كاتب الموضوع :
ملاك هادئه
المنتدى :
الارشيف
الــــجــ الـرابـــع ـــــــزء
رجع فيصل من الدوام دخل البيت ناظر جدته في الصاله جالسه
ناظرته جدته مستغربه: فيصل وش جابك بدري
فيصل بعد ماجلس : مافيه شي بس جيت أرتاح (يتلفت) وين أمي
الجده: أمك بالمطبخ ألحين بتجي وش فيك تعبان
فيصل: لا بس مصدع شوي
الجده خافت: سلامتك ياوليدي (تنادي بصوت عالي) هند ياهند
أم فيصل: نعم اش فيك ياخالتي
(تناظر فيصل) اش جابك بدري يافيصل
الجده بسرعه: يقول مصدع جيبي له مسكن بسرعه
أم فيصل: طيب لحظه (وراحت)جلس فيصل يناظر امه لين مادخلت المطبخ كأنه أول مره يشوفها لاحظت جدته نظراته وقالت
الجده: فيصل فيك شي
فيصل يناظرها: لا ياجده بس ابي ارتاح شوي
الجده: سلامتك ماتشوف شر إذا فيك شي تراني موجوده وأخدمك بعيوني
فيصل أبتسم: تسلم عيونك ياجدتي
أم فيصل وصلت وجلست جنب فيصل وعطه حبه بنادول وشرب ماي :
أم فيصل: الشغل اللي على رأسك أقولك أهتم في صحتك بس ما تسمعني
الجده: خلاص هند اسكتي الولد يقول مصدع (تناظر فيصل) روح أرتاح حتى وقت الغداء
فيصل وهو قايم: طيب يالله عن أذنكم
ــــــــــــــــــــــــــ
بيت أبو منصور (بعد الظهر):
أم منصور تستقبل سعود عند الباب: أهلا يمه (وباسته)
سعود زعلان: يمه مازن قال للأولاد في المدرسه أنا ماعندي بلاستيشن وضحكوا علي
أم منصور: ليه يقول كذا أنا أوريك فيه وبقول لأختي بعد
سعود: أبي بلاستيشن2 عشان أقهره هو عنده بلاستيشن1
أم منصور: طيب يمه بكره أخبر منصور يجيبلك أنت بس أضحك ماأبيك تكون زعلان
سعود يبتسم: طيب
أم منصور: روح بدل وتعال أغديك
وراح يركض مستانس كل رغباته مجابه في هالبيت
وراحت الصاله وجلست
ناظرها أبو منصور: العيال جو
أم منصور: بس سعود ومنصور وأخواته في الطريق
أبو منصور: جهزي الغداء على بال مايصلوا
أم منصور: بس همك تأكل بس الشغل مافيه متربع لي هنا كأنك حرمه
أبو منصور مارد عليها لأنه مايبي مشاكل وقامت وراحت للمطبخ مقهوره من بروده
ــــــــــــــــــــــــــ
في وقت الغداء/
أم فيصل تجهز الغداء على الطاوله: نوال روحي نادي فيصل يجي يتغدى بسرعه
نوال وهي قايمه: طيب يمه
وراحت إلى غرفه فيصل ودقت الباب سمع فيصل الباب لأنه ما نام جلس يفكر في المصيبه اللي طاحت على رأسه: أدخل
دخلت نوال: سلام
فيصل يتبسم: وعليكم السلام
نوال: يالله للغداء ينتظروك تحت
فيصل جلس: يالله أنا جاي.. أبسالك كيف الدراسه معاك
نوال: زفت
فيصل: أفااا ليش
نوال: مادري بس طفش المواد كثاروصعبه
فيصل: ترى أذا سمعت هالكلام مره ثانيه بزعل دراستك أهم شي حتى لوتكون صعبه
نوال: لا..لا إلا زعلك بسوي اللي يرضيك
فيصل: عفي عليك أختي الشاطره
نوال: طيب يالله نزل
ونزلوا سوى
ـــــــــــــــــــــــــــ
من جهه ثانيه/
فهد وصل بيته ودخل لقى أمه جالسه تنتظره وسلم عليها وحب رأسها/
فهد: كيفك يمه
أم فهد: الحمدلله
فهد:(وجالس متأفف) وين نجاح
أم فهد: في المطبخ تجهز الغداء..أشفيك وجهك متغير
فهد يتنهد: قلبي شغال على فيصل اليوم وصله خبر نزل عليه مثل الصاعقه
أم فهد: أيش فيه عسى ماشر
فهد: تصدقين يمه محمد بن سلطان يبي يتجوز خالتي أم فيصل
أم فهد مستغربه: من جدك تتكلم
فهد: أيه والله وفيصل ماهو مصدق مصدوم لما قاله
أم فهد: لا مايستاهل فيصل طيب أيش بيسوي
فهد: والله ماأدري عنه
أم فهد: أن شاء الله خير
(تنادي نجاح : يالله نتغدى)
قام فهد وساعد أمه : يالله يمه الحين لو تأخرنا بتسطرني نجاح..وتسوي نفسها شي من لاشي
نجاح سمعت كلامه: أيه لو تأخرتوا كان ظربتك أصلآ مافيه إلا أنت ولا تبين أضرب أمي..يالله قولولي بينكم أسرار
أم فهد:ههههه لا أسرار ولا شي بس يسولف معي وليدي
فهد يتصنع الجديه: لاوالله تبي تظربني أكسر أيدك قبل تمدينها علي..أنا وأمي كنا نحش فيك وبنتك أرتاحتي
نجاح تضم بنتها تكلمها : ساره لا تحبي خال شفيه بيكسر يد ماما
ساره تناظر فهد: أنا ماأحبك وترجع في حظن أمها تتمسك فيها بقوه
فهد يسوي نفسه مسكين: طيب أنا أحبك
أم فهد: خلاص خلونا نتغدى أشوفكم صايرين بزران
فهد: شايفتها يمه تبي تكره سارونه فيني
أم فهد: أنت البادي والبادي أظلم
نجاح: ههههه صادقه أمي
(ساره تناظر فهد وتطنشه)
فهد: ساره أنا أحبك تعالي عندي بنروح نشتري حلاو العصر
(ساره أحتارت تروح عشان الحلاو أوترضي أمها)
فهد يشد على أسنانه بقهر: نجاح ترى والله أقلبها فوق رأسك
نجاح وأمها: هههههههه
نجاح: خلاص كسرت خاطري(وتناظر ساره)روحي عند خال وهو يحبك
ساره ماصدقة خبر تنزل من أمها تضحك: طيب
راحت عند فهد ولوت برقبته لانه يدلعها وأي شي تبه يجيبه لها فهي تحبه موت
فهد وهو يبوسها: ياروحي أنتي (ويناظر في نجاح): الله يأخذ عدوينك بغيتي تكرهين سارتي فيني
نجاح: ههههه خلاص أنتبه على كلامك ثاني مره والإ بتخسر سارتك
أم فهد: دام أنك متعلق في الأطفال كذا ليش ماتزوج وتفرح قلبي
فهد: عودنا على يطير ياللي
نجاح: هههههههه
ــــــــــــــــــــــــــ
بعد الغداء الكل راح يرتاح/
فيصل في غرفته ويفكر رأسه بينفجر من كثر التفكير وأخير كانت أخر فكره تدور برأسه أنه يخبر جدته وطلع مسرع ونزل الدرج بسرعه وصل غرفه جدته وطق الباب/
الجده: أدخل
فيصل دخل وسكر الباب: سلام عليكم
الجده: وعليكم السلام
فيصل: فاضيه ياجدتي
الجده: حياك تعال أجلس
قرب فيصل وجلس جنب جدته: الله يسلمك ياجدتي أبيك في موضوع من كثر مافكرت فيه رأسي صار يعورني وبينفجر بعد
الجده: سلامتك ماتشوف شر قول أنا أسمعك
فيصل: الشر مايجيك جدتي تعرفين محمد بن سلطان اللي وقف معي في الشركه
الجده بخوف: أعرفه أيش فيه
فيصل متردد: اليوم جاني المكتب تدرين وش طلب مني
(الجده ساكته تنتظر يتكلم)
يبي أمي على سنة الله ورسوله
(أستغرب من رده فعل جدته)
أبتسمت الجده: كنت حاسه بيصير هذا الشي
فيصل مستغرب: كنت حاسه كيف
الجده: راح أقولك كل شي بس أنت أسمعني الى الأخير
فيصل: طيب
الجده بدأت تقوله قصه اللي صارت من قبل 25سنه:
قبل مايفكر أبوك يتزوج أمك كانت محيره لمحمد ويوم قرر يخطبها ورفض جدك لأن سمعته كانت مو زينه وعنده وظيفه بس راتبه شوي مايقدر يصرف ويفتح له بيت..وبعد اسبوع راح أبوك خطب أمك وافق جدك من دون مايشورها قال أنه مايلقى أحسن منه لبنته وتزوجت وكان أبوك يصبر عليها وعلى عنادها كثير..كان لما يطلع يسمع كلام يسم البدن وفي الرجعه نفس الكلام يسمعه..وكانت تجرحه بكلام وهي تقول مأبيك أكرهك ماأحبك أبعد عني..كم مره جاء أبوك عندي وقالي أنه ماعاد فيه صبر وخلاص بيطلقها..بس كنت أصبره وذكره فيك كان عمرك 8شهور كنت أقوله شوف فيصل وترد الحياه فيك من جديد.. وصبر عشانكم كانت طلعتها من البيت كثيره لكن أبوك مافراقكم لحظه يحب يساعدكم بكل شي تبونه الله يرحمه (وتنهدت وهي تذكره...فيصل كان مندمج في السالفه وكملت)محمد كان فاشل في حياته تعرف عليه أبوك ونصحه وقاله راح أخليك تصير رجل أعمال كبير بس تغير حياتك تصير رجال أترك طريق الفساد اللي ماشي فيه..سمع نصيحته كان محتاج محمد أحد ينصحه يوقف معاه..وساعده أبوك حتى صار له منصب كبير مع مرور السنين نست أمك محمد وكبرتوا وأنتم نسيتوها خليتوها تعرف قيمه أبوك وتحترمه..هذا كل اللي أعرفه)
(سكت فيصل وبعد دقايق قصيره رد)
فيصل: وش اللي خلك تحسين أنه بيجي بيخطب
الجده: أمك من يوم زارنا محمد تغيرت صارت تسرح كثير شكيت في الوضع بس
فيصل: والحين أيش أسوي ساعديني ياجدتي
الجده: اتركني أكلم أمك وشوف رايها
فيصل: طيب تعتقدين توافق
الجده: بكلمها مع أني حاسه أنها بتوفق
فيصل: جدتي لا تحسين بيكون أحساسك في محله
