بسم الله الرحمن الرحيم
.
.
.
هلا وغلا بكل المتابعات بناتي وخواتي العابرات على ها المتصفح..
جاني انتقاد من وحده من خواتي الي يتابعون من خلف الكواليس..
هي قرت تقريبآ ثلاث ارباع الروايه..
تقول طيف انتي مرات احسك تعيدين نفس السالفه..!
ويمكن لاحظها او بيلاحظها كثير من الي يتابعون معانا الروايه..
الكلام موجه لأختي ام عبودي ربي يشفيه ويصلحه لها ولكل المتابعات..,
انا ماني كاتبه >>رحم الله امرء عرف قدر نفسه
هي سوالف عندي وكتبتها وقلت بجمعكم واخبركم فيها ..,
الاحداث خيال ممزوج بالواقع مثل ما قلت قبل ..
والحكايه على لسان البطله تسولف الاحداث الي عاشتها..
وتتكلم مع عدة اشخاص وتسمع منهم ...!
حتى الابطال لما يسهبون بشرح بعض الاحداث
شي متعمد مني علشان تكونون با الصوره والا كيف بتعرفون وش صار لهم
مشكلة الروايه الي تعتمد على شخصيه محوريه وهي الي القارئ يعرف من خلالها الاحداث
لا زم يكون فيها الشرح بزياده وبصوره شوي مبالغ فيها
مثل حكاية فايزه هي قالت لأم عوق بقولك الحكايه با اختصار وشرحت لها قصة حياتها
علشان القارئ يكون عنده فكره كيف كانت حياة فايزه مع صالح وبيكون فيه احداث قادمه فيها شرح
من خلالها بنعرف احداث وكيف كانت علشان نكون بصوره صحيحه
انا الروايه احاول اقربها من الواقع على قد ما اقدر
واتمنى اني وفقت بها الشي وكلامي مااقصد ان ما ابي احد ينتقدني..’
لا والله با العكس ارحب با النقد قبل المدح..!
وياليت من يمر من ها المتصفح يطلع بفايده ولو من الهمسه الاخيره..
.
.
.
اليوم بنشوف عوق المزايين وش كانت تبغى من امها..
وذكريات عوق عن جهازها او ما يسمي في بعض المناطق الدبش ..!
تذكرو طيف الأحباب واسرتها بدعوه طيبه..
البارت اهداء للعابرين من هنادون استثناء...!!
يا الله تعالوا معاي...!!
وسالفه جديدة؛
.
.
.
البارت الثاني عشر
.
.
.
ام عوق\ يالله وش هي السالفه الي عندتس ..؟ّ!
عوق منحرجه\ ماادري وش اقولتس ..؟!
وضحى تضحك\دام فيها حيا اجل كني عرفتها..؟
عوق منحرجه\ها وش عرفتي ..!
ام عوق\ العلم الي بين اذانتس انتي تبين دراهم..! ?
عوق بخجل\يمه ريم تقول اخلصي شغلتس بدري لا يروح عليتس الوقت وانتي ما سويتي شي..؟
ام عوق\اجل من بكرابروح للبنك انا وانتي وتاخذين الي تبين...,
عوق\ بكرا الجمعه انتي ناسيه ..!
اردفت عوق بتردد\ عطاتس المهر..!؟
ام عوق\لابا لله ما عطاني شي وماضايع شي وانا امتس..,
عوق\عارفه ما ضايع شي لكن ظنيت انه عطاتس المهر قلت اجهز منه..,
اردفت عوق \ كم طلبتي عليهم با المحكمه..؟
ام عوق\ مثل كلامي يوم الخطبه انتي بكرة والا فحل اتربح من وراتس ..!
يوم قالو ا كم تبون مهرالبنت قلت ما اطلب شي الي هو يقدر عليه راضين فيه ...!
وكتب عند الشيخ خمسين الف واصله..,
ام عوق بتساءل\هو البنك يفتح اليوم..؟
عوق\اتوقع الخميس مافي دوام ..!
ام عوق بهمس\ اجل انا عندي دريهمات حافظتهن لوقت عازه..!
بطلعهن لتس يمكن ماتكفيتس..,
عوق \ لايمه معي صرافتي فيها فلوس واذا نقصني شي طلبتس..,
ام عوق بحده\فلوستس الي با البنك لا اسمع والا اشوفتس تلمسينها الا با امري والا ما يصير شي طيب..,
بقوم اطلع لتس الي عندي وتشري منها اليوم ..
