كاتب الموضوع :
بوح قلم
المنتدى :
القصص المكتمله
نزل الصبح ناوي يطلع لشغله مر من الصاله كالعاده الكل نايم في هالوقت وهو ماشي التفت ومن باب المطبخ لمح شي شد انتباهه رجع عاقد حواجبه واستغرب منها حاطه راسها على الطاوله وبيدينها ضاعطه على خصرها وواضح انها غافيه وعند راسها بنادول وكاس فيه باقي شي واضح انه اعشاب تاركه نصه ونوع دوا ثاني قرب لعلها ترفع راسها جته رغبه يحط يده على كتفها او حتى يناديها بأسمها الي عمره مانادها فيه تحرك اكثر لها لكن ماحست حاول يحرك شي عشان يصدر صوت ينبهها فزت بسرعه ورفعت راسها وعت بصوت سحب الكرسي وهو واقف عند راسها مانتظرت ولافكرت وقفت ناويه تطلع بس سئلها بسرعه لانه عرف نيتها .. وش فيك ليش نايمه هنا ؟؟
انحرجت من نفسها وحقدت على الغبا الي احيانا يخلي الواحد مايفكر .. ماكنت نايمه
بغى يحرجها وهذا الشي الي صار يستعذبه ويحبه .. أي واضح والدلليل اني لي ساعه داخل ماحسيتي الا من صوت الكرسي
فعلا وصل لمبتغاه وصار وجهها احمر وانخنقت منه زياده على الالم الي ماخلاها تنام طول الليل ومن بعد الحوار الي دار بينهم صار يشتد
ثارت مثل عادتها وكلمته بنبرة تحدي .. مالك شغل فيني ان شالله انام بالشارع
كظم غيضه من كلمتها تقول كلام اكبر منها .. قصري صوتك وبلا طولة لسان
بسرعه جفلت كانها انغزت وماقدرت تخفي حركتها وحطت يدها على جنبها وعظت شفتها وهو يراقبها ومامنعها الوجع الي غير وجهها من الكلام .. الي يدق الباب يسمع الجواب
تغيرت نظرته بسرعه وسئلها .. وش فيك يعورك شي
لحظة صمت دققت فيه لاول يتخلى عن رسميته با التعامل معها ويتكلم بصدق يمكن ماانتبه لنفسه لكن هي انتبهت له ولاحظت اسلوبه اخذت نفس بعد ثواني من الالم رفعت يدها وهزت راسها ... لالا مافيني شي بروح اشوف متعب
وطلعت للصاله ومنها للدرج وهو يتابعها لين اختفت وهو طلع لشغله
.................................................
استغرب وهو يشوفها تدور بالصاله ورايحه جايه تجهز الفطور ماتعود احد يقوم قبله ويجهز له شي ابتسم مجامله لها .. صباح الخير
مشت له .. صباح النور يالله الفطور جاهز
.. طيب بس قولي للشغاله تجهز الفطور للطيفه عشان تاخذ دواها >> نزلت راسها للارض ماقدرت تعترض بعد ماشافتها وبنفس الوقت مااعجبه هالاهتمام لاحظ عليها الشي وهو بعد عنده خيارين صعبين يتركها وهي عروس ويروح لطيفه ولا يترك لطيفه وهي مريضه ويجلس عندها حط يده على شعرها وحركه بسرعه .. وش قلنا مانبي زعل هي مريضه ومايصير اتركها وهي محتاجتني
غرقت عيونها بدموع وقفت بمحجرها يمكن من حال لطيفه يمكن من مرضها يمكن من نفسها او من عبدالله كفتهن بيدها وهي تتذكر كلام لطيفه عن عبدالله او أي رجال مايحب الشكوى حطت لطيفه بين يديها خريطه لخفايا عبدالله واسراره سمعت كلمته .. روحي اسبقيني وانا بس بروح لها شوي واجي نفطر مع بعض
من دخلت لغرفتها وهي تكابد القهر الي مع كل موقف يزيد اجزمت ان هدى ماراح تذخر جهد انها تاخذ عبدالله منها تربعت على الكرسي وهو يدخل والشغاله تتبعه بالفطور طلبها تنزله وتطلع جلس جنبها .. يالله افطري عشان تاخذين علاجك
رفعت عيونها الكسيره له تراقب نظرته .. ما ابي اكل
..ليــــش ؟؟
نزلت راسها .. مااشتهي
..مو على كيفك لازام تفطرين
,, عبدالله الله يخليك اتركني وروح افطر مع زوجتك واتركني
.. حتى انتي زوجتي
.. يوه قلت لك ماابي ماابي
.. خلاص اهدي " وش رايك تروحين تفطرين معنا >>هوعارف انها ماراح تطاوعه لكن يبي يهديها ويخفف خوفها
اومت بيدها .. لا انا ابي انام
ماحب يضغط عليها وهو عارف ان نفسيتها تعبانه ..خلاص براحتك الاكل عندك اذا جعتي افطري
وطلع وخلاها وراح لهدى
..........................................