الجده: هههههه لأني أكثر وحده أعرف أمك وأذا وافقت هذا حق من حقوقها ولازم نحترم قرارها
فيصل: مو مصدق الكلام اللي تقوليه طيب ونوال
الجده: خلها علي
فيصل: خايف عليها
الجده: ولا يهمك أحد أذا تبغاكم بتختاركم أذا أخترته نتمنى لها السعاده
فيصل: خير أن شاء الله جدتي أنا بسافر بعد يومين الأمارات فيه شغل هناك
الجده: تروح وترجع بالسلامه
طلع فيصل من غرفه جدته وراح غرفته جلست الجده تفكر متى تكلم أم فيصل قالت هذا الوقت مناسب العيال كلهم نايمين وطلعت الصاله ونادت الشغاله: روحي قولي ماما هند تجي أبيها بسرعه
الشغاله: تيب ماما
دقايق وأم فيصل تنزل وقربت منها وجلست: هاااه خالتي ناديتيني
الجده: أيه أبي أكلمك بموضوع
أم فيصل: قولي أيش عندك أنا أسمعك
الجده: محمد بن سلطان
أم فيصل أرتبكت: أيش قصدك
الجده: قصدي أن موضوعي عن محمد
أم فيصل: شايفتيني فيصل روحي كلمي فيصل أذا كان بخصوص الشغل
الجده: لاااا..السالفه مو شغل السالفه فيها خطبه أبي أعرف رايك بالموضوع
أم فيصل بفرح: تعرفين رأي من زمان
الجده: يعني موافقه
أم فيصل بتردد: أيه
الجده بعصبيه: وعيالك اللي كبرك ومريم ونوال مافكرتي فيهم
أم فيصل ببرود: هم مافكروا فيني يوم خطبوا بنات عمهم وأنا ماأبي قرب نوره مرت أبو منصور..مريم خذت منصور ماشورتوني قلتي ولد عمها أحسن من الغريب ونوال بكره تزوج ماتعطيني خبر خلاص أبي أعيش حياتي ياخالتي
الجده بعصبيه: تخلخلت عضامك عبدالله يوم خبرك بالخطوبه طلب رضاك أول أذا نسيتي أذكرك..وأذا هذي حياتك زي ماتقولي ماتبين أحد يدخل فيها فكري وعطيني رأيك بعدين وعيالك أنا أفهمهم الموضوع مع أنه صعب لكن الله يعينك على بلواك يالطيفه
أم فيصل وهي واقفه: انا ماني جاهل ولا بزر عشان أفكر وردلك..من الأن موافقه (وراحت وتركت الجده مستغربه من ردها وبرودها)
الجده: الله يهديك ياهند
(الجده ماتحركت من مكانها في الصاله وعلامات الأستفهام على وجهها تفكر أيش غير أم فيصل وجلست على حالها حتى سمعت أذان العصر وقامت صلت ودعت ربها يذيدها عمر عشان تسعد عيال ولدها وتطمن عليها في حياتهم بعدها تموت وهي مرتاحه )
طلعت من غرفتها وشافت عبدالله نازل من الدرج
شافها عبدالله قرب وسلم عليها:
أشلونك ياالغاليه
الجده: الحمدلله وين رايح
عبدالله: بروح مع منصور وناصر الكوفي
الجده: طيب يحفظك ربي أنتبه على نفسك
عبدالله: من عيوني تامرين شي
الجده: أيه طلعني الحديقه أبي أشم هواء
عبدالله: تامرين أمر (ومسك يد جدته وساعدها حتى جلسها على كرسي في الحديقه )
الجده: الله يسلمك تعبتك
عبدالله: أيه تعبتيني..وأخرتيني بعد
الجده تلتفت لجهه الثانيه: روح عن وجهي ماني فاضيتلك
عبدالله: زعلتي ياجدتي
الجده: روح الله يسامحك
(قرب منها وباس يدها)
عبدالله: الأ زعلك ترى أحبك أكثر من روحي
الجده تناظرفيه: تسلم روحك ترى تأخرت على أصحابك
عبدالله: جدتي ليش متضايقه
الجده بعصبيه: منك قاعد على قلبي..أقولك روح ماتسمع
عبدالله: خلاص أهدي أذا فراقي بيسعدك بروح أنا ماشي وبتعشى برا بعد باي
الجده تنهدت: مع السلامه
(بعد نص ساعه طلعت أم فيصل و النبات وفيصل في الحديقه يسولفون ويشربوا شاي عشان منظر الغروب حلو مايتفوت)
ــــــــــــــــــــــــــــ
وبعد دخول الظلام/
أتجهوا الشباب إلى المطعم يتعشوا وجلسوا على أحدى الطاولات/
عبدالله: ايش تبون العشاء على حسابي
ناصر: مشكور كأنك تدري أني مفلس الأيام هذي
عبدالله: عادي اذاتبغى أفطرك وأغديك بكره ماعندي مانع
منصور: أيش طرى عليك يا كريم
عبدالله: أسكت الله يخليك بعدين ناصر مثل أخوي
ناصر: تسلم والله
منصور: خلاص خلوا الرسميات بعدين ترى حدي جوعان
عبدالله: طيب شوفوا المنيو وأختاروا اللي تبون
ناصر: أي شي أي شي نختار
عبدالله: اللي نفسكم فيه
منصور: عبدالله ياحبني لك تعال شوف البخيل هذا(ويأشرعلى ناصر)
ناصر: أنا بخيل أجل أنت وش تصير على أقل أنا عندي شقه وأسرف على حالي كله من مكافأة الجامعه
منصور: ههههه والله ماباقي لك الأ حرمه ياشايب
ناصر: شايب في عينك أنا بعدي شباب
يقاطعهم عبدالله: أنتم ماتستحون تتهوشون قدام الناس جزاي بعشيكم
ناصر: أسف بس هو استفزني
عبدالله: طيب أختاروا عشان نتعشى ونروح
(وبعد ماطلبوا وهم يأكلون)
منصور: تسمحلي أسئلك سؤال بس ماتعصب
عبدالله: قول أصل أنا رايق على الأخر
ناصر: ليش تبغى تعكر مزاجه يا أخي
عبدالله: خله يقول يمون أخو الغاليه
منصور: حلوه أخو الغاليه بس لاتعيدها
عبدالله: بكيفي أقول اللي يريحني قول أيش عندك
منصور بتردد: ليش عزمنا
عبدالله قالها على بلاطه: جدتي تبي الفكه مني قلت أتعشى برى وروح متأخر البيت عشان تشتاقلي فديتها بروحي
منصور وناصر فطسوا ضحك بس شفوا نظرات عبدالله فيهم سكتوا على طووول
عبدالله: هذا جزاي تضحكوا علي
ناصر: محشوم والله بس هذا منصور سألك
منصور: خلاص توبه ماعيدها خلوا الليله تمر على خير
ـــــــــــــــــــــــــــ
وبعد ماتعشوا جلسوا في الصاله يسولفون/
كان الريموت التلفزيون بيد مريم وتحوس من محطه إلى محطه/
الجده: مريم خفي شوي رأسي قام يعورني
مريم: ياجدتي مالقيت شي أتونس فيه
الجده: عن الهذره وحطيه على الأخبار
مريم تحطه على قناه العربيه: طيب والله زهق
نوال بهمس: ليش مطول حبيب القلب في أتصاله
مريم تضربها بلمخده: عمااا أسكتي لأحد يسمعك
نوال: هههه..يمه شوفي مريم تطقني
أم فيصل تناظرهم: أيش فيك على أختك أتركها بحالها
مريم: تستاهل هي غلطت علي
الجده: خلاص أسكتوا الأخبار جت طلعي في الصوت مريم
مريم ونوال يتكلمون بأصوات منخفضه
ناظرهم فيصل تكلم بهمس:
ترى جدتي واصله عندها أحسن لكم تسكتون
مريم بهمس: أشفيها ليش متضايقه
فيصل يحرك كتوفه: ما أدري
نوال: ياعمري ياجدتي والله أحس فيها
مريم بخبث: دامك تحسي فيها روحي سأليها
نوال: لاوالله ماأقدر أخف تحط حرتها فيني
مريم: بكيفك بس أذا سألتي عنها بتفرح كثير
فيصل: أنتبهي ترى بتوهقك
نوال: لا تخاف علي ما بأخذ بكلامها
مريم: أقول قومي نطلع فوق حلي واجباتك وعطيني النوته حقتك أقرأ فيها
نوال: ياسلام أكتب وأتعب وأنتي خذيها بارده
مريم وهي قايمه: بروح ولحقيني
أم فيصل: وين رايحه يمه
مريم تلتفت: بروح غرفه نوال أطلع البلكونه(سمعت صوت مسج واصلها على جوالها) يالله بااااي
(وراحت طلعت الدرج وهي تركض)
الجده: من تزوجت البنت طار عقلها
الكل يضحكوا عليها
قامت نوال وجلست جنب جدتها: صح ياجدتي أنا عاقله
الجده: الحين عاقله بس أخاف أذا تزوجتي تستخفين مثلها
نوال: ليش تقولي كذا ماعجبني كلامك
فيصل: هههه أشفيك ياجدتي قلبتي عليها توها تقول أنها تحس فيك
نوال: وأنت بعد معها
الجده: لاتزعلين والله ترى أنتي وأخوانك عيوني اللي أشوف فيها
نوال: جدتي مستحيل أزعل منك لأني أحبك
الجده: ياروح جدتك أنتي
فيصل: يالله قومي روحي أدرسي قبل ماتنامي بسرعه
نوال بتأفف: طيب (وقامت )
أم فيصل وهي قايمه: خذيني معاك بروح أنام تصبحوا على خير
الجده وفيصل: وأنتي بخير
أم فيصل تلتفت لفيصل: كلم عبدالله يجي بكره وراه دوام
فيصل: أن شاء الله يمه
ـــــــــــــــــــــــــــ
دخلت نوال الغرفه ناظرت مريم جالسه تقرأ دفترها: غريبه ماتكلمين حبيب القلب
مريم: لا رسل مسج قال أنه برى البيت وبيتأخر وأذا رجع بيدق
نوال: طيب تعالي البلكونه
مريم: أبي أرسل له مسج
نوال: الدفتر عندك وأرسلي اللي تبغين
ـــــــــــــــ
نرجع للصاله/
بعد ماخلصت الأخبار/
ناظرت الجده فيصل: كلمت أمك في الموضوع
فيصل: هااا بشري وش قالت
الجده: موافقه بكره تعطي محمد خبر
فيصل عدل جلسته: أيش قلتي وليش توافق
