آلبارت الخآمس '$







************************************************** ********

و قبل كل شيء خلوني أعرفكم بأهلي . .

أول واحد هو أبوي " خلف" .. . وأمي الغالية " شما " ..

تستغربون الاسم أكيد ..

أنا أقول لكم لأن أمي اماراتيه وتقرب لأبوي من جهة أمه

يعني باختصار جدتي بعد اماراتيه .. و حنا بس ثلاث ..

متعب : 28 سنه حبوب مرة أكثر من بندر لأنه ما يهاوشني ولا شي متزوج بنت عمي .. " أسيل "

و جايبين كتكوت صغيرون اسمه .. " ابراهيم " ..

بندر : 25 سنه كله على بعضه حلو وأعشقه بس قلت لكم اللي قاهرني انه مصاحب هالحثالة ..

بعده طبعا الحلوة أنا هههههههههه .. و انا دخلت 20 قبل كم يوم .. .


*********************************************


المهم بعد أبوي عمي أبو ماجد " سعود " .. . و زوجته اللي قلت لكم عنها " منيرة " .. عيالهم ..

ماجد : 28سنه حبوب و طيوب مثل متعب .. ومتزوج بنت خاله واسمها .. " جيهان " و عمرها : 24سنه ..

و عنده بنت .. بعد ماجد يجي الواطي ما يحتاج تعريف لأنكم أكيد عرفتوه .. " تركي " عمره 26 سنه ..

بعده تجي .. سلمى : 24 سنه حليلها هذه طيوبــــــــه وهي متزوجة ولد عمي الثالث واسمه " محمد "

وضحى : 20 سنه قلت لكم عنها البقرة الغبية .. . هي وأخوها السافل ما يحتاج لهم تعريف أما سلمى

وماجد حليلهم عكس تركي و وضحى .. .


********************************

بعد عمي أبو ماجد يجي عمي أبو محمد " سلطان "و زوجته حبوبة حيل " مريم " .. عيالهم ..

محمد : 28 سنه حبوب و هو و متعب و ماجد ربع .. و هو زوج .. " سلمى " ..

بعده سلمان : 25 سنه .. . هذا اللي قلت لكم اني كنت أحبه .. .

بعده المشاكس راكان هههههه : 23 سنه ولد فلاوي و غجري و جرئ حيل ..

بعده تجي نصفي الثاني وروحي وحياتي أكيد عرفتموها .. . "جمــــ 20 سنه ــــــون " .. .


*********************************************


بعد عمي أبو محمد يجي عمي أبو نايف " ماجد " و زوجته هي " نهلة " .. . عيالهم .. .

أسيل : 24 سنه زوجة أخوي الحبيب متعب وهي وجيهان وسلمى بعد حزب ما يتفرقون .. .

بعدها التوأم .. نايف ونواف : 23 سنه .. وهم وراكان بعد حزب يشبهون بعض بدرجة ما تخلينا

نفرق بينهم الا اذا شفنا وجههم لأن نواف عنده شامة في آخر خده .. .


*********************************


عقب عمي خالــــد : 26 سنه .. .. يدرس بامريكا أحبــه مرة وانتظر يخلص دراسته نهاية هذه السنة ..

يا حبي له دوم يدلعني أنا و جمّون ..

أنا و جمّون وعمي خالد اللي العايلة تنتظر رجعتهم بعد شهر .. .

عمي له أربع سنوات يدرس في امريكا .. و أنا و جمّون لنا سنتين ..

المهم وأذكركم بجدتي وجدي بعد الله يحفظهم ويطول بعمرهم ان شاء الله ..

************************************************** *********


رجعني لدنيتي و لشقتي اللي بلندن صوت تلفون الشقة استغربت من اللي يتصل الحين ..

ناظرت الجدار و الساعة اللي معلقة في وسطه شفتها الساعة 11:30 الليل ..

قمت و رحت للطاولة اللي عند باب الشقة و اللي عليها التلفون بدون ما أشوف الرقم رديت ..

ريمان : hello ..

وناظرت الكاشف واستغربت هذا رقم جوال ومن السعودية والوقت عندهم الحين الساعة 2:30

يمكن واحد من اهلي لا يكون صار لهم شيء ..!

ريمان : ألوو مممييين ..

جاني صوت ما عرفته ..

.. : هلا قمرهن !

رديت و أنا مستغربة من هذا ..

ريمان : مممين ؟!

.. . : معقولة ما عرفتيني .. لندن نستك صوتي ..

جلست أفكّر ي ربي ميين ذا .. يمكن راكان يستهبل . جيت بأقول راكان بس هو سبقني ..

.. .. . : ريمان !! .. .

ارتجف كل شيء بجسمي حتى السماعة ارتجفت بيدي لأني بكل بساطة عرفته .. .

عرفته لأنه الوحيد اللي لما ينطق اسمي ينطقه بنبرة و رنة غريبة غير عن كل أولاد أعمامي ..

ما عرفت شسوي أقفل بوجهه و لا أشوف شيبي متصل بعد ثلاث سنين و بعد آخر موقف بــــــيني و بــــــينه ..

استغربت ليش يتصل بعد بها الوقت يروح ينام عشان دوامه أبرك له .. . رجعني صوته ..

تركي : ريمان ما عرفتيني ..

قلت له بصوت مرتبك ..

ريمان : خير شتبي ..

تنهد و سكت و أنا كنت أنتظره شيبي الحين .. رجع و تكلم ..

تركي : شخبارك ريمان .. . شتسوين في لندن ..

قلت له ببـــــــرود ..

ريمان : أنا بخير دامني بعيدة عنك ولا أشوفك .. (( سكت بعدين قلت له )) .. أحوالك انت يا واطي باقي

على سفالتك وتكلم اللي مثلك .. .

ما رد جلس ساكت لفترة .. . حتى اني ندمت بصراحة ما أدري من وين جاتني الجرأة ..

بس عقب سمعت صوته لما همس ..

تركي : ريمان .... اشتقت لك ..

غمضت عيوني بقوة هذا شيبي الحين بيجنني أكيد .. كل ما ينطق اسمي أرتجف يا ربي

اشلون ينطقه ما أدري ..

بس المهم ان نبرته ترجفني وتهزني بداخلي .. كل ما يقول اسمي أحس اني أكرهه أكثر .. رديت عليه ..

ريمان : اشتاق لك المرض .. عساك ما تفتح عينك بكره الا في قبرك ..

سمعته يقول بصوت متهدج أكثر ..

تركي : ما نسيتي يا ريمان ما نسيتي ..

قلت له و أنا منقهرة منه ..

ريمان : وشو ما نسيتي هذه في أي بنك أصرفها .. تركي انت سواتك ما تتسمى ..

طنش كل كلامي وقال بلهفة ..

تركي : يا حلوه اسمي من فمك ..

انصدمت يا وقاحته بعد دا كله بعد يغازل .. وججججع و لعنه ! رجع تكلم وهو يسألني ..

تركي : ريمان انت ليش تكرهيني ..

قلت له وانا مستغربة من كلامه ..

ريمان : انت أكيد شارب لك شيء .. . روح اتصل على وحدة من حثالاتك و لاّ نام ..

قال لي وهو معصب ..

تركي : ثمني كلامك معي ..

استغربت منه بجد شين و قوي عين ..

ريمان : ليش ؟ .. . أخوي ! أبوي ! زوجي ! .. انت واحد واطي و حثالة و بس .. .

طنش كل كلامي بعد و قال بثقة ..

تركي : تقدرين تقولين زوجك .. .

هزتني كلمته وثقته و هو يتكلم بس رديت عليه وانا أحاول أخفي ارتباكي ..

ريمان : ليش وتظن اني باقبلك لا جيت لي .. هزلت أكيد .. ثم انت لك وجه تتقدم لي بعد سواتك ..

رد علي ببرود يخالطه الثقة اللي خوفتني ..

تركي : ما سويت شيء كايد .. . ثم ليش ما تقبليني الدنيا سايبه أنا ولد عمك و ما أظن ان فيه شيء يعيبني ..

ثم أنا واثق ان عمي الله يحفظه ما راح يردني .. .

