بسم الله الرحمن الرحيم .. السلآم عليكم ورحمة الله وبركاته

اسعد الله صباحكم بكل خير .. وعساكم ممن يقال لهم أدخلوها من اي باب
تشاؤون قولوا ( آمين ) ..

اليوم عندي كم نقطه ابي اعلق عليها
اول واهم نقطه لحبايبي اللي ينتظروني كل فجر وماينامون ووراهم مدارس واشغال
والله تراني بزعل عليكم بكل صراحه لاتناظروني انا تراني اصحى واقوم دائم بهالوقت
وغير كذا تراي عاطله عن الشغل صحيح ماسكه خواتي الصغار وادرسهم وبيت
اهتم فيه بكل شي بس انا منظمه كثير واعرف انظم وقتي
اما انتم كذا بتظرون انفسكم وبتزعلوني والله جد بزعل حرام عليكم بتضطروني اغير
هالموعد وهو انسب وقت لي
بعطيكم حل بتلقون البارت جاهز لكم عند كل صلاة فجر جاهز وخالص اصحوا
تصلون واقروا فيه بنشاط وهمه

..النقطه الثانيه حلوه من الحلوات تقول في مقطع تقول كيف فارس شاف وجهه
وضحى واقول لها ياحبيبتي ياحياتي لابسه برقع ويوضح عيونها ويبان في تصرفاتها
يوم نزلت راسها واستحت .. ترى والله كل شي حاسبه حسابه واكره هالغلطات
مثلك بس اكيد شفتي برقع إسلامي وتشوفين صح ولالا ..

النقطه الثالثه والله مومصدقه ان وحده من البنات اللي مشهورات في منتدى
جنبنا جزاها الله كل خير تراسلني على هالمنتدى وتخبرني بشخصيتها هي وعضوه
من عضوات هالمنتدى عسى ربي مايحرمهم نعمة الصحه والعافيه والسعاده
واقول لهم ابد اللي ارسلتوه لي بعيد بعيد كل البعد عن المأساه اللي بتصير
لساره بسبب تهورها وقصه جديده بتعجب الجميع ..

اهم نقطه ماابي اخبي عليكم شعور مر علي اني اقفل الروايه بعد ماعرفت بمرض
إنسانه عزيزه علي واللي كان متابع معي في الروايه الأولى يعرف قصتها مع المرض
الله يبعد هالمرض عن كل مسلم مؤمن وعزيز قولوا آمين جاها هالحين في الفك
ربي يشفيها قولوا امين ويفرحني فيها والله انهرت وفكرت اقفل لين فتره لأني اكرهه
اللي يقفلون الروايه ويتركون جمهورهم متعلق بالروايه وهم يولون هاربين بس
لما تذكرت كل وحده فيكم .. لقيت ان محبة كل وحده غطت عمق من صدري
صبرت ووكلت امري لله بإن يشفيها
اللهم رب الأرباب رب الجنة والنار ان تشفي اختي وحبيتي وصديقتي شفاء عاجلآ
وان تفرح قلبها يارب ياكريم يارب ياكريم ياذا الجلآل والأكرام
مع اطيب الأمنيات بقراءه ممتعه
.
سهم المملكه
.
لإله إلا الله



( البــــــــــــــــــــــارت العشــــــــ 20 ــــرون )