الجده بعصبيه:مادري تقول حياتها وبكيفها..وبكره تقوله
فيصل: ليش السرعه خلينا نتظر يمكن تغير رأيها
الجده: أمك مستعجله تبي الفكه تخيل سمعتني كلام أنا قلت أن فيها شي(وتقلد صوتها)أنا ماني جاهل ولا بزر عشان أفكر
فيصل: ما توقعت أمي تقول هالكلام ليش تسوي فينا كذا
الجده: خلاص ماأبي أحد يتحسر عليها وقول لأخوانك هالحكي
فيصل: تامرين جدتي
ودخل عبدالله سكر الباب وسلم وجلس جنب جدته:
جدتي باقي زعلانه مني
الجده: أزعل من روحي ولا أزعل منك
عبدالله: تصدقين أفكر فيك أقول جدتي باقي زعلانه مني وشلون أرضيها
الجده: لايكثر هرجك بروح أنام أحسن لي
عبدالله: يعني أنا كاذب
فيصل: أيشفيك من دخلت وأنت على جدتي
عبدالله: أيش أسوي أحبها أموت من دونها
الجده قامت: ههههه بروح أنام الولد شوي يتغزل فيني
فيصل: والله وأنا شايف ماصار يستحي
عبدالله بزعل: جدتي أجلسي أنا اللي بروح
الجده: لاياروح جدتك أبي أرتاح تعبت اليوم
تصبحوا على خير
فيصل وعبدالله: وأنتي بخير
فيصل: تعال أبيك بموضوع في غرفتي
عبدالله: طيب جايك بس بدق على نجلاء
فيصل: يالله بسرعه الموضوع مايتحمل التأخير
عبدالله وجوال في أذنه: قتلك طيب
(راح فيصل قبله وهو وراه)
عبدالله: سلام أشلونك
نجلاء: بخير أنت كيفك
عبدالله: بخير دامني سمعت هالصوت
نجلاء: تسلم أنت وصلت البيت
عبدالله: أيه وصلت يسلمون اللي يخافون علي
نجلاء: أذا ماخفت عليك أخاف على مين
عبدالله: أوه ماتحمل أنا اسمعي الحين فيصل يبيني بعدين أكلمك أوكي حبيبتي
نجلاء بدلع: أوكي قلبي باااي
عبدالله: باااي
(وقفل ودخل غرفه فيصل سكر الباب وجلس)
عبدالله: قول الموضوع الخطير أنا أسمعك
فيصل: أيش الرمنسيه اللي عايش فيها
عبدالله: والله أنت أدرى ويمكن أنت أحسن مني
فيصل: ماعلينا أولا ماأبيك تعصب أبد ثانيا أسمعني إلى الأخير
عبدالله: خوفتني قول أيش عندك
فيصل ماعرف يبدأ يمكن بتكون صدمه له بس يتحمل بسرعه قالها بتردد: عبدالله أمي بتتزوج
عبدالله: أيش قاعد تقول أكيد تمزح
فيصل: السالفه هذي مافيها مزح أنا أكلمك جد
عبدالله: من بيأخذها وهي وافقت
(فيصل شد على أيد عبدالله وقاله السالفه كلها)
عبدالله عصب: وحنا مافكرت فينا وكلام الناس
فيصل: زي ماقالت جدتي نتمنى لها السعاده هذي مهما كان ربتنا وتعبت وجاء الوقت أنها تعيش حياتها وبطريقه اللي تبغاها
عبدالله: ليش تسوي كذا نوال محتاجتها أكثر من قبل
فيصل: حنا موجدين وماراح نتركها..الحين أبي أخبر مريم تروح معاي
عبدالله: أكيد يالله قوم
(وتوجهوا إلى غرفه مريم)
ــــــــــــــــــــــــ
دخل منصور بيتهم وراح غرفته وفتح جواله شاف مسج من مريم جلس على السرير عشان يقراه
(عـمـري وغـــلاي أنـتـه
عـشـقـي ومـناي أنـتـه
محد سكن دنيــاي قبلك ولابـــــعـدك
الـحـــب لـك وحــدك
والـــشوق لـك وحــدك
لا تـفـتـكـر أنــــساك
ولا أحـــــب بــعــدك)
ضم الجوال في يدينه: ياحبني لك يا مريومه بروح أخذ شاور سريع وأجع أكلمك آآآه ياكثر مشتاق لصوتك
وفز بسرعه ودخل الحمام (وأنتم بكرمه)
ـــــــــــــــ
مريم جالسه في غرفتها على جولها تظغط فيه في نفسها: غريبه أشفيه مادق يمكن رجع تعبان ونام
قطع تفكيرها صوت الباب يدق
قامت وفتحت الباب ناظرت مين يوم شافت أخوانها حطت أيدها على قلبها قالت في نفسها أكيد منصور فيه شي: أيش فيكم صاير شي
فيصل يتبسم: السلام عليكم
مريم: وعليكم السلام
عبدالله: مطولين عند الباب
مريم تبعد عن الباب: هاااا... حياكم
دخل فيصل وراره عبدالله وسكرت الباب
فيصل: ليكون بتنامي وزعجناك
مريم: لا عادي بس وجيهكم ماتبشر بلخير
عبدالله: أفااا ليش
مريم: ترى طيحتوا قلبي تكلموا أذا فيه شي
عبدالله: مريم احنا نبغى نخبرك بسالفه بس تفهمينا وتكوني قويه
(مريم تناظرفيهم ولا قالت ولا كلمه..جلس عبدالله سحبها من يدها وجلسها جنبه على السرير وجلس فيصل جنبها)
فيصل:مريم احنا بنتزوج وكل واحد منا بيعش حياته وأمي تعبت علينا حتى صرنا كذا وجاء الوقت اللي تشوف حياتها فيه
(مريم ساكته وتسمع بكل جوارحها)
كمل عبدالله لأن فيصل ماقدر يشوف وجه مريم لما تسمع الخبر ولف وجهه للجهه الثانيه
عبدالله: أمي بتزوج يامريم
مريم أتسعت عيونها أنفتح فمها من الصدمه: أنت أيش تقول(وحط أيدها على رأسها) أنا مو قادره أستوعب اللي تقول
عبدالله كسرت خاطره أخته: خلاص ماعاد ينفع شي أمي بتتزوج وغصب عن الكل جدتي حاولت فيها بس رفضت تبي تعيش حياتها وبطريقه اللي عاجبتها
(مريم تجمعت الدموع في عيونها ونزلت على خدودها بسرعه)
مريم: ليش تتزوج مافكرت فينا
فيصل ناظر في وجهها: لاتسوين في نفسك كذا أمي مو حاسه فينا
عبدالله: ولا فكرت مجرد تفكير وعشان هي أمنا نتمنى لها الخير
فيصل: وهو صادق ندعيلها بالتوفيق ونصبر وحتى لوعترضنا بتأخذ محمد بتأخذه
(مريم كان كلام أخونها خناجر تدخل قلبها بقوووه) وقالت وهي تكتم شهقتها: منو محمد هذا اللي يبي يأخد أمي علينا
فيصل: هذا صديق أبوي اللي وقف معي في الشركه وساعدني
مريم بصوت يقطع القلب: هذا عدو أبوي مو صديقه(تناظر فيصل وتحط عينها في عيونه) وقف معاك في الشركه عشان يأخذ أمي تكفى تكفى عطه اللي يبي بس أمي لااا
(فيصل نزلت دموعه وغصب عليه أخته تترجاه مافي يده شي)
عبدالله حزن أكثر يوم شاف دموع فيصل مسك يد مريم عشان تلف ويكلمها : مريم أيش في يد فيصل عشان يسويه أمي تبيه غصب أصبري عشان خاطري أنا أعرفك أقوى من كذا
مريم: ونوال ياعبدالله
عبدالله: جدتي تقول بتكلمها وبتفهمها
مريم: أعرفها أنا والله بتزعل أخاف يصير فيها شي
فيصل يمسح دموعه: لاتقولي كذا أنا خايف عليها بس أن شاء الله خير
عبدالله: يالله احنا بنروح وأنتي نامي
قام فيصل ومسح على شعرها بيده: نامي ولا تفكري كثير عشان ماتتعبين وبعدين أنا أروح فيها
مريم بصوت باكي: أشلون يجيني نوم وأمي بتتركنا
عبدالله: يالله أنا ماشي وخذيها نصيحه مني اللي مايفكر فينا مانفكر فيه(وطلع وهو يفكر في نوال أذا عرفت بيصير لها مثل مريم الله يعين)
فيصل جلس قدام مريم : عشاني أصبري أنا أذا شفت الأبتسامه على وجهك أنتي ونوال أحس أني ملكت الدنيا كلها
مريم تبتسم عشانه: الله لا يحرمنا منك
فيصل: يالله نامي بكره بتروحين الجامعه صح
مريم: أيه
فيصل: تصبحي على خير
مريم: وأنت بخير
قامت وقفلت الباب وراه وراحت جلست على سريرها وتبكي على تشت العائله بعد أبوها الله يرحمه(وفجأه دق جوالها كان منصور...مخصصه له أغنيه لو فاكر لـ الفنانه لطيفه عشانها الفنانه المفظله عنده)
مريم هي تذيد بكاء يوم شافت منصور يتصل: ماأقدر أكلمك أنا مخنوقه سامحني ياقلبي سامحني
(طبعا دق أكثر مره وبعدين مريم ظغطه جولها سايلنت وحطته على الكوميدينه بعيد عنها وحطت رأسها على الوساد وبعد صراع من الدموع والأهات والشهقات..أستسلمت للنوم)
ــــــــــــــــــــــــــــ
يوم الأربعاء
في صباح جديد/
على الفطور مريم مالها نفس وكمان فيصل وعبدالله والكل لاحظ مريم من جلست وهي ماأكلت شي
أم فيصل لاحظت هذا الشي بس ماتقدر تقول شي
الجده ترقبهم بس مافي يدها شي تسويه الأ أنها تواسيهم
نوال الوحيده اللي تأكل وماتدري عن شي ناظرت مريم
نوال: ليش ماتفطرين عشان نروح تأخرنا
مريم بحزن: مالي نفس يالله نمشي
فيصل: عبدالله وصلهم أنا بتأخر شوي
عبدالله وهو قايم: أوكي يالله خلونا نمشي
الجده: الله يحفظكم أنتبه على أخواتك
عبدالله يأشر على عيونه: من عيوني باااي
(طلعوا بسرعه)
الجده: أشفيك ليش تبي تتأخر ليكون مافيه دوام
فيصل: لاا بروح بس أبي أكلم أمي وأمشي
أم فيصل: هااا أيش عندك
