السلام عليكم ورحمة الله وبركاته ...


صبــــــــاح \\
حمـــام الحــرم..
يحلق دون قيووود...

مســـــــــاء \\
تنهيدة الصدر ..
غـــداً يوم جديد ..


كيــــــفكم الــ ليلااااااااس ..؟؟
أحبتــــــــي في كل مكان ..؟؟


بعض الغاليات إحتجوا ليش انا ماذكرت فترة معاناة هديل مع مرض ذياب..
وكيف ماعرفتوا عن المرض وأنتوا معها خطوة بخطوة..
ليش أخفيت الموضوع عنكم..؟؟
عزيزاتي هذا أمر مدروس عندي..
كنت خايفة وحدة تكشفني وتقول ذياب بيطلع فيه شيء..
بس كل توقعاتكم كانت إنها بترجع عشان ذياب..
بيهددها بولدها..إما ترجع له أو يأخذها..
حاولت امنعكم تفكرون بهذا الشيء..
لما هو وعدها إنه ماراح يلوي ذراعها بذياب..
وكنت حابة إنكم تتفاجئون حالكم حال غازي..
وبإذن الله بتتفاجئون اكثر مع الأيام القادمة..

اما عن القول بأني وضعت نفسي بموقف محرج..
ولم أعد أعلم كيف أنـــهي الرواية..
فهذا قول أحترمه و لا أتفق معه ...
الرواية بُنيت على النهاية..
فانا صورت النهاية قبل أن أسرد البداية..
لقد كان هذا كلامي منذ الفصوول الأولى..
لا بأس إن لم تنل الرواية بأكملها إعجاب الجميع..
فــ لكل منا رأيه وذوقه..ولولا إختلاف الرأي لبارت السلع..
ويكفيني فخراً أن أعلم بان كل شخص قرأ روايتي ..
قد أعجب ربما بحــرف واحد..او موقف ..
او شعر بإحساس غضب..فرح..حزن..صدمة..
وربما إبتسم بمرح..أو إبتسم بسخرية..
وقد يكون بنى مواقف عديدة على موقف واحد..

أرحب بجميــــع إللي أنضموا لقافلتنا..
وشكـــــــــراً بحجم السماء لكل من سجل عشاني الله يعلي شانكم..

البارت إهــــــداء لــ الجميييع..
ولــ غاليتي روح زايد ..


البارت الثالث والسبــــعون ..


يناديني صباكِ إلى الربيعِ
ويمنعني الخريفُ من الرجوعِ

وتسبح بي عيونُك في الأماني
وتغرقني عُيونيَ في دموعي

فيا أفياءُ! يا مائي وزادي
ويا أفياءُ! يا ظمأى وجوعي

أيعذرني جمالك إنْ رآني
وأظفار الكهولة في ضلوعي؟

أيغفر لي دلالك ما ألاقي
من الطعناتِ في القلب الوجيع؟

وفيم أتيتِ؟ ما تبغين عندي؟
وهل عندي سوى حلمٍ صريعٍ؟

وهل عندي سوى عمرٍ تعاني
بقاياهُ.. بمِقصلة الصقيع؟

المرحوم بإذن الله تعالى.. غازي القصيبـــي ..



مسكت ثوبه بقوووة وهي تشهق تحاول تسحب هواء..
قال لها إبـــكي..
بس هي ماتبي تبكي..
بكت كثيييير عليهم..
واليوم عجزانة تبكي على حالها..
هديل بمرارة\أكــــرهـ سعود ..أكرهه..

طاحت في حضنه وهي ترتجف..
وبعد ثواني فقدت وعيها..

ضمها له بقوة وثبتها عليه..
كان متاكد من إن أخوانها ما أنتبهوا لحركته معها..
وإنه بحركة بسيطة منه في أسفل راسها..
قدر يخليها تفقد الوعي..
هدوئها في حضنه ينحسب لصالحه..
ألتفت بنص وجهه لهم وتكلم بصوت جامد ..
غازي بحدة\ممكن تتركوني معها شوي..

قابلته عيونهم ونظراتهم بالحقد والرفض..
بس هي أجبرتهم بتصرفها..
لانها ماهدأت وكفت عن الصراخ الا لما حضنها..
طلع علي وسحب معه هادي وسكر الباب..
بس هذا ماطمن غازي..
شد يدهـ عليها وأقترب من الباب وقفله بالمفتاح..
شالها بين يدينه ونزلها على سريرها..
قبلها على جبينها ومسح بيدهـ على خدها ..
اللي لازالت أثار الكف معلمة عليه..

توجه لدورة المياهـ..أخذ منشفة صغيرة..
بللها مويا باردة ورجع لها..
قرب منها ومررها على جبينها وخدودها ورقبتها..
ثبتها على بداية صدرها ..
ولمها له بخفة لما شافها تحرك جفونها ..
مرت لحظات وهو واثق إنها صحت..
انتظرها تنفض نفسها من حضنه وتبتعد عنه..
بس هي ظلت ساكنة من غير ما تتحرك..
لحتى شككته بنفسه..
فرفع راسها له وألتقت عيونه بعيونها ..

قرب منها اكثر وقبلها بشوووق..
ماقاومته ولا تجاوبت معه..
ظلت مثل الجماد..
حط خده على خدها وهمس لها..
غازي بوله\أحبــــــــك ..

ما اثرت فيها كلمته..
تحركت بتعب رفعها تجلس وجلس جنبها ويدهـ محاوطة كتفها..
غازي بحنية\مايهون علي أشوفك في هـ الحالة..
كنت متأكد إنك مو بخير من بعد ما شكيتي الحال..
ومن إتصال علي فيني..
عرفت إنك تركتي البيت..
خفت تكونين هربتي منهم مثل ماهربتي مني..

ارخت راسها على كتفه..
وهي تسمعه يوصف لها شعورهـ لما عرف بغيابها..
حركتها شجعته يقربها له اكثر..

غازي بهدوء\كلمت هادي اتطمن عليك..
ابتسم بسخرية\عادت الأقدار نفسها يا هديل..
طعني بنفس الكلمة اللي طعنته فيها..
البقاء في راسك..قلتها له من سنين..
قلتها بإسلوب جامد وقاسي..
وكأني انتقم منه ومن حالي فيه..
وبنفس الإسلوب قالها لي..
البقاء في راسك..

