" بسم الله الرحمن الرحيم " .. السلآم عليكم ورحمة الله وبركاته
مساء حزن الرياض .. ودموع الأيتام .. وسواد المملكه العربيه السعوديه
مساء الحزن والألم والدموع .. مساء رحيل " صاحب الأبتسامه الجميله "
اسأل الله العظيم ان يتغمد سيدي ووالدي وقايدي سلطان الخير بالرحمه والمغفره
وان يُنيرعليه في قبره .. وان كانت له حسنات ان يثبتها ويزيدها بإحسانه إحسان
وإن كان مسيئا ان يتجاوز عنه يارب يارحمان يارحيم
اننا برحيلك ياوالدي لمحزنون .. وبفقدانك لدامعون .. وان الأيتام سايفقدون صاحب
الأيادي التي تمسح دموعهم وتلبي احتياجتهم ( قصص كثيره يروونها فقط من صبغت عليهم بحنانك ياوالدي .. رحمة الله عليك
..
اسمحولي مااقدر حتى اعبر او اتكلم لو ماكنت كاتبه لكم بعض من البارت قبل خبر
وفاة سيدي لمااستطعت ان اكمل
..
قبل لأحط البارت انتبهت لتعليق حلوتنا رعشة شوق فالتحريم .. بنات انا متأكده انكم تعرفون التفسير وحتى هي بعد بس اسمحولي اتكلم بإختصار
حبيبتي هالأيه نزلت في سورة النساء .. عندما كان في الجاهليه تخبطات .. وهالشي ابد
ماله علاقه بغطاء المره عن زوجها .. هو مو محرم على كثر مايكون عادات وتقاليد
اللي قلتيه غلط انا راجعت كثير تفسيرات لهالأيه ولعدة مشايخ كبار وعلماء ضليعين في الدين .. هاذي عادات وتقاليد لحد الحين رايجه عندنا نحن انا محدثتك فيه حريم اعرفهم
ومتدينات كثير بعد .. بس تستحي من زوجها .. وسبحان الله على ان لها عيال كبار
وصارت جده بس فيها حياء .. صحيح انا معك عاده مو حلوه واتوقع اندثرت بس
لازالت فيه وانا متأكده .. والتحريم يوم يكون في الأيه اي حرم الزواج منهن لانهن
حليلات ,, مااتكلمت الأيه عن منع التحريم في رؤية الوجهه لمحرمها
..اتفضلوا البارت مع اطيب الآمنيات بقراءه ممتعه
.
سهم المملكه
.
لإله إلا الله





( البارت الخامـــــــــــــ 15 ـس عشـــــر )




بيت سلطان \ الصاله

جلس سلطان بعد ماتغدى جنب جدته وهو يمدح الأكل – الله يعطيها العافيه خالتي عمشاء صدق لها نفس في الأكل

الجده – ايه الله يعطيها العافيه ,, انت علمني وش علومك

سلطان – بخير ياجده الحمدالله هه زي ماتشوفين من الدوام للبيت ومن البيت للدوام

الجده عرفت كيف تأخذ مسار الحديث لصالحها – وهالوحده مايبيلك حد يشارك فيها

سلطان عقد حواجبه – يشارك فيها ,, الحمدالله العم حمزه معي والله مايقصر الله يعطيه العافيه

الجده – لا انا ماهب قصدي حمزه انا قصدي مره
سلطان فهم على جدته – اييييييه

الجده ضربت على الوتر الحساس – وراك ماتعرس ياسلطان

سلطان عصب من هالسيره – كم مره قلت لكم ماابي اعرس وعلمتس بهالعلم انتي وجدي

الجده ترّكت على عصاها بهم – ولمتى بتحرم عمرك اللي كبرك وانا امك عياله يعدون حوله اما انت الله يصلح حالك

سلطان تأفف من هالسيره وسكت

الجده تحاول في شن الحملات عليه – بنات عمك كل وحده تقول الزين فيني وانا اخترت لك احلاهن واذربهن مع انهن كلهن زينات مير انا بغيت لك ..

