الجزء الحادي و الأربعون



لفت الشال حول كتوفها و طلعت للحوش تنفست بعمق و هي تشوف الشمس تشرق و الغيم يغطيها كل ما حاولت تظهر بالسماء تشبه لحياتها كثير ذيك الحظة لازم يغطيها الحزن أو المشاعر المتناقضه..
الساعة الـ 07:55 صباحا و مشعل لسى ما رجع البيت أو فتح جواله حتى أتصال ما فكر يطمنها أنه بخير مشغول أو بيتأخر مثلا تمنت أنها راحة البيت مع أمها و لا كذبة عليها و قالت لها مشعل رجع ما تنكر أن في داخلها خوف أن يكون صائبه سوء لكنها صعب تسأل عنه حد و يطلع مهمل مجبورة تنتظر و تبلع كل غضبها و قهرها معه.....

*****************

دخل البيت قبلهم و حط الشنطة في الصالة لا شعوريا دار رأسه لزاوية الي شاف مرام فيها فهز رأسه و تمتم ( اللهم أني صائم )
سلطان\ خلوا الشغالة بعدين تطلع الشنطة
أم عبير\ إيه خلها هنا تعبناك معنى
سلطان\ لا تعب و لا شئ يالله أنا بروح تبون شئ ؟
أم عبير\ خلك نام عندنا لين المغرب
عبير\ أي والله وين بتروح الحين أكيد في البيت كلهم نائمين
سلطان\ تصحى الوالده على الظهر أكيد بتطلع الغرفه تفقدني
أم عبير\ بتعرف أنك نمت عندنا
سلطان\ زين أصلا والله مكسر ما يمديني أسوق السيارة
عبير و هي طالعه الدرج\ بجهز لك الغرفه
سلطان\ لي ملابس عندك و إلا أجيب من السيارة
عبير\ لا فيه لك بيجامه فوق.......

********************

رفعت رأسها عن المخده بعد نوم مقطع و متعب تأملة مكانه لسى خالي و طالعت الساعة الـ 01:20 مساء أخذة جوالها و أتصلت فيه المحاولة الألف من أمس و كلها نفس النتيجة مغلق [ ياربي وين راح هذا ياربي خير ] تحاملت على نفسها و قامت من السرير غسلت و طلعت للمرسم محتاجه تفرغ غضبها في أي شئ و ترحم نفسها من التفكير فيه على الأقل هي صائمه يعني لازم ما تغلط أحساسها أنه بخير بيذبحها لكنها أقنعت نفسها تنتظره لين المغرب لو ما رجع تخبر عمها مسكت الفرشاة و بدت تخط خطوط عشواية مبعثرة تحاول تهدي من رعشة يدها و تكتم القهر.....

***************

فتح عيونه و طالع السقف المكان حوله مختلف لكنه مألوف لوهله تذكر كل شئ مر عليه من أمس متفاجئ من قراره كيف قدر يعمل كذا ؟ وش وضعها الأن ؟ معقول كنت أناني لهدرجة أقفل جوالي و أنام بالفندق شلون بقابلها الحين وش بقولها بضطر أكذب عليها كمان أمس أعترفت لها بشعوري تذكر ما تذكر ما أدري بس شو موقفي لو تذكرت و وأجهتني بالي مخبيئه إلا الحب يا مشعل تعرف معناه لازم تصدق في كل شئ و هذا الصعب معها و إلا أريج لا تعذبها أكثر !!
قام من فراشه و طالع الساعة الـ 03:50 عصرا تأخر الوقت لكن ما يقدر يرجع الأن البيت ( خلني أكمل يومي لين الأذان و أروح لها و الي يصير يصير ) طلع للحمام [ أكرمكم الله ] يتوضاء و يصلي فروضه.....

****************

تأففت بملل من صوت التلفون الي يخترق عزلتها و يسبب لها صداع تحركة ناحيته و بخاطرها تفصله من الكابس لما ريم ما تكون موجوده رفعته و بأندفاع
مرام\ الو نعم
عبير\ هلا مرام ؟
مرام تنفسة بعمق تسيطر على إنفعالاتها\ هلا عبير
عبير\ سلامات يقولوا لي تعبانه ؟
مرام\ الله يسلمك بس صداع و راح
عبير\ طيب الحمد لله و ليش ما تفتحي جوالك ؟
مرام\ بفتحه أنتِ رجعتي من العمره ؟
عبير\ إيه اليوم الصباح
مرام\ مقبوله يارب
عبير\ امين بتجي التحفيظ اليوم ؟
مرام تلعثمت\ لا لسى شوي تعبانه
عبير\ اممم عادي أجيك البيت الليل
مرام تمتم بـ أيه و من داخلها كانت تصرخ بأرحميني ما أقدر أشوفك و تصنم كل شئ فيها و هي تسمع صوته ينأديها
[ عبورة ]
عبير بعجل\ خلاص مرام أشوفك الليله فمأن الله....


**********************


جهزت لها الشغالة الفطور جلسة و هي تتأمله بعدم رغبه لا هي الي طبخته و لا نفسها تأكل شئ و مشعل ما تدري وين أرضه أول ما أرتفع الأذان غصبة نفسها على نص الكوب مويه ودارة فيها الأرض مثل الحلم في أحضان مشعل ماسك رأسها في المغسلة تستفرغ الي في جوفها و كل جسمها يرتعش
فتح المويه و غسل فمها مشعل\ خلاص غسلي لا تستفرغي أكثر
تبي تنطق بس لسانها ثقيل فـ أسترخة في حضنه و ضم رعشتها أخذها لأول كنبه جلس و هي على رجوله
أريج بصوت يرتعش\ وين كنت من أمس ؟
مشعل بكذبه\ دخلت غرفتي في البيت و راحة علي نومه
أريج\ و جوالك ؟
مشعل\ خلص بطارية و كنت أظن بس بريح ساعة لكني نمت
أريج عضة شفايفها الي كانت زرقاء من كثر الأرتعاش وزفرة بـ آه
مشعل بلؤم\ أسف فديتك
أريج رفعت عيونها تطالع عيونه للحظات تبي تنطقها و ترتاح مشاعرها تعبت تبي تستقر في داخله و تزيح ثقلها من على صدرها\ مشعل
مشعل بكل إحساسه\ أنفاسه و نبضه
أريج غصة بدموعها و ضمته بحب و نطقتها بكل أريحيه في حضنه\ مشعل و الله أحبك ما أقوى بعدك كذا ....

و أنهارت قلاع المكابره,, و تهيمنة الأحاسيس

*******************

راجعين من المسجد مع بعض بعد ما صلوا التراويح دخلوا البيت و على الطول للملحق
فجر و الي سبقت ريم داخل\ روحي للمطبخ أول
ريم\ شو تبين ؟
فجر\ شوفي الأيس كريم
ريم\ ناوية تمرضينا مع البرد
فجر\ هاتيه لي لا تأكلين منه
ريم\ قالوا لك شغالتك على غفله
فجر\ أعوذ بالله سوي حسنه حنا في العشر الأواخر من رمضان
ريم\ حسنه في المساكين مو فيك
فجر بنظرة\ يا أختي أحسك أستقويتي ؟
ريم\ ههههههههه غصب عنك.....

*******************

بخطئ ثقيله نزلت الدرج و بداخلها كانت تسمع صوت البكاء مخلوط بأنفاسها في أي لحظة ممكن تنفجر دخلت عليها المجلس بهدوء و شبح أبتسامه يتراقص بشفأها
مرام\ نورتي ياهلا
عبير\ هلا بك
مرام\ تفضلي حياك
عبير\ بجلس بس بقولك أني زعلانه منك
مرام مستغربة\ ليش؟
عبير\ يعني تشوفي مكالماتي و رسائلي و لا تردي
مرام\ والله كنت تعبانه
عبير بتردد\ يعني مو زعلانه عشان الي صار ؟
مرام بحذر\ شو الي صار أصلا أنا نسيت
عبير\ هي غلطتي ما خبرته بوجودك
مرام\ عادي أنسي كيف كان الحرم معكم و أمك شو صحتها عسى ما تعبت ؟
عبير\ لا الحمد الله بخير و الحرم كان مرة زحمه كالعاده
مرام\ لأنه رمضان
عبير\ بس الحمد لله أرتحت بعدها
مرام\ أي العمرة تريح أتمنى أروح أنا كمان
عبير\ ما شاء الله عليك عندك أبوك و أخوك ما بيقلون لك لا لو قلتي تبين الحرم
مرام يا حسرتي وين أبوي يفكر في شئ غير شركته\ ياليت بس أبوي دائم مشغول و مشعل عشان زوجته ما يقدر يروح
عبير طالعت الأرض بحزن\ بس و جودهم معكم يكفي
مرام ما تدري كانت تبي تؤاسيها أو تؤاسي نفسها\ صدقيني بعض الأوقات في حياتي و جودهم و تفكيرهم لحاجتي لهم المال وبس
عبير\ ياليت فلوس الدنيا ترجع لي أبوي أو صحة أمي
مرام قامت من مكانها و جلسة جمبها\ أدعيلها هي محتاجه الدعاء و أشوفها ما شاء الله عليها صابرة لا تحسسينها أنك شايله هم لصحتها
عبير أبتسمت\ تدرين أحسك تشبهين لخالي سلطان في كل شئ حتى بتفكيرة
مرام حست شئ بداخلها يتكسر خالها كل هـ الأهتمام و الحب و هو خالها و أنا الي شكيت فيها رفعت عيونها لها و حضنتها بكل إحساس و سمحت لدموعها تنزل و كأن جبل من الثقل أنزاح عن صدرها.......