يا عالم من وشو مخلوق هالإنسان الحين متعني و متصل علي عشان يقول لي هالكلام السم ..

بس تصدقون خفت من نبرة صوته الواثقة و القوية بس تشجعت وتكلمت ..

ريمان : أبوي أهم شيء عنده راحتي و لا بيغصبني على حثالة واطي مثلك ..

قال لي بصوت هادئ بس واضح انه متنرفز ..

تركي : اسمعي تراني حيل مستحمل سبك .. . أنا ما اتصلت عشان انك تعني لي شيء لااااا يا حبي ..

قاطعته و أنا أقول بسرعة ..

ريمان : حبتك القرادة يالمقرود ..

سكت عقب تكلم ..

تركي : المهم اتصلت عشان أقول لك .. . في مفاجأة تنتظرك .. (( وضحك بسخرية )) ..

ههههههه حيل حـيـل حتعجبك و راح تشكريني عليها هههههههههههههه ..

يعععع يا كرهي لضحكته تذكرني بذاك اليوم بس رديت عليه ببرود ..

ريمان : ناس فاضيه روح بالله اتصل على وحدة أخذه مقلبك بقوة و أتسلى معها ..

و قفلت على وجهه بدون ما انتظر رده ..

كنت للحين مصدومه ايش ذكره و خلاه يتصل علي اليوم خطر على بالي هو و ذاك اليوم

و بعد اتصل علي .. وشو فيها الدنيا اليوم .. لا يكون اليوم العالمي لتركي اليوم و أنا ما أدري ..

نزلت دموعي كالعادة و ركضت على غرفتي أنام رميت نفسي على سريري وصحت من قلبي

هذا الانسان جارحني جرح .. حسبي الله عليه ! جلست أصيح لين نمت و أنا ما أدري عن أي شيء حولي ..


*********************************************


.. . [[ السعودية .. الساعة 2:15 .. . جدة ]] .. .


نزلت جوالي من أذني و شدّيت عليه بكل قوتي .. من غيظي وقهري رميته باقوى ما عندي على الرمل ..

حطيت يدي على رأسي و صرت أصرخ مثل المجنون ..

تركي : اووووووووووووووووف مقهور ي عااااالم .. زين أنا غلطت و أعترف اني غلطت مو كذا

اللي يحب بشرف ..! اللي يحب ما يأذي حبيبه بشيء بالعكس يقدره ويحترمه أما أنا وصلت أخلاقي

القاع بتصرفي ذاك اليوم .. ليتها تمرغني بالوحل بس تنسى اللي سويته تنساه أبيها بس تعرف اني أحبها

لاااااااا وشو تعرف هي تدري من زمان بس ليش تكرهني ما أدري واللي سويته أكيد زاد كرهها لي ..

اوووووووووووووف مقهـــــــــور يا عالم مقهــــــور ..

انتبهت لنفسي و ناظرت حولي زين ما في أحد ولاّ شالني على مستشفى المجانين .. رميت بنفسي

على الرمل بقوة بس آآآخخخخ الطيحة آلمتني مرة .. انقلبت على بطني ومسكت ظهري

و ضغطت عليه آآآآآآآآآآآآآآآآي والله اني غبي المجنون ما يرمي نفسه هذه الرميه لكن شسوي

كله من حبي اللي مجننتني .. .

قفزت من مكاني لما سمعت صوت جوال على بالي ريم رحمتني ودقت علي ..

بدون ما أناظر الرقم رديت بلهفة ..

تركي : هلاااااااااااا ..

بس تحطمت يوم سمعتها وحدة من اللي مخاويهم وهي تتكلم بنعومة تجيب القلق ..

.. : هلاااا بك حياتي اشلونك ..

قفلت على وجهها وانا أضحك على نفسي بسخرية اشلون توقعتها ريمان هههههه ريمان

ما تفكر تعطيني وجه تجي تتصل علي على قولها حثالة وما يتصل بي الا الحثالة ..

من عصبيتي قمت ورميت الجوال على البحر .. .

انتبهت للمكان اللي طاح فيه لما طرطشت المويه .. وانتبهت بعد لـ للي سويته تلقائيا ضربت خدي كف ..

آآآآآآآه يعور بس هذه عادتي لا سويت شيء غلط .. ناظرت مكان جوالي والله قهر توه ما صار له يومين

معي يا ربي قهـــــــــر .. فكرت أسبح عشان أريح أعصابي بس لما شفت الموج ضرب بقوة ترددت ورجعت

لسيارتي وانا متحسر بس تدرون وشو الشيء الحلو في السالفة ..

ان هذا الجوال هو اللي اتصل به على البنات .. يعني خلاص جات من الله ما راح أتصل أبدا علي أي

وحدة و بعد و لا وحدة بتدق علي ..

و الله حيل مستانس لأن اللي أتمناه من يوم حبيت ريم صار اليوم !! .. .


********************************************


.. . [[ ريمـــــان ]] .. .

قمت من النوم ورأسي يألمني بدرجة فظيعة و وجهي أحمر وحار .. . شيء طبيعي كله من صياح أمس ..

ناظرت ساعتي بكسل لكن لما انتبهت للساعة فزيت من سريري و رميت اللحاف عني ..

و ركضت على الحمام عشان أتوضآ و أصلي و بالمرة استحميت .. المهم طويت سجادتي و نطيت فوق

سرير جمّون أصحيها .. . فتحت عيونها و عقب قفلتها و قالت بثقل ..

جمانه : وش فيك ريم .. . (( و أتقلبت على الجهة الثانية )) .. . بعدي عني أبي أنام ..

هزيتها و أنا أعلي صوتي عشان تفهم ..

ريمان : تحركي جمّون الساعة سبع و ربع الحين ..

فزت من سريرها و ركضت على الحمام و أنا قمت ألبس على ما تستحم جمّون ..

لبست بلوزة شتوية زرقة وفوقها جاكيت طويل كعادتي ولونه أبيض .. ولبست بنطلون سكيني بعد لونه

أزرق و شيلة زرقة وجزمة سبورت بيضاء .. " الله يكرمكم " ..

وشلت شنطتي الزرقاء و حطيت فيها جوالي ..

طلعت جمّون و لبست الوان ما بين الوردي و الرمادي .. كانت جالسة نص جلسة على الأرض

و تربط حبال الجزمة .. "الله يكرمكم" .. وانا واقفة و أهز رجولي ..

ريمان : يالله جمّون بسرعة ..

جمانه : لحظة ريمان لا تربكيني ..

خلصت و قامت و طلعنا من الشقة و من البناية حتى البنات اللبنانيات طنشناهم ..

ركبنا سيارتنا وحركتها بسرعة .. و أنا أسوق ناظرت جمّون ..

ريمان : يا ربي أخذتنا نومه ..

ابتسمت لي ..

جمانه : ايه أول مرة نتأخر كذه .. (( وناظرت الدنيا بره وقالت )) .. . ناظري ريم نزل ثلج أمس ..

ناظرت أنا بعد عقب ناظرت قدامي .. وانا مبتسمه ..

ريمان : ايه أعشق الثلج ..

قالت و هي تضم نفسها ..

جمانه : لاااااااااااااااااا بــــــرد .. الا أقول ريم متى بيجي بندر له شهرين ما جا لنا ..

ناظرتها بنص عين و قلت ..

ريمان : مشتاقة الأخت لعنــــترة ..

ضربتني بكتفي خفيف ..

جمانه : هههههههههههههههههههه ريم لا تتطنزين ..

ابتسمت لها وانا أبعد كتفي عنها ..

ريمان : زين .. بس كافي كسرتي كتفي ..

جمانه : تدرين ريم ..

كنت متحيرة أقول لها عن السافل و لا لا .. . رديت عليها ..

ريمان : هلاااا .. ..

ابتسمت ببراءة و قالت و هي تشد بطنها ..

جمانه : ما فطرنا اليوم ..

ناظرتها و عقب ناظرت قدامي و أنا أضحك ..

ريمان : هههههههههههههههههههههه ايه صح ذكرتيني .. .

جمانه و هي تمد بوزها : كله من الجوال الغبي ما سمعت صوت المنبه ..

قلت لها وانا أوقف السيارة في المواقف ..

