بسم الله الرحمن الرحيم .. السلآم عليكم ورحمة الله وبركاته
[COLOR="Green"]اليوم عندي تهاني وش كثر احملها لكثير من الإشخاص ,, بعكس روحي الحزينه لفقد
إنسان عزيز علينا
ألف مبروك ازفها لكل الناجحين ألف ألف ألف مبروك وتستاهلون ومن تقدم لتقدم
ألف مبروك لخواتي العزيزات والغاليات ( وردة الزيزفون \همسات ورده \ معزوفة حنين \ ليل الغرباء ) تستاهلون الإشراف من جد مبدعات مبدعات وإبداعكم فاق الوصف والله اني استانست لكم كثير وعسى ربي يوفقكم للخير ويساعدكم
على الإمانه التي حملتوا بها والله يسهل عليكم
..
بالنسبه اني تأخرت عليكم سامحوني .. حتى يوم رجعت صدمت بخبر حزين اسأل الله
العظيم رب العرش العظيم انه يرحم اموات المسلمين اجمعين ولايريعنا في فقد عزيز وغالي .. وهاذا حال الدنيا وهاذا مصيرنا ( ولاحول ولا قوة إلا بالله .. وإنا لله
وإليه راجعون )
انا بتأخر عليكم بالبارت القادم وسامحوني بنزله يوم الإربعاء بس انا في ظروف ونفسيه
متعبه ولولا اني ماوعدتكم انزله اخر الإسبوع والمفروض نزلته البارح في الليل بس
سامحوني والله اني انزله لكم وهو يغطى بالتراب في قبره .. دعواتكم له
..
حابه اشكر ذاك المنتدى اللي حظيت منهم بوسام أفضل روايه اشكرهم وهالإبداع استشفيته منهم .. لي عوده لهم إبلغيهم سلآمي وتحياتي فيتامين وإلى الملتقى القريب
بإذن الله للمنتدى الذي طالما كان يكرمني ويشجعني على الوصول إلى الأفضل دوما
واحبابي هنا يكفيني حبر محبتي في قلوبهم وهاذا هو أكبر وسام حصدته في منتدى
(...........)

مع اطيب الأمنيات بقراءه ممتعه
.
سهم المملكه
.
لإله إلا الله



( البــارت الرابــــــــــــــــــــــــــــــــع والثلاثيــــــــــ 34 ـن )




كانوا جالسات يسولفن

وضحى بتعب – والله اني احس اني تعبانه بالحيل

هند اللي كانت تنتظر فارس وتحس بالشوق له .. وكان نفسها وضحى

ماتمشي لين يرد لانها لو راحت بيضطرون يطلعون معها

نوره وقفت – وهو كذالك حتى انا فيني نوم

موضي بتفتح فمها إلا سمعوا صوت صرخه فزولها واقفين .. وهن

بسرعه يبحثن عن مصدر الصوت

سمعوا صوت تكسير وصرخات متتاليه .. ركضت موضي وهي عرفت

مصدر الصوت المريع .. افتحت الباب وتفأجات بالمنظر








كشر في وجهها وبشين نفس وغرور – هاذا اللي ناقص

تمنت تملك في هاللحظه سكين .. ساطور .. قاز .. بنزين .. بس هالشي

مو متوفر عندها صفعته كف ودمعتها على خدها وبشهيق – وبتظل

تطعني بهالكلمتين اللي حافظهن ( رفعت اصبعها فوق ) والله والله إن اكثر

مخلوق انخلق وكرهته هو انت هو انت ( وبدت تضرب صدره بإنهيار

وتصيح )







وقف سيارته وهو يبتسم على خوياه اللي سووا فيه مقالب .. ورجعوه

للذي مضى .. حس بهمهمه وصوت بكا .. قرب من الصوت وهو يستنكر

اللي قاعد يصير فأجاهم وهو ماط عيونه ويناظرهم – وش تسوون !!






