بسم الله الرحمن الرحيم .. السلآم عليكم ورحمة الله وبركاته
وآسعد الله صباح الجميع .. وجعله صباح مسرات ورضى من رب الكرمات الرحمان
الرحيم
..
بارت اليوم اقدر اقول عنه بارت مهم للتقدم للمراحل القادمه .. فيه قفله من زمان
عن القفلات وانا مثل مااطلقت علي وحده الله يذكرها بالخير ( مجرمه في القفلآت )
يآآآآآآآه اشتقت لهم اللي كانوا معي في ذيك الروايه .. الله يسعدهم وين ماكانوا
يارب ,, لي ذكريات معهم حلوه وجميله والعشره ماتهون إلا على قليل الأصل
وبالنسبه حق صديقاتي الرائعات اللي اشكر ربي اني تعرفت عليهم في هالروايه ويارب
لاتحرموني شوفتهم في الجنه يارب يارب يارب
..
بالنسبه حق اللي انضموا لي اقول يامرحبا فيكم ويآهلآ وسهلآ .. وحق كل اللي
تعنوا لسهم المملكه اللي ابد ماتزعل من إستفساراتكم او نصايحكم .. اما بخصوص
التعمق في الجرأه في الطرح اسمحولي .. ندمت قد شعر راسي في مواقف كانت
في روايتي الأولى وماأبي ينعاد في هالروايه اللي أتعب عشان اطلعها بصوره ترضي
قاراي ومتابعيني فديتهم .. وبخصوص الجرأه المباحه لأباس فيها بس من المستحيلات
اني اتعمق واوعدكم اوصف لكم المشاعر والأحاسيس بقد ماأقدر وش تبون بعد

..همسة شكر لأختي الغاليه ( لعيون سهم المملكه )
والله العظيم احرجتيني اشكرتس من كل قلبي يالغلآ .. وإن شاءالله اني اكون عند حسن ظنك انتي والجميع
ومن لايشكر الناس لايشكر الله سبحانه ,, ونصايحك على راسي يالغلآ .. بس انا بطلت جرآه ويارب ان
يوم تصير جرآه تصير بالوجه اللي يرضي ربي سبحانه ثم يرضيني واوعدتس اني اوصف باحاسيسي الجياشه
وش تآمريني فيه بعد

بارتي القادم كله دمــــــــــــــــــــــــــــــــوع !! كيف وليش لآقوني وبتعرفون ؟؟


مع اطيب الأمنيات بقراءه ممتعه
.
سهم المملكه
.
لإله إلا الله




البـــــــــــــــــــارت الثـــــــــــــــــــ 28 ــــامن والعشــــــــــــــــرون )


حذفت الفستان على السرير بقهر – كيف يعني مانروح ,, كيفك انت لاتروح

بس انا ابي اروح

انسدح على السرير وهو يقول بعصبيه – معاد إلا هي قلت لتس ماراح مانتيب

رايحه لو تطيرين للخضيراء انا ماني برايح انتي بتروحين

عصبت وطرطعت – بس هاذا عرس موضي واخوك ,, انت في عقلك وانت

تقول علمك

هو بنظره عصبيه – انا عارف لاهمتس لأخوي ولا موضي همتس خواتس

تخصرت بقهر – ياسلآم اجل ايشششششش مبطية ماشفتهن ,, تبي تحرمني

خواتي

صقر وهو يعدل البطانيه عليه – المره مالها مكان إلا مع رجلها وش دخلني

في خواتس

خلاص وصل إنبير القهر لحده صرخت بقهر – ابي خواتي مالك حق تحرمني

اشوفهم وبتوديني يعني بتوديني

كره نبرة التحدي في كلامها ورفع البطانيه من وجهه وقال – قبل اشاور

عمري اوديتس هالحين شفتي لو تنطبق السماء على الأرض ماوديتس ويالله

انقلعي برى برقد

عضت شفايفها بقهر وسحبت فستانها اللي تخطط من اصبح الصبح عليه

عشان يصدمها ويقول روحه مافيه روحه ,, حذفته بقهر في الدالوب

وسكرته بقووووووووه بقهـــــــــــــــــر

سمعت صرخته عليها – انهبلتـــــــــــــــــــــــــــــــــــي انتــــــــــــي

ناظرت فيه بقهر وقالت – عساه نوم الكهف

وطلعت وخلته .. صرخ يبيها ترجع بس طنشته .. وراحت للصاله وجلست

فيها .. اول مره تدمع عيونها .. تحس بقهر .. مستحيل إنسان يحس فيه

تكرهه وماتدانيه .. بس ليش تحب ريحته ليشششششششششش !!