سلطان قطع كلامها وهو حزين – دخيل عينتس ياجده ارحميني وفكيني من هالسيره اللي رصوا علي ابوي وامي لين اخذت ويوم اخذت اخذتلي وحده شتّت شملي بأهلي وليتها على هذه غير ذبحتهم بعد

الجده حزنت على حاله – ياولدي هاذا يومهم وهي الضعيفه مالها ذنب

سلطان بقهر وغبن وعصبيه – إلا الذنب ذنبها تدور المشاكل وفرقتني عن امي وابوي

الجده تحاول تقنعه – ياولدي خلاص وانا امك اللي راح راح وحنا عيال اليوم امك وابوك الله يرحمهم يعني لاحرمت عمرك العرس بيرجعون لك

سلطان بجمود – بس انا عايف العرس خلاص نفسي طابت منه معاد تهمني حرمه في هالدنيا

الجده تحاول تحرك مشاعره – ويرضيك تعصيني انا وجدك

سلطان – يايمه اسمحيلي انتم تبون لي الغصيبه

الجده اصدمته وبعصبيه – ايه اغصب عمرك واغد رجال لمتى وانت حارم عمرك العرس اصطلب خذيناك بالين مفاد فيك والله ياسلطان اني لازعل عليك والبنت خلاص خطبتها

سلطان انصدم من جدته ومن كلامها وماط عيونه – جده انتي من صدقتس تحكين

الجده اللي مفاد فيه غير ذا الحل – ايه من صدقي انا تعبت وانا هام قلبي عليك معاد فيني حيل عقب هالعمر اشيل همك

سلطان وقف وبعصبيه – ويومتس خطبتي وخلصتي وجايه تبلغيني بهالأمر وش هوله ( ناظر فيها وبحزن ) انتي طعنتيني
ياجده الله يسامحتس الله يسامحتس ( وطلع لفوق وهو معصب )

الجده اللي ناظرت فيه وهو يطلع الدرج وقالت في نفسها ( مفاد فيك إلا ذا الحل ياسلطان سامحني وانا امك بكره لامنك شفتها تبا تدعيلي )








في الدمام \ شقة صقر

انفجعت من اللي قاله .. قنبله – ايشششششششششششش

صقر بغموض – اللي سمعتيه

شيخه حست انه يستهبل عليها .. وبتعلمه درس كيف يستهبل عليها
بس فعلا يوم شافت ظهره .. والشظايا حست انه شي مخيف اللي صار له

بجمود وهي تناظر الجروح – ليش تعلمني

صقر اللي سكت فتره من الوقت وهو يطالعها يدور ردة فعل بس للأسف مالقى بعدين قال – مو انتي حرمتي وانتي اللي بتراعين ظهري لين يخف

شيخه انقهرت منه وحذفت الكريم عليه – انقلع انا ماني بخدامه لك

عطته ظهرها بتطلع .. وماشافت غير اللي واقف في وجهها وعيونه حمر تخوف ومسكها بكتوفها – وين رايحه

خافت من شكله وشكل عيونه بلعت ريقها .. وسكتت

صقر هزها – والله ان اللي دفعته عليتس لأحلله ريال ريال فاهمــــــــــــــــــــــــــــــه

شيخه اول مره يصب الخوف في قلبها لان شكله مخيف سكتت

عطاها ظهره وانسدح – بسرعه ادهني ظهري

هي اقتربت منه وخذت الكريم من جنبه ودهنت ظهره مع ان فيه جروح مفتوحه ماتعرف كيف يتحملها .. الأكيد انه إنسان قوي عشان يقدر يتحمل اللي فيه

شيخه بعصبيه – ليش مارحت المستشفى .. وبعدين مين اللي لاف على ظهرك

صقر وقف واخذ الشاش ولف على ظهره .. وهو ساكت وشكله مخيف جدا

بعد ماانتهى رجع ونام بتعب .. بدون مايفتح فمه بكلمه .. وهي انقهرت من تجاهله لها والأهم كلمته اللي قالها

في الليل \ بيت سعد بن فهيد

- كللللللللللللللللللللللللللللللووووش الله يوفقتس يابنتي

موضي اللي كانت خايفه من الخطوه اللي سوتها – يمه انا ان اا (وسكتت)

عمشاء – علامتس يابنتي وراتس

نزل فهيد وهو يضحك – كاني اسمع زغاريت من اللي اعرس
عمشاء وهي تضحك – وش ابشرك ابه وانا امك موضي وافقت على محمد

فهيد ابتسم وناظرها – صدق الف مبروك يامويض

موضي حاسه بخوف مصبوب في قلبها .. خذت ولدها نواف وطلعت لغرفتها .. تحت نظرات اخوها وامها المصدومه

بسرعه وصلت غرفتها وسكرت الباب عليها بقوه وتركت عليها واحضنت ولدها بقوه وقعدت تبكي .. نواف كان يناظرها وخايف على امه .. جلست على الارض واحضنته بقوه ونحيبها يزيد ناظرت في ولدها – آآآآآآآآآآآآآآآه يايمه آآآه اللي سويته مجبوره اسويه

