كاتب الموضوع :
نوح الحمام
المنتدى :
ارشيف خاص بالقصص غير المكتمله
الجزء الخامس ..
فنفس الوقت ..
يدام بيت منصور بن غاشم ..
| مبارك |
.
.
: انزيييييييين لييييش؟!
حطيت التيليفون على اذنيه الثانيه وانا ارد واقولها: اماايه الريال يبا يحدر
، هوه اروحه قايل .. يعني بالله عليج شو اقوله احينه؟!
نزلت راسي : استغفر الله .. وشله هيه تتلبس بعد جيه .. خل تحط عليه عباه ولا
شي ..
: اماايه .. انزين لحظة .. اميييييه سمعيني .. انا بقوله انج تبينه قبل لا
يحدر القاعه .. ويوم هوه أي هناك قوليله .. ماعليه .. احينه يت عشر وانتو
بعدكم ماحدرتوها .. لا لا عندكم نص ساعه خلوها تدخل و تظهر قبل لا انيي .. لا
تخبرونه لين ما اييكم هناك، .. عاد امايه انا مايخصني انتو الي ماتناقشتو
فالبدايه .. خلااص .. هب مشكله .. شووه!؟ .. كيف بعد ماندخل وياه؟ .. هاي
بنتج تتشرط علينا شووه.! ..
وقفت ساير صوب قوم عبدالله و عميه وانا ابند التيليفون .. هاي امايه تقول
اونه مريوم ماتبا منصور يحدر وياها القاعه، لااا بعد شوه يوم أي يسلم عليها
ويشلها انحن مانحدر وياه، يا قبله يا عقبه ونختار عاد نحن !
كان عبدالله و عميه وبو منصور و سعيد خو منصور واقفين عند باب الخيمة يرحبون
بالدفعه اليديده الي يت ... انا مع اني عنديه ربع فالجيش و السفاره و الوزارة
و كل مكان .. ماكان عرسي بها الكبر و الفخامه .. لو عديت الرياييل الي ياين
بلقاهم اكثر عن 600 ... و الخيمه من كبرها الجهه الثانيه منها ماروم اشوفها
....
تقربت منهم وانا اسلم .. وقفت عدال عبدالله وقلتله بصوت واطي: امايه توها
اتصلت ..
خبرته السالفه جان يقول: زين .. هب مشكله .. أحينه سر انته و الفروخ .. و انا
وعميه و بومنصور بنخاوي المعرس عقب ساعه او اقل ..
قلتله: وليش مايحدر وياها القاعه شرات العالم و الناس ..!؟
قالي: لنه مريوم هب شرات العالم والناس ,, يومنها بغت هالشي خلاص، بنسويلها
الي تباه ..
وكمل : وخلي منصور عليه انا بقوله ..
تنفست بعمق وانا ارد واقوله: ماعليه .. والشواب خبرهم بعد ....
تميت واقف وياهم لين ماخلصوا الرياييل الي توهم يايين سلام .. و جيكت على
ترتيب المقهوين بما ان عبدالله مشغول بالترحيب بالمعازيم .. الخيمه كانت وايد
فنانه .. و صدق عرس شيوخ .. مع انهم مخسرين وايد ..بس ترتيييب و الله ..
كنت ظاهر من الخيمه من الجهه الثانيه بسير صوب مكان الرزيفه يوم صاح
تيليفونيه ..
كان ربيعي راشد و خال مريومتي ... رديت عليه: مرحبااا .. حي الله بوسنيده ..
قال: مرحب باااجي طال عمرك ، شحالك ياريال ..؟ .. عنبو ماتنشاف؟!
قلتله: فنعمه .. انته الي وين؟ .. هاذا الي بيقول بيي عقب الصلاة على طول
..!؟
راشد: والله ظروف استوت عندنا .. المهم انا توني واصل .. و تعيبت ماشاء الله
من هالعرب .. ثلاثة ارباعهم ماعرفهم .. ماشاء الله ترتييب العرس .. مبرووك
عليكم ..
رديت عليه وانا ااشر على حمد الي كان واقف ويا عمر و بخيت يدام الفرقة : الله
يبارج فيك .. وين انزين انته؟ .. انا واقف صوب الفرقه ..
راشد: وين ؟.. اقولك وين الروس الكبار ، بسلم عليهم وبرد عليك خلاف ..
خبرته عن مكان الروس الكبار على قولته و سرت صوب حمد ..
وقفت عداللهم وانا اقول: ماتبون تسلمون على العرووس؟!!
لفو عليه وقال بخيت بسرعه: إلا .. بس مرتبين المواتر بنسوي مسيره يوم المعرس
بنويّه صوبهم ..
قلتله: لا غيرنا الخطه .. العروس ماتبا المعرس يحدر وياها القاعه .. المهم
انحن بنسير احينه نسلم عليها وبيلحقنا عبدالله وعميه و المعرس وهله ,, وين
عيد و عمير؟!
كنت بكمل بس يا عيد وهو يقول: يالله شباب منصور روح القاعه هوه وعميه و
عبدالله ..
رفعت حياتي وانا اقوله: شوه؟ .. توني مرمسنهم ، منوه قالك..؟
رفع تيليفونه يدام ويهي .. كان عبدالله مطرشله مسج: تعالوا القاعه بسرعه ..
انا وعميه ومنصور ويهنا .. جانكم تبون تسوون مسيره ، يالله انقفظو .. وخبر
مبارك تليفونه مغلق!
حطيت ايدي فمخبايه الا انه صدق تيليفونيه مغلق ,,
استغربت صراحه، اكيد هذا منصور بو راس يابس الي ماطاع ,,, افففففففف!!
.
.
.
بعيداً عن تلك الأجواء .. حيثُ ذلك القلب المحترق ... يُدمي روحه قبل جراحه!
.
.
أمريكا ،
يدام سكن الجامعه ..
| سلطان |
واقف يدام البحيره الاصطناعيه الي حاطينها فسكن الطلاب فالجامعة .. لابس
فانيلتين و جاكيت قطني .. و لاف وشاح على رقبتيه .. عقلي موقف .. وكل شي من
حولي احسه يحترق ..
