في لندن .. عاصمة الضباب \ على مشارف الفجر
يطالع مع الشباك وفي غمرة ذكرياته يوم سمع صوت سعد
اللي كان نايم وصحى – نايف
نايف لف راسه له – صحيت
سعد ناظر يمين ويسار وعيونه شبه مغمضه – كم الساعه
نايف اللي لف راسه للشباك – ماباقي شي ويطلع الصبح
سعد جلس وهو يفتح عيونه – وانت ليش صاحي متى قمت
نايف اللي مانام سكت فتره وقال – قبل شوي
سعد – شرايك اتروش وننزل تحت بعزمك على القهوه
نايف جلس على سريره – خلاص رح انت بسبقك تحت انا
سعد – اوكيه
غير نايف ملابسه .. ولبس الجاكيت حقه .. وطلع من الجناح
فتح الأصانصير وضغط على تحت .. بس فجأه الباب انفتح عليه
ناظر لقى بنت في 18 سنه وكاشفه وباين عليها خليجيه وحاطه
فل ميكب .. ناظر نايف فيها فتره من الوقت .. فجأه مرت على
باله ساره واللي سواه فيها .. غمض عيونه بقوه .. ندم شديد
فتح عيونه ولقى البنت تضحك له .. تحسبه خق من جمالها
كشر في وجهها وعطاها ظهره .. بس البنت وقحه ودقته
مع ظهره .. انصدم من جراءتها لف وجهه عليها – نعم
البنت تمد يدها – معك ساميه ممكن نتعرف
تجاهل يدها وطلع نظارته الشمسيه ولبسها يوم انفتح
الاصانصير ألقى عليها هالكلمه وطلع – لا مو ممكن
انقهرت من اسلوبه مغرور بالمره .. وشايف نفسه وهي
اللي خق عليها الكل

























شاف مافي السياره بنزين .. مضطر يوقف يعبي .. ناظرها
لسى نايمه .. في داخله شفقه مع انها ماتستاهلها .. وقف عند
المحطه .. وبسرعه نزل من السياره هو اللي يعبي .. جاه
الهندي وصرخ عليه – لاتناظر من هنا .. وسد السياره
سيارته مو مغيمه
الهندي خاف منه .. صقر - انا بعبي وانت ناظر العداد بس
لاتلف راسك
الهندي هز راسه – طيب بابا
عبى بسرعه .. وعطاه الفلوس وأمره – يالله رح
الهندي ركض وهو خايف منه .. يحسبه مجنون .. صقر لف
راسه يمين ويسار .. وبسرعه ركب سيارته ومشى .. تذكر
هوشتهم امس .. متمرده مايعرف كيف يسيطر عليها .. حس
انها هي اللي بتروضه مو هو .. تنهد وقال في نفسه ( ليتك
مابليتني فيها يامحمد .. اشهد ان الحب بلوه اشهد ان العشق
مصيبه )
وش بيقولون عن عينها هالحين .. تذكر الضماده والقطن
يحطها على عينها .. بسرعه اتجهه للمحطه وهو يصحيها
بصوت عالي – شيخه شيخه
سمعها وهي تقول – اففف
صقر انقهر حتى في نومها كارهته عصب – قومي قومي
شيخه وهي تتمدد .. جلست وهي تعدل الطرحه والبرقع
صقر بدون شعور – خلاص عرفنا ان عينتس زرقاء لاتغطينها
شيخه بهجوم – عشان تتشمت
ابتسم بإبتسامه على الجنب .. وسكت
بعد فتره – بمر صيدليه في هالمحطه لاترقدين
شيخه وهي تفتش شنطتها – شفتني رجعت ارقد
انقهر منها – تراني مقدر مشاعرتس ولا ...
قاطعته – خلاص خلاص شكرن
وقف السياره ونزل وهو معصب
هي ابتسمت بإنتصار – اصبر ياما بتشوف من شيخه



























