©الـــجــــــــــ الحادي عشر ـــــــــــــزء©



يـــوم الخمـــيــس
1 صفـــر


الســـــاعه 6 ونص الصباح

رجع صالح للبيت وهو تعبآن ومرهق لأن سهرآن عند عمر و مواصل من أمس مـا نآم..

دخل غرفته و رمى شماغه و ثوبه على الأرض بـإهمال..

قـرَب لـ سريره و تفـاجأ لما لقى فـارس نايم فيه .. ألتفت يمين لقى سعد نايم على الأرض..

"صالح و هو يتمتم بقهر": ضـــاق فيهم البيت مـا لقـوا إلا غرفتي؟ المشكله إني ما بعد تزوَجت و تركت هالغرفه عشان يستحلونها!!
قسم إنهم دلـوخ .. بس هييييين حسابكم معي بعدين..


طلع من الغرفـه و نزل الدرج و هو رايح لـ غرفتهم عشان ينـام فيها ..

أنصــــــــــدم لـما لقى وتين نايمه لحالها..


صالح: هذي وش جابها هـِنا؟ لا يكون صاير شي و أنا مـا عندي خبر؟

"فكـَر يصحيها و يسألها بس خـاف إنه يزعجها .. أخذ المخـدَة و البطانيه من سرير سعـد و راح ينام بالدوانيه و بـاله مشغول فيها"..


ــــــــــــــــــــــــــــــــــــــــــــــــــ ـــــــــــــــــ


بـعـد ســاعــات ..

صحت أحـلام و تمت بفراشها تفتح عيونها و تسكـَرها من قـوة الألـم .. تعبت من كثر الصيـآح لـدرجه إن الدموع بلـَلـت المخـدَه ..
و شبعت تهزيئ من مشعل و تمنـَـت تختفي من الـدنيا و ترتـآح منه ..

مـا أعتـقـها من التهديدات بإنه (يحرمها من دراستها بالرياض) إلاَ بعد مـا أخـذ منها وعد ترجـَع الجوال لـوتين ومـا تقبل منها أي هديـَه ..
وهي نفـَذت وعده و طلبته يتم هذا المـوضوع بينهم ولا يعرف فيه أهلها .. و صار لها اللي تبيه ..
بـس ظلـَت خايفه من توتـَر علاقتها مع وتين .. و تشوفها صعبه لمـا تكون معها بـ غرفه وحده و بينهم زعـل و جفـا مـا تدري متى نهـايته..!!!

هي غلطت بـ حق وتين و محتـآره كيف تراضيها و تعتـذر منها..؟


قـامت من سريرها بـ كسل بعد لحظات التفكير و أخذت لها شـور سريع ..
و توضأت و صلـَت ركعتين و تمـَت جالسه على السجـاده تصيـــح و تدعي ربـَها إنه يفـرج همـَها و يريحها من الضغـوط و المشاكل اللي تصير لها ..


رن جوالها و قامت وهي تشـاهق و تمسح دمـوعها اللي تنزل بلـَلت وجهها ..

(( نـهـلــــه
يتصــــل بك ..))


"ردَت أحلام وهي مـا زالت تصيح": نهله وينــــك؟

"تفـاجأت نهله": خير عسى ماشـر ليه تصيحين؟

أحلام: تكفيـن سـاعديني .. ترى مـالي غيرك ..

نهله: طيب تعوَذي من الشيطـان و أنا معاك لا تخـافين ماراح أتركك.. بس علميني وش فيك؟

أحلام: تعبـْت منهم تعبـت!!!!

نهله: ميـن هـُـم؟



§§§§§§§§§§§§§§§§§§§§§§§§§§§§§§§




: مشعـل و أحـلام .....!!!

هديل: أوب أوب مشعل مـرَه وحده؟ وش يبي فيك هـذا..؟

وتين: مـا أدري.. حـاقد علي يبي أصيـر مثل أخته أمشي بـ جنب الحيـط .. و الله يحمـد ربـَه ومـا يطـلع من جزاي طـول عمره لأني مـا علـَمت أهلي عن الكلام اللي قـاله لي!