فيصل: اليوم بكلم عمي محمد وأنا قلت لعبدالله ومريم(ويتنهد بضيق)بس باقي نوال
الجده: لاتخاف خل نوال عليه
الله يقدم اللي فيه الخير
فيصل وهو قايم: يالله حبيت أقولكم أني بردله خبر اليوم في أمان لله
الجده وأم فيصل: في أمان الكريم
ــــــــــــــــــــــــــــــ
وصلت مريم الجامعه وجلست على مقاعد في جانب الساحه الكبيره طبعا سرحانه وتفكر /
قطع تفكيرها: هاي قلبي
مريم: هلا نجلاء اشلونك
نجلاء: بخير أنتي كيفك
مريم: الحمدلله
نجلاء: أشفيك ليه وجهك متغير
مريم وطلعت الدموع: نجلاء أنا محتاجتك
نجلاء: أشفيك ياقلبي أنا معاك
مريم: أمي بتتزوج وتتركنا
ظمتها نجلاء لأنها حاسه فيها : أيش قاعده تقولي مستحيل خالتي تسويها
مريم بصوت باكي: لا سوتها وبتروح جدتي كلمتها وحاولت بس قالت تبي تعيش حياتها بكيفها
نجلاء بعدت عنها ومسحت دموعها: خلاص ياقلبي جدتي معها حق هذي حياتها
مريم: ونوال اللي ماتدري عن شي الله خايفه عليها
نجلاء بستغراب: نوال للحين ماتدري
مريم: أيه
نجلاء: ياعمري والله حاسه فيك
مريم تتبسم غصب: أخرتك على محاضرتك روحي قبل ما تبدأ
نجلاء بأبتسامه: لا أنا كنسلت كل شي بجلس معك
ـــــــــــــــــــــــــــ
من جهه ثانيه/
ناصر يكلم منصور: أيش رأيك اليوم تجون تسهرون عندي
منصور: فكره ماهي بشينه
ناصر يبتسم: خلاص أنا أشتريت فيلم على كيفك بنسهرعليه
وصل عبدالله وجلس: بتسهرون وين
منصور: بالليل بنروح عند ناصر
ناصر: بس هااا..لاتجون الأ وأنتم متعشين
منصور: أفااا ماهقيتها منك
ناصر: أعذروني والله أجار شقه وصرفه خلوها على الله
عبدالله: عذرك الجميل أهم شي فيلم رعب
ناصر: ولا يهمك
منصور:بس أنا أبي فيلم رمنسي
عبدالله: ليش تبي تتعلم منه
منصور: لا بس أبي أبسط نفسي
عبدالله: تنبسط طيب أخبر مريم بسوليفك
ناصر: هههه أذا عرفت عنك هالفكره أش بتسوي
منصور: لاااا..دخيلك أمس دقيت ماردت علي قلت يمكن تشوف المكالمات وترد الصبح بس ما دقت أكيد زعلانه مني
عبدالله: لا مو زعلانه منك بس متضايقه مررره
منصور: منو ضايقها لا تكون أنت أعرفك تعصب ماعاد تشوف اللي قدامك
عبدالله يبي يقهره: أنت مالك خص أمور عائليه
منصور: خبرني عبدالله والله قلقان عليها
ناصر: أخس يالقلقان
منصور: أسكت أشوف فيك يوم ياناصر.. عبدالله قول
عبدالله: أذا جاء الوقت أخبرك بس مريم لاتدق عليها لأنها مابترد اذا كانت متضايقه أنصحك بعد كم يوم دق
منصور: تراك خوفتني فيه شي
عبدالله عصب: خلاص قفل الموضوع أذا جاء وقته قلتك
ـــــــــــــــــــــــــــ
في الشركه/
دخل فيصل المكتب وجلس على مكتبه وشال سامعه التلفون ودق:
فهد كيفك...
أنا وصلت تعال...
خلاص أنتظرك...
مع السلامه...
بعد دقايق دخل فهد:
السلام عليكم
فيصل: هلا وعليك السلام
فهد: هاا بشر عسى خير
فيصل: من وين يجي الخير
فهد: فيصل لا تتفاول
فيصل: أمي موافقه وتبيه غصب
فهد: طيب أنت وش سويت مع أخوانك
فيصل: خبرت عبدالله وكان متفاهم ومريم زعلت شوي بس نوال ماعندها علم إلى الآن
فهد: وكل أمرك لربك وأن شاءالله بيفرجها
فيصل: ونعم بالله(وسكت)
فهد: والله ومايهون علي أشوفك كذا
فيصل: فهد بدق على محمد بن سلطان وأعطيه خبر
فهد: سوى اللي يريحك
فيصل شال السماعه ودق: أبي أخلص من الموضوع وأفتك
ثواني ورد: هلا والله
فيصل: السلام عليكم أشلونك عمي
محمد: وعليكم السلام هلا فيك فيصل
فيصل: الله يسلمك بس قلت أخبرك بلموضوع
محمد: تفضل
فيصل: متى تجي الله يحيك
محمد بفرح: خلاص بكره أن شاء الله
فيصل يبلع ريقه: الله يحيك في أي وقت في أمان لله
ــــــــــــــــــــــــــــ
في الصاله/
الجده: خلاص بكره تتزوجين وتنسينا
أم فيصل: لا ياخالتي أنتي في مقام أمي وهذولي عيالي كيف أنساكم
الجده: أن شاء الله..ونوال ترها ماتدري للحين
أم فيصل: ماعليك بترضى والبركه في جدتها
الجده: بس الجده ماتملى مكان الأم
أم فيصل: تتعود ماعليك
الجده: الله يعين مادري وش أخرتها
أم فيصل: ياخالتي توكلي على الله تبين أصبلك شاي
الجده: أيه والله وحطي التلفزيون على مسلسل جواهر يمكن جاء
أم فيصل: أبشري خالتي
ــــــــــــــــــــــــــ
بعد الغداء/
فيصل: جدتي قلت لمحمد وبكره جاي يخطب
الجده: خلاص أن شاء الله تفتك من السالفه وتسافر وأنت مرتاح
فيصل: خبرتي نوال
الجده: لا أنا بروح غرفتي ونادها لي
فيصل: جدتي حاولي فيها
الجده: أدري أنك خايف عليها بس هي لازم تزعل شوي
فيصل: خلاص أنا رايح أناديها
(طلع فيصل لنوال وراحت الجده غرفتها دقايق ونوال تدخل والأبتسامه على وجهها)
نوال: هلا جدتي كيفك
الجده: الحمدلله أنتي فاضيه
نوال: أيه ليش
الجده: أبيك في موضوع
نوال وهي تجلس: أنا أسمعك
الجده: أمك تعبت عليكم أنتي وأخوانك أي شي تطلبونه تعطيكم عيونها والحين أنتوا كبرتم وصار كل واحد يعرف حاله ومهتم في نفسه
صح والأ لا
نوال: صح
الجده: يعني خلاص بعد التعب كله لازم تعيش حياتها وهي حره
نوال: بس هي ماعليها شي فيصل ما تركنا نحتاج لأحد
الجده: أدري ماقصر بس أمك تبي تغير كل شي بالنسبه لها
نوال: جدتي مافهمت كلامك
الجده: أمك أذا تبي شي نحرمها والأ نقول سوي الله يريحك
نوال: طبعا اللي يريحها
الجده: أنزين اللي يريح أمك أنها تتزوج وتعيش زي ماتبي
نوال بدهشه: تتزوج ليش
الجده: هي تبي نقولها لا
نوال: أيه ليش تبي تتركنا
الجده: صح أنها بتزوج لكن ماراح تتركنا
نوال تجمعت الدموع ونزلت وبين شهقاتها قالت: ما أبي أنحرم منها كافي أبوي أنا مابسمح لها
الجده تضمها: تعالي أنا أمك وأبوك وأهلك كلهم بس لا تبكين دموعك غاليه علي
نوال وهي تبكي: لا ياجدتي ماصدق هالشي بيصير
الجده نزلت دموعها: لازم ترضين ياروح جدتك
نوال: ماأقدر أبعد عنها
الجده: بكره بيجي يخطب لازم نوقف معاها
نوال وبين دموعها: أيش أسمه
الجده: أسمه محمد
نوال بصوت بكي: والله لو قرب صوب بيتنا لأذبحه
الجده تمسح دموعها: خلاص قطعتي قلبي
(تنادي بصوت عالي) مريم يامريم
مريم فتحت الباب ودخلت: هااا ياجدتي..أشفي نوال
الجده: تعالي أجلسي هديها
مريم: حبيبتي خلاص لا تبكين أنا معاك
نوال تضم مريم: أمي بتروح وبنعيش بدونها
مريم تبكي: خلاص هذي حياتها أخترتها
نوال: ما بروح المدرسه أيش أقول لصاحباتي أمي تزوجت بعد هذا العمر
مريم تضمها بقوه وتهديها
الجده طلعت ما تحملت تشوف بنات ولدها يبكون
شافها فيصل قام ساعدها حتي جلست: جدتي أيش صار
الجده: والله يقطعون القلب
فيصل جلس: والله كنت خايف وخوفي في محله
الجده: ماعليك تزعل وترضى
فيصل: الله يهدي أمي
أم فيصل دخلت الصاله فجأه: الله يهديك أنت أخر زمن ولد يدعي لأمه
فيصل قام: أسف يمه ماكان قصدي
أم فيصل: عندي كلمتين بقولها وأروح
فيصل: تفضلي يالغاليه
أم فيصل: مافيه زواج والملكه بعد الأختبارت
(وراحت بدون ماتسمع رد فيصل)
فيصل ناظر جدته بحيره قالت: سوى اللي قالت عليه
فيصل بخيبت أمل: أن شاء الله
قبل أذن العصر بنص ساعه نزل عبدالله سلم وجلس: أشفيكم
فيصل: جدتي خبرت نوال
عبدالله: بشروا عساها تفهمت الوضع
الجده: أي تفاهم والله أنها تقطع القلب
عبدالله بعصبيه: كلها من أمي
الجده: لا تتكلم كذا عن أمك
عبدالله: غصب عني والله..فيصل قوم نشوف مريم ونوال
فيصل: ما أقدر أشوفهم وهم بالحاله هذي
عبدالله: هم محتاجين لنا الحين
الجده: قوم فيصل نوال ترتاح لك أذا كلمتها وتسمعك
فيصل وهو قايم: الله يعين
وراحوا وعلى أكتافهم هموم الدينا كلها
ودقوا الباب ودخلوا شافوا نوال دموعها على خدودها ناظرتهم ولا قالت ولا كلمه
فيصل بحنيه: نوال يكفي دموع أنا مقدر أتحمل
مريم بصوت باكي: أنا أتكلم معها بس ماترد علي
