بسم الله الرحمن الرحيم .. السلام عليكم ورحمة الله وبركاته
وصلى الله وسلم وبارك على سيدي ونبيي وحبيبي محمد عليه أفضل الصلاة والتسليم
( صلوا عليه )
اخباركم \ يارب ان الجميع بصحه وبخير وعآفيه
..
كنت اقول ان هالبارت بداية الثورات .. وثورتنا اللي بهالبارت استاقيناها من ثورة
فتومه وزيزفونه ( الله يحفظهم ) .. ماهب أحسن من شيخه .. اللي بهالبارت
طربقتها على راس الجد قاسي
بالنسبه حق البارت الجاي اعذروني بتأخر فيه .. بس لظروف عائليه ساتأخر قليلا
وموعدنا السبت القادم إن شاءالله
..
عندي كلمه ( برى النــــص )
يؤسفني جدآ مايحدث من مؤامرات تحاك ضد بلدي .. البلد الذي سايظل شامخا
وعلم التوحيد مرفرفآ به عاليا .. لن ولن ولن يستطيعوا ان يهزوا منك يابلدي شعره وسعودي واحد يتنفس الهواء .. ساتظلين يابلدي الدم والروح في جسدي
وسايبقى الحرمين الشريفين رمزآ وفخرآ لنا .. شآء من شآء وابى من ابى .. ولتبقوا
يآحثاله تلوحوا بإلسانتكم النتنه ولن تهزوا من هالوطن شعره



مع اطيب الإمنيات بقراءه ممتعه
.
سهم المملكه
.
لإله إلا الله



( البارت الواحد والستـ 61 ـون )


اليوم الثاني

صحيت الصبح .. والإفكار تشتعل براسي .. احس اني اقدم على شي

قوي .. ماني خايفه .. بس خايفه على مستقبل وحياة خواتي

حسيت بالكتمه .. وقمت من السرير .. ناظرت في وضحى كيف

حاضنه بطنها .. أحس دمعتي بتسيل وفي لحظه بهون على اللي

بسويه .. ماأبي أشوف أكثر واتعذب أكثر .. خواتي كاسراتني

بغيت أجدد أفكاري .. لبست جلالي وبرقعي .. وطلعت من

الملحق .. مشيت واحس ان الوقت بدري .. تو الناس صلوا الصبح

جلست جنب النخله الطويله .. واحس اني ماني قادره ارسي

على شي .. هل اسامح وانسى ونعيش بذل وضعف .. ام أخذ

حقي وحق كل خواتي .. إبتداء من حياتي معه وعذابي .. إلى

اللي صار في ساره وكسرنا .. آآآآآآآآه ياساره تحسبين اني

ماأحس فيتس ولا .. سمعت صوت طلعني من أفكاري .. صوت

حد يبكي .. صوت بكا بحسره .. مين اللي صاحي هالصبح

ويبكي .. مشيت بخطوات مو مسموعه .. لين وصلت لمكان

الصوت .. صدمه اللي شفته







في الشقه

كاسته بيده وتوه ماتعمق باللي يشربه – يعني بتصير ابو

ههههههههههههههه هههههههههههه ضحكتني

ناظره فهيد بعصبيه – وليش تضحك ماهب عاجبك

سياف – اشششش خويك راقد .. تراه مايبينا نزعجه

فهيد – مين اللي يزعج مين .. ثمن كلامك

سياف كاتم ضحكته – خلاص خلاص لاتزعل يابطل زمانك

بس قلي حرمتك تدري انك هنيا وتشرب

سحب كاسته وشرب منها جرعه – لا ماتدري

سياف – طيب من وين بتصرف على ولدك هالحين وانت عاطل

باطل

عصب – انت ليش تبي تطفشني .. انقلــــــــــــــع ( وقف )

مشى شوي .. وجلس على الكنبه البعيده .. وبدأ يدخل في

غمرة سكرته

في مكان ثاني في الشقه .. في غرفته

منسدح على بطنه .. يفكر باللي سواه .. معقول كان في عقله

يوم سوى اللي سواه .. انقلب على ظهره .. هي اللي جذبته

دموعها .. برآتها .. لبسها .. شعرها المتبعثر .. والأهم عيونها

اللي طلعته من طوره .. يحس انه مو بوعيه .. مكان عايفها

وكارها .. كيف انجذب لها بهدرجه .. كان غبي غبي .. والأكيد

انه كان سكران بعد .. بس بعد هو وصاحي تجذبه .. كيف

هالمجنونه بنظره واللي يعيفها وينتبذها تسوي فيه هالسواه

هل ممكن تكون لعنه !!







