يسلمووو غنادير ع ها البارت بصراحه سعاد طيبت خاطري في عناد الزفت بس هو مرح يعديها لهم بساهل
ونكسر خاطري ع منايل لان الي سار مو هين راح يحطم نفسيتها ويعرض سمعتها لكلام الناس بعد منشرت الخبر ذيك العله الى مالقي يطلع الحرامي الابوجهها بس رب كل ضارة نافعه راح تكسب بندر بس راح يلاقو صعوبه حتى تتقبل وجود بندر الي راح تنجبر عليه حتى يغطو السالفه وكمان راح تختلف طريقه حياتها معاه لان اهل بندر ناس عيشين ع البساطه
في انتظار البارت القادم دمتي سالمه

الجـــــزء الســادس عشــر







ومن تعاسة الحظ الخدامه كانت واقفه برى وشافتها ام دعيج (وحده هذاره فضيحه) واقفه وراحت تبي تسألها إشفيها إلا الحرامي طالع يركض ماعليه قميص وفيه دم على صدره من خشمه*

ام دعيج قامت تركض وتصارخ : الباكستاني اعتدى على بنتهم الباكستاني اعتدى على منايل
الحقوا عليها

كانوا فيه صبيان صغار شافوا الحرامي وهو منحاش وقاموا يصارخون معاها



بندر سمع الصوت والكلام إللي تقوله وركض سحب الخدامه دخلها للبيت ودخل وياها وقفل الباب عشان محد يدخل ويشوف شي


منايل للحين طايحه بمكانها مو مستوعبه إللي صار كأنه حلم شاللي صار معقوله نجيت من يد هالوحش معقوله انا للحين على قيد الحياه الحمد الله يارب اللهم لك الحمد والشكر*
(قطع عليها حبل افكارها صوت الخدامه)

الخدامه ماسكتها وتحضنها : هبيبي منايل انت مافي شي انت زينه

بندر راح لهم وهو مسرع يكلم الخدامه : اخذيها وروحوا فوق ولاتفتحون لاي انسان دقي على بابا سعود

الخدامه : إن شاءالله بابا

بندر يلتفت : مافيه باب ثاني اقدر اطلع منه غير الباب الرئيسي

الخدامه : بابا مني ورى عند مطبخ*

بندر : خلاص انتي اخذي بنت ودي فوق انا خلاص يعرف

الخدامه : إن شاءالله بابا

بندر بسرعه راح من الباب الخلفي عشان محد يشوفه ويضن الضن الشين فيه وفي منايل

طلع ولحسن حضه انه كان صافط سيارته بعيد شوي عن البيت ركب سيارته ومشى بسرعه قبل لا احد ينتبه له





الخدامه ودت منايل فوق لغرفتها عشان تبدل ملابسها الحرامي شق بلوزتها من الصدر

منايل للحين مصدومه وإيدينها تعورها من مقاومتها للمجرم

طلعت الخدامه بجامه لمنايل : يلا هبيبي يلبس

منايل بتعب : انا بلبس بنفسي بس انتي روحي دقي على سعود

الخدامه : إن شاء الله هبيبتي

راحت الخدامه تتصل على سعود

منايل قامت تحس جسمها مكسر تبي تأخذ شور بس حست ان رجولها مو شايلتها تسندت على الطوفه وبدلت ملابسها بتعب وانسدحت عالسرير

دخلت عليه الخدامه والتلفون بإيدها : بابا سعود يبي انتي

منايل خذت التلفون وبدت موجة صياح : سعود تعال انا خايفه

سعود جن جنونه بس يحاول يمسك اعصابه : منايل هدي وقولي شاللي صار

منايل تحاول تسكت من الصياح: حرامي تهجم علي (وانفجرت مره ثانيه تبكي وتشاهق)

سعود بعصبيه وخوف : سوى لج شي

منايل من بين دموعها : لاربي ستر في واحد دخل وساعدني والحرامي لما شافه انحاش

سعود برتياح تنفس : الحمــــداللــــه خلاص هذا انا شوي ووصل لاتخافين

منايل : بس ام دعيج شافت الحرامي وفضحتنا تقول (وقعدت تبكي ماقدرت تكمل)

سعود فهم : خلاص هدي انا جاي

منايل منهاره من الصياح : بس الجيران واقفين عند الباب انا انفضحــــت والكل اكيد صدقها

سعود يحاول يهديها : ماعليج انا بتصرف يلا صكي هذا انا قريب من البيت

صكت منايل التلفون وحظنت مخدتها بخوف وتكورت على
نفسها مستمره بالبكي





وصل سعود البيت ودخل من الباب الخلفي وصل الصاله نزل غترته مشى بخطوات واثقه جهه الباب الرئيسي‎‏ سمع كلمات ام دعيج اللي تقولها من خلف الباب ولاهمها رمي المحصنات (مره تقول فضحت اهلها ومره تقول هي مدخلته ‏)‎
ضغط على نفسه وحاول يكون طبيعي فتح الباب ورسم على وجهه علامه استفهام مصطنعه
سعود : خير إن شاءالله عسى ماشر
(لكن للاسف ماكان موجود إللى عدد قليل من الجيران الاغلبيه رجعوا لبيوتهم وهم مصدقين كلام ام دعيج )
‏*
ام دعيج بدهشه : انت موجود في البيت واختك

قاطعها سعود بحده : إشفيهــا اختي

ام دعيج ارتبكت : استغفرالله مابي احط بذمتي بس العياذ بالله استغفرالله استغفرالله مااقدر اقول

ضاحي احد جيرانهم :انا بقول ياطويل العمر ام دعيج وعيال الفريج شافوا باكستاني طالع من بيتكم بوضعيه مخله

سعود بعصبيه: اخــس وعقــب يالــردي

ضاحي خاف : هذا كلام ام دعيج

سعود بحده : ام دعيج تخسى وتعقب بياعة كلام تقذف اعراض المسلمات اسمعــي يامره والله لولا كبر سنج وإلا كان علمتج السنع

ام دعيج خافت : هذا إللي انا شفته

سعود بحده وعصبيه: اقطعي واخسي يامره وارجعي بيتج قبل لاينقص السانج وبعدين شلون الحرامي يدخل البيت وانا موجود

ام دعيج بوقاحه : يمكن انت توك جاي من الباب الخلفي وماعندك خبر

سعود بحده : يامــره اقصري الشر انا موجود في البيت ماطلعت منه شكلج خرفتي*

ام دعيج خافت : خلاص كيفكم الله يستر علينا ولايبلانا (راحت وهي مومصدقه كلام سعود ومستانسه عندها خبر جديد بتنشره بين خلق الله)

سعود عطى نظره لباقي الجيران إللي للحين واقفين فهموها وكل واحد منهم رجع لبيته نصهم مصدق كلام ام دعيج والنص الاخر مصدق كلام سعود بس على قولت المثل الخير يخص والشر يعم*




سعود تنهد ومشى بخطوات ثقيلــــــه
صعد الدرج واتجهه لغرفة اخته
وقف عند باب غرفتها المفتوح اشر بإيده للخدامه إللي كانت قاعده على حافة سرير اخته إللي متكوره على نفسها ومدخله وجهها بالمخده من الخوف
طلعت الخدامه وتقدم سعود جهه منايل إللي ماكانت منتبهه له
ولاحاسه بوجوده قعد سعود على حافة السرير*

منايل حست فيه رفعت راسها والدموع مغرقه عيونها وارتمت بحظنه وقعدت تبكي :
سعود تكفى لاتخليني*

سعود يمسح على راسها : منوله خلاص ماصار شي هدي لاتخافين انا معج وقوليلي إشصار

منايل رفعت راسهها وبدت تتكلم وتشاهق : سعود مادري مادري شي يخوف مرعب سعود كان ضخم يخرع كأنه وحــــــش حسيت ان مابيني وبين الموت إلا شعره
انا حيــــــل خايفــــــه

سعود : بسم الله عليج لاتخافين هذا انا موجود عندج

منايل بخوف : سعود مادري شلون دخل الباب كان مقفول

سعود: خلاص حبيبتي انسيه
ولا كأن شي صار اعتبريه كابوس وصحيتي منه

منايل: شلون تبيني انسى وانا لولا رحمة الله ثم الشخص إللي انقذني من إيدينه ولا كنت بروح فيها

سعود من داخل محترق بس مايبي يبين شي لمنايل ويخوفها اكثر : طيب عرفتي هذا الشخص

منايل : لا ماانتبهت لوجهه من الخوف ماكنت مركزه

سعود : خلاص إهدي حصل خير (طلع موبايله من مخباته) بكلم تلفون وارجع

منايل مسكت إيده: سعود الله يخليك لاتروح انا خايفه

سعود : منايل مورايح مكان انا عند الباب

منايل برجاء : سعود الله يخليك دق على حور او منال ابيهم عندي تكفى انا خايفه ابيهم ينامون عندي

سعود : وين ادق عليهم بهاليل الساعه الحين12من اصبح افلح

منايل : خلاص انا ادق عليهم
( خذت تلفونها ودقت على حور)


(من جهه ثانيه )
حور توها حاطه راسهها عالمخده تبي تنام إلا صوت تلفونها من تحت مخدتها

حور : بسم الله من داق هالحزه عسى خير( خذت موبايلها وشافت المتصل)

