كاتب الموضوع :
بياض الصبح
المنتدى :
القصص المكتمله
البارت الثاني عشر
&&&&&&&&&&&
تعب من الحاله اللي هو فيها عوار الرأس يروح ويرجع ودوخه ولوعة كبد وش هالحاله صار يشك ان هذي أعراض مرض خطير
طالع صديق اللي أقنعه انه يجي هالمكان
سليمان:وش فيه هالدكتور تأخر
حمد:يا أخي راح يجيب التحاليل وجاي
سليمان وهو يمسك رأسه:اااااااه
حمود:فيك شي
سليمان:لا عوار رأس تعودت عليه
دخل الدكتور وجلس وراء مكتبه وصار يطالع أوراق التحاليل ويطالع سليمان وحمود ويرجع يطالع الأوراق
سليمان وحمود يطالعون بعض
وأخيرا الدكتور نطق:أول مره هذي الأعراض تجيك
سليمان:لا مو أول مره
الدكتور:طيب انت متعود تروح مكان معين تشرب فيه يعني قهوه أو مطعم معين تداوم الروحه عليه
سليمان وهو مطالع حمود مستغرب:لا
الدكتور هز رأسه بتفهم
سليمان استغرب على أسئلة الدكتور:دكتور وش فيني
الدكتور:والله اللي فيك شي غريب
سليمان وحمود طالعو بعض بخوف ورجع سأل:ما قلت لي وش فيني
الدكتور وهو ينزل نظارته:الصراحه اللي تبين لي من التحاليل ان في جسمك عشبه من نوع ضار وهي اللي مسببه هالاعراض
سليمان قطب حواجبه:وش عشبته
الدكتور:انا أفهمك النوع هذا من الأعشاب يستخدم في صنع بعض الادويه وهو إذا احد تناوله بروحه يكون ضار وإحنا في الطب نضيف بعض المواد له علشان يكون علاج نافع
سليمان:بس وشلون وصلني
الدكتور:انت وش أخر شي شربته
سليمان يحاول يتذكر:ما اذكر إني شربت شي
الدكتور:تذكر زين
سليمان يحاول يتذكر:انا ما اذكر إني رحت مكان علشان اشرب شي قابلت حمود وجينا هنا على طول
الدكتور وبنظرة شك:وفي بيتكم
سليمان:أكيد لا يا دكتور يعني في .....وسكت
حمود:سليمان وش فيك تذكرت شي
سليمان رجع بذاكرته لثلاث ساعات وتذكر الكوفي اللي شربه واللي قبله كان صحته تمام
حمود:سليمان وش فيك ما ترد تذكرت شي
سليمان انتبه:لا لا بس دكتور حبيت اعرف في علاج ممكن يفيدني ويروح عني عوار الرأس
الدكتور قدر ان سليمان ما يبغى يقول:انا راح اكتب لك شوية أدويه راح تفيدك وانتبه زين على نفسك...وبدا يكتب في الورقه وسليمان فكره شارد وحمود لاحظ هالشرود
طلعوا من المستشفى وركبوا السياره
حمود:وش فيك
سليمان:لا ولا شي
حمود:علي هالكلام انت تذكرت شي صح ولا انا غلطان
سليمان ظل يفكر وما رد على حمود اللي يكلمه
&&&&&&&&&&&&&&&&&&&&&&
قاعد في البيت وما له خلق للشغل صار ماله خلق لأي شي ويحس انه متضايق ومهموم دخل عليه خليل وجلس بدون ما يتكلم
خليل وهو يتأمل بشار السرحان وقرر يقطع هالسرحان:وش تفكر فيه
بشار بهدوء:كل شي
خليل:سمر
بشار ابتسم بحزن:سمر ماضي ماضي حلو
خليل:هجل في ايش
بشار سكت ومارد
خليل ابتسم :جايب لك أخبار راح تفرحك
بشار باستغراب:خير
خليل:ابو سالم بيفلس قريب
بشار اللي شد اهتمام كلام خليل:ايش بها السرعه
خليل:انت تعرف خليل وتعرف وش يقدر يسوي
بشار:لو ما أعرفك كان ما خليتك تساعدني في هالشغله
خليل:ههههههههه طيب ما استأهل عزومه على خبر مثل هذا
بشار:أكيد تستاهل
خليل:اشوفك قاعده يله قم أعزمني وبأغلى المطاعم
بشار:هههه طيب يله
قاموا وخليل حاط في باله انه يخفف على صديقه
&&&&&&&&&&&&&&&&&&&&&
طلعت من البيت بعد ما خذت الإذن وركبت مع السواق وهي في بالها شي معين وصلت لبيت أخوها بشار ودخلت وراحت على المخزن على طول كان المخزن كله غبار صارت تدور عن اللي تبغاه
وتدور وتدور و لقته رفعت الصندوق ونفخت عنه الغبار ابتسمت وجلست على كرسي قديم موجود في المخزن فتحت الصندوق أمتلت عيونها بالدموع وهي تشوف اللعبه ورجعت بالذكريات لسنين طويله وراء
انين:يبه ما اعرف لها صعبه
أبوها محمد بابتسامه:ما في شي صعب بس هاللعبه تحتاج تركيز وتخطيط وفي الأخير راح تذبحين جنودي وتوصلين
انين رجعت للحاضر:قربت أوصل يا يبه قربت انتصر سويت كل اللي علمتني إياه في هاللعبه خططت وفكرت وهجمت وبديت أصيب الأهداف وراح أوصل وأفوز
سكرت اللعبه ورجعتها الصندوق وخذتها وطلعت من المخزن ودخلت داخل البيت وصعدت الدرج وراحت للغرفه اللي كل ما بغت تدخلها تحس برجولها ثقيله بس هالمره ما حست بها الثقل وحست انه خطوتها تختلف عن كل خطوه خطتها لها الغرفه من قبل
فتحت الباب وشغلت النور وراحت جهة الكومنديه وفتحتها وطلعت الألبوم خذت كم صوره وحطتهم في الصندوق وطلعت وطفت النور وهي حاطه في بالها ان هالاشياء وقتها قرب
&&&&&&&&&&&&&&&&&&&
