الــبارت العــاشر ..
أبــويه ...
أبتســم أبــويه , وقبض يدي وبنظرات حب قال : نــوره حبيبي اخــبارج ؟؟
اطالعته مش مصدقــه أنــي أشــوفه جدامــي : أبــويه وينــك ليــش رحت عني .
سكــت ولا رد عـــليه , وتم يطــالــعني بس بنظــرات غــريبــه ..
نزلن دمــوعــي , وأنــا أشــوفه يطالعــني بها النــظرات ..
أبتــعد عــني , وقال : ديري بالــج على نفــسج ..
وراح , حاولت ألحقه بــس هو أختــفى ...
فــتحت عيوني بتــعب , وأنــا احــس ان كل جسمي يعــورني وخاصتنا بطــني .
عــقدت حواجبــي وأنا أتأمل الــغــرفه إلي كنت فــيها , والــسرير الي طايحه عليه ...
سمعت صوت اعرفــه زيــن : نــوره وعيتي ؟؟
رفعت راسي صوب أمــي بستــغراب , وقفت وقالت : لا تقــومين أرتاحي ..
أبتسمت أمي : روعــتيتنا عليج , الحمــدالله أن وصلنا المستشفى قبل ما تنفجــر الزايــده ...
الزايــده , كلمــه دارت في راســي ...
يلست أمــي وقالت وهي أطالعني بغــموض: الحمــدالله على الــسلامه ..
مارديت عليها , أحــس أني ما اقــدر أنطق لســاني ثجيــل ..
يلســت اتأمل الغــرفه , أنــا في المســتشــفى وأمي قالت زايــده , مافهمت شي ..
بعد عشر دقايق نطقت : أنا شو يابني هنيه ..
قــالت أمي بعد كم دقيــقه : تذكــرين يتني الــغرفه وقلتــي أنــج حــامل , وبعدين غمى عــليج ووديناج المستشفى بــسرعه , وطلــع أن الدوده الــزايده ملتهبه عندج ..
سكتت شوي وبعدين أطالعتني و تكلمت بقــهر : شو إلي خــلاج تظنين أنــج حــامــل ؟؟ أنتِ سويتي شىء من ورانا ...
بلعت ريجي بخــوف من نظراتها , بس دق البــاب يا في وقته المناسب ...
أطالعت أمي الباب إلي تبطل وبعدين أطالعتني بنظره غاضبه وقالت : بـعدين بنكمل رمستنا ...
دخــلوا خــالي وحرمــة خالي , أبتسم خالي يو م شافني واعيــه وقال: الحمدالله على الســلامه ..
قلت بهــمس : الله يسلمك خاالي ..
يت حرمة خالي مهره ويلست على طرف الشبــريه وقبضت يدي وقالت : فــديتج روعتيــنا علــيج , بس الحمــدالله على ســلامج ..
ابتسمت نص ابتسامه وهزيت راســي ..
يلست في المستشفى لمدة يومين , باتت عايشه عندي ليله والليله الثانيه رديت البيت ...
وفي ها الفتره ما أنفردت بأمي , والله أنـــي خــايفه شو بقولها..أو شو بفــسر لها ..
طحت على شبريتي , وضحكت على عمري كيف أني كنــت أتخــيل عمــري حــامل , أه هذيــج الفتره كــانت مرعبــه , والحمدالله أنــه ماكــان حقيقية بــس..
قطع حــبل أفكــاري دخــول أحــد لغرفتي ,أطالعت صــوب إلي دخــل ..
كانت أمــي , دخلت غرفــتي ويلست على أقــرب كــرسي لشبــريتي ..
أطالعتني وقــالت : شــو حالج الــيوم ؟؟
أرتــجفت ونزلت عيوني تحت وقلت : بــخير ..
أرعبتني نظرات عيــونها ,حاولت أبعد نظري عنها وما أطالع عيونها بس ماقدرت , لان أمــي يلست أطالعني بنظرات مــرعبه أكــثر , خــلتني أرتجف أكــثر ..
سمعت صوتها البارد وهي تقول: شو بــلاج ترتجفين جي ؟؟
أرتبكت وهزيت راسي بــلا ...
قــالت بحده: نوره !!بــتــقوليــن شو ســالفة شكج أنج حــامل , وسمعيني أن جذبتي تــرا ماتلوميــن الا نفــسج ..
رفعت عيوني صوبها بــخوف , يــاربي ما أقــدر أخبرها خايفه ...
