السلام عليكم ورحمة الله وبركاته



ودي اتعذر منكم وسامحوني
لو ما علقت على ردودكم
والله ما تدرون مقدار سعادتي يوم اقراها
وعلى فكره تراني اقراها كم مرره
من كثر ما تسعدني
ربي يسعدكم اجمعين
ويجمعنا في جنانه يارب



فقدت غاليتين عسى المانع خير يارب
زارا وعبق الرياحين

طمنونا عليكم


بعد حابه اعتذر عن موعد السبت فيه التزام وانا والله ظروفي الحين شوي ما تساعد

بس صدقوني ان شاء الله معاكم
واول ما يخلص جزء بانزله على طول


العذر والسموحه ولاتنسونا من دعواتكم الحلوه






الجزء ال٢٩




هيا تكفين ما تزعلين والله انتي واخوتس
على راسي بس ما ابي اتزوج
هيا بود ونفس صافيه :لا مانا بزعلانه
كل شي يا قلبي بهالدنيا نصيب
والله يوفقكم ويسعدكم انتم الاثنين
يله انابقفل الحين
وان شاء الله احاول اني اجيتس بكره
: هيا الله يسعدتس لا تضغطين على
نفستس خليتس مع زوجتس وعيالتس
هيا بحب : والله اني ما اضغط على عمري
زوجي وطول وقته بمزرعته وعيالي
مع عيال عمهم وعمانهم
بالعكس انا احب اجي اتسلى عندتس
زهره بضحكه حلوة: دام كذا تعالي كل يوم

ـــــــــــــــــــــــــــــــــــــــــــــ

تكفين يا ام صياح بابشرها
ام صياح تضحك من قلبها : ام حسين مااخبرتس
تحبين الشر
ام حسين : والله يا ام صياح مع هالحرمه
احب اصير ام الشر كله
تستاهل من ينكد عليها
ناديها خليها تجلس معنا
ام صياح تنادي بدور و امرتها تنادي هدى



بعد نص ساعه
دخلت عليهم وهي تقول ياشر اشتر
وقفت عند باب الغرفه وتخصرت بوقاحه
وقالت بصوت عالي وقح : نعم بغيتي شي
ام صياح اي اجلسي معانا طول الوقت وانتي لابده بغرفتس
هدى جلست وهي عارفه ان في سالفه
بتسمعها ما دام ام حسين موجوده
قالت ام حسين لأم صياح
: ولدتس قالتس انه خطب
ام صياح سوت نفسها متفاجئه:
لا يا وخيتي ما قالي.
هدى بنرفزه. : من قالتس انتي يا عجوز قريح
ام حسين : اقطعي واخسي انتي عجوز قريح
و انا لا كلمتس تكلميني
بس انا كلامي لام صياح انتي ام صياح ؟؟؟
وبعديين اللي خطبها وحدتن تعز علي
واغليها كنها بنتي خطب زهره فديتها
فزت هدى كنها مقروصه
وهجمت على ام حسين وخنقتها بعباتها
:يا عجوز السوء الله ياخذتس و ياخذ زهره
كانها من يوم عرفتها وهي منكدتن
علي الله ياخذها الله يقلعها
دفتها ام حسين بقوه : يا عقربه وخري عني
ليتها وافقت عشان تموتين بحسرتس وقهرتس
ام صياح : هدوه انقلعي لا بارك الله فيتس
فشلتيني مع ام حسين
هدى صارت ترغي وتزبد من قهرها
قلبت عليهم صينية القهوه و الشاي
وتطاير اللي فيها بس الحمد لله كانت
شبه بارد و الا كان انحرقن عجايزنا اللطيفات


وطلعت من الغرفه وهي توعد صياح
الشين الكلب الحقير والله لا انكد عليك ياابن الكلب

ام حسين و ام صياح ناظرن بعض وانفجرن ضحك
ام حسين مستانسه لقت النتيجه اللي تبيها
تبي تقهر هدى : خله تستاهل ياما قهرت زهره
ام صياح : ول عليها نسره بغت تغولتس
الله يعين ولدي عليها
ورجعن يضحكن على هدى