حور بخوف : هلا منايل

منايل بصوت باكي: حــــــور

حور بخوف : منايل إشفيج تكلمي

منال فزت من السرير ولزقت اذنها على السماعه بخوف*

منايل ماقدرت تمسك نفسها قعدت تبكي : انا خايفه تعالوا الحين

سعود خذا التلفون من منايل: هلا حور

حور بخوف : سعود إشصاير فيكم شي

سعود مايبي يخوفها: مافيه شي تقدرين تجين البيت

حور : طيب انا جايه بس قولي إشصاير فهمني

سعود : تعالي وبعدين افهمج

حور : خلاص مسافه الطريق واكون عندكم*

سعود : الله يرضالي عليج انتبهي لدرب لاتخافين شي بسيط

حور : خير إن شاءالله (صكت التلفون وبسرعه خذت عبايتها)

منال بخوف : حور إشصايــــــر
إشفيها منايل تكلمي

حور تلبس عبايتها ونقابها وشيلتها وتمشي بسرعه: مادري مافهمت إلا انها خايفه

منال تلحقهها : انزين لحظه انطريني بروح وياج

حور : لا انتي قعدي مايصير ثنتينا نروح إذا قعدت خالتي ومالقتنا بتخاف خليج وانا إذا وصلت دقيت عليج ( فتحت باب البيت ) يلا مع السلامه

منال : ديري بالج انتبهي لدرب وأول ماتوصلين دقي

حور تركب السياره : إن شاءالله دخلي داخل

(ركبت حور سيارتها واتجهت لبيت منايل وألف فكره ادور ببالها وتدعي ربهها يكون خير)




سعود : الله يهديج ماكان له داعي تخوفين البنت عليج وجودي كافي

منايل مستمره على حالها: ابيها تنام عندي*

سعود سكت منها طلع تلفونه دق على نايف : هلا نايف

نايف : هلاسعود

سعود : وينك

نايف : ابد طالع من أم الهيمان (منطقه من مناطق الكويت)برجع للبيت في خاطرك شي

سعود : بغيتك تمرني بغيتك بسالفه

نايف ابتسم: ماينفع تنقال بالتلفون

سعود : لاماينفع يلا تعال

نايف : ابشر نص ساعه واكون عندك

سعود :الله معك انتبه لدرب*

نايف: ابشر يلا سلام

سعود : سلام


سعود بعد ماخلص مكالمته اتصل على حور*

حور : هلا سعود انا وصلت افتح لي الباب

سعود باستفهام : انتي وصلتي عندنا

حور : اي افتح لي

سعود صك التلفون ونزل يفتح لها


سعود فتح الباب : انتي صاحيه شهالسرعه

حور دخلت ومااهتمت لسؤاله:
مو مهم المهم قوليلي إشصاير منايل إشفيها خرعتوني

سعود تنهد : اسمعي حور منايل حيل خايفه وانا ابيج تهدينها واطمنينها*

حور : انزين قولي شالسالفه

سعود : اليوم حرامي دخل البيت وماكان موجود إلا منايل ووحده من الخدم وباقي الخدم اليوم عندهم إجازه والكلب تهجم عليها وحاول(وسكت ماقدر يكمل)

حور حطت إيدها على فمها بخوف : صار شي

سعود هز راسهه بـ لا

حور تنفست براحه : الحمدالله المهم هي الحين وين

سعود : بغرفتها

حور صعدت الدرج : الحمدالله الحمدالله

سعود يصعد وياها : حور ابيج تهدينها هي خايفه وحالتها حاله

حور : لاتوصي إن شاءالله خير
(رن موبايلهها)

حور ردت على موبايلها: هلا منال"اي وصلت " موصاير شي بس منايل خايفه بعدين انا اكلمج واقولج كل شي" يلا مع السلامه


وصلت حور لغرفه منايل : سعود لوسمحت بعد اذنك خلنا بروحك

سعود : إن شاءالله انا بكون بالصاله إذا بغيتوا شي نادوني


حور هزت راسها ودخلت غرفة منايل

منايل اول ماشافت حور ركضت لها وسوت مناحه*

حور : خلاص حبيبتي ماصار شي الحمدالله ربنا ستر خلاص انسي اللي صار اعتبريه كابوس وصحيتي منه

منايل : شلون كابوس إللي صار حقيقه مو كابوس انتي لوشفتيه كأنه وحش يحاول ينهش بلحمي شلون تبيني انسى شكله والعرق يتصبب منه وشكثر جسمه كان قريب من جسمي كان مغـــــزز مغـــــزز

حور سحبتها وضمتها بقوه:
خلاص هدي هدي (وقعدت تقرى عليها بعض الايات القرأنيه)




(في الصاله)

نايف وقف معصب : وليه مابلغت الشرطه يأخذون البصمات ويسحبون ابن الكلب هذا

سعود : نايف لاتزيدني إللي فيني يكفيني وشلون تبيني ابلغ الشرطه عشان ننفضح نسيت انها بنت والبنت سمعه

نايف تنهد : طيب ماعرفت الرجال إللي ساعدها

سعود : لا ماعرفته منايل من الخوف ماانتبهت لشكله والخدامه تقول انه قال لها تصعد منايل فوق وتتصل علي وهو طلع من الباب الخلفي
اتوقع انه سمع كلام ام دعيج وطلع من الباب الخلفي عشان محد يشوفه ويثبت كلام ام دعيج عن منايل

نايف : بيض الله وجهه عزالله انه رجال هذا يعرفك بس من اتوقع

سعود: اي يعرفني لومايعرفني ماقال للخدامه دقي على سعود اتوقع يمكن من الجيران

نايف : زين منايل وينها اقدر اشوفها

سعود : منايل بغرفتها وحور عندها

نايف : طيب في مجال اشوفها

سعود وقف: امش منت غريب
عشان تستأذن


راحوا سعود ونايف لغرفه منايل طقوا الباب وتحنحنوا

حور عباتها وشيلتها عليها بس كانت منزله نقابها ألبست نقابها ووقفت : تفضـــل

سعود ونايف فتحوا الباب ودخلوا : السلام عليكم

حور بأدب واحترام :وعليكم السلام

سعود على طول دخل وقعد على سرير منايل*

نايف حاس بالاحراج وخاصه وهو يشوف حور حيل مستحيه ومنحرجه: شخبارج اختي حور

حور مستحيه بس تحاول تكون طبيعيه: بخير الله يسلمك اخوي نايف

نايف ابتسم لمنايل وراح لها حب رأسها : شخبار دلوعتنا

منايل حالتها احسن من قبل بس للحين عيونها وارمه من البكي ابتسمت له بتعب : هلا نايف

سعود ونايف يسولفون ويا منايل ويضحكون يبون يطلعونها من جو الخوف يحسسونها بالامان ،،،*
حور حست إن وجودها ماله داعي في الغرفه بوجود سعود ونايف طلعت من الغرفه بهـــدوء قعدت بالصاله إللي بالدور الثاني دقت على منال وقالت لها السالفه بالتفصيل

منال : حسبي الله عليه وهي الحين شلونها*

حور : الحمدالله احسن بواجد عن أول بس للحين متغززه من الموقف ولايعه جبدها وللحين خايفه

منال : بعد عمري ماتستاهل إللي صار لها بغت تروح فيها

حور: الحمدالله إللي الله نجاها منه

منال : إنزين والحين شلون بتنامين عندها

حور: مادري انا حاسه بالاحراج
وفي نفس الوقت منايل تبيني انام عندها

منال : خلاص خليج عندها الحين الوقت متأخر الساعه وحده ونص وهي مسكينه محتاجه لج

حور: خلاص بقعد عندها وبكره برجع عطي خالتي خبر ومايحتاج اوصيج بمنور وخلودي

منال : ولايهمج لاتحاتين

حور حست بوجود احد وراها :يلا منول اخليج مع السلامه

منال :مع السلامه

حور صكت التلفون وشافت سعود واقف :بغيت شي

سعود : مشكوره عاللي سويتيه لمنايل حالتها احسن بكثير*

حور : ماله داعي تشكرني منايل اختي وانا ماسويت شي

سعود ابتسم : طول عمرج اصيله يابنت حمد

حور استحه من نظراته نزلت راسها : ماعليك زود

سعود تم يطالعها بعدين انتبه لنفسه : طيب بغيت اقولج إن نايف راح لبيته وانا بنام تحت بالصاله اخذي راحتج البيت بيتج

حور : إن شاءالله

سعود : يلا انا استاذن بنزل تحت إذا بغيتوا شي انا موجود تصبحين على خير

حور : وإنت من اهله

نزل سعود وحور راحت لمنايل



" في غرفة منايل "

منايل منسدحه عالسرير وحاضنه مخدتها"

ابتسمت حور وقعدت جمبها
حور تحاول تلطف الجو : يلا اليوم خليت اخواني عشان افضى لج*

منايل حطت راسها بحضن حور ومسكت إيدها وحطتها على قلبها : كل ماتخيلت شكان بيصير قلبي يدق بقوه

حور تمسح على راسها : لاتفكرين بالشي الشين فكري بإن إللي صار مايأثر فيج

منايل سكتت

حور : يلا خلينا نروح انام*

منايل : حور خليج وياي*

حور : إن شاء حبيبتي هذا انا وياج*

حور ظلت تقرى على منايل بعض الايات القرانيه لحد مانامت منايل

حور ماجاها النوم ماتعودت تنام في بيت احد غريب ماتعرف تنام إلا ببيتهم او بيت الخاله سعاد





(بيت الجده هيا)

بندر منسدح على السرير والنوم مجافيه يفكر باللي صار مسكينه بغت تروح فيها الحمدالله جيت بالوقت المناسب مادري إشصار عليها الله يستر من كلام الناس عزالله بوسعود مايستاهل حد يتكلم في عرضه الله يعدي هالسالفه على خير ويستر علينا وعليهم "
قطع تفكيره صوت اذان الفجر تعوذ من بليس وتوضى وراح يصلي بالمسجد"



