كاتب الموضوع :
احاسيس منسيه
المنتدى :
القصص المكتمله
البارت السابع والثلاثون(& والاخير&)
ام سلطان بحنان:هاتيها ياأم مازن..
ابتسمت ام مازن ومدتها لها خذتها وحطتها بحظنها وهي تناظر اعيونها المستسلمه لنوم
ام مازن:حتصحى لو بئيت معاك ياست ام سلطان..
ام سلطان:خليها معي بنومها عندي..قامت وحطتها جنبها على الكنبه واجلست جنبها تمسح شعرها
ام مازن بتردد:بس يعني مايصحش تسيبيها هناه لو تنئلب وتطيح
ام سلطان:لا انا عندها مراح تطبح انشالله..وين امها..
ام مازن تهز اكتافها:ماعرفش انا اخزتها منها وهي لسى فوق ..
ادخلت عليهم صفيه ووقفت بعيد
صفيه:المدام هنوف بدها الصبيه..
ام سلطان بتردد ناظرت علياء:طيب ..تعالي تعالي ياام مازن اخذيها ووديها فوق
ام مازن بفرحه خذتها من الكنبه وراحت فوق بسرعه ..طقت الباب وادخلت
الهنوف توقف وتجيهم ابتسمت بحب شالتها من يدين ام مازن
ام مازن بفضول:ماتنزليش تحت ليه يامدام..
الهنوف تناظرها وتبتسم:فيه احد تحت..
ام مازن :الست ام سلطان وحدها..
الهنوف :انا بجلس هناه
ام مازن تلف وترجع بتردد:السيد سلطان مش عارفه بس يعني هو كان قوزك من اول ..
الهنوف تنهد بصبر وتلف منها:ايه..
ام مازن تبتسم:ااه دنا شوفته وهو بيبص لشباك غرفة حضرتك من الصبح ورحت على طول قايبه لوه علياء..
الهنوف تبلع ريقها بهم تعبت منه ومن تفسير حركاته يكرهني او يبي يقهرني ..
ام مازن تقطع افكارها:اروح يامدام
الهنوف تهز راسها بايه اطلعت ام مازن وخلت الباب مفتوح..ادخلت بعلياء لصاله الجانبيه شغلت التلفزيون بطيور الجنه ونامت على الكنبه على طول بحيل مهدود ومتعب..
نص ساعه وصحتها علياء قامت بتعب شالتها وروشتها حطتها باالارض لبستها حفاضتها وراحت تجيب لها ملابس..اجلست علياء وراحت تحبي بسرعه لبرى ارجعت الهنوف لها ماشافتها تنهدت بكسل شافت الباب مفتوح افتحته على وسعه وشافتها تسرع بالحبي عقب ماشافتها الحقتها بسرعه لاتروح لدرج اضحكت علياء واسرعت اوصلت لها وشالتها بقوه
الهنوف العبره خانقتها من حالتها وبعصبيه طقتها مع ظهرها:حيوووووانه كم مره تسوينها وتطلعين..
جالس بالصاله الجانبيه وقف بقوه وتهديد :لاتسبينها ولا تمدين يدتس لااكسرها لتس..
لفت لها وبكت على طول بصوت عالي وعناد:كيفي ..وش دخلك..بنتي وانا حره..
ناظرها معقده حواجبها بعناد وتبكي تنهد ولف منها:لاتحطين حرتتس فيها اذا ماقدرتي على غيرها..
الهنوف مازالت دموعها تنزل بدون شعور اصرخت عليه بغيض:مالك دخل ..مااااالك دخل ..توك تحس فيها مسوي فيها الابو الرحيم..لفت منه وراحت لغرفتها صكت الباب وقفلته امسحت دموعها بقوه وعلياء ساكته وتناظرها ببلاهه
اجلس بالصاله وكفه على عيونه بتوتر ابتسم عقب ماتذكرها وهي تشيلها من الارض وتطقها لو عشت معهن وبين ضحكاتهن ..ياماتمنيت الحظه الي اشوفها فيه تغسل طفلنا وتلبسه وتلاعبه وتمده لي ..
ام مازن توقف عنده:طلبتني حضرتك..
سلطان يرفع نظره لها:روحي لغرفتهم شوفي اذا يبون شي ..ولا تقولين لهم انا الي قلت..
ام مازن بستغراب:اقول لمين ..انا اسفه بس مش فهماك..
سلطان بتافف اشر لغرفة الهنوف:علياء وامها..
ام مازن ببتسامه اعتذار:اااه طبعن طبعن..مشت عنها بتفكير طايب مايقول مدام الهنوف وبنته وهو بيئول هم ولهم ..طقت الباب وافتحته
الهنوف تلف لها وبدون نفس:نعم
ام مازن:السيد سلطا..احم اقصد عايزين حاقه او شي..
الهنوف بجمود:لا شكرا..
اطلعت ام مازن وصكت الباب راحت لصاله مالقته فيها هزت اكتافها وانزلت لاام سلطان تحت ..
بعد ماعشتها وخلصت نومتها ونامت على طول حطتها بسريرها الصغير وطفت النور اجلست جنبها بتعب وهم ..حاولت تبعد عنها التفكير ماقدرت ..وقفت وتنهدت بصبر..ترددت تروح لغرفة ناصر خذت نفس وراحت له افضل اني انزل تحت وحدي ..طقتها وانتظرته يفتح لها
انفتح الباب وطل عليها ناصر نزلت طرحتها ببتسامه
ناصر بفرحه :اووووه هلا هلا بالزين ..
الهنوف ببتسامه:ممكن ادخل
ناصر:تفضلي ولووو تشيليتس اعيوني اذا تكفي
الهنوف تدخل وتنزل طرحتها على كتفها :تسلم عيونك ...
صك الباب ولف لها وبعتب:اطلعت عم علياء وانتي ماقلتي لي
الهنوف تنزل راسها :ماقدرت اقول لك
ناصر بمرح:اهم شي اني عمها ياااه صرت عم احلى واجمل بنت
الهنوف ببتسامه:ياحظها بعمها
ناصر يجلس جنبها على الكنب :انصدمت اول ماقالت لي النايفه وماصدقتها على انها تحلف لي الى ان جيت وشفت علياء عندنا
الهنوف بخوف وانكسار:ناصر اذا روحت حط بالك منها ماتحب تكون وحدها وتحب الناس حولها
ناصر بحزن:انا والله حاس بالضيقه من حالتها كيف تعيش عند سلطان واهم شي الام
الهنوف بسرعه ابعلت ريقها مخفيه عبرتها:وش نسوي حكم القوي على الضعيف..
ناصر ببتسامه مريحه:ماعليتس بصير امها وابوها ..بتعيش بينا وبينتس
الهنوف بضعف وتعب :اخوك رافض انها تطلع من بيته ابد وتعيش باي مكان..بجلس معها وقت محدد ويحلها الف حلال
ناصر:اخوي موب فاضي لها
الهنوف تهز اكتافها وبتردد :وين مرته ماشفتها ..وبسرعه ..انا قلت يمكن حطها ببيت بالرياض ..لانه مشغول اهناك كثير
ناصر :تزوج وحده اهلها من جده وطلقها
الهنوف تحس بفرحه ترفرف بصدرها:ليش يطلقها
ناصر:مدري استغربنا مع انه وكانه كان يميل لها حتى انه يدافع عنها قدامنا وهاذي اول مره يسويها..
الهنوف بحباط وحسره نزلت راسها
ناصر :ليه تسألين
الهنوف ببتسامه محرجه :لا بس استغربت انها موب موجود
ناصر:وكيف عرفتي انه اعرس
الهنوف تلف لها :انت ارسلت لي انه اعرس
ناصر بتذكر وببتسامه:ايه ايه اذكر وارسلت لتس عقب وقلت انها يع منها الحمدالله الي طلقها
الهنوف :ماجتني هاذي الرساله
ناصر بهدؤ:لانتس غيرتي رقم جوالتس ماتبين اي اتصال منا
الهنوف:اخوي اهداني الرقم وغيرته
ناصر بتغير لسالفه :وانا بعد بهديتس
الهنوف ببتسامه:السيدي معي بشنطتي ترى مافارقني اشكرك من كل قلبي بين لحظه ولحظه اشوفه
ناصر يناظرها ببتسامه ممزوجه بستغراب:ليه مافيه الانتي وسلطان..
الهنوف تضحك برتباك:لا كان اتذكرك واشوف صوري انا ..
ناصر يقرب منها ببتسامه فرحه:تحيبن سلطان للحين صح
الهنوف تبلع ريقها وبقهر :لاطلع كلام كذب ..خلاص انسى السالفه
ناصر مازال مبتسم :طيب انا بهديتس هالمره اغنيه..وقف واتجه لتلفزيونه شغله وارجع يجلس عندها
الهنوف تناظره ببتسامه:كل التلفزيون مليان اغاني تهديني اياها كلها
ناصر يضحك:ايه كلها بهديتس اياها الى ان تجي الي ابي
الهنوف:ههههه طيب وش ورانا
ناصر يطول التلفزيون وبفرحه:اغنية الماجد ,,وش جاه والله احسها مناسبه لتس انتي وسلطان مدري ليه..
