صراحة احيان انسى او مدري ايش اقول عن نفسي


مرت اخوي رايحة موعد اسنان وقولتلها بروح معاك اوصلك واروح ع مكتبة جرير

اوك بابا صاحي بس مدري نسيت

اعطيت اختي خبر وطبعا آثرت النوم على انها تجي معايا ..

مو مشكلة خرجت وانا في الطريق وصلني اتصال من اخوي

قالي بمرك ذحين نروح جرير ..

وطبعا كان ردي اني مشيت مع السواق ..

المهم وصلت لجرير ومافي احد من بنات العيلة شريت كم شغله بعدين شوفت الاولاد

بس مالمحت اخوي دقت بنت خالتي تقولي انهم وصلو ونسيت ماتقولي

للأمانه مافرقت معاي جلست اشتري كم كتاب

وبعدين رحت لأدوات الرسم وبديت اشتري كم غرض اخر رسمه رسمتها لخطيبي للأمانه كنت مجبرة ارسمها ورسمتها بمرسام ومساحة فقط ..
اعترف ماهان علي اقول لاء وهو ماقصر جابلي ساعة الماس وكشخني في العيد فرحت بها رغم انه ماتهمني ذي الشغلات ..

رحت حاسبت .. الا يوصلني اتصال من بابا
يوووه نسيت ما استأذنت

رديت قام قالي سهيله انتي في جرير .؟

رديت عليه ب ايوا

قالي بس انا من شوي كنت معاك بعدين نزلت اشوف العمال وماانتبهتلك لمن مريتي

قولتله رحت ع الساعة 9 الصباح من الباب اللي ع جنب

رد علي مرت اخوك معاك
قولتله لا لوحدي رحت وصلتها بعدين رحت المكتبة

قال اها اتصلي عليها ماتنساك

رديت عليه بمو مشكله سعود موجود

قال كويس طمنتيني ..

يالله مررره انسى سالفة الاستئذان كيف خرجت كذا مدري وكويس بابا مادقق
عاد خلقة يقول عني متمردة *ـ*

ورجعت البيت بدون مااعطي اخوي خبر نسيت .. خلاص مارح اشغله مبيت عند اخواته من الرضاعة

هو والشباب اللي قده ..

ان شاء الله ماينفجع فين اختفيت ..

ما اتخيلت اني اكون كذا ..

امارس طقوس الامومة بكل مهارة لكن في داخلي مستثقله الشغلة احبه لكن تعب مررره

محمد
العمر : 10 شهور
القرابة : ولد اخوي

خدوده المنفخة مع جسمه المليان ماشاء الله
يده اللي يرفعها وهو يكرر عمه عمه عمه وبس اشيله يحاول يبوس خدي لكنه يمليني سعابيل يبعد نفسه وهو يطالعني ويضحك ..

مايعرف من الكلمات الا ابا اما عمه ايش وليش وآب = اللعب

لكنه يكرر اي كلمه تقوليها

كسول جدا وكسله يتناسب مع شكله المتختخ لكنه يملك ذكاء لاقوة الا بالله يسبق عمره

نلعب طول النهار ونرقص ونخرج الحوش يعشق البساس والعصافير والذبابين

يحاول يحبي لمن يجيني يتمسك بركبي ويوقف وينطنط عشان اشيله

وباصباعه المنفخ يأشرلي على الوجهه اللي يبغاها

يموت في شيء اسمه دعاء او ع حد نطقه ادعا

وهي اختي الكبيرة احيان يخليني امسك يده وجري يروح عند غرفتها ويصرخ يبغاها

واول ماتفكله الباب يشهق ويضم ركبها ..

وممكن توصل انه يسحب على اهله عشانها ..

يهرب احيان من امه يحاول ينزل ع بيتنا .. لكنها تلاقيه عند الدرج

وكونهم سافرو وتركوه عندنا فهو مبسوط بالوضع

نوديه عند امه من الرضاعه ترضعه عشان ماينفطم ..

لكنه يتعب في النوم زي الشباب يتقلب كثير ويمد يده ورجوله وعادي يخبطك وقلك يفتح عين وحده انك ازعجتيني

تبوسه مره تشتهي تبوسه اكثر خدوده تجنن ماشاء الله ..

والكل يقول طالعلك ياهيول بحجم الخدود تقولي ماما وانت طفله كنت امتن منه

عسسسل

فتحة باب هي الفاصل بتعكر مزاجي

ارمي التكيات بقهر .. احيان اتمنى ساعات الروقان تطول ..

اجلس اقرأ اغوص في ريحة الكتب ..

جا بابا وكالعاده انتبه لتكيات المرمة وماشافني ..

صحيت الشغالة وقومت بسرعة ارتب حوستي ..

اكره شيء لمن يجيك واحد بطولك وبصحتك ويتدلع وهو يوسخ

رجعت انسدحت واحس انه مزاجي الجميل انتهى ..

