كاتب الموضوع :
غنادير الشقى
المنتدى :
ارشيف خاص بالقصص غير المكتمله
الجــــــزء الواحـــــــد والعشـــــرون
منال وحور قاعدين جمب بعض ويسولفون بصوت واطي "
حور : ياقليلة الادب بسج خز
منال : العن شكل ولد عمج هذا بينني يهبل من اشوفه اتنح
حور : خلي عنج الطفاقه وصيري ثقيله ولاعاد اتخزينه لابط عينج
منال تنهدت : بحاول امسك نفسي
حور : حالتج ميؤوس منها ياصديقتي العزيزه
منال : حــــدها حالتي مأساويه حور شسوي بعمري انا احبه
حور تخرعة لحد يسمعها قرصتها : وجع قصري صوتج لحد يسمع
منال : قومي خلينا انتمشى بروحنا ابي اسولف ابي افضفض
حور : مو فشله نخليهم
منال : لاموفشله ويلا قومي
قامت منال ومسكت ايد حور : يلا عن اذنكم خالتي بنروح سنتربوينت بنأخذ لنا شغله ونرجع
ام مي : خلاص روحوا بس لاطولون
منال وحور : إن شاءالله
"""""
منايل كانت قاعده بغرفتها واتصفح المجله فجأه تذكرت شغله واشهقت وحذفت المجله : اي تذكرت وين شايفه هاليد الشخص اللي ساعدني كانت ايده فيها وحمه نفس الوحمه اللي بإيد بندرنفس الون والحجم لالا مستحيل يعني يمكن يكون بندر هو نفسه الشخص اللي ساعدني زين ليش وعمره مالمح لهالشي لالا انا اشفيني قمت اخرف "
لاماخرف يمكن تكون هذي الحقيقه وبندر يطلع هو نفسه الشخص
اللي بس انا ماشفت وجهه اللي ساعدني "
اي تذكرت الخدامه روز هي كانت وياي وشافت هذاك الرجال انا لازم اروح لأهلي اليوم واخذ صوره من صور بندر وسألها "
"""
كانوا قاعدين عند حوض السباحه والجو كان هادي
منال : يالخايسه وليش ماقلتيلي كل هذا صار بينج وبين سعود وانا اخر من يدري
حور : إللي يسمعج يقول قايله لأحد غير اصلا انتي الوحيده اللي اقولج عن سوالف سعود
منال : حتى ولو مره ثانيه أي شي يصير ادقين علي والا عالاقل دزي مسج
حور : إن شاءالله عمتي
منال ابتسمت : حور خلاص سعود فضح نفسه يحبج ويموت فيج انا ماني فاهمه ليش ماتوافقين عليه عالاقل تفتكين من عناد وشر عناد
حور : لاوالله اتسوين نفسج ماتعرفين شي انتي اكثر وحده اتعرفين ليش رفضت سعود
منال : انزين ليش انتي تسبقين الاحداث عناد يخاف من سعود ولو تزوجتيه ماراح يقرب صوبج
حور : صح سعود وابوسعود مستحيل اطلع من جزاهم وصح سعود سوا اشياءكثيره ادل على حبه لي انا اصلا كل ماتذكر مواقفه لما دافع عني ولما تهاوش ويا عناد وغيرته علي قلبي يعورني لاني رفضته بس في نفس الوقت سعود جرحني جرح عمري ماراح انسى كلامه الجارح واهاناته كل شي ولا الكرامه
منال : كلامه واهاناته كانت قبل لايحبج يوم كان يكرهج وعلى قولتهم مابعد الكره الا المحبه
حور : شوفي اطلع نصابه لوقلت اني سعود ماله مكانه بقلبي او اني ماغليه لكن كرامتي فوق الحب مابي بكره يتزوجني واذا شاف عناد ومشاكله يتحسف ويقول لوماخذ من بنات عمامي اوخوالي احسن
منال : انتي ليش تصعبين الامور بالعكس اذا يحبج بيتحمل لجل عين تكرم مدينه
حور : انا ماراح احلف واقول ماني متزوجته لان النصيب ربي وحده اللي يعرفه لكن اتمنى ان الظروف ماتحدني اني اوافق واتزوجه
منال : اوووف منج لازم اتعقدين الامور عيشي حياتج واخذي اللي تحبينه ويحبج
حور : ممكن اتغيرين السالفه
منال تنهدت : آآآه ياحور انا شسوي في عمري ولد عمج شغل تفكيري وعقلي وقلبي وهو مادرا عني
حور : من البدايه انا اشقلت لج ماقلت لج لاتفكرين فيه وشيليه من مخج لكن انتي ماتسمعين الكلام اعرف سوالفج كل ليله تقعدين تفكرين فيه واتخيلين انه يحبج ويجي يخطبج واهلج يوافقون واتزوجينه صح
منال : ههههههههههههه انتي اشدراج شنو قاعده بمخي وتقرين افكاري وتخيلاتي
حور : خبز ايدي واعرفج زين لاحبيتي حبيتي من قلب وعلى طول تدخلين بالعميق واتفكرين
وتسوين مسلسل من خيالج
منال : حور شسوي احبه مو بيدي
حور :الحب مو كل شي بالدنيا انتي مافكرتي لوتزوجتيه وين بتعيشون وشلون بيصرف عليج لا وفوق هذا محشش ولاهو راعي مسؤوليه ولاشي
منال :المشكله اني عارفه كل هذا ومتعلقه فيه اقولج شي بس لاتضحكين علي
حور ابتسمت : هاه قولي
منال : انا كل يوم ادعيله بصلاتي ان ربي يهديه ويلقاله وظيفه ويصلحه ويخلي عنه الخلابيط
حور ابتسمت : الله الهادي يلا قومي الحين بيأذن المغرب خلينا نرجع
منال : والاغراض اللي قلنا بنشتريها من سنتربوينت بتسألنا خالتي
حور : بنقول مالقيناها يلا امشي
مشوا حور ومنال كانوا راجعين لشاليهم ولقوا بطريقهم فواز شايل عدت الشوي
فواز وقف : من وين جايين
حور : كنا نبي شغله من محل ومالقيناها ورجعنا
المهم وين خالد مو وياك
فواز ابتسم وبانت غمازته : اخوج نصاب شال خيشه الفحم الصغيره وانحاش قال بيرجع يشيل وياي وسحب علي عند عمره جويد
منال مانزلت عينها منه ويوم ضحك وبانت غمازته بغى يغمى عليها تموت على ابتسامته "
حور ابتسمت : انت احمد ربك شال الفحم خلود مايداني يشيل هو زين يشيل عمره عطنا خلنا نشيل وياك