مطت عيونها شيخه .. واندهشت وهي تشوف المنظر .. ضامه

نفسها بقوه .. وتبكي .. شعرها مبهذل .. ولبسها مشقق .. ويدها

يصب دمها .. وشكلها مخيف

قربت منها وهي ماحست فيها .. جلست جنبها .. ومسكت كتفها

نقزت بقوه وصرخت .. بس يوم تبينت في عيونها انها شيخه

ضمتها بقوه وتبكي وتضرب ظهرها – ليش تخيلتوا عني

ليششششششش خليتوه يذبحني وانا حيه .. ماني أختكم .. ابوي

ماوصاك علي .. ليششششش تخليتوا عني ليشششششش

نزلت دموع شيخه معها .. كانت بتفك نفسها .. بس ساره

متمسكه فيها بقوه – لا لا تكفيييييين شيخه لاتخليني لاتروحون

كنت ابيكم .. جايتكم الملحق .. كان مقفل .. (فكت نفسها ) شوفيني

شيخه .. شوفي وش سوى فيني .. شوفي كيف دمرني .. كنت

اصيح وابكي مكاني طول هالليل .. وينكم عني .. رجعتوا وأنتم

تضحكون .. ماأحد فكر فيني .. كنت اسمعكم .. بس بس بس

انتم تكرهوووووني ( ضمت نفسها بقوه وجلست تبكي وتصيح )