طلعت الفانيله من تحت الكنبه ,, وقعدت تشمها وتبكي .. بعد فتره ناظرتها

ليه احب الريحه ليييييييييييه ( وناظرت في الفانيله بألم ) – اكرهك واكره

صاحبك اكرهكم اكرهكم ( رمتها بعيد عنها ) وضربت راسها بقهر

ليييييييييييييييه لييييييييييييييه ألتقيت بهالعالم ليــــــــــــــــــــــــــــــش













فتح الباب بهدوء ودخل .. شافها نايمه وهي مقطبه حواجبه ومكشره

ابتسم وهو عارف انها زعلانه منه .. جلس على الكرسي بتعب وهو يفكر

باللي بيسويه بعد ساعات .. تعب لين اتخذ هالقرار .. اللي ماتمناه ابد

ولا في احلامه وعمره كله تخيل إن هالسيناريو بيكون قصة حياته اللي

من طلع فيها مجرم خطير ومروج للمخدرات .. ووزارة الداخليه اللي تعلن

عن إسمه في كل وقت وحين ..وهالإسم اللي ياما تمنى يقابله ويخلص عليه

ويريح مو السعوديه بس من شره .. لا العالم بكبره .. يوم ألتقاه تشربكت

القصه وتعقدت اكثر .. ناظر فيها بعمق وهي مقطبه حواجبها المميز

والمرسوم رسم بدقه عاليه .. من رب الرحمان .. ينزل مع بداية خط

الحاجبين انف حاد جدا ودقيق .. ينتهي بشافيف عمره مشاف لونها ابد

وردي فــــــــاتح إلى درجة الذهول من لونه المذهل .. يوم وصل هالنقطه

في التعميق في الشرح صد نظره عنها .. مايبي يناظرها بهالنظره ابد

بتظل إنسانه حارب عشان ينقذها .. لدرجة انه ضحى بشي مهم لها وأفقدها

ذاكرتها .. رجع راسه ورى على الكرسي وتسند عليه .. وهو غرقان في

أفكاره









جلست على عتبة ملحقهم .. وبرقعها وجلالها عليها .. وهي تشوف

تجهيزات العمال قدامها والخدمات معهم .. ومنيره تشرف عليهم

وهي غايصه بأفكارها ( أكيد وصل له خبر موافقتي .. ابتسمت اكيد

هالحين يصارخ ويسب كيف يأخذ عرجاء .. مكسحه ,, ماتمشي زين

تذكرت كلام عمشاء ومنيره في البر

قبل لاتدخل المطبخ

سمعت الكلمات اللي صدمتها

لما تكلمت منيره – ايه علمتها

عمشاء – والله مدري يامنيره عن الولد رافضها ويقول

بتزوجوني عرجاء ومن ذا الكلام

ماقدرت تسمع اكثر .. مو من عادتها التصنت .. والكلام اللي
سمعته كبير .. بسرعه ركضت لخيمتهم وهي مصدومه وبقوه
ولو منتظره اكثر .. كان سمعت واتخذت القرار اللي عكس
قرارها هالحين اللي اتخذته



قبل فتره في البر \ عقب ماركضت وضحى

كملت عمشاء وبوناسه – بس عقب اقنعته وكنه وافق

منيره – والله إن وضحى ماتلقون مثلها الله يسعدها هي غير عن خواتها

عمشاء – والله اني عارفه وهي اللي بتصبر على طبع فهيد الله يصلحه




في ذكريات وضحى \ الحاضر

اكيد اليوم بسأل جدتي .. اكيد انه رفض .. وبكذا مايزعلون مني .. هو

اللي رفضني ومايبيني

وانا سويت اللي علي .. والرفض صار منه ,, ولو تعرف شيخه بتنحرني

على اللي سويته لو عارفه بالقصه

سمعت صوت منيره تناديها ,, قامت لها وهي تنفض جلابيتها وتسوي جلالها

على راسها زين ..

