البارت الثالث يوم الخميس باذن الله

سلام عليكم
ادري المفروض البارت يكون الخميس بس شديت الرحال لبيت جدي وانشغلت برمضان والتجهيز وهالعلوم
واعتذر عن التاخير
على الساعه 12 البارت يكون نازل باذن الله

البـــارت الثـــالث

فارشين سفرة الغداء وجالسين عليها وينتظرون
طالعت بناتها التوأم واشرت لهم:وحده منكن تروح تناديها
نوف اللي ما فهمت:من تقصدين؟
ام ذياب:من اقصد يعني مهوي
نوفه وهي توقف:انا بروح اناديها
ابو ذياب وهو يطالع ام ذياب:انتي ناديتيها
ام ذياب:يا ويلي ايه مناديتها بس شكلها نست الغداء
ذياب بابتسامه:الله يوفقها اينشتاين العايله
ام ذياب وهي تضربه وبمزح:قل ما شاء الله على بنيتي لا تتحرول علي ذياب:ههههه ما شاء الله مانيب ناضلها
نوف:اصلا لو بتنضلها ما تقدر عندها درع حمايه
شهقت ام ذياب وهي تضرب نوف:قولي ما شاء الله...كملت وهي تطالعهم:اعنبو داركم وش فيكم على البنت اذكروا الله
التفتوا وهم يشوفون نوفه نازله ووراها مها
جلست مها جنب امها اللي تكلمت:الله يهديس يا بنتي وش فيس ما نزلتي واخرتي الكل عن الغداء
مها وهي تعدل نظارتها وباحراج:اسفه والله نسيت
ابو ذياب بمحبه لبنته:لا تهاوشينها هذي مهوي عين السيح لو تنطرنا شهر كامل مستعدين ننتظر
ابتسمت وهي تنزل عيونها من مدح ابوها لها
نوف اللي جنب نوفه همست:ايه هي مهوي الحبيبه الغاليه واحنا خرفان الحوش نوفه:هههههههههه
التفتوا كلهم للي نازل من الدرج ويطالعهم:السلام عليكم
الكل:وعليكم السلام
ام ذياب وهي توخر لولدها علشان يجلس جنبها:تعال تغدى وانا امك
وليد وهو يعدل غترته:لا يمه مالي نفس بالعافيه عليكم
ابو ذياب:وين بتروح ..في احد يطلع الظهر
وليد وهو يتنهد ويطالع ذياب:بطلع الشباب مزهبين الغداء بالاستراحه
ابو ذياب اشر براسه:طيب
طلع وليد بعد ما رمى نظره لذياب اللي سوى نفسه ما شافه من الاساس
ام ذياب وهي تقرب من ابو ذياب الخس والجرجير:اقول يا مهوي تروحين معاي مها وهي تطالع امها:لوين
ام ذياب:في عرس لعايلة الخلفان وبروح له وش رايس تجين معاي مها اللي ما تحب الاجتماعات:لا يمه ما ابغى
ام ذياب:ليه ما تبغين تروحين ...كله حابسه نفسس في هالبيت لا طلعه ولا دخله مها:لا يمه هالفتره كلها امتحانات ما ابغى اروح
نوف:انا ونوفه بروح طالعتهم
ام ذياب بطرف عينها:اقول اقعدن بس بشوف غزيل يمكن تروح معي
نوف بضيق:وليه ما تاخذينا معاس يا يمه
ام ذياب:اخر مره خذيتكن معاي فشلتني قعدتن تضحكن على الحرمه ولبسها وسمعتكم وانا اللي طاح وجهي
نوف وهي تلف وجهها:محد قال لها تلبس شي ما يناسب سنها ولا وحده اكبر من جدتي تلبس ثوب كله خيوط وين اصرفها ذي
نوفه اللي ما قدرت تمسك نفسها:ههههههههههه....ام ذياب طالعتهم وسكتت
نوف اللي حست ان امها ما راح تاخذتهم طالعت ابوها:يبه تكفى قل لامي تاخذنا معاها والله ملل
ابو ذياب اللي ما يرضى على زعل بناته:اخذيهم معاس
ام ذياب:بس.. قاطعها ابو ذياب:خلاص بيقعدن عاقلات ...طالع بناته:صح
نوفه ونوفه:ايه
ام ذياب وهي تطالعهم:باخذهم ونشوف
طالعت نوف اختها وهي تبتسم بنذاله وحست نوفه ان ابتسامة اختها وراها شي


طلعت من الحمام اكرمكم الله وهي لافه راسها بالفوطه...حاسه انها بعد هالحمام صارت احسن وانعش
