الجـزء الحادي عـشر ..
بعد أسبوعين و نص ..
| حمد |
بيت بو عبدالله ..
الساعه 5 وربع العصر ..
.
.
: أنا الصراحه هب عايبنيه .. سفراته كثرت السنتين الي طافت .. و بعدين انحن
مانعرف هله ولا ربعه ولا اي شي عنه ..
تميت ساكت وأنا منـزل راسي وأفرك ايديه .. كل إلي أباه انهم مايطروني ..
قالت اميه: هذوه حمد عندك .. بعد اكبر عنها إلا بشهرين .. خله ياخذها!!
رفعت راسي بحده وانا اسمع عبدالله يكمل: هيه والله .. صدقها اميه،..
ولف عليه: وحمد مابيقول لاء .. بنت عمه وهو اولى ابها ..
سكت عنهم وانا افرك ايديه واقلب رمسته فراسي .. انا وعليا؟ ... عمري مافكرت
ابها اصلا .. شوتحب؟ ,, شوتكره، شو وشووو!!
قالت امايه:ساكت اشوفك؟!
تخيلت شكلي وياها .. لا لا .. وقفت وقلت بعصبيه أنا اروحي استغربتها: لا
طبعاً ماباها .. خلو ولد خالها ياخذها .. أنا ماباها!
كنت بكمل دربي وبطلع، بس عبدالله قال بعصبيه وصوت عالي: وليش ان شاء الله
ماتباها؟!
أشرت بايدي بغيظ: ماباها ياخي .. جيه غصب هوه؟!
قالت اميه بكل هدوء وهي تقرا الجريدة: عمكم ماخبركم الا انه يبا واحد منكم
الها .. وانته ياحمد لاتستبطر على النعمه ..
قلت بصوت عالي: شوخصه اصلاً؟ .. الريال يباها خلوه ياخذاها ومحد له خص فيهم!
بعدين عميه صح يبا نفس الي قلتي .. بس هب غصب السالفه ..
لفيت على عمر وعمير .. وقهروني يوم ما قالولهم شي .. فقلت وانا ااشر عليهم:
بعدين عندك هاييلا .. جانه خالد هب عايبنك خل واحد منهم ياخذها .. انا
ماباها!
وقف عمر بسرعه وقال : ايييه انته شوتقول؟! .. بعدين هيه اكبر عنا؟!
قال عبدالله : جب انته .. حتى لو أكبر عنك شوفيها!؟ .. وايدين معرسين حريمهم
اكبر عنهم وهذم هااه .. محد شراتهم ..
ولف عليه: وانته ماعطيتني سبب .. ليش حضرتك ماتبا بنت عمك؟!
بديت أعصب الصراحه .. ياخي ماباها وخلااص .. غصب هووه!
قلتله وانا ارد ايلس: بس جيه .. ماباها ..
وكملت: بعد هب لازم كلنا ناخذ من بنات عميه ..
سكتنا فتره وعبدالله طلع معصب و عيد يالس على الغنفه ..
واميه الا تقرا الجريدة .. عقب قالت بهدوء: انتو متظاربين عليها وهيه مادرت
عن هوا داركم اصلا!
لفيت عليها: شوه؟! .. كيف يعني؟!
وكملت: انتو اصلا مكبرين السالفه .. خلوها لولد خالها ..
عقدت حياتي باستغراب .. وهيه تكمل: كيفكم .. أصلا هيه تباه ..
طالعت عمر الي طالعني .. تباه؟! .. يعني تحبه؟! .. وقفت يوم وصلت لهالاستكشاف
.. تــحبه؟! من وين تعرفه عشان تحبه؟!.. اصلا المفترض محد يخبرها لين
مانرخصها نحن!!
قال عمر بسرعه: تباه؟! .. كيف يعني تباه؟!
لفيت على اميه ابا اشوف ردها .. جان تلف علينا وتقول: تحبه بعد شوه؟!
وكملت وهيه تلف داخل: لاتبطون على عمكم .. ردوله خبر بسرعه ..!
رمشت بعيوني ... يعني الحبيبه تعرفه .. لا وتحبه بعد ..
و أذا كانت تحبه فهيه اكيد تعرفه .. عقدت حياتي بعصبيه .. شو هالحاله!!
طاحت عيوني على عمر وعمير الي من اشكالهم تعرفه انهم يفكرون نفس تفكيري ..
قال عمر: شو الشور؟!
لفينا كلنا على عيد الي قال:لاتسون النا فلم هندي احينه .. وشو يعني اذا كانت
تباه؟! .. أكيد شاوروها خواتا وقالت تباه ...! بعدين انتو ولا واحد فيكم فكر
ابها كحرمه له .. خلوها تسير فحال سبيلها!
عصبتني رمسة عيد زياده .. فقلت: لاوالله؟! .. حتى لو مافكرنا ابها .. صلا وين
تتحرا عمرها هاي؟! .. شو تباه وتحبه ؟!
قال عمير: و الله شكلها بنت العم تلعب من ورانا!!
فريت عليه مخده وقلت بعيظ: شو هالرمسه انته بعد؟! ..
قال عيد: عنبوو انته ماعندك ون تو ؟ .. على طول تلعب من ورانا ؟! .. و الله
انكم مكبرين السالفه ..
مسحت على لحيتي وانا اقول: اصلا خالد هذا هب نازلي من زور الصراحه ...!
وسكت .. ما باابها ياريال .. شو الشور احينه؟! .. آخذها عسب اراويها انه
ماعندنا هالسوالف قبل العرس؟! .. ولا ...
وأنا افكر طلع عبدالله من قسمه ووراه هند متلبسه عباتا!
قال وهو يعدل سفتره عند المنظرة الي عند الباب: شو ياعيال ابويه؟! .. منوه
الي بيضحي بعزوبيته؟!
رفعت حايبي بغيظ .. وقلت له بهدوء: بنت العم ماتاخذ غير ولد العم ..
وكملت : متى نسير نخطب رسمي؟!
.
.
نفس اليوم، الخميس ..
الساعه ست وخمس دقايق ..
| هند |
.
.
كنت ساكته ومستغربه .. ماكنت ادري انه حمد يبا علايه؟! .. غريبه الصراحه ..
يعني مارمسنا ولا قال شي، ولا بس لنه خالد ولد خالتي خطبها .؟!
كان عبدالله نازل يصلي .. وانا اترياه عسب نسير الجمعيه .. عندي اشياء ابا
اشتريها .. وعقب بسير الخياط اشل كناديري .. بعد دقايق، يا عبدالله . ويوم
حركنا الموتر .. قلتله باستغراب: حمد كان حاط في خاطره انه يبا علايه؟!
قال بكل صراحه: لا طبعاً .. عميه الي تخبرنا جان حد من خوانيه في خاطريه بنت
العم .. وحمد قال يباها!
فتحت عيوني بصدمه: كيف؟!.. يعني ماخطبها لنه هو يباها؟!
قال: لا اقولج .. تراه لنه ولد خالج قال يباها ..
لاوالله؟! .. شو هالانانيه؟!
قلتله: وشو فيها اذا قال خالد انه يباها؟! .. ولا حلال عليكم حرام عليه؟!
لف عليه وابتسم .. عقب قال: اونج عاد؟! .. شو بعد هالرمسه .. تعرفين انه لازم
يرخصونها خواني عقب جانه يباها ولد خالج محد بيمنعهبه!
قلت بعصبيه: شو هالانانيه ؟! .. جيه موتر هيه يرخصها ولا مايرخصها؟! .. هيه
الي تتشاور وان بغت هذا تاخذه وان بغت هـ...
قاطعني: هيدي هيدي يابنت الحلال .. اقولج انحن جيه .. هاي عاداتنا ..
لفيت عنه وانا اكمل: و الله انكم الصراحه! ..
قال: ههههههه والله انج الصراحه ؟! .. شوبلاج عصبتي انزين؟!
قلت وانا ااشر بايدي بغيظ: قهرتووني انتو وافكاركم .. انا اعرفه خالد ..
واعرف انه خاطره فيها! .. ليش تخربون عليه؟!!
قال بهدوء: هيه ؟ .. وشو تعرفينه عنه الشيخ خالد؟!
قلت بعصبيه: عبدالله بلا استهبال .. انا اعرف انه بويه الي رمسكم .. وانه
يباكم انتو عن عيال خالتي .. بس بعد مايحق الكم جيه تسوون! ..
فهالوقت كنا وقفنا عند الجمعيه .. فقال وهو يبند الموتر: الموضوع انتهى ..
انزلي يالله!
نزل وبند الباب وراه ... وانا من العصبيه مانزلت .....!
فتح الباب من صوبي وقال: هاه؟! .. مابتنزلين؟!
لفيت الصوب الثاني وقلت: لا مابا .. تعال ردني البيت!
قال وهو يمد ايده يزخ ايدي: يالله عاد عن الدلع هنوووود!
خوزت ايدي وقلت بصوت عالي: مااابااا غصب هوه!
فنفس اللحظه كانوا فيه شباب خاطفين عدال الموتر .. فرفعوا روسهم يطالعونا ..
انا بما اني ماكنت متلبسه النقاب لفيت بسرعه وعبدالله يبند الباب بعصبيه!
اوووووووه وقته هذا بعد! ... سكت يوم ركب ولا قال شي .. بس من وصلنا الشارع
الرئيسي قال: لاترفعين صوتج مره ثانيه .. لني انا عندي اذنين واسمع زين
الحمدلله!
استحييييييييت الصرااااحه! ... فقلتله: زين ..!!
ماعرفت شو اسولف شو اقول .. بسكت احسن لي ! ..
بعد دقايق كنا واقفين عند كافتيريا .. قالي: تبين عصير؟!
لفيت عليه اطالعه .. فديت هالخشم انا .. قلتله وانا ابتسم: دامك تباه فأنا
اباه!
لف عليه .. وسكت .. عقب ظحك وهو يقول: لوتــــيه!
.
.
|عيد |
يوم اليمعه فاليل!
.
.
تلبست الفانيله بصعوبة وانا احاول ما احرك ايدي اليمين وايد، و حتى رقبتي
بعده عليها هالجبس العود، هو هب جبس، ياخي المهم انه هذا الي يحطونه على
الرقبه يوم تكون معوايه .. و ريلي اليسار بعدها مفدوعه، ماروم اوقف عليها
وايد!
تعطرت وتسفرت بايد وحده، اففف طلعت بايخه .. بخلي حد من خواني يعدلها!
خذت اغراضي وطلعت .. كانت امايه يالسه ويا هند بنت عمي وحرمة ثانيه وياهن!
سلمت وطلعت بسرعه! بس صوت امايه وقفني: عيييد تعال وين ساير!
رديت على ورى وقلتلها: هاه اميه؟ .. ساير ويا الشباب ، شي بغيتي!
قالت بعصبيه: شو الشباب بعد وانته مكسر؟ .. ماشي سيره تعال يالله!
رفعت حايبي وتنفست بعمق وانا ارد عليها: افا اميه.؟ .. جيه ياهل انا؟ .. بسير
ومابتأخر ..
قالت بنفس العصبيه: اقولك رد .. بعدين ويا امنوه ساير؟
تأففت: يالله امييييه عاااااد ساير وياااا الربع!
سكتت ، وتحريتها رظت وكنت بسير، بس ما ابطيت الا وهي ظاهره وزاختني من ايدي:
انا يوم اقول شي تسمعه!
عورتني ايدي من مسكتها ..قلت بعصبيه: اماااااااااااااايه عااد شوها!؟
قالت وهيه بعدها زاختني: تعال سلم على حرمة عمك .. وماشي سيره .. عنبو تبا
تتنفد مره ثانيه!
ردينا الصاله وهي تيرني شرات الصخله!
قفطت الصراحه يوم قالت حرمة عمي: الله يهديك يا عيد خلك اول شي لين ماتتعافى
ولاحق ع ربعك!
يلست اميه ويلست انا وياها، سلمت عليها و سكت .. تمن هن يرمسن وامايه كل شوي
اطالعني بنظره!
رن تليفونيه .. كان حمدان .. على طول لفت عليه اميه: قلهم ان يوك عرب ومارمت
تسير!
رفعت حايبي بغيظ وانا اقول: ولا اقولهم اني مربوط فشيرة البيت شرات الصخله!
.. عادي تراه!
ظحكت هند: هههههههه هب لهالدرجة عيود!
قلتلها: انتي سكتي، ..!
قالت حرمة عمي: شحاله ربيعك الي كان وياك؟!
قلتلها وانا ارد على حمدان: بخير ماياه شي، الا انا الي لين احينه اعاني
الصدمه!
قالت شي بس ماسمعتها لن حمدان قال بعصبيه: انته بتخليني ادعم مره ثانيه من
رمستك الخايسه هاي؟ .. يالحماااااار قول بخير وخلااااص!!
: ههههههههههههههههههه لا لازم اراويك انك محظوظ ..!
طلعت من الصالة ويلست عند الدري ..قالي: هاه وين؟!
قلتله بعصبيه: اقوووووووولك اميه ماخلتني اطلع .. تقول خلهم يولوا!!
وكملت وانا افر الحصى الي شليته من الأرض: تخيل .. والله ماتقول غير ,, مادري
شوه!
نقع من الظحك: ههههههههههههههههههههههه غربلك الله من ياهل! ,, احلف انها
ماخلتك تظهر!
: يالحمااار لاتظحك .. اقولك ماخلتني .. بجذب يعني!
قال وهو بعده يظحك: هههههههه و الله ان امك الصراحه .. فنتك .!
: جب .. المهم خبرهم مابيي .. بعدين انا اصلا تعبان!
: افا شوبلاك؟!
: ماشي، ادلع!
: والله انك ياااهل ، يالله يالله جلب ويهك .. انا مارمس يهال ماماتهم
ماتخليهم يطلعون من البييت!!
عصبت الصراحه، قلتله بعصبيه وصوت عالي: جااااااااااااااب يالخام!! .. و الله
يتشوف، خل الاجازة تخلص وبراويك منوه عيد بن سلطان بن عيد!
بندت فويهه من الغيظ، اووووووووف شو هالسخافه!
حطيت ايدي علة عيوني يوم دخل موتر فالحوي، يعني فرحان بليتاتك شوه!
