كاتب الموضوع :
أمي روحي
المنتدى :
القصص المكتمله
الــ ج ــزأ الــ ح ــا دي عشر
في غرفة شعاع
شعاع: ليه حبيبتي مارحتي تحضري الزواج
مشاعل: تخبي ضيقها تعرفي باقي اسبوع على زواجي صعبة اطلع من البيت
شعاع: وهي تحط خصله من شعر مشاعل واراء اذنها يعني ماتضايقتي
مشاعل: وهي تلتهى بأصابع يدها وتبتسم ليه رفعت كتفهاليه اتضايق الله يهنيه ويسعده
شعاع: طيب ارفعي عيونك لي
مشاعل: رفعت عيونها الي كانت الدموع متحجرة فيهم
شعاع: ناظرتها بحنان وسكتت
مشاعل: عجزت تمنع دموعها الي سالت على خدودها
شعاع: حضنتها وتمسح على شعرها حبيتي انا متعمدة اخليك تطلعينهم علشان ترتاحي لاتكتمي ياروحي
مشاعل: الله يبعده عن قلبي زي مابعدني عن حياته تحضن خصر اختها النحيل بقوة اكرهه ياشعاع وبنفس الوقت عجزت انساه
شعاع: لأنك ياروحي ماكرهتيه من قلبك الي يحب صعب يكره بس مصدومة منه
مشاعل: كيف ماأكرهه واشوف دانة تحكي عن هداياه لها احترق جوات قلبي بس ندمت على حبي له والله ندمت
شعاع:الي راح راح ياحبيتي لاتندمي على شي سويتيه رفعتها عن حضنها ومسحت دموعها بيدها حبيتي عيشي يومك وانسي ماضيك عيشي لغلاب وانسي سلطان
مشاعل: آآآآه ياغلاب الي مو مطتمنة لزواجي منه اصلا كرهت الرجال كلهم بس فارس اجبرني عليه ابوي ومشاري يظنوني انا راضيه الود ودي اصير زيك بدون
شعاع: حطت يدها على فم مشاعل لاتكملي الله لايحطك زيي ولايحرمك من الزواج ولأمومة
مشاعل: آسفة ياقلبي
شعاع: ابتسمت لها بحنان عادي ياروحي انتي وضمتها على صدرها
مشاعل: وهي تمسح دموعها تلقينه الحين مبسووط مرة انه راح يتزوج كل الرجال كذا مالهم أمان مجرد يلقون بنت ثانية ينسون حبهم وعشقهم المزيف
شعاع: ردينا لسيرته سحبتها وحطت انفها على انف اختها موقلنا ننسى سلطان ونعيش لغلاب
مشاعل: سكتت ماردت
*********************
في غرفة سلطان
سلطانة: دخلت على اخوها اووف سلطان لسه مالبست
سلطان: لابس ثوب البيت وجالس على الكنبة وكان سرحان ابتسم لأخته دقايق والبس
سلطانة: قربت منه ايش فيك مكشر كذا كأنك راح لمأتم مو زواج
سلطان: لاعادي بس تعرفي وحدة من يوم صغرها ماشفتها اكيد الموقف له رهبته
العنود: دخلت عليهم لاتخاف دنو تجنن وذوق وخفيف دمها
سلطان: ابتسم بحنان لإخواته ممكن تخلوني البس شوقتوني لها
العنود وسلطانة: فرحو له وابتسمو وطلعو
سلطان: تنهد بضيق الله يبعدك عن عقلي وقلبي يامشاعل مابي اظلم دانة المكسينة معاي بسببك الله يسعدك بحياتك ويسعدني بحياتي قام وتحمم ولبس ثوبه وطلع البشت يالله من كان يصدق ان راح البس المشلح لغيرك يامشاعل يناظر يده كنت ماحلم الا اني امسك يدك وازفك لبيتي بس خلااااااااااص دانة وبس حاول يبعد مشاعل عن عقله ويتذكر أي صفة حلوة لدانة ابتسم كانت قدام عيني اربع وعشرين ساعة وهي ببيتنا مع اختي سلطانة بس كنت مالقي لها بال بالي بس مع مشاعل ابتسم بحزن سبحان الله اتاريني كنت اهمل زوجتي وافكر بزوجة غلاب هذي حال الدنيا تجمع وتفرق
*********************
في بيت بندر
ابو مشاري: وانت ليه ماراح تحضر
فارس: كذا مالي مزاج
ابو مشاري: عيب عليك زواج ولد عمك وماتحضره
فارس: يبه مالي خلق موكل شي يجي بالغصب والقوة
ام فارس: وهي ماسكة عباتها ايه يابومشاري خله براحته الله يخليك شكل وجهه مرهق
ابو بندر: ماخربه غيرك الحقيني ترامشاري ينتظرنا بالسيارة سبحان الله الي فاسخين بنتهم منها يحضر وياصل رحمه ويرضي ابوه وعمه والي ماسوو له شي مطنش العالم لاتتأخرين يامرة انتظرك هناك
فارس: يناظر أمه قبل ماتطلع يمه لاوصيك حطي عينك لبنية حليوة تناسب جمال ولدك