حور بعد ماصلت الفجر اغراها منظر ولون شروق الشمس لبست شيلتها ونقابها نزلت للحديقه تبي تحس بالنشاط لانها مانمت وتحس جسمها متكسل " قعدت عند النافوره الكبيره تلعب بالماي*

دق موبايلها "
طلعته من مخباتها شافت المتصل وردت "
حور : هلا منور
منار: صباح الخير*
حور : صباح النور حبيبتي شخباركم
منار بعتب : بخير بس ليش نمتي عند منايل وخليتينا
حور : حياتي منايل تعبانه شوي وتعرفين ماعندها احد
منار : انزين متى ترجعين
حور : شوي بس تقعد منايل واتريق برجع
منار : انزين لاطولين*
حور : من عيوني
منار : اي نسيت ماقولج لاتنسين ترى اليوم موعد اسناني الساعه8
حور : خلاص إن شاء الله بس اخلص منايل اوديج
منار : يلا سلام
حور : مع السلامه حبيبتي "

حور شافت الساعه صارت 6وربع راحت للمطبخ تجهز الريوق على ماتقعد منايل * * * *(في المطبخ)*
حور بعد ماخلصت من البيض طلعت الجبن والبنه وقطعت طماط وخيار طلعت الصمون عشان تسخنه بالمايكرويف*

دخل سعود والخبز بإيده ووجهه معتفس*

حور بخوف : إشفيـــك
سعود : حور مصيبه
حور : تكلم إشصاير
سعود تنهد وسحب الكرسي وقعد عليه : الخبر وصل لابوي في لندن*
حور عقدت حواجبها : أي خبر
سعود : إللي صار لمنايل وطلعوا إشاعه ان (سكت ماقدر يكمل)*

حور طاح كيس الصمون من إيدها وحطت إيدها على فمها : لاتقـــول

سعود هز رأسه بقهر : هذا إللي صار*

حور : وعمي إشقال*

سعود : ابوي يقول بيرجعون بكره*

حور مقهوره : حسبي الله ونعم الوكيل في هاللي يطلعون هالاشاعات على خلق الله

سعود بنبره يأسه : والسوات ياحور

حور : سوات ربك ابرك المهم منايل لازم ماتدري بشي*

سعود : مصيرها بتعرف

حور : تعرف من امك او ابوك احسن من ماتعرف منك

سعود : خير إن شاءالله

حور خذت الصمون حطته بالمايكرويف : انا بروح اقعدها عشان اتريق وانت خلك طبيعي لاتبين لها شي اوكي*

سعود : مشكوره حور*

حور : على شنو*

سعود : على كل شي وعلى وقفتج مع منايل عمري ماراح انساها*

حور حست بالاحراج : ماسويت شي منايل مثل اختي عن اذنك بقعد منايل (طلعت من المطبخ وهي منحرجه )





كانت قاعده تقرى قرأن بعد ماخلصت صلاتها"

دخلت حور وقعدت عالاريكه تنطرها تخلص قرايه*

منايل انتبهت لوجودها : صدق الله العظيم (صكت القرأن وحطته عالطاوله )

حور : تقبل الله*

منايل : اجمعين وين كنتي*

حور : كنت اجهز لج الريق يلا قومي انتريق*

منايل : ليش تعبتي نفسج وين الطباخه

حور : شدعوه ليكون ماتبين تأكلين من إيدي

منايل ابتسمت: لاحشى بس مابيج تتعبين

حور : لاتعب ولاشي يلاقومي
مابي اتأخر على منور عندها موعد بالاسنان

منايل : بتروحين وتخليني الحالي

حور : وين لحالج اخوج عندج*
وبعدين ترى ماقعدت الا عشانج وإلا انا مومتعوده انام في بيت فيه رجال غريب

منايل : عادي إشفيها سعود ماراح ياكلج

حور : لاتاخذين وتعطين معاي بهالموضوع تعرفين رأيي ويلا امشي نتريق لااتأخر على منور*

منايل : يلا ياستي تأمرين








حور ومنار راجعين من طبيب الاسنان نزلوا من السياره توهم واقفين يفتحون الباب سمعوا صوت سياره مسرعه*
التفتت منار شهقت بخوف: حور فتحي بسرعه عنـــاد

فتحت حور بسرعه ودخلوا وصكوا الباب ركضوا داخل

عناد يرفس الباب :هين ياكلاب دواكم عندي لوتروحون للقمر بوصلكم



حور ومنار دخلوا الصاله خايفين ويركضون*

منال كانت قاعده بالصاله تشوف التلفزيون دخلوا عليها حور ومنار خايفين"

منال فزت من مكانها: إشصاير إشفيكم

حور تأخذ نفس : عناد برى*

الخاله سعاد نازله من الدرج معصبه : هذا استخف إشهالصيحه خلاص طفح الكيل هالشي ماينسكت عنه

حور مسكتها : خالتي تكفين عشان خاطري بيصارخ شوي ويذلف خليه يولي

سعاد : كل مره نخليه ومافيه فايده لايستحي ولايخيل

نرجس نازله : يمه خلاص راح

حور : شفتي قلت لج بيصارخ شوي بعدين بيروح خلاص لاتشيلين هم

سعاد تنهدت وقعدت عالغنفه:
حسبي الله ونعم الوكيل فيه شوفوا من اليوم ورايح ولاوحده فيكم تطلع بروحها حتى الدوام ياحور انا اللي بوديج وارجعج

حور : ابشري انتي تامرين امر






مطــــار الكويــــت "

موعد وصول بوسعود وام سعود وعذاري"*
نايف كان في انتظار وصولهم اما سعود قعد في البيت ويا منايل*

وصلت الطياره ونزلوا الركاب نايف شاف عمه بوسعود واشر له*

نايف يسلم عليهم: هلا يالله حيهم انورت الديره

بوسعود وجهه معتفس : الله يحيك منوره بأهلها

نايف : شلونكم عساكم ماتعبتوا

بوسعود : نحمدالله على كل حال


نايف شاف بوسعود إمبين عليه العصبيه لفت لأم سعود إللي كانت خايفه ومتوتر حب يخفف جو التوتر سألها عن اخبارها جاوبته بأختصار نايف حس ان الجو متكهرب ففضل السكوت احسن "


في السياره وكان السكوت سيد الموقف والجو متوتر*

بوسعود يهز رجوله يحس إن كل ثانيه تمر سنه حس إن الوقت طول : زد السرعه شوي*

نايف بهدوء : ابشر طال عمرك






وصلــــوا للبيــــت"

سعود ومنايل كانوا في انتظارهم في الصاله "

دخل بوسعود بهيبته المعتاده : السلام عليكم

فزوا سعود ومنايل :وعليكم السلام

سعود :يالله حيهم

سعود ومنايل سلموا على ابوهم وامهم وعذاري

قعدوا والكل كان متوتر سعود خذا الدله صب القهوه سأل ابوه عن اخباره وكان يرد بكلمات مختصره*

منايل قاعده عند امها وحاضنتها

بوسعود تقهوا وهز فنجاله وقف وقال بصرامه : منايل إلحقيني للمكتب (خلص كلامه ومشى )

منايل خافت طالعت امها بتوسل : يمــــه

ام سعود هزت راسها : روحيله يابنتي مايصير إلا الخير إن شاءالله

سعود : منايل روحي لاتطولين عليه

منايل بخوف : شكله معصب

نايف : يابنت الحلال روحي مافيه إلا العافيه


وقفت منايل بخوف واتجهت للمكتب وقفت قبل لاادق الباب خذت نفس عميق طقت الباب بخوف

بوسعود بصرامه : تعــــالي

منايل فتحت الباب بحذر ودخلت بصمت

بوسعود كان واقف عند الدريشه ومعطيها ظهره : شاللي صار بالضبط

منايل حست قلبها بيوقف من الخوف والرهبه تبي تتكلم لكن الكلام جمد بداخلها

بوسعود صرخ : تكلمــــي

منايل انتفضت : يبه كنت قاعده بالصاله ماشفت إلا واحد يمشي عالدرج ركضت للاسنصير دخلته ونزلت تحت ركضت للباب الرئيسي عشان انحاش لقيته مقفول تذكرت إن المفتاح عند الخدامه رحت لها قعدتها خذينا المفتاح وركضنا نبي ننحاش ماامدانا إلا وهو نازل علينا و (سكتت)*

بوسعود بحده:كملــــي

منايل بخوف : وحاول يعتدي علي وانا احاول اقاومه بعدين الخدامه فتحت الباب وقعدت تصارخ دخل واحد وتم يتهاوش ويا الحرامي ولعن خير الحرامي وفلت من إيده وانحاش الحرامي وسمع ام دعيج تصارخ وتخربط بالكلام عقب ركض سحب الخدامه وقفل الباب قال للخدامه تأخدني فوق وسأل فيه باب خلفي ودلته الخدامه بعدين طلع وهذا كل إللي صار

بوسعود : انتي متأكده إنه ماصار شي

منايل بحراج : لايبه ماصار شي من إللي في بالك

بوسعود : خلاص تقدرين تروحين

منايل وقفت : عن إذنك يبه


طلعت منايل وعلى طول راحت غرفتها وهي تبكي "






(بيت سعاد)
حور بعد ماصلت الفجر خذت لها شور "لبست ملابسها وجففت شعرها عالسريع مع إنه توالناس عالدوام بس ماتدري إشفي صدرها ضايق وقلبها ناغزها تمت تفكر وتحط اسباب لهالضيقه يمكن خايفه لايصير لها مثل ماصار لمنايل "

