كاتب الموضوع :
صديد الجروح
المنتدى :
القصص المكتمله
البارت الثامن قراءه ممتعه وان شاء الله ينال اعجابكم
&&&&&&&&&&&&&&
البارت الثامن
&&&&&&&&&&&&&&
جالسين في الغرفه وميتين ضحك
أسير:ههههههه والله طلعتي خطيره يا مدو أما انا مت من الخوف وتصلبت خصوصا لما شفت السلاح على الجنب
مدو وهي تمسك شعرها وتلعب فيه:افا عليك انا مدو وبعدين شي طبيعي ضابط يسكون معاه سلاح
أسير:انا قلت بيذبحنا لاننا مقتحمين الجناح ويا ليت على شي يسوى
مدو بحالميه:شوكلاته شي ما يسوى ااااه يا زين الشوكلاته زيناه
أسير:الحمد لله والشكر
مدو:ههههه ههههههههه
أسير:وش بلاك
مدو:أتذكر شكلك وأنتي ترجفين كان ماسكك كهرباء 220فولط ههههههه
أسير وهي تتذكر:يمه والله عاد أنتي تعرفيني انا وحده ما عندي ما عند جدتي خوافه مو مثلك بس الصراحه ما صدقت اننا نفذنا من هالسالفه
مدو:علشان تعرفين ان مدو مو سهله
أسير وهي ترجع بذاكرتها قبل كم ساعه
صعدوا لطابق الشخصيات المعروفه وبدو يتمشون فيه وأشكالهم مريبه
كان دور فخم ويبين ان كل اللي فيه ناس مهمين انتبهت أسير على صوت شهقت مدى ولفت لها بسرعه:مدو وشفيك
مدى:يا ويلي ويلاه نقطة ضعفي هنا
أسير :وشو
شافت مدى تتركها وتدخل جناح وتمسك علبة شوكلاته سويسريه
أسير وهي تمسك مدى وتسحبها:أقول مدو اتركي عنك الخبال خلينا نطلع من الجناح قبل ...
وقبل ما تكمل كلامها انفتح بابا الحمام وطلعت مره كبيره في السن:من انتم
أسير ومدى صاروا يطالعون بعض وتورطوا وما عرفوا بايش يردون
والتفتوا على الصوت اللي من وراهم:من انتم
أسير وهي تمسك مدى وبهمس وخوف :مدو رحنا فيها
مدى صارت تطالع اللي داخل من باب الجناح وكان رجال طويل ولابس لبس ضابط وعلى كتفه شرطات ومبين انه جدي
مدى بلعت ريقها وأسير صارت ترجف لما كرر سؤاله:من انتم ووش تسوون هنا هاااااا
أسير تطالع مدو
مدى وهي تطالع الرجال الواقف والشوكلاته اللي في يدها والحرمه الكبيره في السن وخطرت في بالها فكره سريعه والتفتت للحرمه الكبيره في السن:خالتي
وراحت لها وتركت وراها أسير اللي مو فاهمه شي
مدى وهي تبوس الحرمه الكبيره في السن :أخبارك يالغاليه ان شاء الله بخير
الحرمه الكبيره في السن تدقق النظر وهي مستغربه لأنها ما تعرف مين اللي قاعد يكلمها:مين
قاطعتها مدى:اهئ اهئ يا قلبي عليك ما تشوفين شر جعله في عدوينك يا ربي انا أترخص والوالده تسلم عليك
ومشت وسحبت أسير اللي ما استوعبت اللي يصير ولما جات بتطلع شافت الرجال صاد الباب وشكله شاك فيهم
مدى وهي تسوي روحها متاثره:انتبه على الغاليه
الرجال يطالع أمه الحرمه الكبيره في السن وتوه بيوخر لأنه ظن انهم من معارف أمه إلا صوت الحرمه وقفهم:انتم من ما عرفتكم
الرجال رجع سد الباب :ما تعرفينهم يمه
الحرمه الكبيره في السن:لا يا وليدي
الرجال:من انتم
ويطالعهم من فوق لتحت:انتم مو من أهلنا من انتم
مدى وهي تلتفت للحرمه الكبيره:يا ويلي يا خاله ما عرفتينا احنا حفيدات بنات عم خالة بنت عمتك
الحرمه الكبيره: هااا وشو
أسير بهمس:يمه بنموت
مدى بهمس:اسكتي
وبصوت عالي:انتبهي على صحتك وإحنا بنزورك مره ثانيه يالله فمان الله
وطالعت الباب:ممكن
الرجال الشرطي وخر عن الباب وهو مستغرب ويحاول يحلل صلة القرابه اللي قالتها مدى ويتذكر شجرة العايله علشان يعرف هم بنات من لان معارف أمه كثير
أول ما طلعوا من الجناح أسير ركضت للاصنصير والعبايه تطير وراها كأنها
بات مان ومدى تمشي بسرعه وعيونها تقزقز على كل جناح مفتوح بابه يمكن تلمح شوكلاته سويسريه مثل اللي لقتها وتلطشها
رجعوا للحاضر وهم يطالعون بعض :ههههههههههه هههه
أسير وهي تمسح دموعها :انا ابغى اعرف من وين طلعتي بسالفه القرابه بنات ما ادري وشو
مدى :قصدك حفيدات بنات عم خالة بنت عمتك
أسير:ايه
مدى هزت كتوفها:خطرت في بالي كذا فجاه
أسير:والله ما اعتقد بنسى هالموقف ابد
مدى:لا بننساه لان الحياه قدامنا طويله بإذن الله وبنمر في مواقف اكبر من كذا
أسير:مري فيها بروحك انا مالي شغل
مدى ميلت بوزها:كل مره تقولين كذا وأول وحده رازه عمرها معي أنتي
أسير:بعد هالموقف توبه
مدى:راح نشوف
&&&&&&&&&&&&&&&
في غرفة ثانيه بنفس البيت الكبير
دانه بخوف:والله خايفه يا يمه
الجده:وش خايفه منه وآنا أمك
دانه:من طلب جدي ليه خلاني اقعد بالبيت ليه ما يبغاني أروح الجامعه بكره
الجده وهي تفكر ومو مرتاحه هي الثانيه بس تحاول تهدي دانه:يا بنيتي يمكن يبغاك ترتاحين ولا في باله شي لك بس أكيد شي ما يضرك
دانه:تعتقدين
الجده:أنتي تعرفين جدك وش كثر يحبك ولا يمكن يضرك ابد
دانه:عارفه
الجده وهي تمسح على راسها:خلاص استهدي بالله ولا توسوسين كثير
دانه وهي تبوس يد جدتها:ان شاء الله
الجده:الله يرضى عليك
وسكتوا و الجده في نفسها:يا ترى وش في بالك يا خليفه انت ناوي على نيه عساها مو نية قشرا بروحها البنت مسيكينه بس الله يستر عسى اللي في بالي غلط
وصارت تطالع دانه اللي تبتسم لها وردت لها الابتسامه بحنيه
&&&&&&&&&&&&&&&&&
في الجامعه
واقف عند لوحة الأسماء وهو معصب من سالفة بنت عمه اللي ما يدري من وين طلعت له وبتخرب عليه أشياء كثيره وأولها راحته
فواز وهو يدور:بانه عبد العزيز الزايد
وبعد ما دور أخيرا لقى الاسم
فواز:أخيرا هذا هو
ديانا:ها لئيتو
فواز:ايه هذا هو
ديانا: يالله شو هالصدفه الغريبه
فواز: وش فيك
ديانا:بتعرف ان بنت عمك هي مع وحده أرايبيني
فواز:حلو وهذا المطلوب اسمعي يا ديانا ابغاك تقولين من قريبتك هذي تركز على الموجودين وتعرف من بين الموجودين بالمحاضره من هي بانه عبد العزيز الزايد
ديانا:ماشي تأمر أمر
فواز:يله روحي لها وقولي لها قبل لا تبدأ أي محاضره لهم
ديانا :ماشي
وراحت وتركت فواز وهو يفرك يدينه ببعض:والله وقربتي تطيحين في يديني يا بنت العم
&&&&&&&&&&&&&&&&
وصلو الجامعه ونزلوا
سجيه وهي تشهق:ول وليته كل هذي جامعه هذي اكبر من مزرعة جدي
أمجاد اللي لابسه النظاره الشمسيه:اسكتي الله يفشلك لا احد يسمعك ويقول مو شايفه خير وبنت فقر
سجيه بطولة لسان:اللي في ابوه خير يدوس لي على طرف وآنا أربيه