العصر \ بيت ضاحي بن فهيد

كلهم متجمعين حول القهوه .. ابو محمد منيره محمد صقر فارس

دخلت لهم وضحى وهي مستحيه وملتفه بجلالها – السلآم عليكم
الجميع – عليكم السلآم
ابو محمد – هلا بالوضحي تعالي ياابوتس
وضحى – ابدن ياعمي بس ( ناظرت صقر ) وين شيخه
صقر بنظرات بارده لها – راقده
وضحى عقدت حواجبها ورددت وراه – راقده !! بس شيخه ماتحب نوم العصر
صقر يصرف – هي مانامت البيرح
منيره لصقر – والله وانا امك هي حتى الغداء مانزلت له كل هذه نوم
وضحى – انا بطلع لها بشوف وش فيها
صقر وقف وبنبره عصبيه – لالا انا اللي بطلع لها
وضحى ناظرت فيه بشك – على راحتك
منيره ناظرت وضحى – تعالي ياامي اجلسي وينهن خواتس
وضحى – خليتهن يذاكرن ياعمه
ابو محمد – تعالي تعالي جنبي وانا عمتس
وضحى استحت تفشلهم وتروح .. وبتجلس معهم شوي
فارس يبتسم لوضحى – الوضحي استعديتي لبكره روحة البل تراه مسراح صبح
ابتسمت وضحى له وهي تأخذ الفنجال من عمتها – إن شاءالله
محمد ناظر ابوه – تراني بأخذ جدي وجدتي معي ومدري إذا
بيروح فهيد ولالا ,, عمي معاد يقدر يسوق
فارس ناظره بخبث – خلهم بأخذهم انا ( وبخبث مدروس وهو
يتفحص محمد زين ) موضي كلمتني وتقول نبيك تمر علينا بكره
محمد حس بربكه ونزل عيونه وسكت
فارس عظ على شفايفه يكتم ضحكته
ابو محمد وهو يوجه اوامره لفارس – لا انت ابيك تسوق ابنات
عمك
ومحمد بيسوق فيني انا وامه وذا الشغالات وسلطان بيروح
لجدانه هو اللي بيأخذهم
فارس بنبره خبيثه يستفز محمد وهو يبتسم – ياحول ضعيفه
موضي عاد متحمسه على الروحه وداقه علي تبيني انا اللي
أخذهم للبر
محمد وقف وعينه في فارس .. وفارس يناظره ثم بقها ضحك
من ملامح محمد المعصبه
محمد ناظر في أمه ويتجاهل فارس – يمه تراني بتعشى عند
رجال لاتحتسولي بالعشاء ( وطلع وخلاهم )
منيره بهم – الله يحفظكم ويرد اللي راحوا للخواجات بالسلامه
ويستر عليهم
فارس يحاول يسكت عن الضحك – خواجات عاد يمه
وضحى تسمع لهم وهي مو معهم .. تفكر في شيخه .. ماهيب
عادتها .. لها اسبوع من وصلت .. من تصير حزة الغداء تغدت
وجتهن .. غير اليوم .. أكيد فيه سر في الموضوع

















طلع محمد برى في الحوش .. شاف عياله يلعبون والشغاله معهم
ناظرهم فتره من الوقت واتجهه لسيارته
خالد اول مشاف ابوه ركض له – بابا بابا
محمد وقف وهو معصب .. لين وقف خالد عنه وهو
يلهث – بابا بروح معك
مسكه محمد مع اذنه – اول شي لاتقول بابا وش انت خكري تبي
تطلعلي على خالك لابركة فيك وفي الساعه اللي شفت امك فيها
خالد حس بالألم ودمع – آآآآه بابا تعورني
محمد دزه عنه – لين هالحين بابا رح اذلف عن وجهي رح
وقف خالد على الجدار وهو يدس وجهه فيه ويبكي .. ابوه قاسي
عليه بالحيل يكرهه إلى متى بيظل كذا
حس بيد انحطت على كتفه .. رفع راسه شاف اخته خلود وهي
تبكي معه .. حط راسه على صدرها وقعد يبكي










