بسم الله الرحمن الرحيم \ السلام عليكم ورحمة الله وبركاته
اللهم صلٍ وسلم وبارك على سيدنا وحبيبنا ونبينا محمد ( صلوا عليه وسلموا )
كيف الحآل جميعا \ اتمنى انكم بصحه وسلامه يارب
..
بخصوص البارت اللي راح بارت والله من قوته اني ماقدرت ارجع اقراه ابد .. ولو
قلت لكم من شدة قوته وتأثيره في نفسي .. اني ماراجعته عقب ماخلصته ابد
وخفت من ردة فعلكم .. بس الإغلبيه تقبل اللي صار .. والبعض مثل زيزفونتنا ابد
كانت عكس التيار .. لكن انا معك قلبا وقالبا هالشي يوجع ويأثر حيل .. ان فيه
كبير سن يطلب بيحتي والله بأبكي وأبيحه لان قلبي ضعيف .. مستحيل أشيل على
أحد .. والحمدالله هاذي نعمه من ربي سبحانه
بس بالنسبه لشخصية شيخه اللي قلت لكم سابقا اني ماأحب هالشخصيه أبد .. على
ان ورى شخصيتها قصه .. والإوراق تفتح رويدا رويدا
..
هالبارت أقدر أقول عنه حلو .. بس مش نفس خوفي ورجفتي في البارت اللي راح
ذاك البارت كان أقوى بارت أوجعني ووترني وخفت منه .. فيه اشياء تبشر بقادم
أفضل للجميع
..
وحق كل اللي يتسائلون عن نهاية الروايه .. صدقوني اني حزينه لفراقكم .. بس لكل شي نهايه حتى نحن لنا نهايه .. وبتكون نهايتها قريب .. وهاذا الشي اللي أقدر
أقوله وخصوصا انا بننتهي منها قبل رمضان وهاذا المهم




مع اطيب الإمنيات بقراءه ممتعه
.
سهم المملكه
.
لاإله إلا الله




( البارت السابع والستـ 67 ـون )

بيت ضاحي بن فهيد \ قبل الإتصال بساعات

مشت للملحق قبل تطلع من البيت وقبل يشيلون جثة الجد ضاحي

دقت الباب وهي تعكز بعصاها .. انفتح وطل بوجهها شيخه

شافت شيخه وجهه جدتها الحزين .. وعيونها اللي توضح كبر

الإلم اللي تشيله

مسكت يد شيخه وناظرت في يدها – بيحي جدتس اللي ودع

انلفع وجهه شيخه ونزلت راسها مصدومه وقالت بحزن – ودع

الجده رفعت راسها وناظرتها – ايه جدتس ودع

كملت – اعرف ماتقوين هالخبر .. واعرف ان كل اللي قلتيه قبل

يموت ورى قلبتس ( ضمتها شيخه وهي منلفع وجهها ) الموت حق

بس ماتمنيت تقولين اللي قلتيه له وهو يطلب البيحه منتسن

( وشيخه حاضنتها وساكته )

كملت الجده – انتي اقوى خواتس بس اقرب لقلبي .. ماهب شي

بس فيتس تصميم وعناد ابوتس .. توقعتس ماتسامحين لنتس

ذقتي الضيم وانا امتس .. بس انا ذقته اقوى منتس .. احرموني

ولدي وبناته .. جدتس همس في إذني قبل يموت يبيتس تبيحينه

قبل يوضع في التراب .. بيحيه وريحيه ( حست ان شيخه مالها

صوت )

فكتها وتفأجات في شكل الدموع اللي تصب من عينها – الله يبيحه

الله يبيحه ( ودخلت بسرعه داخل )