أمجاد وهي تلتفت لسجيه وبعصبيه:سجيوه احنا بجامعه مو حلبة مصارعه واللي يرحم والديك اتركي عنك طولت اللسان ولا ترى والله لأعلمك شغلك مو ناقصه عوار رأس
سجيه:خلاص يا ابو المجد سكتنا
أمجاد طالعتها ومشت وخلتها وسجيه راحت وراها مسرعه تخاف تضيع لأنها ما تدل عكس أمجاد اللي لها ناس من اهلها هنا وجات الجامعه من قبل
&&&&&&&&&&&&&&&
وهم متوجهين للكافتيريا ومعاها أماني وتسولف صدمت في وحده رفعت راسها وشافت بنت لابسه كحلي ولافه حجاب كحلي مع اسود ولابسه نظارات دواوير
نهى طالعتها بغرور
سجيه ما عجبتها نظرات نهى لها :أنتي هيه فتحي عيونك يا مال العمى
نهى:يمه أنتي خليجيه لا ما اصدق الخليجين انحدر مستواهم في اللبس لها الدرجه
سجيه طلعت عيونها:أتغلطين علي...ورفعت كممتها:تعالي أعرفك المستويات على أصولها وأعرفك على مستواي انا بالذات
توها بتهجم عليها إلا مسكتها أمجاد وصارت تجرها
نهى:يا ربي ما اصدق في ناس بالأشكال هذي لا لا مستحيل
أماني:استغفر الله حوش ما ادري وش اللي يجيب أمثالهم على جامعات مثل هذي على مستوى
نهى وهي تلتفت لبانه اللي تطالع جدولها ومو يم احد وتفكر وسرحانه:بانه
بانه صحت من سرحانها:نعم
أماني:يله نوريك مكان قاعتك لأول محاضره لك
بانه:يله..... ومشوا
أما عند سجيه:هديني عليها أربيها
أمجاد بعصبيه وهي تتلفت:انا وش قلت لك الحين أتركك دقيقه ارجع ألقاك منقضه على البنت مثل الصقر
سجيه:هي بدت
أمجاد:كأني ما أعرفك
سجيه:اووووف منك كله ظالمتني
أمجاد وهي تتأفف:أقول امشي نلحق على المحاضرة الأولى والله يعيني على مراقبتك طول الأربع سنين الجايه
سجيه:ليه سجن
أمجاد مشت وما ردت عليها وسجيه مثل العاده تمشي وراها بسرعه وتحاول تلحقها
&&&&&&&&&&&&&&&
في ارض الجو والكرم قاعدين في الصاله
أم مدى:وش أخبار سفرتك عساك ما تعبت فيها
سلطان:ابد يا خاله
الجده:هالمره رديت بسرعه ولا في العاده تطول أكثر من كذا
سلطان:ايه هذي اقصر من غيرها من الرحلات
أم أسير:الحمد لله يا وليدي بس قل لنا وش شفت سولف علينا
الجده:الحمد لله عليك اللي يسمعك يقول أول مره يسافر لذيك البلاد وش يسولف عليك ما به شي جديد
سلطان طرا على باله سجيه وتضايق لما تذكر طولت لسانها وقام من مكانه
أم أسير:وين يا وليدي
سلطان:ابد يا يمه بروح أتمشى بالحديقه شوي
الجده:روح وآنا جدتك
سلطان وهو طالع مر على الصاله الجانبيه وشاف مي قاعده عند التلفزيون وعندها أسير
سلطان:وهذي كله مطيحه عندنا
أسير:ههههه أمها وأبوها طالعين فخلوها عندنا لأنها تحب مدو
سلطان:لا بالله معاذ وغصون كدو خير كان بنتهم تحب مدو
أسير:حرام عليك
سلطان:اخترب مستقبل البنت من الحين
وطالع مي شافها تشوف أفلام كرتون طرزان وتذكر كلمة سجيه:لا يكون انت طرزان اللي بتنفذني من الخوف وآنا ما ادري
وفجاه انرسمت ابتسامه على وجهه وكبرت ابتسامته وبدا يضحك بصوت عالي لما بدا يتذكر كل مواقفها
أسير:سلطان وش فيك تضحك
سلطان وهو طالع:ولا شي
أسير وهي هز راسها:الحمد لله والشكر
&&&&&&&&&&&&&
دخل على زميله في المكتب
يوسف رفع رأسه وابتسم:هلا والله براكان
راكان:هلا فيك
يوسف:شكل الليله مو هاديه علي بس حتى انت
راكان:عساه دوم هالهدوء وما في مشاكل
يوسف:ان شاء الله
وتذكر:إلا خالتي وش أخبارها
راكان تنهد:الحمد لله الدكتور طمني وقال انها بخير
يوسف:الحمد لله على سلامتها
راكان بابتسامه:الله يسلمك
وكل واحد سكت وهو سرحان
يوسف سرح وهو يتذكر لما وصل راكان على المستشفى علشان يتطمن على حالة أمه
ولمح مقعد ومازن في المستشفى
يوسف وهو جاي لهم:وش فيكم ليه انتم في المستشفى
مقعد:ما فيه إلا العافيه بس البنات يسوون فحص دم علشان يعرفون الفصيله لان الجامعه طالبه فصيلة الدم
يوسف:أي بنات
مازن:لولوه ورؤيه
شاف من بعيد لولوه توها طالعه وهي ماسكه يدها وتكلم وحده ثانيه وعرف انها أخته رؤيه وتوه متوجه لها إلا شافها تدخل غرفه بابها مفتوح
راح جهة الباب توه بيدخل إلا يسمع:آلاء في ذمتك تعور قولي لي
آلاء:ههههه رؤيه خلاص والله كأنك بزر قلت لك لا
رؤيه:يمه والله اخاف
كان في الغرفه ولد عمره 10 سنوات
آلاء تكلم الولد اللي خايف من الابره هو الثاني:شوفي هذا أحسن منك ما يخاف رجال صح
الولد وعلامات الخوف على وجهه:ايه
آلاء وهي تمسح المطهر على يده:حبيبي لا خاف ما في شي يخوف خليك أحسن من هالبنت الخوافه وريها انك أحسن منها
الولد يهز رأسه ويتظاهر بالقوه
آلاء:لف وجهك وغمض عيونك حبيبي
الولد يسوي مثل ما تقول وتعطيه الابره وبعدها:خلاص فتح عيونك شفت خلصنا
الولد وهو فرحان:خلاص
آلاء:ايه
ولفت على رؤيه:يله عاد خلصيني
رؤيه:طيب طيب
وتغمض عيونها وآلاء تسحب دم ورؤيه:أي أي
آلاء وهي تخلص:يالعياره خلصنا
رؤيه:اووووف مالت على هالجامعه ما سوت علينا هالدراسه مع هالتعذيب
آلاء:وش دعوه ابره سميتيها تعذيب
رؤيه توها بتطلع إلا شافت يوسف واستغربت:يوسف
آلاء التفتت لهم والتفت عيونها بعيونها وشاف الكره في عيونها وبعدها وخرت عيونها عنه وهي متنرفزه ما تدري ليه وجوده يضايقها
يوسف:ليه ما قلتي لي انك تبغين تروحين المستشفى كان انا وديتك مو مقعد ومازن
رؤيه:انت مشغول وما حبيت أشغلك زياده وأنت ولا مقعد ولا مازن كلكم واحد وبعدين احنا جبنا معانا أسير ومدو
يوسف رن جواله وطالع رؤيه:طيب
وطلع وهو يرد على جواله
رجع لواقعه وهو يكلم نفسه:يا ترى انا غلطان لا انا مو غلطان هي المفروض ما تخالط الرجال لا وبكل قوات عين تقول لي شغلي نفس شغلك وين انا و وين هي انا رجال ما يعيبني شي وهي راحت ولا جات تظل حرمه وشغلتها مو عدله بس مدام جدي وأبوها وإخوانها راضين مالي حق أتكلم والله لو لي حق كان خليتها تنطق بالبيت صدق عينها قويه هالبنت
معاه بالجسد بس هو الثاني سرحان
راكان:من هالثنتين شكلهم مريب و ليش هذيك البنت ماسكه علبة الشوكلاته اللي انا جايبها والله أشكالهم توحي بأنهم نصابات لا ولا القرابه انا ادري انها ملفقه بس ما كان ينفع امسكها بس والله شي يحير اخبر الناس ينصبون في المجمعات والأسواق وفي البيوت مو في مستشفيات بس هم وش كانوا يسوون في جناح أمي
شكلي بتعب من التفكير وما راح اعرف الجواب ابد
وتذكر أشكالهم و انرسمت على وجهه ابتسامه على الزنوبات الخضراء والزبيري