جلست عمشاء جنب الجده عند المشب والجد مقابلهن .. دخل عليهم

ابو فهيد ومعه سلطان

الجده اللي معصبه وتناظر في سلطان – بدري وانا جدتك

ناظر في جدته وهو يبلع غصته وبخاطر شين – صليت العشاء مع عمي

في المسجد حقكم وقلط عند الرجال عزمنا ارفض يعني

ابو فهيد ناظر في امه وفي سلطان – وش الأمر

الجده وهي معصبه – الأمر اني مجهزة بشيتي من الصفره ( المقصود به

قبيل المغرب ) على اني اروح وياه نشتري لعروسه طقمن زين

صد سلطان بوجهه .. وعليه علامات عدم الرضا

طبت ام فهيد عمشاء في السالفه – ونا ابي المراح معكم بنشتري لوضحى

طقم بعد

ابو فهيد ناظرها بعصبيه – وولدتس الأرفل وينه لمتى وهو مايعرف السنع

سندت عمشاء ظهرها على المسنده بفشيله – وش اسوي هو انا اقدر

اقبضه

سلطان وهو يوقف – انا بروح ارقد

الجده وقفته – اصبر زينك بكره الساعه ثمان وانت هنيا بنسرح للذهب

عصب سلطان – بس بكره عندي عمل

الجده بخصت فيه بقوه – وش عمله استأذن ويصير خير من يوم ما.....

( وسكتت ( كانت بتقول من ماتوا هلك ماخذت إجازه ))

