بسم الله الرحمن الرحيم .. السلام عليكم ورحمة الله وبركاته
والحمدالله والصلاة على أشرف خلق الله محمد صلى الله عليه وسلم ( صلوا عليه )
كيف حالكم جميع \ عسى حبايبي في سعاده ياكريم
كأني أخذه عنكم شهور مو أسبوع .. في هالمره ردود البعض قست علي شوي
لكن القسوه ترد للواقع .. وتعلم السيطره على الاخطاء شكرن من القلب للي
قسوا علي قبل اللي مدحوا قلمي
..
بارت اليوم اتوضح كل شي فيه .. قصص وأوراق كشفت .. ماهي نتائج فتح هالإوراق بنعرفه في الموعد القادم يوم الاحد بإذنه تعالى
..
بالنسبه حق اللي معارضين نزول الروايه وقت الإختبارات .. خلاص انحسم الموضوع
وبنكمل .. لين تنتهي الروايه ترانا بنرد نفس قبل مرتين في الإسبوع
واليوم نزلت الروايه بدري .. وجبتها لكم من شوقي فيكم .. اسمحولي على تأخيري
عنكم.. والحمدالله قدرنا نحسم الوقت وأخلص الشغله اللي عفستني
ومشكورين على صبركم علي وتفهمكم .. لآعدمتكم يارب




مع اطيب الإمنيات بقراءه ممتعه
.
سهم المملكه
.
لاإله إلا الله



( البارت السادس والستـ 66 ـون )



