بسم الله الرحمن الرحيم .. السلآم عليكم ورحمة الله
وغسى مساءكم سعيد يارب .. كثر شوقي وحبي لكم .. واتمنى ان كل وحده فيكم
تكون بصحه وسعاده يارب
..
هالبارت طويل مثل ماتبون .. وللأسف مافيه قفله تبرد خاطري .. وخليته مفتوح
وسلمتوا مني بس البارت الجاي الأكشن بيكون عنوانه .. وفيه سر مثل ماقلت
بينكشف

هالبارت إهـــــــــــــــــداء مني لجميع اللي ساندوا سهم المملكه وشجعوها .. في هالمنتدى
ولا المنتديات اللي حبيت هلها وناسها ولهم حق كبير علي



.
مع اطيب الأمنيات بقراءه ممتعه
.
سهم المملكه
.
لإله إلا الله




البارت الثـــــــــــــــــــــــــــ 38 ـامن والثلاثيــــــــــــن )


دخل الشقه وهو يغني .. وارتاع يوم سياف مسكه مع يده وصكر

فمه – اششششششش

فك فهيد يد سياف عن فمه وقال بعصبيه – وش فيك

سياف – ألحق نايف في غرفته يشرب ويبكي

عقد حواجبه – ايششششششش يبكي !!










ناظره سعد وهو يشوفه سرحان وساكت ومنزل راسه

سعد ناظره بإستغراب وهو يشوفه منفعل ويهاوش .. وفجأه يسكت

ويهدى ويسرح لبعيد


سعد – محمد وش فيك

محمد قال وهو يناظر لبعيد – كنت عارف انهن هن اللي وزوهن

وصقر بعد يعرف

بس هالحين سجل اعتراف المجنيين .. كنت موصي صقر مايسوي

شي غير لين يعترفون وتتثبت أقوالهم بس هاذا كله صار عقب

ماصحيت من الغيبوبه

انصدم سعد – وش هووووو عارفين .. عارفين وساكتين !!