عصب وهو يناظرها وطلع من عندهم .. وهو مايدري من وين يلاقيها

وجدته فارضه عليه هالأمر فرض غصبن عليه

الجد اللي تكلم عقب ماطلع – مالتس حق ياوضحى تزعلينه شوره بيده

الجده اللي عصبت عليه – ولمتى نحتري شوره لين تطيح سنونه لاضنا

ولاحرمه وهو مشيب قطع الثلاثين وانتصفها

ابو فهيد – يايمه لاتنسين انه في صدمه ماقدر يطلع منها اصبروا عليه

الجده ألتفتت له وهي معصبه – كيف في صدمه وهو له خمس سنين

من فارقهم

ابو فهيد وقف وهو يقول – بصرتس بصرتس يايمه انتي فصلي ونحن

نلبس

عمشاء ناظرت فيه – ابو فهيد

لف لها – نعم

عمشاء وقفت وجت جنبه ومدت يدها – يدك على عشرين

طلع من مخباه عشرين ريال .. واستنكرتها – وش هاذي

ابو فهيد معقد حواجبه – هماتس تبين عشرين

عمشاء عصبت – وش عشرينه تمزح ابي عشرين ألف

ابوفهيد عصب – وشايفه في مخباي عشرين ألف

عمشاء – اكتب شيك

ابو فهيد – وانتي وش تبين فيها

عمشاء – هماك سامعني وانا قايله لهم بروح اشتري

معهم طقم لوضحى

ابو فهيد – والهيس ولدتس وينه

عمشاء عصبت عليه – وفهيد ياحبة عيني من وين له

انت خابر انه مايشتغل

ابو فهيد معصب – وبتلعبون على وضحى المسكينه

من بيكد عليها

عمشاء مطت عيونها – وانت وين رحت

الجد تدخل بينهم – وهو ماهب دائم لهم ياعمشاء

علمي ولدتس المراجل والخشونه

عمشاء عصبت عليهم وبدت تبكي – وانتم وينكم عنه

انتم ماقدرتوا عليه بقدر عليه انا كود العرس يعقله

الجده ونت بألم على وضحى – ياحبة عيني ياوضحى

ابتلشت بذا الغليم

عمشاء مسحت دموعها – دخيلتس ياعمه لاتقطعين فيه

وانا جالسه ارحموني ذا الولد هد حيلي

ركضت له وهي تحاول تمسك يده عن الدم اللي يصب

وهو ينزف بقوه صرخ في وجهها – انقللللللللعي

موضي تعبت وبعدت يدها .. مشت بعصبيه للمناديل

سحبت كميه كبيره وحطتها على النزيف عشان يوقفه

رفع عينه فيها بعصبيه .. وهي بادلته النظره .. ألتزم

السكوت وهو يشوفها طلعت وخلته

وضحى بخوف – موضي وش صاير

موضي وهي تتجه للمطبخ وبعصبيه – اظاهر انه

بيقطع له تفاحه وقص يده والسكين قطع جزء كبير منه

نوره وهي الحساسه بينهم .. استشعرت من الموقف

وهي تتخيله – يوووووو مريع مسكين

طلعت عليهم موضي بمفأجاه – إلا اقول مكن نايف كان بينا هنا

هند – ليش تسألين

موضي – وش فايدته دكتور هاذي شغلته يجي يعالج اخوه اللي

ابتلشت فيه








ركب بصعوبه في عربيته .. حس انه زعلها وهي مالها ذنب

لف فانيلته على يده ومشى لين الباب .. مإن فتح الباب حتى

سمع كلمتها اللي هزته وقهرته - وش فايدته دكتور هاذي شغلته يجي

يعالج اخوه اللي ابتلشت فيه

بعصبيه صرخ عليها وهو مقهور وعرق في رقبته ينبض – مشكوره

يامدام مانبي خدماتس اللي بمنه .. خلتس في برجتس العالي واحلامتس

اللي لين هالحين ماصحيتي منها .. المشكله اني عارف اني بلشه عندتس

( وتمتم بكلام واطي بس بعصبيه وقهر ) .. رجع بعربيته وقرع بالباب

بقوه .. وسط نقزتهن جميع .. ودموع موضي من الفشله والموقف اللي