وقفت عندها – هلآ

منيره – علامتس جالسة هناك ,, ووينهن خواتس

وضحى – ابد طفشت وقلت اجلس اشم هواء وخواتي اللي تروش واللي

تحضر للعرس

منيره وهي تناظرها بحب – عقبالتس يارب

نزلت راسها وسكتت

كملت منيره – وفهيد صحيح انه عصبي ويحترق بسرعه بس إن قلبه طيب

مثل عيالي

رفعت عينها بصدمه – ليه اجل هو يبيني

منيره بصدمه طيرت عيونها – ليه هم خاطبينتس وماخطبوتس إلا يبونتس

وضحى ابلعت ريقها بصعوبه – بس انا عرجاء

منيره بطيب – ولو صرتي عرجاء والله وهذه محمد لو ماأخذ موضي إن

ماله بد عنتس كفايه حبتس لهم ومراعاتهم مير انتي تستاهلين واحد قلبه

خالي وفهيد رجال والنعم به

مشت من عندها مثل البلهاء لهدرجه غباء فيها ,, توصل إلى قفل المخ

هو مايبيها .. وشلون هالحين يبيها .. كيف صارت ,, أكيد انه مغصوب

وأكيد انه بيطين عيشتهم من بيأخذ وحده مثلي عرجاء وتمشي الخطوه

بصعوبه .. أكيد اني احلم ,, لالالالا أكيد اني سمعت غلط إلا إلا سمعت

غلط بس البر وهالحين .. مسكت راسها وركضت بصعوبه لحجرتها وشافت

هند جالسه فيها تزين شعرها .. ركضت للحمام بصعوبه وقفلت عليها الباب

وهي ماسكه فمها بصعوبه .. لالالالالالالالالالا أكيـــــــــــــــــد أحلــــــــــم

شاف بيتهم من بعيد وحس بالسعاده .. ناظر في اللي جنبه وشافه مقطب

حواجبه

فارس – علامك مقطب حواجبك

نايف – تعبان فيني نوم بنزلك وبروح ارقد

فارس مط عيونه – وعرس محمد !!

نايف بعصبيه – ومايصير العرس غير فيني ,, ماهب لازم اكون فيه

فارس هز كتوفه .. وقف عند البيت ونزل فارس وهو يأشرله يعني مع السلآمه

دخل البيت وهو يشوف العمال وامه واقفه معهم .. وتعطيهم اوامرها

ناظر في كتفه اللي مجبصه ,, والأسفنج الزهوري معلق على رقبته وماسك

على يده

اتجهه لأمه وحب كتفها ,, ومنيره قمزت من الريعه ,, من شافته ضمته بقوه

وحبت صدره اللي يادوب توصله وبدموع – الحمدالله وانا امك اللي قرت

عيني فيك

ابتسم ومسح دموعها من ورى فتحة البرقع – الله يسلمتس يالغاليه

منيره وهي تضمه بقوه – يالله عسى مايبعدني ولايفرقني عنك غير الموت

وانا امك

حب راسها وهو يوقل – آميـــــــــــن

في هالإثناء طلع سعد ومعه شماغه ومعصب

من شاف فارس فك التكشيره – انت جيت

فارس – ايه

سعد – من جابك

فارس – نايف ,, انت وين رايح

سعد وهو مستعجل – بروح اكوي شماغي

فارس – زين خذ شماغي معك

سعد – ماني فاضي مستعجل مستعجل

فارس يسوي نفسه زعلان – امحق هالحين تراني ضعيف توني طالع من

المستشفى امحق مافيه رحمه ابد

سعد وهو يتجهه لمواقف السيارات – عندك امك يالنخله خلها تدلعك









في الليل \ العرس

همست لها – فكي التكشيره ترانا في عرس

وضحى نزلت راسها ( بلاتس ماتدرين عن اختس يانوره ,, الرجال مايبيني

وبيعايرني آآآآآآآآآآه يارب ألهمني الصبر يارب )


في الجهه الثانيه

منزويه في زوايه بعيده عن الحريم .. الللي تشوفهم قدامها عكسها تماما

فرحانين وهي حزينه وشرفها ضايع ,, واللي ضيعه من ولد عمها !!

حسبي الله عليك يانايف حسبي الله عليك يااااااااااااااااااااارب

وقفت وهي تحس دمعتها على وشك السقوط ,, العالم ترقص ومستطربه

وهي حزينه .. شعور مضاد تماما عن مشاعرها

وقفتها منيره – يمه ساره تعالي ارقصي ,, خلي الحريم يشوفن زينتس

ساره بهم – مايحتاج تراهن يشوفني ,, ماعلي برقع

منيره – بس ابيتس ترقصين

ساره تصرفها – مااعرف ارقص ( وراحت وخلتها )


في الجانب الثاني

الجده تناظر نوره وهي ترقص .. وتناظر يم الحريم تشوف من يناظرها

وهي مبسوطه ( آآآآآآآه ياسلطان لو تشوف اللي أشوفه إن ماتمرح اليوم

إلا وهي في حضنك )








