اخوي الصغير مجنون يمزح معايا بطريقة دفشة دايم يتهزء

ودايم يسحب ع كلامهم


اذكر لمن خرجت من العمليات في عمليتي اللي قبل سنة


قعد يآذيني وانا اضحك وافز من الألم

وبابا يهزءو


امس شوفت معاه حبل النط ع طول انحشرت في الزاوية وانا اشوف نظرتو


شوفتو يرفع الحبل ويبغى يخنق رقبتي

صرخت وانا اقول مسوية عملية

قام طالع فيني باستخفاف وقالي لها سنة

لو انها ايش مسكت رقبتي واقولو برضو ماتعرف ممكن تنفك

معرف كيف لف الحبل ع خصري


وسحبني صرت اجري وراه عشان لا اتألم لفلف بي البيت لمن حسيت نفسي انقطع من التعب

وهو يضحك وانا مبرطمة


قعدت اهددو اني بقول لبابا وماما وكلام فاضي اعرف اني مابسوية



شوفتو فاطس ضحك ضربتو ع كتفو وكملت ضحك معاه



الأخوان برغم دفاشتهم إلا انهم يخافو عليك وبجنون


لا امتلت عينك بالدموع تلاقيهم حولك احس اني وانا امشي ما اخاف من احد عندي بدل الأخ اربعة



اذكر يوم خوفت ع اخوي الصغير وبكيت اذكر كيف ضميت اخوي الكبير رغم اننا كنا في محطة ماخاصمني


بالعكس حاول يهديني وهو ينبهني اننا في محطة


اذكر جنون اخوي الوسطاني لمن زعلو اختي وكيف اخد حقها بنفسو وما انتظر احد


اذكر كيف اخوي يمسكني وانا ماشية


كيف نمزح مع بعض وكم مرة قد طبخنا وشوينا


اذكر اخوي وانا اذاكرله رغم انه اكبر مني بس اتحمل عصبيتي عليه


اذكر يوم العملية كيف يدخلو علي تهريب

كيف اتبرع لي بالدم


حتى لمن كانو يكتفوني ويغصبوني ع الاكل


اذكر لمن ضربت اخوي عشانو عور الصوص حقي وقعدت ابكي وماقدرت اضربو بقوة

وكيف قعد يرقص عشان اضحك


اذكر لمن اغمى علي فجئة وماصحيت إلا ع صوت اخوي وقلبتها مناحة

اذكر اتصالي الدائم على اخوي وانا اقلو يستعجل قربت الحلى


اذكر واذكر وابتسم مر زمن بس الذكريات ماتروح عن بالي


اذكر لمن انقطع صندلي وشالني اخوي ع ظهرو


لمن بكيت وقعد يلعب في وجهو لمن ضحكت


احبهم واحبهم جدا



احمد


عبودي


سعود



هاشم

أحلام ازرعها في صدري اختمها بباتسامة


احس احلامي اغلى ما أملك اخبيها وما احب احد يشاركها معي إلا اللي اثق بأنه بيشجعها



دايم اوعد بابا وعود بالمقابل ابغى منه بس الثقة


ودايم يجاوبني بصوتو الدافي اثق في قدراتك اعرف انك بتسويها


بنتي ماترضى بالقليل


الحنان اللي يغلف صوتو لمعة الثقة في عيونو


تجبرني في اشد حالات ضعفي اقوى

احلامي بعيدة كبيرة في كل مكان لي حلم



اذكر من طفولتي كنت اشتهي الشيء ويقولولي اخواني مجنونة لو تموتي ابوية مابيعطيك وجه

وانا اقولهم اجل ماعرفتو بابا


طول حياتي كان بابا هو الوسيلة اللي تحقق احلامي


هو يخليني اسوي اللي ابغى


دايم يخليني اوقف ع كتفو حتى لو مال مايهمو اهم شيء اوصل للي ابغاه



بابا وطن احب ارتمي عليه كل ماشوفتو


يدو الكبيرة احب اقيس فرق حجمها بيدي ودايم اكرر عبارتي بابا انت كبير مررة يدك مرة كبيرة

احب امسك اصباعو الصغير احب اللف اصابيعي حولو وانا اقطع الشارع


وقد قولتها لو اصباع صغير من بابا قادر يحتوي يدي اكيد انو كله يقدر يحتويني


لمن اتكلم في كل شيء وآي شيء ويضحك لمن يقولي

عليك كلام مدري من فين تجيبيه


اقوم افطس ضحك وانا انتبه للكلام اللي قولته اغطي وجهي وانا اقولو كم مرة اقولك يابابا سلكلي ولا تدقق



خرجاتنا وكيف اتدلع عليه وهو يقولي لو تطلبي اي شيء تعرفي اني مقدر اقولك لاء



بابا يستاهل اني اكون زي مايبغى




وقد كيف تلعب بمشاعري كلماتو قبل 13 سنة ونص:


إلى بنتي العزيزة سهيله يسعدني ان اكتب لك هذه الكلمات البسيطة وانت في سن الطفولة

السابعة من عمرك لتكون تعبيرا صادقا عن مدى فرحتي بدخولك المدرسة


وأتمنى ان تهتمي بدراستك وواجباتك لأكتب لك مرة اخرى وانت طيبة وعندها

سأكون في غاية السعادة

أتمنى من الله ان يحفظك ويرعاك

والدك : محمد


27-1-1422




أحلام كثيرة كتبها بابا لي واشياء كثيرة اتمنى اني اسويها


17ـ9

بإذن الله احد احلام بابا فيني وحلمي الكبير يتحقق ^^


7
7
7



دي الصورة هي كلام بابا

غمضو عينكم عن جودة الورق والصفحات المقطعة

كل شيء يبدأ بنقطة فيه خطوط تتشكل تتحور عشان نخرج بعدها رسمة


وانا ارسم يجيني صداع دا الصداع يحسسني بالسعادة


دايم يقولولي غيري نمط رسوماتك حاولي تبدعي اكثر بس فيه شيء يمنعني



اختياري لرسومات تكون عشوائية او احيان وانا اتفرج افلام كرتون اقرر ارسم دي الشخصية


لمن ارسم ما افضفض بالعكس اشتت


رسمتين رسمتها في دا الشهر رفيكي اللي شوفتوه مع صور ابها

والحمدلله تم تلوينو ولولو كاتي


اكثر القطط جاذبيه











دي الايام احس ببرد في عظامي رغم دفا الجو او بالأحرى حرارة الجو بس ايش نسوي

طبعي لا انشغلت في شيء ودا الشيء له دخل بقلبي احس ببرد ^^


المهم اني من رواية لكتاب ومن كتاب لرواية وشغالة ع دا المنوال وفي الاستاتيستيك بيقولولو مود > محد مشتاق للإحصاء

طبعا المنوال او المود هو القيمة الاكثر تكرار > إلا تبغى تحشر حسابات وارقام


سيبوكم من الكلام الفاضي

ونرجع لموضوعنا اصلا من الاساس مدري ايش دخل البرد


حالتي في الإجازة دي ^ـ^


لابي ـ كوبي الوردي واحيان كوبي اللي بإسمي ـ ورواية او كتاب








ودي حلويات لكم طبعا مايحتاج اقولكم فين مكانها دحين


صحة


انا احب الحلويات جابها بابا لي واشترى لمرت اخوي وكل اللي كانو في السيارة زيها


عشاني اخدت درجات حلوة لمن طلعت النتايج


الحمدلله






دا مكاني المفضل بالبيت اجلس اتأمل الورادات والعصافير واشرب كوفي واقرأ كتاب


اتأمل السماء



وع اني دايم اجلس قدام الطاقة القزاز الكبيرة واللي تحتل حجم جدار كامل

ع كنبة بس بابا واخواني مايشوفوني شكل الاشياء الواضحة تضيع دايما > سلكو


المهم راسي مصدع لا مو مصدع نعسانة


وانتظر الاذان في مسجد مخرف اذن من نص ساعة بس لايلدغ مؤمن من جحر مرتين


اكيد انو اذان اول


بقولكم شيء لو حسيتو انو كلامي مو مفهو ثقو تماما انو في حرف او كلمة عقلي اكلهم او اضافهم وخرجلكم الكلام


بصورة مبهمة

اول شيء ابشركم صبغت شعري

اعتقد انو ماما ماهي موافقة

بس هي مبيتة عند جدو الحمدلله خرج من العمليات ورجع بيتو بالسلامة

و على قول المثل لمن يغيب القط اللعب يافار

وجلست ساعة قدام اخوي اسأله فيني شيء متغير

كل شوي يطلعلي سالفة

اخر شيء الحمدلله انتبه


صبغت شعري حطيت اقنعة الدنيا قرأت رواية اتفرجت برنامج

شربت قهوة فرنسية

عملت سيراميك لشعري

وقبلها كنت اعد الأيام عبال لاتجي اجازة شبيهي اخوي الوسطاني

بس طالت الساعات

قعدت انا واخوي الصغير نتفرج في اليوتيوب

لدرجة اخر شيء قالي سحب عليك وانا اقولو لا استنى عبودي ماينسى هو واعدني من اسبوع

لمن جات 10 طالعت في سعود بزعل وقولتلو عبودي سحب علي

قالي خلاص انا اخرجك بس بشرط مطعم

ماابغى نلفلف وانت تعرف سيارتي ملفتة

كون سعود يتنازل اني اركب سيارتو معناتو بلغ اقصى مراحل الشفقة علي

طالعت فيه وقولتلو مايحتاج اصلا انا بنام

علمتو ع لابي ووريتو من فين يتفرج

ودخلت ع الانستقرام

واذا بي اتفاجئ اخوي راح يفطر ومو بس كدا إلا في الطايف


مو مشكلة انا اصلا مازعلت لأني اعرف اخوي لو وعد مايخلف

اكيد انو نسي السالفة

مو مشكلة الايام جاية ويعوضني في خرجة ثانية


بس اللي خايفة انو يعرف اني كنت استناه

اعرف قلوب اخواني وبذات عبودي راح يحزن وانا ماابغاه يحزن

وبابا موجود لمن اصحى بقولو يخرجني ان شاء الله

هذي الإجاة مرهقة لمشاعري جدا




ما ابغى افكر في اي شيء