فيصل قرب مسك يدها: نوال لاتسكتين تكلمي طلعي كل اللي في قلبك
ناظرت نوال في عيون فيصل ذكرها في أبوها صوته حنيته طيبته...وبعد سرحان قليل في وجهه رجعت نوال ردت وبصراخ وبكى:أيــش تبين أقـووول أمـــي تتـزوووج طيب لــيــش أش نــاقصهااا عياااال وعندهـــا وأحلــى ذكــرى لزوجها الله يرحمه..رغد صديقتي ماااات أبوهــا وعمرها ثلاث سنين وأمهـــا فــي عز شبابهــا رفضت اللي تقدموا لها عشـــاااان عيالها.. وماعندها الإ رغد وراكان بـــس..وحياتها كلها أرخستهــا لعيالهــا..وحنــا أربعه بتروح تتركنـــاااا وين الـــــحب الـتـضـحـيه(وتمسك رأسها بيدينها)أكــره الدينــا لأنهـااا غــداره كـل اللــي أحـبـهـم وأبيهــم قـربـي تـأخذهــم منــي
(كلامها اللي خرج من قلبها الموجوع الحزين أثر على أخونها الكل نزلت دمعته تحرق خده من حرقة قلبها..ورد عبدالله بصوت كله ألم على حال أخته: لازم نرضى مهما كان لازم نفرح لها
نوال بصوت باكي: أذا رضيتوا فأنا مابرضى أنا بحتاجها أكثر منكم وأنا رايحه أكلمها
مريم بحزن:نوال والله كلمتها بس ماعطتني فرصه
نوال: بس أنا عندها غير هي تحبني
(قامت نوال بسرعه..وقامت مريم تبي تمسكها لكن فيصل مسك كتفهاوقال)
مريم أتركيها يمكن تغير شي
عبدالله: والله ما أظن
راحت نوال وهي تركض صوب غرفة أمها شافتها جدتها اللي كانت جالسه في الصاله تطلع الدرج وصلت نوال ودخلت من دون أستذان كانت تبكي وصوت شهقتها واضح ناظرتها أم فيصل استغربت من دخلتها/
نوال: صدق اللي سمعته يمه
أم فيصل: أيه حبيبتي لازم تقدرين شعوري
نوال تحظن أمها: بس محتاجه لك
أم فيصل بحنيه: وأنا ما بتركك
نوال: أحبك مالي غنى عنك
أم فيصل: السالفه مطوله أهتمي بدراستك ولا تشغلي بالك
نوال: يعني ماراح تتركينا
أم فيصل: خلي الكلام بوقته
نوال بخاطرها(يعني الموضوع برأسك)
طلعت من عند أمها وراحت غرفتها وتبكي ليش حياتها تغيرت ليش أذا حبت أحد وتعلقت فيه راح وتركها بغمضه عين
ـــــــــــــــــــــــــــ
دق جوال مريم ردت/
هلا نجلاء
نجلاء: هلا فيك كيفكم كلكم
مريم من غير نفس: بخير
نجلاء: خبرين أيش صار
مريم تجمعت الدموع: خبرنا نوال إلى الآن تبكي ولا تكلم أحد
نجلاء: ياقلبي عليها ترى منصور قلقان عليك يسألني عنك..وأظهار ماعنده خبر بالسالفه
مريم: طمنيه أني بخير وبكره أن شاء الله أكلمه
نجلاء: أن شاءالله بقوله سلملي على الكل بااي
مريم: أوكي بااي
ــــــــــــــــــــــــــ
في الليل/
(في شقه ناصر اللي على قده غرفه وحمام ومطبخ صغير وصاله وهو مستاجر بالرياض عشان يدرس في جامعه الملك سعود أهله في الخرج وكل ما حصل فرصه زارهم ...بخبركم أكثر عنه... ناصر جميل مررره وأبيض وعيونه وسعات لونها عسلي فاتح وفيها رموش كثير وجسمه حلو لما يلبس ثوب وشماغ وعقال يطلع جنااان طبعا يتظايق من الشباب في الجامعه يبون يسون علاقات معه في المول والمجمعات يضايقونه البنات وهو مايطيق الحركات هذي يكون أكثر الطلعات حاط الشماغ لثمه على وجهه يلبس نطارات)
ناصر جايب لهم عصير: الله يحيكم زارتنا البركه
عبدالله ومنصور: الله يسلمك
منصور: شغل الفيلم بسرعه متشوق له حيل
ناصر: أن شاءالله(قام داخل السي دي في الآب توب ويضغط فيه)
عبدالله راح فكره بعيد لاحظ منصور وجه المتغير سأله:
أشفيك ياعبدالله
عبدالله: ..... لا رد
منصور هز كتف عبدالله: أشفيك عبدالله أنا أكلمك
عبدالله: هااا...أيش تبي
منصور: لا السالفه فيها شي أنت متضايق ومريم متضايقه
ناصر شاف عبدالله مو على بعضه وشغل الفيلم وضغط أيقاف مؤقت وجلس
ناصر: أشفيكم
عبدالله: مادري أيش فيه يبغى يعصبني
منصور: خل عنك الحركات هذي أنا أعرف أذا فيك شي روح شوف وجهك في المرايه
وتعرف
عبدالله يناظر ناصر بستهبال: في وجهي شي
ناصر: تبي الصدق أيه أنت متغير من أمس وانت موعلى بعضك..عبدالله احنا أخوان قبل مانكون أصدقاء
عبدالله وينزل رأسه: وتشك في اللي تقوله أكيد أخوان بس أنا مافيني شي بس مقهور شوي
منصور: عبدالله فضفض اللي في قلبك احنا همنا واحد
ناصر: تعرف اللي يضايقك يضايقنا وفرحتك فرحتنا
عبدالله وحس نفسه أنه لازم يطلع الى في قلبه ولو سكت بتم السهره نكد لازم يقول ويفتك وينبسط معهم
عبدالله: أنا متضايق على أخواتي نفسيتهم تعبانه عشان...عشان(كان متردد)أمي بتتزوج
منصوروناصر علامه أستفهام على وجيههم ناصر ماعرف يرد خاصة وأنه موضوع عائلي
منصور بستغراب: أيش قلت
عبدالله: اللي سمعتوه
(وقال لهم السالفه كلها وبعدين هدوه وقالوا أنه النصيب وربي اللي كاتبه بيصير وبعدين كملوا يناظروا الفيلم حتى خلص وكل واحد راح بيته)
ــــــــــــــــــــــــــ
اليوم الخميس الساعه عشر وبعد الفطور جالسين في الصاله/
طبعا السكوت دارج بينهم بس صوت التلفزيون ونوال رأسها على رجلين أم فيصل ماتبي تبعد عنها ثانيه عنها تخاف ترجع وماتلاقيها أم فيصل تمسح على شعرها وكل هذا يصير قادم عيون الجالسين
ام فيصل: شوي يانوال بروح أجيب لنا شاي
نوال قامت بسرعه: بروح معاك
أم فيصل بابتسامه: تعالي جهزي الفناجيل (وراحوالمطبخ)
فيصل: جدتي اليوم بيجي محمد وحال نوال بيتم كذا طيب أذا درت
الجده: مانخبرها بشي إلى وقت الملكه
مريم تبكي: خايفه يصير فيها شي
عبدالله: لاتقولي كذا أن شاء الله خير
فيصل: أنا أيش قلتلك لاشوف دموعك لأنها غاليه علي
مريم تمسح دموعها: والله نزلت غصب عني
الجده: مافي يدنا شي ماسويناه الباقي على الله
فيصل: ونعم بالله
ثواني ودخلت أم فيصل ونوال وجلسوا وصبت شاي
أم فيصل..واستذانت مريم بتطلع غرفتها بحجه أنها بتذاكر لأن مابقي شي على أختبارات الجامعه دخلت غرفتها وحاولت أنها تفتح دفترها عشان تأخذ كم فكره بس أنها تذاكر صعبه عقلها مقفل ونفسيتها زفت
ــــــــــــــــــــــــــ
وبعد الغداء راحت أم فيصل ترتاح ومريم في غرفتها تذاكر وعبدالله راح السوق يشتري أغراض لضيوفهم اللي بيصلوا بعد صلاة العصر
في الصاله الجده وفيصل يسولفون عن الموضوع نفسه
وش بيصير (الله يستر)
الجده: خبرت فهد يجي معاكم
فيصل: لا ما قلتله بس عمي ومنصور خبرتهم
الجده: دق عليه يجي أهو مثل أخوك
فيصل: كنت بقوله بس ماحبيت أحرجه لكن أبشررري (وطلع جواله ويدق على فهد في الوقت نفسه طلعت نوال من غرفتها وصلت عند الدرج سمعت فيصل يكلم فجلست في نص الدرج)
فهد: هلا وغلا
فيصل: هلا فيك أشلونك
فهد: بخير أنت أخبارك
فيصل: الحمدلله اسمع العصر بيجي محمد أبيك تكون معنا
فهد: فاجتني والله بس بحاول
فيصل: ترى جدتي ملزمه تجي
فهد: دام خالتي في السالفه خلاص أنا جاي مايصير خطرها الأ طيب
فيصل: ايش عليك جدتي عزمتك أكيد بتوافق
فهد: ليكون أخذت على خاطرك
فيصل: أزعل من الكون كله الأ أنت
فهد: فديتك أنا يالله ماطول عليك
فيصل: مع السلامه(وقفل وناظر جدته) خلاص جاي عشانك
الجده: الله يخليه وتفرح فيه أمه أن شاء الله
فيصل: أمين الله يسمع منك(وهو قايم) يالله بروح أشوف المجلس مبخر وجهزت الشغاله كل شي
(بس تفأجى في نوال نزلت من الدرج مصدومه من اللي سمعته وبدت دموعها تنزل دون توقف)
وبين شهقاتها: فيصل طلبتك أنك تطرده ماأبيه يأخذ أمي
فيصل بحنيه: مو بكيفي أطرده وأمي تبيه لو رفضته كان طرده
الجده: نوال وش في يد فيصل عشان يسويه تعالي ياروح جدتك تعالي
نوال بصوت مبحوح من البكي: فيصل أنت ماعمرك رديتني..هالمره بس والله ما أطلبك بعدها
فيصل يلف بظهره لجهة الباب عشان محد يشوف دموعه
نوال تركته وناظرت جدتها: جدتي قوليله يمكن يسمعك
الجده بين دموعها: فيصل يحبك ومايردلك طلب بس اللي طلبتيه صعب ينفذه