والسبت بنعس البنك انا وانتي ..,
عوق بتوتر\يمه ترى ريم وخواتها بيجهزون معي انتي وش رايتس..؟
ام عوق\هذا شورآ طيب ترى بنات نوره جيدات مثل امهن..,
روحي معهن عسى الله يوفقتس يا عوق ولا يقهرتس يا بنتي ويبارك لتس بحياتس ..,
عوق يمي اذا جا مهرتس انوي انتس تطلعين منه صدقه علشان ربي يبارك لتس...,
عوق بتأكيد\وهذا الي انا ناويه عليه والله يمه بدون ما تقولين..,
وقمت لغرفتي الحمدلله مرتاحه نفسيتي وانا اشوف امي بخير قدامي وتسابقني بالكلام على جهازي..,
انا وش ابغى من ها الدنيا الا رضاها نظمت لي قائمه مثل الجدول وش ببدا فيه..!
كلمت ريم على بيت اهلها هي من امس عندهم ..,
وقلت لها تجي مع خواتها نفكر سوى كيف بنتقاسم المشتروات ..,
جات بسرعه هي و ميعاد والجوهره وجلسنا بغرفتي بعد ما سلموا على امي..,
ميعادتأشرعلى ريم\ اسمعيني عوق العاقل من اتعظ بغيره لا تكررين اخطاء غيرتس ..!
شوفي الي يصلح من اغراضتس الي عندتس تضمينه لجهازك..!
تبارك الله كل اغراضك ماركات وغاليه ماراح تجيبين افضل منها..
ناظرت ريم والا هي تحوس بدواليبي..!
عوق بممازحه\ خير الاخت مضيعه شي..!
ريم تفتش الدولاب \لا عوق لكن كل شي عندك رسمي ما في شي من لبسك ينفع صدق بنت عجوز..!!
عوق بقلق\بالله ريم تتكلمين جد..!
ريم تضحك\لا والله امزح ترى ما يبي لك اشياء كثيره..؟
يعني يبي لك كم فستان وكم تايوار وبناخذ لك جلابيات فخمه..,
وقمصان بيت مرتبه وقمصان نوم..,
ومفرش او اثنين فخمات حرام عوق اغراضك روعه ولا راح تشترين احلى منها..!
ميعاد بضحك \عوق الجلابيات اختصاص امي تقول مالكن شغلهن انا اشتريها لعوق ..,
عوق \الله يسلمها خالتي كلها ذوق...
ريم بمشاكسه\جد عوق انتي ماعندك ذوق ...!!!
الا انتي الذوق نفسه...,
ميعاد بتعجب \ريم صادقه والله استغرب من ذوقك الخطيرعلى ان امك حرمه كبيره الله يحفظها ...
وانتي ما تطلعين وتشوفين العالم كثير يعني بيتك وبيتنا والكليه ...,
عوق \ميعاد الذوق لا ينشرى ولا ينباع هذي موهبه من الله وتبي لها بس صقل ..!
آردفت عوق بضحك\وانا قارئه ممتازه ماهو بس ناسخه..,
والله يخلي لي ريم الي كانت تسرب لي مجلات الازياء والموضه والمكياج واقراهم..!
ريم بضحك \لا تذكريني يا عوق جمالك خطوه بخطوه..!
كل ما اتذكر ان امي هي الي تجيبهن لك بنفسها اضحك وانا ماحولي احد...!!
اقول يمه تكفين هذي كتب من برا ضروري توصلونها عوق عليها بحث لازم تخلصه...؟!
عوق بضحك\وامي يا حياتي تحسبني اذاكر ما درت ان عوق مدخله ممنوعات...!!
الجوهره با استغراب \انتوا من صدقكم ..؟؟!
عوق بضحك\ اي والله المجلات الي الحين تسمعتس داخل المخزن الله لايفضحنا
و بعض مرات عمي مسلط هو الي يدق بابنا ويعطيهن امي..!
لا بعد امي تشكر وتدعي لريم انها متعبه نفسها وجايبه لي الكتب ...!