ماحست إلا بولدها يمسح دمعتها وهو متأثر منها – ماما لاتبكين

ضمته بقوه لصدرها وانتحبت اكثر وفي داخلها ( بلاك ماتدري انا وش سويت ) وبكت وبكا ولدها معها




بيت ضاحي بن فهيد \ الصاله
نزل مع الدرج ومن شافته تهلل وجهها وضحكت وهي تشوفه
وقات تزغرت – كللللللللللللللللللللللللللوش

ومشت له تسلم عليه – مبروك مبروك وانا امك

محمد بجمود – ردوا عليكم

منيره – ايه ياامي توها عمشاء مسكرة مني

محمد – اها على خير إن شاءالله ( حس بإنتصار في قلبه .. إنتصار كان محروم منه من سنيييييييييييييييييييييييين )

عطى امه ظهره ومشى .. وسط إستغراب موضي اللي كانت مصدومه من ردة فعله .. ولاتصدق .. لو راجع الزمن سنين شو لوراء متأكده بتكون ردة فعله غير كذا ,, مو هو اللي بغى يموت يوم عرف موضي خذت واحد غيره !!








شقة نايف \ الصاله

وقعت على الأوراق اللي كان ضاحي جايبها .. وهي ترجف بخوف

بعد ماخلصت – باقي شي

ضاحي صدمها – ايه باقي موتك !!








في الملحق \ بيت ضاحي

جالسه وحاطه يدها على خدها .. قربت منها نوره – وضحى

رفعت راسها – هلا

نوره – علامتس

وضحى – اسكتي يانوره شايلة هم شيخه مادري وش بتهبب وتفضحنا تعرفينها اختس قوية وجهه

نوره – والله انتس صادقه والله اني افكر فيها عقب المسلسل اللي سوته البيرح وانا غاسلة يدي

جلست ساره عندهم وهي تأكل تفاح – وضحى ابي اغير مريولي

وضحى ناظرت فيها – ومريولتس وينه

ساره وهي تبلع القضمه اللي كلتها – لا وش رايتس اروح لمدرسة بنات الرياض وانا بذا المريول المخزبق

وضحى تطنز – لا احلفي ياشيخه ايه صح نسيت انتس صرتي من لهاي هاي ,, روحي عني في السعه ماني بفاضيتلتس
هند اللي كانت في المطبخ وتفتش في الثلاجه – وضحى ماعندنا اكل

وضحى وهي ماسكه راسها – كملت

نوره انقهرت من خواتها – وش اكله بعد ( ناظرت في ساره ) وانتي وش فيه مريولتس جديد وبعدين المدرسه قريب وتعطلون النصفيه

ساره انقهرت – لوالله تخيلوا بكره اروح بذا المريول المعفن حتى قماشه يجذب ريحة الشمس والله ان اكره ريحتي

نوره بعصبيه – اكرهي ريحتس وش خصنا روحي عنا في السعه وارقدي ترى وراتس مسراح من غبشه

ساره تخصرت – ياسلام وش دوركم انتم خوات في الاسم ماهب انتن الكبار وبعدين انا ماهرجتس انتي ياام لسان انا اهرج وضحى

نوره عصبت – والله وصـ

وضحى قاطعتهن وهي ماسكه راسها – بسسسسسسسسسسس

نوره وساره ناظرن فيها

وضحى وهي معصبه – انقلعن عن وجهي وانتي ( ناظرت هند) روحي لمطبخ بيت عمي وجيبي عشاء لتس ولاخواتس انا برقد ماابي شي راسي يوجعني

نوره ناظرت فيها بعطف – وضحى اقعدي لين تعشين

وضحى وهي ماسكه راسها وتمشي بإتجاه الغرفه – بس يانوره ماابي شي ابي بس ارتاح راسي احسه بينفجر





ضاحي صدمها – باقي موتــــــــــــك !!