الهنوف تلف منه وتناظر التلفزيون بجمود:مره طولت قصر..
ناصر يطول زياده:لا لا ..سوي معي كليب ياله..وقف ولف لها..
الهنوف بضحكه محرجه:اخافك شارب وانا مادري وش صار لك
ناصر:ههههه تهمه باطله ..بنخلي هالاغنيه والي بعدها جهزي نفستس ,,وبرجى..طالبتس ..
الهنوف :وش بتسوي
ناصر برجى:تكفين لاترفضين هاذا اخر طلب لي لتس امااانه ..شوفي بسوي الحركات وانتي ابتسمي بس
الهنوف بتفكير:مشروع مغني اجل
ناصر:ايه بصير فنان وبغني فيتس
الهنوف ببتسامه وقفت افسخت طرحتها وعباتها وحطتها على الكنب:اجل انا بساعدك مدام الحين حلال..عشان اذا كبرت وصرت مشهور تقول شجعتني الهنوف ووقفت معي..
ناصر:ههههه تفكير هايل
الهنوف بضحكه:اجل اسوي كليب بلاش
ناصر ببتسامه:ماعليه مقبول لو صايره طماعه ..لف لتلفزيون ..خلينا نحط سيدي التلفزيون ماش ماعندهم ذوق اليوم ..راح لدفيدي تبعه وحط سيدي ..ابتسم وجاها ..هاذي الاغنيه اهدا مني لتس..لفت الهنوف له وابتسمت بتقدير..استمعت لااغنية المنهالي حصر الحلا..
ناصر بحماس صفر وصار يمد يديه للهنوف المبتسمه تناظره بمتنان وحب
ناصر بصوت عالي :ياله قربي ..مد يده لها امسكتها بضحكه قرب منها وبعد وهي تضحك مالت معه بنعومه وشعرها القصير يحاوط وجهها المبتسم بهدؤ..
افتح الباب بهدؤ ماكانو صوبه ابد وصوت التلفزيون عالي ..اوصله صوت ضحكهم حس بقشعريره بجسده وهو يشوف جسمها الرشيق يتمايل مع الاغنية وتضحك لناصر بفرحه
ابلع ريقه بتوتر تردد ينبهها لوجوده عدل رايه واتجه لسيدي طفاه بسرعه ..لف لها بنظره احتقار ورافع حاجبه اليسار
لفو له بسرعه ناظرته بصدمه تنفست بسرعه وتوتر ولفت منه دورت عباتها وطرحتها برتباك
سلطان بسخريه :ولا اجواء مراقص
البست عباتها برتباك من صوته مليان استحقار لها وقرف لفت واتجهت للباب اسرع لها وامسكها من عضدها
سلطان بعصبيه لف بنظره لناصر وارجع يناظرها:كيف تجرئيني تجين لمه وتتركين علياء بلحالها ..
ناصر بسرعه :انا قلت لها تجي عندي
الهنوف بهدؤ تلف لناصر:لا انا الي جيت عنده..اسحبت يدها منه بقوه وهو رافض يتركها وراص عليها بزياده
ناصر بخوف :ترى جبرتها ترقص معي
سلطان بقهر اسحبها لبرى صك باب ناصر ولف لها دزها على الجدار :انتي جايه هناه لفتره محدده وتجلسين بغرفة علياء ماشوف زولتس برى ابد
الهنوف بغيض:من حبي لهالمكان امشي فيه ..راح اجلس في غرفة علياء مايحتاج تقول لي ..
سلطان بشمزاز:واضح انتس جالسه بغرفتها
الهنوف:كان ابي ناصر..ولارا..
ناظر لها من فوق لتحت اسكتت عقب ماشافت ناظراته الشيطانيه ..
قرب منها وببتسامه استهزاء وخبث:لسلامتتس تجلسين فيها او تحملي الي ببيجيتس..وبهدؤ فجاءه..ماقدر اشوفتس تغطين مني..
ارتبكت وتوترت راجعه لورى :انا مراح اطلع من الحجره ابد ..
سلطان يمسح شعره بتعب:لاتنزلين تحت او تطلعين برى الغرفه فاهمه..لفت منه واتجهت لغرفتها اسمع صوت الباب يتصكر وينقفل ابتسم ابتسامه جانبيه وبتعب افسخ اشماغه حطه على كتفه ادخل لغرفة النايفه وافتح الدولاب ماشاف البدله يعني الي كانت عليها هي..ارجع يصكره ويجلس على السرير برهاق وألم
اجلست جنب علياء حاولت تهدي من نفسها اتجهت لدريشه وافتحتها رصت على راسها بقوه ووجع ..
بكت بصوت عالي وحزين واجلست بالارض تندب حظها ماقدر يمه اوافق على عبدالعزيز ماقدر..اعيش وحيده ولا ادخل احد بحياتي واظلم قلبي وحياته..
ناصر بتردد افتح الباب واطلع لجناح سلطان طق الباب وادخل مشى بشويش بوسط الجناح مالقاه دوره بغرفته تنهد براحه انه مالقاه واندم انه فكر يعتذر بدل الهنوف ..اطلع من جناحه وارجع لحجرته ..
الصبح قامت بدري والشمس باديه تطلع حست بتعب امس مانامت والحين علياء تقوم بدري تنفست بتعب وقامت لها شالتها من السرير وراحت فيها للحمام روشتها وبدلتها مشطت شعرها امسكت قذلتها الطويله بفراشه صغيره وباستها برتياح
الهنوف:قمتي بدري وش اسوي فيتس ...
اضحكت علياء بنشاط وقامت ترقى لحظن الهنوف شالتها ووقفت عند الباب بتردد ارجعت لتلفون الغرفه ودقت لرقم المطبخ
صفيه :ايوى مدام
الهنوف:ام مازن موجوده
صفيه:ايه موجوده
الهنوف:انا ابيها فوق قولي لها
صفيه:بتأمري
حطتها الهنوف وراحت للحمام غسلت وجهها ووقفت عند المرايه ارفعت شعرها واحد لفوق مره ناظرت لبسها ماعندي غيره وانا ببدل ..
طق الباب افتحته ام مازن وادخلت
ام مازن :انا تحت امرك ياستي
الهنوف:اخذي علياء لتحت وفطريها
ام مازن :اااه من عينيه..
خذت علياء ومرت على الهنوف الي باستها بحب
الهنوف ببتسامه:باي ..
ام مازن تاشر بيد علياء :باي ماما ....
ابتسمت الهنوف وصكت الباب تنهدت بملل افتحت الشباك ووقفت عنده لو موجوده بلكونه احسن..
جالس وحده على الفطور ناظر لاام مازن نازله من الدرج
نزل راسه وكمل فطوره
ابتسمت ام مازن وراحت له مدت له علياء:تفضل ياسيد
سلطان يرفع راسه لها:امسكيها انتي ..
ام مازن بستغراب ترجعها لحظنها:دا ماماتها مش مفطراها وعاوزه افطرها..كنت حابها تبوسك بوسة الصباح
سلطان يوقف ويناظر علياء:خلي امها تبوسها ..لف منهم واتجه لبرى البيت
ناظرته بصدمه وهزت راسها باسى راحت للمطبخ فطرتها واطلعت برى لشمس على الارجوحه ..
نزلت عيونها لهم تحت شافتهن بلحالهن اسرعت لتلفون ودقت للمطبخ
الهنوف:سيد سلطان موجود
صفيه :لا طلع من تئريب النص ساعه
الهنوف:اوكي ..صكته خذت نفس وافتحت الباب انزلت من الباب الخلفي للحديقه وراحت لهم
الهنوف بصوت عالي وبحب:ماما..
لفت لها ام مازن ببتسامه وارفعت علياء لجهتها ابتسمت وحركت رجليها بتنزل نزلتها ام مازن وامسكت يديها
شالتها الهنوف وباستها :نور عيوني ..علويتي ..
ام مازن :مشالله تبارك الرحمان دا بتنك زي الائمر وحبيتها من كل الئبي
الهنوف تجلس جنبها على الارجوحه وبرجى:اعتبريها زي بنتك ام مازن مراح انسى لك هالجميل ابد
ام مازن :بعيوني راح تكون هي بنت السيد سلطان وانا بحبه من وهو صغير وعلياء بتكون زي ابوها
الهنوف تنفس براحه:راح اكون مرتاحه وهي معتس..
صفيه بحترام:الست ام سلطان بدها اياكم داخل
الهنوف توقف :انا برقى لفوق اخذي علياء لها..
لفت الهنوف واركضت لداخل رقت لحجرتها وصكتها ..
ام سلطان تشيل علياء من يدين ام مزان وبحنان :مرحبا ..باستها بحب ..صباح الخير ياوجه الخير ..