انحطت فيه







لفها وراه وهو يقول يخوف وتمتمه – اا ااااااا وش تبي انت

قرب منهم وهو يناظرهم ويشوف ساره تشهق وراه وتتمنى

ربي يرحمها ويأخذ روحها في هاللحظات ولاتشوف اللي تشوفه

هالحين

هو مازال بإستنكاره وبعصبيه – تكلم انت وياها وش تسوون

صرخ نايف في وجهه وهو يحاول يفرض قوته في الموقف – مالك

دخل وبعدين انا قاعد اعلمها باللي جاي يخطبها

رفع حاجبه وكتف يده – ياحيف على المراجل ياحيف على اللحمه اللي

تجمعكم ( فك يده وهجم عليه وهو يبكسه ويباغته وبعصبيه صرخ فيه

وبقهر – هاذي مراجلك يالتعبــــــــــــإن

انقهر نايف وصرخ فيه – اظاهر انت واخوك طايله يدينكم هاذا وتو رقبتك

مكسوره لاتخليني اعجرها لك ياحيـــــــوان انت مافهمت السالفه

ناظره وناظرها بقهر وهو يحاول يستوعب تبريره وقال – وش عندكم

نايف اللي يمسح مكان البكس اللي على صدره وباين فيه الألم .. ويسمع

شهقاتها اللي يتمنى يدعس على رقبتها ولا يسمعها .. حاس بقهر ويتمنى

يحذفها او يخنقها وتموت ويرتاح من مصيبتها

ناظر في فارس – صديقي سياف بيخطبها

فارس بإستنكار – سياف ماغيره

نايف انقهر انه عرفه – لا سياف يشتغل في المستشفى

عندي وجاي اليوم يخطبها من عند جدي

فارس بقهر وهو يسمع شهقاتها المكلومه ورى ظهره – زين

تقول خطبها من جدي ماهب منك انت مو محرم لها ومايخصك

فيها

نايف انقهر من كلامه اللي يستفزه – بس الولد أمني اني انا اسألها بنفسي

عنه ( وبفكر خبيث قلب السالفه ) وقرب من فارس وسحبه بعيد عن

مسامعها وهو يحاول يلفه بحبل كاذب من نسج خياله وهمس – فارس

هالبنت انا ارحمها تخيل يوم سألتها بكت وقالت انا احبك انت ابيك انت

ماابيه وقعدت تضربني ( وبخبث ) مسح على صدره – والله إن ضربها

يعور

فارس اللي صدق كذبته وخصوصا إن نايف متقن الدور صح ويقول كلامه

بإستعطاف .. وباين إن نايف ينحب خصوصا انه طول ومعضل واحلاهم

ودكتور ماينكر هالشي وهو يشوف هيبته الجذابه

بحزن قال – طيب تزوجها

بغى يخرب اللي سواه ويقول تخسى بس مسك لسانه وقال – لالا سياف

يبيها وانا ماأفكر في العرس ( ورافع صوته يقهر ساره بكلامه ) انا دكتور

وابي وحده في مستواي مو شهادة ثانوي

حزن فارس على ساره اللي ركضت من عندهم وهي منهاره وتبكي

لف له فارس وهو يقول بحزن – حرام عليك هاذا كلام ينقال








يوم الخميس \ الصباح ,, ملحق البنات

تبكي وجدتها تمسح على ظهرها وخرت يد جدتها وهي تقول – لا بدري

عليكم توكم تعلمون

الجده اللي تفشلت من كلامها ,, حتى منيره ماعلموها كانت حزينه

وضحى – والله ياجدتي ماهب زين علمكم البنت تحتاج وقت تفكر

دخلت عليهم شيخه ووجها مجهم وشاحب .. شافت جدتها وحطت كل

الحره فيها – لا ماهب ذولي آل قاسي هم يفصلون ونحن يالضعوف

نلبس من زين الطبوع ولا الدلول تصفونا وحده ورى الثانيه في عائلتكم

المؤقره

الجده انقهرت من علمها – استحي على وجهتس يابنت تراني جدتس

ولا امتس ماعلمتس مقيوله ( وسكتت )