القهر الي فينيه مايسد امريكا كلها، حاسه بظيجه فظيييعه ، وباجر عليه امتحان
تدريبي وانا يالس هنيه ماذاكرت شي .. لو الصياح بيفيدني كان صحت .. هب عسب
انه مريوم بنت عميه خذت واحد غيري ، لا وفضلته عليه .. لا ، عسب انه ابويه
كسر بخاطريه، بدا الغريب عليه .. عندي سؤال واحد بس ابا اسئله .. ليش سويت
جيه؟!
حطني فموقف سخيف يدام حمد ولد عميه .. كسرني يدامه وكسر روحي قبل ماتكتمل
فرحتيه يوم حمد قالي انته ماعليك و تعالوا خطبوا !!
حسيت عمريه بموت هييج الليله .... أخر شي توقعته ان ابويه يقولي اني ما اناسب
بنت عميه ..
ومنوه هالمنصور عشان يناسبها اكثر عنيه؟؟!
انزين واكبر عنها ويعرف فالدنيا و مدير بنك .. وبعدين؟!
انا اولى بها ، ها اول شي، ثاني شي انا ولد عمها وماحد فالعالم يروم يقدرها
شرات ما انا بقدرها ..
هالمنصور من وين طلع!؟
انا اعرف انه ابويه عنده وايد ربع فدبي .. بس ادري انهم هب لدرجه انه يقرب
ابهم .. وبعدين هاييلا هب من ثوبنا .. مستواهم وايد عالي ، وحظر .. غير عنا
،غير بوايد اشيا ..
لفيت الصوب الثاني ويلست اتمشى .. اتذكر اليوم الي خبرنا فيه ابويه ان ملجت
مريوم عقب شهر ..
صدق حسيت ان شي من روحي انكسر ... اعتزلت ابويه وماقمت ارمس وياه .. وايد
اشياء تغيرت .. حسيت ان الكل متعاطف ويايه .. ما استحملت نظرات هند وبخيت ..
اميه تعرف اني احبها من زمان .. فتمت تحاول فيني اعرس واني كل وحده تتمنى اني
اكون ريلها .. خذت بشورها و ع قولتها بنحير البنيه لين ماتخلص دراسه ...
خطبتلي وحده تعرفها .. انا سامع بهلها .. بس من سوء حظي، ان اميه ما لاحظت ان
البنيه سمها مريم .. شوفوا السخافه؟!
شارد من مريم و من طاريها، احير لي وحده ثانيه سمها مريم؟!
انا مادريت ان سمها مريم الا عقب ماوافقوا .. وعلى اساس بسير اكمل دراسه اربع
سنين وارد اعرس عليها .. قلت بقهر مريم بنت عميه مثل ماقهرتني .. بس ماقهرت
الا نفسيه ... كيف اقهرها وهيه ماتدري عن طوايفي اصلاً ..!؟
مادري ليش ماحطيت فبالي انها يمكن ماتوافق عليه ، او انه ماتباني .. هاك
اليوم يوم قالي بخيت : حط فبالك ان مريم يمكن ماتباك، ؟!
انصدمت اني كنت اناني ومافكرت الا فنفسي ..!
كيف احبها وانا يوم فكرت اخطبها كنت حاط فبالي انها مستحيل ماتوافق عليه ..
ولد عمها وبعد كمن سنه بيغدي دكتور!
كييييييييييييف؟!
المهم اني من سنه وكمن شهر سافرت .. قدمت اوراقي فالجامعه هنيه ، وقبلوني على
طول .. معدلي كان 97 ، وانا خاطري فطب من زمان .. احاول اتناسا .. و كل ماسرت
مكان .. اتذكر اني ما باخذ مريوم الي حتى حياتي وياها تخيلت كيف بتكون .. حتى
عيالنا فالمتسقبل سميتهم .. قلت اول ولد بنسميه على عميه الله يرحمه .. واول
بنيه بنسميها الريم .. على اساس ان اسمها يتم جريب من اسم امها .. كيف هنت
عليج يامريم؟!
الي قاهرني احينه ان هب قادر ارقد .. الساعه عندهم احينه تقريباً عشر ونص و
العرس في اوله.. وانحن تونا 12 الظهر .. اليوم عاطينا اجازة على اساس انه
باجر امتحان .. انا مواصل من البارحه .. هب قادر ارقد، كل ماغمظت عيونيه ..
تتخيل لي مريوم ففستان العرس .. الفرق عن احلامي الجديمه، انه الريال الي
واقف يدامها ولابس بشته الاسود .. هب أنا .. واحد ثاني!؟
واحـــــــــــــــــــــــــــــــــد ثاني!!
.
.
.
.
.
.
الساعه 8 ونص ..
خيمة الرياييل ..
جدام بيت منصور بن غاشم ..
| حمد |
.
.
ركبنا المواتر بسرعه يوم طرش عبدالله المسج لعيد .. انا وعيد فموتريه .. و
عمر وعمير فموترهم .. ومبارك و واحد من ربعه .. كل واحد فينا اتصل لربيعه
وخبرناهم انه احينه بنظهر ...
طلعنا تقريباً 15 موتر .. الخمس مواتر الاولى ، كنت انا اول شي .. عقبي مبارك
و بعدين عمر وعمير .. والشباب وايدين ورانا ..
قالي عيد: بطل بطل الجامه الي فوق ..
كنت حاطه فرقة الحربيه، و الموتر مرتبش .. بطلت الجامه لعيد جان يوقف وهو شال
العصا وايبس ويا الغنيه، يبالنا تقريبا نص ساع عسب نوصل القاعه، الشباب
اخترشو .. وكلن قام يطلع مواهبه ..
المواتر الثانيات كل واحد حاط غنيه .. جان يتصلي مبارك ..
قال: حمد خبر هالمخبل ربعكم اني بشغل المسجل الي عندي .. البارحه سرت و حطيت
له مكبرات صوت يداد ..
: انزين .. عندك مالت الحربيه؟!
: الي انته حاطنها؟
قلتله: هيه ..