روحي خلاص ماني محتاجه لكم .. روحي شيخه .. بس لاتشمتين

فيني أمانه لاتشمتين

بكت شيخه وضمتها بقوه – ويل قلبي كيف اتشمت فيتس وانتي

أختي ( بكت بقوه ) ساره ان كنت متردده مره وحده اني اسكت

عن ذا العائله .. هالحين مصممه مليون مره اني اطلع انا وإياتس

المحكمه

تفأجات ساره بكلامها وخافت – كيف نروح .. وش بيسوون فينا

شيخه وهي توقف وتوقف ساره معها – لاتخافين الله إن شاءالله

بيكون معنا .. حنا مظلومات ونبي نأخذ حقنا منهم

سحبتها وراها وهي تسترها .. وتلفها بجلالها لين يوصلن

الملحق .. دخلتها الصاله وناظرت فيها – روحي اغسلي وجهتس

وتروشي بروح اجيب لتس ملابس .. واليوم بطربقها على راسك

ياابن قاسي انت واحفادك

طلعت وهي مصممه أكثر وأكثر .. ان ماخذن حقهن من بيأخذه

نعنبوك ياليتم كيف انك تكسر اليتيم كسر .. كانت تردد هالعباره

وهي تطلع الدرج .. فتحت جناح اختها بتصميم .. تتمنى تلقاه

تتمنى تمسح بوجهه الإرض .. تمردغه فيها .. بس للإسف

مالقت له أثر .. إلا آثار المعركه اللي صارت .. غمضت عيونها

بقهر .. وهي مقهوره على الإيام اللي سمحت لهلوث يدمر حياة

أختها .. فتحت الدالوب .. وسحبت الجلابيه اللي طلعت بوجهها

نزلت وهي تتحسر على الحياه الكريمه اللي كانوا عايشاتها

في الدوادمي

رجعت للملحق .. وشافت بوجهها وضحى .. وهي واقفه

وتناظر بشفقه ساره

عطتها الجلابيه وصرخت بقهر – آآآآآآآآآآآآآآآآآآآآه

وضحى وساره خافن من شكل شيخه .. ومسكتها

وضحى – شيخه فيتس شي

شيخه وهي ترص على يدها بقوه لدرجة ان عروقها بانت – فيني

الحسره والقهر .. فيني الوجع .. فيني دموع تروي جزيره بكبرها

فيني حياتنا القاسيه المريره .. هاه شوفي ( سحبت ساره ووقفتها

بوجهها ) شفتي هاذي حالة أختس .. شوفيني انا .. بقدر اسكت

وابلع غيضي ومري .. بس انتي واختس والثانيه والمر اللي تذوقنه

يمرضني يمرضني .. ألبسي ياساره بنروح على تكسي وبنبلغ عليهم

واللي فيه خير يوقف بوجيهنا

راحت ساره تلبس .. ووقفت وضحى بوجه شيخه وهي تفكر بخوف

من اللي بيصير لهن – دخيلتس شيخه بيذبحونا

شيخه بعصبيه – خليهم يذبحونا مافرقت معنا .. نموت أفضل

من هالحياه المهينه .. عحبتس قذف هالشيبه وهو يلوث شرف

امتس .. عجبتس وهو يطرح كرامة ابوي بالإرض .. لا يابنت

امي وابوي والله ماأسكت وان اتكلم واتكلم واتكلم وافضحهم

بعد

خافت وضحى .. وهي تشوف شيخه تأكل في نفسها من القهر

طلعت ساره وسحبتها شيخه وراحن

وضحى ركضت لهند وقومتها وعلمتها السالفه .. وقلوبهن

تضرب طبول .. شيخه بتجيب لهن مصيبه بتطيح فوق

رؤوسهن .. يويلهن منها ويلاه









في شقة صقر

صرخت بوجهه – انا مانمت الليل كله .. وانت هنا تتمسخر

فيني .. يومك تحبها وتبيها وراك تعلق بنات الناس معك

صرخ – اهووووووه علينا .. خلاص انطمـــــــــي

وسميه – ماني منطمه .. اجل في كل مكان تكون فيه بتسحبني

وراك مثل الشاه هااااااااااه قلللللل تكلم

لا وتبي تسحبني بيت اهلك .. ترى ماسكت عن الكف اللي عطتني

إياه لسواد عينك انت وإياها بس حسيت ان القهوه حرقتها

احترمت وجعها وسكت عنها .. لاتفكرني وحده سهله تلعب

علي لا ياصقيران تراني اوديك البحر واردك عطشان

انقهر صقر منها – بــــــــــــــــس خلاص فجرتي راسي الله

يفجر راستس

طلع وقرع بالباب وراه .. حذفت وسميه المزهريه على الباب وبكت

حظها اللي رماها مع هالإنسان اللي قلبه متعلق بحرمته




في التكسي

مسكت يدين شيخه وهي ترجف وهمست لها – شيخه انتي

متأكده من اللي بنسويه

شيخه وهي تزيد تصميم كل ماقربت من المحكمه – ايه متأكده

لاتخافين

وصلن المحكمه .. وحاسبن التكسي ونزلن

دخلت وساره تلحقها وهي خايفه .. مستحيل اللي يسونه يعدي

على خير

انتظرن دورهن ودخلن على الشيخ .. ناظر فيهن – وش قضيتسن

انتن

شيخه بتصميم – نبيك تجيب لنا حقنا ياشيخ







ضرب الباب بقوه – شيخه افتحي الباب

وضحى وهند يتراجفن وهن يسمعن صوت صقر يدور

على شيخه .. وش يقولن راحت المحكمه تشكيك ؟؟ !!

هند وهي ترجف – روحي روحي وضحى لايطربقها فوق

رؤسنا

وضحى خايفه بس متحامله على نفسها .. فتحت الباب وشافت

صقر يناظرها يحسبها شيخه سألها – وينهي شيخه

وضحى – شيخه راقده

صقر ناظر ساعته – روحي قوميها .. نوم ذا الحزه .. روحي

قوليلها صقر يبيتس

وضحى قامت تعرق .. وهي تدعي ان الله يعدي اللي بيسونه

على خير

سكرت الباب وخلته فتره .. وهو يدور عند الباب وينافخ

يوم طولت عليه دق الباب مره ثانيه

هالمره فتحت هند وهي ترجف – صقر شيخه تقول رح

تبي ترقد لاتزعجها

عصب – ماهب على كيفها قوليلها صقر يبيتس بسرعه

هند – مالي دخل مالي دخل ( وسكرت الباب بقوه على وجهه )

