كاتب الموضوع :
♫ معزوفة حنين ♫
المنتدى :
القصص المكتمله
الجزء الثــــــــــــــــــاني عشر
وينك يا دفا سنيني
تعب قلبي الم وجراح
خريف البعد يطويني
وتبكي حولي الاوراق
رفعت حاجب من حواجبي وانا مستغربة من الانسانة الي يالسة جدامي صارلها ساعة تقريباَ وتهز ريلها بعصبية ...........غريبة من دخلت تفاجأت بها والمشكلة ساكته كل الي قالته تبغي تشوف الاستاذ حميد وراح تترياه شو الموضوع ما أعرف .........
رفعت ايدي عشان اشوف الساعة كانت حوالي ثمان ونص ......... حركت عيوني على المكتب نظرة سريعة ورديت اطالع الملف الي جدامي ........... انتبهت فجأة على تلفون يرن
الظاهر أنه مبايلها ........رفعت راسي اطالها وهي تسكر المكالمة دون لا ترد وتفر المبايل جدامها
بعصبية ........
نزلت راسي بلا مبالاة وحتى لا تلاحظ اني اراقبها
:هو دومه يتأخر جي
رفعت راسي وأنا عاقدة حياتي :آسفة ما سمعت
حركة عينها بحركة مثل الي نفذ صبره :أقول دومه هو يتاخر جي
عليا:الصراحة لاء .....أول مرة
قالت :انزين اتصلي به شوفيه ...... متى بي
رفعت حواجبي وانا استغرابي يزيد من هالانسانة الي يالسة جدامي شو سالفتها وشو تبغي من حمبد: هو المدير وكيفه يتأخر ولا لاء
....................ما أقدر ادخل
عوت بوزها كأن الكلام من عايبنها وصدت الصوب الثاني
شفتها تدق أصابعها على الطاولة الي جدامها مثل الي يتريا حد
بس الغريب ان هزة ريلها لين الحين ما وقفت ............. ما شاء الله من كل الاتجاهات تشتغل
الصراحة الصوت كان وايد مزعج ....بس طنشتها
كنت منزلة راسي وأنا اراقبها بعيوني .... لما شلت المبايل وتمت تدق على ارقام بعصبية
تمت حاطة المبايل على اذنها وهي تاكل ظفرها وريلها بعدها على حالتها (تهتز بعصبية )
:اوووووووووووف ليش ما يرد
قالت هالكلمة وهي تفر المبايل على الطاولة الي جدامها ..........لاء الظاهر اليوم المبايل بتكسره لا محاله
شوي والا دخل حميد وهو مبتسم......... دخيلك لا تبتسم قمت اتشائم من ابتسامتك
بس ماتت ابتسامته لما شاف الي يالسة .......... تمت عيونه تدور بيني وبينها
وهي شافته بنظرات حسيتها خايفة ما ادري ليش ؟؟؟؟
وقفت في مكانها :ابغي ارمسك شوي
حسيت حميد مرتبك يمكن لوجودي
حميد:أـنزين تفضلي المكتب
تخطاني حميد ودخل وراها بدون لا يرمس ولا يصد صوبي ........والي خلاني استغرب انه بند الباب وراه
يا ربي الفضول بياكلني شو السالفة
شو يا ترى تبغي منه او بالاصح شو بينهم
يلست العب بالقلم الي بأيدي وانا اتمنى يوصلني من الحديث الي داخل
لكن فجأة سمعت مثل ما يقولون اخوانا السوريييين طلاطيش كلام
بس موووووول ما فهمت شو السالفة
وقفت وانا خايفة
تجدمت من المكتب شوي شوي شرات الحرامي الي خايف اهل البيت يصيدونه
بس فجأة حسيت قلبي وقفت وتصنمت في مكاني لما انفتح الباب وظهرت الحرمة
وهي معصبة حتى من كثر عصبيتها سكرت باب مكتبي بالقو وراها
رديت مكتبي بسرعة خايفة حميد يطلع من المكتب ويشوفني جريبة من المكتب ويشك
شو السالفة ........شو الموضوع سمعت صوت تلفون مكتبي يرن
شليته
عليا:ألو
حميد:ايبي البريد