لحقتها جدتها وشافتها جلست على السرير وهي تبكي

ماتوقعته يموت .. ابد .. كل اللي قلته والحكي .. كان برد خاطر

انا شفته وهو يصارع الموت بس ماتوقعته يموت بهالسرعه

اوجعته مثل ماأوجع ابوي .. ابوي اللي عاش طول عمره يتمنى

يحب على يد ابوه وامه

قبل عشر سنين \ يوم العيد

لبست فستانها وزينت شعرها .. وهي صاحيه قبل خواتها .. بتروح

العيد مع ابوها وامها .. ووضحى تقعد في البيت مع خواتها

طلعت من الغرفه .. سمعت صوت في المطبخ .. بسرعه راحت

له وشافت امها تسوي القهوه والفطور

تركتها .. وراحت تدور على ابوها .. اتجهت لغرفتهم .. افتحت

الباب وانصدمت

يشم بشت رجال ويبكي .. ناظرت بصدمه .. ابوها رفع عينه وشافها

حط البشت جنبه ومسح دموعها وناداها – تعالي

اقربت من ابوها وهي تحس بوجعه ودموعه .. حبت راسه

وعينها على البشت

حس ابوها ان عينها على البشت اللي جنبه .. جلسها في الطرف

الثاني وناظر في البشت وعينه فيه – تبين تعرفين من له

هزت راسها بسرعه وقالت – ايه

إبتسم بألم وعينه عليه – بشت ابوي خذيته قبل اطلع من البيت

كان يلبسه كل عيد

حست بحرارة الدموع من كلام ابوها .. وعلى هالذكرى

طلعت البشت اللي كان مخبى في الدالوب حقها .. مدته على

جدتها وهي تبكي – هاذا بشته

الجده وضحى ماتتذكر هالبشت

شيخه وهي تمسح دموعها – هاذا بشته كان مع ابوي .. هاذا

اللي صبر ابوي على فرقاه .. ابوي كل عيد يطلع هالبشت يشمه

ويتذكر ابوه .. اللي بغى رضاه وهو معيي

نزلت دمعتها – ابوي يتذكر ابوه بهالبشت .. هاذا اللي اوجعني

ولا أنا معقوله ماأملك قلب يسامح .. دموع ابوي اوجعتني

ضمت جدتها وقالت – اشهدي اني بحته .. مثل ماأباح ابوي

بكن فتره من الوقت .. لين جتهن وضحى تقول – ضاحي يسأل

عن الجده بيوديهم البيت

فكن بعض وراحت الجده .. ووضحى قربت من شيخه اللي مسحت

دموعها وخبت البشت في دالوبها .. وطلعت في الصاله

ولقت خواتها فيه وكلهن يتسألن .. عن دموع الجده .. وعين

وضحى في شيخه اللي سرحانه وخاطرها حزين

لين مر الوقت وهم ساكتين .. جت بتفتح وضحى فمها .. دخلت

ساره وهي تبكي

قالت شيخه – وش فيتس

جلست ساره على الإرض وضربت فخوذها – مصيبه مصيبه

مطن عيونهنقربت منها نوره – وش مصيبته ساره

ساره بكت وهي اتمتم بكلام ماهب مفهوم

شيخه وقفتهامع كتفها – وش صاير تكلمي

ساره ضمت شيخه وقالت بإنهيار – جدي مات .. نايفمات

فهيد مات .. موضي طردتنا وسبتنا

مطن عيونهن .. ورفعتها شيخه عن حضنهاوناظرت فيها

وهي منصدمه – انتي وش تقولين

لكن طيحة ساره بين يدينها .. نسفت كل ابراج مخها

نزلت شيخه على الإرض وهي تضربها على خدها وصرخت

على هند – اركضي جيبي ماء ولا عطر بسرعه

ركضت هند وهي ترجف .. كل اللي يصير اليوم صدمه

جابت المويه وعطته شيخه

صبيت شوي من المويه في راحة كفي .. مسحت وجهها وشعرها

وأحاول أهزها .. وش اللي قالته .. وش المصيبه اللي نزلت على

رؤوسنا .. توه قلبي مابرى من سبب عدم بيحتي لجدي .. وكلامي

السم ولساني اللي بيهلكني .. تجيني ساره وتجيب المصايب معها

مافاد الماء صرخت في نوره – عطيني عطر بسررررعه

جابت نوره عطر من شنطتها .. بخيت على يدي وحطيته على

خشمها وانا مصدومه .. فتحت عينها .. وتنفست بعمق

وحطيت العطر جنبي وبكيت .. ايه بكيت .. احس ودي ابكي

لين ماتبقى في عيني دموع .. احس اني ماهب انا لالا ماهب

انا .. قمت عن خواتي بدون إي كلمه .. حتى ماأبي اسأل

وش صار .. لبست برقعي وجلالي وركضت لعمتي منيره

فتحت باب الصاله وتفأجات في اللي لابسين عبايتهن بيطلعن

وقفت في وجيهن – وش صاااااااااااااااااااااااير

بس انصدمت في صوت موضي وهي تقول بصراخ – لها عين

تجي .. صدق غاسلاتن وجيهن

ناظرت فيها بإستحقار .. وقربت من منيره – وش صاير

فأجتني منيره بدموعها وهي تقول – دعاء اختس على ولدي

صاب صاب ياشيخه ( ومسحت دموعها )

