احاول ما افكر كثير لأن مجرد التخيل مرهق للقلب

خمسة شهور او اقل ويشاركنا انفاس الصباح طفل بإذن الله

يالله ياحجم الم القلب والشوق للجنين اللي يكبر امام عيني

حبيب عمته ياروحي انا

في زمن اتخيلت انه اختي راح تجيب لنا اول مولود

لكن قررت الانفصال عن زوجها في فترة الملكة

فاصبح اول زواج متكامل للي يكبرني بسبعة ويصغرها بسنة

هذا المولد اللي مكانة امه توازن مكانة كل بنات العيلة وتطغى عليهم

يالله قد كيف احبها واحب اخوي وطفلهم المنتظر الله يتمم على خير

كنت اتمنى انه يكون ولد وربي حقق منايا ❤️


هذا الفترة متعصبة ضد النساء

وسبحان الله يالنصيب كيف يقلب الله الأمور ويغير من حال لحال


واليوم بيتنا ينبض بالفرحة والله يتمم للعرسان


بنت خالي اللي عاشت طفولتها معانا بعد انفصال ابويها

رجعت اليوم بعد سنين من البعاد عشان تختار بيتنا مكان يضم فرحتها مع ولد خالتي

جو يشبه العيد وكأن الحياة انحصرت في قلب هذا الضخم اللي ضمنا من سنوات قليلة

حركة العاملات مثل الفراشات وريحة العودة تخترق نبضات القلب

وبابا اللي صاحي من الفجر يتطمن على الوضع ماتوقعت انه يعز بنت خالي لهذي الدرجة وكأنها وحدة مننا

جهز لها كل شيء فوق ما تتخيل وانا متأكدة انها بتنبهر

غير البيت كامل الاثاث والجدران والبلاط والستاير والمفارش

كل شيء يدعو للابتسام ..

الله يسعدها ويسخرلها حياتها القادمة ويعطيها اكثر مماتتمنى ويرضيها ويرضا عنها ..

اخر وحدة يناسبها تكون مخطوبة هي انا

ماما شوي وتبكي لمن رديت لها بطيب نشفت ريقها

طبعا السالفة

انه خطبوني اثنين قبل سنة من خالتي

ورفضت طبعا خالتي خافت اروح على ولدها وقالت لماما اذا انخطبت بنتك ارفضي

وطبعا ماما تعرف بنتها لو صار هذا الشيء بدون علمي

راح اطربق الدنيا

قالت لي ماما وقولت لها دام ماصار شيء رسمي انسي ولا حفكر في الموضوع وبا اعتبر نفسي ما سمعت


طبعا من اسبوعين تقريبا خطبني ولد صاحب بابا

وماما رفضته عشان ولد خالتي

ويعني ما سكت ياخي هذي حياتي

اعطيني فرصة اقول لاء الادهى والأمر انها كانت بتكتم ع الموضوع بس اختي الكبيرة مقهورة ليش يتحكمو بحياتي

ويقولو لناس البنت مخطوبة

بس يعني ولد خالتي كان جنتل مان وكلامه خلا ورود تخرج من عيني

لسا بدري على القلوب

وماما ما اعطتني الا يومين افكر مو عشانه ولد خالتي

بس لأنه رجال ويشترى فهي مصرة عليه

اللي يقهر انهم مكتمين ع الموضوع

اطالع في مرة اخوي واقول مسكينة ما تدري اني مخطوبة لأخوها

وتقولي افكر لأخوي في عروسة وانا اقترح لها وافكر قلك في شخصيته ايش يناسبها وماما بس تخاصمني

عادي اسلك مايعرفو التسليك .؟!

طبعا ما افكر في الزواج حاليًا ممكن سنتين ثلاث سنين والولد موافق

الله يعينه علي احس اني شرسة مقارنة برقة تعامله مع الموضوع

بس والله احاول اعطيه قد ما اقدر > تكتب في التاريخ اني اتخلى عن تمردي

ممكن لأنه اعطاني احساس القوة والقرار وممكن لأنه قال انه يبغاني انا فاستشفيت انه هو اللي اختارني عكس المعتقد السابق

بس كشخة تكوني مخطوبة

رغم اني احسني صغيرة

حتى اخواني اتوقع يأيدوني في قرار التأجيل ماما مقتنعة فيه عشان دراستي لسا ابغى استقر نفسيا دراسيا