ــــــــــــــــــــــــــــــــــــ


من قالت لي هيا انها رفضت وانا جاني
اصرار مجنون اني اتزوجها
مدري يمكن ابي افتك من همها
غريب شلون افتك من همها وانا بتزوجها
أي لا تزوجتها اول شي ضمنت ان صياح الكلب لايمكن يفكر يخطها
وثاني شي انا انتبه لها و اكون ولو بالاسم زوج حامي لها لين الله ياخذ امانته

اليوم هيا يوم قلت لها مصدقه عمرها العجوز
زعلت
والصراحه اني استغربت من زعل هيا
ياربي ليش الزعل عجوز وهذا الواقع


من دون تفكير
اتصلت عليها
وكانت الساعه 11 ليلا
بس ما ردت
رجعت دقيت مره واثنين وثلاث بس محد رد
قلقت عليها من بعد ذيك الليله خفت نط هذاك المعفن مره ثانيه
رجعت اتصلت وردت اخيرا الليدي زهره
: السلام عليكم
زهره با استغراب : وعليكم السلام
احمد : مسيتي بالخير
زهره : مسيت بالنور
احمد وبدون مقدمات : انا يا خاله عارف انتس
ما تبين العرس ولا تفكرين به
وانا ترني مالي بالحريم
زهره قاطعته بسخريه : زين انك عارف يا ولدي
احمد : ممكن تخليني اكمل كلامي

زهره ودها تقفل التلفون : تفضل
احمد : حنا بيننا مصلحه ان كان الشراكه اللي بيننا والا كرهنا للزواج مره ثانيه
بس بقولتس شي وانتي بعدها فكري
ان جاز لتس تر ى بكره بجيب المملك ونملك


زهره عظت على لسانها
كانت بتقوله مصدق عمرك بس سكتت
وكمل احمد: وإلا لا جاتس عريسن مقبول
لا سكار ولا نكار تزوجيه
زهره وهي كارهته وكارهه اسلوبه
: أي وش عندك من علم
احمد حس بالسخريه من نبرة صوتها
: والله يا مرت خالي لولا انتس حرمه وحدانيه ومالتس والي والا ماكان ناظرتس
ولا فكرت اني في يوم اتزوجتس
بس عهدن علي
ان يكون زواجنا حبر على ورق
وانتي امي وانا ولدتس


زهره عجزت تسكت وقالت
بسخريه اكبر من اول
: ايه قلت انت ولدي وانا امك !!!
تصدق اقنعتني اقول يا ولدي
ليه ماتروح ترقد وتخليني ارقد
وتنسى تخريفك اللي قلته
زواج ما ابي وانت بعد ليش هالاصرار

احمد عرف انها تمسخر عليه
وعصب الا احترق من العصبيه
:شوفي يامرت خالي
انا والله لولا ازعاج هيا واصرار ابو فيصل
والا ولا عمري شوفي ولا للحظه ممكن افكر فيتس
ياربي عجوز بس انا هذا كله وفاءً مني لخالي الله يرحمه اللي كنتي غاليه عنده
والا انتي شكلتس ما تستاهلين
زهره من زعلها صكت التلفون بدون ولا كلمه

احمد انقهر منها ولو هي قدامه كان خنقها

قعد يناظر بالسماعه
ويرجعها على اذنه ويكلم نفسه
: صكت التلفون بوجهي
طيب يا عجوز النار
ـــــــــــــــــــــــــــــــــــــــــــــــــ





وجع وجع وجع

يا ربيه هالانسان كنه الجريش من ثقل طينته
قال ايش انتي امي وانا ولدتس
وقال ايش زواجنا حبر على ورق
كش على هاك الوجه
قد جدي ويقول امي

حسيت بحررره من كلامه رحت للمطبخ
وابي اشرب مي بارد اطفي قهري منه
ما ابي احد يعكر علي مزاجي اليوم
طلعت النتيجه والحمد لله نجحت وبتقدير جيدجدا