ميعاد بتعجب\يويلكم من ربي يا ريم انتي وعوق تضحكون على ها الشيبان ..,
ابوي وخالتي وضحى آمنا بالله نقول ما يعرفون...؟
ما يفرقون بين الكتاب والمجله تقدرين تمشينها ..,
الا اذا بتفضحكم الصور اذا لقطوها..!
لكن امي وشلون يطلعن من تحت يدها...!!؟
ريم بتهكم\وشلون يطلعن حلوه هذي الا احلى طلعه..!!
بعد ماتزوجت ما ييبي لها فهلوه..!
اغلفهن والفهن بكيس مكتوب عليه بحوث خاصه بقسم اللغه العربيه..؟!
وادق على امي واقول يمه جزاع نزل عندكم اغراض بالله اقري الي مكتوب عليها وزعيها..!
في شي لخواتي خوذوه وشي لعوق ما لقته..!
وجزاع حاس الدنيا وبصعوبه لقاه..؟!
وامي عاد ياعمري كني اشوفها وهي تقرا لي مكتوب على الكيس وترسله..؟!
اما قبل اعرس انا بنفسي اطلع مع ابوي كل ما بغيت شي للمكتبه..
اتغافل ابوي واخذهن وهو ما يدري كنهن كتب واجيبهن لعوق..!
الجوهره بدهشه \واحنا وين كنا ما كشفناكم...!؟
ريم بضحك\علشان تفضحنا لا السر اذا طلع من بين اثنين انتشر..!
ميعادبا استغراب \الحمدلله والشكر ليه اللف والدوران كان عوق تطلع بنفسها وتشتري الي تبيه ..!
ريم بتهكم \ليه حبيبتي نسيتي ان عوق ما تروح الا وخالتي معها وعلى بالك خالتي وضحى ما تفهم..,
تبينها تفضح عوق يمكن تجلسها با البيت لو درت عن مجلات الازياءوالالمحت اللبس الي فيها..!
و لو فرضناراحت باالحالها نسيتي اخوتس نمر بسم الله الي عقل شايب بجسم طفل كنه ظلها والله ان يفضحها..!؟
كل شي يفهمه الا يقول بنت وضحى بدال ما تشتري من المكاتب كتب تشتري مجلات..ّ!
فيها صور حريم لبسهن يا دافع البلاا...؟!
اخوتس هذابسم الله عليه مرات يخوفني وهو يسولف احسبه جدي..!
ولله الحمد كنت انا وعوق امشيات امورنا ..
ولا عمر احد من شيبانا نقد علينا ..,
الجوهره\ يوم قالوا ياما تحت السواهي دواهي ما كذبوا..
ياربي من يقدر على كيد النساء الا رب العالمين..,
ريم \اقول يا الله خلصونا بنروح نخلص اشغالنا فتحت الاسواق..,
وبعدين ان شاء الله الي تبي دروس من خواتي ..!؟
بكيفية الحصول على الي تبينه قدام انظار اهلك بسهوله بعطيها دروس مجانيه..؟
طلعنا لسوق انا والبنات واستفدت كثير من ارآهن ..,
الا انهم احرجوني والزموني اخذ ملابس ما ادري كيف طاوعتهم وشريتها ..!؟
انهد حيلنا من اللف والمشي با الاسواق ..,
ريم \احسبي حساب انك تاخذين لزوجك هديه...
عوق بتعجب\ ليش..!؟
ريم بعصبيه \وش ليش اقول بس اذا معاك فلوس خليني نشوف له عطر ونغلفه..,
عوق\ لا خليها بعدين كل الي معي بشنطتي صرفته..,
ورجعت للبيت ونزلت الاكياس وعلى طول دخلتها لغرفتي خفت امي تقول وين اغراضك اشوفها ..,
وطلعت اشوف امي ولقيتها بسريرها فديتها تنتظرني...!
ام عوق\هلا ورى تأخرتوا..!؟
عوق\السوق مافي زحمه لكن كل غرض نلقاه في مكان بعيد عن الثاني..,
ام عوق بتساءل\عسى شريتي شي يبيض الوجه..,
عوق تبتسم\ما عليك ما خليت بنفسي شي...,
ام عوق بفرحه\وين اغراضك وريني بشوفها ..,
مغصني بطني يوم اسألتني لكن ما ودي اكسر بخاطرها..
