نهاية البارت الثاني عشــر

تميت أسوي لها مســاج وأسوي , شفت كل الاطباء والنرسات روحوا عنها لالالا بعدها ماماتت حرااااااااااااام , لا ماماتت أصلا أنا مب مستوعبه أنها ماتت
يتني وحده من نيرسات المستشفى وهزت راسها لي وقالت بلكنتها الركيكه : خلاااص هذه حرمه مووت ....
يلست على الكرسي وحطيت يديه على راسي وصحت , شهقاتي بدت تعلى مش مصدقه أنها ماتت صح أني بس لمدة كم يوم عشت معاها بس تعلقت فيها , وأن حد يموت جدامي هاي روحها فكره تخوف , رفعت راسي واطالعت ويها كان ابيض والتجاعيد مبينه بشكل كبير وبعدها أطالعت النيرس الي كانت تخوز عنها الاجهزه وتغطي ويها بشيء أبيض , غمضت عيوني بخوف خلاااص ماتت والله كاتب لها الموت ...مثل مامات أبويه وامي قــبل ...
طلعت من الغرفه وأنا بحالة خوف وحزن , وعقلي مش ويايه أبدا أحس أني أنا إلي مت , الصــراحه أول مره في حياتي أشوف حد يموت جدام عيوني وأشوف جثته بعد مامات ..
خلص الدوام وردينا في الباص والبنات سوالف وحشره بس انا مش ووياهن أبدا , ضميت يدي لصدري ويلست أطالع طرف الشارع والأبنيه ..
سمعت صوت يزقرني بس ماأهتميت لاني مش قادره أكلم حد أو أطالعه , بس فجأه انتفضت من قرصه وعقدت حواجبي واطالعت صوب إلي قرصتني كانت أسوم ..
شفت أبتسامتها وهي تقول: شو فيييج ؟؟
سكت ونزلت راسي , احس أني بصيح ...
ضمتني اسوم وقالت : نوره ترا الله كاتبلها تموت فهاليوم وأنتِ مالج خص ..
ورفعت راسي صوبها والدموع في عيوني وقلت : بس أنا ما اهتميت فيها لو أني خبرت الدكتور جان...
أسوم هزت راسها تنفي: ماتفيد لو الحين , صدقني حتى لو خبرتي الدكتور نفس الشيء لان الله كاتب لها الموت في ها اليوم ..
نزلت راسي صحيح كلام أسوم , ماتفيد لو الحين ولاشي يفيد لانه مكتوب ...
ضحكت أسوم بمرح وقالت: تعرفين منو شفت اليوم ؟؟
طلعت الابتسامه غصبن عني وقلت : منو؟؟
عضت على شفايفها : الدكتور منصور ... أممم سرت صوبه بعد ماخلصت ويلست أطالعه ياااربي ولو شفتيه وشعره طايح على عيونه بعد ماطلع من غرفة العمليات يجننننن حتى التعب إلي في ويها مطلعنه خبااااااااااااااااااااااال ...
ماقدرت أمنع ضحكتي وأنفجرت بضحكه قويه وأنا قابضه بطني , لالالالالالا ها البنت مب طبيعيه , تصرفاتها وحركات يداها يوم تقولي تخليني أمووت من الضحك شوي وبتقوم تمثل لي الموقف هههههههههه...
بوزت أسوم وقالت بضيقه: شو ها!! ليش تضحكين؟!, وكملت بمسخره : ضحكيني وياج ؟؟
زاد ضحكي مش قادره أسكت , وقف الباص ونزلت وأنا بعدني أضحك ...
أه وقفت جدام البيت أحس اني انتعشت شوي بعد ماضحكت ...
الواحد وده يضحك أو يصيح علشان يخفف على عمره من كثر مايكتم ....
دخلت البيت , ماكانت يدوه حد والساعه واصله 6 ونص المغرب , وبعد اليوم ووايد تأخرنا الصراحه ..
انسدحت على شبريتي بتعب وغمضت عيوني, يت في بالي ملامح العيوز , ويها اصفر والتجاعيد محتله أغلب ويها , شفايفها المقوسه والخطوط المرسومه حوليها ..والاجهزه الي كانت حواليها وأمبوب التنفس ...
حركت راسي أطرد طيفها المرعب , بس ماقدرت ..
رفعت جسمي وقمت بتعب , وخذيت فوطتي ودخلت الحمام ... وخذيت دش ماااي حـــار .. الله أحسسس براحه وعضلاتي أسترخن ..
بندت الدش ولفيت عمري بالفوطه , كان البخار محتل أغلب الحمام ..ومشيت طالعه..
حسيت بدوخه , واختل توازني , قبضت بسرعه بأقرب يدار عدالي عن أطيييح...
أحسس أن راسي داير حاولت أمشي وأنا قابضه اليدار .. وطلعت من الحمام وطحت على شبريتي ...
ريحت عمري شوي وبعدين قمت ولبست لي بجامه ...وصليت ..
أه ما اقدر أفج عيوني تقربت من الشبريه وطحت عليها وغمضت عيوني ورحت لعالم ثاني ...
وعيت وأنا أحس أن جسمي كله يعورني , أطالعت تلفوني إلي كان عدالي أنتفضت ياااربي الساعه 6 الفيــر ..عنبو مب رقاد هذا لا صلاه ولاحياه ..
قمت منقهره من عمري وسرت الحمام وتيددت وصليت العشاء والفير ...
يلست على الشبريه وقبضت بطني أحس بيوووع فضيييع ..لبست شيلة صلاه
وطلعت من غرفتي سرت صوب المطبخ , شغلت الليتات ويلست ادور شيء أكله والحمدالله أني لقيت سمون ...
حررّته وحطيت فيه جبن ويلست أكل , أكتفيت بوحده بس..
طلعت برع الجو بعده مظلم والبرد ما اقول شيء عن البرد مووووت ...
تمشيت شوي وأنا ضامه يديه لصدري لفتت نظري أن غرفة عمي مصبح ليتها مفتوح , زاد البرد ماقدرت أتحمل ورديت داخل بسسرعه , سرت صوب غرفة عمي ..
دقيت الباب ماشي رد , قبضت المقبض وفتحته دخلت داخل الغرفه ماكان حد موجود , سرت صوب الحمام ودقيته ماشي رد يعني عمي مش موجود معقوله وين سار أحيده ها الوقت راقد ...