ام مازن :ااه دنى قبتها لسيد سلطان ومش عاوز يصبح عليها
ام سلطان تلف لها :ليه
ام مازن تهز اكتافها:ماعرفش ائلي شيليها مني انا مشغول
تنهدت ام سلطان :وينها الهنوف
ام مازن :راحت لفوق
ام سلطان :روحي ناديها ...
رقت ام مازن لها وقالت لها البست عباتها ولفت طرحتها وقفت على راس الدرج شافتهم تحت وعندها ناصر انزلت لهم
الهنوف:صباخ الخير
ام سلطان:صباح النور ..اجلسي افطري
الهنوف ببتسامه :خلاص افطرت ..
ام سلطان براحه:زين ...
الهنوف:انا برقى تبين شي
ام سلطان :اغراض علياء مالها ملابس ولا حاجات هناه
الهنوف:اغراضها ارجعت ام لمياء لبيتنا ارسلو اي احد يجيبها
ام سلطان :لا مراح ناخذ الاغراض الي هناك ..بروح انا وانتي لسوق ونشتري لها اغراض
الهنوف:متى نروح
ام سلطان تناظر ساعتها:الحين ..
هزت الهنوف راسها ولفت ترقى لفوق ادخلت حجرتها خذت شنطتها بيدها وبيدها الثانيه برقعها خلت طرحتها على كتفها واجلست على السرير الى ان ينادونها تحت ..
افتح الباب بسرعه ووقف عنده
الهنوف تناظره بصدمه وخوف
سلطان بقهر :امري يضرب بها عرض الحايط وتهيتين فوق وتحت
الهنوف تبلع ريقها لفت عنه بقهر رافعه طرحتها لراسها:اولن الامر موب مثل ماتوقعته هاذي اغراض لعلياء..وبغيض رصت على اسنانها..لي حرمتي تدخل على بدون احم ولا دستور
سلطان بحقد:ادخل الوقت الي ابي ..اطق الباب عشان استاذنتس ..وبتهديد..اغراض علياء ماالتس دخل فيها
الهنوف بقهر:اذا خذيتها موب يعني انها معاد تخصني من حقي
سلطان بهدؤ غاضب:علياء بتجلس مع ام مازن وانتي انتهى وقتتس هناه ..يكفي يوم بليله
الهنوف بخوف تلف له :اروح من الحين..
سلطان ببرود:انتي منتب غريبه فيني الي يعصاء اوامري يتحمل ماجاءه ..اخذي عباتتس واطلعي ..
الهنوف بدموع :منيب غريبه فيك اعرفك اكثر من غيري منت ظالم لهالدرجه تبعدني منها
سلطان يتقدم منها :انا حذرتس تطلعين من الحجره وطلعتي وهـ..
الهنوف تقاطعه بألم :طلعت خالتي نادتني تبي اغر..
سلطان :منيب ملزوم اتغاضى عنتس ..
الهنوف تمسح وجهها بتعب وبصوت باكي:لاخير في سيف يجرب في الاقراب ...
سلطان بجمود:منتب قريبه ولا في يوم ياالهنوف السيف قوت سلته من نصابه ..وقويتي النصب علي +( النصب يقصد فيه ماقالت له عن حملها بعلياء
الهنوف تشهق وبصوت خافت:قويته من حر مابي...
سلطان:معاد يهمني الي راح ..انا رجل متزوج وذاك ماضي انتي من ضمنه
غمضت عيونها ويدها على حلقها محرقته العبرات :الوقت الي بتجيب زوجتك فيه انا بمشي قبله ..خلني عند علياء يومين او ثلاث
سلطان يناظرها بهدؤ:بشرط
الهنوف تبلع ريقها:قل الي تبي كلها بنفذها
سلطان بهتزاز بصوته:افسخي عباتتس خليني اشوفتس..
رصت على قبضه يدها الي ترجف عطته جنب وجهها وامسكت عامود السرير بتعب:تطلب المستحيل .لفت له بعتب ,, حرام تشوف ظفري كيف تبيني افسخ عباتي
سلطان يقرب منها وقف بجنبها وبجمود:وبضمتس بعد..
اهتز صوتها الباكي:عارف انه شرط مراح ينفذ ..وبضعف .ليه تصعبه علي
قرب منها اكثر وحاوطها بيديه ضامها له بقوه وبصوت هادي:شفتي انه سهل
الهنوف تبكي بصوت عالي تحاول تسحب نفسها منه:حرام الي تسويه ..
سلطان بهدؤ:اوووش ..لاجل اخليتس عند علياء
الهنوف بقوه :استح ياسلطان انت رجل متزوج ..ابعد مني..
فكها وعطاها ظهره ويده على جبهته يمسدها بضعف:ماقدر اخليتس هناه لازم ترجعين لهلتس اسرع وقت
اطلع منها وصك الباب بقوه اسرعت للباب وقفلته كم قفل اجلست عنده برجفان وقلبها تزيد دقاتها انسدحت على الرخام الابيض وخدها يلامس برودته تنفست بسرعه وبقلق كيف يسوي الي يبي وبعدها يطلعني من البيت ..بكت بقوه ودموعها تنزل على ارض الرخام
سلطان بتوتر افتح الباب على امه بالسياره :روحو انتو
ام سلطان:الهنوف بنتظرها
سلطان:لا ماتطلع من البيت
ام سلطان :مايعرف مقاس بنتها الا هي
سلطان يصك الباب :مايحتاج تصرفي ..اشر لسايق يمشي ولف للبيت غمض عيونه بقوه وش سويت ياسلطان حط يده على صدره وامسحه برتباك مازلت هناه وريحت انفاسها تعطر جوي انفخ بفمه بقوه وادخل لداخل
حست بدوخه في راسها اسمعت صوت الباب يطق ارفعت راسها من الارض وبصوت خافت :نعم
ناصر:انا ناصر
الهنوف توقف وتتجه لسرير:انا تعبانه يناصر ماقدر افتح لك
ناصر بعتذار :انا اسف بس سلطان يطلب مني اقول لتس تنزلين لتحت مسعود ينتظر
اشهقت بقوه ويدها ترص فيها على راسها وكانه ينتظر لحظة انفجار ..
ناصر بتردد:اروح او تبين تقولين لي شي ..سلطان تحت ومراح تقدرين تقولين شي وهو موجود
الهنوف بصوت خافت وحزين :لا رووح ..
مدت يدها للجوال ابحثت عن القصيده كل ماقراتها يمر زوله بذاكرتها..ارسلته له وهي تاخذ عباته وطرحتها.. وتطلع برى
ارجع يجلس وراسه بين يديه رن جواله بصوت رساله
اعتدل بجلسته بهدؤ وهو يشوفها تنزل من الدرج ناظرت لها ووقفت
الهنوف وصوتها يتحشرج بالبكى وعينها بعينه الي تناظرها بقوه :علياء موب اله جامده مثل ابوها راح تحس ببعدي عطها خالتي تنام معها فتره .. وبهدؤ وضعف ..لاتعرس تجيب لها ام تضيمها..خالتي بتــ..انزلت دموعها غصب عنها وصوتها يختفي بالعبره درت انها مراح تقدر تكمل كلامها فاطلعت برى
ناظر ظلها ورى الباب وقف طالع لفوق ادخل حجرته واجلس بالكنب بحيل مهدود ..مد يده لجواله الي يرن
سلطان :هلا
محمد :ابو عايد ينتظر
سلطان :بعد المغرب تجهز البنت بمرها وباخذها لرياض
محمد :صامل اقول له
سلطا :ايه صامل ..صكه وافتح رسالة الوسائط انطلق صوت الربابه اعتدل بجلسته وارهف بسمعه
ياجر قلبي جر غرب على بير &&يجرهن حادي الصوت جرحها ادما..
ويالجتي لجة حزينه على ضير &&كبدها من حر الاخلاج حرقا..(الاخلاج) صوت المراءه وهي تحن على فراق حبيب
على حبيب بختلاط المقاهير&&لاعشو المناعير على سرج برقا..
صكت مابين األالام والاعاصير && واخلاجها يسرق الروح سرقا ..
ساجت ولا جات على صوت المعابير&& على الغالي بين لمه وفرقا..
عليك ياسلطان الروح يمطلق اصخاف المعاشير&& يوم الحزن لفراقك عيا يطيب عيا..
هرجك على كبدي مثل حليب المصاغير &&وهرج العرب غيره على كبدي عرقا ..
الله على وقت مضى مثل هالحين مامرته اغابير &&ابعد علي اليوم من جرح وكسر ماطابا..
الا ذكرته والعرب غافين صغار واكابير&& جريت بصوت يفتح مفالج اضلوعا..
اذكره ايام حبن تجمعنا على غير وعد ومجاريح &&عروس عشق معجبتها الدفوفا..
دنيا نبي منها عدال الموازين والمقادير&&ولا زالت تميل وانا منها جزوعا..
ارفع عينه لرقم شاف رقمها ويده تترك الجوال يطيح بحظنه ويده تدلك راسه بقوه وبألم وتفكير موجع من مبطي وانا رداء الحظ خاواني لكني تعديته الموت لجاء الجرح من غالي ازريت اتجاهله وجافاني..