: هيه عندي .. يالله ماتم شي عن نوصل ..
بندت عنه وانا اير عيد عسب يسمعني .. : عيوووود !؟
نزل راسه وهو يقول: هاااه ،؟ ليش بندت المسجل؟!
قلتله: اتصل فربعك، خلهم يبندون المسجل مالهم، مبارك عنده مكبر صوت بيشغل من
موتره ..
: أهاا .. اوكيه لحظه ..
اتصلت و عيد اتصل .. دقيقتين و الهدوء عم المكان عقب الحشره الي توها .. بس
ما ابطينا الا وصوت فرقة الحربية مشتل .. حشى !
هب مكبرات ماشاء الله .. يا خوفي تلحقنا الشرطه بس! .. صدق بنغدي مصخره!!
الصوت كان وايد عالي ، يعني جنا كلنا شغلنا على نفس الغنيه وطولنا الصوت على
آخر شي..
تمينا ربع ساعه ووصلنا الفندق .. يوم وصلنا .. كل الشباب حولوا ويلسنا نرزف
يدام الفندق ..
الجو وايد حلو .. صدق عرس .. لفيت على عيد الي عدالي وقلتله: سلطاان قم نرزف
رباعه شرات قبل!!
كنت بكمل بس بترت رمستيه يوم اتذكرت انه عيد ... هب سلطان!!
نزلت ايدي و قلت لعيد : انا بسبقكم فوق ..
لفيت صوب بوابة الفندق ودخلت .. قلبي عورني يوم تذكرت سلطان الي حتى ماتريا
العرس ..
قبل اربع شهور يا وسلم ورد مره ثانيه .. بعد شو بيسوي يوم ان مريم اختارته
على واحد غريب .. وهو يحبها .. وايد قويه صراحه .. انا كنت ادري انه يباها ..
ويوم خبرني اني اسألها قبل ماعميه يخبرها .. قلتله انزين .. بس وايد اشيا
وقفت فويهي ومارمت اخبرها .. فأجلت السالفه يوم افظى .. خلاف يت سيرة البر ..
و يت سالفة منصور .. انصدمت يوم عرفت .. اتصلت له على طول وخبرني انه عميه
قال ان مريم موافقه ..
اذكر انا كنا يالسين فالكوفي .. قالي بهدوء: ابويه يقول مريم موافقه .. خلاص
السالفه انتهت ..
عصبت وانا ارد عليه: انته اولى ابها .. بعدين دامك من أول مشكله امبينكم
خليتها يعني انك ماتباها ..
قال بغيظ: حمد ، انته تدري كيف انا احب اختك .. بس دامها هيه اختارت الغريب
عليه ..
كمل وهو يلف الصوب الثاني: الي مايباك لا تصيح تباه ..
فتحت عيوني بقو وانا اقول بصدمه: مريم اختارته عليك؟!
قال بنفس الهدوء الغريب عليه: هيه .. خلاص حمد السالفه انتهت ..
رديت على ورى افكر .. مريم مستحيل تبدي الغريب ولا ولد عمها .. الا اذا كان
عميه غاصبنها ..
بس عميه بعد يعزها وايد، لو كان بيغصبها على حد كان غصبها على الي خطبوها قبل
..
السالفه هب مفهومه ..
قالي: انا بسافر عقب شهرين ان شاء الله ..
لفيت له بسرعه: تسافر؟ .. وين؟! و ليش؟!
قال وهو يوقف : بسير امريكا اكمل دراستيه هناك .. قدمت اوراقي الاسبوع الي
طاف وقبلوني ..
وقفت وياه .. ماعرفت شو اقوله .. كل الي قلته: الله يوفقك .. عاد انته تعرف
بنتم خوان لو شو استوى .. لا تحط فخاطرك ..
ابتسم بهدوء غريب: افا عليك ولد العم .. هب امبينا هالسوالف ..
.
.
شليت تيليفونيه واتصلت على امايه ...
ردت: هلا بويه ..
: امايه فديتج ابا اسلم على مريوم ..
قالت بسرعه: تعال فديتك .، توه اخوك وعمك ومنصور حادرين ..
: انزين .. الفروخ بعدهم تحت يرزفون ويا الشباب .. خلاف بيون ..
بندت عنها .. أتمنى انه منصور يقدر الجوهرة الي خذها و خلا سلطان يشرد من
البلاد عشانها ..!
.
.
.
في قسم العروس ..
قبل ساعه ..
| مريم |
وقفت يوم قالتلي غايه انه حرمة خو المعرس بتحدر .. المعرس؟! .. ليش ما اقول
منصور وخلاص!
قالتلي غايه: ماتبين تتغطين ولا شي؟!
هزيت راسي بهدوء وانا اتنفس .. اول فرد من عايلة ريلي ... اول حد بشوفه من
العايلة الي بسكن وياها .. اذكر انه حمد قالي ان امه مريظه وماتروم تتحرك ..
وابوه يا يوم الملجه .. ومن عقبه ماشفناهم .. عايلة غريبه .. اصلا الي كان
يخليني احس اني وحده مالجه الهدايا الي يطرشها منصور .. عمريه ماحد طرشلي
هدايا .. ويوم حد طرشلي هدايا، الاولى كانت بلاك بيري أخظر غامج .. و الثانيه
كانت سواره الماس واايد حلوة .. الثالثه لاب توب ... صراحه، ماعيبتني الحركه
يوم خواني نقدوها عليه .. بس انا من خاطري ، صدق استانست .. يعني طلع ذووق
ريلي العزيز!!
كان خاطريه اعرف أي حد من هله .. وحاولت ويا هند يوم عرست ويت صوب بيتنا انا
نحاول نتعرف على حرمة اخوه .. بما انه ماعنده غير خت وحده ومعرسه ..
و خته من ابوه بعد .. يعني هب جريبه منهم وايد ..
ابوه طرشلي هديه ... طقم عبي وخمس كنادير واربع اثواب مغربي .. ودرزن نعال و
اشياء ثانيه .. صدق صدق حبيتهم .. بس كل الفرحه اطير يوم واحد من خواني
ينغزني بالرمسه ..