طلعن تاركيني في الصاله .. ألتفت لهن وقلت – بجي معتسن

قالت موضي ببرود – خلتس عند خواتس .. وأدعن على من تبن

بعد

انقهرت منها .. طلعت لها ومسكتها مع كتفها بقوه ووقفت في

وجهها – قطع الله ذا اللسان .. صدق قوية وجهه

مطت عينها بقهر واضح في عيونها – من اللي قبل شوي

تقول ماهب بايحتك وهو ينازع هاااااااااااااااااه

قالت شيخه تقهرها – ماهب انتي اللي عشتي عيشتنا .. ولا ذقتي

اللي ذقناه .. روحي يالدلوعه حلال اللي سواه فيتس عيسى وأمه

حسيت اني صبتها في الصميم .. ولفيت تاركتها

طلعت للملحق .. وشفت خواتي جالسات وساكتات .. طاحت عيني

في ساره – ليش جالسه ألبسي وروحي شوفيه

حسيت ان ساره ماهب مصدقه اني اقول ذا الحكي .. وقفت وهي

تقول – تكفين ياأختي عقب ماشفت العز .. لاترديني للمهانه

راحت وخلتنا وهي تقول – الله أنصفني منه .. وربي ردلي حقي

ناظرنا في بعض .. وتنفست بعمق






في المستشفى

مسح دموعه .. وهم يركبون جثة ابوه في سيارة الإسعاف ناقلينها

للمقبره .. مايدري كيف بيوقف .. ولا وايش يسوي .. ابوه مات

وحالة ولده خطيره قرب منه محمد وعكزه – يايبه قل لاحول

ولاقوة إلا بالله

وجهه الحزين وعيونه الغائره تعكس حزنه ردد وراه – لاحول

ولاقوة إلا بالله .. الله يثبتنا على الطاعه

انتقل الجميع على السيارات .. صقر ركب مع جثة جده ولابس

النظارات الشمسيه ومتلثم .. مصابهم كبير







الجانب الآخر من المستشفى

ركضوا المسعفين في المصابين .. وكانت نور من بينهم

دخلوها العمليات بسرعه .. وضعوا فيها الأجهزه الأزمه

تواجدت الشرطه في المستشفى .. وفتح تحقيق في القضيه








بيت سعد بن فهيد \ مكان العزاء

البيت اكتظ بالمعزين .. هاذا داخل .. وذا طالع

ام فهيد كل شوي يغمى عليها .. وكل ماصحت تذكرت

موت عمها وطيحة ولدها في المستشفى .. وصارخت

وصارخت لين ترد ويغمى عليها

ومنيره جالسه جنب الجده وتبكي بصمت .. والجده تهلل

وتسبح .. يوم صارت المفأجاه

ناظرت موضي ومطت عينها .. بدخول ام عيسى وبنتها مريم

مشن لين وصلن الجده وسلمن عليها

كانت عيونهن كسيره .. وام عيسى باين الكبر فيها كثير .. عزن

بسرعه وطلعن .. وموضي ابد ماهب مصدقه دخولهن وجيتهن






رفع جواله في إذنه بعد ماضغط قبول الإتصال – هلا عساف

الله يحسن عزاك .. مشكور وماتقصر

وششششششش .. وشلون ومتى .. اليوم الصبح .. زين زين

جايكم

ناظر فيه محمد – وش صار

ضاحي وهو يوقف – محمد سد مكاني بروح للمستشفى

محمد مط عينه – ليه وش صاير

ضاحي وهو مستعجل – لقوا نور لقوها





بعد اسبوع

انصدمت وهو يقول لها في السياره راجعين من بيت ضاحي

بن فهيد .. انهم بيمشون اليوم للدمام
حست الدموع امتلت في عيونها .. ومسكت يدينه ترتجيه