انقهر ومشى لداخل البيت .. مصمم ماهب طالع من البيت

غير وهو محاكيها







في بيت سعد بن فهيد

عمشاء تناظر فيه .. حاله منقلب من يوم أختفت حرمته

قربت منه - ضاحي يمه

ألتفت لامه – نعم

عمشاء - ياولدي ماتقول عممت على كل الجهات سالفة

هروبها من البيت .. حسبي الله عليها .. كل من نشدني عنها

قلت مسافره .. لاتعبس ويشكون العرب .. لاتأكل وجهي

ووجهه ابوك وهلك

وقف ضاحي وهو معصب – وهذا اللي يهمتس يمه

يهمتس سمعتكم وانا طزززززز فيني

يايمه والله العظيم اني تعبان وانها واصله معي لين

هنيا ( ويأشر على خشمه ) تعبت مدري وين ذلفت

صرخت الجده بوجهه وهي تقترب منها – قلعة تقلعها

جدك علمني سالفتها الغبرى .. ماهيب سواه اللي تسويه

تزوج بنت مجرم

عمشاء وقفت وشهقت – وش هووووووو

ضاحي تورط وجده هو اللي ورطه .. ناظر فيهن .. وشاف امه

اللي قربت منه وتصرخ عليه .. وتضربه .. وجدته اللي

تهاوش وتصارخ .. كل هذه ماهمه .. همه يوصل لها ويشفي

غليله منها .. هالمجنونه لعبت عليه هي وأبوها

مكان متوقع تسوي معه هالسواه .. حس بالندم قد شعر راسه

طلع من عندهم .. وأمه جلست على الإرض تبكي وتندب حظها

وجدته من وراه وتهاوش فيه .. والمسؤولين اللي معاقبينه

على إهماله فيها .. مايدري يلقاها من وين ولا من وين







المحكمه

الشيخ – تعالن يابناتي اقربن .. احكن وش هي قضيتسن

ناظرت ساره في شيخه وهي ترجف .. ناظرتها شيخه

بتصميم وقوه وثبات

كملت طريقها لين جلست عند الشيخ .. وبدت تنشر خيوط

تفاصيل اللي يصير فيهن عنده .. ومع كل علم .. كان الشيخ

ينذهل من سالفتهن أكثر وأكثر .. وكل ماله ينصدم ويكتب

في كتابه اللي قدامه .. خيوط قصه .. ظلت بين الإيام مطويه

وظلت شيخه تحكي وتحكي .. وتحس ان دمها يبرد

وغلها وحقدها يركد







كانت تفطر هي وإياه .. يوم دق جوالها

ناظرت الرقم .. كان رقم بيت عمها فتحت الخط – آلو

وضحى اللي كانت تهمس – نوره انتي وينتس

نوره ناظرت في سلطان وقامت عقب ماحست بشي في

الموضوع – في البيت

وضحى وهي تصب عرق – بسرعه تعالي نبيتس مصيبه

وركبت فوق رؤوسنا

نوره مطت عيونها – وش فيه وش صاير

وضحى وهي تحاول تتمالك كلامها – تعالي وبس

( وسكرت السماعه )

مشت نوره لسلطان وهي حاسه بخوف – سلطان خذني

بدربك لبيت عمي

ناظرها سلطان – صاير شي

نوره – لا بس أبي ازور خواتي من زمان عنهن

هز راسه .. وناظر ساعته – زين روحي أخلصي لين

أكمل فطوري .. لاتبطين علي ماأحب أحتري

مشت بسرعه لفوق – زين زين

سكر الجوال وهو ماط عينه – سونها الكلبااااات

قرب منه ابو فهيد – وش فيه ياأبوي من اللي دق عليك

ناظره الجد وهو ماط عينه – سونها بنات الكلب وطالباتني

في المحكمه .. والله ماأعديها إلهن

ابو فهيد مط عينه – منهن يبه !!