ريمان : ما علينا استحملي لا تسوين لي مثل برهومي ..

ضحكت ونزلت أنا معها و مشينا بسرعة داخل عاد الحين علينا محاضرة الدكتورة .. " ميري " ..

وعاد كلش عندها و لا التأخير على المحاضرات .. . تمنيت ما تكون دخلت الكلاس بس للأسف لقيناها فيه ..

ناظرتني جمّون و كانت مرتبكة ..

جمانه : نرجع أخاف تهزئنا قدام الكل ..

سحبتها معي و كملنا الطريق ..

ريمان : تعالي ما تأخرنا حيل ..

مشيت معي طقيت الباب وفتحته .. المهم قلت لها و أنا أبتسم ..

ريمان : hi good morning .. ..

ناظرتني و نزلت نظارتها لآخر خشمها و هذه الحركة تربكني شوي قالت لي ..

الدكتورة : hello Riemann and Jumana .. You are late / مرحبا ريمان و جمانه ..

أنتما متأخرتان ..

ابتسمت وانا أتأسف لها ..

ريمان : we're sorry , mrs.Mary .. we did not mean it /

المعذره سيده ماري .. لم نعني ذلك ..

تذكرون محمد الشاب السعودي كان قريب من الباب هو و صاحبه ..

محمد : معقولة ريمان تتأخر أكيد صاير شيء في الدنيا ..

طنشته وناظرت الدكتورة أنتظر ردها فابتسمت هي وقالت و هي تأشر لنا ندخل ..

الدكتورة : you can come .. because you always come early /

تستطيعوا الدخول .. لأنكم دائما تأتون مبكرا ..

ابتسمت ودخلت أنا و جمّون ورحنا مكاننا المفضل وجلسنا ننتبه للمحاضرة و بعد ما خلصت و طلعت الدكتوره ..

ريمان : جمّون تعالي نروح الكافتيريا ..

ناظرتني و هي ماسكة بطنها ..

جمانه : أدري .. . أصلا عصافير بطني تغرد ..

ضحكت عليها رحنا اشترينا 2 كروسان جبن .. و 2 قهوة تركية .. عاد مع برد لندن خيـــال ..

جلسنا فوق طاولة نأكل .. فكرت أقول لها عن تركي .. لأني ما تعودت أخبي عنها شيء ..

ناظرتها لقيتها تناظر الطلاب ..

ريمان : جمّون ما تتخيلين شصار لي أمس .. .

ناظرتني وقالت و هي تأكل ..

جمانه : وشو .. عاد أنا نمت و لا صحيت ..

ريمان : هههههههههههههههههههههههه أدري حشا ان كان نوم ..

لفت كلها علي وهي تضحك .. .

جمانه : هههههههه ما عليك مني قولي شصار ..

قلت لها وانا أتحاشى أحط عيني بعينها ..

ريمان : تــــركـــــي ..

غصت باللقمة و جلست تكح عقب ناظرتني و قالت و هي مستغربة ..

جمانه : شفيه من جاب طاريه ..

ابتسمت بألم وقلت لها و أنا ما أناظرها ..

ريمان : أمس أتصل على تلفون الشقة ..

شهقت و مسكت يدي ..

جمانه : كذابة قولي والله ..

بدت عيوني تدمع قلت لها و أنا أأشر بيدي على نفسي ..

ريمان : تتوقعين بتبلّى على عمري ..

قالت و هي ترص على يدي ..

جمانه : زين شقال لك شيبي ثم انت ليش رديتي عليه ..

رديت عليها وانا ألعب بأصابعها ..

ريمان : وانا شدراني انه رقمه ..

جمانه : زين شيبي منك ..

قلت لها كل السالفة .. عقب ناظرتها وقلت وانا خايفه ..

ريمان : جمّون أنا خايفه شتتوقعين المفاجأة اللي يتكلم عنها ..

ناظرتني جمّون و سكتت و هذه الحركة خلتني أحط رأسي على الطاولة و أصيح بصوت خافت ..

قالت جمّون و هي تربت على كتفي .. .

جمانه : خلاص ريم .. حياتي ما عليك منه وااحد فاضي وما وراه شغلة ..

خليك قوية ما توقعتك تنهزين من واحد مثله ..

قلت لها و أنا أصيح أكثر ..

ريمان : بس أنا ضعيـ ـفـه ضعيفة حـيـل قدامـ ـه .. ما تتوقعين اشكثر يخـ ـوفنـ ـي ما تتـوقعيـ ـن ..

ردت علي بنبرة قوية و جادة و هي ترص على كتفي و تقرب فمها من إذني ..

جمانه : ريمان شصار لك أعرفك ريمان القوية مو الضعيفة .. . حشا !! ..

الحين كل هذه الدموع عشان سمعتي صوته

و هو بعيد عنك اشلون لما نرجع بتنهارين قدامه .. ما أبي هذا الشيء يصير لك يا ريم ما أبي ..

أبيك قوية قدامه أبيك تحقرينه لين ينسى اسمه ..

بديت أخف من صياحي و أفكر بكلامها صدقها جمّون لازم أكون قوية و لاّ بالأخير ما راح أستفيد شيء ..

رفعت رأسي و أنا أبتسم و قلت لها و أنا أرص على يدها ..

ريمان : تسلمين جمّون بلياك كان ما عرفت اشلون أتصرف ..

قالت لي و هي مبتسمة ..

جمانه : ريم كل اللي أبيه منك تكونين قوية ولا يهزك سافل مثله .. .. .. وعــــد .. .

قلت لها و أنا أبتسم وأضمها ..

ريمان : وعـــــــد .. بإذن ربي ما أخلفه ..

عقب بعدت عنها و ناظرتها ..

ريمان : الحين علينا ذاك الدكتور الأبله ..

قالت لي و هي تمد بوزها ..

جمانه : يووووه خلينا نرجع الشقة ما فيني على فلسفته ..

قمت و سحبتها معي .. .

ريمان : هذا هو اللي كنت أبي أقوله لك ..

قمنا ورحنا على مواقف السيارات .. لما وصلنا لمحنا اثنين يطشون بعض بالموية ..

قالت جمّون و هي تغطي فمها بيدها ومبققه عيونها ..

جمانه : ي الله شوفي المجانين بيجيهم برد ..

ريمان : و انت وش عليك فيهم ..

لما قربنا لسيارتنا عرفناهم و هم بعد ناظرونا ووقفوا وجوا لحدنا و هم مبتسمين ..

وحنا وقفنا عند سيارتنا وابتسمنا لهم ..

هيثم : hi how are you ? ..

قلت له و أنا أنغزه بالكلام ..

ريمان : و عليكم السلام .. الحمد لله حنا بخير .. شخباركم انتم ..

ضحك فارس مع جمّون ..

هيثم : ههههههههههههههههههههههه السلاااام عليكم شحالكم شوه أخباركم ..

جمانه : بخير الحمد لله و انتم ..

فارس : طيبين ما نشكي باس ..

ريمان : دوم ان شاء الله .. بس مع اللي تسوونه الحين بتترقدون شهر كامل مع برد لندن ..

ابتسموا و ناظروا بعض عقب رد هيثم ..

هيثم : والله ملانين شنسوي بعد ..

ريمان : روحوا على المحاضرة مو عليكم الحين ..

راح فارس رفع يده باستسلام ..

فارس : لاااااااااا و اللي يطول بعمرج نقول لج زهقانين تقولين سيروا المحاضرة بيينا الضغط و السكر

لا سرنا وحنا تونا شباب .. الله يعيننا وبس ..

ضحكنا كلنا عليه ..

هيثم : خلاص ما بجي واايد ونرد لربوع الوطن ..

ريمان : صادق الله يصبرنا ..

ابتسمت جمّون و راحت دخلت السيارة و هي تقول باي .. ناظرت هيثم و فارس و ابتسمت أنا بعد ..

ريمان : يالله عن اذنكم ..

هيثم رافع حاجبه : أحيد عندج محاضرة انت بعد ..

ابتسمت .. والله صدق اتوهقت ..

ريمان : ايه بس ما ودنا نحضرها ..

