" بسم الله الرحمن الرحيم .. السلآم عليكم ورحمة الله وبركاته "
يالله مع هاليوم تسعد كل وحده تعنت وردت ياكريم .. وجزاكم الله كل خير
على تعازيكم على فقيد الأمه الأسلاميه يارب
..
بارت اليوم مليان قفلات توجع سامحوني .. وهل بتسامحوني لو قلت لكم البارت
الجاي راح يكون يوم الخميس القادم بارت طويل وحلو قبل اقفل الروايه لاني
راح اسافر عيد الأضحى !!..
بارت اليوم مليان نجمات وشغلات حلوه وتوقعات من اعضاء حلوين عسى ربي يسعدهم يارب
اول نجمه \ * حق حلوتنا أموله
ثاني نجمه \ * حق امورتنا وردة الزيزفون
ثالث نجمه \ ** نجمتين مو نجمه لانها توقعت توقعين حق وردتنا فيتامين سي
رابع نجمه \ * حق شوكلاتنا شوكلاته

هالحلواااااااااااات لما ارد من السفر براسلهم يحددون لي البارت متى يبغونه
عقب البارت اللي بحطه ,, ويارب اذكر لان المخ لكم عليه
..
دعواتكم يالغوالي لي وربي يحقق لكم كل شي يخطر على بالكم يارب مع اطيب الآمنيات بقراءه ممتعه
.
سهم المملكه
.
لإله إلا الله




( البارت السادس عشــــــ 16 ـر )



سيارة فارس

رافع على صوت الأغاني وطربان

ساره هزت هند وتهمسلها – هاذا اظاهر انجن

هند رفعت صوتها – لإله إلا الله اصبحنا واصبح الملك لله

حس انه انتصر .. من اليوم يحاول يستفزها عشان تتكلم وهاذي هي تكلمت

طفى المسجل وهو يضحك – محمد رسول الله

هند – اجل ليش مشغل الأغاني ثرك تعرف الدين

فارس كشر – ليش قالوتس يهودي

هند سكتت وقعدت تقرأ الأذكار .. وقفوا عند المدرسه

فارس ناظرهن مع المرايه – الساعه كم تطلعون

ساره – وش عرفنا اول مره ندرس

فارس – خلاص بجيكم 12 ونص

هند في وجهه – لاتجينا خل عمتي ترسل لنا السواق

فارس عصب – تركبن مع سواق بلحالتسن وينا عايشين فيه

هند انقهرت – وهاذا حنا راكبين معك

فارس انقهر وصرخ – ليه تقارنني بالسواق قلللللللللة ادب

هند نزلت وهي تقول – ماغيرك قليل أدب ( وضربت بالباب بقوه )


خلت فارس يصرخ بقوه على سيارة ابوه الجديده .. لان سيارته vg لها باب واحد وخلاها في البيت






في الدمام \ الشقه

سكر الباب بقوه تعبان .. توه راد من المستشفى .. دور عليها
ماشافها .. عرف انها راقده وخلاها
جلس على الكرسي ويحس بألم في ظهره دق جواله فتحه – هلا ضاحي

ضاحي – صبحك الله بالخير ,, والحمدالله على السلآمه

صقر – الله يسلمك من خبرك

ضاحي – خبرني العقيد حقك يقول صقر كان بيموت لولا عناية الله

صقر خاف هله يعرفون – تكفى ضاحي اهلي لايعرفون

ضاحي – والله ان ودي اعلمهم ولا هاذي سواه تسويها تروح للموت برجلك وتوك معرس

صقر بجمود – هاذا امر الله

ضاحي – والنعم بالله بس سواتك وانا اخوك ماتنتسوى لولا العمليه اللي انت عارفها ولا كان جيتك