هديل: يا ويلي شكله مهزأ فيك ليــن بكره .. طيب ليه مـا قلتي لأهلـك؟

"وتين بـ ضيق": لـو قلـت لأهلي بيآخذون موقـف منه و أكيد تخرب العلاقات بينا بـ سببي و أنا مابي تصير مشاكل ..
إذا صالح عـرف بـ يمسح فيه الأرض و العجـْره أقرب أسلـوب لـه بالتفـاهم .. و سطـام مـُسـالم ومـا راح يبرَد قلبي بـ تفاهمه معـاه ..
يعني أحسن لـي آخذ حقــَي بـ نـفسي ..

هديل: وش راح تسـوَين يعني؟

وتين: أخلـَي علاقتي مع أحلام رسميه وسطحيـَـه يعني مالي دخـل فيها تعيش مثل مـاتبي ولا أسمـح لها تشـاركني بـ حياتي و حتى بـ مشـاويري و طـلعآتي ما آخذهـا معي أبدآ !!!!

هديل: عـز الله راحت فيها البنت .. طـلع الوجه الآخر لـك يـا وتين ..

وتين: أنا أعـطي الشخص أكثـر من قيمته و أقـدَره و أحترمه بس لـما يـدوس لي على طرف أدوسـه كلـَه ..

هديل: أممم بقولـك شي بس لا تزعلين!!

وتين: سـمـَي..

هديل: أحس إنك قـاسيه معها بـ زيـاده وهي شخصيتها ضعيفه و مهـزوزه و الدليل إنها تحـاول تفرض وجـودها زيك و عـاجزه ..
ومـا أظـن أنها لهالدرجه شرَانيه و ممكن تـأذيك لأن اللي صـار أمس بسبب مشعل مـو بـ سببها و أكيـد إنها مـو راضيه عن اللي سوَاه ..
إنتي تفضـَلـتي عليها بـ أشيـاء كثيره و مستحيل تنساهـا لـك و تجازيك بالشـرَ مستحيل ..
يعني أعتبـري المشكله بينك و بين مشعـل وهي برا الـموضـوع .. مشعل متحـامل عليك من زمـان و أنتي ملاحظـه هالشي و هـذا كله من غـِـيـرته منـك ..
بـس مـا تدرين يمكن هـ الحقـد و الكـُره اللي فيه مـُجرَد إعجـاب مـُلبـَس بـ قسـوة!!! ترى الرجـال يحبـَون الحرمه اللي شخصيتها قـوية و يكرهون الضـُعف و قـلة الحـِـيله..
والله لـو إن أحلام شخصيتها قـوية كان حطـَها مشعل على راسه بـس مـا تدرين وش طبيعـة حياتهم بالقريات و ليه هـو يعاملها كذا .. وأحلام مـا تسولف لك شي أبـد صح؟
عشان كـذا أقولـك أعذري لها سـُوء تصرَفها ..
و أبعدوا عن بعض كم يـوم لما تتصـافى قلوبكم و ترتـاح نفسياتكم و ترجعون مثل أوَل و أحسن أن شـاء الله ..........
آلــــو .. وتيــن .. إنتي معــــآي؟؟

"وتين وهي تنـطـق بـ ثقـل": معـاك .. بـس إنتي ليه تحسـَسيني إني قـاسيه والله إني إنظـلمت!!

هديل: أنـا أكلمك بالعقـل خلـَي عواطفـك على جنب..

وتين: أحلام مـو سهله مثل مـا إنتي متصـوره و ينخـاف منها .. تراها تتصرف بـ حريـَة مـو ناقصها ضعف شخصية ..
هـي بس عندنا بالبيت كذا و إلا تعالي شوفيها بالجامعه شلـون فالـَتها ع الآخر.. و هذا كله بـ جهه و أسألتها عن عـُمـر بـ جهه ثانيه كـم مـره تسألني عنه و تلمـَح عليه.. طفـَشـتـني!!
والله مـا راح أسامحها ولا أتكلـَم معها إلا لما أطيـَح كل اللي بـ راسي ..
أبي أقهـرها مثل ما قهرتني و خرَبت علي فرحتي بـ ملكة صالح و نـاديا ..
و بعدين تعالي.. أي إعجاب اللي يطـلع من مشعل بصراحه تفسيـرك غريب ..
إنتي تعرفين إن بيني و بينه حرب و ضـرب و مواقـف قديمـه كرهت أسـافر للـقريآت منه ..
و أذا إنه صـدْق مـُعجب بالقويـه الله يبلاااااه بـ زوجه تلغي شخصيته مـن أساسها!!