مطت عيونها بصدمه – ايششششششششششش

ضاحي – لازم تموتين عشان العصابه تنساتس .. لازم تموتين وبندبرلتس حادث سياره .. عقب هالحادث بنقلتس مستشفى يزورون ورقة وفاه وبعدها تسافرين وبلحقتس عقبها

حست الهواء رجعلها عقب كلامه وبخوف – طيب وهالحادث بيصير قوي

ضاحي بجمود – لا بكره الصباح بجيب لتس هنا في الشقه محترف في سواقة السيارت وهو اللي بيعلمتس الخطه

نور هزت راسها بخوف – طيب

في بيت ضاحي \ المطبخ

دخلت هند وساره معها المطبخ اللي كان نايف جالس فيه يأكل ساره من شافته فز قلبها .. ناظرت فيه بعدين نزلت نظرها

ناظر فيهن بنص عين بعدين نزل راسه يأكل .. دخلت عليهم

منيره – هلا والله وينتسن فيه روحّت لتسن الشغاله تناديتسن للقهوه ولاجيتن

ساره – ايه جتنا بس وضحى راسها ماهب طيب واستحينا نجي

منيره – افا ياذا العلم الوضحي علامها وش تونس

ساره – والله مادري تقول راسها يوجعها

منيره – مدام نايف هنيا خليه يكشف عليها روحي ياهند ناديها

هند وساره تلعثمن ولا يدرن وش يقولن .. مستحيل وضحى توافق

ساره تداركت الموقف – لالالا ياعمه هي كلت بندول واكيد بيطيب دوخة راس بس

منيره – متأكدات

ساره – ايه

هند قطعت السالفه – اقول عمه بكره من بيودينا المدرسه

منيره – والله مادري وانا امتس نوره بتمرها ريم
هند – ايه بس انا وساره من بيودينا

سمعوا صوت فارس ينادي – يمه يمــــــــــــــه

منيره – تعال يمه انا في لمطبخ

دخل عليهم المطبخ وتفأجا في اللي فيه .. طنش هند – اقول يمه شفتي ساعتي الجديده ادور عليها مالقيتها

منيره – مانشدت الشغاله عنها

فارس عصب – والشغاله وش لها شغل يوم تدخل غرفتي انا كم مره قلت لكم لاتجيها

نايف اخيرا تكلم – شوي شوي اعصابك لاتنافخ على امي

فارس – مانافخت بس هالساعه غاليه بالحيل جايتني هديه من شخص غالي ( ويناظر هند بنص عين يقهرها )

نايف – والله عاد رح دور عليها زين لاتظلم احد

هند تناظره بنص عين وتضبط برقعها عليها وتعدل الشرشف .. همست لساره – اقول خلينا نمشي

منيره فأجاتهم – خلاص فارس اللي بيوديتسن لاتشلن هم

فارس تفأجا – اوديهن !! وين اوديهن له

منيره من دون ماتعطي البنات فرصه يعتذرن – توديهن لمدرستهن

فارس ابتسم – ابد غالي والطلب رخيص بنات عمي ان ماخدمتهن من يخدمهن

منيره استانست – والله اني قايلته انك طول عمرك شقردي
وانا امك

هند عصبت – بس

ساره جرتها – عمه حنا بنرقد .. بس مافيه عشاء

منيره – الا ياحبيباتي فيه برسل الشغاله لاخلص

ساره – خلاص الله يعطيتس العافيه ( جرت هند وطلعن )

تحت نظرات نايف اللي ترمقهن






في الشرقيه \ الصاله

جالسه ومقهوره الليل راح وهو حضرته راقد .. قامت تهز رجلها بقهر .. ماخلت شي في التلفزيون مافرته .. تذكرت خواتها بس كيف تكلمهن
خلاص اكلها قلبها عليهم .. تذكرت جوال صقر .. بتسرقه بدون مايحس .. مشت للغرفه بهدوء .. افتحت الباب وهي ظلام مره
وبارده بالحيل .. دخلت فيها تناظر يمين يسار وين مكان ثوبه
سمعت صوت انين بعيد ومو مسموع بالحيل .. بالكاد تسمعه استغربت الصوت .. قربت بتسمعه .. لان الصوت صادر من السرير .. مشت لين وقفت على راسه .. نزلت راسها سمعت صوت الانين صادر منه .. بدون قلب مشت وخلته .. اتجهت لثوبه .. حسته يتحرك بسرعه تحركت لايشوفها

بتطلع لين وصلت للباب سمعت صوته – تعالي

حست بقهر – نعم

صقر حاس بحراره تحرقه – هاتي البندول

انقهرت منه – البندول جنبك

لو مو تعبان وفيه حراره كان عرف يربيها – روحي هاتيلي اكل ماني بأكل وبطني فاضي

شيخه بقوة وجهه – الثلاجه فاضيه وراك ماعبيتها

صقر عصب – ماهب شغلي تحركي بسرعه
شيخه نافخت وهي طالعه – بعد مسخن وينافخ عفانا الله


