المنتدى :
ركن المطبخ
فاشلات ولكن مبدعات
السلام عليكم ورحمة الله وبركاته
اخواتي المبدعات والفاشلات على حد سواء
هالموضوع طرح للفضايح وعدم السنع اللي طلع من وراه ابداع
سالوني شلون انا اقولكم
اذا كنتي داشة المطبخ متحمسة تسوين اكلة وبعز الشغل لقيتي مكون ناقص وارتجلتي
وطلع معاج شي ثاني او نفس اللي تبينه بس بنكهة غير او نفسه نفسه بس محد داري بالبلاوي اللي ملغمة فيها الطبخة
هني عاد تفيدين خواتج الفاشلات وتحطين طريقتج الفاشلة اللي قلبت ابداع بهالمكان
واول الفاشلات هني وحدة لها صولات وجولات وارتجالات وخروج من زنقات بهالمجال
اهي
نمورة المطيورة
مطيورة لاني انلقفت الا اسوي لزوجي كيكة يحبها
بصراحة كنت بتمصلح عنده ابي انام عند اهلي
وهالشي من المحرمات بقاموسه واختي انصحتني ادهن سيره
قلت يالللاااااا الكيكة اللي يحبها مع الجاي مافي غيرها
واغمسها بكم كلمة حلوة ورمشة من عويناتي اللي زين مبينين ويمشي الحال
واقوله انا رايحة المطبخ اسويلك كيكتك اللي تحبها
قالي اي والله من زمان عنها
رحت وحطيت المقادير الجافة
كوب ونص طحين ,ملعقة كبيرةبيكنج باودر,كوب سكر الا ربع,رشة ملح ,ملعقة كبيرة هيل,ملعقة شاي زعفران
وخلطتهم شوي ورحت اسوي المقادير السائلة ربع كوب زيت,وخلطت معاه علبة قيمر(قشطة),ورشة الفانيليا ,ورحت الثلاجة اجيب البيض وانصدم ان البيض اللي بالثلاجة مو باقي منه الا بيضة وحدة
يبووووووووي شسوي المقادير وانخلطت والرجال وعنده خبر اني بسوي كيكة
ولو قتله بروح اجيب من فرع الجمعية القريب بيض بيسويني مشخال ويشخل فيني العيش امس متقضي ولو انه موبالبيت جان زرقت بسرعة ورديت بالبيض من الفرع واقعد افكر واحسب واجمع واطرح وافرك بايدي
عوع من هالبيتة ما ابيها شيفكني من لسانه عشمته بحبيبته
وجان تجي عيني وييين المكون اللي انقذني القيمر واحطلي علبة ثانية واحط نص ملعقة بيكنج باودر عشان تنفس الكيكة زود واخلط الكيكة بسرعة واحطها بالفرن واثناء طباخها ما خليت دعاء ولا ذكر حتى دعاء الاستخارة قلتة
واول ما استوت الكيكة حطيتها بالثلاجة تبرد شوي لين اخدرله الجاي واحط عشر تعش صنف مكسرات وكاكاو وحلى قهوة وبقلاوة مع انه مافي قهوة
طلعت الكيكة بردت شوي شكلها جنها اللي دايم بس الطعم الله يعين
وديتها وحطيتها جدامه جان يقول ليش كل هذا قصيلي قطعة كيك وشيلي الباجي
واسوي اللي قاله وارد والقى الصحن ماله فاضي جان يقولي قصيلي بعد قطعة
سالته طيبة
قالي والله حاسها الذ من كل مرة
واشق الحلج واضحك هذيك الضحكة اللي استغربها المسكين وسالني شفيج قتله مستانسة انها عجبتك
بس تدرون وين القهر مارضى انام عند اهلي عقب كل هالرعب ما يسوى علي
وهذا فشلي المبدع او ابداعي الفاشل اللي تبون تسمونه سموه
ناطرة تعليقكم وفشل مبدع اخر
ياربي تعبت من السوالف صج اني هذرة
رجاء التعليق بس عالطبخة هالذرة انسوها فديتكم
وسلاموووووش..........نمورة
|
20-03-12, 08:35 PM
جديد مواضيع قسم ركن المطبخ
العرض العادي