تعرفون.. أنا اصلا تغيرت فهالسنه ونص .. قبل ، كانت فرحة خوانيه من فرحتيه ..
كل شي هم مايحبونه انا ماحبه .. حتى لو كان غالي عليه .. وايد اشياء انا كنت
امنع نفسي عنها بس عسب خاطرهم .. مثل النت الي ماطاعوا يدخلونه البيت .. و
اني اكمل جامعه .. لا حرام هب هم الي قالوا لاتكملين .. بس انا تعودت على
خدمتهم وقمت الاشياء الثانويه ماحبها او اسعى اني اسويها او استمتع ابها ..
فالجامعه انا قلت لهم اني مابكمل ... فقالوا لي على طول احسنتي اونه هب لازم
.. وانه نسمع رمسه هب زينه عن الجامعات ومن هالسوالف .. حزت فخاطريه .. ويوم
قلت لهم خلاص غيرت رايي واني ابا اكمل .. قال عبدالله خلاص انتي قلتي لاء من
البدايه ..
سكت ، كله عشان خاطرهم .. خليت كل شي عشان خاطرهم .. ويوم يت سالفة منصور ..
ركبني هوس اني اخليهم ولو مره يخضعون لقرار انا الي مقررته ..
عصبوا و مارمسوني ، بس عيد فديت خشمه كان يرمسني عادي اونه الريال زين وهاي
حياتج مايخصني فيج ..
امايه تمت مثل ماهيه .. جنه ماشي تغير .. اداوم وترد ترقد لين صلاة العصر ..
العصر نيلس فالحوي عند الفواله .. نرمس بسوالف عاديه .. وخلاف انشغلنا بعرس
عبدالله ..
وخلص العرس ,, وتغير البيت يوم يت هند .. كنت انا اسوي تقريبا كل شي .. ويوم
يت هند .. اكثر الاشياء هيه كانت تسويها .. وحتى كانت وايد تهتم فيني وتقولي
لاتسوين جيه ..
ويم حددوا العرس ، ماخلتني اطبخ ولااااشي .. على اساس اني اهتم فعمريه ..
وصدق تغيرت .. وخوانيه تغيروا .. ماقاموا ينغزوني بالرمسه .. بالعكس حسيتهم
وااايد مهتمين فعرسي .. حتى ان مبارك غير اثاث البيت كله .. من و إلى .. بس
انا ماخليته يغير اثاث حجرتيه .. كل شي فالبيت تغير .. وحسيت انه العرس
ماباقي عنه شي .. قبل العرس باسبوع .. حطو ليتات على البيت كله .. ومع هذا
كله ، ماصحت .. ماحسيت اني بفارقهم ... يعني غييير كان احساسي ..
و اليوم .. وانا داخله القسم ويا هند وعبدالله خويه .. اول شي سويته اني سرت
الحمام وصحت من خاطريه .. يعني صدق انتفخت من الصياح .. يوم ظهرت انصدمت هند
من شكليه .. وعصبت .. بس جنها كانت تدري اني بصيح يابت وياها ماسك للبشره و
خلطه ثانيه من خلطاتها الي ماتخلص..
رديت للواقع يوم دخلت حرمه متغشيه وهيه تقول: حشى نقعتوني خاري ..
مانزلت راسي .. ابا اشوفها .. يمكن فيها شبه من منصور .. !!
ابا اعرف أي شي عنهم .. خوزت هيه الغشوه عن ويها .. وانا فتحت عيوني .. ماشاء
الله عليها ..
قالت وهي تلف صوبي بكامل جسمها : مرحبا مرحبا السااااع فذمتييه ..
كنت بتجدم بس هيه قالت: و الله ماتحركتي من مكاانج .. فديت هالويه والله !
استحيت من رمستها وانا حتى مارديت على ترحيبها ..
يت صوبي وباستي وعقب خاشمتنيه و انا اقولها بصوت واطي: لمحرب لاهان .. الله
يحييج ..
قالت بظحكه: واااااااااايه، هههههههه و الله منصور بيتخبل !
نزلت راسي وغايه تقول: هههههههه طاعي كيف احمرت ..
قالت بفرحه : فدييت ويهج .. ماشاء الله علييج الريم ..
يلست ويلست هيه عدالي .. وغايه صبت الها عصير ..
كملت هيه رمستها : ماشاء الله .. و الله ماتوقعتج جيه ..
رفعت حياتي وانا اقولها : افا .. عيل كيف تخيلتيني ..
قالت براحه: خفت تكونين خسفه !!
رفعت راسي بسرعه مستغربه من رمستها .. حشى فالويه!!
: هههههههههههههه فدييتج و الله اسولف اسوولف!
ابتسمت بهدوء .. على الاقل شكلها وحده مالت سوالف ومصخره ..!
قالت غايه : فديتج فطيم عطيني عذوب رقدت ..
شلتها عنها غايه وانا اقولها: شحالج ..؟ .. وشحال ام منصور .. ربها ماتشكي
باس؟!
مادري ليش سألتها .. بس ماريت شي اقوله ..
ردت هيه وعيونها تتأملني : بخيير وسهاله ربي يعافيج ..
وكملت : انا فاطمة حرمة سعيد خو ريلج ..
قلتلها : والنعم ... حياج الله ..
قالت ببسمه حلوه: الله يحييج ..
ولفت على غايه: قريتوا عليها ولا؟!
قالت غايه: مادري .. مريوم امج قرت عليج ؟!
هزيت راسي بلاء وانا ارد شعري ورى اذنيه: لا .. هنوود تقول بتي عقب شوي ..
وقفت فاطمة بسرعه وقالت: عيل انا بتشرف وااقرى على العروس ..
وقفت عدالي وتمت تقرا عليه .. صوتها وايد حلو ..
طالعت غايه بشوف شو تسوي .. كانت واقفه اطالعنا مبتسمه ..
اشرت على ثمها ومطت ايدينها .. يعني ابتسمي .. ابتسمت بقو عشان خاطرها ..
تعبتها ويايه ..
كانت بعدها شاله عذوب يوم فاطمة قالتلها بغيظ: ام عذوب ، ووطي عنج البنيه
بتذبح اخوها ..
