كاتب الموضوع :
special Lady
المنتدى :
القصص المكتمله
الجزء الثاني و العشرون ~
ل̯يٓش̶͠ ؟
طول الطريق وانا افكر من هالاوروبية اللي عند اخوي و لا تحكي سعودي بطلاقة ودي اسأله بس مو عارفة كيف .. ياربي بسأل صريح ولا يكثر اهم شي اعرف
: اقول رائد
من نبرة صوته حسيت انه مستخف فيني : قولي يا بعدي
لين : وش تطلع ذي الشقرا ؟
رائد : أي شقرا
لين : رائد انت متزوج ثنتين
ابتسم بخفة : ايه اعجبك ذوقي
طيرت عيوني : وبعد بابا و اخواني يعرفون انك متزوجها
رائد : لا الثانية بالسر عنهم بس غالية تعرف لاني مسكنهم سوا
لين : آهااا .. طيب ما تخاف ردة فعل بابا
رائد : ما راح يعرف الا لو قلتي له ، لا تخليني اندم
لفيت للجهة الثانية اناظر الطريق بعدما شفت ابتسامة جانبية خفيفة لرائد اكيد فيه سر ...
رجعت عيوني بتركيز على الطريق قلت في سري مجنونة هالبنت !
***
قالت لي دلال عن سفرتها لبريطانيا اللي كانت لها مفاجأة زايرة اهل امها فرحت لها على الاقل تغير جو الفترة الماضية كانت كلها ضغوط علينا بس الحمد لله بدت تنحل شوي شوي .. و ما بقى الكثير ، رائد امس كان جايب لي اخته يطلب مني الصلح سويت ثقل ، قلت افكر وارد خبر ,, هند راح تزورني اليوم كل يوم علاقتي فيها تقوى اكثر و اكثر الله يديمها
رحلة دلال اليوم و الله بفقدها تعودت عليها 6 سنوات هذي السابعة ما فارقتني فيها الله يعيني اتحمل بثارة رائد لحالي ، رحت لغرفة دلال
كانت نبرتي حزينة وصوتي يدل على اقتراب نزول كم دمعة : ليش ما تصبرين لبعد ولادتي
دلال : حبيبتي انتِ انا مو مطولة بعدين بابا بيجيني يقعد كم يوم يخلص اشغاله مع خالي ونرجع سوا
غالية : لا حتى بابا بيخليني لحالي بعد
دلال باستنكار : غالية ! انتِ مو لحالك ليش تتعمدين تهمشين وجود رائد
يا ماما اسم الله علي وش فيها ذي قلبت علي : دلال انتِ تعرفين رائد زين وتعرفين انه مزاجي
دلال : لو انك ذكية استغلي هالوقت فرصة ما تتعوض .. بتكونين لحالك معه هو يبي رضاك عطيه اياه ، أمنيه لا تنفريه
غالية : و النهاية مثل كل مرة رائد مزاجي مزاجي
دلال : طيعيني انا اول مرة اشور عليك في علآقتك معه غالية انا اكبر و افهم منك عشت مع الناس و القدره على تقييمهم عندي بعكسك تماما
غالية : تشوفين كذا دلال
دلال : لو ما كنت واثقة وشفت الندم في عينه ما راح اشور عليك لسراب
غالية : اللي تشوفينه
دلال : لا اللي يشوفه عقلك و قبله قلبك شايفه من زمان
ابتسمت بتوتر ... هذي انا دوم متوتره : الله يكتب الخير
***
كنا على طاولة الافطار اول مرة نجتمع كلنا ومعنا متعب أنا لاحظت ان ابوي و متعب لهم نفس طريقة التفكير بس الطريقة في التعبير هي اللي تختلف بابا هادي و لسانه يقطر عسل اما متعب يجيك دمه يغلي بس قلبه حيل طيب
كنت اراقب نظرات شذى له شكلها كثير حاقده عليه وبابا ما كانت تناظر له حتى لو كلمها اما عينها في الارض او على صحنها ، معليش يا شذى هم يبون سعادتك فايزة كارهتني بس استغربت منها من يوم شوفة بنتها و هي مبتعده عني ، يالله عساه دووم رهف فديتها ذي الدبيه كل يوم تقرب مني اكثر
خالد : ليش ما تآكلين سوسو
انتبهت على صوته : هااه .. اممم لا بس كنت افكر
ابتسم : نقدر نشاركك الا لو كان خاص
بتعجب : خاص !!
متعب : مثلا فؤاد على هالصبح ابتسم : يالله وش هالرومنسيات
تنحت فيهم وفي نفس الوقت انا خجلانة : متعب وش مواصفات عروسك
ناظرتني فايزة بسرعة : وليش ان شاء الله
يمه بسمك اللهم سكنهم في مساكنهم والله هونت ماني بمدوره له : هاااه لا هو قال ادور له
قلتها بطريقة خلت رهف و متعب يضحكون علي شاركهم بابا بابتسامة جميلة : وش فيها البنت تبي تخطب لأخوها
فايزة : بس يا خالد انا امه و اولى
خالد : الولد عنس بيصك الثلاثين ولا ناظرتي فيه خليها تشوف له رزقه
فايزة : بالاول نزوج شذى و ياسمين
خالد : زواج متعب قبل ياسمين وشذى
فرحت كثير يعني باتأخر في قربي من عبد الله يالله جعلك ما تلقى عروس يا متعب ..