*****************

بالغرفه تمددت و حطة رأسها على يده بكل راحة بعد ما تخلصة من أثقل كلمة عاشتها شهور رغم جمالها إلا أنها حبستها بصدرها عنه لكن اليوم تحطم الحاجز الي بينها و بين مشاعرها له
مشعل بحنان\ أروجه حبيبي شو صحتك الحين ؟
أريج براحه\ بخير من وقت رجعت أنت
مشعل\ سامحيني حبيبي أقلقتك
أريج\ اممم كنت حاسه أنك بخير
مشعل أبتسم\ بالله ؟
أريج\ أي والله
مشعل و هو يلعب بشعرها\ بس أنا حسيت أنك تعبانه
أريج\ لأني أنا من أول تعبانه
مشعل بباله هذي فرصتي\ لا لأن صحتك ما هي عاجبتني من فترة
أريج بخوف\ ممكن من البرد
مشعل\ أريج البرد مو أول مرة يمر عليك أنتِ صايرة مناعتك ضعيفه من أي شئ تتعبين
أريج\ مدري
مشعل بحذر\ أول مرة يسير معك كذا صح ؟
أريج\ ايه
مشعل أرتفع صوته\ وشو تنتظرين تنتكس حالتك أكثر
أريج حسة بغصه و ضيق\ ما بيدي شئ
مشعل قام و عدل جلسته بالسرير و بأندفاع\ لا بيدك أريج فيه ناس محكوم عليهم يعيشون بالمستشفيات و راضين بحكم ربي عليهم و أنتِ .....وسكت
أريج طالعت فيه\ كمل ليش سكت ؟
مشعل\ أنتِ رافضه حتى فكرة العلاج
أريج بضيق\ لأنه ما في أمل
مشعل\ من قال ما فيه أمل شو هـ اليأس الي عندك ما توقعتك كذا
أريج\ مو يأس بس أنا رحة كم مره و نفس الكلام أسمعه
مشعل\ أريج متى عملتي أخر فحوصات من سنتين صح يا قلبي الطب تطور كثير و كل يوم أحسن من الي قبله
أريج سكتت و ما عرفت وش تقول فكمل مشعل كلامه\ أريج فديتك عشاني خلينا نجرب أنا معك و ما بخليك ما بنخصر شئ لو فيه أمل للعلاج أنا أول واحد بيضل معك و يدفع عمره كله لجل يشوفك تمشين و إذا ما فيه أمل سوينا الي علينا و مشعل هو مشعل ما بيتغير عليك
أريج أرتعشت عينها و نزلت دمعه\ الملف الأصفر كان لي ؟
مشعل\ أيه
أريج أخذة نفس\ و شو قالوا لك ؟
مشعل أخذ يدها و ضغط عليها بين يدينه\ وربي قالوا الفحوصات قديمه نحتاج أقل شئ لفحوصات تكون من ثلاث الى سته شهور الكسور ممكن تتغير و تغيرها بشارة خير
أريج\ و أنت تباني أعمل فحوصات جديده ؟
مشعل\ إيه
أريج\ ليش ؟
مشعل أخذها كلها لحضنه و لمها\ لا تسأليني ليش بس أعتبريها أمنية حياتي أغلا شئ أبي أشوفه قبل أموت
إلا الموت من يوم يومها تخافه و تكره حتى للغريب فكيف بمشعل كيف تقوى تسمع منه هـ الكلمة غطة فمه بيدها أريج\ ما أبي أسمع منك هـ الكلمة مرة ثانية تبأني أسوي فحوصات جديده بسوي بسوي كل الي تبيه بس لا تقول أموت ثاني
مشعل من داخله أرتاح أنه قدر يقنعها بسهوله أبتسم و بأس يدها\ فديتك يارب خلاص بعد العيد راح أروح أعمل لك موعد و عند أحسن الأطباء أتفقنا ؟
أريج هزت رأسها بمعنى أيه و دفنت وجهها في حضنه.....

***************

في السيارة وقف قدام البحر يتأمله و هو مبتسم البحر أكثر شئ جمعه بفجر من صغرهم يمكن هو قاسم مشترك بينهم عشقهم للبحر يتذكر كم مرة طلعوا لصيد مع جده الي كان صياد و أغلب عمره بالبحر و الغوص كيف كان يعلمهم يصيدون يتذكر كيف كانت فجر لما تشوف الكل صاد إلا هي تجيه تبكي فيضطر ماجد يعطيها صيده و تتبأهى أنها صادت أكثر منهم و هو يضحك عليها أبتسم على ذكرياته معها و بباله ( راح أسفرها شهر العسل بالبحر للمكان الي تبيه ) ......

*******************

..
..
..

الجزء الثاني و الأربعون



طلع لها المرسم بعد ما صلى العشاء و التروايح في المسجد القريب من بيتهم و أبتسم على ذكرى حلوه و هو يشوفها ترسم و لابسه بدي وردي و رافعه شعرها قرب منها و فتح الشباصه
مشعل\ كم مرة قلت لك خليه مفتوح أنا أحبه كذا
أريج\ بس يضايقني بالرسم يغطي عيوني
مشعل و هو يرجع خصله متمرده وراء أذنها\ بس أنتِ كذا أحلى
أريج بخجل\ بعيونك
مشعل بثقه و ضحكة\ أجل بعيون من غيري ؟
أريج\ يا شين الغرور
مشعل\ يفداك بعدين تعالي أنتِ وش سالفة الوردي معك ؟
أريج\ لوني المفضل و يفتح نفسي لرسم
مشعل جلس على رجوله مقابلها و أخذ يدها حطها على قلبه\ و يقطع هـ القلب
أريج كانت تحس بالرجفه من نبضه\ ليش ؟
مشعل ضغط على يدها فوق صدره بقوة\ يذكرني باليوم الي شفتك فيه بجد تلخبط...و كمل بضحكة\ أقسم لك أني فكرة فيك و أنا لسى على الباب.....


*************


بروح مغايرة و ملامح مبتسمه نزلت مع الدرج و هي تتلفت يمين و شمال ما شافت أحد فـ قادتها خطواتها للمطبخ شافت ريم هناك مندمجه بصنع شئ بيدها أبتسمت و قربت منها
مرام\ شو تسوين ؟
ريم أبتسمت بفرح من كم يوم مرام ما طلعت من الغرفه و الأن نازله و عبأتها بيدها بدهشه\ بسبوسه
مرام\ اممم تطور
ريم\ أنتِ بخير ؟
مرام\ الحمد لله عال العال
ريم بضحكة\ لو درينا خلينا عبير تجيك من زمان
مرام\ أي والله ياليت
ريم بحذر\ أنتِ طالعه ؟
مرام\ يس بروح لأريج تروحي معي ؟
ريم\ اليوم ؟
مرام\ أي شو فيها ؟
ريم\ لا بس قلت بعد بكرة العيد يعني نروح لها مرة وحده
مرام\ عادي هي تعبانه زيارة خفيفه ما نطول
ريم\ اوكيه يالله بس خلي البسبوسه تجهز نأخذها معنى
مرام\ اوكيه
ريم\ بروح ألبس و أرجع
مرام\ لا تطولي.....

*****************

طلعت من غرفتها و شافة أمها و خالتها بالصالة و كأنهم جاهزات لطلعه أم مشعل أول ما شافتها حست باللؤم
أم مشعل\ هلا والله بزينة البنات
مها\ هلا خالتي
أم مشعل\ وينك عنا لا يكون حد مزعلك ؟
مها بضيق\ لا خالتي بس تعرفين رمضان ما فيه وقت أنتم طالعين ؟
أم مها\ أي يمه بنمر السوق شوي بعدين بروح الكوافيرة خالتك تبي تقص شعرها
أم مشعل\ تروحي معنى ؟
مها\ خاطري أصبغ شعري
أم مشعل\ أجل أمشي معنى يالله
مها\ بس أنتظروني أبدل
أم مها\ طيب يالله أسرعي....

