بسم الله الرحمن الرحيم


هلا وغلا بكل الغوالي الي ينتظرون نوح الحمام

ويشوفون ان طيف الأحباب قدمت شي يستاهل القراءة,

انا مستمره بتنزيل الروايه مع قلة الردود وكثرة المشاهدات

الي تخليني اعرف ان الروايه لاقت قبول..

ولا كنت بقول قلة ردود الا بعد ماجاتني حذفة حصاه خلتني اعيد حساباتي

هل انا اسير با الطريق الصحيح..؟

او انا بس متعبه نفسي ونوح الحمام روايه لاتستحق القراءه..؟!

مجرد روايه ختمت با اسم قارئه لها بعض المشاكسات في بعض الردود على روايات

افضل من نوح الحمام بالآف المرات ..,

الحصاه الي جاتني ماهو ابدآ تعقيب على البارتات

علشان لا احد يظن اني اتحسس من النقد با العكس ارحب با النقد الهادف قبل المدح,

ممتنه جدآ لكثير من المتابعات واولهم كاتبتنا الرائعه ساعه بلا عقارب لردودهم المشجعه في البارت السابق,

والشكر موصول لتراتيل الشتاء على القصيده والي من القلب اكيد بيدخل القلب ,

والي خلف الكواليس واقفه معي وتدفعني تقول استمري لها مني كل الحب والتقدير ,

بارت اليوم بارت اضافي طلبته ام تركي الغاليه ساعه بلا عقارب ,

البارت اهداء لكل من سطر في متصفح نوح الحمام ولو بكلمه وحده من دون استثناء..,

سواء مدح واونقد اوحتى يسأل عن مواعيد البارتات دليل اهتمامه با الروايه..,

واهداااء خاص للغوالي الي ارسلو لي على الخاص وفاجئتني رسايلهم وتشجيعهم

قالوا طيف الي يعيش المأساه ماهو مثل الي يكتب لكن لمستي شي بسيط من الحقيقه

وهو فعلن احساس الي يمسك الجمره ماهو مثل الي ينفخ عليها يحاول يطفيها..,
.
.
.
اليوم بنشوف عوق المزايين واحداث متلاحقه من حياتها هي وزياد فرح وحزن وصمت قاتل

يا الله تعالوا معاي...!!

وسالفه جديدة؛


البارت الواحد والعشرون

.
.
.

عوق بوجع\ما قصرت على الشرح رايتك بيضا ..,

اردفت با ارتباك\واساسآ انا كنت انتظرك من اليوم

علشان اقولك اني قررت انا وانت ما نصلح لبعض وكل واحد يروح لحال سبيله..!

زياد بهدوء\وهذا اخر كلام عندك ماراح تراجعين نفسك او تعطين نفسك فرصه تفكرين..!

دنقت ما قدرت ارد ما ابي انفصل عن زياد بداخلي..!

لكن كلامه اني فرضت عليه كسر كبريائي وصغرني قدام نفسي..,

وانا لوكنت بنت شرعيه لبدر ماكان زواجي راح يكون بها الطريقة اني انعرض مثل السلعه ..,

زياد بمعاتبه\تدرين عوق انك ظالمة وانا وامك ما نستاهل منك الي تسوينه فينا..!؟

امك ما صدقت يجي اليوم الي تتطمن عليك وانتي تبين تذبيحنها برجعتك لها..!

وانا ولعتيني فيك وبتروحين وتخليني..,

اي ناس تفهم وعندها وعي تشوف رجل مناسب لبنتهم او غيرها

بتقول ترى في بنت على خلق ودين اخطبوها ها الشي ابدآ ما يعيب

ليش انتي حساسه ماهو معقوله الواحد بيقول اخطبوا فلانه والا زوجو فلان

وهم اشخاص ماهم ثقه هذي كارثة بحق الكل ومافي احد يحب يحط نفسها بموقع ملامه

هم ماقالوا ها الكلام الا انهم حاسين اني استاهلك..,

لكن عاد اذا هذا الي يريحك لك الي تبينه يا عوق ...!

طارت عيوني وش الي ابيه لايكون بيطلقني..

عوق بتوتر وارتباك\ يعني وش قررت ...!

زيادبحده مصطنعه \وش قررت ..!!

قررت بكرا بنطلع عمره انا وانتي ماهو هذا الي انتي تبينه..!

التفت زيادواردف وهو يضحك ويغمز بتهكم \بعدين جايه تصدرين قرارات وتسألين عن قرارات

وانتي لابسه كذا وغرفة الاشباح على قولتك كلها شموع وعطور..!

والله مع ها الجو الرومانسي كل القرارات الي بتصدر قرارات زوجيه صائبه...!

يا ليت كل زوجين بينهم مشاكل اويقررون ينفصلون يكون اجتماعهم با الصوره هذي اكيد بيعيدون النظر..,

ما تمالكت نفسي وضحكت على كلام زياد

زياد يبتسم\ ايه يا شيخه اضحكي هي رحلة العمروش طولها الي نقضيها زعل وخصام وتنكيد على انفسنا

اردف زياد وهويمسك ايدين عوق وبهمس\خلاص ندفن احزان الماضي ونبدى من جديد ياام القرارات..,

عوق بخجل\ بمناسبة ها القرارات مصلحه لك تورته وعصيرابداع

وقف زياد وسحب عوق معاه\ لا تكفين خلي حفلة التورته وقت ثاني يكفيني ها الاجواء الحالمه ..!

اردف بتعب \خلينا ندخل ننام ولاحقين على ابداعاتك ترى لي يومين مواصل مانمت..!!

ودخلت مع زياد اتمنى ايامي القادمه معاه احلى واجمل من الي فاتت..؟!

ثاني يوم

طلعنالطائف با الطائره وكانت اول مره في حياتي اركب طائره كنت بموت من الخوف

وزياد يتكلم معاي حس بخوفي وانا بعالم ثاني من الخوف وصلنا با السلامه لطايف..

جلسنا فيها يومين وبعدها اعتمرنا ...,

وهذي اول مره ادخل فيها الحرم تفاجئت اول ماشفت الكعبه..

بكيت بدون شعور يمكن رهبة المكان او ما كنت مصدقه اني شفتها حقيقة..,

ماكنت اشوفهاالا باالصور او التلفزيون..

اخذنا شقه قريبه من الحرم وصليناالفروض كلها هناك..,

ودعت مكه وانا قلبي يتقطع اني ارجع مره ثانيه..

ورجعنا لطايف نتمشى

زياد\ غريبه عوق اول مره تنزلين مكه..؟!

عوق بمراره\ من بيجيبني انت عارف ماعندي محرم..

زياد بدهشه\لا تقولين بعد خالتي وضحى مثلك..,

عوق بحزن\ امي حجت مرتين قبل تكفلني ..!

الطايف جوها سبحان الله غير عن مكه باردوامطار وارضها خضرا..,

لكن فرق بين المكانين ما ارتحت با الطايف انقلبت نفسيتي..,

حسيت نفسي حزينه غير عن فرحتي لما كنت بمكه..,

والي زاد علي اني اول مره ابعد عن امي مسافه طويله ..,

اكلم ا مي با اليوم اكثر من مره ومع هذا قلبي شاب نار عليها اشتقت لها

زياد حس اني غاصبه نفسي غصب على الجلوس با الطايف..

زياد \اقول بس وش رايك نرجع لرياض..,

انتي معي بجسمك والا العقل الله يخلف عند امك..,

عوق بوجع\ هذي اول مره احس انه انا وامي بينا مسافات...

والله حاولت اضغط على نفسي ولا اشغل نفسي با لتفكير لكن غصب عني..,

زياد يبتسم\ الامر لله من قبل ومن بعد

خلاص جهزي الشنط انا ها التمشيه اساسآ كلها على شانك

اردف زياد\وتستاهلين قبل نمشي عمره ثانيه بنحرم من الطايف نعتمر ونرجع عن طريق مطار جده..,

عوق با امتنان\زياد ما ادري كيف اشكرك وآسفه والله ماهو بيدي ..؟

خربت عليك اجازتك وضيعت عليك التمشيه...,

زياد بحب \ تتعوض ان شاء الله واهم شي احنا مع بعض..,

عوق بفرحه \ نفسي اكافئك مقابل تنكيدي عليك اجازتك..,

زيادبحب\والله انتي اكبر مكفاءه ونعمه كافئني ربي فيها..,

زياد بضحك\ لكن لازم لك عقوبه بماانا قضينا هالكم يوم اكل مطاعم متواصل

خلاص صدر عليك حكم لا للمطاعم واجب التنفيذ..

فيني ستين عله من اكل الشغالات والمطاعم نسيت طعم الاكل من يوم تعبت امي..؟!

زياد يتنهد بحزن\على فكره ترى امي طباخه من الدرجه الاولى لكن الجلطه اقعدتها..

عوق بدهشه\يا الله ما اكلت اكل بيت من تعبت خالتي..,

زياد\الا خواتي ما يقصرون لكن ما احب اتعبهم وخصوص ان عندهم دوامات ..,

وبعدين مرات اضطر اعزم زملائي او اصدقاي والله صار يطيح وجهي من خواتي..

من كثر مايحاولون يبيضون وجهي تشوفينهم يبالغون بلي يسوونه لدرجة انهم يحرجوني

وانتي عارفه مهماكان الزوجه ماهي مثل الاخت..,

الزوجين اي شي يتقبلونه و يطلبونه من بعض مايكون فيه احراج غير الاخوان يظل حاجز الحياءموجود..

اردف زياد با ابتسامه\وش رايك بها الحكم..,

عوق تبتسم\ابشر هذا حكم بسيط تعويض لك وبعدين خلنا نغذي معدتك ونستولي على قلبك..

زياد يضحك \ عملآ بحكمة اقرب طريق الي قلب الرجل معدته ..

اعتمرنا مره ثانيه ودعيت ربي من قلبي انه يحفظ لي امي وزياد..,

ويجزى خالتي نوره الف خير انها كانت سبب زواجي من ها الانسان الرائع..

خوفي من الطائره برحلة العوده كان اخف بكثير ماهو مثل اول مره

بعدما وصلنا مطار الرياض وركبنا سيارتناكان نفسي اقول لزياداول شي بشوف امي..,

عوق\زياد بطلبك طلب ..؟!

زياد يمسك يد عوق\ انا عارف وش الي تبينه بس ما يصيراني اول ما ارجع الرياض على بيت امك لعدة اسباب..!

اول شي الحين احنا نص ليل واكيد امك نايمه بتخوفينها وخصوص ان ماعندها خبر برجعتنا..؟

خليها بكراوباخذك لها من اول النهار ..!

ثاني شي ما ترضينها علي اني اتعدى بيتي وامي واروح لبيت امك..,

عوق بحزن\ بكيفك..,

وصلنا البيت آخر الليل مهدود ين من السفر دخلنا على خالتي اناوزياد

انا سلمت عليها وطلعت لغرفتي ارتاح..,

وزياد تأخر عندها ...!

رجع وحسيت وجهه ماهو طبيعي..؟!

عوق بخوف\ عسى ماشر..,

زياد بقلق\ ماشر ان شاء الله لكن امي تعبانه بكرا لازم اطلع فيها للمستشفى..!

عوق\الله يشفيها خلاص نم ارتاح ما بقى على صلاة الفجر شي..,

نمت من التعب ولاادري زياد نام اولا..!

لكن صحيت صليت الفجر ما شفته توقعته با المسجد..

كملت نومي وصحيت على الساعه ثمان زياد ماهو موجود..؟!

حتى شنط السفر ما نزلهاكلمت على جواله يعطيني مشغول ياربي وش صاير..,

نزلت تحت بشوف خالتي لقيت غرفتها فاضيه..!

والممرضه ماهي موجوده ناظرت في حوش البيت سيارة زياد ماهي بمحلها

ناديت الشغاله اسألها..

قالت ماما كبير تعبان وروح مستشفى مع بابا زيادومدام بشرى..

يارب سترك من يطمني ..,

اكيد الوضع خطير حتى شنطنا ما نزلها..,

بيت بشرى ونجلا مالهم حس اكيد الكل بدواماتهم..

ولا اعرف جوالتهم او يمكن ما يدرون عن شي..!؟

ياربي وش اسوي مشتاقه لأمي بموت اشوفها..,

برسل رساله لزياد استأذن اروح لها ..,

ارسلت لزياد وانتظرت الرد ما رد علي..!

دقيت مره ثانيه يعطيني مشغول..,

اخيرآكلم زياد

زياد بوجع\امي حالتها خطيره والحين با العنايه المركزه ..!

عوق\ طيب اجي للمستشفى..,

زياد بحده\ تجين وش تسوين ماهو وقت زياره واصلن حتى الزياره ممنوعه..,

عوق بترجي\ طيب اقدر اروح لأمي..

زياد بتذمر\مو مشكله كلمي سواق امك يجي ياخذك انا ما اقدر اطلع واترك امي ..,

ولا تركبين معاه با الحالك..,

عوق با استغراب\ اكيد عمري ما ركبت معه با الحالي الشغاله دايم معاي..

كلمت على تيلفون البيت وردت علي الشغاله قلت تعالي بيتي انتي والسواق..,

طلعت لبيت امي قلبي خايف على امي خصوص بعد ما تعبت ام زياد..,

على طول دخلت لغرفة امي لقيتها مثل عادتها منسدحه بفراشها وتسمع لرادو..,

رميت نفسي بحضنها وضميتها ..

والمره هذي هي حضنتي بزود وضمتني..

بعد ما تزوجت كل ما جيت اضمها تبعدني عنها..,

تقول خلي عنتس الدلع والتهنوص الحين صرتي مره..!

اليوم ما ادري هي امي تغيرت والا انا يتهيئ لي..

ام عوق بفرح\متى رجعتوا..,

عوق\ وصلناعلى 12الليل

ام عوق با استغراب\ ليه عودتو بسرعه زياد قال انكم بتقعدون عشرت ايام..,

لا يكون اقلقتي الرجال ورجعتيه..!؟

عوق بتذمر\احسن انه رجعني يمه طفش بالحالنا وبعدين من رجعنا شكل خالتي تعبانه..؟!

اليوم نوموها با المستشفى..,

ام عوق بتأثر\الله يشفيها يا بنتي كبر ومرض الضعيفه ..,

انتوا من خليتوها عنده يوم سافرتوا..؟!

عوق \يمه اهل زياد مره متعاونين ما شاء الله واحد يسد مكان واحد..,

تخيلي خالتي ما تطلع من بيتهاولو طلعت بسرعه ترجع علشان غرفتها ...!!

لو تشوفينها قطعه من مستشفى كبيره مره واجهزه تخوف وفيها 3أسره..,

ويتناوب عليها بنات اختهاوبناتهن كل ليله ثنتين مع الممرضه اذا كان زياد مشغول والا مسافر..,

لكن اذا رجع زياد هو الي يتكفل فيها اكثر وقته يجلس معها..,

ام عوق بوجع\المرض شين وانا امتس..,

عوق بخوف\يمه الله يستر من تعب ام زيادالله يشفيها..!

ام عوق\هذا شي عند الله و من دَنَّتْ رحايله رَحَل يا بنتي مريض والا متعافي..

عوق با اعجاب\سبحان الله يمه انا عندهم اكثر من اسبوعين ..,

عمري ماحسيت بوجود خواته والا بناتهم يدخلن عند خالتي يتطمنون عليها

بدون ما ادري اتفاجئ من الشغاله اذا سألتها في احد جا اليوم..؟!

حتى قلت لزياد ليش زيارات خواتك خفيفه حتى اني ما اشوفهم..!؟

يقول ما يبون يثقلون عليتس وامي ما تستحمل الازعاج الكثير..؟!

ام عوق\ الله يجزاهن خير وماهو كثير هذي خالتهن بمكان امهن ..

وزياد هذي اميمته الي ربته الي يزرع يبي يحصدشين والا زين..,

ام عوق\عوق..؟!

عوق\لبيه يمه ..!

ام عوق\لبيتي حاجه رويم جابت صورتس تقول زينتها يوم شافتس ناسيتها..؟!

عوق بضحك\ياحليلها ريم ماتنسى شي والله انها شقرديه..

ام عوق\مسلط ونوره ناس اجاويد وفيهم صلاح وعيالهم مثلهم..,

لكن انتبهي من ها التصاوير يا بنتي شفتها روعني لبستس..؟

عوق \يمه كل الناس كذا..!

ام عوق بحده\واذا كل الناس..,

ان ضاعت العرب ضعنا وراها..!

المهم لا تعرضين صورتس لكل من هب ودب كان تسمعين النصح ..

عوق بممازحه\ابشري اهم شي الوضيحي ما تزعل وبعدين لبسي الي انتي تقولين توتس تفطنين له

انا عندتس يوم العرس ورى ما شفتيه..,

ام عوق با ارتباك\مادري مشغول بالي با الضيوف ..؟!

عوق بمشاكسه \بالضيوف يا الوضيح علينا..

ام عوق بضحك\اقول بس خلينا نطلع لصاله نتقهوى واتركتس من الهبال..,

نهاري كله قضيته عند امي ونسيت الدنيا ..

رتبت اغراضي بناء على الحاح من امي ولقيت البوم صور لي وانا صغيره..

اكثرها كانت صور ايام العيد انا وريم واخواتها و صورنا يوم كنا نلعب بحوش بيتناالشعبي كانت بكاميرا فوريه..,

اخذت البوم صور زواجي وصور طفولتي وخليتهم مع بعض ودخلتهم لدولاب وقفلت عليهم با اخذهم بعدين..,

غرفتي صارت فاضيه تبرعت بكل شي ما احتاجه..!

ارسلته مع السواق ..,

ما بقى فيها الا دولابي فاضي وسريري الوردي الي ماسكه علي زياد انتي وسريرك الوردي ..

في بنت كبيره لا وبعد معلمه وسريرها وردي كنها طفله ..,

حتى كتبي رتبتها باخذها معاي لبيتي هي والصكوك حقت املاك امي الي با اسمي..,

يعني بجي ها البيت ضيفه مالي اثر..؟!

هل هي سنة الحياه او لأن امي خلاص حست انها سلمت الامانه لشخص يحملها عنها..,

تأخر الوقت وزياد ما جا ولا كلم ولا يردعلى الجوال..,

امي شافتني وش كثر انا قلقانه على زياد

ام عوق\ نامي ومن اصبح افلح ..

انسدحت بنام مع امي والا فكار تجيب وتودي

واكثر ما اشغلني خوفي على امي..,

امي اكبر من ام زياد لكن الحمدلله على انها ماتقدر تصلي الاوهي جالسه ..

ويتعبها المشي حتى لو مسافه قريبةلكن يكفيني اني اشوفها واسمع صوتها..,

دايم تقول عسى اخر المشوار في سجده..,

من كثر ماتدعي ها الدعوه مرات اخاف اذا شفتها تصلي وطولت بسجدتهااوقف عندها حتى ترفع راسها

ام زياد حولها بنات خواتها وعيالهم..,

امي من لها بنات اختها والمصيبة الي من ورى بدر ومشاعل ابعدتهم عنها..,

والاعيال زوجها الي ينتظرون الفرصة بس علشان يا كلون حلالها..,

حتى زياد مصوره له انها مقطوعه من شجره ومالها اقارب ..

ماتبي بعدين شي يشوش على حياتي اوزياد يشك بشي..

امي لها ايادي بيضاء سر وعلن..,

ويمكن هذا الي مد لها بعمرها ربي يحفظها..,

يكفي انها كفلتني وربتني وتركت حياتها في البر علشاني..,

الله يجازي امي برفقة الرسول با الجنه..

صحيت اليوم الثاني وجلست انا وامي الصباح نفطر ونسولف ..

وانا بالي عند زيادوخالتي..؟

واخيرآ هذا جواله يدق

زياد بتعب \هلا عوق شفت مكالمتك مشغول ولا قدرت اردعليك..!

بمر مسافة الطريق بسلم على خالتي واخذك..,

دخل زياد وسلم على امي..,

ام عوق\وشلون امك بشرني عنها..؟!

زياد \نقول الله كريم ان شاء الله احسن..,

ام عوق\الله يقومها لكم با السلامه..

عوق\ لي كتب واغراض با خذهم..,

زياد بتعب \ خليهم وقت ثاني

ورجعت لبيتي زياد ما قال ولا كلمه من يوم مشينا حتى وصلنا..!

سارح بعالم ثاني بس اسمعه يتنهد وعيونه مثل جمر..,

عوق بتوجس \زياد كيف خالتي ما اقتنعت بردك على امي..!

زيادبوجع \ما ابغى امك ينشغل بالها امي حالتها مره تعبانه..,

عوق \ طيب هي وش فيها..,

زياديتنهدبحزن موجع\ جلطه ثانيه انا من وصلنا شكيت بو ضعها..!

عيونها ماكانت طبيعيه وحتى لسانها ثقل بزياده..!