ام فارس: ابتسمت مافيه بنت تناسب جمالك الله يحفظك بس من عيوني ياروحي انت
فارس: تسلم لي عيناتك ياأغلى انسانة
ام فارس: وهـ بس فديت وليدي سمعت صوت هرن سيارة مشاري يوه شكل ابوك عصب انتبه لنفسك ياقلبي
************************
في القصر
دانة: طويلة ومليانة شوي لونها قمحي زايد جمالها تهتم بنفسها حيل لابسة فستان طالبته من فرنسا بدون اكمام وماسك على خصرها بعدين منفوش تحت كان روووعة حيل بس عاري مرة تحب سلطان من يومها صغيرة يوم يخطبها خطبها ولد عمها وولد عمتها واخو صديقتها بس اختارت سلطان عليهم مع انها مجروحة من خطبته وحبه لمشاعل بس من حبها له عجزت ترفضه فرحانة ومو مصدقة ان سلطان راح يكون زوجها
وفاء: اووف ايش هالحلاوة اكيد سلطان راح يطيح من طوله اذا شافك
دانة: بكل ثقة طالعة نفسها بإعجاب بالمراية ابتسمت بنعومة ان مانسيته مشاعل ماكون دانة
وفاء: ياشيخة اكيد راح يندم على اليوم الي فكر فيها وترك هالجمال كله
دانة: ميلت شفايفها مادري ايش معجبه فيها اصلا
وفاء: علشان هو وفارس اصحاب بس
ا م دانة: الحين راح يدخل سلطان مستعدة
دانة: بكل ثقه ايوه مستعدة ماما
ا م دانة: قربت منها وحضنتها ماصدق اشوفك عروس ياروحي
دانة: فديتك ياعمري
نزلت دانة وجلست بغرفة العروس وكل شوي تتأكد من شكلها
ام سلطان: دخلت وحضنت دانة وبكت من فرحتها
العنود: يكفي يمه لاتخربين مكياجها ههههههههههه
دانة: سكتت ماردت
ا م دانة: لا الا عاد مكياج حبيتي وروحي دنو
سلطانة: اوووف اوف ايش هالحلاوة كلها
دانة: من زمان وانا حلوة وابتسمت
سلطانة: ابسمي على اخوي لاينجلط من جمالك اذا شافك
دانة: ضحكت بنعومة بسم الله عليه
ا م دانة: بنات تغطو العريس راح يدخل
البنات الموجودات تغطو واخوات سلطان لان ابوه واخوانها دخلو بعد
سلطان: دخل مع ابوها كان منزل عيونه رفع عيونه لها وشاف عروسته قدامه يشوف بنت حلوة من بعيد قرب منها تغيرت ملامحها عليه مرررة بس هالشي زود حلاوتها بعد ماكبرت ابتسم ومد يده يبارك لها
دانة: مانزلت عيونها له من يوم يجي ناظرته بجرأة ودلع ابتسمت بنعومة وقالت بدلع الله يبارك فيك
سلطان: وقف جنبها وعدل بشته على طول جت ذكرى مشاعل بباله قد ايش كان يتمنى ان مشاعل هي الواقفه جنبه
ابو دانة: حضن بنته ولف على سلطان لاوصيك تراها نظر عيني وانا خالك
سلطان: ابتسم لاتوصي حريص ياخال دانة تاج راسي
دانة: لفت عليه وابتسمت ورجعت تسلم على اخوانها الثمانية وكل واحد يوصي سلطان عليها
سلطان: يوم طلعواخوان دانة قربت اخواته يسلمون عليه
أمه: تحضنه وتبكي ماصدق عيوني شافتك عريس وفرحت فيك ياغلاتي
سلطان: يحضنها أكثر وفرحان بفرحت أمه الله لايحرمني اشوف فرحتك دوم مو يوم يمه
ا م دانة: مو راضيه عن زواج بنتها لسلطان تمنت وحيدتها تتزوج الي ميتين عليها بس ماتقدر تعارض رغبة دانة قربت من دانة يالله حبيتي راح تنزفي
ام سلطان: كيف تنزف وسلطان يجلس لوحده
ا م دانة: مجهزين الكوشة والمصورة على الفاضي الحين تدخل المصورة تصورهم بعدين تنزف
سلطان: عادي مو مشكلة يمه انا ابجلس مع الرجال ماجلست معاهم متى ماخلصت تدقون علي خذي راحتك دانة
دانة: تناظره بحب ودلع اوك
سلطان: طلع عند الرجال جلس جنب ابوه
مشاري: قام وجلس جنبه وحط يده على فخذ سلطان هاه كيف الامور وابتسم له
سلطان: ابتسم الحمد لله سكت وقال بقلبه سبحان الله هالانسان مافيه اطيب من قلبه
دانة: طلعت للزفة الكل انبهر بفستانها
غلا: وووووا فستانها خيال
سحر: بس استغفرالله عاري مرة كيف تتجرا تطلع فيها كذا عند الحريم حتى عند زوجها من اول ليله تلبس عنده كذا استغفرالله بس