نوال تصرخ بأعلى صوتها: ماأحبكم ماأحبكم أكرهكم أكرهكم
(وتركض وتطلع الدرج بس في أول درجه ماتملكت نفسها وطاحت كان صوت طيحتها قوووي)
شافتها الجده بس رجلينها مو شايلتها عشان تروح عندها: الحق على أختك يافيصل
فيصل على باله أنها لقت شي قدمها وكسرته عشان تحط حرتها وقهرها فيه ولف وجهه بهدوء ونصدم لما شافها طايحه على الأرض وركض عندها ورفع رأسها ويضربها على خدها بخفيف : نوال نوال اصحي
الشغاله جت من المطبخ مفجوعه: بابا أيش فيه نوال
فيصل ودموعه مأخذه مجارها: بسرعه جيبي مويه أو عطر
وتركض بسرعه
الجده تمسكت في كتف فيصل وجلست: أشفيها أختك قوم وديها المستشفى
فيصل: جدتي أرتاحي بس غايبه عن وعيها
وصلت الشغاله مويه أخذ فيصل في يده وقرب يرش وجهها
لم حست فتحت عيونها ورجعت غمضتها ضربها على خدها بخفيف وفتحت عيونها
الجده: يمه نوال تسمعيني
نوال بهمس: جدتي أنا تعبانه
الجده: فيني ولا فيك فيصل وشيلها ودها غرفتها عشان ترتاح
فيصل: سامحيني يالغاليه والله أني خايف عليك أكثر من روحي بس ....(وخنقته العبره)
نوال لفت لجهه الثانيه: أبي أرتاح ودني غرفتي
وشالها فيصل وطلع الدرج طلعت مريم من غرفتها وصرخت : نوال أشفيها يافيصل
فيصل: أفتحي الباب بسرعه
وفتحت الباب ودخل وحط نوال على السرير وغطاها زين
ولف لمريم شافها تبكي وألف سؤال يدور في رأسها
فيصل بحنيه مسح دموعها بيده: مريم لا تخافي بس تبي ترتاح خليك جنبها أذا أحتاجت شي تكوني موجوده
مريم هزت رأسها بأيه لأنه لو تكلمت بترجع تبكي مره ثانيه
وطلع راح غرفة أمه عشان يقولها بنوال لأنه محتاجتها بجنبها
ــــــــــــــــــــــــــ
بعد صلاه العصر وصل محمد وعياله سلطان وماجد ونواف وزوج منى حمد وزوج ملاك ياسر
وتفقوا على كل شي وصارت خطبه رسميه
وبعد حلول الليل/
مريم ماتركت نوال لحظه واحده جابت لها عشاء وأكلتها جلست أم فيصل معهم حتى نعست وراحت غرفتها تنام..الجده طمنتها مريم على صحه نوال وراحت ترتاح في غرفتها..عبدالله دخل وطمن على أخواته وراح خبر فيصل أن نوال رفضت تشوفه أهي الغاليه والدلوعه بنسبه له وترفض تشوفه تقطع قلبه يوم قاله عبدالله وراح غرفته وجلس على سريره وما فكر الإ في أمل اللي دايم تواسيه وأخذ جواله وأرسل مسج لها أذا صاحيه بترد وأذا نامت مابترد عليه
(تـكفــيـن لا مـن طـلبتـك لا تــــــردينــي
تـكفـيــن يــا مـهـجـة الـدنيــا ومــا فـيـهـا
أبـقـهــر قـلــوب نــاس مــا تــدنينـي
قــولـي أحـبــك وأنــا يـا بــنــت أبـشـفـيـهـــا)
ـــــــــــــــ
غرفه نوال/
نوال جالسه على سريرها وبجنبها مريم:
مريم: ليش سويتي كذا والله فيصل مايستاهل
نوال: خلاص فكينا من السالفه هذي
مريم: لا مابفكك إلى متى ما بتشوفينه طيب هو أيش ذنبه والله أنه يخاف علينا من نسمه الهواء أذا مرت
نوال: أبي أرتاح الحين وبكره يصير خير
مريم تمسح على شعرها: أنتي ماشفتيه يوم طحتي كان خايف عليك لدرجه أنه وصاني ماأتركك لحظه
نوال: وأنا مستحيل أزعل منه لكن أبي أرتاح الحين
مريم بأبتسامه: والله أني عارفه أن قلبك وسيع وماتشلين بخاطرك على أحد
نوال ترد الأبتسامه: وش رأيك تعطيني دفتري في حاجه تذكرتها وأبي أكتبها
مريم: من عيوني
(وقامت أخذت النوته وقلم ورجعت جلست وعطتها نوال وهي تناظر فيها وش تكتب)
نوال: وش تبين يالزقه
مريم: قولي اللي تقول أنا أعرف أنك تحبيني
نوال: لا أنا ماأحبك وماطيقك بعد
مريم: ههههههه ماراح أصدقك
نوال مسكت القلم وبدت تكتب:ههههههه شايفه نفسك مادري على شنوو
مريم تناظر وتقرى المكتوب اللي هو(يــاراحــل عنــي غـصـب يـعـز علــي أودعـكـ
أعــفـينــي مـــن حــرق الدمــع
مــاأقــول غــير الـلـه مــعـكـ
مــافـادنــي كــثر الـرجــاء
الـقـلــب داااايـــم تحــرجـه
هـــذا أختيــارك وانـسـحـب
مــاأقـول غــير اللـه مـعـكـ)
ــــــــــــــــــــــــــــ
من جهه ثانيه/
سمع رنه مسج وأخذ جواله وفتحه وكان المسج من أمل
(أحـبـــك مــــوت فـــي غـيــابــك
ولا شـفــتـك أحـــبــك زود
أحــبـــك فـــي أبــتــســــام الـوقـت
أحــبــك فــي جـفــــا أيــامــي)
وعلى طول بس قرأ المسج ودق عليها بعد كم دقه ردت
أمل: هلا والله
فيصل: هلا فيك حبيبتي كيفك
أمل: الحمدلله أنت أخبارك
فيصل: عايشين
أمل: وليه تقولها من غير نفس فيك شي
فيصل يتنهد: قولي أيش مافيني أحس بصداع غريب
أمل: سلامتك ياحياتي جعل اللي فيك فيني
فيصل: لااا تقولي كذا ترى أزعل لو صار فيك شي أنا وين أروح
أمل: الله يخليك لي ولا يحرمني منك قول أمييين
فيصل: أمييين أنا لما أحس الدنيا تقفل في وجهي بس أسمع صوتك أحس أني أبتديت حياتي من جديد
أمل: هههه يازين كلامك ألا أقولك أشلون جدتي وخالتي والبنات
فيصل: بخير اليوم تعبت نوال شوي بس الحين طيبه
أمل: ياقلبي عليها ليه درت بخطوبه خالتي
فيصل: أيه درت وترجتني أوقف الموضوع بس والله مو بيدي شي أمي راكبه رأسها والحين نوال ماتبي تشوفني
أمل: ماعليه أصبر مو هذي الدلوعه شوف الحين تدلع عليك وبعدين هي ماتقوى تبعد عنك بكره ربي يفرجها
فيصل: الله يسمع منك يوم السبت بسافر ماأبي أسافر هي مأخذه على خطرها مني
أمل: ليش وين بتسافر
فيصل: الأمارات سفره متعلقه في شغل
أمل: بطول هناك
فيصل: يمكن يومين
أمل: الله يعين يومين بيمروا عندي سنتين
فيصل: الله لهدرجه فراقي صعب يا حبيبتي
أمل: وأكثر تروح وترجع بالسلامه
فيصل: الله يسلمك خدمه ولاشي
أمل: سلامتك أنتبه على نفسك
فيصل: أن شاء الله أوامر ثانيه عمتي
أمل: هههه لا تسلم
فيصل: تصبحين على خير
أمل: تلاقي الخير
ـــــــــــــــــــــــــــ
(في اليوم الثاني الساعه 12 ظهر)
صحت نوال من النوم أخذت لها شاور سريع وصلت ونزلت الصاله وجلست مع جدتها وأمها ومريم/
نوال: سلام عليكم
الكل: وعليكم السلام
نوال: ليش ما صحيتيني معاك
مريم: قلت تصحين براحتك
الجده: أشلونك نوال اللحين
نوال بابتسامه عشان تطمن جدتها: الحمد لله بخير
الجده: عساه دوم أن شاء الله
نوال: يمه أنا جوعانه متى يطلع الغدأ
أم فيصل: جاهز بس يصلوا أخوانك نتغدى سوا
نوال ترجع رأسها لوراء بهمس: ياربي طولوا
مريم بهمس: اليوم الجمعه أكيد بيتأخروا وألا نسيتي
نوال بهمس: تبين الصدق نسيت..أحسب الخميس يعني بكره مدرسه أووووه ياربي
مريم: ترى فيصل من يوم صحى أفطر وراح يصلي وهو متضايق على باله مانزلتي زعلانه بس قتله نايمه
نوال: طيب أنا مو زعلانه منه زعلانه على الحياه اللي أنا عايشتها
مريم: أيش نسوي في الحياه أذا كل شي يمشي غصب عنا
نوال: لا الحياه حلوه بس احنا ماعرفنا نعيشها وكل شي كان بيد أمي
مريم: خلاص أنسي عيشي الحياه الحلوه اللي قلتي عليها
نوال: كنت بعيش لكن موافقت أمك دمرت حياتي
مريم بحزن: لا تقولي كذا حياتك هي حياتي
نوال تضم مريم
قالت بهمس: مريم محتاجتك أكثر من أول
مريم تمسح على شعرها: كلنا محتاجين بعض
بعدت نوال ناظرت جدتها وأمها علامه استفهام على وجيهم:
هههههههه يمه جدتي بس أشتقتلها
الجده: الله يخليكم لبعض
أم فيصل: أمييين
مريم: ههههههه يانصابه اليوم تشتاقين لي وبكره تطردين من البلكونه
نوال: ماعاش اللي يطردك
مريم: أمزح معاك
أنفتح باب الصاله ودخل فيصل وعبدالله كانوا في سوالف بس ناظروا الكل في الصاله وسكتوا فجأه يناظرون بعض
أم فيصل: أشفيكم واقفين تعالوا أجلسوا
عبدالله تدارك الوضع بسرعه: السلام عليكم
الكل: وعليكم السلام
وجلسوا بجنب الجده
أم فيصل: مريم تعالي ساعديني
مريم: أمري يمه(ناظرت في نوال وشدت على يدها وقامت راحت المطبخ)
عبدالله: أخبارك نوال
نوال: بخير
فيصل: أشلونك اللحين