الجد وهو يترك مجلسه – من بعد .. بنات اخوك اللي الله

لايبيحه من يوم انولد وهو عالن تسبدي .. شف مسودات

الوجهه بتصير فضيحتنا على كل لسان .. دق على صقر

خله يجيني .. عارفن كل هاللي صار من تحت راس سلقته







في بيت ضاحي بن فهيد .. الصاله

انذهل من اللي يسمعه – وش هوووووووو .. متى صار

ذا العلم .. ( ألتفت على ابوه ) ابوي هنيا هنيا موجود

ابو محمد يناظره – وش فيه وش صاير

مد صقر الجوال على أبوه

منيره وفارس – وش صاير

صقر – كل شر هالسلقه بخلص عليها ذبحتها على يدي

فارس وقف – صقر وش صاير

صقر – بنات عمك المصونات رافعاتن قضيه علي وعلى جدي

وعلى مدري من في المحكمه .. نزلن اسمنا في القاع

خلاص صقر اللي كان له هيبه مييييييييح .. كلن بيضحك علي

ان درى عن اللي سونه هالسلقات فيني .. يويلي ياذبحتها يويلي

منيره وفارس مطوا عيونهم مصدومين من اللي يسمعونه

ركض صقر لبرى البيت .. بسرعه شغل سيارته .. تذكر وضحى

فتح باب السياره وركض لها .. ضرب الباب برجله – وين بتروحن

مني .. انا اللي بنفسي بتفاهم معها هالسلقه .. تكذبين علي وضيح

هااااااااااااه .. والله اني لاطربقها فوق رؤوستن

ركض لسيارته .. وشاف ابوها وفارس راكبين فيها .. ركب وشخط

بالموتر وهو يحس بنار شاااااااااااابه في صدره





وضحى قعدت تبكي – يويلنا وش بنسوي .. ويلي عنتس

ياشيخه ويلي عنتس

هند ودموعها تنزل – يااااااااارب انك ترحمها ومايصير فيها

شي .. يااااااارب انك تسترها معنا







في المحكمه

وقفوا في وجيهن .. وكل واحد يرسل نظرات تهديد .. ومنهم

من يعاتبهن بنظراته على اللي سونه

ساره كانت محتميه بشيخه ومندسه ورى عبايتها

الشيخ – هاذي سواة تسويها في حفيداتك وانت شايب كبير

سن رجلك والقبر ياجدي

ناظر الجد فيهن وعصاه بيده خبط فيها بالإرض بقوه – وش

سويت ابهن زوجتهن وسترت عليهن .. وش كاذباتن عليك

إبه

شيخه بتهديد – ماكذبناااااا

صقر قرب بيضربها ومسكه ابوه

الشيخ – بسسس ( ناظر في صقر ) – انت ماتستحي تراني

بحذفك برى

سكت صقر .. وجلس يسمع وهو يحس بالغبن والقهر

شيخه – ياشيخ جدي قذف ابونا وهو ميت .. وكل شوي ينطل

عليه هرجه مارحمته حتى بقبره .. حنا بناته ونحس ونعاني

ابونا كريم وشهم وربانا أحسن تربيه .. خذلنا حقنا منه زوجنا

غصب عنا .. مافينا اللي خذت رجالها راضيه .. كلنا مغصوبات

يبا الفيت بيسترنا وحنا مصيونات .. مافضحناه ابد ولا نزلنا

راسه مثل مايقول

ساره خلاص حست نفسها تبي تموت .. منهاره بقوه

مستحيل تفضح نفسها وتسمع كلام شيخه .. وتعلم الشيخ

وش صار معها .. مدام الله سترها .. بتستر نفسها وتسكت

الشيخ ناظر في شيخه – خلاص يابنتي اسكتي لين نسمع

وش رد جدتس

شيخه سكتت .. وناظرت في صقر اللي كان بيأكلها بعيونه

سمعت الجد وهو يتنفس بقهر – من يوم ابوهن ظهر لهالدنيا

ماأرتحت الله لايريحه

الشيخ – لاتدعي وأرحم ولدك .. خاف الله احترم انه ميت

واحترم بناته تراه ابوهن

شيخه – هذاك سمعت ياشيخ .. كل شوي يدعي على ابوي

وينحته .. وماخلى الشينه فيه ماقالها

ناظر الشيخ عياله – وانتم وينكم عن ابوكم ورى ماتنصحونه

ماتدرون ان اخوكم يتمنى تسكتون هاللسان اللي يدعي عليه

كل شوي .. ماخفتوا عليه من العذاب

ابو محمد دمعت عيونه – ماخليت شي مانصحته .. ابيه يسكت

ويرحم ولده اللي طرده .. ماقدرت عليه ياشيخ .. ابوي كبير

سن وتعرف كبار السن

الشيخ ناظر في ابو فهيد – وانت وانا أخوك وينك عن ابوك