&&&&&&&&&&&&&&&
في الجامعه
أماني:هذي قاعك
بانه وهي تطالع المكان:اوكي
نهى:لما تخلصين خليك هنا وحنا نجيك اوكي
بانه:اوكي
أماني:يله سي يو
بانه:باي
ودخلت وجلست في مكان وما في جنبها احد وبعد دقايق بدت القاعده تمتلي طلاب وطالبات البعض كان شكله يوحي انه خليجي والبعض يدل على انه سعودي وإماراتي ومن مختلف الخليج وأجانب
عند بوابة القاعده
سجيه:ها وصلنا
أمجاد:ايه
سجيه:حشى والله لو إني مسافره الصين كان وصلت من زمان
أمجاد ابتسمت ودخلت و وراها سجيه وجلسوا جنب بعض
سجيه وهي ترفع راسها وتطالع السقف وتطالع المكان:ول هذي قاعة دراسه ولا صالة أفراح
أمجاد بهمس:اسكتي لا احد يسمعك
سجيه:عشتوا ومن بيسمع كلهم ما يعرفون عربي
أمجاد:بعضهم خليجيين
سجيه:الله ابغى اعترف على إماراتيين
أمجاد:وليه ان شاء الله
سجيه:علشان لهجتهم برمسك وازقرها والله شي
أمجاد:الحمد لله والشكر لك يا ربي
سجيه:ليه قالو لك خبله ولا مهبوله
أمجاد:اشششش جاء الدكتور
الكل سكت لما دخل الدكتور كان شكله كبير شوي في السن وله كرش ولابس بدله وكرفته
بدا يعرف عن نفسه
(طبعا بالانجليزي وآنا بخليه عربي)
الدكتور:انا دكتور هذه الماده اسمي جورج(...) وانا أقول لكم لا تخافوا من شكل وحجم الكتاب لان الماده جميله......الخ
سجيه اللي جاهله بالانجليزي بقوه:وش يقول
أمجاد صارت تترجم لها
سجيه:وش له يعرف عن نفسه بنخطبه احنا وليه الماده جميله هي عروسه
أمجاد:بس اسكتي خلينا نسمع
سجيه:سكتنا بس ترجمي
أمجاد تبغى تسكتها:زين زين
طلع الدكتور الكشف حق الأسماء وبدا كل طالب يقول اسمه
أمجاد كانت تسمع أسامي الطلاب واغلبهم من عوايل معروفه وسمعت هي عنهم من قبل
وصل الدور عند بانه
وقفت وقالت بغرور:بانه عبد العزيز الزايد
أمجاد تطالعها وبصوت واضح:شوي شوي لا تموت علينا يالطاووس من كثر الغرور ونفخة الصدر
بانه التفتت لمصدر الصوت وشافت أمجاد حاطه رجل على رجل وتطالعها بتحدي
بانه ردت لها نظرة التحدي وبابتسامه كلها غرور:عائلة الزايد يحق لهم الغرور وما أنخلق الغرور إلا لهم
ردت عليها أمجاد بابتسامة غرور وتحدي و بانه جلست والدكتور يطالع ومو فاهم شي
سجيه بهمس وباستغراب:وش فيك على البنت يا مجوده
أمجاد وهي تطالعها:ولا شي
سجيه هزت كتوفها وبدت تحوس في أغراضها وطاحت نظارتها تحت رجلي اللي قدامها ونزلت تدورها وجاء دور أمجاد
وقفت وبكل غرور وهي تطالع بانه:أمجاد سامي الماجد
بانه طالعت أمجاد ولحد الحين الابتسامه على وجهها وأمجاد ترد عليها بالمثل وجلست وجاء دور سجيه اللي تدور نظارتها
الدكتور:التالي
أمجاد:سجيه:الدكتور يقول قولي اسمك
سجيه:قولي له لحظه أدور نظارتي
أمجاد:قومي لا تفشلينا
سجيه:لحظه.....ومدت يدها تحت الكرسي الطالبه اللي قدامها والبنت انزعجت من يد سجيه اللي تدو تحت رجولها ولفت عليها: what are you doing (وش تسوين)
سجيه:أنطمي ولا تقعدين توطوطين ابغى نظارتي
البنت:اووف
سجيه:لا تنفخين نفخوك في نار جهنم
أمجاد وهي تسحب سجيه:قومي الله يفشلك الدكتور عصب منك يبغى اسمك
سجيه عصبت وقامت:ما صارت بلا اسم عاد من زين اسمي
الخليجين:ههههههههه
الدكتور وجهه حمر ويسألها:ًWhat
سجيه طالعت الدكتور:وطوط عند أمك
أمجاد:قولي اسمك وانثبري
سجيه:سجيه عبد الرزاق العلي ها خلصنا يا ابو كرشه
الخليجيين ماتوا ضحك
الدكتور ما يفهم وش تقول:ماذا تقولين
أمجاد وقفت وسكتت سجيه اللي كانت بتتكلم:تقول اسمها سجيه عبد الرزاق العلي وهي تتأسف لأنها تأخرت في قول اسمها
الدكتور وهو شاك لأنه يشوف الطلاب يضحكون بس مشاها:حسنا
وكمل اخذ أسماء الطلاب
أمجاد وهي تقعد وتلف على سجيه:استغفر الله العظيم
سجيه:وش تستغفرين له ليه مرتكبين إثم
أمجاد طالعتها وما ردت عليها وسجيه رجعت تنزل تدور نظارتها
في ارض المملكه
عقول مشتته وغارقة في بحر من الأفكار
قاعدين في غرفهم وكل شخص فكره توديه وتجيبه
رواء:مين اللي يرسل هالورد مين ياربي في البدايه توقعته مقلب بس اليوم كانوا كل البنات برا البيت يعني مو مقلب اووووووف راسي بينفجر من كثر التفكير اووووف
دانه:جدي ليه يبغاني ما أروح بكره ياترى ليه وش يبغى فيني هو قال بيقول لي بكره بس والله حاسه قلبي مقبوض وحاسه بخوف ليه ما ادري الله يستر ان شاء الله ما في إلا كل خير الظاهر إني مثل ما قالت جدتي إني موسوسه ايه ما فيه إلا كل خير ان شاء الله بكره بعرف بس الله يستر
لولوه قاعده وسرحانه وتتذكر لما راحت المستشفى
طلعت من عند آلاء وهي تمسد مكان الإبره
رؤيه جاتها وهي خايفه:تعور
لولوه:لا يله روحي دورك
رؤيه:يمه
لولوه:ههههه روحي ما في شي يخوف
رؤيه:بسم الله توكلت على الله ولا اله إلا الله
لولوه:هههه ترى كلها ابره مو رايحه تجاهدين
رؤيه:الجهاد عندي أهون
لولوه :الحمد لله والشكر بس
راحت رؤيه ولولوه تفرك مكان الابره:ايييي
سمعت صوت من وراها:تعورك
لفت شافت مازن:يعني عادي
مازن:لو ينفع كان جيت مكانك وما خليت شي يمسك
لولوه طالعته وسكتت ومازن صار يحك شعره
مازن في نفسه:وش فيني صرت أخورها مع البنت و أقط خيط وخيط صدق إني غبي
وشوي وجاهم مقعد وأسير ومدى وطلعت بعدها رؤيه وهي تتحلطم لان الابره عورتها وراحوا وآلاء قالت هي بتجيب لهم كل اللي يبغونه من أوراق ومختومه وهم راحوا البيت
رجعت لواقعها:وش يقصد وش معنى كلامه يا ترى يقصد شي لا يمكن ما يقصد شي يمكن لأنه حنون قال هالكلام ايه مازن من يومه صغير ما يحب يشوف احد متأذي أو يمكن اووووف والله صدع راسي من كثر ما أفكر وأحط احتمالات
انسدحت على سريرها ورجعت تفكر
قاعدين في غرفه وحده تجمعهم على ان البيت كبير بس لأنهم ما تعودوا يفترقون وما في واحد يقدر يبعد عن الثاني ضلوا مع بعض حتى بعد ما كبروا في نفس الغرفه كل واحد منسدح على سريره ويطالع السقف
يزن:ان شاء الله تحس والله ما ادري إذا طريقتي تنفع ولا لا بس أتوقع انها تنفع بس هي تأخذ الورد معناتها طريقتي ماشيه صح طيب وش دراني انها ما ترميها في الزباله لو صدق ترميها في الزباله هجل كل اللي أسويه ما منه فايده لا لا ما اعتقد بكره بحط لها ورده صفراء آه بس لو رواء تحبني كان انا الحين فوق الغيم