فواز : لالاشدعوه اضحك مهو من كثر الاغراض
حور بصرار : لاوالله حلفت لاتخليني اصوم ثلاث ايام عطنا نشيل وياك
فواز ابتسم : خلاص دام حلفتي يلا هذي الدوه شيليها
حور فتحت عيونها : يلا عاد قلنا عطنا انشيل وياك يعني اشياء خفيفه وانت ماصدقت خبر على طول عطيتنا الدوه اثقل شي الصراحه ياولد عمي مع احترامي لك ماعندك ذوق
فواز يضحك : ههههههههههههههههههه الله يقطع بليسج اضحك اضحك اشايفتني عديم ذوق
حور ابتسمت : مادري عنك صدمتني
فواز :هههههههه خلاص شيلوا كيس الطماط والخبز وخلاص واجد عليكم
حور : بعد خيرا تفعل شرا تلقى يلا عطني الاكياس وعلى قولت المثل سو خير وقطه بحر (خذت حور كيس الطماط وعطت منال الخبز ومشوا لشاليه )
فواز يضحك : هههههههههههههه اذا ثقيله الاكياس خلونا انتبادل شيلوا الدوه وعطوني الاكياس
حور وهي رايحه : اي هيــــن انتبادل
لحقهم فواز وهو يضحك "
"""""
منايل توها مخلصه صلاة المغرب صفطت السجاده ولبس الصلاه ~
دخل بندر وبإيده كيس : مساء الخير
منايل اتسوي نفسها اتصفط كبتها من بعد اللي صار بينهم وهي منحرجه واتهرب منه ماتبي عينها تجي بعينه : مساءالنور
بندر حط غترته على الكومدينه وقعد على السرير : شخبارج
منايل معطته ظهرها وترتب كبتها : الحمدالله بخير
بندر قام من السرير وراح لها : انتي شتسوين
منايل ارتبكت من قربه : ابد قاعده ارتب
مسك ايدها : خلي عنج الترتيب وتعالي ابي اتكلم وياج
منايل قعدت وياها وكانت منزله راسها وساكته وتشغل نفسها بأظافرها
بندر بجديه : احم منايل انا بتكلم بكل صراحه وابيج تسمعين للاخر طبعا اللى صار البارح هذا حق من حقوقي وانا لازلت على كلامي اللي قلته بعد مايعدي ثمان شهور من زواجنا وانتي لازلتي تبين الطلاق بطلقج ولاني بغاصبج على العيشه وياي
منايل ساكته وودها الارض تنشق وتبلعها من الاحراج "
بندر خذا الكيس وطلع كرتون موبايل : هذا تلفون وخط شريته لج بدال تلفونج اللي كسرته
منايل رفعت راسها وطالعته بصدمه وفرح ماتوقعت في يوم بيجيب لها موبايل
بندر باستغراب : لايكون ماعجبج شريت نفس تلفونج بالضبط
منايل ابتسمت : من قال ماعجبني بالعكس عجبني مشكور ماقصرت
بندر انرسمت ابتسامه عريضه على وجهه : اهم شي انه اعجبج وتراني سجلت رقمي عندج باسم بندر
منايل ابتسمت : زين انت مسيف رقمي عندك ابي احفظ رقمي
بندر : رقمج مميز سهل شوفيه
منايل شافت رقمها : اكشخ خطير احلى بعد من رقمي الاولي مشكور بندر
بندر ابتسم : العفـــو
""""
نرجع لشاليه والجو الحلو بالذات من دخل الليل بدا الجو يبرد "
فواز كان يشوي وخالد يسولف عليه جات ام مي وقعدت عندهم تموا يسولفون "
اما البنات كانو قاعدين على الطاوله قريب منهم "
فواز : يلا وهذي الدفعه الاولى خلصت تفضلي ياخاله هذا صيخج ذوقي شويي عساه يعجبج
ام مي خذت الصيخ : مايحتاج من شكله وريحته امبين انه لذيذ
فواز : هههه عليج بالعافيه هاك خالد صيخك وود للبنات الباقي قول لهم فيه بعد دفعه ثانيه
خالد يأكل : والله كل وحده تجي تأخذ صيخها وإلا كيفهم
فوزيه : يمه منك بطيني خلاص شاف الاكل وين يقوم
خالد : انفع نفسك بنفسك
فوزيه جات تأخذ الاصياخ : مشكور مانبي منتك
فواز ابتسم : يلا هذا صيخج يلا كل وحده تأخذ صيخها
فوزيه : عطني لي وللبنات اوديها مره وحده
فواز : لا على قولت خالد انفع نفسك بنفسك كل وحده تجي تأخذ صيخها
فوزيه : يــــووه عاد انت وخالد اذا تجمعتوا شيقنعكم خلاص عطني صيخي
فواز مد لها الصيخ : يلا يابنات لاتستحون كل وحده تجي تأخذ صيخها لايقضي عليه خالد
حور : يلا يابنات ترى خلود لي شاف الاكل نسى عمره زين ماياكل الصحن بعد
ام مي : تعالوا يمه لاتستحون ترى القعده عالارض وعند الشوي تشرح الصدر
جاوا البنات كلهم وقعدوا"
عطا فواز البنات كل وحده صيخ وبقى منال "
فواز : افا نقص يلا ولايهمج الحين الدفعه الثانيه اتخلص لاوبعد بضبطها
منال سكتت ماقالت شي
فوزيه : شمعنى يعني الدفعه الثانيه بتضبطها يعني ناس وناس
فواز رفع عينه وشاف منال حيل منحرجه : وانتي وش حارج وبعدين انا مابعد كليت وشي طبيعي بفنن لنفسي وبعدين حامض على بوزج تاكلين من الدفعه الثانيه
حور تبي اتغير السالفه لانها حست بحراج منال : اهم شي تحسب حسابي ياولد العم لان الصراحه شويك عجيب
فواز : ههههههه الله يسلمج يعني تهقين لافتحت لي مطعم شوي بربح
حور : افا عليك انت عليك الشوي وانا علي اكل
فواز : تأكلين وتدفعين وإلا بلاش
حور : لابلاش اسويلك دعايه اعلم الزباين ان الطعم لذيذ
فواز : عزالله كدينا خير
الكل ضحك : ههههههههههههه
مد فواز الصيخ لمنال : تفضلي
مدت ايدها منال والرجفه باينه فإيدها : شكرا
فواز لاحظ رجفة ايدها : العفو
"""
العنود ونوير ومنايل كانوا قاعدين بالحوش وحاطين الدوه ومسوين حليب بزنجبيل وخبز صاج ويسولفون ويأكلون الجده هيا عند ام محيسن وبندر طالع"