شيخه ودها تنفجر من القهر - كملي كملي ماهب كفايه عليكم انا

ووضحى بتزوجونها ذا الصايع بعد نوره

نوره سندت راسها على المركى واجهشت بكي .. ماتتخيل انها تأخذ

سلطان اللي من أول مادخلت هالعائله والكل يقول معقد من زوجته اللي

ماتت وخايفه بالحيل منه

الجده وقفت وتسندت عصاها – اقطعي واخسي وثمني الهرج مانتن

بظاهرات من ذا العائله ولا ناسيتن انتس منهم

شيخه وهي تضرب على راسها – وكيف انسى ذا الخيبه ابوي ينهان

منكم وحنا وراه وان كاني نسيت ( ضربت بطنها ) هاذا يعلقني فيكم

اكثر

الكل تفأجا بالخبر ووضحى شهقت – انتي حامل شيخه

شيخه جلست على الأرض بقهر وحسره – حسبي الله عليكم حسبي الله

عليكم واولكم اللي في بطني

الجده انقهرت من كلامها وطلعت من عندهم وهي تهز راسها .. ماتوقعت

ذا الحقد منهم

بس وين بيروحن والجده تخطط عليهن وحده وحده .. مستحيل يضيعن

بنات ناصر عقب ماضاع ابوهن مستحيل

واجهت في طريقها فارس وهو يعلمها بالخبر – سلطان توه سكر مني

يقول نتائج التحليل متطابقه

ضحكت الجده وفرفشت وهي تتذكر يوم سحبت وضحى معها ونوره

للمستشفى وكذبت عليهم إن عندها مراجعه .. وهناك سحبت منهم دم

التحليل اللي خلصوها بسرعه بحكم واسطة نايف في المستشفى

بكت وهي تقول – تخيلي تسحبنا معها واثاريها تلعب وترسم من وراي

كان علموني يعني برفض وهم بيفرضون علمهم علينا

وضحى وهي تناظر في شيخه – خلاص اللي صار صار يانوره واحد

نعرفه ولا واحد مانعرفه على الأقل تجتمعين معنا في كل وقت

نوره انهارت اكثر وهي تتذكر كلام ريم عنه قبل بقصته المخيفه وعقدته

من الحريم .. تتفأجا انها هالحين بتكون مع المعقد نفسه قامت مسرعه

للغرفه وهي تصيح وتشهق

شيخه يوم شافت حالة اختها لبست برقعها وهي بتصميم كبير على اللي

بتسويه .. مشت بقهر لين مجلس الريجيل اللي مجتمع فيه اغلب عيال

عمها وجدتها وقالت بقهر – مالنا مجلس بينكم وعويذ الله من شركم







دخل المستشفى وهو متحلي بالصبر أكثر وأكثر .. ومتحزم باللا مبألاه

ومأكد الخطوات اللي قاعده تنهار اكثر واكثر كل مايلتقيها .. انهارت

صروح الصبر عنده وهي في كل لحظه قاعده تغريه اكثر واكثر .. وتهين

رجولته اكثر واكثر .. ويجرب الصبر المضني في حضرتها .. وكل ماتذكر

كلام جده المخيف تراجع عن أي خطوه ممكن يقدم عليها .. بس هالإنسانه

بلحظه بس تنسف كل ثقه وصبر يدعم نفسه فيها

قاعد يشوفها لابسه فستان تفاحي ألوانه فرايحيه .. بس من شاف اللون

المفضل عنده رجع خطوه للورى .. بس للإسف شافته وضحكت

بضحكه رنانه فقدته صوابه – ضاحي ضاحي تعال تعال انا الجازي لاتخاف

ماغلطت في العنوان

تمنى ولأول مره يغلط في العنوان ولا يلتقي هالإنسانه اللي زادها رابط

الزواج في عينه حلا وحلا .. وكل مايتذكر إن هاللي قدامه حلاله يبلع

ريقه اكثر .. هالانسانه نسفت كل ابراجه

غمض عينه اكثر من مره وبعصبيه وهو يقول – وش هالفستان

ضحكت بدلع اصابت سهمه في قلبه العليل ووقفت وقربت منه .. وهو

يبعد عشان ماتنسف اخر لحظة صبر في حضورها – لاتقول انه ماعجبك

ترى تكذب صح ,, هاذا اهدتني إياه السستر تصدق ضاحي تقول حبتني

كثير .. يالله عاد تراهم اكتبولي خروج وابي اشتري لها فستان احلى عنه

تستاهل يوم عرفت اني بطلع تعنت وشرته حقي

لا صدمته اكثر هو في سويعات يالله يتحمل .. هالمره بتقابله في الشقه

اللي مالقى فيها غير غرفه وحده .. وتذكر المصيبه الأكثر صدمه لو

تعرف اللي مقدم عليه .. امتلآه الخوف والرعب بكلامه وقال – من

قال هالكلام

هي تناظر عيونه اللي صابها سهم حبه – الدكتور اليوم جاني وخبرني

فأجاها وهو يقول بعصبيه – مو على كيفهم يطلعونك توك ماتعافيتي

هي حزنت من كلامه وبصدمه – ضاحي ليش تقول هالكلام ماتبيني اطلع

مسك نفسه وقال وهو معطيها ظهره – انا بروح اشوف الدكتور واتأكد

منه

اما هي ناظرت فستانها وشعرها اللي مسويته بعنايه فايقه .. ومن فتره

طويله وهي قاعده تتعدل وتتزين عشانه يفأجاها بهالكلام اللي هد وحطم

كل احلامها




















( انتظروني في البارت القادم .. يوم الإربعاء بإذنه تعالى )

الحمد لله على السلامه وعظم الله اجرك واسكنه فسيح جناته

محمد وموضي تراكم ها المشاكل والاحزان تزيد من التحفزات بالقلب و محمد اي شي راح يتحسس منه كلمه او تصرف فموضى راح تزيد تخوفها منه وتحاول تبعد

نايف وساره جعلك يانويف ماتوفق ان كان قهرت هاليتيم جعلك باللي كسرو محمد يميلون عليك حتى لو بالغلط ويطيحون فيك ضرب وتكشر اللين تحب الارض وبماان فارس يعرف سياف جعله يوقف هالزيجة وينقذ هالضعيفة اتوقع انها تحاول تنتحر ويخرب مخطط هالنذل

نوره وسلطان الخوف اللي راح تواجه نورة فيه سلطان راح يكون هو العلاج لسلطان

وضحى وفهيد مسؤلية جديده وهم جديد على اكتاف وضحى اماا فهيد فهو في كوكب اخر الا ان يستقر على كوكب وضحى نعلق عليه

شيوخ وصقير ... شيوخ ياقلبي عليك باللي مايخفون الله بس ميلي على نويف دخيلك وعطيله معلقة سب تكسر ظهره اما صقير على نويف بيوقف معاك بس دخلتك على الرياجيل بالمجلس بتجيب لك العيد قبل وقته

تسلم يدينك سهوم وننتظرك الاربعاء على خير وسلامه

يعطيك العافية عبوقة على النقل وتسلم يدينك