وقفت وهي تطالع زوجة خالها رجساء اللي شايله صحن الغداء وهي تناظرها بنظرات كلها كره ابتسمت في وجهها وهي تطالعها من فوق لتحت ولفت وهي تغني:
يا هواي ويا جنوني
يا من تساوي عيوني
ما اقدر احيى العمر دونك
وانته ما تقدر بدوني
رجساء وهي تدخل المطبخ وبقهر:جعل الجن يدخلس وافتك منس يا بعيده
اما عند مهره بعد ما فتحت باب غرفتها ودخلت صكرت الباب وراها...جلست على كرسي التسريحه وهي تفك الفوطه عن شعرها...مسكت المشط وبدت تمشط شعرها وهي تشوف نفسها في المرايه
بعد ما مشطت شعرها رجعته على وراء ومسكته بشباصه وقفت ومشت لحد ما وصلت لسريرها وانسدحت عليه...غمضت عيونها وهي تتذكر اليوم اللي فقدت فيه امها وابوها...تنهدت من قلب ...كل ما تتذكر انها فقدتهم تحس بضيق ...في كل سنه وفي نفس اليوم اللي توفوا فيه تذكرهم وتحس كانهم متوفين من فتره بسيطه....تذكرت اول ما جات لبيت خالها هي وعمشاء ...بدت تمر عليها الذكريات وكانها شريط قدامها....فتحت عيونها على صوت طق الباب
قامت من سريرها ومشت لحد الباب وفتحته وتغيرت ملامح وجهها اول ما شافتها:خير يا مرت خالي
رجساء:ومن وين بيجي الخير وانتي رحتي غرفتس وما جيتي تكملين باقي شغلس
مهره وهي ترفع واحد من حواجبها:ووشو شغلي ان شاء الله
رجساء :المواعين حقت الغداء من بيغسلها ولا تفكرين ان المواعين بتنظف بالحالها
مهره وهي تطالع يدين رجساء:ما اشوف في يديس حناء ...كملت وهي تاشر على نفسها:انا طبخت في هالحر وانتي كنتي جالسه تتابعين المسلسل ومكيف الصاله يهفهف على راسس والحين دورس اغسلي المواعين
رجساء:بس... قاطعتها مهره:الكلام اللي عندي قلته وخلصت
رجساء طالعتها بعصبيه ومشت والغل والحقد في قلبها يزيد
مهره وهي تطالعها وهي رايحه:متى افتك منس وارتاح...الخبله تحسب كل طير ينوكل لحمه...تفكرني زي عموش تكرفني وانا ساكته ما درت الخبله اني مهره اللي ما قدر عليها خالها علشان هي تقدر علي.....صكت الباب وهي تكمل:يارب فكني منهم ومن غثاهم يارب


نزل من سيارته ووقف قدام الصرافه ..دخل يده في جيبه وطلع بوكه وطلع منها بطاقة الصراف
دخل البطاقه وبعد ثواني:يووووه يا ليل وهذي عطلانه بعد...مالي الا اروح للبنك واسحب من عندهم الفلوس ابرك لي
خذا بطاقته من الصرافه ودخلها في بوكه ورجع لسيارته
بعد ربع ساعه وقف قدام باب البنك ونزل من سيارته ودخل البنك
بعد ما انتظر يجي دوره وقف قدام الموظف ...اشر له الموظف يجلس ...جلس وطلع بطاقته ومدها للموظف واول ما جات عينه في عين الموظف حس بان كل خليه من جسمه تصلبت...
ظل الموظف يناظره وهو يحس بان ضربات قلبه زادت...هو...ايه هو
نزل الموظف نظره بعد ما خذا بطاقته ...نزل عيونه على الاسم المكتوب على اللوحه اللي قدام الطاوله((حمود راشد))
سمع حمود يسال:ايداع ولا سحب
همس بهدوء:سحب
حمود بجمود:المبلغ
على نفس الهدوء:3000 ريال
مد له اوراق وقعها وبعد ثواني سلمه الفلوس ...وقف ومشى بدون حتى ما يلتفت لوراء
ظلت نظرات حمود عليه وهو يهمس:خالد ...ابتسم بسخريه وهو يكمل:من يصدق انه جاء عندي برجوله ...كمل وهو يتذكر اخوه علي:الله يستر
رجع نده على الرجال اللي كان ينتظر دوره بعد خالد وفكره مشغول بخالد

حس انه مخنوق..صار له ساعه من طلع من البيت ولا يدري وين يروح...