نوال بابتسامه: الحمدلله أنتوا كيفكم
فيصل بنفس الأبتسامه: بخير بشوفتك
وناظر جدته: جدتي بكره بسافر
الجده: الله يحفظك ياروح جدتك
عبدالله: لا تنسى الحلاوه
فيصل:ههههه أي حلاوه الله يهديك بروح أشتغل ليل نهار وأخلص وأرجع مايمدي أخذلك شي
عبدالله: خلاص مره ثانيه أذا رحت جيب معاك
فيصل: من عيوني
الجده: لاتروح هناك وتعب نفسك أرتاحلك شويااات
فيصل: أبشري جدتي
نوال: ليش تسافر
فيصل: ملزم الشغل علي والأ عن نفسي ماأبي أبعد عنكم لحظه واحده
نوال بأبتسامه: تروح وترجع بالسلامه
فيصل: تسلمين يا حبيبة أخوها أنتي
مريم بصوت عالي: يالله تعالوا.....تعالي يا الجوعانه
(جلسوا حول طاوله الطعام)
نوال: أقول أسكتي يادبه أنا ماأفطرت أكيد بكون جوعانه
مريم: أنا دبه مقبوله منك
نوال: أمزح معاك..يارب ماصارت تتقبل شي مني
مريم جت بترد بصرخ بس أم فيصل قطعت الحوار: سموا بالله أتركوا الهواش عنكم
ــــــــــــــــــــــــــــ
في بيت أبو منصور/
سعود يهمس في أذن أمه: ماما ما عاد أقدر أصبر أبي بلاستشين2
أم منصور: أنا خايفه على عيونك منه
سعود: ما بلعب كثير بس بعد ماخلص المذاكره ألعب شوي
أم منصور تناظر منصور: منصور العصر فاضي
منصور: أيه تبغين شي
أم منصور: أيه خذ سعود يروح يشتري سوني معاك
نجلاء من الفرحه أبتسمت في وجهه منصور وغمزت له
منصور عشان يقهرها: خليها يوم ثاني
أم منصور: من زمان قالي ولا أشتريته له..حرام أكسر خاطره اليوم وأنا مافيني على الطلعه..كان رحت مع السواق وجبت اللي يبي
نجلاء تدقه بيدها وبهمس: منصور روح أشتري له احنا المستفيدين
منصور: وجع ليش تدقيني..خلاص يمه العصر أن شاءالله
سعود قام ينط ويصفق: ههيي هههيي
تضحك أم منصور فرحانه من فرحته
منصوريهمس لنجلاء: الولد تجنن مافيها كلام
نجلاء بهمس: خله يجن أهم شي..تجيب سوني ونلعب أسمع لا تنسى جيب اسطوانات أكشن..مغامره..تحدي
منصور: تدرين أنك خبله بس الحمدلله ياربي(ويرفع يدينه) جيتي في عبدالله مايرحم أحد
أمل: هههههههههه ماعليه خله يطلع حركات البزران من عيونها ههههههههه
منصور: ههههههههههه والله أنك صادقه
نجلاء: ضحكتوا من دون سنون أن شاءالله
ـــــــــــــــــــــــــــ
في بيت أم فهد تحديدا في الصاله/
أم فهد: نجاح تدرين أن أم فيصل بتتزوج
نجاح: صدق يمه من بتأخذ
أم فهد: اللي ساعد أخوك وفيصل في الشركه أظن أسمه محمد وأمس أتفقوا على كل شي
نجاح: وليش توافق عيالها ماقصروا عليها بشي
أم فهد: والله أني شايله هم بناتها هم محتاجين لها
نجاح: الله يعينهم
أم فهد: اللهم أمين
(نزل فهد من الدرج وكان ماسك بأيده ساره ويمشون سوا أول ماشافتها نجاح فتحت أيدها عشان تحظنها وتركض ساره وتروح عند أمها تضمها)
نجاح: تعالي يا روح وقلب أمك أنتي(وباستها)
فهد وهو يجلس: الحين هذا كله شوق توها كانت معاك
نجاح وهي تضمها حيل: والله ما خليك يادنيتي لو مئه خطابه عند الباب
أم فهد: ههههههه مئه عاد تركينهم عشان ساره
نجاح وهي تبوسها: يمه هي حياتي وعمري وأنا صبرت على الشقاء عشانها وبسوي اللي يرضيها
فهد: وينهم المئه ماشفت واحد منهم
نجاح: ياخبل مافيه أحد بس لو أفترضنا
فهد: أهاااا...قولوا كذا من قبل
أم فهد: الله يخليها لك ولا يحرمك منها
نجاح: أمين يمه
فهد وهو قايم: يالله أصلي ورجع جهزي ساره بنروح سوبرماركت مع السلامه
نجاح: أن شاءالله
ـــــــــــــــــــــــــــــ
راح منصور وسعود وأشتروا سوني بلاستيشن2 وكل ماشاف سعود لعبه جديده شرها ورجعوا البيت كان في أسقبلهم نجلاء ساعدتهم وشبكوا السوني وبدوا لعب ماحسوا في الوقت الأ يأذن المغرب
ــــــــــــــــــــــــــــ
في الليل بعد صلاه العشاء/
في المطبخ نوال تسوي عصير برتقال ومريم تسوي فطاير
نوال: أنا خلصت العصير
مريم: باقي تحمر من فوق وأطلعها
دخل عبدالله: ليش طولتوا
مريم: خلصنا بس باقي تحمر فطاير وأجيبها أخذ كأسات العصير وبنجي
عبدالله: طيب يالله بسرعه(وأخذ الكأسات وطلع الصاله)
فتحت نوال الثلاجه وطلعت العصير: يالله بروح والحقيني
مريم طلعت الفطاير من الميكرويف: خلاص جهزت
(وراحوا جلسوا في الصاله)
الجده وهي تأكل: ماشاءالله بناتي طبخات
مريم: نعجبك ياجدتي..الأ بالله عطوني رايكم
أم فيصل: مررره طعمها حلو
عبدالله: حلوه مررره خاصه حقت الجبن
فيصل:تهبل تسلم يد من سواها
نوال: لا تنسون العصير أنا مصلحته
عبدالله: صدق على بالي من السوق
نوال: يمه شوفي عبدالله يتريق علي
أم فيصل: بالعكس حلو أذا ماعجبك لا تشرب
نوال: أيه أذا ماعجبك لاتشرب أعطيني الكأسه
عبدالله: أصبري أخلص بعدين اعطيك
فيصل: ماعليك منه العصير يهبل شوفي كيف يشرب كأنه أول مره يشوف عصير وهذا الدليل
مريم تقوم وتأخذ معها عصير: يالله أنا بروح أذاكر تصبحوا على الخير
الكل: وأنتي بخير
فيصل: نوال أنتي كمان ذاكري عشان مابقى على الأختبارت شي
نوال من دون نفس: أن شاءالله
فيصل: شدي حيلك أبيك ترفعين رأسي
نوال: طيب أبشر
عبدالله: السنه الجايه وش بتدخلين علمي أو أدبي
نوال: لسا مافكرت بس يمكن أدبي مع رغد
الجده: الله يوفقك ياروح جدتك
نوال أبتسمت: تصدقين ياجدتي هذي الكلمه ماأحب أسمعها من أحد غيرك
الجده: ههههه أجل وش خليتي لأمك
نوال: أمي دايم تقول حبيبتي فمأحب أسمع حبيبتي من أحد غيرها
أم فيصل: ههههه وأنتي حبيبتي وأنتي كل شي
فيصل: أجل أنا وش تحبين تسمعين مني
نوال: ممممم يكفي أنهم يسموني دلوعه فيصل
فيصل يدف عبدالله عشان يقوم وتجي تجلس بجنبه: وخر أبعد هناك تعال بجنبي يا دلوعه أخوها
عبدالله: بقوم بس بيجي يوم والله لأذلك فيه(وقام وراح جلس جنب جدته)
نوال راحت جلست جنبه وهي تضحك فرحانه
عبدالله: جدتي الله أذا أعطيت البزران وجه يكلونك كلك
الجده: وأنت أش عليك منهم..الله يديم المحبه بينهم..
نوال لسا مبتسمه عشان تقهره
رد فيصل: وش اللي حارك وبعدين أنت البزر والأ قولي أنت أكيد غيران
عبدالله: قال أغار أخر عمري أغار عليك (وكاش عليهم بيدينه وقام)أروح أنام أبرك مع السلامه
الجده: ههههه مادري أشفيه هالولد يعصب بسرعه من أتفه شي
أم فيصل: بس الحلو فيه يرضى بسرعه
فيصل: يالله نوال بتنامي بكره وراك مدرسه وأنا بعد بأنم وراي سفر
أم فيصل: أيه فيصل قلنا دلعها بس مو كذا
فيصل: لا يمه فهمتي غلط قصدي ماطمن حتى أوصلها غرفتها وبعدين بروح أنام
أم فيصل: هااا..الله يخليكم ومايفرقكم
فيصل ونوال: أمييين
ــــــــــــــــــــــــــــــ
راح فيصل غرفته وحط رأسه بينام الأ وصوت المسج وصله على جواله أخذه من الكوميدينه وفتحه كان المسج مقطع صوت من أمل..يقول
(ديـــر بـالـكـ عـلى حـالـكـ عــسـى دنـيــاك تـحـلـى لكـ وأذا بـتـطــــول الـغيبــة
فـال الـلـه ولا فـالـكـ
أمـانــه خلـنــا نـشــوفــكـ
عـساهـا تـسـمــح ظــروفـكـ وعـسـى مـايـمـنـعـكـ خـاطـر وأعـيـش أيـامـي أقـبـالكـ ديـر بـالـكـ عـلى حـالـكـ )
فيصل في نفسه: وأنا بعد ودي أشوفك بس وش أسوي في أمك ماأدري ليش تحرمني من شوفك أو أطلع معها أكيد عبدالله يعاني مثلي(فكره/ أم منصور قهر أو عناد فيها..منعت فيصل وعبدالله شوفه أمل ونجلاء أوحتى يطلعون مع بعض بس مكالمات على الجوال أم منصور مأخذ راحته عند مريم على الأخر)
دق فيصل على أمل:
أمل: هلا وغلا
فيصل: هلا فيك أشلونك
أمل: الحمدلله أخبارك أنت
فيصل: بخير وشكرآ على المقطع حبيبتي
أمل: العفو ياقلبي..بس أنتبه على حالك
فيصل: كم مره عديها
أمل: والله من خوفي عليك
فيصل: تصدقين من سمعت الأغنيه حسيت أني محتاج أشوفك والحين بعد
أمل: وأنا بعد أبي أجلس معاك وأحط يدي في يدك وسولف بس....
