كاتب الموضوع :
جرحها كايد
المنتدى :
القصص المكتمله
من سكرت رحيل التليفون و هي للحين شارده...جالسه على الأرض...و حاطه راسها بين يديها...و سارح بأفكارها...
قربت منها جدتها اللي كانت طالعه من المطبخ...و هي مستغربه حالتها...جلست جنبها...
أم ساره= يمه رحيل..وش فيك؟
رحيل= حياة دقت
سكتت ما احتاجت تتكلم...لأنه معروف وش قالت...و واضح رأيها و شعورها اتجاه اللي بيصير...
أم ساره= ما عليك...تثور لها أيام و تهدى...تعرفين حياة ما تطيق طاري الزواج و الرجال...و لا راح تفهم اللي قلته لك
رحيل= بس يمه أنا خايفه عليها تتضايق أو تتعب
أم ساره= لا تخافين حياة أقوى من اللي تتخيلينه
••-------•?••?•{N}•?••?•--------••
•• مــن بـكـــره ••
جلس أبوأحمد ساكت للحظات...من ربع ساعه وصل لبيت أخته أم سعود...يبي يقول لها عن اللي صار...
كان جالس معها و سعود و وداد...طالعها بنظرات فهمتها على طول...
أم سعود= وداد روحي شوفي الخدامه وش سوت بالعشاء
طلعت من المجلس...لكنها كانت حاسه إن أمها تصرفها...وقفت بفضول ورى الباب تسمع وش بيقول خالها...
أم سعود= خير يا اخوي؟ شكلك يقول فيه شي؟
أبوأحمد= اليوم اتصلت علي أم ساره و طلبت مني اروح لهم لأنها تبيني بشي يخص رحيل
أم سعود بإهتمام= وش هالشي؟
أبوأحمد= رحيل تقدم لها واحد و وافقت
شهق سعود بصدمه...لكن ارتاح إنهم ما انتبهوا له...لأن خاله كان مهتم بأمه اللي صدمها الخبر...
أم سعود= وافقت! غريب ياما تقدم لها كثير و رفضت..حتى كانت تثور فينا أول ما نفتح لها الموضوع
سعود سأل عن اللي حيره= مين اللي متقدم لها؟
أبوأحمد بضيق= هذا اللي أنا مو مرتاح له..اللي متقدم لها رجل أعمال كبير الكل يعرفه في السوق اسمه يهز الكل..و الغريب يبون الزواج الخميس الجاي و ماراح يسوون أي حفله
أم سعود بإستغراب= و من وين عرفها هالتاجر؟
أبوأحمد= أبومشعل رجل خالتها يشتغل عنده
أم سعود= و ليه واحد مثله يترك كل اللي بمستواه و يفكر بوحده بحالة رحيل؟
أبوأحمد= هذا اللي محيرني..و الأكثر ليه الزواج بهالسرعه؟ و ليه ما يبون يسوون حفله؟
أم سعود= ما سألت رحيل؟
أبوأحمد= يعني ما تعرفينها؟ قالت إنها موافقه و إنها ما تبي مني غير أوافق بما إني ولي أمرها....و...و قالت إني لو ما وافقت بأكون مابي لها الخير و من هالكلام
سعود بقهر= خالي أنت ناوي توافق؟
أبوأحمد يطالع أخته= والله مادري؟
أم سعود= وافق يا أبوأحمد..دامك تقول الرجل سمعته زينه في السوق..دام هي وافقت أكيد راضيه على شي فيه..و الأكيد عشان فلوسه..يا أخوي أنت تعرف رحيل و حالتها و تذكر كيف عاشت بيننا وش سوت فينا..يعني لو أنت رفضت هذا مين اللي هي بتقبل فيه؟ مين بيتحملها؟ ولو صار شي لاسمح الله لجدتها و رجعت لنا..بترجع من جديد تنكد عليكم عيشتكم..خلها تروح في نصيبها و إن شاء الله ربي ييسر أمرها معه
بان الإقتناع على ملامح خاله...و أمه تناقشه أكثر في هالزواج...وهو كان بيعترض...لكن مايدري ليه الإعتراض مات قبل ينطق بحرف...خاف من إهتمامه يتفسر خطأ...هو نفسه مو عارف ليه هالإهتمام...غيره و حب...أو حميه لقريبته و بس...
كل اللي يعرفه إن هالموضوع سبب له الكدر و الضيق...