بيت ضاحي بن فهيد \ غرفة الجد

احتسبت الإنفاس وهم مجتمعين .. الكل متجهه عيونه للجد فهيد

الكل وقف يناظر فيه .. الكل أجتمع حتى فهيد متواجد

كل أحفاده واقفين عند راسه

فتح عينه وهو يجر النفس والصوت – وين بنات ناصر ؟؟

تكتفت شيخه وهي فرحانه باللي يصير فيه .. قضالها رب

العآلمين منه

الجميع بكا بدون إستثناء .. إلا بنات ناصر اللي واقفات

ويناظرن في بعض .. ويستمدن قوتهن من شيخه اللي مركزه

عيونها فيه وتتشمت

الجده وهي تجلس جنبه على السرير ومسكت يده – الله يسامحك

على اللي سويته في ناصر وفرقاه عنا

غمض عيونه بتعب وفتحها – وين بنات ناصر

الجده ناظرت فيهن – هنا موجودات

الجد – خليهن يقربن

ناظرت وضحى في شيخه .. اللي واقفه والجميع يناظر فيها

قربن خواتها وهي واقفه مكانها وتناظر فيه

مسك يد وضحى اللي كانت عند راسه ودمع – بيحنّي ابوتسن

يناظرني حزين .. بيحني

قرب صقر من شيخه وهمس بقهر – اقربي

ناظرت فيه بنص عين ومتكتفه .. مستحيل أحد يزحزها .. النار

اللي شابه في صدرها ماحد يقدر يطفيها

ناظرت وضحى خواتها وهي تبكي كسره وضعفه – الله يسـ

قاطعتها شيخه وهي تصرخ – الله لايسااااااااااااامحه

الكل ناظر فيها .. لهدرجه كره .. حقد .. وبغض

عض شفايفه صقر ومسكها بكتفها وصرخ – انتي مجنونه

ولا صاحيــــــــــــــــــــه

انفجرت كبت ايام قضتها وهالرجل الطايح يأمر وينهى عليهن

انفجرت وقذفه لهن ولإبوهن وأمهن جرحه مانبرى .. وكسره

مايطيب .. انفجرت وهي تسمع صدى صوته ( هاذا إذا كنتن

بناته ) – مستحيل اسامحه .. الله لايبيحه لاحي ولا ميت

مانسيت دموع ابوي وهو يذكر امه اللي حارمه منها .. مانسيت

دموع خواتي ولاهمي وهو يربطنا في ذا العائله اللي ولا واحد

فيكم ينقال عنـ

هزها صقر يذكرها المكان واللي مجتمعين حولها صرخ – بـــــــس

بـــــــــــــــــــــس كاااااااااااااااااااااافي

خواتها انصدمن منها .. قربت منها هند وصرخت في

صقر – فكـــهااااا ماهب انت اللي تحكمناااااااااااا

ناظر صقر في شيخه وناظروا بعض بتحدي .. ونظرات

لو تقتل يمديهم اقتلوا بعض

قال ابو محمد ووجهه منلفع وهو يشوف وجهه ابوه .. وعيونه

اللي غمضها .. ودمعه اللي نزل – بــــــــــــــس فكها ياصقـــــــــــر

صقر انقهر من ابوه .. يحبها صح .. بس مايسكت عن لسانها

المؤذي .. لسانها يوجع في الحكي

الجده بكت ومسكت طرف جلالها تمسح دموعها .. تزلزت كلمة

شيخه في قلبها .. وهي تقول يبكي وانت حارمه شوف أمه

ناصر اللي كان قطعه من قلبها .. ماتنساه لو الموت يطويه

ويطويها

همس الجد – اتركـ ( ثم كح بقوه ) .. الكل فزعله وهي واقفه

كيف خواتها يسامحنه بسهوله .. قالهن كلمه وهو على فراش

المرض يسامحنه

قربت منها وضحى وهي منلفع وجهها – شيخه ارحمي

شيخه تناظرهم وهم فوق راسه .. وتناظرهم بفرح وشماته

قاس ضغطه نايف وهو يقول – جدي دخيلك كمل شوي

الجد مسك يده ودموعه تنزل – نايف قرب بنات ناصر مني انا

بموت وهن ماباحني

صرخت شيخه بعصبيه – ماأبيحك لو تنطبق السماء على

الإرض .. يوم في قوتك بطشت علينا .. يوم شفت الموت

تبي بيحتّنا .. الله لايرحمك مثل ماشتتنا سنين سنين حنا

وأبوي حرمتنا محبة هالناس .. وكرهتنا فيهم .. كيف أبيحك

وأنت نزلت دمع ابوي .. كيف ابيحك وانت غربتنا عن اصلنا

وفصلنا .. كيف ابيحك وانت حكمت بأمرك تزوج كل وحده على

كيفك وهواك

مستحيل قلبي يصفى لك لو انوضعـ

مادرت غير بالصفعه اللي لفت وجهها .. ناظرت في اللي صفعها

بقهر وصفعته .. ناظرها صقر .. والكل شهق

عيونها حمرت – مد يدك علي مره ثانيه ماتعسفني لو الموت

يعسفني .. وان كاني عشانك جريتني بشعري وجبتني هنا غصب

ترى جيت اتشمت في جــــــــــــــــــــــدك ( وأشرت عليه )

الجميع مط عينه .. ناظرت فيهم بعصبيه – فيه خير اللي يجبرنا

على شي مانبيه .. الله اللي طم سبع ورفع سبع ان مانقعد لكم

بهالبيت دقيقه

كح الجد بقوه .. ثم قال – اتركوهـــــــــــــــــــــــــــــا

الكل سكت .. والكل ينقل نظراته بين شيخه وبين الجد

أشر بيده يناديها قالت بقوه – لا .. وش تبي

الجد إبتسم بألم – وش اللي يرضيتس ( ثم كح بقوه )

ألتفتت شيخه بقهر .. وعينه تناظر اللي حولها واحد واحد

ثم قالت – ردونا الدوادمي

الجد بسرعه وقاطعها – لااااااا ( ثم كح .. وحس انه بيموت من

قوة الكحه ) .. ناظرته شيخه بقهر ثم طلعت بسرعه .. وصقر

يغلي قهر

بسرعه لحقها وركضت وراه وضحى وهي منصدمه في اللي صار

تكلمت ساره وهي تبكي .. حست ان كل شي صار مفتوح

وان شيخه فتحتلها باب تقدر فيه تهرب من نايف اللي رفض

يطلقها ناظرت في جدها – انا محللتك بس على شرط !!