حسيت كيف الكلمة تذبح وتحرق الرووح..
تركت كل شيء وتوجهت لـ المطار..
هاوشتهم لما ما سمحوا لطيارتي تقلع الا بعد ماينتهي الإضراب في المطار...
والإضراب أستمر يومين وبالموت انتهى..
كنت ممكن اصير إرهابي ومطلوب امنياً..
ثلاث ساعات قضيتها في إتصالات عشان اعرف وين أنتي فيه..
اللي عرفته إنك مع هادي..
فطلبت منهم يدورون على سيارة هادي ويدلوني على موقعها..
ومن قوة علاقاتي حددوا موقع سيارة هادي..
وبعد ماوصلت الرياض توجهت على العنوان..
وكان عنوان بيتكم القديم..
ألتقيت في هادي جالس في سيارته..قبل شارع من بيتكم..
وذياب يبكي معه بالسيارة ..مارد علي لما كلمته..
وماكان مهتم في ذياب اللي يبكي..
سألته عنك وبعد الضرب جاوبني إنك رجعتي هنا..
أخذت ذياب منه وجيت هنا ادورك ..

دخلت من دون إستئذان لداخل بيتكم ..
وتواجهت مع ابوك وامك وجدتك..
لاهم اللي طردوني ولا أنا اللي طلعت..
كنت واقف معهم واسمع صراخك..
أسمع حسرتك على نفسك وعلى سنين احرقتها لك..
صدمتك كيف كل اللي صار ماله قيمة..
ياجنوني مالها قيمة عندك..
تعتبرينها سنين دمار لنفسك ومستقبلك وكيانك..
تشوفينها سلبت منك شبابك أنوثتك ويمكن صبرك..

بس أنا اشوفها سنين عوضتني..
شوفي عمري كم سنة..ماحسيت بطعمها إلا معك..
صح أنا قسيت عليك وتجبرت واذيتك كثييير..
وبنفس الوقت أنصهر الحديد اللي كان مغلفني..
انهارت أسوار الجمود من على قلبي..
ضاعت سنين منك..
ويمكن أفضل ما حصل لك فيها وجود ذياب معك..
خليني اعوضك مثل ماعوضتيني..

شدد إحتضانه لها وقبلها على رقبتها وكتفها..
بعدت عنه ونزلت من على سريرها..
توجهت لدورة المياهـ ..
دخلت وقفلت الباب عليها..

تنهد بآسى على حالها وصار يمشي في الغرفة..
يدري إن وجودهـ في غرفتها وفي بيت هلها غير مرحب منهم..
بس مايقدر يلقاها الا هنا..
ألتفت عليها بصدمة لما سمعها تتكلم بصوت ناعم..

هديل بإبتسامة\غازي تحبني..؟؟

الصدمة ألجمت لسانه..
تبتسم وتتكلم معه بدلال..
ومن دون نظرات عدوانية..

عادت سؤالها بخبث..
وهي تضحك برفعة حاجب..
غازي تنهد\وش ناوية عليه..؟؟
هديل\أبدأ أبني حياتي اللي انتوا دمرتوها..

أبتسم وقرب منها..
بس هي منعته لما مدت يدها واشرت له يظل بمكانه..
هديل\بـ الهون علي ياغازي..
والحين إطلع ..

مسك يدها وقبلها بحنية..
وتراجع كم خطوة قبل لا يزعلها منه..
وعشم نفسه..
بداية صلحهم إبتسامة..
وطلع من غرفتها ..
وهو يدري إن إبتسامتها ماهي دليل الا على إنتقام مُـــر منها ..
قفلت الباب وراهـ ولازالت الإبتسامة الغريبة مرسومة..

فِقَدتْ الْحِلم.. والــبسمــه ..
وبــان بجسمي إرْهـَاقِي ..

خسارهـ مانَفَع صِدقِيْ ..
ولا فَادتـْنِي أخْلاقِــيْ ..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛

كان جالس جنب جدته ويحس بالدم يفور بعروقه..
كيف يمتلك الجرئة يطلع غرفتها ويحضنها قدامه..
هو اللي أخذها منه سنين ومنعها عنهم..
هو اللي قطع صلة الرحم بينهم..
كذب عليه يوم جاهـ كسير يطلبها منه..
قال ماتت..مابقى معي إلا جديلتها..
واللي ذبحه اكثر إبتسامته لما نزل من عندها..
وكأنه منتصر بحربه..

يطلب أبوهـ على إنفراد..
وش يبي بأبوي..؟؟
بيطلبها من جديدي..
بيأخذها ويبعدها عني مرة ثانية..
ماكفاية إني صرت أكرهـ إنسان بحياتها..
ماهو أنا اللي خذلتها وسلمتها له..
كان بيطلع مع أبوهـ وغازي بس جدته حلفت مايطلع وراهم..

هادي بقهر\إلى متى بتربطوني بحلوفكم ويمينكم..؟؟
اللي عندهـ يمين يحطها في ذمته..
انا ماعدت مسئول عن حلايفكم..
إعتقوني لوجه الله..

طلع الدرج بخطوات سريعة..
توجه لغرفتها دق الباب وحاول يفتحه بس هي كانت مقفلة عليها..
ناداها وترجاهاتسمعه بس ماردت عليه..
راح لغرفته وشافها معفوسة وكل أغراضه مرمية على الأرض ومكسرة..
حتى برواز شهادته مكسور..
داس على شهادته بجزمته من غير إهتمام..
أنسدح على فراشه وهو يتنفس بقوة..
يحس بضيقة كبيييرة تخنقه..
قهر يسيطر عليه..
معها حق في كل كلمة قالتها..
جبان وتافه ما استاهل تضحيتها..

مرت في باله لحظات جنونها لما انهى إعترافه لها..
صار اكثر من الي كان متوقعه..
طلب من ابوه و علي يكونون حاضرين..
عل وعسى تسهل عليه المهمة..

أعترف لها بكل شيء..
كيف قابل سعود وكيف أنتهى فيه الأمر بالخروج من السعودية..
قال لها عن خوفه وعن انه كان يظن نفسه هو القاتل وراح يتحاسب..
ظل هارب لحتى يعلن غازي الإفراج عنهم..

مرت لحظات طويلة..
وهي ضامة نفسها بيدينها وسرحانة عنهم وتفكر..
مايدرون أفكارها وش كانت..
مايدرون إنها كانت تسترجع لحظات العقاب..
من أول ما نزلت من سيارة أبوها كيف عاملوها بقسوة..
وتهديدهـ لها في السيارة قبل تقلع الطائرة..
ضاعت في الماضي ولا عرفت بأيش تواجهم..
وش أكثر شيء تألمت منه بغربتها..
تبي ترميه بوجيهم وتقهرهم مثل ما أنقهرت سنين من دون حق..