قطع عليها تفكيرها صوت شخير منال إلا كانت غاطه بالنوم بسبت السهر عالنت لحد صلاة الفجر "
ابتسمت وباست راسها وغطتها بالحاف*
خذت عباتها وصكت ليت الغرفه*
وطلعت
قبل لاتنزل شافت ليت غرفة نرجس ومنار مفتوح راحت لهم لقتهم نايمين وغرفتهم كانت حوسه عفيسه رفعت عينها للورقه الملزوقه عالكبت"

ابتسمت عرفت انها طلباتهم المعتاده خذتها وصكت اليت وطلعت"

قرت الورقه إللي مكتوب فيها"
( حور بعد عمرنا اشتريلنا بطاطات وككاوات وبيبسي ونفيش ومكسرات وعصير سانكست لزوم السهر قضينا عالاكل كله)
صفطتها وحطتها بالجنطه"



نزلت تشرب لها كوفي يصحصحها على ماتنزل خالتها سعاد شافت الساعه للحين ست إلا ثلث خذت المصحف وقعدت تقرا قرآن"*





في نفس الوقت"

فوزيه كانت ماسكه موبايلها ومتردده :ادق على حور احذرها وانبهها وإلا مادق " يمكن ابوي بس يتكلم جذي وماراح يسوي شي "بس هو يتحلف ويتوعد اخاف يسوي شي لسعاد وعيالها يضرهم عشان يضغط على حور تجي تعيش عندنا (شافت الساعه)
بس الوقت الحين حده مومناسب اخاف ادق واخرع البنت وبالاخير ابوي يهون ويتراجع في كلامه وبالتالي اطلع ماافهم وماعندي سالفه " انام الحين احسن والعصر يصير خير "






نزلت سعاد وابتسامتها المعتاده على وجهها: صباح الخير على الحلوين

ابتسمت لها حور : صباح الرضا يالغاليه

سعاد :تأخرت عليج*

حور :لاشدعوه توالناس عالدوام لاحقه عليه

سعاد ابتسمت : يلا نمشي

حور خذت جنطتها : يـــلا


ركبوا السياره واتجهوا لشركه "
كان الجو في السياره حلو الخاله سعاد كانت تسولف عن صداقتها ويا ام حور وشكثر كانوا قراب من بعض وانهم كانوا نفس الخوات"


سعاد : تصدقين إن نبرة صوتج مثل نبرة صوت امج رحمة الله عليها*

حور : إيه جدتي الله يرحمها كانت دايم تقوله

سعاد : انتي اصلا تشبهين امج حيل (تنهدت) رحمة الله عليها شكثر كانت طيبه وحنونه (سعاد حست إن العبره اخنقتها فحبت تغير السالفه)
المهم خلينا من هالسالفه وخن اقولج ترى امس دق علي*
المستأجر إللي بيستأجر بيتكم وقال يبي يستلم مفاتيح البيت بعد اسبوع

حور :واتفقدوا عالاجار

سعاد : ايه مثل ماقلتيلي 600دينار

حور :حلو خلاص اليوم بروح اخذ باقي الاغراض عشان نكتب العقد ونعطيه المفاتيح*


حور صرخت : خالتـــي انتبهــــــي

سعاد لفت بقوه جهة اليمين*

حور بخوف : خاله سعاد انتي بخير

سعاد داست البانزين واسرعت حدها : حور هذا عناد يبي يكرر إللي سواه في امج وابوج

حور مجرد ماجا في بالها إن عناد ممكن يسوي اي شي بالخاله سعاد : خالـــه وقفـــي*

سعاد بعصبيه : حور انتي ينيتي اقولج عناد يلحقنا ويحاول يدعمنا وانتي تبيني اوقف استخفيتي

حور الدمعه حارت بعينها : انا مستحيل اكون السبب في انه يأذيج إلا انتي تكفين ماني مستعده اخسرج يكفي إللي خسرته*

سعاد : مايقدر يسوي شي

حور : لايقدر ومايهمه أي شي تكفين وقفي خليني اشوف شنو يبي فيني

سعاد بحده : استخفيتي لو على جثتي مااوقف له عشان ياذيج

حور تمت اطالعها وعيونها تدمع تدري إن سعاد لايمكن توقف ولايمكن تخلي عناد يأذيها او يأذي اخوانها هزت راسها وصدت الجهه الثانيه وخذت قرار بداخلها ولايمكن اتراجع عنه بتقدم استقالتها اليوم*
تعرف عناد بيتم كل يوم على هالحال وحور ماهي مستعده يصير في سعاد شي بسببها او بسبب هالوظيفه وبالاخص إن سعاد قايله إنها إللي بتوصل حور كل يوم لدوام"

قطع عليها تفكيرها صوت سعاد

سعاد : يلاحبيبتي نزلي ولاتطلعين من الشركه إلا لما ادق عليج*

حور : خالتي ماله داعي تأخذيني برجع ويا منى لاتعبين نفسج

سعاد : لا محد بيوديج ويرجعج غيري يلا حبيبتي ديري بالج على نفسج

حور ابتسمت وحبت راس الخاله سعاد : الله يخليج لنا ولايحرمنا منج يلا مع السلامه
(خذت جنطتها وانزلت)

سعاد ابتسمت : الله يحفظج





دخلت حور لشركه لكن هالمره مااتجهت لمكتبها اتجهت لمكتب المدير العام

حور : السلام عليكم

السكرتيره :وعليكم السلام اهلين حور كيفك

حور : بخيرالله يسلمج انتي شخبارج

السكرتيره : تمام شو بتأمري

حور : تسلمين بس بغيت اسأل الدكتور سعود موجود

السكرتيره : لا لساتو ماوصل بدوا شي ربع او نص ساعه ليوصل

حور : اها زين ممكن قلم وورقه إذا سمحتي*

السكرتيره عطتها قلم وورقه : تفضلي

حور : شكرا



بعد ربع ساعه وصل سعود*

سعود بهيبه : السلام عليكم (ماكان منتبه لوجود حور )

السكرتيره : وعليكم السلام دكتور سعود هيدي الانسه حور موجوده بدها تأبلك

سعود لف جهت حور باستغراب : هلا حور عسى ماشر*

حور : بغيت من وقتك دقيقه إذا ممكن

سعود : اكيد ممكن تفضلي معاي للمكتب

دخل سعود وحور للمكتب وخلت حور الباب مفتوح ماتحب ينصك عليها باب إذا كانت بروحها مع رجل


قعد سعود عالمكتب : تفضلي حور استريحي ليش واقفه

حور واقفه وبيدها الورقه : مايحتاج ماراح اعطلك بس بغيت إذا ماعليك امر توقع على استقالتي*

سعود انصدم ووقف : ليش إشفيج صاير شي انا ضايقتج بشي

حور تسوي نفسها طبيعيه : لاحشى بس الاغرض إللي كنت اشتغل عشانه انقضى وخلاص ماني محتاجه للوظيفه ابي انتبه لدراستي

سعود تنفس براحه وقعد : اشوى ظنيت انه صاير شي*

حور بثقه : لا ابد موصاير شي بس انا مليت من الشغل

سعود ابتسم : لايكون مليتي من اصحاب الشركه بس

حور فاهمه حركات سعود يبي يطول السالفه قالت بجديه : لاشدعوه محد يمل من اهله بس إذا ماعليك امر وقعلي عالاستقاله لاني بمشي خالد اخوي عنده موعد بالاسنان بوديه له (طبعا الموعد من عندها )

سعود ابتسم وخذا الاستقاله*
يعرف حور إذا انحرجت : ابشري وهذي الاستقاله وقعناها اوامر ثانيه

حور باحترام : شكرا ماقصرت يلا انا استأذن

سعود : العفو بس قبل لاانسى مري المحاسبه يعطونج مستحقاتج

حور هزت راسها : شكرا مع السلامه (خذت الاستقاله وطلعت)

سعود تنهد : بحفظ الرحمن * * * * * * * * * * * * * **قعدت الصبح ومالها نفس تنزل تحس نفسها مخنوقه وبالاخص بعد كلام ابوها ونظراته لها*

منايل :اووف يعني انا إشذنبي وبعدين ماصار شي عشان ابوي يكبر السالفه يكفي الخوف إللي عشته بس كله من هالحيه ام دعيج حسبي الله عليها*
فتحت الثلاجه الموجوده بغرفتها خذت لها عصير برتقال خذت لابتوبها الفوشي المرصع بالكرستال*
افتحت المسن شافت وحده من البنات المنتدى توها متعرفه عليها متصله وقعدت تسولف وياها تقزر وقتها




بيت الجده هيا "

العنود ونوير قاعدين بالحوش يتصفحون مجلة زهرة الخليج

العنود : شوفي الثوب هذا يهبل

نوير بققت عيونها : يافضحي جلدها طالع ياويلي ويلها انتي تبين تلبسين نفسه انهبلتي

العنود : يوه تراج زهقتيني انا اتكلم عن القصه والون وبعدين عدي مو لازم احطه كت بحط له اكمام*

نوير : لاوالله فكيني من شرج انا بفصل الخامه لمنقطه إللي شريتها من السوق دراعه احسن من هالبس الفاضح

العنود : انا ماقلت اني بتفصخ مثلها انا قلت قصت الثوب حلوه
وبعدين ياخبله خلينا نغير كل ملابسنا دراعات عاد ياليتها من الدراعات الكشخه*