••
••
••
دقت وداد على مها...بعد صدمتها باللي سمعته...تبي تتأكد لو كان عندها فكره عن هالعريس اللي يقوله خالها...
مها= أهلين
وداد= هلا مهوي..وش أخبارك؟
مها= تمام..و أنتي؟
وداد= تمام..تدرين إن خالي عندنا؟
مها= والله؟ أنا سمعت إنه بيروح لرحيل عند جدتها
وداد= ايه راح و بعدها جاء عندنا
مها بقلق= وداد فيه شي؟
وداد= ايه..بأقولك بس لا تقولين لأحد..لأن ما أحد يعرف إني تسمعت عليهم
مها= وش فيه؟؟
وداد= رحيل انخطبت و وافقت..و اللي خطبها رجل أعمال كبير...تتخيلين؟
مها بإستغراب= رحيل؟!
وداد= ايه..رجل خالتها يشتغل عنده..أموت و أعرف ليه خطبها؟ تتوقعينه شافها و اعجبته؟ بس كيف يشوفها؟ و وين؟
مها= أبوي وش قال؟
وداد= يقول انهم ما قالوا له شي..بس يبون موافقته بما إنه ولي أمرها
مها= و أبوي بيوافق؟
وداد= اتوقع..أمي اقنعته
كانت وداد تقولها عن اللي سمعته...لكن مها سرحت بأفكارها...ما يهمها رحيل تاخذ مين...غني أو فقير...أو حتى ليه وافقت...و كيف عرفها...كل اللي يهمها إنها أبعدت عن حياتهم...و عن سعود...
••-------•?••?•{N}•?••?•--------••
وصلت رجوى للبيت...و فتحت لها الباب بسمه...
بسمه= رجوووى شوفي فيصل ضربني
رجوى تشيل غطاها= تستاهلين
بسمه بخيبة أمل= ليه؟
رجوى= هههه كيفي كذا..براسي ازعل على أحد اليوم..و طلعتي بوجهي
بسمه= لا ازعلي على شهد..شوفيها تغدت و نامت ما انتظرتك
رجوى تطلع معها على الدرج= لا لا أكيد مو صاحيه..فوتت مسلسل الظهر اللي تتابعه!
بسمه تضحك= أمس الحلقه الأخيره
دخلت رجوى و شافتهم في الصاله...ما عدا أبوها اللي ما يرجع من شغله إلا في الليل...و أحيانا يروح عند أصدقائه و ما يرجع إلا و هم نايمين...
رمت نفسها على الأرض...
رجوى= عطونا بلعتنا
قمر= روحي بدلي ملابسك
رجوى= مـــــــابي..جوعانه ما فيني حيل
قامت أم مشعل تجيب الغداء...و رجوى التفتت لمشعل اللي يتابع له فلم في التلفزيون...
رجوى= مشعل..مطفي ههههه والله المفروض اسمك الثاني مو الأول
مشعل= اللحين أنتي وش تبين مزعجتني؟
رجوى= أووو العفو منك أخ مشعل ما درينا إنك مشغول
مشعل= يقولون بنت خالتك بتتزوج مدير أبوي؟
رجوى بفخر= يس..وصلت خير..إذا بغيت أي خدمه حنا حاضرين..كان تبي تصك على أبوي بوظيفته و تسوي للمدير عصير و كابتشينو احسن من هالقهوه و الشاهي..يقالك تجديد...ترى عادي اكلم رحيل توظفك
مشعل طنشها= و ليه مو أنتي اللي تزوجتيه؟ على الأقل تنفعينا
رجوى= تهي تهي..والله كان ودي..يا أنا بأبيعكم بيعه..حتى اسمي بأغيره(و بغرور مبالغ فيه) و إذا شفتكم بأقول ياي وش هالأشكال؟ وش هالفقر! أنتم كيف عايشيين بهالمستوى الواتي
مشعل= تسوينها مو أنتي بنت أبوك
قمر بإعتراض= لاااا رجوى ما تتركنا لو ايش
رجوى تطالعها بإستخفاف= والله واثقه من نفسك! ادعي ربي ما يغنيني و إلا تشوفين الشوته اللي على مستوى هههه
••-------•?••?•{N}•?••?•--------••
وقف بسيارته متردد قدام البيت...مو عارف ليه جاء...وش بيقول...لكن من يوم سمع كلام خاله...و تأكد من موافقتهم...وهو يحس بغيض و قهر...