طق على أخته الباب اليوم مستغرب ما شافها مثل العاده ورجع يطق الباب وما في رد
سالم:سمر
ويطق الباب مره ثانيه يبغى يفاتحها في الموضوع بعد ما وكله ابوه بها المهمه
سمع قفل الباب ينفتح وفتحت الباب وشافها تروح وتجلس على السرير
دخل سالم وصك الباب وراه:ساعه تفتحين لا يكون كنتي نايمه
سمر بصوت مخنوق:لا
سالم وهو يجلس جنبها:سمر فيك شي
سمر حست ان ودها تبكي بس ماسكه نفسها
سالم:سمور فيك شي ...ويطالع وجهها:أنتي كنتي تبكين
سمر ما تحملت وصارت تشهق
سالم وهو يحوط كتوفها وبخوف:وش فيك في احد مزعلك
سمر من بين شهقاتها ودموعها هزت راسها بلا
سالم:تعبانه تحسين بشي
سمر:لا
سالم:هجل وش فيك
سمر بكذب:اشتقت لامي
سالم تنهد:كلنا اشتقنا لها وما نسيناها ولا راح ننساها
وبحنيه وهو يبتسم لها يكمل:يله حبيبتي روحي غسلي وجهك وتعالي ابغاك في موضوع
سمر بعدت عن سالم وصارت تمسح دموعها:طيب
قامت غسلت وجهها ورجعت تجلس جنبه
سالم وهو محتار ما يعرف وشلون المفروض يبدأ
سمر:سالم وش الموضوع اللي تبغاني فيه
سالم:في ناس خطبوك ..قصدي جاء لك عريس
سمر تفاجات:انا
سالم:هجل انا ايه أنتي وتعرفينه زين
سمر باستغراب:من
سالم:ناصر
سمر وقفت:مو موافقه
سالم تفاجأ من رد أخته لأنه توقع توافق وما توقع ترد بها السرعه:ليه
سمر:بدون ليه انا ما ابغى أتزوج
سالم:شلون يعني ما تبغين تتزوجين
سمر:قصدي ما أفكر في الموضوع
سالم وقف:انا لحد الحين ما سمعت عذر يقنع وما راح اعتبر هذا ردك وبترك لك فرصه تفكرين ولا راح أرد على ناصر
سمر:بس..
سالم يقاطعها:فكري وبعدها ردي بس يا أختي ترى ناصر رجال والنعم فيه وراح يحطك في عيونه وكافي انك بتكونين عند خالتي اللي تموت فيك تذكري هالشي
طلع وخلاها مع الدموع اللي بدت ترجع لعيونها والأفكار الكثير اللي تدور برأسها وبمشاعرها اللي تحس بعذاب منها
&&&&&&&&&&&&&&&&&&&&&&&
دخل البيت وهو يبغى يتأكد من شكوكه إذا كانت صحيحه ولا لا
سليمان وهو في الصاله:انتيا..انتيا
انتيا:نام بابا
سليمان:سوي لي كافي بسرعه
انتيا:جين بابا
وراحت طلع هو من البيت للحديقه ودار من وراء البيت وراح لجهة باب المطبخ الخارجي وصار يطل من النافذه حقت المطبخ وصار يراقبها
انتيا وهي تغلي الماء وبعدها تسوي الكافي وكان كل شي عادي حس بأنه ظلمها بس في أخر لحظه شافها تطلع كيس من جيبها وتأخذ منه وتحطه في الكافي طلعت عيونه يعني ظنونه طلعت في محلها ما حس على نفسه إلا هو داخل عليها و انتيا دخلت الكيس بسرعه في جيبها وهي خايفه ومرتبكه
سليمان وهو يمسك يدها بقوه ويضغط عليها:يا حيوانه يا كلبه كنت عارفه انه أنتي
انتيا:بابا ايش في
سليمان بعصبيه:طلعي اللي في جيبك لا اوريك شي عمرك ما شفتيه
انتيا صار تبكي:اهئ...اهئ.... ما في معلوم
سليمان بصراخ:طلعيه
بيد مرتجفه طلعت الكيس وسليمان خذاه وصار يصارخ:من قالك تحطينه وكيف جبتيه
انتيا تبكي وتهز راسها وكانها ما تدري
سليمان :بتقولين ولا اوديك الشرطه
انتيا وهي تبكي:اهئ ..لا بابا انا في قول
سليمان:تكلمي
انتيا:ماما انين
سليمان تفاجأ ما توقع ان المواصيل توصل معاها لحد هنا وبشك:إذا كنتي تكذبين راح أذبحك فاهمه
أنتي:انا ما في اكذب هزا ماما انين أعطي هزا انا قول هطي لبابا سليمان في كوفي أو عصير وفي هدد انا وآنا في كوف
سليمان ترك يدها وبنبرة تهديد:اسمعيني زين تلمين أغراضك وعلى أول طياره تنقلعين لأبلغ عنك يا حيوانه فاهمه
انتيا هزت راسها بخوف وراحت بسرعه لغرفتها
سليمان يحس انه وده يذبح هالانين كان عارف من البداية انها خبيثه بس ما توقع انها توصل معاها لها الحد
سليمان:انا اوريك يالحقيره ..طلع الصاله وشافها توها داخله البيت مشى ناحيتها ومسكها من يدها وجرها جهة المجلس ودزها على الكنب
انين بعصبيه:كسر انت وشلون تسحبني كذا وش مفكر نفسك ها
سليمان طلع الكيس:ممكن اعرف وش هذا
انين ببرود تعدل جلستها وتطالع الكيس:ما ادري انت تسألني وأنت اللي شايل الكيس
سليمان بعصبيه يمسكها من يدها:هذا هو الكيس اللي عطيتيه لانتيا تحطه لي في المشروب
انين وهي تسحب يدها:انت لا تقعد تالف قصص عني
سليمان:أنتي عارفه ان هذي الحقيقه
انين بابتسامه:بس ما في احد غيرنا يعرف والكل ما راح يصدقك إذا كنت تفكر انك تقول لهم
سليمان :يعني تعترفين ان أنتي اللي قايله لانتيا تحط لي هالعشبه في المشروب
انين بتفاجأ:أي عشبه
سليمان ما فاته المفاجاه اللي على وجهها بس توقع هذي وحده من تمثيلياتها: رجعنا للهبل