نوير : خليني في حالي ومافيه احسن من الثياب الساتره ماسمعتي الاغنيه إللي تقول(ألا يالابس الثوب لمنقط واسمك ياحلو مافيه نقطه)

العنود : ترى راحت موضتها الثياب إللي نخيطها ماعاد احد يلبسها إلا العجايز

نوير : لايعني لا

العنود عصبت : الشرهه موعليج الشرهه على إللي يبيلج الزين (خذت المجله اتصفح فيها بروحها)






بالصاله "
خالد وفهد يلعبون بلاستيشن "
منار ونرجس منسدحين عالارض قدام التلفزيون يشوفون المسلسل
حور منسدحه عالاريكه وماكان بالها للمسلسل سرحانه تفكر باللي سوته وشلون بتعلم خالتها سعاد باستقالتها


منال نزلت تركض من الدرجه وراحت صوب منار ونرجس شافتهم مندمجين بالمسلسل طقتهم على راسهم وانحاشت بسرعه

منار معصبه : اوووف وجع إن شاءالله
نرجس معصبه : عمى بعينج يازفته


منال ضحكت وراحت صوب حور شافتها سرحانه نطت على الاريكه واسحبت إيد حور وانسدحت جمبها

حور ابتسمت : هلا انسه منال

منال على حافة الاريكه متقبظه بإيد حور عشان ماطيح: علومج
إللي ماخذ عقلج

حور عارفه قصدها : اقول عن السخافه لا اطيحج

منال : لالاتحاتين متقبظه عدل وإن طحت حضرت جنابج بيطيح معاي

حور : عـــوبا ماينقدر عليج

منال : شفتيه

حور: منو

منال : من غيره سوسو

حور : أي سوسو تكلمي عدل

منال : واي سوفاج سوسو دلع سعود

حور : ياشين السرج على البقر تكلمي عدل وبعدين كلمة سوفاج محتكره لمنايل ياسراقه

منال : لاتضيعين السالفه وقوليلي إشفيج

حور بجديه تنهدت :اليوم قدمت إستقالتي

منال فزت : قدمتي استـــ

حور بلمتها : اوص وقص قصري صوتج لايسمعونج البنات

منال بصوت واطي: ليش قدمتي استقالتج

حور : سالفه طويله مختصرها اليوم عناد بغى يدعمنا بسيارته وتعرفين عناد إذا براسه شي لازم يسويه وبيتم على هالحال كل صبح وخالتي سعاد راكبه راسها تبي توصلني دوامي كل يوم وانا خفت على خالتي لايصير فيها شي بسبتي فقدمت استقالتي

منال انصدمت : حسبي الله عليه هذا مايكفيه إللي سواه*

حور : موغريبه عليه المهم شلون اوصل لخالتي خبر استقالتي

منال : شوفي قوليلها اني مليت من هالشغله والسبب اللي كنت اشتغل عشانه انقضى والبيت بيتأجر ومعاش ابوج على اجار البيت يكفي ويزيد

حور : وإذا عرفت إن السبب خوفي من عناد عليها تعرفين امج مايطوف عليها شي

منال : إذا قالت شي قولي انا مقرره من زمان اول ما نحصل مستأجر اقدم استقالتي حتى منال تدري وانا إذا سألتني بقول لها ان انتي قايلتلي من اسبوع هالكلام

حور ابتسمت : بعد عمري على هالافكار هاتي بوسه*

منال بغرور متصنع : عشان تعرفين بس إشكثر انا مهمه بالمجتمع

حور رفعت حاجبها : اموت على الناس الثقه أنا








الليلـــه سعـــود حاط عزيمه بمناسبه رجعت ابوه واهله من السفر"
الليلـــه غير المعازيم عددهم قليل مو على العاده مايتجاوز عددهم عشرين شخص العاده إذا كان في بيت بوسعود عزيمه تنترس الديوانيه والحديقه"

بوسعود متعومس اكيد انتشر الخبر والناس صدقوا انفضحنا

بندر كان من ضمن الحضور لاحظ ضيقة بوسعود كان متعومس موبالعاده"
سمع اثنين قاعدين قريب منه يتهامسون

الاول : الظاهر إللي سمعناه حقيقه مو إشاعه
الثاني : استغفر ربك لاتحط بذمتك
الاول : كل شي واضح وضوح الشمس وإلا بوسعود مايقطع سفرته إلا لشديد القوي وبعدين جيرانهم شافوا الرجال طالع من بيتهم كانت مواعدته"
الثاني : يارجال كلام الناس واجد والله يستر علينا وعليهم
الاول : مافيه دخان من غير نار


بندر انصدم من إللي سمعه معقوله انتشرت الاشاعه بهالسرعه حرام عليهم يظلمونها
البنت بريئه وانا شاهد وعارف "
رفع راسه وجات عينه على بوسعود كان منزل راسه "
افـــا بوسعود مايستاهل ينزل راسهه*
بندر تحنحـــن ورفع صوته بثقه : بوسعود طالع عمرك

بوسعود انتبه : ســـم

بندر بثقه : اسمحـــلي طالع عمرك ويسمحولي الوجيه الطيبه في هاليله المباركه اتشرف واطلب إيد بنت الصغيره على سنة الله ورسوله

كل الحضور إللي صدقوا الاشاعه انصدمـــوا

سعود ونايف انذهلوا الخطبه جات بوقتها

بوسعود تهلل وجهه بالفرح وبثقه قال : يامرحبا ومسهلا الساعه المباركه ولوها ذبيحه ماعشتك اتشرف بنسب الرجال إللي مثلك وشرواك

بندر شعور مختلط صدمه من رد بوسعود على شعور فرح*
بأنه سكت كل من كان عنده شك في شرف البنت : شرواك الطيب طال عمرك انا إللي لي الشرف

قام بندر يسلم على بوسعود بدت التبريكات تنهال على بوسعود وبندر*

بندر : الله يبارك فيكم*

بومحسن شايب من الموجودين : ومتى العرس إن شاء ترى خير البر عاجله

بوسعود ابتسم : على راحة معرسنا متى ماحدد حنا حاضرين

بندر : انا رأيي من رأي بومحسن خير البر عاجله وانا جاهز باللي تامرون فيه

بوسعود : اجل تم الملكه الخميس الجاي والعرس بعد شهر

بندر ابتسم : على بركة الله إن شاء الله







بيت الجده هيا"

قاعدين بالحوش الجده تسمع الرادو ونوير تصب لها قهوه والعنود تنشر الملابس على الحبل

دخل بندر : السلام عليكم

الجده صكت الرادو : وعليكم السلام يامرحبا

العنود ونوير :وعليكم السلام

بندر حب رأس جدته : شعلوم الغاليه

الجده بحنان : تحب الكعبه ياوليدي

بندر قعد جمبها : هاه غريبه سهرانه لهالحزه

الجده : اتحراك ابطيت*

نوير صبت قهوه لاخوها: سم

بندر خذا الفنجال : سم الله عدوج هاه شخباركم

نوير : بخير الله يسلمك

العنود خلصت نشر الملابس وجات قعدت عندهم : مساك الله بالخير*

بندر ابتسم : هلا مسا النور عساج عالقوه

العنود : يقويك ويخليك ربي لنا

الجده معصبه: ماغسلتي الملابس من الصبح وانا اقولج بس مالج إلا شورج ياقليلة البصيره

بندر عدل قعدته : خلونا من الملابس عندي لكم خبر بيفرحكم

الجده باهتمام : خير عسى خير

بندر ابتسم : ابشرج انه خير إن شاءالله يمه انتي دايم ماتقوليلي تزوج

الجده : إلا ودي تعرس اليوم قبل بكره

بندر ابتسم :اجل باركيلي الليله خطبة بنت بوسعود الصغيره

الجده بعتب : تخطب بدون ماتعلمني افـــا ماهقيتها منك

سعود مسك إيدها وباسها: اعذريني يالغاليه بس كل شي صار بسرعه الليله وانا عند بوسعود فكرت بكلامج لي دايم تقولين متى تعرس فقلت ماني محصل احسن من نسب بوسعود وخطبة ورحب فيني اعذريني يالغاليه كل شي ولازعلج

الجده بفرح ماقدرت تخفيه : جعله مبـــارك نعم الاختيار ياولدي بوسعود رجال قربه يشرف كـــلولولولولولويـــش

العنود ونوير طاروا من الفرحه: كـــلولولولولويـــش
ألـــف ألـــف مبـــروك يالغالي

بندر ابتسم : اللـــه يبـــارك فيكـــم يالغاليـــات عقبال ماافرح فيكـــم

نوير على طول : اميـــن يارب العالميـــن

الجده عصبت : وجـــع ياقليلة الحيا ماعاد فيه لاحشمه ولاحيا

بندر فطس من ضحك على شكل نوير: ههههههههههههههههه يمه عادي خليها ماقالت شي غلط هذي سنة الحياه

العنود : خلنا من نوير وقول لي متى العرس

بندر مسك ضحكته وتكلم بجديه : شوفي يمه بكره ابيج تروحين لهم انتي والبنات وتشوفون طلباتهم والمهر كم وأي شي يطلبونه انا حاضر وافقوا