كيف يرمون وحده من دمهم لواحد مو عارفين عنه غير سمعته في شغله...و مو معروف ليه اختارها هي بالذات...و اللي يقهر أكثر بهالسرعه...و بدون حفلة زواج...
تنفس بقوه...و نزل من السياره...و راح قبل يتراجع يدق الجرس...وهو يتمنى إنها هي اللي تفتح له الباب...مو جدتها...
لحظات توتر مر فيها...قبل يسمع صوتها الجاف كعادته...
رحيل= مين؟
سعود بهدؤ= أنا سعود
سكتت رحيل للحظه...ما تدري ليه ما تفاجأت بجيته...كانت بينها و بين نفسها حاسه بهالشي بس ما تدري ليه...
من يوم وافقت...و كلمت عمها...و شي داخلها يسأل...وش بتكون ردة فعله هو...
كانت متأكده إن أهله ماراح يهتمون...و بيرتاحون منها بزواجها مهما كان...بس هو وش بتكون ردة فعله...
رحيل ببرود= نعم..فيه شي؟
حس سعود إن كلامها معه ما يشجع...بس دامه جاء لهنا...لازم يقول اللي عنده...
سعود= رحيل صدق اللي سمعته؟
رحيل= أكيد صدق..لدرجة إن أهلك وافقوا عليه بسرعه
مايدري إحساسه صح أو وهم...بس معقول تكون...عتبانه على هالموافقه...
سعود= رحيل ليه توافقين على هالزواج؟ وش يخلي واحد بمستوى ذاك..يترك معارفه كلهم و يرتبط بوحده أقل من مستواه..و بهالسرعه؟ و بدون حفله؟ أكيد فيه عيب..أكيد فيه شي
رحيل= و ليه هالإهتمام؟ ليه ما تسوي مثل أهلك توافق و تبارك وبس
سكت سعود مو عارف بإيش يرد...لأنه هو نفسه للحين مو عارف السبب...
سعود برجاء= رحيل لا توافقين
رحيل= و إذا ما وافقت؟ بترتاح وقتها؟ ليه؟.....تبيني اعيش طول عمري هنا؟مع جدتي بعيد عنكم و عن العالم..أو تتمنى لي عريس احسن منه..يرضي ذوقك....أو وش بالضبط يا سعود؟؟
سعود بحيره= مادري؟ مادري؟ بس أنا مو مرتاح لهالزواج يا رحيل..لا تبيعين أهلك و ترضين بغريب
رحيل بسخريه= أهلي! أنا مو حاسه بهالشي..و لا راح احس..و لا هم حسسوني..أنا في هالدنيا عشت و بأعيش لحالي..كل اللي لي جدتي و بنات خالتي بس
سعود= بس.....
رحيل بتهور= بس وشو يا سعود؟ عندك شي تبي تقوله؟ عندك مستقبل ثاني غير اللي أنا شايفه نفسي فيه؟ عندك إستعداد تتحمل مسئوليتي؟؟
سكتت و هي منصدمه من اللي قالته...و سعود صدمته أكبر...وهو يحاول يفهم معنى كلامها...
ما توقع تكلمه بهالهدؤ...توقع تثور بوجهه و تقول إن ماله حق يتدخل في حياتها...لكنها...لكنها...
تبي منه وعد اللحين...وعد يكون مسئول عنها...و يوقف بوجه أهله عشانها...لأنه متأكد إنها بتكون هي جهه و هم جهه...وعد إنه بيتحمل كل اللي بيجي منها...و عد لصبره على كل المشاكل اللي بتصير...
سكت و لا تكلم لدقايق...
رحيل= ردك وصل يا سعود..ماراح تضحي بأهلك عشاني...روح و انسى اللي قلته...خلني أدور على أماني بالطريقه اللي اشوفها صح..اتركوووني يا سعود..اتركووووني في حالي
سمع صوت خطواتها تبعد...لكنه ما تحرك من مكانه...و لا تحرك ساكن فيه...وهو يعيد كلامها...
••
••
••
دخلت لغرفتها تركض...و جلست على السرير ترتجف...ما تدري حزن أو قهر...صدمها اللي قالته له...اللي كانت تفكر فيه بدون شعور...
كرهت نفسها...و ضعفها...و اللحظه اللي فكرت فيها إنها تحتاج لأحد جنبها...
نزلت دمعه وحيده مسحتها بقهر...(ماراح اسامحك على هالدمع و القهر يا سعود)
••-------•?••?•{N}•?••?•--------••
كان جالس يطالع التلفزيون...و فكره مو معه...يطالع لينا اللي جالسه تتابع معه بصمت...