ماحيد حد من خواني مركب مدعميه هالكبر!
وقفت يوم شفت حد نزل! ،، لحظة هاي ستيشن عمي! .. صدق غباء!
نزلت منه بنيه متلبسه كندورة حمرا على ابيظ، طبعاً عرفت اللون من كثر ما انا
مركز منوه بيطلع .. كانت ترمس فالتلفون و حاطه السماعه فذنها، ..
: ههههههههه و الله سوري حبيبي كنت بي بس امايه ماخلتني!
رفعت حياتي بدهشه وعصبيه يوم عرفتها! .. ومنوه مايعرف الخريييش شما!
حطيت ايدي اليسار على خصري ووقفت وقفة استهزاء وانا اشوفها تبند الموتر
وتفر السويج فوق وتمسكه وترد تفره مره ثانيه!!
صدق بنات آخر زمن، اول شي يايه اروحها وهيه الي تسوق، ثاني شي ظاهره من البيت
من دون عباه، ثالث شي داخل بيت عمها الي كله شباب وهيه تتمختر جيه وصوت ظحكها
وصل بيت بوسالم الي فآخر الشعبيه!
لفت عليه واتجدمت، فجت عيونها بقو ولفت الصوب الثاني، فصفصتج تفصفيص هب لازم
تتغشين! ..ردت طالعتني وهيه متغشيه وتقول: يالله اموني ارمسج بعدين ..
تميت على نفس وضعيتي ولاااانزلت عيوني، شو هالخيااااس!
قالتلي وهيه تتجرب ببطء: السلام عليكم و الرحمه!
رديت عليها وانا امط رمستي شراتها قبل شوي يوم ترمس فالتلفون:
عليييييييييييييج السلااااااااااااااااام والرحمه .. حي الله بنت العم!
حسيت انها اظيقت لنها تحركت بسرعه وهيه تقول: يحييك ... شوي بخطف!
وقفت جدامها بسرعه وقلت بغيظ: ليش يايه بروحج ان شاء الله؟!
سكت شوي بعدين طلعت الي فخاطري كله: وبعدين من متى انتي تسوقين؟! .. و شعنه
هب متلبسه عباه!؟ .. لا بعد داشه البيت وانتي ترمسين فالتيليفون شرات مادل
شوه!؟ .. عنبوو حسج واصل آخر الدنيا .. ماتستحين انتي؟!
ماحسيت بشي غير ايدها الي دزتني بقو! .. وبما اني ماكنت متوازن زين ، وريلي
اصلا تعورني فطحت من طولي على الدري .. حسيت برقبتي تعورني مووت لني لفيت
بسرعه ابا اتساند على شي، وماتساندت الا على ايدي المكسورة!
: آآآآآآخ .. يلعن شكلج!
طيحت عمري على الارض وانا اضغط على رقبتي، آآآآآخ يالويع كيف! ,, جني لفيتها
كلها لين الصوب الثاني، حتى ايدي جنه فيها مسامير!
سمعت صوتها تقول بسرعه و جنه حد يربع وراها: هذا عشان ايدك الي مديتها زمان،
وبعدين احترم نفسك انا اكبر عنك!
و دخلت داخل، وانا فوووووووووووووووووووووووووووووووووووولت!
من دون شعور صارخت وراها: ااااااااااااااااااالله يلعنج من بنيه ..
يالخااااااااااااااااااايسه!
حسيت بنفسي بحترق من الغيظ، يلست بصعوبة، آآآآآخ يارقبتي، و الله يتشوووفين
يالهرمه، ماعليه ,, و الله و الله ياراويها .. وقفت ودخلت البيت وانا امشي
شوي شوي، ريلي انعوت زياااده ، الخايسه ام ايد طويله، واونها بنت هاي؟!
خطفت عليهم فالصاله ولااعبرتهم ولا قلتلهم شي!
سمعت اميه تقولي: عيد اتصل ع خوانك خلهم ايون يتعشون!
قلت بعصبيه: انتو اتصلوا عليهم .. الوحده منكن عندها ثلاث تليفونات خلوهن
يكونن بفايدة!!
دخلت حجرتي وبندت ورايه الباب، واوني اقول الليله بتكون حلوة!!
.
.
| هند |
.
.
طالعت شما بنظرة ووقفت بسير المطبخ الي برع .. لحقتني هيه بعد دقايق، وكانت
نفس حالتها القبليه، حاطه التيليفون فمخباها وتسمع اغاني، قلتلها: ويا منوه
يايه؟!
قالت وهيه تيلس على الطاولة: اروحي يايه .. خذت السويج من حجرة اميه!
قلت بصدمه: سويتيها ؟ .. وليش ماقلتي لبخيت ايبج؟!
قالت بلامبالاه: بس جيه .. انا ابا اسوق .. بعدين ابويه محد!
طلعت كيكة الشوكلت من الثلاجة: ياويلج ان عديتيها مره ثانيه .. احينه سيري
زقري البشكارة خليها تحط العشى!
قالتلي: شفت عيد وانا يايه!
لفيت عنها وقلت: جافج وانتي يايه؟!
قالت ببساطة: هيه وهزبني بعد!
فجيت عيوني وقلت بسرعه: اونه؟ .. شوقالج؟!
قالت بعصبيه: الخايس مادري منوه يتحرى عمره .. اقولج سبني سب .. اونه ليش
يايه اروحج!
قلت بنفس عصبيتها: صدقه .. ويحق له يسبج ويكسر راسج بعد .. ماتستحين انتي
يايه اروحج وياليت بعباه، لو استوى عليج شي احينه؟ شو بتسوين وانتي هب متلبسه
عباه!
كملت وانا اقطع الكيكة: لو قايله لبخيت اييبج احسن .. انا كم مره قايله لج
لاتسوينها مره ثانيه!، بس انتي ماتستحين!
قالت بصوت عالي: انتي احنيه ماعلقتي الا على هالنقطه؟ .. وليش ماتشوفينه هوه؟
هو شو يخصه فيني يهزبني ولا مايهزبني؟
ظربت على الطاولة بالسكين الي بايدي بغضب: شما .. لاترفعين حسج ياقليلة الادب
.. سيري سيري داخل احسن لج!
طالعتني بنظرة عقب لفت بسرعه وهيه تقول: والله انتوا تتحرون انكم تعرفون كل
شي .. ومناك!
رفعت حياتي بدهشه، هاي بلاها؟! .. اصلا هيه متغيره واخلاقها غاديه زفت شرات
ويها!
الله يهديها بس .. انا والله كنت ادري ان الجامعه جيه بتسويلها! .. ياليت بس
ابويه قالها ماتسير!
طالعت تليفوني الي كان يصيح على الطاولة جدامي .. كان عبدالله .. غسلت ايديه
بسرعه ورديت: هلا الغالي ..
: اهلين .. السلام عليح هنادي ..
ابتسمت وانا ارد: عليك السلام ..
: شحالج ؟ ,, شوتسوين؟!
رديت عليه وانا ارتب الكيكة فالصحون: بخير فديتك، والله ياسه اقطع كيكة..
انته وين؟!
قال بسرعه: كيكة شوه؟!
: شوكلت ..تبا؟!
: الا .. احينه بي اانا .. بس فديتج هناادي طالعي الميلس وحطوا فوالة، بي
ويايه ريال ..
: افا عليييك .. تامر الغالي .. ثنينه بس؟!
: هيه .. ويمكن اي خالي .. تعشيتوا؟!
: لا فديتك ، نترياكم بعدنا!
قال بصوت خفيف: هيه زين عيل .. يالله هذووه يا بخليج .. ودخنوا الميلس بعد ..
فمان الله!
بندت عنه ورديت التيليفون ... زين على الاقل مايخترب العشى الي مسوين .. الله
يهديهم عيال عمي نادر ماشوفهم متعشين رباعه!
رتبت الكيكة و سويت عصير همبا وحطيته فالثلاجه وطلعت .. سرت البيت بطالع
البشكارة وين .. كانت ترتب الصالة الثانية .. قلتلها ترتب الميلس واتي تاخذ
الدخون تحطه هناك ..
خطفت على عمتيه واميه .. كانن بعدهن يرمس فنفس السالفة .. قالت اميه اول
ماشافتني: هذيه هند ... اقولج بنت بخيته ماكانت وياج فالمدرسه؟!
قلتلها وانا ايلس عدالها: منوه بخيته؟! .. بنت معضد؟!
قالت وهيه تعدل برقعها: هييييييييييه مرره هيه ..
قلت باستغراب: هيه كانت ويايه .. شوذكركم ابها؟!
قالت عمتيه بكل برود وهي تشرب عصير: توفت الاسبوع الماضي!
انتفظ قلبي، وسكت .. ماتت؟!
حطيت ايدي على حلجي بصدمه: ماتت؟! .. متى؟ ,, قصدي كيف؟!
قالت اميه: حليلها كانت حامل وماتت وهيه تربي؟!
مخصني بطني يوم قالت جيه .. هيه اصلا ماكانت تحمل .. احيد انها اطلقت من
ريلها لولي على اساس انها ماتحمل .. ورد خذها ولد عمها .. واحينه ماتت وهيه
تربي؟!
قمت ببطء وانا اقول: بسير شوي وبرد!
طلعت من الحجرة وسرت قسمي .. دخلت وسرت للحمام على طول وزعت الي فبطني كلله!
.
.
يوم الأحد ..
الصبح، الساعه 8 وربع ..
| خالد |
.
.
: منوه منهم؟!
قلتها بعصبيه وانا افر التليفون من ايدي ,, قالت هند: ايييه بلااااك؟!
قلتلها بنفس العصبيه: منوه خبريني؟ ,, موه هالخايس الي توه اذكر ان عنده بنت
عم؟ .. منوه منهم!؟
قالت بهدوء: خالد شوبلاك؟! .. هدي شوي ..
قلت بصراخ: هند رمسي!
قالت: مابرمس .. شو بتسوي يعني؟!
طلعت من حجرتها وانا مفوووووووووووووول .. منوه ياربي الي حيرها!؟ .. هذا
مايستحي، شقا بعد يحيرها وانا خاطبنها؟!
وقفت فنص الصاله بغضب وحيرة .. شو اسوي، اني افرط فعليا .. هالشي مستحيل ..
فريت عني سفرتي بغيظ، اوووووووووووه!!
: حمد .. اسمه حمد ، وياويلك ياخالد ان سويت الهم مشاكل .. تباه سر صوبه
ورمسه بهدوء وتخبره!
لفيت عليها وقلت بسرعه: حمد بن سلطان؟! .. زين عيل!
شليت سفرتي مره ثانيه وطلعت من البيت .. باخذ رقمه، وبرمسه!، لحظة، شو
بقوله؟!
ركبت موتريه وطلعت من البيت .. كانت الساعه توها 9 الا .. اتصلت على خالتي ..
ابطت ماردت: مرحبا!
: مرحبتيييين الساااع .. شحالج ام سلطان؟!
: فدييييت هالحس انا .. بخير فديتك، انته شحالك؟ ,, وشحال هلك!؟
قلتلها ونا اوقف عند الاشارة: طيبين طاب حالج ..
: خالوه ,, طلبتج!
قالت بسرعه: تم .. مرره تاامر فديتك!
: ههههه فديت خشمج انا .. ابا رقم حمد سلطان .. ولد خو بوسلطان؟
قالت: حمد؟ .. شتباه؟
ماعرفت شو اقولها .. بس عديتها: اباه عاااد .. عندج ولا؟!
قالت: هيه زين .. اصبر عيل ازقر علايا تعطيك اياه!
تشققت عاد انا يوم قالت علايا .. دقيقه وياني صوتها: مرحبا .. 050
**********!
: هههههههههههههه انزين سلمي .. تخبري عن حالي.. هب جيه مره وحده!!
قالت: هيه هذيه اميه .. لحظة شوي!
ابتسمت من ردها، عليا حتى لو تجرأت ورمستني اتم تستحي وايد ..
بندت عن خالتي .. واحينه الرقم عندي .. شو اقوله؟!
خطفت الشيشه بعبي بترول وانا افكر .. آخر شي اتصلت عليه ..
والي بي من لساني ,,, حياه الله!!
.
.
نفس اليوم ،
| حمد |
.
.
كنت فمكتب واحد من الربع نتريق رباعه يوم صاح تليفونيه .. كان رقم ماعرفه فما
تفيجت ارد عليه .. تنطشته وكملت سوالف .. لكنه بعد تقريباً عشر دقايق رد يصيح
..
تأففت ورديت عليه: ألووووه مرحبا!
كان هدوء اول شي عقب سمعت صوت واحد: مرحبتين، السلام عليك ..
رديت باستغراب: وعليك السلام و الرحمه .. حيه الشيخ؟
: يحييك .. شحالك حمد؟!
يوم قال حمد ، رديت اطالع الرقم باستغراب وانا اقول: بخير وسهاله .. ومن
يداك؟!
: طيب طاب حالك .. وشحال عربكم؟ .. ربهم مايشكون باس؟!
وقفت بطلع من الحجرة وقلتله: طيبين ومايشكون باس .. الله يسلمك ..
وسكت ، اترياه يقول شي ,, سوم ابطى مارمس ، قلت: الطيب ماعرفتك؟!
قال: هيه سمحلي وياك خالد بن محمد .. وين بومبارك؟!
خالد ؟ .. خالد بن محمد،؟ .. منوه اعرف انا خالد؟! .. هب وايدين .. لحظة!
لايكون خالد هذا ولد خالة قوم عمي؟! .. لا لا ماظني!
رديت عليه: والنعم بك .. فالدوام طال عمرك .. آمر شي بغيت!
قالي بسرعه: عيل مابعمل عليك .. ماعليك امر ادليني بيتكم وين .. بغيتك
فسالفه!
استغربت زوووووووووووووووووووووود ياربي منوه هذا!؟
: ماعليه قولي انته شو تبا؟ .. لاحقين عالدوام!
رد يقول : السالفه ماتنقال فالتيليفون ..
: اها .. قلتلي منوه الشيخ؟!
: خالد بن محمد .. تعرفه عبدالله بن عيد؟! الي بيت فشعبية ****؟!