ناصر بتردد:محمد عند الباب يدق جوالك ماترد
سلطان ياخذ نفس ويصد عن جهه ناصر:بجيه العصر انزل علمه ..
ناصر بصوت واطي:علياء تصيح وام مازن تمشي بها بالحديقه
وقف بعصبيه امسك ناصر من عضده مشى به بقهر افتح باب الجناح ودزه بقوه وهو يصك الباب وصداءه يطلع بصوت عالي بالقصر
ناصر بعتب والم:وش ذنبها تعاقبها عشان امها
وقفت عند بيت موضي ولفت له:ماقصرت بنزل هناه
مسعود:وحجز الطائره
الهنوف:اطلب منهم يلغونه ..انزلت وصكت الباب
وقفت عند البوابه ودقت لموضي تنهدت وهي تنتظرها ترد شوي وردت
موضي :اهلين
الهنوف بحراج :موضي اناعند باب بيتكم
موضي بسرعه:دقايق واخليهم يدخلونتس ..صكته منها شوي وانفتحت البوابه ادخلت واتجهت لباب الرئيسي شافت موضي واقفه عنده وبجنبها رفيف الي اركضت لها انزلت لها الهنوف وضمتها
الهنوف ترفع عيونها لموضي ببتسامه متعبه :اسفه على الازعاج
موضي :لا زعاج ولا شي تفضلي ..وين تبين تجلسين
الهنوف:خلينا نجلس بالحديقه احسن
مشت مع موضي لكراسي الحديقه واجلست وتفكيرها يخونها ويرجع يفكر فيه وبدموع ارفعت راسها لموضي:اخوتس اطردني من بيته
موضي بحباط ورجى:لاتزعلين..
الهنوف تنزل راسها وتشهق بالبكاء:وعلياء امنعني منها
قامت اجلست جنبها ضمتها :لاتضايقين اذا اطردتس انا بستقبلتس عبدالرحمن مسافر شهر لباريس والبيت على احسابتس وراح نجيب علياء لهناه تسلمين عليها وسلطان مايدري بوجودتس والوقت الي تحبين ترجعين فيه لهلتس روحي فيه وعلياء بعيونا
الهنوف تهدى وتلف لموضي بفرحه حزينه:صدق
موضي ببتسامه:ايه الحين قومي ارتاحي عيونتس حاوطها السواد ..وفي نفسها.. وش قلبك مخلوق منه ياخوي
الهنوف توقف برهاق وراسها يدور بها:ابي كاس مويه وبنادول بس..اذا ممكن
موضي توقف وتمسك يدها:من عيوني روحي الحين ..ناظرتها تحط يدها على راسها وبتساؤل..انتي طيبه
الهنوف بعياء تهز راسها بلا
موضي بصوت عالي :مايااااااا ..جاتها الشغاله تركض وامسكتها معها وصلته لغرفه الضيوف داخل البيت واسدحتها على السرير
موضي :مايا جيبي مويه وحبوب راس بسرعه
الهنوف بتعب:انا اسفه ..موضي لاتدري خالتي اني موجوده هناه
موضي تاخذ الحبوب من مايا وتمدها لها:اكليها الحين وارتاحي ..راح يكون كل شي مثل ماتمنين..
كلتها الهنوف وعيونها تغمض بتعب وتدخل بنوم عميق
اتركتها موضي واطلعت لبرى طلعت جوالها من جيب بنطلونها ودقت رقمه دق الى ان انقطع ماشاله هزت راسها بقلق وعتب
ام سلطان تنزل وتدخل للبيت هادي علت صوتها :ام ماااازن ..ام مازززن
طلت عليها من ورى حاجز الخشبي :بتامري ايه ياستي
ام سلطان :روحي نادي الهنوف وهاتي علياء
ام مازن :الست الهنوف مشيت وعلياء كان بتصيح اؤي وبالزور نامت
ام سلطان بعقدت حاجب:وين راحت الهنوف
ام مازن :مابعرفش
اطلعت لفوق راحت لجناحها مافيه احد مرت ناصر وافتحت الباب مالقته موجود صكت الباب وراحت لسلطان افتحت الباب وادخلت طلت بالمجلس شافت اجواء الغرفه المخيفه افتحت عيونها بقوه
ام سلطان بعتب وصوت مليان قهر:طعنتني بذالسواه ..
لف لها سلطان وارجع يكمل صلب الزقاره ببرود
ام سلطان بصدمه انه ماهتم لها تشوفه يدخن بتردد وضيقه:دمرت نفسك..
غمض عيونه بتعب يحس فيها بخدر فك ازرار ثوبه طفى الزقاره برجله وارجع يعنز راسه بالمسند ويفرد يديه على الكنب
ام سلطان تفتح باب البلكونه وتروح له :سلطان انت تحس فيني
سلطان بتعب وصوت هادي:يمه الله يخليتس انا بجلس بلحالي لو تقدر نفستس تطاوعتس وتطلعين
ام سلطان بصدمه :اطلعني
هز راسه بلا وتعب وعيونه مازالت مغمضه
اسكتت واطلعت برى
سلطان بهم ابيهاااا وكرامتي عيت من دونها اعشقها وجرحي منها ماطاب
ام فهد بحزن :مادري وش صار فيها
لمياء تضم امها بحنان :كل شي زين ..
ام فهد بدموع:لو شفتيها وهي تنزل ماتدري وش تسوي حايره وصوتها يهتز
لمياء :يمه بعد عمري لاتخافين قبل شوي ارسلت لي تبيني اطمنتس
ام فهد :وليه مادقت علي
لمياء :تقول انهل مشغوله بتروح لسوق تشري لعلياء مقاضيها
ام فهد تمسح دموعها وتلف للمياء :انشالله انها اذا رضت على علياء تجي وتعيش حياتها
لمياء بامل :انشالله
ادخل ابو فهد ومعه فهد :السلام عليكم
ام فهد توقف وتجيه :وعليكم السلام ...ام عبدالعزيز دقت علي
ابو فهد :أأجليها
ام فهد :سنتين وكل ماخطبو أجلناهم ولا راحت واتركتهم
ابو فهد بعصبيه :وش عاد نسوي بكتبة ربي نغيرها
فهد بسرعه :انا بكلم عبدالعزيز وباطلب منه يصبر شوي
ابو فهد يجلس بقهر :دق عليه وقله يشوف طريقه حتى لو ترجع الهنوف موب ماخذته
ام فهد بصدمه :وليه
ابو فهد :وجهه موب وجه خير عليها كل ماخطب تعقدت حياتها خليه يلقى له وحدتن ثانيه
ام فهد بضيقه :انا مراح اقولها شي
ابو فهد بصوت عالي:دقي عليها وقولي لها ابو فهد هو الي ارفض
ام فهد بسرعه :طيب طيب هدى نفسك ..
دقت عليها ام فهد وتعذرت منها وام عبدالعزيز عصبت عليها وسبتهم كلهم اسمع صوتها ابو فهد العالي وام فهد ساكته ومنفشله خذ الجوال منها وصكه بوجها
لمياء بفرحه :اقديت فيها
ابو فهد :انا جات تبي العرس ولا موب لازم تعرس ماحد يجبرها على شي ابد ..
افتح عيونه بتعب ولف لصوت محمد الواقف على باب مجلسه بجناحه
محمد بهدؤ:وش لونك..
سلطان بتعب رجع يديه لحظنه ومرنها بوجع غفت عينه وهو فاردها على مسند الكنب :منيب طيب ابد..
تقدم منه واجلس على الكنبه النفرده:افااا وش السبب
تقدم بجسمه حط وجهه بين يديه وبصوت خافت :عييت انساها يامحمد ..!!وش اقلب حالي كذا..
محمد بستغراب هز راسه:انت تذكرها للحين مابعد نسيتها اعرست وطلقت واعرست وعسى ماطلق وحنى نحسبك عودت الاولي
سلطان بهم ارفع راسه :اطلع لكم مالااخفي وانا موجوع ..
محمد بعتب :صدرك ضايق من سنه وعايش بالهم بلحالك
ابلع ريقه وحذف نفسه على الكنب مغمض عيونه ردد بصوت خفيف مايسمعه محمد ..الصدر ضايق والجفـن سـد عالـي
يحبس وراه اسرار واحزان وادمـوع
أجلس مع اخوانـي وكنـي لحالـي
اتصنع البسمات والقلـب موجـوع
وانا كذا ! مـن ايام وسنه حالـي
من بعد ذاك اللي هجرته من اربوع
له سنه وزادت اشهور وهـو راس مالـي
ويمشي معي دايم على السمع والطوع
يا كان يعشقنـي ويعشـق ظلالـي
ويا هو في موق العين والقلب مطبوع
أذكر مواقـف بيننـا فـي خيالـي
ثم اتبسـم واكتـم الدمـع واللـوع
مليـت مـن تمثيـل دور المثالـي
اللي يشوف الشوق والحب ممنـوع
يا خوي انـا مانيـب رجـال آلـي
هيكل من الفولاذ والصلب مصنـوع
صحيح اكابر لـو الاحـزان فالـي
واتظاهر الشبعه وانـا ميـت جـوع
لكـن.. إذا حنيـت لإنسـان غالـي
طبعا بحس بحالة الضيـق والـروع
تبغى الحقيقه عاد ؟.. ما كنت ابالـي
كنت احسب إنه يشبه الغير في النوع
ويوم فقدته قلت شللـي جـرا لـي
وقام الخفوق إيون وابصوت مسموع
وشفت الليالي غيـر ذيـك الليالـي
شفت المجره لكن البـدر منـزوع !!