الجده : ياولدي الله يعينك على طلباتهم هذولا ناس تبذيرهم واجد

نوير : يوه عاد الله يعينك على دلعها اهلها امدلعينها

بندر : وانتوا إشدراكم انها مدلعه

العنود : اسكت بس ياخوي شفناها بعزى العجوز حصه الله يرحمها النعمه طالعه من عيونها

نوير : يـــوووه عليها ساعه تبرق برق اكسرت عيني برقتها

بندر ابتسم : اذكروا الله تراها بتصير إمرتي

نوير والعنود بحسن نيه : ماشاءالله تبارك الرحمن الله لايضرها

الجده : إلا هي وش اسمها

نوير : يمه اسمها منايل

الجده : ملايل وش هالاسم الامحق

العنود : لايمه منايل ماهو ملايل*

الجده : خير إن شاءالله

العنود التفتت لبندر إللي كان يضحك : عزالله كدينا خير ياملايل

بندر يضحك : هههههههههههههههه
خليها على راحتها تسميها الاسم إللي تبيه








ام سعود مصدومه : بوسعود انت شتقول

بوسعود : إللي سمعتيه الملكه الخميس الجاي والعرس بعد شهر

ام سعود : بوسعود إشصار لعقلك بنتي منايل يأخذها بندر*

بوسعود : وبندر وش فيه رجال والنعم فيه مهندس وولد اصل وفصل والكل يشهد بأخلاقه ومعدنه الطيب

ام سعود : انت نسيت وضعهم وبيتهم إللي ساكنين فيه تقول بيت للعمال الأسويين هذا غير طبعهم العتيج وعيشتهم القديمه

بوسعود بحده: ام سعود انا ماخبر ان نظرتج لناس بالطريقه هذي انتي الانسانه الطيبه إللي تخاف الله يطلع منج هالكلام*

ام سعود : يابوسعود انت تعرفني الناس عندي سواسيه وبندر وأهله والنعم فيهم بس بنتك ماتعودة على عيشتهم بنتك تعودت عالخدم والحشم تعودت تلبس احلى الماركات تعودت اتصيف كل سنه بديره

بوسعود انسدح عالسرير: عادي مع الوقت بتعود هذي كلها اشياء كماليه ماهي اساسيه وانا اهم شي عندي رجال يصون بنتي

ام سعود : بـــس

بوسعود : لابس ولاشي زواج منايل من بندر بيسكت كل من تكلم وطلع إشاعه على بنتي

ام سعود اقتنعت : براحتك هذي بنتك عندك وتنجازون انت وياها انا ماراح اتدخل

بوسعود برضا : خلي كل شي علي انا بفاتحها بالموضوع انا عطيت الرجال كلمه ولاني راجع فيها

ام سعود : الله يكتب إللي فيه خير


""""""

سعاد : يمه حور الساعه صارت12 ليش قاعده لي هالحزه باجر وراج دوام

حور بلعت ريقها : هاه أي خالتي لا انا بكره ماراح اداوم*

سعاد باستغراب : ليـــش صاير شي

حور طالعت منال إللي هزت راسه عشان اتشجعها اتكلم

حور بتردد : خالتي انا قدمت استقالتي*

سعاد بصدمه : هـــاه شتقولين

حور طالعت منال بربكه

منال حست انها وقتها تتكلم : أي حور لاعت جبدها من هالشغله وقالت لي من فترها انها بتقدم استقالتها مجرد ماتحصلون مستأجر لبيتهم وأول ماقلتيلها انه فيه مستأجر للبيت قدمت استقالتها خلاص معاش ابوها واجار البيت يكفيهم ويزيد

سعاد براحه : أي اشـــو حسبالي عشان إللي صار اليوم

منال اتسوي نفسها ماتدري : ليش صار شي اليوم

سعاد : هاه لاماصار يعني إشبيصير

منال اغمزت لحور: اي بعد إشلها بعوار الراس ترتاح من هالشغله لاحقه على العنا

سعاد قامت : على قوتج لاحقه عالعنا يلا انا بروح انام تصبحون على خير

حور ومنال : وانتي من اهله*

سعاد وهي صاعده الدرج :
يمه منال طفي اليتات البيت قبل لاتنامون لاتخلين إلا ليتات الممرات

منال : إن شاء الله يمه*

بعد ماتأكدوا ان سعاد دخلت غرفتها"
منال رافعه حاجبها : هاه إشرايج في منوله

حور قامت واحظنتها : يابعد عمري انقذتيني تدودهت ماعاد عرفت اتكلم

منال ابتسمت : ارتحتي الحين

حور : حيل فوق ماتخيلين

منال : عيل يلا انطفي اليتات عشان نصعد انكمل سهرتنا في غرفتنا

حور : يـــلا * * * * * * * * * * * * * * * * * * * * * **صبـــاح يـــوم جديـــد"

الساعه 10 الصبح"*

قعدت منايل حاسه بنشاط اليوم غسلت وجهها بدلت ملابسها رشت عطر من مس ديور وانزلت


كانت اتغني وهي نازله من الدرج اغنيه فيروز*

نسم علينا الهوا
من مفرا الوادي



شافت ابوها وامها قاعدين بالصاله وقبل لاتروح لهم نادت الخدامه

منايل : روز جهزي البريك فاست حقي بروح اصبح على امي وابوي ولااجي إلا وهو جاهز*

روز : اوكي ميمي


منايل اتجهت لابوها وامها إللي قاعدين بصاله

منايل : قود مورننق دادي قود مورننق مامي

بوسعود ابتسم: صباح النور يابوج تكلمي عربي خلي دادي ومامي عنج

منايل باست رأس امها وابوها واقعدت جمب ابوها*

ابتسمت : خلاص ولاتزعل صباح الخير يبه صباح الخير يمه

بوسعود يضحك : أي هذا الكلام السنع شلونج يابنتي

منايل : بخير الله يسلمك دام انت وامي بخير انا بخير

بوسعود : عسى دوم روحي تريقي وبعد ماتخلصين من الريوق تعالي

منايل قامت: إن شاء الله يبه عاد حدي جوعـــانه

ام سعود : روحي يمه اكلي*
عليج بالعافيه

منايل : يعافيج ربي يالغاليه





في الصاله "

العنود : بندر متى بنروح للجماعه*

بندر يتصفح الجريده : بعد صلاة العشا إن شاء الله

الجده : اجل شدوا حيلك يابنات سوى لقيمات وتمر مسمسم و

بندر قاطعها : لايمه لاتسون شي انا بجيب صواني حلويات وفطاير من محل للحلويات راقي وشغله حلو

الجده هيا : يافضحي انروح للجماعه وإيدي فاضيه وش بيقولون الناس عنا

بندر : من قال بتروحون وإيديكم فاضيه بنشتري صواني جاهزه راقيه وإذا بتسون سوا وياكم شي سوا قهوه وشاي

الجده هيا: خلاص إللي اتشوفه ياوليدي انت اخبر منا







الجو في بيت بوسعــــود كان متــــوتر بعد مابلغ بوسعود بنته بخبر خطبتها"


منايل مصدومه : يبــــه انت شتقول انت اتكلم جــــد وإلا
تضحك

بوسعود بحده : وهذي الامور فيها ضحك

منايل : يبــــه انت مستوعب إللي قاعد تقوله انا منايل ال&&&&& بنت أكبرها واسمنها اتزوج هذا إللي اسمه بندر

بوسعود عصب : وبندر وش فيه رجال والنعم فيه واهله ناس طيبين

منايل : يبه هذا تدري وين عايش قريب من العزاب الاسويين ماتخاف علي من العيشه هناك هذا غير عن بيتهم إللي زين للحين ماانهدم عليهم وأهله الله والاهل مغبرين من عصر الدينصورات

بوسعود : شوفي كلام(ن) يوصلج ويتعداج انا عطيت الرجال كلمه وماني راجع فيها وانا اشتري رجال والمظاهر هذي ماتهمني

منايل تبكي: يبه ليش انا إشذنبي بالناس إللي طلعوا علي إشاعات حسبي الله عليهم

بوسعود : يابنتي الناس ماترحم وسيرتنا صارت على كل السان وزواجج من بندر بيسكت الناس وانا اشوف بندر رجال والنعم فيه وصدقيني يابنتي انا ماوافقت على بندر إلا لاني عارف انه رجال كفو

منايل قعدت عالكرسي تبكي : يبــــه بس انا مااقدر اعيش عيشتهم انا غير عنهم*

بوسعود : مع الوقـت بتعودين

منايل شافت إن مافيه فايده وقفت ودموعها على خدها : إن شاء الله يبه بسوي إللي تبيه
(راحت تركض لغرفتها)




دخلت غرفتها طاحت على وانفجــرت من البكــــي

خذت تلفونها دقت على سعود"

سعود : ألــــو

منايل تبكي: سعود وينك

سعود بخوف : منايل إشفيج صاير شي تكلمي

منايل تبكي : ابوي يبي يزوجني لواحد منتف وحافي

سعود تنفس براحه : بس ارجع من الشغل نتكلم انتي هدي نفسج ومايصير إلا كل خير

منايل : اوكي

صكت منايل من سعود وهي حاسه ان الدنيا ضايقه فيها تبي تفضفض اتكلم




الساعه 11 صباحا*
في بيت سعاد"

حور ومنال قاعدين يتريقون في المطبخ"

منال : شوفي اليوم ضروري انروح ويا ميون بنت خالتي للمعرض

حور تشرب كوفي: اوكي بس اي حزه

منال : يمكن العصر

حور : خير إن شاءالله

منال تأكل توست: حــــوره طلبتج*

حور طالعتها بنص عين : هــــاه إشعندج بعد

منال اتمصلح : حبيبتي انتي بعد عمري

حور : اخلصي اختصري قولي إشعندج اعرف سوالفج

منال : شوفي ساره بنت جيرانا قالت لي انها راحت لسليل الجهرا وتمدحه وتقول روعــــه ويهبل كل شي فيه شي خيالي