انين سكتت تفكر وبين عليها العصبيه
سليمان:راح أدفعك الثمن غالي يا انين
انين طالعته وقامت وقبل ما تطلع وهي معطته ظهرها:ما راح تلحق لان العد التنازلي قرب كثير وما عاد في وقت
سليمان ما فهم وش تقصد
طلعت من المجلس وراحت غرفتها وهي مقهوره من خليل اللي كذب عليها وما راح تفوتها له
وخلت وراها سليمان المقهور ومو عارف وشلون يبرد حرته منها
&&&&&&&&&&&&&&&&&
(بداية النهايه)
في الشركه
ابو سالم بعصبيه:شلون يعني
الموظف عبدالله:والله هذا اللي تبين معانا بالحسابات
ابو سالم:شلون صار كذا المشروع ما شي أحسن مما يكون
عبدالله:والله يا طويل العمر انا مثلك تفاجات باللي في الأوراق
ابو سالم وهو يضغط على زر التلفون على السكرتير:اتصلي بخليل قل له يجي الحين عندي بالمكتب
السكرتير:ان شاء الله طال عمرك
ابو سالم وهو معصب :اسمع ابغاك تدقق في كل الأوراق سامع
عبدالله:بس يا طويل العمر هذي تأخذ وقت
ابو سالم :ما يهم أهم شي تدقق فيها معك من هنا لبكره ورد علي
الموظف عبدالله وهو يقوم:تأمر أمر بغيت شي ثاني
ابو سالم:لا
طلع الموظف ودخل السكرتير:يا طويل العمر الأستاذ خليل اتصلنا فيه وقالوا عنده اجتماع مغلق
ابو سالم :طيب...طيب انا أتصرف انت روح
رفع جواله واتصل على بشار اللي كان وراء مكتبه:حيا الله ابو سالم
ابو سالم:الله يحيك بشار ابغاك تجي عندي الحين
بشار اللي كان يطالع اللي جالس عنده ويبتسم له:عسى ماشر
ابو سالم:تعال وبعدها تفهم
بشار:خلاص جاي
صكر الخط وبعدها:ههههههههههههههههه ههههههه
خليل وهو مقابل بشار:شكله عرف ان المشروع فشوش
وصاروا اثنينهم يضحكون
بشار وهو يقوم:لازم أروح وأواسيه قبل لا ينضرب الضربه الكبيره
خليل:ههههههه يا حنون
بشار وهو يضحك:يله سلام
خليل:سلام
طلع وراح لأبو سالم علشان يكمل التمثيليه
&&&&&&&&&&&&&&&&&
جالسه في الصاله وتستنى جاتها انين وصارت تطالعها وهي تبتسم
العنود ونظرات الكره بعيونها:خير وش عندك توزعين ابتسامات
انين وهي فرحانه لأنها قاعده تشوف بداية نصرها:ابد حرام الواحد يبتسم يعني
العنود:جعلني اضحك يوم تنطردين برا البيت
انين:راح نشوف من اللي بيضحك في الأخر
صعدت الدرج وهي تضحك والعنود استغربت بس طنشت لما سمعت صوت الجوال وردت:الو
ناديه:يله اطلعي
العنود:طيب
طلعت وركبت مع ناديه :وش فيك تاخرتي
ناديه:ابد بس علبال ما دليت البيت تدري أول مره أجي بيتكم
العنود:طيب
مشت السياره والله العالم لأي طريق راح توصل
&&&&&&&&&&&&&&&&
رجع البيت وهو يحس انه لحد الحين معصب لأنه ما قدر يقابل خليل ومع ان بشار طمنه إلا ان قلبه مقبوض من سالفة خليل
صعد الدرج وراح لجناحه ودخل شاف انين تطالع تلفزيون
ابو سالم:السلام عليكم
انين: وعليكم السلام
جلست وانين استغربت عصبيته:وش فيك عسى ماشر
ابو سالم وهو يفك أزرار ثوبه:المشروع
انين :وش فيه
ابو سالم:راجعنا الأوراق وفي أشياء مو مضبوطه المفروض ان الأرباح موجوده في حساباتنا الحين بس ما شفنا شي من هالارباح
انين:يعني المشروع خسر ولا ايش
ابو سالم:خليل هو اللي عنده الاجابه لان هو اللي يدير المشروع كله وآنا ما عندي خلفيه كبيره عنه حاولت اليوم اتصل فيه وأقابله بس ما قدرت كله مشغول
انين:ان شاء الله ما في إلا كل خير وخليل مو أول مره يشتغل انا اسمع عنه من بشار انه تاجر شاطر
ابو سالم هز رأسه وقام وقبل ما يدخل غرفته:ان شاء الله ما يكون في مشاكل وكل شي مضبوط ولا راح أروح فيها
دخل غرفته وانين انرسمت على وجهها ابتسامه وفي داخلها:انت رحت فيها وخلصت وموج البحر اغرق سفينتك وجبال الذهب صارت بالقاع ههههههههههههههههه
تذكرت شي وقامت لان اليوم بالنسبه لها غير تحس بطعم الفرحه بالفعل ولازم تكمل فرحتها
&&&&&&&&&&&&&&&&&&
قاعد بالمطعم وكل شوي يقوم وخليل يمسك يده ويجلسه
خليل:يا أخي اقعد تراك أشغلتني كل شوي قايم
بشار:والله ما ادري محتار أحس ان اللي أسويه خيانه لأختي
خليل:أي خيانه انت بالعكس قاعد تساعدها وتساعد نفسك
بشار سكت
خليل:لما تقابله انا متأكد انك راح تغير رايك
بشار هز رأسه وسكت
جاء الضيف اللي كانوا ينتظرونه:السلام عليكم
بشار:انت
هاني وهو يجلس:ايه انا ما شاء الله عليك ذاكرتك قويه
بشار:أكيد بذكرك مو انت كنت بتآكلنا بعيونك يوم ملكة سالم ...وباستغراب:بس انت وش عرفك على خليل كيف عرفتوا بعض
خليل:بعدين اقولك المهم الموضوع اللي جايين له ويا ليت لو تقول له يا هاني اللي قلته لي