************

دخلت و على شفايفها بسمة فرح من أول ما قالت لها الشغالة أن مرام عندها
أريج\ هلا والله نور البيت
مرام\ منور بوجودكم
ريم\ أي عارفه أن كل هـ الترحيب لمرام و أنا مالي داعي
أريج\ افى عليك من أهل البيت أنتِ ريوم
ريم\ أي أحسب بعد
مرام\ يا شين الغرور
ريم و هي توقف\ من حقي إلا عندك حد يا ست و إلا أروح المطبخ
أريج\ لا ما فيه أحد بس خلي عنك أجلسي
ريم\ شوفي هـ الصينية أنا مسويتها و أخذتها من الفرن لك على طول يعني لازم أتذوقها قبل أحتمال ما تتأكل
مرام بضحكة\ هو أجزم
أريج\ لاه شئ حلو يعني بنذوق شئ من تحت يدين ريم
مرام\ جلستها في بيتكم أثمرت
ريم و هي طالعه\ هههههه من خير معلم تحط رجل على رجل و تتأمر
أريج\ ههههه مفكرة نفسها سوت أنجاز
مرام\ مشعل فيه ؟
أريج\ لا طلع مع سلطان.....

****************

بأحدى محلات الكوفي كانوا جالسين بين سوالف و ضحك لذكرياتهم أيام الجامعه و الأسفار كثير يحنون لأيام و موافق مرت عليهم منها تعلموا و أستفادوا في حياتهم
سلطان\ رغم أني شبه كرهة السفر لكن خاطري أغير جو
مشعل\ بروح ثالث العيد المانيا روح معي
سلطان بغرابه\ ليش ؟
مشعل\ بحجز موعد للمدام
سلطان أبتسم\ لاه وافقت تروح ؟
مشعل كان بيرد لكن جواله رن فطلعه و أبتسم\ الأهل لحظة
مشعل\ هلا
أريج\ وينك حبيبي ؟
مشعل\ قريب بغيتي شئ ؟
أريج\ أخواتك عندي فيك تجي قبل يروحون
مشعل بهت و تكلم بدون وعي\ مرام عندك ؟
أريج بضحكة\ أي و ضحكتها ماليه البيت
مشعل\ سبحان مغير الأحوال
أريج\ شو فيك ؟
مشعل\ لا بس معجزه لازم أشوفها بعيني
أريج\ زين تعال و جيب معك أكل لأني ما طبخت
مشعل\ من عيوني يالله سلام
مشعل قفل الخط و حط الجوال و البوك بجيبه و وقف\ يالله أنا ماشي
سلطان كان مستغرب كلامه عن مرام بهـ الطريقة فـ فكر أنها ممكن أول مرة تزوره بالبيت\ مو بدري ؟
مشعل\ عندنا ضيوف بالبيت يالله سلام نشوفك....

****************

طلعت من غرفتها بملل و جلسة مع أمها و جدتها بالصاله
فجر\ وين أبوي عنكم ؟
أم أريج\ نائم
فجر بخوف\ مو بدري لا يكون فيه شئ ؟
أم أريج\ لا ما عليه شر بس ما نام أمس زين
فجر\ اهاا
أم عبدالله\ وين ريم عنك اليوم ما شفناها
فجر\ راحوا لأريج اليوم
أم عبدالله\ حصه معهم .؟
فجر\ لا بس ريم و مرام
أم أريج\ مرام طلعت ما شاء الله عساها بخير
فجر\ أي هـ البنت كل لحظة بمزاج أشك أنها طبيعيه
أم أريج\ ما يندرى يمه
فجر\ السالفه أني أحس بالملل
أم عبدالله\ بسم الله عليك يمه وش هذا
فجر تستهبل\ الي مخليني مقابلتكم خخخ
أم أريج ضربتها بخفه\ أجل روحي قابلي قطوك
فجر\ هههههههه ما أبيه كمان.....

*******************

كان جالس بينهم مبسوط و مرتاح أنه شاف مرام ترجع مثل أول تضحك و تسولف براحه
مرام و هي تأشر لريم\ يالله أحنا بنروح الحين
أريج\ وين بدري
مرام\ خلاص مرة ثانيه نجيكم تأخر الوقت
مشعل\ خليكم أتسحروا معنى بعدين أنا أوصلكم البيت
ريم\ أحلا كلام
مرام\ أي أنتِ تبينها من الله القعده
ريم\ عندهم غرف فاضيه كمان
مشعل بضحكة\ ههههه بس ما أحنا فندق
ريم\ اوووب يا الطرده
مرام\ تستاهلين
أريج و هي تطالع ساعتها\ عن أذنكم شوي
مشعل عرف أنها بتجهز السحور فما حب يتعبها\ خذيني معك شويات بس
ريم و قفت من غير شئ\ بسبقكم المطبخ
مرام بضحكة\ و بتتركوني لوحدي ما يصير بس ترى بخبركم ما أعرف أسوي شئ....

****************

تمددت بسرير و هي تحط يدها على أسفل ظهرها بدت تحس فيه بالألم و ما بتقدر تأخذ الحبه لأنه أذن عدلت المخده خلفها و هي تفكر بكلام مشعل مناعتك بدت تضعف معه حق صايرة تتعب من أبسط شئ تسويه و تخاف تخبر أمها من فترة و تقلقها .. شافته يدخل و يتوجه للكبت بعد ما وصل أخواته للبيت و صلى الفجر بالمسجد
أريج\ مشعل
مشعل\ هلا
أريج بقلق كان واضح\ أنا فعلا بديت أخاف
مشعل بغرابه\ تخافين من شو قلبي ؟
أريج\ من هـ الألم بظهري
مشعل\ يعورك الحين ؟
أريج بتعب\ أي شوي و كمان أحس ألم أسفل بطني و دوخه و الغثيان من كل شئ
مشعل فهم بطريقة غلط\ مدري طيب قلتي لأمك يمكن هي تعرف أنا ما أعرف لأمراض الحريم هذي
أريج\ لا ما أبي أقلقها
مشعل بحيرة\ طيب تبين شئ أجيبه لك حار تشربيه ؟
أريج بهتت فيه\ مشعل شو فيك أنا صائمه
مشعل فتح عيونه و ما أستوعب هي شو فيها بالضبط\ اهاا أحسب......
و قبل يكمل قاطعته و هي تضحك\ لا لا مو الي ببالك
مشعل بضحكة و نبره حنونه\ ما عليه قلبي أن شاء الله خير لا تقلقين أنتِ......

*******************

دخل غرفته و بدل على السريع و أتصل فيها اليوم ما سمع أخبارها و بخاطرة يضحك هـ البنت إذا ما أتصل فيها ما تتصل أنفتح الخط و هو يتوعدها
عبير\ هلا بخالي العزيز
سلطان\ هلا بالي ما تدق لو ما دقينا
عبير\ والله أنا وحده أعرف موقعي زين
سلطان بغرابه\ كيف ؟
عبير\ يعني أعرف أنك لطلعت مع هـ المشعل أسير صفر على الشمال
سلطان أنفجر ضحك و طلعت عفويه\ و أنتِ لـ كلمتي مرام نسيتيني مره
عبير\ هههههه لا و حافظ أسمها بعد
سلطان بباله و أكثر مما تتخيلين\ لمعلوميتك تراها أخت مشعل
عبير بدهشه\ بجد ؟
سلطان\ أي مو أسمها مرام عبد الله الـ.....
عبير\ إلا
سلطان\ بس أخت مشعل يا ذكيه
عبير\ والله صغيرة الدنيا ما قلت لي قبل أن مشعل ساكن بحينا
سلطان\ عشانه وأحد عائش بين المطارات ما ركد إلا بعد الزواج
عبير بتردد\ امممم بس لما قالت لي مرام عن وضع زوجته أستغربت
سلطان\ و ليش أستغربتِ .؟
عبير\ يعني وأحد بوضعه وحيد أمه و أبوه عائش حياته أسفار و فلوس مثل ما يبي يتزوج كذا ببساطه
سلطان\ ترى مشعل ما هو مثل ما تظنين هو رجال و النعم فيه و زوجته بنت عمه يعني هو أولى يصونها من الغريب.....