نوير : منايل ماسولفتي لنا عن العرس
منايل تشرب حليب ومتلحفه بالفروه : ابد حلو وراقي كانوا جايبين مطربه العروس كان شكلها حلو
العنود بلعانه : انتي إلا والله كان شكلج حلو اخوي المسكين ماعاد طلع من الغرفه ينتظرج على احر من الجمر
منايل فتحت عيونها وحذفتها بكرتون الكلينكس : خايسه ومقطنه
العنود تضحك : هههههههه لعنبوا لايمه متزينه وحاطه شي مابعد شافه واخوي بدوي مايدري وين الله قاطه
منايل : يــــووه عنودوه فكيني من شرج نوير شوفيها
نوير : امسي علينا ياعنيده وخلي المره ورجلها في حالها وشدخلج فيهم
العنود : انتي اسكتي مأذيتني كل ليله متى بعرس ياربي زوجني وانا شسوي يالعنود ابي اعرس
نوير تفشلت من منايل وقامت اتغمز للعنود عشان تسكت : وجع متى قلته خلي عنج الصواريخ
منايل فطست من الضحك : ههههههههههههههه أي عادي وان قالته مافيها شي الزواج سنة الحياه
نوير ماصدقت : أي والله ياختي سنة الحياه واستقرار
العنود : يــــااااو مسرع قلبتي كان كملتي الحيا قبل شوي اتغمزين ويعني انج مستحيه وماصدقتي شجعتج منايل على طول قلبتي
نوير ماهتمت : والله هذا الكلام الحق ان الزواج سنة الحياه قولوا اميــــن جعلكم اتشوفوني عروس قريب
منايل والعنود طالعوا بعض وفطسوا : هههههههههههههههه اميــــن
"""""
الساعه وحده الفجر "
ام مي والبنات دخلوا ينامون من الساعه 12 ومابقى إلا منال وحور قاعدين برى يسولفون~
منال : احس الكل لاحظني
حور : انتي بعد الله يهديج من يتكلم فواز ماتنزلين عينج منه
(في هالحظه فواز كان طالع من الشاليه يبي يروح لربعه وسمع كلام حور راجع شوي لطوفه عشان مايشوفونه وتم واقف يبي يفهم ليش جايبين سيرته )
منال تنهدت : حور والله مو بيدي انا نفسي مستغربه من نفسي انا من اول مره شفته يوم تقابلتي وياه وهو شاغل فكري بالعربي الفصيح انا احب ولد عمج فواز ياحور
(فواز كانت كلمة انا احب ولد عمج فواز مثل الصاعقه انصدم عمره ماتخيل ان فيه بنت بتحبه او انه بيلفت انتباه بنت ولاحتى فكر بالحب )
حور : انتي مثل الظميان إللي يلحق سراب
منال : والمشكله اني ادري انه سراب ومتعلقه في هالسراب حور كل ليله اقوم في ثلث اليل ادعيله حتى ادعيله اكثر من ماادعي لنفسي
حور : انا مستغربه منج يعني تدرين انه سراب وللحين متعشمه خير قلتها لج قبل وبقولها الحين فواز مايصلحلج انسيه ولاعاد اتفكرين فيه
منال : الكلام سهل بس الفعل صعب انا كل مره اقول ماراح افكر فيه وبنساه بس كل ماجيت احط راسي عالمخده القاه يتسلل لافكاري والقى نفسي افكر فيه بدون مادري
(فواز ماعاد يبي يسمع شي سحب عمره ورجع لغرفته وهو مصدوم )
حور حبت تغير السالفه : الجو برد امشي ندخل
منال : خلاص امشي نامي عندنا بشاليهنا انام انا وانتي بالصاله
حور : يلا امشي
في الشاليه إللي استاجره فواز وبالتحديد فالصاله"
فواز كان واقف عند الدريشه والف فكره ادور في راسه (هذي من جدها اتحبني شتحب فيني لاوظيفه ولاشهاده ولامال ولاسمعه ومهستر ولاني راعي مسؤوليه ولاني بذاك الجمال إللي يلفت انتباه البنات يعني مافيه شي زين بقول انه اتحبني عشان هالشي والله حرام انها اتحبني واتعذب بالتفكير فيني وانا ماني بكفوا شالسوات يافواز انا لازم ماعاد اتكلم وياها وانتبه لحركاتي عشان ماتعشم خير أنا لااصلح لها وحرام اظلمها واعشمها بحبي وانا خابر نفسي لاني راعي حب ولازواج ولامسؤوليه )
"""""
يوم جديد "
منايل من الساعه 11الصبح استأذنت من بندر بتروح لأهلها اتغدى عندهم ~
وهي طبعا حاطه الغدا وان امها ملزمه عليها اتغدى عندهم عذر وإلا كل روحته عشان اتشوف الخدامه وتسألها"
بعد ماقعدت ويا امها وسولفوا راحت للمطبخ "
الخدم أول ماشافوها ابتسموا "
منايل ببتسامه : سلام
الخدم : سلام
لجمي (وحده من الخدم صار لها عندهم عشر سنين ) : شلونج هبيبي منايل
منايل ابتسمت : هلا لجمي تمام انتي شلونج شلون ماما وبيبي
لجمي : كله زين يسلم عليج
منايل : الله يسلمهم لجمي وين روز
لجمي : روز يسافر قبل يومين
منايل بصدمه : سافرت لا زين ومتى قالت بترجع
لجمي : يقول شهرين ثلاث عشان ماما تعبان
منايل ضاق خلقها : يــــووه شهرين ثلاث وأنا شيصبرني
لجمي باستغراب : ليش يبي شي منها انا في رقم
منايل : لالا مايبي شي خلاص مشكوره
""""
رجعوا للدوامات والمدارس بعد عطلة الاسبوع إللي غيروا فيها جو واستانسوا "
حور : يلا بسرعه خلص عشان ننزل الحين بجي عمي مصطفى لاتأخرون عليه
خالد يلبس جوتيه : يلا خلصت يلا ننزل
فوزيه : اوووف واخيرا يلا نبي نرجع انام
خالد : عزالله بتكبرون المخده وحنا المساكين اهلكونا بالدروس
منار سحبت خالد : امش امش الحين فتحتي له سالفه شيسكته
منار كانت ماسكه خالد ونازلين من الدرج وفوزيه وحور وراهم تصادفوا ويا عناد "