حور ترتشف من الكوفي : اها وبعدين شالمطلوب

منال : تكفي حوره حياتي قنعي امي خن اروح له*

حور : وليش انتي ماتقولين لها

منال : قلت لها عبالج ماقلت لها بس مارضت عطتني زفه محترمه*

حور بلعانه : وانتي اتروحين عشان سليل الجهرا وإلا عشان العرب إللي بالجهرا

منال : ياملغج ويا ثقل طينتج لاتصيرين سخيفه نبي انروح نستانس

حور : اوكي بحاول اقول لها بس على فكره ترى الناس إللي ببالج مايروحون هالاماكن ولايوطوطونها

منال ضاق خلقها : صــــج حسافه خلاص ماله داعي انروح

حور تضحك : ههههههههههههههه
ومسويه نفسج وحده سياحيه وبتغير جو بس على منو كاشفتج خبز إيدي

منال : حــــدج سخيفــــه

قطع عليهم كلامهم تلفون حور*

حور شافت المتصل : هذي منايل غريبه قاعده هالحزه العاده ماتقعد إلا الظهر

منال : أي والله غريبه ردي شوفي إشعندها

حور ردت: ألــــو

وصلها صوت منايل اتصيح وحالتها حاله

حور موفاهمه شي : منايل إشفيــــج صاير شي اهدي مافاهمت شي

منايل تبكي : لحقــــي علي حور ابوي يبي يزوجني*

حور مصدومه : اتــــزوجين

منال نطت من مكانها ولزقت بسماعة التلفون

منايل حالتها حاله: أي يبــــي يزوجنــــي واحد حافي ومنتف

حور مستغربه: ليــــش

منايل : حسبي الله على الناس إللي طلعوا علي إشاعات واظلموني وام دعيج الله لايوفقها

حور : فهميني إشصار مخي قفل مافهمت شي

منايل تبجي واتشاهق: عقب السالفه إللي صارت الناس قاموا اتكلمون وحتى دوانيه ابوي قلوا الناس إللي يجونه ويوم خطب هذا إللي مايتسمى ابوي على طول وافق عشان كلام الناس

حور اتهديها : منايل حبيبتي هدي "قل لن يصيبكم إلا ماكتب الله لكم" وابوج لو مايشوف الرجال مناسب اكيد ماكان وافق

منايل : أي مناسب وأي بطيخ هذا مو من مستواي وعيشتهم غير عن عيشتي انا مستحيل اقدر اعيش وياهم

حور : زين هالرجال من معارف ابوج وإلا شنو انا اعرفه

منايل زاد بكيها: أي تعرفينه بندر إللي خواته العنود ونوير

حور انصدمت ماصدقت : بندر إللي جدته هيا بنت خالة جدتي الله يرحمها

منايل : أي هذا إللي عايش بالعصر الحجري

منال اول ماسمعت الاسم بققت عيونها وألف علامة تعجب على وجهها

حور : خلاص هدي واكيد ابوج ماراح يختار لج إلا الزين وصدقيني بندر والنعم فيه رجال بكل ماتعنيه الكلمه واهله ناس طيبين وعلى الفطره صدقيني إذا عرفتيهم بتحبينهم

منايل : انتي اتقولين هالكلام بس عشان اتسكتيني

حور : صدقيني يامنايل انا ماقول هالكلام عشانهم يصيرون لي صح هم ناس عيشتهم بسيطه وللحين عالعيشه القديمه بس لي عرفتيهم بتحبينهم

منايل : مابــــي اعرفهم ولا يعرفوني إن شاءالله ايزفوني لقبري قبل إيزفوني له

حور : استغفرالله العظيم لاتقولين هالكلام*

منايل : الموت احسن لي من العيشه إللي بعيشها

حور : منايل صدقيني موكل من خذت تاجر وسافرت والبست احلى الماركات عاشت سعيده واكبر دليل عندج سهام بنت خالتج شوفيها تزوجت اكبر رجال الاعمال وماخلت ديره ماسافرت لها بس عمرها ماارتاحت ولا استانست وبالاخير تطلقت وبعدين تزوجت من واحد عادي وشوفيها عايشه بسعاده واتموت فيه

منايل : بس عالاقل مونفسي هذولا الناس إللي بعيش عندهم سوفــــاج اومبسبــــل مااقدر اتحمل العيشه وياهم

حور : لاتقولين مااقدر وبعدين بندر مهندس وحالته الماديه ممتازه هذا غير عن اخلاقه إللي الكــــل يمدحهها

منايل : لوكان شنــــو إللي اعرفه ومتأكده منه اني مستحيل اتعود عليهم خلاص انا بوافق على هالزواج عشان يرتاح ابوي وكلها شهر شهرين واتطلق منه

حور : استغفرالله تفألوا بالخير

منايل عصبت : حور خلاص كيفي اقول إللي اقوله وبعدين أي خير ايجي من هذا واهله وإلا عشانهم يصيرون لج إذا عاجبج اخذيه انتي

حور : ماراح اخذ بكلامج انتي معصبه وماتدرين شتقولين

منايل عصبت وصكت الخط

حور طالعت منال باستغراب : سدت الخط

منال جاتها موجة ضحك هستيري : هههههههههههههههههههههههههههههههههههههههههههههههههه هههههههههههههههههههههههههههههههههههههههه

حور : حمدالله والشكر شاللي يضحك

منال مستمره بالضحك : ههههههههههههههههههههههههههههههههههههههههههههه لالا حده مولايق تخيلت شكل منايل اتغسل ملابسها وتطبخ وتمسح هههههههههههههههههههههههههههههههههههههههههههههههههه هههههههههه لا واتروح للمزرع واتحلب الغنم والبقر هههههههههههههههههههههههههههههههههههههههههههههههههه هههههههههه

حور : وجع تضحكين على رفيجتج تحمدي ربج وبعدين بندر واهله مافيهم شي

منال:ههههههههههههههههههههههههههههههههههههههههههههه ههههههههههههههه ادري بس مو راكب منايل إللي الخدم والحشم يخدمونها اتعيش هالعيشه هههههههههههههههههههههههههههههههههههههههههههههههههه هههههههههههههههههههههههههههههههههههههههه

حور : مافيه شي يضحك

منال :استغفرالله موقصدي اتشمت بس تخيلت شكل منايل اتقول سوفاج وهي اتحلب بقره هههههههههههههههههه هههههههههههههههههههههههههههههههههههههههههههههههههه هههههههههه

حور ماقدرت تمسك ضحكتها: هههههههههههههههههههههههههههههه حــــرام عليج منايل تكسر الخاطر متعوده عالدلع والرفاهيه

منال تمسح دموعها من الضحك: خنت حيلي تكسر الخاطر لاتلومينها إذا انا وانتي ناس عاديين لاسفر ولادلع مستحيل ندخل لزريبه ونحلب غنم وإلا بقر

حور : لا من هالناحيه تطمني ترى العجوز هيا وبناتها طيبين امي العودا رحمة الله عليها كانت اتسولف لي عنهم*

منال : يــــلا محد يأخد إلا نصيبه





الصالــــه"

بوسعود : شوفي ياام سعود اليوم اهل بندر بيجون بعد صلاة العشا ماوصيكم هالله الله فيهم ترى الناس اجاويد

ام سعود : إن شاء الله لاتوصي ماحنا مقصرين معهم

بوسعود : اتصلي على عبير بنتج عشان تستقبلهم معاج وإياني وياكم عذاري تنزل لناس وإلا ادري انها قايله شي ترى اعرف بنتج السانها طويل وماتحترم احد

ام سعود : ابشر مايصير خاطرك إلا طيب

بوسعود : بارك الله فيكم يلا انا بروح للمسجد اصلي العصر

ام سعود : تقبل الله

بوسعود : منا ومنكم صالح الاعمال





غرفة منايل "

سعود : يعني ماتعرفين عذاري تقول كلام والسلام واتشوف نفسها فوق الناس لاوبعد خاوت رغد وثنتينهم من طينه وحده

منايل : بس عذاري اتقول انها اسمعت الناس يقولون انه بخيل وشكي وجدته عسره وخواته حراميات

سعود ابتسم باستهزاء : تدرين من اللي يقول هالكلام رغد من الحره اطلع اشاعات عشان تقهرج وطبعا عذاري اي شي تقوله رغد اتصدقه

منايل : يعني يقصون علي

سعود : منايل صدقيني لو في بندر واهله شي من الكلام إللي قلتيه تأكدي ان ابوي ماكان وافق عليه

منايل هزت راسها بيأس*

سعود : يلا انا اخليج بروح للمسجد*

منايل : تقبل الله

سعود : منا ومنكم صالح الاعمال



ـــــــــــ /// ــــــــــــ ///

بعد صلاة العشا "

ام سعود وبنتها عبير كانوا جاهزين لاستقبال الضيوف إللي قالوا بيجونهم بعد صلاة العشا

عبير : الله يكتب إللي فيه خير تصدقين يمه زوجي عمر طار من الفرحه اول ماقلت له إن بندر خطب منايل ويمدحه ويقول النعم فيه مايعيبه شي

ام سعود : ادري يابنتي هو والنعم فيه وفي اهله لكن المشكله عيشتهم اتعرفين اختج منايل متعوده على الدلع والرفاهيه

عبير : اهم شي الرجال يكون صالح وفالح وسمعته زينه وباقي الامور عاديه بتعود

ام سعود : الله يكتب إللي فيه خير


صوت جرس الباب يرن"