وقفت وهي تشهق وترتجف..
صارت تدور في مكانها..
تبي تتكلم تبي تقول لهم كل شيء..
تزاحم الكلام في صدرها..أختنقت بحروفها..
ماطلعت منها الا ..
الآآآآآآآآآآآآآآآآآآهـ ..
صرخت فيها بصوت عالي مجروووح...

ولما حست بيدين أبوها تحتويها..
نفضت نفسها منه..
وصارت ترمي كل شيء بطريقها عليهم..
مسكها علي ومنعها تقرب من هادي..
كانت تصرخ عليه وتشتمه..
ضربته وخلصت نفسها منه بالقوة..

وقربت من هادي اللي كان واقف ينتظرها توصل له..
مستحيل ينسى نظراتها له..
كل اللي سوته له صرخت في وجهه بكلمة وحدة..
هديل\أكــــــــــــــــــرهك ..

سحبه علي من قدامها وطلعه من البيت غصب عنه..
وعطاهـ ذياب اللي كان يبكي يبي يرجع لهديل..
وطلب منه يوصله لامه ولا يرجع لهديل..

طلع من البيت وهو يسمعها تعاتب أبوهـ ..
وكانت أخر كلمة سمعها تقولها..
كانت أقوى واقسى كلمة يمكن يسمعها هو أو ابوها..
لما قال لها يابنتي قالت أنا مو بنتك..
أنا بنت غازي..

وقف من على سريرهـ وطلع من غرفته ..
كان حاقد عليها بسبب كلمتها..
ليه تقول إنها بنته..
معقولة بترضى ترجع له بعد كل اللي سواهـ ..

صار ابوها..؟؟!
مافيه بنت بتعتبر زوجها مثل أبوها...
إلا إذا كان بحنية وطيبة ابوها..
وإذا كان يراعيها ويهتم فيها مثله..
معقولة كان مثل أبوها لها..
صرتي بنته يا هديل..؟؟
صرتي بنت اللي فرقك عنا وغربك..؟؟
بنـــت عدونا..؟؟!

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛


جالسين بالصالة العلوية لبيت ام غازي..
شوق تضرب رشا اللي تتمسخر عليهم..
رشا\ألحين من كل وعيك إنتي وإياهـ ..
طيب قلتوا بتسوون حفلة وخرابيط ماقلنا لا..
بس يعننكم ماتشوفون بعض من فترة عشان تلتقون ليلة الحفلة..
شوق\عذوووول قومي نامي...
رشا\ههههههههههه ماعندك رد يا شوكة..؟؟
شوق تبتسم\انتي وش حاشرك بينا..
انا وإياهـ ننفلق مالك شغل..
رشا\وش حشرني..هذا اخوي خنت حيلي..
ابي له الزين..
لو علي زوجته بحرمة ثانية سنعة ماهو عصقول..
شوق\اممم أنا عطيتك بطاقة دعوة تحضرين حفلتي..
خلاص انا تراجعت لا تحضرين..
رشا تضمها\وهـ أختك حبيبتك لازم أحضر..
شوق\ياربي كل شيء يتم على مافي خاطري..
رشا\إن شاء الله..
امممم طيب بأقووولك شيء بس ما تحششين أمي علي..؟؟
شوق\والله ما أحششها عليك هههههههه أعجبتني الكلمة..
رشا\المهم إسمعيني أنا إحم..
أخاف تنقدين علي يا شوكة..
شوق بعصبية\صح أنتي نقدتي علي وشرشحتيني..
بس أنا طيبة ماب أنقد عليك..
رشا بنص عين\أنتي طيبة..؟؟
شوق\قومي نامي..
رشا\هههههههههه طيب اسمعي..
أنا محضرة مفاجئة لرجوحي..
شوق بحماس\وش محضرة يا قليلة الادب..؟؟
رشا تبتسم\انا قليلة أدب يا اللي بتتزوجين وأنتي حامل..
شوق\هههههههه ذكرتين باللي في الافلام...
لما تخلف منه ثلاثة وتكون حامل في الرابع يقررون يتزوجون..
رشا\لا وبزارينهم هم اللي يزفونهم..
شوق\الحمدلله لحقت على عمري اتزوج قبل يولد..
عشان اذا شاف نفسه بالصور معنا يقول وش السالفة..؟؟
رشا\ههههههههههههه خلاص أسكتي واسمعيني..
شوق\طيب كملي مفاجئتك..
رشا\اممممم بعد حفلتك بأسوي لرجوحي حفلة..
طبعاً أنا مو مثلك وجهي مغسول بمرق..
حفلة بيني وبينه..أبي ألبس له فستان عروس هادي طبعاً..
لأني ما لبست له فستان ولا صار له حفل مثل الناس..
وأنا عشت خرابيط الفستان مع سعود الله يرحمه..
شوق\الله يرحمه..
بس المهم لا تنامين وتخربين المفاجئة اعرفك رأسك والمخدة..
ضربتها رشا\الشرهة مو عليك..
علي اللي معطيتك وجه..
شوق\هههههههههه لا بجد رشا إنتبهي..
إلا ماقلتي لي عديتي نص عارضه الثاني..؟؟
رشا بزعل\لا..كنت متحمسة كثير..بس حلق وضاع علي العد..
شوق\ههههههههه يالله الجايات أكثر..
رشا بسخرية\طالب جاء قومي تخبي منه عيب يشوفك قبل العرس..

توقعت إن شوق بتهرب منه..
لان لها فوق الأسبوعين تتغلى عليه ولا تسمح له يشوفها او يكلمها..
طالب\هجت ام السعف والليف..؟؟
رشا\هههههههههههههه إيه هجت..
طالب بابتسامة\تزوجت لي وحدة خبلة..
المشكلة خبالها هـ اليومين عاجبني..
حسيت إنها انثى تستحي..
شوق من بعيد\طويلب وقص بلسان رشا..
طالب\أرهفي صوتك يا مرهـ عيب أسمعك..
رشا\هانت يا أبو رشا يومين وهي حلالك..
طالب بصوت خفيف\بالله قولي الصدق..
هي تغيرت وجها خشمها كشتها..
أي شيء فيها تعدل ولا باقي على خبري..
شوق\لا ماتغيرت على خبرك..
طالب يوقف\وقطع شكلي باكشت فيك واخليك على الكوشة لحالك..
شوق\عادي أنت الخسران..
طالب\أنتي بتروحين غرفتك ولا اجيك..؟؟
شوق\لا خلك مكانك بينا إتفاق..
طالب\الخبل اللي يرضى بإتفاقاتك..