كلمت بشرى هي صبور ماهي مثل نجلاء واخذناها للمستشفى..,

وعلى طول للعنايه المركزه شكوكي كانت بمحلها..!

بشرى تقول المغرب مافيها شي لكن فجاءه جا تعبها..!؟

عوق \ الله يشفيها..,

زياد بوجع\آمين المشكله ان حالة امي صعبه...

ضغط وسكر ومعاها القلب والكبد تعبانه عندها وسنها كبير..

باخذ دش واغير وارجع لها ما اقدر اتركها..,

عوق\ حق واجب مهما كان امك مالها غيرك

رجع زياد للمستشفى..

نزلت تحت البيت كبير ومافيه الا انا والخدامه..,

ياربي الحين العصر وزياد لا حس ولاخبر من الصباح ..

وقلبي منشغل على خالتي العنود

سمعت صوت الجرس علق وطلعت الخدامه تركض تفتح الباب..,

دخلت عبير تصيح بصوت عالي افجعتني

عبير ببكى\عوق امي اغمى عليها..,

خالتي بشرى كلمتها تقول جدتي العنود توفت..!؟

وامي معاها سكر طاحت علينا ومافي احد عندنا..

عوق بذعر\لا حول ولا قوة الابالله انا لله وانا اليه راجعون..,

اصبري بلبس عباتي واجي معك..,

لبست عباتي وطلعت مع عبير

علشان اشوف نجلاءلقيت بناتها يصيحون حولها..,

مجد ببكي\ شكل سكر امي انخفض..,

حاولنا نصحيها وعت فينا لكن كان حيلها مهدود رفعناها عن الارض..

حاولت اصبرها تصب دموعها وهي ساكته ولا اسمع الا تحوقلها..

خبر وفاة خالتي العنود انتشر بسرعه في عايلتهم والكل اجتمع في بيت نجلاء..,

والحزن مالي قلوبهم على خالتهم وانا بينهم غريبه..,

هم يبكون خالتهم وانا ابكي حالي ..!؟

لو انا مكان خالتي العنود لا عمات ولاخالات مقطوعه ..؟

الي قطعني سواد وجه امي وابوي الي مايمحيه الزمان..,

وزياد يقولي انتي انسانه معقده تصالحي مع نفسك..!؟

منين يجي التصالح وعار امي انا الي ادفع فاتورته..؟!

حتى هي احسن من حالي على الاقل بين ناسها وفضيحتها بتقعد مدفونه اذا ماهي طلعتها..!

زياد يتكلم من منظوره هو شخصيآ قدر انه يكافح ويكون له مكانه عند الي حوله وفي مجال عمله..

ما همهم هو لقيط اولا المهم وش انجز ..,

او يمكن مامر في امتحان بينت له نظرة الناس للقيط..,

مرت ليله كئيبه وانا بحيره ارجع بيتي والا اجلس في بيت نجلاء..,

قررت با الاخير اروح لبيتي والصباح ارجع هنا..!

رجع زياد آخر الليل حزين ومنهار على امه دخل غرفتها ودخلت وراه ما قدرت اقول الا احسن الله عزاك

زياد يبكي ويشاهق كنه طفل على سريرها..

وانا عجزت افتح فمي لو بكلمه الموقف اكبر من كل الكلام..,

تركته بغرفة امه ونمت با الصاله كأني على شوك

والفجر صحاني زياد

زياد ب الم موجع\ انا طالع لمستشفى علشان اخلص اوراق امي..

البنات بيجون علشان يغسلونها ويجهزونها لصلاة والدفن..,

تجين معهم والعزا هنا في بيتي..

عوق بحزن\ طيب..

طلع زياد وبعدها استوعبت كيف قلت طيب وانا عمري ما شفت جنازه..!

وكيف بستحمل المنظر ...؟!

دق تيلفون البيت وكانت اثير بنت نجلا تقول تجهزي...

امي وخالتي بيطلعون مغسلة الاموات علشان جدتي العنود..,

خالي يقول عوق بتطلع معكم...

لبست عباتي وطلعت لهم..,

حسيت قلبي بيطير من بين ضلوعي من الخوف رحت معاهم..,

ولاادري كيف وصلنا المغسله الي غسلها وكفنها نجلا وبشرى ومعاهم حرمة شكله المغسله..,

وانا اناظر من بعيد كانت لابسه اساور قصتهم بشرى بمقص..,

وعطتهم الحرمه الي معاهم وقالت لها انتي تصدقي فيهم..,

ويحركون جسدها ويقلبونه منظر جثت ام زياد رهيب..!

ماكأن مر يوم على ها الجسد الضخم مشى فيه على الارض لفوها با الكفن ..,

هذي اخرتها حياه وشباب ومتع دنيا ونركض ركض المخلدين وناسين الموت وهذي النهايه..,

وسلمت نجلا وبشرى على راسها..!

وجيت بعدهم دنقت على راسه وسلمت عليها سبحان الله وجها بعد ماماتت كان احسن من يوم كانت حيه..,

كأنها نايمه توقعت اني بخاف وبشوف وجه غير مثل ما اسمع عن الجنايز..!

اخذوا الجنازه زيادوزوج بشرى وعيال نجلا وبشرى..,

واحنا رجعنا لبيتي مع سواق بشرى انا ونجلا وبشرى ..,

دخلوا بنات نجلاء وبشرى وزوجة ناجي ..,

وحضرواحريم اقارب لهم امتلى البيت ..,

جات امي تتوكا على عصاها وام ابراهيم وريم

عزوا نجلا وبشرى وحريم شكلهم اقارب خالتي العنود

ام عوق بعتب \ورى يا امي ما دقيتي علي تعلميني بوفاة ام رجلتس..,

عوق بحزن\ ما ادري نسيت فجعني موتها تروعت انتي من قالتس..؟!

ام عوق \نوره دقت علي وهي تحسب ان عندي خبر تقول نواف معلمهم..!

قالت بروح معتس اعزي وجات هي وبنتها معي..,

مر يوم العزاء ناس طالعه وناس داخله البيت مافضى..,

امي رجعت لبيتها حاولت فيها تنام عندي رفضت تقول ما ارتاح الا بغرفتي..,

عدت 3ايام العزا

زيادما اشوفه من الصباح الي اخر الليل يستقبل المعزين..,

انتهى عزا خالتي العنود

زياد صامت لكن الحزن بعيونه يدخل غرفة خالتي يجلس ساعات ويطلع عيونه كنه دم

مر شهر على وفاة خالتي وانا وزياد في بيت واحد لكن كل واحد عايش با الحاله

كم مره احاول اطلع زياد من حزنه لكن ما قدرت

حتى امي خلال ها الشهر مازرتها الا مرتين والي ياخذني لها ويرجعني سواقها..!

زيادصار ماهو يمي يانايم يا جالس بغرفة امه

او في دوامه الي كان فتره والحين صار فترتين..,

اذا جيت جلست معاه وسولفت يسمع وهو ساكت ولا يرد علي غير انه يهز راسه ..,

حياتي احسها صارت ممله الصبح نفس المسا واليوم مثل امس..!!

امي حلفت علي ما اجي عندها..؟!

زياد فاقد امه ولازم ما تركه وهو بها الوضع..!

امي اذا جيتها تهاوشني وتطردني تقول لااشوفتس الا مع رجلتس ..

ان تركتيه ها الحين ما ينساها لتس بعدين..

ورجلي ماهو معطيني فرصه اخفف عنه ..؟!

محد حاس فيني خوات زياد كلن مسكر بابه على حزنه وساكت..,

وانا انعزلت با الغرفه الثانيه غرفة الاشباح الي فوق..,

اما اتفرج على التلفزيون والا اراجع حفظي للقرآن لعل الله ينفعني به..

حتى غرفتي صرت اكرها وانقرف منهااحس تجيني ضيقه فيها ما ادخلها الا اذا جا زياد..

وزياد ما اشوفه فوق الا اذا بيغير لبسه والا بينام .,

زياد كل يوم عن يوم يسوء وضعه واحسه يبعد عني..؟

صارت حالته غريبه اذا نام يلم نفسه مثل البردان واسمع ونينه وهو نايم يروع ما ادري وش علة ها الرجال

وانا الوقت الي ما يكون موجود وبدوامه اوالمستشفى احيانآ يطلبونه بوقت متأخر..؟!

انام بغرفة الاشباح والا با الصاله الي فوق احس البيت الكبير ضاق بي ..

ياربي مالي غيرك دبرني فأني لا احسن التدبير..

صرت بكل سجود وركوع ادعي ربي يطلع زياد من حزنه..

خالتي لها اكثر من شهر ونص من توفت واحنا على حالنا..

ما ادري متى تنقشع عنا سحابة الحزن..؟!

شسوي مالي الا اكلم خواته يمكن يساعدوني نقدرنطلع زياد من جو الحزن..

كلمت نجلاء وقلت بمرك بعد المغرب..,

طبعآ ارسلت رساله لزياد اني بطلع لنجلاء...

مالي خلق اطلبه شي وجهآلوجه ..

حزنه سد نفسي من حتى الكلام معه حتى مقاضي البيت واغراضنا..,

ارسلها برساله على الجوال بدون كلام..!

ردبرساله فيهاكلمه وحده او كيه..,

طلعت لنجلاء الي كانت حزينه وحتى جو بيتهايجيب الكآبه..,

لكن افضل من جو بيتي ..,

جلست معاه ماادري كيف افتح معاها الي جايه انا على شانه...

ولا كان لها كلام الا عن خالتي وتعبها بمرضها وعسى الله يعوضها با لآخره..,

وان الي سواه زياد لو كان ولدها من بطنها ماراح يسوي ربع الي يسويه

عوق بتردد\نجلاء بطلبك طلب ولا تفهمني غلط..


.
.
.

(كلمه اخيره)

لا تحزنوا ، لأنّ
هذهِ ليست حياتُنا
هذهِ ليست وجوهنا الحقيقة
هذهِ ليست طبيعةُ عيشنا
هذهِ الأرض ليست مكاننا ، إنما هي معبَر مجهّز ومخلوق لأجلنا
هذهِ الشّمس وهذا القمر إضاءة مؤقتة
والنجوم زينة مؤقتة
والفصولُ امتحانات دوريّة ، أخفيتُ عنّا درجاتُها ،
وشهاداتُنا ،
نحنُ هُنا بأجسام مؤقتة ، وجمال مؤقت ،
وكلّ الأحزان
والأمراض
والمحن ،
والأحداث والكوراث ،
والابتلاءات ،
طوارئ س تزول قريباً ...
تنتظرُنا حياة مختلِفَة تماماً ،
مُدهِشَة جدّاً ،
يفصلُنَا عنها سجدَة خالصَة وإغماءة طويلَة ،
ثمّ نستفيقُ منهَا على ضفّة نهر في الجنّة
-بإذن الله -

.
.
.
الي الملتقى قريبآبأذن الله

وسالفه جديده


طيف الأحباب

ام الوليد

تذكروني واحبابي بدعوه طيبه

بسم الله الرحمن الرحيم


هلا وغلا بكل الغوالي الي يعطرون متصفحي المتواضع سواء با لردود او الاعجاب او التقييم او الشكر..,

او با الرسائل الي تجيني على الخاص ممتنه للجميع..,
.
.
البارت اهداء لكل من سطر في متصفح نوح الحمام ولو بكلمه وحده من دون استثناء..,

سواء مدح واونقد اوحتى يسأل عن مواعيد البارتات دليل اهتمامه با الروايه..,
.
.
اليوم بنشوف عوق المزايين وهي تحاول تطلع زياد من حزنه وزياد كيف يتقبل الموضوع..

وهل هي غلطت بطلبها المساعده من نجلاءاولا بنشوفه في البارت القادم..,

يا الله تعالوا معاي...!!

وسالفه جديدة؛
.
.

البارت الثاني والعشرون
.
.
.
عوق بتردد\نجلاء بطلبك طلب ولا تفهميني غلط..

نجلاء با استغراب\ اطلبي عوق حنا خوات مابينا شي..!؟

عوق ب الم \زيادمن توفت امه وهو عازل نفسه عني وعن بيته..,

وحاله كل يوم اردى من الي قبله..!

الموت قضاء الله وقدرمن الله مالنا يد فيه..,

بيتنا يا نجلاء صار ما ينطاق ..

تحسينه ظلام قربت انجن من الوحده ومن كثر ما اكلم نفسي..,

حتى امي تقول خلك مع رجلك لا تجين الا انتي وهو

دليني حليني تعبت ما يعطيني فرصه حتى للكلام او ناخذ ونعطي مع بعض ..

يا نايم يا بشغله يا بغرفة خالتي ماخليت طريقه ماجيته فيها توهني بصمته..,

صرت ماني عارفه اتصرف معاه..؟!

نجلا بتفهم\وليش افهمك غلط عوق انتي من حقك تعيشين حياتك طبيعي..,

وزياد صراحه غلطان حابس نفسه بدوامة حزن وساحبك معاه لدوامته

خالتي غاليه علينا كلنا ولا هي رخيصه بس الحياه ماشيه حزنا والا فرحنا

خلاص بكرا بمركم ..!

اردفت نجلاء وهي تناظر ساعتها\اليوم مافي وقت اكيدبيرجع من شغله تعبان ولا هو وقت مناسب اناقشه..,

عوق منحرجه\ ما قصرتي نجلاءلكن ماكنت عارفه اروح لمين وآسفه على الازعاج..,

نجلاء\لا عادي عوق با العكس انتي الحين منا وفينا..,

عوق بتردد\نجلاء..؟

نجلاء\هلا...!

عوق با ارتباك\لا يدري زياد اني قلت لك شي اخاف يزعل..,

نجلاء تبتسم\ابشري عوق وبعدين انتي ما قلتي شي غلط خايفه على زوجك من بيلومك..,

طلعت من عند نجلا حسيت اني غيرت جو ورجعت بنفسيه احسن لبيتي..

ارسلت لزياد انتظرك على العشا..

ورد برساله تعشي لا تنتظريني عندي شغل..

الله يصبرني بس ان شاء الله نجلاء تقدر تسوي شي ..!

انا ما طلبت مستحيل طلبت ان زوجي يرجع لي مثل اول ما تزوجته ..!

ابي اعيش مثل العالم والناس ..

ياربي كنت عند امي وحيده وهنا وحيده..

يعني مكتوبه علي الوحده وين ما اروح..!؟

وش الفايده من زواجي مابي شي منه بس يعطيني وجه يحسسني اني موجوده معه..؟!

نمت بغرفة الاشباح وانا غارقه با افكاري ولا صحيت الا على صوت زياد..

يقومني لصلاة الفجريقول ترى فاضوا من الصلاه وانتي نايمه..!

قمت صليت الفجر وقريت اذكاري ..

ورجعت لغرفة الاشباح انتظرته يناديني والا يجي يسولف معي ما عطاني وجه..!

لحقته للغرفه لقيته متكور على نفسه ومعطيني ظهره ..,

عوق ويدها على ظهر زياد\زياد في شـي ..!!

زياد وهو يوخر يدعوق\ تكفين عوق تعبان ابغى انام اجلي كلامك لبعدين..,

قمت من عنده طاح وجهي واستحيت من صدته لي خفت اجلس واخذ واعطي معه يقولي كلام ما اتحمله

رجعت لغرفة الاشباح فتحت التلفزيون ولا ادري وش يقول اهم شي صوت با البيت ..,

على الساعه تسع قمت صليت الضحى..,

ودعيت ربي يعدي ها اليوم على خير...!

انا ما ادري وش طبع زياداصلن ما كملنا شهرين مع بعض ...

بداية عرسنا والمشكله الي صارت بينا..

بعدها سافرناوفاة امه...

يعني للآن زياد احسه غريب عني ..,

ما ادري وش راح تكون ردت فعله حتى الفجر نفض يدي عنه ما يبيني حتى المسه ..,

الله يستر من اخرتها المفروض اني منطقه وساكته وش اسوي خلاص رجال هذا رجال بحسناته وسيئاته..,

ياليتني مارحت لنجلاء ودخلتها بينا اكيد زياد بيحس اني قايله لهاشي..

الا لازم انط واتلقف اروح ادور حلول عند خلق الله ..,

طيب من يلومني يوم دخلت نجلاء ماعندي غيرها بعد الله ..,

انا ماخليت شي ماسويته عجزت فيه سواء كلام ولا لبس ولاتغيير بشكلي وفي بيتي نفع فيه

مابقى شي طرا في بالي والا سمعته الا وسويته له لكن الرجال منطوي على نفسه وصاد عني ..

والله يا زياد انك عقدتني وصرت استحي منك من كثر ما تصدد عني ..

ماكذبت ريم يوم تقول اذا جفاتس رجلتس كن البشر كلها محاربينتس ..

الحين لو زياد زعل مني وقال هذا اسرار بيتنا ليش تطلعينها وش راح ارد عليه..

يا عوق وش اسراره زوجك يبي احد عنده جراءه ويواجه يقول الحزن ماراح يقدر يرجع امك لك..

عش حاضرك وهذا قدرها تموت في ها اليوم مهما كان وضعها متعافيه والا مريضه..!

قضيت يومي كله باالحالي وافكار تودي وافكار تجيب ونجلاء للحين ما بينت وش الي أخرها

قرب يأذن المغرب ولا شفت احد

لا هي ولا زياد..

زياديطلع ويدخل ما احس فيه..

أذن المغرب وصليت جات الخدامه فوق تخبرني ان نجلاء موجوده..!

الحمدلله اخيرآ ما بغيتي تطلين يا ام راكان..

انا مستبشره خير من جيتها زياد يحترمها واكيد بيسمع كلامها..,

ليتك ترجع يا زياد مثل ايام الطايف يومك تدور رضاي ..!

آخ يا قلبي ايام حلوه تروح من اعمارنا ما نحس بحلاوته الا اذا عدت وراحت

والا بوقتها ندور الي يتعسنا ونسويه بس علشان ننكد على حالنا..,

لبست ونزلت سلمت على نجلا ء...!

حضرت القهوه وجلسنا نتقهوى انا ونجلاء ..

واسمع صوت زياد يرحب بنجلاء وهو من على الدرج نازل..,

بسم الله هذا منين يدخل ومنين يطلع ..,

حتى قبل يشوفها شكلها مكلمته جوال..,

نجلاء تبتسم \هلا ومرحبا وينك يا اخي شغل شغل افض شوي لنا..,

زياد بحزن\موجود يعني وين بروح من المستشفى للبيت ..,

نجلاء \وش فيك زياد مره وجهك تعبان وزنك نازل ..!

زيادبضيق و يمسح على وجه بيدينه\ ابد ضغط شغل ..؟!

نجلاءتلتفت لعوق \حتى عوق بعد ضغط شغل متغيره ونحفانه..!!

وشفيكم انتم ماتاكلون عايشين على الهوى ..,

عوق بنفسها\جاك الموت يا تارك الصلاه شكلها بتفتح معه الموضوع احس بطني مغصني من الخوف..!

تكفين نجلاء خلاص ما ابيتس تقولين شي راضيه بصمت زياد

قامت نجلاءودخلت غرفة خالتي..,

ولحقها زياد ودخل وراها وخلى الباب مفتوح

وانا جلست في محلي غرفة خالتي مقابله الصاله واسمع اصواتهم كأنهم عندي ..!؟

نجلاءبا استغراب \ توقعتك فضيت غرفة خالتي..,

زياد بدهشه\ ليش افضي غرفة امي بتقعد طول ما انا حي مثل ما تركتها ..؟!

نجلاءبملامه \وش ها الكلام زياد خالتي توفت الله يغفر لها ولافي داعي توقف غرفتها كذا..

الاجهزه تبرع فيها يمكن احد يستفيد منهم كثير المبتلين ومحتاجين ها الاجهزه..!

الله يرحمها لو كانت حيه مار ضت بلي تسويه..!؟

زياد بحده و استغراب\من جدك با الله تسولفين ..,

نجلاء تتنهد بوجع\الحزن لو كان بينفع كان نفعني يوم مات ساري..!

بغيت انجن حسبت حياتي انتهت بموته..

اهملت نفسي وعيالي بغيت انطرد من وظيفتي..

سنه كامله ما شفت الشمس اقوم واقعد بهمي وغمي واحزاني..!

بغينا ننفضح وانت تذكر الي صار وقتها لو ما ستر الله علينا..؟!

وثم تدخلك با الوقت المناسب ..؟؟

من غير توابع ذيك السالفه الي بغت تهدم بيت بنتي من شخص غير مسؤل وام غارقه باأحزانها

لكن بعدها رجع لي عقلي تحسفت اني ما تصبرت ..!

وان الصبر عند الصدمه الاولى وهذا انا قدامك بعد ساري زوجت بناتي وفاء وسناء..

وعبير قريب زواجها وهذا انا امارس حياتي طبيعي وعجلة الحياه ماو قفت لي ..!

اردفت نجلاء با الم\ساري كان كل حياتي وشايل عني مسؤلية كل شي..!

ما اعرف من المسؤليه الا وظيفتي ..!