فتحت عيوني وانا اقول بحيرة: نعااام اني اعرفهم .. وياك حمد بن سلطان بن عيد
.. عبدالله بن عيد يستوي عمي .. وصلت الشيخ ، آمر؟!
: مايامر عليك ظالم .. ماهي والله الا ان السالفه ماتنقال فالتيليفون .. وين
بيتكم عن قوم عبدالله بن عيد.!؟
امري لله .. دامه يعرف قوم عمي فأكيد انه حد نعرفه: ماعليه الشيخ .. يوم انته
ظاهر من الشعبيه، خذ يمين و الشعبيه الي ع يسارك دشها .. بتلقا دوار
فالبداية، خذ يمين وعقب سار ومرره وصلت .. وحياك الله!
: الله يحييك ويبجييك .. ماعليه العصر بكون هناك ..
: حياك الله الشيخ ..
: اسمحلي عاد عالمغثه !
: لا افا علييك ، حياك الله فأي وقت ..
: ماعليه بخليك عيل .. فمان الله ؟؟
قلتله بهدوء: فمان الله!
انا شاك انه هذا خالد الي خاطب بنت عميه .. لايكون هو وياي يقولي بقوات ويه
انا اباها!؟ ..يبالي اظهر كلاشن ابويه ، و الله ان قالي اباها، يا ان الذبح
فيه حلال!
ولا اي واحد ماتعرفه ويقولك بنت عمك الي انته حيرتها يوم خطبتها، انا اباها
شو بتسويله؟! .. يخسي ويهبي .. اصلا مابيسويها ، مستحييييل!
رديا للمكتب و السالفة محيرتني .. يبالي اخبر اميه بعد يجهزون الفواله ..!
.
.
الجزء الثاني عشر ..
| حمد |
العصر، ميلس بو عبدالله ..
.
.
: نعم؟!
: الي سمعته! .. بنت عمك انا اباها ..
فتحت عيوني على وسعهن، يالس جدامي ريال ماعرفه ولاعرف اطباعه ولا شي عنه،
واسمعوا شو يقولي: بنت عمك انا اباها؟!
رمشت اكثر عن مره عقب قلت بهدوء: حظرتك شوقلت؟!
عقد حياته وقال: سمعتني .. قلت اني ابا عليا بنت عبدالله بن عيد ، الي هيه
بنت خالتي!
وقت بعصبيه: انته تخبلت؟.. يايني فبيتي وتقولي ابا بنت عمك؟! . تخبلت انته؟!
وقف ويايه وقال بثقه وهو يرد سفرته على ورى: هيه نعم تخبلت دام السالفه فيها
عليا ,, اسمعني ياحمد!
قاطعته: اسمعني انته يا خالد .. ترا هالرمسه لمصلحتك .. تطلع من هالباب
وماشوف رقعة ويهك ..
و كملت وانا امد صبعي فويهه: وبسوي عمري ماسمعت انته شوقلت .. يعني ..
و حطيت صبعي على صدغي: بمشيهالك على مزااجي ..
حسيته تنرفز من آخر كلمة .. خله يتنرفز لقعه تقلعه الخايس الي مايستحي ..!
: حمد بلاها هالرمسه .. خل عنك العصبيه وايلس نتفاهم ..
عصبت عاد انا: اي تفاهم الي ترمس عنه؟! .. انته متخيل الي تقوله؟! .. انا ولد
عمها واولا ابها .. وان قلتلي مره ثانيه ابا عليا بنت عمك بفرغ فيك كلاشن
ابويه .. وهيج الساعه عاد ارمس!!
اتجدم مني وزخني وقال بعصبيه واظحه: حمد انا هب ياي اتظارب .. انته اسمعني
وبس!
خوزته عني وانا اقول بنفس العصبيه: جب اقوووولك وبـ......
قطع رمستنا دخول عمير الميلس ، واول ماشافنا ربع صوبنا وزخني : حمد شو تسوي
انته!
قلت بصوت عالي: طالع الخايس شو يقول ؟ .. اونه بنت عمك اباها!
طالعنا عمير عقب قال: عنبوووو بتظاربون يعني!
انصدمت من رمسته .. قلتله: بلااااك انته؟! .. اقولك ..
قال: حمد اسمعني .. خلنا نيلس ونتفاهم احسن ..
فريت ايده عني وانا اطالع خالد الي رد ييلس بثقه ..... في داخلي .. اباه يصر
ويتظارب عشان انا اتنازل واخليها له .... بس كرامتي ماتسمح لي اني اقولها
فويهه! خلني احرق اعصابه بس!
قال خالد عقب فتره: انا هب ياي اسوي مشكله .... انا خطبت عليا بنت عمكم اكثر
عن مره وردتني ... وانا من خاطري اباها .....
كنت بقطع رمسته بس هو كمل بسرعه: وهيه احبها .. من واحن صغار .. وعليا مريظة
وتحتاي متابعه! ..
كمل بهدوء: احينه يوم هيه وافقت، انا مستحيييل افرط فيها ..
وسكت .... قلبت رمسته بهدوء فراسي ... طالعني عمير وقال بصوت واطي: انته
تباها حمد؟!
غمظت عيوني وقلت بنفس الهمس: لاء ..... بس مابخليه يشلها جيه!
قال عمير بصوت عالي: وشو يضمن النا انك ماتهينها وبتطلقها دام انها مريظه؟!
قال بقوة وصوت عالي: اخسي اهينها ... ماعاش الي يهين عليا بنت عبدالله وانا
اشم الهوا ...
وكمل بنفس النبرة وهو يأشر بايده: بعديين انا اقولك اباها من خاطري ..
مستحيييل اطلقها ...
سكتنا ... ماعرفت شو اقول الصراحه!
جان يقول عمير: اذا انته قد هالرمسه ... نحن بنـ...
قطعت رمسة عمير: انا يا خالد ماباها بنت عميه .. بس انته هب عايبني!
قال بسخريه: وليش ان شاء الله هب عايبنك؟!
قلت وانا ااشر بصبعي: اولاً ... سفراتك وايده ...
ومديت صبعي الثاني: ثانياً .. ما أعرفك عشان ارخص بنت عمي لك ..
و كملت : واخيراً ماعطيتني سبب مقنع يخليني ارخصها عشانك!
سكت ... تميت اطالعه انا وعمير نترياه يرمس .. عقب عدل يلسته وقال بهدوء:
انزين .. بس هاي اسبابك؟!
هزيت راسي: هيه ...... اشوفك متسعد تجاوب؟!
ابتسم بثقه غاظتني وقال: طبعاً .. شوف ..
واشر بصبعه السبابه: اولاً .. سفراتي كثرانه لشي واحد ..... الي هوه اني ادور
لعلاج حق بنت خالتي .. الي بستوي خطيبتي ان شاء الله!
عقدت حياتي ...: شوه؟! .. كيف يعني دوا؟!
كمل هو: وثانياً .. انته هب لازم تعرفني شخصياً .. تخير اي حد من يماعتنا
وبيقولك منوه انا، وثالثاً و السبب الرئيس الي بترخص بنت عمك عشاني، اني
احبها واباها وانته العكس طبعا!
سكتني رده ...... شو اقول!
قاله عمير: انته شو تدرس؟!
قال وهو يحط ريل على ريل: انا ما ادرس ... انا تخرجت السنه الماظيه .... انا
دكتور جراحه و قلب!
فتحت عيوني على وسعهن ...... جراحه وقلب!؟
قال عمير: اها .... وشو ريت عن العلاج!
قال بهدوء: ممممممم ... انا هب ملزوم اني اخبركم عن حالتها ... الي انا
درستها من اول ماكانت هيه ياهل .. بس بخبركم .. السبب الرئيسي فتعبها .. هو
عصبيتكم انتم يا عيال عيد!
قلتله: نعم؟! .. بتقولي انها مريظه بالقلب بسبة عصبيتنا؟!
وكملت بفخر: انحن عيال عيد!
قال: انا اقول الي شفته كمنظور دكتور ... هب ولد خاله!
وكمل: على العموم، نحن ظهرنا عن موضوعنا .... شو شورك؟!
بعد تفكير .. و منطقيه، هو احسن عني .. طبعاً ماابا اقول هالشي. بس الحق
ينقال!
وقفت وانا اقوله: ان سمعت ، او يتني الينيه وخبرتني ان عليا مظيومه يا خالد
ولد سعيد!
و كملت وانا افتح الباب بطلع: بتكون الناس متيمعه تصلي على الدكتور خالد!
.
.
.
.
بعد اسبوع ..
| بخيت | ..
الساعه 8 فالليل ..
: خلااااااص بودييييج .. اففففف!
طلعت من الصاله بظييييج من حنة شما، هالبنيه غاديه نكديه وطلباتها ماتخلص،
سلطان مسافر وانا اروحي عندها، سر هات وسر ود، وكل يوم لازم اسير مكان، يا
السوق يا الجمعيه او الدكان و دووووووووووووم المكتبه، لاعت جبدي من كثر
السيرات!
بسير اشل سويج لكززس ابويه اليديده اطمش ابها على الاقل، كنت متلبس وزار
وفانيله ، يعني شكلي تحفه، ماطالعت جانه حد عنده فالميلس دخلت وسلمت ..
رد عليه ابويه وريال وياه: عليك السلام و الرحمه!
وقفت عند الباب بقفطه بس عقب كملت دربي وسلمت على الريال: مرحبا الشيخ
شحالك؟!
: بخير ونعمه .. الله يسلمك ..
يلست بهدوء وانا اطالعهم يرمسون، فجأة لف عليه الريال: حي الله بخيت، شكلك
ماعرفتي ..؟
طالعته وهو يرمس، متلبس سفره وعقال، وكندورة بنيه غامجه، و شال فايده عصا جنه
بيرزف، شكله فناان غربله الله!
قلتله:لا والله ماعرفتك ..
قال بفخر واضح فرمسته: وياك مايد بن علي، ولد عم نسيبك منصور بن غاشم!
رفعت حايبي بدهشه، هيه و الله، بس شو هالخقه، ومايد بن علي، خير ياطير؟!
قلت بهدوء: و النعم بك .. الله حيهم هل دبي ..
قال: يحييك الطيب .. و علومك ويا الدنيا؟!
قلتله: طيبين طاب حالك، بعدنا عايشين الحمدلله ..
قال: مدييييم ياربي ..
ولف على ابويه: شو قلت بوهند؟! .. بعدك معزم؟!
قال ابويه وهو يطالعني: مايد يابخيت ياي يشتري الريم!
عقدت حياتي باستغراب: الريم!؟ .. اي ريم بعد؟!
قال مايد بدهشه: ناقة ابوك ماتعرفها؟!
قال ابويه وانا بعدني افكر شو قصده: الريم ناقة بخيت يا مايد .. عسب جيه انا
قلتك اصبر بشاورهم!
آآآآه هاي ناقتي الي عاطني اياها عمي من زمااااان!
قلت: شقا بعد يبا يشتري الريم!؟
قال مايد: ناقتك هيه ؟ ,, ياحيك عيل يوم ييت .. بغيت اشتريها عن ابوك انا ..
كم تبيع؟!
رفعت حايبي باستغراب من ثقته: مابيع انا .. ناقتي واباها!
لف عليه ابويه: مايد عارض عليك 3 ملايين، فكر زين يابخيت .. انته امبونك
ماتعابلها!
قلت : تراني مخلنها فالعزبه عند البيدار .. وموكل ريال يعابلها!
وكملت بثقه وانا ارفع راسي: بعدين بوهناد العام قايل ب4 و مابعت!
قال بسرعه: انا مازيد عن ثلاث، الريم صح انها ناقة فنانه وسبوق، لكن بعد
يباله ترويض ومراجعه ، انته شرات ماقال ابوك مابتعابلها شرات مابسوي انا!
ماعيبتني رمسته، مع اني انا قايل ببيعها لبوهناد و افتك .. بس ماببعيها
لمايد، شو هالخقه الي فيه!
قلتلهم بهدوء وانا اطلع: ماعليه سمحلي .. مابيع انا ..
قال: فكر ياريال .. اباها انا ..
قلت وانا اوقف: ماعليه بفكر وبرد لك خبر .. احينه سمحولي ورايه مشوار .. الله
الحافظ ..
ظهرت من الميلس الي كان عيد واقف عنده ويرمس فالتليفون، يوم خلص مسكته من
ايده وقلت: ويا منوه ياي؟!
قالي باستغراب: عليك السلام والرحمه .. انا بخير الحمدلله انته شحالك؟!
: اففففففف .. انته وسخافتك الي ماتخلص .. ويا منوه ياي؟!
قال وهو يخوز ايده عني: ويا أنا ..!!
طالعته بظيج جان يقول بظحكه: هههههههه انزييييين ياي اروحي .. ليش؟!
يودته ووديته ويايه وانا اقوله: تعال عيل بنسير الستي!
قال: لا لا اانا يااي بيلس ويا عمي ..
قلت وانا ااشر: يارياااال بنسير الدوبي وبشل كندورتي وبنويه الستي نطمش شويه
ورااااد لعمك ان شاء الله!
هز راسه وقال: نسير الستي شو وراانا!
ركبنا الموتر وهو يقول: عيل بنخطف على حمدان كان يبا يسير ويايه بس انا قلت
بخطف صوب عمي الليله!
طاحت عيوني على لكززس ذهبيه موقفه عند الباب قلت: عنبوووج زاد ياللكززس!
قال عيد: هيه و الله انها فناااانه، مالت منوه؟! .. حد عندكم!
قلت : شكلها مالت مايد .. هيه ولد عم نسيبكم!
: نسيبنا؟!
قلت : خطف الدوبي على يمينك .. نسيبكم منصور بن غاشم .. هذا ولد عمه!
لف الدوبي وهو يقول: اها .. اقولك مارمست مريوم جريب!
: لا والله .. ببدل كندورتي وبيي!
نزلت .. تلاقيت فالدرب بواحد من الشباب ويايه فالجامعه، قال: مرحبااا بخوووت!
اففففففففف، يقهرني يوم يقول بخوووت .. قلتله وانا اسلم عليه: جب يالهرم ..
شو بخوت بعد!؟ .. شحالك؟!
ظربني على جتفي وقال وهو يظحك: يالسباااال انا هرم؟!