بكره ان شاء الله جاراتي معزومات عندي
وقمت اجهز سفرتي لبكره

ــــــــــــــــــــــــــــــــــــــــــ


من بعد ما رمى ابوي كلامه ذاك اليوم سلمى
اعتصمت في غرفتنا


دخلت الغرفه لقيتها تصيح
جلست جنبها وحضنتها : لا تزعلين يا عمري
ابوي وجدتي شفقانين على ولد
تعرفين عقلية الناس الكبار
إلا ولد
ومتناسين وجود شوشو
اخذت سلمى منديل ومسحت انفها
وقالت بتأثر : معاهم حق انا بنفسي
قلقانه لنا تسع شهور
وكل شهر اقول هالشهر رفعت وجهها لي
: سليم هونيها و تونا يا قلبي تونا
ولتس وعد مني ان تمت هالسنه
وما الله كتب لتس حمل نروح ونفحص انا وانتي
وصكي اذانتس عن كلام ابوي
اما جدتي صدقيني
قبل لا اطلع قالت لي تسامح لي من سلمى
والله مالي وجه بس ابوك الله يسامحه
فتح السيره وانا تلقفت معاه
توكم يا ولدي والله لايحرمني شوفة عيالكم

ارخت راسها على كتفي
:خالد اذا رجعت جدتك برجع معاها الله يخليك
خالد: ابشري كم سلمى عندي
تعلقت برقبتي : شكرا شكرا حبيبي
قلت : شكرا حاف
نطت وحبت راسي وخدي
:مشكوررر دكتور خلودي

مسكت يدها ووقفتها
تعالي ننزل عندي جدتي ابوي راح ونزلنا
عند جدتي وسلومتي كتها فرفشت شوي

ـــــــــــــــــــــــــــــــــــــــــــــ


وين طس الله ياخذ زوله
مقهورة انا ياخذ علي ومن !
زهره
زهره الحراميه
اللي نهبت ورثنا عساها ما تهنى

جالسه تستناه عند باب البيت من داخل
عشان تشوفه لادخل
انتظرت وانتظرت الى ان غفت عيني
مدري كم نمت
حسيت باحد يضحك عند راسي
رفعت عيني لقيت الثنائي الغبي
واحده واقفه وشايله ولدها الصغير
والثانيه تناظرني
قمت على حيلي
ام بدر : وش عندس مرابطه هنا
رديت عليها : مالتس دخل
ام بندر: ياحرام شكلتس تستنين ابو بدر
تراه من ساعه وهو واصل
دخل و شافتس وهو اللي علمنا عنتس انتس
منبطحه هنا
ام بدربلهجه حازمه : لا عاد اشوفتس منبطحه
بالصاله انا عندي عيال كبار
استحي على وجهتس
سفهتهن واتجهت لداخل البيت
: اول دريتن ان زوج الندامه خطب
"كنت ابيهن يساعدني عليه
ويفشن غلي فيه
ضحكت ام بدرر و ام بندر
: بالله خطب ما تزوج ؟؟
دايم يتزوج دون خطبه اكيد انها بنت ناس
اللي يخطبها اول صياحوه
ولعت هدى : لا والله بنت كلاب
مالت عليكن من حريم كني
بشرتكن يا مال الماحي

ام بندر : اللي يمحاتس

وبعدها كل وحده دخلت غرفتها
وهي دورت صياح مالقته رجعت لغرفتها
لقته نايم ولا يحس بنفسه

راحت له وسحبت اللحاف عنه
يازفت انا تخطب علي
انا ومين يا حظي تخطب زهره
قام على صراخها
وش فيتس انتي اللهم سكنهم مساكنهم
هدى: ماتدري شفيني
انا اقولك وش فيني
فيني اني عرفت انك خطبت زهره
ضحك صياح بكل برود : وخطبتها وش الي مزعلتس
وما وافقت ارتاحي
هدى بقرف : ومن زينك وزينها انت كلب
وهي كلبه الله لا يوفقكم
صياح طلعت عفاريته : انا كم مرره قايلتس
لا تدعين علي ولا ترفعين صوتس هاا
هدى بشراسه : ابي أرفع صوتي واهينك وادعي عليك عسى الله ياخذك
صياح بشراسه :سدي حلقتس عساتس
للمرض اللي يشيلتس
انا وين ابتليت فيتس
والله لو ما علي شرط ان ما اطلقتس
كان من زمان طلقتس ورميتس عند اخوتس
هدى : عارفينك منت برجال ورمة الرجاجيل
سكار نكار
صياح صار يضرب فيها اقطعي حستس
اقطعي حستس
ضربها الى ان كسرها


ـــــــــــــــــــــــــــــــــــــــــــــــ


مر اسبوع بحلوه ومره

اسبوع من الوحده
في النهار احاول اشغل نفسي
ومن بعد المغرب يذبحني الهدوء ما تعودت أكون وحيده دايم حولي احد