لكن هو مصمم على رايه







امسكت يدينها وهي تبكي ترجاها – تكفين يابنتي روحيله

ماعلى فمه غير اسمتس يناديتس

ساره اللي عيونها ممتليه دموع – وانا من يناظر في حالي

انا تعبت ياعمه .. تعبت منه .. ماابي غير اتطلق منه .. ارحميني

ترجتها بحال كسير – ابخليه يطلقتس ان صحى بالسلامه يابنتي

والله ان ماعلى فمه غير اسمتس ارحميه يابنتي الله يرحمتس

وارحميني انا وعمتس .. عشان خاطري يابنتي

ناظرت في شيخه اللي هزت راسها لها بالقبول .. ناظرت

في عين منيره وبخوف – تراتس وعدتيني

منيره بكت وهي تهز راسها – طيب طيب يابنتي

وقفت ساره .. ومشت لفوق .. وشافت في وجهها موضي اللي

كشرت .. ماكلمتها ولا شي .. اسحبت عبايتها وهي تناظر في

جناحه .. طفت اللمبات وهي تقول في خاطرها – إن شاءالله انها

اخر مره أدخلك يهالجناح

نزلت الدرجات .. وشافت الجو متوتر .. والنظرات ناريه بين

موضي وشيخه

شافت منيره جت ومعها عبايتها وحالها حزين .. وشكلها مبهذل

ناظرت في ساره – فارس بيجي هالحين ياخذنا

سكت .. ولبست عبايتي .. وعدلت برقعي .. سمعنا صوت البوري

طلعت وراها .. ركبت مع فارس

سمعتها تسأل – وشلونهم هالحين

فارس قال – فهيد مجبصين رجلينه الثنتين بس هو أحسن حال

من نايف .. اللي الضربه كلها من يمه

سكت .. عادي .. كان هاذا شعوري .. ابد ماشفقت عليه

ولا كسرني .. انا ماني مثل شيخه تفرح بالشماته .. بس

انا ربي خذلي حقي منه

وصلنا المستشفى

نزلنا ومشيت وراهم .. ركبت معهم الإصانصير .. واحس اني

توترت مدري ليش .. وفي داخلي ندم اول ماشفته وانا داخله

ورى امه وفارس .. شفت صقر يقرأ عنده قران

غريبه اعرف علاقته بصقر ماهب زينه .. كيف صقر يقرأ هالحين

عنده قران .. معقوله الجميع سامحه .. إلا انا

الإجهزه محاوطته في كل مكان في جسمه .. قربت مني أمه وهي

تناظرني – قربي يابنتي

ناظرت فيها ومسكت يدها – لاتخليني معه بلحالي ياعمه

حست فيني وشدت على يدي تطمني .. مشيت عنده لين قربت

منه .. طلع فارس هو وصقر

هزته عمتي – نايف نايف

تمتم بكلمات مافهمتها .. ناظرتني وهي تقول – ينادي عليتس

احس اني في مسلسل ولا .. هه سخرت من اللي يصير كله

نايف ينادي علي .. ويقول اسمي

وكأنه قرأ أفكاري – ساره

ناظرته وشفت عينه في عيني وباين فيه وجع – ساره

حسيت اني ارتبكت وسكت .. فجأه رجع غمض عيونه وسكت

ناظرتني عمتي – تكلمي قولي شي

وش أقول .. مدري .. خايفه .. بس الإكيد ان فوق كل قوي اللي

أقوى منه .. وهاذا حالي معه

تنفست بعمق .. جلست على الكرسي .. جلست عمتي جنبي

وقامت تبكي .. ناظرت فيها أشفقت على حالها .. وش تبيني أسوي

له أكثر من اللي سويته .. ناظرتها بحزن وتكتفت .. نقلت نظري

له وهو منسدح ولاحول له ولاقوه .. وباين الضعف في وجهه

الشاحب .. وجسمه اللي نحل .. ناظرت في شعره المبهذل

نقلت نظري في ذقنه اللي مو مرتب وهو يحب يهتم في ذقنه

كثير .. صدره العاري اللي أنقرفت منه .. وقفت ومسكت يدي

بقوه – دخيلتس لاتروحين ياساره

رجع يهمس – ساره ساره

ناظرت فيه .. وعمتي ركضت له وقالت – موجوده ياأبوي هنا