راحت الخدامه تفتح الباب

وقامت ام سعود وعبير يستقبلون الضيوف

الجده هيا من اول مادخلت وذكر الله في لسانها : بسم الله ماشاءالله

خذت الخدامه من العنود ونوير اربع صواني حلويات وفطاير وقهوه وشاي*

الجده هيا : السلام عليكم

ام سعود : وعليكم السلام ياهلا ومرحبا يالله حيهم

الجده هيا : الله يحيكم ويبقيكم


سلمت ام سعود وعبير على الجده ونوير والعنود ورحبوا فيهم سألوا عن اخبار بعض وصبت عبير القهوه وبدوا يسولفون وتكلموا عن الخطبه وسألت الجده عن طلباتهم وإللي يامرون فيه*

الجده هيا : هاه ياأم سعود شاللي في خاطركم وتامرون

ام سعود : سلامتكم حنا ياخاله الماديات ماتهمنا اهم شي التوفيق وماوصيكم في ابنيتي*
ومثل مانتي عارفه ياخاله بنتي ماتعرف تطبخ ولاعمرها اطبخت ومتعوده عالرفاهيه

الجده هيا بطيبه : شوفي يأم سعود مثل مانتي عارفه ان بيتنا قديم وعيشتنا على العصر القديم وندري إن بنتكم متعوده على الرفاهيه لكن نبيكم تعرفون ان حنا ناس لاحنا هل مشاكل ومن عاش عندنا سكناه وسط عيني وبنت بتصير زوجة ولدي ويشهدالله إني اشوفها مثل بناتي

ام سعود انحرجت من طيبتها: ماعندنا شك في هالشي وانتوا والنعم فيكم معروفين بمعدنكم الطيب

الجده هيا : ماعليكم زود وهالحين قولولنا وين تبون العرس في صاله وإلا ( التفتت للبنات ) شسم الثاني إللي قال عنه بندر

العنود :فندق يمه فندق

الجده هيا : أي هذا هو ضيعت اسمه

ام سعود ابتسمت : لاحنا ودنا يكون عندنا فالبيت إذا ماعليكم امر البيت وسيع ويكفي

الجده هيا : ابد مافيه اخلاف ابشروا دام هذي رغبتك مالكم إللى طيبة الخاطر

ام سعود : جعلج تبشرين بالجنه



بعد ماتفقوا على ان العرس في بيت بوسعود قالت ام سعود انها احجزت فنانتين يحيون حفل زواج بنتها*
وتموا يسولفون عن تفاصيل العرس ويتناقشون واتفقوا على كل شي اما المهر ماحددوه قالت ام سعود مثل ماقال بوسعود مايهمنا الفلوس المهم التوفيق" بعد ماتفقوا على كل شي استأذنت الجده هيا وبناتها حاولت ام سعود وعبير فيهم يتعشون عندهم لكن اعتذروا"






صعدت ام سعود وعبير لغرفة منايل بعد ماراحوا الجماعه وبعد ماام سعود طمنت بوسعود إن كل شي تم على خير والملكه بتكون الخميس


دخلت عبير غرفه منايل"

عبير : كلولولوليش ألـــف ألـــف مبـــروك

ام سعود تسلم على بنتها: بالمبارك يمه ألف مبروك يالغاليه

منايل اطالعهم نظرت عتب ولوم وساكته ماردت

عبير : ياللـــه ياعروس لازم نجهز الملجه يوم الخميس ماباقي شي

منايل اول ماسمعت ان الملكه الخميس دخلت في دوامة التفكير ماكان بالها مع عبير وام سعود إللي كانوا يخططون إشبيسون بالملكه وشنو بيحطوا حتى ماحست بعذاري إللي دخلت وبدت تنتقد هالزواج إللي مايشرف على قولتها وان بندر واهله ناس يفشلون ومتخلفين وسفهاء وماخلت كلمه ماقالتها وبالاخير ماسكتت إلا بعد ماهاوشتها امها واطردتها برى الغرفه*



منايل كان تفكيرها إشلون توصل لبندر لازم اتسوي شي عشان مايتم هالزواج
: ياربي شسوي مابي هالزواج يتم لامستحيل ايأس لازم اسوي أي شي أي شي انا مستحيل اتزوجه بس اشلون انا كل إللي اعرفه عنه انه ساكن بمنطقه جليب الشيوخ بس عنوانه ماعرفه (مرت في بالها فكره وابتسمت)






صبـــاح يـــوم جديد"

قعدت منايل الساعه 7ونص البست خذت الورقه إللي سجلت فيها "العنوان من حور بحجة انها تبي اتشوف بيتهم عشان اتأقلم على موقعه وماتنصدم وطبعا حور عطتها العنوان" واركبت سيارتها واتجهت لمنطقه الجليب

بعد عنا وجهد جهيد دلت البيت

وقفت قريب من البيت طبعا انصدمت من شافت بيتهم
منايل : ياويلي إشهالبيت لاويبوني اعيش فيه (تنهدت) يلا هذي سيارته البرادو إللي قالت عنها حور موجوده يعني للحين ماطلع يلا خن انطره ماوراي شي
* * * * * * * * * * * * * * * * * * * * * * * * * * * * **تمت واقفه تنتظر وبعد عشر دقايق شافت شاب وسيم طلع من البيت
‏
منايل : هذا الوجه مار علي بس وين مومهم
(انزلت من سيارتها واتجهت صوبه)
‏
بندر استغرب من البنت إللي جايه صوبه وتم واقف*
‏
منايل بدون مقدمات : عفوا انت بندر
‏
بندر مستغرب : هالله الله انا بندر وصلتي خير
‏
منايل طالعته من فوق لي تحت : اها هذا انت
‏
بندر بنظره حاده : خير فيه شي
‏
منايل : معاك منايل ال&&&&& اظن عرفتني
‏
‏
بندر ابتسم وتسند على سيارته وربع إيدينه : اهلا حيالله الخطيبه امري
‏
منايل نرفزتها كلمة الخطيبه : شوف انا مو جايه اخذ واعطي معاك بالكلام هي كلمتين ورد غطاها انا مو موافقه عليك ولايشرفني اتزوج واحد مو من مستواي*
‏
بندر عصب : انا كلامي مع الرجاجيل والحين اركبي سيارتج وارجعي للبيت وبعدين لي تصرف ثاني معاج
‏
منايل : هذا تهديد وإلا شنو
‏
بندر : شوفي يابنت الناس روحي دام النفس عليج طيبه
‏
منايل تخصرت : يعني خوفتني
‏
بندر مسكها من ذراعها وفتح باب سيارتها وركبها : شكلج ماتفهمين بالكلام يلا حركي وإلا انا إللي بوصلج بنفسي لبيتكم يابنت الاصل والفصل
‏
منايل انقهرت : مالت عليك سخيف (صكت باب سيارتها وحركت )
‏
‏
‏
‏
‏
‏
‏
مرت الايام وتمت الملكه على خير بندر دفع مهر15ألف دينار وشبكه بعشر ألاف دينار طبعا هم المعرس مايشوف العروس إلا ليلة العرس "
وبدوا يجهزون للعرس طبعا منايل كانت رافضه اتروح تختار شي وتكفلة عبير وام سعود بتجهيزها اما فستانها كان طلبيه من إيطاليا"







الليلــــه غيــــر الفــــرحه في كل ناحيه من نواحــــي القصــــر "
حفــــل زواج*
(بنــــدر و منــــايل)



عبير :خلاص ياحياتي ماصارت خربتي مكياجج

منايل تبكي والكحل سال : قلتلكــــم مابيــــه

عبير : خلاص مايفيد الكلام الحين المعازيم تحت وكل شي تم مسحي دموعج وتعوذي من بليس لاتخلين الناس اتكلم فينا

الصالونه : خليها على راحتها مش مشكله الميك اب بيتعدل خليها بس تخلص بكي وهلا بعدلوا

عبير : خلاص انا خليج بنزل استقبل الضيوف مع امي واهل بندر انجل ماوصيج عليها
* **

اعذروني مارديت عليكم لان الاب ماشبك ونزلت البارت من فوني حتى نزلتها من دون الوان

السلام عليكم و رحمة الله و بركاته

صباح الخير و الرضا من الرحمن

غنادير تسلم الأيادي على هالبارت الروعه

=======================
(( منايل ))

الحمد الله اللي طلع بندر في طريقها و انقذها بس العله أم دعيج هي اللي خربت الدنيا

بهذرتها الزايدة يمكن هالشيء هو السبب اللي خلا بندر يتشجع و يخطبها بعد ما شاف

تأثير اللي صار على أبو سعود .. بس منايل رد فعلها جدا طبيعيه كانت عايشه بسلام

و فاجاة يصير هالشيء و تنخطب و من ناس أقل من مستواهم .. بس تصرفها الاخير

ماله داعي لأنه بندر راح يمسكها عليها .. بس متحمسه اعرف رده فعلها لما تعرف أنه بندر

هو اللي انقذها بيتغير تفكيرها بس لأي جهه هني السؤال .. اتوقع أول شيء بتحس

بالنقص و أنه تزوجها بس عشان يسكت الناس عنها ...

=====================
(( حور ))

زين سوت بتقديم الاستقاله عشان تحافظ على نفسها و على سعاد من شر عناد

الهم بس ابد ما أظن انه شيء يسكته و عنده الحيى الرقطه تحن وراه ...

=======================

سلمتي يا غنادرير

بــ انتظارج

..
..
..

تسلم يدك على الروايه الخيال وعذريني اختى غاندير اوالى مره انتبه لي الرويه بس اطلعت الرويه شي على قوالت اخواننا الكويتين وننتظرك في البارت اجاي ان شالله وممكن سوال متى وقت نزوال البارتات