قلتله وانحن نحدر الدوبي: هرم وسبال وثور بعد .. اييه رفيق وين كندور مال انا
.. اقولك سعييد ، ولد عمك علي متى بيرد ان شاء الله!؟
قالي وهو يشل كناديره عن راعي الدوبي: باجر ان شاء الله .. يالله سلم ع
عربانك بخوت!
لفيت عليه بسبه لكنه ويه!
الهرم، شليت كندورتي الزرقا وتلبستها وسرت صوب عيد الي قال: بعد لو تميت هناك
احسن!
قلتله: جب جب .. والله انك غادي ملسون يالبايخ!
رفع حايبه وقال: تراك ياي ويايه .. يعني احترمني!
اشرت بايدي: يالله يارياااال بتذلني عالسيره يعني!!
خطفنا على شعبيتهم بنشل ربيعه حمدان ..
بعد ربع ساعه كنا فالدرب سايرين الستي .. قالي حمدان: حيه بو بخيته ..
وعلوومك!
: يحييك بوحمده، علوم الخير!
اشرت لعيد: لف لف ناخذ شاي كرك ..
طالعني: اقولك ولد العم .. هب جنها عيبتك السالفه!؟ ..
قلتله: شوه؟!
قال: لايكون تتحراني صبي ابوك ولا ختك تتأمر عليها؟!
يوم قال ختك، فجأة يت فويهي صورة شما يوم تقول تبا تسير الخياط!
قلت بصوت عالي: خييييييييييبه ذكرتي بشميم!
وكملت من دون لا احس: كانت تبا تسير الخياط ، لحزن جان ماتنقع الشوزن عندهم!
ماحسيت الا بايد عيد تظربني وصوته المعصب: لا بعد قولنا كم مقاسها جاد ربك
بعد نلقالها فستان فالدرب!
طالعته بغيظ: وايد تظرب تراك .. علني بلا هالايد لك!
حجيت فخذي مكان ظربته وانا اقول: يالهرم ، هب ايد عنبووو!
صدق والله بتسوي سالفه شميم ... بس خلها تولي ..
.
.
| شما |
قبل ربع ساعه!
.
.
شليت نقابي ، ولا احسن الغشوه، فريت نقابي وخطفت على عليا بشل عنها غشوتها،
ريتها راقده دخلت شوي شوي وشليت الغشاه وطلعت صوب اميه ..
خذت عنها فلوس وربعت ربعان برع عن يسير عني بخيت .. قالي بنسير بلكززس ابويه
اليديده، ونيه انزين!؟ .. اانا حتى ماشفتها!
شفت لكززس ذهبيه طر واقفه برع البيت، شكلها طرررررررر، عنبوووك زاااد
يابووويه، شو هالذوق هذا!
طلعت ووقفت عندها، ماشاء الله وايد حلوة .. كنت بيلس جدام، بس هونت يوم تذكرت
بغيمه عليه اليوم الصبح عسبت اني تأخرت على الباص ولا سرت وياه واونه مايبا
يلف لين جامعتي ويفرني وانه بيتأخر على كلاسه!
ركبت ورى وشغلت الاي بود مالي اترياه ايي .. غمظت عيوني واسترخيت وانا اسمع
اغاني يابانيه .. ناروتو بالاخص!
بعد دقايق حسيت بالموتر يتحرك، تميت على نفس وضعي اترياه يهزبني .. بس ماقال
شي ..
فتحت عيوني شفت انا طلعنا من الشعبيه .. طالعت الي جدامي بكل هدوء!
لحظة، احيد بخيت مخفف لحيته، هذا الي يالس جدامي هب مخفف، بالعكس وايد غليظه!
فتحت عيوني بقو وانا استوعب ان الي يالس جدامي هب بخيت!
هذا مايشبه بخيت .. منـــــــــــــــــــــــــــــــــــــــوووه
هــــــــــــــــذاا ؟!
نزلت السماعه بهدوء وانا ادقق فيه! .. قبظت الآي بود بقو من الروعه .. ياويلج
يا شما.؟ .. موتر منوه ركبتي انتي!!
من الظلمه شكله ما انتبه انه فيه وحده يالسه وياه ورى!!
لفيت اطلع الدرب .. لااا .. هذا شارع الامارات! ... خطفنا عن الشعبيه! ..
وايد بعدنا! .. شو اسوي!؟ .. شو اسوي!
حطيت ايدي على ثمي بسرعه يوم شفت يرد على ورى ويطالع الدرب من جهة اليسار، لو
انحن فالصبح كان من زماااان اكتشف اني ورى .. بس فهالظلمه ماتروم تشوف زين!
ظكيت على يسار شوي شوي عشان ما اطلع فالمنظرة .. شو اسوي ياناااس؟!
رفعت ايدي على صدري اهدي من ظربات قلبي .. بصييييييييييييح!
شفت يشل تليفونه ويرمس عمره: لو شاري الريم احينه كانت السيره بفايدتها ..
شكلي بويه ليوا!
رصيت على ثمي وانا اشهق .. ليوا؟! .. ليوا آخر الدنيا .. ياربي شو اسوي!
بديت اصيح من الظيجه و الخوف .. ياربي ، ياويلج يا شما ياويلج من ابوج !
عورني قلبي يوم تخيلت انه عرف .. والله انه يذبحني ويدفني جدام العرب!
سمعته يرمس فالتيليفون: هلا شموووه!
رفعت حايبي بدهشه وخوف شـ...شما .. شما قال؟!
سمعته يكمل: لا مابي .. قولي لامايه اني ببات فليوا .. لا بي باجر العصر ان
شاء الله!
غمظت عيوني بصدمه من الموقف الي انحطيت فيه .. شو اسوي ياناس!
لاحظت انه بدت تخف المواتر الي حوالينا .. يعني ماتم غير موترنا نحن وكمن
موتر ثاني .. هذا درب ليوا .. أنا اعرفه .. كله صحرا!
بعد دقايق كانت جدامنا شييشه، وقف عندها ونزل .. فكرت انزل واتصل على بخيت اي
يشلني .. هيه احسن، بي يشلني ، بس، بس بيعصب وبيذبحني هو الثاني .. مديت ايدي
بفتح الباب والي فيها فيها!
بس قبل ما افتح الباب كان هالريال داخل الموتر .. ساندت راسي وانا اصيح من
دون صوت وراصه على ثمي .. شو اسوي!
اصلا حتى لو بغيت اقوله اني انا هنيه ، بيشك فيني!
بيتحراني ينيه! .. شفته يفر كيس على الكرسي الي عداله وحرك الموتر وطلعنا من
الشيشه!
يوم اتجدمنا فالدرب، بدا الظلام صدق اي .. ماشي ليتات على طرف الطريج .. انا
هينه بغيت اموت من الزيغه .. شو اسوي ياناس!
حتى صوت صياحي بدا يعلا! .. رفعت عيوني صوبه .. شكله هب شرات هالشباب الخياس
.. يارب يارب يكون معرس .. ان شاء الله مايسويلي شي!
حطيت ايدي الثانيه على ثمي احاول اكتم صوتي .. بس ماشي فايده .. ارتجف واصيح
من الزيغه .. يااااااااااااااارب سترك!
.
.
| مايد |
.
.
فريت عني السفره و العقال ورديت الكرسي شوي على ورى .. كان الجو هادي و درب
ليوا دومه هادي اصلا، ظلام ، ومافيه سيايير وايد .. مديت ايدي بشغل المسجل،
بس جني سمعت صوت .. عقدت حياتي وانا اتصوخ .. شوه هالصوت؟! .. يمكن تليفوني
.. طلعته بس ماكان يصيح .. فريته على الكرسي عدالي وشليت ما ويلست اشرب منه
.. بعد ثواني يوم هدت حركتي وهديت، رد نفس الصوت .. جنه صوت حد يصيح .. بسم
الله الرحمن ..!
هديت السرعه شوي شوي وانا احاول اعرف من وين ياي الصوت، ياريال بتخبل!
صلبت ظهريه بقو يوم عرفت انه من ورى! .. بسم الله الرحمن .. منوه يصيح
فالموتر من ورى؟! .. بدينا بالتخريف يامايد، منوه بيكون فالموتر وياك يعني!؟
.. ام الدويس!
حطيت ايدي على الكرسي ولفيت على ورى بسرعه وانا عاقد حياتي .. فتحت عيوني بقو
وانا اشوف شي اسود يالس ورى .. و هالصوت بدا يعلا!
تميت اطالعه وانا ارمش بصدمه!
منوه هاي؟! .. واضح انها متلبسه عباه! .. من دون شعور قلت: بسم الله الرحمن
الرحيم ..
حسيت بالسكان لف مره وحده والموتر دخل عالرمل، لفيت بسرعه ورديت الموتر على
الدرب .. كنت اتنفس بسرعه واحس عظامي بردت! .. انا ما اتوهم .. فيه وحده
يالسه ورى عندي فالموتر .. صوت صياحها بدا يعلا .. وانا تنفسي يعلا! ,, بتخبل
من الروعه!
وقفت الموتر على طرف ونزلت بسرعه ... ياويل حاااااالي .. بسم الله عليه ..
: اعوذ بالله من الشيطان الرجيم .. بسم الله الرحمن .. شو الي شفت انا؟!
حكيت شعر راسي بقو اوانا افكر .. تكون صدق ينيه!؟ .. وانا كيف اصلا اشو الين
.. ؟ ,, هب قالوا مايروم حد يشوفهم! .. بسم الله الرحمن الرحيم!
اتجدمت شويه ومديت ايدي بفتح الباب .. بس هونت!
لو كانت صدق ينيه شو بسوي!؟ .. شو مايد متروع! .. الصدق اني متروع .. بس بعد
ابا اعرف شو السالفه!
فتحت الباب بعد ماسميت للمره المليون .. اول مافتحته صارخت فويه لدرجه اني
رديت على ورى: الله يخليك لاتسويلي شي .. و الله انا .. انا ماكنت .. هو بخيت
.. بخيت قالي .. وانته موترك نفس ابويه .. انا!
مافهمت غير بخيت قالي .. فجيت عيوني على وسعهن وانا اطالعها .. خطفت عدالي
سياره مسرعه فخزت عن الدرب بسرعه عن تدعمني واموت ونا متروع من ينيه!
وقفت عند الباب وهيه تصيح .. الينانوة يصيحون بعد؟!
قلت بسكون: انتي منوه؟! .. وشو تسوين فموتري؟!
طلع صوتي وايد واطي .. صدق اني ياهل!
يتني فكره ، الينانوة مايتمون فمكان فيه قرآن .. ركبت الموتر وشغلت سيدي سورة
الكهف عندي .. عليت ع الصوت شويه وطلعت ....
اذا كانت بعدها موجوده فهي هب ينيه، واذا روحت فهي ينيه، بسم الله الرحمن
عليه .. والله لو طلعت ينيه يني مادش الموتر مره ثانيه!
رديت عليها شفتها بعدها تصيح!
تنفست بقو وانا اتساند على ركبي واقول بصوت عالي: غربلج الله من بنيه
روعتيني!
وكملت وانا امسك الباب: تحريتج ينيه!
بس لحظه هالنبيه شو تسوي فموتري؟!
قلت بصوت عالي يوم ردت لي روحي: بس خلاص سكتي .. انتي شو تسوين هنيه؟!
قالت بصوت مبحوح: بخيت قالي بترياج برع .. وانا ظهرت وماريت غير هالموتر ..
ابويه ..
قلت بغيظ : بتقوليلي قصة حياتج انتي .. شو يايبنج هنيه؟! .. وكيف ماعرفتي انه
هب موتر بخيت هذا؟!
قال : والله تحريته مال ابويه ... هو كان مشتري لكززس يديده وانا اول مره
اشوفها .. فتحريتها مالته ..
وكملت وهيه ترد تصيح: الله يخليك لاتسويلي شي .. و الله مابخبر حد بس
لاتسويلي شي!
عصبت يوم قالت جيه جان اقول بعصبيه: وشو بسويلج ان شاء الله!؟ ..
قالت بقوات ويه: أنا اعرف انتو الريايل ماهم غير رغباتكم .. بتغتصبني!
فتحت عيوني وانا اقول باشمئزاز: يع .. جيه متحرتني افكر شراتج!؟
وكملت وانا ابعد شويه عنها: بنت منوه انتي؟!.
قالت : بنت عبدالله بن عيد!
: عبدالله بن عيد!؟ .. انتي بنت بو هند؟!
هزت راسها وقالت: والله ماكنت ادري انه موترك!
عقدت حياتي افكر .. شو هالمصيبه!؟ .. شو اسويلها هاي؟!
: شو هالعقل الي فيج ؟ .. يعني ماتعرفين ارقام مواتركم؟!
قالت وهيه تصيح: والله ماعرف .. دخيييييلك ردني البيت .. الله يخليك !
بندت الباب وانا اقول: حسبي الله ونعم الوكيل .. افففففففف، شو هالمصيبه!
ركبت الموتر وبندت المسجل، شو اسوي احينه!؟ .. اكيد يدورونها!
وان اتصلت بيتحرون اشياء ثانيه .. حركت الموتر وانا اقول: بوصلج عند البيت بس
من بعيد .. تنزلين و الله لو سمعت انج قلتي شي لهلج .. وقسم بالله ينج
بتشوفين شي ماشفتيه!
اففففففففف .. مصيبه والله!
بعد نص ساعه كنا واقفين بعيد شوي عن بيتهم .. بندت الموتر وقلت بهدوء: يالله
انزلي ..
قالت بصوت مبحوح: واذا تخبروني؟ .. شو اقولهم؟!
عصبت عليها: مش مشكلتي .. قوليلهم الي بتقوليلهم .. انقلعي يالله!
فتحت الباب ووقفت عنده .. لفيت عليها بقولها تنتبه مره ثانيه بس هيه قالت
بعصبيه: والله انك واحد خسف وماتستحي على ويهك .. مالت عليك!
فتحت عيوني على وسعهن من وقاحتها .. شفتها تمشي جدام الموتر .. نزلت بسرعه
بهزبها بس شفت واحد يربع صوبها ويعطيها طراق وصلني صوته، وقفت بصدمه، يارب
سترك .. شفته ايرها وراه وايدشون بيتهم .. ياربي شو اسوي .. خلها تولي هيه
الي يابته حق عمرها!