الليله
معزومه عند ام فيصل على العشا
بنتهم سلمى جتهم وعمتي بعد رجعت
لبست ورحت لهم وتعشينا وانا راجعه للبيت
لقيت رجال جالس على باب بيتي

ياويلي شكله هذاك اللي كان يلحقني وانا ارجع واشوف احمد مقبل علينا
ناظر فيني وهو معصب

وتركني وتوجه للي قاعد
مسكه من ياقة ثوبه بقوه وكان سكراان عل الاخر


وقاله: انا ما قلت لك ان شفتك هنا
غير اكسر رجولك
رد عليه خلف : وخررررر انا جاي عند زهره
انت وش دخلللك
احمد اهتاج وشاط :اقطع واخس يالكلب
لا تجيب اسمها على لسانك
والله ثم والله ما اخليك لين اسلمك للشرطه
وسحبه معاه وتجمعو طبعا
رجال الحاره
وانا ودي ان الارض تنشق وتبلعني
هذا وش يبي لابد لي عند الباب


فتحت باب البيت ودخلت وانا دموعي تصب
يا فضيحيتي الحين اكيد كلن بيسولف
في هالسالفه وماراح يخلوني في حالي
واكييد احمد ما بيخليني في حالي

اللهم اكفني شرهم يارب

ـــــــــــــــــــــــــــــــــ




:يالله صباح خير
وش عندك يا احمد
احمد اللي كانت عيونه حمرا و
وجهه اسود تعالي معاي
هيا : وين
قلت لتس تعالي ألبسي عباتس وتعالي
وطلعنا متوجهين لبيت زهره
ولمن وقفنا عند الباب
: روحي جيبيها
وقولي لها احمد يقولس الملكه هالحين
والا ترى ما يصير خير

هيا : انت وش تقول يعني بتغصبها مافي ....

صرخ علي احمد ما خلاني اكمل كلامي وقال :هيااا انزلي لا انزل انا بنفسي
وبسرعه

نزلت ودقيت الباب وجاني صوتها من ؟
قلت :هيا افتحي
وفتحت الباب
سلمت عليها وشفت وجهها
هي بعد عيونها حمرا شكلها باكيه
الى ان تنكدت
قلت : والله يازهره مدري وش اقول احمد برى ومعصب ويقول تجين معانا عشان تملكون
رفعت نظرها فيني بحده وكانت بتكلم بس سكتت وقالت : طيب دقايق ألبس عباتي
تنحت هيا فيها واستغربت استسلامها وهي اللي كانت رافضه تماما الموضوع




طلعنا من المحكه بعد ما عقد لنا الشيخ

وصلت هيا لبيتها
وتمتيت انا وزهره لوحدنا
قلت لها : الليله ان شاء الله تجمعين اغراضتس
بتسكنين معي في بيتي
ــــــــــــــــــــــــــــــــــــــــــــ



قراءه ممتعه لكم وردود حلوه لي

بسم الله الرحمن الرحيم

صباح المسرات
هديتي لكم وعلى فكره جزء خاص بليلاس لمدة 24 ساعه بعد كذا ينزل في غيره من المنتديات

منتداي الغالي اللي مابخل علي بالدعم والتشجيع



جزء احمد و زهره فقط



الجزء الثالث والثلاثين


في لحظة تهور ومن دون تفكير
دخلت على زهره غرفتها
كانت نايمه على السرير
ومغطيه عيونها بذراعها
ذراعها المخش اللي كله شروخ
من فعايل هدى
قربت اكثر ووقفت جنب السرير
وبانت لي جروحها اكثر حتى نحرها
ما سلم من افتراس هدى
تنحنحت احم
رفعت يدها ولثواني جت عيني في عينها
دمعت عينها ورفعت لحافها وغطت وجهها بسرعه
وقالت بصوت مخنوق : لو سمحت اطلع وخلني
قلت: انا اسف والله ما تمستس مرةً ثانيه
اوعدتس ان ما تأذين وانتي معي وعندي
زاد بكاها وانا عجزت اتحمل
طلعت والا اقول هجيت
والله ان بكاها عورني في قلبي

طلعت من البيت وركبت السياره وابعدت

ابي انسى شكلها وهي تضرب
وعلى يد من!!
للاسف على يد هدى الله يهديها
نفسي ما تطاوعني ادعي عليها
لكن الله يهديها ويكف شرها عنا
وعن زهره المسكينه

