عدت والعود احمد


رجعت من بيت جدة بقرار مابتزوج

رغم انو خالي اللي ساكن في بيت جدة قرر قرار يزوجني


وقعد يقولي فيه شابين ومدري كيف

انا اقلب وجهي اشارة مرور وجري رحت المطبخ ولقيت زوجة اخوي تسوي قهوة لجدة

واغطي وجهي ومو قادرة اتنفس واقولها فشله

وهي تسألني ايش وجيت ابغى اتكلم

وانقلب وجهي استحي

بس ماما ردت علية لا تفتح بنتي تراها ماتفكر في الزواج

صادقة ماما



رجعت البيت مع ماما وخالتي


اول مادخلت رحت الديوانية حق الرجال ولقيت بابا رميت شنطتي واكياسي

وجري ع بابا وصرت اسلم على اكتافو وخدودو وهو يسلم علي ويقولي وحشتيني وحشتيني

مااعرف اقول وانت كمان اني اخصص شخص بعينو استحي او كبرياء او ايش معرف

بس رديت وانتو كمان

غير موقفي مع ماما لمن دخلت بيت جدة وضمتني وتسلم علي

وبكيت

احبها يناس

حسيتها وهي تمسك لي يدي

ودحين وهي تبغاني اجلس معاها


انا مااحس اني هيول وروح هيول ترجع لي

إلا بوجود ماما وبابا

جو جدة عذاب هذي اليومين

بارد بلطافة وهتان ينزل بين الفينة والأخرى

نشوي بطاطس وبطاطا حلوة

ونتدفى بشاي ع الجمر

يمزح اخوي معي واطاردو وانا ابغى اخد حقي منو تمسكو ماما لي بعد مالف بي البيت كلو

بس يفلت وملامحو المحببة لقلبي تشفعلو عندي

سعود روحي وكل دنيتي بطيبتو حنانو صدقو وغموضو وقلبو

فطاير حارة ريحتها اللذيذة تنعش الروح

جلسة عائلية

اطفش اخوي الوسطاني وانا اصورو


عبودي



طبعا صورتو بالبجاما محد قلو مايغيرها ><"
امسك كتاب العلوم وابدأ بتقمص دور الاستاذة

رغم اننا من الظهر لمن الساعة عشرة وثلث بس مامليت بوجود اخواني


وبعد دلع بابا والراحة اللي احس فيها

يبغوني اتزوج .؟!

أجر الأنفاس من أعماقي وأحس بغصة متجمعة في حلقي

ايش اسوي .؟!

مو عارفة اكتم وجعي وحزني وحيرتي لمن اشوف ماما

وما اردد غير كلمة

مغبونة واخبط ع صدري

احس بوجع يكتمني

احس بصداع يفتت خلايا دماغي

ومع كل سجدة اردد


يارب الهمني الصواب

يااارب الهمني الصواب


احس عمري مو 19 سنة

حاسة اني في نهاية الاربعين


مالي غير الله هو يعلم باللي في قلبي

وهو اللي بيرشدني للصواب


الله كريم

حديثهم

ضحكاتهم

مشاكستهم


أحلامنا

طموحاتنا

واسرارنا

تشاركناها سويا

صداقة مختلفة اجتمعت بالله

وأحببنا بعضنا في الله

صديقاتي

عالمٌ مختلف

لم اعتقد بأنهم في يوم من الأيام

سيأخذون جزئًا من قلبي

صحيح أن علاقتي بهم لم تتجاوز الثلاث أعوام

ولكن هم مختلفات تماما




جمعة في بيت الغالية عذاري

استهبلنا واستمتعنا بالسوالف

اخدت دوري المفضل أني اكون مستمعة

أحس كأننا بنحكي حكاية وكل وحدة في قلبها مالله به عليم

طبعا صاحبتي عشانها على وشك زواج فجربت على بطوننا

والأكل مافيه ملح ولأول مرة أجامل

ماعليه لازم نشجعها ولا مابنكون صاحبات

أما اسراء كانت بتبكي لمن دق اخوها وقال انو ابوها فجئة جا من السفر وبيعدي عليها

في النهاية أول وحدة روحت أنا

والحمدلله انو مشيت بسرعة ولا كان فجئة بكيت عليهم

فطوم في الرياض رجعت لعشيرتهم

بعد ما وافق ابوها انو بس بينتظرها تخلص الثانوي وبعدها مايقبل اي سبب

رغد سافرت امريكا تكمل دراستها وحاولت فيني اقدم بس إلى الآن تخطر ببالي وبعدين اشيلها من راسي بدري ع الغربة

افتقد الغايبين

وافتقدت اللي ما مداهم يحضرو

حسيت فجئة اننا كبرنا كثير

اتأملهم وأتمنى أني اقدر افضفض لهم همي بس كالعادة

لو بوحت لأحد بسر أعرف انو دا الشخص راح تصير علاقتي معاه رسمية


شخصيتي عجيبة بس لكل شيء مبرر

أحب أني أكون مختلفة

لي لبسي الخاص

وطريقة نطقي الخاصة

اتبع الموضة باللي يناسبني

ما اكون أمعة

أحيان في ديزاين معين يدل على شخصية

أنا أؤمن بأن الواحد لازم يكون له نمط معين

بس مو بزيادة

أعشق اللون الوردي عشق لايوصف عندي كوب وردي غرفتي وردية مناشفي وردية فرشة شعري وردية وفرشة اسناني

صنادل البيت وحتى شراريبي اغلبها وردية

في الوقت نفسو

ملابسي تشكيلة ألوان بكل الدرجات

أحس كل أنثى لازم تكون فاتنة

لازم تكتشف جمالها من جوة

تبدأ تطور ذاتها لمن يكون عندها تقدير الذات ايجابي

وبعدها تشتغل ع نفسها

كل انثى جميلة

بس فيه اناث يخفو جمالهم


هذي الأيام أحس بأن روحي جميله احس بجمال في قلبي

هذا الجمال مخليني اشعر بالرضا

أحيان وانا أتأمل بنات الجامعة

أحس بعضهم اذكياء في اظهار الجمال

وبعضهم عاديات

أما الفئة اللي تستفزني هي اللي تخلط في الأمور

اكره الأنثى المهملة

مايشفع لها شيء ابدا الوحدة لمن تعتني بنفسها فهو لنفسها مو لأحد


مافي انثى وحشة

في انثى اهملت نفسها

واهملت ذاتها


اتمنى كل الأناث يغيرو بعض من الأفكار الخطأ عندهم