وقف السياره لما حس انه مو عارف وين يروح ...وقف قدام استراحة عائلتهم وفتح الباب ونزل ...اول ما فتح الباب نزل وهو يتسند على باب السياره وبعد ما حط رجله الثانيه على الارض خذا عصاته اللي ما صار يقدر يمشي بدونها وصك الباب
مشى وهو يتسند على عصاه لحد ما وصل لباب الاستراحه ودخلها
اول ما دخلها ووصل للمدخل الداخلي للاستراحه ..فتح الباب ودخل للصاله وتفاجا بوجود علي
همس وهو مستغرب وجوده لان في هالوقت ما يكون في الاستراحه احد:انت هنا
علي اللي كان منسدح على الكنب اللي بالصاله:متعب هذا انت ....تعدل وهو يجلس ويكمل:ايه هنا ما لي خلق احد قلت اجي مدام الاستراحه فاضيه
جلس متعب جنبه وهو يسمعه يقول:وانت وش اللي خلاك تجي هنا
متعب:ولا شي طفشان قلت اجي هنا استنى الباقين يجون
علي هز راسه وسكت وهو عارف ان متعب يكذب وزي عادته ما يقول لاحد اللي داخله
متعب وهو يسند عصاه جنبه:وش عندك ما لك خلق احد
علي وهو يتنهد:ضايقن صدري واحس انه شاب نار
متعب بملل:لا تقول بسبت هالثار
علي وهو يتعدل ويصير مواجه متعب:ايه في غير هالسالفه
متعب وهو يلف وجهه:وانت ما طفشت من هالسالفه الرجال قصوه من سنين طويله وقبروه والدود كلاه وانت جاي تركض ورى شي منتهي من الاساس
علي بقهر:ما الومك يوم تقول هالكلام تنام وتقوم وابوك قدام عيونك مو انا اللي انام واقوم على صوت صياح امي من قهر ما فيها
متعب وهو يتنهد:مجنون من ينفخ في قربه مخرومه
علي:وشـ...قاطعهم دخول وليد اللي مبين انه ضايق هو الثاني:انتوا هنا
علي:ليه ضايقه فيك الدنيا انت بعد
وليد وهو يجلس ويزفر:لا ...كمل في خاطره: وش اقول ايه ضايقه فيني الدنيا واختك السبب ..اهلي ناشبين لي بسبتها
دخل وهو يهمس:السلام
جلس وهو يسمع الكل يرد:وعليكم السلام
متعب:اخبارك يا حمود
حمود:الحمد لله..وش علومك انت
متعب:بخير وعافيه ولله الحمد
شافت اخوه اللي لاف وجهه وصاد عنه واطلق تنهيده ...توجهت كل الانظار لذياب اللي سلم وردوا السلام وجلس جنب حمود
لاحظ ذياب علامات الضيق على الكل...عرف سبب ضيقة اخوانه بس استغرب من ضيقة علي وقرب لحمود وهمس له:وش فيه اخوك عاقد النونه ونفسه بخشمه
تنهد حمود وهو يرد عليه بنفس الهمس:هو في سالفه غيرها
ذياب:لا تقول سالفة الثار
حمود:ايه
ذياب:والله ان اخوك ما عليه شرها سالفه انطوت صفحتها من سنين وهو يبغى يفتح الدفتر من جديد
حمو وهو يتنهد:انا قلت له بس دائما ما يسمع الا كلام امي
ذياب :مدام دخلت خالتي بالسالفه اجل كدو خير
سكت حمود وحس بان ما عندي أي كلام ممكن يرد به على ذياب...تذكر خالد اللي شافه اليوم بالبنك ما ينكر بانه يحس بكره له بس كل ما يتذكر انه فقد ابوه مثله يحس ان الموضوع انتهى والمفروض يشيله من باله نهائيا


نزل من الدرج وهو يركض وفي يده لعبته الطياره وبصوت عالي:واطير انا بالناس ووراي الاشرار وانا الف يمين بالطياره
صار يتحرك ويركض وعيونه على لعبة الطياره اللي رافعها فوق وبدون ما ينتبه ضرب المزهريه اللي جنب السلم وطاحت وانكسرت
التفت بخوف لصوت الصراخ اللي وراه:وكسر يكسر راسك ...وين عيونك فيه ..اعنبوا دارك عيون كبر عيون البقره ولا تشوف...كسرت لي المزهريه كسر الله راسك
طالعها وبخوف:والله ما شفتها قربت وهي تمسك يده وتضربه:ما شفتها ها انا بوريك علشان مره ثانيه تبقق عيونك وتشوف وانت تركض مثل الثور في المكان امتلت عيون فيصل بالدموع وبصوت باكي:والله العظيم يا جدتي اني ما شفتها والله العظيم
رجعت ضربته على راسه وبصوت مرتفع وعصبيه:اصلا وش منزلك تلعب هنا ليه ما طلعت تلعب برا
طلعت من المطبخ واتسعت عيونها وهي تشوف ام خالد ماسكه ولدها وتضربه وولدها يصيح....قربت منهم بسرعه وبعدت يد ام خالد عن ولدها وخذتها في حظنها:وش فيس عليه وش مسوي علشان تطقينه
ام خالد:ولدس ما تربى زين كسر لي المزهريه كسر الله راسه ان شاء الله عمشاء:لا تدعين عليه مو زين تدعين عليه
ام خالد اللي ناويه على الشر:ما بقى الا هذي تجي تعلميني السنع ووش اللي المفروض اقوله
عمشاء اللي تعرف ام زوجها تبغى تسوي لها مشكله استغفرت ربها وبهدوء:لا والله يا خالتي حشى لله مو هذا قصدي واذا على المزهريه اوعدس ما عاد اخلي ولدي يلعب في الصاله وانا الحين بكنس اللي كسره واول ما اروح السوق اجيب بدالها
ام خالد وهي تطالعها بكره:من قال اني ابغاس تشترين بدالها قطيعه تقطعس انتي وولدس
مشت عمشاء وصعدت الدرج وهي تبغى تنهي النقاش علشان لا تكبر الهوشه بينهم
ام خالد:ايه اسفهيني ..اصلا وين يلقى الولد التربيه السنعه اذا انتي ما لقيتي من يربيس حسبي الله عليس وعلى ولدس وعلى اللي دلنا عليس يوم اغبر يوم خذاس ولدي
التفتت لصوت الباب اللي انفتح ودخل منه خالد وتغير وجهها 180 درجه وهي ترحب بولدها:هلا وغلا بولدي
خالد وهو يبوس راس امه:هلا فيس
ام خالد:احط لك الغداء وانا امك
خالد:يا ليت يا يمه ترى ميت جوع
ام خالد وهو تروح للمطبخ:ثواني بس
مشى بيصعد الدرج ووقف لما شاف المزهريه المكسوره والمتناثره على الارض ....شاف الخدامه تقرب من المزهريه ومعاها مكنسه اشر لها تقرب ولما قربت همس لها:من كسر المزهريه
الخدامه:هزا بيبي فيصل كسر
خالد تنهد وعرف ان امه اكيد سوت مشكله لولده وزوجته اللي في كل مره لازم يجيها طشار من لسان امه...اشر للخدامه تكمل كنس وصعد الدرج لغرفته اول ما قرب لقى باب الغرفه مصايف ...سمع صوت ولده:أي يمه يعورني
عمشاء وهي حاطه ولدها في حظنها وتبوس مكان الطق اللي جاه من جدته:بسم الله عليك ..
