بسم الله الرحمن الرحيم .. السلآم عليكم ورحمة الله وبركاته
وآسعد الله مساءكم .. وجعلنا من هاليوم من السعداء والمغفور لهم بإذن الله
قولوا آمين
..
وارحب بكل اللي انضموا لنا .. ويآهلا فيكم .. وماراح أطول عليكم في الكلام
اليوم مره انهكت في هالبارت .. وحطيت كل طاقتي فيه .. وفكيتكم من بربرتي
اللي مالها داعي
..
هالبارت حابه اهديه لـــ منضمين حديثا للروايه .. سواء هنا او في المنتديات اللي
حابه الروايه والقراء الحمد والشكر لك ياربي انها حازت على رضاءهم واعجابهم وهاذي
أعظم هديه .. وهالشي قاعده اطلع فيه كل إبداعاتي
يمكن يوم انحرمت من الجامعه .. ومادرستها ربي عوضني بهالشي اللي قاعده احصده
منكم والكلام المشجع لي واللي يدعمني .. وماأكذب عليكم لو أقول تنزل دموعي فرح
من اللي قاعدين تسوونه لي .. الله يسعدكم مثل ماأسعدتوني قولوا آمين
ويحقق لكم اللي في بالكم يارب





مع اطيب الأمنيات بقراءه ممتعه
.
سهم المملكه
.
لإله إلا الله

( البارت الســــــــــــــــابـ 37 ـع والثلاثين )









انا ماجيت لك .. ابيك تعلمني عن اي احد من اهلي

ماابي اقعد معك ثانيه وحده

انصدم منها .. ماتوقع انها تسوي كذا أبد

حس ان الكلمات وقفت في حلقه ..هي عارفه ان ابوها مات .. بس

هي حامله اسم عائلته .. يعني متوقعه ان لها أهل وعمام

ضغط على يدينه بقوه وهو يقول - نـ ااا الجازي انتي عارفه ان

ابوتس ميت

قاطعته وهي تدمع - ابي عماني دلني على واحد فيهم ,, انا

ماابيك افهم ماابيك

مسك يدها وهو مقهور من اللي بيسويه - اهدي حبيبتي انتي

تعبانه لاتنفعلين

مشاها معه للسرير وهو يسدحها عليه وينسدح جنبها وهو يحاول

يهدي نفسه

قبل ان يهديها ,, ماأصعب اللي يمر فيه .. مستحيل أحد يتخيل أبد

أحساسه.. نار تكويه في كل لحظه وحين .. طلعت الجلال اللي

لافته على راسها وهي تفرد شعرها على صدره وتبكي بألم .. وهو

حتى اللمس بيصير متهورلو فكر ولمسها











ضربت النخوه بصدره وهو يتلفت على اللي حولها .. خوف لو

اي أحد اذاها بكلمه

عادت عليه وهي تبكي - تكفى فارس طلعني تكفى ابي ارجع البيت

هز راسه وهو يقول - ابشري ياساره هالحين بنرجع اصلا نايف

معلمني اول ماتصحين اطلعتس ( مايدري انها تهرب من نايف )

نايف .. ونايف كم مره بينعاد عليها هالإسم وبتخاف هالخوف ..