احيان أعـزز فـي لقـاه احتمالـي
وأحيان احس ان الامل صار مقطوع
حط اذراعه على عينه مخفي نص وجهه الي بانت ملامحه بالضيقه والتعاسه
محمد يوقف تقدم وحط يده على كتفه:اجبرها ترجع لك مثل ماسويت في الاوله
سلطان :هي ماهي قدها بالجبر قدها بعزة النفس قد العيب فيني انا..
محمد بتردد: اجل بنتم امر ابو عابد..
سلطان يوقف وياخذ نفس :ايه اراح له ..
موضي ببتسامه حنونه :تبين اطلبها تجيني بكره
الهنوف تمسح دموعها :ايه اذا قدرتي
موضي تسحب جوالها :بدق لسلطان تجي مع ام مازن
الهنوف بخوف :اخاف تقول له ام مازن
موضي بتاكيد :لا ابد مراح تقوله اعرفها عشرة عمر ..خذت نفس وسلمت عليه
موضي بعد السلام :سلطان لو تقدر ترسل لي علياء بكره ابيها تغير جو مع رفيف وسلطان
سلطان :برسلها الحين وخليها الفتره هاذي عندتس ..
موضي بستغراب :ليه وامي
سلطان :الوالده بتروح للخاله حصه ..وانا بجي ايام لبيتي بالرياض وابيها تكون قريبه مني
موضي بفرحه :طيب راح تجي الحين
سلطان:ايه راح اجيبها
موضي تعض شفايفها بتوتر :ارسلها مع ام مازن موب لازم تجي..
سلطان :لا بجيبها انا وفهده..
موضي :مربيه جديده
سلطان :بنت ابو عابد ..مرتي
موضي تفتح فمها :خذيتها
سلطان:ليليتي الاولى اليوم
موضي بهدؤ:الله يوفقك ..مع السلامه
صكها منها ولف لفهده ورى :بنمر نجيب بنتي الحين ..
فهده بصوت واطي:طيب
لف لمحمد وكلمه يروح لبيته مروها وانزل سلطان لها
ام مازن :لو عايز حضرتك اخزها انا
سلطان يشيلها منها بحظنه ويبوسها بحنان :لا باخذها انا..لف لها ..وش فيها عيونها حمراء ماتفتحها زين مانامت
ام مازن :ماعرفش ياسيدي بس من ربع ساعه صاحيه مش عايزه تنام
مد يده لشنطتها الصغيره واخذاها واحضنها لصدره افتح الباب من جهة فهده وحط الشنطه لداخل واتجه لبابه ادخل وصكه
محمد بصوت واطي :نمشي
سلطان يعدل علياء بحظنه :تسهل
مشى محمد وسلطان يلفها لجهته ويمدد رجليها من جوانب خصره
سلطان يمسح شعرها :اعيونها ماش كانها مريضه
محمد :علم موضي تهتم بذالامر توديها للطبيب
سلطان يلف لفهده وببتسامه :لا تهتم بها ام نواف
فهده بحراج :انشالله ..
محمد يلف لسلطان ناظره شوي وارجع يكمل سواقته
موضي :الهنوف ارقي لفوق اضمن مايدري
الهنوف :متى ماراحو دقي لي على طول
هزت موضي راسها والهنوف ترقى الدرج بتعب
ناظرتها موضي برحمه وحالتها الي تغيرت وانكسف حالها
موضي بصوت عالي :الهنوف
لف لها واسكتت
موضي :شوفي غرفى التبديل تبع النايفه وامي بالدور الثالث استعيري منها لبس
الهنوف بهدؤ ارجعت ترقى مره ثانيه ..
وقف عند بوابة القصر الداخليه
انزل وافتح بابه وقف عنده ودخل راسه لمحمد :الله لايهينك ..معاد الا دور علياء الله الله فيها
محمد:ابشر لاتهتم
صك بابه ولف لفهده الي انزلت ووقفت على جنب مد يده ليدها وامسكها وودع محمد بيده الثانيه ..
نزل نظره ليدها المرتعشه:سمي بالله مامن شر ..
ابلعت ريقها وسمت بنفسها
اوصلو لجناح فوق اترك يدها ولف لها
سلطان :هذا بيتتس الى ان تجي اجازة الصيف انا بسافر بعدها وكلن يروح في طريقه
ناظرت له افهده وهزت راسها بالموافقه
سلطان :اليله ان اعجبني وضع علياء عند موضي ولا جبتها هناه
فهده :ومدرستي الترم الثاني بادي
سلطان :أجليها ذالسنه .....
موضي ترقى الدرج وبصوت عالي :علياءءء تنادي
وقفت الهنوف ببتسامه هاديه على راس الدرج اوصلت لها موضي ومدتها لها
الهنوف تضمها لصدرها وتبوس خدها :بتنام هناه
موضي :ايه سلطان اليوم عريس
ناظرتها بسرعه وصدت عنها عضت شفايفها الي اهتزت بقوه:انا بروح ارقد
انزلت لتحت بسرعه ادخلت لحجرة الضيوف انزلت دموعها بسترسال
الهنوف بوجع:اااااااااه ياحسرتي ماعرفت اصبر بدونه..
ادخلت موضي بهدؤ ووقفت ورءاها وهي تناظرها طايحه على السرير وتصيح بحزن والم..
اسحبت علياء من السرير واتجهت للكنب اجلست عليها والهنوف تبكي بصوت عالي فضلت تسكت وتخليها اطلعه من خاطرها
دقت جوالها على رقم مايا ونبهتها تهدي ان جات ادخلت مايا ومدت لها علياء خذتها واطلعت لبرى مشت لها موضي واجلست جنبها حطت يدها على شعرها وامسحته بحنان
اسكتت الهنوف بقلق وهي تشهق:من
موضي برحمه :انا ياقلبي طلعي الي بخاطرتس لاتخبين الكتمان يوجع
الهنوف تغمض عيونها ومازالت العبره بصوتها:انتي السبب خليتني اتعلق به وهو قاسي اتركني كان ماكان بينا حب ولاشي..
موضي تقرب منها وبصوت متالم :قولي لي السبب الي منه طلقتتس ماقال شي وانتي خبيتي خليني بالصوره..
الهنوف تخبي وجهها بين المخدات وتبكي :لاني كليت احبوب منع ..اشهقت بقوه ..كليتها ايام بيني وبينه مشاكل وكره بس بعدها تركتها ..
موضي بعتب:طيب ماقلتي له هاالكلام
الهنوف :بظنتس اني ماقلت له
موضي بتردد:مادري
الهنوف ويدها على راسها تضغط عليه بقوه :قلت له كم مره ووضحت عذري بس ارفض ..انا موب شي بحياته كان يلعب بي اقعدت على حيلها وبقهر مختلط بدموعها ..قلت لكم مايبيني خذاني يلعب بي وهمتوني بالصبر وماستبعد انكم خليتوه يلعب علي ويمثل ..
موضي بصدمه :لاتفكرين كذا انتي ماتعرفين سلطان مستحيل يدخل احد بحياته فكيف بسالفه مثل كذا
الهنوف بنهيار وصراخ :كيف يلعب علي ويكذب ويرجع يعرس بمره ثانيه..طقت صدرها بقوه وألم ..خذا مره ثانيه انا بموت من الغيره اذبحتني..
اسحبتها ضمها بقوه :اهدي مايستاهل هالحب حتى لو اخوي مايستاهل ماقدر يتغاضى عن خطا واحد ..
الهنوف تشهق :ولا كانه ..كان ..كان يخطي علي ..
موضي :شيليه من بالتس الحين ونامي لاتفكرين بنفستس فكري بعلياء لاتخسرين كل شي ..حياتتس ملكتس لاتخسرينها
الهنوف تهز راسها وووووهي تحس بها ثقيل وموجوع :وينها علياء
موضي :بتنام معي انتي نامي
الهنوف تهز راسها بلا :نامي معي انتي اتركي علياء مع خادمتكم..
موضي تناظره لها برحمه :وش فيتس
الهنوف بتعب وارهاق :ماقدر انام وحدي ..
موضي ترجعها لمخدتها :بروح اطمئن عليهم واجيتس ...