ورحت جبتهم لها يوم اطلع الي با الاكياس مره تضحك ومره تنتقد..,
حتى يوم شافت القمصان الي شرتهم لي ريم استغربت ردة فعلها..!
ام عوق بضحك\ورى وجهتس قام يتقلب الوان ..!
عوق بخجل\ يمه والله هذي كلها بلتني فيها ريم بلوى...,
ام عوق\مافيها شي ريم معرسه وهي عارفه الي يصلح لنسوان ..,
يا بنتي كل زمان وله ناسه ولبسه الي يصلح لحريم اول ما يصلح لحريم الحين..!
والي يصلح لجيلتس ما يمشي مع الجيل الي قبله..!
لكن عاد وانا امتس مخافة الله هي الباديه على كل شي ان كان بلبس والا غيره..!
عوق\الله يعين يمه..,
ام عوق \اي والله الله يعينتس ويوردتس موارد الخير يا بنتي ..,
طلعت لغرفتي وقعدت ارتب اغراضي الجديده والقديمه الي تصلح اني اخذها معاي ..,
سبحان الله ما ادري وش جاني نشاط ماهو طبيعي كأن عرسي بكرا..!
واشيل واحط با اغراضي بما ان سفرنا قليل ما عندي شنط سفر نسيت لأاكتبهن..!
قضيت يوم الخميس كله سوق ونوم وترتيب..!
متعوده من يوم كنت صغيره رغم وجود الشغاله ملابسي ما احب احد يلمسها انا اغسلها واكويهاوارتبها..!
امي الله يحفظها علمتني الحرص على اغراضي واعتمادي على نفسي ..,
يوم الجمعه عادتنا انا وامي نصحى الصباح نفطر ونتقهوى واذاعة القرآن الكريم شي اساسي في حياتنا...,
احيان عن طريق الراديوا وبعدها لا صار عن طريق التلفزيون...,
امي بعد جهد جهيد رضت انه يدخل الستلايت لبيتنا ومع هذا ما نستغني عن راديوا امي..,
نقرا سورة الكهف انا قراءه وامي تستمع لها من الردايو او التلفزيون...,
اجواء يوم الجمعه احسها اجواء يوم عيد نقل صلاة الجمعه من مكه وعادة امي توزع على اطفال حارتنا فلوس ..,
و ترسل السواق يوزع مويه عند المسجدبعد ما يفيضون المصلين من صلاة الجمعه..
اشياء غير مكلفه لكن تدخل السرور لنفس وتشرح الصدر ..,
السبت بنروح انا وامي علشان نسحب فلوس واكمل جهازي...!
حتى المبالغ الي اسحبها من رصيدي عن طريق الصراف احب امي تكون معاي وتعرف كم سحبت ..,
يوم السبت صحتني الشغاله تقول ماما تبغاك بسرعه با لمجلس
طلعت اركض خفت امي فيها شي وادخل فجاءه...!
الا رجال جالس و لابس لبس غريب واصرخ ذيك الصرخه الي هزت جدران بيتناوارجع لغرفتي...!!
ما ادري اصيح خوف والا حيا من الرجال الي موجود..!!؟
ياربي وش بيقول عني الحين يا فضحي ..؟!
اكيدبيقول ما تستحي دخلت علي طايره..!؟
بعدها لحقتني امي لغرفتي وهي متروعه علي وتسمي بالله علي..؟!
ام عوق بذعر\ وش فيتس ..؟!
عوق بخوف وحيا \ ما دريت ان في احدبالمجلس الشغاله نادتني وانا فيني نوم..,
خفت عليتس ورحت اركض ..؟!
دخلت وجهي بوجه رجال غريب جالس ..؟!
ام عوق بضحكه\ ماعرفتيه هذا زياد..؟
ها الشغاله مادري تسيف تفهم ما قلت لها خلي عوق تجي للمجلس ..
قلت صحي عوق وخليها تزين القهوه لرجلها..!
تخبريني ما احب الشغاله تزين قهوة الضيوف والا هي الضعيفه مصلحه القهوه والشاهي من راسها ..!
اردفت ام عوق بتهكم\زياد تقهوى وشبع قهوه وهي توها تصحيتس يا الله الخيره ..؟!
كان ودي انتس انتي صلحتي قهوته...,
عوق بنفسها\وش عنده جاي على هالصبح غريبه ...!