ابو فهيد نفث الهواء اللي بصدره وسكت

ناظر الشيخ في الجد وقال – اتركوني معه واظهروا

شيخه اللي تشوف عيون صقر وعارفة انه ماهب جايبها

على خير – ياشيخ خلهم يكتبون عندك تعهد ماحدن يلمسنا

ولا يضربنا

الشيخ ناظر فيهم – لا ماهب مسوين لتسن شي .. هذولي هلتسن

يابنتي

شيخه - لا ماهب هلنا .. هلنا وهم مورينا الويل .. وقعهم على

التعهد ثم أظهر

الشيخ وقعهم على التعهد وقال – لحد يظهر لين اخلص ثم

بشوف باقي القصه

صقر ناظر في شيخه – بعدددد

وقعوا على التعهدات وطلعوا .. وبقى بس الجد

في الممر على الكراسي .. جلست هي وساره جنب بعض

صقر وهو معصب – حسابتس في البيت يالسلقه

شيخه عصبت – ماهب على كيفك ,, والله ان اخذ

حقي منك

ابو محمد – بسسس فضحتونا ( ناظر في شيخه ) هاذي

سواه تسوينها وانا ابوتس فينا .. ساحبتنا كلنا للمحكمه

ابو فهيد – بلاها والله ماترانا شي .. ماهب مالين عينها

شيخه تكلم بحرقه – اللي سويتوه فينا ماهب قليل .. كل

واحد فيكم زوجنا عياله غصب من ورى خشومنا

ابو فهيد – من غصبتس انتي اللي بنفستس رضيتي على

صقر .. انتي من يغصبتس انتي

صقر ينفث الهواء بعصبيه .. ويطقطق برجله

اما فارس ألتفت لشيخه وغمز لها ( برافو )

بعد فتره

طلع الجد – ارواح روحنا

شيخه خافت .. توها تستوعب اللي سوته – مانيب رايحه

طلع الشيخ – روحي روحي يابنتي .. الله يصلح شانتس

انتي وخواتس .. وجدتس تفهم كل شي

ناظرت بعيونهم بخوف .. وساره ترجف جنبها

تذكرت اختها – لحظــــــــــــــــــه

ضربت على فخوذها بحسره – يويلنا من عمي والله ان

يذبحنا

وضحى وهي تبكي من الخوف – ياعمه هم اللي حدونا

نشكيهم .. والله اني قلت لشيخه مير ماتسمع الهرجه

منيره بهم – كله يهون مع اختس اللي ساحبتها وراها

بننفضح بتفضحنا شيخه وبينغسل شراعنا

وضحى خافت من فضيحة ساره .. وهند اللي خافت من الموقف

بكبره وبكت







شيخه – اختي عندهــــ

قاطعت كلامها ساره وهي تلكلك بالكلام – ماعندي شي

ماعندي شي امشي شيخه

شيخه – لا مانيب ماشيه .. خليه يدري عن اللي سـ

فارس مط عينه – شيخه شيخه امشي امشي

شيخه ناظرت فيهم بقهر .. عرفت انه ماغير اختها اللي بتنفضح

والجد اللي تبي تنزل راسه القاع ماهب صاير فيه شي

ناظرت الشيخ – خلاص ياشيخ

الشيخ – الله يصلح شأنكم ,, ويجمعكم على قلب واحد

طلعوا من المحكمه .. وأول ماطلعوا .. مسكها بيدها بقوه

ومشاها للسياره وهي واصلة معه

ركبها السياره بقوه .. وقرع الباب .. حاول يلحقهم فارس

بس صقر شخط بالموتر بقوه





دق الجوال عنده كذا مره وهو راقد .. الصوت أزعجه

يالله وصل للجوال اللي محذوف جنبه .. ناظر في الرقم

كان رقم أمه فتح الخط – آلو

منيره وهي تبكي – انت وينك

صحصح شوي وفتح عيونه – ليه تبين شي

منيره وهي تبكي – قم قم ألحقني .. فضيحتنا بجلاجل قم

الله لايبارك فيك

جلس بخوف – يمه قولي صاير شي

منيره فجرتها – حرمتك راحت المحكمه تشكيك

انصدم وشهق – اييييييييييييييييييشش







في سيارة صقر

تشوفه شاخط الموتر .. تحس بإنها أول مره تنتصر على

هالعائله .. قدرت تبرد كبدها وكبد خواتها

اللي سووه فيهن ماهب قليل .. ألتفتت عليه وشافته

مركز عيونه في الشارع .. رجعت نظراتها للشارع وشافت

السياره تقترب منهم

صرخت - لاااااااااااااااااااااااااااااااااااا














( وللحكايه بقيه .. إنتظروني بإذنه يوم السبت القادم )