في البر
وقفت سيارة سلطان .. ونزلوا منها .. مشى الجد لخيمة الرجال
وسلطان بيتبعه يوم الجده مسكت يده .. وهي تخطط
لبعيد – تعال تعال ابيك تتقهوى معي وتعطيني علومك
سلطان سكت
خذته لمجلس الحريم .. وهناك لقت الجميع جالس بما فيهم
نوره والبنات .. سلموا عليها ثم قالت
الجده بأمر – نوره يمه قومي صبي القهوه لولد عمتس
سلطان على طول نزل عيونه .. عرف مقصد جدته
نوره استغربت كلام جدتها
الجده – وراتس قومي
نوره قامت وهي ترتجف وتناظر خواتها .. وضحى هزت
راسها يعني سوي اللي تقول عنه
نوره مسكت الفنجال وهي ترجف تحت نظرات الجميع
وسلطان يحاول يشتت نظراته .. جدته احرجته وهو مايبي
اخذت الدله وصبت له منها .. ويدها ترتجف بقوه .. ماتعودت
ويدها ترتجف بقوه .. مدته له وهي منزله عيونها .. ناظر يدها
وهي تمد الفنجال وشافها ترتجف .. حاول مايفشلها .. ومد يده
وقبل لاتوصله انتثر الفنجال على لبسه .. تحت صدمة لجميع
وشهقة نوره .. على طول وقف وطلع بدون أي كلمه
والجده تناديه .. ونوره طلعت لخيمتهم تبكي من الفشيله






















قبل يوصلون وقف على جنب عقب ماقطع شوي في الصحراء
نزل واتجه لها .. فتح الباب اللي من الجهه الثانيه اللي مو يمها
وطلع الكريم من الكيس – هاتي وجهتس
بنبره لا مبالآه – وليش إن شاءالله لايكون صدقت الدور وتبي
تعطف علي شكرن مااحتاج منك شي
صقر عصب .. مد عليها الكريم – خذي حطي اجل انتي على
عينتس .. وهاتي احط هالضماده عليها
لفت راسها الجهه الثانيه وتكتفت وحطت رجل على
رجل – ماابي قلت لك مااحتاج شفقه
صقر وهو ماسك اعصابه – ماهيب شفقه ليه اشفق عليتس
بالعكس هالشي تستاهلينه
بسرعه لفت راسها له وخزته بقوه .. وهو مايعرف وش نوع
نظرتها لانها متغطيه بالكامل
شال الطرحه عن وجهها .. وهي عصبت منه
صقر عصب – تراني مانيب ألعب فاهمه
فسخ برقعها وهي عصبت بس في النهايه أستسلمت .. وغمضت
عيونها بقهر لانها استسلمت .. حط الكريم وهو يمسح على
عينها .. ويحس انه مرتبك .. يحس انه في وضع حميمي بس
هي مو حاسه فيه ابد






























غسل وجهه من موية الوايت كذا مره .. وهو يتلذذ بالبروده
اللي يحسها تلفح وجهه
جدته حطته في موقف صعب بالمره .. مكان يبي هالخطوه ابد
حتى مالمح زولها ابد .. بس يتذكر رجفة يدها .. غمض عيونه
يمسح هالنظره من راسه بالقوه .. فتح عينه وهو ناقم وحاقد
ويقول في نفسه ( كلهم كذا .. نفس الطينه .. يسوون انفسهم
طيبات وهم ابعد عن الطيبه .. الله يسامحك ياجده بس )







دخل المستشفى وهو حاس بشعور تعب .. ماصار يرقد ابد
ولا يعرف طعم للراحه .. لين يسوي اللي عليه ويتركها
اهم شي يأمن لها أمان من بعد الله .. وسكن ممتاز .. ومصروف
ووظيفه محترمه .. ويدور لها على زوج محترم .. بس تذكر
وصية ابوها .. بس مايبيها .. ولا قادر يتقبل ان بنت مجرم
تشاركه الحياه .. وتكون نصفه الثاني .. مايبي يخرب حياتها
وينهيها بإسلوب درامي .. يبيها تبدأ حياتها الزوجيه مع شخص
مو يقتحم حياتها ويومين ويتركها
وصل للعنايه المركزه .. شافها على وضعها .. بس استغرب
وجود طيبيب اول مره يشوفه .. خاف انه من العصبه ولاحقها
لين هنا .. بسرعه اقتحم الغرفه .. تحت ذهول الدكتور
ضاحي بالأنجليزي – ماذا تفعل هنا ؟؟
الدكتور ناظره – انت الذي ماذا تفعل هنا ,, ممنوع الدخول
ضاحي وماسك اعصابه – ماذا تفعل بالمريضه
الدكتور – افحصها
ضاحي – واين الدكتور كيث هو المسؤول عنها
الدكتور حس بشعور الوف في عينيه وابتسم – لاعليك انني
اعتني بها لأكثر والدكتور كيث ارسلني لأعاين حالتها ربما
تحتاج إلى عمليه
ضاحي انصدم – ماذا عمليه ؟؟
الدكتور وهو يلقي عليه الصاعقه – يشتبه ان يكون لديها نزيف
داخلي في الراس