هايييلا مايتفاهمون، وان قلت الصدق مابيصدقوني .. لفيت بسير للموتر بس ماحسيت
الا وحد ايرني من ورى وواحد ثاني و اقف جدامي وعطاني بكس حسيت ظروسي تكسرت!
اصواتهم كانت عاليه مافهمت شي بس عرفت انهم يسبون .. حاولت ادافع عن عمري بس
هم كانوا ثنينه!
: حمد شله ويايه بنوديه داخل!
حسيت ابهم يسحبوني: ايييييييييييه لحظة .. انتو فاهمين غلط ..
لــــحظــــــــــــــــــــــــــــة!
حسيت عمري ياااااااااااهل وهم ايروني جيه .. قال واحد بغيظ: والله يتنذبح
اصبر انته بس ..
فروني داخل الحوي وقفوا فوق راسي .. عدلت كندورتي الي توصخت دم .. كنت بوقف
بس واحد منهم شاتني على ريلي وقال: منوه انته يالخايس؟! .. أرمس يالهرم!
مشيت الدم ووقفت بسرعه : محد هرم غيرك .. و ..
هجم عليه مره ثانيه بس هالمره قدرت ارد له الظرب .. قام الثاني وخوزه عني
وقال: جااااااااااااااااااااااااااب انته وهوه!
ابتعدت عنه شويه وانا اقول بصوت عالي : انتو فاهمين السالفه غلط ..
قاطعني الكبير فيهم: جب يالحيوان .. محد رمسك .. خل عمي اي ونعرف شو بنسوي
لك!
وقفت بعيد عنهم وانا امش الدم .. قلبي يرقع رقع ... انا قلت هاييلا
مايتفاهمون .. بس هب جيه!
فجأة سمعنا بغيم وظرابه فالبيت .. واصوات حريم .. ترابعوا داخل وانا تميت
واقف .. كنت اقدر اشرد .. بس جيه بأكد الي فبالهم .. فسرت الميلس اغسل ويهي
.. خييييييييييييبه ، ظرسي الي يدام طاح! .. شكلي نكته! .. و الله انك فايج
يامايد .. انفج باب الحمام بقو ووقف عنده هذاك الي ظربني .. قال بسخريه:
وبقوات ويه بعدك هنيه .. جان شردت؟!
وقفت بشموخ وانا اقول: لو شردت بأكد الكم الي تبونه .. بس ارد واقول انتو
فاهمين غلط!
قال بعصبيه وهو يتجرب منيه: فهمني كيف فاهمين غلط!؟
وكمل وهو يزخني: شايفنك بعيوني موقف موترك بعيد عن البيت ونزلت منه شما ..
وانته نزلت وراها .. الكتاب واضح من عنوانه!
سبيت عمري مليون الف مره على هالفكره الي طلعتلي .. لو موقف عند باب البيت
كان احسن .. فريت عني ايده وقلت بغيظ: والي خلقني وخلقك اني مش مواعدها ولا
عرفها!
قال بنفس العصبيه: هه .. تتحراني ياهل .. شما تقول انته الي قاص عليها!
وكمل بغيظ: تنجلع تيلس هنيه لين ما اي عمي ..
طلع من الحمام ومن الصدمه تميت واقف .. الخايسه تبلت عليه .. أنا أواعد
هالاشكال!
حطيت ايدي على راسي يوم يتني دورة .. مصييييييييييبه مصييييييييييبه يامايد!
رفعت راسي يوم دخل مره ثانيه: مطول يعني؟!
قلت: وين بوهند!؟
رفع حايبه بدهشه: تعرف عمي يعني!؟ .. صدق انك ماتستحي على ويهك!
طلعت من الحمام وانا اقول: هاتلي عمك .. انته ماتعرفني عسب جيه مابتصدقني!
قال بعصبيه: اها .. ياي عمي عيل ..
بعد دقايق دخل بو هند ووراه شباب .. بخيت عرفته .. و الثانيين ماعرفتهم ..
وقفت بسرعه وانا اشوفه معصب وويه محمر .. يلس وحط ايده على راسه بهم .. قال
واحد من الشباب: بسم الله .. بلاك يارياال؟ .. شو السالفه؟!
وقفوا كلهم ساكتين وقال عميه: مايد، سر غسل ويهك و عطوه كندورة غير هاللي
متلبسها!
فتحت عيوني وقلت بعصبيه: شعنه بعد؟! .. بوهند تراك فاهم السالفه غلط ..!
وقف فجأة وقال بصوت هزني هز: جااااااااااااااااااااااااااااااب ولا كلمه ...
يالخايس الي ماتستحي على ويهك .. تتحرا انك بتقص عليه مره ثانيه .. يايني
اونك تبا تشتري الريم وخلاف انته مواعد بنتي!
حسيت النفس انقطع عني، كلهم شهقوا .. قال العود فيهم: عمي شو تقول ؟!
اشرت بايدي وانا اقول بعصبيه: والي رفع سابع سماه يا بوهند الي ما اجذب ..
تخبر بنتك بعد .. انا اروحي استغربت شو تسوي فموتري؟!
قال واحد منهم: نعم!؟ .. عيد .. عيد شوقلت؟!
قال بوهند بنفس الصوت العالي: تغير كندورتك احينه و تتغسل .. المطوع ياي
فالدرب!
لا لا .. اي مطوع .. شو هالمصيبه الي طحت فيها يا مايد!
قلتله بصدمه: اي مطوع؟ ,., وحق شوه؟!
قال وهو ييلس: المطوع بيملج لكم!
شقهت وانا اقول: اي ملجه؟! .. بوهند ورفجة هلي انك تسمعني .. أنا ..
قاطعني مره ثانيه: انا قلت جب .. انته تحمد ربك اني ماذبحتك .. المطوع بيملج
لكم وانته ساكت ومنطم!
قلت بصدمه: منوه؟! ,., يملج لمنوه.!
كنت اعرف الاجابه بس ابا اتأكد ..
قال بهدوء والشباب الا يطالعون: انته وشما بنتي!
.
.
.
.
| شما |
.
.
نزلت راسي وساندته على اركبي وانا يالسه ورا الشبرية ..... كنت اصيح بقو من
الزياغ .. اصواتهم واصلتني من الصاله ..
كنت فصدمه بعدني، خدي ورم من صفعة حمد ولد عمي اقصد من تكفيخه!
حسيت بروحي راحت يوم شفته ياي صوبي يربع وعيونه تنقط شرار .. كنت ابا اربع ,,
اسير اي مكان، بس ما اطيح فإيده .. بس انا من الزياع والصدمه تميت واقفه محلي
وماحسيت بشي غير يوم فرني داخل صالة البيت وين ماكانت اميه وعلايه يالسات ..
كانت امايه تصيح وعليا واقفه وفاجه حلجها!
ياليته بس فرني وافتكيت منه .. لااا كفخني تكفيخ وسبني سب وامايه ماحركت ساكن
.. بعد ظرابه وصراخ خوزته عني عليا بعد موت .. حتى خذتهلها كمن ظربه .... كنت
جني اشوف كابوس جدام عيوني. بس هالكابوس كان واضح لدرجة خوفتني!!
يرتني عنه عليا وقالتله يظهر بس هو كان جنه شيطان فشكل انس، يوم شفته يلف
يمين ويسار جنه يدور عن شي، ويوم ربع صوب صينية الخظرة المحطوطة على السفرة
على طرف، طاحت عيوني على السكين الموجود هناك .. وتخبلت !
حسيت الروح ردت فيني فجأة وقوتي ردت .. ربع هوه صوب السكين وشله، وانا دزيت
عني عليا بكل قوتي الي ماعرف من وين طلعلتي، وربعت ربعان صوب حجرتي .. كان
يلحقني، حسيت به من صوته الي يخوف .. بس انا كنت اخف منه واسرع بندت الباب
بالمفتاح ورايه و انخشيت ورى الشبرية وماتحركت لين احينه!
سمعت صوت عليا عند الباب، وقفت بسرعه .. كان صوتها عالي : بخيت بس اظهر ..
اقولك سر عنها .. والله ان شبرت الباب بذبحك!
تحرك مقبض الباب ومادري جانه يتهيء لي ولا صدق الباب تحرك من مكانه جنه
بيطيح!
سمعت صوته يصارخ: فجي الباب يا عليا احسن لج ...
سكت دقايق وسكنت انفاسي انا لحظة .. بس ثواني، وحسيت بالدريشه الي وراايه
تنكسر ,, تابعت بعيوني الحصا العودة الي كسرتها .. وفجأة كان بخيت جدامي ،
يوم شفت ويهه بهالقرب مني، اطلقت العنان على قولتهم، صارخت وصارخت وصااارخت
لين ماسكتتني صفعة دورتلي راسي .. ومن بعدها ماحسيت بشي!
فتحت عيوني وماشفت شي .. كان الظلام فكل مكان و المكيف مشتغل .. حسيت بشوية
امان .. رديت اصيح مره ثانيه وانا اتحسس ويهي ... ظاع شبابج يا شما ..
ظااااااااع و انتهى .. انا كنت اتحرا انهم بيصدقوني على الاقل .. بس انا غبيه
.. غبيه والله اني غبيه .. لو قلت لهم الصدق .. ياليتني قلت الصدق ،
يااااااااااليييييييييييت!
غمظت عيوني بقو وانا اصيح .. ياربي شو بيستوي ... عدلت يلستي يوم شفت الباب
ينفتح .. حاولت اعرف منوه، بس ويهي منتفخ وعيوني مويفنات، شفت عليا شاله صحن
وكوب ما .. حطته عند الباب وردت بندته بالمفتاح .. نزلت راسي يوم تقربت مني
.. يلست عدالي بعد ما فتحت الليت .. سمعتها تقول: شما واعيه؟!
رفعت ايدي وحطيتها على خشمي .. قلت بصوت مبحوح وانا ارد اصيح: عليا .. انا!
.. و الله ماكنت وياه!
حسيت بصوتها وايد ضعيف ..: شما عيال عمي شافوج وانتي نازله من موتره .. هب
لازم تنكرين .. و السالفه كلن درا ابها خلااص!
: والله .. و الله اني ماعرفه .. والله العزييييييز!
قالتلي وهيه ترفع راسي وتقول بحنان .. اول مره الاحظ انه صدقي: خلاص فديتج ..
نشي بلي ريقج وكلي شي .. الساعه 10 ونص، ماصليتي العشا بعدج ..
حاولت ايلس بس ماقدرت .. قلت وانا اغمظ عيوني: ماحد بيصدقني .. محد!
قالت: نشي احينه وخبريني شو السالفه!
يلستني بعد موت وانا احاول ما اصيح .. خبرتها السالفه كلها .. جان تقول: ليش
جذبتي عيل؟! .. لو قايله الصدق؟!
هزيت راسي بخوف وانا اقول بسرعه: تروعت منهم .. ماعرفت شو اقول .. ماعرفت ..
قالت بغيظ: وعلى طول يا الجذب فبالج!
وكملت : صدق انه بوطبيع مايوز عن طبعه!
رفعت حايبي: شوه؟! .. انتي احينه ويا منوه؟!
لفيت بسرعه صوب الباب الي اندق بقو وصوت بخيت : عليا فجي!
وقفت عليا بتفتح وانا تخبلت يوم شفتها واقفه، زخيتها من كندورتها وعلى طول
بديت اصيح: لا لا علاااايه لاااا .. الله يخليج لاتفجين!
خوزت ايدي عنها وقالت بصرامه: بشوف شو يبا ..!
رديت ازخها: والله لا .. دخييييلج لاااااااء!
بخيت: عليا فجي الباب ولا بكسره!
قالتلي بهدوء: مابيصكج وانا هنيه ..
شفتها تسير صوب الباب، وتفتحه، ويه بخيت الي طاحت عيونه عليه ... كان يخوف،
جنه اسوووود!
قال بصوت عالي: خليها تي يالله !
عقدت حياتي بخوف : اي ؟ اي وين؟!
لف عليه وقال بصراخ: جااااااااااااااااب و لااا كلمه!
وكمل: لبسيها عباتها يالله خلصيني!
عطاني ظهره وهو يقول: خسارة العمر فيج و الله!
صيحني قوله ... حطيت ايديه على ويهي وقلت بصوت عالي: والله ماعرفه .. و الله
ماااعرفه انا بالغلط ركبت الموتر اتحراه مال ابويه!
وقفتني علايه وهو تقول: نشي شما، مابسيرين مكان، بس بيتخبرج المطوع جانج
موافقه ولا لاء!
فتحت عيوني على وسعهن .... مطوع؟! ,, اي مطوع!
لف علينا وقال بصوت عالي يخوف: بتقول موافقه ولا بدفنها حيه!!
حسيت بروحي تطلع وانا البس العباه بصدمه ... يوم وصلنا صوبه، مسكت ايده وقلت
بانهيار وانا اصيح: بخيت ياخويه والله ماعرفه .. قسم بالله والي خلقني وخلقك
اني ركبت بالغلط و ..
دفرني عنه بقو لين ماطحت وهو يطالعني نظرة حزينه: ولا كلمه .. جدامي يالله!
حسيت اني خلاااص بموت .. زحفت عند ريوله وانا احاول احبهم واقول:
دخييييييييييييييييييييييلك لاء و الله مابا لا الله يخلييييك!
ماحسيت غير بحد ايرني من شعري ، يوم سمعت صوت ابويه ....... اقشعر جسمي، وصدق
، صدق حسيت بالموت يظحك جدامي!
: لسانج تصرطينه ... بيسألج المطوع وتقولين موافقه وانتي خايسه!
صرطت لساني، صرطته وسرت وياه، عفواً ...... يرني وراه!
سألني المطوع اذا كنت موافقه .. كنت منزله عيوني فالارض .. بخيت عن يميني
وابويه واقف جدامي حاط ايده على رقبتي، وراص عليها بقو .. قلت بصوت بالكاد
،بالكاد سمعته انا: موافقه!
قالي ابويه بصوت عالي: علي حسج!
حطيت ايدي على ايده وضغطت بقو وانا اجمع قوتي: موافقه!
.
.