كل شي هو قايم فيه ما خلاني اشيل هم شي با الدنيا..,

وبعده جبرت نفسي وعودتها على المسؤليه وانا الي كنت احسب نفسي اضيع من عقب ساري..!

زياد بتساؤل\ليه انا وش سويت يخليك تقولين كل ها الكلام..,

نجلاء\شف نفسك كيف صاير..

ما انت زياد الاول حزنك انعكس حتى على بيتك وحياتك ..!؟

زياد با استنكار\ وش فيها حياتي لا يكون عوق بزيارتها البارحه لك تشتكي مني..؟!

نجلاء\وش تشكي منك حرام عليك لاتظلمها مسكينه..!

مراعيه وضعك ومقابله بيتها وانقطعت عن العالم على شانك شف حتى شكلها كيف صايره ..!

بالله عليك هذي عوق الي اول مادخلت بيتك ..!

زياد بغضب \ليه وش فيه شكلها ست الحسن والدلال غير الدلع والفضاوه..!

اردف زياد بغضب واستهزاء\وانتي وش عرفك انها ماتطلع من البيت غير ان وجه النحس شكت لك مني..!

نجلاء بملامه واستنكار\عيب زياد تقول عن زوجتك كذاوالله عوق ما مثلهااستغفر ربك..

اعوذبا الله وش فيك ماانت زياد الي على خبري..!؟

زياد با اصراروغضب \الا وجه نحس وشر وبعد شكايه ..,

خير ماتبيني حضرتها احزن على امي على بالها بتعوضني امي

تبطي عظم توصل لظفر امي وجه النحس المعقده..,

صراخ زياد واصلني لصاله معقوله هذي عقلية دكتور ..,

والله المراهق ما يفكر ها لتفكير

يا ويله من ربي وجهي نحس ومعقده وشكايه كل ها الصفات فيني ..,

هذا وانا الي استعجلته يرجع من الطائف اجل لوانها متوفيه واحنا هناك وش كان سوا بي..؟!

يمكن يتركني وراه ويرجع با الحاله ..!

معقوله الي قاعده اسمعه مستحيل هذا ماهو زياد هذا شخص ثاني

انا من عرفته وامه مريضه..!!!

استفزني كلامه ودخلت عليهم بالغرفه..,

عوق بحده \وش نحستكم فيه يا دكتور زياد..!

زياد بحده\ انتي فوق انك نحس ما تستحين تتصنتين علينا

وبعدين تعالي انتي وجهك شايفتني طفل رايحه تشتكيني لنجلاء

ومن بعد حضرتك رحتي اتشكوين و تدورين عنده حلول..!؟

عوق بغضب \وش اتصنت عليك انت صوتك واصل آخر الدنيا

يسمعك الي برا البيت ماهو الي جنبك..!!

نجلاءبترجي \تعوذوا الشيطان..,

نجلاء تسحب عوق مع يدهالبرا الغرفة\عوق اطلعي فوق زياد اعصابه تعبانه ما يدري وش يقول..!

عوق تنفض يد نجلاء بغضب\ وش تعبان هذا من شهر ونص ما يشوف احد غير نفسه..!

ما يدري اصلن حتى عني كنت اظن انه نسى وجودي...,

الحين عرفت السبب يتجنبني خايف بعد اني انحسه ويموت ..!

يا اخي ما يحتاج تصبر نفسك علي ..!

كان من يوم توفت امك قايل يا وجه النحس يا معقده اطلعي من بيتي

لا تذبحيناولا تجيبين لنا امراض نفسيه..!

زياد باستهزاء \والله ما فات شي كان تبين تنقلعين لأمك..

الباب طلعت منه امي ولا رجعت وانتي ما نتي احسن منها اطلعي ولاترجعين..!

عوق بتحدي\خلاص انتظرك عند السياره بسرعه بلبس عباتي وجايه ..,

لكن خلك عند كلامك لاتتراجع بعدين وتطلب رضاي ..,

زياد بغضب\غصب عنك عند كلمتي وتشوفين وش بسوي ..!؟

نجلاء\زياد عوق وقفوا ها المهزله خلاص ...!

عوق تكفين تعالي معاي ترى الشيطان وقف على روسكم..!

عوق بوجع \نجلاء انتي ما قصرتي لكن اخوتس بايع ومخلص..,

وشكل ها الكلام كان بقلبه من توفت امه لكن مالقى فرصه يقوله الا الحين..!

زياد\يا نجلاء اتركيها تنقلع هذي قليلة ادب و لسانها طويل ومتبري منها ما تعرفينها ..!

اردف زياد بسخريه\الله لايسامح من بلاني فيها ما سوو خير يوم عرضوها علي وانصحوني اخذها..؟!

عوق بتهكم موجع \ لا والله ما سوو خير فيني ماهو فيك يالله القاك عند السياره..,

زياد با استهزاء\كلمي امك ترسل سواقها يجي ياخذك الدرب الي يودي ما يجيب

والله يعينها عليك وعلى بجاحتك انقلعي الله يردك..!

كلام زياد ذبحني من الوريد للوريد انا بجحه وقليلة ادب وش سويت..

عوق تبلع غصتها بحسره\ اذا هذا أخرها يا زياد وصلتها لأخلاقي

تذكر بعدين انك لو وش ماسويت مارجعت لك..,

اردفت بمراره \انا ماشيه لكن ورقتي توصلني وفراقك عيد مامن على مثلك حسوفه..!

وطلعت من الغرفةاحس اني امشي بلا روح با الغصب تمالكت نفسي لا ابكي وتحس امي بشي

اذا درت قبل اجيها ماراح ترسل السواق بتقول لاتطلعين من بيتك وحلي مشاكلتس داخل بيتس..,

وزياد ماعاد خلا بيني وبينه حبال وصل كلها قطعها

انا يقولي تنقلع الله لايردها..,

يا ليتني اعرف ذنبي وش قليت ادبي عليه فيه والا تبجحت

هو كلامه ينطق الحجر ماهو البشر ولا يبيني ارد بعد..

كلمتها ترسل السواق سألتني زياد وينه...!

قلت لها سافر فجاءه عنده شغل وانا تعبانه ولا عندي في البيت احد..!

لبست عباتي وقفت برا البيت با الشارع..,

طلعت وراي نجلاء وهي تبكي تحاول انها ترجعني لكن رفضت ارجع ..,

الدنيا ليل والحي الي فيه بيت زياد قليل البيوت فيه ومتباعده ...!

اذن العشاء وانا واقفه برا وطلع زيادلصلاة وشافني واقفه عند الباب..,

كأني متسوله واقفه اشحذ ولاناظرني ولا حتى كلف على نفسه يقول ادخلي للحوش ..!

ولا استحى ان المصلين الي يروحون للمسجد يشوفوني واقفه..,

ناجي وعيال خواته طلعو للمسجد وهم ويناظرون على باب البيت ..؟!

مستغربين من الي واقفه عند الباب..!

جا السواق قبل يفيضون المصلين من صلاة العشا والا كان هي الفضيحه الي صدق ..!

ما اخذت معاي من بيت زياد الا لبسي الي علي وعباتي..,

ركبت مع السواق ورجعت لبيتنا وانا خلاص مقرره انهي كل شي مع زياد..!

دخلت على طول لغرفتي حتى امي ما شفتها..,

الغرفه الي حسبت خلاص ماراح ارجع لها الا ضيفه

الظاهر بقعد فيها لين يشيلوني جنازه...

دقت الشغاله الباب تقول عوق ماما كبير يبغاك..؟!

غسلت وجهي بماء باردوطلعت اطمنها علي ما ابي افاجئها اني خلاص الي بيني وبين زيادانتهى..,

سلمت على راسها وجلست ابي اسولف واخذ واعطي معاها ما قدرت..!

حلقي ناشف من القهروفيني عبره ما ابيها تطلع قدام امي..؟

وهي تسأل وانا بس اهز راسي ايه ولا..!

ام عوق\وش فيتس تانسين شي..,

عوق بوجع \لا ..,

ام عوق بتوجس\رجلتس فيه شي..!

عوق بقهر \ما به بلا..!

ام عوق بتهكم \ السالفه بها مابه بلا اجل البلا بتس..,

عوق بألم\ مافيني شي ..!

ام عوق يتساءل\هو وينه..؟

عوق بملل\ماقلت لتس يمه انه مسافر..!

ام عوق\كل هذا ضايقن خلقتس عليه جيتي وعلى طول لغرفتس..!

ما شفتس غير مرسال يا الله تجين ماغير روعتيني يوم تقولين تعبانه...!؟

عوق بتهكم\ايه بسم الله عليه تعبي منه فاقدته اشتقت له..!

ام عوق تضحك \الله يخليه لتس ويرجعه با السلامه..,

عوق بتململ \يمه ابي انام تعبانه صاحيه من الفجر..؟!

ام عوق بتفحص\ وجهتس ابد ماهو الي انا خابره ..!

عوق بتعب\ راسي يوجعني انام وان شاء الله يطيب..,

ام عوق\ وش ينومتس الحين تو الليل ..,

عوق بقلة حيله \طيب ..

ام عوق\متى بيعود زياد من السفر...؟

عوق\ ما ادري عنه يمكن يطول سفره..,

ام عوق بملامه\وليه ما سافرتي معه وش يجلستس عقبه..؟

عوق تتنهد بحسره\ مسافر بشغل ماهو فاضي لي..؟!

اعتذرت لها اني ما بعد صليت وقمت ..

صليت العشا نمت وانا ما ادري وشلون نمت ..؟

صحيت على صلاة الفجر قريت اذكاري وردي طلعت..

شفت امي بغرفتها تصلي ورجعت لغرفتي احس اني مصدومه ماني قادره حتى افكر..!

رجعت لسريري انام واصحى واتقلب كأني على جمرمتضايقه مدري وش اسوي ..

الله واكبر يا زيادوين كلامك يوم تقول مرات احسك حلم ماابي اصحى منه

ما كذب من قال هرج الليل مدهون بزبده..

هذا انت يوم زعلت طلعت كل صفه شينه ولزقتها فيني وكلامك صار مدهون بعلقم ..,

نمت صحيت ما ادري كم الساعه لكن الاكيد انه نص النهار طلعت اشوف امي ..!

ام عوق\هلا بعوق المزايين ماهي عوايدتس تنامين لظهر..؟

عوق بكسل\كم الساعه الحين ...!

ام عوق\ اذن الظهر صلي وتعالي ابيتس

رجعت لغرفتي وتجهزت لصلاه وصليت وطلعت لأمي

ام عوق\الخدامه تقول انتس من جيتي البارحه ما اكلتي شي..,

عوق بحزن \الحين بقوم افطر..!

ام عوق با استنكار\دافع البلا كل هذا زعل على سفر رجلتس..!

عوق بضيق \يمه تبين تفطرين معي والا تنتظرين الغدا..!

ام عوق\تعرفيني ما احب اخلط ..,

افطرت قبلتس واستنظر الغدا..!

دخلت للمطبخ مالي نفس با الاكل ولا ابي امي يضيق صدرها..؟!

كبدي وارمه وفيني عبره خانقتني من كلام زياد ما ابي امي تحس فيني..,

افطرت فطور خفيف وشربت مويه حتى المويه احسها مره بحلقي طلعت من المطبخ..!

عوق بتعب\يمه تبين شي بدخل انام ما ابي غدا..,

ام عوق\سلامتس نوم العوافي يا النوامه..!

دخلت غرفتي واناافكاري مشوشه ماني عارف وش افكر فيه ذبحتني الحيره..,

نمت وصحيت مع صلاة العصرصليت وطلعت لأمي..,

لقيتها جالسه بمظلتها وعندها قهوتها جلست عندها اقهويها..!

ام عوق بتوجس \ من جيتيني وانتي نايمه وش عندتس..,

عوق\ابد مافي شي من توفت خالتي ما نمت زين ماصدقت القى سريري عوضت النوم الي فات..!؟

ام عوق\عوق وش بلا وجهتس منقلب وعيونتس غايره..!

يوجعتس شي تونسين شي..!

اردفت ام عوق بضحك \يمكن صايده لتس صيده..,

عوق بضيق واستغراب\ وش صيدته الا تغير جو ..!

ام عوق\ اي بالله صادزه هالحين حنا اول الصفري..,

كل يوم نهارنا شكل مره حر ومره برد ومره عجاج..!

لين يدخل الشتاء الله يغيثنا با المطر الارض يابسه..

عوق\اي والله يمه اول مره اشتاق لشتاء الله يسوق الامطار علشان اطلع انا وانتي للبر..,

ام عوق\لا والله اطلعي انتي ورجلتس..,

انا السنه هذي بطلع مع سعد شاري له ذودآ طيب..!

يقول ياعمه علشانتس شريته وبنخيم با لبر..

وانتي عاد قولي لرجلتس يجيبتس عندنا..!!

عوق بتهكم\زيادوش عرفه با البر انا خويتس ..,

ام عوق بتوجس \طيب يا عوق من هنا لطلعتنا للبر مية فرج..,

دقي على نوره خليها تجي تقهوى تسأل عنتس ما مرت اليوم ماهي لها عاده..!

وجددي القهوه مبطيه عن قهوتس ..

دخلت علشان اكلم خالتي ام ابراهيم وازين قهوه أمي ..,

كلمتها وقالت بتجي..

صلحت القهوه وجهزتها ..

دخلت غرفتي بغير لبسي تذكرت اني ما جبت معي لبس..,

وكل لبسي الي هناارسلته للجمعيه..,

ياربي وش اسوي وجتني فكره ابي اغير شوي من جوي

دخلت غرفة امي وطلعت من ملابس امي..,

لبستها ولبست من طرح امي وبراقعها وزينت شعري جديلتين

واطلع بالقهوه لمظلة امي وخالتي نوره تسولف عليها..!!

يوم شافتني طارت عيونهاسلمت عليها من ورى برقعي ..,

وامي ضحكت وانا ساكته ماتكلمت...

ام عوق بضحك\وش فيتس يانوره..

ام ابراهيم بدهشه\من عندتس يا وضحى..؟

ام عوق بممازحه\ ما عرفتيها..,

ام ابراهيم منبهره\والله يا وضحى اني ما شفتس بشبابتس لكن ما اقول الا انه هذا انتي..,

اردفت ام ابراهيم بتساءل\لايكون انها من حريمتس الي ماقد شفناهن عندتس ..,

ام عوق با ارتباك وتوتر \هذي عوق يانوره عوق..,

اردفت ام عوق\يا منوة عيني انها تلبسه ماتفكه بس وش تقولين في بنات ها الحين..,

ام ابراهيم بضحك\البرقع من اول ستر النساءالحين يادافع البلا غيرنه ماعاد هو برقعتس الي انتي خابره..,

عوق بضحك\دامها رغبتس والله اني ان شاء الله ما خليها بنفستس يا الوضيح واني البس برقع امتس وجداتس ولا افكه ..,

واقعد اسولف مع امي وخالتي ونسيت همي الي جيت به من بيت زياد

عوق بممازحه\ وش رايتس يا خاله انا وامي بنرجع بدو خلاص..؟!

وناظرتني امي نظرت المستغرب والي حاس ان فيه شي..,

ام ابراهيم بضحك\ يا الله الخيره الناس هاجه عن حياة البداوه وانتي وامتس تدورنها وش تبن با الشقى..؟!

ام عوق بتوجس \ عوق تمزح والا رجلها ماهو تاركها..!

ام ابراهيم با اعجاب \ومن الي عنده مثل عوق ويفرط بها انا اشهد انه فاقدآ صوابه...!؟

عوق بنفسها\وش بتقولين يا خالتي لودريتي ان زياد يدعي على حتى الي صار سبب زواجنا..,

اذن المغرب وام ابراهيم طلعت لبيتها وانا سندت امي ودخلنا بيتنا..!

ودخلت لغرفتي اصلي المغرب ..

خلصت صلاتي لكن الحين وشلون اطلب من امي فلوس علشان اشتري ملابس..,

ملابسي خليتها هناك ..!!

وطلعت لأامي الي توها تخلص صلاتها..

عوق بتردد\ يمه معتس فلوس..,

ام عوق با استغراب\وش تبين فيها..

عوق\ محتاجتها..!

ام عوق \ورجلتس ماعطاتس شي ..!

عوق\الا ما يقصر بس زياد متعود يحول على حسابي ماهو نقدي بيدي..!

وانا بطاقة الصراف ما ادري وين مضيعتها

ام عوق\والله ما ادري عنتس انتي وراتس شي عسى الله يستر منه..!؟

عطتني بطاقتها وطلعت لسوق اخذت لي لبس واغراض الي احتاجها..,

يوم رجعت نزلتها في المجلس ما ابي امي تشوفني ودخلت لها بكيس واحد

ام عوق\وش عندتس تأخرتي واخرتها جيتي بها الكيس ...!

عوق\ما لقيت الي ابيه..؟!

دخلت غرفتي ما ابي امي تضغط علي حسيت انها عارفه اني اكذب عليها بكلامي ولا ابيها تطلب مني البطاقه..!

اخاف احتاج شي وانا ما معي شي كل شي تركته في بيت زياد..!

صلحت عشا لأمي وتعذرت لها اني با انام..,

دخلت غرفتي وانتظرتها تدخل غرفتها تنام ..,

طلعت واخذت ملابسي الجديده ودخلتها بغرفتي ..!

وفتحت دولابي الي كان فاضي الا من البومات الصور..,

رتبت الملابس وغيرت لبسي كملت صلاتي ودخلت سريري..!

وافكار تروح وافكار تجي

انا من البارحه وانا عند امي زياد لاجا ولا كلم الرجال شكله ما صدق بس يفتك مني..!

حتى خواته ما كلموا ولا قالوا بنصلح بينهم..!

احسن لايدقون ولا هو يجي ماعلى مثله حسوفه..!

وهو من هو شايف نفسه يعني اني كله دكتور حريم لاقام ولا قعد..!

استغفر الله وظيفته تقوم فيها اي ممرضه..!

والاإي عجيز تقدر تولد حريم والا تعالجهن ..!

وجع يوجعه هو وها الوظيفه الي تفشل ..,

لا وخواته الدكتور زياد والدكتور زياد..!

لو كان اخوي دكتور نساء اصلن استحي اقول دكتور..!

ولامن زين ها الوجه والا من حلاة ها الزول..!

من طوله حتى سريره تفصيل..!

كش عليه وعلى وجه المتشائم المريض والله هو المعقد مهو انا ..!

الحمدلله اني افتكيت منه ..!

نمت وصحيت الفجراليوم الجمعه عيد الاسبوع ..,

كل جمعه من يوم كنت طفله احب اللبس جديد واسوي تغيير بشكلي وفي بيتنا..,

المدرسات غرسوا فيني وانا صغيره ان ها اليوم احب الايام الي الله ..

وامي كانت تساعدني اسوي جو في ها اليوم..,

قمت صليت وطلعت صلحت لأمي فطور مثل ما كنت اسوي قبل اتزوج..!

ودخلت لغرفتهااناديها تطلع معاي تفطر

جلسنا انا وامي با الصاله على صوت القرآن ياربي من زمان عن ها الجو ..!

افطرنا ونسولف انا وامي

عوق بترقب وارتباك \يمه الله لو نرجع انا وانتي مثل قبل..!

ام عوق بتوجس \وشلون مثل قبل ..!
.
.
.


(كلمه اخيره)



حين قرأت [إن الإنسان لربه لكنود]. . . ""سورة العاديات آية6 ""
عتبت على نفسي لماذا لا أعرف معنى كنود . . ؟!
ولما عرفت معناها / (الإنسان الذي يعد المصائب وينسى النعم,عاتبت نفسي أكثر و خشيت أن أكون كذلك)

لـــِ د.سلمان العوده

ربي آجعلنـــآ من الشآكرين
.
.
.
الي الملتقى قريبآبأذن الله

وسالفه جديده


طيف الأحباب

ام الوليد


تذكروني واحبابي بدعوه طيبه

بسم الله الرحمن الرحيم


هلا وغلا بكل الغوالي الي يعطرون متصفحي المتواضع سواء با لردود او الاعجاب او التقييم او الشكر..,

او با الرسائل الي تجيني على الخاص ممتنه للجميع..,
.
.
البارت اهداء لكل من سطر في متصفح نوح الحمام ولو بكلمه وحده من دون استثناء..,

سواء مدح واونقد اوحتى يسأل عن مواعيد البارتات دليل اهتمامه با الروايه..,
.
.

اليوم بنشوف عوق المزايين وش راح تسوي بمشكلتها مع زياد وموقف وضحى من المشكله

يا الله تعالوا معاي...!!

وسالفه جديدة؛



البارت الثالث والعشرون

.
.
.

عوق بترقب وارتباك \يمه الله ياسلام لو نرجع انا وانتي مثل قبل..!

ام عوق بتوجس \وشلون مثل قبل ..!

عوق بتردد\ يعني اعيش معتس هنا..!

