ورجعت متينة جسمي بسرعة يمتن لآزم أعمل رجيم وأنتبه لنظامي الغذائي

قبل الحج متنت نفسي لمن 43 وبعدين رجعت من الحج ونحفت نفسي لمن 41

ودحين رجعت 43 رغم أني صايرة ما آكل مع الضغوطات اللي أمر فيها بس مدري

أمس أختي قعدت تدعي ع وحدة قبل المغرب دقت علي وخربطت كل الدنيا وانا جاية ع وقت اختبارات

وطبعا امس كنا صايمات وانا طفشتهم جوعانة

واشم بسكوتتي اللي بأسمي واتنهد وابرطم متى يأذن المغرب أبغى آكل بسكوتتي وكل شوي اجي عندهم المطبخ

وبس بعد الاتصال صرت ابكي رغم اني اخدت حقي منها بس برضو

قهر لمن احد يبغى يروح لك كل تعبك وانا رغم قوتي إلا اني بسرعة انجرح ومعد قدرت افطر ابدا رغم انو الفطور جميل

المهم طبعا ماخليت اختي تكمل دعاء ع البنت حرام هي مشكلتها عقلها صغير شوي

ودحين البنت محزنتني لأني كنت شديدة معاها بس هي الله يهديها اللي عرضت نفسها لدا الشيء

أجل تقولي انو شغلك ممل والموضوع ممل وبنغيرو ونبغى نعيد كل شيء واحنا في وقت الاختبارات

وفينها لمن اتبسمت وقالت مررة حلو وماعندي اعتراض عليه واضطريت اشتغل كل شيء

ولمن قولت كل وحدة تعمل شريحتها قالت لي البور حقي قديم ولابي يتصلح وقولت لها مومشكلة خلاص انا بسويه كامل

وبعدين تجي تقولي نغير الشغل وترجعي تشتغلي من جديد

لا حبيبي انا ماخلصت الشغل بدري إلا عشان اتفضى اذاكر

المهم قامت تقولي لو انتي مشيتي كلامك علي أنا راح اعتبر نفسي ضعيفة

رديت عليها انا لو سمحت لك انك تضيعي تعبي واقولك ماشي تبغي تغيري الموضوع ماعندي مشاكل فأنا اهضم حقي واكون شخصية انهزامية وضعيفة

وع العموم مشي كلامي أو كلامك فإنتي في الحالتين ضعيفة لأنك بمجرد ماشفتي عروض البنات حكمتي على عرضنا

انو ممل هذا دليل ع الضعف وعدم الثقة في النفس

احنا اللي نخلي موضوعنا ضعيف واحنا نخليه قوي

المهم انها قعدت تقول بعد ماقالو البنات مايتغير الموضوع بدري جاية تبغي تغيريه دوبك تتكلمي < والقصد متأخر

قالت والله مااسامحكم لو نقصت ..


اصلا هي ماتحبني من بداية السنة كانت وانا ماشية تدفني احيان لمن اجي خارجة من كلاس تخبطني بكوعها وفي كلاس الحاسب ترجع كرسيها علي لمن معد اقدر اتحرك وانا كنت اطنش ابغى اشوف ايش نهايتها

بعدين تقول مدري ليش اضربك رغم اني مااكرهك وتبتسم ابتسامة مجاملة وانا امشيها لها


الله المستعان بس والله يبعد عني شرها

بس انا مااحب اللف والدوران من بعد دا الموقف راح تتغير معاملتي معاها صحيح اني ما أكرهها

بس راح تكون علاقة رسمية ومارح اسمح لها تبتسم في وجهي

دامها تكرهني لازم توضح كرهها من حقها تكرهني او تحبني أنا أؤمن بدا الشيء

بس دحين لازم تشتغل على نفسها وتدرب عشان ماتنقص وبحاول اساعدها والله يعين يخلص

البرزنتيشين وبعدها اقولها خلاص ماابغى يكون بيني وبينك اي علاقة

مفاجأة ..

كانت أجمل مفاجئة بلا سبب ولا ميعاد أهداني أبي باقة ورد


عربون عن مشاعر نمت بيننا منذ الطفولة ..

