يا لبيه يا الدنيا العجيبة ، للكاتبة : معاندة جروحي ..

يالبيه يالدنيا العجيبه ( 1 )

ام تركي وهي تبخر نادر:ماشاءالله كنك المعرس
نادر:واحلى بكثيييييير من المعرس
ام تركي:مااااادح نفسه
نادر:ههههههه كمليها كذاب
ام تركي: لا محشوم وليدي ابسحبها
نادر بمزح:اششوا بغيت اهون عن الروحه
ام تركي تحط المبخره ع الطاوله وتضحك
ام تركي:بعد قليبي مايتم شي الا بوجودك..
الا تعال خواتك تأخروا في المشغل نبي نروح الصاله ماصارت
نادر:دحوم راح ياخذهم وبيوديهم القاعه من هناك
ام تركي:اجل استعد ابيك توديني
نادر:ابشري يلا حتى ابوي ينتظرني برا
قال اوصله لان زي مانتي عارفه مايشوف بالليل
ام تركي:لحظه خل تركي ينزل ابخره واقرا عليه فديته معرس
اكيد العيون كلها عليه
نادر:شين الحلايا من زينه
ام تركي تضحك:شين الحلايا هاه قول غيران
نادر:هههههههه لاوالله مو غيران هو من السابقون
وانا باذن الله من اللاحقون
ام تركي ترفع ايدها:الله يوفقكم ياعيالي واكحل عيوني بشوفة عيالكم
نادر يحب راسها:الله لايخلينا منك يمه ويطول عمرك
وتشوفين عيال عيالنا
ام محمد:الله يرضالي عليكم

نزل تركي لابس ثوب وغتره كان طويل وعريض
وابيضاني و وسيم بما تعني الكلمه
وكان البشت في يده مالبسه

ام تركي:بسم الله تبارك الرحمن تعال ياقلب امك ابخرك
تركي واضح عليه الضيق:يمه لا مابي ماله داعي
ام تركي:هو وش اللي ماله داعي..اقرب بس ابخرك وتمسك المبخره وتبخر غترته
تركي كح:يمه خلاص اختنقت
نادر:ياشين الدلع ع الشياب
ام تركي: الغيره وماتسوي
نادر:هههههههههه يمه شفيك ماسكه ع الغيره
تركي ماسك الصمت
ام تركي:عشانه بيعرس وانت بتقعد عندي ابكرفك مشاوير بدال هالسايق..
نادر:والله على راسي لو تبيني اشتغل خدام عندك ما اقول لا..
والجنه تحت اقدامك يالغاليه

ام تركي:بعدي والله انك قدها.. وان شاءالله ازوجك ست البنات
نادر: ايه يمه وابيها مثل جوري الكل يمدحها
تركي طالعه:من يمدحها؟
نادر:عماني يمدحونها.... والكل اصلا طايح مدح في اخلاقها..
والله مافي واحد منهم الا ويثني عليها.. الله يوفقك تروك معها
تركي مشمئز: خذها تبيها
نادر انصدم من رده

ام تركي:تركي استح شوي وش هالحكي جوري اليوم عرسك عليها
تركي:قمة القرف والله لو علي ما اخذها لو بريال بس ما اقدر اخالف رغبة الوالد
ام تركي عصبت:انت متى تعقل وتغير نظرتك
نادر:تروك كلامك كبير وشفيك ع البنت ترا خلاص صارت زوجتك
لك شهر مملك عليها واليوم زواجك يعني لازم ترضى بالامر الواقع وتأقلم نفسك
تركي متنرفز: اكرهها

انصدموا من كلمته.. هم عارفين موقفه منها وانه مايبيها..
بس توقعوا خلال الشهر اللي ملك عليها انه تغير وتقبل الموضوع اثاريه على نفس وضعه

ابو تركي اللي توه داخل:كرهتك هدومك قل امين
ام تركي:ابو تركي؟؟ من متى انت هنا
تركي تغير وجهه 180 درجه
ابو تركي:من حزة ماقال هالفاهي اكرهها
تركي:يبه لو سمحت ماني ف...
ابو تركي:اسسسكت ولاحرف والله ياجوري ماراح تلقى مثلها..
وانا ماتخيرتها لك الا اني واثق انها بتعقلك ياخبل

تركي:لاحول ولاقوة الا بالله يبه انت وش قاعد تقول وش خبل
نادر يأشر له بعيونه يعني اسكت خلاص لاتكبر الموضوع
ابو تركي عصب اكثر:وستين خبل والا احد يعاف جوري؟!
ام تركي:هدي نفسك ابو تركي مو زين عليك الانفعال
ابو تركي:شوفي كلام ولدك احد يسمعه وماينفعل
تركي ماسك اعصابه: والله عاد انا ما ابيها
وماخذيتها الا عشان البي رغبتك وما اطيح وجهك قدام عمي ابو طارق

ابو تركي:تخسسسى وتعقب تطيح وجهي
نادر يمسك ابوه:يبه واللي يعافيك لاتنرفز عمرك قلبك ضعيف لاتخلي اي شي يوترك
وماراح يصير الا كل خير..
ويطالع تركي:الله يساحمك ياتركي خربت علينا فرحتنا
ام تركي تمسح دموعها:لاحول ولاقوة الا بالله والله كنت داريه بتسوء الاوضاع
تركي حس بالندم حب راس امه:حقك علي يمه
ام تركي:الله يصلحك بس

وجا يحب راس ابوه
ابو تركي:وخر عني ماني راضي عليك
تركي ماسمع الكلام وحب راسه وشال يدين ابوه الثنتين وباسها
تركي:والله يبه اني ماوافقت الا طلب لرضاك ..
والله العظيم لو ماهمني رضاك يالغالي كان ماسمحت لك تجبرني على الشي
اللي مفروض ماانجبر عليه والا انا اقدر اعارض وما اطيعك

وكان من زمان هجيت اي مكان بس ضحيت في سبيل رضاك اللي من رضا ربي..
وطلع بدون مايسمع اي كلمه

ابو تركي كان داري انه صادق لان تركي الشي الوحيد اللي يهمه في الحياه رضا امه وابوه..
ومايقدر يخالفهم لو على حساب نفسه..
ابو تركي هديت اعصابه قدر تركي يمتص غضبه:الله يهديك ياتركي
نادر:يبه لاتضيق صدرك مصيره يرضى بالامر الواقع..
لاتكدرون خواطركم افرحوا وطالع ساعته:وشكلنا تأخرنا حيل يلا نمشي
ام تركي:اسبقنا ع السياره هالحين نجي
نادر:طيب وطلع لسيارته
ام تركي تطالع زوجها:والله يا ابو تركي خايفه عليه
ابو تركي:وش تخافين منه انتي بعد
ام تركي:انت غاصبه ع الزواج.. وشينه الرجال ينغصب
ابو تركي رجع عصب:وش تقولين انتي.. هذا مايعرف مصلحته
الظاهر قدر يأثر عليك هالتريك
ام تركي :انا ام واحس ..تركي مايبي جوري ..
حتى نفسيته تغيرت وين مزحه معنا.. وين تنكيته مع اخوانه وخواته ..
الابتسامه من زمان ماشفتها بوجهه.. الولد مايبيها..
عمر الزواج ماكان غصب..حرام عليك يا ابو تركي اللي سويته فيه
ابو تركي:لطيفه لاتختبرين صبري والا بيصير شي عمرك ماشفتيه
ام تركي سكتت مو خوف بس ماتبي تضيق صدرها
في يوم زواج ولدها اول فرحه له

...................................