وصار يبتسم والأفكار لحد الحين تدور في راسها
في رأس شبيهه كان يدور في رأسه صوت يؤنبه :صدق إني غبي هجل أقول لها كذا بس ما اعتقد لاحظت لا العب على نفسي كيف ما لاحظت وهي سكتت وما عاد ردت علي بس هي طلعت من غير قصد مني ايه بس لازم انتبه على نفسي أكثر وانتبه ان لساني ما يزل يمكن هي تحب احد ثاني وآنا يطيح وجهي وذيك الساعه والله ما عاد اقدر ارفع عيني في عينها لازم اتاكد إذا كانت تحب ولا لا وبعدها أتصرف ايه
يامن وهو وراء مكتبه وبكره:كلكم نذلات وحقيرات وأنتي وحده منهم يا هبه أل(....) هذا اسمك وعرفناه باقي اعرف وين ساكنه بكره راح اعرف وين أنتي ساكنه وبعدها أعلمك الحساب على أصوله يا أم الجمع
&&&&&&&&&&&&&&
خلصت المحاضرة وهم طالعين أمجاد:أوف نسيت
سجيه:وش نسيتي
أمجاد:دفتري...... ورجعت وهي بتدخل صقعت في بانه اللي توها طالعه
أمجاد بابتسامة غرور وتحدي:ها أشوف الطاووس نافش ريشه لرجة ان ريشه أعماه
بانه وهي ترد لها الابتسامه المغروره:الغرور مني وفيني ولو ما لاق علي ما يلوق على غيري
أمجاد وهي تتكتف:واثقه بنفسك مره
بانه:واثق الخطى يمشي ملكا
سجيه تطالعهم:والله تصلحون
أمجاد:نصلح لوشو
سجيه:تصيرون ربع
أمجاد وبانه طالعوا بعض
سجيه:كل وحده رافعه خشتها ونافخه صدرها وكل وحده منكم مغروره أكثر من الثانيه لو الناس كلهم مثلي كان الدنيا بخير
أمجاد وهي تدخل تجيب الدفتر وبصوت عالي:لو الناس كلهم مثلك كان تذابحوا
بانه فيها الضحكه وماسكتها
سجيه:الناس مثلي أفضل من انهم يكونون مثلك يا هايدي الصغيره
أمجاد:وأنتي كل تشبيهاتك أفلام كرتون
سجيه:ليه وش فيها هايدي يحليلها تركض وراء عنزاتها
بانه:ههههههههههه
أمجاد طالعت بانه وابتسمت على خفيف
سجيه وهي تمد يدها:انا سجيه وإذا بغيتي تدلعيني ناديني سجيوه أو سجوده
بانه صافحتها:انا بانه
سجيه:وهذي أمجاد انا عرفت عليها لأنها ما راح تتنازل و تمد يدها
بانه طالعت أمجاد اللي تطالع سجيه
أمجاد بعناد مدت يدها وبانه صافحتها وكل وحده على وجهها علامات التحدي والغرور
سجيه :خلونا نروح نأكل تراني بموت من الجوع
الكل :يله
راحوا الكافتيريا وهم في الطريق صقعت فيه
فواز:أسف
بانه:حصل خير
وكملت طريقها
فواز:يالله تشبه دانه يوم كانت بالمتوسط شبه خفيف سبحان الله يخلق من الشبه أربعين
مشى وراح لديانا :ها عرفتيها
ديانا:ايه عرفتها
فواز:طيب وينها وريني إياها
ديانا:تعال شفتها رايحه جهة الكافتيريا
فواز:يله
وصلوا الكافتيريا وجلسوا
سجيه:روحوا اشتروا لي
أمجاد:وليه ما تروحين تشترين لنفسك
سجيه:أف منكم ما اعرف انجليزي
بانه:الحين أنتي ما تعرفين انجليزي كيف تذاكرين وتدرسين في جامعه بأميركا
أمجاد:الحبيبه أم الشباب تأخذ ملخصات مترجمه ومدام انها مترجمه معناتها خلاص ما في مشاكل
سجيه:انا حاله نادره
بانه:كيف يعني
أمجاد:هذي اللي قدامك و 24ساعه توطوط مأخذه الدرجه الكامله في الانجليزي هي ما تعرف انجليزي بس عندها طريقه حفظ أحس مني ومنك ياللي نبلبل انجليزي
بانه:غريبه
سجيه:قلت لك انا حاله نادره والحين من بيروح يشتري لي
بانه وقفت:انا
أمجاد:غريبه متنازله ومتكرمه
بانه وهي تاشر على راسها:مزاج
أمجاد ابتسمت على الجنب وبانه راحت تشتري وفواز عيونه عليها
فوزا يلف لديانا:متأكده
ديانا :لكان ايه متأكده
فواز:وآنا أقول تشبه دانه اثاريها هي
قام من مكانه وراح لبانه ومن وراها وبصوت خفيف:مرحبا ببنت العم
بانه لفت للي وراها ورفعت حاجب من حواجبها:نعم
فواز:فواز صالح الزايد ولد عمك
بانه بابتسامه سخريه:اها انت ولد عمي صالح
فواز:انا من رأيي نتكلم برا أحسن
بانه:وليه ان شاء الله نتكلم من أصله
فواز مسكها من يدها بقوه وبصوت معصب:قلت نتكلم برا
بانه وهي تطالع يده اللي ماسكه يدها بقوه وبهدوء:اوكي
طلعوا عند باب الجامعه ووقفت وسحب يدها وعيونها تقدح شرار:خلصني انطق وش عندك
فواز بعصبيه:تلمين ثيابك وعلى اقرب طياره على السعوديه
بانه بابتسامة سخريه:ومن حضرتك علشان تأمرني انا أبوك ما سمعت كلامه اسمع كلامك انت
فواز:اسمعي كلامي لا يجيك شي ما يعجبك
بانه:أقول وخر عن طريقي ولا تخليني أحطك ....وهي تاشر على راسها:في راسي
فواز:انا فواز صالح الزايد أنتي تهدديني
بانه:إذا انت ولد صالح انا بنت عبد العزيز واسأل أبوك عن أبوي وآنا ما اخاف من احد إلا اللي خلقني
فواز:بعطيك مهله لبكره وإذا ما ضفيتي ثيابك وقشك انا بتصرف معاك
داخل الجامعه في الكافتيريا عند طاوله سجيه وأمجاد رن جوال أمجاد رفعته وقامت ترد وطلعت برا عند باب الجامعه علشان تأخذ راحتها بالكلام وبعد ما خلصت لمحت بانه واقفه مع واحد طالعتهم بسخريه ودخلت
عند بانه لمحت أمجاد واقفه من بعيد وراء فواز وكانت تكلم ولما خلصت شافتها تطالعهم بنظرات وبعدها دخلت
بانه بهدوء:اوكي
فواز ابتسم على جنب:لك لحد بكره
ومشى وخلاها وهي ابتسمت ابتسامه لها معنى
وراحت تلحق على أمجاد
دخلت شافتها تمشي جهة الكافتيريا
بانه بصوت عالي:أمجاد
أمجاد تلتفت:خير
بانه:ليش
أمجاد باستغراب وهي واقفه ويديها في جيوبها:وشو اللي ليش
بانه:ليش ناظرتينا بذيك النظرات
أمجاد:يصير لك صح
بانه:تعرفينه
أمجاد:لا
بانه:هجل كيف عرفتي انه يصير لي
أمجاد:ما يبغالها ذكاء ن اسم عائلتكم
بانه:كيف عرفتي انه من عائلة الزايد
أمجاد وهي ترفع يديها على الجامعه:كل الجامعه تعرف لأنه معروف هنا
بانه باستغراب:معروف
أمجاد بضحكه تسليه:ايه معروف خصوصا عند البنات وأهل الحفلات
بانه ابتسمت بخبث:وش عرفك انه يروح حفلات أنتي شفتيه
أمجاد شافت ابتسامة بانه:وش عندك فرحانه
بانه:أول جاوبي شفتيه
أمجاد:ايه مره
بانه:ابغى منك خدمه
أمجاد:من متى المعرفه علشان أخدمك
بانه:اخدميني اليوم أخدمك بكره
أمجاد:مصالح يعني
بانه:بالضبط
أمجاد وهي تحط ذقنها:اممممم اوكي وش هي الخدمه
بانه:اسمعي
أما عند سجيه اللي كانت تنتظرهم
شافتهم جايين وهم يضحكون
سجيه:غريبه وش عندكم
بانه:ولاشي
جات أماني:أنتي هنا وإحنا ندور عليك
نهى:اووف منك تعبتينا ليش رحتي وما قلتي لنا
بانه:أسفه بس تعرفت على بنات ونسيت أقول لكم إني بروح معاهم
أماني ونهى يطالعون أمجاد وسجيه بقرف