مشى بإتجاها وهي صرخت بمكانها تضحك وتحلفه يرجع..
رجع لرشا وهو يضحك على خوفها..
طالب\والله اللي طحت من عين ام غازي..
مابتعطينا من الورث كله بسببك..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

مرت عليها ايام وهي صادة عنهم كلهم..
ولاتنزل من غرفتها ..
بس اليوم طلعت منغرفتها وجلست مع امها في الصالة..
كلهم لاحظوا تغير خفي فيها..
بس ماقدروا يحددون وش يكون..
ما تتكلم إلا إذا أحد سألها أو تكلم معها..
متجاهلة وجود هادي بشكل كبير..
ولا كأنه موجود معها بنفس المكان..
حتى ابوها وأخوانها بينت لهم غن مالها اي رغبة في الكلام معهم..

كانت شايلة هديل الصغيرة بحضنها..
لما ضربها ذياب بزعل..
ناظرت فيه بهدوء..نزلت هديل وشالته بحضنها..
ماقدرت تسمع كلام امها وغادة وجدتها وماتتفاعل معهم..

الجدة\لا يكون حامل يالغبراء..؟؟
غادة بزعل\إيه يومه حامل والنتيجة عندي من شهرين..
الجدة\هههههههههه أجل ماحولك شر..قلتي تبين الطلاق..؟؟
غادة بغيض\إيه أبي الطلاق..هو رجال مؤذي وكريه..
وما اطييقه..كل شيء يخترب علي بسبته..
أم علي بصدمة\غادة صاحية انتي..؟؟
غادة تبكي\يومه والله إن نفسي عايفته..
ما اباااهـ..خلوه يطلقني..
الجدة\ياجعل يضحك سنك يا غادة..
هذا نفس اللي جاني على ابوك..
بس جدك ماحبني على راس خشمي وقال لبيك..
إلا هفني على وجهي وقال قدامي..
تعيفيني ياالجيد عنبوا من حبك بعد اليوم..
غادة بزعل\شكل زعله كان كبير عليك يومه..؟؟
الجدة تتنهد\كان ابوك لاعبن فيني..
بس قلبي ماتحمل زعل جدك..
رحت اراضيه وقلت له كله من ولدك ماهو مني..
هديل بجمود\ضربك ورحتي تراضينه..؟؟

ألتفتوا كلهم عليها..
والجدة أنبسطت إنها قدرت تجذب إنتباهـ هديل..
فجاوبتها وهي متأكد إن إجابتها يمكن تلينها..او تثورها عليهم..
الجدة بمحبة\رحت اراضيه لاني أدري ما بيعزني احد كثرهـ..
جرحته يوم عفته وقلت ما ابيه..والحمل مالين قلبه علي وقال بأعذرها..
الجرح يابنتي جرح إن كان بسكين ولا بكلمة..
رحت له مشتاقة ارجع واصير الجيد بقلبه..
وأكون الأوله والتالية..
بس جدكم كان اهم ماعندهـ نفسه وكرامته..
صدني وأنا ظليت اركض وراهـ..
هديل بقهر\ليه تركضين وراهـ..
أنتي معذورة بصدك عنه..وضربك وهو ماله حق..
ليه تبين ترضينه وهو غلطان وجارحك..؟؟

حست بقلبها يتقطع على حال هديل..
كانت شاكة إن اللي صار فيها اكبر من ماتقوله لهم..
وغضبها من جدها دليل إنها تعرضت لضرب وقسوة..
الجدة بحسرة\إيه غلط وضربني..
بس يابنتي أنا لقيته يحبني أكثر من امي وابوي..
ضربني وانا ادري إن ضربه لي أوجعه قبل يوجعني..
يكفي إن شفت زعله علي أكثر من زعلي على حالي..
ويوم إني بكيت عندهـ..شفت الندم يأكله وهو ساكت..

هديل بغصة\ماهو مستحيل نلقى اللي يحبنا اكثر من امنا وابونا..
بس وش يسوى حبه وهو قاسي وحقير..
غادة بشهقة\جدي حقير..؟؟
الجدة تضرب غادة\وجع عساك لـ الجرب..
غادة\هي اللي قالت ماهو بانا..
هديل بسخرية\الله يرحمه..
ودامك رضيتي بمذلته لك تحت عنوان إنه يحبك..
فيا كثركم ياللي رضيتوها على انفسكم..
أم علي\يابنتي إذكري ربك..وش فيك محاربة الدنيا وهلها..
مابه إنسان معصوم عن غلط وزلة..
يابنتي ماخبرتك قاسية وماتراعين..
هديل بصد\رباني يومه وأحسن تربيتي..

وقفت وطلعت من الصالة وهي تشوف أبوها ومحمد داخلين البيت..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛


قفلت جوالها بعد ما انهت إتصالها مع أخوها..
وأنتبهت على إبتسامت سارة ..
ياسمين\ياساتر سامعة نكته..؟؟
سارة\يابنت لهجتك رهيييبة..
بالله إنتي تدلعين عند سلمانوه كذا..؟؟
يامسين\ههههههههه في البداية..بس هلا صرت سعودية..
سارة تهز راسها\لا لا يا وردة ما اتفقنا كذا..
حافظي على دلعك..متى ماحبيتي تجيبين راسه إستخدميها..
ياسمين\أجيب راسه..؟؟
سارة تبتسم\هذا مصطلح عندنا معشر الخليجيات..
يعني إذا حبيتي تلينين راسه لك وتخلينه يطيعك بشغله إستخدمي دلعك..
ياسمين\سارة أنتي تدلعين..؟؟
سارة بنص عين\أجل وش شايفتني..وعند أنواع أسلحة قصدي أنواع دلع..
ماتعرفينها لا انتي ولا المبتدئات من شاكلتك..
ياسمين\علميني بعض أسلحتك..
سارة بغرور\تعقبين ياحرمة أخوي..
خلصي الأسلحة اللي عندك أول وبعدها امولك من اللي عندي..

