قولت لها مارح يدخل قلبي ولا راح افكر في الموضوع


ماعجبتني الفكرة من اساسها


حسيت بعصبية ونرفزة


انشغل بالي فكرت كثير


ومالقيت نفسي إلا متعلقة ..


مالي إلا حل واحد ويارب يكون صح احتاجها احتاج تقولي الحقيقة

النكدي مصيرو يعيش وحيد وكل الناس يبعدو عنه

حتى لو بطل نكد في نهاية حياته



احنا في زمن نبحث عن السعادة


وبالنسبالي انا بعيش في الحياة مرة وحدة لازم اللي حولي يكونو ناس ايجابين ليش ازعج دماغي بناس ينظرو

للحياة بسلبية وكل ماانبسطت ينحاسوني ع الضحكة


هذول الناس بالذات ما اجاملهم ولو جرحتهم ماعندي ادنى مشكلة


لأنهم يحتاجو احد يخبطهم ع دماغهم ممكن سبحان الله تتعدل عقلياتهم


القهر لمن تلاقيها ماعندها اي مشكلة بيت واهل ومال وكل شيء

وحياتها لو تشيل النظرة السوداوية بتكون من اجمل مايكون

طبعا اكثر شيء يستفزني


لمن تجيني وحدة وتقولي انتي ماتحبيني اصلا مو بس انتي الكل مايحبني كل المجموعة تكرهني انا ماسويت لكم حاجة حرام عليكم والله ماقد ضريتكم بشيء

وتجيك هيا اللي تتمشكل مع البنات ويكبرو عقولهم وتسوي اشياء تستفز ولو ردت عليها وحدة تقلبها فيلم هندي

هذي بالذات ارد عليها ايوا ما احبك

دام جاك هذا الشعور فااحتفظي به

واحيان ارد على مثل هذي العبارات المتكررة

اصلا مابيني وبينك شيء عشان احبك او اكرهك

هذا السؤال المفروض ماينسأل


اجرح

ايوا اجرح لأني اعرف هذي الشخصيات عندها نقص تبغى تغذيه بأنك تنفي عباراتك وتطبطبي عليها


وانا ماني مصحة نفسية ولا احب اطبطب ومارح اطعنك في يوم لأني ماانافقك


المهم اني معصبة لأني قابلت ناس كثير نكدين وبديت اتضايق ولو انكرت انهم مايأثرو علي إلا اتأثر واحس بقهر عليهم يضيع عمرهم على وهم ماله اساس من الصحة


بس ماانكر بأن في ناس يحقلهم يكونو حزينين هذول بذات تلاقي ابتسامتهم ماتفارقهم عندهم قناعة برغم من ان ابتسامتهم توجع قلبي هذول بذات احب اقتحم حياتهم واحاول


بكل مااوتيت من قوة اسعدهم


المهم بعض الكلام يزعجني لدرجة اني احط السماعات في اذني حتى لو ماشغلت شيء


وفي البيت يعرفو انه لو سويت كدا معناته سمعت كلام ماعجبني وانتهى النقاش فيه


الواحد في دا الزمن عشان يحافظ على مزاجو لازم يعتزل الناس


اذكر جات لبنات العيلة فترة مو عاجبهم شيء

لا دراستهم ولا بيوتهم ولا ازواجهم ولا شغالاتهم ولا عيشتهم ولا البلدة ولا اي شيء

وان كل شيء سخيف

كون بنات العيلة يحتلو مساحة كبيرة في قلبي حبيت احافظ على دي المساحة بأني اللغيت كل القروبات

اللي هم فيها لأن راح اوصل لدرجة وبنفجر وتوصل اني اجرح


واللغيت اي تواصل


عشانهم وعشان كنت امر بفترة لازم احافظ ع مزاجي

بنات الخالة والخيلان شيء مختلف


البارحة

صحيت من النوم قالت لي ماما انه بنات العيلة عند مرت اخوي


طلعت لي ايس كريم

واقرأ كتاب حسيت اني صحصحت وروقت كوني مانومت إلا كم ساعة




رحت عند البنات وسلمت عليهم واختي خاصمتني عشاني مانومت بس قولت لها شبعت

قعدنا نتكلم وع 11

قررت وئام تعمل مكرونة وعاد احنا دخلنا معاها فزعة








معروفة وئام انو تحب اواني بيتنا وعندنا براد لونو وردي معروف انو حق وئام في اي عزيمة لازم تسوي فيه