تركي كان جالس في الخيمه
مايقدر يسوق بهالحاله ضايقه فيه الدنيا
حاس انه مخنوق دق جواله وبنبرة حزن
تركي:هلا
رشا تبكي:مبروك حبيبي
تركي:حياتي واللي يرحم والديك
لاتعذبين قلبي كفايه اللي انا فيه

رشا تمسح دموعها وتعدل صوتها:بعذري ياتركي انا اليوم بفقدك للابد
تركي عصب:وش تقولين انتي..صاحيه والا انهبلتي
رشا: هذا الواقع..انت اليوم بتكون لجوري

تركي:اسسسمعي انا لك بلحالك ..
عمري ماكنت لغيرك عشان اكون لوحده مثل جوري
رشا ساكته تصارع العبرات اللي خانقتها
تركي:حياتي ارحميني تكفين انتي داريه لوما ابوي ماخذيتها
رشا:ادري
تركي: وانتي بعد لك يد في هالزواج
رشا: انا؟؟
تركي: ايه انتي..
والا كم مره قلت لك بجي اخطبك وانتي رافضه
رشا:تركي كنك ناسي المشاكل اللي بين ابوي وابوك
تركي: وش علينا منهم كان تزوجنا وحطيناهم قدام الامر الواقع..

رشا: ماترضاها لي انا بنت ناس وحموله اطيح وجه ابوي بهالطريقه..
انا بنت مو مثلك رجال ماحد بيلومك
تركي: يعني يرضيك اللي انا فيه؟
رشا: والله مايرضيني واني اتعذب اذا فكرت انك لغيري
وبتكون معها تحت سقف واحد
تركي:اووووووووووهووو كم مره اقول لك اني مستحيل اكون لغيرك
رشا:حبيبي هدي نفسك
تركي يتنهد: كيف اهدا كيييييف
رشا تقاطعه:تروك احبببببببك
تركي غمض عيونه هذي هي الكلمه اللي تريحه
وبالذات من حبيبة قلبه رشا: وانا اموووت فيك
رشا: عاد الحين اخليك بروح انام حاسه بارهاق
تركي:نوم العوافي.. لاتقفلين جوالك اذا رجعت بدق عليك
رشا: مو بتكون معها شلون تدق و...
تركي: ماعلي من احد بدق عليك
رشا:بس...
تركي:لاتبسبسين انتهى النقاش
رشا:زين
تركي:يلا مع السلامه وقفل
دخل نادر:وش مقعدك هنا؟
تركي كان مرجع راسه ورا:ارتاح شوي
نادر:يلا قوم قدامي الحين ماشين
تركي:بلحقكم بسيارتي
نادر ماحب يضغط عليه:اوك


..
..
..

في القاعه

طارق:وجع كل ذا حلا.. اهب ماخلت لنا شي
شافطه الحلا شفط

ام طارق:حسبي الله على ابليسك اذكر الله
وجع يوجع عدوك

طارق:هههههههههه والله يمه بنتك قنبله كل
الجمال راح لها

ام طارق:ياويلي بينظل بنتي خمسه
وخميسه طارق وبعدين معاك..قول ماشاءالله

طارق:ماااااااشااااااءالله تباااااارك الرحمن

جوري كانت سرحانه تحس نفسها عايشه بحلم.. ماهي مصدقه انها بتصير مع تركي في بيت واحد.. تركي اللي كل البنات عليه واللي مطنشهم اختارها هي زوجه من بدهم.. وودتها افكارها للمدى البعيد ..وبنت لها مملكه تضمها هي وتركي وعيالهم.. وودتها افكارها لأبعد مايكون انها بتسمي البنات وهو الاولاد..

طارق:هيييه انتي ياللي تفكرين

جوري صحت من احلامها:هلا وش فيك

طارق:اللي ماخذ عقلك يافووولاه

ام طارق:شففف اقول طارق يلا برا..

طارق:ههههههه يمه وش فيك بقعد شوي

ام طارق:لا شوي ولاغيره ..يلا برا بسرعه
الحين بيجون بنات عمك

طارق يستهبل ويعدل جلسته:اجل زين خل
اقعد اسولف معهم

جوري:ههههههههه

ام طارق طفح كيلها بس ضحكت:وين
جوالي بدق على العيال اجل تبي تقعد
تسولف مع خواتهم هاه

طارق:هههههههههههههههه ياحبي لك يالغلا تهددين خلاص طالع... وطلع

جوري:والله بفقده هالادمي..

ام طارق:والله حنا اللي بنفقدك امس بعد مانمتي سوينا مناحه وبكينا انا وابوك وريم وطارق وخالد على فراقك

جوري دمعت عيونها..
ام طارق:لالالا ما اتفقنا على كذا لاتخربين مكياجك..
انا بس اقول لك عن كبر محبتنا لك وبنفقد وجودك وحسك بيننا

جوري:والله يمه حتى انا بفقدكم ماني
متصوره بفارقكم

ام طارق تضم بنتها:هذي سنة الحياه البنت
تتبع زوجها لو المريخ

جوري:يمه ما ابي اسافر بقعد عندكم

ام طارق تبتسم:اجل وش استفاد تركي...
لايمه ماينفع انتي عارفه الاتفاق في العايله.. كل واحد من الشباب يسافر لمدة 3شهور برا.
والحين دور تركي وابوك وافق يعجل بالزواج عشان تروحين معه ..
خليك معه في ديار الغربه عون له وانسيه وعوضيه غيابه عن اهله ..واتوقع منه نفس الشي بس ها ما اوصيك ابيك ت....

جوري:هههه يمه والله حفظت اسطوانتك خلاص
ام طارق تضحك:الله يوفقك يابنتي

ودخلت اختها ريم وبنات عمها دانه ونوف وساره
جوري شافتهم ارتاحت
ام طارق:بنات لاتصيفون هنا وتخلون المعازيم
البنات:انشاءالله
دانه تبوس جوري:مبروك حياتي
جوري:الله يبارك فيك عقبالك
نوف:وعقبااااالي
جوري تستهبل:لا انتي مو لازم
البنات ضحكوا
نوف:يانذله جد جد نذله

جوري:هههه لا امزح عقبالك وعقبال دانه
وريم وساره وندى بعد

ساره تأشر على خاتم في اصبعها:اميييييين

نوف:ع الاقل انتي متملكه ضامنه عمرك
لكن انا ودانه وريم وبنت عمي محمد ندى مالت على حظوظنا بس يالله هانت ..
منى وخذت فيصل اخوي وانتي وساره خذيتوا اخوان الدور والباقي علينا..وترفع ايدها :يااااااااارب اوعدنا

ريم:تكلمي عن نفسك انا مابي زواج بكمل
دراستي

نوف:جوري اسمعي اختك وش رايك باللي تقوله
جوري:والله اتوقع هالشي ريوما دافوره وتحب الدراسه زي خالد تماما

ساره:ماعليك منها لو يطق الباب شطبت على ابو الدراسه هههههههه
اسأليني انا ولو ما دحوم قال ابيك تكملين
دراستك كان ماكملت

ريم:بكل بساطه لانك فاشله

ساره:شف الخايسه انا بنت عمك واكبر منك
احترميني وجع
ضحكت ريم عليها

جوري:كل وحده مصيرها تتزوج ان شاءالله
نوف:الله يسمع منننننننك
دانه:وجع وش مشفوحه عليه انتي
نوف:ابي استقر واسوي كل شي خاطري
فيه.. وابي الدلع والدلال
دانه: والله يا ان ابوي وفيصل وحمد مدللينا
ومدلعينا