صقر – خلاص اجل بتسافر

ضاحي – ايه بس بعد العمليه بنسافر بسرعه

صقر – الله يوفقك يارب

ضاحي – المهم طمني عن صحتك انت

صقر – انا الحمدالله بخير

ضاحي – والحرمه وينهي ؟؟

صقر كشر يوم تذكرها – راقده

ضاحي – اها الله يوفقكم يالله وانا اخوك مع السلامه

صقر – لحظه هلي عرفوا

ضاحي – لا محد عرف غيري

صقر – زين بس لاتعلم محمد

ضاحي ضحك – محمد بيعرس مافيه حيله اظاهر الأسبوع
الجاي ملكته

صقر ابتسم ويحس بألم في ظهره– وافقت موضي

ضاحي- ايه الله يوفقهم

صقر – يالله خذى الحب محمد

ضاحي ضحك – تذكر

صقر – اجل اقدر انسى

ضاحي – اجل يالله اترك في حفظه .. بس انتبه على الجروح

صقر – لاتوصي وانتبه لنفسك ,, وانا بتابع العمليه من بعيد

ضاحي – انت خلك في نفسك بس وانتبه

صقر – ماعليه ماعليه

ضاحي – سلام

صقر – الله يسلمك
صكر منه .. وحط الجوال جنبه .. يحس ظهره بينقسم نصين يحتاج راحه .. ليته وافق على كلام الدكتور وتنوم عندهم .. بس وين يروح وهي مربطة يده .. من يخليها عنده

وقف بتعب ويحس انه مسوي انجاز بوقفته من كثر تعبه .. مشى لين الغرفه .. شافها نايمه ومرتاحه
انسدح جنبها وهو يحس عمره هلكان وميت تعب .. ومن التعب اللي فيه نام وهو مو مرتاح في نومه من ظهره

لبست عبايتها بسرعه .. ووضحى جالسه بالشرشف لافته على راسها ومتسنده على يدها في المركى
نوره انتبهت لها وقربت منها – وضحى علامتس

وضحى ارفعت راسها – ابد بس حاسه راسي يانوره يعورني وقلبي يأكلني على شيخه

نوره – لاتخافين عليها شيخه هالحين مرتاحه وانتي هنا اكلتس قلبتس عليها ,, لاتحسبيني ماانتبهت لتس .. وانتي طول الليل تقولبين كانتس الحيه

وضحى بهم وتعب – وش اسوي يانوره شايله همها .. انتي تعرفين اختس عوباء وتعرفين تركيبتها .. وصقر مابيتحملها كثرنا ياخواتها

نوره وهي تسمع صوت البوري – والله اني عارفه ,, يالله وضيح ريم تنتظرني






في السياره \ حوش قصر ضاحي بن فهيد

طلع سعد وهو لابس لبس الكابتن .. وشاف سواق عمهم .. حس بغبن .. مشى للسياره وهو معصب .. كيف تركب معه لوحدها .. فتح الباب اللي من جهه وحده .. وشاف الخدامه معها
ريم حست بقهر

سعد ناظرها – آسف حسبتس لوحدتس

ريم بقهر – لاتخاف اعرف الدين والأصول زين

سعد ابتسم – اسف ماصبحت عليتس .. صباح الخير والطيبه صباح الحب ياحرم سعد

ريم مطت عيونها مقهوره من جرأته ,, واستحت وسكتت

سعد – العرس قريب بس ارد من لندن بحدده

ريم انصدمت ومن دون شعور – لندن !!

سعد مافهم بعدين انتبه لغيرتها وابتسم – ايه لندن ,, وش اسوي انتي معطيه اوامرهم وجهه لو تحبيني وتعزيني ماسمعتي فيني

ريم انفجرت عليه – صدق ماتستحي ليه وينا عايشين فيه هذولا الحضران يخلونك تشوف بنتهم ماهب حنا ,, تبي تزوج حضريه رح من رادك

عصب – قد اللي قلتيه

ريم بتحدي – ايه قده ,, انت ماترضاها لو عندك اخت ,, وانا ماني براضيتها على اخواني ولا حتى على نفسي .. منا لين العرس يصير خير

عصب وطبق الباب عليها بقوه ,, شوي وينخلع
جتهم نوره تركض .. وشافت سعد اتجهه لسيارته وهو معصب وينافخ

افتحت الباب نوره وهي تقول – السلآم عليكم ,, شصاير

ريم بعصبيه – سنه لين تجين

نوره اسكتت ,, وريم حست الجو تكهرب

ريم بتأسف – سامحيني نوره بس هاذا فصل مخي

نوره بعذر – لا مسموحه افا عليتس ,, بس وش فيكم

ريم بعصبيه – تخيلي الأخ يبيني اكشف عنده واتميع عليه وينا عايشين فيه لو يعرفون اخواني بيشيلون عليه

نوره انقهرت منه – ماله حق ,, وانا احسب انه اعقل عيال عمي

ريم – مدري عنه اففففففففف والله اني عصبت

نوره – افا اهدي اهدي علامتس ,, مايسوى الموضوع






الظهر \ الساعه 11

البست عبايتها وهي ترجف .. الموضوع بيحسم اليوم .. الجهاز محطوط في أذنها .. والعمليه تحتاج إلى دقه