سجيه لو خلتها ما تكون سجيه:خير وش عندهم انجلينا جولي وجوليا ربرتس يطالعونا كذا
نهى :هذي أنتي واااي مستحيل
سجيه:من اللي مستحيل يا داموا مستحيل
أمجاد تضحك
أماني:خلينا نروح بانه ترى بننتظرك عند البوابه حقت الجامعه بعد ثلاث ساعات علشان ترجعين معانا الشقه
بانه:اوكي
أماني ونهى راحوا وسجيه تتحمد وتتشكر وأمجاد تضحك بصوت عالي على أشكالهم وهم يطالعون سجيه بخوف
&&&&&&&&&&&&&&&&&&&
مر الوقت وأصبح الصبح على السعوديه
أصبح الصبح على ارض الخير والكرم
قامت من النوم زي عادتها وتوضأت وصلت وبعدها نزلت للمطبخ
أسير وهي نازله قابلت مدى على الدرج
مدى:صبح الخير
أسير:صباح النور
مدى:أسوره غيبي اليوم
أسير:ليه
مدى:بقعد لحالي وملل
أسير:أقول روحي زين انا وحده ما أحب أغيب وبعدين تنزل درجاتي
مدى :مالت عليك
أسير:محد قال لك تحطين يا بقره صبي لبن
مدى اللي تذكرت:ههههههه
أسير وهي تنزل:يله باااي
مدى:باااي
&&&&&&&&&&&&&&
تلبس وترتب روحها علشان الجامعه وفتحت الدرج و تبغى تأخذ شباصه وظلت تتأمل الورد الموجود
رواء:يا ترى اليوم بعد بلاقي ورد ولا لا يووووه وشفيك يا رواء أكيد هذا نتيجة المستأثرات الخارجية أثرت على التفكير والسلوك ايه هذا الاستنتاج الوحيد
خذت الشباصه وصكت الدرج وخذت عبايتها ونزلت
&&&&&&&&&&&&
عند بانه جالسه في غرفتها وتطالع ظلام الليل اللي خيم على الجو وأنوار المحلات و الاناره حقت الشارع تنور الطريق تنهدت
بانه:ان شاء الله أمجاد تسوي اللي طلبته منها ولا ما ادري كيف بتخلص من هالعله فواز اللي ما ادري من وين طلع لي ما أقول إلا الله يأخذك يا بابا نويل يا عله العلات
وسكتت وطرا على بالها فجاه:انا كيف نسيت دانه قالت لي انهم اثنين مو واحد وانا ما شفت إلا واحد هجل الثاني وين مو مشكله مثل ما قدرت على فواز بقدر على الثاني وبلقى له مصيبه اووووف
&&&&&&&&&&&&&&
في ارض المملكه وقت الظهر
طلعت من مدرستها وركبت سيارتها وظلت السياره وراها وين ما راحت راحت وراها لفت يمين لفت وراها لفت يسار لفت وراها وبعدها وقفت عند البيت ونزلت وما انتبهت للسياره المظلله اللي وراها والعيون اللي تراقبها
&&&&&&&&&&&&&&
نزلت للصاله الكبيره بناء على طلب جدها وقلبها طبول ما هي متطمنه دخلت وشافت عمها صافي موجود وجدتها وجدها وعمها صالح وتفاجات من وجود شخص ما توقعت انها تشوفه
شافت نادر جالس معاهم
دانه بهدوء:السلام عليكم
الكل:وعليكم السلام
الجده أشرت لدانه تجلس جنبها وراحت لها دانه وجلست جنبها
الجد:انا ادري إنكم مستغربين ليه جمعتكم هنا انتم بس والباقين لا
الكل يطالعه ومركزين معاه
الجد وهو يحط دقنه على العصا:انا جمعتكم علشان أعطيكم خبر ملكت دانه على نادر بعد أسبوعين
الكل وقف مبهور وألجمهم صمت المفاجاه إلا نادر اللي كان جالس وساكت وما ظهر منه أي ردت فعل
وصالح اللي عنده خبر من قبل
الجده:وش تقول يا خليفه
الجد:اللي سمعتوه
صافي:وشلون يا يبه تقرر تزوج ولدي وانا ابوه مالي رأي
الجد:ليه قراري فيه شي غلط انت شايف دانه فيها عيب
صافي بسرعه: أكيد لا
الجد:هجل خلصنا وما ابغى أي نقاش في هالقرار
وقف نادر ومشى ووقفه صوت الجد بعصبيه:نادر ما بعد خلص الكلام علشان تعطينا ظهرك وتمشي
نادر لف على جده:وش الفايده سوا قعدنا ولا رحنا اللي انت بتقوله بيصير وش الفايده من القعده
دانه كانت الدموع ماليه عيونها ولسانها مشلول ونطقت بكلمه وحده:ليه
الجد بحزم:وشو اللي ليه
دانه:ليه يا يبه
الجد:عندنا فضيحه وحده محنا بناقصين فضيحه ثانيه
الجده:استغفر الله وشو فضيحته
صالح: أبوي صادق مو هي أكيد في الأخير بتقلد أختها وإحنا محنا ناقصين سواد وجه
دانه تسمعهم ومو مصدقه هي اللي تحبهم وتغطي على عيوبهم وتشيلهم فوق راسها يقولون عنها كذا وهذا تفكيرهم عنها
&&&&&&&&&&&&&&&
لحد هنا أوقف واترك لكم حرية التعليق
&&&&&&&&&&&&&&&&&&&&
ودي لكم
قلب امي وروحها
&&&&&&&&&&&&&&&&&
توأم لكن انا غير ومالي مثيل وراسي عنيده
&&&&&&&&&&&&&
&&&&&&&&&&&&&&&&&
&&&&&&&&&&&&&&&&&
البارت التاسع
&&&&&&&&&&&&&&&&
دموعها على خدها وتحس انها مقهوره ما توقعت في يوم من الأيام ان جدها اللي يعزها ويا ما اعتبرته مكان أبوها يمكن يظلمها ويزوجها حتى بدون ما يأخذ رأيها لا ومن واحد حتى هو مجبور عليها يعني ما يبغاها
دانه وهي في حضن جدتها:اهئ اهئ اهئ اهئ
الجده وخاطرها منكسر على حفيدتها:يا بنيتي يا حبيبتي خلاص ارحمي عمرك من البكي ارحمي عويناتك اللي نشفت منها الدموع
دانه وهي تقوم من حضن جدتها وتمسح دموعها بكف يدها وترتجف:حـ...را..م والـ.لـ..ـه ..حـ..را..م
الجده وهي تمسح دموع دانه بطرف شيلتها:يا بنيتي والله ما بيدي حيله والله لو اقدر أسوي شي كان سويته
دانه زاد صياحها وزادت شهقاتها ورجعت لحضن جدتها وجدتها ضمتها وهي تمسح على راسها
&&&&&&&&&&&&&
مجتمعين في الصاله الكبيره
أسير وهي متاثره:والله حرام ليه جدي يسوي كذا في دندون
مدى:أحيانا يا بنات ودي لو اذبح جدي على تفكيره
روابي:مدو وش هالكلام مهما كان هذا جدنا
رؤيه بقهر على دانه وبعصبيه:مدو معاها حق يعني ما لقوا إلا دانه اللي عمرها ما قالت لهم لا حتى على حسابها يزوجنها وغصب عنها
هبه:بس نادر ما فيه أي شي يعيبه
مدى:احنا مو معترضين على نادر معترضين على الفكره نفسها وبعدين حتى نادر مغصوب
هبه:لا تلعبون على نفسكم نادر رجال ما ينغصب على شي مو مثلنا بنات مساكين
دخلت عليهم لولوه:صدق اللي سمعته
مدى بسخريه:كان سألتي اخوك الفاضل
رؤيه:مدى وش فيك لولوه مالها شغل
مدى:أسفه بس والله من قهري على دانه
لولوه وهي تجلس جنب رؤيه:بنات عاد ترى الموضوع مو كارثي لها الدرجه
مدى بعصبيه:ايه وش عليك مو أنتي اللي غاصبينك وقايلين انك ممكن تسودين وجيهم
أسير وهي تمسك مدى:مدو هدي وش فيك
مدى:ايش اهدي والله شي يقهر
روابي بحكمه:لولوه معاها حق
هبه:شلون يعني
روابي:خلونا واقعيين شوي بالله عليكم عندكم من ارحم جدي وتحكمه ولا نادر وبيت عمي صافي
البنات يطالعون بعض
رؤيه:لا الصراحه بيت خالي صافي ارحم
لولوه:يا بنات دانه لما تجي عندنا راح نحطها بعيونا ولا راح نخلي عليها قاصر وبعدين انتم تعرفون ان دانه هي مو بس بنت عمي إلا أختي وصديقة عمري