توووووووووووت توووووووت تووووووووت
شليت السماعة من اذني وطالعتها
بلاه هذا جي دفش بس ما وحالي اكمل كلامي الا واسمع صوت حميد من داخل المكتب
:ويييييييييييييييين البرييييييييييييييييييييد
شليته بسرعة ورحت على طول صوب المكتب دقيت الباب ودخلت
شفت شكل حميد معصب على الآخر ....... كانت اول مرة أشوف حميد متنرفز جي ....يا ربي شو السالفة
وايد اشياء تصير في هالمكتب ما أفهمها
حطيت البريد جدامه ورفع هو راسه يطالعني كانه يدور البحر الي يفرغ فيه كل غضبه
ويطلع كل حرته فيه
نزلت راسي
وشفته نزلت راسه يوقع على الاوراق خلص توقيع سكر الملف بالقو وفره جدامه على المكتب
وفر القلم وراه
شليت الملف من جدامه ومشيت عشان اظهر
بس انتفض جسمي على صوت حميد وهو يقول
:كم مرة أقولج لا تظهرين دون لا تستأذنين
شو سالفته يبغي يظهر حرتها فيني ولا شووووو؟؟؟؟؟؟؟؟
بس الحين مب ناقصة مشاكل فما رديت عليه
غمض عينه وتافف أوكي اظهري
ظهرت ورحت على طول يلست على مكتبي ....... ما ادري ليش نزلت دمعة من عيني
الصراحة اول مرة لاني دايماَ ما اكون ضعيفة لما حد يصارخ علي
بس يمكن الحادثة الي صارت خلتني ضعيفة
عديت في داخلي....................... أوووووووف خلاص 1 2 3
وخذت نفس مسحت دمعتي :لازم اصير اقوى من جي .....لا زم اصير أقوى
لاااااااااااااااااااازم
.................................................. ...
كنت حاطة ايدي على خدي واطالع المكان بملل اوووووف الساعة كم يا ربي .....طالعت الساعة كانت
وحدة ونص
يالله هانت ما باقي شي طلعت منظرتي من الشنطة ويلست اعدل الجحال
لما سكرت المنظرة فجيت عيني على الي واقف عند الباب ومربع ايدينه جدام صدره :
No comment
قالها حميد وهو يهز راسه ويطالعني بعصبية
ورجع دخل داخل يلست اطالع المكان الي دخل منه
من وين طلعلي هذا بعد صدق جني
أوووووووووووف الحين شو بيقول .......... صدق بيقول ياهل
يا ربي يولي يقول الي يقوله ما يهمني الصراحة
ما ادري ليش لما قلت خله يولي حسيت بوخزة في قلبي
يا ترى الحرمة شو كانت تبغي من حميد ............. ما ادري ليش حسيت من بينهم شي
طريقة نظراتهم لبعض تتشكك الي ما يشك
كانت تطالعه بخوف غريب مستحيل انسانة تخاف من انسان ما تعرفه او ما يكون وايد جريب منها
ويقدر يتحكم بها
غريب حالهم .................. اصلاَ حميد كله على بعضه غامض وغريب
غمضت عيني بضيج بمجرد ما اتخيل ان ممكن تكون من بينهم علاقة
رديت ظهري على الكرسي وتساندت عليه وانا اتافف :اووووووووف
يا ربي ابغي اطرد هالاحساس الغريب الي ياني .......ما اعرف شو تفسيره
يلست العب باظافري بس بعدين ما ادري ليش............... فكري يوديني لهالاحساس
الي كان للأسف ((غــــــــــــــيــــــــــره))
أغار هي اغار هاي الحقيقة وعلى منو على حمييييييييييييييييييييد
شو هالافكار أنا من متى افكر في حميد .......... عشان اغار عليه
لا لاء هذا مجرد فضول انا اكيد يتهيأ لي ..... الصراحة سخافة الي افكر فيه
تافف بس ما ادري هاي المرة رقم كم الي اتأفف فيها اليوم
..................................