حط الضماده عليها وهو يقول ببرود وبأمر – إذا حد سألتس عن
عينتس قولي منتفخه مدري وش قرصها
شيخه تجاهلته وهي تلبس البرقع
صقر وهو ينزل – ويالله انزلي عشان شكلنا مابيكون حلو وانتي
جايتهم وراكبه ورى
ركب وهو متأكد انها بتنزل وتركب .. بعد فتره افتحت بابها
ونزلت .. وركبت جنبه
ومشوا بدون أي صوت واي كلمه .. لين وقفوا عندهم
افتحت الباب شيخه .. وصقر مسك يدها – لحظه
شيخه فكت يدها عن يده – نعم
مد نفسه بإتجاهها وفتح الدرج اللي قدامها .. وهي تبعد عنه ..
وهو غمض عينه لما شافها خافت منه وزحفت بسرعه .. طلع
الجوال وفتح عينه – هاذا الجوال لتس
ناظرت فيه – ماابيه
ابتسم على جنب – ولا ماتعرفين له
فعلا قال الواقع .. ماتعرفه ولا مره مسكته بعد
صقر ابتسم – طريقة الجوال سهله اضمن انا مانرجع إلا وانتي
عارفته انتي لاتدقين علي ( قالها بثقه ) انا اللي ادق عليتس
انقهرت من ثقته وغروره بنفسه .. وخزته بعينها
ضحك صقر من نظرتها – خلاص لما تسمعين الدقه اضغطي
هالزر ( وأشر على الزر الأخضر ) ولما اسكر منتس
( اضغطي على هالزر الأحمر ) وبس انتهينا
مده عليها – اتفضلي
شيخه – قلت لك ماابيه
صقر وهو مبتسم ومروق – قولي انتس تبينه بس مستحيه
شيخه انقهرت وجت بتنزل
صقر مسكها وهو يضحك – خلاص خلاص
حطه في شنطتها .. مو لتسه الجوال لي بس لما يدق سوي
اللي قلت لتس عليه
انزلت وهي مقهوره من كلامه وضحكه واستخفافه فيها
وسكرت الباب بقوه .. لدرجه السياره ارتجت
عصب من حركتها بس مكبل مايقدر يهاوشها .. والعالم فيه
ويشوفونهم



















اتجهه على عنوانها اللي حافظه عن ظهر قلب .. صعد الدرجات
وهو يسترجع الذكريات الحلوه اللي مرت عليه
اول مره يجيها .. كان شايل ورده وعلبة شوكلآ .. وهو يصعد
الدرج ويناظر في الورقه .. يتأكد من العنوان .. ولما افتح له
الباب وهي تضحك .. وترحب فيه .. وهو طايره فيه الدنيا
جيسي تضحك له مو معقول
المره الثانيه
وهو راجع معها .. وشايلين اكياس كثيره لان
جيسي تبي تزين شقتها وتعدلها .. ويضحكون وهم يلقون
النكت على بعض
المره الثالثه
وهو يهديها الورده برومانسيه .. وهي تبتسم له .. وحاس ان
الدنيا ابتسمت له بكبرها يوم ابتسمت
المره الرابعه
المره الخامسه
المره السادسه
ووتوالى المرات .. وتتكرر الزيارات .. لين اخر لقطه شافها
ومو قادر ينساها
الباب مفتوح .. وهو مستغرب .. دخل وهو كان بينادي عليها
استغرب وهو يشوف صقر في موقف حميمي معها .. ماسك
يدها ويضحك .. ويهمس في أذنها .. وهي تبوسه وتضحكله
بعدين بادلها الموقف نفسه
لين حذف اللي بيده واللي كانت ملازم مصورها لها .. عشانها
ماحضرت المحاضره تقول تعبانه
هجم على صقر وهو يتصارع معه ويتضاربون .. وجيسي
تصرخ فيهم .. لين في الأخير وقفت بينهم ودزت نايف
ولصقت في صدر صقر وهي تذبح نايف بالكلمات – نحن
نحب بعضنا انا اكرهك اكرهـــــك اكرهـــــــــــــــــك