نور – اوكيه اسمعك

ضاحي – يالله سمي بالله وانزلي ,, ترى فيه سياره هنا سوداء تراقبك شاك في وضعها

نور خافت اكثر ودمعت – بسم الله

ضاحي – يالله انا قاعد اراقبك من بعيد ,, ومنفذ العمليه موجود واول مايصير الحادث بيوصل الأسعاف اللي موقفين في الشارع الثاني خلاص

بلعت ريقها .. وسكرت باب الشقه .. وبخطوات مسحوبه تنزل مع الدرج .. وهي مره تقرأ الأذكار ومره تتشهد

وصلت عند البوابه ,, ودموعها غرقت وجهها .. تبي تنتهي من
العذاب بسرعه مشت ,, ونست ان المنفذ قالها تمشي بهدوء
وبسرعه اعبرت الشارع ووصلت نصه ,, والسياره السوداء
هي اللي قربت منها ..

وأخر ماسمعته ضاحي يصرخ – لاااااااااااااااااااااااااا







الدمام \ شقة صقر
صحت من نومها وهي تحس حد ضاربها وثقل في بطنها
ألتفتت يمين إلا وتلقى يد صقر على بطنها .. ارفعت يده
وحذفتها عنه .. ووقفت وهي مقهوره

وصرخت فيه – هييييييييييييييييييييييه انت

صقر فتح عين وحده – نعم خير !!

شيخه – انت هنا الليل بسسسسسسسس

صقر اللي كان نايم على الجهه اللي يمها .. ألتف على الجهه الثانيه وهو يقول – احمدي النعمه لين هالحين ماطلبت حقوقي

شيخه انصدمت من كلامه المفاجئ وبلعت ريقها .. وقفت بسرعه كانها مقروصه – جرب وشف وبعدين عايب ومكسح عالج نفسك وقرب وشف وش يصير

صقر عصب وصرخ عليها – اخذتس فرجه انا هااااااااااااااااه

انقهرت منه وعطته ظهرها .. ومشت لين الحمام وطبقته في وجهه بقوه .. خلت صقر يصارخ ويهاوش







بيت سعد بن فهيد \ الصاله

جالس الجد والجده وابو فهيد وعمشاء

الجده بصوت جهوري – يافهيد ( تقصد الشايب ) انا بخطب لسلطان

الجد – عين الصواب

ابو فهيد – وسلطان عرف يايمه ظني ماهب موافق

الجده – معاد إلا هي نأخذ شوره ,, الولد دفن نفسه في الحياء ياسعد
عمشاء – لاتلومينه ياعمه اللي مر فيه ماهب شوي ,, ابوه وامه راحوا مره وحده فجأه عنه ,, والأهم انه يحس عمره السبب

الجده – هاذي كتبة الله ياعمشاء انا ابيله من بنات عمه انشهد انهن طيبات واجوديات

عمشاء – الأهم ياعمه وضحى تراني ابيها لفهيد ولدي ابعديها عن تفكيرتس

الجده بدت فيها الحميه – فهيد اللي مافيه مرجله السايع تبينه لوضحى خافي الله ياعمشاء

الجد صرخ على الجده – اقطعي اقطعي من بيناظرهن بنات الهنديه خليهن يذلفن والله اني ماني بمصدق انهن طاهرات لين هالحين

ابو فهيد انقهر من كلام ابوه – افا ,, ابوي انفض الهرجه هاذي اتفلها وادحر الشيطان
الجد عصب – سعيدان اقطع ( ناظر في عمشاء ) اخطبي لفهيد العرجاء وترى سلطان للأخرات

الجده نزلت دمعتها وقعدت تمسحها بشرشفها – حسبي الله عليك من شايب خاف ربك يوم تقذفهن وش تبابهن

الجد وقف – ماورى الهنديه خير ,, آآآآآآآآآه ياأنا اللي دخلتها بيتي لويرجع الزمن ,, والله اني لمسطها بالعقل لين تعرف الأرض مير نار ابها الله لايبيحه

الجده وقفت وتسندت بعصاها – الله لايبيحك انت ياهالشايب الله لايبيحك

الجد عصب وصارخ وسب وهاوشها .. والجده دخلت غرفتها وهي تلاسن .. ودموعها تصب .. وتدعي لناصر ان ربي يبيحه ويجمعها فيه في الجنه