فيصل وهو يطالع امه وعاقد حواجبه بزعل:انا ما احب جدتي كله تطقني وتصرخ علي
عمشاء وهي تمثل انها متفاجاه وتشهق:يووووه ما يصلح عيب يا حبيبي هالكلام...جدتك تحبك
فيصل:اجل ليش تطقني
عمشاء بابتسامه: لأنها عصبيه...يعني الحين انت مثلا يعني لو كنت معصب وطقيت صديقك معناتها ما تحبه
فيصل هز راسه بلا
عمشاء وهي تمسح دموعه:زي جدتك تطقك لانها معصبه بس هي تحبك واااااااجد فيصل وهي يضحك:وانا احبس انتي واجد
عمشاء بضحكه:وانا بعد احبك يا نور عيون امك واااااجد
فتح الباب وعلى وجهه مرسومه الابتسامه:الله الله وش هالحب كلكم واجد وانا لي الله
عمشاء:هههههههه اللي يتسمعون علينا ما نحبهم
خالد وهو يجلس جنب عمشاء ويطالع فيصل:شفت امك ما تحبني
فيصل وهو يطالع امه:انا ابغاها تحبني انا اكثر منك وانت رح لامك تحبك
خالد وهو يمسكه من اذنه:بعد طرده عيني عينك
عمشاء:هههههههه خل ولدي ...خلاص احنا نحبك اكثر شي صح
فيصل وهو يضحك:ايه
عمشاء:يله حبيبي روح غسل يديك علشان نتغدى
فيصل وهو ينزل من حضن امه:طيب...
طلع فيصل والتفتت عمشاء على خالد اللي تكلم:عسى ما جاء في خاطرس
عمشاء اللي ما تبغى تضيقه:ما فهمت
خالد وهو ينزل غترته ويحطها على السرير بعد ما دخلها في العقال:قالت لي الخدامه ان امي هاوشتكم علشان المزهريه
عمشاء وهي تاخذ غترته وتعلقها في العلاقه:لا عادي انا متعوده على خالتي وقف خالد وصار مقابلها:ويلوموني في حبي لس
عمشاء:هههههه من يلومك
خالد وهو يبوس خدها:العذال عسى ربي يقهرهم فوق قهرهم
عمشاء وهي تبعد وبخجل وتوتر:اقول
خالد وضحكته تكبر:بدينا بالتصريفات كل ما نستحي نصرف ها... عمشاء ووجها يحمر:هههه لا والله ما اصرفك
خالد وهو يكتف يدينه :قولي
عمشاء بجديه:سحبت لي الفلوس لاني العصر ابغى اروح السوق ما عاد في وقت وما عاد بقى شي على العرس
خالد وهو يدخل يده في جيبه ويطلع بوكه ويفتحه:ايه سحبتهم
طلع من بوكه 3000 ومدها لها
عمشاء :لا 3000 واجد عطني بس 1500
خالد وهو يحط الفلوس في يدها:خليهم معاس احسن
عمشاء بابتسامه:ربي ما يحرمني منك
خالد وهو يبوس راسها:ولا منس....فتحت عمشاء الدرج وحطت الفلوس :غير ثيابك علشان نتغدى
خالد وهو يتوجه للحمام اكرمكم الله:زين...وقف خالد قبل لا يدخل الحمام اكرمكم الله وظل يناظر عمشاء وكأن في خاطره شي بس متردد يقوله
قربت عمشاء وبشك:وش فيك
خالد وهو يطالعها :ها لا ولا شي....مشى وحس بيدها تمسك يده:لا انت فيك شي قول لي وش فيك
خالد وهو يطالعها لحظات قبل لا يتنهد
عمشاء من سمعة تنهيدته حست ان فعلا في شي
طالعها لحظات قبل لا يقول:ما تصدقين من شفت اليوم لما رحت البنك
عمشاء وهي تحس ان الخوف بدا يدب في قلبها:من
خالد :حمود
عمشاء وهي تعقد حواجبها:من حمود؟
خالد:حمود راشد ال نادر
اسعت عيونها وهي تشهق:يا ويلي عليك
خالد اللي تحسف لانه قالها: لا تخافين ما صار شي
عمشاء:وين شفته فيه