حمدت لله اني رجعت بدري و فكيتها
من يدين هدى

اذن الظهر ونزلت في مسجد قريب من بيتنا
دخلت المواضي وانا اتوضأ
انتبهت لخصله من الشعر عالقه في ازار ثوبي
كم شعره قلبت حالي
تلفت يمين ويسار ابي اشوف احد لمحها
نزلت طاقيتي ولفيتها فيها ودخلتها جيبي
ودخلت المسجد ألحق الصلاه



ــــــــــــــــــــــ

هيا الله يسعدتس
مابي اسبب لتس مشاكل روحي لبيتس
خلاص الحين بصلي الظهر وانام
هيا محرجه : والله يازهره مدري وين اودي وجهي
منتس
ضميتها بحب : هيا انتي مالتس دخل
بهدى وفعايلها معي
وانتي يشهد الله انتس اختي اللي
ما جابتها امي
حبيتها من كتفها : والحين روحي لبيتس
وانا ان شاء الله لا صحيت
العصر دقيت عليتس اطمنس
لا تخافين تراني لصقه مامن فكه
هيا تلبس عباتها : قبل لا انسى

بالله هذا الظرف سلميه لاحمد
زوجي عطاني اياه
ومن اللي صار نسيت

اخذته منها وقلت :ابشري
وتوادعنا هي نزلت
وانا صليت وحاولت انام
بس كل ما غمضت عيني
هاجمتني لحظات هجوم هدى علي
ولحظات وانا بجماية احمد
ولحظة ما عطى هدى كف
الله عليه تسلم يمينه
ودي اني انا بعد عطيتها كف
حسبي الله عليها

فزيت من السرير ووقفت قدام المرايه
ابي اشوف وش شاف احمد يوم دخل علي

شهقت وحطيت يدي على وجهي ابكي
الله ينتقم منتس يا هدى
جرح في خدي واحد فوق شفتي
واخطرهن اللي في رقبتي ويمتد على نحر ي
رميت نفسي على السرير ابكي
مقهوره ومغبونه منها الله ينتقم منها


ــــــــــــــــــــــــــــــــــــــــــــــــــــــ

رجعت البيت بعد الظهر

وكان هادي عرفت ان ما في احد
هيا راحت لبيتها


حبيت اروح اتطمن على زهره
طلعت لها فوق ودقيت بابها
لكن ماكان في استجابه
بهدووء شديد فتحت الباب
ودخلت كانت نايمه
وضوء النهار هو اللي منور الغرفه
حاولت اشوف ملامحها
لكن ما قدرت شعرها الناعم غطي ملامحها
تمنيت امسك شعرها وامسح عليه
مديت يدي بس كفيتها
خجلت تقوم وتلقاني وش بتقول عني








ــــــــــــــــــــــــــــــــــــــــــ
مر يومين وانا شفقاان
على انها بس تكلمني
ابيها هي تبدا بالكلام
والله لو هو سلام بس والا تمسي
وانا اكمل الباقي ما ابي اضيق عليها
ولا ابي ابان قدامها مطفوق
من ذيك الليله ما دخلت غرفتها
ولا شفت وجهها
اليوم العصر كانت بالمطبخ
ولمن دخلت غطت وجهها وراحت غرفتها
جلست طفشان في الصاله
وحذفت شماغي وفككت ازارار الياقه
تمددت بزهق وافكر اني اطلع من البيت


:احم احمد
فزيت جالس احسبني في حلم
ناظرت الا هي قدامي واقفه
ومدت لي ظرف
زهره : تفضل هذا من هيا
وعطتنياه من يومين ونسيته عندي
قمت على حيلي ووقفت قبالها
اخذته منها و طبعت بوسه على الظرف

:اشكر هالظرف اللي خلاتس تكلميني
دنقت ولفت بتطلع شكلها استحت مني
بس انا مسكت يدها قبل لا تطلع
:زهره خلتس معي وين رايحه
زهره بتردد : اااا ابي اطلع عندي شغل وترتيب
احمد بلهفه : اجليه تكفين
وقربت اكثر وتجرأت ورفعت الشرشف عن وجهها
حسيتها تخشبت وجمدت
قلت ابرر : زهره انتي زوجتي وماله داعي
تغطين عني
للحظه رفعت عيونها وحمر وجهها حيا
" اموت بالحيا واللي يحمرون منه