أبي هو صديقي وأبي هو حبيبي وأبي هو كل الرجال في حياتي


كل فتاة بأبيها معجبة أما أنا فبوالدي مغرمة ..


أحبك يا أبتي كقبلات أزرعها فوق يداك وعلى جبينك وعلى وجنتيك وفوق أكتافك


أحبك أكثر من تدليلك لي ..

وأحبك أكثر من ركضي عند رؤيتك وضمك لي بكل حنان


أحبك يا أبتي بقدر ماتراني طفلتك صغيرتك مدللتك ..

وبقدر ابتسامتك وحماسك عندما اخبرك عن يومي

وأحبك بقدر مايزعجك شدتي على نفسي

وأحبك بقدر استغرابك من قوانيني العجيبة على حد قولك

وأحبك بقدر رائحة الورد الجميلة وهدوء الورد وشراسة الورد وأنوثة الورد


أبنتك تعشقك يا أبتي ..

الغالية اللي سألتني 157





دعواتكم لي من الخميس تبدأ اختباراتي ..


عاد عقلي مشوش دي اليومين

اتأجل اختبار الخميس للأحد بعد اللي جاي


يعني اقدر اقول اول اختبار من الدوري الثاني الاثنين رياضيات بعدين الاربعاء فيزياء

بعدين السبت حاسب

بعدين الاحد اتصال بعدين السبت انجليش


وبعدها بثلاث اسابيع تقريبا شهر من الآن راح نبدأ الفاينل



اليوم قابلت صديقتي آية تبقى آغلى صديقة ع قلبي يكفي انها تأخر السواق بس عشان تجلس معي ..

وتجيني لمن اخر الجامعة عشان عندي كلاس


أحبها واشتاقها ..


الصداقة مضمون تعجبني صداقتي بآية لأننا متفهمات وتفهم متى تجيني ومتى تتركني

أنا شخصية في التواصل مع الناس زيرو بس يجي أحد يكلمني ع طول اندمج معاه

جوالي مااسجل في ارقام الواتس ماادخل

الرسايل ميتين وتسعة واربعين رسالة ماقرأتها

الاتصالات ماارد عليها إلا لو جوالي جنبي وموبس كدا لازم مزاجي يهيئ أني أرد


آية لمن تكلمني ومرررة الكلام ضروري ترسلي في 3 أماكن تويتر والواتس ورسالة نصية أقوم انا افهم انو الموضوع ضروري

أما لو ترسل بس ع الواتس ممكن اشوف الإشعار بس ما أرد إلا لو خلصت اشغالي

ومررة ماتزعل فأحس براحة نفسية

شخصيتي مشربكة من ناحية الانطوائية والاجتماعية

نفسيتي المشكلة الفيس مابيبان

احسن اصلا نفسيتي زفت


مخنوووقة ومتضايقة ومو طايقة نفسي ومعصبة وكل شيء

المشكلة اني من الناس اللي يحرقو في قلبهم


اقول لأختي قلبي يعورني مو عارفة ليش

الله يعدي الاختبارات ع خير


مشتهية ابكي لو اني اترك كبرياء الدمعة ع جنب

دايما تخونني دموعي على مواقف سخيفة


ودي اكسر جوالي وكل شيء واسافر

خلي ينتهي دا الترم وناوية اهج

المشكلة اني اضحك وعادي بس ارجع البيت احزن

بس انا كنت اضحك مع صاحباتي بجد مو مجاملة

اكره اترك لنفسي فرصة افكر

بنت خالتي قالت لي كلمة صادقة بس اوجعتني

هيول انتي حياتك كلها دراسة

انا مجبرة انو حياتي تكون كدا ..

مخنوقة الله يعدي دي الضيقة ع خير وماتروح لمن اسمع محاضرات او قرآن

بس بعدين ترجع ..

احس اني ماابغى ابتعد عن ماما ابغاها تضمني طول الوقت وابغى بابا يضمني

ابغى ماما تنام معايا كل يوم

انا مخنوقة