كاتب الموضوع :
Metvirus
المنتدى :
مدونتي
نوجي
قطة صغنتوتة و غلبانة، جابتها ماما من شغلها، بعد ما زمايلها قالولها أن امها سابتها من غير أكل لمدة 10 ايام بحالهم .. انا مش عارف إن كانت المدة دي خيال علمي و لا لأ، بس القطة كانت هيكل عظمي. صحيت و امي بتزغطها اللبن من علبة نقط عيون فاضية احنا بنستخدمها للقطط الصغيرة .. حصل امبارح أن امي وكلتها اربع مرات اربع علب لبن زائد اربع علب ميه
البنت كانت الصبح مفنيخة
كنت خايف عليها من كتر الأكل انا و ماما ، خصوصا انها كانت ف شبه غيبوبة.. كانت بطنها عاملة زي الكورة الشراب.. انا قلت لامي مية ايه اللي هي كانت بتشربهالها؟ عمرك شفتي قط بيشرب وسط الأكل؟! بس المطمئن شوية ان عملية الأخراج عندها اشتغلت.. ده لو محصلش كانت ح تبقي مشكلة.. انا امبارح سمتها نوجي .. من ناجية .. ماما قالت ان ده كان اسم دلع جدتي، تقريبا 26 سنة و انا مسمعتش اسم الدلع ده . بس اصل نوجى ده دلع ناس كبار.. يالا ما علينا
:)
المهم انا خرجت ف مشوار الصبح، و ماما خرجت شغلها، و قالتلي ابص علي نوجا كل شوية.. ممكن يعني يحصلها حاجة. و انا برضه انقبض قلبي، مش عارف ليه، بس حصل. رجعت جري علي البيت، علشان ابص علي نوجي -- ماما، و لا مؤاخذة، حاطاها ف الفرن مع فتح الباب فتحة بسيطة، لأن دي الوسيلة الوحيدة اللي بيها ممكن تنجو من نقابة الأشرار اللوكال بتوعنا: بوسي و لالو و ببوس.. ربنا يستر و ما الاقيش طاجن نوجا علي ترابيزة غدا عبده ومروان
جريت علي المطبخ، لاقيتها نايمة زي ما هي، بس بتتحرك اكتر. قلت الحمد لله. قدرت اني انام و انا بقول انها بتتحسن. و لما صحيت من شوية، ماما قالتلي انها بقت زي الفل، و انها لعبت في الصالة شوية النهاردة
علي الله تكملي الرحلة معانا يا نوجى، و تفضلي علي طول كده ناجية
|
27-05-12, 09:52 PM
صدقت يا رسول الله .. انه زماننا !
مع ان البعيد دمه تقيل .. بس حلوه الغنوة دي :)
جديد مواضيع قسم مدونتي
العرض العادي