خالد وهو يمسك يد عمشاء ويمشي معاها ويجلس على الكنب اللي في زاوية الغرفه:شفته في البنك هو يشتغل هناك
عمشاء:وش وداك للبنك كان سحبت من الصرافه
خالد:الصرافه عطلانه فرحت اسحب من البنك ما حبيت انس تنطرين واتاخر عليس بالفلوس
عمشاء بخوف:وما قال لك شي ...تدري عاد لا تروح هالبنك ابد
خالد بهدوء:لا ما قال لي شي ...واذا على البنك كيف ما اروح له وفلوسي فيه عمشاء بضيق:افتح لك حساب في أي بنك ثاني...كملت بصوت كله رجاء:تكفى يا خالد لا عاد تروح هالبنك اليوم ما قال ولا سوى لك شي بس بعدين الله يستر ...لا تخليني اوسوس وطمني وقل لي انك ما راح تروح له
خالد وهو يحاوط كتوفها بيده:ان شاء الله خلاص ما راح اروح له وراح افتح في بنك ثاني بس انتي لا توسوسين ما في الا العافيه
تمسكت بثوبه بخوف من انها تفقد هالحظن وهالحنان اللي حست بانها تملك الدنيا لما تكون فيه

بصوت يملاه الضحك:فطومه ...صارت تصفق لها:هنا شوف هنا
طالعت اختها وبزعل:نوره شوفي بنتس صار لي ساعه اناديها وهي مو معبرتني
نوره:هههههه البنت ما تفهم ...مدت لها لعبه تطلع صوت:اشري لها بها اللعبه يمكن تطالعس
مسكت ميعاد اللعبه وهي تحركها في الهواء:فطومه شوفي خاله
طالعتها فاطمه وهي تاشر بيدها انها تبغى اللعبه:انا
ميعاد وهي تقرب وتقبص خدودها:يا لبى هالخدود فديت عيون حبيبة خالتها
نوره اللي شافت بنتها فيها الصيحه:حرام عليس خليها ترى بتبكي
ميعاد بضحك:وش اسوي خدود بنتس تجنن
دخل عليهم :السلام عليكم
نوره وميعاد:وعليكم السلام
قرب وشال فاطمه:يا لبى قلبهم اللي جالسين في الصاله ومحلين الجلسه ميعاد:شف ذا واحنا ما عاد لنا كرت
نوره:هههههه مدام المدح لبنتي ما راح اعترض
حمود وهو يرمي فاطمه في الهواء ويرجع يمسكها:حبيبة خالها هوووبا...باس خدها لما شافها تضحك له ورجع نزلها على الارض وهو يعدل غترته اللي بتطيح من على راسه وقف وهو ياشر لنوره:تعالي ابغاس شوي
وقفت نوره وهي تطالع ميعاد:انتبهي لها
ميعاد:طيب
راحت وراء حمود اللي دخل المقلط وشغل انوراه ودخلت وراه وجلست جنبه:امرني يا اخوي
حمود:ما يامر عليس عدوا بس بغيتس في سالفه
نوره:وش هي
حمود وهو يتنحنح وبهدوء:اليوم جاني سالم...نوره لفت وجهها والضيق منتشر على ملامحها
حمود:الرجال يقول... قاطعته نوره:لا
حمود:بس يا اختي... رجعت قاطعته نوره وبضيق:قلت لك لا يا حمود وخلصنا ... حمود:اسمعيني
نوره وهي توقف:خلاص يا اخوي وش فيك قلت لا انا ما ابغى احد بعد ابو فاطمه حمود بهدوء:انتي اذكري الله واجلسي
نوره هي تجلس:لا اله الا الله
حمود:يا اختي محد دايم لاحد وبعدين الموت حق علينا والواحد يستمر بحياته مهما صار...فكري بفطوم كيف بتربينها
نوره:مو عجزانه عن بنتي
حمود:يا نوره فكري بعقلس فطوم بكره لما تكبر ما تبغ يكون عندها ابو حالها حال باقي البنات ...ما راح تحس انها ناقصه
نوره وهي تطالع حمود :وسالم راح يكون ابوها ...لا والله ما يحل محل عبدالعزيز
حمود:نا ما قلت يحل محله بس...