فتحت و ارمشت بعيونه رفعت ظهرها ورجعت بسرعه ارخته متيبس من نومتها رفعت يدها وصارت تتمغط وتحاول تتاكد انها ماكانت تحلم تقريبا شبه متاكده انه كان واقع عاشته ماكان حلم سبحت فيه لحالها وهو مايدري عنها والدليل نومتها الي عورت ظهرها بس استغربت اكثر انه تركها نايمه وهي ماتشوف له اثر تلفت بالغرفه ماله اثر
قامت من سريرها وغيرت ملابسها ونزلت تحت وهي على الدرج تسمع اصواتهم يتكلمون وباين الفرحه بصواتهم وصلت عندهم .. صباح الخير
.. صباح النور>>و سحبت الكرسي وجلست جنب ام ناصر وعيونها تسترق النظر له كان ملاحظ حركاتها وسكناتها مدت يدها للاكل تحس بشبع من فرحتها حطت يدها على خدها وصارت تتأمل الاكل انتبهت لام ناصر تكلم ناصر .. اقول ياوليدي يعني البارح يوم وصلت لو ماسمعنا صوت التكسير ماكنت قومتنا
انبسط من سؤال امه كأنها تتعمد الي قالته .. لايمه بس انا قلت اشرب واقومكم بس انتم صحيتوا يوم طاح الكاس من يدي
وهي منزله راسها ومن غير ماترفع نظرها حكت راسها باصبعها وما حست الابصوت ام ناصر تكلمها .. وين سرحتي يانوف ليش ماتاكلين
رفعت راسها بسرعه ودارت عليهم بنظرها .. هاه معك
.. الحين لازام ماتسرحين الي كنتي تفكرين فيه قدام عيونك
لا ارديا رفعو ا انظارهم وتلاقت ببعض نزلت راسها وهو يطالعها بلغة العيون مايفهمها الاهو وهي التفت لابوه .. اسمع ياناصر بكره ان شالله بنسوى عشا لرجعتك
..ماله داعي تتعب نفسك
.. خلاص انا كلمت عمامك واتفقت معهم
.. براحتك يبه
قام ابو ناصر .. انا بروح اتقهوى
قامت ام ناصر بحركه مقصوده متعمده من الاثنين .. وانا بقهويه افطرو انتم براحتكم >> ومشت عنهم
بس اختفوا جلست وماهي قادره ترفع راسها بعد مده رجعت بكرسيها ناويه تقوم .. وين رايحه ؟؟
.. شبعت بااطلع لغرفتي
.. يعني المكان الي انا فيه تهربين منه
.. لا انا ماعاد اهرب الظاهر بها السفره انت تعلمت الهروب وانا تعلمت المواجهه عن اذنك >>ومشت وخلته يضحك لتلميحها المباشر
...........................................
في شغله عقله ماهو معه ماقدر يشيلها من راسه كانت حالتها صعبه والمشكله تكابر تتحامل على نفسها بس ماتحسسه بحاجتها له اخذ جواله من الطاوله قدامه يفكر يتصل بمها وهو متوقع انها ماراح ترد اكيد جوالها صامت ومثل ماتوقع ماردت المشكله جوالها مايعرفه وحتى لوكان يعرفه ماراح ترد والمشكله الاكبر انه ماهو قادر ينساها حتى بالشغل يمكن حس بشفقه عليها حتى اكثر من نفسها
عزم امره بسرعه لم اغراضه بالشنطه وشالها ورجع للبيت خلاص ماعاد قادر يصبر
من وصل القى نظره بالمطبخ ماكانت موجوده طلع فوق وقف عند باب الغرفه فكر يدق الباب لكن تراجع وقرر يباغتها عشان يشوفها بوضعها من غير ماتمثل عليه فتح الباب ودخل شافها نايمه ومع انه وجهها واضح عليه التعب بس كانت مرتاحه بنومها ماعرف وش تفسير تصرفه وبعد ماتطمن كانه وبخ نفسه على حركته تراجع طالع من المكان لــــــــــــــكن نبهه وصحاها صوت جوالها عدلت نفسها وشافته واقف فركت عيونها لعلها خزته بنظره غريبه تركت جوالها الي يدق وصرخت بوجهه .. انا الف مره قلت لك لاتدخل الغرفه هالمكان يتعذرك
نفخ منها لو هي بتموت ماتترك طولة لسانها .. وانا الفين مره قلت لك لاتطولين لسانك انتي ماتوبين
.. اول تتوب انت وبعدين انا
عطاها ظهره نوى يقصر الشر ويطلع .. زين زين ردي على جوالك
وقفت على السرير بسرعه ونزلت .. ليه مجنونه تاخذني على قد عقلي
لف لها .. اسمعي يابنت الناس انا مالي خلق عليك وعلى طولة لسانك اقصري الشر وردي على جوالك يمكن احد يبيك ضروري
طلع وهي من المغص الخفيف الي هجم عليها استسلمت ورمت ظهرها على السرير وردت .. هلا نوف
.. وينك ليش ماتردين على جوالك
.. كنت بعيده عنه وش عندك داقه بهالوقت مالك بالعاده
.. أي بكره ابغاك تجين عمي مسوي عشا
.. وش المناسبه لايكون لنجاحك
.. لا وانتي الصادقه لرجعة ناصر
وقفت بسرعه ماتدري ليش فرحت من قلبها يمكن عشان اختها يمكن عشان نفسها يمكن الاثنين ؟؟؟ .. صدق ناصر رجع !!متى؟؟
.. البارح بالليل
.. طيب قولي لي وش صار بينكم وشلون تلاقيتوا
.. شوي شوي اذا جيتي قلت لك وقولي لمها تجي معك
..طيب خلاص ضفي وجهك باكمل نومتي
.. اوكي باي
.. بايات >> وحذفت الجوال ومدت يدينها على السرير رجعت بيدها لمست جنبها الي من البارح ينغزها ومضايقها الالم الي يجيهيا من فتره للثانيه تركت هالافكار على جنب ولقت نفسها تدور بمحيط نايف ودخلته عليها وسكوته الغير طبيعي عنها بعد دقايق انتظم نفسها ورجعت تغط بنوم عميق من تعب البارح
.................................................. .............................