عند الرجال \ العرس

سكر الجوال واتجهه لبناخيه وهمسله – هلك يحترونك

زفر وآآآآآآآآآخيرا مابغوا .. الناس من زمان راحوا ,, إلا جور حريم ومنكر

مشى بإتجاه البوابه وحس بحد مسك ثوبه نزل راسه وشاف ولده خالد – نعم

وش تبي

خالد – يبه يبه بروح معك

دزه عن رجله – ضف وجهك ورح هناك عند جدك وعمانك

خالد – بس جدتي تقول خلك مع ابوك

محمد بقهر – خلاص رح عند جدتك يم الحريم

خالد ببرأه هز راسه وركض للحريم

اتجهه للسياره ,, وسمع صوت حد يناديه

لف ناظر شاف فهيد – صبر بروح معك ,, ماأحب الجمعات حظ نويفان

حط راسه ورقد

ركب معه السياره وفي بال محمد ( مليون ومليون أفكار مخيفه )

صرخت عمشاء – انتي تبين تفضحينا

جلست ريم جنبها وضمتها – خلاص ياموضي خلاص

موضي ودموعها تنزل وبشهاق – كيف أخذه كيف وعيالي عيالي ياريم

عيالي بيردون هالحين مع ابوي ومايلقوني وش بيقولون امنا اعرست راحت

خلاص

عمشاء – عيالتس محفوظين ومحمد ولد عمتس اللي لو تلفين الدنيا ماتلقين

اللي أحسن منه منصب وزين ومرجله وفلوس

ريم تضمها وتواسيه وتدمع معها – لاتخافين ياموضي على عيالتس

انا امهم اللين تأخذينهم لبيتس لاتخافين

موضي وهي تبكي وبشهاق – بس ماأبيه ماأبيه

دخلت الشغاله وهي تقول – ماما عريس يجي وفهيد معه

عمشاء مطت عيونها – حسبي الله عليتس رجلتس جاء ودموعتس اربع

اربع قومي عدليها ياريم وانا بروح ألهيه شوي

ركضت ريم للتسريحه وخذت المكياج وعدلت موضي اللي كارهه اليوم

كله .. سمعوا زغاريت امهم وتلآلي – كللللللللللللللللللللللللوش

بعدت ريم عن موضي وتغطت بطرحتها وعدلت عبايتها .. دخل فهيد

وجنبه محمد ووراهم عمشاء بالدخون ,, وهي عضت شفايفها بقوه

اتجهه فهيد وحب راسها – مبروك ياموضي مبروك

عمشاء – يالله تجمعكم على خير وانا امك منك المال ومنها العيال ويرزقكم

ربي الذريه الصالحه

من قالت ذريه كش شعر جسمها

وقف جنبها ولاناظرها ابد .. كانت لابسه فستان ازرق قريب من اللون البحري

مثل تصاميم المصمم هاني البحيري .. رفضت تلبس فستان ابيض وهن

سكتن عنها واحترمن رغبتها خصوصا انهم كلهم متزوجين قبل

بعد فتره من الجلوس وهو ولا رفع عينه لها ,, وهي منزله راسها

سمعته وهو يوقف ويقول – يالله مشينا

بصعوبه قدرت توقف ,, وريم اتجهت بسرعه وجابت عبايتها

بصعوبه لبست عبايتها وهي تحس إن معها هبوط في ضغط الدم

وبصعوبه قدرت تتبعه و تمشي وراه وامها تمشي معها هي وريم

عمشاء وبحزن – هالله هالله وانا امك في موضي

محمد وهو يتجهه لباب السياره من جهتها ويفتحه وبغموض – لاتوصين

ركبت بخوف ورجفه وهي تحس اطرافها جمدت

وقبل لايفتح الباب حقه ويركب .. اعترضت سيارتهم سياره نورها قوي

بقوه .. وباين إن مصيبه كبيره معها













( بحول الله وقوته ,, نلتقي يوم الخميس في بارت الدمـــــوع )

صباح الخيرات ... يسلمو سهومة على البارت والله يستر من البارت الجاي دامه كله دموع اجل بنجهز لنا مونة مناديل مافينا نغرق الي حولنا ......... بصراحة خليتينا نهوجس لمين الدموع بالظبط لانو الضحايا كثير ...القفلة خطيرة ومحيرة ماادري هل هي خير او شر