اكرهك اكرهــــك اكرهـــــــــــك .. مسح دمعته وهو يهز
راسه بقوه .. وبسرعه نزل مع العتبات .. عشان ينصدم بالموقف
اللي شافه وهو يحط يده على فمه بصدمه















مسحت دموعها بسرعه وهي تشوف وضحى داخله عليها
وتقول – قومي شيخه جت وبلاها اللي تسوينه في نفستس
اتجهت على ساره وهي تهزها – ساروه ساره سويره قومي
ساره كانت نايمه ومتمتعه بنعمة النوم اللي فارقها من صار
اللي صار – وضحى خليني ترى لي ايام مانمت ابي انام
تعبانه
وضحى سكتت عنها .. وهي تشوف ان ساره تغيرت بالحيل
مو ساره اللي يعرفونها
شافت نوره قامت وراحت تغسل .. مشت وضحى للمجلس
وشافت ان عمشاء ومنيره مو فيه .. اكيد في المطبخ يحضرون
الفطور .. وواجب انها تساعدهم .. قبل لاتدخل المطبخ
سمعت الكلمات اللي صدمتها
لما تكلمت منيره – ايه علمتها
عمشاء – والله مدري يامنيره عن الولد رافضها ويقول
بتزوجوني عرجاء ومن ذا الكلام
ماقدرت تسمع اكثر .. مو من عادتها التصنت .. والكلام اللي
سمعته كبير .. بسرعه ركضت لخيمتهم وهي مصدومه وبقوه
ولو مانتظره اكثر .. كان سمعت واتخذت القرار اللي عكس
قرارها هالحين اللي اتخذته






( إنتظروني يوم الأثنين .. بمشيئة الرحمان )

لاااااااااااااااااااااااااااااااا



البارت يقهر ..




ابتداءا بصقيرااان المخنز


وانتهاءا بالوضحي المسكينه





كسر يكسر يدك يا صقيران يا المجرم >> ادري ان رابطة هديل بتقوم علي خخخخخخ


تضربها من غير سبب .. ولكن احسن انك عشقتها عشان تذوقك ما ذوقتها اياه





وضوووحي الغاليه .. يا كبر الجرح اللي في قلبها الحين ..

ولكن اظن انها بتوافق عليه لانها تدري انه رافضها وهي تبي خواتها يتوفقون

يعني لازم تتزوج ..



وش شاف ناايف؟؟؟؟؟؟؟



بارت حلووووو بس كنت ابي يوم كامل وش يصير هناااك ..


وقفلاتش خطيره يا حلوووه




تسلم يمين من كتبها ويمين من نقلهاااا

السلام عليكم..
مررحباا عبوووقه ويعطيتس الف عافيه على النقل وتسلم ايدتس وايد الكااتبه..
سهوومه الف لااباس عليتس وطهور ان شااء الله باذن الله البارت الجاي تكونين مثل الغزال ياا غزال>>فيس يغازل.هخهخهخهخه
سهومه كنت بقول البارت قصير بس عاد يوم قلتي انتس تعباانه رحمتس وقلت خلاص هالمره سمااح>>فيس طيوب ورحووووووم..