هديل: براحتك.. أنا قلت اللي عندي بس لا تزعلـين مني لأني أبي مصلحتك والله..

وتين: ولا يهمـَك هدَوله إحنا صديقات وما بيننا أعذار ..
بس أبي منك خـدمه صغيره!!

هديل: آآآمـري..

وتين: كلمي صفـاء و أتفـقوا على مكان نطلع نغيـَر جو فيه و أعزموني أنـا و بنت جيرانا رينـاد اليوم..

"ضحكت هديل": هههههه أوخص يالمسكينه (أعـزموني) هذا إنتي عزمتي نفسك مع رينـاد..

وتين: عشان أقـول لأهلي صديقاتي عازميني لحالي بـدون أحلام..

هديل: أهـب منك مانتي هينه .. خلاص أكلـَم صوفي و أرد لـك خبر فمان الله..


"سكرت وتين و حطـَت الجوال على سرير فـارس و راحت للمطبخ تدور لها شي تـآكله لأنها من صحت كلمت هديل ولا قـابلت أحد من أهلها"


: مســـــاء الخير ..

"ألتفتت وتين على فارس": أهلين فروسي..

فارس: مـا صارت كل هذا نـوم الساعه 2 ونص ألحين..

"وتين وهي تمسح على راسها بـ تعب": والله مـا شبعت نوم .. مـا يجتمع القهـر مع الرآحـه..

"فارس بـ ترجـَي": بالله وتين علميني وش صـاير بينكم إنتي و الطعسـه أحلام والله مـا أقول لأحـد..

"وتين بإستياء": فكـَني من طاريها أبي أنسى لا تذكـَرني..

"فارس بـ إصـرار": قلـت تكفـى!!

وتين: فروسي هـذي سالفـة خاصه مـا تصلح أقولها أحترم الخصوصيه ..

فارس: وتين ترى هـذا الكلام لـ جدَتي و سطـام مـو أنا .. والله عندي أحساس أن المشكله مـا طلعت عن أهل أحلام بـسبب خالي صالح .. زعلانين لأنه مـا تزوج من بناتهم و إلا وش معنى هالمشكله مـاجت إلا بـ يوم ملكته؟

"وتين و تحاول تصرَف الموضـوع عشان مـا يرجع يسألها مره ثانيه": إيوه صـادق لأن من رجعنا مـن الحفله و أحلام قـافله معها ومـا حسـَيت إلا وهي منفجره فيني صياح و هواش..

فارس: مـا تستاهل طيبـتك معها..

وتين: المثل يقـول أعمل خير و أرميه بالبحر يعني أنسـاااااه..
على العموم الله يسـامحها و يهدي أهلها..

فارس: تعلـَمي يابنت و أستفيدي مـن أخطائـك وإلا راح تصير حياتك بـارده و مالها طعـم ..

"أبتسمت وتين وهي تمسك خدوده بـ مزح": يـا حلوك لما تتـفـلسف أغـدي كشنه على قـولة صالح ..

فارس: ذكرتيني بخـالي صالح المسكين نـام بالدوانيه.. ألحين يحسبنا أنـا وسعد متعمـدين لـه هالحركه..

وتين: لا صلوحي حبـَوب لو زعـل مـو من قلبه..

فارس: مـا سولفتي لي وش سوَى لـما شـاف ناديا؟

وتين: مـوَتني ضحك و ربـَي أنه فلـَه.. تصـوَر أول نظره صار يتنهد و يآخذ أنفـاس واضح شعـوره ههههههههههه..

فارس: وش سـولف لما جلـس معها؟ شـوف عيني بـ طـاري السلق و البـر..

وتين: لا يـا عمري هـذا قدَامنا بس و إلا معها تطـلع السوالـف الحلوه ..