تتوسد القهر والالم والندم والحسره على الماضي والغبن من الحاضر والخوف من المستقبل اصعب شعور ان يبتلع الانسان الجمر بيده
على وسادتها حطت خدها ماعاد عندها قدره حتى على البكا بقدر ماعاشت مرتاحه والحياه عطتها كل الي تبي كل شي راح بغمضة عين
طلع صوتها وكلمت السكون الي يخيم بالمكان لعله يتحرك ويصرخ ويعينها على الصراخ "" ماعاد لك احد يالطيفه خسرتي اخوانك وخسرتي زوجك وخسرتي ابوك الكل ربح الاانا خسرت كل شي وش اقول!! لوعندي اخت افتح لها قلبي اناعندي بدال الوحده ثلاث خسرتهم لو عندي ابو يرفع الضيم عني!! ابوي عايش ومالي عين اشكي له حالي >> استلقت وقابلت السقف "" يارب انت اعلم بحالي سامحني وريح بالي
هذا وقته ماراح يتاخر اكثر من كذا اكيد اليوم وبكره بالكثير لكن بعدين وش راح يكون مصيري معك ياعبدالله راح اخسرك مع الي خسرت مثل كل يوم يدخل يحاول يواسيها يجبرها على الاكل وعلى اخذ العلاج ويطلع ويتركها تدور في دوامة الوحده
.................................................. ...............................
.. خلاص يمه ماعاد اقدر اعيش معه
.. موهذا الي عاندتيني وتزوجتيه عشان فلوسه
.. انا مواول ولااخر وحده تتطلق يعني تخرب الدنيا اذا تطلقت
تكلمت بسخريه منها ومن برودها .. لاوالله ماراح تخرب تتطلقين اليوم تلقين الخطاب بكره صف عند الباب
.. لاتستهئزين فيني عالعموم انا ماطلعت خسرانه لاتنسين المؤخر مبلغ حلو
..لاتنسين انتي ان الطلاق رغبتك واكيد راح تتنازلين عنه
.. انتي ليش تسدينها بوجهي
.. لانها مسدوده خلقه ومو انا الي سديتها انتي الي سديتيها وضيعتي نفسك
انجنت من شعورها بالخساره وانها طلعت منه منهزمه .. انا ماراح اسمح له يسجني كذا حتى بيت لحالي ماعندي راميني وسط هالقبيله الي الظاهر حتى هو مايعرف اسمائهم
.. هذي مشكلتك يوم نصحناك قلتي ماحد له دخل فيني الحين بعد مالنا دخل كلي طبخ يديك
.. المفروض مااتكلم معك انتي تحبين تشمتين فيني
هزت راسها بحرقه .. انا اتشمت فيك !! بس انا ماراح ارد عليك لان الكلام معك مامنه فايده
وتركت نوال المتمسكه بشرها الانسانه الي رغم غلطها الواضح مارضت تعترف فيه
.................................................. ......
. الشــوق زااد ..
وخابر الشوق لازاد ...
قلبي لواني مااجي لك يجي لكي..