غلا: غمزت لها عقبال ماتلبسينه عند المحروس حمود
سحر: ياشيخة لاتعكري مزاجه تعرفي ماطيقه ولا اطيق سيرته
غلا: اصلا يادلوعة عمك متى حبيتي احد من الشباب
نوال: جلست عندهم بنفس طاولتهم شفتوها ماشاءالله عليها حلوة يوم كبرت
غلا: بحزن ياقلبي ياميشو
نوال: الحمد لله ماجلست برجاه راح تتزوج وتنساه
سحر: بحزن صعب الي يحب ينسى
نوال: غلاب يقول فارس ابن حلال وراح ينسيها كل شي
غلا: لابعد مزيون ويجنن
سحر: منو قال الزين كل شي بعدين مادام انه خوي فارس ماتوقع الطيبه راح تدل دربه الطيور على أشكالها تقع
غلا: ايه بهذي صح فويرس مايجيب واحد الا زيه
نوال: كم مرة اقولك احشمي خالك يابنت وثانيا هذا سلطان طيب ومحترم وكان اقرب لفارس من أنفاسه
غلا: ايه بس سلطان ولد عمه مو من ربعه ومايسافر معاهم بس بملحقنا يجتمعون بس
سحر: خلاص خلينا منهم
غلا: ايه صح لاتنسين تجينا بكرة نضبط شجون قبل مايشوفها هالغثيث فويرس
نوال: استحي يابنت تقولي عن خالك كذا ايش فيك طفشت وانا انبهك
غلا: هو محسسنا انه خال اصلا
نوال: بــــنــــــت
غلا: حطت يدها على فمها خلاص انطميت
مها: قربت منهم بنات شفتوها تجنن عقبالي مانزف ليسوري
غلا/ ياهاليسوري الي غثتينا فيه وياليته معبرك اصلا
مها: ماعبر ولا وحدة من المستشفى لا الحلوة ولا الشينه لا الملتزمة ولا الداشرة اشك انه يحب وحدة منسيته عالم البنات كلهم او وحدة كرهته البنات كلهم
سحر: مو شرط يمكن مايقتنع بالحب ا واصلا مافكر يتزوج
مها: تراه مو صغير عمره بعمر مشاري يعني تقريبا ثلاثين
غلا: تهز بحواجبها تخيلي يحب اكيد مها راح تنصدم يحمر وجهه وتضم مخدتها تبكي على اطلالها يالله مقوف رهيب ليتني جنبها يوم تنصدم وناسه
مها: ماراح انصدم وهو ماعبرني اصلا بس تعرفون يابنات اكيد الي يحبها ملكة جمال منسيته كل هالبنات والله لو تشوفون الي عندنا بالمستشفى بنات يجنووون واغلب الموظفين خاقين عندهم ترا صلاح زوج العنود معطيهم وجه بزيادة وغيره كثير ماشفت غير ياسر هو الي مايعبر احد يابخت البنت الي راح يفكر فيها او يتزوجها
سحر: من جد يابختها نادرا تلقين برجال هالوقت كذا
*******************
في بيت ابو مشاري
شجون: كانت جالسه مع شعاع تسولف معاها طبعا لأن فارس منع انها تروح للزواج وهي اصلا ماتبي يوم حست ان شعاع انعست لبست جلالها ونقابها وطلعت بس طبعا كانت فاتحه نقابها عارفه انم احد فيها بس لبسته احتياط وقالت ليه اسكر عيوني أكيد مافيه أحد طلعت يوم قربت تنزل من الدرج طلع فارس من المطبخ الي فوق وكان قريب للدرج التقت عيونهم ببعض
فارس: عجز يرفع عيونه عن عيونها
شجون: تخربطت وبسرعه نزلت نقابها وجت تبي تنزل
فارس: فاق من سكرة شوفة عيونها قال بصوت عالي تحشمي زين تراك صرتي مرتبطه الحين مو تلفي وتدوري حول مشاري
شجون: وقفت ومسكت الدرابزين
فارس: فرح يوم وقفت وتمناها تلف علشان يشوف عيونها اليم اشبع منها تعمد يرمي كلام اقوى علشان تلف وتناظره وترد عليه ويطالع عيونها كمل كلامه حركات الدشارة ببيت ابوك راحت الحين انتي ببيت عايله محترم احترمي الي فيه
شجون: ضغطت على الدرابزين وجت تبي ترد بس فضلت السكوت نزلت وماكأنها تسمعه
فارس: عصب هيه انتي اكلمك
شجون: بغيت شي
فارس: فرح يوم سمع صوتها الناعم الهادي ايه مرة ثانيه اذا صرت اكلمك ماتروحين حتى اقولك روحي
شجون: وقفت وماردت
فارس: بصوت هادي خبله وماتعرف ترد موزي أتخها عوبا راح وخلاها وهي واقفه بمكانها
شجون: يوم سمعته راح عارفه متعمده يهنيها وماقالها خلصت استغفرت ربها ونزلت