اسكتت الهنوف وعيونها تشرد بالأشي
اطلعت برى ورقت لفوق دقت رقمه دق ودق انقطع ماشاله دقت مره ثانيه باصرار وبعد انقطع ماشاله ..والله ان ترد ياسلطان حتى ولو اروح لك ببيتك..دقت مره ثانيه وتقفل ..رصت على الجوال بقهر ..قامت لنوتت الارقام دورت رقم البيت ودقت عليه شوي وشاله
الخادمه:ايوى
موضي بسرعه:خلي سلطان يرفع السماعه..
الخادمه:طيب.. راحت له الخادمه وقالت له يرفع تلفون من جناحه ..شوي وجاها صوته الغاضب
سلطان بغضب:نعم نعم نعم..لو ابي ارد رديت ..
موضي بعصبيه:لاتصارخ علي ..انت الوحيد الي تعصب ..انت الوحيد الي تزعل ولاتسامح ..يني انت ماتخطي على غيرك وتبيه يسامحك ..من انت ياحضرة الامير..
سلطان ساااااكت ويناظر لقدام بجمود مخلوط بستغراب من عصبيتها الاغير متوقعه ..
موضي تكمل باصرار وقهر :طلقتها عشان كلت احبوب..تبيها تحمل وتجيب طفل وتبعدها منك ..ليش انت بتصير اب ..وهي جماد تولد وتنسا ..ايه هاذا انت من عرفتك مشاعر الناس من حولك مالها اهمية وكانهم حيوانات تعيش بدون عقل وبدون احاسيس ..لعنبو غيرك قد الشيب مالي لحيتك وانت تهيت بالنسوان عشان قدرت تستقل بنفسك لك الصلاحيه اتدمر غيررك..حسافه الفكره الي في بالي عنك وخربتها عقب ماعرفت وش سبب طلاقك لها ..رصت على اسنانها بغيض..عشان احبوب ايه ايه بتاكلها لانها ماكانت تحبك وخايفه تاخذ اولادها لكن اتررررركتهااااا..بعد ماحبتك وحذفتها ..تسمع اتركتهاااااااا ..حرام حرام والله ان عندي اخو مثلك ..صكت التلفون بقوه ورمته على الارض وهي تنفس بغيض وتوتر واستغراب من انفلاتتها بالكلام معه
فهده تناظره عقب ماصارخ على صاحب التلفون وعقب اسكت والتلفون على اذنه ويده تمسح وجهه بقوه ويده تهتز ..
اغسلت وجهها تبعد عنها التوتر وادخلت على الهنوف المنسدحه على جنبها وتبكي بصوت خافت...
قام الصبح شافها مازالت نايمه البس ملابسه الرسميه واطلع من البيت متجه لمكتبه دق جواله وانتظرها ترد
ناظرت اسمه بالشاشه تذكرت كلامها له امس ابلعت ريقها وردت :هلا
سلطان بهدؤ :صباح الخير
موضي ترطب شفايفها بخجل:صباح النور
سلطان :كيفها علياء
موضي بختصار:طيبه
سلطان :برسلتس السايق ارسليها للبيت
موضي :ومن الي في البيت بيستقبلها
سلطان بقوه :فيه فهده وتنتظرها ..
موضي :ماله داعي عروس لا تعذبها
سلطان:ساعه ويكون مسعود عندكم..صكه وادخل الاصنصير رقى للمكتب مر بسكرتيره
سلطان:ارسل لنواف يرجع للسعوديه اليوم..واوراق سعود طلعها من المكتب ارسلها لسكرتير الوالد
السكرتير:تأمر ياطويل العمر ..
ادخل لمكتبه صك الباب وتنهد بحيره اجلس بكرسيه وعينه تجول برجاء المكتب افتح جواله شغل مقطع الوسائط ورجع راسه لروى
ياجر قلبي جر غرب على بير &&يجرهن حادي الصوت جرحها ادما..
ويالجتي لجة حزينه على ضير &&كبدها من حر الاخلاج حرقا.. (الاخلاج) صوت المراءه وهي تحن على فراق حبيب
على حبيب بختلاط المقاهير&&لاعشو المناعير على سرج برقا..
صكت مابين األالام والاعاصير && واخلاجها يسرق الروح سرقا ..
ساجت ولا جات على صوت المعابير&& على الغالي بين لمه وفرقا..
عليك ياسلطان الروح يمطلق اصخاف المعاشير&& يوم الحزن لفراقك عيا يطيب عيا..
تحبيني ياالهنوف..من طلعتي من بيتي قبل سنه وللحين انا عيت نفسي ماتطيب.. امسك صدره بقوه ماقدر اقول ارجعي ..مأقدر لو اقعد عليل سنيني كلها..
رن تلفون مكتبه امسح وجهه وارفعه :هلا
محمد :صباح الخير
سلطان :صباح النور
محمد:حبيت ادق اسأل عن اخبارك
سلطان بهدؤ:زينه ولله الحمد
محمد:جالس بالرياض الى متى
سلطان :الى اجازة الصيف
محمد:وش الاخبار عقب المره
سلطان يتقدم ويعنز يديه بالمكتب:بسافر بشهر سبعه لسبانيا ..ان احملت خليتها بالبيت تربي اعيالها وان ماكتب ربي شي مثلها مثل غيرها
محمد بتردد :لو اسعى لك في رد الهنوف بترضى
سلطان بستهزا:منيب عاجز من ردها بنفسي
محمد:المعونه شي والنفس شي ثاني
سلطان :بكذا زدت الرفض رفض انا اجل الي اجلس انتظر العرب يساعدوني
محمد بستغراب واحباط من حاله:بس انا اعينك على نفسك
سلطان:لاماقصرت اقدر ادبر أمري
محمد :اجل مع السلامه
سلطان :تسلم ..صكه ورد على جواله
سلطان :هلا
ام سلطان :وين علياء فيه مع بنت ابو عابد ولا ببيت موضي
سلطان :ببيت موضي وبرجعها لبيتي الحين
ام سلطان :وش تبي تبعدها من بينا وتروحها للمره
سلطان يوقف ويمشي لبرى المكتب :مسعود رايح ياخذها من موضي وبتسقبلها ببيتي وعند بنت ابو عابد..تأمرين شي
ام سلطان بقهر :سلامة عقلك من كل شر
سلطان ببتسامه :مع السلامه ..
اطلع لبرى ولف لمسعود الواقف برى
سلطان بستغراب :وين البنت
مسعود:طلبت يطلعونها لي وارفضو
سلطان بعقدة حاجب :من الي ردك
مسعود:سمو الاميره بنفسها ردتني وقالت لي انها هي الي بتجيبها المغرب
سلطان يفتح الباب ويركب :انا الي بطلعها لك ..روح لها
امسحت فمها ويديها الصغار وارفعتها حطتها بكرسي سلطان الصغير ولفت لموضي وبحراج:ببدل ملابسي
موضي توقف وبعتب :قلت لتس شوفي غرفة تبديل النايفه زعلتيني منتس
الهنوف :تعالي معي وريني اياها ..
اطلعت معها موضي لفوق وافتحت الدولاب وناظرت بين الملابس
موضي:هاذي اختاري واخذي راحتتس وانا بطلع انام
ابتسمت الهنوف بفشله مانامت امس اجبرتها تنام معي انا مانمت ولاهي بس شتان مابين مسهر العيون لي ولها
دورت بنطلون افتحت الدلاوب بجنبه مافيه شي اسحبت فستان ابيض فوق الركبه شيفون وبدون كم تروشت على عجل البست ومشطت شعرها وقفت قدام المرايه احسه مبالغ فيه اسحبته شوي لتحت ابتسمت وهي تشوفه يرجع لمكانه انزلت لعلياء شافت حولها رفيف وسلطان ويحركون قدامها العاب ابتسمت وارفعتها لها
الهنوف:انا بطلع انا وعلياء لبرى تروحون معي
رفيف بفرحه:ايه بروح انا
ارفع سلطان يده مثل اخته اضحكت الهنوف وامسكت يده اطلعو لبرى جلست علياء على البساط الاخضر في الشمس واجلست جنبها
رفيف :بروح اجيب العابي
هزت الهنوف راسها لها واركضت لداخل
اجلس بجنبها سلطان وصار يقطع الزررع
رفيف تحذف العابها بينهم
اسرع سلطان واسحب لعبه واسحبت علياء لعبه
رفيف بقهر :وانا..!! خذوها كلها
الهنوف :ههههه شوفي الدفتر لونيه..اصغار حرام بيصيحون اذا خذيتيه
رفيف تجلس وتنام على بطنها :اجل بلونها الى ان يخلصون واخذها منهم
الهنوف:شاطره
رفيف تلف لها :لوني معي
الهنوف تبتسم وتنام على بطنها جنبها :بلون فله
رفيف بفرحه :طيب وانا شعرها وسيارتها
سلطان للبواب :افتح الباب
البواب :ابشر طال عمرك..افتح البوابه اشر سلطان لمسعود يوقف بالسياره وادخل داخل البيت مشى على احجار الحديقه للباب الرئيسي للقصر وقف لصوت ضحكتها نزل راسه وطل على اظلالهم بين الشجيرات الصغيره على احفاف الطريق الحجري مشى لزاوية البيت ووقف عندها
الهنوف:هههههه الشعر تبع فله يعني انا الونه...
