كل ثانية تمر علي في كلية الطب احس اني امارس العبادة

الطب فوق ما يتخيله اي احد

كنت اسمع انها مهنة انسانيه وكنت مؤمنة بهذا الشيء

بس دحين احسها شيء لا يوصف

عظيمة لدرجة اللي تخليك تحرصي انك تفهمي

لأول مرة من يوم ما بديت دراستي في اولى ابتدائي

ما تهمني درجات

لأول مرة اختبر اختبار صعب واهتم باستيعاب المضمون

لأول مرة ما افكر اراجع

ولأول مرة اخرج من اختبار ولا افكر اشوف حليت صح ولا

الطب اكبر من الدرجات

الطب حياة

الله قال " ومن أحياها فكأنما أحيا الناس جميعا "

تحسي بعظمة الخالق وهم يربطولك العلم بالقرآن ..

يخلوك تحسي بمراقبة الله

يقولولك انه علاقتك بربك راح تزيد

مع الطب وانك بتتعلمي طول حياتك

وراح تحسي بزهد


.
.
.

هو احساس وذكريات ربطتنا

الحب

الاخلاص

الهدوء

والطيبة

اجتمعت في جسد واحد

لبست ملابس واقية وجونتيات وكمامة

واخذت ماما شنطتي

ما اسمع الا صوت القرآن

وزوج خالتي اللي يقرأ عليه

كتمت غصة دموع

العناية المركزة شعورها صعب

غصب عني نزلت دموعي ..

ما قدرت اقرب اكثر

عيونو مفتوحة بس ما يحس ..

فمو مفتوح بسبب الاجهزة

وانفو جواته لي

جهاز الضغط في يسارة وجهاز القلب في اصباعة

ويده المنفخة كلها كدمات

خرجت بسرعة من الغرفة


يالله انك ترحمه وتختار اللي فيه الخير

يارب تريحه ..


معد اتحمل اشوفه يتألم


.
.
.

ما اتوقعته اخر لقاء

كنت مستحية من زيارتي بس دفتني ماما

اتأملته من خلف القزاز

ابيض .. نقي

وجهه يجيب السعادة

احبه جدا

حسيت بسعادة وانا اشوفه متحسن

ما قدرت ابكي لمن سمعت خبر موته

هذا مصيره

وهذا وقته لو البكى بيرجعه راح ابكي ..

بس احسه ارتاح

الكفن الابيض وريحة الكافور

سلمت على راسه بارد ببرودة قلبي

وابيض

مبتسم

سلمت ع رجله ضميته

والله احبه وفاقدته وحزنانه

بس قدر الله واللهم لا اعتراض ..


والله يصبر قلوبنا على فقيدنا ..

ويرزقنا الثواب

النياحة ما تجوز

هو ما يحتاج دموعنا هو يحتاج دعواتنا

الله يثبته عند السؤال

يوم جمعة

وفي العشرة

وعساها خاتمة حسنة

لا كان الوجع غصة تسكن البلعوم ونعجز نخرجها بشكل دموع

مين اللي قالنا انه البكى ضعف .؟

وان الدموع استسلام


مين اللي قال انه الوحدة لو مات زوجها تسكت

تسلم على جثة باردة وهي كلها برود

مين قال انه البنت ما تبكي تحط راسها ع صدر ابوها وتغطي دموعها بالكفن


مين صنع مننا هذا الجبروت هذا الصمت .؟

احنا الاحفاد محنا الا نسخ من كبار صنعو شخصياتنا بما يوافق طبيعتهم

مو الشخصية شيء مكتسب ..


مدري اعزي المعزين ولا المعزين يعزونا


استغل لحظة اختلاء عشان ابكي عشان اضم صورته
عشان اقوله اني ضعيفة واني كذابة

وانه فراقه كسر قلبي

باب هو الفاصل بين تغير الاقنعه

يا وجع فراقه ويا صوته اللي ما يغادرني


يارب لك الحمد هو عبدك

استودعه الله في ودائعه اللتي لا تضيع


يارب ارحمه واجعل قبرة روضة من رياض الجنة

جدي شخصية غريبة

أعصر ذاكرتي

أحاول اتذكر مرة خاصم او رفع صوته على جدتي او اي شخص

اعجز

بالعكس جدة لمن تبربر يبتسم لها

معطيها مكانتها وكلمتها

عاشت في بيت ابوها دلوعة ولمن جات عنده ما استغل بعد اهلها بالعكس

جاب لها اللي يخدمها

جدة إلى الآن ماتعرف تنظف اصلا ولا عمرها نظفت

بس تطبخ ونادرا عندها اللي يطبخ لها

جدي نسمه هادئة وابتسامة

لمن مايعجبو شيء بس يحمر وجهه

هو اللي علمنا الدين كان يتبع اسلوب اللين رغم انه على نفسه شديد

مايخرج الا نادر حياته مسجد وعمل وقراءة

شب على هذي الثلاثة

حتى لمن كبر كان يقرأ إلا بعد مرضه نسي الحروف

لمن انام عنده كنت اسمعه وهو نايم فجئة يكمل قراءة قرآن مع الشيخ

جدي مات ابيض مبتسم

صلو عليه في الحرم

جات قبله ثلاثة جنازات وهو اخر واحد واندفن قبلهم

يقولو الرجال اصلا يدوبك نلحق ع الجنازة

رغم انه كان في جدة وحج الشوارع عندنا زحمة ووصل لمكة يقولو عند التفتيش في ناس رجعوهم بس بالنسبة لجدي كل شيء سهل

كل شيء اصلا في هذاك اليوم غريب

الدكتور يقول انه اتشهد قبل لا يموت واصلا بس شهق شهقة خفيفة

جدي طيب جدا ما يغتاب ودايم ابتسامته على وجهه

تحسي بروحانيه لمن تشوفيه
سواقه كان يحبه

محد قد قابله الا وحبه

عاش يتيم

ومات بعد ما تعب

وماقد اشتكى من شيء كلمته دايما الحمدلله انا بخير


وفي مرضه ما يكرر إلا

انا صليت

اذن

فين امكم وقصده بها جدة

جدي في عز مرضه وهو وسط الاجهزة لو جدة تبعد عن عينه يتعب

كان ما يرضى ياكل ولا يشرب بس لمن جدة تجيب له الأكل يرضى

مايحب يقولها لاء ولو كان الشيء بيسبب له ألم

لو قلناله جدي تجي بيتنا

يقول زي ماتقول امكم

اللي يوجع قلبي انه جدة ماتبكي اقرأ الحزن في عينها

بس على كثر دلعها إلا انه قوتها تمنعها من البكاء


وحشني

وحشني

وحشني


الله يرحمك ياجدي