فارس: دخل غرفته وهي يتذكر عيونها ابتسم غصب عنه مع كثر ماغازل البنات واشوف عيون مرسومات بالكحل والظل بس ماعمري شفت زي جمال عيونها بس أكيد عيونها عدسات زي أختها الي كل يوم بعدسه بس تجذب رمى نفسه على السرير وحط يدينه تحت راسها ابتسم ايه صارت حلالي بدون تعب او مهر وشكلها بعد شخصيتها ضعيفه موزي أختها يعني أخذ الي ابي واهين فيها وهي منطمه وساكته وماتقدر تحط عيونها بعيون فارس ولد الحسب والنسب كل البنات يرتمون تحت رجولي يتمنون نظرة مني اجل كيف انتي ياشجون راح تبوسين رجولي بوس بس ماراح يفتني جمالك زي مافرضتي تفسك علينا بحيلك راح اخليك تندمي وانا اتمتع فيك زي مابي
*******************
في غرفة شجون
مشاعل : حاولت تنسى هم زواجها وزاج سلطان أخدت فستان وراحت لغرفة شجون
شجون: تحاول تخفي حزنها من كلام فارس وتصرفه السامج ابتسمت بوجه مشاعل
مشاعل: لايكون تبي تنامي وانا ازعجتك
شجون: لاقلبي مافيني نوم قربي حياك
مشاعل: حبيتي شوفي هالفستان
شجون: أخذته حلو بس كأنه ضيق عليك
مشاعل: ابتسمت مو لي هذا لك علشان تلبسينه يوم زواجي
شجون: مشكورة ياروحي
مشاعل: روح البسيه ابشوفه عليك
شجون: راحت ولبسته وطلعت لمشاعل
مشاعل: يالله جايبته اصغر مقاس وصار وسيع عليك
شجون: ناظرت بالمراية وطالعت شكلها ليتني مالبسته كان احلى بالشوفه يوم لبسته خرب
مشاعل: ماعليك لاتحطمي حالك انتي تجنني
شجون : بحزن لو على اختي هالفستان كان شفتي كيف يجنن
مشاعل: تبي تغير السالفه قربت منها وتلمس شعر شجون مستغربة ليه قاصه شعرك كذا !!!
شجون: بحزن نزلت عيونها كنت اخاف من ابوي مابغاه يطول تخيلي بنت تخاف على نفسها من ابوها الي المفروض يحميها ابغى اكون قبيحه بعيونه وعيون زباينه الي كنت دايم اخاف يجيبهم لي بأي لحظة بس فديتها الي كانت تحمين منهم بعد ربي تنهدت بضيق الله يفرج عنها
مشاعل: حزنت عليها اللهم آمين
شجون: جلست على الكرسي وهي لسه بفستانها
مشاعل: تلمس شعرها ماحسه خشن مرة بس انتي ماتهتمي فيه علشان كذا يتساقط بايش تغسلينه
شجون: بالتايد
مشاعل : أيــــــــــــــــــــش ؟؟؟؟؟؟؟!!!!!!!!!!!!
شجون: ابتسمت ايوه التايد اجيبه لغسل الصحون وغسل الملابس واغسل فيه شعري وكل شي اوفر ماعندي قيمة شامبو زيكم
مشاعل: معقولة مافي بيتكم شامبو
شجون: تنهدت بضيق فيه بس ماكنت استعمل شي تجيبه فرح
مشاعل: حزنت مرة لحال شجون قالت بقلبها احمد ربي على عيشتي الف مرة
مشاعل:طيب الحين استمري على كريمات راح اعطيك اياهم وشامبو حلو لشعرك لأنه مرة تالف ان شاء الله يكثر ويطول مع انه يبغى له مدة حتى يزين التايد مرة ماثر في جذوره مرة
شجون: اصلا كنت لو اشتري اشتري ارخص شامبو اهم شي شي ينظفني
مشاعل: عطتها كيس وهذا كريم ليدك ووجهك ياروحي
شجون: مشكورة بس ماله داعي كل هذا تراني ماهتم بالأمور هذي
مشاعل: خلاص صرتي متزوجه لازم تهتمي بكل شي
شجون: سكتت ماردت تتمنى بقلبها تهتم زي أي بنت متزوجة بس هي زواجها غير وحالتها غير هي مالها حق تفرح زي أي بنت خلاص التعاسه ملازمتها وخصوصا يوم تزوجت فارس
***********************
في القاعه
مشاري: يسولف مع سلطان مبسوط
صلاح: مقهور من شوفته لمشاري يشوفه مبسوط وماهمه لا العنود ولاغيرها قام ودق على العنود يالله مشينا
العنود: يوه بدري
صلاح: بعصبيه بسرعه يالعنود
العنود: حسته معصب اوك حياتي دقايق واطلع راحت لأمها يمه صلاح يبغاني اطلع الحين على اذنك
ام سلطان: بدري
العنود: الحمد لله شفت اخوي ماله داعي اجلس على اذنك باست امها مع راسها وراحت لصلاح
******************
في غرفة سلطان
سلطان: هاه عجبتك الغرفة
دانة: ابتسمت بدلع يعني بس مو مشكلة انت محليها