نفس الوقت ،
| عليا |
.
.
كنت واقفه ورى باب الصاله واشوف ابويه واقف ويا شما وبخيت .. شفتهم خلصوا
فقلت بسير انخش عن يذبحني ابويه .. وقفت فنص الصاله اترياهم ايون .. بس مايا
غير بخيت الي اشرلي اييه ..
وقفت عنده جان يقولي: تعالي ابويه يباج!
قلتله بخوف: ليش؟ .. شو السالفه!؟
قال بهدوء وهو منزل راسه: المطوع بيسألج عن شي!
رمشت بهدوء وانا اقول بغبنه: شوه؟! .. بخيت انته شو تقول؟!
سمعنا صوت ابويه من برع: بخيت .. يا بخيت!
مسكني من ايدي وقال: تغشي!
رفعت طرف الشيله وتغشيت ابها واانا اقوله: شو السالفه؟! شو استوى على شما؟!
قالي: تعالي انتي ..!
مشيت وياه وانا قلبي يرقع رقع ... شما مب موجوده؟! .. وين سارت؟ .. وقفت عدال
ابويه الي حط ايده على جتفي وقال: جاوبي على المطوع يابنتي!
فتحت عيوني على وسعهن يوم قال المطوع: انتي عليا بنت عبدالله بن عيد؟!
قلت بهمس: هيه ..
قال بعد لحظة: يابنتي موافقه على ولد عمك حمد بن سلطان؟!
فجأة .. ماحسيت بالدنيا ... كنت اطالع بخيت واقف جدامي، ومركزه فويهه ، بس
فجأة صغر ويهه واستوت الدنيا كنها ادوووووور .. مديت ايدي ومسكت ايده بسرعه
.. ضغط عليه بقو .. وانا رديت للواقع يوم سأل مره ثانيه : موافقه على ولد عمك
حمد يابنتي!؟
قالي ابويه بهمس: ردي عليه يا عليا!
لفيت عليه ..... قلتله: ليش يابويه؟! .. ليش؟!
عقد حياته وقال بصوت عالي: يالطيب بنتي ماسمعت سؤالك ..
عاد المطوع نفس سؤاله .. نزلت راسي وانا اضغط بايدي الثانيه على صدري: هيه
موافقه!
و كل أحلامي، كل لحظة تخيلتها ويا خالد ..... غابت ويا المطوع الي خذ
الموافقه وروح ويا ابويه ...!
حسيت بالدنيا ادور ..... انا شو ذنبي؟!
ماحسيت بعمري يوم مسكني بخيت عن اطيح .. قالي بهدوء: استهدي بالله يا عليا ..
ورب ضارة نافعه ..
حطيت ايديه على ويهي وصحت : ليش؟ انا شو ذنبي؟ .. ليش جيه يسوي!؟
قال وهو يوقف: بس عليا .. احينه سيري لشما تلقينها فالموتر فالحوي .....
وحطيلها اي لبس جاهز ، بتسري ويا ريلها احينه!
روح عني وخلاني ... ويا بقايا احلام و .... نفس حتى!!
وقفت ببطء .. على االاقل انا هب الي بتسير ويا ريال ماتعرفه .. على الاقل انا
اعرف ولد عمي، بس شما .. شما الي ماتعرف شي عن هالريال الي بيشلها ..
سرت صوبها ببطء وانا احاول ما اصيح .. كانت يالسه فالموتر من جدام .. صوتها
وهيه تصيح وصلني .. فتحت الباب وقفت عنده ... طالعتني بعيونها الحمر .. قالت:
قالي بيشلج احينه! ... بسير وياه يا عليا ..
عقب كملت وهيه ترد تصيح: بموت من الخوف .... بيذبحني يا عليا .. شو اسوي!؟
مديت ايدي وحطيتها على شعرها ومسحت عليه: تعوذي من الشيطان .. اقري الي حافظه
من القرآن و استغفري .. ربج كبير يا شما .. واذا ابويه وهليه ماصدقوج .. الله
ان شاء بيسخرلج ريلج ويصدقج ..
قالت بغبنه: انا خايفه ..! خايفه وايد ..
قلتها: شما فديتج سمعيني .. مهما كان اسمعي الي يقولج ريلج .. بس لاتذلين
نفسج له ... صح انتي غلطتي .. بس هالشي مايسمح له انه يذلج .. تسمعين؟!
هزت راسها وقالت بسرعه: اذا شفته احينه شو اقوله؟!
:لاتقولين شي .. خليه هو الي يرمس .. ولا تنسين انه ريلج وله حقوق عليج!
فتحت عيونها وقالت: اي حقوق؟! .. لا شو حقوووق .. علااايه انا مغصوووبه
عليه!!
ابتسمت بحزن وانا اقولها: شما حقوقه من حقه ، حتى لو كان عدوج!
شهقت وهيه تقول: يا ... يا علااااايه!
لفيت اطالع الميلس الي ظهر منه ريال منزل راسه .. هذا هو مايد .... رفع راسه
وطالعنا عقب نزله .. وقفت انا بعيد شوي وبندت بااب شما .. قلتلها قبل ما
اسكره: انتبهي لنفسج .. وانا عندي تليفونيه .. اذا استوى عليج اي شي .. اي شي
اتصلي وخبريني ... الله يحفظج ياختي .. ويهديج يارب.
بندت الباب وانا اسمعها تقول وهيه ترد تصيح: علايه سمحيلي والله انا آسفه ..
آسفه على كل شي!
فتحت الباب وحبيتها بين عيونها وانا اقول ودموعي اطيح: فديتج انا .... انتي
اختي ما اسمح لنفسي ازعل منج على اشياء المفترض اكون أنا العضيد فيها ..
انتبهي لنفسج .. وطمنيني عيلج ..
هزت راسها و انا بندت الباب وابتعدت شوي .. اتجدم هو وسلم .. قلتله: : السلام
عليك .. كنت اترياك عشان اقولك ان شما مظلومة شراتك .. و الله يقول: "ولا
تَزِرُ وَازِرَةٌ وِزْرَ أُخْرَىٰ "
قالي بهدوء: يزاج الله خير ..
وسكت ... انا يوم شفته يتجدم رديت للبيت .. وقفت عند باب الصاله لين تأكدت
انه طلع من البيت .. وبندت باب الصاله ورايه .. يلست على اول غنفه جابلتني
.... وفتحت منااااااحه!
تميييييت اصيييييح واصييييييييييح!
ماصدق اني غديت حرمة حمد .. كيييييييييف استوى هالشي ..؟! .. كيف سمحت لنفسي
اكون لغيره .. انا واعدتنه؟!
كيييييييف؟! .. رفعت راسي .. كانت امايه واقفه عند باب القسم .. قالتلي: سارت
ختج؟!
هزيت راسي بهيه .. قالت: وليش تصيحينها ان شاء الله!؟ .. نشي غسلي ويهج وسيري
ارقدي ..
ماصدقت رمستها .. كيف تكون قاسيه جيه .. قتلها وانا اوقف: انا ما اصيح شما ..
انا اصيح نفسي الي انجبرت اسوي اشياء انا هب الغلطانه فيها!
قالت باستغراب وجمود: ليش؟ .. شو سويتي انتي بعد!؟
رفعت حايبي .. تنهدت وانا اقولها: تريبتج يا اميه .. دلعتيها وايد .. اكيد
بيكون دربها معواي!
سكتت .. جان اكمل: حمد ولد عمي ملج عليه. ..
شقهت: اشوه!؟ .. وشو خصج انتي وحمد!؟
قلتها وانا امسح ويهي: اسألي ابويه ..
وكملت بغبنه: مع ان خالد ولد خالتي خطبني قبله!
قالت بصدمه: ملج عليج!؟
كنت بكمل رمستيه بس بخيت فتح باب الصاله وقال: عليا .. سيري الصاله الصغيرة
حمد يباج!
فتحت عيوني بصدمه: شوه؟! كيف يباني بعد؟!
قال : يباج بيرمسج .. ابويه قاله سر الصاله الثانيه!
رمشت اكثر عن مره ...... حسيت بضيق تنفس ... دوايه ماخذته! .. يلست وانا اضغط
على صدري .. قالي: خذتي دواج؟!
هزيت راسي بلاء وانا اقول: لاء .. سير هاته الله يخليك تلقاه فسدتي الثانيه
..
ربع داخل وبعد دقيقه كان واقف فوق راسي وشاله فايده ويا الكوب .. خذت الدوا
وتميت دقايق مغمضة عيوني .. ردت لي الروح .. جان اقوله: انا مستحيل ايلس وياه
قبل العرس ... كيف اصلا ابويه يقوله سر عندها؟!
مسك بخيت ايدي ووقفني .. قال: نشي ويايه عليا .. واصلتلي هنيه .. لاتخليني
اطلع حرة الخايسه فيج!
وقفت وياه بانصياع وانا اقول ببرود: هيه .. هاذو انتوا .. تاخذون اغلاط الغير
وتحطونها على الي مايخصهم ..
خوزته عني ايده وانا اقول بصوت عالي: مايحتاي تقودني .. انا هب مسويه شي غلط
عشان جيه ترمسني .. واحترم نفسك انا بعدني اكبر عنك ..
دخلت شعري ومسحت ويهي بالكلينيكس و سرت الصاله الثانية .. بنشوف حمد شو يبا!
فتحت الباب بعد ماتغشيت .. وقفت عنده وسلمت: السلام عليكم ..
كان يالس على الغنفه، من دون سفره ولا قحفيه .. وقف بسرعه وهو منزل راسه
وقال: عليج السلام ... حياج بنت العم .. يلسي!
تميت واقفه عند الباب جان يرفع راسه ويقول: مطوله وانتي واقفه؟!
قلتله: نعم حمد؟ .. ممكن تقول الي تبا؟!
تنهد .. عقب رفع راسه: شوفي يابنت الناس .. انا ماباج!
و أعرف انه خالد ولد خالتج يباج وخطبج .. انا بخليج على ذمتي كمن شهر عقب
العرس وبطلق .. عقب بيخطبج خالد !
رمشت بقو ... يوم قلت انهم انانيين، ماكنت واثقه .. احينه انا متأكده اميه
بالاميه ان الي جدامي ااناني درجة أولى!
قلتله بصرامه: اسمعني يا ولد العم .. يا ريلي .. انا هب بنت شوارع تلعب بي
جيه .. انا بنت عمك، من لحمك ودمك .. ان طلقتي عقب العرس على قولتك، مابييك
شي، انا الي باكلها .. وانا الي مايخصني شي اصلا!
و كملت وانا اطلع: طلاق ، طلق لو تبا من احينه .. بس تذكر اني مستحيل ارظاها
لخواتك لو هن فمكاني .....
كنت بطلع بس كلامه وقفني: انا رمست خالد .. ورخصتج له .. بس سالفة ختج
الخايسه هيه الي خبصت كل شي! و ابوج عصب وانا بما اني ولد عمج .. ما ارظاها
لنفسي ان اقوله ازقر ولد خالتها خله يملج عليها!
لفيت عليه .... سكت وتم يطالعني .. قلتله بهدوء وبرود: انا مايخصني .. انته
احينه ريلي .... اذا طلقتني عقب العرس، او قبله حتى، بترد السالفه عليه انا
وانته بتظهر منها .. بس ، طبعاً بيك شي من الرمسه، و لا ليش ولد عمها طلقها؟!
وكملت بصعوبة: وصدف انه فنفس الوقت الي طلعت منه اختها من البيت معرسه من دون
لا عرس ولا اي شي؟!
سكت مارمس حتى .. تنهدت انا وكملت: حمد .. انا موافقه عليك خلاص .. خلونا
نخلص من هالسالفه ......... عن اذنك!
طلعت من الصاله ... ونسيت قلبي ورايه!
.
.
قبل دقايق!
| مايد |
.
.
كنت منزل راسي وانا يالس فالميلس .. جدامي عبدالله ، العود الي من عرف
السالفه وهو يطالعني باستحقار!
واخوه الصغير .. عيد ، هذا الثاني كان منسدح على الغنفه ويطالعني بنظرة حزينه
.. ماعرفت على شوه! .. يمكن كان يباها!
رفعت راسي يوم دخل بوهند ووراه بخيت!
وقفت انا ببطء .. قال بخشونه: يالله شلها وروحوا، وان شفتك انته ولا هيه مره
ثانيه ذبحتكم وفريتكم للجلابه!
كمل عنه بخيت: الطيور على اشكالها تقع!
طالعتهم بنظرة خاويه، الرمسه ماتفيد عندهم! .. خطفت وقلت بهدوء: الله ع
الظالم بس!
قال عبدالله الي وقف عند عمه: و الله يمهل ولا يهمل يا مايد! .. تذكر زين
انها بترد على هلك!
يوم قال جيه نطت شياطيني .. شما ومها! .. مستحيييييل يسوونها خواتي واعرفهم!
قلت بصوت عالي وانا الف عليه: الي يربي زين يا عبدالله مايخاف .. شوف الي
ياكم من تربيتكم!
وكملت وانا اطلع: والي ويهه ابيظ، عمره مايسود!
طلعت من الميلس، رفعت راسي للسما وتنهدت .. يارب عفوك! .. كانت اللكززس موقفه
فالحوي .. و الله يلعنج من لكززس!! راس المشاكل كلها!
شفت حرمه واقفه عندها .. عرفت انها ختها، اكيد امها مابتي توقف هنيه!
اتجدمت ووقفت بعيد شويه!
قالتلي من بعيد: السلام عليك .. كنت اترياك عشان اقولك ان شما مظلومة شراتك
.. و الله يقول: "ولا تَزِرُ وَازِرَةٌ وِزْرَ أُخْرَىٰ "
رديت عليها: يزاج الله خير...
ماعرفت شو اقولها الصراحه .. انا اصلا ميت تعب وين بسوق احينه!
رفعت راسي وشفتها يالسه جدام .. بقواااااااااات ويه .. في ذمتي ذمه .. و الله
الي خلقني ، ماسكت لج يالمفعوصه الجذابه!
ركبت عدالها وانا احاول اسيطر على اعصابي!
شوفوا المفارقه، طلعت من بيتهم ابا اشتري الريم، و ظهرت منه منقهر على اني
ماشريتها .. واحينه طلعت منه مكفخ وبذبح عمري من القهر على السالفه!