ام عوق بدهشة\ورجلتس ..!

عوق بعدم اهتمام\ بكيفه ..!

ام عوق بحده \وش كيفه المره العاقل وين ما يعيش رجلها تعيش معه..!

عوق با ارتباك \زياد كان يربطه في البيت امه وتوفت الحين عادي..!

انا بجلس هناوهو مشغول تعرفين شغله متعب وكل نهاره با المستشفى متى مافضى يمر علي..!

ام عوق بغضب وانتقاد تضرب راسها \يمر عليتس ..!!؟؟

يا فضحي فضحاه عساتس تبينه يرقد معتس في بيتي ..

وش بتقول عنا العرب بنت وضحى اعرست لها على لها رخمتن تسحبه وراها تقومه وتقعده على كيفها ..!

وبعدين بيتس الي اكبر من بيتي مرتين من تخلينه له ..!!

اردفت ام عوق\لا بالله هذا ماهو راي وانا امتس ومن يوم يرجع رجلتس من السفر ارجعي معه..,

ولاهو من بعد بيتس مقراط عصا متى ما بغيتيني تعالي والا انا اجيتس..!

عوق بمراره\يمه بيت زياد موحش ما ينعاش فيه وخصوص بعد ما توفت خالتي ما ابي ارجع له..!

ام عوق بحده \ هذي ماهي سالفه انتي وش وراتس..!

عوق برتباك وخوف \يعني وش بيكون وراي غير كل خير..!

ام عوق بتهكم \نصبر وانا امتس ونشوف تالي ها الخير..,

قوميني ارتاح بغرفتي قبل الصلاة ..!

ازين من سوالفتس الي لا تنزرط ولاتنبلع ..!؟

قومت امي لغرفتها وانا دخلت غرفتي..

ياربي وشلون افهم امي انه خلاص بنفصل عن زياد اجيها يمين تجيني يسار..!

اليوم الجمعه ماهو لازم اضيعه

اصلي واطلب ربي ازين من التفكير بزياد وسوالفه..

صليت الضحى وقريت قرآن..,

بعدها طبخت غدانا انا وامي ..,

يا ما تمنيت يكون عندي عايله كبيره ونجتمع بعد صلاة الجمعه..!

صلحت الغداء وبخرت البيت ..!

تسبحت ولبست جديد مثل عادتي كل جمعه لازم لبس جديد..!

ها العاده الي نسيتها من جنون زياد..!

قريت سورة الكهف

صلحت قهوه وصحيت امي تصلي ورحت صليت وجلست اسمع خطبة الجمعه..,

طلعت امي علي وهي مستانسه..!

ام عوق بفرح\ ماشاءالله زياد عودمن السفر..,

عوق با استغراب\ لا ليه...!

ام عوق تبتسم\ما ادري عنتس بخور وريحة الغداء والقهوه واصله غرفتي..!؟

ولابسه وطاقه الزين قلت يمكن رجلتس بيجي..!

عوق \يمه وش لبسه ترى كله قميص ..!

وانتي تعرفين طبعي من صغري احب البس جديد يوم الجمعه..,

وبعدين زياد ماهو بجاي كلم يقول بيطول بسفرته شوي..!

ام عوق\ايه زين يوم تطمنتي عليه..!

اذا كلمتس مره ثانيه والا كلمتيه..!

قولي امي تبي تكلمك و تسلم عليك..

عوق \خلاص يمه ابشري..,

ام عوق تبتسم\خلي سورينا تحط كرسيي عند الباب الحين كني اشوف وريعات جيرانا يتحروني يناظرون بابنا..!

عوق بنفسها\ياخوفي امي اذا درت تجبرني على زيادوهو رجالآ مايبيني وش اسوي...!

يا حياة الشقا حياتس يا عوق..؟!

طلعوا الشغاله وامي عند الباب وعادتها الي ماتتركها..!

توزع ريالات للبزارين تفرحهم فيها ..!

دق تيلفون البيت شفت الرقم ..!

هذارقم بيت نجلاء اكيد هي بتكلمني ارد والا ما ارد..؟ّ!

مافي احد يدري اني طلعت من البيت الا هي وزياد..!

ماراح ارد بس وش عندها داقه معقوله مرسلها زياد..؟!

انقطع الخط..

احسن خله ينقطع يعني وش بتقول زياد ما اخلى فيها اقوال..

من غير فشيلتي والسوالف الي سمعتهن مني ومن زياد يا طيحت وجهي منها..

ودق مر ثانيه شكلها مصره تكلم برد قبل تدخل امي ..!

اخاف امي ترد عليها وتعرف السالفه ..!

نجلاء\السلام عليكم..

عوق \ هلا نجلاء..

نجلاء \كيفك وكيف الوالده ان شاء الله طيبين..؟

عوق ببرود\الحمدلله بخير..,

نجلاء بتردد\والله ما ادري وش اقولك لكن بدخل با الموضوع..!

عوق تدرين بمعزتك عندنا ولو ماتهمينا ما كلمتك..!

عوق بمقاطعه\اذا هو بخصوص زياد الموضوع منتهى..؟

زياد ما قصر ماخلى له عندي خط رجعه..!

قدامك مسح بكرامتي الارض وطردني ..!

نجلاء\يا عوق الحياه الزوجيه معرضه لأهتزازات وهذا شي طبيعي..!

والزوجه لازم تكون واعيه لشي هذا..!

وبعدين الزوج وزوجته ما بينهم كرامه..!؟

انتي عارفه ان زياد كانت نفسيته با الحضيض بعد خالتي وهو شوي حساس..!

عوق بعتب\وانا يعني ما عندي احساس..!

الاحساس بس له هو..؟!

نجلاء\ والله ما اقصدلكن انا كلمتك لأني عارفه ان عقلك يوزن بلد..!

وبتسمعين مني لا تعاندين وتخربين بيتك وزوجك يحبك لكن ساعة شيطان

والله مافي مثل قلب زياد..,

عوق بتهكم\ زياد ما مثل قلبه عندكم انتم..!

اما انا با النسبه لي خلاص مسحته من حياتي ومستغنيه عن ها الحب

الي كان واضح يوم انفجر علي قدامك ماخلى ولا بقى كلمه..!

نجلاء تتنهد بوجع\ ياليتني ما تدخلت بينكم انا السبب..!

عوق\لا تلومين نفسك يا نجلاء اصلن حياتي مع زياد منتهيه منتهيه سواء تدخلتي اولا..!

انا ماشفت يوم حلو معه كلها مرار بمرارمن تزوجته وانا متعوستن معه..!؟

نجلاء\انتي الحين متأثره بلي صار ومنفعله..!؟

اذا هديتي راجعي نفسك ..!

وفكري بتلقين شي حلو ولحظات سعيده بينكم تشفع له عندك..

وسامحيني على الي صار..؟!

عوق بوجع \انتي مالك ذنب بشي با العكس الله يكثر من امثالك..!

حاولتي تصلحين لكن انا مالي با الطيب نصيب..!

انا وزياد لايمكن نكمل مع بعض ..!

نجلاءبخيبة امل \توقعت لي خاطرعندك لكن خيبتي ظني..!

عوق تتنهد بحسره \لا والله لك كل الخاطر الا بموضوع زياد ما استقبل اي محاولة اصلاح..!

لأن الزجاج اذا انكسر صعب تصليحه مالنا الا نتخلص منه ..!

نجلاء \ الله يصلح الحال ويهدي النفوس واتمنى هذي ما تكون آخر مكالمه بينا توصين شي ..!

عوق\ سلامتك ..!

سكرت من نجلاء واحس اني بردت حرتي بزياد شوي لو ان قلبي اوجعني اني زعلتها..,

اهل زياد ناس محترمين وخصوص نجلاء وبشرى عكس اول مره شفتهم فيها ما كنت مرتاحه لهم

لكن لما احتكيت فيهم غير سبحان الله ذوق واخلاق ونياتهم طيبه ..!

دخلت امي من برا..,

ام عوق \وين غداتس قلت ادخل القاه جاهز ..!

عوق\ابشري الحين احضره اخرتني نجلاء على التيلفون تسلم عليتس ..!

حضرت الغداء وجلست انا وامي نتغدى

ام عوق با استغراب \وش عندها ام راكان داقه غريبه ماتعرف حتى رقمنا..!

عوق بتوتر\ شافتني يوم انا تعبانه ودقت اتطمن ويمكن اخذت الرقم من زياد ..!

ام عوق بشك\ايييييه الله يجزاها خير ..!

كلام امي صار يرعبني وتلميحاتها تخوف ولو ماشافتني واقفه عند التيلفون كان ماخبرتها بمكالمة نجلاء

ماصدقت خلصت امي من الغدا قمت على طول دخلت غرفتي بريح شوي..,

ونادتني الشغاله تقول حرمه على التيلفون ..؟!

ياربي سترك لايكون بعد نجلاء وش بقولها الحين اخاف امي تسمع

ثم عادينكشف الي انا داسته عنها ..!

رديت على التيلفون..؟!!

ريم\هلا بعوق ..!

عوق با ارتياح\هلابتس الحمدلله انه انتي ..!

ريم بدهشه\ليه منتظره احد والا ما تبين تكلميني يا القطوع ..؟

عوق بضحك\ \نطح الصياح صياحن تسلم من القطوع انا والا انتي..!

ريم بتهكم\ومن الخفيف يا عويق انا والا انتي..!

تدرين ابلش بعيالي وين اخليهم..!

عوق\الله واكبر الي يسمعتس من كثرهم كلهم ثلاثه..!

ريم\تعرفين طبعي يا عوق مااحب اخذ عيالي معي خصوص اذا باازور احد..!

الحمدلله والشكر طالعه اتونس والا اركض وراهم ..,

اتركيني من اخبار عيالي ابي اخبارتس ..,

عوق بوجع \ابد ماعلي طيبه..

ريم بضحك\امي تقول روعتني عوق دخلت علينا حسبت الزمن رجع ورى ..!

وضحى رجعت شباب وش جاتس على ها الحركه..,

عوق تبتسم\ابد قلت بونس امي وخالتي شوي..

ريم تمريني اليوم..؟

ريم \والله يا عوق بموت على شوفتس لكن اليوم انتي خابره لازم نجتمع على الغداتحت عند خالي..

الحين اكلمتس وجلالي على راسي بنزل لكن امي قالت عوق عند امهاوقلت بسمع صوتس..,

استحي اكلم على بيتس والا جوالتس..,

عوق بضيق\على راحتس ..

ريم \ شكلتس زعلتي عوقه ..,

اسمعي اذا اليوم بتطولين عند خالتي وضحى مريت عقب المغرب ..!

عوق بتهكم\لاابشرتس مطوله الجلسه عند امي..!

ريم بضحك \لا والله انا الي ابشرتس نمر محرمكم تعلم يسوق ولا يرفض لنا طلب

بدق عليه يجي ياخذني توه شايش با السواقه يدور الي يناديه يوصله..!

عوق بفرح\على البركه الله يحفظه لكم ليتني اشوفه وهو يسوق خلاص انتظرتس..!

سكرت من ريم ..,

ما شاء الله نمر يسوق يا سرع الايام البارحه وامي تناديه..!

يركب مع السواق واطلع اقضي اشغالي معه صغير ما يبان اذا جلس جنب السواق ..!

رجعت لغرفتي ونمت صحيت على صلاة العصر صليت

طلعت لأمي الي منسدحه بغرفتها شكلها توها مصليه تسبح وتستغفر با ايديها وهي على سريرها ..

ام عوق\صليتي العصر ..

عوق\ ايه من يوم اذن صحيت وصليت..!

اردفت عوق \يمه ريم دقت اليوم ..!

ام عوق تبتسم\وش عندها رويم..,

عوق \ابدتسلم خالتي ام ابراهيم خبرتها اني هنا..!

ام عوق بمقاطعه \ يا ليت كل البنات مثل ريم ما شاء الله عليها جيده وصبور..

والله نفلاء ما يعيش معها القرد ..!

عوق بشرود\يمه جزاع شاريها..؟

ام عوق بتوجس \حتى ولو كثر الدق يذوب الحديد..,

ماتبي كل يوم فراش جديد وماهو على كل حال بيجي ازين من فراشها الاول..؟!

ام جزاع تعلميني بها يادافع البلا لسانها يلوط اذانها على البعيد وشلون القريب..!

ذوقت طخايم الله يرحمهاالمر والمرير..!

الله يطول بعمر مسلط ونوره طخايم عندهم لين ماتت هاجه عن نفيل وضيمها..؟!

ولا علم ولا خبر يدري به العدو والا الصديق ..,

تنشدها الناس يانوره وش قومها امتس عندتس وتاركتن بيت ولدها التسبير..,

تقول امي ما تغتني عن بنياتي تبيهن والا نفلا وعبد الرزاق يبونها

وزعلانين علي يقولون حارمتنا من عجوزنا تضوي بيتنا ..,

والخافي يعلم به الله عبد الرزاق رجالن ما يدري عن شي الطيب الي تمدحه نفلا..,

ماتت امه الله يرحمها با المستشفى بين ايدين نوره ودقت نوره وجمعت اخوانها عند امها

بالمستشفى تقول عبد الرزاق واخواني كل ليلهم عند راس امي الين توفت بين ايدين عيالها

وهي تسذب تستر على اهلها ماتبي العرب يشمتون فيهم..,

وانا خابره كنها الحين ليلة وفاتها طخايم

اهل نوره معزومين بعرس..,

وحريم اخوانها كل ليلهن يردحن با العرس مادرن من حيا من مات..,

وهذا هي دارت الدنيا ونفلا وعبد الرزاق اخذو بنات نوره لعيالهم..!

دارين انهن مثل نوره الي تستر الشينه وتطلع الزينه..!

عز الله ان نوره ربت بنات ماشاء الله عليهن كلن يقول

يا بنات نوره والا لاتدور ..,

عوق تتنهد بضيق \يمه ريم يمكن تمرنا بعد المغرب جيت اعلمتس ..,

ام عوق تناظر عوق بتفحص\حياها الله رويمه البيت بيتها ..,

ما صدقت اطلع من غرفتهاودخلت غرفتي صداع ضرب راسي وفجره من كلام امي..,

ادري ان كل الي قالته علشان توصلي لي رساله..,

ياربي سترك وهذي بس شاكه شك ان فيه شي اجل اذا درت انه طاردني وش بتقول..!؟

قريت اذكاري وتمددت على سريري يمكن ها الصداع يفك عني علشان اصحصح اذا جات ريم..!

صحيت مع المغرب والصداع ما فكني ...!

الحين ريم بتجي بقوم اجهز القهوه لريومه يا انا مشتاقه لخشتها ..,

صليت المغرب ربطت راسي من الوجع وجلست انا وامي با الصاله ننتظر ريم..,

ما ابي افتح اي موضوع مع امي صرت اتحاشي اسولف معها..

ام عوق \ليه رابطه راستس ..؟!

عوق بتعب\ لا بس راسي يوجعني ودورت بنادول شكل الشغاله مخلصه عليه ..!

ام عوق\يطيب ان شاء الله بس اكثري من الا استغفار ..,

واتركي عنتس الحبوب ترى ما وراها زود..!

دق جرس الباب وطلعت الشغاله وكانت ريم..

سلمت علينا وجلست..!

ام عوق \ رويم ورى ما جبتي عويلتس..,

ريم\ عند خالاتهم انفال تركتها تصيح ياالله اني هجيت عنها نشبت لي..!

عوق تبتسم \ حرام عليتس ليتس جبتيها معاتس ..؟

ريم بضحك \والله ياعوق ما ادري وش عاجبتس با انفال غير انها تلبد وراتس وتلمس شعرتس..!

فضحتني عند خالتي ام جزاع تقول ياجده ابي شعري مثل شعر عوق..,

قالت خلي امتس تحنيه وتدهنه ويصير ازين من شعر عوق..!

وهذاانا ما صار لي شغل الا انفال وشعرها ندهن ونحني كل نهارنا..!

دق جوال ريم وكلمت خواتها..,

ريم بضحك \الذيب عند طاريه انفال تصيح تبيني

خالاتها طفشوا منها وبيرسلونها..

عوق \يالبى قلبها والله اني مشتاقه لها ..!

ام عوق \وشلون خوالتس ياريم عساهم طويبين..

ريم\ ما عليهم ابشرتس وهذا هم يجهزون لعرس نواف والجوهره..,

عوق \ ماشاء الله متى عرسكم..,

ريم با استنكار \ ماعندتس خبر..,

عوق بدهشه \لا والله وش يدريني ..؟

ريم\كان المفروض الايام هذي لكن اجله نواف علشان زياد..,

يقول مره نفسيته تعبانه من يوم توفت عجوزكم الله يرحمها..,

غريبةما قالتس زياد عن التأجيل ..؟!

حتى زعل على نواف قال لا تأجل وخل عرسك بوقته..؟!

عوق بشرود \ والله ما ادري يمكن قالي ونسيت..؟!

ام عوق بتهكم\ الظاهر فيه شي واجد قايله لتس زياد وناسيته..!

عوق با ارتباك\ماهو قصد يمه بس زياد يمكن نسى لا يقولي ترى مره متأثر بوفاة امه..

ريم با استغراب \ وش فيتس رابطه راستس..,

عوق تمسك راسها\ صداع ماسك راسي من العصر ليتني قلت لتس جيبي معتس بنادول..!

ريم با استنكار\ وانتي صاحيه تاكلين بنادول على كيفتس يمكن انتس حامل..!؟

عوق بذعر وارتباك\ حامل فال الله ولا فالتس ..,

ام عوق بحده \ بسم الله وش بلاتس فريتي تقل مقروصه..!

وخيرآ على خير ان شاء الله انتس حامل..,

اردفت وضحى \والله وجهتس الاصفر وتعكف رميشاتس ان وراه شي..!

عوق با ارتباك \وش وراه وانا البارحه بس صليت ..,

ام عوق بسخريه \تعلميني يا عوق ..؟!

ام عوق تهز راسها بسخريه \لتس الي تبينه اذا ما طلعتي حامل...!

مير دقي على رجلتس بشريه والبشاره لي..!

ريم بفرح\ مبروك ياعوق ترى خالتي صادقه عيونتس عيون الي طاقها وحام.,

عوق بتذمر \لا اله الا الله اقولكن امس اخريوم باالدورةوانتن تحللن على كيفكن..!

مافيني شي حتى راسي طاب الحمدلله ..,

وفكيت ربطت راسي ..!

اسكتت امي وقامت وجها وجه المقهور علي

وش اسوي لو بقولها الحقيقه بتنقهر زياده..,

والتفتت علي انا وريم وقالت انتبهن تسولفن شي قدام بنت ريم اذا جت..,

ترا البزران على السوالف مثل الدجاج ..,

يلقط الحب الي ما ينشاف لا تلقط عنكن سالفه من سوالفكن ..,

وتقولها عند احد يفهمهاغلط ثم عاد يا الله دورن الاعذار


دخلت امي غرفتها وانا وريم دخلنا غرفتي..,

ريم با استغراب \انا وانتي ماهي عشرت يوم ويومين..

عمري ما شفت خالتي وضحى زعلانه منتس..!

وتدور على الكلمه بس علشان تقهرتس فيها..

بينكن شي..!؟

عوق تبكي \لا مافي شي بس امي صايره حساسة واي شي يزعلها..!؟

ريم بحزن\يا عوق وش يبيكيتس امتس حرمه كبيره وش تسوين تحمليها

العجايز مرات تضيق صدورهن يطفشن والي يجي بوجيهن الله يعينه ..!

شوفيني مع خالتي امس سوت لي حفله ..!

زارتنا حرمه من الجيران العصر تقهوى عندنا..

تخيلي انفال تلعب مع اخوانها وهي دفشه تعرفينها ضربت عبد الرزاق ..!

وقلت نفوله ليه متسلطه على عبد الرزاق هذا اخوتس نطلع فوق وتشوفين..!

وعينتس ما تشوف الا النور وش سوت فيني الله لا يوريتس ..!

تقول للحرمه بنت نوره ما بغت اسمي وخلت ولدي يسمي انفال..!

وها الحين تقول نفوله متسلطه على عبد الرزاق تقصدني..,

المشكله ان عيالي هي وبناتها سموهم انفال يوم قال جزاع بسميها نفلا على اسم امي ..!

قلت خير وبركه وبناتها عارضوا قالوا لا نبيها انفال قريب من اسم نفلا..!

وعبد الرزاق سموه على خالي ابو جزاع حتى فراس بغيته على واحد من اخواني..

رفض جزاع قال لا امي لها خاطر بفراس

وليتها تناديه فراس الا تقوله ابو راس..,

عوق تضحك من بين دموعها\ياربي سترك بصراحه انتي لازم يرشحونتس لجايزةنوبل باالصبر..!

ريم تتنهد بقلة حيلة \ نوبل وبس خالتي منقهره من نواف بيطلع شهر العسل لنمسا..,

وهي زعلانه تقول وش مهججه عن ديرته ما اسرع ما بنت نوره ركبت راسه..