عقدت حياتي مستغربه وغايه تقول وهيه تظحك: هههههه يالساحره .. انا اروحي
نسييت ..!
رفعت حياتي وانا اقولها: أي اخو!؟
قالت فاطمة يوم ردت تيلس: فدييتها حامل ..
شهقت وانا احط ايدي على ثميه .. بس هالمره ثنينتهن صرخن فويهي: لاااء خوزي
ايدج!!
خوزت ايدي بسرعه وانا اقول: بسم الله .. روعتوني ..
لفيت على غايه وقلت: و الله غوويه حامل؟!
قالت وهي مبتسمه: هيه فديتج .. عاد انتي كنتي اول وحده بخبرج .. بس هاي
الساحره مادري كيف عرفت !!
ابتسمت بقو وانا اقولها: فديييتج و الله .. ان شاء الله زايد شرات ماتبين ..
كانت فاطمة كله اطالعني ... لفيت عليها وانا اقول وانا اظحك: هاه عيبتج؟! ..
ولا خايفه على خو ريلج لا اطيح فجبده وحده خسفه؟!
قالت بهدوء: لا والله .. ماشاء الله عليج .. اصلا منصور يحمد ربه يومن الغزال
وافق عليه ..
نزلت عيوني وانا اقولها: اونه .. شو غزاله بعد!
قالت وهي ترد شعري على ورى : الله يحفظج .. فديت ليش فاله شعرج .. بيعطونه
بعين جيه .. بعد ماشاء الله طويل وكثيف ..
قالت غايه: انا الي قلتلها جيه تسويه ..
انا ماقلت شي .. بس فاطمة ردت تقول: هيه وعسب اطيح منصور من طوله .. عاده هوه
عووقه والشعر الطويل ..
استحيت من رمستها .. واستغربت فنفس الوقت .. كيف تعرف هالكثر عن منصور ..
تمينا نسولف تقريباً ربع ساعه .. يوم اتصلت اميه على غايه ..
مدت اليه التيليفون : امج تباج .. بسرعه تقول ظروري ..
شليت التيلفون : هلا اميه .. هاه؟!
قالت: سمعيني .. ادري انج مستحيه عسب فستانج عاري شويه .. بس الريال مصمم انه
يحدر وياج .. خلي عنج الدلع و اتجهزي هو احينه تحت ويا عمج و عبدالله ..
فتحت عيوني وانا اوقف بسرعه ..: اماايه شو احيينه؟!
حسيت بقلبي يطيح يوم قالت: يالله احينه انا يايه و عبدالله هذووه يتصل!
بندت عنيه وانا طاح التيليفون من ايدي وغايه تقول : بسم الله بلاج !!
قلت الها وانا احط أيدي على صدري: تحت .. الرياييل تحت!!
قالت باستغراب: شوه؟ .. منوه الي تحت؟!
شليت اطراف الفستان بتوتر وانا اقولها: منصوووور!!
ظحكت فاطمه: هههههههههه ها كله عسب انه منصور يا .. هذوه سعيد مطرش مسج يقول
وصل المعرس ..
حسيت بخبصه فقلبي وبطني وكل شي ..
وقفت يدامي غايه وقالت: مريوم بس بلاج ترتجفين ..
رفعت صبعي يدام ويهي وانا احلف: والله مايدش قبل عبدالله وخوانيه ..
عقدت فاطمه حياتها وقالت: ليش عاده ..؟ المفروض هوه اول واحد يشوفج!؟
لفيت عليها وقلت بعصبيه: اول شي خوانيه بعدين هوه!
تجتفت ايديه وغايه تقول: شو هالمصااخه مريوم .. بسج دلع!!
مارمستها وانا اشل التيليفون واتصل بعبدالله ..
بعد رنتين رد : عبدالله طلبتك لاتدرني ..
قال بسرعه: تم .. شوبغيتي؟!
قلتله برجاء: دخييلك اول شي انتو دخلو خلاف منـ... خلاف هوه!
قال : فديتج مريوم وصلنا نحن .. نتريا اميه اتي ادخلنا ..
يلست على الكرسي وانا انتفظ: دخييييييييلك .. عااد انته قلت تم !!
تنفس بعمق وقال: ماعليه .. تمين جان تبين .. انا ياينج احينه!
فريت التيلفون وانا اقول براحه: قال تم ..
كانت غايه معصبه وهيه تقول: بايخه صراحه حركتج .. الريال وصل لين هنيه ..
شوبيقوله اخوج احينه!؟
رديت عليها بثقه: عبدالله يروم يدبر عمره .. المهم اني اشوف خوانيه اول شي ..
وقفت فاطمه وقالت لغايه: خليها عنج غوويه ، عروووس لازم تدلع ..
ويت صوبي : يالله بسير انا عيل .. طرشت علي للقاعه ويا الخدامه وماعرف شو
استوى عليه ..
اشوفج فالقاعه ..
باستنيه مره ثانيه وظهرت عقب ماتغشت ..
كانت غايه واقفه صوب الشبريه الي فطرف الحجره عدال عذوب ..
قلتلها: غويه انتي ماتعرفين ليش انا جيه سويت ..
ابا اشوف خوانيه قبل لا احس اني معرسه خلااص ..
قالت بسرعه: انتي معرسه من سنه ..
قلت بهدوء وانا اسمع صوت الباب يندق: غايه عبدالله وصل ..
وقفت غايه وتغشت وتلبست قفازها عشان انها متحنيه .. قالت انا بوقف هينه يوم
يدخل هوه بتريا برع ..
قلتلها اونا اوقف: انزين ..
قبل ما تسير تفتح الباب قلتلها: غايه شكلي اوكيه ..
لفت عليه مبتسمه: واايد .. لاتحاتيين ..
بس انا كنت احاتي فستاني .. انا اصلا بغيت عبدالله يدخل قبل منصور عشان يشوف
الفستان ..
وقلت فبالي لو عبدالله قال شي عنه و الله يفجه قبل ما أي منصور ومايخصنيه ..