عقدت حواجبهــا وقالت : شــو فــيج ماترمسـين؟؟ يالله رمــسي الحــين ولا والله لتندمــين ..
قــلت خــايفه : مــادري ..
قالت أمــي بعصبيه: كيف ماتدريــن ؟؟
نبرت أمــي العصبيه خوفتني ووايد , أنتفضت بخــوف كيف بقــولها , ماعندي الجرأه ..
وقفت أمــي وقالت : قومــي الحين ..ولبسي عباتج..
اطالعتها وقلت بصوت واطي : لــيش ؟؟
أرتفع صوتها وهي تقول: أووووص ولاكلمه , بنسير الــعياده , وأشـرت بصبعها صوب ويهي وكملت بعصبيه : والله والله أن طلع انــج مسويه شي والله ماتلومين الا نــفسج ..
تجمــدت محلي بصدمــه , وتجمعت الدمــوع في عيــونــي , يعني الحــين لو ماطلعت بنت , شو بيستوي فيني ..أمــي بتحتقرني وبتحرا أني مسويه ها الشي برضاي ..لالالا ...
وقفت بــخوف وقلت: امــي خــلاص بخبرج كل الســالفه والله ما اجــذب ..
جتفت يديها جــدام صدرها وقالت : شو يعني تعترفين أنج مسويه شي ..
نزلن دموعي على خدي : والله ماسويت شي انــا بــس ..
فتحت أمي عيونها : بــس شو ؟؟
مسحت دموعي وقلت بتــردد: مهــا , طلعت مره معاها هي وأخوها , ورقدت في الــسياره وياهم حولي كم ســاعه , شكلهم كانوا حاطيــن لي منوم و.............
ماحــسيت الا بــطراق قوي على خدي , بــسرعه حطيت يدي على خدي من الالم , تجمعت الدمــوع في عيوني مره ثانيه, وأنا اشـــوف أمــي أطالعنــي بكل عصبيه وغضـــب ...
صرخت : أنتِ مينونــــه خبـــله يـــاهــل , كــــيف تسيرين ياريال غـــريب منيه والدرب كيييييف حتى لو اخته او أمــــــه ويــاج , كــــيف تتجرئين..
صرخــت أمي خلت الدمــوع تنزل على خدودي بكثره , لــيش تقول لي جي هي الي أهملتني هي الي خلتنــي أروح مع مهـا ,هي الي مافهمتني الصــح من الغلط طول ها السنين لاهييه عنـــــــي , والحيــــــن يايه تلومني ...
ماأقــــدرت أقول شي , بس في ها اللحظـــه دمــــوعي هي الي تعبر عن مشـاعري الداخليه ...
مــشاعــر كره لمها وناصــر ولأمـــــــي , مشــاعر حــزن لان النــــــــــاس يالسه تظلمني وتستغلنـــي ... بــدون ماتراعي مشــــاعري ..
رفعت يدي أمسح دمــوعي ...
سمعت صوت امــي الغاضب : قــومي لبســي عباتج ...
طــلعـت أمــي من غرفــتي , نزلن دموعي اكـــثر لها الحـــياه إلي أعيشها من مصــيبه لمصــيبه ...
قمت بستسلام ولبست عبــاتي , ونــزلت تحت , يــلست في الــصاله حطيت يدي على خدي ويــلست اطالع الفراغ , أفــكاري متلخبطه , والخــوف مالي قــلبي ....
عــقلي مش ويايه , مادري بشو أفكر , أفكر بأمــي, ولا أفكــر بحياتي بعد ماتعرف أمي أنــي مش بنت !!!!!!
أيقضني من سرحاني صوت حاد : نــوره يالله قــومي ..
رفعت راسي صوب أمــي إلي كانت لبسه عباه وفي يدها نقابها , ســارت أمــي وسرت وراها ..
ركبنــا الســياره ورحــنا ..
كان الصمت مخيم على جو الســياره ....
أنا ســرحــانه بأفــكاري المخـــيفه وأن خــلاص حــياتي بتنتهي من أفــحص ..
غمضت عيوني بــرعب , يــارب أرحمـــني , يــارب ..
فتحت عيوني على صوت أمي: يالله نــزلي ..
نزلنا رايحين صوب الــعيــاده, وأنــا أرتجف من الخــاطر خــايفه...
دخــلنــا العــياده ...
دخلت أمـي تكلم الرسبشن, وبعدهايــلسنا ننتظر الــدور ,يا دوري ودخــلت مع امــي عند الدكـتوره وسوت لي الفــحص ...