كنت بطلع من الغرفه بس لفت نظري شيء صغير طالع من ورى الكبت , أستغربت شو ها ..
سرت صوبه وطلعته كان ظرف كبير بني , كأنه مال المستشفيات ؟؟؟
فتحته وطلعت حوالي 5 أوراق أو أكـــثر ...
ويلست اتصفحهن كلهن طبعا بالانجليزي ..
فتحت عيوني وأنا أقرأ , فــشل كلوي , منـــو فييييييييه فشل كلوي ومزمن بعد ..
رفعت عيوني صوب الاسم : مصبــح سيف خلفان الـــ.....
فتحت عيوني بخووف لا مش معقوله عمي مافيييه شيء , أشوفه بخييييييير ولا مره أشتك من شيء ... معقوله انه مريض ولا خبر حد ...
أطالعت السنه كانت 2004 يعني من سبع سنين وهوه مريض ولاخبر حد ...
شهقت معقوله هذا السبب الي خلااه مايعرس , لان المريضين بالفشل الكلوي المزمن يوم يتعالجون وياخذون الادويه والعلاج يصيبهم العقم !!!!
يلست على شبريته بــألم وحــزن ودمعت عيوني , ياحليلك ياعــمي الله يعينك ..
ياربي عــلشان جي من تتكلم يدوه عن العرس يعصب ويروح سيده غرفتة ويتم متضايق أيــام .. أه ياعــمي الله يعينك ويصبرك ..ويشفيك ويعافيك ...
رديت الاوراق في الظرف ورديته محله .. وطلعت من الغرفه وأنا احس أن مزاجي متعكر لاخر درجه ..
سرت صوب غرفتـــي فجيت شيلتي وانسدحت على شبريتي أفكر ...
ماحسيت بعمري الا وأنا مغمضه عيوني ...
وعيت على دق الباب , فزيت وأطالعت تلفوني كانت الساعه 10 الضحى ,
ياها الرقاد ...
قلت: هاا وواعيه الحين بقوم ..
قمت غلست ويهي ولبست لي جلابيه مخمل رقيقه مع شيلتها , وطلعت من غرفتي ..
شفت يدوه يالسه في الصاله مع عمي عمير سرت صوبهم وسلمت على عمي وبعدين على يدوه ...
ويلست وياهم ويلس عمي عمير يسألني عن دراستي ..
عمير: ليش متعبه عمرج في هالتخصص إلي مافيه فايده و شوفي كيف ضعفانه ؟؟طبيها الدراسه..
عقليه مادري شو اقول عنها التدخل في حياتي الدراسيه وأنتقادها هذي شغلت عمي عمير وعياله بعد , كل يوم أسمع ها الرمسه وكأني وحده كسلانه داخله ها المجال بدون هدف وكاني بس ألعب ...
قبضت عمري عن انفجر عليه صدق عصبت , قلت بكل برود: عمي أنا أحب ها التخصص وداخلتنه بعد مشواره وأستخاره والحمدالله انا شــاطره ..
ها الكلام كل سنه أعيد وازيد فيه بس مادري شو فيهم ها الناس....
أطالعني بنظره وصد عني يكلم يدوه , اه بسسسس شو أسوي هذا عمي ولزم احترمه بس والله تعبت منه ...
دخل عمي مصببببح , من شفته تذكرت الملف اااااااه ياعمي قلبي يعورني عليك شفت ويها تعبان ...وشكله يبا يرقد ..بس من شاف عمي عمير أرتسمت على ويها أبتسامة أستحقار ... حسيت كأنه مايبا يسلم عليه بس يدوه خزته بنظره ..
وسلم عليه بالخشم بشكــل بارد جــدا ...
وبعدها راح عمي مصبح ينام , ويلست شوي ويا عمي عمير ويدوه وبعدها قمت علشان أتسبح واقرأ سورة الكهف قبل ماتوصل الساعه 12 ..
خذيت لي شور سريع وقرأت سورة الكهف وبعدها صليت فرضي ,طلعت برع لقيت يدوه بعدها تصلي سرت المطبخ أطالع إذا الخدامه خلصت الغداء ...ويلست اساعدها ...بعدها حطينا الغداء ويلسنا نتغدا ...وشربنا بعد الغداء جاي ....
أه ياقلبي أحس أني اليوم ماذاكرت شيء ... قهر بسققققققققط ...
أستـاذنت من يدوه الي سارت ترقد شوي , وسرت غرفتي فتحت شنطتي وفرشت كتبي على الشبريه بشكل عشؤاي أول شي قبضت ..كتاب ..
Medical – surgical nursing (Nursing care for adults)
ويلست أتصفحه ....
ذاكرت شوي منه .. وبعدين قبضت كتاب ..
English for specific purposes (ESP)
ويلست أذاكر , من كتاب لين كتاب مادريت بعمري الا وأذان العصر ..صليت ورديت أذاكر ة على الساعه 5 طلعت أطالع أذا يدوه تبا شيء و يلست عند يدوه لين عقب صلاة المغرب وبعدها سرت أذاكر لين عقب صلاة العشاء نفخت بتعب وفريت الكتاب من يدي بقهر ...أحس عمري خلاص طفرت ....
عفت الكتب وكل شيء , طلعت من غرفتي أرفه عن عمري شوي ,لقيت يدوه يالسه في الصاله واطالع التلفزيون ..
يلست عدالها أتسمع المحاظره الدينيه , شوي واسمع تلفوني يرن ...
أطالعته , علـــياء غريبه متصله ؟؟
رديت على التلفون , وماسمعت الا صريخ علياء العالي ..
علياء: نووووواري عندي لج بشششششششششششااره ..
عقدت حواجبي بخوف من صوتها بعدين ابتسمت : بشري شوووو ؟؟؟
علياء بصرريخ : ماما ربت يااااااااااابت ولـــــــــــد ...
أبتسمت بفرح وضحكت : مبررررررررررررررررروك ماياكم والله أحــلى بشاااره .. سكت وبعدين كملت : شو حالها خالوه عساها بخير والنونوه شو حاله بعد ؟؟
علياء: الحمدالله أبويه يقول أنها بخير والنونوه بخخيرر بعد وباجر الصبح بيودينا صوبها , أنتِ بتين صوبنا ؟؟
أطالعت يدوه وبعدين قلت : مادري أذا كان الدريووول موجود بيي ...
سكرت عن علياء , ما اظن أسير لان محد عندي يوديني لان الدريول يمكن يكون مشغول علشان الحشيش , وعمي مصبح طبعا محد ... يعني ماشي أمل ..