البنات سكتوا يفكرون بكلام روابي ولولوه
مدى بهدوء:أسفه يا لولوه
لولوه بابتسامه:كلنا نحب دانه ومقدره قهرك عليها
رواء وهي تفكر بصوت عالي:يا ترى أختها إذا درت أكيد بتسوي مصيبه هي وأمها
الكل التفت لها
رواء وهي تعدل نظارتها:وش فيكم التحليل يخليني أتوقع ردات الفعل هذي
أسير:قصدك ممكن أمها تسوي مشاكل
هبه:مالها أي حق انتم نسيتم انها عمرها ما سالت عنها
رؤيه:مسكينه دندون
الكل تنهد وسكتوا
سمعوا صوت مقعد:يــــــــــا ولـــــــد
البنات تغطوا
أسير:حياك مقعد
دخل مقعد ومازن ويزن وسلطان معاهم
وجلسوا بعيدين شوي
سلطان:أخباركم
الكل:زينين
مدى:إلا زفت
مقعد:افا ليه
مدى:يعني ما دريت باللي صار
مقعد:إلا درينا
أسير:وش رأيكم
مازن بحنيه:والله مسكينه
يزن:ايه والله
سلطان:بالعكس انا أشوف انها محظوظه
هبه:محظوظه في ايش يا حسره
سلطان:نادر رجال ما عليه كلام وأكيد بيحطها في عيونه وعمي صافي ما راح يقصر ولا
لولوه:أكيد
أسير:قعودتي لو جدي يبغى يزوجك غصب ترضى
مقعد يسوي روحه مفزوع:فال الله ولا فالك
مدى:هههه تخيلوا شباب يزوجكم غصب
الكل:الله لا يقوله
مدى:لا ويزوجكم الشغالات اللي في البيت
الكل مات ضحك وتلطف الجو شوي
والبنات يضحكون على عيونهم اللي طلعت من مكانها
&&&&&&&&&&&&&&&&&
في بلاد الغرب
لبست وتعدلت وطلعت شافت سجيه قاعده على التلفزيون
سجيه باستغراب:وين يا أم المجد طالعه في هالوقت
أمجاد وهي تطالع سجيه:مو شغلك
سجيه قامت لها وبعصبيه:كيف مو شغلي إلا شغلي ونص على وين طالعه في هالوقت
أمجاد تتأفف:بسهر ساعه زمان وراجعه
سجيه باستغراب وهي تطالع الساعه:تسهرين
أمجاد وهي تفتح الباب:ايه يله باي
صكرت الباب وسجيه جلست على الكنب وتهز راسها بأسف على صديقتها اللي ما تدري وين بتوديها أفكارها وتصرفاتها
سجيه بهمس:ياليت على كل اللي تسوينه يدرون عنك بس
تنهدت ورجعت تطالع التلفزيون
&&&&&&&&&&&&&&&&
في بيت احتد فيه النقاش
:انتم انهبلتم ولا وشو
صافي:لمياء وش هالكلام
لمياء بانفعال:هجل تزوجون وليدي ما لقيتوا إلا ولدي تورطونه
صافي بدا يعصب:وشو توريطته
لمياء:عمي ليه يسوي في أحفاده كذا ليه يسوي في المسكينه كذا ليه يظلمها
صافي:الحين زواجها من ولدنا ظلم
لمياء بحق:إذا كانوا اثنينهم مغصوبين ظلم وستين ألف ظلم
صافي يحاول يهدي لمياء:يا أم معاذ البنت ما بتنظلم وآنا بسكنها عندي وبتعيش معززه ومكرمه
لمياء لفت على صافي :اشوفك واقف بصف أبوك
صافي:لا واقف بصفه ولا شي انا ما أنكر ان في البداية تضايقت بس لما فكرت شفت اننا ما بنلاقي أحسن من دانه لولدنا نادر وبعدين من يدري يمكن تقدر تطلعه من حالة الصمت والعزله اللي حاط عمره فيهم وتنسيه اللي راح منه وحزنه عليها
لمياء:ويمكن تنظلم
صافي:هنا يجي دورنا راح نحرص على انها ما تنظلم ولا تحس بالنقص
لمياء: انا مستعده أوافق على الزواج ولا اعترض بس إذا وافق نادر ودانه
صافي:انا بكلم نادر وأشوف وبكلم أمي واعرف رأي دانه
لمياء وهي تتكلم بسخريه:و إذا اعترضوا يعني احد راح يسمع لهم
صافي طالعها ومارد
لمياء تنهدت وراحت وجلست جنب صافي وحطت يدها على يده وبحنيه:لا تأخذ على خاطرك مني بس والله ما أحب أشوف الظلم واسكت
صافي هز رأسه وابتسم بخفه لها وهي ردت له الابتسامه
&&&&&&&&&&&&&&
جالس في الكوفي وساكت
يوسف:نادر لي ساعه أكلمك وأنت ما تنطق بولا كلمه
نادر طالعه ببرود :وش تبغاني أقول
يوسف:قول رايك
نادر:في ايش
يوسف:في زواجك من دانه
نادر:عادي ما تفرق عندي
يوسف:كيف ما تفرق هذا زواج يعني عمره وحياه
نادر ببرود:ما يهم
يوسف بعصبيه:انت بتجنني كل ما أقول شي تقول ما يهم ما يفرق عندي انت شلون تفكر
نادر طالع يوسف و بمراره:من بعدها ما في احد يهمني
يوسف:انت ما نسيت
نادر ابتسم بمراره:ولا راح أنسى وصك على الموضوع
يوسف سكت وتنهد بغضب ولف وجهه جهة النافذه يطالع الرايح والجاي ورجع يحل الصمت من جديد
&&&&&&&&&&&&&&&&&
قاعده في غرفتها وتحس انها تعبت من كثرة البكي غمضت عيونها وشدت عليهم تحس بهم حارين مثل الجمر
قمت بتعب وراحت الحمام (أكرمكم الله) وطالعت نفسها في المرايه وشافت عيونها مورمين من كثرة البكي وتحس بغصه بحلقها وخذت نفس بالقوه وفتحت الماء البارد وغسلت وجهها ومع برودة الماء صارت تشهق ورجعت طالعت نفسها مره ثانيه وخذت المنشفه تنشف وجهها وراحت ورفعت جوالها
دانه بصوت مخنوق:دقي يا بانه محتاجه لك كثير ااااه يا أختي
وسكتت وهي تفكر:انا ليش انتظر لحد ما اتصل عليها ليش ما اتصل عليها انا
مافي غيره يقدر يساعدني هو الوحيد اللي أثق فيه
قامت بسرعه ولبست الجلال والبرقع وطلعت من غرفتها وصعدت الدرج وراحت لغرفة أسير وطقت الباب وفتحت لها أسير وبابتسامه:هلا والله بدندون
دانه بسرعه:أسير مقعد بالبيت
أسير باستغراب:اخوي مقعد
دانه:ايه
أسير:ايه في غرفته ليه
دانه:أسير واللي يعافيك ناديه لي
أسير باستغراب:أنادي اخوي مقعد
دانه:ايه واللي يخليك ابغاه ضروري
أسير:اوكي
راحت وراحت وراها دانه ووقفت في الصاله وأسير راحت لغرفة مقعد وطقت الباب وسمعت صوته:تفضل
أسير وهي تفتح الباب:نمت
مقعد:لا خير بغيتي شي يا أسوره
أسير:مو انا دانه اللي تبغاك
مقعد متفاجا ومستغرب:دانه
أسير:ايه وهي تستناك في الصاله
مقعد:ودانه وش تبغى
أسير هزت كتوفها
قام مقعد وطلع للصاله وشاف دانه
مقعد:أمري يا دانه
دانه تضغط على يديها بتوتر وتطالع أسير وتنزل نظرها ومقعد فهم
مقعد:أسير اتركينا بس لا تبعدين
أسير:ان شاء الله
راحت ومقعد:خير دانه وش بغيتي
دانه بتوتر ومو عارفه كيف تبدأ:ابغى..ابغى منك..وسكتت
مقعد وهو عاقد حواجبه:دانه خوفتيني قولي وش تبغين
دانه بسرعه:ابغى اكلم بانه
مقعد وهو عاقد حواجبه:ما فهمت
دانه وهي تطالع يديها:اللي اعرفه انك تقدر من تلفونك تتصل على اللي بالخارج عكس جوالي...وكملت بغصه: وابغى اكلم أختي
مقعد سكت وما عرف وش يرد
دانه برجا:مقعد الله يخليك
مقعد اللي كسرت خاطره دانه:طيب لحظه
دخل غرفته وطلع ومعاه الجوال:عطيني الرقم
دانه تنقله الرقم بعدين خذت الجوال منه
مقعد:إذا خلصتي عطيه لأسير وهي تجيبه لي
دانه:مقعد ما...