سلطان: ابتسم مجامله واستغرب من صراحتها دخلو وجلسها على اذنك ابغير ملابسي وانت خذي راحتك
دانة: اوك
سلطان: دخل غرفته الثانيه وتنهد بضيق جلس على الكنب يالله اعرف انها احلى بكثير من مشاعل بس صورة مشاعل ماتفارق خيالي يارب ارزقني حبها وانزع عن قلبي حب زوجة غلاب (( يتعمد يسميها زوجة غلاب علشان يذكر نفسه انها ماصارت له صارت ملك لغيره ))
ناظر بغرفته القديمه تنهد بضيق الله يعيني على حياتي الجديدة غير ملابسه وطلع لدانة
دانة: لبست روب بيج فاتح عبارة عن قطعتين فخمات القطعه الأولى شك وتخريم وطويل والي تحت سبت ساتان وفوق الركبة فكت شعرها الي كانت صابغته ومأثره الصبغه شوي على نعومته مدرجته وصابغته خصل مافسخت عدساتها اخضر محدد بني شكلها حلو وجذاب
سلطان: ماينكر جاذبيتها وريحة عطرها الي قبل مايفتح الغرفة شمه بس القلب ماخفق لها ابتسم يوم شافها ايش هالحلاوة
دانة: بكل ثقه عيونك الحلوة
سلطان: سكر الباب وتمنى انها تجذبه بخجلها وخوفها وربكتها بس الي قدامه جريئة مررة بس قال بقلبه لاتتصيد الزلة سلطان فوت اهم شي انها تحبك حبك لها يجي مع الوقت
*********************
في بيت غلاب
غلاب: مشاعل حضرت الزواج
ام غلاب: لافديتهازواجها قرب اكيد مستحيه الله ياغلاب ماني مصدقه ان مشاعل قريب تجي وتسكن معا ي ماني مصدقه اشوفك عريس ياوليدي
غلاب: بنظرة جامده تصبحين على خير
ام غلاب: الله يوفقك ياولدي
غلاب: دخل غرفته اكيد حزينه مشاعل على سلطانها ايه ماعلينا ايام وانتي عندي ياأخت فارس ونشوف ايش وراك أكيد شايفه حالك زي أخوك
************************
في غرفة شجون
سحر: ايش رايك بالفستان هذا شجون
شجون: سارحه ماردت عليها
غلا: هيه نكلمك من الصبح وانتي مو معانا
شجون:آسفه ياروحي مانتبهت لكم
سحر: اكيد الفساتين ماعجبك قلت لك تروحي معانا وانتي موراضيه
شجون: قلت لك ياقلبي مابغى اطلع مالي نفس شي
سحر: حطت يدها على كتف شجون ايش فيك ياروحي وجهك ابد موع اجبني
شجون: بحزن ابغى اشوف اختي اشتقت لها
غلا: وليه ماتروحين لها
شجون: استحيت من عمي كل شوي اطلبه واشغله
غلا: خلاص راح اقول لاخوي عبدالرحمن البارح جاي علشان زواج ميشو
سحر: انجنيتي اخاف فارس يسويها سالفه
غلا: صح هالغثيث فويرس مانقدر نتوهق فيه
شجون: بحزن خلاص ماله داعي
غلا: دقايق وجايتكم على اذنكم
سحر: يوم طلعت غلا قربت لشجون حبيتي وجهك ابد موكويس
شجون: خليها على ربك سحر
سحر: خايفه من فارس صح
شجون: ماخاف الا من الي خلقني بس قلبي قارصني على اختي فرح مادري ليه يمكن ابغى اشوفها قبل زفافي لفارس اخاف يحرمني منها
سحر: شوفي ياقلبي توقعي أي شي من فارس مو هين ابد ماقولك كذا اخوفك بس ابغاك ماتنصدمي ابد
شجون: تنهدت بضيق الله يعين يارب
*****************
في بيت اخوان غلاب الكبار
غلاب: لاتخلوني يوم زواجي وترا الملاك بنفس اليوم
اخوه الكبير: بدون نفس ان شاءالله
اخوه الثاني: الحمد لله انك ناسبت ناس من طبقتنا مافشلتنا ورحت تتزوج من هنودك قصدي خوالك وابتسم بتريقه
غلاب: عصب من رده قال بتريقه عارف انكم ماراح تجون لزواجي الا خوف من كلام الناس والا انا ماقمت ولا جلست عندكم بنظركم ولد شغالة ابوكم راح يظل ولد شغالة
اخوه الكبير: بغيناها تخدمه بالحلال وبلانا بولد
غلاب: استغرب من جرأة اخوه يقول قدامه هالكلام رد بسخريه يكون بعلكم انا ماعزمتكم حب ولاكرامه بس زي ماتهمون بكلام الناس انا بعد اهتم بكلامهم اخاف يقولون مقطوع من شجره قلت اجيبه بروزا لزواجي فقط لاغير لو إنه برواز قديم ومغبر بس مو مشكله اسمه برواز يأدي المهمه ويمشي الحال