جوري:ولايهمك نوف مالها الا طارق اخوي
يطلق سراحها

ساره:وشو تهج معه يعني والا تهج معه
جوري تطالع نوف:تهج بالحلاااال

نوف تغير لونها
والبنات ضحكوا على شكلها

دانه:مو توك تتمنين.. هذا وهو ريحة كلام
اختبصتي اجل لو جد وش بتسوين؟
نوف زاد حمار وجهها:اقول انكتموا ويلا نزلنا
خالتي قالت لاتتأخرون

ريم:هههههههه ليتك تشوفين وجهك بالمرايا
نوف قامت:انا نازله ..وطلعت من الغرفه

دانه:فديتها اختي استحت وهي مزحه
جوري:لاياماما مو مزحه
دانه:اجل؟!
جوري:لكل حادث حديث وصرفت الموضوع
الا وين منى وندى

ساره:قبل شوي دق علي دحومي وقال راح يجيبهم من المشغل

دانه تطالع جوري:دبلت كبودنا دحومي ودحومي اجل كلها كم يوم وتنادين تركي
تروكي زي هالخبله

ساره:زووووجي حلااااالي يانااااااس
ادلعه بكيفي

جوري:وهي صادقه اذا مادلعناهم ندلع مين
دانه:الله يعين الاخوان عليكم يلا يلا ننزل
بقوه صيفنا
ساره:ايه يلا
وتلتفت على جوري:اقول جوري قلبو
جوري:هلا
ساره:فديتك اقري الاذكار وتحصني زين
الناس ماتعطي خير
لان جوري فعلا كان شكلها رووووعه

دانه:اي والله جد طالعه خيال ماشاءالله..
اقري لين تجي وقت زفتك والا اخلي خالتي
تجي تحصنك

جوري: هههه لا انشاءالله انا بحصن نفسي

.......................
تركي لابس البشت وقاعد بالوسط
كان رزه ويدوخ من وسامته
بس خرب عليه انه باين عليه التوتر والضيق
اللي فسرها البعض بالارتباك من الزواج
ومنهم ولد عمه فيصل

فيصل:مرتبك الاخ؟!
تركي بدون نفس:جايز
فيصل:خلك طبيعي وكل شي بيكون تمام
تركي:انشاءالله
فيصل مبتسم:ماتبي نصايح؟؟
تركي رد له ابتسامه باهته:اتحفنا ..
فيصل:احذر غضب الليديز الله لايوريك ناااار
تركي وعلى ثغره شبح ابتسامه يالله طلعت
شكل اختي موريتك العين الحمراء
فيصل:ههههههه شف ...
تركي:انا ادري عنك

فيصل:والله ياتركي مو عشانها اختك ..منى ماشاءالله عليها
متفاهمه لابعد درجه ماقد شفت منها شي..
عشان الزوجين يكسبون بعض
لازم يكونون متفاهمين وهذا اللي طبقناه انا ومنى

تركي:اجل ليش تقول احذر غضب السيدات
فيصل:امي الله يطول في عمرها ويهديها
انت عارفها مايحتاج اشرح

تركي:تعلمني في خالتي حصه الله يخليها
لكم بس

خالد اللي توه جا:فيصل عمي ابو طارق يبيك انقزله بسرعه...وقام فيصل

خالد يكلم تركي:ياخي نكد الاعراس
والله من الصباح واقف وفيني نوووووم

تركي:هانت مابقى شي وكلن بيروح على
بيته سيدا... ونام لين بكرا

تركي جت عينه في عين ابوه اكثر من مره
وكان يتحاشاها

خالد:ورا عمي يطالعك كذا وبمزحه:لايكون
غاصبك على اختي هههههه

تركي حس بتأنيب الضمير وكسر خاطره
خالد اللي قال الكلمه مزح وهي صحيحه
مليون بالميه.. بس هو فعلا مغصوب
وصعب يجبر قلبه ونفسه على انسانه مايبيها
وابتسم يصرف: لا شدعووه

تركي شاف عمه ابو فيصل جاي يسلم عليه
وقف حب راسه

ابو فيصل:مبروك تركي والله يرزقك الذريه
الصالحه
تركي متشائم من هالدعوه بس مابين:الله
يبارك فيك ياعمي

ابو فيصل:خويلد وش مقعدك هنا؟
خالد:بس برتاح شوي
ابو فيصل:لا ابو اشكالكم يبون يرتاحون يلا
قوم
خالد:هههههههه زين زين ..وقام
ابو فيصل:وين دحيم للحين ماجاء

تركي يطالع ورا عمه:هذا هو وراك جا
التفت ابو فيصل لعبدالرحمن وأشر على ساعته:شايف الساعه؟!

عبدالرحمن يسلم عليه:والله ياعمي حايس مع خواتي توهم يخلصون من المشغل

ابو فيصل:اها طيب يلا قوم بالواجب مع
الشباب..

عبدالرحمن ابشر وشاف عبوس تركي وسوا له حركه بمعنى ابتسم وافردها...وراح
جا نادر
ابو فيصل:شف هالعيال نقول لواحد قوم يجي الثاني يجلس.. يلا نويدر قوم مافي
قعده لين يروح المعازيم

نادر:ههههههه والله ياعمي رجولي تخدرت

ابو فيصل:مثلك مثلهم يلا قوم انا رايح الحقني

ابو فيصل هو الكبير عياله
''فيصل وحمد وساره ودانه ونوف''
وابوه ترتيبه الثاني عياله''تركي عبدالرحمن ومنى ونادر وندى''
وبعده ابو طارق عياله''طارق وخالد وجوري وريم ''

نادر جا يروح وتذكر:اووووه نسيت تروك
جهز نفسك يبونك تدخل

تركي ضاقت فيه الدنيا:نادر دق على امي
ابيها..
نادر:طيب.. ودق
ام تركي:هلا نادر
نادر:يمه تركي يبيك.. وعطا تركي الجوال
تركي:يمه
ام تركي:هلا بالمعرس
تركي:متضايق يمه والله بنفجر
ام تركي:عطني نادر شوي
تضايق تركي من الحركه:طيب
نادر:سمي يمه
ام تركي:جيب تركي الحين زفته
نادر:يمه بندخل معه ترا
ام تركي:داريه بس قبلها ابي احاكيه بروحه
جيبه من المدخل الصغير
نادر:وهو كذلك

وراحوا مدخل القاعة من ورا وشافوا امهم
واقفه

نادر:هذا هو ولدك دقي علينا اذا جا ينزف
لاتنسين
ام تركي تأشر على عيونها

مسكت ايد تركي ورقت الدرج ومشت معه
غرفه فاضيه جنب الغرفه اللي فيها جوري
بلحالها
دخلوا الغرفه وقعدوا جنب بعض
ابتسمت له ومسكت ايده وايدها الثانيه على
صدره وقعدت تقرا عليه
خلصت:ع البركه وليدي
تركي ساكت يطالعها
ام تركي فهمت النظره:حبيبي انت تعرف لو
كلنا نعارض هالزواج ماراح احد يقدر يلغيه
تركي بقق عيونه

ام تركي ابتسمت كثير:تدري ليش؟؟لانها
مشيئة الله.. الله مقدر لك هالشي
تركي:يمه ا..