يبي يسألها عن حياة...كيف حالها...وش شعورها بخطبتها...وش اللي ناويه تسويه...
لكنه يمنع نفسه...مثل ما يمنع نفسه من التفكير فيها كل ما طرت في باله...(خلاص يا ياسر..مو اللحين عاد بتفكر فيها..البنت راحت في حالها..والله يوفقها)
التفت يطالع لينا اللي كانت شارده...و فجأه تحركت كأنها تذكرت شي...و أخذت جوالها و دقت...
لينا= هلا حيووته وش أخبارك؟
حياة= بخير
لينا= سلامات ليه غايبه اليوم؟
حياة= مالي خلق لشي..ضايقه فيني الدنيا يا لينا
خافت لينا و تبدلت ملامح وجهها...حياة مهما تكون تعبانه...او متضايقه...عمرها ما شكت...
دائما تبين لنفسها و للكل إنها بخير...
و ياسر خاف من تغير وجه لينا...
لينا= خير يا حياة وش فيك؟ صار شي بموضوع خطبتك؟
حياة= تصدقين ناسيه هالسالفه و ما فضيت اتصرف فيها
لينا بإستغراب= وش اللي مشغلك عن خطبتك؟
حياة بضيق= رحيل بتتزوج
لينا تبتسم= خوفتيني يا حياة..حلو إنها تتزوج مو تقولين مو مرتاحه عند عمها..أو هي مغصوبه على الزواج
حياة= يعني مغصوبه و مو مغصوبه
لينا= كيف يعني؟
حياة= جدتي اقنعتها توافق
لينا= و أنتي وش مضايقك إذا رحيل راضيه..و جدتك راضيه..اكيد جدتك تبي لها الخير
حياة بشرود= مادري! مو مرتاحه لزواجها..مع إني واثقه من قوة رحيل و إنها ماراح يهمها شي..لكن بعد مو مرتاحه
لينا= حياة يا عمري مو عشانك رافضه فكرة الزواج توقفين بوجهها..ما تدرين يمكن الزواج احسن لها و يريحها..كافي تلقى أحد يتحمل مسئوليتها..و تعتمد عليه
حياة فكرت بقهر...(تعتمد عليه! هذا اللي مستكثر عليها وقته..و مشاعره..هذا اللي يشري و يبيع بالناس بس عشان راحته هو و أهله..والله إنك طيبه يا لينا)
لكنها ما قالت للينا عن شروط هالزواج...عشان ما ترخص رحيل بعيون أحد...
لينا= حياة وين رحتي؟
حياة= لا معك يا قلبي بس اسمع أم فايز تناديني..اشوفك بكره و سلمي على خالتي و عاليه
لينا= يبلغ
سكرت و هي تتنهد..
كان ياسر بيقوم...عشان ما يسأل عن أي شي يخصها يخليه يفكر فيها أكثر...
لكن لينا سبقته بالكلام...كانت تتكلم معه بكل شي يضايقها...مثل ما تتكلم مع عاليه...لأنه من صغرهم تعودوا عليه دائما معهم بمشاكلهم...
لينا= الحمدلله اللي زواج بنت خالتها اشغلها عن اللي بتسويه
ياسر= و هي وش كانت بتسوي؟
لينا= مادري..ما قالت و اليوم كانت غايبه و خفت عليها..بس طلعت متضايقه عشان بنت خالتها....تدري وش الغريب في حياة؟
ياسر= وشو؟
لينا= اللي تمر فيه حياة نفسها من مشاكل يخليها أعند و اقوى..لكن اللي تسمعه صار في غيرها يضايقها و يتعبها..شوف خطبتها مع إني متأكده إنها رافضتها و بتسوي أي شي عشان تتخلص منها إلا إنها داومت من بكره بكل برود..لكن زواج بنت خالتها خلاها تغيب و صوتها يبين فيه التعب و الضيق
تنهد ياسر و رجع يشغل نفسه بالتلفزيون...عشان تتسكر هالمناقشه عن حياة...و عشان ينسى...
لكنه كان متأكد إن اي شي بيصير لها...بيسمع عنه في هالبيت من لينا...اللي تتكلم عنها بكل شي قدامه...لأنها للحين تعتبرها أخت لهم...(و أنا المفروض إني افكر بهالشي بعد..حياة ماضي حلو..مابي اشوهه بمشاعر ثانيه ماراح تلقى لها أي قبول عندها)
••-------•?••?•{N}•?••?•--------••
جلست رجوى في السطح على البساط اللي فارشينه...تاكل بتلذذ الحلا اللي قدامها...و قمر تصب لها القهوه...هي و شهد اللي جالسه معهم...