اخوه الثاني: ماتعرف تحشم اخوانك الي اكبر منك ياولد بس مالومك ولد هنيه كيف راح تربيك تربيه زينه ماتعرف تربيك الا على الطبخ ومسح البلاط
غلاب: متعود على قطهم للكلام ومايبي يعصب يفرحهم عليه عارف انهم ينبسطون اذا عصب ابتسم بسخريه ولد الهنديه كبر وتوظف احسن وظيفه موزي الي ماقدر ولايكمل دراسته ولاعيال ولاشي
اخوهالثاني: انقهر من رده وعجز يرد عليه
اخته: تبي تنقم لاخوها بتريه وهنودك يبون يحضرون الزواج اوماعندهم فلوس يجون هنا
غلاب: بعصبيه مالك شغل فيكم انتم احضرو وبطلو لقافه
اخوه الكبير: ماتحشم أختك تراها اكبر منك
غلاب: ومن متى صار لي أخت او اخو بس بطاقة عائلة تجمعنا بنفس مسمى الابو والا غيره مافيه ولو بيدي تبريت منكم وريحت عمري عن اذنكم وطلع وخلاهم
اخوهم الثاني: والله ابونا بلانا بليه بولد الهنديه
اختهم: من يصدق الشغاله الي عمرها 16 منتفه ونحيفه راح تحمل من ابوي وتجيب ولد
اخوه الكبير: تمنيت انه يموت ببطنها ولا يصير لي اخو خواله هنود بس الشكوى لله اراد له ربي يعيش
اخوهم الثاني: سبحان الله يولد هو وابوي يتوفى الله يرحمه
اختهم: لا وصممت الا تفشلنا اكثر راحت تشتغل للناس تخيط وتطبخ علشان تعيش ولدها مسويه مكافحه والله ان وجهي يقلب الوان اذا سألوني حملوتي عنها اتخربط واكذب بس مابي اعترف
اخوهم الكبير: هي وجودها هي وولدها غلط بغلط
غلاب: دخل بيته وهو حيل معصب
أمه : بحنان هاه عساك عزمتهم
غلاب: بدون نفس ايه
أمه: الحمد لله فديتهم ماقصرو عارفه ماراح يتخلون عنك وانت اخوهم
غلاب: لف يناظرها بعصبيه ريحي نفسك تراه مو لعيون ولد الهنديه بس يخافون من كلام الناس ليه حملتي فيني ليه عذبتني كل هذا علشانك طمعناه بفلوس ابوي وتخافين ترجعين لديرة الفقر ديرتك قلتي اجيب ولد اضمن حياة الهناء والغناء عذبتني علشان تسعدي نفسك
أمه: انجرحت من كلامه وربك انه مقدر ومكتوب ياوليدي وجابك لي ربي نظر لعيني انت تكفيني عن دنياي كلها ياغلاب
غلاب: ناظرها بعتاب من فوق لتحت وراح وخلاها
أمه: جلست على كنب الصالة بحزن الله يحنن قلبك علي ياوليدي
*******************
لــــــيــــــــلــــة زواج غلاب & مشاعل
الكوفيرة: ماينفع كذا يامشاعل
غلا: عيب عليك كم مرة تحط لك مكياج وبدموعك الي مالها داعي تخربينه الي يشوفك يقول راح تنزف لقصاصها مو زواجها
مشاعل: غصب عني ماقدر احاول اخفيها موقادرة خايفه ياغلا خايفه
غلا: ضمتها وماحاولت تبين حزنها لمشاعل تحاول تصبرها ياعيون غلا توكلي على ربك ولاتنسين وصية شعاع لك
مشاعل: عضت على شفايها وغمضت عيونها تحاول تمنع دموعها
الكوفيرة: يالله اكمل او لا
مشاعل: هزت براسها كملي
*******************
في غرفة شجون
سحر: تعالي امكيجك
شجون: ماله داعي ماحب المكياج
سحر: مايصلح يشوفك فارس كذا
شجون: وجعها قلبها من سيرة فارس
سحر: يوم شافت وجهها تغير حبت تلطف الجو كيف فرح
شجون: بحزن ماعليها احمد ربي على كل حال
سحر: رفعت وجه شجون باصبعها حبيتي الله قدر لنا كذا شوفيني مجبورة
اتزوج حمد علشان ماخرب بيت أمي ويمكن زواجي منه خيرة وانتي ماتعرفي يمكن زواجك من فارس خيرة او تصبري عليه وربي يعوضك احسن منه
شجون: ابتسمت لها وسكتت ماعلقت على كلامها
فارس: يالله تأخرنا
ابو فارس: الحين راح تشوف زوجتك او بعد الزواج
فارس: عقد حواجبه ايش مستعجل عليه
ابوفارس: تغير وجهه يكره اسلوب فارس الاستحقاري لشجون
ام فارس: حبت تغير الجو ايه خلها بعد الزواج علشان يجلسون مع بعض بهدوء
مشاري: روحو انتم وانا ابجيب مشاعل والبنات راح لغرفتها مالقها نادى على غلا
غلا: سم ياخال
مشاري: وين مشاعل بسرعه تأخرنا