مقعد يقاطعها:لا تخافين محد راح يعرف
دانه بامتنان:مشكور
وراحت ودخلت غرفتها وضغطت على الزر الأخضر ورن مره وثنتين وثلاث وما في احد يرد
دانه:ردي يا بانه ..وبصوت ضعيف:ردي
&&&&&&&&&&&&&
دخل البيت وقبل لا يصعد الدرج سمع صوت يناديه
:نادر
التفت لمصدر الصوت
صافي:تعال ابغاك في سالفه
راح لأبوه وجلس
صافي:اعتقد انت عارف الموضوع اللي بكلمك فيه
نادر:عارف
صافي:وش رايك
نادر:ايش يفرق
صافي:كيف وش يفرق يعني انت تبغى البنت ولا لا
نادر سكت وما رد
صافي مسك يد ولده:لو ما تبغى البنت انا أول واحد يوقف في وجه أبوي
نادر:ماله داعي
صافي:انت تبغى دانه ومستعد تصونها وتحافظ عليها
نار طالع ابوه ببرود وما رد عليه
صافي:يا وليدي تكلم إذا ما تبغاها قلي لاني مستحيل ارضى ان البنت تنظلم أكثر من هي مظلومه
نادر ما يبغى مشاكل لأبوه لأنه عارف لو عارض جده ممكن يسوي فيه مثل ما سوى في عمه عبد العزيز ويسحب كل شي منه
نادر: تعتقد إني ممكن اظلم احد يا بيه
صافي:عارف يا وليدي انك ما تحب تظلم احد
نادر:هجل خلك واثق إني ما بظلم البنت
صافي ابتسامه:هذا ولدي اللي اعرفه
نادر وقف:تبغى شي ثاني يا يبه
صافي:سلامتك
نادر صعد الدرج وراح لغرفته وهو متضايق من كل شي من حوله وحاس ان عمر الدنيا ما أنصفته
&&&&&&&&&&&&&&&
نامت بعد ارق طويل ما تدري ليش مو مرتاحه وحاسه بضيقه
سمعت صوت الجوال فتحت عيونها بانزعاج وحطت المخده على راسها وسدت أذانيها بس الجوال ما وقف دق
بانه وهي تقوم:اووف من هاللي يدق
رفعت جوالها واستغربت محد يعرف رقمها غير أمها وربعها اللي توها متعرفه عليهم بس ما تدري ليه ضغطت على الزر الأخضر
ووصلها صوتها الباكي:بانه لحقي علي
بانه قامت مفزوعه وبخوف:دانه
دانه:اهئ اهئ بانه
بانه بخوف:وش صاير ليش تبكين
دانه:جدي
بانه:مات
دانه:لا بيزوجوني
بانه باستغراب وتفاجأ:مين بيتزوج
دانه:بيزوجوني انا اهئ اهئ
بانه وهي لحد الحين ما استوعبت:نعم وش قلتي
دانه بصوت مخنوق:انا ما ابغى أتزوج
بانه:بيزوجونك من
دانه :ما راح تصدقين بيزوجوني نادر انا اهئ اهئ ما ابغى اهئ ..وصارت تشاهق
بانه صارت ترمش تحاول تستوعب:دانه أنتي من وين متصله
دانه وهي تسحب نفس:من تلفون مقعد اللي يستخدمه في الاتصال بالعملاء الأجانب للشركه
بانه:طيب سكري وآنا بتصل عليك
دانه بضعف وخوف:لا لا تصكرين
بانه بحنيه:حبيبتي انا الحين بتصل عليك
دانه باستسلام:طيب
صكرت من أختها وهي تردد:الله يأخذك الله يأخذك يالشيبه
راحت الحمام (كرمكم الله)وغسلت وجهها وخذت دقائق تفكر وش تقول لأختها
أما عند دانه رجعت الجوال لأسير علشان تعطيه مقعد ونبهتها ما تقول لأحد ورجعت لغرفتها تنتظر أختها تتصل عليها وبعد ثواني اتصلت وردت دانه على طول والدموع رجعت تتجمع بعيونها:بانه
بانه:حبيبتي اهدي
دان:وش أسوي جدي حدد الملكه بعد أسبوعين
بانه:طيب اهدي يا دانه اهدي شوي
دانه خذت نفس
بانه بهدوء:مو أنتي تحبينه
دنه وهي مستغربه من سؤال أختها:وش قصدك من ذا السؤال
بانه:دانه تزوجي نادر
دانه عيونها طالعه وبهمس:ايش
بانه:اللي سمعتيه
دنه:بس هو...انا ظنيتك...
بانه:صدقيني هذا لمصلحتك
دانه بعصبيه:لمصلحتي انا ظنيتك راح توقفين معاي مو ضدي ليه انا مو أختك
بانه:دانه اسمعيني
دانه وهي تبكي:ما ابغى اسمع شي ولا عاد ابغى اسمه صوتك حتى أنتي ضدي
ليه وش سويت لكم
بانه توها بتتكلم بس دانه صكت الخط
بانه وهي تطالع جوالها:صكت الخط في وجهي
رجعت تتصل بس ما في احد يرد وحطت جوالها على الكومنديه
بانه:أسفه يا أختي بس كذا أحسن لك
أما عند دانه رمت الجوال بعد ما حطت صامت وضمت رجولها ورجعت تبكي بس هالمره بشكل أقوى ما توقعت ان الوحيده اللي ظنتها بتوقف وياها تتركها وتبغى الفكه منها
دانه:حسافه يا أختي حسافه
وسندت راسها على ركبها وظلت في بكاء متواصل
&&&&&&&&&&&&&&&&
في الاستراحه
مجتمعين الشباب
يزن – مازن – يوسف – سلطان – لافي – مقعد
اللي يلعب بلياردو واللي يشرب شاهي ويسولف
مقعد يكلم لافي:وش صار على اخوك
لافي:ما صار شي
مقعد:هو موافق
لافي:ليه في خيارات
مقعد:الله يهديه جدي
يوسف:انتم وش فيكم مكبرين الموضوع البنت مسيرها راح تتزوج نادر ولا غيره
مازن:يمكن لو كان غير نادر كان لها رأي بالموضوع
يوسف:لا تلعب على نفسك كان نفس الشي ما راح يأخذ رأيها المفروض تحمد ربها ان جدي غصبها على نادر مو على واحد ما تعرف يعني شي أهون من شي
يزن:وليه سالفة الإجبار هذي من الأساس
يوسف:عادي الحين مستنكرين الموضوع بعد فتره راح يتعودون على بعض وتصير الأمور عندهم أسهل
يزن:وأنت لو صار لك نفس الشي وغصبك جدي راح تتأقلم
يوسف طالع يزن وطرا على باله آلاء وتأفف
مازن:صدق يا شباب لو صار مع واحد منكم نفس اللي صار لنادر بتوافقون وترضون بالأمر الواقع
سلطان:انا طلعوني من روسكم
مازن:ههههه ههههههههه قل لجدي لا يحطك في رأسه
مقعد:انا عن نفسي كل البنات خواتي
لافي:والله جدي ما يعرف خواتي من إخواني ما يعرف غير ان أمره ينتفذ وبس
سلطان:ان شاء الله الدور مو على شكلي بهج من الديار
الكل:ههههههههه هههه
&&&&&&&&&&&&&&&&&
في بيت الجد
طقت الباب على جدتها تبغى تعرف هي ليه طالبتها وسمعت صوتها:ادخلي يا يمه
دخلت وشافت عمها صافي موجود
دانه:السلام عليكم
الجده وصافي:وعليكم السلام
الجده وهي تاشر على مكان جنبها:تعالي يا يمه اجلسي جمبي
راحت وجلست جنب جدتها
الجده:شوفي يا بنيتي انا جبتك وقدامك بسال عمك وأنتي تسمعين علشان يرتاح بالك
دانه مو فاهمه شي
الجده:حلفت بالله يا صافي نادر راضي عن هالزواج
صافي:ايه راضي وآنا سألته اليوم
دانه تطالع عمها صافي باستغراب وفي نفسها:كيف راضي وهو يحب له وحده أكيد بس يبغى يسكت جدي وعمي صافي
الجده:ها يا بنيتي سمعتي
دانه هزت راسها بأيه
الجده:يا صافي لو جاء لبنتك لولوه زوج مثل ولدك نادر تزوجه
صافي:والله أزوجه وحتى بدون مهر
والتفت صافي على دانه:لا تظنين انك رخيصه بعينا يا بنتي تراك بنت الغالي وأنتي دانتنا تسمعيني يا بنيتي
دانه وعينها تمتلي بالدموع هزت راسها بأيه