والي قهرني اكثر وش بيقول عني مرجوجه والا مطفوقه ...!
لوشخص ثاني يمكن اهون عندي منه..,
غيره بينسى دخلتي عليه من يطلع مع الباب ..,
لكن زياداخاف مع الايام يمسكها علي يا فضحي كله من ها الشغاله الي الفهم معدوم عندها..؟
عوق بقهر \ والله ما كنت اقصد بدخلتي عليكم..!؟
ام عوق تضحك\ دارين بس الضعيف بغى يطير يوم سمع صرختس ..؟!
ويبس حلقه شرب بيالة الشاي وهي نار بغى يحترق فمه من الروعه..؟!
وعلى طول مشى ظنتي راح يعالج فمه..!.
هذا درس لتس عن الطيره ها المره جات سلامات رجلتس الي با المجلس مره ثانيه ما تضمنين من هو..!
ام عوق بأمر\اغسلي وجهتس خلي النوم عنتس والحقيني..!
استغفر الله قعدت اضحك وانا اتخيل شكله وهو يشرب الشاي الحار يا زينتس يا الوضيحي وانتي تعلقين...,
غسلت وجهي و لحقت امي لغرفتها..,
دخلت عليها وجلست على كرسيها الي اكثر المرات تصلي وهي جالسه عليه ....,
امي جلست على سريرها مدت يدها تحت مخدتها ...!
وطلعت ظرف بني قالت هذا من زياد مهرتس ..!؟
خوذيه ولاتلعبين فيه بنروح فيه للبنك...,
عوق\ خلاص تبيني اودعه بحسابي والا حسابتس..!
ام عوق\ لا بالله بحسابتس ولا تسحبين منه لين اقولتس..!
عوق بتردد\كم المهر الي جابه..؟!
ام عوق\استحيت اقول كم..,
وهو بعد ما قال شي ظنتي انهن الخمسين الي كتبهن با المحكمه..!؟
ذاك الوجه على نياته ماعنده تسذب واحتيال..!
اخذت الظرف معي لغرفتي بشوف كم فيه..؟!
الظرف حجمه صغير يمكن فيه شي ما يسوى..؟!
فتحت الظرف ابي اعد كم ارسل وعديتهم..؟!!
لقيت حاط في الظرف مئة الف فئة 500علشان كذا الظرف كان صغير...,
ياربي وش قصده يوم ارسل كل ها الفلوس ..,
جيت بدخلها داخل الظرف الا كاتب على الظرف من داخل انتظريني عند التلفون الساعه عشر الليله..!؟
وجع ماهو مخ بزر وبس الا قليل ادب صدق..!
يا ويله يا سواد ليله لو امي درت وش بتسوي فيه..؟!
اجل الساعه عشر انتظريني..!؟
الا ردد يا ليل مطولك...؟!
تركت الظرف بغرفتي واخذت الفلوس خفت امي تلمح وش كاتب ...!
وخصوص انها تعرف الحروف وامي لماحه خلقه فديتها ما يفوتها شي..!
حطيتهم بشنطة يد وطلعت لأامي اخبرها كم جاب زياد مهر ..؟
دخلت عليها وهي مرتكيه وماسكه رادوها وتفر فيه..!
عوق\يمه..!
ام عوق\همممم..,
عوق \ كم تتوقعين زياد حاط لي مهر...!؟
ام عوق\ والله ما ادري لكن الاجودي توه معود من سفر ودراسه..!
ويمكن الضعيف ما عنده شي والي ارسله خير وبركه..,
لا يصير بخاطرتس شي والله وانا امتس ما ينقص عليتس شي وانا اشوف....
عوق\الله لايحرمني منتس يمه بس هو مرسل با الظرف مية الف ..!
ام عوق بتعجب\ تقولينه صادزه..!؟
عوق تبتسم\اي والله هذا هي تعالي نعدها وتشوفين اذا انا صادزه او لا..؟!
ام عوق\يا بري حالي ياعوق يمكن انه متسلف والا ماخذ قروض على ظهره...؟!
عوق بتهكم\ واذا والله محد جبره يهايط خليه احسسسسسسن يستاهل..؟!