بس لمن فكت الدولاب وقعت في الحب من أول نظرة لبراد الشاي

بلونو الابيض والورد الزهري


وجلسنا ع الطاولة نحتسي كوبا من الشاي





على اخر الليل عملنا نسكافيه

وعند مرت اخوي زي الطاولة دائرية وقصيرة التفينا حولها واحنا جالسين في الارض

وجلسنا نتكلم عن اشياء شاغلة بالنا احلام تتكرر دايما امنيات نفسنا نحققها

وطموحنا في المستقبل





انا ممتنة لوئام كلامها دخل السعادة في قلبي وممتنة للجمعة اللي جات في وقتها

كان الجو هادئ طالعت في مرت اخوي بنظرة

قالت ايش عندك

رديت عليها ب ايش رايك نلعب بالبلالين

جاوبتني بـ قدام

كنا لابسات نفس البجايم اذكر في المدرسة كانو يقولو اننا مرررة نشبه بعض


المهم جبنا طشت وعبينا البلالين بالموية





في يدي بلونتين بس بنت خالتي جاتني جري لدرجة اني صرخت صرخة خفيفة وصرت اجري

اخر شي غطيت وجهي لمن انفجرت البلونه علي

وكا انتقام اخدت حقي من ننس

خلصنا لعب وبقيت حبة صرنا ندور الحوش وانا اصرخ على بنت خالتي لاتجري في موية واللف الاقيها وراي ارجع اشد في الجرية

خايفة من البلونة اخر شيء وقفت وفجرتها مرت اخوي علي


طالعت فيها وقولت قهر خلصت ايش رايك نغسل الحوش

وجبت لنا مساحات طبعا غسلنا ربع الحوش وهلكنا وجوعنا رحت عملت لنا اكل

وجلسنا في الديوانية

ع 9:15 صحيت من النوم معصبة

رميت اللحاف وانا اطالع في الجهة الثانية لقيت السرير فاضي زدت عصبية قفلت المكيف بكل وقاحة وخرجت


سحبت الرموت وشغلته وغطيت وجهي واحس بقهر مارح تتوب ابدا مهما عاقبتها

رفزت اللحاف وبرضو مابعد وطلعت كل عصبيتي على اللحاف وقفت امشط شعري بعد ماقفلت المكيف

حسيت بدوخة وجلست ع الارض سمعت صوت خطواتها طالعت في المراية اللي قدامي وانا اكمل تمشيط شعري

انفتح الباب ووصلني صوتها

: صباح الخير خلصتي النوم

رديت بقهر

: وكنت بأخلصه اكثر لو ماقفلتي المكيف

طالعت فيني ببرود وردت

: بردت قولت اطفي المكيف واروح افطر الاقي الغرفة دفيت

رفعت حواجبي بقهر وانا احس برغبة كبيرة افجر فيها

: ياسلام

طالعت جوالها ببرود وقالت

: اصلا مالي وقت بعدين شهقت اوبس ثلث ساعة مدري كيف مشي الوقت

وقفت ورفعت اصباعي

وزميت شفايفي بقهر

: اصلا شبعت نوم

ابتسمت لي وانا رفعت حواجبي وحكيت خدي بفشلة

قالت لي كم ساعة لك نايمة

رديت وانا اشيل جوالي

: مدري بس اللي اعرفو كثير من الظهر نايمة

ضحكت وابتسمت


رحت الصالة وشبكت جوالي بالشاحن وانا اطنش رسايل الواتس اكره دا البرنامج بشكل

طالعت في اخوي الوسطاني


صباح النور

رد بدون مايطالع فيني

: ياصبااااح الخيرات وفجئة رفع حواجبو وطالع فيني : سهيله

حركت شعري بدلع وانا ارمش بسرعة

طالع في ساعتو وطالع فيني

: ختمتي النوم

جلست ع الكنبة اللي مقابلته وانا احسب باصابيعي

وبفلسفة

عادي مانومت كثير بس 19 ساعة

ضحك ورجع يطقطق ع جوالو

بعد فترة حسيت بدوخة وسمعت صوتو وهو يقول : كلي تمر

هزيت راسي واخدت لي حبة احس جسمي يرجف من جوة وبضعف

جلست اقرأ واخوي بين فترة وفترة يتناقش معاي

احس بكل شيء زي الحلم اصلا حلمت لمن قولت بس

جد ختمت النوم ^ــ^