فارس: يمكن بعد التغيـَر اللي صـار بـ شكـْله هالشي أثـر على سوالفـه .. الله يصبـَر ناديا عليه لا يقـلب و يرجع مثل أوَل..

وتين: حتى لـو رجع عادي عند ناديا لأنها متـقـبـْلته بكل عيـوبه..

فارس: مـا شاءالله عليها أحسـَها مـو من هالبنات المغرورات اللي مـا يرضون بأي أحـد بالعكس متواضعه .. كنت شـايل هـمَ خالي صالح و هي فـرَجت هالهم..!!

وتين: لـيــه؟

فارس: قلت مستحيل بنت بالدنيا توافـق تتزوجه يـاختي عـربجي..!!

وتين: بسـم الله عليه ربـَي رزقه بـأحسن بنت لأنـه طيـَب و يستاهل..

فارس: الله يرزق خالي سطام و عمـر بعد .. و بالذات عمـر يـآآآآآآه متحمـس لـ زواجه مرَه..

"أبتسمـت وتين و هي تعـضَ على شفـايفها بـ خجل": آميـن..

"فـارس وهو يستـأذنها و يطلع من المطبـخ": تغدي و تعالي نكمل سوالف بـ غـرفتي ..




>>>>>>>>>>>>>>>>>>>>>>>>>>>




وفي القريــــــات..


"دخل مشعل الصاـله و هو بـ لبـس الـدوام .. حب على راس أمـه و أبـوه و جلس هو يتنهد من التعـب"..

أبو مشعل: الله يعطيك العـافيه يـا ولدي..

مشعل: و يعـافيك يبه .. تعب هـالدوام والله تعب ..

أبو مشعل: مأجور ياولدي أنت جالس تحمي الدوله و تحفظها من الفساد .. و بعدين إنت شغلك على كرسي و مرتااااح مـا غير تختـَم بهالجوازات ما وراك تعب مثل المفتـَش ..
تذكـر اخوياك اللي يفتشون سيارة واحد معه مخدرات و يومنهم كشفوه طعنهم هالمروح بـ سكـَين اللي يطعن بسيرته..!! وأسعفوا هالمفتشين و ربـَي رحمهم برحمته ..

أم مشعل: احمد ربك أنت حالـك أحسن من الموظفـين اللي معاك .. أقـلـَها بيتنا قريب من الجمـارك مـا تتعب بـ مشوار الطريق و تجي ترتاح هـِنا و ترجع لـدوامك بأي وقت ..

مشعل: الأجازه بدت يمه و بدأ معها ضغـط الشغل و الـزحمه ..

أبو مشعل: ماهو جديد عليك .. المهم تقهوى و أرجع لدوامك لا يخصمون من راتبك وإلا يعـاقبونك ..

أم مشعل: مـا تقـدر تآخذ إجـازه تروح تجيب أختك أحلام من الريـاض..

"مشعل وهو يقرَب للسفـره و يصب لـ نفسه قهوه": من شـوي و أنا أقـول ضغط شغل يعني مـا أقدر آخذ إجازه .. و بعدين أحلام مـا قدَامها إلا أسبوع و بعـدها يبدأ الترم الثاني يعني ما يسوى تجي للقريـات عشان أسبوع ..

أم مشعل: والله لـو تلقى اللي يجيبـها كان تركت الجـامعه أسبوع ثاني مـن غير الإجازه بعد أهـم شي تستانس بـ شوفـة أبوها و أخوانها..

مشعل: يا سلام .. سوَيتوا قضية عشـان تكمـَل دراستها بالرياض و الحين تقـولين تترك الجـامعه أسبوع؟ مـا يصير هالكلام ..

أم مشعل: أنـا أقول (لو) و هـ الأسبوع مـو مـأثر عليها..

"أبو مشعل وهو يمسح على لحيته بـ تفكير": كود أني أسـافر بكره مع ولد أبو حزام .. عنده شغل بالرياض و أبي أخـاويه..

