جمرة العشاق

جمـرة العشـاق تاليهـا الرمـاده
حكمتـن كذبتهـا بيـنـي وبيـنـي

ليه وجه الصـدق لبسهـا قـلاده؟
وكيف مات الصدق في قلبي وعيني؟!

نامـت جروحـي ونومتهـا عبـاده
بـس لانامـت يصحيهـا حنيـنـي

من بعد ماغبت صار الحـزن عـاده
فالخفـوق اللـي يبيـك ومايبينـي

الغـلا واشواقـي وضـعـف الاراده
شجعتك إنك على المـوت تحدينـي

جيتلك مثـل المغـرب عـن بـلاده
ماذخر عن دنيته كلمة ( عطينـي )

جاك من غي الدهر يبغـى رشـاده
طمعته كانت ( دخيلـك تحتوينـي )

قال لـك كلمـه ماتحتـاج لأعـاده
انـت محبوبـي وثالـث والديـنـي

تهت والله تهـت واحتـاج لسعـاده
مـن مقاديـر الليالـي تنتشيـنـي

يوم شفت الوصل ميت فـي مهـاده
ماقـدرت امنـع تصافـق راحتينـي

ليت ابو متعب بعـد جـات الزيـاده
زود احساسك عشان تحـس فينـي

المخرج :،
.


من محجر العين طاحت دمعة الخافق ..
......... اللي ملاه الغياب ويبّس اوراقه


تبي بعادي .. ؟ ملزم ..؟ طيب موافق ..
.......... بس اخذ قلبي معاك وموت اشواقه