**************

في المرسم جلسة قدام الطاوله و فتحة الاب توب حق مشعل محتاجه تتصفح و تقراء أي شئ ممكن يطمنها أو يزيد معلوماتها عن علاج الكسور و الشلل السفلي نتيجة كسر فتحة أكثر من صفحة و أندمجة بالقرأه فيها هي وعدت مشعل تروح عشانه بس و هو وعدها يضل معها لازم تهيئ نفسها و تتقبل أي شئ ممكن يصير ما فيه قدامها حاجه تخصرها أكثر الأمل وحده يكفيها بوجود مشعل من حقها تجرب و راح تعتبرها مغامرة بأسم الحب......

***************

..
..
..

الجزء الثالث و الأربعون



الساعة الـ 04:25 فجرا فتحت الكبت تطلع ملابس لمشعل الي كان يأخذ شاور لجل يلحق على صلاة الفجر و العيد في المصلى جهزتها على الكرسي جمبها و قادها الفضول تفتح الصندوق الي نزله لها مشعل بالليل و قالها تفتحه قبل صلاة العيد,.. الصندوق كان لونه أحمر جدا جذاب فتحته و أنبهرت بنصاعة ألون الأبيض بداخله فستان أبيض و فوقه طوق أبيض مرصع بزهور الياسمين لفت نظرها كرت أبيض أخذته و أبتسمت و هي تقراء حروفه بحب ( العيد معي هـ السنه غير لأنك بحياتي حبيت أشوفك فيه ملاك أبيض لقلبي يا طفلة الياسمين ...أحبك )
أريج بذيك اللحظة ما فيه كلمه ممكن توصف شعورها تبي تصرخ و تسمع العالم كله أنها تحبه..
طلع من الحمام [ أكرمكم الله ] و هو لاف الباشكير على خصرة بعد ما تأخرت أريج عليه شافها فاتحه الصندوق و ماسكة الورقة بيدها فـ أبتسم ( الي ما كنت تعرفه أريج أن الورقه موجوده بالصندوق من قبل ما تعترف له بحبها ) قرب منها و أنحنى قدامها
مشعل\ كل عام و أنتِ معاي حياتي
أريج و هي بقمة سعادتها\ و أنت بعد ربي لا يحرمني منك يالغلا
مشعل كان متأكد أنه لما كتب كلمة أحبك كتبها بكل أحساسه لكن أحساسه اليوم أقوى أنه ينطقها وقف على ركبه ورمى جسمه العلوي الي كان عاري كله في حضنها و بهمس في أذنها\ تدري أني أحبك......


أحبك و سـ أقضي عمراَ يرتجي إسعادك ,,, و النبض يتراقص لكِ شوقاَ كل وهله ,,, تقودكِ الخطئ بعيداَ عن ناظري

*****************

ضحكة على نفسها و هي تطلع لصالة تنتظر أمها و جدتها لجل تروح معهم لمصلى العيد الظاهر أريج كانت مريحتها من القومه بدري سمعت صوت جدتها و هي طالعه من غرفتها تكبر و تهلل مشت ناحيتها و بأستها على رأسها فجر\ كل سنه و أنتِ بخير جدتي
أم عبدالله\ و أنتِ بخير يا يمه ما شاء الله لابسه من بدري
فجر\ أي جدتي بروح معكم هـ العيد للمصلى
أم عبدالله\ زين يا يمه إلا وين أمك ؟
فجر\ هـ الحين تجي تعالي أجلسي جدتي
أم عبدالله\ أي لا تتأخر و ما نلقى مكان بعدين
أم أريج و هي طالعه و عبأتها بيدها\ جاهزة خالتي
فجر راحة جهة أمها و بأستها على رأسها\ كل سنه و أنتِ بخير يا الغاليه
أم أريج\ و أنتِ بخير يمه
فجر\ يالله بنروح
أم أريج\ أيه بس أخذتوا تمر و إلا لسى ؟
فجر\ اووب نسيت لحظة أجيب
أم عبدالله\ هاتيه في الحوش بنطلع هناك
فجر و هي رايحه\ زين جدتي
أم أريج و هي تمشي مع أم عبدالله لبرى\ مدري عن أريج وش مسويه اليوم
أم عبدالله\ أريج سنعه ما ينخاف عليها خليها تعتمد على نفسها.....

**************

طلعوا من المصلى ثلاثتهم مع بعض عبير من داخلها كانت فرحانه بطريقه ما تنوصف لأنها حصلت في مرام كل الي تتمنأه أخوه و صداقه هي محتاجتها و مرام نفس الشئ كانت أبتسامتهم تميزهم
عبير\ يالله تعالوا أدخلوا معي البيت
مرام\ الحين عاد
عبير\ أنتِ كذا و إلا كذا بتجيني بس ريم ما أظمن أدخلوا تضيفوا و بعدين روحوا
ريم\ لا أمرك مع مرام وعد تعرفين الحين لأزم نروح نفطر عند جدتي و أكيد الوالد ينتظرنا
مرام\ تعالي معانا أنتِ
ريم\ أي والله فجر بتفرح لما تشوفك
عبير بأحراج\ ماقدر أخلي أمي لوحدها و صعب أروح لناس كذا من الصباح
ريم\ أنتِ معنى لا صعب و لا شئ
مرام\ و إذا على أمك خليها علي أنا أكلمها
عبير بتردد\ مدري
مرام و هي رايحه جهة أم عبير\ ياالله بس بلا دلع ترى بيت عمي مثل بيتكم خالي من الذكور.....

******************

رجع من المصلى و طلع لها الغرفه يستعجلها هذي أول مره يروح يفطر في بيت عمه رغم أنه تقليد سنوي في عائلتهم الفطور في بيت الجده أو كبير العائله لكنه كان يرجع من الصلاة و ينام بس هـ المرة ما قدر لأن أريج هي الي طلبت منه يروحون دخل و أبتسم على منظرها تحط مكياج و لأبسه الفستان الأبيض كأنها طفله صغيره رفع يده لقلبه تنفس بعمق و بهمس [ أركد ]
قرب منها و بأسها على خدها مشعل\ كل سنه و أنتِ بخير
أريج بأدلته البؤسه بحب\ و أنت بخير حبيبي
مشعل و بمزحه\ كأنك باربي أروجه اليوم
أريج بقهر\ أدري نفسي أغسل وجهي أحس المكياج ثقيل على الصبح
مشعل بضحكة\ اووف هذا ثقيل والله ما ينشاف زين حتى
أريج و هي تطالع المرايا\ بالله يعني خفيف ؟
مشعل\ إيه و حلو
أريج\ أحس شكلي غلط
مشعل تأملها شوي\ اممم لحظه .. و أخذ الفرشه من يدها و نثر شوي بودرة وردي على وجنها\ خلاص كذا تمام
أريج بضحكة\ لا فنان زودته
مشعل\ هههه عشان جدتي تقولك لوحه
أريج\ هههههه
مشعل و هو يطالع السرير\ بتطولين خليني أخذ غفوة
أريج\ لا والله لو نمت ما صحيت خلاص جهزت
مشعل تقدمها\ يالله طيب أنا عند السياره
أريج\ اوكيه....

*******************

جلست معهم بعد ما قدروا يقنعوها و في قرارة نفسها كانت مبسوطه أن يومها طراء عليه تغيير على غير العاده
فجر أول ما شافتها أبتسمت بمكر أنها بتكتشف البنت الي غيرت مرام\ حياك الله عبير نورتي بيتنا
عبير\ منور بأهله حبيبتي
مرام\ بالقوة جأت معنى
ريم\ مستحيه الأخت
أم أريج ببسمه\ و ليش تستحين يمه أعتبريه بيتك
عبير\ تسلمين خالتي
فجر\ ترى أمي مستعده تتبنى كل العالم و تقولهم بناتي و أولادي
ريم\ غيره هذي ؟
فجر بضحكة\ ما تحسين أنا ما ضيفنا البنت
ريم حطة رجل على رجل\ و الله هذا بيتكم و لازم تضيفيني أنا بعد
أم أريج\ ما فيه أعجز من هـ الأثنتين لجتمعن وحده تقوم تضيف البنت و الثانيه تتصل في أريج بتجي و إلا نحط الفطور
مرام بحيرة\ أمي وين ؟
فجر بضحكة\ مع جدتي تخيلي المشهد
ريم\ و أريج ما أدري مشعل ما هو متعود يفطر يصلي وينام
فجر بغيض\ طيب تجي و هو نائم وش فيها
بهـ اللحظة دخلت أريج و الي ما كانت تعرف بوجود عبير\ ياااه هـ المشعل شو فيكم عليه ...لكنها سكتت و أبتسمت بأحراج
مرام\ هلا أريج هذي صديقتي عبير اممم عبير هذي زوجة أخوي مشعل
أريج\ حياك هلا
عبير\ الله يحييك
أريج أبتسمت لهم و سلمت على أمها\ كل سنه و أنتِ بخير يا الغاليه
أم أريج بفرح وهي تشوف وجه أريج كيف مبسوطه\ و أنتِ بخير يا يمه ما شاء الله وش هـ الزين
فجر و هي تسلم عليها\ لا مغطيه على الكل اليوم وش السر ؟
ريم بغمزه\ يمكن الي بالي بالك فجر
أريج بأحراج\ أستحي أنتِ و هي
أم أريج قامت و أخذت فجر و ريم معها\ يالله أمشوا معي ضيفوا البنت فضحتونا فيها
أريج\ فجر هاتي لي عصير برتقال
فجر تبي تغيضها\ ما عندنا إلا فراوله و مانجو ما في دلع....