هاني:ان شاء الله....والتفت لبشار:اسمع زين يا أخ بشار انت لازم تتعاون معي انك توقف أختك عند حدها ولا راح يتفاقم الموضوع لأكبر من كذا بكثير
بشار:وش قصدك
هاني:اقصد ان الحاله اللي تمر فيها أختك تعتبر حاله نفسيه لان الأشياء اللي تسويها مو أمور ما يسويها عاقل سليم مثلي ومثلك يعني انت مريت بكل اللي مرت هي به بس ما اشوفك تسوي مثلها بس هي عندها الأمر أكثر من مجرد انتقام
بشار صار يطالع خليل ورجع يطالع هاني:ممكن توضح لي أكثر
هاني: كل شخص له فكره عن الانتقام ويحب ينتقم بطريقته ممكن اعرف أختك وش فكرتها عن الانتقام يعني هي ذكرت لك شي عن موضوع انتقامها أو تكلمت فيه
بشار:هي كل مره تقول انها لعبة شطرنج وإحنا قاعدين نلعب
هاني:انتم تعرفون لعبة الشطرنج صح
خليل:أكيد
هاني:أختك تتصور الحياة من حولها مثل هاللعبه يعني ابو سالم الهدف الكبير علشان تفوز لازم تقضي عليه نهائيا
بشار سكت وخليل التزم الصمت معاه
هاني:انتم لازم توقفون الانتقام وهالكلام كله ...وصار يطالع بشار
ويكمل:حتى لو انتقمتم صدقوني ما راح ترتاحون راح تكونون خسرانين مو ربحانين مثل ما انتم مفكرين وأختك انا متأكد ان لها خططها لان في لعبة لشطرنج اللاعب لازم يكون مخطط ممتاز ولاعب ماهر وهي تعتبر نفسها اللاعبه وانتم الأدوات اللي تحركها
بشار سكت وهو يتذكر طلبها من خليل اللي كان من وراه ولا قالت له عنه
وبدا يحس ان خليل معاه حق وإنهم لازم يكتفون في سالفة انتقامهم بسلب ابو سالم كل ما يمللك من فلوس وبس
وصار يسمع لهاني ويطرح عليه الاسئله وفي باله أمور امور كثيره
&&&&&&&&&&&&&&
قاعده في الشقه وتفكر في اللي دار فبل فتره ومحتاره
حلا معقوله الصدف تصير لها الدرجه رفعت الكرت ورجعت بذاكرتها للوراء
جالسه معاه وسألها:أنتي تعرفين وحده اسمها العنود
حلا:لا
سليمان:العنود راشد العالي
حلا اللي كانت تشرب العصير:كح كح كح وش قلت
سليمان:قلت اسمها العنود راشد العالي تعرفينها
حلا وهي تحرك المزاز في العصير:قلت لك لا بس هي وش تصير لك
سليمان:أختي
العنود اللي طلعت عيونها:أختك
سليمان:ايه
حلا سكتت وهي تفكر بعمق
وتذكرت قبل ما تطلع من المجمع ان سليمان عطاها كرته وتتذكر أخر كلماته:ادري ان غلط و المفروض إني ما أعطيك رقمي بس لو احتجتي احد يساعدك في شي لا تترددين
خذت الكرت وأشرت له بأيه وراحت
رجعت للواقع على صوت الجرس وراحت تفتح الباب
ناديه:سلام
حلا :آهلين
العنود :مرحبا
حلا:مرحبتين حياكم
العنود وهي تسمع صوت الموسيقى المرتفع:شكل الحفله حلو
ناديه:راح تعجبك موت بس خلينا أول نروح الغرفه نعدل أشكالنا عند المرايه ونفسخ عباياتنا
العنود:طيب
حلا:تفضلوا البيت بيتكم اخذوا راحتكم
راحوا الغرفه وحلا راحت المطبخ وهي لحد الحين تفكر وصار تفكر في العنود وسليمان وبدت تحط سليمان في كفه وانين واللي ممكن تسويه في كفه
حلا:سليمان ولا انين يا حلا سليمان أول شاب يعاملك بحق وحقيق وما يقصد شي من وراء معاملته الطيبه لك ولا انين وفلوسها اللي يا ما غرقتك بس سليمان لو عرف إني افتح شقق واجمع فيها الشباب والبنات أكيد راح يحتقرني ويتخلى عني وما يشرفه يعرف وحده مثلي وانين لو انا خنت الاتفاق اللي بينا راح توديني وراء الشمس اووووف قرار صعب
في الغرفه يعدلون أشكالهم
ناديه:حبيبتي العنود خليك هنا انا بروح لحلا شوي وراجعه
العنود:اوكي بس لا تطولين
ناديه بابتسامه صفراء:لا تخافين يا حلوه
وطلعت وبقت العنود لحالها وبعد ربع ساعه سمعت صوت صراخ وخافت وشوي إلا انفتح الباب ودخل رجال امن
العنود:وش صاير ومن انت
الشرطي:امشي يا حيوانه
العنود وهي خايفه:و..وين.... نروح
الشرطي يمسكها من يدها ويسحبها:وحده مثلك مكانها السجن يله
العنود وهي تسحب نفسها وتبكي:انا ما سويت شي الله يخليك
الشرطي:يله البسي عبايتك
العنود تلبس عبايتها ويمسكها الشرطي ولما طلعت من الغرفه تفاجات بالأشكال اللي شافتها ومناظر البنات طلعت عيونها وقلبها صار يدق بقوه وشوي ويوقف ودموعها صارت تنزل أكثر وأكثر وتحس برجفه و رجولها مو شايلتها
نزلوهم من العماره وركبوهم السياره والعنود خايفه وتحس انها بتموت ومو فاهمه أي شي وينها ناديه ووش صاير وآنا في حلم ولا علم
حلا اللي كانت واقفه عند العماره بالسياره ومعاها ناديه اللي تضحك وهم يشوفون العنود وهي تركب السياره مع البنات الممسوكين
حلا رفعت جوالها واتصلت عليه وقالت كلمتين:نفذت المطلوب