محمد – ايه عارفين وانا طلبت منه يخليهم يعترفون بالحيله لان

مريم مابتسكت هي وأمها وبيقولون تتبلون علي وابي اثبت اقوال

المجرمين .. بس هالحين انا ندمان قد شعر راسي اني خليت صقر

يثبت أقوالهم

سعد بإستغراب من حالة أخوه – وليش مكانت كذا ردة فعلك يوم

كلمك صقر وصارخت وهاوشت

محمد – هه لاني صحيت على الحقيقه المره والموجعه لي صدق

خسيسه هي وأمها بس فكرت ولقيت اني أستاهل

سعد – وليش ندمان ,, هاذا حقك وهم سببولك إعاقه ومعاد تقدر

تجيب عيال

محمد ناظر فيه – بس هاذي ردة فعلها على اللي صار .. انا يوم

قمت من الغيبوبه سبيتهم وهاوشت فيهم بس لما فكرت وشفت

اللي خسرته مو كثر اللي هي خسرته سعد

سعد ناظره بنظرات ذات معنى – طيب تقدر تطلعهم

محمد تكتف وقال – لا .. لان هالإمر طلع من يدي ومعاد أقدر أسوي

شي

سعد أنا ظلمت مريم أنا ظلمتها وظلم قوي هي ماتستاهله

وقفت يدها عن مقبض الباب .. وابتعدت لان الجميع يشوفها



فارس اللي يفطر وشافها راجعه ادراجها لهم – ليش مادخلتي له

موضي وهي سرحانه – يتكلم هو وسعد خلهم يأخذون راحتهم



سعد اللي تعاطف مع أخوه وقدر حالته – وهالحين وش بتسوي

محمد زفر – معاد أقدر أسوي شي غير اني بتنازل

سعد انصدم – وصقر وش بيقول

محمد – صقر ماله دخل ,, ويكفيه حق الحكومه اللي بيكون فيها

سجن أقلها سنه

سعد ناظره بنظرات بارده وهو مركز عليه – تغيرت محمد

محمد وهو يغمض عيونه بألم يوم يتذكر أيامه – حب موضي نساني

حقوق مريم وواجباتها .. وموت ولدي صحاني على حقيقة ان لي

بنت لازم أهتم فيها ( ناظر في أخوه ) سعد مريم أنظلمت معي وهي

ماقصرت أبد فيني ,, بس حب موضي كان الحاجز بيني وبينها

مابتصدق لو أقول لك لو يجي موقف حميمي بيني وبينها أتخيل

صورة موضي هي ,, هاذا الشي اللي قهرها ولو أحط نفسي مكانها

يمكن أذبحها

سعد انصدم من تفكير أخوه الإناني – كل هذا كنت تسويه في

المسكينه وساكته

محمد – وأكثر وأكثر بكثير سعد .. أنا موت ولدي صحاني من

اشياء كثيره كنت فيها في برج عاجي .. ومابكذب لو قلت

حتى صدمتي من موضي أثرت على اللي يصير فيني ويغيرني

( بألم قال – وبنات عمي اللي سحبتهم من الدوادمي سحب

هه وخليتهم في مهب العاصفه اللي هو جدي اللي حنا وحنا الرجال

ماناطحناه بيقدرن عليه هالضعيفات

اللي صارلي ربي يعاقبني فيه وانا أستاهله وياليتني أخذ هالعقاب

في الدنيا ولايلحقني في الأخره

( نزلت دمعته وهو يقول – فهيد وهو ولد عمي ماأتحمله ثواني

هو وريحته الخايسه يوم يشرب ( رفع عينه ) – وسلطان اللي

مستحيل في يوم يطلع من صدمته وانا خليت بنات عمي في

هالتيار اللي أنا عرضتهم له

سعد رحم حال أخوه – محمد اهدى ,, أنت خايف على مصلحتهن

وجبتهن هنيا لان ماوراهن والي ( نزل راسه وهو يقول – بس

ظلمك لمريم وصورة موضي ماتفارقك في اللحظه الخاصه لها

لوحدها شي مؤلم ومؤجع لها

محمد وهو يمسح دموعه – المشكله انها تعرف .. وتسكت لين جاء

اليوم اللي معاد تقدر تتحمل فيه وانفجرت













وقف وهو يستأذن – يالله انا بروح تبون شي

موضي – ايه فارس صدق اللي سمعته

فارس عقد حواجبه ورد يجلس – وش سمعتي

كان اللي جالس موضي وهند

موضي – انكم علمتوا ابوي بتسافرون لمكه

فارس – كنا

موضي استغربت – وليش كنتوا

فارس وهو يتذكر وضحى – مسكينه وضحى تبي الروحه وهالحين

وش بيفكنا من فهيدان خلاص يمكن اروح مع امي وسعد بس

هند اللي كانت تتمنى تشوف مكه بس اسكتت

موضي قالت – بس بيتنا كله متحمس للروحه ,, وابوي يمدح رايك

انت وسعد

فارس إنبسط – صدق يعني بيخاوونا

موضي اللي ابتسمت – ايه امي وابوي وريم وجدتي بعد .. بس

جدي ماهب رايح

فارس حزن – بس وضحى مسكينه خاطرها في الروحه

موضي وهي تبتسم – بعلم فهيد يروح وياكم فرصه يسافرون

فارس – اصلا اخوتس مدري كيف قايل احد يعرس ولايروح شهر

عسل ( ضحك وقال ) – آه بس من امسك الحرمه بكون انا وإياها

اول الراكبين لطيارة النمسا

ضحكت موضي – اكشخ النمسا

هند تطنز – كثير عليك تشاد

فارس انقهر منها – تشاد تروحين لها مع رجلتس

ضحكت موضي من تطنزهم على بعض

هند وهي ناسيه الحيا – لا انا ورجلي بنسافر لإستراليا

فارس ضحك وهو عارف انه زل لسانها – استراليا مره وحده

تذكرت وش قالت .. وأحلامها .. تحسب انها تحكي مع وحده من

خواتها ,, مادرت انها طاحت في لسان فارس والفضيحه موضي

بلعت ريقها وقامت وهي متفشله

موضي وفارس ماتوا ضحك

فارس ويتكلم ويضحك منها – ماضنتي بيجي راعي استراليا زين ان

جاتس بدوي معه دستن غماره وضفتس في الصندوق وقبضتس

الخيمه ,, ياعزتي لتس يابنت عمي قال ايش تبي استراليا

( ورجع يضحك من كلامها )