يالي غلاك بداخلي ماله ابعاد
تبطي ولااحد من خفوقي يزيلك
بعد المغرب بغرفته متربع بالاراض واوراقه قدامه والغرفه فوضى من اوراقه الي ملت المكان كان الباب مفتوح
طلعت تفكر فيه للحين ماعندها علم بقرارة نفسه الي تعرفه انه من طلع من غرفتها الصبح مارجع وصلت فوق وكانت غرفته مفتوحه ماتدري هل لها عنده حاجه اوالشوق دفعها الى الان عيونها ماارتوت من شوفته ماعادت تقدر على فقده
مشت لها ووقفت على الباب لقته محتاس بشغله تقدمت شوي وانقرت بااظفرها الباب تنبهه رفع راسه ونزل النظاره على جنب شافها مقابلته وعلى شفتها شبه ابتسامه .. تعالي ليش واقفه
تقدمت شوي .. لا مابي اعطلك بس كنت بستئذنك ودي اروح للسوق اشتري لي اغراض عشان العشا بكره
.. اجلسي وبشوف اسمح لك ولا لا
فهمت مقصده وعرفت انه ماراح يرفض يمكن هذا الي تدوره وتطمح له بس هذي هي نوف دائما ثقيله بمشاعرها .. ااااا بس شكلك مشغول
.. طيب قربي شوي
تقدمت خطوات منه مد يده وسحبها من يدها واجبرها على الجلوس تثنت رجولها تحتها .. خير وش تبي مني
لم الورق على جنب وعدل جلسته وصك يديه ببعض .. نوف ماتلاحظين انا ماجلسنا مع بعض وتكلمنا
نزلت راسها .. انا مامنعتك عن الكلام
.. عندك استعداد تسمعين ؟؟
هزت راسها بحرج ..اسمعك
استرسل بكلامه وهو يطمح انه يوصل لداخل .. ماظن راح اقول اكثر من الي قلت اول بس يمكن لنتي وتقدرين تستوعبينه
فضلت تكون مستمعه وتترك له الكلام وتخلي الحروف تمتد لجروحها وتداويها وتقدر على السماح الي يطمع فيه منها شافها راغبه تسمعه
وسئلها .. تدرين ان المفروض ارجع بعد شهر تتوقعين ليش اختصرته وجيت >> انتظر اجابتها بعد برهة صمت هزت راسها بالنفي
.. لاني خفت اجي والقاك طالعه من البيت
وهي منزله راسها .. انا ماقلت اني بروح
.. بس ماقلتي انك راح تستنيني
رفعت راسها وناظرته بشوية عتب لانها ماقدر يكتشفها .. كنت اظن انك تعرفني من غير مااتكلم
زحف بجسمه وقرب لها .. لاتنسين انك ابعدتي عني مده ماهي بسيطه خلتني ماعرف كيف تفكرين انتي تغيرتي يانوف
ابتسمت على جنب .. انا ماتغيرت بس انت ماكنت تعرف نوف اذا نجرحت
.. والحين وش قرارك
.. انت وش تقول ؟؟
.. انا اقول اني ماقدر استغني عنك وان حياتي بدونك مالها طعم ولالون واني عرفت قيمتي عندك من الي شفته بعيونك يوم رجعت
قدرت له هالكلمات الي بالفعل طيبت مابقى اكتفت انها تسكت لكن تكلم .. وانتي ؟؟
بسرعه حطت عينها بعينه .. وش فيني ؟؟
.. ابي اعرف قرارك النهائي >> حط يده على صدره .. وانا عند وعدي ماراح اجبرك على شي ماتبينه
وقفت ببطئ والتفت عنه وفكرت بكلمه توصل احساسها من غير ماتنحرج .. مادام عيوني قالت لك ليش تبي الكلام يطلع من لساني مو يقولون لغة العيون اصدق لغه
وقف وراها ومن اكتافها لفها له .. كنت ابي اذني تأكد لعيوني
طولت مطخيه راسها للارض وهو يستنا يشوف عيونها بيدها رفع راسها شاف دموع هـــــاديه تشق طريق على خدها بهدؤ استغرب منها عقد حواجبه باستفهام .. وش فيك ليش تبكين ؟؟
مسكت يده الي مازالت مستقره على ذقنها وضمتها بين يديها وهو يتابع تصرفاتها بصمت .. اشتـــقت لك ياناصر """"""
ابتسم بفرح خلاص سقطت حصونها انتهى عهد المكابر انتهت ايام التحامل على الروح اقرت بالي داخلها وخلته يسمع باذنه ويشوف بعيونه الي تحس فيه صدقت مع نفسها ومعه سحب يده من بين يديها وقربها لصدره حتى تناغمت انفاسهم حط يده على ظهرها وهي مسلمته كل ماتمكلك اكتفت من الصمت وشبعت من البعد وارتوت من الصد صار الوقت للمشاعر الصادقه تفرض نفسها وتقضي على شوائب الحياه
بعد فتره ابعدها عنه .. مارح تروحين للسوق !!
رفعت نظرها له بسرعه ونزلتها بخجل من عيونه الي اكتسحتها هزت راسها .. اذا تسمح لي
مسك يدها ومشى معها جهة الدولاب وهي تتبعه .. اول اوريك هديتك
وفقت معه قدام دولابه وهي تناظره يعبث بااغراضها يدور على الي قال عليه ..هديتي !!
طلع من الدولاب كيس صغير وهو يطلع العلبه الفخمه الي داخله .. اكيد معقوله انساك معقوله ناصر ينسى نوف
مدت يدها واخذتها .. ولانوف تقدر تنساه
.. طيب الحين تجهزي عشان اوديك تشترين الي تبين
..انت !!بس انت مشغول
رفع يدها .. افضى لك بسرعه قبل لااغير رايي
ضحكت وطارت بسرعه من يديه وطلعت تركض .. دقايق واكون جاهزه
وهو لاف بجسمه يتبع خطواتها
هنا استقرت بهم رحلة الضياع ووطئت اقدامهم ارض الامان ووصلت بهم سفينة الهجر الى شاطى الوصال وارخ عليهم صباح الحب سدوله بعد ان انهو ليل البعد الطويل
ناصــــــــــــــر ونــــــــــــــوف
.................................................. ..