هنا ساره تبيها

رجع يهمس – ساره

شجعتني أقرب منه .. كل اللي أسويه شفقه لها هي بس أكثر

ولا هو مايستاهل مني الشفقه

همست عند إذنه بخوف وقلب ينبض بقوه – انا هنا ,, انا ساره

بكت أمه يوم يحاول يرفع يدينه .. ناظرت في يدينه .. اليد اللي

بطشت في يوم من الإيام علي .. اليد اللي كتفتني وخذت اللي تبي

مني .. اليد اللي نحرتني من الوريد للوريد .. اليد اللي كانت تصفع

وتأمر وتنهى .. هالحين رب العزه والجلال .. وضعها هامده

لاتقدر على الرفع .. رجع نزل يدينه يوم ماقوى عليها

وتمتم – ساره ساره

حسيت دمعتي نزلت .. هالحين بس أشفقت عليك يانايف

ماكنت ابد كذا .. يااااااااااااارب رحمتك

اوجعني حال عمتي .. اللي تبكي بوجع .. وشهاق نابع من أقصى

قلبها .. مسكت يدينها وعضدتها علي وطلعت فيها

شافنا فارس هو وصقر اللي واقفين عند باب العنايه .. قربوا

منا – شصار ماتحسن

هزت عمتي راسها وقالت – يتمتم بس بإسم ساره

ناظرني فارس بترجي – اجلسي عنده ياساره

حسيت اني انصدمت من قال هالكلمه .. ناظرتني عمتي

وصقر وفي عيونهم ترجي .. لالا مستحيل أقعد







ناظرها من ورى القزاز .. كل ماصحت اضربوها في الإبر

وهاذا حالها من إسبوع .. منهاره بالحيل

اربع ايام في الغيبوبه .. ومن فتحت عيونها وهي تقوم

وتصارخ منهاره كثير .. واضح ان اللي مرت فيه ماهب

قليل

ربت على كتفه الطبيب وهو بيدخل لها – ادع ربك انها

ماتنهار اليوم بعد .. بشوف الإستجابه عندها .. ان تقبلت

وحست في الناس من عيني اني لإخليك تدخل لها .. وهي

اساسا من تقوم تصارخ وتناديك .. وتصيح منهاره

فيه شي مخوفها .. الله يحل القضيه على خير

ضاحي – إن شاءالله خير .. إن شاءالله








بيت ضاحي بن فهيد

دخلت منيره وصقر وفارس البيت .. تلقتهم هند وهي تدور

على ساره – وين ساره

فارس – جلست مع نايف بترافق معه

شيخه وقفت وهي تقول – كيف وافقت ,, من صدقكم خليتوها

صقر ناظر فيها .. بعدين سكت وجلس

منيره وهي تدعي لها – الله يسعدها ويوفقها يارب وين مالقت

بوجهها ياكريم البيت

فارس جلس عند صقر وناظر في امه – وينه ابوي

منيره وهي تجلس معهم – راح للإبل .. ماصدقت يوم راح

من مات عمي وصار فينا اللي صار وهو جالس .. اليوم شرت

عليه وتوحى فيني وزهم على ابو فهيد وراحوا

شيخه جلست عندهم – والله ماهب حاله موضي من صار في

رجلها اللي صار وهم معيين عليها تجينا

خزها صقر – المره بيتها بيت زوجها

انقهرت شيخه ووقفت – ماهب كل شي عندكم إجباري

مشت طالعه .. ووقف وطلع وراها

ناظرهم فارس وهو يلف راسه يمين ويسار – إبتدى حرب

البسوس الله يعين

هند بقهر ناظرت في منيره – ياعمه مايصير .. من صار اللي

صار وهو ماهب راضي يريح شيخه .. كأنها السبب في موت

جدي

منيره وهي تمسك راسها تهمزه – والله يابنتي ان ماعاد فيني

حيل .. عيال عمتس كلهم أذوني

ناظرها فارس – افاااااااا حتى انا يمه ,, هاذا وانا اللي جبت

النتيجه اللي ترفع راستس وتفرحتس .. وتخرجت

نزلت دمعة منيره – فرحتي يوم يقوم أخوك بالسلامه