فيصل: أيش رأيك أغامر وأجي عندكم ألحين وأقول لعمي أبي أشوف أمل زوجتي ألحين وغصب
أمل: والله أمي الأيام هذي تدور المشاكل دواره شكلها بتحصلها عندك
فيصل: أنا بقدم زواجي اللي فيها فيها..أسمعي أمولي أقولك شي
أمل: عيون أمولي
فيصل: مأبي عيونك كيف بعدين تشوفيني
أمل: ههههه أجل أيش تبي
فيصل: دوم هالضحكه..أبي تسمعيني بأذنيك
أمل: طيب قول أسمعك
فيصل: لم نتزوج راح نسكن في بيتنا عبدالله بيأخذ بيت ويستقر فيه وأنا ماأقدر أترك جدتي ونوال تعرفين مالهم الله الأ أنا
أمل: وأنا راضيه بكل اللي تقوله وبكون معاك
فيصل: الله لا يفرقنا قولي أمين
أمل: أميين..خلاص روح نام وراك سفر الله يعينك
فيصل: أن شاءالله تامرين على شي
أمل: سلامتك ياقلبي تروح وترجع بالسلامه
فيصل: الله يسلمك حياتي مع السلامه
ــــــــــــــــــــــــــــــ
يوم السبت
يوم جديد في صباح باسم/
أمل صحت على المنبه كالعاده راحت غرفة نجلاء
أمل: نجلاء قومي تأخرتي ترى منصور صحي
نجلاء ترفع أدينها وتشوف الساعه: خلاص صحيت
أمل: ترى مابرجع مره ثانيه قومي من الحين يالله بروح أشوف سعود
نجلاء: لا لا خلاص قمت
(راحت أمل غرفه سعود وجلست جنبه)
أمل: سعود يالله قوم المدرسه
سعود وغصب يفتح عيونه: أنا تعبان مابروح المدرسه
أمل: يالله عن الدلع قوم
سعود: مابروح يعني مابروح(وغطا رأسه)
أمل: أصل ماينفع معاك الأ منصور
سعود: مأبي منصور أبي أمي
أمل بخبث: أبشر
(وطلعت تنادي منصور)
أمل: منصور يامنصور
منصور: نعم
أمل: سعود مأيبي يروح المدرسه شف لك صرفه
منصور: طيب وين أمي
أمل: تحت أكيد بالمطبخ
منصور: فرصتك يامنصور
أمل: ههههه شكلك تغار من سعود مره
منصور: أنا ماأغار من بزر لكن قاهرني الدلع اللي فيه
أمل: خلاص روح
ركض منصور ودخل على سعود وبصوت عالي: ســـعـــود
سعود فزع صار قاعد: يييمه..ليش مخرعني
منصور: قوم تجهز والأ والله ليجيك طراق عمرك ماذقته
سعود: بس أنا تعبان
منصور: كذاب سهران على السوني والحين تقول تعبان قوم قبل ماتجي أمي والأ أرويك شغلك
أم منصور تدخل على صراخ منصور: أشفيك على أخوك تصارخ
منصور: يقول مابيروح المدرسه
أم منصور: طيب أطلع أبتفاهم معه
منصور: طيب بنشوف (طلع وسكر الباب واره)
أم منصور: ليش ماتبي تداوم
سعود: فيني نوم يمه ماأبي أروح المدرسه
أم منصور: ليش أمس كنت تلعب بلاستيشن
سعود: حبيت لعبه وجلست ألعبها ماشوف الوقت الأ متأخر
أم منصور: خلاص هذي أخر مره أوعدني ماتلعب بالليل أذا وراك مدرسه
سعود وينط في حظن أمه: أوعدك يا أحلى أم
أم منصور تبوسه وبعدين رجع نام وغطته زين وطلعت من غرفته
كان منصور ينتظرها يوم شافته تخرعت ماتوقعت فيه أحد
أم منصور: بسم لله..أنت أشفيك واقف هنا
منصور طنش كلامها: كعاده سمحتيله بس المره هذي وهذي مليون مره
أم منصور: وليدي وبكيفي وأنت أنتبه لجامعتك ولا تحط عقلك بعقله
مارد على أمه ونزل تحت عشان يفطر مع أبوه
ــــــــــــــــــــــــــــــ
على الفطور
من جهه ثانيه/
الجده: أكل يافيصل أبيك هناك تهتم بصحتك
فيصل: لاتاخفين ياجدتي راح أكل شوي وأشتغل شوي وأرتاح شوي
نزلت مريم وجلست: سلام
الكل: وعليكم السلام
مريم: فيصل جهزت أغرضك وشنطتك بعد
فيصل: مشكوره يالغاليه
قام عبدالله: يالله أنا ماشي مع السلامه
مريم تشرب كأسه الحليب: أنتظر أبروح معاك
أم فيصل: لاتستعجل عليها أشربي على راحتك يمه
عبدالله: أنا في السياره لك خمس دقايق أذا طولتي بروح
مريم: لا لا..أنا جايه وراك..نوال يالله
نوال تتبسم: عادي أروح معاك يافيصل
فيصل ناظرها: شلون عادي السياره وصاحب السياره في خدمتك
نوال بغرور: خلاص روحوا طقت كبدي منك أنتي وعبدالله
مريم تناظرها بطرف عين وهي ماشيه: أخبر عليك عبدالله..وشوفي مين بيوصلك بكره أذا سافر فيصل
فيصل: مريم توكلي مع السلامه(ناظر نوال)دلوعتي يالله نمشي
نوال قامت: هههه يالله
فيصل: مع السلامه
الجده وأم فيصل: الله يحفظكم
طلعوا فيصل ونوال وشوفوا سياره عبدالله واقفه...لما شافهم عبدالله طلع رأسه من الدريشه
عبدالله: هييي أنتي قد الكلام اللي قلتيه لمريم
مريم جالسه في السياره تضحك
نوال سكتت خافت من عبدالله أذا في رأسه شي يسويه أذا جات لصدق ماهي قدها
رد فيصل: أيه قدها عندك مانع
عبدالله: سألتها ماسألتك..أذا أنت صادق تدور أحد بكره يوصلها
نوال ناظرت فيصل
فيصل: توصلها ورجلك فوق رقبتك والأ أقطع عليك مرتبك اللي أعطيك كل شهر
عبدالله: بدينا باللعانه(وحركه السياره ومشى)مع السلامه أخوي أشوفك على خير
فيصل ونوال ماتوا ضحك على حركته بعدين ركبوا السياره ومشوا
ــــــــــــــــــــــــــــ
على الفطور في بيت أبومنصور/
أبومنصور: أشفيك أمل ليه ماتفطري فيك شي
أمل كانت سرحانه وأنتبهت: هاااه..لايبه سلامتك مافيني شي بس مالي نفس
نجلاء بدفاشه: لاااا..يكون عشان فيصل بيسافر اليوم
أمل عطت نجلاء نظره حاده
نجلاء: لا لا لا..خلاص والله ماأعيدها
أم منصور: شوفه كيف طلع نفسه وصار له أسم مثل أبوه وأنت ياحظي لاشغل ولامشغله
منصور: يمه فيصل ماقصر..ومرتب أبوي يوصله وزياده بعد
أبومنصور: أيه ونعم فيه..وأنا خلاص يكفي ماعاد أقدر على الشغل والتجاره
أم منصور: الأ قول ماأقدر من الفشيله اللــ...
يقاطعها منصور بعصبيه: يمه بس خلاص(وقام بسرعه)يالله يابنات تأخرنا
أمل ونجلاء قاموا بسرعه لان الكلام ماعجبهم
ــــــــــــــــــــــــــــ
في الشركه بمكتب فيصل/
فيصل مشغول يجمع الملفات المهمه اللي بيأخذها معه بخصوص مشروع دبي
دخل فهد بسرعه في أيده ورقه: فيصل متى قلت موعد الطائره
فيصل: مادري قلت يدور حجز العصر أو المغرب
فهد: قوم بسرعه المفروض أنت بالمطار..الطائره الساعه11
فيصل: الساعه11 ليش مالقوا حجز الساعه5 أو6
فهد: مافيه فرق..باقي ساعتين
فيصل: خلاص بروح البيت أخذ أغراضي وأخذ الموظفين اللي بيروحوا معي ونتقابل في المطار
فهد: صار يله روح ولاتتأخر
قام فيصل بسرعه وراح بيته وفهد من صوب راح نادى الموظفين اللي بسفروا مع فيصل وتوجهوا للمطار
ـــــــــــــــــــــــــــــــــــ
وصل فيصل البيت ودخل مستعجل شافته أمه/
أم فيصل: فيصل يمه..أشفيك
فيصل: يمه أبي شنطتي الحين بمشي المطار
أم فيصل: لحظه بجيبها لك
جلس في الصاله عند جدته:
سلام ياجدتي
الجده: هلا فيصل..أنت ماشي الحين
فيصل: أيه والله كنت ناوي أروح عالعصر بس يمكن مافيه حجز
الجده: تروح ترجع بالسلامه
نزلت أم فيصل: تفضل ياولدي
وأنتبه على نفسك
فيصل: أن شاءالله(ويأخذ شنطته)يالله في أمان لله أشوفكم على خير سلموا على أخواني
|
26-09-11, 12:48 AM
جديد مواضيع قسم الارشيف
العرض العادي