نجي عاد للربع..
يعني موقف شيخه وصقر صغير بس شيخه للحين تجيب الهم وقحه وقليلة حياء وتقول عن صقر قليل ادب .. ارحميني ياا ام الاخلااق والادب العالي ..تعيبين على صقر وانتي اردى منه صدق من قال الشبكه تعير المنخل>>فيسي اللي يحب الامثال..هع
شوفي شيخه خلينا نتكلم بصراحه ..يقولون بعلم النفس ان فيه ناس تحب تعذب نفسها وتستمع وترتاح لما تنضرب اعتقد انتي من هالنوعيه تجلسين تهاوشين صقر وتحوسين مريره وتدبلين كبده لين يعطيتس المقسووم.. فخليتس مثل ماقلت لتس بالاول بااااااااااارده جدااا وانتي تنفذين اللي يبي ..

وانت صقر ماتستحي على وجهك وانت كل شووي راضخ بنت عمك؟؟ ياا اختي مستحييييل يكون جسمها مثل جسمك يعني اصلاا مستغربه كيف مع هالضرب للحين ماتكسرت وعز الله انها قووويه ولافيها فقر دم ولا نقس كالسيوم>>فيس يتنظلها..هخهخهخه
عيب عيب الرجال يجلس كل شووي يكفخ حليلته وبنت عمه وخصوووصاا اذا كانت يتيمه.. وبعدين اذا انت تحبها خلاص خف عليها شووي كود انها تنضرب على راسها وتهجد وتحبك حبتها القراده..
تدري مت من الضحك عليك وانت تقول شكلها هي اللي بتروضك مو انت اللي بتروضها..هههههههه

الا صدق تعال انت صدق كنت مع العله جسي؟؟ شوف اتوقع انك مسوي كذا خطه لانك عرفت بحب نايف لها وانت عارف انها انسانه استغلاليه وتبي تووضح له بالصوووره انها ماتحبه وتبيعه لللي يدفع اكثر..وعشان كذا سويت هالتمثيليه عشان نايف يشوفك وينهي علاقته معها وهذا اللي صار بس الللي ماحسبت حسابه انه بيحاربك وبتكون عدو له..

نايف ..جعلك من هالحال واردى ياااااااااارب اجل مسووي نفسك تذكر الضعيفه السووري وانت خربت حياتها ..جعلك والله ماترقد ابد وجعل هالليله اوول ليااااالي الارق والسهر والتعب والارهاق والانهياااااااار لييييييين تصلح غلطتك مع البنيه حسبي الله عليك..

وضحى : تدرين اتووقع انتس كنتي بترفضين بس يوم سمعتي كلام عمشاااء وانه رافضتس عشان العرج بتردين وتوافقين وبتكونين مخططه انتس تخلينه هو اللي يسووي لتس العمليه وياااااااااااااويله من وضووووووح الجديده اللي شكلها خلاص ملت من شفقه الناس وبتقرر هي هالمره مصيرها بدون تدخل احد..هذااا اذاا مااشرطتي انه يسوووي لتس العمليه قبل مايتزوجتس رسمي..>>فيسي ابو التوقعات..


سلطان ونوره: بعذرها نوره تسووي كذا وتتوتر اجل المجلس مليان ليش الجده مانادت الا هي... وخصوووصاا انها ماسبق وشافت هالسلطان .. بس اللي قهرني صدق هوانتياسلطان وش هالافكار الغبيه اللي انت حاطها براسك.. حركتك وش مسوويه يوم هالافكار السووداء على جنس حواااء معبيه راسك.. صدق انك مريض ..افكارك كلها معفنه ياليت تسووويلها تجديد ياا رجال وتبطل تفكر كذا .. ونووره بتكون لك رضيت والا انرضيت..
نوور : ياااااقلبي عليتس الله يعافيتس يااارب وترجعين مره ثاانيه للحياة بس باسم جديد ومع زوج بعد .. خاطري صرااحه اشووفكم سواا احس بتكون حياتكم جبهه طبيعيه وماراح يعكرها شي الا الشيبه اذا شافتس طبتي ...

تسلم الايادي ياارب للحامل والمحمووول عنه..
بانتظاااار البارت القادم بكل شووق اذا الله احيانا فلا تتركون انتظارنا يطووووووول..