في الطياره
فك نايف حزامه بعد مااستقروا في الجو .. اتوجه لكبينة الطيار
دخل ولقى سعد يضحك ويسولف مع خويه الكابتن
نايف – السلآم عليكم
سعد وخويه ناظروه – وعليكم السلآم
سعد – زين انك جيت قاعد انكت عليك عند غانم ( ناظر في
غانم ) غانم هاذه اخوي نايف اللي نحش فيه من اليوم
نايف رفع حاجب – وش تحش فيه
غانم ابتسم لنايف ووقف وسلم عليه – ابدن وانا اخوك قاعد
يزايدني فيكم يقول اخواني مناصب ليتني طلعت ظابط
ولا دكتور مثل نايف
نايف ابتسم – هاذه سعيدان فاضخ قلبه الطيران
غانم – ايوالله صادق
نايف ناظر بغانم – وانت شلونك طيب
غانم – تمام يسرك الحال وشلونك انت
نايف – بخير ,, ( ناظر في سعد وبإستهبال ) المهم انتبه
لاتورطنا تدل طريق لندن زين بس
سعد ضحك ويستهبل – ابدن مانت بموقع غير في هيثرو
لاتخاف معي ابو الغوانم

نايف يسألهم – كم يبينا ونوصل
غانم يجلس – ابدن نوصل لهم بتوقيت لندن الساعه ثمان
نايف – زين بعد ,, يالله اسمحولي بروح اجلس
غانم – اجلس عندنا سولف علينا
نايف – لا ابدن بخليكم تأخذون راحتكم بطل عليكم شوي



















فر القفل .. وفتح الباب .. دخل شافها جالسه على الكرسي وباين
عليها معصبه
ناظرت فيه بقهر – انفك الحصار
كان صامت وهو يتقدم بإتجاهها .. ويتوجه بخطوات هادئه
خطوه .. خطوتين .. هي حست بخوف من ملامحه بس ثبتت في
الكرسي اكثر جلس على ركبه وعينه فيها وهواه الحار يلفح
منه .. انتشل البرقع من وجهها بقوه – كم مره قلت لتس لاعاد
اشوف هالحجاب الحاجز هذه
ماشاف ردة فعل منها غير انها نزلت راسها بسرعه .. وشعرها
طاح على وجهها .. انقهر انها تحاول تخبي وجهها عنه
رفع وجهها بقوه بيده .. وشاف دموعها ماليه عيونها .. وتحاول
تشتت نظراتها عنه تكلم بنبره غريبه عليها – ليش تحاولين
تدسين وجهتس عني لتس اسبوع وانتي كل ماشفتيني تلملمتي
بذا البرقع تبيني اقصه مثل صاحبه الأولي ولا تبـ ......
ماخلاه يسكت عن اللي يقوله غير دموعها اللي صبت على يده
انتبه لها وقال بسرعه – خلاص خلاص ( وحذف البرقع عليها)
اخذت برقعها الطايح من الأرض وركضت بسرعه للحمام
الأكيد انها هالحين تحسنت تحسن بسيط .. ولحظات بس يشوف
وجهها يوم تبي تصلي بس مثل الظهر .. بس اللي متأكد منه
وهو يضرب يده في بعض من القهر ويقول في نفسه .. وراها
سر ولازم اعرفه




















في مطار واشنطن دالاس .. اتوقفت الطايره اللي نور فيها
وسيارة الإسعاف وضاحي ينتظرونها .. اول مانزلت من
الطياره بسرعه ركبوها سيارة الإسعاف .. واتوجهوا على
مستشفى واشنطن الرئيسي .. ضاحي يحاول يتقبل المصيبه
اللي انحط فيها .. له اسبوع وكوابيس ماتفارقه .. عن زواجه
منها .. كيف بيتقبلها .. بس الشي اللي مريحه ان جده يعرف
بالأمر


















