هلا فديتج نور

تمام بشوفتكم

سالمة تبكي لانها انهت العلاقة بيوم الامس وما زالت تحت تأثير الحزن


يا ليت كل الحياة الزوجية مثل عبدالله وشمسة


ههههههههه فيه بعض التوقعات نوعا ما صحيحة وتعطيني بعض الافكار لتطور القصة

تسلمي على الرد فديتج

الجزء الخامس

عودة الى سالمة

سالمة: بعد تقريبا شهرين من اخر رسالة بينا كنت مرة داخلة المنتدى وكان هو موجود..بعد نص ساعة تقريبا رسلي رسالة على الايميل..كان يعتذرلي انه ما رد عليه فوقتها لانه كان متضايج اني نهيت اللي بينا من دون ما يكون هو غلطان عليه بشي ..حسيت بشي غير لما شفت رسالته يمكن حنين او لاني كنت انتظر منه رد ...قلتله اني نفس الشي زعلانة منه لانه حتى ما رد على رسالتي حتى لو بعتب اوشي ..كانه تخلص من شي ما له اهميه..طبعا انكر اذيه الشي وقالي انه كان طول اذيه الشهرين يفكر فيه وما نساني ...بعدين طلب مني انه نرجع للمسن بس اني كنت خلاص متخذه قراري ما ارجع للمسن مرة ..رفضت قالي انزين ابا اتطمن على اخبارج برسايل الايميل ..ما قدرت ارفض طلبه..كان شخص عزيز عليه وايد

نصرى: وبعدين؟؟

سالمة: من وقتها لحد بارحة وحن نرسل لبعض رسايل شبه يومية..رسلي امس انه يباني نفترق خلاص تأييدا على كلامي السابق له انه مصيرنا بنفترق واحسن نفترق الحين دامنا متفقين يعني نفترق بالمعروف هههههه

ثم اكملت بحزن واضح: بس من ساعتها واني احس كأني فاقدة شخص عزيز..ما اقدر اتخيل اني خلاص ما بعرف عنه شي خلاص بينتهي وجوده من حياتي

نصرى: ما عليه ..عطي نفسج على الاكثر اسبوعين وبتنسيه..شي طبيعي انج تحسي باذيه الاحساس بس اللي صار فمصلحتج والحمد لله طلع ريال زين وهو اللي انهي اللي بينكم من دون مشاكل


سالمة: علاقتنا كانت غير وهو كان شخص غير
"والله إني كنت ألوم اللي
يضيق إن غاب خله ،،
لين جربت المحبه
والفراق وقلت
" تـــــوبــــه" !..
لعنبو جد المفارق
فيه هم وفيه ذله ..!
أثر كل الحب لذه..،
والفراق
(( أكبـــــــر عيــــــــــوبه )).
"
**************
لم استطع ايقاف قلبي عن الشعور اتجاهها..لم استطع منع شعور الحرقه والمراره في صدري وانا اراهم يعقدون قرانها الى غيري..غالبت دموعي كثيرا ولكني اشعر الان انها ستنفجر شلالات من الدموع وليس سيول فقط..عبدالله طوال الملكه يجلس بجانبي وبين الحين والاخر ينظر الي بنظرات تفحصيه وكأنه يتوقع شي ما
بعد ان انتهت المراسيم وبدأ الضيوف في تناول القهوه همس عبدالله في اذني: خلا بنطلع دام الناس مشغوله


" ما ان خرجنا وركبنا سيارتي رأيت ما كنت اتوقعه..لف حمد مصره على وجهه وتوالت على مسمعي صوت الشهقات التي يحاول جاهدا ان يوقفها ولكنني اعلم انه لن يستطيع...ذهبت به بعيدا عن بيت عمي" مكان الحفل" لكي يخرج كل ما في قلبه
**************
هناك الكثيرون ممن كانوا يتوقعون الحاله التي سيكون عليها حمد
والدته التي قدمت الى الزواج مجبره بداعي القرابه...والد نوره واخواتها حتى نوره كانت تشعر بالذنب الخفيف اتجاه حمد ولكنها كانت منشغله اكثر بشعور الخجل والخوف من حياتها المستقبليه التي بدأت اليوم
شمسه: هلا حبيبي
عبدالله:هلا
شمسه:عبدالله انت هين؟ ما اسمع عندك شي ربشه
عبدالله: طلعت شويه عنهم
شمسه بتردد: كيف حال حمد؟
عبدالله تنهد: هيش تتوقعي!! تراني طلعت عشانه كان شكله شويه وبينفجر عيونه مدمعه وحمرا قلت احسن اطلعه واصبره
شمسه بحزن: تبا الصدج طول العرس واني افكر فيه..مسكين ما يستاهل
عبدالله بعتب مصطنع: لا حلفي!!
شمسه باستغراب:هيش؟
عبدالله يقلدها: "طول العرس افكر فيه" ثم اكمل باستهزا: ما عندج ريل تفكري فيه وتتذكري ايام عرسنا و و و
شمسه تضحك: والله انك متفيج..حن كنا فدا ار وانت شليتنا دار...ثم اكملت بتلاعب يقلب كيان عبدالله: اصلا انت محتل كل مكان فتفكيري وقلبي..اي موضوع بدخلك فيه حتى اذيه الموضوع قعدت افكر لو لا سمح الله صار شي بيفرقني عنك بموت لا محاله
عبدالله يضع يده على قلبه وكأنها تراه وهو يقول بشعور صادق: قلبي خذتيه معج..احس مكانه خالي..خفي عليه رحميني..تعرفيني اذوب
شمسه تضحك بخفيف: انزين الخلق كلن يتشوف عليه بروح اقهوي..اه صح بنبات بيت هلي عشان اساعدهم فترتيب البيت بعد العرس
عبدالله بنبره انهاء الحديث: اقوول خلي عنج..اذيه اللي ناقص!!..خلصي شغلج وخبريني اخطف عليج ولا تراني بسويلكم حوله جدام البيت
**************
رنه مسج
المرسل:راعي الباص
"قمة "الشوق"
شكوى البعد
وقمة"الحب"
عشق الصمت
وقمة سعادتي
"أن تكوني بخير"