برق ورعد .. ذي حالتي دون غِيمْه
والخد سالت من ذواريف هتان
الحال حاله والليالي ظليمه
واضداد دنيا صارت اليوم بـ انسان
حطت متعب بينها وبين مها على سرير مها وخالجها شعور بالكلام ورغبه عارمه بتفريغ محتوى صدرها
استلقت الثنتين على السرير وناظروا للسقف همست بصوت هادي يشبه احساسها .. تدرين يامها ناصر زوج نوف رجع
بنفس الوضع ومثل حال ساره .. زين اكيد نوف بتحس بالاستقراربرجعته
حطت يدها على راسها .. اكيد نوف تحبه وتعذبت بوجوده وتعذبت اكثر بغيابه
عدلت نفسها واتكت على يدها .. تدرين انا ماعرف عن حياة نوف عمري ماسمعتها تتكلم عنه اختك احس انها احيانا غامضه
شخصت بعيونها فوق .. نوف تزوجته من غير حب وهو كان يحب غيرها لكن سبحان الله الف قلوبهم وشعورهم البارد صار حب احرقها واحرقه صارت بنيهم مشكله تسببت انه تنزل حملها ومن بعدها قررت تتركه لكن هو ماتركها ورجعها غصبا عنها وعاشت معه وهي صاده عنه وصاد عنها لين بالاخير ترك المكان لها وسافر
تتابع الكلام وتسمع بشوق كلام اول مره تسمعه .. الله شكله يحبها بس وش المشكله الي سوت فيهم كذا
فركت جبهتهاا .. ناصر كان يحب بنت خالته زوجوها اهلها ولد عمها وهو زوجته امه نوف لكن بعد ماتطلقت بنت خالته حاولت تخرب حياتهم وارسلت رسايل من جوالها خلت ناصر يشك فيها وصار الي صار
رجعت استلقت وتذكرت كلام لطيفه عن نوف انها قدرت تدمر حياتها احتقرتها اكثر واكثر واوجعها قلبها على الاخوه وصلت الرحم الي تصبح شبيهه بالورقه اليابسه تفتتها لطيفه واشباها بدون رحمه صفنت فتره وهي تلعب بشعر متعب الي يتوسطهم .. اقول ساره انتتي صاير بينك وبين نايف شي
دارت بعيونها من غير ماتتحرك توقعت ان مها حاسه بشي ببرود ردت على سؤالها باجابه وسؤال .. لا "ليش
.. لا ولاشي بس يعني انتم المفروض متزوجين وفـ بيت واحد ...........
قطعت كلامها الي تتلعثم فيه حتى تلاقي لها مكان تبداء من عنده .. المفروض لكن احنا غير
استقعدت على السرير .. ليش غير ليش ياساره تخلون حياتكم مع بعض مثل السجن وتحكمون على هالطفل يكون سجان لكم مجتمعين بس لانه محتاجكم انتم مااختروا مصيركم الله هو الي كتبكم لبعض
غمضت عيونها وحركت راسها يمين وشمال ماتحب تسمع هالكلام .. خلاص يامها خلاص ماظن بيوم يكون لي واكون له الايام اجبرتنا على بعض لكن مااحد يقدر يجبرنا نتقبل بعض
.. بس انتم تعترضون على شي صار باختياركم
سكرت الموضوع وسكتت شوي وووتكلمت
نزل للصاله يدور مها توجه لغرفتها الباب قبل يلامس اصبعه الباب وقبل يستئذن استوقفه الكلام
.. الله وش كثرودي اطلع من زمان ماشفت الشارع احس البيت جدرانه طابقه على صدري
.. طيب اطلعي من الي مانعك
تنهدت وجلست وقابلت مها ..ماحد منعني لاني ماطلبت من احد
فهمت تلميحها .. طيب جربي واطلبي
حطت يدها عند رقبتها .. لو على قطع رقبتي مااطلب منه عندي اموت بمكاني ولا اطلب منه طلب
هزت كتفها .. خلاص لاتشكين
.. ودي بكره اروح لعزيمة نوف >> رجعت استرخت .. يالله خيرها بغيرها
كف يده وتراجع وراه وطلع من البيت كلمتها هزته حركت بداخله شي ماقدر يلقى لنفسه تبرير
..................................
..مصمم ياوليدي ماتاخذنا معك
.. يمه الله يهداك صعب عليك تروحين بالسياره وانا سفرتي بكره وبعد بكره ان شالله راجع يعني بس تتعبين على الفاضي
.. مشتاقه لخواتك ياوليدي ودي اشوفهم
نزل عند رجولها ماخفت عليه دموعها الي تستئذن تنزل على تجاعيد وجهها السمح سحب يدها وحبها .. يمه تكفين لاتعذبيني واذا سفرتي بتضايقك اكنسلها
تجلدت على نفسها وكفت دموعها ماتبي تضيق صدره .. لايايمه سافر الله يسمح دربك وسلم لي على خواتك
هز راسه وابتسم .. تكفين يالغاليه لاتزعلين مني انا مااحب اثني كلمتك بس السفر يتعبك ولو سفرتي مطوله لاخذك معي لو اشيلك على راسي
رتبت على كتفه ومسحت راسه بيدها كانه ولدها الصغير الي ماراح يكبر .. يسلم راسك يايمه انا مازعل منك بس تعرف اشتقت لهم
.. بحاول يمه اشوفهم اذا صار معي وقت لاني يوم وراجع
.. روح ياسلمان الله يحفظك
..........................................