صافي:أنتي بتجين عندي بالبيت وبنحطك بعيونا والله انك بتنورين بيتنا وبعدين الكهرب طافي عندنا
دانه ابتسمت بخفه
الجده في نفسها وهي تنهد:الله يسعدك يا بنيتي
&&&&&&&&&&&&&&&
صحت الصباح
ولبست وراحت مع أماني ونهى الجامعه بدون ما تفطر كله شارده تفكر في دانه واللي سوته معاها هي ما سوت هذا إلا علشان مصلحتها الأفضل لها تعيش في بيت عمها صافي أفضل من بيت جدها
تنهدت وسمعت صوت قريب منها:أشوف اينشتاين سرحان
التفتت لسجيه وابتسمت بخفه:آهلين
سجيه:وش فينا سرحانين ولا ندري عن الدنيا
بانه:ولا شي ..وهي تدور بعيونها:وين أمجاد
سجيه:جايه بعد شوي
وجاتهم أمجاد وراحوا على المحاضرة علشان يلقون مكان قدام
لما وصلوا عند بابا القاعه
أمجاد:سجيه ادخلي احجزي لنا كراسي قدام انا وبانه بنروح دورة المياه
سجيه تخصرت:قولي والله أقول ولي زين
أمجاد:سجيه تراني مصدعه ومو رايقه لك
سجيه وهي تتأفف:طيب خلاص ..ودخلت وهم راحوا على دورت المياه
دخلوا دورة المياه ووقفوا عند المرايه
بانه بهدوء:ها جبتيه
أمجاد وهي تبتسم على جنب:ايه
بانه فتحت جوالها:أرسليه
أرسلته أمجاد و بانه ضحكت وهي تشوف المقطع:حلو
وطالعت أمجاد:خلي المقطع عندك في الجوال لا تمسحينه
أمجاد:ليه
بانه:احتياط
أمجاد:اوكي
طلعوا من دورة المياه رايحين للقاعه
عند سجيه محبوبة الكل دخلت وصارت تدور بعيونها على مكان
سجيه راحت قدام بس بعدين ذكرت الشنطه الكبريه اللي في يدها:لا لا ما ينفع اللي معاي يجي قدام
ورجعت وراي وجلست
جاو اثنين وكانوا بيجلسون
سجيه:خير وين مدرعم يالحبيب
الشاب الاول:نعم
سجيه:يله محجوز
الشاب الاول:ليه نقل جماعي تحجزين
سجيه:ايه نقل أبوي عندك مشكله انت ويا قذلتك
الشاب الثاني وهو فيه الضحكه:خلنا نجي قدام
الشاب الاول حقد على سجيه وجلسوا قدامها
وجاووها أمجاد وبانه
أمجاد:أنتي ليه حاجزه لنا هنا
سجيه:هنا أحسن
أمجاد:انا ما قلت قدام
سجيه:أوف اجلسي ولا تتشرطين
جلست أمجاد جنب سجيه وجنبها بانه
وامتلأت القاعه
سجيه تطلع من شنطتها مثل الكوب اللي يحفظ فيه القهوه اتمنى عرفتوه
وفتحته وبدت تشرب
أمجاد باستغراب:وش تسوين
سجيه:ما لحقت اشرب حليبي قلت أجيبه معاي
بانه مسكت ضحكتها وأمجاد طالعت عيونها وعصبت:أنتي مجنونه
سجيه:ليه وش سويت
شوي إلا دخل الدكتور اللي يدرس الماده حقتهم
سجيه طلعت عيونها وفتحت فمها:يا ارض حفظي ما عليك هذا دكتور مادتنا ولا وائل كفوري
أمجاد و بانه يطالعون سجيه ويطالعون الدكتور وكان توه شباب
سجيه:يا ويلي ما أحلاك يا حليوه
وتلتفت على بانه وأمجاد:شفتوه يا رلبيه على الشعر ولا شعور الفلبينيين
الشاب اللي قدام:أقول إذا في بالك مغازل اجلي بعدين خلينا نسمع وش يقول
سجيه:أقول يا ابو قذيله انطم
صديقه ماسك ضحكته
الشاب الاول:ناس ما تستحي
سجيه عصبت و بطولة لسان:مخليه الحياء لك انت ويا هالقذله
انتبه الدكتور على صوت سجيه
الدكتور:You
أمجاد بهمس:سجيه الدكتور يناديك
سجيه تلتفت:انا الحليوه يناديني
الدكتور قرب ووقف عندهم
الدكتور:yes, you
سجيه:معناة الكلمه هذي معناتها ايه عرفت معناتها نعم
أمجاد وبانه ماسكين ضحكتهم
الشاب اللي قدامها يضحك
سجيه:أقول سك حلقك جعل ضروسك تطيح وش عليه تضحك
الدكتور عصب:What is you name?
سجيه:وش يقول
أمجاد بهمس:اسمك
سجيه :اسمي انا يا ربي يا الحلو تبغى اسمي
الدكتور :yes
بانه انتبهت ان الدكتور يرد على سجيه مع انه المفروض ما يفهم وش تقول لأنها تتكلم عربي والتفتت على سجيه تاشر لها
سجيه:والله بقولك اسمي بس انت لا تنحاش
الدكتور:لا تخافين ما راح أنحاش قولي
سجيه انصدمت وعيونها طلعت وبلعت ريقها:عربي ..قصدي خليجي...قصدي سعودي
بانه وأمجاد عاضين على شفايفهم ومنزلين روسهم وميتين ضحك
الدكتور:ابغاك بعض المحاضرة تجيني فاهمه
سجيه وهي لحد الحين مصدومه:ها
مشى الدكتور وأمجاد سحبت سجيه وجلستها وهي ماسكه ضحكتها
سجيه وهي تطالعهم بحق:اضحكوا
بانه وأمجاد حطو يديهم على فمهم وماتوا ضحك
سجيه طالعت اللي قدامها:ابو قذيله اضحك انت بعد
الشاب تقطع من الضحك فرصته يبرد حرته
&&&&&&&&&&&&&&&&&&
قاعد وراء مكتبه وهو يتأفف
يامن:اووف هذا وقت الشغل يوم جيت بسوي اللي في بالي وأقدم على أول خطوه تطلع لي هالمشكله في الشغل بس اخلص من هالشغل وأتفرغ لك عدل
وأعلمك الحساب ههههههههه
ورجع لشغله وهو يبغى يخلصه بأسرع وقت
&&&&&&&&&&&&&&&
في الجامعه
قابلها وعيونه تقدح شرار جاها ومسك يدها بقوه ومشاها لحد ما وقفوا عند البوابه حقت الجامعه
فواز بعصبيه وهمس:ما قلت لك لمي قشك وانقلعي على اقرب طياره
بانه وهي تنفض يدها:تو تو انا لو بروح على أول طياره راح احرص انك تكون معاي يا ولد عمي العزيز
فواز باستغراب:نعم
بانه:شلون كانت حفلة البارح ان شاء الله انبسطت
فواز تفاجأ:ايش قلتي
بانه وهي تبتسم على جنب:اسمعني من الأخر يا ولد العم إذا تفكر ترجعني للسعوديه انا رح احرص انك تكون جنبي في الكرسي واعتقد ان جدك ما يحب سالفة الحفلات ولا انا غلطانه
فواز مسكها من يدها بقوه وحست انها بتنكسر:تهدديني يا ح..
بانه:لا تغلط ولا والله ان يعرف جدك بسوالفك وتروح وراء الشمس
فواز سكت وهو يطالعها بحقد
بانه:انا ابغى منك طلب ولا راح يوصل لجدك سالفة خرابيطك
فواز:تخسين أسوي لك شي ما بعد عاش من يهدد فواز
بانه وهي تعطيه ظهرها:خلاص
فواز غمض عيونه وزفر بضيق:استني وش طلبك
بانه بابتسامه:ابغى طلب صغينون
فواز يطالع بحقد وينتظرها تكمل
بانه:كل اللي ابغاه انك تقنع بابا نويل اللي هو جدك يخليني هنا ادرس وأنت بتهتم فيني
فواز :في أحلامك
بانه:خلاص نرجع سوا على السعوديه وراح نستانس مع بعض في الرحله
فواز بعد تفكير:عطيني مهله
بانه:اوكي
ومشت وخلته وراها وهو مقهور ووده لو يذبحها وصار يسب فيها
&&&&&&&&&&&&&
لهنا وقف واترك لكم حرية االتعليق
&&&&&&&&&&&&&
ودي لكم
&&&&&&&&&&&&&&بارت طويـــــــــــــــــــل
&&&&&&&&&&&&&&&&
توأم لكن انا غير ومالي مثيل وراسي عنيده
&&&&&&&&&&&&&
|
07-01-12, 10:03 PM
جديد مواضيع قسم القصص المكتمله
العرض العادي