فتحت غايه الباب وهيه تقول باحترام: حيااك الله بوحمييد ..
نزلت راسي يوم شفت طرف ثوبه الابيض .. احس قلبي يدق بقو!
: السلاام عليكم و الرحمه ..
شفت وحده دخلت وراه و صوت غايه تقول: سمحولي عيل ..
وظهرت وبندت الباب .. اخيراً رفعت راسي وانا احس بعيوني ادمع ... فدييت
اخوويه انا!
حط ايدينه على جتوفي وقال بعمق: مبرووك الغاليه .. رفعت راسي اطالع ويهه وانا
اقوله بصوت مخنوق: الله يبارج في حيااتك ..
باسني على يبهتيه وهو يقول بهدوء: فديت هالويه و الله .. قمر قمر مشاء الله
!!
حسيتني بصيح وانا اهز راسي .. مارمت ارمس !
.
.
.
نفس الوقت ..
| هند |
كنت واقفه ورى عبدالله وانا اشوفه يرمس مريم .. عيوني بدت تعورني ..
قبل لا نحدر كنت اوصيه عليها .. قلتله انها بعدها متأثره من السالفه ..
وتتحراه بعده هب موافق على عرسها ..
ريلي واعرفه .. يحب مريوم مثل بنته ..
يلسها ويلس عدالها وهو يقول بظحكه: شو متلبسه انتي؟!
قالت مريم بسرعه: هب حلو .. ؟ و الله اغيره لو تبا .!؟
قال عبدالله : لا لا هب قصدي ... ماشاء الله حلو ..
وكمل وهو يقول بصوته الي يخبل بي: فديت بنتيه انا ، غدت عرووس !
شهقت مريوم وهيه تصيح وتزخ ايده وتقول بسرعه: عبدالله والله نا ماقصدي اطلع
من شوركم ..
سرت صوبهم وانا اقوله بغيظ: طالع صيحتها ؟ .. مريوم فدييتج بيختررب المكياج
..
قالت وهيه ترفع راسها: قولي انك موافق ؟! .. دخييلك حتى لو هب موافق بس قص
عليه لني اذا انته هب موافق بفر عمريه من الدريشه وخلو هالمنصور يدور له عروس
غيري!
ظحك عبدالله: هههههههه حشى فلم هب عرس! ..
وكمل بجديه وهو يعطيها الكلينكس الي عطيته: سمعيني زين يابنت ابويه .. انا لو
كنت هب موافق ، ولو بنسبة واحد فالاميه على هالمنصور .. مابتشوفين عمرج يالسه
هنيه ..
يوم قال جيه .. انفجرت مريم من الصياح .. حطت ايدنها على ويها وتمت اتصيح
وانا انصدمت ..
: مريوووم المكيااااج ..
قال عبدالله وهو يظهر تيليفونه: خليها ...
سمعته يتصل على واحد يعرفه جنه عنده صالون و قاله يطرش الكوافيره صوب فندق
الهيلتون ..و بند عنه ورد يتصل ..
سرت ويلست عدال مريم من الصوب الثاني وانا اهديها: مريووم فدييت روحج بس ..
حرام عليج خربتي المكياج و المعرس حتى مادخل ..
رفعت ايدينها عن ويها وقالت: خله يولي ..
ردت تنزل راسها وعبدالله يقولها: بس خلاااص خربتي شكلج .. احينه منصور الي
بيفر عمره من الدريشه من الزيغه ، هب انتي!
ظحكت وهيه تقول: مايظحك!
ضحك عبدالله وهو يلوي عليها من جتفها: فدييت ختييه انا .. من وين ظهرت
هالدموع ؟ .. احيدج مافيج دلع ، وكنتي تلعبين ويانا كورة!!
قالت مريم وهيه تتنفس بعمق وتمسح دموعها: يعني شكلي ماينفع يوم اصيح!؟ .. ولا
ماينفع اكون بنيه من الاساس؟!
قالها: خخخخخخ لا هاي ولا هييج ... الا انتي الدلع كله فيج!!
وكمل وهو يوقف: انا اتصلت بواحد من الربع عنده صالون حريم بيطرش وحده من عنده
..
قلتله: منوه هالي عنده صالون حريم!؟
قال: واحد من الربع ، المهم انا بسير اشوف منصور شو سوى هو وعميه ، وبقولهم
انكم بعدكم ماجهزتو ..
يوم كان بيظهر دق تليفونه .. رد عليه خلاف قالنا : يالله المعدله يت .. بطرش
حد اييبها هنيه ، وانتو عندكم نص ساعه قبل 12 ..
ظهر عبدالله من صوب ، ومريم قالت بظحكه من صوب: ههههههه و الله يا هناادي
ماتعرفيين كييف ارتحت .. رااحه نفسيه و الله ..
قلتلها: راحه نفسيه وانتي هالشكل!
قالت : والله المكياج يفداااه و يفدا طوايفه ..
كملت وهيه توقف صوب المنظره : لحـــــــــــــــزن، صدقه بوحميد يوم انه
بيشرد عنيه ..
شليت كلينكس ، ويبت ما ، ويلست امسح الها المكياج على ما اتي مالت التعديل،
دقيقتين وحدرت المعدله ووياها غايه وعذيجه ..
قالت عذيجه وهيه تحط ايدها على بطنها و تقول بتعب: يااالله احس عظامي بينكسرن
..
وكملت وهيه اطالع مريم: ولخييبه، بلااج مريوم،؟ ,, صحتي اكيد!؟
قالت غايه بغيظ: اونه تتدلع علينا .. خلت المعرس حليله يتريا تحت!
يلست على الكرسي جدام التسريحه الي مجهزه ويا القسم، وفيها كل ادوات المكياج
..
تمينا تقريباً نص ساعه او اكثر .. وخلصت المكياج، طبعاً مابيكون شرات القبلي
.. بس حاولنا نقولها تسويه شراته .. اندق الباب .. كل وحده لفت على الثانيه
وهيه تقول: لايكون المعرس؟!
وقفت مريم عند غايه الي كانت بدخنها ..و انا سرت للباب بطالع منوه ..
وقفت وقلت بهدوء: منوووه؟!