اتجهت للمطبخ وهي بتنفجر غيض .. فتشت فيه مافيه شي .. شافت بيضه وحده بس في الثلاجه .. بسرعه خذتها وحركتها في الصاج فتره من الوقت وهي مقهور .. دورت خبز مافيه .. صامون مافيه .. حطته في صحن وملعقه وودته له
مدته عليه – خذ

صقر ناظر الصحن باللي فيه والملعقه – وش هذه

شيخه بعصبيه – وش هذه بعد هذه اللي موجود في ثلاجتك

صقر انقهر وسكت قام واقف واتجهه على ثوبه يلبسه – انتي اللي كلي هالصحن انا بروح اجيب عشاء

مطت عيونها على شكل ظهره اللي ينزف دم وفلينته اللي انقلبت حمراء

شيخه بريعه – ظهرك ينزف

لف فلينته وشاف الفلينه مليانه دم .. بسرعه طلعها .. وشاف الجروح الكبيره تنزف

شيخه بأمر – رح للمستشفى ترى انا ماني فاضيه ارعاك

صقر ناظرها بنص عين .. اخذ فوطته ودخل الحمام يتروش

اما شيخه اللي ناظرت السرير وشافته بقعه حمراء كبيره فيه انقهرت وقامت قشعته وهي تهاوش وتسبه

اما هو اللي داخل الحمام وتحت المروش .. ويسمع صوت هواشها انقهر من زواجها لها .. كيف رمى عمره في هالرميه هاذي توقع يوم يعلمها تصير مثل البنات اللي في الروايات لقاها قويه ولاهمها .. اخ بس ياشين الرومانسيه يوم حبيت اقولها وذليت عمري ضرب برجله على الأرض بقهر




اندق الباب عليها .. وهي اللي كانت قابعه في حزنها .. مسحت دموعها بسرعه – ادخل

فتح الباب وهو مبتسم ويوم شاف دموعها جمد .. دخل وعينه ماطاحت منها ..

اما هي بسرعه مسحت دموعها .. ماتبيه يحس فيها

- موضي افا تبسين

موضي – هلا ضاحي

ضاحي – امي هناك تحت فرحانه وماخلت حد فينا ماخبرته وتزغرت وانتي هنيا تبسين وانا عاد اقول بروح ابارك لموضي اللي خذت شيخ الريجيل

موضي استحت منه

ضاحي وهو يبتسم – عاد دموع فرح بنرضى بس حزن وغصه لا انسي

موضي بحزن – ابكي عيالي اكثر ماابكي نفسي

ضاحي – افا عاد ومحمد بيضم عيالتس وعيالتس عياله

موضي – بس مو مثل الأب حد

ضاحي – اكيد بس عاد محمد رجل يخاف الله وملتزم وهاذا اهم شي

موضي حست براحه من كلام ضاحي

ضاحي عشان يغير الأجواء عليها – بس يمكن ماأحضر عرسكم

موضي – ليه حددوا العرس

ضاحي – ايه الشهر الجاي

موضي انصدمت

ضاحي ناظر اخته وشاف عيونها سرحت وباين فيها الخوف

ضاحي – افا عاد ماسألتيني وين بروح !!

موضي ناظرت فيه – وين بتروح

ضاحي – بروح دوره برى المملكه ويمكن اطول شوي برى

موضي بحزن – وليه ماتبي تشاركني ,, وانت عارف ياضاحي انك اقرب واحد لي واكثر واحد بحتاجه

ضاحي حزن عليها – والله ياموضي غصب عني لو بيدي ماطلعت من هنا شبر

موضي هزت راسها بحزن

وضاحي حب راسها – لعاد تفكرين كثر التفكير يتعب وانا اخوتس ووكلي امرتس لله






الصباح \ بيت ضاحي بن فهيد

ازعج البيت بالبواري كل اللي فيه صحوا على الصوت

نايف طلع راسه مع شباكه وهو يصارخ وفي عيونه النوم واضح فيه – انت صاحي ولا مجنون ياحماااااااااااااااااار

فارس يضحك – رح غسل الكشه اللي طايره ,, انا انتظر بنات عمي بسرحهن للمدرسه

نايف – عساك التبن انت وإياهن ناقصكم انا تراني توني جاي وتعبان ابي ارقـــــــــــــد

طلعت ساره وهند وهن مستعجلات .. بسرعه ركبن وفارس يناظر نايف ويضحك .. ضرب بوري وهو يضحك .. ونايف طلع شبشبه اللي فيه وحذفه به

فارس شخط بالموتر بسرعه وهو يضحك .. وساره مبسوطه انها صبحت بشوفة وجهه الزين بنظرها




( إنتظروني بإذن الله تعالى .. يوم الخميس القادم )