"عصـَبت أم مشعل و ردَت وهي عـاقده حواجبها": و كود أني أخـاويك أنا بعد و رجلي على رجلك.. أجل أحلام بنتك أنت بس! حتى أنـا أمها و أبي أشوفها و أتطمـَن عليها..

أبو مشعل: إنتي أجلسي عند عيالك وش يوديك للريـاض..

أم مشعل: حتى هـُم عيالـك ..

"أبو مشعل بـ تذمـَر": ياحوووول يا مـًره عويذ الله من شـرَك أتركيني أروح أشوف هالمسيكينه اللي محذوفه بالرياض .. مدري متى ربـَي يفرجها و تعرس و نتطمن عليها..

"أنصـدم مشعل من كلام أبوه و سـأله بـ تعجـٌب": ليه أنت نـاوي تزوَجها أحـد من الرياض؟ وإلا تقـصد إنها تتزوج و تترك الـدراسه و ترجع للقريات..

"أرتبك أبو مشعل و ردَ بسرعه": أنا أقـول أن جاها نصيبها نخليها تترك دراستها و ترجع لأن البنت مالها إلا بيتها .. و أن ربي رزقها من عيال الرياض نزوَجها إذا كان الرجـَال زين ومتربي و نسبه يشرَف..

مشعل: الظـاهر أنها تلعب هناك وما تدرس .. شلـون تترك الدراسه بـ برود كـِذا..؟
هي مـا أبعـدت كل هالشهور إلا عشان تجيب الشهاده و ترفع رأسك مـو هذا اللي تبيه؟

أبو مشعل: يا ولدي تعوذ من الشيطان وراك معصـَب .. أنا أبيها تكمـَل بس أن جاها نصيبها ما نقدر نرفـض ..

"نزل مشعل فنجان القهوه وهو متنزفز و قـام من السفره": الشرهه علي أنا اللي أهتـم بـ سـالفه من أساسها غلـط بـ غلـط ..
مـانتم قـادرين تحكـَمون حياة أحلام بـشي صح .. احلام راح تضيع و السبب قراراتكم اللي مـا أدري كيف صايره ..
تربية عمامي غير عـن تربيتنا و هالشي أثـَر سلبي عليها لازم تفهمون ..!!

"سكـت ثواني وهو يمسح على راسه بـ توتر و كمل بشـكَ "
إسمـع يبه .. إذا أنت ناوي على شي بخصوص أحلام عطنـي خبر من ألحين و ريـَحني مـا يصير تشتـَتني كـِذا تراها أختي و أخاف عليها .. و أنت فـاهم قصدي..
أذا أنها مخطوبه من دون علمي سواء لـواحد بالقريات أو الرياض "شدد على هالكلمه بقوه" لااااازم يكون عندي خبر من الحين وإلا أعتبركم ملغين وجودي..

أم مشعل: ماحد ملغيك ياولدي علامـك تحوس بالحكي.. وش زينها عاد بنتي تنخطب و حنـا ما ندري عنها!!

"زل لسانه أبو مشعل و توهـَق .. كان موضوع خطبة (سطام وأحلام) سـر مؤجل بينه و بين أخوه فهد لـما تجي العطـله الكبيره و يتم الموضوع رسمي .. بـس الظاهر أنه بهالزلـَه رمى أول خيـوط السر و أشغلهم فيه"..

أبو مشعل: أقطعوا الهرج و أتركوا أحلام علي لا تتدخلون..

"طلع مشعل وهو يلبس طـاقيته على راسه بـ قهر و باقي فيه الضيقه مـن وضع أحلام و اللي زاد عليه كلام أبوه الغريب و عجز يفسـره"...



^ ^ ^ ^ ^ ^ ^ ^ ^ ^ ^ ^ ^ ^ ^ ^ ^ ^ ^ ^ ^ ^




: سلاااامتـك من الضيقه يـا جعلها بـ عدوينك أن شـاء الله..

"وتين بحسره": آميـــــن ..

صفاء: هذا أحنا أخترنا أحلى مـلاهي نلعب و نسولف و نضحـك نستـرجع أيام الطفـوله كـذا بـ مـزاااااااجـنا ..

هديل: وتين جبتي معك المسجل؟

وتين: أيوه مع خدامتنا سيتي..