نعم ياالوالد العزيز الحين انا لي كم شهر اتجهز ويوم باقي شوي تبي تأجله وينك يا فؤاد اسمع !!!
قامت فايزة من السفرة انقهرت من كلام ابوي ، وه فكه
خالد مبتسم : وش فيها ذي ما صارت قلنا كلمة مانمزح يعني
شذى باندفاع : بابا انت صايره كلماتك كلها اوامر واجب تتنفذ على اكمل وجه ما تراعي حنا وش نبي و ش ما نبي انا مابي عبد الله اللي انت جبرتني عليه
متعب ببرود : ابوك يدور مصلحتك
شذى : انا كبيرة لدرجة اعرف مصحلتي
خالد : شذى يا بابا انا لو ما شفت في عبد الله مواصفات الرجال اللي بيسعدك صدقيني ما اعطيك اياه لانه ببساطة ما يستاهلك
شذى : بس انا موافقه أنا ما احلم في عبد الله
ياسمين بسرحان : بتصيرين تحلمين فيه
قلت جملتي اللي ماستوعبت اني قلتها الايوم قرصتني رهف خجلت كثير نزلت راسي بعدما شفت ابتسامة متعب
ناظرني بابا نظرة لها معنى من اول انا حاسه انه يعرف بعلاقتي بفؤاد من قبل بس الحين تأكدت ... عشان كذا جبرني عليه من قبل لا اعرف انه هو ، بس شذى وش سببه ؟
لف على شذى : كم واحد رفضتي من قبل وانا رديته معك ؟ كم مرة مشيت كلمتك من بين اخوانك كلهم على حساب كلمتي اللي المفروض ما اتراجع فيها كم وكم وكم .... و الحين يوم اني ابي مصلحتك يطلع منك هالكلام ؛ على امرك ما راح اجبرك لانه ما يحق لي اصلا ؛ لو جاك حلمك عطيني خبر
متعب : يبه من جدك تحكي وش نقول للناس هذي تبي تفضحنا بين الناس
خالد : مابي اكون سبب تعاسة عائلة ، بنتي و امها اعرفهم
قآم من على السفرة وانا متعجبة من كلامه .. صار فيني تساؤل ، وش يقصد
!!
***
ھ̲̌ذُيٓ ﭑن̲آ̲
رؤى طلعت من حالة الانطواء اللي كانت فيها صارت تسولف وتضحك مثل قبل بس انا ملاحظة انها تخفي الم كبير لو وش ما سويتي مو علي يا رؤى من بين كل الناس اقدر اعرف ان فيه شي مو طبيعي ... ياسمين مشغولة بزواجها ما بقى على الصيف كثير وهو في بداية العطلة الصيفية ,,,, من بديت دوام وانا في اقسام التنويم الداخلي مع البنات بس تعبت الروتين طلبت نقل لقسم الطوارئ ابي اتطور اكثر و اشوف حالات اكثر مرضى التنويم حفظتهم حفظ بس للأسف الشفت فيه بيصير مسائي بس مافي مشكلة التغيير كويس
اليوم بزور غالية .. ودي افتح لها قلبي لاني اثق فيها خلآص ماعدت اتحمل احتاج احد افضفض له ~
***
اليوم خميس ... الظاهر الكل نآيم بعد تعب امس ما ينلامون مدري وش هالنشاط اللي فيني نزلت اشوف البيت بعد امس كان كل شي نظيف ومرتب ,, شلت كتبي نزلت الصالة اقرا شوي اضيع فراغي ... ما حسيت بالوقت الا يوم نزل علي وليد
: شوشو وش تسوين هنا ؟
شروق : ابد كنت ادرس شوي انت ما رحت الشركة اليوم
وليد : لا و الله استئذنت من الوالد امس سهرنا انا و فارس و مشعل ولد خالي قالها وابتسم بعدها تنحت فيه ثم استوعبت وش صار امس حمرت و لفيت وجهي للجهه الثانية
وليد : شروق ابي احكي معك في موضوع انسب وقت بالنسبة لك تعرفينه الحين بعدما خلصنا من ملكة هنادي
شروق : وش فيك وليد خوفتني
وليد مبتسم : لا تخافين شوشو أنا ماعرف للمقدمات الطويلة العريضة بس بسألك سؤال واتمنى تجآوبيني خذي وقتك بس لا تطولين بعد !