الجد اللي كان مغمض عيونه ويسحب هواء فتحها بألم

وهو يمسك قلبه – وش تبين يابنتي

ناظرها نايف بخوف .. قلبه يدق بقوه .. لايكون تسويها

وتعلم سبب زواجهم

تكلمت ساره وعينها في عين نايف – انا أقدر اروح للمحكمه

مره ثانيه واسوي قضية خلع ( مط نايف عينه )

بس انا ماأبي فضيحتكم تكبر .. اقتصلي حقي من اللي

واقف قدامك وطلقني منه

قله يطلقني لاني أكرهه أكرررررررررهه وأنجبرت اني

أخذه

الجميع ناظرها .. مصدومين من كلامها عنه .. اما هو نزل

راسه ورفعه يوم قال جده – طلقها

انصدم ورفع عينه في عينها .. وهي وقفت وتكتفت تحتريه

يطلقها

قال بقهر وعصبيه – لاااا لااااااا مستحيل اطلقها مستحيييييييييل

وبسرعه طلع وهو يصارخ ويسب .. لحقه فهيد

ويالله ركب معه السياره اللي شخط فيها وهو يصارخ ومعصب

ليييييييييييش في هالوقت بالذاااااااااااااااااااات حبها .. وهي تكرهه

ربه اقتضالها منه .. ضرب الدريكسون كم مره وهو يصارخ

ويهاوش وداعس على البنزين





وضحى وقفت في وجهه قريب من الملحق وهي تلهث – وقف

صقر اسمعني

صقر اللي ماهب راضي يسمع احد – ابعدي عن وجهـــــــي

مشى وهو معطيها ظهره .. متجهه للملحق

وضحى فجرتها – شيخه لها ماضـــــــــــــــــــــي مرير !!

وقف وناظرها وهو ماط عينه







حست بشي يهزها .. شي يبيها تصحى لاتموت .. وهي مغمضه

عيونها تلمست دمها اللي على بلل كتفها .. لان زجاج الدريشه

شقها .. حست بطعم الموت وهي تتطعم الدم بدأ يطلع من فمها

كحت وكحت .. وهي تسمع أنين خافت حولها .. بسرعه

فتحت عيونها بخوف .. ألتفتت على اللي حولها .. بعضهم

صامت صمت عجيب .. وربما انه الموت سحب ارواحهم

وبعضهم تسمع أنين يخرج منه

كانت السياره منقلبه على جنب .. وهي عند الباب الخلفي

اللي حاولت تدزه بصعوبه .. وتسمع واحد يهمس – وقفي

ويبدو انه مستصعب مسكها .. ألتفتت ودمها ينزف .. شافته

كبيرهم واللي يعطيهم أوامر

شافته تسحب بيمسكها .. دزت الباب برجلها بكل قوتها

وأخيرا انفتح .. بسرعه طلعت وهي ماسكه كتفها .. وصوت

الزعيم يناديها – تعاااااااااااااااااااااااااااالي

بدت تمشي بسرعه وتحاول ماتلتفت للخلف .. ماتبي شي يثني

عزمها .. مستحيل ترجع تعيش اللحظات الصعبه اللي كانت

عاشتها .. ركضت للشارع اللي نادرا ماتمر سياره فيه .. ومشت

ومشت وهي تحس انها بتهلك وتطيح في إي لحظه وتموت

الموت اللي تشوفه كل لحظه .. الإلم .. الجوع .. الكسر

العطش .. شفايفها الزرق .. جلست على طرف الشارع

وحطت يدها على راسها تبكي .. بتموت وهي ماعلمت ضاحي

وش حقيقتها .. وهاذا كان أكبر دافع يدفعها انها تقاوم كل

اللي يصير فيها







مط عينه وهو يعيد كلمتها – ماضي مرير !!