صكرت الخط وهي تحس انها متضايقه لفت لناديه:انزلي
ناديه:وين انزل
حلا:عندي مشوار
نزلت ناديه وحلا أمرت السواق يتحرك وهي في بالها شي معين رفعت جوالها واتصلت
&&&&&&&&&&&&&&&
خلونا نروح للعنود ونشوف وش يصير معاها
&&&&&&&&&&&&&&&&&&&&
دخلت مع البنات والشباب مركز الشرطه وهي تردد وتعيد:والله ما لي دخل انا ما ادري عن شي
رجل الأمن:بس ولا كلمه
دخلوا عند الضابط اللي مبين انه يخوف وشديد وظل يطالعهم بكره واحتقار :يا حوش يا قذارة المجتمع
العنود تبكي وتشاهق
الضابط جاء قدامها:بس ما ابغى اسمع ولا نفس الحين تبكين بعد ما وطيتي رأس اهلك
العنود:والله ما اعرف شي
صار:هذا اللي فالحين فيه بعد ما تمسكون تصيرون ما تعرفون شي
العنود رجولها ما عادت تشيلها وجلست على الأرض:اهئ..اهئئئئئئ...والله انا ما لي ذنب والله ما ادري عن ش والله هي قالت لي حفله بنات
الضابط يضحك بسخريه:لا يا شيخه
وبصراخ:قومي وقفي أشوف واتركي عنك هالمسلسل المكسيكي اللي تسوينه
راح وراء المكتب وطلب من مساعده يأخذ أسماؤهم ولما وصلوا عن العنود سكتت
الضابط :خلصينا وش اسمك
العنود:ا..سـ..مـ..ي..العـ...نـ..و..د
الضابط وهو يطالعها:العنود ايش اخلصي علينا ما عندنا شغل غير نعرف اسمك
العنود بمحاوله أخيره:والله ما ادري عن شي الله يخليك...وسكتت وهي تبكي
رن التلفون والضابط رد :تحياتي طال عمرك – ايه
وصار يطالع العنود ويكمل: بس – ان شاء الله – أمرك – خلاص طال عمرك..صك السماعه وهو يطالع العنود بقهر
طلب من الشرطي يطلعهم كلهم إلا العنود
الضابط ظل ساكت ويطالعها بنظرات تخوف وقام من مكتبه وجاء قدامها وبحزم:أنتي العنود راشد العالي
العنود تفاجات وطلعت عيونها وحست لسانها انشل ومو قادره تتكلم
الضابط:ردي
العنود وهي منزله عيونها:ايه
الضابط وهو يضحك بسخريه:وتقولي بريئه والواسطة اللي جاتك علشان تطلعين قويه لدرجه تخلي رئيسي بالشغل يطلب إخلاء سبيلك في الحال
العنود:راح تخلي سبيلي
الضابط هز رأسه أسف عليها وهو يطالعها باحتقار وكره من فوق لتحت ولف وجهه عنها وراح وراء مكتبه ومد عليها بورقه :وقعيها واطلعي
العنود:والله راح اطلع
الضابط:اخلصي علينا
العود وقعت بسرعه ووقفت تطالع الضابط
الضابط:يله ما ابغى أشوف وجهك هنا مره ثانيه
العنود هزت راسها وهي مو مصدقه وطلعت واستلمت شنطتها وطلعت من المركز وهي مو مصدقه وحاسه انه راح يغمى عليها ومو مستوعبه إذا اللي صار لها كابوس ولا حقيقه
&&&&&&&&&&&&&&&
طقت الباب عليها ودخلت وشافتها عند النافذه وتفكر
انين وهي واقفه جنب سمر:الحلو في ايش سرحان
سمر انتبهت لها وابتسمت بحزن:انين
انين:تكسرت يدي من كثر ما طقيت الباب وأنتي مو بالدنيا
سمر وهي تجلس على الكنب:أسفه كنت سرحانه
انين تجلس مقابلها وبفرحه:قال لي أبوك عن الخطبه وناصر
سمر لفت وجهها بضيق وما ردت
انين:حبيبتي وش فيك شكلك مو فرحانه
سمر:لا بس ....وسكتت وهي مو عارفه وش تقول
انين:بس ايش لا يكون مو موافقه
سمر:ما ادري
انين:ترى ناصر ما في مثله ثقه ورجال يعتمد عليه هذا اللي اسمعه من أبوك وسالم
سمر هزت راسها وسكتت
انين:لو أي وحده مكانك كان ما تفكر ترفض واحد مثل ناصر نصيحتي لك وافقي وآنا متأكده انه راح يسعدك
سمر:مشكوره انين
انين:العفو حبيبتي يله أخليك الحين
قامت وطلعت وأول ما صكت الباب ظلت تطالع الباب بعدها:ههههههههههه
باااي باااي يا سمر حرام متعذبه ولما تسمعين نصيحتي راح تتعذبين أكثر لان اللي يحب مستحيل ينسى ويعيش مع شخص ما يحبه والأصعب انك تحب مره ثانيه
ابتسمت بنصر وراحت لجناحها وهي مبسوطه لأنها بدت تشوف نتائج تخطيطها وقريب راح ترتاح وتحقق وصية خالتها وانتقامها لامها وأبوها
&&&&&&&&&&&&&&&
قاعده في السياره قدام مركز الشرطه جاها اتصال ورفعت جوالها
:خلاص كل شي صار مثل ما تبين
حلا:ما ادري وشلون أشكرك
:أنتي عارفه ابغى وحده من الحلوين اللي عندك وعلى ذوقك
حلا:ولا يهمك أحلى بنت راح تكون تحت رجليك متى ما طلبت
:كذا حنا متفقين
حلا:يله باااي
:باااي
صكرت الخط وزفرت بقوه ولمحتها تطلع من مركز الشرطه وتجر رجولها جر ومبين انها مشتته وتتلفت يمين ويسار خايفه
حركت السياره ووقفت قدامها
حلا وهي تنزل النافذه علشان تكلم العنود:اركبي
العنود وهي تطالعها بكره:أنتي يا حيوانه يا.......
حلا تطالعها:هذا بدال ما تشكريني
العنود:أشكرك لأنك بغيتي توديني في داهيه أنتي والثانيه الحقيره يا كلاب....