دق جواله .. وخلاهم يفزون .. وهي يوم شافته هالكثر قريب منها

ومشاركها الوساده دزته وهي معصبه .. رد على الجوال وهو

منقهر من اللي سوته – هلا منيف

منيف – تأكدت من اللي بغيته صقر

صقر بسرعه وقف .. وطلع برى الغرفه وسكر الباب وراح

في أخر الصاله

صقر وهو معصب – شفت الولد معها

منيف – لا ,, من وصلت هنا .. ولين هالحين تطلع ولا معها أحد أبد

وراقبت الشقه اللي مايسكنها غيرها بس مافيه غير هي اللي عايشه

فيها .. إذا كان هي لو حدها وين الولد ؟؟ ومن تخليه عنده !!

صقر عقد حاجبه – منيف لاتغيب عن عينك دقيقه ,, وأعرف هي

من تجلس معه

منيف بشك – صقر انا شاك في شي بس مو متأكد

صقر – قوله لو خيط صغير يمكن يوصلني الحقيقه

منيف – اول إسبوع وصلت فيه هنا .. تلاقت لها مع سعودي

صقر استغرب – سعودي .. طيب كيف عرفت

منيف – شكله وملامحه تدل على انه سعودي

صقر – زين .. ماسمعت شي من كلامهم

منيف – لا كانوا في حديقه عامه وطولوا مع بعض بس من

إنفعلاتهم باين فيهم شي كايد وأنا ماقدرت اسمع لهم عشان

مايشكون بشي

صقر زفر بقهر – ومالتقت بهالسعودي ثاني مره

منيف – لا ,, للأسف عقب ذيك المره ماألتقت فيه

صقر بحسافه – كنت متامل انك تجيب لي صورة هالطفل

منيف – ماشفته أبد ابد وانا شاك ان مافيه ولد بالإساس

صقر جلس وهو يفكر – توقع

منيف – إلا أبصم لك على العشره بعد .. اصلا من وصلت ماشفت

مثلا تشتري حليب أطفال.. حفاضه .. صراخ طفل وانت تعرف اني

سكنت مقابل لها

صقر بفكره – تعرف عليها منيف

منيف – أخاف تشك في وضعي ,, صقر لاتنسى اني مو بديرتي

اخاف تورطني بشي

صقر – لا ماعليك قلها انا جارك وادخل عندها .. تدري شلون

جب لها شوكلاته وادخل عندها وتأكد عندها طفل ولا .. واسألها

مع من عايشه

منيف بطاعه – زين تأمرني أمر بو ضاحي تبي شي ثاني

صقر اللي من قال ابو ضاحي تذكر شيخه واللي سوته فيه .. عقد

حواجبه وقال – ابد سلامتك وانتبه على نفسك وانا بكلمك

وماقصرت منيف مخاب ظني فيك

منيف – افا لاتقول جمايلك مغرقتني صقر يالله مع السلامه

صقر – مع السلامه



بعد ماسكر سمع صوت تكسير .. وسمعها وهي تصارخ وتسب

ركض للغرفه مثل المجنون – وش صاير وش فيتس

شيخه وهي تصارخ ومعصبه – الشيبه الظالم اللي ماهب راحمنا

مزوج خواتي ( ناظرت فيه ) كنت تدري صح تدري .. ماهب معقوله

ماتدري كلكم نفس بعض .. انا ماأقدر أتحملكم .. أنا واجهت ناس

مايعرفون للرحمه طريق .. كيف تتزوج نوره هالإنسان كيف

كيـــــــــــــــــــــــف

صقر منهبل من اللي تسويه .. ووقف يناظرها ومنبلم من اللي

تسويه

ناظرت فيه وهي بتموت غبن وصرخت بوجهه - حتى الولد اللي

اشيله منكم وفيكم انا ماأبيه ماأبيـــــــــــــــــــه

صقر – خلاص كله ولا أعصابتس لاتتعبين مدام شيخه نزليه حتى

وحامتس متعبتس ماله فايده هالحمل

يتمسخر عليها .. وهي تكره هالإستخفاف فيه

هالإنسان قاعد يطنز عليها .. والمشكله انه صاحب هالتطنز

صرخت في وجهه بقهر – مصدق اني بموت عليك من انت من انت

إنسان خراط مثل جدك