اندق عليها الباب .. كانت تسمعه وتسوي نفسها راقده .. بس
النوم محاربها من عقب المصيبه .. ماغير تبكي وتحس بالقهر
سمعت صرخة نوره – ساروه افتحي الباب مصار نوم احد
يرقد العصر
ساره كتمت شهقتها اللي تبي تتمرد .. كيف تقدر تحط عينها
في عيون خواتها .. اللي تواعدوا يربون هالعايله اللي قذفتهم
وقذفة ابوهم .. يوم صاروا معهم وبيثبتولهم هي اللي كسرتهم
هي اللي فضحتهم .. شهقت ساره بقوه وهي تتمثل هالفضيحه
عليها .. خلاص معاد فيها .. تبي تموت كرهت الحياه
نوره دقت الباب اقوى – علااااااااااااااااااامتس
ساره وهي تصرخ عليها – اذلفي مافيني شي
نوره تدق اقوى – لا فيتس
ساره – نوروه روحي عن وجهي ( وصوتها يتغير لإعلان
موجة بكا ) والله ماني فاضيتلس
نوره – ساروه علامتس تبكين
مإن قالت هالكلمه .. حتى قامت وفتحت الباب .. وحطت راسها
على صدر نوره وهي تبكي بقوه

نوره اللي كانت واقفه وتسمع بكا اختها .. انفتح الباب وارتمى
شي ثقيل عليها .. نزلت عيونها .. شافت ساره حاضنتها وتبكي
نوره اللي انذهلت – ساروه علامتس تبكين
كانت ماهيب راضيه تحكي بس حاطه راسها وتبكي .. حاولت
نوره معها فتره من الوقت
ساره وهي تشاهق – ابي ابوي وامي
ابتسمت نوره ودمعتها تنزل – بس انتي اللي تبينهم كلنا نباهم
بس راحوا واتركونا عند ربي اللي احسن عن هالدنيا ومافيها
ساره وهي تبكي بقوه – ابي اروح لهم ماابي اعيش في هالحياه
نوره خلاص انا عفتها
نوره تضايقت من كلام اختها – تعوذي من الشيطان وانا اختس
هاه هذانا حنا كلنا راحوا واتركونا فاقدينهم صح بس صبرنا
ومالنا غير الصبر





دخلت عليهم وضحى وهي تعرج ومعصبه .. جلست على الكنبه
بدون ماتنتبه لخواتها وهي تنافخ بعصبيه
رفعت عينها وشافتهم يناظرونها – علامتسن
ساره على طول راحت الغرفه تكمل موجة البكا .. ونوره
اخذت دفة الحديث وهي تمسح دموعها – تقول مشتاقه لأبوي
وأمي
وضحى وهي تنفخ بيأس وقل حيله – قولي ماهيب انتي وبس
كلنا اشتقنالهم
نوره ناظرت فيها – علامتس انتي تنافخين
وضحى وتناظر في نوره فتره وقالت – اول شي شيخه مدري
وين اختفت شاكه في رجالها طلع لها فوق يوم دخلت واختفى
معها
( ناظرت في نوره فتره ) الخبر الشين الثاني (بلعت ريقها
بقوه ) – عمتي مسكتني على جنب اولى وقالت لي ولد عمتس
يبيتس
نوره بصدمه – منهو
وضحى وهي تنافخ – فهيد
نوره بتساؤل – منهو فهيد
وضحى ناظرتها – ولد عمتس سعد
نوره – بس انا مااعرفه
وضحى – حتى انا
نوره – طيب وش قلتي لها انتي عاد
وضحى وهي تتعوذ من الشيطان – سكت وبعدين قلت لها يصير
خير
نوره – كم عمره ذا هو قدتس وضيح
وضحى – مدري بس اظاهر انه كبير
نوره انبسطت – طيب صلي إستخاره وشوفي
وضحى ناظرت نوره وشافت السعاده فيها – انتي من صـ
قطع كلامهم صرخة هند اللي في المطبخ .. ركضوا بسرعه لها
وشافوها واقفه قدام الكيك وتصرخ
وضحى عصبت – هيه انهبلتي صاحيه انتي
هند وهي تحزن – ألحقي ياوضحى كيكتي اختربت
نوره بعصبيه – تقومين تروعينا
هند ناظرت فيها وهي عصبت – لو الله لي ساعتين من الظهر
وانا احوس فيها تاليتها اكل هواء
ناظرت في وضحى بإستعطاف – دخيلتس وضحى سويلي
نفسها نفسي هافتني عليها مشتهيتها بالحيل
نوره وهي تطلع من المطبخ وتحلطم – الله يرحم زمان اول
مانعرف الكيك غير زوايد صحون طلبيات وضحى
هند وهي تصارخ عليها – انتي مالتس خص فيني لاتدخلين
وضحى مسكتها وهي تقول – اشششش عيب استحي اختس اللي
اكبر عنتس وطلعي مقاديرتس يالله
هند انبسطت وحبت راس وضحى – ابشري يااعز اخت لي
بهالدنيا
وضحى وهي تجهز – بنعطي فارس منها يحب ذا الكيكه
هند طلعت عيونها – يخسى ويهبى مايذوق منها
وضحى ناظرتها بعصبيه .. ومعناته اقطعي ولا مانتي ذايقه
شي
هند تكتفت وهي تقول – خلاص بس اهم شي عقب مااشبع
تأخذين له الزود