غلا: وهي خانقتها العبرة بغرفة شعاع ضامتها وتبكي وخربت كل مكياجها
مشاري: يالله طيب اقدر ادخل او فيه احد قدامي
غلا: مسحت دموعها شويات اقول لشجون وسحر ينزلون تحت
مشاري: طيب لف بوجهه علشان البنات يطلعون
شجون وسحر : تغطو ومرو من عنده بهدوء
غلا: تفضل ياخال
مشاري: تقطع قلبه وهو يشوف دموع شعاع اول مرة من بعد الي صار يشوفها تبكي دايم يشوفها متصبره قرب وحط يده على ظهرها
مشاعل: رفعت راسها لأخوها وبسرعه قامت من حضن شعاع وارتمت بحضنه
مشاري: حضنها بحنان وخلاها تطلع كل بكاها بدون مايسكتها
غلا: تبي تمنعها علشان مكياجها
مشاري: أشر لها بيده يعني خليها براحتها
شعاع: تناظرهم ووتسمح دموعها الي ماوقفت
مشاري: بعد مشاعل عن حضنه عروستنا الحلوة راح تقابل عريسها بعيون حمراء وكلها دموع
مشاعل: تمسح دموعها غصب عني مو بيدي مشاري خايفه والله خايفه
مشاري: ضمها مايجيك شي وربك جنبك ثم ابوك واخوانك من ايش خايفه ياروحي
مشاعل: مابي اتزوج ابي اجلس عندكم وبكت
مشاري: افااا مشاعل العاقله تقول كلمة وتتراجع عنها مو انتي وافقتي بإرادتك
مشاعل: بغت تقول لا فارس اجبرني بس ماتبي تصير مشاكل نزلت راسها وسكتت
مشاري: رفع راسها باصابعه حبيتي أي بنت يجيها الخوف هذا طبيعي تخاف تترك بيت أهلها وتروح بيت رجال غريب
مشاعل: قلبها مو متطمن ابد لغلاب هذا سبب خوفها الشديد
غلا: خالي أمي ارسلت رسالة تقول وينكم تأخرتو حيل
مشاري: طيب يالله نمشي
غلا: يالله ميشو علشان ترتب لك سحر مكياجك الي خربتيه بدلعك وضحكت
مشاعل: سكتت ماضحكت وودعت أختها وطلعت
مشاري: اسبقوني انتم السيارة مفتوحه يوم طلعو جلس جنب اخته شعاع بسريرها ومسح على راسها وطالعها بحنان شعاع ياختي ترا موتي ولا أشوف دموعك انتي بالأخص وربي دموعك تعذبني وتهلكني
شعاع: مسحت دموعها وابتسمت بحنان له اعذرني ياخوي بس يمكن دموع فرحي بمشاعل ماقدرت امسكها
مشاري: ان كانت دموع فرح تهون بس مابي اشوف دموع حزن مسح على شعرها يكفي دموعك الي ذرفتيها قبل
شعاع: تتمنى ترتمي بحضنه وتبكي ألمها وحزنها الي تكتمه بس ماتبغى تحزنه مصممه تظهر انها البنت القويه ابتسمت له يالله تأخرت عليهم
مشاري: وقف وابتسم لها تبغين تصرفيني
شعاع: ابتسمت له بكل حنان
مشاري: باسها مع راسها جعلها دوم هالإبتسامه تبين تعذبيني كشري بوجهك
شعاع: بسم الله عليك من العذاب ياخوي ليت فيه منك الف كنت اكون اسعد وحدة بالعالم
مشاري: باسها مع راسها فديتك عن اذنك ياختي شكلي تأخرت عليهم نزل ولقاهم ينتظرونه يالله ماركبتو
غلا: جينا نركب حصلنا سيارتك مسكره
مشاري: فتح لهم الباب كيفكم بنات
سحر: ردت الحمد لله
شجون: سكتت ماردت
سحر: نغزتها بشويش ردي
شجون: لاتعليق ماتحب تكلم أي رجال غريب حتى لو كان مشاري وهي واثقه فيه بس طبعها كذا ماتتكلم الا للضرورة
مشاري: عقبالك ياسحر
سحر: انقهرت ماتحب احد يجيب سيرة زواجها
غلا: خال ترانا نبي نوصل بسلام مايحتاج تشب حريقه بسيارتك
مشاري: ضحك افا ليه
غلا: قلت عقبالك للخبله الي جنبي حسيت رحر شديد عرفت ان مناخيرها تطلع دخان
سحر: قرصتها مع خصرها
مشاري: ههههههههههههههه مجنونة وربي هالبنت
سحر: وهي ترص على اسناها وبشويش قسم اوريك بالبيت
غلا: خالي بسرعه البنت راح تذبحني
شجون: غصب عنها ابتسمت مع انها قليل ماتضحك او يفرحها شي حياتها كلها ألم بألم بس اختفت ابتسامتها يوم شافت فارس كاشخ وواقف عند باب الفندق وهو معصب حيل
غلا: ياليل اتمنى اشوف فويرس مرة بحياته مروق
مشاري: ماعيكم منه يالله انزلو نزل وفتح لمشاعل الباب راح ندلعك ياعروستنا