*****************

في المجلس القريب كان يغالب نومه و يتثأب لما أنتبه له عمه وضحك عليه
أبو أريج\ ما نمت زين ؟
مشعل\ يعني والله ساعتين يمكن
أبو مشعل\ لاحقين على النوم هذي أول مره تفطر معنى
مشعل بضحكة\ بس لا تقولون لي فيه غداء ؟
أبو أريج\ لا ما فيه إلا كان عندك
مشعل\ هههه يوم ثاني عمي
أبو مشعل\ سمعت أنك مسافر وش عندك ؟
مشعل ما حب يتكلم و تسمع أريج شئ تتضايق منه\ لا أبد تغيير جو
أبو مشعل\ يا ولدي أركد من هـ الأسفار الي ما فيها خير
مشعل\ يبه هـ المره عندي شغله ضروريه
أبو مشعل\ طول عمرك و أسفارك ضروريه
مشعل\ أخر مره يبه
أبو مشعل\ الله يهديك بس......

***************

بالمساء و بعد ما أخذت كفايتها من النوم طلعت لغرفه أخر الممر جهزتها مع ناني و هي تبتسم اليوم بالذات لازم يكون مختلف لهم هي مجهزه فكرة أحتفالها مع مشعل أول يوم بالعيد من فترة و زادها أصرار سفر مشعل بعد بكره و كله لجلها مسكة الورد تنسقه في الزهريه
ناني\ يبي شئ ثاني مدام ؟
أريج\ لا خلاص شكرا
تأملت المكان حولها و ببالها يارب تعجبه المفأجاة و توجهة ناحية الدولاب الخشبي بالزاوية فتحته و طلعت هدية لمشعل مخبيتها عنه من قبل رمضان و بضحكة [ و اللهِ غبرة يا أريج ] فتحة عنها الغلاف الإحتياطي و خلة التغليف الأزرق ألون الي يحبه مشعل و دخلتها بالصندوق و ولعة فوقها الشموع ألقت نظرة أخيرة حولها كل شئ تمام و ما هو ناقصه إلا تصحي مشعل....

****************

كان جالس معها يسمعها و هو مبسوط لفرحها الظاهر علاقتها بمرام بدت تقوى و تحلو
سلطان ببتسامه\ يعني شفتي زوجة مشعل ؟
عبير\ واااه يا خالي البنت تجنن ما شاء الله عليها
سلطان\ أي وراعية بيت سنعه تراها أفطرة عندهم مره
عبير\ افى يعني حنا مو راعيات بيوت
سلطان\ ههههههه لا راعيات سوالف وبس
عبير بغياض\ ما علي فيك أنا واثقه من نفسي
سلطان\ ههههه طيب يا واثقه هالحين زوجها بيسافر شو رأيك تروحين لها البيت
عبير\ اممم لو مرام راحة أروح بس كذا لوحدي لسى ما أظن
سلطان بباله و بعدين مع هـ الأسم\ زين خير
عبير بدون مقدمات\ خالي أنت متى بتتزوج ؟
سلطان طالع فيها مبهوت\ ليش لقيتي لي عروس ؟
عبير\ أي أخت صديقك مشعل الصغيره مره عجبتني

سلطان بهت و فضل يسكت هو يعرف مرام أكثر اما ريم فهو شافها مره أو مرتين و ما يذكر حتى ملامحها.....

***************

بخطئ هادئه وقفت قدام باب بيت خالتها دقة الجرس و أنتظرت ثواني لما فتحت لها مها و تفأجات بحظورها
مها\ هلا مرام حياك تفضلي
مرام و هي تدخل\ خالتي فيه ؟
مها\ أي داخل
مرام ببتسامه\ مو كأنه اليوم عيد ؟
مها بغرابه\ إلا
مرام\ زين شو هـ الكأبه الي على وجهك حتى كل سنه و أنتِ بخير ما قلتيها
مها\ صح كل عام و أنتِ بخير
مرام\ و أنتِ بخير
مها\ تفضلي داخل
مرام\ امممم مستغربه جيتي صح ؟
مها و هي تطالع الأرض\ على كلن هذا بيت خالتك
مرام\ و أنتِ بنت خالتي و صديقتي بعد مهما كان سوء فهم و مشاكل بين الأصدقاء تنحل صح...

****************

طالع في عيونها مبتسم [ أريج يالله منها تحاول تسعدني بكل شئ فديتها يارب مهما سويت لها أحس أني مقصر ]
أريج ببسمه\ وين وصلت ؟
مشعل\ غمازاتك
أريج بخجل\ طيب طفئ الشموع هذي
مشعل\ بس هذي ؟
أريج\ إيه
مشعل بضحكة\ كلها يصير الجو أحلى
أريج بخجل\ و بعدين معك مو أتفقنى تنفذ و بس
مشعل\ طيب ممكن أتمنى أمنيه و أنا أطفيها ؟
أريج ضحكة من قلبها\ زين بس أعرف شو الأمنيه
مشعل بغياض\ طيب و إذا كانت زوجه ثانيه لا تزعلين ؟
أريج أخذت ورده و رمتها عليه\ يا ربي مشعل لا تخرب الجو
مشعل\ هههه زين بطفيها و أقولك الأمنيه خلاص
أريج و بعد ما طفئ الشموع\ هااه شو أمنيتك ؟
مشعل لف يده من وراء ظهرها و قربها ناحيته و بهمس\ تحبيني أكثر
أريج بأسته على خده و ببالها [ هـ الأنسان ما عنده حاله وسط أما جاف و إلا ماطر ]\ أفتح الصندوق
فتح مشعل الصندوق و أنبهر فيه من داخل كان عباره عن رسومات أمواج و أصداف منثورة و كأنه بحر
أريج\ أفتح الصدفات كمان
مشعل بعجب\ كلها ؟
أريج هزة رأسها بمعنى أيه و أستسلم مشعل لكم الصدفات قدامه يفتحها مره يضحك و مرة يبؤس أريج الي فرحة من داخلها أن فكرتها و هداياها عجبته [ الأصداف كان عددها فوق الثلاثين صدفه و أحجامها مختلفه و بداخل كل وحده أشياء تختلف ما بين البسيطة و الفخمه ما بين عطور و أقلام و ميداليات حتى بعض الأصداف كان بداخلها حلاوة أو مجرد ورقة مكتوب فيها أسمه ] ......


*******************
..
..
..

الجزء الرابع و الأربعون



دخل البيت و قفل الباب من وراه و هو يضم نفسه من البرد الي بداء يشتد و خصوصا أخر الليل دخل يدينه في جيب بنطلونه و مشى ناحية الباب الداخلي لكن رائحة النار الي أخترقة أنفاسه خلته يلتفت ناحية الشوايه في زاويه من الحوش و أستغرب لما شاف الدخان يطلع من فتحتها العلويه مشى ناحيتها و شاف أريج هناك في هـ الوقت لوحدها
مشعل بغرابه\ شو عندك هنا ؟
أريج\ أشوي كستناء
مشعل\ هـ الحين عاد !
أريج ببسمه\ أي وشفيها مشتهيتها هـ الحين
مشعل\ مو برد عليك ؟
أريج\ لا قرب هنا ما بتحس برد
مشعل قرب و أخذ وحده كستناء و الي كانت لسى حاره\ اووف حاره
أريج\ رجعها ما أستوت لسى
مشعل رماها فوق الجمر\ هاتي عنك ......و أخذ يقلبها\ أريج تبين شغاله ثالثه ؟
أريج أستغربت منه\ ليش ؟
مشعل\ يعني تبقى معك بالليل مثل كذا لو تبين شئ لك أنتِ بس مالها شغل في البيت أجيب لك فلبينيه أحسن
أريج\ لا مشعل ما أبي ناني و ساتي يكفون
مشعل بحذر\ بس عشان تسافر معك كمان
أريج طالعت فيه و تنفست بعمق [ مشعل يفكر في بعيد يفكر لو فيه عمليه فعلا بتحتاج لوحده تبقى معها على طول ] \ الي تشوفه.......

