احس بهدوء يسكني

هدوء صدمة

جدي مدرسة

اشياء كثيرة كنت معمية عنها

علمني بدون كلام

لي يومين مبيتة عند جدي هم يظنو اني متفضلة عليهم

وانا اشوف انهم هم اللي متفضلين علي

احس بخجل من نفسي

كل اللي اسويه فطور وسحور

واكبس جدي

احس بشعور غريب

خجلانة من نفسي

وفي نفس الوقت مبسوطة معاهم

واحس بقلبي يعورني

احس بجدي يتألم بس مايشتكي

ما اعرف ايش اسوي

ورجعت لبيتنا

وحشني كل شيء

ماانكر اني عشت ايام جميلة في بيت جدي

بس بيتنا غير

مررررة مكسرة يعني متعودة ع الدلع

اليوم شغالة جدة تقولي لاتروحي مين يساعدني

حزنتني الله يعينهم وربي يحزنو

تاركه اهلها وفي غربة وتعب وكرف

وليتها شغلة حلوة


الله يعينهم ويرزق كل محتاج يارب

احس عظامي مفتفتة انتظر الصلاة وانام


رمضان سريع

للقهوة طعم مختلف لمن تشربيها ع الريق

البن والهيل وبهارات القهوة


تمرة واحدة وفنجان قهوة

ادمان علمتني عليه جدة الطعم مختلف تماما بعد الصيام تعطيك نشاط وفي نفس الوقت شبع


النظام في كل شيء جميل



مقارنة بجدة اعتبر جدا مقربعة في حياتي ماصادفت احد بمستوى نظامها


الأكل المشي الكلام حتى النوم كل شيء يمشي عندها بنظام معين غير قابل لتخريب

مو قادرة مااعد الايام خلاص يومين ويجو اهل امريكا معرف قلبي فين اودية

ما بفكر كيف بيكون اللقاء ابغاهم يوصلو بالسلامة ولكل حادث حديث

وحشوني وحشوني جدا جدا

كل وحدة فينا تخطط كيف بتكون الايام الجاية معاهم

احس جيتهم دي المرة غير احس قلبي يدق من الشوق


بنتجمع زي زمان وبنستهبل بنضحك ونتصور

احلى شيء انه بيوتنا جنب بعض يالله مشتاقة لهم بشكل لايوصف

ليت اقدر اعبر عن شوقي اكثر

مرت سنة ماشوفتهم

مدري ليه استحي اروح عند كل وحدة فيهم على الخاص واقولها فقدتك

شكل جينات جدة سيطرت علي

وحشووووووووووووني جدا ولو ماتكلمت متأكدة انهم يعرفو

في عيلتنا المتن يعتبروه بمستوى العنوسة عند بعض العوايل


مايهمهم العيلة ولا يطفشو البنت لا اتأخرت عن الزواج ممكن لمعرفتهم انها هي اللي رافضة


او كبرياء يسكن قلوبهم انه بناتنا مايستحقهم اي واحد

عشان كدا مو بسهولة نوافق تقول ماما انه جدة كانت ترفض العرسان

دوبي اعرف ليش ازواج وزوجات خيلاني كلهم جنوبين جدة ماترضى الا بجنوبي


بس الشيء اللي ممكن الوحدة تعاني منه في عيلتنا ادا كانت سمينة

رغم انه مافي بنات سمينات الا كم وحدة وطبعا بيعملو رجيم


المتن في عيلتنا اشد واقوى واقسى من العنوسة


يخافو من المتن وكأنه شبح بيدمر حياتهم


فطرت تمرة وقهوة وصليت وبعد الصلاة اكلت حبة سمبوسة


صلينا التراويح في المسجد وع الساعة 12 اشتهيت سمبوسة رغم اني المقالي ما اكلها الا نادر اليوم

اول يوم اكل في بيت اهلي سمبوسة


حطيت لي واكلت

جات الساعة اثنين اشتهيت شاي وكانت مرت اخوي عندنا طبعا هي بيتها لصيقنا بيننا بس بابين


سويت لنا وهي جابت من بيتها فطيرة اصلا انا مافكرت اكل بس ماما الله يهديها اكلتني بقشوري


وهي تقولي ياويلك تاكلي ننس لاتعطيها شوفيها كيف دبة

انقهرت ع الكلمة حرام والله مو دبة وزني 44،2 فين بالله دبة ادري اني ابغى انحف بس انا في قرارة نفسي عارفة اني مو دبة

صرت ابربر اني مو دبة وحرام دكتورة التغذية قالت لي اني وصلت لنحافة

وننس ردت ع ماما بحرام والله ماهي دبة

سكتت ماما وردت بـ ولو لازم تنتبه لنفسها


برطمت اخدت قطعة لمجرد العناد وبس قربتها من فمي حسيت بغصة ابتسمت لمرت اخوي وقولت لها

بكذب احس السمبوسة شبعتني معد فيه وسع في بطني

باتسحر بها غطيتها بالمنديل


ياربي جدة ورثت ماما دي الجينات وماما اسوأ من جدة

اختي وزنها 51 طبعا نعتبرها دبة وقاعدة تعمل رجيم حتى الفواكه ممنوعة منها والجزر والبطاطس وكل الكربوهيدرات


الاخصائية استغربت منها انه وزنها مثالي بس في عيلتنا لاء


المتين مايقدر يعيش بينا لأنه اكيد بتجيه حالة نفسية ولا لازم يتبع حمية عشان يسكتو عنه


اكثر شيء يتعب في العيلة


انه حتى الاطفال لازم مايكونو سمان عندنا طفلة في العيلة مسكينة


كل ماشافوها يعطو امها نظرة ويقولولها حرام بنتك ليش دبة مافكرتي توديها عند اخصائية تغذية

ولا يعطوها رجيمات تتبعها

وخالاتها يخلوها تنزل الدرج وتطلعو 10 مرات

لأنها مقارنة بعيلتنا تعتبر سمينة وهي ثاني ابتدائي


تعرفو المشكلة فين اني مقتنعة تماما انها لازم تنحف ^ـ^


رغم انه عقلي له كلام ثاني