فارس: قرب بعصبيه وينكم تأخرتو حيل ساعه ويجي العريس وأهله
مشاري: بنظرات عتاب عادي راح يمديهم يتجهزون بعدين العريس يجلس يتقهوى حتى يجهزون اهم شي عندنا راحة ميشو عندي
فارس: فهم من نظرات مشاري انه يعاتبه لانه يتكلم بالطريقه هذي معاه سكت ومارد ودخل داخل الفندق
غلا: اعوذ بالله بغى ياكلنا الحمد لله انك معانا ياخال
سحر: بقلبها حتى ماعبر هالمسكينه او جاملها مغرور الله يعينك عليه ياشجون
مشاعل: دخلت جوا وسحر راحت تعيد مكياجها طلبو من الكل مايضمها ولايبوسها علشان ماتبكي ويخرب مكياجها ثانيه
العنود: دخلت متردده خافت مايتقبلونها
ام فارس: هلا ببنيتي
العنود: قربت منها وباستها على راسها
سلطانه: هلا خالتي
ام فارس: حياكم منورين ياقلبي
العنود: بتردد مبروك مشاعل
مشاعل: بهدوء الله يبارك فيك
غلا: وجع ليه العنود متفسخه كذا ماكنت تلبس كذا ايام خالي
سحر: بدون نفس مادري عنها يمكن تسوي زي اهل زوجها يقولون ابد مو محافظين ويظنون العري بالباس كشخه موضه يعصون ربهم بإسم الموضه
غلا: مالت عليهم وعليها استغفرالله ماقدر اطالعها حيل متفسخه
سحر: صد عنها لاتطالعينها
غلا: ياختي اغمض عين بس العين الثانيه ملقوف هالا تطالع احوليت عين مؤدبه وعين داشرة ايش اسوي بلشت فيهم
سحر: ضحكت قسم انك مجنونة وبقوووة
غلا: تسوي خجولة يالبى انا بس
ام سلطان: مبروك يابنيتي
مشاعل: قامت وباستها مع راسها وجلست وكأن سكاكين تنغرز بقلبها الم وحسرة وفراق وخوف من مجهول
شجون: حنت راسها وهمست بإذنها اقرأي اورادك وحصني نفسك
ام فارس: كيف سلطان الحين
ام سلطان: ماعليهم مبسوطين مسافرين ياخذون عمره ويتمشون بعدها
ام فارس : الله يوفقهم
مشاعل: من زود الخوف مو مركزة بكلامهم
ام فارس: دق جوالها هلا والله بابو مشاري طيب طيب الحين نزفها
مشاعل: سمعت طاري الزفه طار عقلها وصارت ترجف بقوة
سحر: بحنان ونعومة بسم الله عليك ياروحي
شجون: بكل ثقة سمي بسم الله وتوكلي على ربك
مشاعل: رفعت عيونها الي كلها دموع وعضت على شفايفها وقالت بخوف خايفه مرة
غلا: الله يرحم والديك تكفين يالله ضبط مكياجك يالله ياخالة زفوها والا راح تنزل امطار غزيرة تخرب مكياجها وكل شي
ام فارس: وقفتها وجت تضمها
غلا: همست لهاخالة والله لو تضمينها تنفجرويتحول فيلم هندي فكينا ياخالة ترا هالليله مشاعل عوامتها خربانه معلقه والدموع فايضه
سحر: ياملغك بعد انتي
غلا: ياختي ايش اسوي فيها مسويه مأتم مو عرس
ام فارس: كتمت عبرتها يالله سمي بسم الله وامشي
شجون: قربت تمسكها مع يدها الثانيه
مشاعل: رفعت عيونها لشجون
شجون: بإبتسامه لاتخافي الا من ربك كلنا زي بعض نروح لمصير مانعرف ايش هو
مشاعل: تذكرت جفا فارس وصرامته وعرفت ان شجون راح تقابل معارك معاه هانت عليها مصيبتها مع غلاب مستحيل يصير اقسى من أخوها
ابو مشاري: يالله ياعريسنا عروستك تنتظرك
غلاب: قام ولف بشته وبكل ثقه وقف وطالع لفارس بكل غرور
فارس: ابستم له
غلاب: ابتسامته لفارس لها الف معنى ومعنى مشى مع ابو مشاري وفارس ومشاري لصالة العروس
مشاعل: جالسه على كرسيها وكل شوي تضغط على مسكت الورد الي بيدها كأنها تفرغ كل خوفها فيها وكل شوي تدعي ربها
ام فارس: تغطو يابنات العريس وابو مشاري والعيال جو
مشاعل: كأن احد صب عليها مويه حاره وصارت ترجف بقوة وقلبها يدق بسرعه و.....
انتهى هذا الجزا
تتنظر توقعاتكم لمصير
شجون & فارس
مشاعل& غلاب
فائدة:
ما تحسَّر أهل الجنة على شيء كما تحسروا على ساعة لم يذكروا فيها اسم الله
سبحان الله , والحمد لله , والله اكبر
[/SIZE]
|
07-05-12, 01:54 PM
جديد مواضيع قسم القصص المكتمله
العرض العادي