هيثم : ههههههههههههههه زين لا تلوميني دامج شراتي ..

ريمان : ههههههههههههههه خلاص زين .. و يالله عن اذنكم ..

فارس : اذنج معاج .. في وداعة الرحمن ..

ابتسمت و ركبت السيارة وهم راحوا على سيارتهم وحنا بالطريق ناظرت جمّون ..

ريمان : جمّون تدرين كم باقي على الامتحانات ..

ناظرتني و هي تفكر وتحط اصباعها تحت فمها ..

جمانه : اممممممم أظن أسبوعين ..

ابتسمت لها وانا أسوق ومن غير ما أناظرها ..

ريمان : مستعدة .. تراها آخر امتحانات لندن ..

جمانه : نوعا ما مستعدة .. . و انتي ..

ريمان : تقدرين تقولين بس أكيد يوم تبدأ الامتحانات راح نجتهد .. (( وناظرتها )) .. . صح ..

جمانه : أكيد لأننا حنكون تحت الأمر الواقع ..

وقفت السيارة قدام بنايتنا و قفلتها وناظرت جمّون و أنا أبتسم و أشيل شنطتي ..

ريمان : يالله ننزل ..

ابتسمت و شالت شنطتها و رحنا على البناية و دخلنا شقتنا .. ..


*********************************************


وكالعادة تمر الأيام على هذا المنوال .. . صرت أنا و جمّون نجتهد و نهتم بالدروس

و المحاضرات أكثر لازم أصلا عشانها آخر سنة ونبي نرفع رأس أهلنا ..

آآآآآآآآه يا لهم وحشة ما تحصى أبد ..

و مع الأيام نسيت أو حاولت أتناسى سالفة تركي ..

و غرقت حالي في الجامعة و في التفكير بفارس وهيثم ..

أو خلوني صادقة معكم غرقت حالي في التفكير في هيثم .. .. هيثم وبس ولا أحد غيره ..

ما أدري وشو المشاعر اللي بديت أحس بها تجاهه .. . صرت لا شفته أستانس حيل ..

اذا ضحك ونكت وهو يسولف معانا أبتسم .. . ولاااا صرت أرتبك بعد يوم يجي جنبنا ..

ما أدري وشهي الأحاسيس اللي أحس بها ولا أبي أدري أخـــــــــاف أكتشف يوم اني حبيته !! ..

لحظة من جاب طاري الحب !! .. لا يكون فعلا حبيته لااااااااااا هذا آخرشيء أبيه ..

لأني ما أبي أعلق نفسي بوهم و لازم أتذكر انه من بلد و انا من بلد ..

و هذا اللي حاز بخاطري آآآه ليتني أعرفه أو يقرب لنا على الأقل أبقى أشوفه و لو يكون لغيري ..!!

يا ربـــــــــي وش هذه الأفكار اللي بدت تتحذف على رأسي ..

اللي قاهرني أكثر ان هذه آخر سنه لنا وخلاص بنرد على السعودية عقبها ..

و اللي يقهر أكثر و اكثر ان هيثم ما طلع الا على آخر السنه .. آآآآآآآه يا قهـــر ..



**********************************************


نهآيه آلبآرت آلخآمسس '$
آن شآء الله عجبكم ..

آلبآرت آلسسآدس ..




**********************************************



كانت الساعة 12:30 الليل .. . و كنت جالسة فوق السرير أسولف مع جمّون و هي منسدحة

فوق سريرها .. اليوم الخميس و بكره ما علينا محاضرات فكــــــه عاد مرة ملينا ..

لاحظت و أنا أسولف ان جمّون مغمضة عيونها ناديتها ثلاث مرات ما ردت علي .. مالت عليها الكلبه نامت

و خلتني أسولف مع روحي مثل المجنونة .. هين جمّون ان ما وريتك ما أكون ريمان ..

توي مسكت اللحاف و انسدحت عشان أنام الا يرن جوالي .. .

رفعته من على الكومدينة و استغربت يوم شفت الرقم .. لأني ما عرفته وخفت أرد يكون تركي .. .

ترددت أرد أو لا .. . شوي وقف الجوال عن الرن .. ارتحت لكن ما أسرع ورد يرن ..

اووووووووهوووووووو أظن مقدر علي أرد ..

رفعت السماعة بدون ما أتكلم .. بس سمعت الطرف الثاني و كان صوته مألوف شوي بس بعدني

ما عرفته و لا رديــــــت عليه .. . رد و تكلم مرة ثانية ..

.. . : ألـــــــــوووو ياهووووووووه يا نااااااااااس انتم معي على الخط ولاّ وين رحتم ..

يا عاااااااااااااالم ردوا ترى بتندمون اذا قفلت .. .

ما سويت شيء غير اني ضحكت لأني عرفته ..

ريمان : هههههههههههههههههههههههههههههههههههههههههههههههه ..

.. . : دوم الضحكة .. يالحمارة ليش ما تردين ..

كنت أضحك و بالقوة رديت عليه ..

ريمان : ههههههههههههههه ما عرفت رقمك متى غيرته ثم يا القاطع توك تتصل بجد البعد يبين الغلا ..

.. . : هههههههههههههههههههه لا والله بجد حمارة من المفروض يتصل على الثاني أنا و لاّ انتي ..

ريمان : انت أكيد .. أنا وش لي بك .. انت عمي و المفروض تسأل ..

خالد : كلي تبن زين .. قال وشو انت عمي قال .. بجد بنات آخر زمن لكن خليني أمسكك و أنا أوريك ..

ريمان : هههههههههههههههههههههه عادي تقدر تمسكني ما بيننا غير محيط .. .

خالد : طيـــــــــب ريم .. هذا بدال ما تقولين اشلونك عمي شخبار دراستك ..

لكن كله من رأس خالك اليابس .. و لاّ كان ما اتصلت و لا فكرت فيك ..

حبيت أقهره فقلت له بلهفة و بسرعة ..

ريمان : خلــــــــــــــوف هو عندك !! .. أعطيني اياه أحسن منك ..

خالد : زين يالحمارة خذي خالك و ترى الطيور على أشكالها تقع خذيه يالله ..

سمعته ينادي خالي و يكلمه ..

خالد : خذ بنت أختك السبالة على قولتكم ..

جاني صوت خالي خليفة ..

خليفة : هلاااا والله بالزين كله هلاااا ببنت أختي الغالية هلاااا باللي شراتي طالعه ..

قعدت أضحك أكيد يبي يقهر خلودي بس حليلهم اثنينهم و لا كأنهم صكوا 26 ..

خليفة : ريم حيــــــــاتي شحالج شخبار دراستج ..

مسحت دموعي اللي نزلت من الضحك و من الوناسة بعد ..

ريمان : بخير خالي ما أشكي من بأس و انت اشلونك خلوف ..

خليفة مستغرب : خلوف ! أصغر عيالج ريم ..

ضحكت ما أدري شصار لي بس جالسة اضحك ..

ريمان : ههههههههههههههههههههههههه يالله عاد خالي اشلونك ..

خليفة : هيه جيه خليج مؤدبة .. والله أنا عال العال ولا أشكي بأس ..

ريمان : دوم ان شاء الله مو يوم .. الا وينه خلودي المدلع صدقه زعل ..

سمعت صوت عمي وهو يرد علي أكيد حاطين الإسبكر ..

خالد : أيـــــــه خلودي المدلع وش بقي ما قلتيه لي يا بنت خلف .. أصغر عيالك أنا ..

لكن كله من خالك الخام علمك طولة اللسان ..

خليفة : أنا خام يالسبال ..

خالد : خــــــامين بعد مو خام واحد ..

خليفة : أهــااا زين سمعتي عمج شيقول ريم ..

كنت أضحك عليهم بجد بزران مو رجاجيل ..

ريمان : شسوي لكم حشا بزران مو رجاجيل والله ..

خالد : اوووووووه زادت صرت بزر بعد وش عندك بعد يا بنت أهلك ..

ضحكت من قلب ولا رديت عليه ..

خالد : ريم يالحمارة وحشتيــــــــنــــــي مووووت متى بسس نرد السعودية متى ..

خليفة : بس هب أكثر مني ما تدرين اشكثر متوله عليج ريم ..