أطالعت صوب يدوه شكلها ماسمعت شي من رمستي قلت بتردد : يدوه !!
لا جواب ,عدت مره ثانيه وأنا حاطه يدي على جتفها : يدوه..!!
اخيرا أنتبهت يدوه لي وقالت: ها بنتي ؟؟
أبتسمت وقلت: يدوه خالوه مهره ربت ويابت ولد ..
شفت الابتسامه على ويه يدوه وهي تقول: مبروووك بنتي ماياهم ..منو خبرج ؟؟
قلت: بنت خالي علياء توها متصله تخبرني ..
يدوه: اتصلتي حق خالج تباركين له ..
ضربت راسيي يا الفضيحه نسيت ماأتصل بخالي: الحيــن بتصل له ..
مسكت تلفوني بتصل حق خالي ضغط على أسم خالي , رن ورن وعلى خامس رنه رد ..
خالي: الســلام عليكم ..
رديت ببتسامه: وعليكم السلام والرحمه , شحالك خالي؟؟
سعيد: الحمدالله مانشكي باس ومن صوبج؟؟
نوره: يسسسرك حالي ... سكت شوي وقلت : مبروك ماياكم خالي وتستحق سلامت أم سلطان والولد..
خالي سعيد: الله يبارك في حياتج بنتي , وعقبال مانشوف عيالج ..
انقفط ويهي أحرااااج أحراااج بس ضحكت وأنا اقول: أنا عرسست أول علشان أيب عيال ههههههههه...
سمعت صوت خالي الهادي: غريب أن شاء الله ...
خوووفتني نبرت صوته , وماقدرت أرد بكلمه معقوووله خالي يقصصصد شيء
قال خالي: شو بتين صوبنا ..؟؟
بوزت وقلت : مادري أن لقيت حد يوديني ..
خالي سعيد: بخلي علي يخطف عليج وهو راد من الدوام ...
قلت مستحيه : لا خالي لاتعبله ..
خالي سعيد: انتِ مالج خص انا بخليه يخطف عليج زهبي عمرج من الصبح ..
سكت ماأقدر أقول شيء لان خالي مابيرضى فقلت : أن شاء الله ...
سكرت عن خالي , وأنا احس بقشعريره وأنفض راسي من الافكــار , خالي شو يقصد ليكووون بزوجني علي , لالالالالا ما اقدر أخذ علي ..
ليش ما اقدر علشان أني كنت أحب أخوه قبـــل ...أحبه قبل والحين يمكن ها الحب راااح ..
قلت حق يدوه أن ولد خالي بيي يشلني ومن شكلها أنها ماعيبها ها الشي بس سكتت وماقالت شيء...
قمت أتسحب لغرفتي , وعقيت عمري على الشبريه ...
ودي انام , تثاوبت وطحت على ينبي اليمين , وغمضضضت عيوني ...
وعيت على الفييير وصليت وتلبست لي جلابيه خفيفه وحطيت شيلتي على راسي ...
سرت صوب يدوه لقيتها في المطبخ , أه يايدوه عبلتي على عمرج كانت مسويه هريسه وفريد ...
سرت صوبها وحبيتها على راسها وقلت: كيف أصبحتي يالغاليه؟؟
يدوه: الحمدالله بخير وسهاله ...
أطالعت الهريس الي توه مخلص , والخبز الي يالسه الخدامه تسويه ...
وقلت: ماقلتي لي يدوه علشان أساعدج ..
حسيت بويه يدوه تعباان أكيد من السااعه 3 وهي تعابل حرااام والله ووايد تعبت عمرها , طبعا ماأقدر أقول لها سيري وانا بسوي عنج لانها أذا سوت شيء لزم تخلصه ,..
يلست اساعدها , على الساعه ثمان سرت أتسبح وأتلبس لبست لي كندوره مخوره بندقيه وتجحلت, وحطيت عباتي وشيلتي ونقابي على ينب ...
وبعدها يلست مع يدوه شوي , على الساعه تسع رن تلفوني شفت الرقم كان غريب , ترددت أرد بس رديت بعد ما ازعجني من كثر مايرن..
سمعت صوت رجالي خوفني : الســلام عليج نوره ..
عقدت حواجبي منو هذااا بس رديت بتردد: وعليكم الــسلام ...
قال: شحالج؟؟
قلت: الحمدالله بخير وسهاله ومن صوبك؟؟
قال: مانشكي باس..
قلت بتردد: منو يايه؟؟
سمعت ضحكته وهو يقول: عنبوه ماعرفتني ؟؟
صوته يذكرني بحددد ها الصووت صووت محمد لالالا ياربي حسيت بنفضضه فضضيعه ودقااات قلبي بدن يدقن بصووووت مسموووووع وتنفسسسي زززاد
معـــــــــــقوله محمـــد لالالالا مش معقوووله بــس كأنه صووت محمد يشبه نفس النبره ...
سمعته يقول: ها جهزتي عمرج؟؟
ياني أحباااط وأنا أقول : عـــلي...
سمعت لكنته المتمصخره وهو يقول: ليش أتحراني محمد مثلاااا؟؟
حسسسسيت بضيقه أفففف هذا دووم يقهرني ..قلت: لا ما أتحراك ..
علي: اها زيييين عييل انا الحين جدام بيتكم طلعي..
قلت بصدمه: شوه!! والله , بعدني مالبست عباتي..
علي: يالله لبسي بسسرعه اترايااج ..
قلت : علي صبر أنزين نزل تقهوي وسلم على يدووه ..
علي: مادري والله بس بسلم ما أبا أتقهوى ..
نوره: أوكي كيفك ...
سكرت عنه ولبست عباتي وشيلتي وشليت شنطتي ونقابي في يدي ...
ظهرت من غرفتي وظهرت من باب البيت لقيت علي واقف مع يدوه في الحوي ويحولف أنه مايأكل شي بس شرب فنيان قهوه ...أطالعته بتأمل كان لبس كندوره بيج وسفره من نفس اللون ونظاره شمسيه ...شكله كشخه خاصتنا مع بشرته البرونزيه...
ضحكتتتت على عمرري بعد يالسه أتمنظر فيه ..
تقربت منهم أطالعني علي من تحت نظارته , وقال ببتسامه: أخــيرا ظهرتي ..
أنقهرت منه وقلت بنص أبتسامه: هيييه ...