هالإنسان متفنن في تعذيبها .. ألتمت على نفسها بألم وهي تقول

ومنزله راسها وبعذاب وألم داخلي وخارجي - اجل يالله امش

بسرعه

استغرب كلامها وقال بمراقبه لتصرفها - أول شي بنمر نايف ونأخذ

منه وصفة العلاجات

بغت تعترض .. وناظرت فارس ؟؟ وشافت وش كثر نظراته مدققه

عليها وعلى تصرفها هزت راسها بألم وهي تقول - طيب

جارته ومشت معه لين مكتب نايف ,, تحنحت وهي تقول - انا

تعبانه بحتريك على هالكرسي

هز راسه وقال - طيب

دخل على نايف اللي كان يبي يتكلم معه .. ويشرحله اللي سواه

وصار قبل شوي بس كان حسن عنده .. سلم عليهم .. وأخذ

الوصفه وطلع

طلعوا متوجهين للصيدليه .. وسمعوا صوت نايف يناديهم .. لف

فارس عليه

بينما ساره .. قبضت على يدها بقوه

وقف في وجيهم وعيونه على ساره ويمد الورقه لفارس - نسيت

هالورقه بعد

فارس يناظر فيهم .. ولسان حاله يرحم ساره اللي تحبه .. وأخوه

مايعطيها وجهه حب يفسحلهم المجال ومايدري على اللي في

النفوس - انا بروح اجيب العلاج وانت يانايف خلك معها

راح عنهم وهو ماسمع اي كلمه بس عيون نايف غارقه في

عيون ساره

اللي نزلت دمعتها عقب مامشى فارس .. رفع حاجبه من شكل

دمعتها اللي انزلت وصار عين البرقع اللي لابسته السد المنيع

انه يتابع باقي إنحدار الدمعه

تنهد بألم وهو يقول - الحمدالله على السلآمه

انقهرت من تطنزه الواضح عليها - عسى تشمت زين فيني

اتقن الدور وهو يتذكر اللي قاعد يسويه وبخبث ظاهر لها - تصدقين

كنت بنادي رجلتس المؤقر سياف يشوف كل شي على الطبيعه

إسلوب إجرامي قاعد يعذبها فيه .. قالت في وجهه وهي رافعه

صوتها وناسيه المكان - روح حسبي الله عليك دنيا وآخره











زاد بكأها أكثر وهي تناظر آثار خواتها في المكان .. المطبخ اللي

احتوى وضحى وهي تطبخ فيه .. والصاله اللي كان جلسة نوره

وكتابها اللي تذاكر فيه .. لفت راسها للغرفه اللي منقبعه فيها ساره

وزاد بكاها وعلى صوتها .. وهي تتذكر اللي حصل لهم

حست فجأه ان كل خواتها ابعدوا عنها

سمع صوتها سعد وهو راجع من عند خوياه .. خاف عليها

باين بكاها بألم ,, بسرعه دخل للبيت ينادي على أمه – يمه

يمه

طلعت منيره من جناح محمد اللي تحت – هلا يمه انت جيت

اقترب سعد وهو يتذكر صوت دموعها – يمه صوت وحده من

بنات عمي قاعده تبكي

اضربت منيره على صدرها – يويلي هند نسيتها

وطلعت بسرعه من البيت متوجهه للملحق .. وسعد دخل لأخوه

محمد وهو يقول – السلام عليكم بو ( وتذكر وسكت )

ناظره محمد ونزل الملعقه .. وحس بالغصه

سعد مايدري وش يسوي ناداه محمد وهو حزين – سعد تعال

ابيك

سعد مشى وجلس على الكرسي قريب منه – سم

محمد وهو متألم وخاطره حزين تنهد وهو يقول – سعد تعرف ان

ربي عاقبني وبقوه على ضناي اللي مات

سعد قاطعه وكأنه يصبره – الله يرحمه ,, ومعوضين خير

غمض عيونه محمد بألم وعض شفايفه – معوضين خير

سعد ناظر في شكله وفي عضه على شفايفه بتحسر واضح

وقال – ايه إن شاءالله الله بيرزقك انت وموضي

محمد ابتسم إبتسامه في عز ألمه وقال – تصدق ياأخوي ان ربي

عاقبني ومعاد انجب

انصدم سعد وانبلم من اللي قاله

ضربه على علباه بقوه وهو يصرخ – انطق من اللي ارسلك

اللي قدامه صامد ولايبي ينطق بحرف .. انقهر منه صقر

ونادى على العسكري اللي دخل وهو يقول – سم

صقر – جهزت الغرفه اللي قلت لك عليها

المجرم اللي قدامه كش من الخوف .. بس ثبت ولا أرتبك

العسكري اللي ناظر في المجرم برأفه من ذا الغرفه – ايه

طال عمرك

ماحس المجرم غير باللي تله مع فانيلته من ورى .. واتجهه

فيه على الغرفه .. اللي خاف منها المجرم

ذََّرع صقر واخذ السوط .. ومعه عسكريين قويين .. سدحوه على

الأرض وكتفوه وصقر ضربه بالسوط وصرخ – خــــــــلاص

بقول والله بقــــــــــــــــول

صقر وقف ومعصب – يالله قل

المجرم قال وهو يبكي ودموعه مو لايقه على شكله الغليظ

والطويل – أم زوجته أم زوجته هي اللي بتنتقم منه وبنتها










قام بسرعه وكأنه تذكر .. وانلسع بسوط موجع .. بلع ريقه

وجلس على السرير بألم .. ناظرت فيه وسكتت

لف لها وهو يمسح الإرتباك – وش رايك نطلع نتعشى برى

جلست جنبه وهي ترتب نفسها وهزت راسها

وقف ومشى طالع وهو ينفث الهواء اللي متعبه في صدره

سكر الباب وقف عليه وتكلم بقهر – اظاهر اني بخربها قريب









صحت الصبح وهي تتذكر اللي صار لها عقب مارجعت ساره

وناموا في جناح صقر .. عقب ماحلفت عليهم منيره ماينامون

في الملحق

شافت ساره نايمه بهدوء ,, وهي اللي مانامت غير بعد الفجر وهي

سهرانه معها

وتسمع صوت بكاها اللي عورها .. تكلمت معها بس ساره

مانطقت بحرف واحد .. وارجعت تنسدح وهي ماتزال تبكي ومنهاره

وهي عاذرتها .. الجد ضربها وحطمها .. وكمل عليهم سواة جدهم

يوم فرقهم عن خواتهم

غسلت وجهها .. وناظرت في اختها .. اتجهت لها وباستها

ومسحت دمعتها اللي نزلت من منظر اختها .. اللي نايمه على بطنها

لانها ماتقدر تنام على مكان الضربه اللي منتفخه .. تتذكر يوم

تدهنها بالكريم وساره تصرخ وتبكي .. شكت ان هالبكاء كله من

الضربه

وقفت منها ومشت متجهه للباب .. قابلت في وجهها فارس اللي

طالع من جناحه اللي مقابل جناح صقر .. ناظرها وبسرعه بعد

نظراته تذكر ساره وقال – كيف ساره

هند ناظرت نظراته اللي تتجاهلها ,, وفرحت بسؤاله – هالحين

بخير

هز راسه وهو يقول – ماهي بدارسه اليوم

هند هزت راسها برفض – لا ,, ولا أنا بعد

صدمها وهو يقول – ليه انا سألت عنتس

انكسحت منه وسكتت ,, وناظرته بقهر وهو يتعداها نازل على

تحت .. مشت وراه بقهر وهي تقول في صدرها ( مغرور وشايف

نفسه )