ماغير مخاسير على الفاضي ..,

ونواف يحلف يقول هذي هدية زياد لي هو الي حاجز كل شي ومسوي برنامج كامل

على اساس له هو لكن ما كتب الله انه يطلع واهداها علي ..,

ارجع هدية الرجال والله عيب ..,

من عاد يفهم خالتي ها الكلام ..,

اخرتها نواف عطاها اذن طين واذن عجين ولا لقت غير ريم تبرد حرتها فيها..,

اردفت ريم تضحك بتهكم\وانتي ضاق صدرتس من كلمتين قالتهن خالتي وضحى ..!

عوق بنفسها\من هو الي منحوس ها الحين يا زياد انا والا انت الي حتى هديتك سببت مشكله..,

ريم بضحك\طنشي بس والا ترى والله ان يجيتس مية علة ولا احد درى عنتس..!

وخالتي ما قالت شي غلط يمكن هي صادقه انتس حامل..!؟

ماعندي رد لسؤال ريم وانا الي بقلبي مكفيني..!

ريم\عسى اعجبتس البوم عرستس شفتس نسيتيه وتذكرت الوصل عندي من ليلة العرس ..!

اخذته من المصوره يوم اوصلهاواخترت الصور والخلفيات على كيفي..!

عوق\ما قصرتي ريم حلو مره تسلمين ..,

ريم\ رجلتس طالع شين با الصور على الطبيعه احلى..,

عوق بقرف \والله انه شين طبيعه وصور..!

ريم بضحك\ شكلتس وحده من ثنتين ياخايفه من العين يا توحمين عليه..!

ريم رجعت لبيت اهلها بنتها تصيح تبيها وانا رجعت لغرفتي افكر بكلام امي..

انا الدوره ماجاتني الا مره من تزوجت حسيتها تخربطت علي كنت بقول لزيادبشكوكي لكن صدني..

الحين اذا صدق وش اسوي بها الحمل الي ماجا على البال ولا على الخاطر..

لو بطلع اصلح تحليل امي تنشب لي وين بتروحين بشوف لي طريقه اتطمن ان مافي حمل..

آآآآآآخ يا راسي...!

مر اسبوع علي عند امي وزياد لاعلم ولا خبر ..!

على مكالمة نجلاء الي ما دقت بعدها..,

وامي تدور علي الزله بس علشان تهاوشني..,

وجع راسي ماعاديفكني ..,

ولا قدرت اطلع للمستوصف خفت امي تكشفني اكتفيت اني اربط راسي احس الوجع يهدا...!

او الشغاله تدلكه لي يخف عني وجعه..!

غير الضيقه الي صاكه على صدري ..

سمعت جرس الباب وناديت الشغاله تفتح الباب..!

دخلت غرفتي مالي خلق اشوف احد اكيد هذي وحده من الجيران والا ام ابراهيم..؟!

جاتني الشغاله قالت ام ابراهيم عند ماما يبغاكي بسرعه ..!؟

قلت قولي لهن عوق نايمه..؟!

حاولت انام ما قدرت صار عندي فضول اشوف خالتي نوره وش تبي..!

دخلت عليهن خالتي وامي معصبه و تقول لها ماهو ولي امرها يا نوره..؟!

دريت ان في شي كبير ويخصني بعد..!

جلست عندهن وقطعن السالفه..!

ام ابراهيم بعطف \وشلون راستس الحين ..!

عوق بتعب\ ما عليه طيب ان شاء الله ..!

خاله انتي ارسلتي سورينا لي تبين شي

ام عوق مقاطعه بتوجس \صاير شي بينتس وبين رجلتس..؟َ!

عوق با ارتباك\ لا وش بيصير رجلي مسافر وكل يوم يدق على جوالي..!

ام عوق بسخريه\وين جوالتس يا ام جوال وانتي دخلتي علي بعباتس وثوبتس الي على ظهرتس..,

سكت ودريت ان امي عارفه من يوم جيت اني كذبت عليها..؟

ام عوق بحده\عندتس خبران رجلتس البارحه عند نواف وسالفة السفر كذبه جبتيها من راستس

ام ابراهيم \زياد يقول انتس عند امتس وان بينكم خلاف..,

عوق بغضب\ هو قال كذا..؟!

ام ابراهيم\ايه وبيجي ها اليومين يتفاهم معتس هو مستحي منكن عقب الي صاربينكم وارسل نواف علي قال كلميهن..؟!

عوق بحده\ما شاء الله عليه انا سالفة الخلاف الي بينا حتى امي ماعلمتها فيه وهو ما قصر نشرها..!

ام ابراهيم منحرجه \الرجال ما قصده لكن معتبرنااهل لتس ..,

ومافي احد يدري بشي غيري انا ونواف وامتس ..؟

ام عوق بحده\ زياد رجال ماعليه يا خوفي البلا من بنتي..!

عوق بغضب \وش الي ماعليه كل من قام قال زياد ماعليه وزياد ما مثله وزياد وزياد..!

وانا ناسيني ماني بشر والا زياد آدمي وانا جدار وينه الي ماعليه كم لي يوم عندتس مدرى عن هوى داري ..,

اردفت عوق بتهديد\شوفي يا خاله انا كنت قبل اراجع نفسي انه لو جا واعتذر مني ..

يمكن اقبل عذره لكن الحين لو مهما سوى ماله عذر..؟!

ام عوق\ تعوذي الشيطان والحرمه مالها الا بيتها ...,

عوق بسخريه\الله واكبر يا ها البيت انا زياد خلاص انغسلت نفسي منه..!

خبري نواف الي صار المتحدث الرسمي با اسمه يقوله يرسل ورقتي..

وهذا انا حلفت ما ارجع لزياد

والله ما ارجع له عقب سوالفه لو ينخاط جلدي على جلده..,

ام عوق بأمر \اتركي عنتس الهبال ولا تفرطين برجلتس ..!

عوق بسخريه\رجلي ما ابيه خلاص هونا من الزواج ماعاد له لزمه صفحه سوداء وقطعناها..

ام ابراهيم بعتب \ماكنت اظن يا عوق هذا عقلتس..!

عوق بتهكم\والله عاد عقلي ماهوبعقلي..!

محد نشبني بحلقه غيرتس انتي وامي..!

امي تشكي لتس من ثقل حملي وانتي ما قصرتي عرضتيني عليه ..!

الحين مثل ما مشيتي بزواجي فكيني منه خليه يطلقني ..!

وفلوسه الي اشتراني بها تراها با البنك ما تحركت..!

يطلق من كيفه والا غصبن عنه..!

ام عوق بغضب \ اقطعي واخسي هذا ماعاد تحشمين احد..!

ام ابراهيم بوجع \ لا يا وضحى خلي عوق تقول كل الي عندها هي صادقه..

والمثل الي قال امش بجنازه ولاتمشي بجوازه والله ماكذب ..,

التفتت نوره لعوق\ يا بنتي والله ما بغينا لتس الا الزين ما درينا وش بيصير بينتس وبينه..!

عوق با انكسار \خاله انتي ما سألتي نفستس انا وش دراني انكم خطبتوه والا عرضتوني عليه بدال هو ما يخطبني..,

هو الي خبرني يقول عمة نواف هي عرضتس علي..!

هو لوكان يبيني ما قالي ها الكلام وانا قبل اكمل اسبوع عنده..!

ام ابراهيم تمسح دموعها\والله يا بنتي انه غلطان كان هذا كلامه ماله حق..,

عقب الملكه دق علي ماخلى ولا بقى من الكلام الزين ما قاله لي..!

ويدعي لي اني صرت سبب بزواجكم..؟!

و عقب العرس مسلط كل ماشافه وسأله عنتس يقول قام وحب خشمي وقال بيض الله وجهك يا ابو ابراهيم..,

ليه الحين وش قلبه عليتس..؟!

ام عوق بملامه\ يا نوره لا تغلطين الرجال وحنا ما سمعنا وش عنده والا وش الي حده على ها الكلام..!

عوق من بين دموعها\وش عنده يمه الي عنده انه ما يبيني عافني طابت نفسه مني ..,

من ماتت امه وانا عايشه با الحالي يقوم ويقعد كنه ما يشوفني..!

و يوم قلت لنجلاء ابيها تساعدني نطلعه من حزنه فضحني وفشلني قدامها..؟!

يقول هذي وجها شر من دخلت علينا ماتت امي هذي منحوسه هذي فيها وفيها ..؟!

واخرتها بغيته يوصلني هنا رفض قال انقلعي امتس عندها سواق ماعادهمه من اركب معه

طلعت قدامه بس ابيه يناديني ولا كأنه يشوفني..!

نجلاء تبكي وتصيح تسحبني ما تبيني اطلع وهو على الصامت

ما سمعت حسه ولا حتى طلع يشوف ليه نجلاء تصيح

وقفت عند باب الشارع بنصايص الليول من شافني يحسبني شحاذه..!

وتقولين يمه ما سمعنا منه شي..؟!

طلاق بيطلق ورجله فوق رقبته..؟!

.
.
(كلمه اخيره)

يجانب البعض الصواب عندما يظن أحدهم بأن الصبر هو أن يبتلى الشخص بمرض

أو سجن أو نحوه فيصبر حتى يسمي حاله "صابرا"،

والصحيح أن هذا النوع هو أهون أنواع الصبر؛

لعجز ذلك الشخص عن حل تلك الحالة فيصبر اضطرارا،

وإنما الصبر الحقيقي: هو الشيء الذي تستطيع أن تفعله ثم لا تفعله،

كالكاظم غيظه ولو شاء أن يمضيه لأمضاه.

الشيخ صالح المغامسي

.
.
.

الي الملتقى قريبآبأذن الله

وسالفه جديده


طيف الأحباب

ام الوليد


تذكروني واحبابي بدعوه طيبه

بسم الله الرحمن الرحيم



اللهم يا مهلك الطغاة يا من اهلك فرعون اهلك بشار الاسد واخوانه وعائلته وكل من يتبعه ويعينه

اللهم ارنا فيهم عجائب مقدرتك

الله احمي أهلنا في درعا وفي جبلة وفي الشام وفي جميع انحاء سوريا

اللهم فك قيد الأسرى والمعتقلين وشافي الجرحى والمصابين وارحم أمواتنا وأموات المسلمين وتقبلهم مع الشهداء والصالحين

اللهم انت قلت وقولك الحق ، ادعوني استجب لكم

وها نحن ندعوك

يا حي يا قيوم برحمتك نستغيث

اللهم انا ندعوك الله ، اللهم انا ندعوك باسمك الأعظم الذي اذا دعيت به استجبت

يا الله انصر عبادك المستضعفين فلا ناصر لهم غيرك

اللهم انصرهم على من عاداهم

اللهم احقن دماء المسلمين واهلك الظالمين بالظالمين واخرجنا من بينهم سالمين

اللهم هذا الجهد وعليك التكلان

اللهم تقبل الدعاء

.
.
.

هلا وغلا بكل الغوالي الي يعطرون متصفحي المتواضع سواء با لردود او الاعجاب او التقييم او الشكر..,

او با الرسائل الي تجيني على الخاص ممتنه للجميع..,

ولا يرضيني ان اي رد با الروايه يحذف وخصوص اذا كان نقد ولا طالبت بحذف اي رد..,

البارت اهداء لكل من سطر في متصفح نوح الحمام ولو بكلمه وحده من دون استثناء..,

سواء مدح اونقد اوحتى يسأل عن مواعيد البارتات دليل اهتمامه با الروايه..,

والله العظيم انه في ردود من روعتها اوقف ما اعرف اكتب كلمه

وفي ردود احسكم معاي يوم كتبت الروايه لدرجة ان في اشياء حذفتها يوم عدلت با الروايه

لقيتكم تبارك الله كاتبينها ومتوقعينها...,

فخوره ان متابعات راقيات ومثقفات يمرون على متصفحي المتواضع ويسطرون فيه من درر ابداعهم..,
.
.
واهداء خاص للغوالي loost & ارجوانة الياسر

اليوم بنشوف عوق المزايين والتطورات الجديده



يا الله تعالوا معاي...!!

وسالفه جديدة؛
.
.
.
البارت الرابع والعشرون

.
.
.
وقفت عند باب الشارع بنصايص الليول من شافني يحسبني شحاذه..!

وتقولين يمه ما سمعنا منه شي..؟!

طلاق بيطلق ورجله فوق رقبته..؟!

والله الغني عن ها الرجال عووع يا جدوع خلاص نفسي عافته عارفه وش معنى عفته ما ابيه..,

ام عوق ساده اذانها بيديها\ خلصتي بربرتس الفاضيه..؟

ترى ما سمعت كلمه من الي قلتيه..,

الرجال وهو زعلان كل شي يقوله واذا رضى ما كأن شي صار..!؟

لو كل حرمه تهاوشت مع رجلها وغلط عليها بساعة زعل شالت قشها وقالت يالله

والله يابنتي ما شفتي بيتن عامر ..!؟

انا كم مره اعلمتس ان الرجال اليا زعل مثل اول شبت النار

ان جيتي بوجها ان مااحرقتس اخنقتس بدخنها..,

واذا هدت النار قربتي لها وتدفيتي بها واتنفعتي منها..,

عوق بتهكم موجع\واضح زعله الي ماقالي وش لونتس من ماتت امه لين طلعت من قدامه..؟!

يطلق وينقلع مثل يوم قالي يوم انا في بيته خلوها تنقلع وجه النحس ..!

الحين انا اقول خله ينقلع غراب البين وجه البومه..!؟

هو الي من دخل حياتي صار فيني منه ستين عله..!

بغيت انجن في بيته ما غير اكلم الجدران كرهني با الدنيا ..؟!

ام ابراهيم بحيره \والله ما ندري من نصدق انتي ولا هو..؟!

كل شي يجي با الخناق الا الزواج با الاتفاق ..؟!

هذي عشرة عمر وخصوص الطلاق محد يقدر يظلم حظه ويتدخل فيه..؟

عوق بمراره\انا ما ابي شي منتس لكن مثل ما جمعتينا..!

الله يجزاتس خير فرقينا فكيني منه وهذا اخر ماعندي ..!

ام ابراهيم بقلة حيله\والله نواف يقول زياد تشوفين الهموم بوجهه يمشي الضعيف بلا روح ..!

عوق تتنهد بوجع\ زياد خلاص مالي خبزتن اكلها معه النصيب انقطع بينا..!

ورقتي تجيني وفلوسه با البنك ..,

ياخذها اذا جاب ورقتي وفوقها هديه كل الي خليته في بيته هذا مريض ما ينعاش معه..!

وان كانه رجال عنده كرامه وفيه خير يطلق با الحسنى احسن ما اجرجره با المحاكم ..,

ام عوق با استنكارلأم ابراهيم \انتي صاحيه تبين تقولين لرجال ها الكلام ..!

والله لوانه يشرق بغلاها غير يعافاها ويطلقها ما عليتس منها يا نوره

هذي تهذر زعلانه والله لويجي ها الحين ويضحك عليها بكلمتين انها تنسى كل سوالفها قدامتس

وكل واحد وقف ضد رجلها فازعن معها غير تشوفه عدو الي ها الحين ماخلت شي ماحطته بظهره..!

ام ابراهيم تتنهد بقلة حيله \وش تبيني اسوي الذنب ذنبي يا وضحى انا الي طاوعتس ..,

لكن يعلم الله اني ما بغيت لها الا انها تعرس وترزق الله..!

ما دريت انهم بيتخالفون وتوصل لطلاق وهي توها معرسه..!

ام عوق تضحك بتهكم \ يا بنت الحلال وش طلاقه عوق حامل ..!

ويمكن وحامها جاي برجلها..!

ام ابراهيم بفرح \ما شاء الله ازين علمآسمعته مبروك ياربي لك الحمد ..!

عوق بذعرتلفت لنوره وامها \و ش مبروكه وش طاوعتس فيه..,

اردفت بقهر وهي تضرب على ر كبها\ الله لا يبارك بزياد ابو المصايب الله لايسامحه كانه قاهرني وغابني حاضر والا غايب..

ام عوق بضحك\عيني خير وانا امتس يمكن ها الحمل يصلح حالكم ..,

عوق بتحدي وغضب \من قال اني حامل من قااااااال وش تبين اسوي يمه علشان تصدقين اني مانيب حامل..!

ام عوق بحده وحزم\ لا تقولين ولا تسوين وبينا الايام ياعويق هي الي تجيب العلم الوكاد..!

التفتت عوق لنوره بذعر وارتباك\ خاله ترى امي تمزح معتس..,

ام عوق تهز راسهاوتضحك بتهكم \لا والله ما امزح والعلم الصحيح بين جنوبتس..,

عوق بذعر وتهديد\والله لو ادري ان اشاعة اني حامل طلعت من ها البيت ..,

اني لأاذبح نفسي ومحاولاتي قبل اني انتحر يوم دريت اني لقيطه لأاعيدها..!

و بتنجح ها المره وذنبي برقابكن انتن وغراب البين وجه البومه زياد ..

استغربت من امي ان ردودها بارده ولا همها كل الكلام الي قلته..؟!

طلعت من عندنا ام ابراهيم وهي تبكي ..!

ام عوق بملامه وحده\وش ها الهرج الي قلتيه قدام نوره ..,

عوق با اصرار \ماقلت غير الصدق الغلط راكب زياد من ساسه لراسه..,

ام عوق \ واذا رجلتس غلطان تروحين تفضحين به عند العرب

باتسر تصالحين انتي وهو وتنسين كل ها الي قلتيه لكن الي سمعوتس ما ينسون سوالفتس

وعلى اداناة الدون يذكرونتس بها..,

والحمدلله انها نوره ولا غيرها...,

عوق تبكي بقهر \يعنى انا ما اهمتس وطلعت الحين انا الغلطانه والله لو يموت ما رجعت له ..؟

ام عوق با انتقاد\وش الي يبكيتس ياعوق انتس ماعرفتي تجيبين راس رجلتس..

ورحتي تفزعين عليه تبين المعونه من الحريم يا بنتي الي مايعين نفسه الناس ماتعينه

كان صبرتي عليه وجيتيه با المسايس يبي يلين ويرجع لتس على ماتبين..,

الحين وش استفدتي كم لتس مع رجلتس ولا فهمتيه..,

رحتي تشاورين نجلاء الي اجهل منتس لو كبرت شهادتها ..,

لو انها حرمتن تفهم كان عطتس حل بينتس وبينها ولا يحتاج تنصح رجالتس وانتي تسمعين

والا صبرت لين يمرها في بيتها من كيفه وان كان عندها نصيحه صبتها با اذنه وانتي كنتس ما تدرين بشي..,

دخلت بينكم بحسن نيه لكن ماش وانا امتس دخلتها غلط

رجالتس ضايقن خاطره من موتت امه ويوم اخته بغت تنصحه في بيته شاش راسه وزعل وقال الي قاله

وانتي نطيتي بحلقه وثار الرجال وفرغ حرته بتس

وماقصرتي قمتي تراددين هو يقول كلمه وانتي تقولين عشر..,

عوق \انا وش قلت هو الي ماخلا ولا بقى علي..

ام عوق تهز راسها بقهر\بنتي واعرفتس تطق روحتس انا ماراددتي تحسبينها شطاره

والله لو انتس مبعده عنه ساعة بس ساعةوحده انه غير يرجع يحب مواطي رجليتس مهو راستس

وخصوص ان شك انتس سمعتيه وحشمتيه وعذرتيه

ولا رديتي عليه يبي ينفشل من نفسه ويجي يترضاتس

حتى لو انه عند نفسه ما ازعلتس الله يهديتس ويكفيتس شر نفستس ..,

ام عوق تتنهد بقهر\ترفقي بنفستس ترفقي تراتس حامل وخلي عنتس العناد..,

وكلمتي حطيها بين عيونتس زياد راجعه راجعه له

من انتي مرتكيه عليه وانا امتس

على اهل والا عزوه..؟؟!!

مالتس غير الله ثم ها الرجال ..

وان كانتس اليوم مستظله بظلالي باتسر الله العالم ..؟

قامت امي لغرفتهاوتركتني ماقدرت اقول كلمه ..؟!

كلام امي عارفه انه كله صحيح لكن فات الفوت ماعاد اقدر اتراجع زياد مرحله وانتهت من حياتي

وامي صادقه من انا مرتكيه عليه ياخذ حقي من زيادويرجع لي كرامتي..,

دخلت غرفتي وبكيت على حالي الي عمري مافرحت بشي الي وجا شي نقص علي..؟!

الي فيني كلها اعراض حمل وامي صادقه..,

هذا الحمل الي ياماتمنيته وصار ..!

لكن عقب ايش عقب ما كسرني زياد وقهرني..؟!

وطلعت من بيته مذبوحه والحين كملها يحط بينا مراسيل من غير ملامة امي لي .؟!