مريم تدير الهاتف حتى ترى اسماء الرساله:تخيلي من راسللي!!!
اسماء: اندوووكم!! هيش يبا اذيه؟!! رسلك شي قبل؟
مريم بدهشه عميقه:لا!!! هيش قصده؟ ثم اكملت بانفعال: هيش يهاييني السيد؟ وحده من خايساته براسله !!!
اسماء: بيكون يوب شافج انتي ترسليله عن الباص يهاييج عادي عندج
مريم: حرام عليج..والله اني ما ارسله الا اذا نبا نطلع ولا شي يخص طلعاتنا
اسماء: تلقاه يجيس النبض اذا شافج رديتي كان بها واذا نازعتيه بيلقاله حيله
مريم بعصبيه:يخسي..هيش يهاييني؟!! بعده هو يعرف خوتي ويعرف حن عائلتنا ما عليها كلام..تصدقي احس اني ببكي..معقوله هو يفكر فيه جيه
اسماء: طبيه عنج..طنشيه ولا ترسليله شي ابدا هو اروحه بيفهم المقصود



هل من الممكن ان يحدث شي وتصبح نورة من نصيب حمد؟؟


كيف سيكون رد فعل سائق الباص بعد المسج الذي ارسله؟؟


ننتظر توقعاتكم

السلام عليكم ورحمة الله وبركاته
كيف حالك العود المياس؟...أتمنى أن تكوني بخير...يعطيك العافية وسلمت يداكِ
سالمة: ما تشعر به شيء طبيعي خصوصاً أنها وسعيد قد أصبحا عادتين لبعضهما فلا عجب من شعورها بالفراغ بعده...ولكنني لا أشعر بالراحة من إنهائه لعلاقتهما..فهل يخطط إلى شيء ما؟..العلم عندكِ
شمسة وعبد الله: هههه..الله يديم السعادة بينهما...أحبّ ثنائي إلى قلبي..فماذا تخبئين لهما في المستقبل؟
حمد نورة: كما قلت اتوقع أن تعود له...ولكن ومع ذلك إن لم يكن توقعي صحيحاً فاتمنى السعادة لها مع زوجها الجديد.
مريم وسائق الباص: أتوقع إما أرسلها لمريم بالخطأ..أو إنه يحاول التلاعب بها.
العود المياس..آسفة لتقصيري..متابعة لكٍ
دمتٍ بحفظ المولى عز وجل
أختك نور^_^ سوريا

فديتج حبيتي نور سوريا


انتي دعمي الوحيد فالمنتدى شكله

تابع /
الجزء الخامس
************
الساعه 8 صباحا
استيقظ من نومه ولم يجدها بجانبه..استحم وتوجه الى المطبخ وجدها تضع اللمسات الاخيره على صينيه الافطار وقف خلفها ومال برأسه ليقبل خدها:احلى صباح بشوفه الحلوين
مدت يدها لتضعها على خده:صباح الورد
تناول منها الصينيه ويتقدمها الى الصاله:هين العيال؟
جلست وهي تحمل الدلال:بعدهم راجدين
امسك بكفها بين يديه:خلاص طاح الحطب؟
ابتسمت:طاح
ابتسم هو ايضا:الله يخليج لي دوم
لكنها اردفت برجاء:بس اتمنى ما يتكرر مثل اذيه المواضيع..ضربتين فالرأس توجع ..ساعتها مستحيل قلبي يصفى
قاطعها:لا تفاولي يابنت الحلال..اني وعدتج و وعد الحر دين...
هدى:الله يديم المحبه والسعاده علينا
سالم:آمين
**************

" يا حلو ...اليوم طولت فالنوم!!!"