عبوقة يعطيك الف عافية على النقل المستمر

نجي للبارت وماحمله من احداث تعتبر تمهيد للبارت الجاي .........الخوفة مخطط الخسيس نويفان يتم عاد هي دموعها مانشفت من بعد الي صار او هي تحاول تستعطفه ويزيد عليها خوب هو لاقلب عنده ولا رحمة واصلا السبب لاجيسي ولا غيرها لانو مافي واحد عنده ايمان قوي ويخاف ربه يسوي هالمنكرات والذنوب الكبيره ... هو فيه بذرة شر وطلع على حقيقته وانعدام الايمان عنده يوم شاف بنت الشوارع وخلاها شماعة لاغلاطه ... بس ابي افهم شالمبرر الي بيحطه لاهله لو سيافوه طلقها بعد اسبوع وهو جايبة ومادحه وملمع صورته عند اهله الظاهر انو ناوي يكمل عليها ويحط اسباب واكاذيب على سارة سببت طلاقها او يقول لهم انو انخدع فيه وطلع داشر ساعتها اتمنى من هالشايب يجبره يتزوجها بعد ماتخلص عدتها ويحرق قلبه ........او انو صقر يصير اسرع منه ويجيب دليل برائته وفضيحة نويفان وجده يعاقبه وبدل مايزوج سارة للداشرسيافوه يزوجها له عاد ضربتين براس نويفان يستاهلهم وبجدارة



حاسة انو الدموع بتكون سارة لها نصيب الاسد فيها والله يستر من المصير الي ينتظرها وهي بهالعمر الصغير بس الي صار لها يشيب الراس



شيوووخ شمامة الملابس اجل الفنيلة معاها وين ماتروح ماتستغني عنها الوحام ببدايته والجاي اعظم واتوقع بتصير ام دميعة مع الايام لانو الحمال بيخليها حساسة بزيادة وهالشي بيحيرها وبيحير صقر وهي بتنقهر لانها دوم لابسة ثوب الرجولة ورامية الانوثة بعيد عنها والحين اقل شي يبكيها .........هالفترة هذي هي الي بتغيرها وبتخليها تتعلق بصقر غصب عنها وطبعا هي بتفكرها بس بفترة الحمل بس بعد ماتولد بتستغرب من حالها انها تحن لقربه وماتبي تبعد عنه .... واعتقد سرها بيطول على مايكشفه صقر


وضحى وقرارها الغير حكيم كانت مفكرة انها تخلصت ونجت من فهيد وارتاحت من التجريح بس ياليت السالفة على الفكرة الي اخذتها بس الا الفاجعة اذا عرفت خياسه وانو الكل خدعها علشانها عرجة ويتيمة حتى منيرة الي تقول انها تحبها مدحت فهيد لو سكتت مثل غيرها اهون ولا انها تلمع صورته وهو لاصلاة ولا وظيفة على ايش يبي يتزوج ويظلم بنت الناس ماادري وعمشة نست انو عندها بنات وربي قادر يوجع قلوبهم حتى لو بطريقة ثانية ...... الله يعينك ياوضحى اكيد لك نصيب بالدموع في البارتات الجاية


الجدة ماهمها الا سلطان وزواجه من نورة وماحطت ببالها الالم والوجع الي بتعيشه مع سلطان المعقد وهو قبل ماياخذها قاعد يحط عليها احكام والزين الي فرحانة فيه ماراح يأثر بسلطان الا اذا طلع الافكار السودة من راسه لانو اكيد زوجته الاولى كانت حلوة بس اخلاقها خايسة خوب هو معتبر الحريم نفس بعض


نجي للمعاريس ولمويضي الي ماادري شبيفيدها الي تسويه هي وافقت على محمد وخلاص صارت تحمل اسمه وله حقوق عليها والي تسويه يأكد لمحمد شكوكه مع انها مو شكوك هي للاسف حقيقة مازالت تحب عيسى وتخاف عليه لدرجة نست فارس الغرقان بدمه وخافت يجيه شي

محمد ناوي شر عليها من اول ليلة وهالشي بيأكد ظنونها الاوليه عنه المفروض يحاول يحتويها وينسيها عيسى بفعايله الزينة مو بالقوة والاهانة والانتقام ... الاثنين غلطانين وحياتهم بدايتها دمار ...

بس من الي قطع عليهم الطريق اذا عيسى بالسجن وماحد تنازل عنه الا اذا تم التنازل عنه من ابو محمد بدون ماحد يدري عاد هو بيخرب الدنيا وبيقلبها على روسهم وموضي مابتقصر اذا شافت عويس وقهره عليها ...ويمكن تكون مريموه عديمة الكرامة مع امها تبي تاخذ عيال اخوها وهي من حرقت قلبها تبي تحرق قلب موضي ... مفكرة انو محمد جايب خبرها او بيهزه الي بتسويه رجال مايبيك الا ترزين وجهك عنده ...والله الحسرة على عيالهم لاالابو يبيهم ولا الام معترفة فيهم وشكلها ماجابتهم الا علشان تربط محمد فيها ولما شافت انهم مامنعو الطلاق رمتهم


في انتظارك سهومة بكل حماااااااااااس