وصلت البيت الساعة ثنتين ونص تقريباَ دخلت البيت شفت نورة وخواتي يالسات
تجدمت منهم
شفت نورة يالسة على القنفة وفي حظنها فطوووووم كانت تعقص شعرها
وكانت شهد يالسة الصوب الثاني اطالع تلفزيون
شفت نورة اليوم كاشخة بلاها شو مستوي .......... ليكون مستانسة ......أوكي يا نورة أن ما نكدت عليج مزاجج
رحت غيرت ثيابي ورجعت تحت شفتهم في غرفة الطعام .............رحت لهم
واول ما دخلت تفاجات ان ابوية محد
قلت وأنا أطالع نورة باستحقار :ويييييييييييين أبوية؟؟؟؟؟؟؟؟؟؟؟؟؟
نورة شفتها تاكل شهودة ولا مسوتلي سالفة قالت: ظاهر ما بي على الغدا
فجيت عيوني على هالوقاحة ........انا تسويلي جي يا ام الدويييييييييس
ما علي براويج
يلست على الطاولة ويلست اطالع الاكل
صدت صوبي وقالت وهي تاكل ولا رفعت راسها صوبي يعني باختصار مسوتلي أكبر طااااااف:ليش ما تاكلين
رصصت عيوني بقهر ........ بتذبحني من القهر هالسبالة : قلتلها بصوت واطي وبهدووووء:ما يخصج ............ خلج في حالج
شفت ويها قفط مرة وحدة ابتسمت وحطيت لي أكل في صحني
انزين براوييييييج أونج عاد مستقوية..........
عليا:اقوووووول نورة ......... اسمحيلي عاد ما واسيتج......... بس تدرين عاد مشغولة شوي
رفعت عيونها تاطلعني وهي معقدة حياتها :على شوووو تواسيني
عليا:رفعت حياتي وأنا اتصنع الاستغراب :ما ادري والله ....... شقولج ....... بس غريبة عيل ليش ابوية يقول جي شكل الكلام الي سمعته غلط
نورة عقدت حياتها وقالت بخوف ؟:وشوووو سمعتيه
عليا حاولت اسوي عمري ناسية :أمممممممم .......... ما ادري سمعت ابوية يقول أنج ......
لا سمح الله بعيد الشر عنج طبعاَ ..............يقول أنج عقييييييييييييم
شهقت مرة وحدة وتمت تطالعني مب بس دمعة في عينها الا بحيرة دموع تيمعت في عينها لحظتها ..........ههههههههههههههههههه
شفتها تمت اطالعني بالم ...... تعرفون كسرت خاطري نظرتها شرات اليتيييم الي ماله ملجأ
ويتالم ويضطر أنه ينذل عشان يعييييييييش
هههههههههههههههههه فلم سويته هب نظرة هاي
قامت مرة وحدة وراحت فوق .......... حتى صوب باب غرفتها سمعته عندي
ههههههههههههههههه حليلها ...........فديتني صدق ذكية ضربت عصفورين بحجر واحد
خربت عليها فرحتها............ واكيد بخرب العلاقة بينها وبين ابوية
هههههههههههههه مالت عليها ..........
كملت اكلي وانا مبتسمة ........... زين زين خلا تغسل عيونها بالدموع
هههههههههههههههههههههههههههههههههههه
بعد ما خلصت رحت فوق ومريت صوب غرفة ابوية
كنت اسمع وناتها وهي تصيح لأنها كانت عالية
هههههههههههههه لحظتها كانت على اذني احلى من كل الاغاني الي سمعتها في حياتي
ابتسمت باستمتاع ورحت صوب غرفتي
شفت مبايلي كان فيه ثلاثة مس كول من لميا
استغرب مسكت المبايل عشان اتصل بس رن قبل باسم لميا
شليته
عليا:ألوووووووووووووو
لميا :علاية ألحقي علي .............. خلاص بمووووووووت بتخبل آآآآآآآآآآآه
عقدت حياتي وانا خايفة: بلاااااااااااااج شو مستوي
لميا:عــــــــــــبيد ..............عبيد يا عليا خطبني