صرخ عليها – وش مناسبة هالكلام انتي وش فيتس انهبلتي

هي ومنفعله بقوه وبدت تبكي وتضرب بطنها – ماأبيه تعرف ماأبيه

بيطلع مثلكم يشبهكم بكرهه ماأبيه ماأبيـــــــــــــــــــه

مط عيونه وركض لها ومسك يدينها .. وكتفها وصرخ عليها

بقهر – انتي انهبلتي انا أمزح أمزح ماأقصد ,, شيخه خلاص

حرام اللي تسوينه حرام

صرخت عليه بجنون – فكنــــــــــــــــي











ماسمعت صوت ابد .. غير ان الجوع ذابحها .. والخوف فيها

تشجعت تفتح الباب وهي ماتسمع اصوات ابد .. لفت براسها يمين

يسار مافي الممر أي أحد .. وهي لابسه جلالها وبرقعها

تشجعت ووصلت الدرج .. طلت على تحت مافيه أحد .. وكأن

هالبيت مايعيش فيه سواها .. مخيف ومريع .. وكبير مره

وحتى ديكوراته مخيفه

انزلت وهي تقرأ الإيات اللي حافظتها .. وقامت تلف البيت تدور

على المطبخ .. اللي يوم وصلت له سمعت فيه صوت

خافت بقوه .. وطلت براسها .. وشافت الشيبه الوقور اللي رحب

فيها يجهز الغداء اللي طفى عن قدره .. سمع صوت الزراع

يناديه .. من الباب اللي يطل على الحوش .. وطلع له

اما هي بسرعه ركضت وخذت من الصحن .. حطت لها أكل

وهي تلتفت يمين يسار خوف أي حد يدخل عليها .. وكان

شكل الغداء لذيذ .. برياني باللحم .. عقب ماخذت عدلت شكل القدر

عشان مايبين انها أخذه منه .. وصبت لها كوب مويه .. وركضت

بغنيمتها .. اللي هو الصحن وكوب المويه لفوق .. وهي تلهث

لين وصلت جناحها وقفلت بابها .. وهي تلهث بقوه من الإنجاز

اللي حققته











العصر \ بيت ابو محمد

نازل مع الدرج وهو يعدل شماغه .. شاف أمه جالسه ومعها هند

وساره وموضي

منيره – على وين يمه

فارس اقترب وجلس جنب امه وحب يدها – بروح يالغاليه بيت

عمي سعد اشتقت لوضوح ( ويناظر خواتها .. وركز نظراته لهند

صراحه البيت بلاها ولا شي

منيره وكأنها تكلم نفسها وسرحانه – ايوالله لها فقده وضحى الله

يسعدها ويوفقها

فارس يقترح – يمه امشي معي تنبسطين غيري جو هالحزن اللي

فيتس ,, وبعدين وضحى عروس ليش ناسين

هند تناظر فيه بتشمق – ونوره ماهب عروس بعد

فارس استحى وتذكر نوره – إلا بس وضحى طول الفتره اللي

عاشتها هنا قريبه مني وقريب انا منها ,, وبعدين نوره عايشه

مع رجلها في بيتهم وين اطق شلايلي واروح لها .. نوره يبي

لها روحة حريم

موضي وهي تبتسم – وضحى لها روحة الشيخ فارس بنفسه

رز نفسه وضحك – هذاتس قلتيها يالشيخه

منيره – لا يمه خلهم هالحين عرايس وين نطب عليهم ويوم نبي

نروح لازم نأخذ معنا قهوه وحلويات وهديه لهن بنزور وضحى

بكره ونوره اللي عقبه

ساره اللي كانت مغصوبه على الجلسه بينهم .. خوف ان مايشكون

فيها شي ولا ألتزمت الغرفه .. وقفت وهي تقول – بروح ارتاح

ظهري يعورني

هند وقفت معها وهي تساعدها

مشوا طالعين لفوق .. وفارس جاء بيقوم ومسكته منيره

منيره بعصبيه – مره ثانيه اذكر بنات عمك كلهن ,, نوره تستاهل

من يذكرها

فارس حب راسه – يمه ذاكرها والله وحتى شاري لها هديه مع

وضحى بس ماأقدر أروح لها وش بيقول عني سلطان

موضي – صادق ياعمتي وش بيقول الرجال ( ناظرت فيه بتحره )