سحبتها وجلستها جنبي

عجزت اصد عنها عجزت
وما علي ملامه

شعرها سبجان الخلاق اسود سواد الليل
هدب عينهاملفوف طبيعي
بشرتها
مامر علي مثل لونها
والا مبسمها يعجز حرفي عن وصف حسنه
جمالها عربي انثى
بكل ما تحمل من معني ومواصفات

حسيت بعمري مصختها وانا اتأملها
حاطه يدينها في حجرها وقطعتها من الحيا ء
ماشفت مثل حياتس يا زهره
قلت بعد ما غصبت نفسي على الكلام

:زهره وش رايتس نسافر لنا يومين
زهره بحيا شديد : احم ماله داعي
احمد بحماس شديد: الا له داعي
خلينا نغير جو ونحاول نتعرف على بعض اكثر
انا اقول نروح عمره
وبعدها نروح جده والا الطايف
ناظرتني و بعيونها فرحه : اللي تشوفه
ان كان للعمره خاويتك
ضحكت سعيد بحماسها الخجول
:وان كانت لغير العمر ه ما بتخاويني

تبسمت واااه ليتها ما بتسمت
بغى يغمى علي
:مكه وبس
قلت بابتسامه وش كبرها :
اجل بكره الصبح ان شاء الله
رايحين بالسياره
لا تعلمين احد حتى هيا
نبي ناخذ راحتنا سويا
قامت وهي تحاول تلم شرشفها عليها
وقفت بسرعه مقابلها وسحبته منها وقلت بجديه مع بسمه خفيفه
هالشرشف ان شفته عليتس لغير الصلاه شقيته

ـــــــــــــــــــــــــــ

دخلت غرفتي وانا اهف على نفسي
خدودي مشتعله من كثر ما انا خجلانه
اووووه قعدت اتنفس ابي اهدي قلبي
قعدت ألوم نفسي
انا خبله كان حطيت له الظرف
باي مكان ولا انحرجت هالاحراج
وكله كووم ولمن شال شرشفي
عن وجهي كووم ثاني
بغى قلبي يوقف
وانا انخرست ولا مانعت
وش بيقول ماصدقت اعطيها وجه
وألقي لها بال
وقفت قدام المرايه وانصعق من شكلي

الله يخزيك يا شيطان
و يا عسى يدس للكسر يا هدى
جلدة راسي للان تعورني وادهنها بزيت دافي
يمكن يخفف علي الالم
وقبل لا انزله دهنت شعري
هههههه
ههههههههههه
ههههه
لا بالله انهبلت

سكت من موجة الضحك اللي هاجمتني
على نفسي
وتذكرت عرضه وطلبه اننا نسافر
ونروح عمره
يالله يارب لك الحمد ما اكرمك
وياسبحان الله مبدل الاحوال
من ساعه ضايق خاطري وكل هم فوق راسي
والحين اضحك ومبسوطه
جدا مبسوطه بروح لمكه واعتمر
ياني مشتاقه والشوق ذبحني للحرم
ـــــــــــــــــــــــــــــــ
نمت بعمق واحلى نومه نمتها
رفعته وشميته سبب نومتي الهنيه
شرشف زهره الاحمر
من بعد ما خذته منها
توقعتها تاخذه مني
بس هي هربت من قدامي
لغرفتها وانا اخذت غنيمتي
تنشقته بعمق
اوووه يازين هالريحه زيناه
مدري هو عطر والا هو مسك
والابخور كل ريحه زينه شميتها فيه
طويته ولفيت مخدتي فيه وحطيت
راسي ونمت وراي مشوار الفجر
بسوي تشييك على السياره واخذ لي يومين اجازه


ــــــــــــــــــــــــــــــــــــــــــــــ
يالله توكلنا على الله

انطلقنا في رحلتنا الساعه 10 الصباح
متوجهين لمكه
جالسه معاه في سيارته الجيب
كان واضح تركيزه في الطريق
المسافه بعيده والطريق الحمد لله
شبه فاضي