قمر= وش رأيك رجوى بحركاتي؟ خبيت هالحلا من يوم ارسلته أم هيثم و خليته بس لنا للسهره
رجوى= زين ما فعلتي..ما تشوفيني منشكحه آخر إنشكاح..لو اكلناه مع اخوانك كان ما لحقتي إلا على قطعه منه
شهد تدخل عرض= اللحين صدق بنت خالتك بتتزوج مدير أبوي؟
رجوى= هههه خربت أحلامك..و تخطيطاتك عليه.....يله اقولها تتوسط لك عنده يزوجك رئيس الأرشيف..هاا لا تقولين ما أحبك
شهد= بس ليه يبي يتزوج بهالشروط؟ يمكن عاجز!
رجوى= والله كل خواتي خبره! لا تطمني ما سمعتي أبوي وهو يقول(تقلد صوته) ما يبي العرس مشغول بمقابل هالشركات اللي يبي لها جيش يقابلها....مع إني أشك إن بعد هالكلمه تلقينه بكره على الحديده..أو يمكن حتى الحديده تذوب من عين أبوك
قمر= الله رجوى بنزور رحيل لا تزوجت..أبي اشوف ناس أغنياء
رجوى تقلد حماسها= ايه يا سلام..تدرين يقولون ان لونهم ذهبي..وش فيهم يعني ناس مثل هالناس
قمر بسخريه= اللي يدري يدري
••-------•?••?•{N}•?••?•--------••
في سيارته...كان واقف ما يدري وين...لكن من يوم ما تركها و الأفكار تدور في راسه...لين حس إنه مو قادر يركز في طريقه و وقف...حس بضيق...و لوم...
رحيل بغرورها...و كبريائها...و عزلتها...طلبت منه يكون لها عون...يشاركها هالهموم و الوحده...يحسسها بالأمان...و الحب...و الإهتمام...
وهو بكل بساطه خذلها...حس إنه جبان...حس إن خيب أملها الوحيد...(بس كيف أوقف معك...و خصيمك هم أهلي..أمي و خواتي..و أهلي؟ كيف اوقف بوجههم و اقولهم أنتم خطأ و هي صح؟ ولو حاولت اقنعهم يقربون منك..أنتي وش يقنعك فيهم؟ ماراح تصدقين أي شي منهم..تبيني لحالي..بس أنا ما أقدر انفصل عنهم)
••-------•?••?•{N}•?••?•--------••
•• بـعـــد أسـبـــوع /يـوم الخميـس••
كانت في سريرها...حست في الصبح أول ما طلع...حست بحياة و رجوى و هم يصحون و يطلعون عنها...لكنها ما تحركت و الكل يحسبها نايمه...بس هي كانت خايفه تصحى...خايفه تتحرك و يصير هاليوم باللي فيه حقيقه...
من أسبوع تفكر بهالتغييير الغير متوقع بحياتها و لا تستوعب الأمر...تفكر كيف تترك بيت جدتها بهالسهوله و هي اللي ياما حلمت تعيش فيه...
لكن خطر في بالها شي أول مره تفكر فيه...زوجها...هالإنسان اللي تكرهه قبل ما تشوفه...اللي شراها بفلوسه...
كيف بتواجهه...كيف بيشوفها...كيف بتكون حياتهم مع بعض...كيف المفروض تتعامل معه...(إذا كان ما يبيني أنا بعد ما أبيه..بس ماراح اسمح له يتحكم فيني أو يتدخل بحياتي..إن كان مسوي فيها قوي و مستغني أنا بعد بأكون اقوى منها و مستغنيه عنه..و بكذا اعيش مرتاحه)
و هالكلام خلى فكره تطري عليها...(صح ماراح أكون انقص منه بأي شي)
قامت من سريرها و طلعت للصاله...و شافت حياة...و رجوى...
رجوى= كللللوش صباح الخير يا عروس
حياة تطالعها بقهر= للحين ما صارت عروس
رجوى= اعوذبالله من لسانك..إن شاء الله بتصير عروس و أحلى عروس بعد
حياة تطالع رحيل= رحيل وش فيك؟
رجوى= صح ليش ساكته؟
حياة= و أنتي عطيتيها فرصه تتكلم
رجوى= مادري مين اللي توها تدعي عليها ما تتزوج
حياة بأمل= صح رحيل لا يكون تراجعتي و ما تبين تتزوجين..ترى يمديك
رجوى= والله إنك خرابة بيوت
رحيل= ممكن تسكتون عشان أقول اللي أبي
رجوى تسد فمها= ........