الحين وش بسوي كان كلآ درى ان زياد طاردني واهاني ومرمط بكرامتي الارض ..,

مافي الا الطلاق قرار الطلاق هو القرارالصحيح وهو الي بيرجع لي كرامتي ..!؟

والطفل الي بجيبه بربيه مثل ما ربتني امي..,

ان طلع علي والا على زياد ماراح اندم ..!

زياد ما اظلمه مهما كان الي سواه فيني الا ان حنانه على امه غير..!

وانا امي وضحى عندي با الدنيا كلها..,

شهادتي معي اتوظف واعتمد على نفسي...,

ماكذبت امي يوم كنت ابكي من صعوبة المواد واجي عندها..!

اقول يمه ما افهم شي تقول عيدي وزيدي لين تفهمين ..!

الشهاده هذي سلاحتس الي يحميتس من جور الايام..!؟

محد يدري ياعوق وش يصير بعدين..!

لو بتكشر الدنيا عن انيابها شهادتس هي الي تحميتس بأذن الله ..

الحاجه ومدت اليد لناس شينه والي يعطيتس اليوم باتسر يمن عطاه والايطردتس..!


وهذي الدنيا بدت توريني وجها الشين..!

الظاهرما طلعنا من ها العرس الا بها الحمل..!

زياداكيد ماهو حريص عليه ماراح ينشب لي ..!

والا كان شك والا لاحظ ان فيني شي كل من شافني قال ياعوق وش الي مغيرتس الاهو..!؟

وكلها كوم وطلعته للمسجد وماكأنه يشوفني كوم ثاني كل ماتذكرتها احس قلبي ينحرق كيف هنت عليه ..!

لو انا مدعوسه والا مخطوفه من قدام الباب محد درى عني..؟


يومين مرو على اخر مواجهه بيني وبين امي وخالتي نوره..!

الصداع فك عني شوي لكن على طول احس اني متضايقه وادوخ..؟!

ولا عاد لي نفس للاكل ولا حتى الكلام..؟!

امي مرات اجلس عندها بغرفتها ما تعطيني وجه..؟!

اوالقاها بمظلتها جالسه تسمع الرادو الا تتقهوى مثل ما اجلس اقوم..!

ادري زعلانه علي وهذا طبعها اذا زعلت صدت ما تعطي لاشين ولا زين ..!

بعد اسبوع من مواجهتي معاها هي وام ابراهيم

دخلت عليها الصباح

عوق \ يمه..!

ام عوق بعدم اهتمام \خير..!

عوق بوجع\بطلع مع السواق بشوف المدرسه الاهليه الي جنبنا..!

كلمت وحده من البنات الي كانوا يدرسون معي قالت محتاجين عربي بقدم اوراقي..,

ام عوق بضيق \انتي للحين راكبه راستس..؟

عوق با الم\تكفين يمه خليني على راحتي ..,

ام عوق تتنهد بقلة حيله\ روحي عسى الله يهديتس ..!

وصلت للمدرسه وقدمت اوراقي هم عارفيني ما يحتاج اشرح عندهم..!

باقي بس اوراقي الثبوتيه قلت لهم بكملها لكم ما توقعتكم تقبولني...!

وانا اكذب كل اوراقي في بيت زياد..!

صورة لوثيقتي بس هي الي كانت معي حتى كنت ناسيتها في بيت امي..!

قالوا لي من بكرا تباشرين البنات متأخرات..!

وبسرعه كتبت العقد وطلعت..!

فكرت ليش ما اطلع مستوصف خاص احلل اتأكدمن الحمل واقطع الشك با اليقين

وافتح ملف عندهم اذا ثبت ان فيه حمل

ولا من شاف ولا من درى..!

طلعت للمستوصف دخلت عند الدكتوره وقلت لها الاعراض الي احس فيها..!

الدكتوره \انتي متزوجه..!

عوق\ ايوا من شهرين ونص..

الدكتوره\لازم تحليل حمل ..

عملت التحليل ورجعت لدكتوره با النتيجه

الدكتور\مبروك يا مدام النتيجه في حمل ...,

بكيت ولا ادري ليش بكيت ..!؟

الدكتوره تبتسم \ايه يا مدام دموع فرح دي والا ايه..؟!

عوق بوجع\ لاوالله دموع خوف...!

الدكتوره\ ما تخافيش علشان اول حمل بتحسي كدا..

خلاص لو عاوزه تابعي معايا لازم تعملي التحاليل دي..

ونعملك ملف رعايه شامل من دلؤتي لحد الولاده ان شاء الله ..

والنتيجه بعد المغرب بأذن الله ..,

عوق \خلاص بتابع معاك ..

طلعت وسويت كل الي طلبته الدكتوره دفعت الحساب من بطاقة امي..!

عسى بس امي ما تذكر البطاقه وثم عاد اقعد بها..,

رجعت للبيت وانا احس خلاص ما عاد فيني حيل ابي بس اصلي الظهر وانام..؟!

قبل انزل شفت سيارة زياد عند بابنا حسيت بدقات قلبي زادت وعرقت..,

ما اقولكم دايم فرحتي ناقصه اليوم تأكدت من حملي والمدرسه قبلوني والحين زياد داخل بينكد علي..,

نزلت وانارجليني ما تشليني ما ادري كيف دخلت البيت ..؟!

الا على صوت امي تضحك وزياد عندها جالسين با الصاله ..,

ياربي ما ابي اشوف وجهه وهو مرتز با الصاله..!

وابي ادخل غرفتي يعني لازم امر الصاله ويشوفني زياد..,

اخذت نفس ودخلت من شافني زياد وقف يتبسوم ومد يده بيسلم..

ما عطيته وجه ولا مديت يدي ..

عوق بحده \ عساك جاي ومعك ورقة الطلاق علشان ننهي ها المهزله..!

ام عوق با انتقاد\الناس اذا دخلت تسلم ماتدخل متسلحه لسنها

تعوذي الشيطان وتفاهمي مع رجلتس وانا بقوم اجهز لصلاه..!

عوق بسخريه\رجلي جاي يتفاهم والا انتي وام ابراهيم سحبتوه يجي يرحم عوق المسكينه..!

مثل ما تزوجها يبي يفكتس منها جاي يتفاهم بعد علشان يريحتس من همي..!؟

يمه الي يبي يتفاهم من طلعت لحقني..

ماهو كنه داخل غرفة عمليات ..,

والحين اصلن عنده فترة غدا..,

بدال ما يقضيها با المستشفى جا على قولتس يتفاهم ماكلف على نفسه حتى يغير لبسه ..,

زياد واقف وساكت وانا وامي بس الي نتكلم..,

ام عوق بتهديدوتحذير\ الكلام معتس ضايع وذنبتس برقبتس..!

زياد جاي يصلح الي بينكم لا تهدمين بيتس بيدتس يا مره..!

عوق بوجع\كلمه وقلتها له قبل اطلع من بيته ان طلعت مارجعت ..!

امي دخلت غرفتها وخلتني انا وزياد واقفين با الصاله..

زياد يقرب من عوق وبترجي و يمسك كتفها \ طيب عطيني فرصه نتفاهم...,

انتي من دخلتي اكلتيني ما ني عارف اسولف معك اسمعي الي عندي واحكمي..؟!

عوق بعناد وسخريه وتنفض يده\ما ابي اسمع شي يكفي الي سمعته منك يوم كنت في بيتك..!

وش تبي بمنحوسه نحسها بيذبحكم كلكم..!

احمد ربك وقفت على امك والا كان نحستكم ولابقى منكم احد..!

اردفت عوق بغصه\انت صادق انا منحوسه والا ماكنت لقيطه..!

لوكان لي اهل وسند ماخلوا احديهيني ولا يشوفني شي..!؟

هذا انت دخلت وضحكت على امي علشانها عجوز وضعيفه..,

اردفت عوق بتهكم\ضحككم اسمعه من فتحت الباب ما اسرع ماخليتها توقف معك..,

زيادبترجي \ طيب هدي اعصابك خلينا نتفاهم ادري مالي عذر ..؟!

عوق بمقاطعه\ وش نتفاهم عليه انا من طلعت من بيتك طلعتك من حياتي

يا اخي ما تفهم وش معنى ما ابيك ما ابيييييييييييك..؟

زياد بنفاذ صبروقلة حيله\ والمطلوب..؟!

عوق بسخريه\المطلوب الطلاق زواجي منك كان لعبه بينا..!

لعبنا واستانسنا وانتهت كلن يروح بحال سبيله..؟!

انت ما قصرت عمي مسلط وخالتي عرضوا عليك الضعيفه عوق..!

وانت ماشاءالله نفذت لهم الي طلبوه منك..!

عوق با انكسار\لكن شي ماهو بيدك المحبه من الله يمكن انا ماكنت الانسانه الي انت تمنيتهاوحلمت فيها..!

وفوق هذا نحس وش يجبرك علي..؟!

بتقعد كل مازعلت تدعي على الي كان سبب ها الزواج

الافضل انا نتفارق علشان نرحم ها المساكين من دعاويك...؟!

اردفت عوق بوجع\سبحان الله يا زيادعلمتني كيف تزوجتني علشان ما يجي يوم واسمع من احد كلمه تجرحني

ان زواجي منك كان عن طريق جيراناالي عرضوني عليك

وانت اول من عايرني وحسستني كنك متفضل علي بها الزواج واني ما استاهلك

زياد بوجع \ لا ياعوق لا تقولين كذا والله انك اكبر واحلى من كل احلامي..,

انا كانت نفسيتي بعد امي مدمره امي كانت كل حياتي..,

وفجاءه فقدتها حسيت ان الدنيا كلهابعيني اضيق من خرم الابره

ولا عاد لي رغبه با الحياه بـ

عوق تقاطعه با استهزاء\ والله حياتك ماهي حياتك شي ما يخصني

يوم كنت احاول اصير جزء من حياتك رفضتني الحين انا ابي ورقتي وبس ..!

وخلني حلم حلو مر بمنامك اذا كنت فعلن صادق اني كنت اكبر من احلامك مع اني اشك بها الكلمه

الي كم مره ترددها على مسامعي ولاعاد لها قيمه عندي..,

زياد بوجع انكسار\تكفين يا عوق لاتقولين كذا..؟

عوق تتنهد بحسره وتذمر\لا تطولها وهي قصيره وتعاند معك مهله الي آخر الاسبوع..!

طلق وخذ مهرك الي عطيتنياه كامل من غير الي تركته في بيتك حلال عليك وش تبي اكثر من كذا..

اردفت عوق بتهديد\اذا ماارسلت ورقتي راح ارفع ضدك قضية خلع..؟

وبعدين المؤذن اقام الصلاة الحق عليها..

ترى كلك مساوئ الحسنه الوحيده فيك انك ما تترك صلاتك..

لا تقول بعدالمنحوسه اخرتني عن صلاتي وسكر الباب بطريقك..,

اتوقع وراك دوام ماراح ترجع بعد الصلاة..!

ماهو كل زيارة بعد صلاة الظهر مرغوبه ..؟

بعضها عسل وبعضها سم

وانتي من النوع الثاني

طلع زياد و دخلت لغرفتي وانا ماني مصدقه اني قلت لزياد كل الكلام الي قلته..,

بردت حرتي فيه رديت له كل تهزيئه لي يوم انا في بيته ..!

خلاص من اليوم مافيه دموع انتبه لنفسي ومستقبلي ولأمي وحملي ..,

هذا زيادجاي يتفاهم معي في فترة البريك حتى ماكلف على نفسه يتعنى على شاني..,

اكيد امي هي الي كلمته..!

خلاص يا عوق خوذيها قاعده محديحب عوق الا عوق..,

الحين ما عاد في حياتي الا امي وطفلي ..,

امي الحين زعلانه علي بحاول اترضاها واعيش حياتي مثل قبل

ما قصرت معي من يوم طلعت لدنيا وهي تراعيني الحين با ارد لها الدين

صليت الظهر وطلعت بشوف امي ..,

لقيتها للحين تصلي امي تطول بصلاتها الظهر تصلي 12 ركعه..,

طلعت للمطبخ احس اني بموت جوع ودايخه ولا لي نفس بشي..!

قلت لشغاله صلحي لي سلطه او اي شي بدون طبخ ابي اسد جوعي اكره ريحة الكشنه...,

رجعت لأامي

ام عوق\وش سويتي..؟

عوق\المدرسه قبلوني خلاص من بكرا بباشر ..!

ام عوق بتذمر\ ما سئلت عن المدرسه وش سويتي مع رجلتس..,

عوق \ رجلي انتهى موضوعي معه من طلعت من بيته..!

يمه تكفين خلاص ماابي ادوخ راسي فوق وجعه..!

ام عوق \والله انتي الي مدوخه نفستس..؟!

يا بنتي وين البيت الي يخلا من المشاكل ...!

هذا حال الدنيا لازم يمر الانسان يوم زين ويوم شين..,

الدنيا ماتمشي على طريق واحد..!

ورجلتس والله ما تلقين مثله رجال طيب وحبيب وعاقل..!

الحريم صابرات على رياجيل واحدهم مايسوى التاليه من الغنم

وتشوفينها قال ابو فلان وسوى ابوفلان

الرجال اذا ماهو بخيل ولا يشرب ما حرم الله ..,

تقدرين تعيشين معه وتمشين حياتس

وهذلين كلهن ماهن به

رجال يخاف الله والي يخاف الله ما ينخاف منه ماشفتي وجهه وشلون صاير

موتت امه ولحقاها مفارقتس له ..,

ماكسرت قلبتس فزته بتس يوم دخلتي والله ياشهق شهقه يوم سمع صوت فتحتس للباب ,

انه اضحكني المسلم تقل رادتن عليه روحه..

عوق تتنهد بوجع وتمسح دموعها\انا عارفه با لكلام الي تقولينه كله..!

وفوق حبه لي اخلاقه عاليه وكريم معي بدون حدود لكن انا طابت نفسي منه..!

مالي با الطيب نصيب وش تقولين بي مقروده..!

هو بيلقى الي احسن مني وانا خلاص اكتفيت بنصيبي منه..!

ماعاد افكر بشي اسمه زواج ..!

يمه تكفين لا تضغطين علي انا تفاهمت معه وهو شكله وافق على الي طلبته منه..؟!

وخلال ها الاسبوع بينتهي كل شي ونرجع انا وانتي مثل قبل ..!

ام عوق بتوجس\وش طلبتي منه..!

عوق\طلبت منه يطلق..!

ام عوق با استنكار\ لاحول ولاقوة الا با الله وش طلاقه انتي مافكرتي بحملتس..!

عوق با ارتباك\وش حمله انتي للحين مصره اني حامل..!

تراتس وهمانه ولا يكون بعد قلتي لزياد ظنونتس..!

ام عوق تتنهد بقلة حيله\لا اله الا الله ما قلت لزياد شي الله يعين ها الزياد عليتس

عوق بترجي \يمه انا جايه استسمح منتس والله حتى بنومي ماتهنيت وانا اشوفتس صاده عني..!

تكفين يمه ارضي علي تكفين ولا ترخصيني وتكسريني..,

لا تربطين ارضاتس برجعتي له ترى والله لو ارجع اني لأاموت غبن عنده..!

ام عوق با الم\الله يرضى عليتس ياعوق لكن بطلب طلب منتس

وعقبه سوي الي تبينه انتي ما تقولين خلاص ماعاد تبين العرس عقب زياد..!

عوق بذعروتأكيد\ يويلي يمه التوبه والله ماعاد البس ثوب العرس غير ما لبسته..!

ام عوق \اجل خلاص اقطعي سالفت الطلاق وهو يروح بحال سبيله وانتي تقعدين عندي..!

ان تطلقتي ودرت الناس ما سلمتي من القيل والقال ..!

والله لوتوقف سياره عندبابناباالغلط ان تسمعين الي يغبنتس ويقهرتس..!

لكن يوم تدري العرب انتس متزوجه محد بيتعرض لتس بكلام ..!

واذا انشدوني ورى بنتس عندتس قلت رجلهاما قصر..!

انا طلبته وخلاها عندي تونسني وش رايتس بكلامي..!

عوق بتردد\ خلاص لكن انا..

ام عوق بترقب وحده \وش لكن في شي ما ادري عنه بعد..!؟

عوق\لا يمه مافي شي بس انا عطيت زياد مهله لآخر الاسبوع اذا ما طلق با اشتكي عليه واخلعه..!

اواكيد هو مايبي فضايح بيطلق من نفسه وقلت له بعوضه خسايره ..؟!

ام عوق تهز راسهاوتتنهدبحسره \لا اله الا الله يا بنتي فكرتي وش تعوضين زياد عن خسايره عليتس علشان يتركتس

ولا فكرتي بخسارة نفستس وحياتس

يا بنتي اللي يبيع الجمل ما هو متحسفن على الرسن ..,

اردفت وضحى بقلة حيله\خلاص بنتركها للقسمه والنصيب علشان انتي ترضين وانا ارضى..!

ان طلق بها اسبوع بكيفه هذا الي ربي كتبه عليتس وان ما طلق بنخليه على وجهه..!

عوق بترجي واستعطاف\يمه لا تدقين عليه وتخبرينه با اتفاقنا..,

ام عوق تضحك \ ما نيب داقه عليه لكن ان كلمني قلت له يارجال رح انت بنصيبك ولا تطلق عوق

هي راضيه انها تصير معلقه وانت دور لك حرمه واعرس..!

واذا درت الناس ان عوق زعلانه قل انا راضيت حرمتي لكن خليتها عند امها..

والعرب خابره اني وحيده محد بقايل شي ..,

الا بيقولون كفو من عوق وزيادماتركوا عجوزهم ..!

حتى ام ابراهيم بقولها عوق تصالحت مع رجالها لكن بتقعد عندي خلاص اتفقنا..!

عوق تبتسم بحب\قولي الي تبين اهم شي انتس رضيتي علي ..,

ام عوق تبتسم\اي والله رضيت عليتس تدرين ان مالي با الدنيا غيرتس..!

يالله روحي تغدي وارقدي قبل العصر والله ان التعب باين بوجهتس انا ما ابي غدا كثرت تمروقهوه..!

سلمت على راس امي وايدينها وطلعت لغرفتي..!

اهم شي امي رضت علي ما عاد يهمني شي حتى التعب الي كنت احس فيه احس خلاص راح عني..!؟

هل هو فعلن من تأثير رضى امي والا شوفتي لزياد يعتذر لي قوتني..,

بناااام على شان اصحى العصر واكلم خوله زميلتي اشوف كيف الوضع با المدرسه..!

والبنات وين واصلين با المناهج واطلع المغرب لدكتوره يا كثر اشغالي..!

حسبي الله عليه توكلت وهو رب العرش العظيم..

صحيت بعد العصر صليت وكلمت خوله..؟!

خوله\ترى متأخرين كثير وبتاخذين ثالث ادبي خمس فصول نحو وبلاغه..!

عوق\ لا خوله صعبه علي ثالث وادبي بعد وانا عندي مسؤليات..!

خوله\داريه يا عوق انك ما انتي فاضيه مثل قبل زوج وبيت ومسؤليه..!

والمديره ما صدقت انك رجعتي..!

بس وش نسوي انتي ما شاء الله مدرسه متمكنه..!

وعندك قدره على توصيل المعلومه لطالبه بسهوله..؟!

اول العام يوم كنتي معانا صراحه البنات نسوا هم البلاغه والنحو ..!

ولا واجهتنا شكاوي من صعوبة المواد مثل كل سنه تبارك الله حتى رسوب ماكان فيه..!

عوق بضحك\وش رسوبه خوله تدرين احنا بمدرسه اهليه نقعد وراهم لين ينجحون..؟!

خوله\اهليه صدق لكن في بنات ما ينرقع لهم مهما تحاولين تدفين با الدرجات توقفين خلاص ما ينفع معاهم..!

عوق\ اول العام مسكت ثالث علمي فصلين واولى ثانوي فصلين لكن ثالث ادبي ماعندي خبره..!

خوله\عوق لا ثالث ادبي هم الي محتاجينك ومتأخرين..؟!

عوق\مو مشكله لكن حاولوا تخففون علي شوي خوله..!

وانا شاده الظهر فيك صديقتي ومساعدة المديره اكيد بتسند على ظهر قوي..!

خوله\خلاص نشوف بكرا كيف الوضع انتي الاسبوع هذا خوذي المناهج ..!

وادخلي للبنات وتتدبر ان شاء الله..!


هذا نص شغل اليوم طاح بقى الحين كيف اطلع للمستوصف ..!

في الليل ما اقدر اطلع مع السواق الا والشغاله معنا ..!

اخاف امي تسألها والخدامه ثرثاره ما تصدق بس احد يسولف معها..؟!

طلعت لأامي

عوق بتردد\ يمه بطلع لسوق با خذ لبس باكر بباشر با المدرسه

تحتاجين سورينا والا اخذها..!

ام عوق\معتس وقت تو العصر والا بتأخرين

عوق\ اخاف يجي المغرب وانا ما خلصت شغلي..!