حست بالعرق والخوف وهي ترجع للزمن اللي عاشت فيه

شيخه أسوء ايام عمرها – ايه ماضي مرير .. شيخه في

صغرها بنت كلها قوه وحياه .. كانت لنا الإخ اللي نتعكز عليه

كانت تعيش عمر أكبر من عمرها .. مثل ماتشوف انا حالي
مايسمح ابد أعيش هالدور

جر الإنفاس ووقف وشد انتباهه كلامها

كملت وضحى وهي تنزل راسها – كانت شيخه كلها حياه وروح

كانت الفراشه اللي ماتهاب أحد .. والكل يقدرها ويحترمها رغم

صغر سنها .. والكل يشهد بأخلاقها وانها ماتلتفت للتحرشات

اللي تجيها من شباب حارتنا .. حتى لدرجة انها تكفخ لها واحد

تفلق واحد عادي عندها .. أهم شي تجينا منتصره وجايبه اللي

طلبناه منها .. بس إذا جاء الليل كانت تبكي وماحد يسمع بكاها

غيري .. وترتجف وتعرق وهي في فراشها

كنت اسمع ونينها وخوفها .. بس كل هاذا يختفي في الصبح

ويتبدل حالها

في ذاك اليوم اللي دخلت علينا وهي تبكي .. وكانت هذاك اليوم

اشوف شيخه تبكي في النهار .. على كثر مانفلقت وانضربت

وراحت ورى الحوش تبكي .. رحت لها وقربت منها

ونزلت عندها – شيخه وش فيتس

رفعت راسها وكأنها مصدومه انها شافتني وقفت ومسحت

دموعها وتلفتت حولها – هاه هاه لالالا مافيه شي

ركضت داخل .. ومن هذاك اليوم انقلبت شيخه .. لين جانا

في يوم إتصال ومن حسن الحظ ان ابوي كان فيه

شد انتباهه صقر للسالفه – ايه كملي

نفثت الهواء اللي في صدرها – كانت الشرطه

ضحك بسخريه – ثرها تدل هالاماكن من صغرها

ناظرت فيه وضحى – صقر

صقر – زين زين كملي

حس ان صوت وضحى تغير وعيونها ترقرقت دموع وهي

تسترجع هالذكرى – راح ابوي وامي للشرطه وجلست انا

عند خواتي بس برد لك العلم من لسان شيخه نفسها وهي

تحكيلي

تقول – دخل ابوي وامي الشرطه والضابط كان يسقيني مويه

ويبلل وجهي .. كنت شايفه الموت لين شفته

شخص جثه .. قبيح المنظر والهئيه .. عند عينه شلخ

مشوه عينه وكل ماشافني اعترض

طريقي ويقول كلام يخوفني – انتي اللي ذبحتي امي هي انتي

تقول كل ماراحت للدكان شافت ذاك الشخص وهي تسكت

خوف وراعي الدكان اللي كان من نفس قرية امي يساعدها

ويخبيها مرات .. ومرات تطيح في وجهه

مسك مقبض الباب بقوه وهو خايف ومرتاع – هد هد الله يخليك

هد بتأخذ ارواحنا انت

لاكن لاحياة لمن تنادي ولا كأنه يسمعه

حس فهيد ان الموت قريب منهم وصرخ – ناااااااااااااااااااايف

والسياره بدت تلف وتدور .. وفهيد دموعها نزلت وهو ماسك

مقابض السياره بكل قوته ويصارخ .. لين استقرت السياره

في عمود الكهرب اللي قدامهم .. وفجأه صوت فهيد اختفى

والسياره وقفت







نزلت دمعة وضحى وهي تحكي – تقول في ذاك اليوم راجعه

في الخبز اللي نبيه .. وصدفته في الشارع اللي خلف الدكان

تقول تخبيت عند السياره بس هو شافها .. وقرب منها

اقترب منها وهي تدس وجهها بيدينها بقوه .. تحتمي بيدينها

عنه .. لين مسكها ووقفها وهي تصرخ وتبكي

قاطعها صقر وباين في الخوف – وعمي وينه عنها

انفثت الهواء – ابوي في هالحزه راقد لانه كان يحرج على الغنم

يبيع ويشري .. ويطلع من البيت قدم الضو .. ويوم يرد هلكان

مابه نفس

كملت وضحى وهي تزفر – شيخه في ذيك اللحظه .. شافت الموت

يوم مسكها وهو يجرها ويخنقها ويضربها ويمطر عليها أقسى

كلام ممكن تسمعه وتتهم بقتل حرمه ماتعرفها

وضربها وضربها وضربها لين هلكت .. وشافهم شخص وبلغ

الشرطه اللي اسرعت لمكانهم وحاصرته .. وخذوها للشرطه

وهي في حال مزري ..وهناك دقوا على بيتنا

من ذاك اليوم عاشت شيخه على الإدويه النفسيه .. كانت تهذي

وتحلم وتصارخ أخر الليل .. وكانت تخاف من كل واحد يقربها

إلا ابوي بس

قبل عشرين سنه

تبكي وتبكي وتشاهق وتضم ابوها – يجيني يجيني يبي يخنقني

مسكها ناصر ومسح عليها ونفث ويحاول يهديها .. خلاص يابنتي

تعوذي من إبليس .. مايقدر يجيك

قربت وضحى اللي كانت في حدود العشر سنين ومسكت يدها

وبكت – خلاصـ

صرخت شيخه وهي تروح ورى ظهرابوها – ابعدها ابعدها

عني ابعدي ابعـــــــــــدي ( وكانت تصارخ لين ابتعدت عنها )