اليوم الثاني \ الصبح
نزل من سيارته وهو يتحنحن .. ويطق الباب الداخلي اكثرعن
مره يعلن حضوره
افتحت الباب موضي وهي تبتسم له – حيالله سلطان
سلطان وهو يبتسم لها – هلا موضي صبحتس الله بالخير
واسفين على الإزعاج
موضي ابتسمت – صبحك الله بالنور والرضا والسرور افا
عاد وش ازعاجه ترانا صاحين
سلطان يدخل وهو يقول – عفانا الله احد يغبش من خمس
ألتفت يمين ويسار – وينه جدي اللي منشبني من صلاة الفجر
صل وتعال اخذنا
اضحكت موضي على اللي بتقوله – ابشرك جدي دخل يقول
ابتلين لين تجهزون
سلطان انصدم – ايشششششش ,, حسبي الله على إبليس بس
هاذا وانا فيني نوم مارجعت غير متأخر وفي النهايه يقلب
علي ويرقد
موضي قالت – تعال اجلس تراه من حسن حضك الفطور
والقهوه بتتجهز من يدين عموش هالحين
سلطان انفرد وجهه – لا مدام عموش مانردها لله يحفظها
اكلها يحلم فيه الواحد
طلعت عليهم الجده وهي تعكز ناظرت فيهم – هاذه سلطان
موضي – ايه ياجده تعالي سلطان جاي بيأخذكم وسحبتوا عليه
سلطان – ماسويتوا خير فيني ليتني كملت نومتي ( قال بصوت
واطي مايسمعه غير موضي ) مير انتم يهالعواده ماتخلون
الواحد يتهنى
ضحكت موضي بهدوء .. وهي تشوف سلطان يقرب لجدته
ويسلم عليها – صبحتس الله بالخير يابنت خزام
الجده – صبحه بالرضى يارب ,, تعال تعال اجلس
جلسوا وبعد فتره .. الجميع ألتم فطروا وقضوا وتجهزوا يمشون
ركبوا كلهم مع سلطان غير ريم اللي تنتظر سيارة فارس بتركب
معهم هي وابوها.. لان سيارة سلطان ماتكفيها
وهم في الحوش راكبين
سمعت ابوها يكلم وحاطه على السبيكر ويصارخ على فارس
ومتحلطم – انت وين غديت
سمعت نبرة صوت فارس وهو يستهبل على عمه – حاضرين
للطيبين تؤبرني يانور العين من هالعين ومن هالعين
كلهم ضحكوا غير الجد اللي هز راسه – ماهب تارك الهيط عنه
ذا الولد




سعد صارخ عليه – والله ( معاد فيه حيله ) خلني اشوفك
بس ( وسكر في وجهه )





