ام عوق\اجل خلاص خوذيها ولا تأخرين ..!

عوق تبتسم \ابشري بسرعه باخذ لي لبس ماني مكثره الشتاء جاي..!

ام عوق بضحك\وانتي صادزه الشتاء جاي والبطن بيكبر ولبس اليوم ما ينفع باتسر..!

يا الله برزقآ تمده ما يقدر الحاسد يرده..!

ما قدرت ارد والا اعلق الا اني ضحكت بسري على تعليق امي ومشيت

ودي اعلمتس يا ميمتي بحملي لكن اكيد بتخبرين زياد وانا ما ابيه يدري..!

علشان ما ينشب لي هو وجهه يقطع الرجا برجعتي ويطلق من نفسه ..,

طلعت لسوق وربي يسر بسرعه لقيت لبس وشنط وجزم..!

دولابي فاضي الي في بيتي والي تصدقت فيه مافي شي غير قمصان البيت ..!

اخذت الي يكفيني ها الفتره..!

ما ابي اسحب واجد من رصيد امي احس اني اسرق منها..!

على انها كم مره تقول كل الي بحسابي لتس مسامحه فيه دنيا وآخره..!

واذا نزل راتبي برجع لأامي كل الي اخذته منها

اخاف ما يجوز لي اني اخذ منها من دون علمها حتى لو انها اباحتني وحللتني قبل زواجي

بعدها طلعت لدكتوره اشوف النتايج ..!

دخلت عندها ماكان في زحمه والممرضه احضرت ملفي..؟

الدكتوره\تحاليلك كلها كويسه مدام عوق والدم نسبته ممتازه

وحا اكتب لك على حديد وحمض الفوليك تحسب لفقر الدم ..!

عوق\ دكتوره انا في اي شهر..!

الدكتوره\انتي في الاسبوع الثامن..!

عاوزه اعملك سونار علشان تتطمني على الجنين

عوق بملل\ لا انا مستعجله ..!

الدكتوره\ان شاء الله في المره الجايه حنعملها لك ..!

لكن الي الآن ماشاء الله وضعك مطمن تعالي بعد 4اسابيع من النهار ده ..,

تبئي خلصتي الشهر التالت وتدخلي في الرابع واهم حاجه الاكل المفيد والراحه..

طلعت بسرعه وصرفت الادويه من الصيدليه ..!

واكلت قلبي الخدامه با الاسئله ليش عوق ينزل هنا..!

على اني خليتها مع زوجها با السياره علشان لا تسمع ولا تشوف شي الا اني ما سلمت من فضولها...!؟

رجعت للبيت امي كانت جالسه تنتظرني ..!

ام عوق بقلق \وراتس تأخرتي روعتيني ..!

عوق\لا يمه الشوارع زحمه ولا خلصت بسرعه

دخلت الخادمه اغراضي لغرفتي ..

ام عوق\ تعالي اجلسي عندي مبطين ما تقهوينا مع بعض..!

عوق\ ابشري لكن اخرت صلاة المغرب بصلي وارجع لك نتقهوى

صليت وجلست عند امي نتقهوى ونسولف مثل قبل ..؟!

عوق بتردد\يمه بقولتس شي يقرقع بقلبي..!

ام عوق\ قولي كل شي بسمعه منتس الا انتس ترجعين لزياد

عوق\ لا مانيب راجعه وبعدين غريبه ما تبيني ارجع

ام عوق\وانا صادقه وش يرجعتس له تقعدين عندي تونسيني وهو ماهو ضايع عقبتس ..!

الحريم واجد وان كانه جا اليوم يتعذر ماهو بجاي باتسر ..!

بيدور له حرمه وهو تكتور كلن بيقوله ياهلا ومرحبا

لا بعد بيكيفون العرب حرمته ماهي عنده هاجه وتاركه بيتها مقابله امها..!

عوق بتذمر\ ايه زين الله يوفقه لكن سالفتي غير..,

ام عوق بتوجس \ وش عندتس ..!؟

عوق با ارتباك\يمه انا اخذت بطاقة الصراف حقتس وسحبت فلوس مامعي شي..!

ام عوق ضحكت\اثا ريتس سروق..!

عوق با اعتذار\سامحيني والله انحديت طلعت من بيت زياد يد ورى ويد قدام ماخذت معي ولا شي ...!

ام عوق\ ماعليه وانا امتس الخير واجد بعدين انا داريه انتس ساحبه فلوس..ّ.ّ

والا وشلون طلعتي لسوق وبطاقتي ما رجعتيها والا تحسبين امتس خرفت ..!

عوق بخوف ومحبه\لا يمه بسم الله عليتس والله ما قصدي لكن تخبريني قلبي يوجعني اذا سويت شي انتي ماتدرين عنه..؟

ام عوق\مسموحه يا عويق اليوم ودوم والي تبينه خوذيه والي في خاطرتس سويه..!

عوق با امتنان\يا ربي يخليتس لي يمه وبأذن الله من يوم ينزل راتبي ارجع لتس كل الي اخذته..؟

ام عوق\وش ترجعين احفظي دراهمتس وانا امتس محد نا فعتس وانتي وراتس مسؤليه ومصاريف الله يعينتس عليها..!

سكت وغيرت الموضوع خفت امي تجيب طاري حملي ..!

من يوم قالت مسؤليه عرفت انها تقصد حملي ..!

عوق\يمه وش تبين عشا بزين عشاتس واصلي وانام وراي بكرا دوام..!

ام عوق\الي تشتهينه صلحيه ما اخالف..!

صلحت عشا لأمي وصليت العشا جهزت لبس بكرا ونمت مهدود حيلي من مشوار السوق والمدرسه...,

صحيت الفجر وانا احس اني تعبانه واستفرغت حتى حسيت ان روحي طلعت ..!

ياربي امس ماكان فيني شي وش جاني اعوذ بالله ..,

ماصدقت هدت معدتي صليت وتجهزت للمدرسه..!

دخلت غرفة امي لقيتها جالسه على كرسيها شكلها توها مخلصه صلاة

سلمت على راسها..؟!

ام عوق بخوف\ بسم الله وش بلا وجهتس وعيونتس محمره..؟

عوق بتعب\ لا مافيني شي بس ما شبعت نوم..!

ام عوق\افطري قبل تطلعين وجهتس اصفر..

.
.
.

(كلمه اخيره)

مَتَى رَأيتَ صَآحبَكَ قَد غَضِب, وأخَذَ يتكلَّمُ بِمَآ لآ يصلُح, فلآ ينبغِي أن تعقِدَ عَلى مَآ يقُولُهُ خُنصُرَاً,

ولآ أن تُؤآخِذَه بِه,فِإنَّ حَآلَهُ حَآلَ السكرَآن لآ يدرِي مَآ يجرِي, بل انظُر لَه بعَين الرَّحمَة, وتلمَّح تَصرِيفَ القَدرِ لَه,

وتفرَّج بِلعِب الطبع بِه, واعلَم أنَّهُ إِذَآ انتبَه نَدم عَلى مَآ جَرَى, وعرفَ لَكَ فضلَ الصبر.

ابنُ المقفَّع
.
.
.

الي الملتقى قريبآبأذن الله

وسالفه جديده


طيف الأحباب

ام الوليد


تذكروني واحبابي بدعوه طيبه

بسم الله الرحمن الرحيم



اللهم يا الله عليك ببشار وأعوانه , اللهم يارب انتقم لنا منهم عن كل قطرة دمٍ أريقت ,

وروحٍ أزهقت , وونفسٍ وأدت , وزوجاتٍ ترملت , وأطفالٍ تيتمت , وأعراضٍ انتهكت ,

وحرماتٌ استبيحت , ومساجد دنست , وبيوتاً هدمت , ونفوساً آمنة أرعبت ,

وشوارع وطرقاتٍ وأزقة هجرت ودمعاتٍ ذرفت ,

الله انهم لا يعجزونك اللهم ارنا فيهم عجائب قدرتك وانتصر لأهلنا في سوريا وكن معهم واحقن دمائهم ,

اللهم لا تحاسبنا عنهم فإنا لا نملك إلا الدعاء لهم وليس الدعاءُ بقليل , يارب استجب ياااارب
.
.
.

هلا وغلا بكل الغوالي الي يعطرون متصفحي المتواضع سواء با لردود او الاعجاب او التقييم او الشكر..,

او با الرسائل الي تجيني على الخاص ممتنه للجميع ..,

البنات الله يسعدهم الي يرسلون تقييمات اقرا التقييم ولا ادري مين هم اذا ممكن الي تكتب تقييم تذكر اسمها

في وحده من البنات ارسلت تقييم ذكرت فيه كيف بداية الصلح بين زياد وعوق تمنيت اعرف مين هي..,

والبنات الي ما يشوفون ردي على تعليقاتهم يعطوني خبر لأنه ابدآ ماهو تجاهل مني لا والله لكن احيان الحرص

يعطي نتايج عكسيه..!

البارت اهداء لكل من سطر في متصفح نوح الحمام ولو بكلمه وحده من دون استثناء..,

سواء مدح اونقد اوحتى يسأل عن مواعيد البارتات دليل اهتمامه با الروايه..,

اهداءخاااااص لأهل الكويت بمناسبة افراحهم بيوم الاستقلال واليوم الوطني دامت افراحكم يا اهل الكويت

وللغوالي الي يتابعون نوح الحمام من الكويت..

اليوم بنشوف عوق المزايين ويوم عملي جديد ومناوشات خفيفه مع الوضيح..,


يا الله تعالوا معاي...!!

وسالفه جديدة؛


.
.
.
البارت الخامس والعشرين

.
.
.

ام عوق بخوف\ بسم الله وش بلا وجهتس وعيونتس محمره..؟

عوق بتعب\ لا مافيني شي بس ما شبعت نوم..!

ام عوق\افطري قبل تطلعين وجهتس اصفر..

عوق بوهن \لا بفطر مع البنات با المدرسه اليوم بروح بدري علشان اشوف الجدول وتوزيع الحصص..!

ان شاء الله نتغدى مع بعض يمه ادعي لي..!

ام عوق بحنان\ الله يسخر لتس من عنده ويرشدتس لطريق الصواب..,

عوق\آمين يمه..,

طلعت للمدرسه ودخلت على غرفة خوله علشان اخذ جدولي..!

كان نصابي يقطع الظهر شي مو معقول..!

عوق با اعتراض\الحين 4 فصول نحو و3ايام با الاسبوع بتكون 12حصه..,

والبلاغه مثلها يعني 12حصه 24 با الاسبوع لا يا خوله ..!؟

لو اترك المدرسه ما رضيت بها الظلم انا اتعب با الشرح وتوصيل المعلومه..!

ما ابي اظلم البنات وشرح مش حالك يوميا خمس حصص متواصله الا يوم بيطلع 4حصص ..!

خوله بقلة حيله\مافي احد يا عوق ...,

عندنا نقص مو طبيعي والطالبات عددهم كبير..!؟

عوق با استنكار\ حرام عليكم معقوله الي تقولينه..!

مافي اكثر من خريجات العربي اكيد قدموا عندكم..!؟

خوله\ يووووه بس لو تشوفين الملفات الي تجينا..!؟

لكن المالك الله يهديه حاط شروط تعجيزيه للقبول ..؟!

دخلت علينا استاذه شيخه مديرة المدرسه سلمت عليها..!

عوق\احضرينا استاذه شيخه خوله عطتني جدول يقطع القلب ..!

شافته ضحكت ..

شيخه تبتسم\ والله ادري لكن انتي عارفه صعوبة المادتين على بنات الادبي..!

والبنات الي محولين من حكومي لناخصوص الي ثانويه عامه يبون مجموع..!

عددهم كبير ما شاء الله وانتي تبارك الله شرحك وتوصيلك المعلومه للبنات قمه بصراحه..

عوق بقلة حيله \ بجرب نفسي ها الاسبوع لكن اذا ما قدرت اعذروني ..!؟

لو عطيتوني العلمي نحو وادب عادي ..!

بنات العلمي متجاوبات اكثر معاي لما درستهم قبل والمنهج اقل..!

شيخه \ مالك الا الي يرضيك لكن نبيك عوق الي خابرينها ..؟!

اردفت شيخة\خليها على الله يا عوق تدرين ان النحو لو في امكانيه كان خليناه 4حصص

لكن مانقدر نضغط عليكي اكثر من كذا..,

عوق بقهر\لاحول ولاقوة الابالله يعني 4فصول بيطلع 16 حصه هذا يبي معلمة وحده تمسك منهج واحدفقط

اذا انتو تبون شرح ومعلومات تعطي نتايج مرضيه..!!

اخذت جدولي ولا حول ولاقوة الا بالله خمس حصص با اليوم آلات ما احنا بشر متى احد يحس فينا..!

ولا حوافز ولا تشجيع ولا رواتب زي العالم تبين والا بكيفتس..!

روحي وغيرك يجي ولو اتأخر بالحضور كم يوم مهماكان ظرفي حتى لو حصصي كانت الاخيره

ما يصدقون ..؟!

خصم يطير نص الراتب واصير ادوام بدون فايده..,

من غير اذا جات لك وظيفه رسميه والا بديله ينشبون بحلقك لحد ما تطير الو ظيفة

حسبي الله وكفى..,

طلعت وبديت اول يوم دراسي مع الطالبات لقيتهم متأخرين لازم الحق معهم الا متحان الشهري..!

ونحضر لأمتحان نصف العام البنات اكثرهم درستهم في اول ثانوي وفي منهم بنات الجيران..,

كانوا متعونات معاي لأقصى حد..؟!

عدت ثلاث اسابيع..!

ارجع من المدرسه مهدود حيلي بس ابي انام ..!

خلال هاالثلاث الاسابيع نسيت كل مشاكلي مع زياد..!

بالي مشغول با المدرسه والا استفراغ الي كل صباح احس عيوني بتطلع منه..!

ليتني ما حللت كنت بخير قبل التحليل و قعدت على شكي اني حامل يمكن ما كان حالي كذا..,

الظاهر من قال ان الوحام حاله نفسيه ما كذب ..!

وفوق هذا كله اناطبعي اذاكر واحفظ الماده الي بدرسها اكثر من طالبه ليلة امتحان..!؟

حتى امي ما صرت اشوفها كثير الا الصباح قبل امشي وفترة الغدا والعشا دقايق..,

وانا وقتي امانوم والا مشغوله احضر واصحح..!

زيادما سمعت عنه خبر من يوم طلع من بيتنا ..!؟

لاهو الي قال بطلق ولا هو الي عاند وقال ترجعين..؟!

على ان الشغاله خبرتني انه جا بعد جيته الاولى وكان معاه ابو ابراهيم لبيتنا..

وامي صارخت عليه وكان صوتهم عالي ..!

ما اهتميت من كثر ما كنت مشغوله وامي ما لاحظت عليها شي ولاخبرتني بشي

احسن خله ينسى وجودي ما نيب فاضيه لسوالف والمشاكل ..!

داومت السبت كا العاده خوله جاتني لغرفة المعلمات..؟!

خوله\ عوق بكرا بتحضر لك موجهه..؟!

عوق\ على خير والله كنت ناويه اصلح درس نموذجي..!

وارسل دعوه تحضر المديره وموجهة عربي لكن يا الله جات منكم..

خوله با امتنان\ الله يعينك ويكثر المخلصات الي مثلك..؟

وقبل تطلع طستني بطلب غثني

خوله با استفهام\عوق وين بقيت اوراقك ورقم حسابك..,

بنكمل لك بياناتك ونرسلها والا ماتبين راتبك ..!

عوق بتوتر\ابشري لكن ما فضيت ها اليومين انا عند امي واوراقي في بيتي وزوجي مسافر...,

عوق بنفسها\يا الله بكرا عندي الف شغله وشغله والدرس الي بتحضرلي موجهه..!

وعندي مناوبةرحماك ياالله غير مصيبة ها الاوراق ..!

رجعت للبيت لقيت امي حياتي تنتظرني على الغداء..؟

سلمت على راسها وغيرت وطلعت لها.,

عوق بتردد\يمه امممم ..!!

ام عوق بتوجس\عوق وش فيتس ..!؟

عوق\ مافي شي بس طالبين المدرسه اوراق لي وكلها في بيت زياد...,

الاصول كلهاهناك ماعندي الا صورة الوثيقه بس..!

ام عوق با استفسار\ وش الي تبينه منها..؟

عوق\يمه ابي كل اوراقي وبطاقة الصراف علشان راتبي..؟!

ام عوق بحيره\والله انها مشكله الحين انا صرت مثلتس مادانيه خيب ظني فيه ..؟!

اردفت ام عوق بتردد\طيب انتي دقي عليه وقولي ابي اوراقي يبي يجيبها ماهوبقايل شي ..!

عوق بطفش \فكيني منه حتى صوته يدبل تسبدي..!

ام عوق بقلة حيله\يدبرها الله وانا امتس الحين بطاقتي معتس..؟!

خوذي الي انتي تبينه ورواتبتس ماهي ضايعه يجمعونها لتس ماخذتها, ماخذتها..؟!

اللقمةالي توعد بها احسن من اللقمةالي تاكلها..!؟


تغديت غصب مالي نفس با الاكل ولا ابي امي يضيق صدرها اني ما اكل وتشيل همي...,

قمت ونمت ابي ارتاح واصحى علشان اشوف بكرا وش بسوي ..؟!

صحيت مع المغرب راحت علي صلاة العصر..,

عن أبي هريرة رضي اله عنه قال: قال رسول الله صلى الله عليه وسلم :"

يتعاقبون فيكم ملائكة بالليل، وملائكة بالنهار،

ويجتمعون في صلاة الصبح وصلاة العصر، ثم يعرج الذين باتوا فيكم،

فيسألهم الله - وهو أعلم بهم - كيف تركتم عبادي؟ فيقولون:

تركناهم وهم يصلون، وأتيناهم وهم يصلون " متفق عليه.

وعن بريدة رضي الله عنه قال: قال رسول الله صلى الله عليه وسلم :

" من ترك صلاة العصر فقد حبط عمله " رواه البخاري

ياربي عفوك استغفر الله الذي لا اله الا هو واتوب اليه..

اللهم لاتجعلني ممن حبط عملهم..,

اسابق اذان المغرب وصليت العصر وهو يأذن المغرب..!

وبعدها كملت صلاة المغرب ...!

وطلعت لأامي لقيتها جالسه على كرسيها تصلي خلصت صلاتها.,

عوق وهي ضايقه\راحت علي صلاة العصر ليش ما صحيتوني..!

ام عوق بضيق\والله ما دريت قلت يمكن صليتي ونمتي مثل عادتس..,

عوق\ بطلع للمكتبه ناقصني اوراق بكرا بتحضرلي موجهه..!

ام عوق\ روحي و بسرعه ارجعي انتي خابره يا بنتي هروج العرب..!؟

بيقولون عوق امها عجوز ماتدري عنها وهي ماغير سردادي مردادي مع السواق ..,

عوق با انكسار \ طيب برجع بسرعة..!

طلعت للمكتبه وكلام امي مثل المسمار الي اندق بقلبي ...

امي صادقه الناس وش دراها وين اروح وين اجي واكثر جيرانا عارفين اني لقيطه..!؟

لا زم اخلص اشغالي با النهار مشاوير بعد المغرب ماهي للي مثلي ..!

اخذت من المكتبه كتيبات وهدايا للبنات بكرا..,

واوراق وادوات كانت ناقصتني..!

ورجعت بسرعه دخلت وامي كانت تكلم با التيلفون..؟!

سلمت على امي ما ردت علي تكلم وشكلها زعلانه..!

دخلت انزل اغراضي وعباتي بغرفتي واسمع امي تقول

مالك شي عندنا..؟!

وكانك تبيها هي ما تبيك..؟

لا بالله ما لك خاطر عندي ابد ابد..!

مانبي الا اوراقها الي عندك في بيتك جبها وجزاك الله خير..!

ويارجال اعرس انا وبنتي ما نزيد السمن الا عسل ..,

لاماعليك بتمل وبترجع تعرس ما انت قاعد في بيتك كذا لاحنيس ولانيس..,

اقول بس اعرس ولو تبينا نحضر عرسك ما قلنا شي..!

جبها با اقرب فرصه..؟!


طلعت لأامي..

عوق بتساءل\ وش فيتس كنتس زعلانه ..!

ام عوق بحده\ زعلانه من هي الي ما يفهم اقوله شرق يقولي غرب..!

سألت امي وانا عارفه انه زياد\لايكون من عيال خالي ناصر..!

ام عوق بتذمر\لا ماهو من عيال ناصر ..!

هذازياديقول توسطي لي عند عوق ترضى علي ولهاالي يرضيها وانا بشورها..؟!

قلت له ما نبيك لا انا ولا بنتي..!

ليه وش ظنه يومه يتهددتس ويهاوش وطاردتس نصايص الليول وفاضحتس قدام خلق الله ..!

لا بالله ماله مره عندي ..!

والتسذوب قلت له اعرس يقول ما ابي الا عوق والا مثيلها..!