ردت بضحكه\ هذا جزاه الي مقدرتس ما قلت لتس انه ما مثله..,
ان شاء الله ان ربي عوضتس يا بنتي والله انه حياوي وفيه دين ودخل قلبي من شفته..!
الله يوفقكم يا عوق انتي وهولكن بوصيتس بعلم حطيه بذنتس ولا تضايقين مني..؟!
عوق بملامه\ انا اتضايق من كلامتس والله يا ميمتي ماعمري عصيتس وافلحت..؟!
ام عوق\ اجل اسمعي ماهو ضروري ان احد يعرف وش ارسل لتس والا كم ارسل رجلتس لا قريب ولا بعيد..؟!
عوق بااستغراب\با العكس هذا دليل انه شاريني ...!
ام عوق\ ادري انه شاريتس ولومايبيتس ما طق بابنا محد جابره بيلقى ماهو بلشان..؟!
لكن يا بنتي العين حق وش ينفع لو عطاتس رجلتس مليون ثم عقبها جاتس عين والا حسد..؟!
والله ان تشوفين الدراهم ورق والذهب نحاس..!
يا بنتي العافيه وراحة البال ماحدوها با الاثمان..؟!
الي يسألتس كم مهرتس قولي الحمدلله المهر ماهو بكثره وقله المهم البركه..؟!
عوق بممازحه\ خلاص تم بقول ريال وشيمة رجال ..,
كم وضيحي عندي يمه وش رايك اليوم انزل اكمل الباقي من الجهاز..؟!
ام عوق بفرحه\ لا اليوم بنروح انا وانتي نشتري ذهب ..؟!
عوق بملل \ يمه وش ذهب ما عاد حد يلبسه ..؟
ردت بحزم\ يلبس مايلبس شاريه شاريه..!
وعسانا ما ننسى ابي هديه لنوره تراها وجهن يستاهل..,
عوق با استسلام\خلاص بعد العصر نتجهز انا وانتي لكن بشرط بسرعه نرجع..!
ماهو مثل يوم رحنا للمحكمه قلبي تقطع كل شوي خايفه تطيحين علينا..,
ام عوق\طيب بس الشغاله ماتروح تنثبر ماودي انها تدري انا شاريات ذهب نفتح عيونها هي ورجلها علينا..,
عوق\ابشري من عيوني..,
وبعدين محلات الذهب كلها مثل بعض ما يحتاج فرفره..!
اردفت عوق \يمه خايفه على الفلوس الي معي وش رايتس اروح اودعهم با البنك واسحب كل ما بغيت ..؟!
ام عوق \خليهن معتس بنشتري ذهب منهن والي يبقى روحي اودعيهم في البنك انتي ما تقولين مايصرفون الا خمس الاف با اليوم ..!
عوق \لا يمه ترى عادي في شبكه في المحلات لا تخافين يا خذون حقهم ..
ام عوق\ اجل سوي الي تبينه مير طلعي بطاقتي حقت البنك يمكن ينقص علينا شي الا احنا ماخذات احتياطنا..!؟
طلعت للبنك انا وامي مع السواق ..
اودعت المهر بحسابي على طلب امي بعد صلاة العصر ركبنا سيارتنا..,
ولسوق الذهب وقفت عند اول محل ذهب ما ابي اتعب امي كفايه مشوار الصباح عليها..,
واشترت امي لي ذهب وانا وهي شيل وحط ..؟!
انا احب الناعم وهي الله يرضى عليها تبي ذهب صب اخيرآ خلصنا..؟!
واخذت اسواره هديه لأام ابراهيم على ذوق امي..,
واسواره هديه مثلها لأم زياد..,
وشريت لأامي انا على ذوقي خواتم جديده وغوايش ...,
امي دايم تقول يا عوق ما احب ايديني بدون حنا وبدون ذهب ...!
من عرفت امي ما فارقت ايدينها الحنه والغوايش والخواتم بين عيوني خاتمها ابوفص ازرق ..,
والا خواتمها الثلاثه الناعمه الي تلبس با اصبعها البنصر..!
يوم جيت بطلع صرافتي علشان الحساب مسكت يدي امي....؟
قالت انا الي بحاسب ..؟
وطلبتني بطاقة الصراف حقتها وقالت يا الله حاسبي حلفت ما تحطين ريال من مهرتس..!