رفيف :انا موافقه
الهنوف :الي يخلص بسرعه له هديه
رفيف تناظر للهنوف وترفع شعرها من عيونها:شعرتس حلوو
الهنوف ببتسامه عدلت جلستها:تعطيني شباصتتس الصغيره ..ولاتبين يغطي على عيوني واخسر
رفيف برفض:لا تبين تصيرن احلى مني اخذي شباصتس بنتتس
الهنوف تضحك:ياغيوره ..
لفت لعلياء وشالت الفراشه الصغيره بجنب شعرها مشطت قذلتها على جنب وحطتها فيها ارجعت تنام على بطنها وتلون
الهنوف :انتي غشاشه ..بديتي قبلي
رفيف :اصلن انتي بتسبقيني انا عارفه ..
اضحكت الهنوف وخففت سرعتها بتلوين
شالت الصينيه العصير وسندويتشات واطلعت لهم برى شافته واقف بجهة الحديقه ويديه بمخباة ثوبه
الخادمه مايا :سير سلتان ..
لف لها بهدؤ واشر لها ترجع لداخل لفت وارجعت لداخل
رفيف بصوت عالي وفرحان :خلصت قبلتس
الهنوف تعدل جلستها وبحباط:امممممم شفتي انتس سبقتيني
رفيف ترفع يديها لفوق :انا اسرع وحده
الهنوف ترفع يديها ببرائه :مافيه هديه
رفيف :لاااا لازم تجيبينها غصب
الهنوف بستعطاف:رفوف
رفيف بتفكير :عطيني الشباصه حقت علياء
الهنوف:وشعري بيخرب ..
رفيف :مالي دخل ..
اضحكت الهنوف واسحبتها من شعرها طاح على وجهها ارفعته ورى اذنها ومدتها لرفيف
رص على قبضة يده وغمض عيونه بقوه الله يلعنك ياقلب ماترخي اشوي
رفيف بغيره :حطيها في شعري نفستس
الهنوف ببتسامه:ابشري ..قربت منها وحطتها بشعرها على جنب
وقفت رفيف وارفعت راسها بكبر :وش رايتس
الهنوف :اووووه روعه تجنين
طلع يديه من مخباته وتقدم لداخل الحديقه
رفيف تناظر وراها وقفت بضحكه اركضت له :خالوووو
لفت الهنوف بسرعه شافته عقدت حواجبها بصدمه وتعب وخوف ..لفت برجاء الحديقه تدور مخرج لها بعيد منه..
قرب منهم متجاهل رفيف
شافته قرب ابلعت ريقها وقفت مشت بتجاه البيت
خذا نفس وهو يشوفها بجمالها الجذاب والاسر وثقتها بنفسها وان كانت موجعه تمر من جنبه ..
سلطان بتردد:الهنوف..
سمعت صوته غمضت عيونها بقوه ماقدر اوقف لك ياسلطان وانا كاشفه...يااارب صبرني..
مشى بتجاهها بسرعه وامسكها من عضدها ولفها له بهدؤ
الهنوف ودموعها تنزل نزلت راسها بعذاب:اخذ علياء وانا هالمره بطلع من حياتكم كلكم..
سلطان :ليش مارحتي
الهنوف ترفع راسها وببكى:ماقدرت ابعد ..ابعد ماقدرت ابعد من علياءءء
سلطان يغمض عيونه:وانا
الهنوف تسحب يدها منه وهو رافض:انت مبروك عليك العرس
سلطان بتعب:انا عارف اني مازلت بالقلب
الهنوف بقهر ودموع :وش يفيد ان عرفت
سلطان بضعف :انا احبتس احبتس ياالهنوف ماغبتي مني ثانيه..
حطت يدها على فمها وصاحت بهم :طول عمرك تحب تعذبني..ارفعت راسها لها وبصوت عالي ..تحبني وش فادتني هالكلمه وانت بعيد..هااا زيادة تعذيب
سلطان يناظر وجهها بسرعه وبشوق:لا تفيد ابيتس تاكدين اني احبتس ..ارجعي لي..
اهتزت بين يديه ارتجفت شفايفها بألم:ارجع لك بعد المره بعد ماعرست انا رفضتك من البدايه خوف اعيش مع رجال بسبعين قلب
ضمها له بقوه دخل راسه بشعرها:بترجعين لي ماقدر اعيش بدونتس ..مااقدرابعدتس مني زاد الشوق وفاض الحمل..
الهنوف بتعب :بس انا ابي ابعد مادمت باول الطريق..
ابعدها منه وتاملها بحب :منتب باوله انتي غصتي بعماقه..انتي ماغيرتس احد لو اخذ سبعين مره
عضت شفايفها ودموع تبلل وجهها :مانمت امس تدري ليه..لاني عرفت انك اعرست عرفت انك تكلمها بنفس الكلام الي تسمعني ايها كل ليله..انك تضمها وتحظنها مت من الغيره وانت عايش حياتك بالكامل..انا ماعدت حلالك اتركني..
سلطان يمسح خدها بهدؤ:انتي حلالي وفهده يشهد الله مالمستها غير مسكة يدها ادلها الطريق..
ارفعت عيونها فيه اشهقت بخفيف بعيون ذابله
احظن وجهها بكفه وبشوق :لازم تثقين في حبي لتس انا ماظهر المشاعر الصادقه الا متاكد منها ..
موضي بستغراب تقرب منهم وبصوت عالي وعتبان :سلطان حرام عليك لمسها..
سلطان يضمها له اكثر:حلالي اليوم بترجع حلالي..
موضي تقرب منه وتناظر لعيونه:صادق..
ابعد منه الهنوف :الهنوف
ماقدرت ترفع عيونها له وهي تضم يديها لحظنها وتبكي
سلطان :تبين تشرطين علي الي تبين انا كلي لتس..
غمضت عيونها بفك يرجف :طلق فهده ..ومابي ادخل بيت قد ادخلت فيه
سلطان يناظر موضي ويبتسم :ماشد غيرتس
ارفعت راسها له ونزلتها بسرعه :مراح اوقع على العقد الا بعد ماشوف اورقتها ..اعرفك بتسكتني وبتسوي الي تبي
سلطان ببتسامه :من عيوني يام علياء اذا تكفي ابشري على هالخشم..لف منهم ..انا بروح وبجي بعد الظهر جهزي نفستس ..
موضي :اصبر شوي
سلطان براحه:خليني اروح ابعد الى ان تصير حلالي بنت ناصر ...
اطلع وموضي تلف للهنوف الي اتجهت لعلياء واجلست جنبها حاظنتها بقوه ومغمضه عيونها
موضي بفرحه تجلس جنبها :مبروووك
الهنوف تصيح :حياتي ارجعت لي توى الحين حسيت بالحياه ..لفت لموضي ودموعها تسيل دون توقف ..انا سعيده حبي لسلطان موب عبث موب تافه..
موضي تضمها بفرحه وتنفس براحه :والله اني اغبطتس على قلب سلطان ..عشق الرجال بشخصية سلطان ماينتهي لو يموت صاحبه
الهنوف تمسح دموعها وتبتسم بفرحه :والله اني اموت فيه واحبه..
موضي :ههههه يابنت شوفي وجهتس والله ان صار منور
الهنوف تبتسم بخجل وتمسح شعر علياء بعدم تصديق وابتسامه واسعه :يعني صدق كل شي جا مثل مابي .ارفعت راسها لسماء..دعواتي باخر اليل بقلب صادق لها مستجيب..
موضي توقف وتمد يدها للهنوف :قومي جهزي نفستس
امسكت يدها ووقفت ببتسامه مدت لها علياء :بروح ادق لهلي واقول لهم
موضي تاخذ علياء:اعزميهم انا بسوي لتس حفله بكره
الهنوف تهز راسها بلا:ماله داعي ..مابي حفله ولا شي
موضي :موب على كيفتس لازم اسوي ..وبعد قولي لهلتس ترى بحجز لهم اليوم بعد المغرب
الهنوف تركض لداخل :كيفتس ..