عناد بنفس خايسه : امحق صباح صبحنا بالوجيه الودره
محد رد عليه
عناد طالع فوزيه : هاي انتي يالعاله للحين ماطلعتلج وظيفه
فوزيه : لا للحين انطر اسمي
عناد : الله يأخذج انتي واخوج مامنكم فايده عطالين بطالين
حور مالها خلق لعناد وسوالفه : يلا خالد يلا منار تأخرتوا امشوا
مشت حور وأخوانها ومشت فوزيه وراها وخلوا عناد إللي مستمر سب وشتم فيهم "
وصل العم مصطفى وخذا خالد ومنار يوديهم للمدرسه ورجعت فوزيه وحور لغرفتهم "
فوزيه منسدحه على فراشها : حور
حور اتحط لوشن على ايدها : هلا
فوزيه : حور ضايق خلقي وودي اروح لسوق ناقصني شغلات وابيج تروحين وياي
حور طالعت ساعتها : الحين 6ونص مافيه شي فاتح هالحزه
فوزيه : لامو الحين بروح عالساعه 9
حور : أوكي بس منو بيودينا
فوزيه : فيه سايق انا اذا بغيت شي ادق عليه يوديني متعامله وياه حتى كان مرات يوديني للمعهد
حور : أوكي خلاص انا بنام الحين ومتى مابغيتينا نروح قعديني بس هاه اهم شي نرجع قبل الساعه وحده عشان يمديني اسوي غدا لمنور وخالد
فوزيه : مومشكله بنشتريلنا غدا جاهز شدعوه الثلاجه فيها شي حتى خضره مافيها
فواز قال بيشتري اليوم ماجلت للبيت
حور : خلاص اوكي
§§§§
نايف : صباح الخير
منايل : صباح النور ياهلا
نايف : اخباركم
منايل : الحمدالله بخير انت شخبارك
نايف : نحمد الله المهم منول انا الحين قريب منكم جهزتي التقارير الطبيه اللي يبيها سعود
منايل : تقارير ولد جارتنا أي جاهزه
نايف : خلاص بمر أخذها
منايل : حياك الله
¿¿¿¿¿
الستي سنتر "
حور وفوزيه كانوا يتسوقون"
فوزيه : اشرايج بهالبوت
حور : حلو بس الون الاسود احلى حتى الفرو اللي عليه احلى من البني
فوزيه : يعني اخذ الاسود
حور : والله انا عاجبني الاسود وانتي كيفج
في نفس المكان "
واقف يشوف الجواتي الرجاليه سمع الصوت وشبه عليه : هذا صوت حور وإلا يتهيئ لي
التفت وشاف بنتين واقفين ومعطينه ظهره "
فوزيه : خلاص بأخذ الاسود بروح اقوله يعطيني مقاس 38
حور : وأنا بشوف احصل شي لي ولمنور
راحت فوزيه تشوف مقاسها وحور كانت واقفه تشوف الجواتي"
اما هو كان واقف يطالعها يبي يتأكد "
لفت حور للجهه الثانيه وجات عينها في عينه
ابتسم ابتسامه عريضه وراح لها : مادري اقول صباح الخير وإلا انتي الخير كله
حور تنحت ماجا في بالها انها بتشوفه : سعــــود (قالتها بصدمه )
سعود : عيون سعود وروحه
حور انحرجت منه دايم يمسخها بالكلام
سعود : اشهالصباح الحلو اللي جمعني فيج شلونج طمنيني عليج
حور تحاول تكون طبيعيه : الحمدالله بخير انتوا شلونكم شلون عمي وخالتي
سعود ابتسم : انا عن نفسي بأحسن حال من بعد ماشفتج
حور توهقت اليوم جرأته زايده ماعرفت شتقول
سعود : ممكن اعزمج على كوفي
حور : اسفه اعذرني مااقدر
في هالحظه جات فوزيه وطالعت حور بأستغراب : حور خلصتي
حور حست بنظرات فوزيه انها تبي تعرف منو هذا اللي واقف وياها : اعرفكم هذي فوزيه بنت عمي وهذا سعود ولد العم بوسعود واخوى منايل
سعود : هلا تشرفنا
فوزيه هزت راسها : هلا
حور : يلا حنا نستأذن سلم على الاهل
سعود ماحب يحرجها بالاخص قدام بنت عمها وإلا هو ماصدق يشوفها وكان وده يطول فالسوالف وياها : يوصل إن شاءالله سلامج
فوزيه وحور : يلا بالأذن
سعود : الله معاكم
حاسبت فوزيه البوت وطلعوا من المحل وراحوا محل ثاني "
حور انقلب حالها من شافت سعود حتى ماعاد عرفت تشتري"
فوزيه : حور اشفيج صاير شي
""
الجده هيا قاعده بالحوش وقهوتها وريوقها ودوة الفحم عندها نوير كانت قاعده وياها وعقب ارجعت اتكمل نومتها "
منايل : صبحج الله بالخير (حبت رأسها وقعدت )
الجده : هلا صباح الخير
صح النوم
منايل تصب لها حليب : صح بدنج محد قعد من البنات
الجده : إلا نوير قامت سوت القهوه والريوق وشبت الفحم وقعدت وياي شوي وراحت
اتكمل نومتها الظاهر انهم يسهرون قليلات الخاتمه
منايل : لاوين يسهرون المساكين يمكن مانامت البارحه عدل
الجده : اي يمكن إلا انتي وش الاوراق هذي اللي بيدج
منايل : هذي تقارير ولد ام محيسن تبي سعود اخوي يشوفها
الجده : اي الله يشافيه وسعود بيمر يأخذها
منايل : لا نايف قال بيمر يأخذها ويوديها لسعود
الجده : اي حياه الله اذا جا انا اللي بفتحله واقلطه يتقهوا ويعين من الله خير
منايل ابتسمت : إللي يريحج سويه
سمعوا الباب يدق "
الجده قامت : هذا اكيد نايف بروح افتح له
فتحت الباب "
نايف : السلام عليكم
الجده : وعليكم السلام يامرحبا
نايف : صبحج الله بالخير ياخاله شلون صحتج
الجده : ياصباح الخير بخير جعلك بخير اقلط اقلط
نايف : خليها مره ثانيه إن شاءالله انا مستعجل
الجده : والله إن تقلط اتقهوى معي وإلا ان ازعل عليك
نايف ضحك : هههه افا عاد كل شي ولازعلج ابشري والله ماردج
الجده : اقلط حياك الله
نايف : الله يحيج
دخلوا للحوش وقامت منايل سلمت على نايف وقعدوا قهوه وسوالف وضحك "