نوره:حمود ان كان لي غلاه عندك لا عاد تفتح معي هالموضوع مره ثانيه
حمود سكت وهو يتنهد
نوره وهي توقف:لا سالم ولا وليد ولا غيرهم كلامي واضح يا اخوي
حمود اشر براسه بايه....طلعت نوره من المقلط تاركته يفكر فيها وفي بنتها وفي بنتها


نزلت من الدرج ودخلت المطبخ شافت اختها جالسه على الكرسي وفي يدها كاس شاهي شافت هياء تطبخ المرقوقه واول ما شافتها طالعتها بنظرات كره لفت وجهها وهي تمشي وتجلس جنب اختها:انتي هنا وانا ادورس
نوفه وهي تطالع اختها:انا قلت لس بنزل اشرب شاهي
نوف وهي تطالع هياء همست لاختها:وما لقيتي تشربين الا عند هالعله
نوفه بتعاطف:حرام عليس والله الحرمه طيبه وانا ما شفت منها شر
نوف وهي تطالع هياء اللي تخصها بنظرات كلها كره:هذي سوسه وحيه تلدغ من تحت لتحت
طالعتها نوف وابتسمت بطيبه لهياء اللي ردت لها الابتسامه:يمكن نذله معاس بس معاي حبوبه
نوف وهي توقف:انتي تبغين تبطين كبدي ولا وش سالفتس
نوفه:ههههه لا والله اقول الحق
مشت نوف وقبل لا تطلع:امحق حق تعرفينه
طلعت من المطبخ ومشت لحد الصاله ولقت امها وغزيل جالسين ويسولفون:لا ما اصدق غزوله عندنا
غزيل اللي وقفت تسلم عليها:ليه اول مره اجيكم
نوف:لا بس في العاده صوت ولدس يصدح في المكان دلاله على وجودس
غزيل:ههه بسم الله على ولدي من عيونس لا تصكينه بعين
نوف وهي تجلس:الا هو وينه ما اشوفه
غزيل:مع ابوه وبيجيبه معاه لا جاء
ام ذياب:ليه عبدالله ما دخل
غزيل:عنده كم شغله انا موصيته بها وبعدها بيجي
ام ذياب:زين ...قلتي له ان العشاء عندنا واننا مسوين مرقوقه
غزيل:هههه ايه يمه قلت له
ام ذياب وهي تمد تصب فنجان لبنتها:تقهوي يا بنتي
غزيل وهي تاخذ منها الصينيه والترمس حقت القهوه:هاتي عنس انا بصب
مدت ام ذياب لها الترمس:اخذي
صبت غزيل لامها فنجان قهوه:سمي
ام ذياب:سم الله عدوس
مسكت غزيل الفنجان الثاني وصبت لها وطالعت نوف اللي ما تحب القهوه:تبغين اصب لس شاهي
نوف اشرت براسها لا
ام ذياب:الا صدق يا بنتي وش صار على العرس اللي قلت لس عليه بتروحين معاي
نوف وهي تطالع امها:مو قلتي بتاخذينا انا ونوفه ولا هونتي
ام ذياب:لا ما هونت بس لو تروح غزيل معانا ابرك بعد
غزيل:من هو عرسه ذا
ام ذياب:هووو هماني قلت لس ..هذا عرس بنت صيته
غزيل وهي تعقد حواجبها:من صيته ما عرفتها
ام ذياب :يا ويلي وشلون ما عرفتها ...صيته اللي عندها ثلاث بنات....تذكرين يوم رحنا لتمامة بنت عايشه الزلال
غزيل:ايه
ام ذياب:اللي كانت جالسه جنب فوزيه هذا عرس بنتها
غزيل اللي تذكرت:يا حليلها والله ما توقعت ان عندها بنات يصلحون لزواج شكلها توها صغيره
ام ذياب :لا وين صغيره الحرمه عمرها صاك 45 بس لانها قزمه وضعيفه ما يبين عليها...كملت وهي تمسك فنجالها:ها بتروحين
غزيل:والله ما ادري يا يمه بشوف وبعلمس
ام ذياب:زين بس علميني بدري
دخل عليهم:السلام عليكم
الكل :وعليكم السلام
ذياب وهو يشوف غزيل:اوووه ام محمد عندنا
غزيل وهي توقف تسلم عليه:وش بلاكم ما تبغوني اجيكم
ذياب وهو يبوس راسها:الا نبغاس ونص
شافوا ابو ذياب داخل الصاله وراء ذياب:السلام عليكم
الكل:وعليكم السلام
باست غزيل راس ابوها ويده:وش اخبارك يا يبه عساك طيب.
ابو ذياب وهو يجلس جنب ام ذياب:بخير والحمد لله...انتي وش اخبارس بشريني عن علومس
غزيل:والله الحمد لله بخير وعلومي طيبه ولله الحمد
ابو ذياب:الحمد لله
تلفت ابو ذياب وباستغراب:وين حميد ما اسمع له حس
غزيل:مع عبدالله عندهم مشوار وبعدها بيجون
دخل الصاله يركض واخوه يلحقه:يبه يبه شفه
ذياب وهو ياخذ ولده في حظنه:خلف وش فيك على اخوك
خلف وهو ياشر على اخوه:يبه يقول لي يا حمار...ما يحترمني وانا اكبر منه
ذياب وهو يعقد حواجبه وبصوت بانت فيه الشده:فلاح انت قايل لاخوك يا حمار
فلاح:هو قال انت ما تفهم
ذياب وهو ينزل العقال من راسه وبتهديد:شوف انت وياه لو القى احد منكم يقل ادبه او ما يحترم الثاني بلشط هالعقال على ظهوركم سامعين
فلاح وخلف:سامعين