*****************

في السيارة و طول طريق رجوعه للبيت و هو يفكر في كلام عبير تبي تخطب له و من أخت مشعل هو متاكد أنه أول واحد بيوافق عليه لكن ممكن يوافقون تتزوج قبل مرام و مرام ممكن تأثر فيها لجل الي سويته معها ممكن تتكلم و تتأثر حتى علاقتي بمشعل خلني أبتعد عنهم أحسن أتزوج من الأهل و أريح رأسي .....

****************

بخطئ هادئه دخلت لغرفة ريم تحاول ما تزعجها لكنها تفأجات فيها صاحية و جالسة على الكمبيوتر
مرام\ صباح الخير ما نمتي ؟
ريم\ صباح الفجر قصدك لا شبعانه نوم تبي شئ
مرام\ أي هذي عبير أتصلت تقول تعالوا أفطروا معي
ريم\ من جدها ؟
مرام\ أي ما وراها شئ صاحية لوحدها
ريم\ و عادي نروح مشئ مع الصبح هذا ؟
مرام\ شو بنخطف مثلا ؟
ريم\ ههههههه يمكن
مرام\ ما عندك سالفه تبي تروحي و إلا لا ؟
ريم و هي تطفئ الكمبيوتر\ اوكيه بس ببدل
مرام\ ماشي بروح أبدل كمان.....

*****************

بالملحق كانت جالسة و القطو في حضنها تتأمل السلة مبتسمه و هي تتذكر جرأة ماجد لما حط لها الورقة دخل عليها بدون ما تنتبه له
أبو أريج\ وين وصلت بنتي ؟
فجر ألتففت بدهشه\ هلا يبه
أبو أريج\ وش تفكرين فيه مع الصبح ؟
فجر بكذبه\ الدراسة قربت
أبو أريج\ أي و شدي حيلك أنتِ شاطرة و الكلية ما بتتغير عن المدرسة لو تابعتي دروسك من أول
فجر\ أن شاء الله يبه
أبو أريج\ الله يوفقك يا يبه أنتِ و أختك و أشوف عيالكم
فجر\ الله يطول بعمرك يبه و تشوفهم لسى شباب أنت
أبو أريج بضحكة\ يعني تشوفين فيه شده لثانيه ؟
فجر بهتت هي من يومها تكره أي رجال يفكر يتزوج بثنتين بدون سبب\ لا طبعا
أبو أريج حب يمازحها\ و ليش الله شرع لي أربع و بعدين أنا ما عندي ولد يمكن الحرمة الثانيه ربي يرزقني منها بولد
فجر بأنفعال\ يعني الولد بس هو الي يحسسك أنك أبو روح أتزوج وحده تجيب لك ولد بس أنسى أن عندك بنت أسمها فجر
أبو أريج ضمها و هو يضحك لو كان يفكر بالولد أتزوج من زمان لكن حياته مستقره و سعيده مع زوجته و بناته......

*******************

بالصالة كانوا جالسات بين سوالف و ضحك الوضع في بيت عبير معطيهم الأريحيه يسولفون و يضحكون بصوت عالي مثل ما يبون
عبير\ يا ربي منك يا ريم بس خلاص بطني عورتني من الضحك
ريم\ و هو الضحك بفلوس
مرام\ لا بس فيوزاتك ظاربه أنتِ من قل النوم
ريم بضحكة\ متعوده عند فجر نسهر بعدين نهبل بجدتي
عبير\ مره أعجبوني بنات عمكم صراحة حتى أمهم عسل
ريم\ عسل وبس هههههه بديت أحبها أكثر من أمي
مرام\ منتي صاحية اليوم
عبير\ لو فجر قريبه جبتوها معكم
ريم\ يا حظي بس فجر من الفجر عند جدتهم في الجبيل
عبير\ هههه حلوه فجر من الفجر
ريم\ وناسه عندها بنات خالات كثير مو مثلنا تقول مقطوعين من شجرة عم وأحد و خاله وحده
عبير\ وين أنا عنكم عندي سته خوال و خالتين بس أعمام ما عندي إلا عمه بس
مرام\ و وين بناتهم ما أشوف يزورنكم ؟
عبير\ عمتي في الأحساء و خوالي أربع متزوجين أغلب ذريتهم عيال و كبار بعد اما خالاتي لسى بناتهم في الإبتدائي و المتوسط
ريم\ مو حلو ما فيه بنات بعمرك في العائلة
عبير\ أي بس شو نسوي عاد...

*****************

في الفراش فتحة عيونها و هي تحس بالدوران تنفست بعمق و هي تطالع شنطة مشعل عند الباب و ببالها [ المرة الجأية بتكون شنطتك معه يا أريج ] مدت يدها و لمسة كتفه
أريج\ مشعل
مشعل\ هممه
أريج\ أصحى حبيبي عشان تفطر و تلحق الطيارة
مشعل بكسل\ كم الساعة ؟
أريج\ عشر ونص
مشعل سحب الفراش و تغطى\ بدري بس ربع ساعه خليني
أريج بالأصل غاصبه نفسها على القومه الصبح بالذات صار يشكل لها مشكله دوران و غثيان و قرف حتى من نفسها\ مشعل ما فيه وقت قوم يأدوب بتلحق و إلا خلاص لا تروح أحسن
مشعل رمى الفراش عنه\ هاذاني قمت تبينها من الله ما أروح
أريج\ عقاب للكسلانين
مشعل بضحكة\ عندي أمل أن ربي ما بيخيبني هالمرة
أريج بدون نفس\ الله يزيدك أمل
مشعل و هو قايم\ خلي ناني تجهز الفطور بالبس مرة وحده و أنزل عشان بمر أمي قبل أروح
أريج\ طيب الحين.......

*************

نزل بشنطته من فوق بعد ما لبس و أفطر طالع لسلطان الي بيوصله المطار شافها تبتسم له أسفل الدرج و بيدها جوازه و التذكرة
أريج\ كنت بتنسأهم
مشعل\ مو الي يتزوج وحده مثلك ينسى نفسه
أريج بغرابه\ ليش ؟
مشعل\ من كثر ما يفكر فيك تشغلين عقل الواحد
أريج بحاجب مرفوع\ مو كأنك تبالغ
مشعل بضحكة\ ههههههه أحس بعد
أريج\ أي هين
مشعل قرب منها و جلس على مستواها\ ما بتروحين عند أهلك تخليني أكون مطمئن عليك
أريج\ أرتاح هنا أكثر
مشعل\ اممم طيب الي يريحك بس خلي جوالك مفتوح على طول
أريج\ أبشر
مشعل\ و لا تطلعين في البرد
أريج\ أبشر
مشعل و بغياظ\ و لا تصحين
أريج\ أبشر
مشعل\ كمان لا تسهرين
أريج\ ههههه زين سلطان بينتحر في السيارة
مشعل\ يفداك ههههههه يالله تشاو.....

**************

تمشي معها و هي تحس إنها ما هي طبيعية حتى في الشارع مرام و هي تظربها على كتفها
مرام\ بنت بسك ضحك حنا بالشارع
ريم\ فاضي ما تشوفين
مرام\ لا يا شيخه فاضي و السيارات الي تمر
ريم\ ما يسمعون مسرعين
مرام\ لا بيسمعون و كمان بيأذن الظهر العالم بتطلع المسجد
ريم و هي تضرب جبينها\ مشعل بيسافر اليوم ما كلمته
مرام\ لا تتصلي في الشارع خلي ندخل البيت
ريم و هي توقف\ لحظة فيه سيارة عند الباب وااااو كشخه
مرام بلا مبالأة مشت\ تلقيه واحد من سواقين الي يزورون آمي تعالي بس
ريم بضحكة هستيريه\ يا بنت هذي متشببه طالعه رنج بلحق أشوفها
مرام ضحكة من قلبها\ ياالله يمكن يطلع عندها ولد تزوجك
ريم\ و مهري رنج أمه هههههههه
مرام و هي تمشي من جمب السيارة\ لا أجل فكري في المؤخر كمان قال رنج أمه قال و تطلع من طينة أمي يبي لك مؤخر سنع أقترح عليك ثلاثه مليون تكفي صح ؟
ريم\ وهـ مكسب صراحه بزياده لقب بس

دخلوا مرام و ريم البيت بضحكهم و طنازتهم بدون ما ينتبهون لسلطان الي كان واقف وراء السيارة ينتظر مشعل يطلع و ضحك من قلب على سوالفهم و ما كان عنده أي شك أنهم راجعين من عند عبير......