سكت فارس ثم تمتم – الله يقومه بالسلامه






بيت سعد بن فهيد \ الصاله

تعبت من مواجب الحريم .. وإستقبالهن .. هاذي اللي داخله

وهاذي اللي طالعه .. وبطنها اللي بدأ في البروز

جلست وهي تحس انها هلكانه .. في الصبح والعصر تجلس

مع الحريم .. وبعد المغرب تزور فهيد .. وان مازرته قلبت

عمشاء عليها البيت

حست فيها جدتها – روحي يابنتي ارتاحي

ناظرنها الحريم شفقانات عليها

عمشاء – وش روحته .. هي توها جت .. اجلسي اجلسي

ناظرت فيها وسكتت .. تعرف انها لو قامت ماهب مخليه فضيحه

ماهب قايلتها فيها

دخلت عليهم ريم البيت .. وسلمت على الحريم

قالت عمشاء – يابعد قلبي روحي ارتاحي وانا أمتس روحي

ريم اللي كانت واقفه قالت – ايوالله تعبت مع اني من السياره

لكم بس الوحام ذبحني

حست بالقهر وضحى وسكتت .. راحت ريم

بعد فتره عقب ماطلعن الحريم

وقفت وضحى بتطلع لفوق .. وقفتها عمشاء – على وين

وقفت وضحى – ليه تبين شي بعد

عمشاء – فيه ملابس لفهيد حاطتها الشغاله ورى الحوش

روحي جيبيها .. وأكويها بنأخذها معنا لفهيد

وضحى بتعب – والشغاله وين

عمشاء وهي تخليها – الشغاله عندها ميتين ألف شغله ماهب

فاضيه

انزلت بتعب ومشت للحوش .. لمت ملابسه اللي موجوده

وجمعتها وطلعت فيها لغرفة الكوي

شغلت المكوى وقامت تكوي .. وهي مقهوره من اللي تسويه لها

ذا العجوز

سمعت صوته – وقفـــــــي

كملت طريقها .. ومسك يدها ووقف في وجهها – ليش

تحبين تعاندين

ناظرت فيه – لاعناد ولاشي ,, خلاص انا تعبت .. كل شوي

توقفني وتمشكل معي .. معاد قدرت على مشاكلك ياصقر

ناظر فيها – كله بسبب عقدتس ولا ماهب ذا حالنا

ناظرت فيه بإستغراب – عقدتس

فجرها – ايه ابو وجهه مشوه

حست الإرض افترت حولها .. وش عرفه بالقصه .. معقوله

تسويها وضحى وتعلمه

ناظر فيها يتفحصها – ليش سكتي

قالت بتوتر – ممم ماعندي شي اق اقوله

صقر – وش قصته

حست انها بتطيح – قل للي علمك .. يعلمك قصته

صقر حجرلها – بس ابي اسمعها منتس انتي

حست انها بتبكي .. ردها للشي اللي تبي تمحيه من ذاكرتها

البيت اللي دخلته معه محروق .. سحبها سحب ووقفها في

وسط صالته صرخ عليها – انتي اللي حرقتي البيت انتي اللي

حرقتي امي

ماتدري ليش يقول اللي يقوله .. كيف حرقت البيت .. وكيف

حرقت امه .. هاذا أكيد مجنون

مسك يدها .. ومشاها غصب .. وهو يشتم ويسب ويجرح

تمسكت في كتف صقر وهي تبكي – ليش عرفت ليش ليش

انصدم صقر من كل اللي سمعه .. حس انه مربط فكها

من حضنه – انتي متأكده باللي تقولينه

شيخه وهي تبكي – ماأبي ارجع أعيش اللي عشته ياصقر دخيلك

دخيلك





بيت سلطان

حست بالقهر .. وهي ترضخ للإمر الواقع .. غصب طيب

لازم تمشي معه

جمعت اغراضها واغراضه ودموعها تنزل

دخل عليها وناظر فيها – يالله اخلصي

مسحت دموعها بقهر وناظرت فيه – بتتصرف في هالبيت ولا أترك

اللي ماهب لازم

أشفق عليها – لا اتركي اللي ماهب لازم .. في الإجازات بنجي

هنا إن شاءالله

حس بالفرحه وهو يقول لها هالكلام







( إنتظروني يوم الخميس القادم .. بإذنه تعالى )