سلمان\خير يا خرابت البيوت..
وش مخطط التخريب اليوم..؟؟
سارة\الله يسامحك..جزاتي جاية أشوف حرمتك..
أسنعها لك واجملها..
سلمان بغمزة\قمر وعاجبتني حتى بالمنشفة..
سارة بشهقة\ياسمين منشفة من وراي..؟؟
وين اللي خططنا له..
ياسمين\إنطمي لا يسمعك الحين..
سارة\طيب يا هبلاء خليه يلعب عليك..
سلمان\سارة حبيبتي زوجك سافر..؟؟
سارة\لا بسم الله عليه بعد تسبدي..
سلمان\إستحي..
سارة\توها ياسمين تقلدني وتقول بعد تسبدي سلمان..
سلمان بضحكة\ههههههههه لازين دامك تعلمينها السنع اللي كذا ماعندي مانع..
ياسمين بقهر\كذابة..
سارة بهمس\أجل منشفة ومن وراااااي..
ياسمين\طيب بأقولك بس لا تحرجيني معه..
سارة تبتسم\ترى ماقالت بعد تسبدي قالت بعد حيي سلمان حبيبي..
ياسمين بشهقة\والله كذابة لا تصدقها..
سلمان\هههههههههههه طيب ما باصدقها لأني أعرفك أكثر منها..
يالله أنا طالع تبين شيء ياوردة..؟؟
ياسمين\شــكراً..
سارة حمقت\بلى تبي..إسمع وانا أختك..
ترى يمدحون الورد..والهدايا الرومنسية..
تبيها ترضى من دون رشوة ترى مايصير..
عيب حس على دمك..كفاااية أعلم في زوجي..
ما يجيب هدية الا بعد ما اترجاه يجيب هدية..
لا وبعد اقوووله خلها لي مفاجئة لما تجيبها..
سلمان\هههههههههههههههه الله يرزقك بهدية الليلة..
سارة تضحك\ههههههههه إن شاء الله..بس ماظنتي فيه هدية..
لاني لازم ازن على راسه قبل الهدية بإسبوعين وإن زادت ثلاثة..

سلمان\يعني يا بعض الناس تبون هدية من أنت اللي مزعلكم..
ياسمين\شكــراً ما ابي منك شيء..
سارة\ترانا حريم ونفهم على بعضنا..
جيب لها هدية وأنا أتصرف فيها..
ياسمين\والله ما اخليك تاخذينها..
سارة\هه شفت يا فديتك..
عرق النساء لازم يظهر..

ضحك على شكل ياسمين المعصبة من سارة..
قرب منها وقبلها على خدها بحنيه..
سلمان\تعقب سويرة تاخذ هديتك..
ياسمين\.......................
سلمان يبتسم\لا تردين يكفيني أنفاسك..

سارة بهمس\الخطة الخطة..
سلمان\إكفينا شر خطتك يا سارة..
سارة\مالي شغل أنا في صفها لحتى ترضى عليك بكامل قواها العقلية..
سلمان\وإن شاء الله بترضى..

قبل يطلع نادته سارة..
سارة\سلمان حبيبي..ترى يمدحوون زارا..
سلمان يضحك\ابشري باللي تبين..
سارة\الله يصلحكم دائماً أذكركم تهدوني ولا ما احد يهديني..

طلع سلمان وهو يضحك عليها..
ياسمين بعصبية\مشفووحة..
سارة\ههههههههههههه لبى السعوودية ياعرب..
من علمك مشفوحة..
ياسمين\مذبوحة على الهدايا..؟؟
سارة\اعوذ بالله..خلينا نترزق..
يقولون الرازق في السماء والحاسد في الأرض..
ياسمين\مابتاخذن الهدية ..
سارة\من على خشمك..وألحين قولي وش سالفة المنشفة..؟؟
ياسمين بإحراج\خلي أخوك يعلمك..
سارة بنص عين\كذا يا وردة..؟؟
ياسمين\مالك أمان..خلاص أقووولك..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

نزلت وهي لابسة عبايتها وعبدالله معها..
كانت ناوية تتوجه لـ الجامعة وتقابل خلود هناك..
أيقنت غنها مهما حزنت او تحطمت..
بتظل لوحدها في كهف الماضي..
فقررت ترجع وتبدأ حياتها وتتجاهل كل اللي حوالينها..

غادة\هديل شفتي اخت زوجك وش مسوية...

جذبت إنتباها بكلمة اخت زوجك..
تحفزت كل حواسها لغادة..
تتكلم عن أعدائها..
وأعدائها ياكثرهم..
كلهم من الــ جالي..
غادة\مسوية حفلة زفاف لها..
أذكر إنها لما جات تزورك بعد مارجعتي..
تقول إنها حامل..كيف تسوي عرس وهي حامل؟؟
الجدة بنقد\وش ذا العلم..
حامل قبل تعرس..؟؟
غادة بصدمة\هاهـ..؟؟استغفر الله يومه..
لا ماهو كذا..لا ان شاء الله مو كذا..
هديل وش سالفتها..؟؟مو هي متزوجة؟؟

رسمت في بالها صورت شوق..
لو تنسئل هذا السؤال عن هديل وش بيكون ردها..
يمكن تذمها وتشهد بالباطل..
بتقول إيه جارية وحامل بالحرام..
همس ضميرها..أنتي مو مثلها..
وهمست لضميرها..متى تموت وتريحني..

هديل بهدوء\هي متزوجة من سنين..
الجدة\الحمدلله ..بس وش بلاها مئجلة حفلتها؟؟
هديل بسخرية\كانت مشغولة باعراض الناس..
قصدي بدراستها مع زوجها..
غادة\أحس مالها داعي تسوي حفلة الحين..
هديل بجمود\ليه مالها حق..؟؟
انتي ما اعتقد أحد منعك من حفلة وفستان وطرحة..
وهي ظروفها أجبرتها تتخلى عن الفستان والحفلة..
من حقها تحتفل بنفسها مثل ماتحب..
ولا أحد له حق ينتقدها لان ما أحد يعرف ظروفها كيف كانت..
غادة بإستفهام\اللي يسمعك يا هديل يحتار إن كنتي تحبينها أو تكرهينها..
هديل بواقعية\لا احبها ولا اكرها..
لانها ولله الحمد ما تستاهل أوهبها من قلبي شيء..
لا حب ولا كـــرهـ وهذا حالها وحال الجميع..

غادة\أرسلت بطاقة دعوة لك..
تبيك تحضرين حفلة زفافها..
هديل برفعة حاجب\دعوة..؟؟
غادة\إيـــه..
هديل\متى الحفلة..؟؟
غادة\بكـــرهـ ..
أم علي\وليه تسألين..؟؟
لا يكون ناوية تحضرين حفلتها..؟؟
هديل بحقد\وليه لا..
أهل زوووجي يومه..
ويمكن ارجع لزوجي بعدها..