ابتسمت و أنا أمسح وجهي يا حبي لهم والله ..

ريمان : وانا بعد متولهه عليكم حيل حـيـل ..

ماقدرت أستحمل و جلست أصيح والله وحشوني صدق هم وأهلي ياربي تنتهي هالثلاث أسابيع بسرعة

خلاص مليت من لندن ومن كل شيء .. ما أبي غير شوفة الغاليين ..

خالد : بس حياتي ريم .. لو أدري كان ما اتصلت .. يالله مسحي دموعك تراها غالية علي ..

صحت أكثر جعلني فداه وحشني ..

ريمان : والله وحشتني عمي وحشتني حيل ..

خليفة : أوب أوب أوب و أنا وين رحت ..

ضحكت وانا أصيح بعد ..

ريمان : والله اشتقتلكم انتم كلكم واججججد ..

سمعت صوت عمي كان متهدج ..

خالد : ما عليه يا الغالية ما بقي غير ثلاث أسابيع تحملي فيها وحنا بعد و عقب ان شاء الله

نجتمع بلا فراق ثاني ..

خليفة : والحين بسج صياح قطعتي قلبي ولوعتي جبدي الله يهديج ..

خالد : مالت عليك يا المطفوق لازم تقط ورى كل كلمة حلوة كلمة بايخة يالبايخ ..

خليفة : أنا مطفوق وبايخ عيل انت شوه .. انت مصطول وراعي حريم وسوالف ..

خالد وهو يشهق : أيا الكذاب قلبت علي وانا اللي ساعدتك و أعطيتك أفكار عشان تخلي ذيك الشقراء

ام رأس يابس تطيح في هواك .. و الحين بعد ما طيحتها في شراكك بفضل أفكاري تقلب علي يا خاين العشرة ..

خليفة : هههههههههههههههههههه جب شوهت صورتي جدام بنت أختي .. .

خالد : ليش لاااا .. خليها تشوف خالها اللي ميتة ع ثراه خليها تشوفه على حقيقته ..

خليفة : جــــــــــــــــــــب جب والله صج ما تستحي ولا تحشم .. خليتني راعي سوالف وراعي ليل جب

ولا كلمة لا أليخ العقال على ظهرك عقب أعقك من الدريشة ..

خالد : وتهدد بعد ريمان ترى خالك .. آآآآآآآآآآآآآآآآآي ..

خليفة و هو يكلمني : والله انه جذاب يا ريم أقسم باللي خلقني اني ما سويت شيء من

اللي يقوله لا تصدقين رمسته .. والله انه جذاب أنا صج أغازل لكن والله ما وصلت لذيج السالفة ..

خالد : أنا كذاب هااااه .. آآآآآآآآآآآآآآآآآآآآي ..

خليفة : والله لو ما تصلح كل اللي قلته لاني ربيعك ولا أعرفك فاهم ..

خالد : هههههههههههههههههههه زين كنت أمزح ريم لا تصدقيني تراني كذاب .. حليله خلوف صح انه

يغازل لكن ما وصل لذيك السالفة على قوله هههههههههههههههههه ..

خليفة : هيه على بالي بعد ..

ضحكت ما يتركون عاداتهم يتناقرون مثل البزران وعقب دقائق يرجعون سمن على عسل ..

ريمان : لا تخاف خالي أدري ان عمي يغار منك عشاني أحبك أكثر منه ما عليك منه واحد غيور ..

خالد شهق و يوم سمعت شهقته جلست أضحك بس بصوت واطي عشان لا يسمع أبيه يأخذ المقلب ولاّ أنا

مستحيل أحب أحد على أحد اثنينهم مثل بعض مكانتهم ..

خليفة : هــــيه والله غيور ادريبة .. هو شرات اليهال يغارون اذا جافوا حلاو عند غيرهم وهم عندهم جيس كامل ..

هالمرة ما قدرت أمسك ضحكتي وضحكت بصوت مسموع معي خالد وخليفة ..

ريمان : ههههههههههههههههه حرام عليك خلوف حليله خلودي أحبه بعد الا أموت عليه ..

خليفة : ردينا حق خلوف وخلودي خليتينا أصغر عيالج ..

خالد : ههههههههههههههههه فديتها والله لو تشبعني طراق وخلودي أفداها المهم اني أشوفها مستانسه ..

ابتسمت من خاطر يا رب ما يخليني أنحرم منهم ..

ريمان : تســـــــــلم عمي والله أنا اللي أفداك ..

خليفة : انزين مالي شيء أنا بعد أحبج وأكثر عنه بعد ..

رديت عليهم وانا أداري نفسي لا أصيح لأنهم موت وحشوني ..

ريمان : انت بعد فيك الخير والبركة خالي جعل عيني ما تبكيكم يا رب ..

خليفة + خالد : آآآمين ..

خالد : الا أقول ريم وينها القاطعة رقم 2 ..

فهمت ان قصده على جمّون ناظرتها كانت نايمة ولا تحس باللي حولها ما قلت لكم نومها ثقيـــل ..

.. . (( طبعا خالي خليفة ما يقرب لها أبد هو بس خالي .. أما عمي خالد طبعا يصير عمنا كلنا )) .. .

ريمان : رقم 2 نايمة ومستانسة بعد في نومها خبرك عنها دجاجة ..

خليفة قام علي فجأة ..

خليفة : ما غيرج الساهرة تعلمي منها كيف ترتبين حياتج هب طيب السهر لج ..

استغربت شفيه خالي قام علي مرة وحدة .. أما خالد جلس يضحك من قلب ..

ريمان : طيب شــوي شوي علي شقلت أنا حليلي ..

خليفة وهو يقلدني : شقلت أنا حليلي .. جب ولا كلمة كلج و لا جمّون فاهمة ..

تحيرت أكثر قلت لعمي و أنا أتنهد ..

ريمان : عمي شفيه خالي صابه برد ولا ضربة شمس ..

خالد : ههههههههههههههههههههههههه تقدرين تقولين ان خالك طايح في مستنقع الحب ..

خليفة وهو يتنهد : آآآآآآآآآآآآآه و أحلى مستنقع بعد ..

خالد : يا اللي ما تستحي على وجهك حشمني أنا عمها .. تراك حيل مآخذ راحتك هههههههههههه ..

رد خليفة وهو مبين من صوته انه انحرج ..

خليفة : هههههههههههههههههه جب يالجلب ..

أول شيء ما فهمت وشو يقصدون عقب فكرت جمّون و خالي طايح في الحب قلت و أنا أشهق .. .

ريمان : خلـــوف يالخاين ليش ما قلت لي هين يا دبــــــــــــــــــب ..

خالد : هههههههههههههههههههههههه تعالي شوفي خالك مسوي منحرج ههههههههههههههه ..

ضحكت حليله خالي صح انه يغازل لكن بعده ينحرج مرة ..

ريمان : خلــــــــــــــــــود حرااام عليك اتركه في حاله ..

خالد : هههههههههههههههههههههه زيـــن زين هههههههههههههه ..

كلمت خليفة و طنشت عمي أدريبه يحب يحرج الواحد الله يعين خالي من طولة لسانه ..

ريمان : خلوف حياتي ما عليك منه .. الا قول لي من متى ..

رد علي بس واضـــــــــح انه منحرج ..

خليفة : اممممممممممم من زمان والله .. بس هذا الجلب اللي يعرف عن السالفة

قلت له قبل تسع سنوات ..

قلت له و أنا ألومه بس خاطري متشققة من الوناسة أخيرا جمّون لقت واحد يحبها و يقدرها

مو أخوي المطفوق ..

ريمان : و ليه ما قلت لي يالخاين صدق انك ما تستحي ..

خليفة : شـــــــــــــــــوه تراني ولفتج واايد حشميني على الأقل ..

انحرجت منه بصراحة من حقه هو أكبر عني بست سنوات ..

ريمان : السموحة خــــــــالي والله جد آســـــــــــفة ..

خالد : ههههههههههههههههههههه يا الخبلة شوفيه يضحك عندي هو بس يبي يغير الموضوع

شفيك ما تعرفين خالك ..

قلت له و أنا بعدني منحرجه ..