تفتح عينيها بابتسامة كسولة : وانت اليوم مزعج...احسني متكسرة من العرس بارحة

عبداللة: بيكون من كثر الرقص واني مسكين احايلج محايل عشان ترقصي عندي

شمسة تضحك بخفة: الله والرقص عاد..اصلا ما رقصت غير طشة ..طول الوقت اعابل القهوة وولدك اللي انط له كل شوية
عبدالله: اصلا اني موصته اذا شافج تبي ترقصي يصيح

نهضت جالسة: الله بمصباحن طيب عن تشليخك ...ثور عني بثور اسوي ريوق
اعادها الى تمددها: بنطلع خبز وجبن وعسل وخلصت سالفة الريوق..قعدي عندي اباج شوية
شمسة: امرني
عبدالله: ما يامر عليج عدو حبيبتي انتي ....ثم اكمل بتوتر : بصراحة مريم بنت عمي مواشلتني
شمسة: وراها؟؟
عبدالله: هلي كانوا يبوني اخذها بس اني بغيتج انتي ..والحين لها فترة طويلة ما تزوجت كل الناس يهايوني كنت محيرنها بعدين ما بغيتها

شمسة : والمعنى؟؟

عبدالله: امممممممممممممم

شمسة ثارت بانفعال قوي كقوة الخبر الذي زفه اليها: تبا تتزوج عليه؟؟ صدج صدج تبا تتزوج عليه؟؟ والله اذا سويتها ما اسامحك لا دنيا ولا اخرة ....

بدات دموعها بالانهمار بغزارة وهي تشهق: هين الحب هين الكلام اللي تسمعني اياه ليل ونهار..

قالت باستهزاء" اوعدج ما يفرقني عنج مخلوق ...اوعدج ما اتزوج غيرج انسانة ثانية

التفت عنه وهي تشهق بقوة دموعها

حينها ضحك عبدالله بهستيريه: بس بس يالهبلة ...صدقت وسوتها دراما
نهض اليها وهو يديرها ناحيته: والله العظيم امزح ..كنت ابا اشوف هيش ردة فعلج

نفضت يديه عنها: لا تكذب عليه.. انت ما قلت اذيه الكلام الا انك مفكر فيه
ضحك من جديد: واللي خلق اذيه الراس واللي حفر حبج فقلبي اني ما فكرت فيه غير الحين عشان امزح عليج
اعرفج دلوعة بس ما توقعتج تبكي بسرعة

مسح دموعها بيديه : دموعج غالية عليها..ما اسمح ابدا انها تنزل

شمسة: انزين وخر عني الكذاب.. عاد مب صباحية تبداها بمزحة ثقيلة مثل دمك الثقيل

ضمها الى صدره: هههههه كل شي من الحب مقبول
"أبي (( وعــــــــــد )) منك أنك ماتخليني..؟
ولاتساوي غلاي بـــــــــواحدثاني..!
وان كانك تحبني صدق وتغليني..؟
لامني أخطيت أسمحلي على شاني..!
أماأنافي محبتك مايلزم توصيني..؟
من يمك الروح تآمرني وتنهاني

"
**************

مرحبا الساع بكل من زار روايتي وشارك

وباللي زارنا وما شارك بعد نقول مشكورين



الجزء السادسبعد اسبوع
" مرحبا ملايين..شخباركم؟"
سالمه: مرحبا بج زود..بخير دامنا نسمع صوتج
نصرى:دوووم ان شاء الله اكون اني البلسم للحياه
ضحكت سالمه: خلي عنج هواته..هيش اخر علومج؟
نصرى: الحمدلله كل حاجه تمام حاليا..هيش اخبار الدوام؟
سالمه: سكتي..احسني تعبانه فكل وقت شغل شغل ..جنيت على عمري بأذيه الوظيفه
نصرى:حمدي ربج احسن من اللي جالس فالبيت
سالمه:تصدقي..ساعات اقول احسنلي لو جالسه فبيتنا عن اذيه الشقا
نصرى بنبره خافته:هيش اخبار النفسيه؟اقصد اذاك الموضوع
تنهدت سالمه:اشتقت له..فكل وقت اتذكره..قلت يمكن مع الوقت انساه بس احسني كل يوم ... وصمتت
نصرى: لين الحين؟؟
سالمه بنبره حزينه: احس انه بعد ما افترقنا زاد تعلقي فيه اكثر..اي شي حتى لو كان تافه يذكرني بموقف حكالي عنه او صار معنا
نصرى:تحبيه؟؟
سالمه:ما اقدر اقول احبه لأني ما اعرف هيش هو الحب او اساسا ما اقدر افكر بالحب بسبب عادات مجتمعنا..ساعات اقول لو كنت احبه كنت ما قدرت ابتعد عنه بس يمكن اللي بينا كان تعود على شخص بطريقه خاصه علشان جذيه مب قادره اتقبل الوضع الحين
نصرى بنبره يأس: لحد متى يعني؟!!
سالمه:ما اعرف..احيانا اقول لو تزوجت يمكن اشيله من بالي بس كل مره اشوف شاب عقلي تلقائيا يسوي مقارنه بينه وبين هالشاب ودائما هو الفائز
نصرى بنبره تشجيعيه: حاولي تشغلي نفسج بأشيا ثانيه..كل ما يي على بالج شغلي بالج بأشيا ثانيه
سالمه: احاول بس ما قدرت