آآآآآآآآآآآآآآآآآآه حاسة بموت ما اصدق الحمدالله
تدروووووون لو كانت جدامي جان الحين سدحتها على الارض وضربتها ضرب .........صدق ما عندها سالفة
خوفتني واخر شي على هذااااااااااااااااااا
زين قلبي ما وقف علي الصراحة
عليا:والله انج .......... زين قلبي ما وقف علي ........وآخر شي ترمسيني على هالبارد
لميا :حرام عليج علاية ........... لا تخربين علي فرحتي
ههههههههههه لاء ما بخرب عليج كفاية نورة ههههههههههههههههه
عليا:هههههههههههه .............زين زين وهالجليد منو ذوبه وخلاه بتحرك
.......... صدق منو قالج
لميا:هههههههههههه امس شهاب كان يقولي على طنازة بس سويتله طاف تعرفين شهاب وسوالفه ............. بس اليوم امي رمستي ........... تصدقين حاسة قلبي بيوقف علي من الفرحة
عليا:هههههههههه بسم الله على قلبج......... زين زين مبروووك غناتي........ وجان كملها شهاب وخطب جولييييييييييييت
لميا:هههههههههههههه وين تبين .......... بعدها ياهل بعدها دربها طويل
عليا:ههههههه هيه نسيت نظرية عايلتنها مافي زواج قبل الجامعة
لا بنت ولا ولد
لميا:هههههههههه بسج ......... عاد انا قلت اقولج انتي اول وحدة
عليا:فديتج والله لميو فيج الخير
لميا:تسلميييييين..................... اخلييييج الحين عيل .......سلمي
عليا:يوصل حبيبتي
لميا:مع السلامة
عليا:مع السلامة
ابتسمت براحة استانست وايد حق لميووو تستاهل الصراحة
وحليلها وايد عانت
الصراحة الله يعينها عليه .......... ما أدري كيف بستحمل برود اعصابه
ههههههههههه ما ادري ليش لحظتها تذكرت حميد
حميد الي ما قام يفارق خيالي ........... ما ادري ليش الصراحة
يمكن موقفة والي سواه وياي خلاني أغير نظرتي له
يمكن خلاني دايماَ اشوفه الشاب الشهم ........الي وقف وياي
وستر علي
بس للاسف الظاهر هب أنا بس الي اغتريت به و خذت
عنه هالفكرة الظاهر كل الي يقرون القصة
خذوا هالفكرة ..........
شليت هالافكار من بالي وقلت اريح شوي
.................................................. ...
فتحت عيوني بكسل مديت ايدي وشليت الساعة اشوفها كانت ست وعشر تقريباَ
قمت ورحت اتغسل .......... اول ما طلعت سمعت
صوت الاذان ما ادري ليش ساعتها تذكرت صلاتي
غريبة صح وحدة بسني ولين الحين هب مواضبة على الصلاة
لكن للاسف هاي كانت الحقيقة ...........
شليت السيادة وصليت المغرب أول ما ركعت حسيت بشعور غريب
راحة عجيبة ما كان ودي أقووووووووم
بس لازم اقوم لأني كنت اصلي
خلصت الصلاة وحطيت السيادة في طرف الغرفة
طلعت من غرفتي وأنا احرك ايدي عشان اتنشط شوي بس
سمعت صوت من تحت رحت وقفت فوق على حد الدري
تحته على طووول كانت الصالة يعني الي يوقف هني يشوف كل الي يصير في الصالة
ناصر:"يعني ما بتقوليلي شو فيج
نورة:صدقني ناصر مافيني شي
شفت ابوية تنهد وهز راسه وهو يقول: على هواج
عويت بوزي على حال أبوية ونورة الي كل يوم وهو يتحسن
نزلت من على الدري بس ما ادري ليش نص الدري ورديت رجعت فوق
رحت غرفتي
كانت الساعة استوت سبع تقريباَ :غريبة شو السالفة الوقت يمر بسرعة