****************

في المساء كانت جالسة بالصاله تطالع التلفزيون لما سمعت الجرس و نأدت على ساتي تشوف مين و ألتفتت على صوت أبوها
أريج\ هلا يبه حياك تفضل
أبو أريج\ الله يحيك يبه
أريج و هي تلتفت خلفه\ ما معك حد يبه ؟
أبو أريج و هو يجلس\ لا والله توني منزلهم من الجبيل و جأيك
أريج\ ما شاء الله حتى جدتي راحة معكم
أبو أريج\ أي راحة و أنبسطت مع جدتك هناك ما بغت ترجع
أريج بضحكة\ الله يسعدهم ما يملون سوالف مع بعض
أبو أريج\ وصل مشعل طمنك و إلا لسى ؟
أريج\ أي وصل يبه و أتصل
أبو أريج\ و متى بيرجع هو ماهو قبل رمضان بكم يوم راجع من هناك وش عنده
أريج طالعت الأرض إلا أبوها ما تعودت تكذب عليه\ يبه مشعل يروح عشان.....وسكتت
أبو أريج\ عشان شو يبه رجلك فيه شئ ؟
أريج\ لا يبه هو يروح عشاني مشعل يبي يسوي لي فحوصات من جديد
أبو أريج بحذر\ و بتروحين معه ؟
أريج تنفست بعمق\ يبه ما قدرت أقوله لا
أبو أريج\ يبه هو كلمني من قبل و قلت له لا تجبرها لو ما تبي تروح خلها براحتها
أريج بتحدي\ لا أنا بروح معه المرة الجايه
أبو أريج بحنان\ يا عمري كلنا معك لا تتضايقين من شئ خلي بس الله معك و هو ما بيخيبك....

**************

في الفندق كان متمدد على السرير و تفكيرة في بكره كيف بيكون عنده أمل كبير أنه يحصل دكتور ممتاز لأريج المانيا معروفه بكثرة مستشفياتها و التطور الطبي فيها ما يبي يستعجل و يحدد موعد عند أي دكتور لازم يحجز عند أفضل طبيب تنفس بعمق ( هذي أريج مو أي أحد قلبت حياتي هذي البنت بشكل ما أتخيلته من يصدق أني مشعل الي قبل كم شهر بس يا ترى لين متى بنضل على الحال ؟ و أمي و مها و..... شو بقول لأريج وقتها و إلا حتى عمي ) لوهلة غمض مشعل عيونه على حقيقه ينكرها كل ما حس بحب أريج و كانت بجمبه [ تسرعة يا مشعل تسرعة في كل شئ ]....

****************
..
..
..

الجزء الخامس و الأربعون



دار بوجهه الجهة الثانيه و بباله [ اللهم طولك يا روح ] يعرفها لحطة شئ براسها ما تنسى و لازم يصير و هـ المرة شكل ما فيها فكه و أخته معها
أم عبير\ يعني أنت لين متى بتجلس بدون زواج هذولا أصحابك كلهم متزوجين
عبير\ أي حتى أعز أصحابك مشعل متزوج
سلطان\ و يا ليتني معه في المانيا
عبير\ بالله ما كرهتها ؟
سلطان\ بس أكره سالفة الزواج أكثر
أم عبير\ يا أخوي أنت مكره نفسك بالزواج و إلا هو ما فيه شئ ينكره
عبير\ نخطب لك وحده ما تقولك وين رايح و وين جأي هذا الي تبيه
سلطان\ لا إله إلا الله هالحين أنا قلت أبى كذا و إلا كذا و جلسة أتشرط
أم عبير بفرح\ يعني أنت ما عندك أي شروط في الي تبيها ؟
سلطان بدون نفس\ لا
عبير\ و ريم ما تحتاج حد يتشرط فيها
سلطان أنتفض و كأن حد صب عليه كأس مويه\ ريم لا و لا تفكرين تكلمينها حتى و إلا خلاص بطلنا بلاها سيرة ما عاد أبي أتزوج
عبير\ لا لا خلاص نخطب لك من عند أي حد ثاني بس أهم شئ أخذنا موافقتك في الزواج.....

****************

أبتسم بحب و عض شفايفه على صوت ضحكتها تجلجل بأذنه الشوق دائم يغلبه لسمع صوتها
مشعل\ زين و بعدين ؟
أريج بضحكة\ و لا قبلين أخذتها بالقوة وراحة البيت
مشعل بغياض\ و تلقينها أعطتها لقطوتها تأكلها
أريج\ والله تسويها يا خسارة التربية بس
مشعل\ أنتِ وش جأيك عليها مربيتها كم شهر و بعدين ما عاد تبينها ؟
أريج\ تعبت منها و بس
مشعل بضحكة\ و بس ؟
أريج\ أي
مشعل\ دلوعه أنتِ
أريج بضحكة من قلب\ تعلمت منك
مشعل\ بسألك أنتِ ليش تحبين تغيضيني ؟
أريج بغرابه\ ليش ؟
مشعل يمثل البراءه بصوته\ ما تضحكين إلا إذا سافرة اماا و أنا فيه ما أشوف إلا بسمه صغيرة بس
أريج بدلع\ عشان تبطل أسفار يا أبن بطوطه
مشعل\ هههههه لاه تجازيني يعني ؟
أريج\ يس
مشعل رفع صوته\ أريج ما قلت لك ؟
أريج\ شو !
مشعل\ الجناح الي جمبي فيه عراقيه ملاك
أريج بهدوء تبي تغيضه\ ما شاء الله أسمها ملاك
مشعل\ لا ملامحها ملاك حلوه يعني
أريج\ أي الله يخليها لأهلها
مشعل بأحباط\ أي الله يخليها
أريج\ ههههههه وش فيك ؟
مشعل\ و لا شئ
أريج\ أجل عراقيه و ملاك
مشعل\ واثقه أني ما بفكر حتى أطالع غيرك
أريج بضحكة\ مو كثير بس شوي
مشعل\ بس خليني أرجع
أريج\ ههههههه بتجيبها معك ؟
مشعل\ ههههههههه فكره والله جبتيها لنفسك
أريج\ مشعل بصيح
مشعل بطنازة\ لا لشفتيها صيحي مو اليوم.......

*****************

طالعت في أمها مبهوته من الي تقوله ما تنكر بداخلها فرحها بس مجرد يخطر ببالها أنها بتبعد خلاص يقتل فرحها
فجر\ يمه يعني خلاص ؟
أم أريج بضحكة\ هالحين من متى و أنتِ طايرة على العرس و الحين بتبطلين
فجر بأندفاع\ لا من قال ما بى بس خالي قال بعد سنه مو الحين
أم أريج\ عاد هذا طلب ماجد
فجر\ بس هو لسى ما خلص دراسة
أم أريج\ باقي له كم شهر و وظيفته و شقته جاهزه يمه بعدين هي إلا ملكه و العرس بعد كم شهر وش فيك متخوفه
فجر\ يعني باقي حول شهرين بس
أم أريج\ أي يمه
فجر بتفكير\ زين أبي ملكه في البيت و لا تعزمون أحد غير الأقارب بس
أم أريج بغرابه منها\ يا سبحان الله هذي فجر الي تكلم
فجر بضحكة شيطانيه\ يمه ما أبي أخسر رجلي العزيز و التوفير شئ حلو
أم أريج\ ههههه أي هذي فجر ما تغير مبروك يمه الله يفرحني في عيالك يأرب
فجر\ الله يبارك فيك يمه و يطولي بعمرك.....