ام تركي تقاطعه:عارفه وش بتقول والله
ياقلب امك اني ماني راضيه باللي سواه
ابوك.. بس صدقني ابوك ماهو الا سبب في
اتمام هالزواج والا ربي خلاص كاتبه عنده
انك بتاخذ هالانسانه.. فما اشوف له داعي
تضيق صدرك.. توكل على الواحد الاحد
ولاتسخط فديتك.. والله لو ادري ان السخط
والضيقه بتلغي كل شي كان ماشفتني الحين
مبتسمه قدامك..

تركي كأنه مصدع مسك راسه
وقفت ام تركي ومسكت راسه وبابتسامتها
المعهوده:صدعت من كلامي؟

شال تركي ايدها وباسها ورد لها ابتسامه
طالعه من قلبه:يابعد قلبي يمه كلامك
ريحني كثير بس!!
وأشر على مكان قلبه بمعنى وش يسوي بقلبه مايبيها

ام تركي:تروك ترا جوري والله ماشفت مثلها
والله تنحب على طول ..وكلنا نحبها وبالذات
انا والله ياحبها في قلبي يوازي حبي لكم
ومع العشره بيروح الكره اللي ضامره لها وانا متأكده هالكره اللي تحسه تجاهها سببه
ابوك اللي اجبرك عليها وهالشي خلاك
تحس بنفور منها..بس صدقني مع العشره
بيختلف الوضع وتقول امي قالتها

تركي كل حرف من كلام امه انساب على صدره وخلاه يرتاح شوي''الللللله امي ذي تنحط ع الجرح يطيب'':الله يخليك لي يارب
ام تركي:ويخليكم لي

.......................
البنات يرقصون ومستانسين ماخلوا اغنيه ماطلبوها..
منى:ياحظكم ترقصون.. وتطالع بطنها

دانه:اكيد حنا رشيقات مو مثلك برميل..هههههه برميل خانم

ندى:بسم الله عل اختي لايطيح اللي في
بطنها

دانه:يمه فديته ولد اخوي انشاءالله مايجيه
شي

منى:كشششش عشان ولد اخوك والا انا
في قريح

دانه:هههههههه لاااااه كلكم عينين في راس

ام طارق:منى امك وينها مابقى شي ع الزفه
منى:تو كلمتني قاعده مع تركي
ام طارق:طيب حبيبتي كلميها الحين بنزف جوري
ندى:انا انا اللي بدق
ندى:الو يمه
ام تركي:ها نداوي
ندى:خالتي ام طارق تقول تعالي بنزف جوري
ام تركي:هذاني جايه
..........................

جوري اللي كانت وحيده وخايفه بالغرفه
كانت تبي امها والا اختها معها .. بس شلون
تناديهم.. سمعت صوت ام تركي شافت انها
فرصه تقول لها تبلغ امها او ريم انها تبيهم.
طلعت بس ماشافتها.. مشت في السيب وين
راحت خالتي.. سمعت صوتها جاي من
الغرفه اللي جنبها
راحت تشيل فستانها جت بتطق الباب
سمعت صوت ام تركي
لان الباب كان مردود:
(((تروك ترا جوري والله ماشفت مثلها والله
تنحب على طول وكلنا نحبها وبالذات انا..
والله ياحبها في قلبي يوازي حبي لكم.. ومع
العشره بيروح الكره اللي ضامره لها وانا
متأكده هالكره اللي تحسه تجاهها سببه
ابوك اللي اجبرك عليها وهالشي خلاك
تحس بنفور منها..بس صدقني مع العشره
بيختلف الوضع وتقول امي قالتها)))
رجعت الغرفه مثل الريح حست زي
المطرقه هوت على راسها وصحتها من
احلامها اللي بنتها من يوم ملك عليها ..حست
كأنه مقص قص كل رسمه رسمتها لمملكتها
''يالله معقوله اللي سمعته تركي مايبيني لا
وغصبه عمي علي..ليش ياعمي ليش.
علشان كذا طول فترة الملكه ماقد كلمني
ولاحتى زارني.. وش اسوي وش اسوي اقول
لمين اشكي لمين''
قطع تفكيرها دخول امها

ام طارق والفرحه مو سايعتها:يلا جوري زفتك
جوري تطالع امها والدموع اربع اربع

ام طارق:ياويلي وش تسوين انتي
وجوري زادت دموعها
ام طارق:ياخبله حستي مكياجك

جوري كانت بتصرخ باعلى صوتها وتقول اللي ماااااايبيني ما ابييييييييه بس فرحة امها
خلتها تتراجع ..حرام تقتل فرحتها وفرحة
الجميع اللي كانوا مستانسين ومسكت نفسها
عن البكى

ام طارق:لاتخافين كل يوم بنكلمك ماراح
تحسين انك فارقتينا
جوري تهز راسها

ام طارق:وبسك صياح.. زين ان الكوفيره لسه هنا تعدل هالحوسه


نهاية البارت

..
..
..

يالبيه يالدنيا العجيبه
.......................
زفوا العرسان جوري كانت في قمة الاناقه
والجمال وكانت ملكة الحفله باطلالتها وكان
تركي عابس وحاس بنفور منها صح جوري
كانت جميله جمال طاغي بس ماقدر يتقبلها
وهذي ثاني مره يشوفها المره الاولى كانت
النظره الشرعيه اللي اصر عمه ابو طارق
عليها والمره الثانيه الحين قدامه اما الملكه
فتحجج تركي انه كان منوم بالمستشفى
بشهادة بعض من اصدقائك ونادر اللي
غطى عليه

جوري كانت في عالم ثاني مافي الا هي
والحزن بس حز في خاطرها وصعبت عليها
نفسها ان الكل يتمناها ورفضت الجميع
ومارضت الا بالشخص اللي كارهها
ومايبيها''الله يسامحك ياعمي''
تركي طول ماهو قاعد مطنشها ولاحتى قال لها مبروك

ندى شافتها فكسرت خاطرها هي عارفه
موقف اخوها من زواجه منها قالت لها في
اذنها:حبوبه لاتزعلين ترا هذا طبعه دايم ساكت وكتوم عاد انتي وشطارتك تغيرينه..

ندى عارفه في قرارة نفسها ان تركي
ماصار كذا الا من بعد المشكله الاولى اللي
عرض فيها ابوها عليه انه يخطب له جوري
وبعد جزر ومد وافق عشان يرضيه ..ومن
بعدها انقلب حاله وصار حزين وقليل الكلام
وعلى اتفه شي يعصب وعازل نفسه.
جوري كانت تحس نفسها زي اللي
يستغفلونها على بالهم انها مادرت انه
مغصوب

وكانت طول الوقت تفكر حتى اخوانها وعيال
عمانها وعمانها دخلوا من غير ماتحس كل
اللي حست به يوم تغطيها امها بالطرحه
ويوم تشيلها ثاني مره..

تركي:يمه

ام تركي:هلا

تركي:خلاص بمشي

ام تركي مبتسمه:زين امسك ايدها ويلا توكلوا

تركي تأفف :مو لازم امسكها

منى:اصصص صاحي انت لاتسمعك لاتفشلنا يلا خذ مرتك

ياكثر ما انصدمت اليوم كانت تسمعهم وهي
ساكته.. كان ودها ترتمي في حضن امها
وتبكي.

مسك ايدها وطلعوا وتوجهوا للفندق
والكل راح بيته
.......................
فيصل يطالع منى اللي واقفه عند التسريحه
كان شكلها يجنن بالحمل

منى تطالعه في المرايا:شكلي بايخ صح..