الخــوف كان مسيطر عليه طول الوقــت , بس الــدكــتوره أبتسمت وقالت لأمــي : بنتك سليمه 100% ...
ماصــــدقت ذنـــــي يوم سمعتها تقـــول ها الكــلام , فرحــه ماتنوصف انـــي بنت بــعدنـــي ...
أسترخيت علىى الســرير وغمضت عيونــي بفرحــه , الحمــدالله أن ربي نجاني من نــاصر ومهــا ..
طلعنا من العيــاده , ورحــنا للســياره , أحــساسي بهاللحظــه ماينوصــف كــل الشكوك والهموم راحــت..
ركبت الــسياره...
تنهدت بــرحه وأنا أسترخي على كرسي السيــاره , وبعــدها أبتسمت براحــه ..
سمعت صوت أمــي الحــاد وهي تقول : مــها ما أبــاج ترمسينها ولا تــروحيــن معاها أي مكــان ..
بوزت وهزيت راسي بنــعم ..
كملت كلامهــا امــي : وأن عـرفت أنــج تكلمينها ولا تــروحين معاها والله ماتلوميــن الا نــفسج ..
ومرت الايــام عاديه مافيها شي ,ما رحــت فيها المدرسه لاني ماخذه أجــازه مرضيه ســبوع , طبــعا التلفون إلي عطاني علي أياه تكســر فما كلمت مهــا من هذاك اليــوم في المدرسه..
الصــراحــه أرتحت لاني نــاويه أقطع علاقــتي فيــها نهاياً...
الجمعه الــساعه 4 عصــرا..
لبست كنــدوره مخوره , ونزلــت تحــت ...
لقيتهم متجهزيــن بــروحون عند أهلهم , أبتسمت وأنا أشــوف خالوه مهــره محتشره على عليــاء المشاغبه ..
خالوه مهره : عليووه لبســـي شغابج بســرعه ..
علياء: ماما ما أحبــه يعور ذنيه ووايد ...
خالوه مهره : سمعي الرمسه ولبسيه ..
صدت خالوه مهــره صوب عبدالله ..
مهره: عبدالله قوم لبس كندورك ..
عبدالله كان طايح ويلعب ببلاي ستيشن وعقله عندها ...
مهــره: عبدالله ماتســمع ..
عبدالله أنتبه لصوت امه : ماما ما أريد أشير بلعب ببلاي شتيشن ..
خالوه مهره سارت صوب البلاي ستيشن وبندتها , عبدالله قام معصب ..
عبدالله : خــايشه ,بنغاليه ..
فتحت خالوه مهره عيونها بصدمه وقالت : شــو ها الالفاظ ماحيدني معلمتنك أياها ..
ماقدرت اكتم ضحكتــي , وأنفجرت أضحك ...
عبدالله شرد لان يعرف أمه بتضربه ..
ضحكت خالوه مهره ويايه وقالت : شفــتي الحين أنا أستويت خايسه وبنغاليه.
بعد ما سكتنا أطالعتنــي خالوه مهــره وقالت : بتــروحين معانا ..
أرتجفت خــايفه لاني ممكن أشــوف نــادر هناك , من توفت نــوال مارحت هنــاك ... ولان اليــوم عندهم عــزيمه ,فاخاف أشــوفه في البيت..
مــادري أروح ولا , لا ....
بس صــوت أمــي أيقظني من تفــكيري..
أمــي : لا مابــتروح , سكتت بعدين كملت وهي أطالعني : بــروح نحوط شوي وبنتعشى في مطعم ..
أطالعت خالوه مهــره أمــي بنظرت أستغراب ,وبعــدين تحولت نظرت الاستغراب لبتسامه ...
مهره : والله زيــن تســون ..
أنــا في حــالة صــدمه , مــعقوله بطلع يا أمي اتحــوط وأتعشى فــي مطعم لأول مــره في حيــاتي ..
أطالعت صوبها بعدم أســتواعاب وفرحه غريبه , قالت بصــرامه وهي تبعد نظرها عنــي : سيري تلبســي ..
سرت لبست عــباتي وشيلتي ونزلت تحت , لقيت امــي واقفه بعباتها وشيلتها عند المنــظره الكبيره الموجوده عند بــاب الصــاله تلبس نقابها ..تجدمت صوبها ووقفت شوي بعيد عنها منزله راســي ألعب بالسلسله الموجوده في طرف شنطتي الصغيره ..