بزاويه معزوله ومظلمه من البيت لام جسمه الصغير وقاعد يبكي و على صوت شهقاته اقتربت وهي تتبع مصدر الصوت شافت حالته دموعه مغطيه وجهه وماسك لعبته يدور فيها الانس لكن صامته مثل الناس الي حوله مثل احساس الامومه الي كانت بغيبوبه ومات رثت لحاله وحال ابوه وحال امه وعزت هالبيت على البرود الي يخيم بزواياه قربت بحذر وخوف انه ينفر منها جلست عنده وعيونها تراقب طفولته الجريحه
.. ريان حبيبي ليش تبكي
حط اللعبه على وجهه يحاول يخفي دموعه قربت منه ومسحت على كتفه ..انت رجال والرجال مايصير يبكي صح
نزل اللعبه عن وجهه .. ماما قالت لي اطلع برى وبابا راح وخلاني
شهقاته الصغيره نغزت قلبها سحبت كفه وقفته .. انت خايف ؟؟
هز راسه يخفي خجله طفل بعمره يستوعب ان الخوف عيب ولكن مايستوعب الشجاعه الي يتسلح فيها ضد قسوة الايام ويحارب فيها شعور اليتم وامه عايشه .. تعالي حبيبي لاتخاف انا بلعب معك بغرفتك ماراح اخليك
صار يتبع يدها الي تسحبه لين لقى نفسه يستقر بحضنها حس بدفئ ماحسه بحضن الانسانه الي ينقال عنها امه حس بالامان الي يغيب مع غياب ابوه من البيت استكان ليدها الي تمسح ظهره بحنان وحس نفسه ارتفع عن الارض وهي تشيل كيانه الغض الي تعود على صلابة الايام مشت فيه لين وصلت غرفته نزلت وبدا معها بشي من الامان ........
........................
رجعوا للبيت بوقت متاخر رجعت نوف لحياتها برجعة ناصر البيت كان هادي الامن صوت ناصر الي عليه الكلام وترك الاستماع والاستمتاع لنوف وصلت عند باب غرفتها وهو تعمد انها يتقدم كم خطوه للغرفه الي يسكن فيها .. تصبحين على خير
ناظرت له بتعجب .. وانت بخير " ناصر
اعتقد انها راح تتكلم وتقول له .. نعم
نزلت راسها تلعب بطرف شيلتها .. مااعتقد في سبب يخليك تنام بمكان ثاني
حط يده بجيب بنطلونه وهو يتامل حمرة خدودها وشفايفها الي ترتجف عرف انها تمردت على خجلها وقررت تعطيه الاذن رفع عيونه يتذكر كلمه قالت بيوم وماغابت عن باله .. المكان الي انت فيه يخنقني "ماكان هذا كلامك
نزلت راسها وحست انها احرجت نفسها .. على اساس انا نسينا الماضي والكلمه الي قلتها وجرحتك سبقها فعل ذبحني
.. نسيته يانوف نسيته وكلام بهالموضوع مانبي نعيده
رفعت راسها بشموخ .. انا كنت واضحه معك في كل شي واليوم انا قلبي قرر ينسى ويطوي هالصفحه ويرميها ببحر ماله نهايه
.. نوف انا آسف خلاص نرمي كل شي ونبدا من جديد
ابتسمت وتركت الكلام ودخلت غرفتها ودخل وراها
..................................................
ماكنتشيوشلونازعل لفرقاك ـــــــــ
ماكنت شي وشلون ازعل لفرقاك
عادي وجودك كان وان
رحت عادي جايز
اكون اول تعاطفت وياك
لكن في بالي تركك وكادي
لاتنفعل لاتثور لاتبرر اخطاك
ماينفع الغرقان مد الايادي
جلس بالصاله يتفرج على التلفزيون بعيونه بس بينما قلبه وعقله بمكان ثاني نزلت مها وهي تخطط لشي براسها .. مساء الخير
تنبه لوجودها ونزل الرموت من يده واستعدل بعد ماكان متكي .. مساء النور " وينك ماعاد تبينين
ابتسمت.. موجوده بس سهر بالليل ونوم بالنهار وانت تطلع من الصباح مااشوفك وتنام بدري
اشر لها عالمكان جنبه .. تعالي اجلسي
جلست جنبه وبدت بسرعه بالكلام .. نايف لو سمحت اليوم بروح لبيت خالي
ضيق عيونه وده يفتح لموضوع وتطلب نيابه عنها لكن للاسف خذلته بقصد منها .. لازام اليوم!!
هزت راسها .. أي لازام كلهم مجتمعين يستنوني اجيهم وتعرف لي مده هنا مارحت لهم ويمكن انام هناك
... خلاص اوديك بس نوم هناك مافي
اعترضت .. ليش تكفى نايف
رفع يده باصرار عليها .. نوم مافي واوعدك اوديك لهم مره ثانيه >> ماكان معترض على نومتها لانه يخاف عليها هناك لكن لانه مايبي ساره تجلس لحاله مايقدر يقرب منها وبهالمكان مالها الامها
.. خلاص انا بروح اتجهز >> واستدارت تركض
..مـــــــــــــــها >> بعد برهه من التفكير لحق عليها قبل توصل لفوق
مسكت الدربزين بيدها والتفت له .. سم
وقف مشى لها وماعرف كيف يبدا رفع نظره فوق يأشر بنظره .. تخلينها لحالها
عظت شفتها تخفي ابتسامتها وقلبها يصفق للانتصار طلعت الين منها يانايف .. لا ليش لحالها انت موجود واكيد ماراح تطلع
افحمته بالكلام واجبرته يظهر الي يخفيه .. اااا سمعت ان ببيت اختها عزيمه اليوم اسئليها ماتبي تروح
وصلت قمتها من التطور الي تشوفه وعرفت انه سمع الكلام وهنت نفسها لآن الحظ اسعف وخلاه يسمعها .. وش دراك هي قالت لك
بسرعه رد ينفي استفهاممها ..لألألألألأ بس ااااا انا سمعتها تقول لك
.. طيب يعني وش المطلوب مني
.. اا قولي لها اني بوديها
رفعت يديها تصطنع الانهزام .. انا ماقول لها شوفها فوق انت كلمها " وبعدين اظن انك سمعتها وش قالت
تنهد وهز راسه وغمض عيونه .. سمعت
.. اجل اعفني من المهمه ساره انا ماقدر على لسانها انت تفاهم معها
.. خلاص بسرعه تجهزي
طارت من عنده لفوق فرحانه بانتصارها والخطوه الي تقدمت من نايف عقبال ماتبادر ساره
.................................................. ......