ريمان : بس بعد لازم أحترمكم شوي ..

خليفة : هههههههههههههههههههههههههههههههه ريم والله أحبج ..

حبيت أستهبل عليه وأحرجه ..

ريمان : أنا و لاّ اللي نايمة جنبي ..

خالد جلس يضحك من قلب وانا معه ..

خليفة : جب يا السبالة ..

وااضــــــــــــــــــــــــح عليه مررة انحرج آآآخخخخ ليتهم معي الحين كان عرفت فعلا أحرجه ..

ريمان : ههههههههههههههههههههه خالي لا تزعل كنت أمزح معك ايش فيك صاير كبريت ..

خالد : مو كبريت لو تشوفينه خلاص نار مسعره هههههههههههههههههه ..

خليفة : أنا أروح أنام أحسن لي من مجابلتكم وانتم تتمصخرون باجر ورانا محاضرات ..

ريمان : ههههههههههههههههههههههههه خالي أهون عندك تتركني مع خلود ..

خليفة : خلّه ينفعج خلود يوم تنتهين مصخرة ويّاه ذيج الساعة تعالي دوري على خالج ..

قلت له وانا أترجاه ..

ريمان : خـــــــــــــــــالي لا تزعل والله ما كنت أقصد .. (( و كلمت عمي خالد )) . . كله منك يا خلـــود ..

خالد : أيــه ايه أقلبي الجرة علي ..

قلت له بهمس عشان يسكت لا يولعها أكثر ..

ريمان : عمـــي الله يهديك خلك ساكت ..

خليفة : هههههههههههههههههههههههههههههه ..

استغربت منه بس عقب سمعت ضحكة عمي معه عرفت انه مقلب مالت عليهم ..

ريمان : خالي لا تتطنز انت معه ..

خليفة : والله اني أحبـــج أحبج أحبــــج أحبج أحـــــــــبج كبر الامارات والسعودية فديتهم و فديــــــت أهلها ..

خالد : هههههههههههههه خلاص وش خليت لجمون خلني أنا .. (( و رد كلمني )) .. ريم والله اني أحبك
أحبـك أحبك أحبــــــك أحبك كبر الامارات والسعودية فديتهم وفديت أهلها ههههههههههه ..

كنت أمسح دموعي وانا أسمعهم وفي نفس الوقت كنت أضحك على أسلوبهم ..

ريمان : وانا بعد أحبـــــــكم أحبكم أحبكم أحبكم كبر الإمارات والسعودية فديتها وفديت أهلها .. .

ما استحملت ورجعت صحت ..

خليفة : لااااااااااااااااااااااااااااا شوه اتفقنا بسج صياح ريم حياتي ..

خالد : خلاص ما بقي غير ثلاث أسابيع ..

خليفة قطع كلامه : لااااااا شوه نسيت خالد بس بجي آآآآآآآآآآآآآآي ..

خالد : خلاص حبيبتي ريم لا تصيحين ولاّ نزعل منك ..

كان خالي بيقول شيء بس عمي سكته .. ما دققت بالسالفة ورديت ..

ريمان : لاااااااا كله ولا زعلكم ما أقدر عليه ..

خليفة : و احنا بعد عمري ما نروم على زعلج ..

خالد : يالله كان تحبينا امسحي دموعك ..

رديت بسرعة وانا أمسح دموعي ..

ريمان : أكيد أحبكم ما يحتاج لها تفكير ..

خليفة : فديتج والله وحنا بعد نحبج وأكثر عنج بواايد ..

ريمان : فديتكم .. يالله أترككم الحين أكيد وراكم محاضرات وانا ما وراي شيء بكرة عندي off ..

خليفة و هو يتحسر : حظج والله .. مالت علينا طول أربع سنوات ما جفنا غير خمس ..

خالد : أحمد ربك غيرك ما شاف ولا واحد ..

ابتسمت بجد سوالفهم ما تنتهي وانا ما ودي أسهرهم وأكيد عندهم الحين بأمريكا الساعة 10 الليل ..

ههههههههههههههههه الحين أنا الساهرة مو هم ..

ريمان : أظن ان ما عندكم نية تروحون الجامعة بكره ..

خليفة : هيه والله صادجه مالي بأرض مولية أسير ..

ريمان : لا خالي لازم تجتهدون خلاص ما بقي غير ثلاث أسابيع ليش تضيعون تعب أربع سنين ..

خالد : صدقك والله .. يالله حياتي لازم نقفل أولا عشان الجامعة وثانيا وهو الأهم عشان البطاقة قربت تخلص و

ما ودي أشتري وحدة ثانية ..

ضحكت من قلب عليه ..

ريمان : ههههههههههههههههههههههههههه أدريبك عمي بخيـــــــــــــل ..

خالد : هههههههههههههههههههههههه والله ان كل فلوس الدنيا تفداك ..

خليفة : وتفدى السبالة النايمة ..

ضحكت عليه أنا وخالد ..

خالد : ههههههههههههههههههههههههه كم مرة قلت لك حشمني ..

خليفة : اوووووووه سوري نسيتك ..

خالد : أيـــــه حاسب مرة ثانية فاهم ..

خليفة : حاضر عمي ..

ضحكنا كلنا عقب قال خالد ..

خالد : يالله ريم ان شاء الله وقت ثاني أتصل عليك بس من جوال خليفة طبعا ..

خليفة : يفداج الموبايل و راعيه ..

ابتسمت من خاطر ..

ريمان : يالله أجل ما أطول عليكم تحملوا على أنفسكم ولبسوا زين عن برد امريكا ..

خالد : ان شاء الله أوامر ثانية يا الغالية ..

ريمان : سلامتكم وبس يا الغاليين ..

خليفة : الله يسلمج ويحفظج من كل شر .. الا قبل لا نقفل في مفاجأة بتعرفينها باجر ان شاء الله ..

شكيت ايش فيها العالم توعدني بالمفاجآت ..

ريمان : مثل وشو ..

خالد : لا قلنا مفاجأة يعني مفاجأة .. . يالله سلمي على جمّون و تحملي على روحك زين حياتي ..

تحيرت بس استسلمت ورديت عليه ..

ريمان : زين يالله في حفظ الله وتسلمون على الاتصال .. و .. و .. و تراني أحبكم ..

نقع عمي هو وخالي من الضحك مالت عليهم يتطنزون علي ..

خليفة : هههههههههههههههههههه اللي يسمعج يقول يالسة ترمسين ريلج ..

خالد : هههههههههههههه بجد ريم وش فيك ..

انحرجت منهم كل السالفة اني كنت متحيرة من سالفة المفاجأة بس هذولا ايش يفهمهم ..

ريمان : ههههههههههههههههه خلاص باي ..

ضحكوا أكثر ..

خالد : مع السلامة حبيبتي في حفظ الله ..

خليفة : بـــــــــــــــــاي يا حلــــــــــوه ..

ريمان : باي في حفظ الله ..

ضحكوا وقفلوا وانا ابتسمت وانا أناظر جوالي حليلهم وحشوني حيل .....





************************************************** *********************



نهآيه آلبآرت آلسآدس . .
آن شآء الله عجبكم '$

البآرت السآبع


**************************************************




بعد ما قفّلت من عند عمّي جلست أفكر وانا أناظر جمّون من جده خالي يحبها ههههههههههههههههه

بس تدرون لايقين ببعض حيل .. يالله يا رب يكتبهم لبعض بس معقولة من زمان يحبها وهي ولا تدري عنه ..

الا لحظة .. أذكر لما كان عمرنا 15 جاء خالي من الإمارات يزورنا وكان عمره 21 سنه في ذاك الوقت ..

وفي يوم كنا مسوين عزيمة بس للشباب وكانت جمّون موجودة طبعا دوم وهي معي ما نتفارق أبدا ..

كان جالس بالمجلس هو وعمي خالد و بندر ومتعب وتركي وباقي أولاد أعمامي بس الشياب ما كانوا

موجودين سبق وقلت لكم .. المـــهم .. دخلت أنا و جمّون وكنا شالين صينيات القهوة وصحون الحلا ..

خليفة : هلاااا والله بالزين ريم شحالج اليوم ..