حلا وهي تقاطعها مره ثانيه:انا اللي طلعتك من الورطه اللي أنتي فيها وتوسطت لك
العنود طالعتها بعدم تصديق:كذابه أنتي أصلا السبب في دخولي
حلا:اركبي ما اعتقد تبغين تمشين في هالوقت ولا انا غلطانه
العنود صارت تتلفت وتطالع الشارع يمين ويسار وبعد تردد ركبت
حلا تأمر السواق:روح بيت العنود
العنود:ليه
حلا:قصدك ليه ساعدتك
العنود:ايه
حلا ابتسمت بحزن:يمكن لأنك تذكريني بنفسي بوقت من الأوقات وما ابغاك تنظلمين ويمكن علشان الناس اللي يحبونك وهم غالين علي
العنود:ما فهمت ناديه ليه سوت معاي كذا وأنتي ليه ساعدتيني وأنتي من البداية متأمره مع ناديه أحس إني مو فاهمه شي
حلا:انا ما اقدر أقول شي بس كل اللي اقدر أقوله انتبهي على نفسك زين واللي صار اليوم مجرد كابوس وأنتي صحيتي منه ولازم تنسينه
العنود وهي تبكي:شلون أنسى
حلا:اتركيها للزمن هو ينسيك وابغاك تسمعيني زين
العنود:شنو
حلا:انتبهي زين من مرت أبوك
العنود استغربت:انين وش جاب طاريها الحين وأنتي من وين تعرفينها
حلا:ما اقدر أقول غير كذا
العنود سكتت تفكر وبعدها:لا يكون لها يد في اللي صار
حلا: انتبهي وانسي وبس
وشافوا السياره وقفت
حلا:امسحي دموعك وانزلي ومثل ما قل لك انسي
العنود قبل ما تنزل:ما ادري أكرهك وادعي عليك ولا أشكرك
حلا:أهم شي ربي سلمك
حلا:يله روحي
نزلت وهي تمسح دموعها ودخلت البيت وهي تجر رجولها وأول مره تحس انها تحب بيتهم هالكثر وندمت على الوقت اللي فكرت تروح فيه هالحفله صعدت الدرج ودخلت غرفتها وقفلت الباب عليها
وطاحت على السرير وهي تبكي وتحمد ربها انه عدا هالليله على خير
&&&&&&&&&&&&&
سندت راسها في السياره ورفعت جوالها
حلا:لازم أتصرف قبل لا تشوف انين العنود وتعرف ان الأمور فيها شي مو مضبوط
اتصلت على الشقق اللي هي مسئوله عنها وفاتحتها وطلبت انهم يخلونها وتتقفل الشقق...صكرت وهي تفكر
حلا:ادري ان اللي سويته راح يجي من وراه عوار رأس ومشاكل بس الكفه رجعت لصالحك يا سليمان ويمكن في يوم من الأيام نلتقي بس اللي اعرفه و متأكده منه اننا لما نلتقي راح أكون غير ما راح أخليك تحتقرني وراح أكون مختلفه ايه مختلفه
غمضت عيونها و انرسمت شبح ابتسامه على وجهها لأنها تعرف ان الطريق صعب ويمكن ما يتحقق اللي تقوله بسهوله بس بتحاول شوي شوي لحد ما تكون أحسن وتطلع من البيئه اللي هي فيها
&&&&&&&&&&&&&&&&&&
أشرقت شمس الصباح لكن في عيون كثيره ما نامت
في عقول غزاها التفكير وقلوب غزاها الحزن
وناس كلتهم الحسره
الساعه 10 وربع صباحا
انين صحت وشافت ابو سالم يتعطر وجاهز يروح الشركه:صباح الخير
ابو سالم:صباح النور انا بروح الشركه تبغين شي
انين:لا سلامتك
ابو سالم وهو يبوس راسها:مع السلامه
انين:مع السلامه
طلع من جناحه ويبغى يوصل بسرعه للشركه ويسمع وش وصل له الموظف بخصوص الأوراق والمشروع
&&&&&&&&&&&&
ما نامت كانت تفكروا خيرا وصلت لقرار
سمر:لازم أنسى اللي نساني وابدأ من جديد
خذت شور ونزلت لتحت شافت سالم قاعد يفطر لحاله استغربت المفروض هو في الشركه
سمر:صباح الخير
سالم:هلا صباح النور والسرور
سمر وهي منزله عيونها:سالم بغيت أقول لك إني موافقه على ناصر
سالم بفرحه:على البركه أختي
سمر:الله يبارك فيك
سالم:انا كنت متأكد انك راح تأخذين القرار الصح
سمر هزت راسها وبدت تاكل مع ان مالها نفس
سالم:إلا العنود راحت المدرسه اليوم
سمر:والله ما ادري عنها بس اعتقد زي العاده راحت
سالم هز رأسه وتذكر:إلا صدق دريتي ان انتيا سفرها سليمان
سمر باستغراب:سفرها ليه
سالم:ما قال لي بس أكيد شايف عليها شي ولا كان ما سفرها وأنتي تعرفين سليمان
سمر:معاك حق
كملوا فطورهم وبعدها قام سالم علشان يروح الشركه وسمر قامت لغرفتها ولعزلتها وأفكارها
&&&&&&&&&&&&&&
في الشركه
بشار:ها وصلت
خليل:ايه وتدري والله أميركا لها وحشه
بشار:ههههههه افا وإحنا
خليل:انتم بالقلب
بشار:تسلم
خليل:اعتقد كذا انتهت المهمه اللي بينا
بشار:ايه بس ان شاء الله الفلوس وصلت حسابك
خليل:ايه وصلت مثل ما اتفقنا
بشار: تستاهل نص اللي ربحناه من ابو سالم
خليل:يا حبي للفلوس والأرباح المضمونه
بشار:ههههههههه أرباح مضمونه بالنصب
خليل:الأرباح أرباح بالنصب ولا بغيره
بشار:يله انا لازم أخليك عندي أشغال
خليل:اوكي فمان الله
بشار:فمان الكريم
صك السماعه ورجع لأوراقه وفجاه طرت على باله سمر تنهد وهو يردد:خلاص خلاص انتهينا
&&&&&&&&&&&&&&&&&&
في مكان ثاني وشركه ثانيه
(العد التنازلي أعلن نهايته)
ابو سالم ساكت ويسمع للموظف بتركيز
الموظف عبد الله:والله يا طويل العمر انا الصراحه أنصدمت من اللي مكتوب في الأوراق ومو عارف انت كيف ما عندك فكره