فتحت اللاب دخلت المسن كنت حاطة أوف لاين
غيرت نكي
وحطيت : ؛¤ّ,¸¸,ّ¤؛°`°؛¤لو الحب موت قلت أبيه ولو العشق موج سبحت فيه ولو أنت سجن والله لعيش فيه ¤
شفت وايد كانوا داخلين بس لفت نظري نك نيم
((تيس مزوووووود))
ابتسمت على النك بس ماتت ابتسامتي لما شفت الايميل هذا صدق تيس
هههههههه ما غلط
؛¤ّ,¸¸,ّ¤؛°`°؛¤لو الحب موت قلت أبيه ولو العشق موج سبحت فيه ولو أنت سجن والله لعيش فيه ¤
مرحب يا التيس
__((تيس مزوووووود))
مرحبتييييييييييين هلا والله يا التيسة
؛¤ّ,¸¸,ّ¤؛°`°؛¤لو الحب موت قلت أبيه ولو العشق موج سبحت فيه ولو أنت سجن والله لعيش فيه ¤
تيسة حرمتك
((تيس مزوووووود))
هههههههههه زين زين بطوفها لج هالمرة ........ شحالج
؛¤ّ,¸¸,ّ¤؛°`°؛¤لو الحب موت قلت أبيه ولو العشق موج سبحت فيه ولو أنت سجن والله لعيش فيه ¤
بخير الحمدالله شحالك انت
((تيس مزوووووود))
بخيييييييير والله .........أقول بلاج ضاربة مخفي ههههههههههه
؛¤ّ,¸¸,ّ¤؛°`°؛¤لو الحب موت قلت أبيه ولو العشق موج سبحت فيه ولو أنت سجن والله لعيش فيه ¤
يا الظريف
((تيس مزوووووود))
ههههههههه تسلمين كلج ذوووووووق
؛¤ّ,¸¸,ّ¤؛°`°؛¤لو الحب موت قلت أبيه ولو العشق موج سبحت فيه ولو أنت سجن والله لعيش فيه ¤
الله يسلمك ؟؟؟؟؟؟؟؟؟؟؟؟ ؟اقول سلطان
((تيس مزوووووود))
هلا أمري
؛¤ّ,¸¸,ّ¤؛°`°؛¤لو الحب موت قلت أبيه ولو العشق موج سبحت فيه ولو أنت سجن والله لعيش فيه ¤
أبغي اسالك شي وابغيك تجاوب بصراحة
((تيس مزوووووود))
اســــــــألي
؛¤ّ,¸¸,ّ¤؛°`°؛¤لو الحب موت قلت أبيه ولو العشق موج سبحت فيه ولو أنت سجن والله لعيش فيه ¤
انت شو تبا مني ؟؟؟
((تيس مزوووووود))
كيف ما فهمت ؟؟؟؟؟؟؟؟
؛¤ّ,¸¸,ّ¤؛°`°؛¤لو الحب موت قلت أبيه ولو العشق موج سبحت فيه ولو أنت سجن والله لعيش فيه ¤
يعني أنت خاطب شو تبا مني ملعوزني ومأذني .؟..؟؟
((تيس مزوووووود))
الصراحة .........تبين الصراحة 
؛¤ّ,¸¸,ّ¤؛°`°؛¤لو الحب موت قلت أبيه ولو العشق موج سبحت فيه ولو أنت سجن والله لعيش فيه ¤
يا ريت 
((تيس مزوووووود))
هيه انا خاطب واحب الي خاطبنها على فكرة
.................. ومستحيل اهدها بس بعد أنتي تعيبيني 
؛¤ّ,¸¸,ّ¤؛°`°؛¤لو الحب موت قلت أبيه ولو العشق موج سبحت فيه ولو أنت سجن والله لعيش فيه ¤
احترم نفسك لو سمحت 
((تيس مزوووووود))
أنتي ما تبين ترمسين بصراحة هاي الصراحة 
؛¤ّ,¸¸,ّ¤؛°`°؛¤لو الحب موت قلت أبيه ولو العشق موج سبحت فيه ولو أنت سجن والله لعيش فيه ¤
اوكي لوين تبغي توصل تراك ان شاء الله بتعرس 
((تيس مزوووووود))
هههههههههههه بحطج حرمة ثانية ........ شرايج موافقة
فجيت عيني وحلجي ..............اطالعه بقهر
رصصت عيوني وأطالع الي كاتبنه
صدق قهرني السبال والله لو جدامي لادوسه في بطنه لين ما يموت
......... حسيت ضغطي ارتفع عشان جي ما تعبت عمري
سويت له بلوك ودلييييييييييييييت
وسكرت المسن
قهرني الصراحة آخر زمن استوي حرمة ثانية............ جيه شو شايفني شرات نورة سراقة ريااااييييييييييييييييل
............................................