ما بغيت ازعل امي با السوق وحاسبنا بمبلغ جامد..؟
واخذنا مشترواتنا وطلعت من السوق عجزت اتكلم كلمه ..!
خانقتني العبره امي حاسبت با اكثر من خمسين الف..؟!!
من حسابها هذا غير قبل فتره حولت برصيدي مبلغ كبير ..؟!!
وكل ما بغيت شي تحلف ما احرك من رصيدي شي...!
وخصوص بعد ما اقتنعت في بطاقة الصراف..,
والا اول رافضه تطلع بطاقة صراف لازم نروح للبنك كل ما بغت شي واجراءات علشان تسحب الي المبلغ الي تبغاه...!
صار كل شي ابيه من حسابها وانا بس اجمع برصيدي الي مدري وش فايدته ..,
وصلنا للبيت وساعدت امي تنزل ..!!
دخلنا البيت هي دخلت غرفتها وانا دخلت غرفتي ..!
قعدت ابكي ولا ادري وش السبب يا كثر ما ابكي واتحسربدون سبب من دريت اني لقيطه...
وتزيد حسرتي اذا تذكرت ان ها الانسانه العظيمه ماهي امي ولا اقدر اصرح انها تقرب لي..؟!
شعور ما ادري كيف اوصفه لكن الاكيد انه شعور حزين ..,
يغصب عيوني على ذرف الدموع..,
سمعت صوت امي تنادي وجيتها اركض ..!
ام عوق \وش فيتس يا دافع البلا من رجعنا من السوق اختفيتي..,
عوق بوجع\لا يمه بس شوي مصدعه ..!
ام عوق بفرحه\تعالي البسي الي شريناه وريني الزين لامنه لبس زين..,
وافتح العلب والبس وانا ظر عيون امي من ورى برقعها تصب دموعها ..
وانفجر خلاص ماعاد ت اقدر امسك نفسي واحضن امي واصيح ..’
عوق ببكى\ يمه ليش ما خليتيني ادفع فلوس الذهب ..؟!
ام عوق\وانا وش ابي بكنوز الدنيااذا ما ونست بنيتي فيها..,
عوق من بين دموعها\لا والله ماهو هذا قصدتس يمه انتي تحسين بشي..!!
ام عوق \لا والله ما احس الا با العافيه والله من يوم صرتي من نصيب ها الرجال وانا اوجاعي راحن..,
اردفت تضحك وتبلع غصه\احس اني رجعت شباب اصغر منتس..
عوق بحزن\لا والله فيه شي انا ما ني خبله يمشي علي الي انتي تسوينه..!
يمه والله وراتس شي وشي كبير..,
ام عوق\عوق اسمعي وانا امتس انتي ما انتي بزر ولا انتي الي يفوته شي ..!
عيال ناصر ينتظرون بس روحتي من ها الدنيا وشوفي وش بيسوون فيتس..؟!
وهم مالهم حق بريال واحد بس ابن ادم وش تسوين فيه الي ما يملا عينه الا التراب ..,
هم ماعاد لهم مطمع با الي سجلته بسمتس ما يقدرون يوصلون له..!
كل الطقطقه الي يسونها من بعيد والا من قريب بس يبون ينكدون عليتس..!
هم الحين عينهم على الي في البنك والله لو في يدهم شي كان مبطي رامينا انا وانتي با الشارع..,
لكن عجزو ايديهم قاصره عنا ..
انتي ما ضايع عندتس شي بنتي واعرفتس..,
اردفت ام عوق بغصه \عوق يا امي ان مت لاتنسيني من دعوه والا صدقه..,
عوق انهارت تبكى بشده\لا يمه تكفين لا تقولين كذا ..
من تخليني له ما ابي ها الحياه الي انتي منتي فيها ..,
ام عوق تمسح دموعها\تعوذي الشيطان وش ها الصياح اعو ذبالله ما خبرتس كذا وانا امتس ..؟!
انا ما فيني غير الخيرهذا الواحد ابد ما يقدر يسولف معتس..,
الحياه والموت يا بنتي بيد الله غير انها كلمه بخاطري وقلتهاتعوذي من ابليس..؟!
وش يدريتس يمكن اعيش لين ازوج عيالتس مثل ما زوجتس..؟
وقومي رجعي ذهبتس بصناديقه..!