ابو سالم:وش قصدك
الموظف:انا راجعت الأوراق وشفت إحداثيات موقع المشروع وأرسلت احد يشوف المشروع في دبي ولما راح للموقع ما لقى مشروع ولا مكان لها المشروع من الأساس
ابو سالم:شلون يعني كيف ما في مشروع يعني هالمشروع وهمي موجود في الأوراق بس
الموظف:والله للأسف هذا هو الصدق
سال دخل الكتب على صوت الصراخ:وش صاير
ابو سالم:تعال شف المشروع اللي دفعنا فيه دم قلوبنا طلع ما له وجود
سالم استغرب:شلون مو موجود
الموظف:انا أرسلت بنفسي ناس لدبي وما لقوا له وجود
سالم بعدم تصديق:يعني خليل نصب علينا
ابو سالم بانفعال:والفلوس اللي دفعتها والقرض اللي أخذته ودفعته علشان المواد اللي المفروض يجيبها خليل الزفت كل هذا وين راح
الموظف:انا راجعت كل الأوراق ولقيت ان الفلوس اندفعت لشركه(.....)ولما بحثت عن هالشركه ما لقيت لها أي وجود
سالم:قصدك حتى الشركه وهميه
الموظف:للأسف ايه
سكتوا اثنينهم ومو عارفين وش المفروض يقولون من هول الصدمات اللي تطيح على روسهم
الموظف:في شي أخير
سالم:قل وش بعد ما قلته من المصايب
الموظف:الصراحه انا استغربت إلا تفاجات لما شفت هالورقه
مد الورقه لسالم اللي قراها وطلعت عيونها والتفت على ابوه
ابو سالم:وش مكتوب فيها
سالم:يبه انت موقع ان خليل يقدر يفك الشراكه وفي أي وقت وبدون شروط
ابو سالم:بس انا ما اذكر إني وقعت شي
الموظف:أكيد طال عمرك وقعتها بدون ما تقراها أو بدون ما تنتبه على اللي مكتوب فيها
ابو سالم حط رأسه بين يديه:انا خسرت كل شي كل شي
سالم بخوف:يبه هد حالك وإحنا راح نشتكي على خليل هالنصاب
الموظف:والله ما ادري وش أقولكم
سالم:ليه هو في بعد شي ما قلته
الموظف:السيد خليل سافر أميركا
ابو سالم:شلون سافر يعني كل شي راح... وبصراخ:راح
سالم يحاول يهدي ابوه
ابو سالم:بشار جيبوا لي بشار...وقام:ولا انا اللي بروح له
طلع وطلع وراه سالم والموظف يهز رأسه بأسف على الحاله اللي هم فيها واللي راح يصيرون فيها
&&&&&&&&&&&&&&&&
طلعت من جناحها مرت من جنب غرفت العنود سمعت صوت بكى قربت من الباب وحطت إذنها وسمعت صوت احد يبكي
انين:هذا صوت العنود بس هي المفروض بالحبس وفضيحتها منتشره ما في غيرها أكيد حلا
عصبت وراحت جناحها اتصلت على حلا لقت الجوال مقفل واتصلت على ناديه:الو وين الزفته حلا
ناديه:وش صاير
انين بعصبيه:قلت لك وينها
ناديه:ما ادري عنها من أمس بس سمعت انها صكرت كل الشقق
انين صكرت الخط في وجه ناديه وهي معصبه وتتوعد في حلا اللي خربت عليها الخطه اللي قعدت تحبك لها ودفعت فيها دم قلبها بس راح تعلمها ان اللعب مع انين مو سهل ابد
(انين كانت تكلم ناديه لأنها ما تثق بحلا وطلبت من ناديه انها ما تقول لحلا طبعا بفلوس)
&&&&&&&&&&&&&
دخل على بشار وهو معصب والسكرتير وراه:هذا اللي نصحتني أشاركه
بشار اشر للسكرتير يطلع ورد بهدوء:وش صاير
ابو سالم:سرقني ونصب علي
بشر:من تقصد
سالم:يقصد خليل
بشار ابتسم وهو يطالعهم ويطالع تعابير ابو سالم
ابو سالم:اشوفك تضحك ليه احد قايل نكته
بشار:انتم النكته
سالم وأبو سالم تفاجأو وصاروا يطالعون بعض
بشار وهو يأشر لهم بالقلم اللي بين يديه:يله برا انا مو فاضي لكم عندي أشغال
ابو سالم:انت كنت متفق وياه
بشار:هذا سوق يا ابو سالم مثل البحر الكل يأكل الكل وأنت انتهى وقتك وسمك القرش كلاك
ابو سالم:انا حوت ما أنوكل
بشار:ههههه ههههههههه لا انت سمك صغير وصرت بــــــــح
سالم:ما توقعناها منك يا النسيب تطعنا في ظهورنا
بشار تحول للجديه :برا لا اطلب لكم الأمن يطردكم وأنت يا زوج أختي العزيز أنسى شي اسمه شراكه بينا لأنه ما يشرفني أشارك واحد مثلك....وبصراخ:برااااا
ابو سالم قبل ما يطلع:راح تدفع الثمن غالي....وطلع
بشار:ههههههههه هههه
رفع جواله وأرسل رساله لأخته ورجع رأسه على وراء واختفت ضحكته وعم الهدوء في المكان وهو يردد:أسف يا سمر لاني راح أجرحك مره ثانيه
&&&&&&&&&&&&&&&
(قيم اوفر)
دخل البيت وهو يصارخ ووراه سالم وبصوت عالي:انين...انين
سالم:هد بالك يا يبه
ابو سالم:انين وينك
انين نزلت الدرج وهي لابسه عبايتها وفي يدها الصندوق والخدامه وراها تنزل بالشنطه وتطلعها لبرا والبنات نزلوا لحد نص الدرج وسليمان توه داخل البيت جاي من الجامعه
سليمان:وش صاير
ابو سالم:شفتي اخوك وش سوى
انين:وش سوى
ابو سالم:سرق فلوسي هو وخليل الكلب تأمروا ضدي
سليمان:ايش وش قاعد تقول يا يبه
سالم:هذا اللي صار
سمر بهمس وعدم تصديق:بشار
سليمان:لازم نشتكي عليهم النصابين
تفاجاو من رد انين وهي تبتسم لهم:للأسف القانون ما يحمي المغفلين