فتحت عيني ثاني يوم على صوت المنبه
أول مرة اقووووم واحس فيني كتله نشاط ............... روحي مستغربة
قمت بسرعة ورحت اتغسل واغير ثيابي
ما ادري ليش كنت ابغي الفت نظر حميد ......... ولو أني ادري مستحيل الفت نظره
تحطمت وتشائمت لحظتها
بس لازم احاول ؟............... قمت وتعدلت لبست عدساتي الزرق المحددين بالبني
وحددت عيني بالازرق .........للتغير ملينا من الاسود الصراحة
وحطيت جلوس وردي خفيييف
اكتفيت بهالاشياء .............. نزلت تحت شفت ابوية يالس يشرب شاي ويقرا الجريدة الي جدامه
عليا:صباااااااااااااااااح الجوري
نزل ابوية الجريدة عن ويهه وهو يبتسم :صبااااااااح الورد ....... ما شاء الله شو هالنشاط من صباح الله خير
عليا:ههههههههههههه بتحسدني الظاهر
ناصر:ههههههههههههه لاء لاء ............ لا أحسدج ولا شي
عليا:أنزين ابوية بطلع انا
ناصر:طالع أبوية ساعته ...... مب بعده وقت
عليا:لاء أحسن ما فيني اتأخر
ناصر:هههههههههههههههههههههههه شكله حميد مأدبنج عيل .......
ابتسمت على تعليق ابوية وطلعت
متوجهة للدوام وانا مستانسة
وصلت المكتب على الساعة سبع ونص أول مرة في حياتي أوصل الدوام في هالساعة ههههههههههههه
يلست على المكتب وانا اتأمل المكتب ....... كان مكتبي بسيط اقرب للرسمية اكثر من الفخامة
بعكس مكتب حميد الي احسه وايد فخم .............
يسلت اتامل المكان ........... لفيت الكرسي على ورا...... كان اليدار الي وراي نصه زجاج مطل على الشارع الي جدام الشركة
يلست اطالع السيارات والي رايح والي راد .......... حلو الصبح تراقب الناس
بس بعدين تذكرت الي يقول من راقب الناس مات هماَ
ابتسمت على المثل الي كان يقولي اياه دوم دكتوري في الجامعة
مر شريط ذكريات الجامعة سريع على بالي لكن انقطع علي صوت حميد وهو يقول
حميد:صباح الخير
عليا:صباح النور
تخطاني وراح مكتبه ............. الحمدالله اليوم ما ابتسم ........ عيل أكيد اليوم ما بيصير شي
يمكن مرت دقيقة وطلع حميد من مكتبه وتجدم ويلس على الكرسي الي جدامي
استغربت الصراحة
حميد: وهو يالس على الكرسي براحة ويقولي:جيه الساعة كم الحيييييييين
عليا:طالعت ساعتي:سبع ونص تقريباَ
شفته رفع حياته وهو يبتسم :عيل ساعتي صح
............... ما شاء الله شو هالنشاط اليوم
عليا:ههههههههههههه ............ لاء شكلكم اليوم بتحسدوني
ابتسم حميد :منو نحن
عليا:انت وابوية وانا
فجاة ضحك حميد ويلست اطالعه وهو يضحك:هههههههههههههه وانتي بعد من الي بيحسدونج
عليا:هيه روحي مستغربة أني اليوم ياية من وقت
اكتفى حميد بابتسامة وقالي وهو يطالع المكتب الي فيه الملفات :وين ملف مرابحة السيارات
فتحت الدرج وطلعته منه :هذا قصدك
حميد:هيه هذا ايبيه
مديت ايدي اعطيه الملف شل الملف
وحطه على الطاولة الي جدامه ويلس يتصفحه
غريبة يالس عندي اليوم ............ الظاهر راضي علينا هههههههههه
ابتسمت وأنا اتأمل ويه حميد
حميد لا هو ابيض ولا هو اسمر في النص
حنطي يعني .......... عيونه سود ما فيهم حلاة بس يجذبونك تطالعهم فيهم بريق غريب
قبل كنت اسميه بريق الجذب
ههههههههههههههه ما ادري ليش قبل كنت أحسه وايد جذاب ويقص على البنات هذا قبل ملجته طبعاَ
بس بعد ملجته تغير كل شي ما قام يحب البنات لكن البريق بعده في عينه
انتبهت على حميد وهو يطالعني وهو رافع واحد من حواجبه ويبتسم باستهزاء
:وين سرحانه
حسيت ويهي تلون الصراحة مية لون
عليا:ها .......... لاء ولا شي
ابتسم باستهزاء وكمل قراية في الملف .......... صراحة صح يعيبني بس بعد يقهرني هالخقااااااق
شوي والا رن مبايله
رد عليه وهو قايم وشال الاوراق
حميد:هلا والله ..........بخير والله شحـــ
هذا آخر شي سمعته لأنه بعدين دخل مكتبه .................