الضيقه اللي ماله جتني ××××حسبي عليها بهذلتني وانا اشوف
مثل عادته اول مكان يمره بالبيت غرفة لطيفه كانت مظلمه وقف عند سريرها ومن الضو الي تسلل من الباب لاحظ انها نايمه
تركها وطلع متوجه لغرفة ريان قبل يطلع لهدى فتح بابه شوي شوي استغرب وهو نايم وهدى جنبه وتحط يدها على شفايفها علامه انه مايصدر صوت يزعجه قامت وغطته وطلعت وعبدالله يتبعها .. وش فيه ؟؟
.. ليش ياعبدالله تتركه وهو محتاجك تكون جنبه
من سؤالها رد بنفسه على نفسه بسؤال " وين امه وش الي اشغلها عنه وش الي خلاه تهمله للوحده وتخليه يدور الدفا بحض غيرها يمكن هدى اليوم ترحمه لكن بكره من يدري .. انا تركته بالبيت عند امه
ماحبت تخوض وتتكلم تلومها او تبرر لها اكتفت بالصمت على كل شي .. عبدالله ودي اطلب منك طلب
.. خير امري
.. اليوم خالتي مسويه عشا لرجعت ولدها وودي اروح
رفع حواجبه دلاله على عدم الاعتراض .. خلاص ان شالله اوديك
...............................................
اكتب وحرفي تاه في صـدر معنـاي
والقـاف حبـره دمـع قلبـي المعنـى
والصمت يخفي نبرة الجرح بالناي
صـوتـه حـزيـن ونغمـتـه تمتحـنـى
والليل ماردد صدى صـوت مغنـاي
يومن خنقه الدمـع والصمـت غنـى
ركضت لغرفة ساره تنهي معها الي بدته مع نايف كانت تغير ملابس متعب باغتتها بكلمتها .. ساره انا رايحه تبين شي
بسرعه رفعت عينها وانغز قلبها يمكن خوف ان مها تروح وتتركها لحالها سئلتها بسرعه .. ويــــــــــن
.. بروح لبيت خالي توصين على شي قبل اروح
حست برجفه داخلها خيم عليها شعور بقلت الامان .. وتخليني لحالي
.. بالبيت ومعك نايف وتقولين لحالي
.. مها الله يخليك هالبيت يخنقني لاتتركيني فيه وتروحين >> تحس دموعها تلمع بعيونها وهي تمنعها من النزول
.. ساره وش فيك كل هذا لاني بطلع من البيت انا ماراح اقعد هنا العمر كله
رجعت لشغلها ونزلت تلبس ولدها .. خلاص براحتك
حست انها زعلت او انها متضايقه حطت يدها على كتفها .. طيب روحي لبيت اختك غيري جو
زفرت بحراره تخرج شي من الي يملا صدرها وهزت راسها .. ماراح اروح
.. ياساره حرام الي تسوينه حتى نايف ماعنده مانع انه يوديك
فتحت عيونها بغضب اشياء كثيره تكالبت عليها كلها مالها اسم .. يعني قلتي له
من الشر الي شافته بعيونها خافت تتهور ساره وتسوي شي يلخبط الدنيا .. لا ماقلت له بس هو بالصدفه سمعك
.. مها قولي له ماراح اروح وانتي روحي الله معك
تخاذلات من عنادها مستعده تحطم نفسها مقابل انها ماتحسسه انها راح تنصاع له بيوم من الايام تركتها مها باحزانها لضياعها
.................................................. ...
تدور بالبيت بنشاط وتستعد لاستقبال الضيوف كانت راحة بالها وفرحتها منعكسه على وجهها تجاوزت مدة العذاب الي حكمت على نفسها فيها" انهت كل شي ومابقى الا يوصلون الناس رمت نفسها على الكرسي طلعت ام ناصر من غرفتها وقبل توصلها سبقتها ابتسامه منظر افرحها..ماشا الله وش هالزين هذي نوف ولا انا غلطانه
احرجتها ام ناصر بتلميحتها الواضحه .. تسلمين ياخاله " يعني انا ماني حلوه !!