يوم تأكدت انا طلعنا عن الشعبيه، وقفت الموتر على طرف وقلت بصوت هادي: اطلعي!
شقهت شهقه حسيت ان روحها طلعت وياها! .. رديت اقول يوم ماتحركت: قلت اطلعي من
موتري!
سمعتها ترمس تقول شي .. واتذكرت يوم سمعت صوتها فموتري اول مره وكيف اني
تحريتها ينيه، ياليتج طلعتي ينيه .. على الاقل الينانوه مايوزون بهالطريقه!
.. قلت بصوت عالي: قلت انزلي!
قالت بصوت مبحوح: ليش؟!
يوم قالت جيه! ... خلااااص انا زورت مديت ايدي على كل شي جدامي الهرن السكان
الي لفيته والاوراق الي كانت جدام وكل شي جدامي ظربته وانا اصارخ:
لييييييييييييييش؟ لج عيين تسأليييييييييييين!؟ .. يالجذاابه الخاااايسه
تتبلين عليه !؟ انا .. انا مايد جيه يستويلي!؟ .. كيف تسمحين لنفسج جيه
تسوييين!؟! .. مافيج حيا انتي!؟ ماعندج مذهب!
مديت ايدي ومسكت فكها بقو وانا اخوز الغشا عن ويها: ويهج لوح؟! .. تتبلين
عليه وانا الي ساعدتج؟! .. كيف سمحتي لنفسج!
كانت عيونها متورمه، ويهها منتفخ .. خشمها احمر وشفتها متورمة وعليها بقايا
دم .. فريت ويها الصوب الثاني وانا اسمعها تصيح !
يااااااااااااربي شو اسوي احينه؟! .. صارخت مره ثاااانيه: انجلعي يلسي ورا لا
اذبحج احينه!
نزلت بسرعه وركبت ورى .. مسكت راسي وتساندت على السكان... تم الهرن يصيح وانا
مهوس على صدغي ... راسي يدور وعيوني تعورني، كل شي فيني يعورني ... رفعت راسي
وقلتلها: اذا ماسكتي بفرج هنيه تراني!
كانت تشهق وتصيح بقو .. لو انا فموقف ثاني كان حن قلبي عليها .. امبوني على
قولت اميه حنين! .. بس انا يوم اعصب ماعرف اميه من ابويه! .. على طاري
ابويه!؟ .. شو اقوله؟! ,, اصلا شو اقولهم كلهم؟!
حركت الموتر .. بسير ليوا .. المزرعة هنيه محد ايها , بيلس فيها ويا هالبلوة
وبحاول اعرف كيف احل هالمصيبه!
بعد ساعه وربع من الهدوء الي يتخلله شهقاتها وتنهيداتي انا .. وصلنا المزرعه
.. وقفت الموتر برع وهرنت على البيدار عسب يفج الباب ... طلع بسرعه مستغرب
ويوم شافني فتح الباب ..
دخلت الموتر ووقفت فالنص .... المزرعه وايد عوده .. والفله كبيييره .. شو
بسوي ابها هاي الي عندي؟!
ماعندي اي فكره عن كيف بعاملها؟! .. شو اسويلها!؟ .. كل الي اعرفه احينه اني
ابا اتسبح وارقد!
نزلت من الموتر ولاقلتلها شي .. خلها تولي .. بس عقب رديت صوبها ، فتحت الباب
ومديت ايدي ومسكتها ويريتها ويايه!
قالت: آآآآي ايدي!
هيه اصلا كانت متوازنه عليه ، ويوم فريت ايدها طاحت .. طاح غشاها وهيه تقول:
حرام عليك انا الا مظلومة شراتك!
: هه! .. قلتيلي مظلومة؟! .. منوه الي تبلا على الثاني؟! .. سكتي بس
والحقيني!
قالت: شو بتسويلي؟!
يوم قالت جيه! ,, على طول يا فبالي الي استوى فالموتر .... اذكر انها قالت
بتغتصبني؟!
ههه ياج الي تبين يا شما! .. كانت بعدها طايحه .. وخيت عليها وقلتها: تحيدين
شو قلتي فالموتر.!؟
رفعت عيونها صوبي ... تميت اطالعها ... مع انها متورمة ، بس عيونها واظح انهن
وساع وخشمها سلة سيف .. بشرتها شكلها كانت ناعمه بس الظرب خلاها تكون مجرحه
جيه!
قالتلي: شو بتسويلي؟!
مديت ايديه الثنتين وانا ابتسم بخبث ، وشليتها .. ياخي انا ريال! وعطوني حرمه
ابلاش!
وهي اروحها معصبه بي، ومتهمتني فوق كل هذا، وقبل تقولي اونه مادري شو
اسويلها!
كانت اطالعني بعيون اونها مفتوحه!
خطفت باب الفله وانا اقولها: بغتصبج بالحلال!
.
.
| مايد |
.
.
طالعت ويهي فالمنظرة .. حشى قطوة !! .. كان ويهي مجرح من كل صوب جني مظارب
ويا قطوة .. اصلا انا ماكنت بسوي الها شي ، بس ابا اراويها اني اقدر اسوي الي
ابا ... بس فكرة كانت و الله .. لو بس هيه شوي هدت .. كان!!
الله يلعن الشيطان! ..
نزلت راسي تحت الماي وانا اتنهد .. شو اسوي ؟! .. اسير الهم مره ثانيه
واحايلهم!؟ .. يعني حتى لو ماقبلوا، انا شو اسوي بهاي القطوة الي عندي؟!
امايه طبعاً مابتوافق .. اووووه يا اماايه مشكله ثااانيه بعد! ... افففف!
بندت الماي وطلعت .تلبست بسرعه..... وين التقعت هاي بعد!؟ .. طلعت برع الفله
وسرت صوب حجرة البيدار ...: محمد هات المفتاح وسير المزرعه .
أحسن شي اسويه احينه، اني اخذ مفاتيح الحجر و البيدار اخليه يسير المزرعه
الثانيه. مافيني احينه يخبر اميه اني ييت وويايه حرمه!
يوم طلع بالكلوزر بندت باب المزرعة وراه ورديت للفله .. بندت الباب بالمفتاح
مرتين عن تشرد بعد! .. اتخيل شكلي اسير ادور الها! .. قسم بالله مصخره!
.
.
| شما |
.
.
يلست ورى الباب وانا اشهق! ..... هذا هب هوه نفسه الي كان فالموتر..
مستحيييييل ... هو ماسوالي شي يوم كنت عنده و لو حتى فكر محد كان بيعرف ..
احينه جيه يسويلي!؟؟
طالعت ظفوري الي فيهم آثار دم .... وظحكت ... جني مينونه.. على الاقل طلعت
حرتي شويه وشمخت ويهه الي فرحان فيه!.. مسحت ويهي وانا أحاول اهدي نفسي ....
بعد لحظات استوعبت اني كنت قبل شوي فأحضان ريال غريب عني! ..... بس غربله
الله حليو!
شو بيستوي احينه .. سمعت خطوات برع الحجرة .. وقفت على طول وسديت الباب بظهري
.. و الله لو يحدر احينه ..... ماعرف شو بسوي!
حسيت بمقبض الباب يتحرك .. لا لا !!
سديته بقو وانا أحاول ما ارد واصيح .. على قولت عليا انا صح غلطت بس ما بذل
عمري له!
لحظات ونقزت بعيد عن الباب يوم اندز بقو وانفتح .. طالعته بعيون مفتوحه
ومتروعه ... كان ويهه احمر ومتلبس شورت وفانيله كت .. شكله يخوف!
ابتعدت شوي شوي وانا اشوفه جدامي .. اتذكرت يوم يرني بقو وفرني فالحجرة .....
عورتني عظامي .. كان يتجرب وكنت انا ابعد، لين ماصكيت اليدار .. وقفت جدامي
بهدوء وانا عيوني مقدرت اخوزهن عنه .. تساند على اليدار عدالي وبايده الثانيه
مسح على شعري .. غمظت عيوني ونزلت راسي .. ابا اماااايه! .. و الله ما اسوي
شي حتى ما اطلع من البيت .. بس ابا اماااايه!
مسك شعري من ورى وقال بهدوء: ليش متروعه؟! .. خلاص انتي حرمتي احينه!
شهقت وانا احط ايدي على ثمي .... ماقدرت ارد عليه من كثر ما انا اصيح!
نزل ايده لين ماوصل لخدي ومسح دموعي ... يوم سوى جيه حسيت بجسمي اقشعر ...
ابا حظن اامايه اصيح عندها وتهديني .. وهذا مستوي حنون فجأة!
قرص خدي بقو وهو يصارخ: جاااااااااااااب! .. اسكتيى عشان اتفاهم وياج!
نقزت محلي من صوته العالي .. بس صحت اكثر .... رد يقول بهدوء: اسمج شما صح؟!
هزيت راسي بقو وانا افتح عيوني .... طالعته ، كان وييه جريب وايد، مكان ظفوري
واضح ..... حسيت به يتقرب مني ويقول فاذني: ان ماراويتج ان الله واحد ...
ماكون مايد ولد ابوه!
ابتعدت عنه بقو وانا افتح عيوني على وسعهن ...... طالعته بغبنه وانا اقول:
انا شو ذنبـ..
كان بيمد ايده عليه، بس ظرب اليدار الي ورايه وقال بتهديد: تنثبرين هنيه ..
وان شبرتي الحجرة ........ سويت الي اباااااه فيج!
لفيت عنه بحزن .... هذي آخرتها .... واحد ماعرفه يهددني جيه!
فجأة يا فويهي عيد ولد عمي ...... يوم عصبت به ودزيته يوم كان مريظ!
قلبي عورني .. ماحسيت به يوم طلع ويوم بند الباب بالمفتاح وراه .. كل الي
احسه اني ابا امايه .. نزلت شوي شوي وضميت نفسي وتميت اصيح ..
.
.
| عيد |
.
.
شفته يوم يوقع، ويوم يترادد ويا عمي وخواني، كنت يالس عدال عمر منصدم!
شما؟! .. شما بنت عمي مواعده مايد!؟ .. شو هالمصيبه هاي؟!
قالي عمر: لو انا من عمي كان ذبحته الهرم!
انا ما كنت وياه! .. كنت افكر كيف قدرت شما تواعد ، كيييييييييف؟!
انا عرفت انه هالبنيه فيه حركات هب حلوة .. بس انها تواعد!؟ .. والله قويه!
كان عبدالله يالس عدال عمي يهديه، وحمد واقف عند الباب، وبخيت فبيتهم .. احسه
بيموت من القهر، عمي اصلا زين انه ماطاح علينا .. شفته يوقف هو وعبدالله
وطلعوا من الميلس .. بعد فتره كل واحد روح .. انا تميت اتريا بخيت .. بطالع
شو بلاه مايا!
شو بعد شوبلاه؟! .. اكيد منقهر!
عيل ليش قالت لبخيت انها تبا تسير الخياط؟! .. يوم انها بتواعد؟!
غريبه والله!
شفت بخيت يدش وويهه مسود!
اول مادخل قال بصدمه: انته هنيه؟!
قلت وانا اوقف: هيه .. شحالك؟!
قال بعصبيه: تتخبر عن حالي .. بتخبل يا عيد .. بتخبل من هالبنيه!
سكت عنه .. اباه يطلع الي فخاطره ولا بينفجر قال بنفس الصوت العالي: تخيل؟ ,,
كانت مواعدتنه؟ .. وهو بقوات ويه ياي هنيه اونه يبا يشتري الريم .. ثره
مواعدنا الهرمه!
رفع ايده فالسما وقال: يااااااالله يعلها تمووت ونفتك منها!
زخيت ايده وقلتله: بس بخيت .. مايسوى عليك .. خلها تولي احينه هو ريلها استوى
خلهم يولّون ثنينتهم!
قال بصراخ: و العرب الي درت .. شو نقولهم!؟ .. شووو نقوووول!
قلت باستغراب: محد عرف بخيت؟!
قال: لا والله .. تراهم خوانك سطعوهم جدام الباب .. وماتم حد من الشعبيه
ماعرف!
قلت بهدوء: بخيت حمد يقول شافوهم عدال البيت وزخوه وفروه فالحوي هنيه .. محد
عرف!
يلس على الغنفه وزخ راسه بصدمه وهو يقول: انا ماصدق الصراحه .. شما، شما
الصغيرونه جيه تسوي؟! .. كيف ومتى؟!
يلست عداله وقلت بغيظ: الصراحه يابخيت انا ملاحظ عليها حركات من زمان!
لف عليه وقال بسرعه: وشعنه مارمست؟! .. لييييييييييييش خليتنا بعمانا!؟
قلتله بهدوء: احينه مايفيد هذا .. قولي عمي رقد؟!
قال : هيه رقد .. واظني الا انه مابيرقد ,, دخل حجرته .. الخايسه تصيح وتقول
انه هوه الي غصبها تطلع وياه؟!
قلت: هذا هوه مايد ولد عم نسيبنا صح؟!
هز راسه بهيه .. كملت: كيف عرفها؟! ..او هي كيف تعرفت عليه؟!
قالي وهو يوقف: ماعررف انا .. كل الي اعرفه اني لو شفتها طالعه من حجرتها
والله يدفنها هنيه!
كان بيطلع عقب قال: سمحلي عيود بسير اطيح شويه ولا بتخبل من التفكير!
قلتله وانا اطلع وياه: افا عليك ولد العم .. ربي يحفظك وتصبح على خير!
قال بهدوء: ونته من هله ..
طلعت من بيتهم .. لحظة حمد سار عني .. منوه بيوصلني احينه!
اتصلت على عمير ابغيه يشلني، بس تليفونه كان مغلق!
اتصلت على عمر، نفس الشي.. وحمد مايرد .. عبدلله مستحيل اتصل عليه ..
جربت اتصل على البيت ، يمكن اميه واعيه ,, اتخيل هيه اتي تشلني ههههههههههه!
: مرحبا ..
: ماااااامااااااااااتي ..
قالت بروعه: بسم الله .. بلاك عيد؟!