ضحك فارس وهو في السياره .. وبنات عمه معه – يويلي
عصب علي عمي
هند – تستاهل
فارس انقهر – انتي اصصصصص
وضحى – خلاص عاد
هند – لا مانيب ساكته اكل كيكتي كلبوها عساها ماتحدر إن
شاءالله وكله من تحت راستس
تذكر فارس الكيك اللي شافها وهي تبردها في الثلاجات اللي
برى في المطبخ حق الملاحق .. راقبها لين راحت وأخذ
الكيكه وانحاش فيها لخوياه
ضحك بقوه على هالذكرى
هند – جعله مايحدر
ضحك فارس – ابشرتس حدر وتهضم
ساره تسمعهم وهي كاتمه عبرتها .. اما نوره مرجعه راسها
على ورى وتحاول ترقد
وضحى – اششششش خلونا في السعه اسكتوا شوي
فارس – عشان خاطرتس يالشيخه ابسكت




















بينما في السياره الثانيه
ركب ابو محمد ومنيره والخدامات الثنتين وعيال محمد .. كانوا
بينتظرون صقر اللي طول .. وشيخه اللي ماشافوها امس كله
ابو محمد – حرك شكلهم مطولين
محمد – إن شاءالله



















كان جالس على الجريده وكل شوي ينافخ .. عارف انها
تستعبط عليه من اليوم جاهزه بس تبي تقهره
خلاص طفح الكيل فيه ووقف بيدخل يهاوشها .. شافها واقفه
ولابسه بشتها وخالصه
صقر – لا بعد كان كملتي نومتس العرب مشوا وانا طرطور
احتريتس
كانت صامته على غير عادتها
صرخ فيها – بلعتي لسانت سهاه سكنهم مساكنهم على ذا الصبح
ايضا مطنشته بس مشت للباب وهي تطلع .. استغرب صمتها
وراه شي .. بسرعه لحقها ووقفها .. شافها مغطيه عيونها عنه
تنرفزمن فكرة انها تحرمه عيونها بعد صرخ عليها – وراتس
مغطيه عيونتس
فجأه تكلمت وهي تقول بنبره جامده وفيها هدوء – مايخصك
فيني
صقر عصب من هالكلمه – ترى طفح كيلي من ذا الكلمه
سحب الشيله اللي مغطيه عيونها وانصدم من اللي شافه




















ركب سعد وهو يتحلطم – ماحطولي غير انت تسوقبي حسبي
الله على ذا الصبح
فارس ينكت – افا افا افا تعاف مخاواي يالأجودي والله اني
اطلق خوّي اضحك واسولف عليك
سعد – قل تهذر الله يقلل هرجتك بس
ضحكن البنات من كلام سعد .. وفارس انقهر من عمه
أشر على نفسه – يعني انا ثرثار
سعد وهو يناظر على قدام ولا عبرها – اصبر طريقك بس
فارس انقهر وقال – هالحين انا بعرف ولدك فهيد وينه بس
شاطر تحط حرتك فيني
سعد – مااخس منك غير هو عساه بالماحي معاد اقدر عليه
فارس سكت وزفتت معه .. بينما السوالف في الخلف على حامي
الوطيس بين هند ونوره وريم .. اما ساره ووضحى كل وحده
وادي بعيد .. وضحى في السيره اللي انذكرت قدامها ودعوة
ابوه عليه يعني بيدبسونه فيها .. وساره في المصيبه اللي صارت
لها ولو الموت يشترى اشترته




انتظروني يوم الخميس بإذن الله تعالى .. في رحله مثيره
في كل شي

:"""( البارت جدا جدا قصير والله مايسوا كل هالحماس تككفين طوليييييييييييه من هنا لما الخميس فيه وقت واجد :$

,,ياعمري عمرتس ياسووري :"( وهذاك سافر ولا جاب خبرتس ياضعيفه :( :( :(

,,الحين انا اذكر ان وضحى كانت اول تجمع فلوس عشان تسوي عمليه لرجلها عشان العرج ! ليش ماتسوي طيب !!
,, ههند ذي بثثثثثثثثثثثثرههه ما ابلعها ابد ابد مدري شفيها على الوجه السموح فارس <-- يقالها شايفه وجهه الحين :$

,,صقر يقههر يستقوي على حرمه ياعيب الشومم