وأخذ زاويه بعيده في الغرفه وارقد .. وخواتي جنبي

اما هي كل ليله ترقد في حضن ابوي اللي تعب كثير معها

كانت تخاف مني ومن امي ومن خواتي الصغار .. مدري وش

يتخيلها عنا .. بس ابغضت الجميع إلا ابوي كانت متعلقه فيه

وبقوه .. لين اجبرت ابوي تترك المدرسه وتلازمه .. وبكذا

اصعبت مهمة ابوي .. اللي صارت تلازمه في حراج الغنم

وتعلمت اصول المهنه .. في ذيك الفتره كان ابوي يبث ويزرع

فيها الإعتماد على النفس .. كانت ماتنام إلا على كتفه .. وهو

يقرأ عليها وينفث .. في الليل تخاف وتصرخ وتبكي .. وفي

النهار تتظاهر بالقوه .. وفهمت المهنه

اتذكر ذاك اليوم اللي داخل فيه ابوي علينا وفي يده كيس .. وهي

مبسوطه وفرحانه

سألت ام شيخه – وش في الكيس

ناصر وهو يناظر بنته ومبسوط فيها – عبايه شيخه بتلبس عبايه

فتحت شيخه الكيس ولبست العبايه .. وصارت تستعرض فيها

عندنا ( إبتسمت على جنب وضحى وهي تتذكر حالها ذاك الوقت)

كملت وهي تدمع – تغيرت شخصية شيخه .. انقلبت قلب وصارت

تحمل قوه .. ولما كبرت شوي فتحلها ابوي بسطه كانت تمسكها

ابوي يحرج وهي تبسط .. لين تغيرت شيخه وصرنا نهابها ونخاف

منها .. تحملت كل المسؤوليه .. بس لازال خوفها من ذاك الرجل

مسيطر عليها لين هالحين

عقد حواجبه صقر – ليه شافته عقب كذا

زل لسان وضحى وتلكلكت – هاه لالا معاد شافته ( قطعت السالفه)

اصبر عليها صقر .. شيخه تحبك بس ماتوثق بأحد ابد .. تخاف

من الضعف والذل .. تلبس قناع ماهب لها .. شيخه مريضه

وتتظاهر بالقوه .. هاذا الشي اللي بس قدرت اصارحك فيه

طاحت دمعتها – شيخه إنسانه تحمل طيب وبياض داخلها

دخيلك لاتقسى عليها

فرك وجهه كم مره .. ومسح على شعره .. لف ظهره

وناظر الملحق اللي مسكر بابه .. ناظر وضحى ثم راح

تاركها ووجهه منلفع

نزلت وضحى على الإرض وهي تبكي .. سامحني ياصقر

ماأقدر أعلمك ذاك المجنون وش سوى فيها بعد أكثر







حس ان الروح تغرغرت .. والعيون شطحت .. مسك يد وضحى

يودع هالدنيا .. حس لسانه ثقل .. والنفس اختنق

مسكه ابو فهيد – تشهد ياأبوي تشهد

الجميع ناظره والكل بكاه .. ماقدر يقنع بنات ناصر يبحنه

بيودع هالدنيا وهو ماتذكر في يوم انه حسسهن بحنانه وبمكان

ابوهن اللي يشيله في قلبه

سحب يد وضحى وأجبرها تنزل راسه لفمه .. تمتم كلمات

ثم نزلت دمعته وعيونه شاطحه وقال بصعوبه – اشـ هد ان لاإلـ

( واختنق صوته ) كح وكح وكح ثم قال – وان محمـ د رسول الله

غرغرت روحه في هاللحظات .. ويده ماسكه يد رفيقة دربه وعمره

وضحى اللي كانت تردد ( ان الموت حق ,, ان الموت حق )

هدت انفاسه .. وانقبضت روحه قال تعالى ( كل من عليها فآن

ويبقى وجهه ربك ذو الجلال والإكرام )