ألتفت يمين ويسار .. مالقى سفرة الفطور – وين الفطور

اتجهه على المطبخ يدور على أمه مالقاها .. طلع من المطبخ

وشاف في وجهه هند اللي بغت تضرب فيه

ناظرها بنظرات وإبتسم بمصلحه – اقول هند

هند وقفت ورفعت راسها وناظرته – نعم

فارس وهو مازال بإبتسامته – امي أكيد ان النوم سرقها ماهب

عادتها ماتقوم انا بروح اشوف وش فيها وانتي جهزي الفطور

هند لقت الفرصه عشان تقهره مثل ماقهرها – وش قالولك شايف

مكتوب على وجهي طباخه ولا أختك وأمك مثلآ

عقد حواجبه وتكتف وقال – هه لا بنت عمي .. ( وعدل وقفته )

اصحي امي يعني تسويلي فطور .. منتي بدارسه سويلي انتي

دخلت المطبخ ولحقها وهي ساكته – هاه وش قلتي

هند بتطنز – خلاص اشفقت على امك ولا أنت ماتستاهل الشفقه

ابتسم وقرب منها وحط عينه بعينها وخوفها بنظراته – صدق

اشفقتي علي

رجعت خطوه للورى وهي ماتدري وش صابها









توه يدخل البيت .. عقب ماسجل أقوالهم وكتبه في المحضر واليوم

بيأخذ أذن من النيابه بإستدعاهن .. هذولي سكتوا عائلته عنهم كثير

حتى لو القرابه تجمعهم بس مايسببون الإذى القوي اللي سببوه

لأخوه .. جلس في الصاله بإرهاق .. وطلع جواله ودق على محمد

اللي كان نايم وسعد عنده عشان يساعده

صحى على رنة الجوال – ألو

صقر – ألو .. نايم انت

محمد وهو يتعدل – لاصحيت

صقر – اسمع تراني سويت اللي ماقدرت تسويه

محمد عقد حواجبه – وش هو

صقر بقهر – تخيل من وزى عليك الناس اللي ضربوك

محمد بألم من اللي سووه فيه وهو يسترجع في ذاكرته كلامه

هو وسعد عن اللي صار له – من !!

صقر – مريم وأمها

أنصدم ,, وأهتز – مـــــــــن ,, صدق اللي تقوله

صقر مقهور – ايه ,, وأنا توني دخلت البيت عطيت القضيه خوي

ضاحي هزاع وهو اللي بيتفاهم معهم .. وترى خذينا إذن من

النيابه بإستدعاهن بالقوه

محمد حس بالمر مشى في حلقه لين أسفل بطنه ومعصب وصرخ

بقهر وهو يضرب السرير بيده – الخسيســـــــــــــــــــــــــــــات

صحى سعد على صوته .. وركض وهو يأخذ السماعه من يد

أخوه عقب ماشاف حالته وكلم – ألو من فيه

صقر عقد حواجبه – سعد وش فيه محمد

سعد وهو يشوف محمد يضرب السرير بقهر ويصرخ

ويسب – انا اللي بسألك وش فيه ,, وش قايله انت

صقر – اعلمه ان اللي سوى فيه اللي صار مريم وامها

سعد انقهر ,, وشاف محمد هدى وسكت وباين انه حمقان

ويفكر – مريموه ماغيرها

صقر – ايه ,, وشلونه هالحين اخوك

سعد – خلاص انت سكر هو هدى هالحين وأنا بكلمه

صقر – زين مع السلامه

سكر منه ووقف وهو يدخل الجوال في ثوبه .. مشى للغرفه

ودخل وشافها نايمه وهي حاظنه مخدته وراقده

ضحك من منظرها .. وتذكر يوم دق عليها يطمنها عن أختها ساره

وغلس عليها وسكرت التلفون على وجهه ,, ومتحلف فيها عقب

مايرجع وهاذي رجعته .. أخذله دش سريع ولبس بجامته وقرب

منها وهو يمشي بخفه على رؤوس

اصابعه وبخبث .. جلس في السرير عند راسها .. وانسدح معها

على مخدتها وابعد مخدته عنها .. كتم ضحكته وهي تقرب منه

أكثر في عز نومها .. وتحضنه أكثر .. حس بالدفئ والحنان

ونام وهو يبتسم ومغمض عينه وش بيكون ردة فعلها ان صحت

وشافته على هالحال