وجع يوجع العدو..

يومك داري انك ما تلقى مثل بنيتي وراك تسوي سواياك..!

خليه يويلي تسذبان..!

والله ياهو نادم كثر شعر راسه وبيندم اكثر بعد اذا اعرس ماهو لاقي مثلتس..!

عوق با ارتباك\يعرس ولا ما يعرس شي راجع له انا ابي اوراقي وبس جزاه الله خير..!

ام عوق \بيجيبها ان ما جابها اليوم وانا امتس بيجيبها باتسر..؟

عوق بتعب\يمه لاتناديني على العشا عندي شغل واجداذا جعت انا ادبر عمري ..!


ريحة الاكل ما احبها وارتاح بنومي اذا نمت جوعانه..,

حتى المويه ما احب اشربها احس اذا شربتها تجرح معدتي..!

زودآعليه كلام امي الي غثني وزاد المر بتسبدي هي وش تبي فيه تقول له اعرس ..!

وش دخلنافيه يعرس والا عساه ما يعرس..!؟


صليت العشا وخلصت شغلي بنام بكر ا الحصه الثانيه بتحضر لي موجهه..,

صحيت الفجر الحمدلله اليوم خاف عني الغثيان لكن ذبحتني الدوخه..؟!

الغثيان يخف عني اذا نمت ما تعشيت لكن الدوخه هذي وش اسوي فيها..؟!

وحبوب الحديد صرت انساها مرات..!

لأنها تكون بعد الاكل وانا من خوفي من اني استفرغ حتى الاكل كرهته..!؟

شربت كوب حليب مع عسل على شان ما ادوخ با الفصل وراي شرح وقلق..!

طلعت للمدرسه والحمدلله عدت حصة الموجه على خير..,

البنات الله يجزاهم خير كانوا متحمسين معاي ومع الهدايا والتشجيع..!

اثنت الموجهه على ادائي ولا انتقدتني ولله الحمد..,

اليوم لازم اطلع بدري لدكتوره تشوف لي حل بها التعب

ما ابي اطلع بعد المغرب واجيب لنفسي الكلام..؟!

كلمت خوله..

عوق \ خوله بطلع للمستوصف ساعة با الكثير وارجع..,

الدكتوره ينتهي دوامها مع صلاة الظهر..,

خوله بقلة حيله\ شوفة عينك ما في مجال ..,

خليها يوم ثاني انتي شايفه الربشه مع الموجهات وعندك مناوبه..!

وش رايك بكرا وقعي واطلعي..,

عوق با استسلام\ خلاص مو مشكله

انتهي اليوم الدراسي عندي قبل اذان العصر بدقايق..!

لأنه في بنات شكل اهلهم ناسين ان عندهم بنات يدرسون..,

جلسنا معاهم لحد ما اهلهم اخذوهم..؟

رجعت للبيت هلكانه واحس رجولي ماهي شايلتني..,

اخذت دش يمكن اصحصح شوي وطلعت لأمي..

ام عوق\وراتس تأخرتي ..؟

عوق\كان عندي مناوبه وفي بنات اهلهم تأخروا عليهم..!

يمه بعد الصلاة بطلع للمكتبه...؟

ام عوق\ وش مكتبته يا بنتي فكينا من ها المدرسه تعب وارهاق عليتس ..,

والراتب ما يسوى ثمن الي انتي تخسرينه على الاوراق والخرابيط ..,

عوق بتعب\يمه ما قدر اترك البنات با الفتره هذي محتاجيني..,

ام عوق \روحي لمشوارتس وعودي بسرعه..,

صليت العصر وطلعت للمستوصف..,

دخلت عند الدكتوره ماكان في زحمه..,

خبرتها ان معي دوخه ومرات احس ماغص ..!

اخذت لي تحليل دم

والنتيجه ان عندي فقر دم بسيط

المره الا ولى لماحللت كانت نسبة الهيمو جلوبين عندي 12الحين 9..

الدكتوره با اهتمام \لازم تتغزي كويس الجنين بياخد حاجته من جسمك طبيعي وكامل والتعب بيكون عليكي..,

انا حاكتب لك على حديد وفيتامينات

واهتمامك بأكلك بالدرجه الاولى هو الي حيساعدك اكتر من الادويه..,


وعملت لي سونارواسمع اصوات غريبه با الجهاز..!

الدكتوره\انتي عارفه الصوت دا ايه ..,

عوق بترقب\ لا هذا اول حمل لي..,

الدكتوره\دانبض الجنين ..!

اوجعني قلبي يوم سمعت ازعاج نبض الطفل ..,

اول ما عرفت اني حامل كان عادي شعوري ..

لكن الحين ما ادري حسيت بخوف عليه ما ادري من ايش ..؟!

عوق\ دكتوره متى الولاده..؟

الدكتوره\ احسبي مدة الحمل من 36اسبوع اقصى حد 40اسبوع ..,

ونزلت من على السرير ..,

عوق بقلق\دكتوره طيب والماغص..,

الدكتوره \مطوليش وائفه..

ارتاحي سبب المغص الي عندك..,

انتي بتؤفي وتتحركي كتير ودا مش كويس عشانك

اهتمي براحة جسمك عشان ما نلجأش للمسبتات..!

اخذت الادويه من الصيدليه ورجعت للبيت..

لقيت امي جالسه بمظلتها ما توقعت القاها جالسه هنا ناظرت كيس الادويه..,

ام عوق با استنكار وسخريه\ما شاء الله وش ها المكتبه الي تبيع علاج ..!

عوق تتنهد بضيقه \ لا يمه بس دخت شوي وطلعت للمستوصف الي جنبنا..

ام عوق\سلامتس لكن انتبهي من كثر العلاجات ترى ضررها اكثر من نفعها

دخلت لغرفتي ونزلت عباتي وتمددت على سريري ..

الحين الدكتوره تقول لازم ارتاح والمغص الي يجيني لأني اطول واقفه...

طيب وش اسوي انا اليوم ما قدرت اطلع الصباح ضغط دروس والمدرسه محتاجتني ..

اما الوظيفه واما الحمل ..,

او ان الاداره تساعدني وانا ما ابي احد يدري بحملي...,

ناديت الشغاله وقلت لها تصلح لي عصير فواكه الدوخه ذبحتني

شربت العصير واخذت الادويه صليت المغرب وبديت احضر لدروس بكرا وانا جالسه على سريري ..,

دخلت امي علي..!

ام عوق بحنان\عويق يمي وش فيتس تعبانه..,

عوق با ارهاق\ لا بس شكل معي فقر دم من ارهاق المدرسه..,

وجلست على حافة سريري وعصاها بيدها وفجاءني سؤالها المباشر..,

ام عوق بهدوء \كم لتس حامل..!

عوق با ارتباك\ وش فيتس ترى ذبحتيني بسالفة الحمل..,

ام عوق بوجع\انكري على كيفتس..؟

لكن ترى اي شي يجي ورعتس انتي محاسبه عليه ..,

انتي ان ماخاب ظني لتس 3شهوروالعلاج الي تاخذينه مابه زود..!

المدرسه الله مغنيتس عن تعبها..,

خيرنا واجد من فضل ربي ..,

يا بنتي حمل الحين ماهو مثل من اول ..,

حريم قبل الوحده منهن تركض نهارها كله ورى شغلها والا وريعاتها ومسهل الله عليهن ..

لكن الحين على جريف والله لو تشيل كرتون طماط ما يردها الا المستشفى..,

الورع فيه والحمل مدري وش جاه لاتركبين راستس وتضيعين ضناتس..!

طلعت امي من غرفتي ورجعت..؟!

ام عوق بقهر\ نسيتيني وش ابي..!

رجلتس جا اليوم وانتي طالعه وجاب كل اوراقتس واكياس معهن ..

وقال بنتظرها ابي اشوفها وطردته شوفيهن بغرفتي ..,

قلت له المره الثانيه نبي كل اغراض عوق الي في بيتك ماهو بس هذولي..؟!

انت ما انت بقاعدآكذا اكيد بتعرس والحرمه الجديده اكيد ما تبي تشوف اغراض عوق

جبهن قبل تدخل عليهن مرتك وتحذف اغراض بنتي ..,

وطلع الضعيف متكدر خاطره ..,

عوق بحسره والم \ازين ما سويتي وش يتكدر خاطره عليه..!

يمه الرجال واضح من البدايه مايبيني رجال تزوج كبير با العمر..

ماتفرق معه غيبتي وحضرتي عنده واحد متعود طول عمره يعيش با الحاله..,

من يوم ماتوفت امه الله يرحمها وهو مايدري معه مره والا عايش با الحاله..!

يمشي مثل المسبوه يقعد ويقوم وعيونه على غرفة امه واكثر وقته ينام فيها ...,

ناسي كان عنده غرفة نوم ماهو بس انا ناسيني

ما يذكر ها الغرفه الا اذا بغى يغير لبسه.,

ذبحني الجوع في بيته ولا درى عني ما يسأل ويقول البيت وش ناقصه

مرات اسكت ومرات لا والله ارسل له ناقصنا وناقصنا البيت مافيه شي فاضي ..

ما يسأل عن اي شي اذا زينت اكل وناديته مرات يعيي ومرات لا يجلس مقابلني ما اسمع الا طق صحنه..,

وبس يجر ونينه نايم والا صاحي يجيب الهموم على بعد..,

اردفت عوق بتهكم موجع\ واحساسه بي معدوم يشوفني جالسه قدامه 24ساعة

يطلع دوامه ويرجع ولا عمره قال عوق شفتي امتس والا كلمتيها..!

ليش هو امه غاليه عليه وانا لا..!

هو عنده احساس وانا ماعندي ..!

ماهو بس هو يتيم انا بعد يتيمه مالي بعد الله غيرتس انتي وهو..

واخرت صبري فشلني وفضحني قدام نجلاء طردني ويتحداني تحدي اني اطلع من بيته..!

ماخلا لي وجهن قدام اخته المه ...,

ويقول الله لايسامح من بلاني فيها..!

والحين مراسيله عليتس وكلامه موجه لتس ..

والوسايط الناس الي مشو بعرسنا ماشفت منه عزم قوي انه يبيني

والا يصر علي انه يراضيني يمكن يلين قلبي عليه شوي واتناسى الي سواه..,

خلاص يمه جا والا راح والا طس اعرس لاتجيبين لي اخباره

النفس عافته وكل يوم يمر يبعدني عنه اكثر..!

وضحى تتنهد بوجع \يوم تمنيته لتس و زوجتس له ما بغيت لتس الا الستر

لكن عاد وش نسوي وانا امتس مادرينا وش المكتوب..!

عوق بضيق ومراره\والله يمه داريه انتس ماتبين لي الاالستر انتي والا ام ابراهيم وانخدعتن فيه..!

دكتور ورجال متفتح وتوه جاي من امريكا..!

قلتوا اكيد هذا الي بيشيلني فوق راسه وهو شالني صدق فوق راسه لكن عقبها جابني سابع ارض..!؟

والله يمه انه يعز علي شوفتس متضايقه والا طلعت خالتي نوره تبكي من بيتنا وهي والله ما تستاهل..

بس وش اسوي بعدانا عازه علي نفسي اني اكسرها له يهني واسكت..,

ام عوق تتنهد بقلة حيله \ والله يا بنتي ادري ان معتس حق لكن ما ابيتس تهدمين بيتس

زياد ما منعه يلحقتس غيرانه طايح وجهه من الي سواه واستحى مني ومنتس يحسبتس من جيتي

عطيتيني العلم قال ان جيتهن الحين بياكلني..,

وانا ترى يوم جا ماقلت له كلمة..!؟

غير وشلونك كيف حالك..,

حتى انه روعني بدخلته علي وجهه وجه المنفشل ويقدم رجل ويوخر رجل

ولا بغيت ازيدها عليه ولا توقعت والله جيته..؟!

قلطته وجلس وما قالي وش صار بينكم غير ان بينكم خلاف وانه غلط عليتس غلطآ كبير

وجاي يتعذر ويتفاهم معتس ..,

ماجادلته ليه ماجيت قبل والا وش غلطك ..؟

كنت ابيتس تفاهمين معه بنفستس وتاخذون العلم من روس بعضكم..,

ولياصار هذا رايتس وش تبينا نسوي ماتبينه خلاص ماني غاصبتس ..؟!

ماهو كل ماحاشت النفس لها ولا كل ماتمنيناه بنحصل عليه عسى با الامر خيره ..,

وقفت ام عوق واردفت بوجع\ يفرجها الله يا بنتي قومي اذن العشا صلي وتعشي و نامي وراتس جهاد الله يعينتس عليه..!

صليت العشا ونمت وانا في قلبي هم ما يعلم فيه الا ربي..

وصحيت قبل الفجر كملت صلاتي ودعيت ربي ؛

اللهم أسترني فوق الأرض وتحت الأرض ويوم العرض عليك ..

اللهم إسترعيوبي وإغفرذنوبي وإجعل حياتي بردآوسلامآكماجعلت الناربردآوسلامآعلى أبراهيم..

اللهم إذقني بردعفوك وحلاوةمغفرتك اللهم سخرلي وإخترلي فإني قدعجزت عن صلاح نفسي وفوضت أمري اليك..

اللهم اني اشكو اليك ضعفي وقلة حيلتي وهواني على الناس سبحانك اللهم فرجآمن عندك قريب..,

دخلت غرفة امي ولقيت الاكياس اخذتها وطلعت لغرفتي ..!؟

فتحتها لقيته مرتب اوراقي وبطاقة الصراف بكيس..!

وكيس جوال جديد فتحته لقيت مركب شريحتي القديمه فيه..

وحاط رقمه وكاتب لقبه انت الحب..!!!

وكيس فيه ذهبي كله جامعه مع بعض ..!

ما قصرت يا زياد مرسل لي الذهب وش اسوي فيه

الذهب مانفع امك قصته بشرى من يديها وعطته الحرمه الي ساعدتهم بتغسيلها..

وقالت تصدقي فيه كان تعرفين محتاجين ..

يا ليتني ما عرفتك يازياد ما استفدت من ها المعرفه غير نارآ بجوفي تصطلي ..

وهذا انت اقفيت ..,

حتى كلامك واعتذارك كله لأمي وانا ولاشي..

عوق تتنهد بقهر \لاوكاتب انت الحب الله واكبر يا ها الحب الي انت تعرفه

انت لقبك المفروض انت العذاب ..,

رتبت الاوراق الي باخذها معاي للمدرسه..,

والجوال والبطاقه في شنطة يدي وذهبي بعطيه امي تتصرف فيه..,

اذن الفجر وصليت الفجر وقريت اذكاري وردي وجهزت نفسي للمدرسه ..,

واخذت الادويه الي صرفتهم لي الدكتوره بشنطتي..,

دخلت غرفة امي

عوق \يمه هذا ذهبي شوفيه با الكيس خفت اتركه با الغرفه ينسرق والا يجيه شي...,

ام عوق\ خوذي المفتاح افتحي الخزنه واقفلي عليه الله لايحيجتس له..,

عوق\آمين ..,

ام عوق با اهتمام\ افطرتي..؟

عوق\لا بفطر بالمدرسه ..

تأخرت السواق ينتظرني من اليوم

ام عوق تبتسم \ مع السلامه استودعتكم الله انتي وضناتس...,

عوق تبتسم وبنفسها\وانا استودعتس الله يا نور حياتي كلها لا والله انتي الحب ماهو غراب البين زياد المراهق..,

طلعت للمدرسه اليوم لازم اشوف حل مع ها النصاب 24حصه با الاسبوع انهد حيلي..

الاولى ماكان عندي حصه جلست بغرفة المدرسات في معلمات ماعندهم حصص مثلي..

سألتهم قلت بنات الي معه فقر دم وش يسوي علشان يرفع نسبة الهيمو جلوبين في دمه

ردت وحده من المدرسات اسمها ناهد

ناهد \ شوفي فقر الدم له اسباب انتي حامل ..,

عوق با ارتباك\ الي الآن ماحملت ..,

ناهد \ مع الحمل طبيعي كثير يجي لهم فقر الدم ..

وفي ناس ما يتغذون كويس ينقصهم فيتامينات وحديدويهملون انفسهم ويجي لهم فقر دم ..,

حتى في ناس تستغربين انهم معهم فقر دم وهم ما شاءالله يعانون من البدانه كله من التغذيه الخاطئه..,

شاركونا كل الي با الغرفه الموضوع..,

اسماء\اسمعي عوق انتبهي من الآن لا تهملين تغذيتك ..!

علشان اذا ربي كتب لك حمل تدخلين مرحلة الحمل وانتي نسبة دمك ممتازه..!

عليك با السلطات والفواكه

اذا في بيتك خادمه على الغدا تبوله وسلطة فواكه قولي لها تجهزها لك ..!

دلال \والموز والتوت بعد يمدحونهم..!

المدرسات الموجودات معي با الغرفه ضحكوا كلهم استغربت من ضحكهم على كلام دلال والا علي

دلال بقهر\ياربي انا الغلطانه الي قلت لكم ..,

اسماء بضحك\تكفين دلول عيدي الموقف خلي عوق تسمعه يمكن الحين تحسبنا نضحك على كلامها..!

دلال بممازحه \ فضحتوني ماتسوى علي ها السالفه ومسكتوها علي ..؟!

اردفت دلال بضحك\لكن لعيون عوق بقولهاوامري لله..

عوق بنفسها \لعيون عوق فديت عيون عوق يا ما قالها زياد

ويوم زعل نسى عيون عوق ويدعي على الي اجمعه بعوق..!

عوق تتنهد بوجع\تسلم عيونك كلي اذان صاغيه..!

ناهد تضحك\الحمدلله عوق ماهي حامل اخاف يجيها شي من موقفك دلول..!

دلال \اسمعي عوق هذا الله يسلمك اول ماتزوجت طلعت با الاجازه عند اهل زوجي..!

كنت توني حامل في بنتي وفترة وحام يا ساتر اضيفي لها اول حمل واتدلع..

وطبعآ بيت اهلي واهل زوجي بنفس المنطقه ..!

المهم طلعت من بيت اهلي راجعه لأهل زوجي بنص الطريق جا في بالي اكل موز

واحنا بعد الساعه12في الليل..

قال زوجي يا بنت الحلال مافي موز كل المحلات مسكره..!

قلت ما فيه الا تجيبه..!

و بعد جهد جهيد زوجي لقاه ومن فرحته انه لقى الموز اخذكميه واجده..!

قال يالله يا دلول هذا الموزعليك با العافيه قشرة موزه واكلت نصها..!

قال زوجي اشبعي موز ما ادري وش القرد الي بتجيبنه لنا..

انا سمعت كذا بغيت انفجر من القهر قلت انا تقولي وش القرد الي بجيبه لكم..

خلاص ما ابي الموز وهو يا بنت الحلال ماهو قصدي وانا اسف..,

قلت لا مافيه اشبع فيه انت ..!

هو اكل وحده وثنتين بعدها قال الله يسامحك وش نسوي با الموز اذا رمينا خفنا من غضب ربي...

واذا نادينا احد با الشارع وقلنا له خذ كيس الموز ...

اكيد بيحسبها وحده من الثنتين يا ان الموز فيه بلا يا انا مهابيل..!

عوق بدهشه \طيب عادي خوذوه معاكم لبيت اهل زوجك..!

دلال با استنكار\ تبينهم يفضحونا داخل عليهم ولدهم بكيس موز..

والله كنه مسوي جريمه..,

بيقولون قدرنا عند ولدنا كيس موز بنص الليل بيقعدون يتمسخرون ويسوونها تاريخ

ذيك السنه الي دخل علينا ولدنا بكيس موز ..!

عوق تمسك ضحكتها \طيب وش سويتو فيه..؟!

دلال بتهكم\وش سوينا زوجي اكله كله ما وصلنا بيت اهله الا هو مخلص على الموز كله..!

الله لايوريك نزل من السياره وهو ماسك بطنه بيديه الثنتين وطاح قدام بيت اهله ..!

وادخل داخل انادي احديشوفه حسبته مات ..؟!

واخذوه اخوانه للمستشفى تنوم يومين وطلع ..

ومن بعدها ما دخل الموز بيتنا زوجي كره حتى اللون الاصفر منه..,

عوق بضحك \بصراحه قويه هذي يا دلال..!

ناهد\عوق انتي كم لك متزوجه..,
.
.
.
(كلمه اخيره)


الله كَريم مَـاذا تعني؟ يُعطي كثيراً

بل أكثر مما يدرك عقلك الصغير

أكثر من خيالاتك، أوسع من جدران يأسك،

قادر على تحقيق أمنياتك، وعلى أن يخلق لك أمنيات أجمل،

قادر على أن يعطيك حتى تنسى أنك قد حزنت يوما.


د. سلمان العوده


الي الملتقى قريبآبأذن الله

وسالفه جديده


طيف الأحباب

ام الوليد


تذكروني واحبابي بدعوه طيبه