ترى لولا اهلي عند وضحى كان فهيد حش رجولك

فارس وقف ومشى للمرايه يعدل الغتره – يخسي اخوتس ذا المروح

الحمار مايبي يسافر معنا لمكه يوم ابوتس كلمه ,, ماأقول غير الله

يصبر الوضحي عليه

كل واحد كاسته في يده .. وجالسين على الأرض وفارشين يدينهم

على الكنبات .. وكل واحد في عالم ثاني

اما هو في الغرفه ويحس بالألم .. مايدري ليش يتعذب كل مايتذكرها

ليش مو راضي عن اللي سواه فيها .. حتى وهو يشرب ماتقدر

صورتها تنمحي من راسه .. حتى جيسيكا صورتها ضبابيه .. يوم

يتذكر دموعها وهي تترجاه .. ولا دعاها عليه اللي عور قلبه

حذف الكاسه اللي بيده اللي تكسرت لقطع .. وصرخ بأأأأأأأأأأأأه

طلعت من أقصى القلب

لبس بلوزته .. وطلع لهم وناظر فيهم – ليش قاعدين هنا ليش

مارحتوا

سياف وفهيد اللي في عز سكرتهم .. مادروا عنه .. مس سياف

ووقفه وسحبه للحمام .. وحط راسه تحت الصنبور .. وسياف

يشهق تحت المويه .. بعدين حس باللي يصير فيه ودز يد

نايف .. وطلع راسه ومسح وجهه معصب – انت انهبلت

نايف بصدمه له – اليوم انت بتملك على ساره اليوم















في بيت سعد بن فهيد \ الصاله

جالس وجده وجدته وعمشاء .. يوم نزلت عليهم وضحى وهي

تحس بالخجل – السلآم عليكم

ضحك ووقف – وعليكم السلآم ورحمة الله وبركاته .. حي الله

الشيخه ,, أشهد بالله يالوضحي بيتنا مايسوى ريال من دونتس

وضحى حست بالحياء – تسلم يافارس شلونك انت

فارس – تمام .. وألف مبروك ماكنت فيه يوم خذتس فهيد ولا كنت

ضربت لكم ذيك الصور وسويت لكم موكب

ضحكوا كلهم

الجد – وش موكبه

فارس جلس يوم شاف وضحى جلست – هاه خذوا جاكم جدي اللي

يبي لكلامي تعريب عنده

ريم نزلت وعبايتها عليها .. ويوم شافت فارس فيه

ضحكت – هه فويرس عندنا

فارس – عمتس الشيخ فارس لو سمحتي كلن وله مقامه

ريم – خل عنك بس اشوى عشان توديني

فارس مط عيونه – ايا اللي ماتستحين ,, لا بدق على سعد يوديتس

حب يحرجها لانها تستحي من طاريه وخصوصا قدام اهلها

وهي غاصت في محلها

الجد اللي تذكر – ايه سعد تراه منشبني محدد العرس الشهر الجاي

ريم كنها انقرصت – لااااااااااا

فارس اللي ضحك – مسكين ياأخوي انت منهبل تبي العرس وهي

ماهب يمك ابد

الجده اللي ضحكت – حرام عليكم ترى بنيتنا تستحي

عمشاء – بس ياعمي ماكنه حدد العرس بدون لايشاورنا

الجد – عاد تراه ماقصر وانتم مصختوها

ريم اللي دموعها بتنزل – بس ياجدي انا ابي اخلص الجامعه

فارس وهو يحرجها – خلي عنتس تقدرين تكملينها عندنا

ريم عصبت منه .. وناظرته بعصبيه .. وهو ضحك لانه عصب

فيها

فارس اللي حب يشيل الحرج عنها – خلوا عنكم هالهرج متى

تبونا نمشي لمكه

الجد – انا بخاويكم بعد

فارس حب يحرج جده – اقول جدي مكان هاذا علمك يوم ننشدك