تجالهت شهقات امها وغادة..
ناظرت في عبدالله الي واقف مصدوم من كلمتها..
هديل\عبدالله غيرنا طريق المشوار..
مابأروح الجامعة..خذني على المملكة..
يالله حبيبي السواق ينتظرنا..

طلعت من البيت وعبدالله يشد شعرهـ بقهر
عبدالله\بنتك وش بلاها..؟؟
تقول بترجع له..أروح معها ولاأسحبها من كشتها..
غادة بإبتسامة\روووح معها بسرعة..
وانا باكلم سارة ونلحقكم المملكة..

طلع عبدالله بعد هديل وركب معها السيارة..
كان جالس قدام جنب السواق وكل لحظة يلتفت عليها..
أنتبهت على حركته وكانت متاكدة إنه يبي يصرخ عليها..
أتصلت على خلود واعتذرت منها ..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛


أنهى كلامه لاخوهـ وعياله..
قال لهم كل اللي قاله غازي..
رد عليه هادي بصوت مقهور..
هادي\وتبي ترجعها له..؟؟
أبوعلي\إذا وافقت ترجع له ما بأقول لها لا..
وإذا رفضت ما احد بيجبرها..
علي\يعني هو يهدد..
ابوراكان\ليه يهدد..؟؟
علي بقهر\لأنه يدري إنه بيحرجنا بالجاهة اللي بيجيبهم معه..
ومالنا قدرة نرد جاهة كبيرة جايين يطلبون بنتنا ترجع لزوجها..
يبي يذلنا ويلوي ذراعنا..
راكان\لاتأخذ الامور بالعصبية يا علي..
المسلمين كلهم يدرون إن الزواج قسمة ونصيب..
وإن مارجعت له ما أحد له علينا شيء..
القرار لها ماهو لنا..
ابوعلي\وانا مع راكان..
علي بغضب\يوبه هو لازم يتراجع عن جمع القبايل..
ماهو بكفو يذلنا قدامهم..هديل مابترجع له..
ابوعلي\إلى متى بامشي حكم الناس على بنتي..
ما عطيته إياها بالدس زمان الا بسبب الناس..
وش فادونا فيه..لارفعونا لـ السماء ولا خسفونا بالأرض..
خلنا نبين لها قبل لا نبين له..
إن مابه من يستاهل نوجعها عشانه..
هادي\انا بأروح اكلمه..
ابو علي\والله العظيم ماتروح ولا تقابله..

هادي بقهر\يوبـــــه تكفى خفف حلوفك من علي..
لا انت ولا امك ولا أخواني..
كل من ضاقت فيه حلف علي..
خلني أقابله ومابيصير إلا كل خير..
ابوعلي\حلفت ما تقابله ولا تطلبه شيء..
هادي\ليه تقصيني عن الموضوع وانا راس السبايب..
ماهو خذاها براسي..
خلني أبيض وجهي مع اختي..
علي\صل على النبي يا هادي..
هادي\عليه الصلاة والسلام..

وقف وطلع من المجلس..
يبون يرجعونها لي..يساومون فيها من جديد..
ما بترجع له لو تصرخ بكل صوتها إيه أبيه..
أعرفها كتوووم..حاس بقهرها بوجعها..

ترددت في ذاكرته كلمتها..
غازي هو أبوي..
يعقب ماهو بابوك..
لو كان حنون عليك ما ضامك وحرمك من هلك..
لو يحبك مثل ما يدعي..
ما كنتي مقهورة اليوم وتصرخين..
لو كلهم يعمون عيونهم عنك..
انا عنك ماعميت..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

وصلوا لـ المملكة نزلت وعبدالله معها..
ناظرت حواليها بحنين..
خمس سنين وزيادة ما زارت اسواق المملكة..
حتى اغراض ذياب واغراضها..
كانت غادة هي تنزل المول وتتشرى لها..

دارت بالمول وفي ابلها ستايل معين تبي تظهر فيه..
ماتدري غن كان قرارها بحضور الحفلة صح أو غلط..
بس مستحيل تتراجع عن هذي الخطوة..
كلهم يكملون حياتهم وأنا لازم أكون اقوى منهم..

طلعت جوالها وشافت اسم سارة..
ردت عليها بهدوء..
سارة بمرح\يالخااااايسة وييينك..؟؟
طبينا المول عشانك..ولا بنحضر الحفلة معك..
هديل تبتسم\يصير خير..

دلتهم على مكانها وأنتظرتهم لحتى وصلوا لها..
سارة بسرعة\يالله لازم أكشخك واعدلك..
إمشي وراي..
هديل\لا يا حلوة..
انا اعرف وش بألبس..
ورجاءً ما احد يتدخل بلبسي..
سارة بقهر\تعقبين..إذا ما اعجبني ماتلبسينه..
هديل بثقة\بيعجبكم يا سارة..

أبتعدت عنهم ودخلت المحل اللي عارض الفستان اللي تبيه..
أشترت الفستان ولوازمه من نفس المحل..
طلعت وسارة وغادة واقفين ينتظرونها..
غادة\خلصتي..؟؟
هديل\إيه خلصت..
سارة\ترى بأحضر معكم الحفلة..
أبي اضحك شوي واعلق على كرش العرووسة الحامل..
هديل\حياك حضورك معي بيبسطني..
غادة\حتى أنا وامي وعسوولة بنحضر..
هديل بإبتسامة\لازم تقومون بالواجب..
مو هذولاء أهل نسيبكم حبيب قلوبكم..

أبتعدت عن سارة وغادة ومشت جنب عبدالله..
اللي كان يخز بنت في السوق لابسة عباية ضيقة..
هديل\غض البصر..
عبدالله\ياليتها اختي..كان لبستها خيمة..
هديل تبتسم\طيب روح لها قل عيب عليك يابنت إستحي..
عبدالله\عيب أتكلم معها..
هديل\اجل أمش وإن شاء الله ربي يهديها..