رجعت اكمل قراءة وانا ادعي محد ينادي اسمي

مدري مين قال لشغالة انه اسمي سُريا ..

اوووووف يااااه المشكلة اني احب اقرأ قبال الطاقة المطلة ع زهر الفل ومع الصيف

يزيد انتاجه ..


منظر روقاني

بعض القرارات نتخذها بقوة ويعتقد الطرف الآخر اننا نشبه الصخر او اقسى

لكن خلف كل قرار عقل وثقة واستشارة وايمان ..


الله يعين

وقع الاختيار علي في الاكاديمية اني اشرح

الاربعاء

11 صباحا وصلتني المادة العلمية المطلوب مني اشرحها

حاولت احضر ع الساعة 12 جاني ولد اخوي نزلته امه لنا

ونشب كل ماجيت اذاكر ناداني عمممه .. اطالع فيه بقهر واقوله حمودي يادبه

مو كفاية عديتني وتعبت عمه وذحين ناشبلي بذاكر ومنت راضي تروح لعمو

يبتسم ابتسامه يكرمش فيها كل ملامحه وكأنه يجامل اضممه بقوه واقوله عمه ليش

نحفان ورغم عدم تجاوبه الا اني احب اتحكى معاه وكأنه كبير ويفهمني

اسأل ايش تبغى يرد علي وهو يحرك يده ب ايث ايث

اضحك وانا اجلسه معاي وابدأ اشرحله الموضوع واتكلم بالانجليزي يقوم يضحك
ويوقف ويحاول يبوسني غريب ذا الولد اذا كلمتيه انجليزي يبوسك

مااعرف هو قصده اسكتي ولا مبسوط ..

جا اخوي بيشيله مني قام ضم ذراعي بقوة ويصرخ عمممممه عمممممه

ويحاول يضرب اخوي .. قام سحبه غصب عنه ويقوله عمه مشغوله قام النونو ينسدح ع بطنه ويمدمد اياديه

قولت لأخوي كبسه انصدم اخوي وضحك وقال قلللك قام يكبسه ويقولي هيول كأنه مسخن .؟

قام حمودي يناديني عمممه جيته وشلته وريح راسه ع كتفي ويقولي

عممممه ويحاول يصفق شغلتله انشوده بس من المرض بس شاد ع لبسي

ويصفق شوي ويرجع يحط راسه

اتصلت ع ماما واعطيتها حمودي ع الساعة 2 لأني لازم احرك واروح ع نقطة التجمع كانت حرارته دوبها رجعت لطبيعي استعديت وكذا وماقدرت اكمل قهوتي

ورحت مكة كان المفروض البنات يشرحو في الدور اللي فوق والاولاد في اللي تحت بس اعتذار واحد من الدكاترة سبب مشكله

قولتلهم مالي دخل مابشرح قدام الاولاد من غير مو محضرة ومتوترة

سخونه وكحة وزكمه وتعب وكمان برد وفوقها الدور اللي تحت كلهم اعلاميين وتصوير

ماعندي استعداد اشرح ل 120 شخص من غير الاعلامين ..

نزلنا رغم انوفنا .. كان البرد شال عظامي جابولي البنات قهوة بسبب كحتي وايادي اللي زرقت

لمن جا وقتي نسيت العالم ..

سلمت وعرفت باسمي .. اطباء من انحاء السعودية وكلنا نحمل هدف واحد هو التطوع ..

وكان موضوعي عن الغازات السامة .. وينتمي لموضوع طب الحشود

مدري كيف مااستحيت ولا ارتجفت يدي ولا صوتي ومااهتميت بالكميرات .. خلصت وسمعت صوت

التصفيق .. قالتلي وحدة من البنات راح تكوني فخورة بنفسك لو شوفتي التصوير رسلتلي هو

ورسلته لأهلي وطبعا اي شيء لازم يوصل لخطيبي ..

ابتسمت في الباص وانا اقرأ رسالته : هيول انا جدا فخور بك ..

ابتسمت وانا احط جوالي ع جنب واطلب البنات اللي معاي كيس ..

ماكان في بطني شيء كثير .. كانت ليلتي عبارة عن استفراغ مستمر حتى عصارة المعدة

رفضت تخرج وزني وصل للاربعين خلال ذي الاجازة بعد ماسمنت في الجامعة بس الحمدلله .. اختي راحت تصحي ماما وبابا

لبست العباية ورحت للمستشفى بعد الفحوصات اعطوني اربع ابر ومغذي ومن ضمنها منوم ..

ومن بعدها مدري كيف مشيت في الشارع كيف وصلت بيتنا وكيف نومت 27 ساعة وصحيت ساعة

ورجعت نومت ثاني وكل مااصحى ارجع انام من جديد .. يسألوني اهلي خلال فترة 27 ساعة تبغي اكل وانا حاسه بهبوط وابغى اقول ايوا واجاوبهم لاء وانام

لمن صحيت واحس نفسي احسن بكثييير .. لكن الويكند ضاع ^ـ^

ووراي واجبات