العنود توها قاعده من النوم غسلت وجهها ومشطت شعرها ونزلت سوت لها قلاص حليب وراحت للحوش "
شافت ظهر نايف وظنته بندر ماتوقعت انه احد غريب "
العنود : الله الله على القعده الصراحه قعدتكم ماتطوف
الكل التفت صوبها "
العنود شافت الوجه مو وجه بندر اخوها وانصدمت وتجمدت في مكانها وبعدين استوعبت طاح قلاص الحليب من ايدها :يــــوووه (وركضت داخل)
شكلها كان يضحك "
الجده عصبت : وجــــع
إن شاءالله
نايف نزل راسه يعني انه يأكل من القرص وماسك ضحكته غصب يحس انه بينفجر من الضحك
منايل حطت حرتها في الحليب وماسكه ضحكتها خافت من الجده
نايف قام : الله يغنيكم ويكثر خيركم
الجده : فيه العافيه ماكليت
نايف : إلا والله كليت الله يعطيكم العافيه
الجده : فيه العافيه
نايف : يلا انا استأذن تأمرون ع شي
الجده :وين توالناس
نايف : والله مشغول ياخاله وماقعدت إلا عشانج
الجده : خلاص المره هذي بعذرك لكن المره الجايه لازم تتغدى عندنا
نايف ابتسم واشر على خشمه : على خشمي
الجده ابتسمت : عليه الشحم
خذا نايف الاوراق ووصلته منايل للباب "
~~~
فوزيه : حور اشفيج حالج انعفس من شفتي سعود صاير شي
حور رفعت حاجبها : لانعفس ولاشي يتهيأ لج وبعدين يعني اشبيكون صاير
فوزيه : مادري احس بينكم شي نظراته ماكانت طبيعيه
حور تنرفزت : مافيه شي عادي شافني وسلم ماصار شي
فوزيه : اي بس انا سمعت انه خطبج وانتي رفضتي
حور سوت نفسها مو مهتمه شلون عرفت : عادي خطب وانا رفضت لاني مافكر بالزواج وبعدين الزواج قسمه ونصيب وبعدين ممكن اتغيرين الموضوع
فوزيه : على قولتج قسمه ونصيب
"""""
بدت امتحانات الكورس الاول والكل كان شاد حيله حور كانت اتحاول قد ماتقدر اتوفر سبل الراحه لأخوانها عشان يجيبون نتايج زينه "
في نفس الوقت منار وخالد كانوا شاديين حيلهم يبون ايام الامتحانات تخلص عشان المده اللي متفقين يقعدون عند عمهم قربت تنتهي "
كانوا ناطرين اليوم اللي يطلعون فيه من بيت عناد ويرجعون لبيت خالتهم سعاد والاستقرار والراحه والامان إللي فقدوها من قعدوا في بيت عناد "
صباح يوم جديد "
حور : اكلي الصمونه لاتروحين بمعده خاليه
منار : حور مولازم مولازم بعدين اذا رديت من الامتحان بأكل لين اقول بس
حور : والله ماتطلعين إلا وانتي ماكلتها خلصيني وبلا دلع
منار : لاتلوميني ماني مصدقه ان اليوم اخر امتحان ونفتك
خالد : ترى العطله الصغيره اللي بنعطلها مو العطله الكبير على هالفرحه اللي فارحتها
منار تأكل الصمونه : هذا انت قلتها عطله سواء كانت كبيره او صغيره اهم شي عطله نأخذ راحه واستجمام
حور : اهم شي تبيضون وجهي وتجيبون الدرجات العاليه
خالد : من هالناحيه لاتحاتين اخوج سبع دايم الاول الخوف على هالعنز لاتجيب العيد
منار : عنز بعينك ياقليل الادب يالتيس بعد السانك طويل
حور : اقول انطموا ثنيناتكم ويلا هذا صوت هرن العم مصطفى طلعوله
خالد حب راس حور : دعواتج لنا
حور : الله يوفقكم ويسهل امركم
منار خذت جنطتها وطبعت بوسه على خد حور : وانا بعد دعواتج
حور ابتسمت : الله يوفقكم إن شاءالله ويسمح امركم
راحوا منار وخالد لمدارسهم ورجعت فوزيه وحور لغرفتهم
شافوا عناد يكلم بالتلفون ومستانس "
عناد : ابشر طال عمرك "اي جاهزه "انت فصل وحنا نلبس " بعد يوم او يومين خلاص تم " ابشر باللي يرضيك
حور وفوزيه ماكانوا معطين عناد ومكالمته أي اهميه راحوا لغرفتهم يكملون نومتهم "
>><<>><<>><<
ليله تعتبر من اليالي التى لايمكن أن تنسى ليله امتزج فيها الخبث وحب المال والشهوه ليله لايمكن ان يتخيلها العقل مايهم الشرف مايهم الانسانيه مايهم العرض كل اللي يهم في هذي الليله ( المال و اشباع الشهوات )
صفقه دامة شهور واليله موعد اتمام الصفقه "
الساعه 12 الليل "
خالد نايم وغرقان فالنوم "
حور منسدحه واتألم من بطنها يمغصها ألم موطبيعي "
منار وفوز قاعدين عند حور ويشوفون كتالوج سحر الشرق "
فواز مسافر لرياض معزوم على تحدي تقحيص "
منار : حور حطي الكماده كمديه
حور العوار ذبحها : امممم أأأي يابطني
فوزيه : حسافه خلصت الحبوب اللي كانت عندي تبيني اسويلج حليب واحط عليه من دوا الحريم
حور : لالا مابي جبدي تقلب ان شربت شي برجع
فوزيه : الله يعينج وانتي كل شهر تعورج
منار : أي دايم هذا حالها قبل يوم كنا عند خالتي سعاد كانت اتسويلها بابونج يهدي العوار واتسويلها دارسين ونعناع فيخف عليها العوار
في هالحظه انفتح الباب وكل الانظار توجهت للباب ونظرات الخوف كانت سيدة الموقف "
فوزيه خافت : انتي ماصكيتي الباب
منار ماتت من الخوف من شافت عناد وسكينه وحسينه داخلين عليهم والخبث امبين عليهم : مادري مادري
عناد يبتسم بخبث : اووه بعد الباب فاتح اليوم الامور كلها تمشي لصالحنا
حور كانت اتألم بس من شافت عناد داخل نست العوار وتمت تردد بداخلها (وجعلنا من بين ايديهم سدا ومن خلفهم سدا فأغشيناهم فهم لايبصرون )