فيصل:من قال؟؟

منى:دانه عقدتني اليوم تصدق تقول لي برميل

فيصل:ههههههههههه والله انك تهبلين ماعليك
منها.. ها واستانستي؟؟

منى:حيل بس كان ودي افلها وارقص مع
البنات كل اغنيه رقصوا عليها

فيصل:قد شفتي عروس تفلها وكل اغنيه
ترقص عليها؟؟

منى:حبيبي ما اقصد جوري ..انا اقصد نفسي
قام فيصل لعندها وحضنها من ورا وهمس
لها في اذنها: داري تقصدين نفسك بس انا
اسألك قد شفتي عروس تفلها وكل اغنيه
ترقص عليها؟؟؟

منى تمسك ايدينه اللي لافها عليها وحاطها على بطنها: امممم لا

فيصل بكل حنان:اجل شلون تبين تفلينها
رقص.. اليوم انتي العروس في عيني.. وكل
يوم اعتبرك عروس

منى بدلع وتغمز له في المرايا:اكيد
لفها فيصل له:اكيدين ياروحي انتي ...ولفها
عليه وجا يضمها
منى:اااي بطني

فيصل نزل لمستوى بطنها وسوا نفسه
معصب:الحين انت متى بتطلع حتى ضم
ماصرت اضمها زي الناس

منى ماتت ضحك عليه:حرام عليك

فيصل مسك ايدها:وش اسوي مشتاقلك
حييييل.. اذا ولدتي بخليه عند امي والا امك
ونسافر

منى:يمه واخليه
فيصل:هذا بلا ابوك ياعقاب عزالله
بتجطلوني انت ولدك ورمى نفسه ع السرير

منى قعدت جنبه:ههههههه لاعاد محشوم
بس هذا ضناي

فيصل اتكى على ايده: انا غلطان خليتك ام

منى تغير وجهها وحمر حست باحراج

فيصل فاطس عليها قام باس خدها: الله
لايحرمني منها الخجلانه

(فيصل ومنى لهم متزوجين 8 شهور وهي حملت في الشهر الثاني يعني لها 7 شهور حامل.. زواجهم كان تقليدي عن طريق الاهل بس حبوا بعض بعد الزواج ومنى بفطرتها الانثويه قدرت تتملكه وتكون المتربعه على عرش قلبه .. فيصل 28 ومنى 24 )
.......................

بعد مادخلوا الجناح اللي حجزه لهم ابو تركي
في افخم فندق
كانت الصاله كبيره فيها مطبخ تحضيري
مكشوف كان ع الطاوله انواع الاكل..راح
تركي يشوف الاكل ماجاز له فتح الثلاجه
اخذ عصير وجلس ع الطاوله يشربه
وماكلمها بكلمه..

وبعدها دخل غرفة النوم اللي كان فيها
سرير كبير روعه وفيها حمام اخذ شور
دخلت جوري الغرفه غصبا عنها ملابسها وكل مستلزماتها اللي رتبتها الليله السابقه جوتها..

قعدت جوري على طرف السرير كانت
ملاحظه تطنيشه من دخلوا السياره اللي
بتجيبهم الفندق بس ماتوقعت بيطنشها لها
الدرجه وبالذات اذا وصلوا.. فصخت جزمتها
وقعدت تشيل البنس والفراتك اللي مثبته
التسريحه..

طلع تركي شافها قاعده في صراع مع
شعرها:اخلصي بسرعه بطفي النور نعسان

جوري ضايقها اسلوبه بس ماردت

انسدح وعطاها ظهره وغطى نفسه وماعلق
خلصت وحمدت ربها انه معطيها ظهره
عشان تقدر تتخلص من فستانها الكبير.طفت النور ..

وراحت اخذت لها شور سريع طلعت كانت
لابسه بجامه شورت بنك وشافت عيونه
تطالع السقف اول ماشافها طلعت رجع
لوضعه الاول عطاها ظهره.. جوري تحس
بألم من حركاته ..جففت شعرها بالمنشفه
وراحت تنام جنبه مع انها ماتبي وكان بينهم
مساحه كبيره غطت نفسها وعطته ظهرها

تركي:الغطا مايكفينا خذي غطى ثاني

واصلا الغطا كان كبير حيل بس مايبي يكون
معها تحت غطا واحد

انقهرت بس كتمت قهرها''هين انت و
وجهك'': طيب

وقامت دورت غطا مالقت شالت عبايتها
وراحت الصاله كان في كنبه كبيره انسدحت
وغطت نفسها بالعبايه وفتحت جوالها وتجي
الرسايل دفعه وحده من صديقاتها تهاني
وتبريكات وتريقه

تركي:افففف ترا بنام لا اقوم اكسر جوالك
الحين

جوري ماتحملت.. نرفزها اسلوبه: الله يعينك
ع الخساير بتجيب واحد ثاني

تركي بقق عيونه وراح لها كانت منسدحه
ولاهمها شي:وش قلتي

عطته ظهرها:مو وقتك الحين فيني نوم
جرها من ايدها ووقفها

جوري:هييييه انت عورتني

تركي فك ايدها: وش قلتي

رجعت تقعد ع الكنبه وتتحسس ايدها
وبنظرة تحدي: اقول الله يعينك ع الخساير
لانك لو تكسره بتجيب لي واحد ثاني

تركي متفاجأ هذي اللي يقولون عنها طيبه:
وبعد تتحدين ولسانك وش طوله ..طلعتي
حيه من تحت تبن

جوري استجمعت قوتها هي لازم تكذب عليه انها هي بعد مغصوبه ماتبيه وانها
تكرهه وابوها جبرها عشان ماتحس نفسها
ذليله فقالت بهدوء: مادمنا لحالنا قول اللي تقوله ماتفرق عندي..

بس اتمنى هالاكشن مايحصل قدام اهلي..
انا تهمني سعادة اهلي وبضحي عشان
يشوفوني مستانسه حتى لو مثلت هالدور..

تركي:وش قصدك؟؟

جوري دق قلبها هي دايم كذا اذا جت تكذب
بس استقوت: يعني ماتدري اني اكره ماعلي
في هالكون انت.. وان ابوي جبرني عليك

تركي استصعب الموضوع ماتوقع هالشي
ابد..

جوري:ليش انصدمت عادي حتى انت
مغصوب علي على بالك ما ادري.. ليش
نلعب على بعض مادمنا بروحنا ..انا عن
نفسي قدام اهلي بمثل دور السعيده بصير
زي الشمعه اللي تحترق عشان تنور لغيرها
وتخليهم مستانسين.. وانت بعد من الافضل
تسوي كذا مو عشان احد عشان اهلك
وبالذات عمي اللي قلبه تعبان والا لو علي
تراني شاريه فرقاك اليوم قبل بكرا

تركي كان وده يعطيها كف بس هو ضد
ضرب المرأه احسن شي يهددها:جوري ولعنه وقسم بالله لا احوسك واقص لسانك

تركي كان حاس بالنقص ..هو اللي البنات
يبون اشاره منه وتجي هذي عكسهم تكرهه
والادهى مغصوبه عليه..

ماحبت تزيد الوضع سوء:طيب ممكن انام
عاند وفتح التلفزيون وخلاه اعلى صوت يبي
يزعجها ولقاها فرصه عشان يكلم رشا
بدون ماتسمعه لان مايبيها تكشفه وتعلم
اهله وراح للسرير

لفت ع الكنبه وتدفت بعبايتها وفي
سرها''الله يشفيك'' عدلت منبه جوالها ع
صلاة الفجر ونامت

دق تركي على رشا رابع رنه ردت بصوت
مبحوح:هلا حبيبي
تركي:نايمه؟؟

رشا:لا صاحيه بس ماتوقعتك تدق

تركي:يعني تحسبينها كذبه يوم اقولك بدق

رشا:لا حبيبي بس انا عارفه الوضع و....