هديل: يا حركآت مـا يمدينا على البرستيج جـايبه خدَامتكم..

"وتين بأستهبال": أعتبرها البودي قـارد الخآصه لي آآآحم آآآحم ..

"ألتفتت ريناد على وتين و تسوَي نفسها معصبه": وتينووووه لا يكون عـازمتني عشان يكمل برستيجك و أصير أنـا البودي قآرد 2..!

"صـرخت وتين وهي تقرب لها و تحضنها بـ خفـه": لاااااااااا يـا عمري إلا إنتي عـاد ما أستغني عنك لا تقولين كـذا ترى أزعل!

"ريناد وهي حاضنتها و تضحك": هههههه أمـزح معك يالدوبا..

هديل: أجل من جلس عند أحـلام بالبيت..؟

وتين: أمي مـوجـوده ..

صفاء: مـا سألوك أهلـك ليه مـا أخذتيها معك؟

وتين: كل البيت سألني ما عدا صالح و أبوي لأنهم مـا يدرون أني طـالعه للملاهي..
آخر شي سطـام سألني بالسياره لما أخذني !! أنـا خلااااااص بغيت أصيـح من القهر وهو حس إني تضـايقت و سكت مـا ناقشني أبدآ..

"هديل وهي تلعب بخصلات شعرها و تمثل عليهم": يالبييييه يـا أخوك ذا أطـْخـم و يخقـَق مـا تخطبيني لـه؟ مابي شي إلا أن تتحقـق أمنيتي و أتزوج واحد رآقـي مثله..

"ضحكـوا البنات من كلامها و ردَت عليها وتين وهي مـا زالت تضحك": هههههههه إنتي مـا بقى أحد إلا و خطبتيه..

"هديل وهي تحـرَك حواجبها": بـاقي عيال جيرانك و تحديدآ عـُمـرررررر..!!

"طيـَرت عيونها وتين وهي تقرب منها": يالنذلـه مـا لقيتي إلا عمـَوري ..

"هربـت هديل وهي تضحك و لحقتها وتين ..
مشـوا صفاء و ريناد وراهم وهم يضحكون على أشكالهم لأنهم يتهاوشون بمزح"..



\ \ \ \ \ \ \ \ \ \ \ \ \ \ \ \ \ \ \ \ \ \ \ \ \



و بـ مطـعـم النافـــــــوره ..


كـانوا مجتمعين الشبـاب/ صالح و أبو عطـا و أبو طـلق و دلـي لأن عمـر عازمهم على العشـاء بـمناسبة ملكة صـالح..

عمر: أعـذروني شباب كان ودَي أعزمكم بالـمطـاعم الـراقيه بس إنتـم أصرَيتوا على إنه يكون هـِنا..

"صالح وهو كـاتم الضحكه": أنـا أول مره أشوف ناس معزومين يتحكـَمون بـ مكان العزيمه..

أبو عطا: نمـووون على أبو عمير .. بعدين أهـم شي يكون أكـل المطعم حلو مـو مهم مكـانه..

عمر: على قولتك حلو .. المهم وش تحبون أطـلب لكـم..؟

أبو طلق: لحظه خلني أشـوف الـدفتر وش فيه أكلات عشـان أختار..

صالح: أسمه (منيـو) مـو دفتـر..

أبو طلق: أسمعـوا من يعدَل علي؟ يعني عشـانك أخذت بنت كشـخه صرت تتفـلـفـس ..

"أبتسـم صالح": ايه أبي أشـوف نفسي عليكم .. أنـا تزوَجـت و أنتم لسـَه عـوانـس ..

دلي: إلا مـا قلت لنا وش أسـم مرتـك..

"صالح وهو يقلـَده بإستيـاء": مرتـك !! يـاااا ثقـل دم هالكلمه مـا أحبـَها .. قـل زوجتك و مالـك دخل بـأسمها ..

أبو طلق: أنت مستلمنـا تعـديلات اليوم ..

"عمر بـ تهديد": لو سمحتوا لا تضـايقون صديقي و إلا ترى أكنسل العشـاء..