المهم انه الموضوع ينقاله سر بين ستة اشخاص

بس انا مايهمني يكون سر ولا الوقت اللي راح اتكلم فيه مارح اتردد

ما انكر انه فرحتي بالهدايا البسيطة اللي يقدمها لي ولد خالتي ولو انها بالمعنى كبيرة

قلبه الطيب يذهلني يوم بعد يوم

في نص نومي اتوقع اني كملت 12 ساعة نوم وهذي عادة هيولية بعد الاختبار ما اصحى لو محد صحاني

حسيت بأحد ينادي اسمي تمتمت اني حسيت

لكن لمن لمست اليد كتفي عرفت انه الأمر ضروري قومت وبعدت شعري عن مجال الرؤيا حاولت افهم السالفة

لقيت مرت اخوي تناولني ايس كريم ومشيت

طالعت في الكتلة الباردة وفجئة ابتسمت بهدوء هو اكيد انه هو

شلت الايس كريم المأكول منه وحطيته في الفريزر عبال لا اغسل وجهي

رجعت مسكته ومشاعر غريبة تحتويني ابتسامة - عطف - واستغراب

اكلت من نفس الملعقة وانا كل شوي اتبسم ماهو الموقف الأول الله يسعده

اتأمل الخاتم اللي يزين يدي يالله قاعد يحتل عالمي بعفويته وبهداياه الغير متوقعة

بهدوءه - وصمته -

ما انكر انه يوم الشوفة ما قصر كان يتكلم واذني تطقطق باحراج وماني قادرة اجاريه بغيت اسلم على الارض من فرط انحناءي ..

ولمن حسيت انه طولنا ولا احد قاله يمشي اضطريت اشيل عفشي واهرب الى الآن احس بإحراج

ليش اني فجئة جريت وسط استغراب ولد خالتي وعلى النداءات المتكررة من ماما وخالتي

الا اني رفضت الرجوع ..

ومن يومها صارت انتقالة كبيرة في قصتنا ..

كان لقاءنا البارحة مع دكتور محمد العوضي في مكة ماحسيت بالوقت ..

لقاء جميل وخفيف ع القلب ..

انتهى اللقاء ع الساعة 2 فجرا .. ولسا وراي طريق لجدة

اخدت مكاني في الباص .. واتأمل الظلام خلاص هذا اخر يوم ونأجز يالله ودي ارتاح

دقيت ع بابا يخلي السواق يتسحر ولقيت رسالة من بنت خالتي هيول متى ترجعي .؟؟

استغربت قولت شكلها جات لمرت اخوي .. كتبتلها اتوقع ع اربعة الا ربع

ريحت راسي وانا افكر في حياتي .. في دراستي .. في ارتباطي ..

اتذكرت لمن اول يوم دخلنا الطب قالتلنا بنت في الامتياز مارح تجو سادس الا وكل بنات الدفعة مرتبطات احاول اتذكر مين اللي قال انه طالبة الطب ماتتزوج الا والله تدخلي الطب وتتخطبي كثير

انا ذحين طالعة رابع واغلب الدفعة يا اما مملكات او مخطوبات او متزوجات وكم حبة رافضين لمن يخلصو دراسة


وصلت جدة ع ثلاث الا ربع لقيت السواق ينتظرني عند نقطة التجمع وعلى الساعة 3 وثلث

وصلت البيت .. فيني هدوء يشبه هذا الكرف اللي اكرفه ..

لقيت اختي تقولي انه ولد خالتي كان عندنا وجابلك هدية في الفريزر

بعد ماغيرت وغسلت وجهي فكيت الفريزر لقيت ورد مربوط في كيس متوسط

طلعته وانا اسأل نفسي ايش المفاجئة ذي المرة .!!

فكيت الكيس لقيت علبة ايس كريم وكرت صغير ..

ماقدرت امنع ابتسامتي من الكلام المكتوب ..

الكلمة اللي هزتني اكثر من كلمة حبيبتي .. هي انا فخور فيكي

يالله بعد ذا التعب تلاقي ذي الكلمة كأنها بلسم ..

شاركت اهلي الايس كريم بس ماكملو اكل يقولو هو جابه لك مو لنا ..

وعلى كبر حجمه وصغر معدتي الا اني خلصته كامل ..