أطالعت يدوه وقلت: الخدامه حطت الحرارات ولا ..
يدوه: هيه حطتهن ..
سرت صوب يدوه وحبيتها فوق راسها وقلت : مع السلامه ..
يدوه: الله الحافظ واطالعت علي بنظره وقالت: دير بالك على بنتي .. وهالله هالله لاتسررع ..
بغييييييييييييت أضحك أخخخخ أنقفط ويه علي وهو يقوول : ان شاء الله ..
ودعنا يدوه وسرت صوب السياره متوتره بركب وياعلي برووحي الصراااحه هاي مب حلوه, بس لو خالي مب واثق فيه جان ماقاله أيبني ..
أحترت وين اركب جدام ولا ورى ... بس قلت أركب جدام عن يفشلني أن ركبت ورى...
دام السكون في السياره , كل واحد سارح بأفكاره ...أنا حاطه يدي على خدي وأفكر بالحلم إلي حلمته اليوم كان حلم غررريب ...
حلمت أني في مستشفى أو مسيد مادري وشفت خدامتين يالسات وعندهن طفل ها الطفل طاح من يد وحده من الخدمات بس يوم طاح تحت لاصاح ولا شي ... انا عصبت وسرت ادور أمه ولقيتها وقلت لها ولدج يمكن أيه نزيف داخلي من ها الطيحه القويه وبعدها ركضت أبا حد يعطني تلفون علشان أتصل بالاسعاف و شفت ويه حد اعرفه ..
كان محمد نفس الويه البريء والقصر وكأنه طولي الحين ..
صدمت فيه وأطالعته ببتسامه وضحكه وفرحه ماتنوصف في نفس الوقت وأبتعدت عنه وقلت بصوت عالي وانا أشوف نظرته المستغربه لي :مــــــحمــــد !!!....
وانتهى الحلم ... تنهدت بصوت مسموع ..
سمعت صوت علي يقول: شو فيــج؟؟
اطالعته وأبتسمت : ماشي...
رد أنتباهه للدرب , وقفنا عند محطة البترول أطالعني علي وقال : تبين شيء..
فكرت شوي الصــراحه عطشانه , وقلت بتردد: أبا ماي بسس..
قال وهو نازل: فــالج طيب ...
يلست شوي أطالع المحطه والناس الي فيها, ماحسيت الا بعلي يركب السياره ..
ويحط جدامي قرطاسه و أطالعت القرطاسه كان فيها كافي وعصير وجبس وماي..
أطالعته وماقالت شيء لاني أستحيت منه ..
ياني صوته هو يقول: أذا ماعليج امر نوره ممكن تعطيني عصير ..
قلت ببتسامه وانا أطالع الكيسه : فالك طيب ...أممم شو تبا ؟
علي: فالج ما يخيب, أبا مشكل..
عطيته العصير , ويلست أشرب ماي وبعدين مديت يدي صوب الكافي ويلسنا ناكل منه أنا وعلي ..
خذتنا السوالف لين وصلنا بيت خالي ..
نزلت وأنا أتأمل ها البيت إلي أشتقت له ووايد , دخلت ولقيت خالي يالس مع علياء الي لبسه عباتها ..
سرت صوب خالي وسلمت عليه ويلست معاهم أسوالف ...
بعد عشر دقايق رحنا صوب المستشفى ...
خذيت حق خالوه باقة ورد جوري مع دبدوب في النص وحاضن سلة فيها كافي مع حرارات الهريس والفريد ...
دخلنا على خالوه في غرفتها الخاصه ,أبتسمت يوم شافتنا وقامت يالسه ...
سرت صوبها وسلمت عليها وتحمدت لها بالسلامه ..
سارت علياء صوب السرير الزجاج الي يحطون فيه البيبي وقالت: وين ميوود ..
ضحكت خالوه: بعد سميتيه بروحج..
قال خالي: حاشرتنا الا ميود وميود , بس غيضنا فيج مابنسميه مايد ..
بوزت علياء وقالت والدموع في عيونها: والله حراااام ليش جي سموه ميوود ..
قلت: اممم حلو اسم مايــد بس ..
اطالعتني علياء بنظره ناريه : بس شو هاا يعني تسمونه مايد مايد ...
ضحكت خالوه : أن شاء الله بنتشاور اول شيء..
علياء: هيه زززين ..انزين أبا أشوفه ..
شوي والا الممرضه داخله بل البيبي ..
ركضت علياء صوبه وهي تقول: ياالله يعلني أفداااه ماحلاااااه يجننن ياااربي ..
سرت صوبه أطالعه مااشاء الله عليه صغير ووايد وكتكوت , وملامحه حلووه وكأنه يشبه خالوه مهره ...
يلست علياء تبوسه وتلعوزه وهو كل ساعه يصيح ... وبعد تبا تشله بس خالي ماخلاها عن أيطيح عنها..
ردينا بيت خالي , وتغدينا وعلى العصر خالي وصلني بيت يدوه ....
من رديت سرت سيده غرفتي وبدلت ثيابي ويلست اذاكر لان اليوم ماذاكرت شي .
مر اليوم وانا على كتبي ..
يا الاحد , ونفس الدراسه عن قسم icu ....(( العنايه المركزه ))
ومر الاثنين بــعد ...
ويا يوم الثلاثاء ورحنا المستشفى , الصـراحه كنت متخوفه بعد تجربتي هذيييج خاايفه ان حد يموت تحت يدي أحسسس عمري كأني مجرمه مادري شو ها الاحساس ..
خذيت نفس وأستغفرت ربي , سرنا لغرفه التبديل, لبست المعطف الخاص بالعنايه المركزه...وحطيت بطاقة إلأي دي على المعطف ...
وطلعت صوب المس جمعتنا المس عند غرفة العنايه المركزه ودخلنها كانن هناك 6 أسره وكانن على عددنا ...
مرينا على مريض مريض ويلست تقرا الدكتوره لنا أسمايهم ومن شو يعانون الاول كانت بنت عمرها 18 سنه مسويه حادث من كم يوم وعندها ضربه في الراس وأسمها مي , والمريض الثاني مسوي حادث من كم ساعه وعمره في اخر العشرين وعنده ضربه في الصدر بسبب سكان السياره وسبب له جرح في عضام القفص الصدري وأدى إلى تمزيق الانسجه المحيطه بالقلب وأطروا يسون له عمليه علشان يردون الضلع مكانه ويخيطون الانسجه المتمزقه حول القلب ((وهي عمليه حساسه جدا ولزم يكون في البنج الكامل)) ...وأسمه هــادف ..