فوزيه تحاول تكون قويه وماتبين خوفها : خير فيه شي
عناد يغني : واليله سهرتنا خلوها صباحي
البنات انقبضت قلوبهم حسوا ان فيه كارثه بتصير "
فوزيه سحبت تلفونه ودقت على فواز بدون محد ينتبه لكن للاسف الجهاز مغلق "
منار لزقت في حور وقامت ترجف من الخوف "
حور تمت اطالعهم وتدعي ربها يرد كيدهم في نحرهم "
طالعها عناد : فديت العيون انا فديت اللي بسببها بيجينا الخير كله
حور تحس بمثل الصاعقه تحاول تقوي نفسها : خير إن شاءالله اطلعوا برى نبي انام
سكينه تضحك ضحكتها المعتاده : هههههههاااي أل أيه تنام مافيش نوم ياروح امك دنتي اليوم مش حتأدري تغمضي عينيكي
فوزيه بخوف : يعني شنو
سكينه : دنتي تخرسي خارس
خالد سمع الصوت وفز : خير
عناد بلعانه : كمل نومتك ابرك كملها
فوزيه : انتوا اشناوين عليه
عناد : ابد بس نبي حور بكلمة راس
حور تحس بيغمى عليها من الخوف ومن العوار : مابيني وبينكم لاكلمه راس ولاشي
عناد جا صوبها : موبكيفج غصب عنج
خالد فز من مكانه وركض صوب خواته : وراك وراك واقضب ارضك
عناد يطالعه باستهزاء : والله وصرت رجال واتعرف اتكلم ياولد حمد
خالد وقف في وجه عناد : اي رجال غصب عن اللي مايرضى
عناد دز خالد بقوه وسحب حور من ايدها : اجل ورني مراجلك
منار تمسك حور وفوزيه تحاول ادز ابوها
حور : هدني يالخسيس اتحط حيلك على بزر وحريم
عناد يسحبها بقوه وخالد يرفسه وتركض سكينه تمسك خالد وحسينه تمسك فوزيه
فوزيه جن جنونها : هدوها هدوها وخروا عنها حرام عليكم وش تبون اتسون فيها
خالد كان يقاوم سكينه ويرفسها ويحاول يفلت منها لكن جسمه صغيره وقوته ولاشي عند قوة وجسم سكينه
منار طاحت عند رجول عناد : الله يخليك هدها ابوس رجلك
بكل قسوه وبدون رحمه رفسها وسحب حور
ودزت سكينه خالد وركضت برى ونفس الشي سوت حسينه بفوزيه "
طلعوا من الغرفه وقفلوها عليها
حور كانت تصارخ : هدوني وخروا عني وين تبون تودوني
وعناد يسحبها : انطمي لاقص السانج
حور زاد صراخها حست انها خلاص اليوم نهايتها : يانــــاس يانــــاس الحقــــوني دقــــوا على الشرطه
سكينه : صرخي كمان ياختي مفش حدي حيسمعك هههههاي
عناد كان يسحب حور لوحده من الغرف وحور اتصارخ واتسب وتلعن وتقاومهم بس مافيه فايده
دخلها الغرفه وحور ترجاه : عناد الله يخليك انا لحمك ودمك انا عرضك خاف ربك فيني
عناد دزها : سكينه جهزيها يلا الرجال على وصول
حور من اسمعت الرجال بغت تموت : لالالالالالا ياويلكم من الله ياكــــلاب يالنجس ياحقير ياويلكم من فواز الحين بيجي فواز ويأدبكم
عناد ضحك باستهزاء : فواز فالرياض ياماما شوي شوي على بلاعيمج ههههههههه (وطلع وخلاها )
طلعت وراه حسينه وتمت حور وسكينه فالغرفه ~
حور طاحت عند رجول سكينه : ابوس رجلج تكفين مستعده اصير خدامه بس الا هالشي لاتسونه خافوا الله
سكينه : ماتغلبينيش خلصيني اومي البسي البس دى
حور طالعته بحقد وكره : البس وجع يوجع قلبج يالحقيره يالنجسه يالوسخه انتي مستنقع وسخ
سكينه تحاول تمسك نفسها مو عشان حور لاعشان بوفيصل طالب انهم يجهزون حور له : أومى يابت خلصيني مش حيحصل حاقه اومي دا بس حيبوسك ويشوفك وخلاص
حور جن جنونها : ياحقيره يازباله تبيني اصير نفسج انتي مثل الحمام العام اللى الكل يستخدمه ماتخافين الله ماتخافين نار جهنم إللي حرارتها تصهر العظام
سكينه بدت تنفعل مسكت حور تبي اتلبسها قميص نوم احمر شفاف : أومي خلصيني ماتخربيش كل حاقه
حور شقت القميص : والله ماالبسه لو على موتي يارب يارب رد كيدهم في نحرهم
سكينه عصبت يوم شافتها شقت القميص : يخرب بيتك عملتي ايه ياوليه بوصي دنا نفسى في منخاري خلصيني ابل ماأعمل فيكي حاقه ماتخطرش ببالك
حور برودت السراميك زادت عوار بطنها لكن تصبر وتحاول تكون قويه : سوي اللي بتسويه لبس ماني لابسه ولو تموتين ماعطيتكم اللي تبون
من جهه ثانيه "
فوزيه محتاسه تحاول تلقى سبير لغرفتها خالد يحاول يفتح الباب بسكين منار منهاره من البكي وتحاول تدق على فواز او العم مصطفى لكن شحن التلفون خلص وحتى الشاحن ادوره مالقته وانهارت : حــــور حــــور تكفين فوزيه سوي شي عشانها حرام اللي يبون يسونه فيها
فوزيه هي الثانيه ارتبكت وماعاد استوعبت : إن شاءالله بلقى الاسبير وبنساعدها ماراح يصير شي انتي بس هدي عشان اقدر اركز والقى المفتاح
منار منهاره : وين اهدى وانا مادري اشسوى في اختي حسبي الله عليهم
نرجع لحور وسكينه "
سكينه مسكت حور من شعرها : حتلبسي يعني حتلبسي
حور تفلت على وجه سكينه من القهر
عصبت سكينه وانفعلت : يابت الكلب حوريكي
وبدت ترفس حور على بطنها وتمسك شعره وتمت ترفس بطن حور
حور كانت تصارخ من العوار : أأأأأأي خالتي سعاد الحقيني وخري عني يالنجسه
وسكينه مستمره بالرفس بكل قوتها ترفس حور تحس خلاص بيغمى عليها : خلاص بموت وخري عني ياربي