تركي:ريوشه حبيبي لو يحطون العالم بكفه
وانتي بكفه رجحت كفتك..

رشا:طيب وينها؟

تركي:منهي..؟

رشا:المدام

زفر تركي زفره طويله: كرشتها الصاله

رشا:جد

تركي: قلت لك انا اذا ماكنت لك مستحيل
اكون لغيرك

رشا:الله لايحرمني منك ياتركي

تركي:ولامنك يا اغلى البشر.. حبيبي تعشيتي

رشا:مو مشتهيه

تركي:لا مايصير ابيك تاكلين وتتغذين زين

رشا: انت عارف اني ما اكل الا اذا دريت انك
اكلت.. فما ادري انت اكلت؟؟

تركي:صراحه لا بس شربت عصير برتقال..

رشا: حظ الكاس اللي شربت منه ..تدري لو
اشرب من نفس الكاس بنام مرتاحه..

تركي قعد: الحين بجيبه لك .. خلي السايق
يقابلني

ضحكت ضحكه عذبه:لا لا يامجنون من
جدك.. امزح

رجع انسدح: والله اسويها كم عندي ريوشه

رشا:ياااروحها

وتموا سواليف لين سمعوا صوت الاذان

رشا:اوووه خذانا الوقت معليش سهرتك
وانت تعبان و وراك قومه..

تركي بعذوبه:كلي حلالك..

رشا:طيب حبيبي خل نروح نصلي وننام..

تركي:طيب ابيك تنامين زين ولاتفكرين بشي
فكري بشي واحد تركي لك لوحدك..

رشا:لاتوصي حريص ..وقفلت
قام توضى وشافها تصلي وهو طلع المسجد


..
..
..

يالبيه يالدنيا العجيبه

الصباح الساعه9 يحترون جوري

خالد:والله البيت كئيب من غير جوري

ام طارق:فديتها الله يوفقها لازم نتعود

طارق يستهبل: اما نتعود يمه خلي تركي
يطلقها وترجع تعيش معنا..

ام طارق تضرب كتفه:اعووووذ بالله

خالد وطارق:هههههههههه

ريم نزلت:وش عند الثنائي ضحك مع الصباح

خالد:ابد طارق اقترح اقتراح ماعجب امي

ريم تصب لها قهوه وتقعد:وشووو

طارق:بما اننا فاقدين جوري اقترحت على امي تقول لتركي يطلقها

شرقت ريم في قهوتها:كحح كح كح
خالد مات ضحك

ام طارق:حسبي الله على ابليسكم..

ريم:وجعه لاعداكم انهبلتوا انتم..

طارق:صدق انكم مخفات يالحريم تصدقون اي شي.. طبعا ماعدا امي العزيزه

تبسمت ام طارق

ريم:يمه متى طيارة جوري وتركي

ام طارق: 12الظهر

ريم:يالله وللحين ماشرفت متى يمدينا
نسولف

خالد:يمديكم يمديكم لكن انتم يالحريم
قرقكم واجد

....................
تقلبت ع الكنبه جسمها يعورها
''هو مرتاح ع السرير وانا تكسرت عظامي من الكنبه''

تثاوبت وخذت جوالها تشوف الساعه:اووف
الساعه 9 ياالله تأخرت بشوف اهلي قبل اسافر..
راحت الحمام خذت شور نست ملابسها برا:يحووول شلون اطلع كذا والبجامه تغرقت مويه..

لفت جسمها بالفوطه وطلعت على روس
اصابعها ماتبيه يصحى ويشوفها بهالوضع
وصارت بنص الغرفه طالعت في الفراش
مافيه احد ''شكله نزل'' وجلست تدور ع الاستشوار تذكرت ان ريم حطته بدرج التسريحه..

وهي تفتحه حست بأحد واقف وراها
ورفعت راسها طالعت المرايا شافته واقف وراها..

تجمع الدم في وجهها وتسمرت اقدامها.
تحس بخجل مو طبيعي اول مره احد
يشوفها بها الوضع.. حتى ريم اختها ماقد
شافتها كذا تستحي..

تركي واقف يطالعها اخر شي مشى .
وجوري خافت ولفت له ومسكت بإحكام الفوطه ورجعت على ورا..

تركي ببرود واستحقار: لاتخافين ماراح
اوصخ نفسي وألمسك ومد ايده واخذ جواله
اللي كان ع التسريحه وراح..

قهرها برده قالت له: وانت تطول تلمسني

وقف مكانه والتفت بحركه آليه ضوق عيونه
واشر على اذنه: ياليت تعيدين لاني ماسمعت

جوري ماتت رعب وحبت تنهي الموضوع قبل
يصير مالايحمد عقباه ومشت تبي تروح
الحمام..

مسكها من زندها بكل قوته
جوري:آآاااااااااي

تركي: مو ترمين كلمه وتمشين ..اذا قلت
تعيدين يعني تعيدين..

حست جوري بحجم الغضب اللي كان فيه
لازم تهدي الوضع: كلمه وطلعت وانا
اسسفه ممكن تفك ايدي

حس انه انه انتصر ع الاقل اعتذرت: زين
انقلعي..

حست بالاهانه بس سكتت ..وعلى طول
راحت الحمام وبكت من الموقف.. حسسها
انها قذره حسسها باشياء كثيره.. اهمها انه
جرحها مهما كان هي انسانه وتحس.. اخذت
دش ثاني يطفي النار اللي تحس بها في
انحاء جسمها:والله ياتركي لا اخليك تندم والله بتندم..

استشورت شعرها ولفته كله في لفافات
عشان يبان مضبوط وخلتها في شعرها
لبست بجامه ساتره وطلعت من الحمام..
كان تركي ع السرير وبيده اللاب.. تجاهلت
وجوده وراحت التسريحه خذت عدة المكياج
وفتحت الدولاب وطلعت كيسه وراحت..

تركي كان ضغطه مرفوع وحس كراهيته لها
زادت بالذات بعد ماصارحته انها هي بعد
مغصوبه عليه واللي قهره اكثر كلمتها يوم
قالت اكره ماعلي الا انت واني شاريه فراقك
اليوم قبل بكرا..

طلعت جوري كانت فعلا جوريه انبهر
بجمالها بس رجع اشتغل ع اللاب وطنش اللي شافه ..

كانت قمة الانوثه كانت مذهله ماكانت تحب
الميك اب الثقيل لانها تعودت تكون اقرب
للطبيعه حاطه كحل خفيف وكثفت الماسكرا
وقلوس مايل للأورنج برز حلاوة شفايفها
وكانت لابسه فستان لونه بألوان الطيف
وقصير لتحت الركبه اكمامه جبنيز ومن عند
الصدر مزموم وفتحة الصدر نازله وتحتها
ورده كبيره لونها برتقالي ومن تحت واسع
ومزينه جيدها بعقد فخم..

راحت للدرج خذت صندل لونه برتقالي وقعدت ع السرير بحيث انها معطيته ظهرها لبست الصندل اللي اظهر جمال سيقانها..
فكت اللفافات وتماوج شعرها واصل نص
ظهرها وكان مدرجات ولونه اسود جنااااان
كان في قمة الروعه..