والثالث ريال شيبه عنده جلطه في القلب , والباقين اغلبهم حوادث..
مادري ليش اخترت المريض الثاني ...بس المهم أخترته ...وأسوم اختارت الشيبه عورها قلبها عليه على قولتها ...
تقدمت من مريضي إلي اسمه هادف , أطالعت ملفه وإلي لزم أسويه له ...
لزم بعد ساعتين أسوي له فحص الS/V...وأسوي فحص للرئه علشان أطالع طريقة دخول وخروج الهواء منها ..
اطالعت أسوم لقيتها يالسه أطالع الشيبه ومتأثره ووايد ..
ضحكت وطلعت من غرفة العنايه بسير الحمام شوي ..
بعد ماطلعت من الحمام , سرت صوب غرفة العنايه المركزه , ويايه بدخل من الباب شفت ناس كأني أعرفهم ياااربي ... هذي منى أخت خالوه مهره وإيمان معاها ..وثنين ريايل ماعرفتهم ..
سرت صوبهم مستغربه , من شافتني إيمان ربعت صوبي ووقفت قريب مني وبعدين قالت بستغراب : نــوره !!!!!!!
سكتت وتمت تصيح , خفففت عليها وسرت صوبها أهديها وأنا أقول: إيمان شو فيج بسم الله شو مستوي ..؟؟
رفعت راسها وهي تمسح دموعها بكفها وقالت: نــو رره , هــ هــادف سوى حـادث والدكاتره هب طايعين يخبرونا عن حالته وممنوع نزوره ...
عقدت حواجبي وانا أقول :هادف حمــد الــ.....

نهاية البارت الثالث عشر ...

هزت إيمان راسها بنعم !!
سبحان الله ماغيره هــادف أخوه إيمان مريضي إلي أعتني بـــه ...
قبضت يد إيمان وسرت بها صوب أمها وقلت لهن: خالوه منى, هادف في ها الفتره أنا المشرفه عليه طبعا خبروكم أن عمليته نجحت , بس بعده تحت تأثير البنج ..
قبضت منى يدي وقالت: نوره تخيل روحج شو حالته الحين؟؟
أطالعتها محتاره ماأقدر أقول لها شيء , لان ممنوع نخبرهم عن حالة المرضى إلي في العنايه ..
ترددت مب عارفه بس هم من الاهل ماأقدر ما أقولهم ...
رفعت نظري لإيمان وبعدين أطالعت لمنى وقلت : خالوه هو تحت تأثير البنج الحين وحالته مستقره , وأن شاء الله بيوعى بعد ما يروح التأثير ..
حضنتني إيمان وخالوه منى يلست تصيح , ابتسمت شكله هاادف ووايد غالي عندهم ...
أســتأذنت منهم ورحت داخل غرفة العنايه , توجهت للسرير إلي طايح عليه هادف ويلست في الكرسي الموجود هناك..
يلست أتصفح ملفه وبعدين حطيت الملف مكانه ورفعت نظري لهادف ..
يلست بدون شعور أتأمل ويها ...
ماشاء الله رموشه طوال وشكل عيونه كبار, ولونه أبيض مخلوط بصفار ولحيته خفيفه وسوده وشفايفه .............!!
أبعدت نظري عنه صدق أني ماأستحي صدق مصختها يالسه أتــأمل الريال
أففف أستغفر الله .... بس ها الانسان كـأنه يشبه محمد ووايد ..
رديت نظري صوبه , وحست بوزي لا محمــد أحــلى ...
ابتسمت خخخخ بعد أونه مـحمد أحــلى مالت عليه لين الحين محمد في بالي مادري متى بنساه مع أن حبي له خف ووايد ... بس هل يوم بشوفه مره ثانيه بيرد لي هذاك الشعور ....؟؟!!
اتمنى انه مــايرد لان حب محمد أنتهى من حياتي ولزم أنساااه ...
تنهدت وأطالعت ساعتي باقي ساعه عن فحوصات هادف ...
سرت أطالع أسوم شو تسوي .. لقيتها يالسه على الكرسي حايسه بوزها وتهز ريلها ...
ضحكت وسرت صوبها وقلت : علووومج..؟؟
حاست بوزها أكــثر: عفت ويه ها الشيبه ..
قلت بصدمه :امنوه الي توه غامضنه ...؟؟
عقدت حواجبها وقالت وهي عاضه طرف شفايفها : اطالعي شما عند منو!! ومروه !!ووأنتي وأنا يالسه عند ها الشويبه ..
صدمه ها البنت صدمه شو من قلب عليها خخخخ بس أنا اعرف أسوم حياتها كلها سوالف ومصخره وحركاتها غريبه ..
كتمت ضحكتي وانا اقول : تبينه واصــل ..
أطالعتني ببتسامه ماكره: بكم تبيعينه ؟؟
ماأقدرت أكتم ضحكتي وضحكت بصوت واطي وقلت: أسوووم تخيل روحج بس ..
حرااام عليج شوفي حاله كيف ها الشيبه الله يشفيه..
تأملته أسوم وبعدين اطالعتني وقالت: يعني في يوم من الايام بستوي مثله صح...
فتحت فمي لكلامها وضحكت مره ثانيه وقلت: أسوم عن المصخره..
اطالعتني بنظره حزينه وقالت: صدق نوره اخاف في يوم من الايام أستوي جي.. ماأقدر أعتمد على عمري, أستوي مثل الطفل الصغير أبا حد يخدمني ,والامراض تهاجمني وأستوي ضعيفه , وضمت يديها لصدرها وهي تقول: اتمنى أموت قبل ماأستوي عيوز ...
أرتجفت لها الرمسه وتقربت منها وأنا اقول: استغفري ربج...
أسوم: أستغفر الله ..
فجاه ضحكت أسوم بصوت واطي وهي تقول بشكل شرير: نواري تخيلي اني أنا عيوز ويايه ازورج وضروسي طايحات وفمي جي ..
ويلست تقلد وتضحك ووأنا أضحك وياها وأحاول أهديها وأسكتها, لان الي في العنايه يسمعونا وممكن يتأثرون بسبب كلامنا ,حاولت أسكتها لين ظهرتها من غرفة العنايه , حراااام المرضى تأذو منها ...
أسوم مب قادره تسكت فضحتنا ..