ضحكت من قلب عليه اللي يسمعه يقول كأني ما كنت معه طول الوقت ..

ريمان : ههههههههههههههههه بخير دامك بخير انت اشلونك ..

خليفة ابتسم عرف اني أتطنز عليه ..

خليفة : بخير يا الغالية بشوفتج الا أقول من المزيونه اللي معج ..

حسيت ان جمّون ذابت في مكانها بس هي بعد كانت تحب بندر عشان كذه كانت جافه مع خالي ..

خالد : هههههههههههههههههههههه ما تعرفها هااااه ..

شفت خليفة يناظره بنظرات بس وقتها ما اهتميت لشيء ..

ريمان : هذه الله يسلمك بنت عمي الغالية ورفيقة دربي جمّون أخت سلمان ومحمد وراكان ..

.. (( وأشرت على سلمان ومحمد وراكان )) ..

خليفة : اوووووه السموحة يا الشيوخ على رمستي .. (( قصده كلمة المزيونه )) ..

محمد : لااااااا مسموح حليلها جمّون بزر ..

تخصرت جمّون على طول ..

جمانه : لا والله بزر هاااه ..

وانا بعد تكتفت وقلت وانا أرفع حاجب ..

ريمان : و اذا كانت هي بزر يعني أنا مثلها لأني في سنها ..

تدخل تركي في هالوقت ..

تركي : من قال محشومه يا زينة الحلايا محشومات ككل يعني .. (( يحاول يرقع السالفة حضرته )) ..

طنشته وسحبت جمّون نبي نطلع لأني كنت مستحملة نظرات تركي من البداية لكن الحين ما أقدر ..

ريمان : يالله جمّون خلنا نروح عشان نكمل شغلنا ..

خليفة : ههههههههههههه أونج انت معها عندج شغل هااااه هههههههههههههههههه ..

على ما أظن ان الخدامة عليها كل الشغل وجفت هالشيء بعيني ..

ضحكت لأني عرفت قصده .. يوم كنا نتغدا وعقب خلصت قمت من الكرسي بس خالي ناداني وقال لي

تعالي لمي السفرة بس أنا قلت له هذا شغل الخدامات مو بنات الشيوخ .. المشكلة ان هو بعد

عندهم خدامة وما يشتغلون بس أظن نزل الوحي عليه ..

ريمان : ههههههههههههههههههههههههه لااااا هذا شغل من نوع آخر وخاص جدا الله يحفظك ويهديك

.. (( قلتها وانا أغمز له بعيني )) .. هههههههههههههه فهمت عليّ ..

خليفة : هههههههههههههههههههههههه زين زيــن سيري عيل سوي شغلج الخاص اللي من نوع آخر ..

ضحكت وانا أطلع و جمّون معي و جات عيني بالصدفة على تركي ومنها ارتبكت وطلعت بسرعة ..

اووووووووووووووووف ما قلت لكم مسبب لي أزمة هو و نظراته .. .

بس هذه هي السالفة اللي طرت على بالي عاد أنا ما أدري ان كان يقصد كلامه خالي بس أنا

أعرفه هو وعمي في هذه السوالف ما عمرهم مزحوا أبدا .. المهم .. أعرفكم على خالي زين ..

هذا أخو أمي ههههههههههههههههههه شيء أكيد ما يبغالها كلام ..

هو بعمر عمي خالد : 26 سنه ويدرس بعد معه في امريكا .. هم أصدقاء من زمن بس مو مرة

لأن خالي يعيش مع أهله بالإمارات وعمي معنا بالسعودية لكن عقب راحوا امريكا صاروا دوم

مع بعض المهم هو بعد مدلعني حيل وأكثر من عمي بس عرفت مصلحته الحين هههههههههههههههههههه

لا والله حرااام أظلمه كذه .. خالي دوم يحبني ثم وش مصلحته عشان أقول كذه هو يقدر بنفسه

يروح يخطبها بجد ما أستحي على وجهي هههههههههههههههه

يالله يا رب يصير من نصيب جمّون .. بقي عمي الله هداه لحد الحين مو مبين عليه يحب وحدة ..

بس تدرون وشو اللي محيرني المفاجأة .. والله يا خوفي يكون تركي و عمي خالد يقصدون شيء وااحد ..

بس وش دخل عمي في تركي آآآآآآآه رأسي بينفجر من كثر التفكير أنام أحسن لي من صداع الرأس ..



*********************************************


في اليوم الثاني كنت راجعة أنا و جمّون من السوبر ماركت على الساعة .. (( 11:30 الصبح )) ..

ويوم وصلنا البناية وقفنا السيارة ونزلنا وحنا شالين الأكياس .. بس لما وصلنا لباب البناية شفنا

واحد جالس على الدرج ويلعب بجواله .. تضايقت الحين لازم نمشي من عنده ..

لما وصلنا له رفع رأسه ووقف على طول وهو مبتسم ! ..

أما أنا رميت الكيس لجمون وركضت له وطحت في حضنه أصيح .. وهو جلس يهديني ويضحك ..

بندر : هههههههههههههههههههههه حشا ما صارت ريم كل هذه دموع ..

ريمان : شهرين يا الظالم وتضحك .. (( وضربته على صدره بعد ما بعدت عنه )) .. وينك ..

ابتسم .. بندر : كأني جيت خلاص .. ماله داعي السؤال .. (( ناظر جمّون اللي وصلت لنا )) ..

بندر : هلاااا والله ببنت العم هلاااا و غلا اشلونك عساك بخير وصحة وسعادة ..

جمانه : الحمد لله بخير و انت ..

بندر : بخير دامكم بخير ..

.. (( استغربت من ترحيبه المبالغ وراح بالي لسبب ثاني و تمنيت من ربي تكون شكوكي في محلها )) ..

بندر : بنجلس واقفين كذه ..

ابتسمت وسحبته لداخل وركبنا المصعد ودخلنا الشقة ..

ريمان : هلاااا والله بمن جانا وشرفنا هلاااا وغلا ..

راح رمى نفسه فوق الكنبة واسترخى وقال وهو يتمغط ..

بندر : لي ساعة أحتريكم ..

جلست فوق الكنبة و جمّون راحت تودي الأغراض للمطبخ ..

ريمان : كنا بالسوبر ماركت .. انت ليش ما تعطيني خبر قبل لا تجي ..

ابتسم ابتسامة واســـــــعة ورد علي بهدوء ..

بندر : كنت مسوي لك مفاجأة ..

والله كان خاطري أصرخ وأقول .. يا عااااالم ايش صار للناس بس يبشروني بالمفاجآت ..

يا خوفي بس من هذه المفاجآت بالأخير شتطلع لي .. طنشت كلام بندر وسألته ..

ريمان : المهم اشلون أهل السعودية اشتقت لهم ..

ابتسم ابتسامة واسعة وهذا اللي خلاني أستغرب وأحتار أكثر ..

بندر : أهل السعودية بصحة وسلامة ويسلمون عليك بالذات ناس خاصيين وصوني أسلم عليك واااجد ..

ناظرته مستغربة وقلت بنبرة طنازة ..

ريمان : ما أحيد روحي سيدة أعمال عشان يجيني السلام الخاص ..

ابتسم أكثر وناظر جمّون ..

بندر : جمانه بعد اذنك و اذا ما فيها احراج أبي ريم في موضوع خاص .. و .. و السموحة جمانه ..

ابتسمت جمّون و قامت ..

جمانه : لا عادي مسموح خذوا راحتكم ..

راحت دخلت غرفتنا وانا ناظرت بندر مستغربة .. بس تدرون كنت أحس بخوف بداخلي بس من وشو ما أدري ..

بندر : اشلونك ريم وش أخبار الدراسة معك ..

رفعت حاجبي في وجهه ..

ريمان : الحين مقوم جمّون عشان تقول لي اشلونك ..

ابتسم وعدل جلسته و ناظرني بجدية أربكتني ..

بندر : لاااا بغيت أقول لك عن الناس الخاصيين ..

ناظرته من غير ما أرد .. وهو كمل كلامه ..

بندر : شوفي ريم أنا بدخل في السالفة من غير لف ولا دوران ..