اشر ابو ذياب لنوره اللي واقفه عند الباب:تعالي يا حبيبة جدس
ركضت نوره وجلست جنب جدها وهي تتنعم بحنانه اللي يخصها به دون الباقين
غزيل وهي تشوف ذياب وعياله اللي جنبه:ما تسلمون على عمه
قام خلف من مكانه وسلم عليها وبعده فلاح اللي اشر له ذياب يسلم
غزيل:جعلني ما افقد هالوجيه ابد
دخلت نوفه اللي سلمت على غزيل من قبل وركض لها فلاح وجلس جنبها
ام ذياب:نوفه وين مهوي ما ناقصنا الا هي روحي ناديها لا تفوتها هالجمعه الزينه
نوفه:نسيتي يا يمه انها تدرس واذا عندها امتحان ما تطلع من غرفتها
غزيل بصوت ضاحك:لبى قلب هالمهوي احس في الاخير بتطلع عالمه ولا فيها حاله نفسيه
ام ذياب:بسم الله على بنتي فالس ما قبلناه خبله مره وحده
الكل:ههههههههههه
غزيل وهي تهمس لامها:يمه وين متعب اخر مره جيت ما شفته والحين بعد
ام ذياب بتنهيده:خليها على الله
غزيل:صاير شي
ام ذياب وهي تطالع زوجها وعيالها:بعدين اقولس
دخلت عليهم وبهدوء:السلام
الكل:وعليكم السلام
جلست جنب ذياب اللي اشر لها تجلس جنبه:اخبارس يا غزيل
غزيل وهي تطالع سميه وتلف وجهها وبدون نفس:من الله بخير
نوف همست لنوفه:شوفي لعانة غزيل الحين بتبين
نوفه:انتي وغزيل مدري ليه تكرهون حريم ذياب
نوفه:لانهم نذلات وخبيثات
هزت نوفه راسها ولفت تسمع سوالف ابوها وامها
دخلت عليهم وهي تعدل نظارتها:السلام
الكل :وعليكم السلام
ام ذياب وهي تطالع غزيل وذياب:ظلموتها هذي البنت طلعت من غرفتها
مها وهي تجلس على الكنب جنب عيال ذياب:وش فيكم
ام ذياب:يقولون حابسه نفسس علشان الدراسه وما راح تطلعين منها حتى لو ناديناس
مها وهي تضحك:مو لها الدرجه
فلاح وهي يطالع مها:عمه ابغى اجرب نظاراتس
ذياب وهو يطالعه:لا ما يصلح بتعورك عيونك
مها وهي تحس ان فلاح زعل طالعت ذياب وبابتسامه:لا عادي هذي مو طبيه بس حقت الدراسه...كملت وهي تفصخها وتلبسها فلاح:طالعني اشوفك
فلاح وهو يضحك:وجهس كبير
مها:ههههه..
فلاح وهو يطالع خلف:خلف شوف شكلي
صار خلف يضحك على شكل فلاح وهو يضحك معاه وجلس على الارض يشوف نفسه في انعكاس وجهه على ترمس الشاهي
دخلت الخدامه والكل سكت وهم يسمعونها تقول:بابا عبدالله عند باب
طالعها ابو ذياب ووقف وهو يبعد نوره عن حضنه:بروح ادخله ...انتي فتحتي له الباب
الخدامه اشرت براسها بايه
وقف ذياب :وانا بروح اشوفه بعد
وقفت مها وهي تمد كتابها حق الاحصاء اللي تو ذياب يلاحظه في يدها:ذياب متى بتشرح لي
طالعها ذياب واشر لها:تعالي اشرح لس الحين في المقلط وبعدها اروح لعبدالله
ام ذياب:يوووه ما يصير تخلي ابوك مع الرجال لحاله...الا رح لعبدالله ولاحق على مهوي ودروسها
مسك ذياب يد مها وهو يطالع من الصاله:الا عبدالله اللي ينتظري وهو مو غريب البيت بيته وبشرح لمهوي اللي وقتها من ذهب
مها ابتسمت بمحبه وحست انها طايره بمحبة ذياب اللي خصها بها غير كل خواتها
نوف وهي تطالع نوفه:قلت لس اننا خرفان الحوش ما صدقتي
نوفه:هههههههههههههه
بعد ما طلع ذياب حست سميه بانها ما لها مكان بينهم فطلعت لجناحها عندها منيره وهياء احسن من غزيل ونوف اللي تدري انهم ما يحبونها ولا هي تحبهم وعمرهم ما توافقوا في شي
دخل عليهم وهو يركض:جدتي
ام ذياب وهي تفتح يديها:يا عيون وقلبي جدتك
جلس في حظن ام ذياب اللي صار تبوسه وتمسح على شعره
نوف :توك ذكرتنا يا حميد بعد ما شبعت فرفره مع ابوك توك تجينا
محمد:لا ما نسيتكم بس رحت شوي ورجعت لكم بسرعه
نوفه:هههههه حرام عليس اخرتها الولد بيتعقد بسبتس
نوف بنذاله:خليني اجننه شوي...اشرت وهي تكمل:تعال سلم ولا ما تبغى تسلم علينا
قام من مكانه وسلم على نوفه ولما قرب من نوف سحبت خده بقوه وباسته
محمد:احح عورتيني
نوف وهي تقلده:اححح خكري انت تقول احد
محمد اللي زعل:يمه شوفيها تقول عني خكري
غزيل :نوف اتركي ولدي لا تهبلين به
نوف:ههههههه خليني اجننه شوي
وقفت نوف وهي تاشر للبزران:تبغون تلعبون
عيال ذياب وولد غزيل:ايه...ايه
نوف وهي تاشر بيدها:يله وراي