جلست بالمقهى وأنضمت لها سارة وغادة..
كانت تدري إن فيه كلام كثير يدور في بالهم..
بس ماتبي تعطيهم فرصة يتكلمون..
ولما تكلمت سارة ضحكت على حالها..
من اللي يقدر يهرب من سارة..؟؟

سارة\هدوولة في خاطري سؤال..
أخاف يضايقك..
هديل بهدوء\تفضلي..
سارة\اممم غادة حكت لي عن كلامك عن هذي أخت زوجك..
وعرفت إنها ماسوت حفل زفاف بسبب ظروف الله العالم فيها..
هديل بهدوء\طيب..؟؟
سارة\طيب حتى انتي ماسويتي حفلة زواج..
وظروفك يمكن اصعب من ظروفها..
هديل\والمطلوب..؟؟
سارة\أنتي أبد ماتساعدين الواحد يأخذ ويعطي معك..
يعني ليه ما تحتفلين بنفسك..خلينا نحضرلك حفلة أكبر من حفلتها..
إلبسي الأبيض وإنزفي قدام كل الناس..
خلي اللي تكلم يبلع لسانه..
غادة\إيه هدولة..امي قالت كيف تبي تحضر..
وش يقولون الناس عنها..مو هي طالبة الطلاق من زوجها..؟؟
خلينا نسكت الناس ويدرون إنك زوجة غازي وهو يبيك ماعافك..
هديل بهدوء\تدرون كنت مثلكم..
طيبة كذا وعلى نياتي..
احسب إن الزواج مايكتمل إلا بفستان وحفلة ومعازيم..
بس تعلمت إن كل هذا مايسوى شيء..قدام فكرة وحدة بس..
فكرة إنك تكونين على علم إن هذا الإنسان زوجك..
وإنتي عايشة معه بالحلال..
سارة\غريب هذا المنطق..كيف تدرين إنه زوجك؟؟
أصلاً وش العذر اللي بيخليك تعيشين معه إذا كان مو زوجك؟؟
هديل بسخرية\ههههههه يمكن فزعة..او يكون مالك قيمة..
غادة\مافهمت عليك تقصدين مسيار..؟؟
هديل تتنهد\حتى المسيار كان ممكن يكون ارحم..
ع الأقل يعتبر زواج..
سارة بعصبية\أنتي تلعبين علينا وضيعتي السالفة المهمة..
ألحين نروح نشتري لك ثوب زفاف ونحضر لكل شيء..
بس أنتي ماعليك إلا تعطينا الضوء الأخضر..
هديل تبتسم\بشـــرط..
سارة بفرح\إشرطي مثل ماتحبين..
هديل بجمود\لون الفستان يكون اسووود..
والطرحة تكون بلون الفستان..
والمعازيم كلهم يلبسون أسود..
وأهم شيء..مايكون فيه رجال في الحفل..
أقصد هذا اللي تسمونه زوجي مايكون موجود..
غادة بغصة\ليييه أنتي كئيبة كذا..؟؟
وش سوى فيييك..؟؟
سارة بصوت خانقته العبرة\هديل إحكي لنا وش اللي مزعلك وقاهرك..
حن إخواتك..كلامك فيه وجع كثيير..
جمووودك مرعبني منك..

شالت أغراضها ووقفت..
هديل\أنا راجعة البيت..
عيييب أظل برا اكثر من كذا..
وش يقولوا الناس عني..؟؟
يمكن أبو علي وشلته قالبين الدنيا يدورون على عرضهم الضايع لا يضيع مرة ثانية..

طلعت من المقهى وأتصلت على عبدالله..
طلعت معه من المول ورجعوا البيت..
وفي بالها كيف ممكن تظهر بكرة في حفلة شوق..
مالها نية تخرب فرحتها بعمرها..
بس كانت هذي فرصة لحتى تبدأ أول خطوة في إسترداد كيانها إللي أستباحوهـ..

طلبت من السائق يوقف عند صالون نسائي كبير..
دخلت الصالون وطلبت تقابل المديرة..
تكلمت معها وطلبت أحسن العاملات في الصالون..
المديرة ادركت إن عميلتها الجامدة لها نفوذ..
صار عندها خبرة بإسلوب اصحاب النفووذ..
رحبت فيها وطلبت من العاملات الإهتمام فيها ومراعاتها..

بعدما خلصت شكرتهم بإحترام وطلعت من الصالون..
انتبهت على عبدالله ينفخ بقهر..
تدري إنها تعبته معها بمشاويرها..
كانت بتطيب خاطرهـ بكم كلمة..
بس حست بجموود كبير يطغى عليها..
فتجاهلته وركزت نظرها بالشوارع..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

قامت من على كرسي التسريحة تركض..
ومسكته قبل يدخل غرفة الملابس..
رشا بإبتسامة\وين وين..؟؟
راجح يضحك\ههههههههههه البر..
وين أبي أبدل..
رشا\لا مافيه..
راجح\بعدي خليني أبدل وانام..
رشا\أولاً أنا باعطيك ملابسك وبدل هنا..
لاتدخل الغرفة..ثانياً مافيه نوووم..
راجح\ليه ماتبين ادخل الغرفة..؟؟
رشا\اممم كيفي غرفتي..ما ابيك تدخلها..
راجح\لا والله..
رشا\إي والله..

لم يدينه على خصرها وشالها يبعدها من قدام الباب..
صرخت بصدمة ولما حطها على الأرض..
لمت يدينه من ورى وترجته يوقف..
رشا\ههههههههه راجح تكفى لا تدخل..
راجح مبسوط\إلا ادخل واعرف وش في الغرفة..
رشا\خلها مفاجئة يا قلبي لا تخرب علي تكفى..

فك يدينه عنها ولم يدينها بحركة سريعة..
راجح\يعني المفاجئة لي أنا.؟؟
رشا بإستعباط\لا ابي أفاجىء نفسي تصدق..؟؟
راجح\هههههههههههه يابنت عيب ..
رشا تضحك\آآآآآي طيب خلاص قلت لك مفاجئة..
لا تخربها عليك حبيبي أنت..
راجح يرفع حاجب\طيب هذي المفاجئة من اي عيار..
يعني من العيار الثقيل..
او العادي..او ...
رشا برفض\لااا بكرهـ تعرف..
راجح بقلة حيلة\مصممة..؟؟
رشا بمرح\إيه بكرهـ إن شاء الله تعرف..
راجح\طيب عطيني ملابسي أبي أنام...
رشا\لازم تنام..؟؟ماتشبع نوم انت..
راجح\قل أعوذ برب الفلق..
متى أنام بآخر الليل عشانك..

بعدت عنه وناظرته بتهديد..
رشا\خلك مكانك..باجيب ملابسك..
لاتقرب من الغرفة..
راجح يبتسم\طيب..على أمرك..

بدل ملابسه ونام..
وهي استغلت نومه وخرجت من الغرفة تحضر باقي مستلزمات حفلتها..
واللي كان ناقص كتبته في ورقة عشان ماتنساهـ..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛


ناظرت نفسها بالمرآية..
راضية كل الرضى عن شكلها..
الفستان مايبين إنتفاخ بطنها ..
والطرحة أستغنت عنها مالها اي داعي..
تسريحتها ومكياجها مغير في شكلها كثير..
مبسوطة إنها بتقدر تحتفل بوجود امها واخوها واصحابها..