بــعد ما خلــصت أمــي لبس نقابــها ,أطالعتنــي وقالت : ويــن نــقابج ..
بلعت ريجي أصلا انا ماعنــدي نقاب ولامره جربت ألبسه ..
قلت بتردد: مــاعندي ..
عقــدت حواجــبها وقالت: والله ..
حسيت أنها توترت شوي وبــعدين أبعدت نظرها عني وطــلعت بــرع ..
لحقتها ,ركبــنا الــسياره ورحــنا ...
كان الجــو متوتــر وسكــون , ماتجــرأت أتكلم لاني أســتحي من أمــي ..
ومــاعندي أي موضوع اتكلم فيه ...
أول شــي رحــنا واحــد من المولات , نزلــت من الســياره وأنا محتاره أتغشى بالشيله ولا ,بــس أخــر شي تغشيت ..
أشتــريت من المحلات الموجوده هنــاك مجمــوعة قمصان كيوت وكم بجامه , ورحــنا بــعدها عند بــاريس غاليري..
يلست أمــي أطــالع المكــياج , وأنــا أطالعها, الصــراحه خــاطر أشــتري مكــياج , بــس مستحــيه ..
بــس تجرأت ويلست أطالع الروجــات وأجربهن , وبــعدهــا رحت عند البلاشر ويلست اطالع الالون الي عندهم..
يتني وحده من العاملات هنــاك , ويلــست تخبرني عن اليديد إلي عندهم , بس أنا مــتردده , أخــاف أمــي تهد عليه , لاني صغيره بعدنــي على ها الاشــياء .. بنــظري طبــعا ..
بــس سمعت صوت امــي ورايه :خــذي إلي تبينه ...
أطالعت صوبــها متردده : و..والله , عــ عــادي..
هزت راسها بــنعم , ابتسمت بـفرحه , وأشتريت لي كم قلوس وروج وبــلاشر ..
وبــعدها طلعنا , روحنــا واحد من الكوفيات , خذيلتي كابتشينوا , وخذت أمــي قهوه تــركيـه...
فجيت غشوتي ويلست مجابله أمــي , اطالعت صوبها بتوتر ونزلت عيوني بسـرعه يوم شفتها أطالــعني ...
يــلســنا نــشرب بهــدوء , وكــل وحده فــي حالــها ...
امــي بــنظري أنســانه أنعزاليه وغــامضه , وحــياتها كلــها شــغل وحــواطه ,ماتهتم بــأحد أبــدا , ونظــراتها كلــها غــرور , كأنهــا وحده شــايفه عمــرها ووايد ..
بـــــس الــيوم حسيتها غــير شوي , فهي أول مره من توفــي أبــويه أطلعنــي مــكان نــحوط ...
بـــس بــعدني أحس أن في حــاجز كــبير أمبيني وأمبينها ما اقــدر اتخطاه ..
وبــعد ما خلصنا من الكوفي , يلسنا نحوط في المول ...
وصلــت الســاعه 8 ونص ... وسرنــا نصــلي الــعشاء في المصــلى الموجود في المول ..
وبــعد ماخلصنا صلاه , يلسنــا نمشي شوي ..
فجأه أطالعتني امــي وقالت : ويــن تبين تتعشـين ..
أستــحيت وسكت ,مب عارفه شو أقول , أبــعدت أمــي نظرها عني وقالت : شو رايــج بقصر الهند...
هزيت راسي بنــعم , أه والله أنــي مشتهيه أكل من عندهــم ..
أبتسمت بــفرحه من ورا غشوتي , اخــيراً بــاكل من عندهم, الله !!!!!!
ســرنا والمطعم وطلــبنا لنا , الــــــصــراحه عيبني ووايد أكلهــم لــذيذ وحــار ..
رديــنا البيت الســاعه 10 بالضبط, وســرت غرفــتي وخــذيت لي شاور ونمت ســيده ...لان بــاجر مــدرسه ...
في الــيوم الثــاني رحت المــدرســه و الــبنات كلهن ألتمن عــليه يتحمدن لــي بســلامه ..
فــرحت لهتمام البنات فيني بشــكل كــبير , وحتــى انهن يابن لي بــاقة ورد ..
وبــعدها يت مها وهي تبتســم , حسيت بتوتر من شفتها ..
قالت مها ببتسامه: الحمدالله علــى الســلامه يالقاطعه ماتخبرينا الا سمعنا عنج من عند الــبنات ...