طالع شعرها عجبه منظره.. وقامت تدور
في شنطتها وطلعت كلونيا وبخت بختين..
لكن هالبختين داعبت خشم تركي وانهبل ع
الريحه قام يطالع يبي يشوف نوع هالكلونيا
لفت والتقت نظراتهم.. ارتبكت جوري

وماحست بنفسها الا وهي تقول:خير؟!!
ماتدري شلون طلعت منها هالكلمه

تركي عصب وكره نفسه''يعني حبكت
اشوف نوع الكلونيا ...الحين وش بتفكر وش
بتقول..اوووهوو تفكر اللي تفكر العين بحر''
قال بسخريه: ماناقصك الا السيرك طالعه
مهرجه..

جوري:اهاا حلو..طيب ياليت تبطل بحلقه
في المهرجه وتقوم تبدل لاننا تأخرنا اهلنا
يستنون..

تركي صار ضغطه اتش وده يقوم يخنقها.
جا بيتكلم بس انقذها منه جوالها اللي دق

جوري:هلا يمه

ام طارق:صباح الخير..

جوري:صباح الورد لأغلى ام

ام طارق:كيفها عروستنا؟

جوري:تمام وانتم

ام طارق:بخير منتظرينك تأخرتي..

جوري:ايه توه تركي يقوم يبدل

ام طارق:عطيني بسلم عليه..

جوري تعطيه الجوال

تركي:الو

ام طارق:هلا والله بتركي شخبارك يمه

تركي:بخير خالتي شلونك انتي

ام طارق:دامكم بخير فأنا بخير.. مو كأنكم
تأخرتوا واجد نبي نلحق نقعد معكم قبل
تسافرون

تركي:على امرك الحين جايين ..وقفل

رجع طالعها كانت تطالع اثار ايده اللي على
زندها واضحه

تركي:ترا مو كل مره بعدي اي شي تقولينه
احذريني ياجوري ..

جوري بكل هدوء: اوك من اليوم ابعرض
عنك وانت نفس الشي

تركي: ثالث اعيادي ..

حست بقهررررر فظيع دايم ردوده قاتله
بس ليش هي ماتكون زيه لانها كل ماسكتت
تمادى وماراح تسمح له يتمادى معها
.................
راحوا لاهلها اول شي ..

استقبلوهم احلا استقبال وسط دموع ام
طارق وتوصياتها على جوري وطول الوقت
تركي يهز راسه.. على كثر ماكان يحب يجي
بيت عمه ابو طارق الا ان هالمره حاس
بكره لهالبيت واللي فيه.. وودوعهم لان مافي
وقت يادوب يلحقون يسلمون على اهله..
راحوا لاهله استقبلتهم ندى وسلمت عليهم
هلا وغلا بالعرسان
تركي ساكت

جوري:هلابك زود.. وين خالتي ومنى
وماقدرت تقول وين عمي لانه هو سبب الي
هي فيه

ندى:امي الحين نازله ومنى تو كلمتني قالت
اسلم عليك رجولها تعورها من عقب امس

جوري:ايه ماتنلام تعبت فديتها

تركي كان بينفجر ضيقه وملل منها وهي تتكلم شاف امه نازله

ام تركي:يالله حيهم

قام تركي وراحت له امه وضمته ضمه طويله
ندى:الله لنا

تركي حب راس امه:يمه كل ذا شوق

ام تركي تمسح دموعها: شوق وفرحه.. انت
بكري واول فرحه لي

تركي:ياجعل ايامك كلها افراح
راحت تسلم على جوري

ام تركي:هلا بحبيبتي وتضمها

جوري:هلا فيك خالتي

ام تركي بعد ماقعدوا : ها يمه متى رحلتكم

جوري تبتسم وجت تتكلم

قاطعها تركي:12 دعواتك يمه

ندى شافت وجه جوري صار الوان''يالله
شكل الحرب بدت'' وهي ماتدري انها بدت
من امس

ندى:جوري تعالي معي دانه عطتني شي
اعطيك اياه وقاموا

ام تركي: اتمنى ماتتصرف معها بهالطريقه
قدامي مره ثانيه

تركي يطالع جواله:ابشري

وفوق كانت ندى وجوري
جوري:وش الشي؟

ندى:اكذب بس ابي اشوف لبسك مير لافه
نفسك بالعباه طلعي الزين انتي و وجهك..

جوري:مالت عليك ماعندك سالفه

ندى تشلحها العباه وجوري تضحك اخر شي
شهقت ندى

جوري تطالعها:بسم الله وشو

ندى تبتسم ابتسامه خبيثه:ماتوقعت اخوي كذا لهالدرجه.. واشرت لها على الاثار اللي
على ايدينها

جوري تدور وجهها

ندى:حشا بينقض على فريسه هههههههه
وجع وش ذا يدينه باينه

جوري ودها الارض تنشق وتبلعها ..صح ان
ندى فهمت غلط بس هالشي حسسها
بالخجل ومع ذلك حمدت ربها انها ما أولتها
بالشي اللي بتسعى طول بقائها مع تركي اذا
استمر على اسلوبه انها تغطيه عن الكل ..

جوري:ياحماره هاتي العباه

ندى:ههههههههههههه

اخذت جوري عبايتها ونزلت بسرعه مالها
شده لندى لانها عارفه انها بتنهال عليها
بالاسئله.. شافت عمها قاعد مع تركي وامه
سلمت عليه مع ان ماكان ودها بس الواجب
حتم عليها.. واستأذنهم تركي وسلموا ع
الكل وطلعوا

ندى''الحمدلله هذي بداية خير'' >> فاهمه غلط
........................
وصلوا الفندق كل واحد يجهز اغراضه ويرتب
شنطته.. راحت جوري وبدلت لبست بنطلون
اسود وبلوزه حمراء ولبست عبايتها وقعدت
بالصاله تنتظر..
وتركي بعد راح يبدل لبس برمودا بيج وبدي
اسود ماسك اظهر جمال عضلاته وشعره
لرقبته مرجعه على ورا باهتمام وترتيب
دق جواله:هلا قلبي

لفت رقبتها زي الصاروخ لجهته مو مستوعبه
اللي سمعته بس كان معطيها ظهره

تركي زلق لسانه وحس الدم تجمد بعروقه شلون يرقع بس للاسف ماتترقع:اكلمك
بعدين ..

جوري اخيرا فهمت سبب كرهه له اثره طلع
حقير وراعي بنات.. ماتدري تسكت والا
تكمل مشوارها وتضغط على نفسها والا
تفرق بين العايله.. حست بركان يغلي داخلها
بس لازم تصبر''يامصبر ايوب صبرني''

وراحوا المطار توجهوا للبوابه ..وطيران على
لندن عاصمة الضباب ووصلوا مطار هيثرو
طبعا تركي دايم يجيها لان هو اللي يخلص
اشغال العائله في لندن بالتناوب مع شباب
العائله فيصل وعبدالرحمن وطارق.. وكان
الدور على فيصل واللي المفروض هو يجي
بس مايمدي مدة الشغل 3شهور ويبي يكون
مع منى اذا ولدت..لقاها تركي حجه عشان
مايكون تحت المجهر عند ابوه وامه ويتصرف
بحريه زي مايبي معها بعيد عن النصايح..
وجوري اخر صيفيه جتها قبل سنه

توجهوا لمبنى كبير كان غالبية سكانه عرب
والباقي اجانب دخلوا المصعد شافوا حرمه
متحجبه مع ولدها الرضيع واضح انها عربيه
وبابتسامه ابتدأتهم بالسلام:السلام عليكم

جوري وتركي :عليكم السلام

وجهت الكلام لجوري اللي كانت بعد متحجبه
فقط: جداد هنا ماهيك؟؟

جوري:ايه نعم.. وانتي؟؟ حست جوري
بغباء سؤالها:اقصد ساكنه هنا والا زائره احد

الحرمه:لا انا ساكنه هون صار لي سنه
وشهرين.. انا اسمي سميره وهيدا ابني مهند
جوري:ماشاءالله عاشت الاسامي..