ادخلت ودقت لامها الي افرحت لها وللمياء وخواتها وقالت لهم يجهزون بعد المغرب
سلطان براحه افسخ شماغه ووقف بجنب سيارته بمواقف الشركه
محمد ببتسامه :والله اني يارجال فرحن لك اكثر من نفسك
سلطان يهز راسه بلاا:اوف اوف كذبت يامحمد
محمد :ههههههههههه حي ذالعين من ذالصوت والوجهه السفر
تنهد وعنز يديه على كبوت السياره :ماستوعبت ان نفسي اقدرت تغلبني وتمشيني على عشق الهنوف وهواها
محمد ببتسامه :على كثر ماحبيت عهود (مرته )الا ان اشوف حبي لها ولا شي عند حبك للهنوف
سلطان يبتسم ويرفع نفسه من كبوت السياره :انااجيك الحين في المره الي في البيت .. روح لها بنفسك وودها لهلها
محمد بفشله وعتب :والله اني مفتشل من الجماعه
سلطان :جماعتك وانت اولى فيهم
محمد بقهر :وهقتني معه وهاذي النهايه
سلطان يبتسم:انا بروح لهلي الحين ..وانت تصرف..برسل لها ورقتها بعد الظهر ترجع تكمل ادرستها قبل تقول لهلها يأجلونها
محمد :العبت بك الهنوف في اصبعها نفذت شروطها
سلطان يناظره ويضحك :كانك تبيني اعدل امري
محمد:هههه لا تكفى خلك كذا بس استغربت خضوعك لها بالسهوله
سلطان يتجه لسيارته :ايه خضعت للي ذوقتني طعم الحياه الحلو..
موضي:هههههههه النايفه تبكين
النايفه تجلس بالكنب وتمسح دموعها :احماااره لاتهزين
الهنوف ببتسامه :فديتتس اجل خالتي وش بتسوي
موضي بسرعه :لا امي لاحد يقولها انا مجهزه لها مفاجاءه ...
ادخل عليهم وناظر على طول للهنوف ببتسامه فرحه
ناصر :انا ماقدر اصدق ان هذا صدق
الهنوف بضحكه :وافقت ابي اصير قريبه منك
ناصر :هههه ايه كثري منها ..اقريبه مني انا !!,,
اضحكو كلهم ولفو لسلطان الي افتح الباب وادخل
سلطان ببتسامه ناظر للهنوف الي لفت عليها الطرحه :روحي لغرفتتس ..قلت لتس ماقدر اشوفتس تغطين مني ..
الهنوف توقف وببتسامه:ايه بروح مايصلح اجلس معك ..رقت فوق ولفت لصاله اجلست بالكرسي المطل من الصاله التحت تنهدت وهي تسمع صوته بشوق..
النايفه بفرحه:الحين بس حسيت اني ارتحت
حط يديه على اكتافها وضمها له:يابعد روحي يأختي ..حبيبه خابرتس ماتفرحين الا شفتيني زعلان
موضي:ياسلام وحنى نرضى فيك
ناصر:هو الناس على كيفه الي يحبهم اكثر شي يقولهم كلام زين وانا مالنا الا الهواش
سلطان:ههههه انت كذا وان دلعتك وش بتسوي بتقلب علينا الدنيا
ناصر:عاد دلعني شوي الفضل يرجع لي بعد الله في رجعة الهنوف
سلطان :لا والله موب انت الحال الحزين بعدها هو الي رجعها
ابتسمت بحب وفرحه وحاولت تطل عليهم تحت بدون لايشوفها
ناصر:من بعد ماشفتها ترقص معي وانت غاير مني ورايح اليوم الثاني ترجعها
موضي تناظره له وبضحكه:اثرك تعرف اتعلق النسوان بك
سلطان يبعد يديه من النايفه ويناظره بتساؤل:ذاك اليوم وش جابها بحجرتك..
ناصر:روح اسالها انا وش دراني
سلطان يرفع راسه لفوق شافها اسرعت وابعدت من الدرج ابتسم :لاحد يناظر الا بعد الملكه او انا بعد بجي وبناظر..
اضحكت واسرعت لحجرة موضي يسويها ويجي ادخلت وصكت الباب وقفت عند المرايه بسعاده وحركت شعرها بحيويه
بعد الظهر رقت لها موضي وقالت لها ان سلطان اأخر المملك مايبيه يجي بعد الظهر استغربت طلبه التأخير وحست بقلق خفيف ادخلت بعلياء لحجرتها ونومتها وقفت عند الشباك وناظرت لهم تحت كلهم بمضلات الحديقه وسلطان موب بينهم ترددت تنزل وفضلت تجلس فوق اخاف يجي بأي وقت
لفت لجوالها الي دق راحت له وردت على لمياء
لميا بفرحه:امي رايحه اليوم تشتري لها فستان وابوي وفهد كلنا رايح لسوق
الهنوف بضحكه:الله يكمل فرحتهم
لمياء :امين ..ان جينا تعالي لنا على طول
الهنوف:بستناكم على العشاء راح تاصلونا ..وانا بكون اهناك
لمياء :بجي انا ومفلح بعد اهلي بكره الظهر حجزنا
الهنوف:ليش ماتجون مع اهلي
لمياء:مفلح عنده دوام اليوم الى بعد العشاء،،,, بيجون كلهم بفندق ....
الهنوف براحه :ماتوقعين وش كثر حاسه بالفرحه والسعاده
لمياء بحنان وحب :تستاهلين السعاده لو شفتي ابوي وهو يرفض عبدالعزيز يوم رحتي لهم بعد علياء
الهنوف :الله يخليه لنا من عرفت عبدالعزيز بحياتي وخطبته لي وانا ملخبطه
لمياء :اليوم الثاني تملك على بنت خاله على طول خافو لايتاجلون بعد وبعد شهر عرسهم
الهنوف:الله يوفقهم..يالله ننتظركم
لمياء :مشتاقه اشوفتس بكره ..مع السلامه
الهنوف :هههه مع السلامه ..صكته منها ووصلت لها رساله من ساره تبارك لها وفرحانه من اجلها
اسمعت اذان العصر قامت توضت وصلت عدلت نفسها ولفت لعلياء الي قامت على صوتها ارفعتها من سريرها وجلستها بحظنها
الهنوف تبتسم بحب:الحمدالله بتعيشين مع بابا وماما..وقفت بها وراحت للحمام روشتها وبدلت ملابسها امسكت شعرها الكثران حطتها بالارض ترددت تروح مره ثانيه لغرفة تبديل الملابس تبع النايفه ففضلت تجلس بلبس الصباح ..
اسمعت طق على الباب شالته علياء لحظنها وافتحت الباب
موضي:سلطان والمملك تحت ينتظر توقيعتس
الهنوف براحه ابتسمت :يالله جاين..اطلعت وصكت الباب انزلت مع موضي لتحت شافت ناصر الي ابتسم ووقف لها
ناصر :عطيني علياء بروح فيها اهناك
الهنوف:لا بيزعل سلطان اذا شافه عند الرجال
موضي:لا انت روح لهم وخل علياء
ناصر:لا خلاص بجلس وعطيني علياء
مدت لها خذاها وجلسها بحظنه يلعبها
النايفه تاصل لهم وبتعب اجلست :سلطان جاء
موضي :ايه بالمجلس
دق جوال ناصر رد عليه بعد ماخلص صكه اضحك بقوه نزل علياء واركض لبرى
موضي :وش فيه
الهنوف تروح لعلياء وتاخذها :الحمدالله ماحذف علياء
النايفه :ههههههه
بعد شوي ادخل عليهم ناصر ووقف عند الهنوف بدفتر الممك
ناصر بفرحه وضحكه:انا ولي امرتس وقعي هناه
الهنوف تناظره وتضحك :عشان كذا فرحان
ناصر:هههههه ايه فرحت سلطان كلمني وقالي اجي اودي لتس الدفتر ..
اضحكو ووقعت الهنوف عليه وارجع ناصر مره ثانيه لهم بالمجلس
النايفه بفرحه :مبروووك الله يسعدكم ولا يفرقكم
الهنوف تبتسم بهدوء:امين
قربت صوبها موضي ووقفتها:الهنوف موب بس حبها سلطان حبتها امه واخواته واخوانه وغيرت سلطان تغير جذري واهدته حياه ثانيه ماكنت انا ولا امي نتخيل سلطان بيعيشها بين زوجه تحبه ويحبها عايله يحس بالشوق اذا سافر ويرجع لها بسررعه موب يعيش اهناك ان سافر..
الهنوف تبتسم لكلام موضي ضمتها وبتاكيد :كل هالكلام انا واثقه منه وراح اكون هنوف سلطان ويرفع راسه فيها وانتو بعد ..
ادخل عليهم وطق الباب بااصابعه ابعدت من موضي ولفت له ناظرت بعيونه بشوق وحب حست بالخجل نزلت راسها و فركت اصابعها بحراج
اتجه صوبها امسكها بيديها الثنتين :مبروك تمام الامر..
الهنوف:الله يبارك فيك
سلطان يناظر لخواته من ورى الهنوف:مكانا هناه غلط
موضي بضحكه:بعد شوي بتجي امي ولازم تكونون اهناه
الهنوف بحراج من كلامه ابعدت منه لايسوي شي قدامهم كلهم
سلطان يمسكها ويقربها لها :ليش تبعدين كفايه الي راح..
الهنوف ترفع راسها له :توعدني ماتسوي شي قدامهم
سلطان يقربها من حظنه :حتى البوسه
الهنوف برتباك :ايه ..
سلطان ببتسامه حب:طيب..
يتبع^^
|
11-03-12, 05:37 PM
جديد مواضيع قسم القصص المكتمله
العرض العادي