ناظرت بامها اللي دخلت عندها..
وخافت من شكلها..
شوق\يومه..وش فيك..؟؟
أم غازي بصدمة\هديل..جات..
شوق بشهقة\صدق يوومه..فديتك على هذا الخبر..
ام غازي\ليه جات..؟؟
شوق بفرح\حياها الله..ليه زعلانة؟؟
ام غازي\ماني زعلانة..انا خايفة من ذا الليلة..
غازي عصب امس لما عرف إنك ارسلتي لها بطاقة..
شوق\ليييش يعصب..؟؟مو هي زوجته..؟؟
ام غازي\يابنيت أنتي متى بتفهمين علينا..
البنت حالها حالك..
ما احتفلت بزواج اصلاً مادرت بزواجها..
غازي مايبي تنجرح من شيء..
شوق\لو زعلت ماكانت بتحضر اليوم..
ام غازي\انا واخوك كنا واثقين إنها مابتجي..
بس لودرى إنها موجودة وش بيسوي..
شوق بخوف\والله غازي ماله امان يومه..
ماله داعي يدري إنها جات..
إنتي لا تقولين له وأنا ما بأقول..
ام غازي\إيه احسن كذا..
بأقول لرشا لاتطري الموضوع له..

طلعت أم غازي من غرفة شوق..
نزلت الدرج ودورت على رشا..
رشا تبتسم\يومه شفتي هديل..ذياب معها..
ام غازي\إيه شفتهم..أنا بأروح اسلم عليهم..
بس أنتي إنتبهي لا تعلمين غازي إنها موجودة..

راحت أم غازي ولا انتبهت لحركة رشا لما عضت على شفايفها..
رفعت جوالها وشافت اسمه..
راحت بمكان بعيد عن الحريم وكلمته..
غازي\عيدي اللي قلتيه..؟؟
رشا\كيفك..؟؟
غازي\جااات.؟؟
رشا\غازي تكفى امي بتذبحني قالت لا اعلمك..
غازي يبتسم\علمتيني وأنتهينا..
رشا يا اخوك أبيك بفزعة..
رشا\غازي تكفى لا تطلبني أسوي شيء لهديل..
غازي\لا يا روح اخوك..
مابتسوين لهديل بتسوين لي أنا..
رشا\اممم طيب قول واشوووف..
غازي\......................
رشا بشهقة\لاااا تكفى غازي..
مستحيل اسويها..
غازي بحدة\رشا لا تجننيني..سوي اللي قلت لك..
رشا\مالي شغل..لا تدخلني بينكم..
يمكن ربي يعاقبني..
غازي\يابنت هذي زوجتي حلاااالي..
واللي بتسوينه ماهو حرام..
رشا\بس عيب..
غازي بحدة\في عينك عيب..
رشا\غازي أمي تناديني مع السلامة حبيبي..
غازي\سوي اللي قلت لك عليه..

قفلت الجوال وهي ترتجف من اللي قاله لها غازي..
والله لو تكشفني امي إن تذبحني..
بس وش أسوي فيه بيزعل علي..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

بعد ماسلمت عليهم ام غازي..
ضمت هديل لها بحنية..
حست بصد هديل عنها..
أبتسمت لها بمحبة..
وغصب عنها حطت يدها على راس هديل وقرات عليها..
ام غازي تبتسم\حصنوا بنتكم يا أم علي..
بسم الله ماشاءالله..
أم علي تبتسم\الله بيحفظها إن شاء الله ويحفظنا..
ام غازي\مشكورة لانك جيتي..

ما انتظرت رد من هديل لانها تدري إنها مابترد عليها..
انحنت وشالت ذياب من حضن غادة..
أستئذنت منها إنها بتاخذهـ معها وبترجعه..

بعد ما ابتعدت عنهم بدأت سارة وغادة يحللون الوضع..
سارة\شفتي كيف بتأكلك بعيونها..
ولا كأنها شافتك من قبل في فستان وكاااشخة كذا..
غادة\ولا عبرتنا يا اختي..
سارة بحسرة\وين تشوفنا وأم الأحمر ماخذة الصدارة علينا..
ام علي\أذكروا الله..العين حق..
غادة\هديل إنتي لما كنتي عندهم ماغيرتي بشكلك..؟؟
يعني هذا الهاي لايت ماشافوك فيه من قبل..؟؟
هديل\لا..
سارة بقهر\هذي تبط الكبد..تكلمي معنا سولفي..

وقفت هديل وحركت شعرها بغرور..
هديل\هذي حفلة اخت زووجي..
لازم أقوم بالواجب..
غادة\وين..؟؟وش بتسوين..؟؟
هديل بخبث\أبي أرقص ..

طلعت بخطوات واثقة وهي تدري إن خبر رقصها بيوصل له..
كانت فاله شعرها اللي يوصل لنص ظهرها..
وحاطة مكياج أوفر..
فستان أحمر قاني مرسوم على جسمها ..
ماسك من على صدرها..
بوجود كرستالة متوسطة تحت الصدر..
بدأت ترقص وهي معمية عيونها عن كل اللي يناظرونها..
ويهمسون هذي زوجت غـــازي ..
ركزت عيونها على رشا اللي كانت تكلم في الجوال وتراقبها..
كانت متأكدة من إنها تكلمه هو ..
صدت عنها ولا درت بالامر اللي أصدرهـ غازي ..



إلى الملتقى بإذن الله تعالى فجر الخميس ...


كونوا بخيـــــــــــــــــــر ...


صدووود’’’

صبحك الله بالخير صدوود


بارت جميل جدا والواضح انه مقدمه لاحداث جديده وحماسيه



طلبه لاتوجعين قليب هديل *


احس هديل مو راجعه مع اهلها للبيت لان الواضح ان فيه براسها شيء ..!



بانتظارك بالبارت الجديد

* شعللي الاحدث يبعدي عطينا شيء يبرد التسبد

ليه ماااكملتي سطررررين اشووويه بعرف شنووناوي عليه غااااازي شكله بيدخل عليها بغرفه ويبرد عل قلبه فديتك صدوووووووود نبي رومنسيااااااااااات زاياااااااااده

تسلمين يالغلا على هالبارت احس انه بداية مرحلة جديدة في حياة هدولة يصيطر عليها الانتقام والجمود مع اقرب الناس وجاء دورك ياابو ذياب تنال العقاب ودمتى بخير