: انا فجي ..!
فتحت الباب بسرعه يوم سمعت صوت عمتيه المبحوح ..
دخلت وهيه تقول: هاه خلصوتو؟ .. نقعتو الريال حليله!!
دخلت ووقفت جدام مريم .. ، اشرت للبنات انا نظهر احسن ونخليهن ارواحهن ..
كلنا تلبسنا عبينا و غايه شلت عذوب .. وظهرنا عنهم ..
أكيد تبا ترمسها عن شي ولا شي!!
.
.
.
الساعه 12 وخمس دقايق ..
في صالة الفندق ..
| منصور |
واقف من ساعه اتريا .. والله لو الاميره ديانا جد خلصت ..
طالعت ساعتيه للمره الالف .. عقب اربع ساعات رحلتنا ..
والحبيبه بعدها ماخلصت .. انا شوله مسوي كل شي من يومين ومجهز .. مش عشان
العروس ما تتأخر .. كنت بيلس يوم يا عبدالله وعمه .. وقفت صوبهم وانا اسمع
عمه يقول: خبرهم ايون احينه .. اتاخر الوقت ..
يوم وصلت قالي عبدالله: سمحلنا منصوور .. تأخرنا عليك .. تعرف انته الحريم و
عبالتهم!
ابتسمت بغيظ وانا اقول: لا ماعليك .. نتريا شو ورانا ..
قال عميه بوهند: يالله عيل .. بنسلم على العروس .. عسب تحدرون القاعه .. نص
المعازيم بيسرون ..
قلت فنفسي : و الله كله الا من فعايل بنتكم .. ولا انا مخطط عالساعه 11 ننزف
.. الا حرييم ماعندهن مونه!
بعد اربع دقايق .. وقفنا يدام القسم .. كنا نقدر نسمع اصوات الاغاني من صوب
القاعه .. مد عميه بو هند ايده بيفتح الباب بس سمعنا اصوات الشباب يايين ..
لفينا عليهم .. وتأففت صراحه .. شووهذا يعني مابحدر انا اليوم ..
يا عيد يربع وقال بسرعه: ورفجه ياعمي تخليني احدر قبل ..!
ابتسم عميه وقال : افا عليييك .. حيااك!
افففففف والله حاااله .. يو خوانه وراه وقالهم عبدالله عندكم خمس دقايق بس ..
قاله بخيت وهو يحدر آخر واحد : خمس دقايق اذا ماظهرنا انتو حدروا !!
لحظة، .. هذا كيف بيحدر؟!
كنت بمطه من اذنه ، بس فآخر لحظة اتذكرت انه خوها بالرظاعه .. قبظت ايدي
بالقو وانا احمد ربيه اني ما استعيلت ... كنت اروم اسمع اصواتهم وانحن واقفين
يدام القسم ... مارمست ويا عميه و لا عبدالله .. ياني اتصال من سعيد خويه:
وينك انته!؟
قتلته وانا ابتعد عنهم شوي: واقف شرات المطيرزي يدام باب قسم العروس ..
قالي بصدمه: بعدك ماحدرت؟!!
قلتله بغيظ: اقولك استوت سالفه وماعرف بلاهم يقولون بعدهم مش جاهزين!
قالي بسرعه: الله بسرعه ابويه يقول بيتم فالخيمه ويا الرياييل .. بعد الله
يهداكم من ساعتين المعازيم متعشين، يالله بسرعه!
قلتله وانا اشوف حمد يظهر من القسم .. : زين انا بحدر احينه .. نص ساعه
بالكثير وبنظهر صوب البيت ..
بندت عنه .. عدلت البشت زين .. و سرت صوبهم .. دخل قبليه عمي بوهند و عبدالله
.. والفروخ وقفو عنديه .. قالي حمد: هالله هالله بالريم يامنصور .. تراك خذت
شمعة بيتنا ..
وكمل عنه عمير بهدوء: هيه نعم .. ياويلك ان زعلتها!
رفعت حاجبي بخقه وانا اقولهم بثقه: افا عليكم النسايب .. مرره ريمان فعيوني !
تعمدت اقول ريمان .. بس قفطني عيد: هههههههه حشى مسرع مادلعتها!!
هالمفعوص يرمسنيه جيه؟!
قاله بخيت: هيه عيل، منوه يشوف الغاليه ومايدلعها .. الا الدلع حقها اروحها
..
طل عبدالله من الباب وقال : هاه المعرس ولا ماتبا تحدر ..
قلتله بسرعه: لا ابحدر شو مابحدر..!
رد عيد وقال: خيييبه مستعيل الريال!
هالعيد انا حطيته فمخي خلااص .. خل يصبر عليه بس!!
تنفست بعمق وحدرت .. هاليوم من بدايته وانا نادم اني ماشفتها قبل .. مع اني
طلبت انيه اشوفها .. بس خوانها ماوافقوا .. لكن عمها قال ماعليك منهم ..
بنطالع العروس جانها ماعندها مانع حياك الله .. يوم ييت هاك اليوم متعني،
وشال ويايه هديه كان قبل عرسنا بخمس شهور اظنيه .. المهم كنت ماخذ الها وايد
اشياء، ومنها طقم ذهب وايد عيبنيه فاشتريته .. خليتم فالسياره على اساس اني
بيلس وياها .. ويوم اسير بطرشه ويا بشكارتهم .. يلست فالميلس وماكان حد من
خوانها موجود غير عيد .. قالي بنبرة غريبه: حيا الله ريل ختيه!
ابتسمت له: الله يحييك .. علوومك ويا الدراسه؟!
قال وهو يحيس ثمه: زيينه .. انته شي تبا ياي؟!
وانسدح على الغنفه! ..
عقدت حياتي مستغرب منه ؟ .. شو شي تبا؟! ... جيه يردون هالضيوف!!
قلتله بقو: ماتستحي انته جيه ترد عليه ... نسيبك انا!!
قال وهو يظحك: هههههههههه عصب النسيب .. يارياال انا ماعرف ارمس بجديه شرات
خوانيه .. وانته بما انك ريل ختييه .. خلااص برمسك على انك واحد من الاهل ..