شروق : خير وليد قولي
وليد : شروق مشعل ولد خالي طالبك و اتوقع امس سمعتيه باذنك وش قال .. الولد شاريك فكري زين بس تأكدي انها فرصة ثمينة ما تتعوض مو عشانه ولد خالي ، بس انا ماعرف عنه الا كل خير
ماعرفت انطق بس قال طالبك رحت لعالم ثاني .. رجعت لايام طفولتنا يوم قال لي
اصبريني بس اكبر انا اصير معرس و عروسي انتِ
وعيت على نفسي بصوت وليد : بنت شوشو نحن هنا
شروق : هلا سم
وليد : ما صارت عاد من اليوم احاكيك و اوصف لك الشخص و انت غارقة هناك على العموم انتظر ردك
شروق : شور علي يآخوي
وليد : ما ودي اظلمك ؛ استخيري
قام وقف بيطلع وقفت معه ومشينا لين الباب بكل هدوء وقف طبع بوسه على جبيني : يبي يعرف ردك بعده بيكلم الوآلد
شروق : الله يكتب الخير
طلع وخلاني ... مو عارفة افرح ولا وش اسوي بالضبط
***
ما امداها تصير الساعة ثنتين الا و دلال لابسه عبايتها قالت وش رايحة الحين للمطار
: لا اقعدي يوم يأذن العصر صلي وروحي
دلال : يا بنت الناس ما يصير لازم اروح مبكر
غالية : طيب وش بيفرق تراها طيارة الوالد
دلال : حتى لو هذي رحلة دولية
غالية : الله يخليك اقعدي بعد
دلال : تدرين شي يلا تعالي نروح سوا
غالية بحماس : طيب طيب بس اجيب عبايتي
وقف رائد : لا ما تروح اقعدي انتِ مهبولة
غالية : ما يخصك بروح مع اختي يعني بروح
عصبت وتجمع الدم فيني بس مسكت نفسي .. لآحظت غالية في الفترة الاخيرة تصدر منها تصرفات اطفال وفي نفس الوقت نافرة مني
: طيب يصير خير يا غالية .. راح اتفاهم معك يوم تقومين بالسلامة
دلال : الحين لآخر لحظة لي بينكم لازم هوآش !! نفسي اشوفكم يوم متحابين
رائد بعد زفرة قهر : هذي اختك مدري وش في راسها طلبتها تسامحني رافضة حتى اختي جبتها لها ورافضة وش اسوي بنفسي انا
ناظرتني دلال نظرة اول مرة اشوفها عليها فسرتها انها نظرة غضب وفعلا ، لهجتها غريبة وصوتها حاد : غالية وبعدين معك وش انا كنت اقولك من قبل ؟
رائد : خلاص دلال لا تضغطين عليها ان شاء الله كل شي بيزين
غمز لها بعد جملته يحسب اني ما اشوف ، قربت مني وضمتني بقوة بعدت عني وهي تضحك فيه مشاغب رفسها حسيت بحركته
دلال تهمس لي : غالية نصيحة لاني احبك رائد لا يضيع
ابتسمت لها : ان شاء الله
كان بابا توه واصل .. هو بيآخذها للمطار و بعد الحاح قدرت اروح معهم ^_^
***
من راحت دلال و انا احس بطفش .. رائد ما فتح معي اي موضوع نزلني في البيت و راح و بابا اللي ما رجع معنا اصلا عنده اشغال ادري ان الفترة الماضية اشغتله بس بعذري لا تلوموني ... هند كانت جايتني هذا خفف علي ، بطني كبر بشكل الواحد يقدر يلاحظه اكيد فيه اثنين كنت مخليتها مفاجأة بس لساني نطق فيها احترت وش البس كل ملابسي ضاقت وحتى ملابسي هالشهر وصلتني صغيرة علي مالي شغل بقول لرائد يوديني السوق ، لبست جلابية كانت واسعة علي فليت شعري رسمت عيوني بقلم اخضر كان ملائم للون الجلابية و حطيت مجرد غلوس تعطرت و لبست لي صندل خفيف ,,, ما قدرت انزل طلبتها تطلع لي فوق الصالة العلوية المفتوحة تطل على حديقتي الصغيرة بزجاج عاكس كان منظر الغروب شي جميل منه حضرناه سوا كانت توقف بجنبي ...
: فقدت امي
حسيت بقشعريرة سرت بجسمي وش هالطاري يا هند ، ماعندي لها رد استرسلت
هند : غالية انا فقدتها بين ساعه وثانية طلعت ولا رجعت قالت لي بروح اشوف صديقتي و بعدين بآخذك معي تلعبين مع بنتها راحت بس ما جت ظليت انتظرها وانتظرها بس ما..... فضفضت بكل قصتها وبكت ، ترتاح
كل كلآمها صدمني معقولة هذي هند وشايله كل ذا بداخلها ماعرفت شلون اتصرف يا الله وش هالمواقف اللي قاعده انحط فيها الايام
.
.
.
.
تم الجزء الثاني و العشرون
|
23-03-12, 06:08 PM
جديد مواضيع قسم القصص المكتمله
العرض العادي
