كاتب الموضوع :
زهرة سوداء
المنتدى :
المواضيع الجانبية
♪♪♪
غربة أرض وغربة مشاعر
.
.
في مطعم مطار برلين الدولي ..
شايلة بيدها النوت وتوجهت لطاولة رقم 7 حتى تاخذ الطلب ..
وبلباقة موجهة كلامها لـ زبونهم الدائم : أهلين وسهلين مسيو حازم ..
وين هالغيبة ؟
حازم بابتسامة : أهلين فدوى ..
لا خلاص ماحتشوفيني رايح جاي عالمطار لاني استقريت هون ..
فدوى بدهشة : عن جد !!
حازم بتآكيد : وجد الجد كمان ..
فدوى : وأخيرا .. طيب ومرتك وولادك !
حازم : لاحقيني بس تطلع فيزهن ..
فدوى : أخذنا الحكي ‘ شو بدك تطلب ؟
حازم : خليني شوي ‘ انا مستنى رفيئ الي بدي ودعو لانو راجع عالشام نهائيا ..
فدوى : اوكي .. بي يجي انده لي حتى اخذ طلبكم ..
×××××××××
بعد فترة من التنقلات بين الطاولات ..
تنتبه فدوى لـ حازم بيؤشر لها ..
توجهت للطاولة فورا وعينها عالشخص اللي معطيها ظهرو ..
: أهلا وسهلا شو بتحبوا تشربوا ؟
ما ان ختمت عبارتها حتى طاحت عينها بعين رفيئ حازم  !
حازم : أنا بدي كابتشينو ‘ شوفي مازن شو بدوو ؟
تصلبت فدوى وهي تبحلق في مازن ..
اوتعت على حالها لما تنحنح مازن وقال : كيفك فدوى ؟
بارتباك ردت فدوى : من الله منيحة ‘ كيفك انت ؟
مازن بـ ضياع : نشكر الله ..
في هالاثناء كان استغراب حازم بمعرفة الاثنين ببعضهم كبير !
حاولت تتوازن فدوى وسآلت : شو بدك تشرب ؟
مازن : عصير ليمون بليز ..
اخذت الطلب فدوى واسرعت ورا الكاونتر على بال مايجهز طلب الاثنين ..
×××××××××
في هالثواني سرحت ورجعت بالزمن 5 سنوات ..
رجعت لعند بيت صغير كان يجمعها بزوجها مازن ‘ طليقها حاليا ..
تذكرت حبه وحنيته عليها ..
وتذكرت انو كان مستعد يضحي من شانها ..
وتذكرت كيف كسرت قلبه هي !
تذكرت كيف أجبرته يتزوج حتى يجي له اولاد ‘ بما انها كانت عقيم ومانفعت معها كل العلاجات !
وافق على مضض مع اصرارها وضغط اهله ..
جهز الطلب وقطع سيل الذكرى ..
توجهت للطاولة ونزلت لهم الطلب كانت عيونها تكلمه ..
بتذكر أخر مرة شفتك سنتا
بتذكر وقتا أخر كلمة قلتا
و ما عدت شفتك و هلأ شفتك
كيفك أنت ملا أنت
تراجعت لمكانها عند الكاونتر ‘ وتذكرت كيف كان أخر لقاء لها معه !
في ليلة زواج مازن ..
لما اخذ عروسته وانطلق ‘ توجهت هي لبيت أهلها ..
بتذكر أخر سهره سهرتا عنا
بتذكر كان في واحدة مضايق منا
هيدي أمي بتعتل همي
منك إنتا ملا إنتا
ولما رجع بعد اسبوعين حتى ياخذها ..
دخل لبيت اهلها وسهر معهم ‘ ولما صار وقت عودته للبيت ..
: يلا فدوى ضبيتي غراضكك ؟
فاجئته فدوى بأنها ترفض الرجعة معه ! وانها بدها تطلب الطلاق منه !
بحجة انها تتمنى له السعادة وتتمنى يصير عنده أولاد وانها ماتقدر تعيش مع ضرة !
كان هذا آخر لقاء بينهم ‘ بعدها كانت تتحاشى تلقاه ..
وهو أصر على انه مايطلقها ..
وضلوا سنين لما بالنهاية رضخ لها وطلقها ..
وبعدها انقطعت أخباره عنها لما راحت هي وسكنت بأحد ضواحي برلين ..
كيفك قال عم بيقولو صار عندك ولاد
أنا و الله كنت مفكرتك براة البلاد
شو بدي بالبلاد الله يخلي الولاد
×××××××××
شوفتها لـ مازن اليوم صحى فيها مشاعر الندم والحشرة لانها فقدته .
بيطلع عبالي ارجع أنا و اياك
انت حلالي ارجع أنا وياك
أنا و انت ملا انت
لكن شو بيرجع الزمن وهي خلاص تعودت على حالها .
لما اوتعت من الذكريات تفاجئت انو الطاولة فضيت من اللي كانو عليها ..
حاولت ترجع وتندمج مع شغلها مثل ماكانت ..
لكن هيهات !
×××××××××××××××××××××××××××××××××××××××××××××
تمت  ..
.
.
وبس ..
لا تعلقون ولا تضحون ياويلكم ..
والله صار لي يومين اكتب وامسح فيها ويادوب طلعت معي ..
اخر مقطع بالاغنية حذفته كيفي  ..
بتذكر اخر مرة شو قلتلي
بدك ضلي بدك فيكي تفلي
زعلت بوقتا و ما حللتا
أنو انت هيدا انت
بترجع عراسي رغم العيال و الناس
إنتا الاساسي و بحبك بالأساس
بحبك أنت ملا أنت
♪♪♪
|
16-04-12, 03:35 PM
جديد مواضيع قسم المواضيع الجانبية
العرض العادي