قلت بظحكه: اماايه محد عندي ايبني .. شو اسوي!؟
قالت بغيظ: غربلك الله وانا اتحرا شي استوى عليك .. وين انته؟!
قلت بتمسكن: فدييت اميه انا ... حليلي واقف عند بيت عمي شرات الناطور ..
قالت بهدوء: يالله يايتنك انا ..
بندت عنها وانا اظحك: زين اترياج!
يلست عند باب الميلس من برى ... والله وعرست الخايسه! .. تذكرت هاك اليوم يوم
طيحتني .. و الله ما انساها لها .. آخر زمن والله ..
بعد عشر دقايق شفت موتر امايه .. سرت صوبها يلست عدالها ..
قالت: شعنه ماييت ويا خوانك!؟
قلت وانا احب راسها: فديييت اميييه انا .. روحوا عني الهروم!
طالعتني بنظره وقالت: محد هرم غيرك .. كلهم اكبر عنك!
قلت بهدوء: عااادي امييه عاادي!
طلعنا من الشعبيه وهي تقول: شو كان عنده عمكم؟!
لفيت عليها باستغراب: جيه محد خبرج؟!
قال: له .. عبدالله ارمسه يقولي باجر هب متفيج .. وحمد ماشفته ، عمير وعمير
رقدوا!
قلت: اها .. مممممم ماعرف شو اقولج الصراحه!
قالت بعصبيه: شو تقول بعد .. قول الي استوى!
قلت ببساطة عن تعصب عليه: شما بنت عمي ملج عليها مايد بن علي ...
شقهت ولفت عليه بصدمه: اشوووووووووه!؟ .. شما عرست؟!
قلت: هيه .. اميه طالعي الدرب عن تنفدينا!
لفت على الدرب وهيه تقول بنفس الصدمه: شقا بعد تعرس؟! .. وعليا؟! .. بعدين
منوه هالمايد؟!
قلت وانا اسدح الكرسي: مايد ولد عم ريل مريوم ختيه ..
قالت: ولعثره، شو وداها هناك .. عنبو ولايخبرون حد!
قلت وانا اغمظ عيوني : شدراني ابهم .. اذاوصلنا البيت وعيني!
حطيت ايديه تحت راسي وانا افكر .. شما وعرست .. وعليا بياخذها حمد خويه ..
ومبارك اسمعه يخبر اميه يقول بيرد حرمته .. تميت الا انا وعمير وعمر .. انا
كنت حاط فبالي شما الصراحه .. بس يالله خيرها فغيرها!
يوم وصلنا البيت ، شربت لي ماي وانسدحت برقد ..
ورقدت وويه شما فمخيلتي!
.
.
اليوم الي عقبه ..
الساعه 7 و7دقايق بتوقيت جنوب أفريقيا –جوهانسبورغ-
المكان : شارع سموتس يناير، مدينة رأسا، جوهانسبورغ .. جنوب أفريقيا!
فندق ويستكليف!
| مريم |
.
.
فريت عصا الغولف عني بغيييييظ و انا اسمع ظحك منصور .. قال وهو يطالعني:
ههههههه والله انج حوووله!
رديت اشلها وانا اقول بغيظ: جااااااب .. انا هب حوووووله!
رد يظحك وهو يأشر على الحفره الي جدامي على بعد خطوات مني: انتي بس طالعي
المسافه الي بينج وبينها!
طالعت المسافه مثل ماقال .. جان يكمل وهو يظحك: وتقولين مش حوله هههههه!
فريت عليه العصا وانا اقول بعصبيه: اففففف منك انته و هاللعبه البايخه .. انا
بسير اسبح .. وبنسير الحديقه عقب ..
سكت وهو يكمل لعبه .. شفته كيف واقف و ماسك العصا بطريقة حلوة و يوم يظرب
الكورة .. تمشي شوي شوي وتستقر فالحفرة ... عصبت لني انا ماعرفت كيف اييبها
... ابتعدت عنه جان يقولي: صبري بوصلج!
قلتلها: مايحتاي .. ادل الدرب!
قال : لا صبري!
مابغيت انا نظارب وكالعاده على اشياء سخيفه! .. فوقفت اترياه لين مالم اشياءه
و ردينا للفندق ، الي لين احينه بتخبل عليه .. رووووعه الصراااحه، فندق ولا
اي فندق!
الشكل ارووحه فنتك .. خذ النا منصور جناح جونيور على قولتهم .. بس شو
هالجناح، عجييييييييييب! ... مطل على حديقة الحيوان الي هنيه ، مرره فرة حصا
عنهم .. و الاجوااء وايد حلوة ، بعد الجو هب بارد ولا حار، بالعكس وايد حلو
.. وفالليل يغدي الجو جنه فالشتا صوب العين .. وقفت عند الباب اترياه يفتحه
.. بس بطرف عيني من الدريشه الي فالممر شفت منطاد ازرق يطير !
ربعت صوب الدريشه وانا اقوله: منطاااااااااااد ... ااااااااااالله ابا اركبه!
وقف عدالي وقال: والله تبين؟!
لفيت عليه وعيوني تلمع: والله عادي؟!
ابتسم وهو يمسح على خدي: افا علييييج .. اكيد عادي!
: ياااااااااااااي عيل يالله احيينه!
قال وهو يمسك ايدي: اول شي بنتسبح وبننزل نتريق عقب نسير ...
فتح الباب ودخلنا داخل ... سرت بسرعه وانا اقوله: اوكيه ..
قلتله: من وين هم فاجينه؟!
قال وهو يفصخ فانيلته ويفرها كالعاده على الارظ: مادل .. يالله بسرعه خلصي ..
سرت حجرة الملابس : زين ..
خذتلي كندورة سودا وورديه ، وشيلة صفوة و فوطتي وسرت الحمام الي فالصاله بما
ان منصور سار صوب الي فالحجرة!
بعد ربع ساعه كنا تحت فمطعم وجيا .. او ماعرف كيف يقولون اسمه .. المهم اني
طلبت كروسان جبن وكابتشينو .. قلتله وانا آكل: هالفندق احلى فندق سرتله
الصراحه!
قال وهو ياكل عنب: ومتى سرتي انتي فندق برع البلاد؟!
عقدت حياتي وانا اقول: اصلا عمري ماطلعت من البلاد .. بس سرت دبي مره .. بتنا
ففندق .. ياربي شو كان اسمه؟! .. ماحيد والله!
رشفت من الكابتشينو وكملت وهو يطالعني بابتسامة: احيد انا حجزنا جناح كامل ..
ثلاث حجر بحماماتهم، وصاله ومطبخ تحضيري ، وشو الي عيبني التلفزيون، بلازما
60 بوصه! عيبني بشكل .. هيييج السنه كنت توني مخلصه ثانويه، ومتخبله عاااد
عندي اجاااازة ..
سكت شوي وكملت وانا ااشر بايدي: كنا بنحضر عرس حد من هلنا .. ويلسنا يومين ..
وهاليومين انا مارقدت .. على طول يالسه عند التلفزيون واطالع فهالافلام ..
رفعت عيوني صوبه .. شفته يطالع الساعه .. ابتسمت بهدوء .. غادي هادي وحبووب
.. رفع راسه صوبي وقال: هاه خلصتي؟!
شربت ماي وقلتله: هيه .. يالله نسير .
بعد دقايق كنا نمشي على ريولنا صوب الحديقة .. لنا يوم سألنا راعي الريسيبشن
عن المناطيد وين ، قال انه فحديقة الحيوان الي هنيه .. تمينا نمشي ونمشي ..
وين هالحديقة هاي !
خطفنا على وايد اشياء حلوة فالدرب .. خص الدكاكين الصغار .. وايد حلوة
جوهانسبورغ .. انا اصلا ماتوقعت جنوب افريقيا جيه بتكون .. احيد يوم قالي
بنسير جنوب افريقيا .. اول شي يا فبالي العبيد الي هنيه .. والحر ..!
مادري شعنه حاطه فبالي انهم غادين سود من الشمس!
بعد نص ساعه وقفت وانا اقوله: وين هالحديقه الي قال جريبه!
لف عليه وقال: يالله عاد يالدلع .. تعالي باقي شوي!
كان ماد لي ايده قلتله: اففففف لو خذت موتر اخيرلنا ..
قال وهو يأشر على جسمي: احسن .. عشان تخسين .. غاديه دبدوبه!
شهقت وانا اطالع نفسي: انا دبدوبه؟! .. حرام عليك!
ظحك: هههههه اسووولف .. يالله بسرعه!
مسكت ايده بهدوء وانا اقول: زين .. عقب مانرد بتصل على خواني .. من زمان
عنهم!
.
.
في البلاد ,,
بيت بوناصر ..
| غايه |
.
.
انسدحت ببطء على الشبريه .. بطني كبر، و قلبي صغر وضاق .. طالعت شبرية عذوب
الي فالجهه الثانيه من الجحرة .. كانت يوم ترقد احطها هناك، و مرات ارقدها
عندي هنيه .. انسدحت على ظهري وانا اتنهد، مر اسبوع ونص ... اسبوع ونص متعب
ومنهك الصراحه .. انا اصلا تبلدت مشاعري خلاااص !
ولا الي يشوفني يقول هاي ماتت بنتها الوحيده قبل اسبوع وشوي؟!
غطيت ويهي بايديه احاول ما اصيح .. تنفست بعمق وانا اتحسس خشمي، غادي خشن
ويعورني من كثر ماصحت .. اول يوم! .. تخبلت عليهم .. ماتم شي فالقسم ماكسرته
.. كل شي كسرته، عذبه وماتت! .. وناصر تغير .. حتى هل البيت متغيرين .. كل شي
تغير .. حتى مريوم تغيرت، كنت اباها ويايه .. بس هيه من عرست مارمستني غير
مرتين او ثلاث!
وروحت قبل ماتزورني حتى يوم ما كانت عذوب فالمستشفى .... واحينه اتصلها ابا
اخبرها ، اباها عدالي فهالوقت .. بس هيه ماترد !
عدلت يلستي يوم سمعت الباب يندق .... الغرفه فاظيه .. فيها الشبريه و اشياء
عذوووب الله يرحمها، و الكبت بس .. وانا اتريا ناصر يرتب البيت ، بيتنا عشان
ننتقل .. قلت بصوت عالي: منوه؟!
سمعت صوت ريال: أم عـ.... غايه ناصر يباج تحت!
حسيت اني بموت من الغيظ .. نطيت من مكاني وشليت شيلتي وتلبستها بسرعه .. فتحت
الباب وانا عاقده حياتي .. شكلي كان وايد تعبان وعيوني حمر ووارمه .. كان
أحمد واقف عند الباب وكان بيمشي .. بس انا مديت ايدي ومسكت ايده وقلت بتهديد:
اسمع أحمد ..
لف عليه مستغرب نبرة صوتي ، ويطالع ايدي الي بعدها قابظه زنده .. كملت وانا
اطالع فعيونه وبنبرة صوت عاليه: لا تزقرني ولا ترمسني ولاااا حتى تسلم عليه
.. وان شفتك مره ثانيه واقف عند باب قسمي .. و الله بتشوف ويهي الثاني ..
وقفت ثانيتين اطالعه .. كان يطالعني بعيون مفتوحه، منصدم أكيد!
نزلت عيوني وايدي وانا اكمل بصوت واطي: عمري مابسامحك على اللي سويته!
رديت داخل القسم وبندت الباب ورايه .. تساندت عليه وانا اصيح : لييييييييش
يااااربي؟ .. لييييييييييش من بدهم كلهم يكون أحمد!؟ .. الوحيد الي كنت اسولف
وياه و الوحيد الي كنت استانس وياه هنيه! .. ليييييييييش؟!
يلست ورى الباب وانا اصيح .. مابا اتم هنيه .. اذا تميت هنيه بتخبل .. واذا
شفت احمد بتعذب زياده .. سرت الحمام وغسلت ويهي ... وصلت الصاله بعد عشر
دقايق من الوقت الي زقرني فيه احمد .. شفته يالس عدال التلفزيون، وناصر يالس
تحت ويا امه و منى عدالهم .. سلمت ويلست عدال منى .. قالت عمتيه: جان
ابطيتي!؟
رفعت عيوني صوبها وطالعتها بملل .... كل شيء تغير الا عمتيه .. بعدها نفسها!
مارديت عليها ، نزلت عيوني وصبيت لي فنيال اقهوة ومنى تقول: غويه تبين تسيرين
ويايه الخياط .. ابا افصل للعيد قبل رمضان ..
هزيت راسي بلاء وهيه تكمل: دخيييلج ابا ذوقج فالقطع ..
رديت اهز راسي بلاء وانا اشرب فنيالي .. قالي ناصر: بسيرين لهلج؟!
رفعت عيوني صوبه ، يمكن من بدهم كلهم ناصر الوحيد الي غادي حنون .. غير عن
قبل، ودوم ويايه يالس فالبيت .. قلتله: ماعليه .. متى؟!
طالع ساعته وقال: احينه!؟
: ماعندي خلاف انا ..
قال وهو يوقف: عيل اترياج فالموتر ..
وقفت وياه وانا اقول: انزين .. سمحولي!
خطفت عنهم وانا اسمع عمتيه تقول لناصر: بلاها حرمتك ترمسنا بطرف خشمها؟!
بالعاده اوقف اسمع شو تقول عني .. بس انا احينه ماشي يهمني .. بس وقفت من
سمعت صوت ناصر يقول بضيق: امييه عاد شو تبيني اقولج؟! ,, عنبو عذبه ماتم الها
اسبوعين من توفت ، وانتي تسألين ليش ترمسنا جيه؟!
وكمل بصوت عالي: اذا ماعذرتوها وهيه هاي حالتها ، متى بتعذرونها؟!
وقفت عند باب الصاله الي توني ظهرت منها .. خطف عدالي ناصر مسرع وظهر بعد ما
رقع الباب بقو وراه!
لفيت عليهم .. كانت عمتيه ساكته ومنى اطالع أحمد الي كان يطالعني ..!
عقدت حياتي فويهه ... عقب لفيت عنه ... مافيه حد يستاهل اني ازعل عشانه ..
حتى ناصر!
05-08-12, 09:20 PM
جديد مواضيع قسم ارشيف خاص بالقصص غير المكتمله
العرض العادي