طلعت وطلعوا البزران كلهم وراها ووراهم نوفه
غزيل:ههههه نفسي اعرف وش اللي يحببهم فيها مع انها تعذبهم
ام ذياب:من خيبتهم ما لقوا الا نوف يحبونها
غزيل:هههههههههه...طالعت امها وبجديه:المكان فضى قولي لي وش فيه متعب
ام ذياب وهي تتنهد:اسمعي

سمعت طق على الباب
قامت وفتحت الباب وبضيق:خير
ارتسمت الضحكه على وجهها وهي تهمس:عموش
عمشاء:يمه منس من.خير مره وحده
قربت منها وحظنتها:يا حبيبتي ادخلي
عمشاء وهي تدخل:هههههه وش فيس فتحتي الباب وكانس بتخوضين حرب
مهره بصوت ضاحك:وش اسوي زوجة خالي بتجنني
عمشاء:الصراحه رحمتها يوم حسيت بالكارثه اللي بتجيها من وراس
مهره:مو لها الدرجه ترى هي العن مني
عمشاء وهي تجلس على السرير بعد ما فسخت عبايتها:ما علينا اتركينا من مرت خالي ...اليوم رحت السوق وما رجعت الا بعد ما شريت لس هالثوب
فتحت عمشاء الكيسه اللي شايلتها وطلعت من الكيسه ثوب احمر وعطته لمهره
مهره وهي ترفع الثوب:الله يا عموش يجنن
عمشاء:الحمد لله انه عجبس
عمشاء وهي تحطه على جسمها:مو كانه ضيق
عمشاء:لا ما راح يكون ضيق وحتى لو طلع ضيق راح اوديه الخياط يعدله..بس انتي لازم تجربينه الحين
عمشاء:طيب الحين اروح اجربه
عمشاء:بسرعه ترى خالد كلها ربع ساعه ويرجع ياخذني
مهره:وليه مستعجله
عمشاء:ما اقدر اطول وراي اشياء اسويها فروحي البسيه وخليني اشوفه عليس
مهره وهي تمشي:طيب
راحت مهره تجرب الثوب وتركت وراها عمشه اللي بدت تسترجع الذكريات اللي انحفرت براسها وبالتحديد في هالغرفه اللي كانت تنام فيها هي ومهره

دخل لجناحه والهدوء عام
اليوم يحس انه طول بالاستراحه وبالسهر مع عيال عمه راشد وزوج اخته غزيل
مر من قسم هيا وسمع صياح بنتها مزنه
كمل مشي لحد ما وصل لقسم سميه اللي اليوم هو دورها
فتح الباب ولقى النور مطفى ...كلم نفسه باستغراب:ما لها بالعاده ترقد الا لما اجي
فتح النور وصك الباب وراه
قرب وشافها منسدحه على السرير ومغمضه عيونها
جلس على طرف السرير وهو يحط غترته:ادري انس ما رقدتي فما له داعي التمثيل
تكملت وعيونها لحد الحين مغمضه:انا ما امثل بس ما ابغى اكلمك
حست بحركته لما قام من السرير وحست بصوت خطواته لحد ما وقف الصوت قريب منها...فتحت عيونها على وسعها وهي تشهق لما سحبها ذياب بقوه لحد ما جلسها وجلس قدامها:الحين نتكلم
سميه وقلبها يرقع:انت مجنون...الناس تجلس خلق الله كذا
ذياب وعلى شفايفه طرف ابتسامه:يمكن مجنون
لفت سميه وجهها وهي ساكته وحواجبها معقوده
ذياب:الغلا ليه ماخذ بخاطره
سميه وهي تتكلم بنبرة زعل:يعني ما تدري...اليوم غسلت شراعي مع اني قلت لك اني...
قاطعتها ذياب بجديه:هذا مو عذر يعني يعجبس ان امي تكرف
سميه نزلت عيونها ليديها اللي بحظنها:لا ...بس والله ما طرا على بالي لا الغداء ولا أي شي كل اللي كنت افكر فيه مكالمتي لعمتي...كملت وهي تطالع ذياب:انت تدري ان عمتي تعبانه وهي اللي بقت لي من ريحة ابوي وبعد ما قعدت اترجى بنتها سمحت لي اكلمها...ادري هذا مو عذر بس والله ما كان في بالي الا عمتي
ظل ساكت ...مد يده ومسح الدمعه اللي نزلت على خد سميه...قرب منها وخذاها في حظنه وخاطره مكسورعليها:خلاص ما صار شي
سميه بصوت باكي:انا والله...
ذياب وهو يقاطعها ويشد يديه حولها:قلنا خلاص
سميه سكتت وظلت مستقره بحظنه دقايق قبل لا يبعدها ويرجع يمسح دموعها:قومي غسلي وجهس يله
اشرت براسها وابعدت الغطا وقامت تغسل وجهها
تنهد وهو يشوف سميه تدخل الحمام اكرمكم الله
وقف يفسخ ثوبه وهو يتذكر الكلام اللي قالته اخته غزيل في اخر مره زارته:اعدل يا اخوي ترى الكل ملاحظ الفرق في التعامل بين الثلاث
غمضت عيونه وهو يهمس:والله احاول ما ابين بس مو ذنبي اذا الغلا زايد عند وحده دون الباقيات

نهاية البارت

اعتذر مره ثانيه للتاخير بس من جد صعب اني اكتب وفي بيت مليان وفي رمضان
وما راح احط مواعيد محدده لاني صعب التزم بس اول ما اخلص البارت انزله
واحاول ما اتاخر ان شاء الله
وقراءه ممتعه