.. حشى من قال يابنيتي بس مثل مايقولون الوجه مراية القلب واذا زان القلب وارتاح زان الوجه
رفعت نظرها فوق بابتهال .. الحمدلله
اخذت ام ناصر تهلي وترحب كانها اول مره تشوفه لكن كان قلبها يقود لسانها ويسخره يدعي ويرحب .. هلا والله حيالله الغالي
قرب منها ونزل على راسها وحبه .. هلابك يمه يعني لازام هالحفله كل ماشفتيني
..ماني مصدقه انك قدام عيوني الله لايحرمني شوفتك
.. الله يخليك لي
غمزة بعينها قبل تتكلم .. اقول ناصر نوف ماشالله صايره حلوه اليوم انت وش مسوي لها
التفت لها وهي جالسه وجهها تغيرلونه .. مافي شي جديد هي قمر من الاول
.. صح بس اليوم وجهها منوررر ماشالله
ذابت بملابسها وماعادت تقدر تجلس ام ناصر ثقلت العيار وناصر مبسوط ومنتشي بكلام امه وردة فعل نوف .. انا بروح للمطبح اصلح القهوه >> وراحت من قدامهم تتسابق خطواتها
ضحك عليها وعلى نظرات الانتصار بعيون امه .. وانا بروح لابوي قبل تستلميني
.................................................. ...........
ياوين أأبرمي هالجسد فيه وارتاح ....
لاصار حتى .. البوح مافيه راحه
الالم بدا يشتد من راحت مها كان يهاجمها ويخف لكن اليوم يزيد ويزيد وماعاد تقدر تتحمله بيدها ظغطت على خصرها لعلها تروضه او تخنقه قبل يذبحها انخنقت من الغرفه ماعادت توسع الي تحس فيه تشعر ان روحها خلاص بتتخلى عنها تسللت دموع ماقدرت تسكن بعيونها خلاص قامت تجاهد وجعها مافي بالبيت الاالشغاله فكرت تستنجد بنوف ماحد راح يحس فيها الانوف لكن تذكرت العزيمه فـ بيتهم اليوم رفضت الفكره و صكت اسنانها وزمت شفتها بقوه وطلعت من الغرفه وصلت لنص الممر وقبل تنزل التوا كل جسمها من النغزه الي هجمت عليها احساس بالاغماء خيم عليها وجلست بالارض
طول ماهو بالطريق مع مها كانت تلمح ان فيها شي وهو يمثل عدم الاهتمام لكن حتى هو ملاحظ رفضها انها تروح لبيت نوف ضايقه مايدري ليش كان وده انها تروح وصل للبيت وجلس بالصاله نادا الشغاله تجهز له قهوه وقام يغير ملابسه قبل ينهي العتبات بين له المنظر كانت بوضع يشبه السجود راسها على ركبها ويديها ماكانت بانيه لانها لافتها على جنبها وشعرها على الارض تجاوز الدرج بسرعه لين وصل لها مافكر يكلمها او ينبها زي العاده على طول جلس عندهاو مسك كتفها الي يرتجف وحرارة جسمها الي تعدت ملابسها
وهي منزله راسها حست بيد لامستها او ترغمها على رفع نفسها حمدت ربها ان الشغاله وصلت يمكن تقدر تساعدها رفعت راسها ببطئ وشهقت ودارت وجهها ماتبيه شوف اثر الدموع ويحس انها تتالم وحاولت توقف لكن منعها وهو يضغط على كتفها .. وش فيك ؟؟
قعدت تلهث وتلهث تسابق النفس ومع انافسها كان راسها يتحرك .. مافيني شي
اجزم انها ما في امل تشكي او تقول .. يابنت الناس ترى بتذبحين نفسك بهالعناد قومي معي خليني اوديك المستشفى
للاسف ماتخلت عن الي براسها ومصره تعانده .. قلت لك مافيني شي وماني رايحه للمستشفى
هالمره ضرب بكلامها عرض الحايط وقام متوجه لغرفتها وسحب عباتها من الشماعه ورجع لها بخطوات سريعه وثابته رمى عليها العبايه .. يالله قومي
رفعت يدها بوجهه .. انت ماتفهم قلت لك ماني رايحه
رفعها عن الارض .. ماهو على كيفك >> ولفها بعباتها .. تمشين على رجولك ولا اشيلك
.. انت وش تب مني ماني رايحه ماني رايحه
.. قلت لك امشي احسن لك لاتخليني اتعامل معك بشكل ثاني
اخذت نفس وحاولت تكلمه بشي من الهدؤ او تتحايل عليه .. خلاص الالم خف وبعدين ماقدر اخلي متعب مع الشغاله ومها طالعه
مط شفته وهز راسها .. شايفتني غبي و تحسبيني صدقتك امشي لااسحبك ومتعب مالك شغل فيه
وفعلا مثل ماقال سحبها من يدها غصبا عنها وهي من سحبه وحركت جسمها على الدرج صار الالم يزيد افلتت يدها من يده واستسلمت .. اااااخ خلاص انا امشي اتركني بس
بسرعه ارخا يديه وهو يتابعها تمشي شوي شوي وتصد بوجهها عن نظراته الي اكلتها حس ان وقفته غلط .. انا برى بالسياره >> وطلع وصى الشغاله على متعب وطلع وطلع ينتظرها برى
|
10-05-11, 11:19 PM
جديد مواضيع قسم القصص المكتمله
العرض العادي
