المنتدى :
الشعر والشعراء
القلوب البيض تالي الوقت وش فيها حزينة .؟!!
يا سقى وقت ٍ من احزان الليالي كان خاوي !!
ويا سقى وقت ٍ مضى ما فاح صدري من حنينه !
.
يوم انا داله .. وحظي بالهناء مده رهاوي
ما يمد الا الجزيل ولا يمد ... الا السمينه !
.
يوم انا عايش خليّ .. ولا بعد شفت البلاوي
لا شكيت من المحبه لا ولا عشت بغبينه !!
.
قبل تبدى رحلة احلامي على ( درب المناوي )
ان بكيت ابكي ( يغيب الحزن ) في وقته وحينه
.
لين من هي في دروب العشق .. خلتني امتساوي
حيث صارت فرحة ايامي على ايديها رهينه !!
.
اذكر اوقاتي معاها .. حلمنا بالود ضاوي !
اذكر شعوره وشوقه .. عطفه .. وزين لينه !!
.
واتذكر ما مضى بالحب .. من عين النداوي !
تجذب المعلوق لا من سلهمت بالرمش عينه !
.
كيف سرت الدرب عاشق .. غاوي ، ومانيب غاوي
وانتهى زين العمر .. ثم ابتدى لي كل شينه !
.
كيف مرتنا الليالي ,, كيف اخلفنا الهقاوي !!
والقلوب البيض تالي الوقت وش فيها حزينه ؟؟
.
اشهد ان البعد ما يرحم وما هوب ياوي
لين ضاق ابه النسم ( قلبــــي ) وبيح له كنينه !
.
ليه بكاني وانا وافي ومن طبعي ... حياوي
وفي وجيه الناس بانت دمعة ٍ كانت سجينه !
.
والله اني من الليالي الموجعه .. قلبي شقاوي
عقب غابت عن عيوني طفيت ( انوار المدينه )
.
لو تحيزمت الصبر من بعدها .. مانيب قاوي
ولو عقدت العزم والا لو ( تغشتني السكينه )
.
المشاعر في هواها ما ( تزبنها الجلاوي )
مير راحت من يديني والمشاعر به سجينه
.
جرح فرقاها بصدري جرح ما له من .. مداوي
قلبي اللي من بعدها .. ما يريد الا ضنينه
.
و والله اني عايش ٍ من عقبها عيشة خلاوي
وما بقى من العمر مدري كم بقت لي من سنينه ؟
.
يا عساها في سعاده يا عساها في غناوي !
ويا عسى من هو فقدها يا عسى ربي يعينه
لــ المتألق / متعب بن فهد
|
14-06-11, 08:06 PM
جديد مواضيع قسم الشعر والشعراء
العرض العادي