ولا يوم عرفت ان بنت خزام بتروح قلت انا وراني اقعد وهي

بتروح وتخليني

الجده اللي انحرجت – هه دوكم مايترك عليماته اللي مثل وجهه

هالمره عليك فيه يافهيد عطاه مطرقتين

فارس اللي وقف وبعد عنه وهو يضحك – لا دخيلك المره اللي

راحت ساره المسكينه اللي ياله توقف من ظهرها هالحين تباني

اذوق اللي ذاقته وهي بغت تموت

ريم وعمشاء ارتاعن – متى صار هالعلم

الجده – امس ,, وهي وشلونها ( تسأل فارس )

فارس - بخير .. وهم خذن قسم صقر بيقعدن فيه عندنا

وضحى اللي أطمنت – الحمدالله شلت همهن

فارس – يالله استأذن بروح تبون شي

ريم اللي وقفت – ايه بروح معك ابي المكتبه وبمر ساره

فارس – يالله روحنا بس لو قصبني سعد انتي السبب

وهم طالعين

ريم – ماهب اول مره تأخذني خل سعيدان يقعد بس
















جناح محمد \ تحت

موضي حطت القهوه عنده وجت بتطلع – تبي شي ثاني

محمد – ايه

موضي تنهدت – سم

رفع عينه لها يوم سمع تنهيدتها .. وتألم بقهر .. اظاهر انها

ماتقدر تنساه

محمد – تقدرين تجيبين عيالتس .. وحطيهم في قسمنا لين أسوي

لهم غرفه يستاهلونها













( البارت الجاي فيه سر بيكشف .. وش نوعه !! بتعرفون بإذن

الله يوم الخميس إذا كنا من الحيين )

السلام عليكم ورحمه الله وبركاته
يعطيك العافيه عبووووووووووووووقه

القصه تجنن وانا تابعتها من فتره وكملت امس البارت الماضي

وللحين ماقراء هالبارت

يعني مثل ماقلت تجنن بصفه عامه

بس مدري كذا تعور القلب
لاصارت حالتي النفسيه زينه استمتع فيها بقوه ولا قفلت معي

ماحب ازيد همي هم
يعني والله اذا ناظرت لحال كل بطله بالحال والاكشن والبلاوي تطيح عليهن
احس عادي
ومن اشوف الصوره من فوق ينط لي عرق
واتضايق من هالحال المايل اللي وصلو له
وعيال عمهم الهمج ومعاملتهم الزفت خصوصا صقر
والا الرخمه نايف
ياحسافه اسمه فيه
المفروض يتسمى صايع ضايع
غبي الا نااااااااااااايف
فيس يبوس اسم ابوه
*******
محمد والظلم ضلمات يوم القيامه
كيف رضى لنفسه يتزوج وحده ويخلف منها وهو هدفه الانتقام من اخوها اللي فظلته حبيبته وبنت عمه عليه
صراحه انسان يفتقد لمعنى الرجوله الصح
يعني بهالشله كل ابوهم ماعجبني
الا فارس وسلطان
على ان فويرس مايستحي متبطح اربع وعشرين ساعه مع بنات عمه
الكبار قلنا اخوه غصب
والولد حباب ومقام اخوهن الصغير
لاكن هند مو كنه ممصخها
********
وضحى والزفت فهيدان
لااااااااااااااا تكفين يا سهومه
عدليه حرام هالزين كله والعقل يضيع على شواطي هالزفت
يعني يشرب ويهيت اما يطردها ليله زواجهم بذا الشكل المشين
ماظنتي لو يصير مطوع ولحيته مل يده بتنسى
الا لو يجيها فقدان ذاكره مزمن

بروح اقراء الجاي ويمكن لي عوده حسب الظروف

السلام عليكم.


فيه. سر. يعني. يبي. ينكشف. منهو. الولد. ومنين. الشبه.