سكت ولارديت عليها , وصديــت الصوب الــثاني ..
سمعت صوتها تزقرني : نوره !!
تجاهلتها بس نفسي تقولي كلميها, فاعلى صوتها : نوره شو فـــيج ..؟؟
وقفت وقلت : مها أنــا خــلاص ما أبــغي اكون ربيعتج من اليوم ..
طلعت برع الصف, بس مها لحقتني ووقفت جــدامي وقالت : لــيش!!
نزلت عيوني تحت : خلاااص أنا ماأبا أروح معــاج ولا أبــا أكلمج ..
مــها : والله , وأرفــعت صبعها جــدامي : بــطقاق يطقج اتحريني ميته عليج الحين ولا أتحريني بــذل عمري عليج ووايد بــنات في المدرسه يبني ربيعه لهن..
وراحــت عنــي , أطالعت صوبــها وحسيت بالذنب أني قلت لها جي ..
بــــس كنت بفقد شرفي بسبتها شو أباها الحين تــولي ...
ومــرت الايــام عليه بكــل حلوها..
الــصــراحه أرتحت نفسين بــعد ما أبتعــدت عن مهـــا ..
حسيت في ها الايــام بعد تحسنت علاقــتي بأمــي بـشكل كبــير..
أخــيراً يلــست تسأل عنــي وعن دراستي ..
وتســألني أذا كنــت محتاجه أي شــي ..
تحوطنــي ... تتـكلم معايــه وتنصحنــي ...
بــس بعده الحاجز امبينا موجود , لان أمــي ماتتكلم عن نفسها أبــدا ..
ومــا أطــلع مشــاعرها , ودي أحس بـحنانها ودي لو مره تضــمني لها لاني محتاجه لضمتها ...
قــربت امتحانات أخر السنه , وانـــا صدق خــايفه لانــي أيــام الامتحانات تيب المــــرض ...
حــاولت أبذل جهد كبير في الـدراسه..
ويت الامتحانات وكان أول أمتــحان دين , ومشيت فيه لانه سهــل الحمدالله ..
وبــعده عــربي , الــصراحه الــعربي شوي أحســه صعب...
ترددت أروح لأمــي علــشان تفهمني النحو , بــس في أخــر لحظه رحت ..
دقيت الباب سمعت صوتها من الداخل : منو ؟؟
قلت بتردد: انـــا ..
قالت: دخلي ...
دخــلت وأنـا أطالع تحت , وسرت صوب أمــي بتردد وقلت: ماعرفت كم درس في النحــو أباج تفهميني شوي..
عقدت حواجــبها وقالت: عطــيني ..
يلست أمــي تفهمني الدروس وياالله فهمت ...
بــعد مافهمت كل الي كنت مب فاهمتنه وقفت وقلت : شكــرا ..
سكتت أمي ولا ردت عليه , سرت صوب البــاب وقبــل ما اقبض مقبض الباب سمعت صوت أمي وهي تقول : يوم تبين أي مساعده في دراستج تعالي عندي ..
أطالعت صوبها ببتســامه وهزيت راسي بنعم ...
سرت أكمل مــذكرتي وبــعدها رقدت لان الوقت تــاخر ...
مرن الامتــحانات والحمدالله ماكانن صعبات ووايد , وأن مافهمت شــىء أروح عنــد امي تفهمني إلي مب فاهمتنه ... حســيت فها الايــام أني تقربت من امــي ووايد أستوت تضحك معاي وتضربني بمصخره يوم ماأعــرف شيء ...
يا أخــر أمتحــان وكان ريــاضيــات وهو بــاجر , هذي الماده هي عشقي الوحــيد وإلي أحبــها من كل قلبي ذاكرتها لمدة يومين بكل جهد علــشان أيب درجــه كامــله ..
على المســاء الساعه 9 رحت صوب أمــي وبيدي كتابي ودفــتري أباها تفهمني مســئله رياضيه ما عرفت لها..
دقيت الــباب ودخــلت غــرفة أمــي , شفت عيونها فيهن دموع وخشمها أحــمر , كــأنها كانت تصيح , صدت أمــي ويها للجهه الثــانيه تخفي ويها ..
نــزلت عيوني بــسرعه تحت , لانــي ماحبيت أشــوف أمــي بها الضعف ..
حسيت بحــزن والفضول أجتاحني لــيش أمــي تصيح ..
تقربت منها , شفتها تمسح خشمها بالكلينكس , والتفت لي ببتسامه ..