أبو عطا: خلاص لا حـد يسأله خلـَوه براحته أهـم شي أننا نـآكل..

صالح: لااااا لحظه قبل العشـاء خلـَونا نتفـاهم على سواتكم فيني أمـس..!! و ربـَي إنكم قليليـن خاتـمه..

"ردَوا الشباب بصوت واحد ": وش سوينااااااااا..

"صالح بـعفويه": سـواة العدو .. من جلست مع نـاديا أستلمتوني إتصـالات و رسايل يلعن أبـو الإزعـاج اللي تعرفونه! متـَفـقين تنكـدون علي الجلسه..

"أنفجــروا الشباب بالضحـك على صالح لأن زلَ لسـانه و نطـق أسم ناديا .. و عمر يضحـك معهم ولا هـو قـادر ينبهه"..

أبو عطـا: أسمها ناااااااديا..! عاشـت الأسامي ..

أبو طلق: أجل مرتك ناديا هي شريكـة حيـاتك..؟

"عمر وهو مـا زال يضحك و ينـاظر بصالح": هههههههههه ياخي عليك طبـَـآت رهـيييييييـبه..

"صالح وهو يحـك رأسه بإحراج": المهم تراهـا أمور أسرية مـاله داعي تحكـون فيها..

أبو عطا: أقـووول عمر أستعجل بالعشـاء قبل لا تكثر طبـآت صالح ..

"رن جوال صالح و كـانت المتصله وتين.. قـام وهو يستـأذهم": أبي أكلـَم و أرجع لكم .. والله لا أفرشكم هـِنا و أقضي عليكم ..

أبو عطا: أقـوووول روح كلـَم ناديآ لا تتـأخر عليها..

صالح: مـو ناديا يالدلـخ اصلآ هذي مـا بعد أخذت رقمها ..

"ضحـك عمر بقوه وهو يضرب الطـاوله": ههههههههه فضحـت نفسك يا أبو صلوح خـلاص أسكـت..

أبو عطا: مشكلتك إنك مـا تعرف تسوي خصوصيات.. روح كلـَم أمـك و أخلص علينا..

"صالح وهو كاتم الضحكه": مهي أمـي بعد .. و مـووووت قهر مـاني قايل لـك ..


"رجـع أتصل على وتين وهو يوقـف بعيد عنهم بـ مسـافه"..

وتين: مرحبا..

صالح: هـلا وتين .. وش عندك متصـله..

وتين: أممم أسمـع أنا ألحين بالـملاهي و أبيك تجي تـآخذني بعد ساعه..

"صالح بـ تعجـَب": مـلاهـي! خير بزر إنتي؟

"أنقهرت وتين": يـووووه لا تتطنـَز علي يعني أوَل مـره أروح؟

صالح: مـا تكبرين عـن هالحركـات..

وتين: أنت شفت نفسك تزوجك يعني خلاص كل الناس صاروا كبار بعينك؟

صالح: المهم اللي أخـذك يرجعك أنـا مشغوووول مـآني فاضي ..

وتين: اللي أخذني سطـام و من شوي أتصل يعتـذر لأن من الصباح راح يسـافر للشرقية عنده شغل ضـروري و لازم ينام بـدري ..
و ترى معي رينـاد بنت جيرانا و راح ترجع معي بعد_ يعني لازم تجي أنـت تآخذنا قبل السـاعه 12 لأن بوابة الملاهي تقفل ..

صالح: يالييييل يـاسطام سفراته كثيره .. و إنتي وقتـه تروحين ملاهي..؟

وتين: بكيفي رايحـه أنبسـط و إذا مـا تبي تآخذني خلاص أرجع مـع سايق صديقتي صفـاء ترى جداً عـآتي..

صالح: بلا سايق بلا خرابيط خلاص أنا أجي آخـذك بعد ما أنتهي من العشـآء..

وتين: أوكِ .. الساعه 12 لا تنسى .. بـآي ..



***

بكره اكملكم باقي الاجزاء

قراءة ممتعة

اختيآآر موفق معزوفه ~

من الرواياات اللي استمتعت بمتاابعتها وعشقت ابطالهاا

بالتوفيق حلووتي