شليت الاوراق الي لازم اراجعهم اليوم ويلست اراجع
مر الوقت بسرعة يا ربي فريت الملف جدامي بملل
.................. بلاه هذا من دخل ما طلع ولا سمعت صوته ............ حتى اليوم ما طلب ولا ملف
يا ربي ما يبغي شي ........... ابغي اشوفه ......أووووووف
صدق والله انذليت ذل بس يا ريت يكون مصير الي صار بحياتي الذل بس
لحظتها ما كنت أفكر في شي الا كيف اوصل لقلب حميد
هالقلب الي صعب حد يوصله بسهوله
الصراحة:أحـــــــــــــــبــــــــــــــك أيها الرجل الــــــــــغــــــــامض
هههههههههههههه استويت عبلة أخر عمري
يا ربي يت في بالي فكرة يمكن ألفت نظره بها .......... علطول مسكت بطني
وطلعت اصوات على اني اتويع
كانت أصواتي خفيفة الظاهر حميد ما سمعها صرخت صرخة بس مب وايد عالية لأني في الشركة يعني أنا ابغي الفت نظر حميد هب الشركة كلها
عليا:آآآآآآآآآه
تميت أون وانا عيني على الباب
لين ما ظهر حميد ساعتها بسرعة نزلت راسي
وتميت اون .............. عشان لا يشك
آآآآآآآآآآآآآآآآآه ............ آآآآآآآآآآآآآآه
تجرب حميد من المكتب: عليا ......... شفيج .......شو يعورج
عليا :قتله وانا اتويع:آآآآآه بطني يعورني....... ما ادري بلاني وايد يعورني ......آآآآآآه
حميد:أنزين اوديج المستشفى:
عليا:لااااااااء ......آآآآآآآآآآه ودني البيت
حميد :انزين اخبر ابوج هو هني ............ خله يشوفج
صرخت معترضة يا الغبي ما ابغي ابوي ابغيك انت
:لااااااااااااااااااااء ............آآآآآآآآآآآآآآه قصدي ما ابغي أخوفه ........خلا ص اذا
انت ما تقدر بروح روحي........آآآآآآآه يعورني
حميد:لاء هب جي قصدي الله يهديج ............ أنزين خلاص قومي اوصلج البيت
قمت وانا امثل اني اتويع ومب قادرة امشي
ههههههههههههه الصراحة شفت الخوف في عيون حميد لاء دام خاف أكيد في أمل
ههههههههههههههه الظاهر أني ممثلة خطيرة وأنا ما ادري....................
ركبت سيارة حميد و أول ما ركب حميد شغل السيارة وهو عيونه علي
كنت حاطة ايدي على بطني وانا امثل اني اتويع
ومغمضة عيوني .......... يعني كنت عايشة الدور ههههههههههههه
فجأة سكت ويلست اقوووول ليش رديت البيت الحين شو بسوي عالاقل هناك جان شفته في البيت بشوف منو نورووووه
تذكرت فجاة اني في سيارتة وان صارلي فترة ما ونيت
أوووووووه ليكون شك
حطيت ايدي على بطني:آآآآآآآآآآآآآآآه
كنت أطلع صوت الويع وعيني على حميد الي شفت على ويهه شبه ابتسامه
أويييييييييييه ليكون سمعني .......... بس كيف سمعني أنا كنت اكلم عمري ........
بخبلني هذا شكله ...............
سمعته يقول وهو يبتسم: وكانه بطنازة:ها عليا بعده الويه
عليا:آآآآه يعني أخف من قبل
ابتسم حميد وطالعني :وصلنا
عليا غمضت عيني على اساس أني اتالم :مشكووور حميد تعبتك وياي
حميد :افا عليج في الخدمة انا
صديت الصوب الثاني عشان افتح الباب بس وقفت لما حميد زقرني
صديت صوبه وشفت على بويه ابتسامه استهزاء وقالي
حميد :عليا بقولج شي
نصيحة
((لا تـــــعـــــشـــقــــي الــــــــــــبحــــر تـــــــــــرا البـــــــحــــر غــــــدار))
صديت صوبه وانا متفاجئة شو قصده؟؟؟؟؟؟؟؟؟؟؟؟
انتهى البارت
 سامية المقام
تحيااااااااااااتي للجميع
|
24-11-11, 01:05 PM
جديد مواضيع قسم القصص المكتمله
العرض العادي