من بعد ممشى 4 ساعات نزل شماغه
وخلل شعره بيده
صديت عنه بسرعه
كان شكله كذا احلى
عضيت عى شفتي وقرصت نفسي
وش هالتفكيير
قطع تفكيري فيه يوم قال:
: عندتس فنجال قهو ة
رديت عليه: ابشر
وصبيت له فنجال وتناوله مني وشرب
قال: الله الله وش هالقهوة المضبوطه
في تمر ؟؟
قلت له : أي معاي
وفتحت له المطبقيه
ناظر فيني وقال
:يدي مشغوله اكليني
تمنعت بالاول وذبت خجل
بعدين شفت انه فعلا يده
مشغوله تناولت تمره وقربتها من فمه
هو قرب اكثر وبغى ياكل اصابعي
سحبت يدي
وترني هالرجال جريء وانا والله استحي
هو الحين يحسبني اتغلى مايدرى اني
ما جربت هالحركات واللمسات مع ابو ناصر



قالي وكسر الصمت بيننا
زهره سولفي علي
قلت : وش تبي اقول
قال: اول شي شيلي غطاتس
خليني اشوفتس

فكيت غطاي وطبقته
ناظرني ورجع يناظر الطريق
:ماشاء الله تبارك الله
حلوه يازهره ما شفت بحلاتس
خجلت بزياده : قلت شكرا على المجامله
"هالمره واثقه من نفسي
كنت حاطه روج وردي ومكحله عيوني
بس ما اتذكر احد قالي انتي حلوه
والا حتى مقبوله
وهو يقول ماشاف بحلاي
احمد : والله انا ابيتس تعرفين عني
شي مهم انا انسان صريح
وما احب المجامله واذا قلت كلمه اعنيها
فهمتي يا قمر 14 وصاحبها بغمزه

نزلت راسي أداري لخبطتي مع حيياي
وشب وجهي حمآآر
ضحك علي وقال : تراني انتظر السوالف
قلت له :ما اعرف وش اقول
انت اسأل وانا اجاوب
ومن هنا بدت السوالف
سالني في كل شي وعن كل شي
في الحياه
حسيت ان الوقت مر بسرعه معاه
هو بعد كان يعرف شلون يسحب مني الكلام
وقفنا عند الميقات واحرمنا
وكملنا طريقنا لمكه

من اقبلنا على مكه وان دموعي ما وقفت
قال احمد الحين بناخذ غرفه ونحط اغراضنا فيها ونطلع بعدها للحرم
وقفنا امام فندق مجاور للحرم ومن افخم الفنادق
نزلنا وسوينا اجراءات الحجز
وطلعنا للغرفه حطينا الاغراض
ونزلنا نعتمر
ــــــــــــــــــــــــــــــــــ
في مصعد الفندق تزاحمو الناس فيه
قربتها مني ولميتها من كتوفها
حسيت بنفضتها تحت يدي
وش اسوي المصعد مليان رجال
وقف المصعد مسكت يدها وطلعنا

حاولت تملص يدها مني بس انا ما صدقت امسك يدها القطنيه في يديني


كانت اخف عمره سويتها في حياتي
طفنا وسعنا وشربنا زمزم

ورجعنا وطول الوقت يدها في يدي

اول ما دخلنا الغرفه
رميت نفسي على السرير

تعباااان ومهدود حيلي

اما زهره فكانت واقفه بعباتها

يووه ما نفكينا حنا من هالخجل
وقفت وطاح احرامي وبقي الوزار

قربت منها وقلت: تو ما نور هالفندق
يوم دخلتيه
ساكته وماترد فجأه انتبهت انها تبكي
قربت منها اكثر افى تبكيين ليه
حضنتها بقووه ماقدرت على دموعها
وسحبت غطاها
لييه تبكيين
قالت :غصبن عني عجزت املك دموعي ممنونه لك وشاكره
ورفعت وجهها لي
وتأملت رمشها وعينها الدامعه
وملامح وجهها ومبسمها المزموم

ما تمالكت نفسي وتهورت

ــــــــــــــــــــــــ
بالقوه تخلصت منه وهربت للحمام
مسحت فمي بكمي
وجلست بالارض اصيح
كرهت هاللحظات ما ابي ابكي
ولا ابي اتضايق
اللي يسويه احمد طبيعي
رجال وبيكون مع زوجته
بس والله ما قدر استحي استحي
مايدري ان خاله حتى بوسه على الخد ما عطاني

ـــــــــــــــــــــــــــــــــــــ

قراءه ممتعه لكم وردود حلوه لي