سكينه ولااهتمت مستمره
حور خلاص خدر جسمها وحست بنزيف ماعاد اقدرت اتكلم جسمها انهار حست نفسها قصر
سكينه للحين ماشفت غليلها : حربيكي يابنت الشوارع حعلمك الادب (ومستمره بالرفس)
حور طاحت على الارض ماعاد فيها حيل وصارت تنزف حيل انترست ملابسها والسراميك
سكينه توها تستوعب يوم شافت الدم خافت وماعرفت شتسوي ركضت برى الغرفه وصكت الباب ونزلت تحت"
حالة حور يرثا لها ألم يقطعها ونزيف تحاول تزحف للباب عشان تطلع لكن مافيها حيل تزحف شوي وتنهار قواها "
خالد ركض لدريشه : فوز بسرعه عطوني حبل
فوزيه : خالد إشبتسوي
خالد : بربط جسمي وانزل على سقف الدوانيه وبعدين بنزل طوفة الحوش وبعده عادي المسافه بسيطه بس انتو امسكوا الحبل عشان اذا فلت جسمي او زلقت ماطيح
منار بخوف : وين تنزل لامستحيل تبي اطيح
خالد : اجل نقعد انتفرج وماندري شنسوي انا بنزل عشان اقدر افتح لكم وانشوف حور وينها
فوزيه : ماقدامنا إلا هالحل لازم نسوين
خالد : يلا بسرعه جيبي الحبل
جابت فوزيه الحبل وربطته بخصر خالد ومسكوا طرف الحبل "
صعد خالد الدريشه وبدأ يمشي على حافة الطوفه الموصوله على سطح الدوانيه ومن وصل سطح الدوانيه نزل على طوفة الحوش وفك الحبل وطمر للحوش "
منار وفوزيه استانسوا واشر لهم خالد ان كل شي اوكيه "
بوفيصل يمشي بهيبه : وين نروح
عناد شوي ويحب ايده : نصعد فوق طال عمرك
بوفيصل بخبث : القمر فوق
عناد : اي طال عمرك فنتظارك
بوفيصل : طيب علمني أي غرفه وتسهل
عناد تفشل : طال عمرك ثاني غرفه عاليسار
بوفيصل هز راسه واشر له بإيده يروح
حور تسمع الصوت حست ان قواها انهارت وتمت تدعي ربها (وجعلنا من بين ايديهم سدا ومن خلفهم سدا فأغشيناهم فهم لايبصرون )
طاح قلبها وهي تسمع الخطوات واقفت عند الباب ومسكت الباب تحركت
فتح الباب وابتسامه عريضه على شفاته لكن سرعان ماختفت الابتسامه وتحولت لصدمه وهو يشوف حور تسبح بدمها والسراميك متلطخ بالدم وقف منصدم
وماجا في باله إلا إن عناد غشه وفي داخله يهدد ويتوعد عناد"
حور لسانها كان مستمر بالدعاء
خالد قدر يدخل بدون محد يحس فيه وعلى طول راح لغرفة البنات ومن حسن حظه ان سكينه نست المفتاح فالباب "
خالد فتح الباب : يلا بنات بسرعه
منار : خالد لقيت حور
خالد : لا انا بنزل وانتوا دوروا فالغرف
فوزيه : وين تنزل اذا شافوك ماراح يهدونك
خالد : لاتخافون علي انا بكون حذر
فوزيه : خلاص حنا بندور وانت دور واللي يلقاها يعطي الثاني خبر
خالد هز رأسه ونزل ~
فوزيه : امشي منار نشوفه بغرفه امي او الغرفه الثانيه اللي جنبها
وهم ماشين متجهين صوب الغرف سمعوا صوت حور : لاتقرب ولاخطوه اطلع برى
ركضوا البنات صوب الغرفه وانصدموا وهم يشوفون رجال غريب واقف وحور منترسه دم
منار ركضت على طول لأختها "
فوزيه بصدمه : اشسويت انت منو
بوفيصل ارتبك : هاه انا انا
فوزيه عصبت : اطلع برى ياحقير لاادق على الشرطه ياخسيس
بوفيصل مابغى الا عمره نزل على طول وطلع من البيت ركب سيارته وحرك "
خالد شافه وهو نازل وعلى طول ركض للبنات فوق "
فوزيه للحين مصدومه وتردد بداخلها : لاحرام عليك يبه ليش بعتها اشسوى فيها الحقير هذا المتوحش حرام عليهم ضيعوا حور
نبهها صوت خالد وخلاها ترجع للواقع : حور اشفيج اشفيها غرقانه في دمها
حور بتعب مافيها حيل : خلونا نطلع من هالبيت
منار صرخة على فوزيه : فوز تحركي شوفي حور تنزف
فوزيه استوعبت نفسها : بروح اجيب لها ملابس والحاف وانتي دخليها الحمام وانت ياخالد خلك واقف عند الدرج عشان نخلص حور وتطلعون من البيت وجودكم فيه خطر عليكم
خالد : خلاص يلا يلا خلصوا
خالد راح يراقب عند الدرج ومنار دخلت حور الحمام قطت ملابسها المليانه دم وغسلتها عطتها فوزيه الملابس ولبستها
منار بخوف فتحت باب الحمام : فوز حور قاعد بكثافه
فوزيه بخوف : هي عليها العاده الشهريه
منار بخوف : اي بس نزيفها موطبيعي الحمام انترس
دخلت فوز ولبستها ولفوها بالحاف وطلعوها من الحمام: حور تقدرين تمشين انتوا لازم تطلعون من البيت
حور بتعب : اي اي بأقدر خلونا نطلع بسرعه
فوزيه مسكت حور وطلعتها لخالد : منار بسرعه البسي عبايتج وجيبي شي انحطه على راس حور وجيبي تلفون حور اخذوه وياكم
خالد ماسك حور : خلاص خذيت تلفون حور وبوكها بس البسي عبايتج وجيبي شي انغطي راس حور
ركضت منار لبست عبايتها وشيلتها وجابت شرشف عشان تغطي راس حور : يلا امشوا
فوزيه : يلا شيلوها من ظهرها وانا من رجولها وشوي شوي
شالوها ونزلوها من الدرج
فوزيه : بسرعه انا براقب وانتوا طلعوا
خالد : مانتي جايه ويانا
فوزيه : لا انا متعوده عليهم لكن انتوا عليكم خطر
خالد : انتبهي لنفسج
فوزيه ابتسمت: لاتوصي اهم شي انتوا طلعوا وروحوا للجمعيه ومن هناك دقوا على خالي مصطفى يأخذكم
منار وخالد ماسكين حور ويمشون : إن شاءالله
