كاتب الموضوع :
سلافه الشرقاوي
المنتدى :
القصص المكتمله من وحي قلم الاعضاء
السلاااااام عليكم
عارفة اني اتأخرت بس انتي عارفة انشغالي الفترة اللي فاتت
وبعدين حد قالك تنزلي البارت وانا نايمة؟؟؟اهو ضاع مني اول تعليق وبردت خلاص
بس ولا يهمك....كام سولي عندي؟؟؟؟؟
نيجي للبارت
وبجد قلبي وجعني
ناخد الخفيف الاول
مبرووووووووك لبسنت الحمل اللي كلنا كنا منتظرينه معاهم . وصراحة لو مكنتش عاصرت حالة مشابهة لصديقة ليا كنت سألتك ازاي حامل اثناء البريود. بس حتى صديقتي كلنا سألناها وقتها وهي قالت انها حالة طبية بتحصل عند بعض السيدات...يالا عقبال بسنت صاحبتي دي جابت توأم وكانوا اول توأم في دفعتنا
معتز...انت كدا في السليم...ومعلش استحمل اللي ياسين حيقوله لإنك فعلا اذيته كتير واذيت اخوه واختك. بس تصرفك كان صحيح وياريت يكفر عن بلاويك السابقة
وياريت بأه تبتدي بداية صح فعلا تشتغل فيها وتسيبك من الهجص اللي بتعمله دا
الاستاذ عبد العزيز....قاسيت كتير في وجود حنان وبعد موتها. بس زي ما بنقول الخال والد، وانت اديت المهمة على اكمل وجه
عبير....صدمة قوية جدا
خيانة من الداخل ومن قلب مكتب المدير
اوقات فعلا الواحد بينتقم من نفسه اذا ماقدرش يوصل للي بيحبه. وصراحة عبير دي خلتني اعيش حالتين لياسين متناقضين فعلا
يعني هي حبت ياسين الشاب الحليوة الواثق اللي يؤمر فيطاع، وهي كبنت او حتى سبق ليها الزواج عاشت في وهم الافلام القديمة وان المدير بيتجوز السكرتيرة فقالت لما اعلقه واتجوزه بس هو عمره ماشافها
يمكن هي مكانتش ملفتة لانها قدامه على طول، او لانها عمرها ما اعترضت على اوامره. على العكس من نور اللي وقفت قصاده وشخطت فيه وورته العين الحمرا فعشان كدا التفت ليها. اصلا الراجل اللي شخصيته قوية ما يلفتش انتباهه الا الشخصية القوية زيه او اللي تقف في وشه، ونور عملت كدا حتى لو بدون قصد
طبعا طارق كان عاوز اي طريقة يغيظ بيها ياسين اللي بياخد كل حاجة، وهو شايف انه ميستحق، وكمان اخد نور فكدا الحكاية وسعت منه. يمكن مكانش عاوز انتقام قوي بس معتز وسواس خناس وشجعه على كدا، فلف على عبير وعرف يوقعها في لحظة ضعف ورغبة منها في الثأر لانوثتها اللي حستها اتجرحت بشدة
عمر....صدمة احساسه بإنه ظلم امه ويمكن اتسبب في اللي جرالها كبيرة. طبعا هو ما اتسببش بشكل مباشر لكن يمكن لو جه بدري شوية كان سمع صريخ امه وقدر ينقذها وينقذ معاها العيلة كلها. بجد دموعه وجعتني وهو بيلوم نفسه. ويمكن هو دا اللي حيخليه متشدد في موقف مع ياسين ويمنعه عن مراته، وفعلا ممكن يصر على الطلاق بينهم وهو شايف ان له حق في كدا
ياسين بأه...تصدق بجد صعبت عليا؟؟
تناقض فظييييييع بين اللي قالته عبير عنك وبين اللي شفته في البارت دا. حسيت اد ايه ممكن الحب يحول الانسان 180 درجة. على رأي اخواننا الشوام يضرب الحب شو بيزل
ياسين اللي اتكلمت عنه عبير دا كائن خرافي..اسد جسور هصور زي ما بيقولوا..شوية واقول ادهم صبري( لا معلش موصلتش للدرجة دي يعني..كله الا ادهم)
قوة شخصيته في الشغل وصرامته وحكمته كلها صفات تخلي اي بنت تحبه وتعشقه وتموت فيه، بغض النظر عن تقل دمه وجلافته وغطرسته اللي كنت عاوزة ارقعه قلمين عليها في الاول
بس من بعد ظهور جنيته الحبيبة اتحول لشخص تاني، شخص مش بعيد ينتمي لبرجنا برج الجوزاء بتقلبه الغريب وهو شوية يدوبها بكلام حلو وشوية يشخط فيها وهو مش عارف انه غيران عليها بس ملوش سلطة عشان مش مراته
وبعد الزواج شخصية تالتة عرفت الحب الحلال وحلاوته وعرف معنى السعادة مع زوجة تحبها وتحبك وتفهموا بعض من نظرة عين وخلاص الحياة بقى لونها بمبي
يظهر حافظ الاجرب على قول ام رنا ويقلب الموازين بكذبته ويخلي ياسين يتغير مع حبيبته ويبدأ يسيء ليها قولاً وفعلاً لدرجة تخليها تقرر الهروب منه
بس صدمة اختفائها من حياته واكتشاف الحقيقة خلوه يحس بقيمتها ومدى حبه ليها
واللي وجعني بجد مشهده وهو بيحاول يستنشق هوا الصبحية ويتخيل انفاسها فيه، وكمان لما شافها في المستشفى واستنشق زفيرها...بجد استاذة في المشهد دا وشكلي حاستلفه منك في قصتي الجاية 
حسيته بجد طفل مضيع امه، وأول ما شم ريحتها النوم داعب اجفانه وهديت كل مخاوفه ورجعت نبضات قلبه تدق باتزان
بس شفت بأه انتقام ربنا؟ يعني كنت بتتريأ عليها عشان بتقع من عالسرير...اديك وقعت ولا حدش سمى عليك
لكن حقيقي وجعني شخط الدكتورة فيك وكأن ليها تار بايت معاك، لا والممرضين ازاي يجرؤوا يمدوا ايدهم عليك ويشدوك....لا بجد يضرب الحب شو بيزل
والدمعة دي كمان قضت عليا نهائي. اصعب شعور لما تشوفي دمعة الرجل بتبقى فعلا دليل قهر وقهر الرجال شين على رأي المثل
سوسو....انا مستنية البارت الجديد وبعد الايام
وياويلك تنزليه وانا نايمة تاني وإلا مش حاعلق وقد ازعر من انزر
سولي...دمتي في حفظ الرحمن
|
23-09-11, 05:58 AM
جديد مواضيع قسم القصص المكتمله من وحي قلم الاعضاء
العرض العادي