*************

بالصاله نزلت تجلس مع أبوها و شافتهم مجتمعين من فتره و هم ما جلسوا مع بعض بداخلها تمنت لو مشعل معهم مثل أول لكن بصوره أفضل و جلسة عائلية كلها حب
مرام و هي تبوسه على رأسه\ شخبارك بابي ؟
أبو مشعل\ بخير يا يبه وينك أنتِ ما عاد تنشافين
مرام\ موجوده بس نومي ملخبط مره
أم مشعل\ بكره ترجعين الكلية و يتعدل نومك
ريم\ لا تذكروني
أبو مشعل\ وش عندك عاد عليها
ريم\ يبه أنا أكره الدراسه
أبو مشعل\ بس الدراسه مستقبل
ريم\ هذا كلام عمي عبدالرحمن من يشوفني مع فجر إلا و عمل لنا محاضره عن المستقبل و الدراسه
أبو مشعل\ و النعم فيه عمك قضى عمره يدرس و يعلم طلابه
أم مشعل\ وش أخذ في النهايه هذا هو متقاعد بكم ألف و جالس في البيت
أبو مشعل\ بيته ملك و عنده محلين تدخله مبلغ كل نهاية شهر على راتب التقاعد و هو مرتاح لو يحصل لي كان رجعة بعمري وراء و عملت مثله
أم مشعل\ و كنت تظن بعيش معك كذا ؟
أبو مشعل\ و ليش ما تعيشين و إلا يمكن أنا أخذك من بيت أبوك و هو وزير
أم مشعل بقهر\ عبدالله لا تغلط على أهلي كم مره أقولك
أبو مشعل\ و أنتِ لا تنسين أنكِ بنت ناس أقل مستوى من أهلي و أنا الي رفعتك فوق
مرام\ يبه يمه خلاص أستهدوا بالله يعني هـ السالفه كم مره بتعيدونها
ريم و هي قائمه\ لين الواحد يمل و يكره البيت أكثر
أم مشعل\ أبوكم طول عمره ما يحترم أهلي
أبو مشعل و هو قائم\ أنا أروح أقابل أوراقي أحسن لي....

***************

بفرح كانت تسمعها و مبسوطه على الخبر الحلو الي معها أبتسمت و فتحت لها يدينها
أريج\ تعالي أحضنيني
فجر بضحكة\ خلي يوم الملكه مره وحده
أريج\ يا سخيفه تعالي
فجر قامت و حضنتها و هي تضحك\ السخيف رجلك بالله شو عنده مسافر
أريج\ مالك شغل فيه هو على رأسك
فجر\ لا على قلبي
أريج بضحكة\ أجل ماجد وين ؟
فجر\ ههههههههه مالك شغل
أريج بطنازه\ لو درينا حددنا يوم الملكه من زمان
فجر\ و ليش ؟
أريج\ يقولون عقلتي و تبين ملكه صغيره
فجر و هي تحط رجل على رجل\ والله أنا أفكر في مصلحتي قبل كل شئ
أريج\ لاه و كيف ؟
فجر\ يعني بدل خسائر ملكه كبيره نوفر فلوسنا لحياتنا و متطلباتنا بعد الزواج
أريج بضحكه\ وش متطلباتكم بعد الزواج ؟
فجر تعدل جلستها\ أهم شئ سفره
أريج\ إيه أنتِ لا تثقلين على رجلك يعاف العرس من أوله
فجر\ لاه لاه أنا بعدين بتخرج و أتوظف و أساعده و لووو
أريج\ أي ساعديه يسدد ديونه بسببك
فجر بطنازه\ وليه على أمتي ما يكون بالسجن بس
أريج\ هههههه لا يكثر بس بكره من تشوفينه قابليني لو نطقتي بحرف
فجر ضحكة بخجل و هي تتذكر لما شافته بالمطبخ و كيف تجمدت بمكانها......

***************

مشى على العنوان الي بيده و وقف يطالع المبنى قدامه الي كان جدا فخم مركز متخصص في علاج العمود الفقري و أفضل طبيب في المانيا بسمل في سره و دخل و هو يضغط على الملف بيده تقدم ناحية الرسبشن [ راح يكون الحوار مترجم ]
مشعل\ مرحبا
الموظفه\ أهلا
مشعل\ هل لي أن أقابل الطبيب
الموظفه\ لديك موعد مسبق ؟
مشعل\ ليس بعد و لكن حادثته بالهاتف بالأمس وقد حضرت و معي الأوراق الأزمه ليطلع عليها
الموظفه\ حسنا دقيقه من فضلك
مشعل\ اوكيه
الموظفه و بعد ما نزلت الخط\ تفضل من هنا الغرفه الثالثه
مشعل أبتسم\ شكرا.....

**********************

أبتسمت له و هي تمد لي فنجان القهوة كثير تفرح بجيته لها و سوالفه معها
أريج\ تفضل عمي
أبو مشعل\ زاد فضلك يبه أستريحي
أريج\ مرتاحه عمي
أبو مشعل\ دوم يا يبه إلا وش أخباره مشعل ؟
أريج\ بخير ما عليه
أبو مشعل\ لو بس الله يهديه عن هـ السفر
أريج\ ما عليه عمي بكره بيترك السفر من نفسه بعدين هو إلا يغير جو
أبو مشعل\ ما يخلص شهر يا يبه في بيته بس يضيع عمره و فلوسه على الفاضي
أريج\ يمكن هو تعود بعدين مشعل يحب يغير على طول خله عمي لين يمل من نفسه
أبو مشعل\ زين يا يبه أنتِ ناقصك شئ تبين شئ ؟
أريج\ لا عمي خيرك سابق و مشعل ما هو مقصر معي بشئ
أبو مشعل\ الله يخليكم لبعض يبه
أريج\ و يخليك عمي
أبو مشعل\ إلا وينها فجر عنك ما تنام عندك ؟
أريج\ توها كانت عندي وراحة ما تنام والله الوالده لها كم يوم تعبانه و ما بنخليها لوحدها
أبو مشعل\ سلامتها أي والله قالي أبوك أمس أكيد من البرد الشتاء خلاص دخل......

****************

طلعت من غرفتها و جلسة مع أمها الي كانت جالسه لوحدها في الصاله
مها\ الحلوه وين واصله
أم مها\ هلا يمه هذاني هنا وين بروح
مها\ وش فيها خالتي معاد تمرك
أم مها\ و الله مدري عنها خالتك عيالها رافعين لها الضغط
مها\ وش مسوين ؟
أم مها\ مدري مره تشكى من مشعل و حرمته و مره ريم الي غير في بيت عمها و هالحين مرام الي مدري وش جايها
مها\ يمه خالتي ما عندها سالفه مشعل ما تغير من عرفة الدنيا و ريم تروح عشان فجر بعمرها و الحين بيدخلون كلية مع بعض
أم مها\ والله مدري عنهم
مها بضيق\ و إذا على مرام فهي حصلت لها صديقه جديده يعني ما فيها شئ
أم مها\ و من بنته ؟
مها\ مدري يمه تعرفة عليها بالمسجد من رمضان
أم مها\ من يصدق مرام تغير علينا معاد هي بنت أختي الي أعرفها......

***************

طلع من المركز و هو مبتسم على الكلام الي سمعه صار فيه أمل و فائده من سفرته هالمره خلاص حدد الموعد و كل شئ بس باقي يرجع مع أريج طلع جواله و أتصل فيها
أريج و الي كانت على أعصابها تنتظر مكالمته\ هاااه مشعل شو قالك ؟
مشعل بضحكه\ بشويش طيب لا تأكليني
أريج\ مشعل مو وقت برودك تراي على أعصابي
مشعل\ فديتك يا قلبي خلاص كل شئ تمام عملت لك موعد و الدكتور بشرني خير
أريج أخذة نفس\ و متى الموعد ؟
مشعل\ بعد شهر و نص و هذا أقرب موعد عنده
أريج\ و أنت متى بترجع ؟
مشعل\ لسى ما حجزت
أريج\ الحين طيب روح أحجز
مشعل بذهول\ هالحين ؟
أريج\ مو تقول خلصت كل شئ
مشعل بضحكه\ بس باقي ملاك
أريج بنبرتها المعهوده بكسر الميم و الشده على الشين\ مشعل
مشعل\ هههههه عيونه
أريج\ هالحين تروح تحجز أقرب طياره و ترجع
مشعل\ أبشري.....

*********************

عند المغسله فتحت المويه تغسل بعد ما رجعت كل الي بجوفها غسلت و غمضة عيونها و هي تسترخي على الكرسي تحس بشعور غريب من فتره كل يوم يزيد معها
ناني و الي كانت واقفه من وقت بدون ما تنتبه لها أريج\ مدام أنتِ كويس ؟
أريج فتحت عيونها\ أي يبى حاجه ؟
ناني\ مرام ريم و وأحد ما يعرف مرام قول عبير صديق حقها كله تحت
أريج عدلت جلستها و طالعت المرايا وجهها أصفر و ذبلان\ طيب سوي قهوة أنا يلبس و ينزل
ناني\ اوكيه .....و بتردد\ مدام
أريج\ شو فيه ؟
ناني\ لازم يروح مستشفى بعدين أنتِ يستفرغ كل يوم ما فيه كويس كذا لازم دكتور يشوف
أريج بقرف\ لا أنا كويس خلاص يأخذ دواء بعدين......


****************

..
..
..