وخلينا نطلع نتقهوى ونكلم نوره نتونس حنا وياها..؟!
قمت رجعت الذهب با العلب وانا قلبي مجروح على امي الي ما ادري وش فيهاامي كلامها ماهو عبث
اكيد تحس بشي لكن ما تبي تعلمني ..!
وصليت المغرب ودعيت ربي يحفظها لي ..,
انا ما ادري كيف بتكون حياتي من غيرها يمكن اموت لو يصير لها شي ..!
كلمت خالتي ام ابراهيم تجي عندنا تتقهوى
وجات على طول تقهوينا بغرفة امي..!
ام عوق\عويق سكري باب الغرفه با المفتاح ..!؟
ام ابراهيم تضحك \ ما تقفل الباب ام العوق الا عندها شي خطير..؟!
ام عوق\ لا سلامتس بس اليوم تشرينا ذهب لعوق وابيتس تشوفينه..!
وطلعت امي الذهب وخالتي كل ما فتحنا علبه قعدت تذكر الله ..,
ام عوق\ شوفي يا نوره عوق ماهو جايز لها تقول وش ابي فيه كله ثقيل من يلبسه..!
ام ابراهيم تغمز بعينها لعوق\ما عندها سالفه شورتس يا وضحى هو الزين..,
وطلعت امي هدية ام ابراهيم ولبستها الاسواره ..
ام ابراهيم \ الله يكثر خيرتس يا وضحى ما قصرتي وليه تكلفين على عمرتس عسى عيال عوق يلبسونتس ..
ام عوق بوجع\ يالا حقين خيريا نوره متى هاك اليوم ..,
ام ابراهيم \الله كريم يا وضحى الله يطول بعمرتس وما على الله عسير..,
ورجعت الذهب بخزنة امي وانا احس قلبي حزين ومقبوض..!!
ياربي عونك ضاق بي كونك
صليت العشا ونمت وصحيت على صوت التيلفون ..!؟
رديت الا صوت رجال عرفته على طول انه زياد
ما يمدي قال كيف الحال الا امي طالعه من غرفتها..!؟
ام عوق بتعجب \ من الي داق بنصاص الليالي..!
عوق\ يمه ما ادري شكله غلطان..!
ورديت على زياد يا اخ تراك غلطان واسكر الخط وارجع لغرفتي..!
الايام الي قبل زواجي كثرتفكيري في امي ما خلى مجال لأي شي ثاني يحتل عقلي..,
ماعاد في راسي الا امي اشوفها ولا كأني اشوفها..!
ما ادري وش جاني هل هو شعور اني با ابتعد عنها او شعور اني با افقدها..,
امي حاسه انه فيني شي وكلمت ريم تبيها تساعدني اخلص جهازي ..؟
صرت امشي بدون وعي ريم هي الي تشتري وتحط وتجيب وانابس ادفع..,
سبحان الله كانت ريم هي الي تاخذ رأيي وتثق فيني وبذوقي اكثر حتى من خواتها..!؟
الا انه في اهم مرحله من مراحل حياتي كل شي قلب عندي لونه رمادي ..!
ما عدت احس بطعم شي ..؟!
بسرعه ريم خلصت اغراضي ..,
ريم فيها عجله غير طبيعية ويدها ووقتهاسبحان الله فيهم بركه..,
حتى ملابسي طبقتهم با الشنط ..,
ولا بقى الا فستان الزواج ننتظر بس يحددون كيف بيكون حفل العرس عائلي او عام..؟!
.
.
.
(كلمه اخيره)
في خبايآ سراديُبنا..
ثمه سعادةٌ مخبئة ?
لدينا أشياء بيضاء تسعدنا
و لكننّا لم ننتبه لها !
لدينا ؛ ( أهل وأخوة و أصدقاء)
لِـ نشعر معهم بِ الفرح ? "
لدينا ؛ ( دين )
فضلنا الله به على الكثير
لدينا صلوات وأذكار ترتاح بها الأرواح ?
لدينا الكثير لنسعد به ،
لك الحمد يَا ر بْ
.
.
.
الي الملتقى قريبآبأذن الله
وسالفه جديده
طيف الأحباب
ام الوليد
31-12-11, 12:30 PM
جديد مواضيع قسم القصص المكتملة (بدون ردود)
العرض العادي