وكمل وهو يبدل فالتلفيزون: وانا جيه اسولف ويا كل حد من هليه ..
سكت عنه وانا اتريا عميه يرد .. بعد دقايق دخل ... ويهه متغير .. عرفت على
طول شو النتيجه ..
عصبت قبل مايرمس .. يلس وقال بهدوء : السموحه منك منصور .. بس مريم ماطاعت ..
لفيت على عيد ريته حاط ايده على ثمه ويحاول يكتم ظحكته ..
حسيت ويهي طااااح .. منوووه هيه عسبت ترد طلبيه!؟ .. انا مش ريلها والمفترض
تسمع رمستيه؟!
وقفت وانا ايمع ويهيه واقوله: تامر الريم .. جانها ماتبا ، مابنغصبها ..
وقف ويايه وهو يقول بهدوء: اسمحلنا ..
قلت وانا اسلم على عيد: ماعليه ,.. يالله نسلم عليكم ..
اشر لي عيد اونه باي، ومن دون لا يقوم ..
ظهر ويايه عمي بوهند .. سلمت عليه عند الباب .. ويوم ركبت الموتر .. ظربت
بقووو على السكاان ..
قهـــر .. شو هالسخافه بس ..!!
تتحرا انيه بسكت الها .. ماعليه خل نشوف يامريم ..!!
ظهرت من شعبيتهم وقبظت درب العين دبي .. عدلت الجامه جان اطيح عيونيه على
الهديه .. خساااره فيج و الله!!
كنت بوقف افرها .. بس قلت حراام مخسر فيها وايد انا ..
.
.
ردييت للواقع وانا اسمي بالله وادش الحجرة .. كان عبدالله واقف عند الباب
وعميه واقف عندها ..
كانت منزله راسها .. كل الي شفته، جســـمها الطويل و المتناسق! .. حشى!
سلمت: السلام عليكم و الرحمه ..
رد عميه وعبدالله السلام و انا وقفت جدامها .. شوي وتوصلنيه .. اكيد متلبسه
كعب ..
وخيت عليها بحب يبهتها بس تحركت ، شكلها كانت بترفع راسها .. بس صقعتني على
لحيتيه!!
عنبوو من اولها ظراابه .. الحمدلله انه عبدالله ما لاحظ ولا كان بيمصخرني صدق
.. ظحك عميه وقال: شوي شوي عالريال يابنتيه!!
نزلت راسها زياده .. ابتسمت بهدوء وانا ارفع راسها بايدي وابوس يبهتها ..
قلتلها: مبروووك ..
ماعرفت شو اسوي ، سرت وقفت عدالها ,, دخلت عمتيه .. هاي اول مره اشوفها ,,
كانت متلبسه عباه شوي خفيفه .. ومتغشيه ..
سرت صوبها قبل لا هيه اتي صوبنا .. سلمت عليها: السلااام عليييج عمتييه ..
: عليك السلام .. مبرووك الغالي ..
وكملت وهيه تسير صوب العروس الي ماشفت منها غير الفستان!
: هالله هالله فبنتيه يامنصور .. تراها غاليه علينا ..
وقفت عدالهم وانا اقولها بابتسامه: لاتحاتين فعيونيه ..
قالت : يالله عيل .. جهزنا كل شي ..
عدلت البشت ووقفت عدالها .. قالت عمتيه : اقبظ ايدها عن اطيح ، الفستان وايد
طويل ..!
مديت ايدي بقبظ ايدها .. حشى مبردها!!
ايدها نااعمه! .. شو هالاحساس!!
قال عميه بوهند وهو يحب العروس على راسها: يالله بنتيه .. ماوصيج على ريلج ..
هالله هالله فالمعامله الزينه !
قالت شي بس مارمت اسمعه .. ظهر عميه و يا عبدالله : ها مريووم نحن بنترياكم
تحت ..
قالتله: مابتدخلون ويانا؟!
رفعت حياتي وانا اقول: لا شووه يدخلوون !؟ .. فديتج رواحنا بندخل!
قلت فديتج بتلقائيه، بس مادريت انها جيه بتسويلها .. يبست ايديها الي انا
قابظنها وانتفظت بكبرها..
قال عبدالله : عيل نحن بنترياكم تحت .. اصلا اتأخر الوقت !
ظهر عبدالله وعميه وتميت انا وهيه وامها .. خوزت امها الغشوة عنها ,, واانا
انصدمت من شكلها .. ماتقول وحده فالاربعين .. او فنهاية الاربعين مادري ..
ابتسمت بهدوء ,. على الاقل شي يبشر بالخير .. دام امها جيه فأكيد هيه بتكون
بعد حلوه ..
قالتنا: يالله .. توها هند تقول احينه بتبدا الزفه ..
قلت: يالله انزين ..
ظهرنا من الحجرة والعروس تمشي شوي شوي .. دخلنا من باب القاعه العود .. قبل
مانلف صوب الباب الصغير الفاتح على القاعه كلها .. وقفت العروس .. قالت بصوت
واطي: لحظة ..
امها سبقتنا وتمينا رواحنا .. وخيت عليها وانا اقول: شوه؟! .. ماترومين تمشين
.؟
ماردت عليه .. جان انزل شويه اطالع ويها ... فتحت عيوني بقوة يوم شفتها ..
حلللوة!
ماتوقعتها جيه .. يعني محد رمسنيه عنها .. حطيت فبالي انها يمكن تكون خسفه ..
بس ماتوقعتها جيه .. ياويلي على الاحمر انا !!
لفت الصوب الثاني وهي تقول: النعال انفج .. لو سمحت تروم تزقر امايه تعدله!
نزلت عند ريولها وانا اقول: لا هب لازم أنا اعدله ..
كملت كلامي وانا ارفع الفستان ، ابداً ماتوقعت الفستان الي انا شريته جيه
بيطلع على جسمها .. حشى هذا مش جسم صاااروخ!!
.
.
|
31-07-12, 03:14 AM
جديد مواضيع قسم ارشيف خاص بالقصص غير المكتمله
العرض العادي