ابو سالم:ايش هذا ردك بدل ما توقفين معاي ضد الحراميين تقولين هالكلام
انين وهي تنزل لنهاية الدرج:التجاره شطاره وأنت ما كنت شاطر كفايه وطحت ولا أجد سمى عليك وبعدين ما في حرامي غيرك هنا
سليمان:شب الحرامي أنتي واخوك انا قلت لكم داخلين على طمع ما في احد صدقني
سمر بصوت مخنوق:ليه يا انين ليه
انين:لان الدنيا صعبه وقاسيه
سليمان:راح اشتكي عليكم واشرشحكم واقطك أنتي واخوك وراء السجن
انين بضحكه:بتهمة ايش اعتقد خليل هو اللي سرقكم مو احنا
ابو سالم:ابغى اعرف ليش وآنا اللي دخلتك بيتي وطلباتك كانت أوامر وفرشت لك الأرض ذهب وورود وفي الأخير تسوين فيني كذا ليه
انين بحقد ونظرات كره:لأنك زبـــــاله
سليمان :يا حقيره أنتي الزباله...وتقدم بيضربها
سمعوا صوت من عند الباب اللي كان مفتوح:حدك لا تلمسها لأكسر ايدك
البنات صعدوا فوق وجابوا غطى ونزلوا علشان يشوفون وش اللي بيصير
تقدم بشار ووقف جنب آخته وبعصبيه:أي احد يفكر مجرد تفكير انه يلمس أختي اذبحه ذبح الشاه فاهمين
سليمان:ايه كملت اجتمعت العصابه
سالم:ليه سويتوا كذا وإحنا اعتبرناكم أهلنا ومنا وفينا
انين: تبون تعرفون ليه لان الماضي له عواقب
وتكمل وهي تاشر على ابو سالم: اسألوا أبوكم وش سوى في ماضيه اسلوه
التفتوا كلهم لأبوهم وصاروا يطالعونه
انين تطلع صور وترميها على الطاوله اللي قدامهم:سوينا كل هذا علشان اللي بالصور طالعوها
خذا سالم وسليمان الصور وصاروا يطالعونها أما ابو سالم تقدم ولما شاف الصور رجع على وراء وهو يهز رأسه بلا ويردد:محمد لا مو محمد
ورجع يطالع انين وبشار وهو مو فاهم شي
انين:ايه محمد تعرفون محمد أكيد لا هذا تاجر كان معروف بطيبته وكرمه مع الكل وهذا الرجال هو أبوي انا وبشار
ابو سالم:مستحيل أنتي انين سالم الغانمي ومحمد ما كان عنده عيال
انين:هنا اللغز اللي قدرنا من خلاله نسوي كللللللللللل هذا
ضحكت بشكل هستيري ودموعها بدت تملئ عيونها:وش رأيكم أقول لكم قصه وعنوانها الماضي وعواقبه وتدرون من بطلها ابو سالم أبوكم صفقوا له
وصارت تصفق بيدها وتكمل:لما كان عمري 6 سنوات صرت يتيمه انا وبشار وتبنانا محمد وزوجته ولما صار عمري 8 سنوات دخل أبوي محمد وهو ماسك قلبه وكان يلفظ أخر انفاسه
وبدت دموعها تنزل وعيونها كلها حقد موجهه لأبو سالم:وأخر كلماته لنا كانت راشد العالي سرق فلوسي وبسبب أبوكم انا فقدت أبوي وتيتمنا للمره الثانيه ويا ليته اكتفى بها الشي بعد العزاء وبعد مرور وقت على موتت أبوي محمد تهجم أبوكم على أمي سلمى تهجم عليها قدام عيني
وصارت تصارخ بهستيريه ومعصبه:شفتوا الآثار اللي على وجهه تدرون سببها ايش سببها أظافر أمي وبعدها بشهر واحد انتحرت ما قدرت تتحمل فقدت عقلها
وصارت تمسح دموعها وخذت نفس:دمرنا خرب فرحتنا بعد ما لقيناها وبعد ما ربي عوض علينا بأم وأبو بدل أمنا وأبونا جاء أبوكم
وبصوت مرتفع:خذاهم منا وجاء وقت دفع ثمن الماضي عذبنا وعذب خالتنا اللي كانت أخر كلماتها قبل لا تموت (احرقي قلب ابو سالم احرقي قلب راشد العالي مثل ما حرق قلوبنا ريحيني في قبري وريحي آمك وأبوك اللي ظلمهم بظلمه وجبروته) والحين انقلبت الأدوار وجيتنا يا راشد العالي وخسرناك كل شي
حطت الصندوق على الطاوله وفتحته وطلعت لعبة الشطرنج ورفعت القلعه وطرحتها في الأرض :انت يا راشد العالي انهارت قلعتك وآنا فزت باللعبه
وطالعت ابو سالم بابتسامه:ورقتي توصلني ولا والله فضايحك انشرها بكل الجرايد وأنت الحين شفت وش انا اقدر أسوي واللي أقوله ممكن أنفذه
راحت لبشار وبهمس:يله
بشار هز رأسه وخذا اللعبه ودخلها الصندوق والصور وطلعوا وأبو سالم صار يطالع عياله اللي يطالعونه بنظرات الخزي الفشيله من كونه أبوهم والاستغراب والمفاجاه وعدم التصديق
رجع على وراء وجلس على الكرسي بثقل وهو يحس انه مو قادر يحرك أطرافه وما حس إلا على صوت عياله اللي صاروا يصارخون وهم يبغون ينقلونه المستشفى
&&&&&&&&&&&&
ركبت السياره وسندت راسها على النافذه وهي تحس بضيق وفتحت النافذه يجيها هواء بس تحس انها مخنوقه والهواء ما يوصل لها التفتت لآخوها شافته يسوق ومو مبين عل ملامحه أي تعابير
رجعت سندت راسها وغمضت عيونها وهي تفكر ليش ما أحس بنصري ليش ...ليش
&&&&&&&&&&&&&&
لهنا أوقف واترك لكم حريه التعليق
&&&&&&&&&&&&&&
انين.....كره.......انتقام......حب..نهاية مجهوله (لعبة الشطرنج)
&&&&&&&&&&&&&&&&
ودي لكم
قلب أمي وروحها
&&&&&&&&&&&&&&
انين.....كره.......انتقام......حب..نهاية مجهوله (لعبة الشطرنج)
&&&&&&&&&&&&&&&&
..
..
..
|
14-10-11, 02:45 AM
جديد مواضيع قسم القصص المكتمله
العرض العادي