الناس تشوفنا وها البنت مب رايمه تسكت أبدا , شفت واحد من دكاترة المستشفى خاطف , ياااربي خفت أنه ينتبه لنا ..
تقرب منا وهو عاقد حواجبه , حطيت يدي على فمي هذا الدكتور منصور .. ياربي يالفضيحه ...
حطيت فمي عند أذن أسوم وأنا أقول: الدكتور منصور..
رفعت راسها بسرعه وقالت بصوت عالي: وينننننننننننه؟؟
حسيت ويهي أخضر وأزرق من الفششله , واسوم عدالي من طاحت عينها عليه جمدت محلها ..
نزلت راسي بمستحى ...وخوف منه ولهيبته الي تخلي الواحد يخاااااف ..
سمعت صوته وهو يقول: أنتن شو تسون هنيه ...؟؟
رفعت راسي صوبه , كان بعده معقد حواجبه والضيقه باينه في ويه , بلعت ريجي بخوف وأنا اطالع اسوم إلي مب قادره تقول كلمه وحده رديت عيوني صوبه وانا أقول برتجاف: نحنا طلاب التمريض ونعتني بالي في العنايه ...
فتح فمه بمسخره بعدين قال : لاوالله عيل ليش هب يالسات عندهم , صرخ: شو بعد ها الضحك ؟؟؟؟ هنا مرضى أمبين الحياه والموت وانتن يالسات تضحكن وتلعبن ماشي دم ماشي أحساس...وبعدين أطالع أسوم وعبس : انتِ بتخبرج انا دوم اشوفج تحوطين بلا شغله ليكون يايه تلعبين هنيه , وإذا يايه تلعبين فاحسن لج وفري التعب عليج ويلسي في البيت ...
صدمني وخوفني صريخه , اطالعت صوب أسوم بخوف وحزن أكيد جرحها الدكتور منصور أكيييييييد...
حسيت عيونها بدن يتقرقرن بالدموع, مسكت يدها بدون أي كلمه ورحت معاها صوب الحمام ...
من دخلنا الحمام وقفت أسوم بدون حركه بعدين نزلت تحت ببطى ويلست ..
ودموعها تنزل على خدودها بصمت ..
رفعت يديها تمسح دموعها بس كل ماتمسح ينزلن أكثر ...
حطت يديها على ويها ويلست تصيييييييييح بصوت مسموع , حاولت تكتم صياحها بس ماقدرت ..وقفت شوي وسارت صوب المغاسل ويلست تغسل ويها .
أما أنا فكنت واقفه مب عارفه شو أقول أو شو أسوي , تقربت منها وقلت لها : أسوم ماعليج منه يمكن كان معصب...
اطالعتني أسوم بنظره أحتقار وبعدين قالت: أكرهه اكرهه , صدق مب لها الدرجه يفشلني يعني , بسس أنا الغلطانه كله مني بيشوف أنا براويه ... بخليه يندم ..
تنهدت بخوف أســوم تهديداتها دوم تسويها , ماعليها من حد ..
حطيت يدي على جتف أسوم وقلت : أسوم خليه يولي ..
ابتسمت أسوم بكل أحتقار : والله بنتقم منه بيشوف ...بيشوف منو هي أسماء بنت سالم ...
حاولت أهديها بس ماقدرت لانها معصبه بشكل لاول أمره أشوفه خلال سنيني الثلاث وياها ...
أطالعت ساعتي يااااربي بسسسسسسير أشوف هادف باقي ربع ساعه عن الفحص.... أففففف خذني الوقت ونسيته ياويلي لو حد درى ..
زخيت أسوم و بعد موت ردينا غرفة العنايه ...
سرت صوب هادف أطالع إذا حصل أي تغير ... والحمدالله لقيت كل شيء أوكيه ..
مرت الربع ســاعه ...
يلست أخذ لهادف S/V وكل شيء كان طبيعي ...
خذيت نفس الحين لزم أخذ فحص الرئه , يااااربي أجتاحتني رجفه وأنا أفج ازرار قميص هــادف , لان لآول مره أسويها لريال , يمكن سويتها لصبي ماتجاوز عمره 15 بس لواحد كبير هذي أول مره ...
أستحيت وغمضت عيوني بخوف , بس فلحظه تشجعت أنا ممرضه وهذا شغلي ولزم أسويه على اكمل وجه ..
فتحت عيوني وأنا أشوف جدامي صدر هادف الي يلفه الشاش بنص صدره في مكان الجرح ...
رفعت السماعه لذنيه وحطيتها , وبعدها حطيت القطعه الثانيه على صدره وحاولت أنه ماتي يدي على صدره ويلست أتسمع حركة خروج ودخول الهواء للرئه ...
أبتسمت الحمدالله الحركه طبيعيه...
خوزت السماعه عن ذني , ويلست أعقم أزرار قميص هادف ,وياصبعي على صدره وانا أعقم العقمه قبل الاخيره ...
اففففففف أبعدت يدي عن صدره وانا عابسه , موقف كريهه ووايد ..
وكملت بسرعه تعقيم الاخيره ...
نفخت وانا ايلس على الكرسي الي عدال الســرير ...
عــلى الساعه 12 الظهر يلست أطالع ملف هادف , العمليه سواها الساعه 6 الفير مدتها كانت ساعتين , وكان مخدر بالكامل , يعني التخدير يتم ساعتين او ساعه... بس الحين وصلت الساعه 12 يعني 5 ساعات ...
هل من الممكن أنــــــــــــــــــــهــ...
ركضت طالعه من غرفة العنايه , وسرت صوب الدكتور إلي مسوي لهادف العمليه ودقيت الباب ودخلت وانا الهث ..
عقد الدكتور حواجبه وهو يطالعني وقال: خير شو فيه ..؟؟
قلت بسرعه: دكتور المريض هادف الحين له 5 ساعات نايم وهو تحت تأثير المخدر بس هذا مش معقول ... قام الدكتور وراح معايه لغرفة العنايه ويلس يفحص هادف..
بعدها عقد الدكتور حواجبه وقال: راح في غيبوبه بس كيف؟؟
حسيت الدكتور يلس يفكر وبعدين طالعني وقال: أنا شك في شيء يمكن أصابته حساسيه من المخدر بس ها الشيء من الحالات النادره.. ممكن تنادين أهله علشان نتأكد من ها الشيء؟
هزيت راسي وقلت: حاضر دكتور ..