حياة= قولي
رحيل تجلس عندها...و تعطيها بطاقة الصراف...اللي حطت فيها مهرها...
رجوى تشهق= لااااا رحيل غلطانه أنا الفقيره مو حياة..الظاهر من نتايج العرس صرتي حولا
حياة= اسكتي أنتي..رحيل وش اسوي فيها؟
رحيل= أنا ما أحب اروح السوق..و أصلا ما أعرف اتسوق و اليوم خاصه مالي خلق لشي..أبيك تتسوقين لي فيها كل شي
حياة= تبين جهاز؟
رجوى بإستغراب= بدري!
رحيل تطالع حياة= ما يمديك؟
حياة= يمدي أجيب لك بعض الأشياء..و بعدين نكمل..بس وش غير رأيك؟ طول عمرك رافضه تتزينين بأي مناسبه
رحيل= مابي يشوفني اقل منه بأي شي..لا هو و لا أهله
و راح اليوم كله و هم في السوق...و رحيل جالسه عند جدتها...ما فارقتها و لا لحظه...لأنها كانت تخاف كل ما تفكر إنها اليوم ماراح تنام عندها...
و جت اللحظه اللي بتروح فيها رحيل مع أبومشعل و رجوى لأنهم بيوصلونها لشقتها...لأن زوجها عنده إجتماع و ما كلف على نفسه يلغيه عشان يآخذ عروسه...و عطى أبومشعل الأمر إنه يوصلها لللشقه...
سلمت على جدتها...و طلعت مع رجوى و ابوها...اللي وصلوها بس للباب الشقه و تركوها...
••
••
••
أول ما وصلت رجوى للبيت دقت على حياة...
حياة تشهق= رجوى! ليه في بيتكم؟ ماراح ترجعين عندنا؟
رجوى= أبوي ما رضى..بيسافر اليوم مع واحد مادري وش اسمه؟ نسيت هو يا أبوطلال أو أبوبلال أو أبوهلال أو أبوجلال هههه
حياة بملل= المهم?
رجوى تضحك= المهم يبيني أصير في البيت
حياة تتنهد= حتى أنتي بتتركيني لحالي؟
رجوى بإستهبال= حياة لا تخليني اقحص و أجيك
حياة تبتسم= وش أخبارها رحيل؟
رجوى= ما تكلمت من يوم ركبنا..و أبوي ما رضى ادخل معها للشقه..تخيلي تركناها على الباب و رحنا
حياة بقهر= أبوك هذا ما يجي منه إلا الشر..حسبي الله عليه
رجوى= بس تدرين المبنى اللي فيه الشقه فخـــم مررره..و حتى اللي شفته من الشقه يهبل..حسيت اننا غلط في ذاك المكان(تضحك) و كله و إلا سيارة أبوي جنب السيارات اللي هناك..و الله شكلها يكسر الخاطر بغيت اصيح
حياة= والله إنك رايقه..يله تصبحين على خير
رجوى= و أنتي بخير..نامي و لا تفكرين كثير..عادي القهر ما يطير تقومين الصبح تلقينه جالس على رأسك و يقول يله استلميني
••-------•?••?•{N}•?••?•--------••
كان للحين يدور في سيارته...ما يدري ليه هالضيق اللي بصدره...ما كان يبي يرجع للبيت لين ينامون خواته...و أمه...
مل من الموضوع اللي لهم يومين يتكلمون فيه...
رحيل...و زواج رحيل...و زوج رحيل...(و أنا ليه مقهور؟ الله يوفقها)
بس هو من ذاك اليوم اللي خذلها فيه...يحس بضيق...
ما يدري ندم...أو إحساس بالذنب...يحس لو تعذبت بهالزواج...بيكون هو السبب...هو اللي رماها بعيد عنه...و عنهم...و دور على راحته و بس...هو اللي ما كلف على نفسه يحاول يقربها منهم...يحاول يفهمها إنهم أهلها مهما صار...(اعذريني يارحيل..اعذريني)
••-------•?••?•{N}•?••?•--------••
|
10-05-11, 03:13 AM
جديد مواضيع قسم القصص المكتمله
العرض العادي