قلت له بصوت فيه الحيرة والخوف ..

ريمان : ايـــه !! ..

بندر : انت تعرفين ان كل بنت ومصيرها بيت زوجها .. وان هذه سنة الحياة ..

هزيت رأسي بمعنى .. * كمل كلامك أعرف * ..

بندر : بس وانا بصراحة جاي أقول لك ان في واحد حيل حـيـل قريب منا وتعرفينه خطبك مني أو من أبوي رسمي

وبصراحة أنا وافقت له لأنك تعرفينه زين وماله داعي أعرفك عليه ..

وابتسم وهو يكمل كلامه بثقة ..

بندر : هااااه ما عرفتيــــــــه ..

هزيت رأسي بمعنى .. * لااااا * .. من غير ما أنطق بحرف واحد ..

بندر : ههههههههه مستحيــــــل ريم ما عرفتيه .. زين طيب تعرفين روميو العرب تعرفينه أكيد ..

أنا انثبرت و لا قدرت أتكلم يا ويل قلبي يا ويلي ويلاه لو كان يقصد اللي في بالي ..

بندر : هههههههههههههههههههههههه زين خلاص تركي خطبك ..

تدرون وش كان شعوري وقتها حسيت كأن أحد صب على رأسي جك مويه بــــــــارد ..

سكت ولا رديت عليه أصلا أرد عليه بوشو قولوا لي وشو أقول له / الأخ شكله طابخ السالفة في

السعودية و جاي بس يزف لي الخبر الرررررررررررااااااااائـــــــــــــــع ..

بندر : و بس يا حلوة وحنا اتفقنا ان تكون الملكة يوم ترجعين للسعودية ..

عصبت منه بصراحة وشو هذا الانسان يتحسب الناس رهن أمره .. قمت من مكاني وقلت له

وانا منفعله و ميته من الغيظ ..

ريمان : انت بكيفك تحدد كل شيء من دون ما تشاورني ..

ناظرني وهو مستغرب ..

بندر : ايش فيك ريم ليش معصبة .. تركي ما غيره خطبك ليش معصبه ..

ريمان : ما أبيه ما أطيقه ما بقى غير اتزوج ذاك الواطي ..

عقب سكت و حطيت يدي على فمي يا ويلي أنا شقلت الحين وش بيسوي فيني بندر ..

قام وهو مستغرب وتقدم مني ..

بندر : آل وشـــــــــــــــــــو ؟!! ..

يا ويــلي شقول له الحين والله ما ألومه مستغرب من سبتي لأني ما قلت غير لـ جمّون ..

مسكني من ذراعي وهو معصب ..

بندر : تكلمي آل وشو ؟! .. الحين هذه السبة الراقية بس عشان خطبك ..

رديت عليه بسرعة ..

ريمان : ولا شيء انسى كنت منفعله وبس ..

رص على ذراعي أكثر ..

بندر : كنت منفعله !! .. في أي بنك أصرفها هذه .. الحين اللي يسمعك وما يعرف تركي حيحسبه واطي فعلا ..

سكت آآآه ليتك تدري عنه و بتعرف انه واطي وأكبر واطي بعد .. قال لي وهو يبعد عني ويرجع يجلس ..

بندر : المهم مهوب كيفك ترفضينه أنا أعطيت الرجال كلمة .. ثم أنا ما أبي خطوبتي لـ وضحى تنفسخ ..

صدمة ثانيــــــــــــــــة ..

ريمان : وشو وضحى انت خرفت ..

رد علي ببرود وكأنه كان متوقع عصبيتي ..

بندر : لاااا ما خرفت بعدني بعقلي .. تراني خطبت وضحى ووافقت و ملكتها في نفس يوم ملكتك على تــــركي ..

.. (( و شدد على اسم تركي كأنه يتحداني )) .. أما أنا ما كان يهمني شيء ما كان يهمني غير جمّون ..

قلت له بهدوء ..

ريمان : و جمّون ..

ناظرني وهو مستغرب ..

بندر : علامها جمانه ..

ريمان : من بيتزوجها ..

ناظرني بنظرة حسستني اني بزر ..

بندر : جمانه جاييها نصيبها مثلك ..

صرخت عليه ..

ريمان : الحين انت وش فيك أقول لك ما أبي تركي تقول لي الملكة و النصيب ثم حرام عليك ليش وضحى ليش ..

وضحى ما تطولك مهيب من مقامك ..

عصب علي مرة شيء طبيعي مو قلت لكم بندر عند تركي و وضحى ينقلب ضدي ..

بندر : ثمني كلامك ولا تصارخين و انت الصادقة وضحى تسواك و تسوى جمانه و تسوى

عشرة منكن فاهمة و لاّ لااااا ثم أنا منيب جاي عشان أشاورك لاااااااا أنا جاي أوصل لك خبر

و انت تنفذينه بدون أي كلمة فاهمــــــــة ..

صارخت أكثر والله ما أتزوج تركي لو يطير ..

ريمان : ما أبي تركي ما تفهم براحتك انت تزوج وضحى تزوجها و عيش معها لكن اني أتزوج تركي

لاااا من المستحيلات أتزوجه ما أبيه ما أبيه ما أبيـــــــــــــــــــــه ..

رد علي بهدوء وببرود وهو يشيل الكاب ويلبسه ..

بندر : أنا قلت لك مو جاي أشاورك لا تجلسين تبحين في صوتك من كثر الصراخ وراك ملكة ..

هي السالفة عنده سالفة عناد لكن هين ..

ريمان : والله ما أتزوجه و بتصل في أبوي وأقول له اني ما أبي تركي ..

ضحك بسخرية علي ..

بندر : ههههههههههههههااااي حياتي ترى أبوي هو اللي موصيني أجبرك اذا رفضتي ترى الدنيا

مو سايبة هو ولد عمك و اهانه بالنسبة لنا ترفضينه ..

جلست على الكنبة وانا أحاول أمسك روحي عن أصيح لكن ما قدرت أستحمل وغطيت وجهي بيدي وجلست

أصيح من قلبي .. ليش يا دنيا تربطيني بأكره مخلوق على وجه الأرض ليش يا دنيا ما أقدر أستحمله وهو بعيد

اشلون لا كان زوجي .. ما أقدر أكثر شيء أخاف منه هو تركي ..

سمعته ينادي على جمّون .. جات جمّون وهي تناظرني و تناظره باستغراب ..

جمانه : هلاااا بندر ..

بندر : الحين أنا رايح طيارتي بعد نص ساعة تحملي على روحك .. (( و وجه لي الكلام )) ..

و انت يا ريمان تحملي على روحك وخليك عاقلة عن المخفه .. ..

و قفل باب الشقة وراه وقفل معه كل أبواب الفرح بدنيتي .. قربت مني جمّون ..

جمانه بهمس : ريم حياتي علامك تصيحين ..

ضميتها من قلبي وانا أصيح و أشاهق ..

ريمان : الكلب يبي يزوجني تركي غصب عني رفضت بس مهوب بيدي أبوي خلاص أعطى الرجال كلمة ..

ولاااا راح خطب وضحوه يا جمّون خطبها ..

وجلست أصيح أكثر ..

جمانه : ما جبتي شيء جديد من البداية قلت لك ان بندر ما يفكر فيني وانه يبي وضحى بس انت ما رضيتي

و لا تقبلتي هذه الفكرة ..

ريمان : و تـــ ـــركـــ ــــي تركي يا جمّون ما أبيه انت تعرفين اني أخاف مرة منه تعرفين

اني أرتجف لا سمعت بس صوته اشلون لا صار زوجي ..

جمانه : خلاص حياتي خلاص كافي قطعتي روحك من الصياح .. والله انه ما يستاهل كل هذه الدموع ..

ما أدري كم مر من الوقت وانا أصيح على حضنها المهم انها بالأخير أخذتني لغرفتنا ونومتني فوق سريري

وانا من حطيت رأسي على المخدة انخمدت .. .





************************************************** *********



نهآيه البآرت السآبع .. '$

نزلت لكم بآآرتين اليوم ,,

فينكم يآآجمآآعة ؟؟

لآآ ردود ولآآشئ ,,!!