طلعوا من البيت وبدوا يمشون فالشارع الجوا كان بــــارد والساعه 1ونص الفجر وحور تحاول تصمد وتتحمل
خالد : شيلي حور من رجولها وانا من فوق حور ماعاد فيها حيل
منار : يلا يلا
(شالوها وتموا يمشون لين وصلوا الجمعيه )
قعدوا عند المصافط داخل وانخشوا عشان محد يشوفهم
خالد : انتوا خليكم لاتحركون بدخل ادق على العم مصطفى وارجع
منار بخوف : خالد شوف حور اشفيها اغمى عليها وإلا شنو
خالد يصفق وجهها عالخفيف : حور حور تسمعيني
منار خايفه وتبكي : ياويلي اشصار فيها خالد شنسوي
خالد ارتبك : حنا لازم نوديها المستشفى
انتي خليج وانا بشوف تكسي
مشى خالد يشوف تكسي ووقف له رجال في منتصف عمره لابس لبس الحرس الوطني
الرجال باستغراب : خير ياولد
خالد والخوف واضح على وجهه : تكفى ودنا للمستشفى اختي مريضه
الرجال : وين اختك يلا اركب
خالد : اختي عند المصافط خلك واقف وبنجيبها
الرجال استغرب ماكان مصدق : يلا انا بوقق
ركض خالد للمصافط وشال حور هو ومنار الرجال يوم شافه شايل اخته وتأكد من صدق كلامه قرب السياره منهم ونزل وفتح الباب
الرجال بخوف : هي وشفيها انتوا وين اهلكم شمقعدكم هالحزه في هالمكان
خالد : هذي سالفه طويل انت بس وصلنا اقرب مستشفى وجزاك الله خير
ركبوا ووصلوا لمستشفى وكان مستشفى خاص "
علق الرجال بالهرنات وطلعوا السسترات بسرير ركبوا حور ودخلوها "
الرجال نزل وياهم كانوا واقفين ينطرون احد من الدكاتره يطلع ويطمنهم "
خالد : جزاك الله خير انت تقدر تروح ماقصر
الرجال : وين اروح واخليك انا معكم لين يوصلون اهلكم
منار تمسح دموعها : خالد روح دق على خالتي سعاد وإلا عمي مصطفى
خالد : إن شاء الله بروح ادق عليهم بس لنتي اهدي
الرجال يوم شاف خالد راح التفت على منار وسألها : يابنتي انتوا وش سالفتكم شاللي مطلعكم من بيتكم هالحزه
منار ماحبت تقول شي : لاسالفه ولاشي ابوي مسافر واختي طاحت علينا وتلفون البيت مقطوع وجينا نبي ندق من تلفون الجمعيه
الرجال : زين وين امكم محد ساكن وياكم
منار : امنا متوفيه والحين خالتي وعمي
الرجال : الله يقوم اختكم بالسلامه
منار :جزاك الله خير
~~
خالد واقف يدق من عند الرسبشن فوق العشر مرات دق على خالته سعاد لكن ماردت في الاخير دق على العم مصطفى إللي من ثاني دقه رد "
: ألو
خالد : الو عم مصطفى انا خالد
مصطفى بخوف : خالد مالك انت فين
خالد : حنا بالمستشفى انحشنا من بيت عناد حور طاحت علينا
مصطفى بخوف : مستشفى ليه مالها حد عملها حاقه
خالد : تعال وبعدين نفهمك السالفه بس اهم شي عناد لايعرف شي عناد
مصطفى : ربنا يأخد عناد قاي لكم يابني ماتخافوش
~~~
وصل العم مصطفى المستشفى "
منار وخالد اول ماشافوه ركضوا له "
منار تبكي : عم مصطفى الحقنا حور مادري اشفيها
العم مصطفى يحاول يهديهم : اهدي يابتي اولولي هي فين
خالد العبره خانقته : دخلوها للعمليات وللحين محد طلع يطمنا
العم مصطفى انصدم : عمليات هي حصل لها ايه
منار مستمره دموعها : مادري دخلوا علينا عناد وسكينه وحسينه وسحبوها غصب وقفلوا الباب علينا وعقب خالد طب من الدريشه وفتح الباب ورحنا ندورها لقيناها غرقانه بدمها
مصطفى تأثر : ياولاد الكلب عملوا فيها ايه المقرمين دول
خالد : مادري حسبي الله عليه عم مصطفى عناد مالازم يعرف مكانا اكيد بيسوي شي اذا عرف مكانا هذا مجرم
العم مصطفى : حسبي الله ونعم الوكيل فيه ماتخافوش ماتخافوش
الرجال اللي ساعدهم جا : السلام عليكم
العم مصطفى : وعليكم السلام
خالد : عم هذا اللي ساعدنا ووصلنا للمستشفى
مصطفى : متشكرين ياخويا قزاك الله خير
الرجال : العفو ماسوينا شي بس ياخوي انتبهولهم مايصير يطلعون هالحزه من البيت
العم مصطفى : معاك حأ ياخويا متشكرين تعبناك معانا تأدر تروح
الرجال : اقدر اساعدكم في شي
العم مصطفى : لامتشكرين
الرجال مد كرته : اذا احتجتوا شي هذا كرتي فيه كل ارقامي
العم مصطفى خذا الكرت : شكرا ياخويا
الرجال : يلا مع السلامه
العم مصطفى : مع السلامه
طلع الطبيب والكل ركض صوبه "
مصطفى : ايه يادكتور طمنا
الدكتور : الحمدالله قدرنا نسيطر على الوضع كان وياها نزيف حاد بسبب تعرضها لضرب شديد على منطقه البطن قدرنا نسيطر عليه بفضل الله النزيف هذا لو استمر كان يمكن بيأدي لأصابتها بالعقم
الكل بصدمه : عقــــم
الدكتور : اي عقم هي متعرضه لضرب شديد وانا راح استدعي الشرطه عشان تفتح محضر
العم مصطفى : استحلفك بالله يادكتور بلاش شرطه خلها تصحى ونعرف منها الحكايه وبلاش شرطه
الدكتور : انا بنتظرها لين تصحى اذا تعدت الاربعه والعشرين ساعه بخير اقدر اقول انها تعدت مرحلة الخطر
منار بخوف : يعني حالتها خطيره
الدكتور : انتوا ادعولها والله كريم
انتهــــــــى البــــــارت قـــــــرائه ممتعــــــــــــه
|
29-02-12, 11:53 PM
جديد مواضيع قسم ارشيف خاص بالقصص غير المكتمله
العرض العادي