رحت صوب أهل هادف الي كانوا في الاستراحه, لقيت أبوه وأمه و إيمان ومعاهم واحد كأنه أحمد...
تجدمت بتردد وقلت: السلام عليكم ..
الكل ألتفت صوبي , وقفت إيمان بسرعه وقالت: نوره ... شو قام هادف..؟؟؟
هزيت راسي بلا وقلت بمستحى : لو سمحتوا ممكن تون ويايه الدكتور يباكم ..
رحت معاهم ودخلنا غرفة الدكتور , ويلسوا على الكراسي وأنا تميت واقفه ...
أطالعهم الدكتور وقال: الصراحه مااأعرف شو أقولكم , ماكنا نتوقع ان يروح في غيبوبه ... وأنا شاك في سبب دخوله الغيبوبه , وودي أسألكم سؤال إذا ممكن..؟؟
أبو هادف : قول يادكتور؟؟
الدكتور : الصراحه أناشكيت أنه ممكن يكون سبب الغيبوبه حساسيه من المخدر , يمكن يكون وراثه ... يعني في حد من العايله حدث له مثل ها الشيء؟؟
اطالعت ويه أبو هادف الي أعتفس , وأم هادف إلي تكلمت بسرعه: لا مـــ...
بس قاطعها أبو هادف وهو يقول: نعم أخوي أستوت له نفس الحاله بس ماقدروا ينقذونه ومات بسببها ...
قال الدكتور: الله يرحمه , سكت الدكتور شوي وبعدين كمل: الله يعلم إذا بقوم أو لا ادعوا له ...
قال أبو هادف : أن لله وأن إليه لرجعون..
أطالعت خالوه منى كانت الدموع مبلله ويها بشكل كبير وإيمان إلي صاده على اليدار وتصيح , وأحمد إلي حاط يديه على راسه وكأنه مصدوم ...
غمضت عيوني بألم لحالهم ودعيت ربي أن يقوم هادف بالسلامه ..
خلص الدوام ورديت البيت وطحت على شبريتي بتعب وغمضت عيوني , ما أبا أرقد بس ماشي باقي عن صلاة المغرب ...
أسوم..
دفنت راسي بالمخده وأنا منقهره من الدكــتور منصور , فلحظه أستويت أكرهه مثل ماكنت أحبه ....
صرخت ويلست أضرب راسي على المخده:ســبال والله لانتقم , بس لزم ألقى خطه تخليه يندم أنه فشلني جدام الناس وخاصتنا نــوره ...
نفخت بقهر , ويلست على الشبريه حطيت يدي على راسي كأن فيني حمى داخليه احس جسمي يرتجف ..
سرت غسلت ويهي , وطلعت من غرفتي سايره صوب الصاله ,يلست على اقرب كرسي وتثاوبت ...
وقلت بصوت عالي : وووودي أنام ليييين باجر وماأقوم حق دراسه ولا حق شيء وودي أكل جيز كيك في ........
سمعت صرخه : أسكتي صدعتينا ...أبا أتابع الدراما ...
صديت لها عابسه : أنتِ إلي سكتي , أنا تعبانه توي يايه ...
زمت شما شفايفها وقالت: أفففف من حشرج ...
غمضت عيوني متجاهله شموه المزاجيه الي أصغر عني بأربع سنين ,آه أحس اني مب قادره أفكر بشيء أبدا , خاطري بس أرقد وأريح جسمي المتعب ..
فتحت عيوني على أحساس حلو كان حد يمسح على راسي بكل دفئ , أطالعته كان أبــويه , أبتسمت براحه وأنا أحط راسي بحضنه أكــثر ..
حبني على راسي , ابتسمت وطلعت لساني بدلع ...
رد لي الابتسامه وقال: شحالها بنت سالم اليوم ؟؟؟
قلت بدلع: يسسرك حالها يابوغنيم ..
رفعت عيوني صوب أبويه وأطالعته بنظرة حب , أبويه مدلعني أنا وأختي شموه على الاخر لاننا بناته الوحيدات , الله مارزقه إلا بي وبشموه وبحمد أخويه البجر إلي لاهي في ها الدنيا...
غمضت عيوني ودي بخطه أنتقم فيها من الدكــتور منصوررر..
قفزت من حضن أبويه وقللللللللللللللللللللت بصوووت عالي: أيواااااااااااا لقيتها أخيرا ...أخيرااااااااااااا
حبيت أبويه على خده واناقول: ياااااااااااااااويلي أخيراااااااااااااا والله والله بيشوف ..
وربعت صوب غرفتي ...

............................................................ ...................................

يوم الاربعاء الساعه 8 ونص صباحاً...
اطالعت إيمان ومنى كانت ويهم حزينه , ومتألمه ....
شوي وأشوف ويه أعرفه , كان عــلي...
عقد حواجبه وهو يشوفني وأتجهه صوبي وقال: نوره شو تسوين هنيه؟؟
قلت بتردد: دوامي هنيه اليوم..
هز راسه وقال بحزن : هادف ولد خالوه هنيه سوى حادث والحين هو في غيبوبه الله يشفيه..
هزيت راسي وقلت: الله يشفيه ..
وسكت متردده هب قادره اقوله أني أنا المشرفه عليه ...
بس فكرت مب حلوه أني ماأقوله وبعدين يعصب عليه ,قلت بتوتر: أنا حاطيني مشرفه عليه..
فتح عيونه وقال: والله ..
قلت وانا أبلع ريجي بأحراج : هيه ...
أستأذنت من علي ورحت العنايه بسرعه لاني تأخرت ... دخلت وأتجهت للسرير هادف ...
وأطالعت ملفه , لزم أخذ له الـS/V وأنظف الجرح ...
خذيت له الــS/V , وبعدها فتحت أزرار قميصه أففف ياربي لزم انظف الجرح اليوم مرتين لان كل أربع ساعات لزم أنظف ... وطبعا معايه ممرضه ثانيه تساعدني
حطيت له المغذي وفتحت الازرار وبعدها الشاش الي كان يحيط بصدره , الجرح كان عميق ومخيف بس أنا تعودت على ها المناظر فصارت ماتخوفني ...

لبست القفازات المعمقه وكل شي معقم أحتاج له , ويلست أنظف الجرح بكل دقه وحذر , وبعدين أستبدلت الشاش بشاش يديد ولفيته عليه بمساعدت الممرضه...
انتهت مهمتي , وسويت فحص للرئه وخلصت وعقمت الازرار ..
لفيت أطالع صوب الباب ...