قالت بصوت مزجم: شو عليج بــاجر..؟
قلت بصوت واطي وأنا أرفع عيوني صوبها: رياضــيات ..
خذت مني الكـتاب وقالت: شو مافهمتيه ؟؟
قلت وأنا أشر على المسئله : هذي ..
يلست تفهمني المسئله , والحمدالله بــسرعه فهمتها , أبتسمت بعد ماخلصت أمي ..
ردت لي الابتسامه وقالت : تبين شي ثــاني ...
هزيت راسي بــلا ..
وسرت متردده صوب البــاب , اقول لها أو لا , أخــاف ترفض .. بس أستجمعت شجاعتي ولفيت صوبها وقلت : أمـــي ..
عقدت حواجبها وقالت: نعم ..!!
قلت بتردد: ممكن انام عندج اليوم ..
أطالعت ثواني وبعدين قالت : انــزين ..
أبتسمت وقلت بسرعه : بسير ألبس بجامتي وبيي ..
طلعت من غرفة أمي , سرت غرفتي ولبست بجامتي ولفيت عمري بشيلة صلاه , وطلعت ..
دخلت غرفتي امــي بــعد مادقيت الـباب , لقيتها منسدحه على شبريتها ..
تقربت منها ووقفت عدال الشبريه, أطالعتني وقالت : تعالي طيحي هنيه ..
أشرت للمكان الفاضي في الشــبريه , طحت عدالها وتلحفت بلحافها..
بعد فــتره حسيت بــأمـي تصيح , أنتفضت شو فيــها أمــي قلبي عــورني علــيها بشــكل كبير ..
نزلن دمــوعي بصمت , حــزينه لحزن أمــي , والله خــاطري أسير صوبها وألوي عليها وأخفف عنها ..بــعد فتره ..
ماحسيت بعمــري الا وأنــا راقده ..
نشيت على دفى غريب , ويدين محاوطتني بحــنان , لمست اليدين وعــرفت أنها أمــي , أبتسمت بفــرحه , شــعور حلوو , قبضت يدها بحب وطبعت بوسه عليها بالخفيف ..
يلست فتره بحظن أمـي , وبعدها أمــي أبتعدت عنـي بهدوء ..وكملت نومها ..
قمت وغسلت ويهي ورحت غرفتــي أذاكــر ..
على الــساعه خمس الا ربع سمعت صوت المأذن يأذن ...
صوت الاذان كان منعش وحلووووو في ها الــصباح ..
سرت صليت , وبــعدها كملت مذاكره لين 6 ونص ..
خذيت لي راحه بــعد الســاعه 6 ونص , طحت على شبريتي وقبضت كيمرتي أطالع الصور ..
مرن عليه صور مــحمد , دمعت عيوني وأنــا أشوف صوره ..
كم أشتقت له ..
في ها الايــام صدق نسيته , حتى أني مارمسته من ذاك الــيوم ..
بــعد ماكانت علاقــتي بمحمد احــسن علاااقه في ها البيت أستوت أخس وحده ..
مسحت دموعــي وانا أردد في نفــسي : لــزم أتخلص من ها الحــب لاني بتعذب بسببه ووايد ..
وصلــت الســاعه 7 ونص , سرت وتلبست لبس المدرسه ...
وركــبت الســياره ورحت ...
أمتنحت الامتــحان , وانــا فرحتي ماتنوصف أن الامتحان كان سهل وشكلي بيب درجـــه كامــله فيه ..
رديت معا الباص ها المره , لان كــل البنات كانن متيمعات وبيردن مع البــاص واجبرني أرد معاهن ...
وصــلت البيت وانــا فرحــانه حدي ..
عقدت حواجبي وأنا أشــوف سياير وووايد متيمعه جــدام بيتنا ..
نــزلت ودخلت من البــاب الخلفي ..
دخــلت الــصاله , أســتغربت وأنــا أشوف حريم لبسات أســود , والجوو كان حزين , ويصيحن بــعد ..
خوف فـــــضيع حل بي , وانــا أطالعهن ..
شفت وحده متجهه صوبي وبتطلع من الــباب ..
وقفتها وقلت بخوف: شو مستوي ..
قالت بــحزن : فاطمه بنت سلطان توفت الله يرحمها..
قلت بصدمه : شووووو!!!!
نهاية البــارت العاشر
14-01-12, 01:50 AM
جديد مواضيع قسم القصص المكتمله من وحي قلم الاعضاء
العرض العادي