سميره:يسلمو ماتعرفنا

جوري تطالع تركي اللي كان لاهي بأوراق
معه:اسمي جوري.. و وهذا ز ز زوجي تركي

سميره:اهلين تشرفنا

تركي اومأ لها براسه بدون ماينطق ..فتح المصعد وطلعوا وطلعت وراهم
سميره:طلعنا جيران
تبسمت جوري

سميره:اي شي بدك اياه ماتستحي قولي
اللي تبينه..والا بزعل ها

جوري تضحك على لهجتها الا تتسعود:طيب
انشاءالله

كانت شقتهم جنب بعض
دخلوا شقتهم كانت كبيره حيل وتنطق
بالفخامه كان بالصاله قطع انتريه فرادي
وكرسي هزاز مقابل التلفزيون الكبير .. دخل
تركي بشنطته احدى الغرف وطلع

رمى لها جوال: خذي هذا جوال شريته امس
ودولته اذا بتكلمين اهلك وحطه وطلع

عطاها الجوال اتقاء المشاكل عشان
ماتطلب جواله لانه ملغم رسايل وزود عن
هذا رشا في اي حزه بتدق ..

كانت عارفه قصده من الحركه واضح مايبي
يعطيني جواله واكشفه مع انه مكشوف
خالص.. وقامت تفر الشقه.. كانت روعه فيها
نوافذ من الزجاج كبيره بحيث انها تشوف
المباني والشوارع وكل شي والحلو في الامر
انه عاكس اي احد من برا مايشوف اللي
جوا ..راحت للابوب المغلقه..

فتحت اول باب لقتها غرفه كانت صالون
للضيوف ..فتحت ثاني باب كانت غرفة
مخصصه للغسيل واضح من الات النشر
المتوزعه فيها وغساله اتوماتيكيه كبيره
وسلات وعده كامله من المنظفات رتبت
بعنايه.. فتحت ثالث باب هي الغرفه اللي
دخلها تركي كانت كبييييييييييره فيها سرير
خشب مزدوج له نقوش يعني هي الغرفه
الوحيده اللي كانت تحسسك بالفعل انك في
لندن من اثاثها وتصميمها ..وكان فيها
تلفزيون بلازما ومكتب وغرفة ملابس
وحمام مجهز ..

فتحت الباب الاخير لقتها غرفه فاضيه تماما
اصغر من الغرفه الاولى وفيها حمام وغرفة
ملابس صغيره..

رن الجرس:غريبه يدق الجرس هو عنده
مفتاح!!
راحت تفتح:مين؟
سميره: انا انا سميره

ابتسمت جوري ماتدري ليش دخلت قلبها
هالانسانه فتحت الباب شافتها جايبه صينيتين

جوري:ياااالله وش ذا ليش تتعبين على
نفسك

سميره:انا طبخت كثير لزوجي واصحابو بس
هلأ تلفن وقال ماراح يجي فحرام كبو واحنا
ماراح ناكلو كلو..تفضلي

جوري خجلانه من كرمها: تسلمين

دخلت سميره وحطت الصواني بالمطبخ
سميره:عملت محاشي و ورق عنب وكبسه
متل كبستكم واطيب هيك حكالي عبدالعزيز

جوري تضحك الحين اثبتت انها تبي تتسعود
لازم احد ينقذها ويجنسها:ههههههه بعد
تعرفين الكبسه

سميره:معلوم بدي اعرفها زوجي يحبها كتير

جوري: ماشاءالله شكله يبي يجرب اكلات
غير اكلات بلده

سميره:هههههههه تؤبريني هو سعودي
جوري انحرجت عشان كذا لهجتها كانت مره
كذا ومره كذا.. مسكينه ظلمتها وتضحك في
سرها: اهااا كلنا واحد مافي فرق بينا

سميره: متل ماقلتي.. هلأ بدي اروح مهند
لحالو وهيدا تلفوني ..وحطته على الطاوله
في ورقه.. وطلعت
وجوري راحت ترتب ملابسها

......................
مر ساعه وهو ماسك الجوال ويتجول في
شوارع لندن

تركي:والله تمنيتك انتي اللي معي

رشا: اااااه ياتركي لاتقلب المواجع

تركي:انا وعدتك اني ماراح احسسك
باختلاف عن قبل وانتي مع الوقت بتحسين
بهالشي

رشا: مشكلتي هالراس كل ما اتخيل انك مع
غيري ابكي

تركي: ياجعلي فدوه دموعك.. يلا عطيني
بوسه

رشا ضحكت غصب عنها:الحين بدل
ماتواسيني انت وتعطيني

تركي:ههههههه عادي مو حنا واحد
رشا: تروكي
تركي:احبببك
رشا:ياشيييينك خربت علي يادب

تركي:افا انا ينقال لي دب بعد كل النوادي
اللي سجلت فيها.. والدورات والتعب لين
طلعت بهالجسم الرياضي.. كله عشان اطلع
بالمستوى المطلوب واخققك

رشا:هههههه يوووه كل ذا عشان قلت دب..
والله اني داريه انك خقق من غير.. حتى
صديقاتي يوم شافوا صورك تهبلوا عليك .
وعلى فكره كثير يحلم بالجسم الرياضي
اللي زي جسمك

تركي:احم احم ترا بشوف نفسي

رشا: ماتقدر ياااادب

تركي: فدا راسك هالدب..
رشا:فديت روحك..

تركي:والله ريوشه محد يرفه ويخفف عني
اللي انا فيه الا انتي..

رشا: يارب لاتحرمني تروك حبيبي وكل دنيتي

تركي: ولايحرمني من ريوشتي

رشا:اميييين.. يلا عاد بقفل طولت عليك

تركي: ياشيخه لو انك جنبي كان عضيتك

رشا:هههه دب وحاقد بعد.. ليشش؟

تركي:انا ادري عنك.. كم مره اقولك كلي
حلالك وكل شي يرخص لك

رشا:تيب تيب لاتعصب ياعمري.. المهم
تركي:هاتيه
رشا: طفشانه بطلع اغير جو
تركي:متى و وين
رشا:متى بكرا ..وين مدري اي مكان
تركي:لا مافيه

رشا:بلييييز ترا مو مع احد غريب مع دانه
واختك ندى

تركي:اممم اوك بس ما اوصيك ..مثل كل
مره انتبهي لجوالك لاتعطينه احد لا خواتي
ولابنات عمي.. انا عادي بالنسبه لي لكن
خايف عليك من كلامهم و...

رشا:داااااريه حبيبي مايحتاج توصي لنا
3سنوات على هالوضع.. اسمع امي تناديني

تركي:طيب حبيبتي روحي لها وانا برجع البيت
حاس بارهاق باخذ شور وانتي اذا كنتي
فاضيه دقي

رشا:لا ارتاح ماصارت كل اللي نمته من
امس 3ساعات

تركي: ماعليك مني دقي

رشا:تروك اسمع كلامي ..شوف انا ابيك
ترتاح وتنام واذا من بكرا بدق

تركي:بس لو تقلبت وصحيت بدق

رشا:زين ياقلبي

وقفل منها فرحان ومستانس
,,,,,,,,, ,,,,,,,,, ,,,,,,,,,, ,,,,,,,,,,

..
..
..