أرتفعت الحراره لويهي وأنا اشوف إيمان وعلي وأحمد يطالعوني من الدريشه الزجاجيه الي تفصل العنايه عن المحيط الخارجي ...
علي فاتح عيونه ويطالعني بذهول واحمد فاتح فمه بستنكار ,وإيمان عاقده حواجبها ..
ماعرفت وين أودي ويهي من الفشيله , اه نظراتهم تربك تخوف وكأنهم قابضني بجرم ...
لفيت ويهي عنهم , آه يالفشيله أحمد بعد شافني ....
رديت نظري صوب الدريشه بس ماشفت غير إيمان أطالع , أشرت لي أطلع ..
بلعت ريجي وسرت صوبها وطلعت ..
لقيتها واقفه عند الباب , زخت يدي وقالت بنظره متألمه: نوره هادف بنش ؟؟
أطالعتها برتباك وحزن وقلت بتردد: أن شاء الله بس أنتي أدعي الله ..
تنهدت إيمان وتقرقرت الدموع في عيونها : وربي توي عرفت غلاته وربي هادف محد يسواه في ها الدنيا , نزلن دموعها واطالعتني وقالت بصوت مشوش: كم خدمني وكم حوطني وأبتسم لي وياب لي هديه يوم تخرجت ... والله أحس أني أسئت وووايد له وحتى كان أخر الايام معصب عليه ...وحطت يديها على ويها تصيييييييييييح: ماأتخيل أنه بروح عنااا ما أتخيل أنه ممكن يموت وأفقده ..
تقربت منها أهديها: الله بقومه بالسلامه , إيمان ثقي بالله أن شاء الله بقوم هادف بالسلامه ...
مسحت دموعها وقالت: أمين الله يسمع منج...
أبتسمت بعدها وقالت: ماكنت اتوقع أن شغلت الممرضه جريئه ها الكثر ..
أنقفط ويهي من الاحراج وماقلت شيء...
أستأذنت ورديت داخل ورحت يلست عدال سرير هادف وقلت: الله يقومك بالسلامه ...
اطالعت ويها وابتسمت قايله: هادف أمممم أسمك حلو يعيبني ووايد , ياربي كيف صعب على الواحد أنه يفقد أنسان عزيز عليه , الله يقومك وتفرح أمك وأبوك .. و خاصتنا إيمان لانها شكلها ووايد تحبك ...وتعزك ..
وبعد أربع ساعات نظفت الجرح له ...
على الساعه 2 خلص الدوام ....
رديت البيت وسرت غرفتي بعد ماسلمت على يدوه , طحت على شبريتي وغمضت عيوني ماحلاااا الراحه بعد يوم طويل ومتعب ...
في اليوم الثاني رحت المستشفى وحال هادف مثل ماهو ماتغير ...
ومرت الايام ويا الدراسه , آه باجر الثلاثاء وأنا لين الحين ماأعرف هل هادف أستيقظ أو لا....
طلعت برع غرفتي سايره صوب يدوه برع , شفت يدوه كالعاده يالسه على حصيرها , بس معاها حد من ضخامته عرفت أنه عمي خلفان ....
تنفست بعمق وسرت صوبهم , وسلمت على عمي ..
خزني بنظره وقال: شحالج نوره؟؟ وينج من زمان عنبوه ماتقولي عندي عم بسلم عليه والا بطالع شو يبا ؟؟
كلامه أخجلني صح أني مقصره بس صدق ظروفي تمنعني , أبتسمت وقلت: أسمحلي عمي فديتك والله الدراسه لاهتني ..
كشر وهو يقول: شو تبينها , بس بتخبرج بعدهم يعطونج مصروف ..؟؟
هزيت راسي بنعم , خلاص وصلت حدي خاططططري أضحك الا امووت من الضحك عمي خلفان سوالف ..
كان من أشد المعارضين لدراستي بس من قلت له أنه في راتب ..
هز راسه وقال: زين والله درسي أبويه بتفيدج شهادتج في ها الزمن وهذا مستقبلج ولزم تضمنينه والتمريض شيء زين ومضمون ...
قبضت عمري عن اضحك ويلست شوي معاهم وبعدين أستأذنت بروح ...
يوم الثلاثاء الساعه 9 الصبح..
مريضي هوه نفسه هادف بعده ماوعى, غمضت عيوني بألم وأنا أشوف ويها ..الله يقومه بالسلامه ...
خذيت له الــS/V وفحص الدم والفحوصات الثانيه ...
فتحت أزرار قميصه علشان أسوي فحص للرئه , بعدها يلست أطالع ملفه لزم بعد أربع ساعات أنظف الجرح ...
سمعت صوت ينادني كانت أسوم أبتسمت وأشرت لها تي , يت صوبي وقالت: مابغى الشيبه يوعى ويفكنا ..
حطيت يدي على فمي بذهول: أستغفرالله ..
ضحكت بصوت واطي, أسوم سوالف وشكله كلام الدكتور منصور ماأثر فيها لانها البنت بعدها تلاحقه , أســـــــــوم وحده غريبه بشكل فضيييييع...
رفعت نظري صوب أسوم , وشفتها أطالع صوب هادف وهي فاجه فمها بشكل عبيط ..
قلت لها: بسم الله شو فيج..
أطالعتني بنظره منصدمه : ياااربي هذا كل يوم يحلو ..
قلت بصوت مفجوع: بسم الله اعوذ بالله منج قولي ماشاء الله..
أسوم طنشتني وقالت: ووااايه ماحلااااه غرااام ها الانسان ...
حست بوزي وقلت: أسوم ترا هذه من أهلي..
أسوم أطالعتني بسرعه: أحلفي ..
قلت ببتسامه: والله , بس شوي من بعيد..
أسوم: هيه أقول ليش أحلى عنج...
ضحكت عليها , واطالعت صوب هادف عقدت حواجبي وأنا أشوف دقــات قلبه ترتفع والضغط بعد ...
اطالعت أسوم وقلت: أسوم شكله الكلام يأثر فيه, روحي عند شويبتج ..
حاست بوزها وقالت بقهر: انزين أففففففففف...
سارت أسوم ويلست أطالع هادف , أطالعت الشاشه وشفت انه دقات قلبه بعدها مرتفعه...
رديت نظري صوبه ,فتحت عيوني على وسعهن وأنا أشوفه فاتح عيونه ويطالعني ....

نهاية البارت الرابع عشر ...